གངས་ཅན་འགྲོ་བ་ཡོངས་ཀྱི་འདྲེན་པ་༸གོང་ས་བདུན་པ་བསྐལ་བཟང་རྒྱ་མཚོའི་ཞབས་སུ་ཞུ་ཡིག་ཕུལ་བ་ངང་པའི་བུ་མོའི་གླུ་དབྱངས།
༈ གངས་ཅན་འགྲོ་བ་ཡོངས་ཀྱི་འདྲེན་པ་༸གོང་ས་བདུན་པ་བསྐལ་བཟང་རྒྱ་མཚོའི་ཞབས་སུ་ཞུ་ཡིག་ཕུལ་བ་ངང་པའི་བུ་མོའི་གླུ་དབྱངས་ཞེས་བྱ་བ་བཞུགས་སོ། །
ཨོཾ་སྭཱསྟི། བསྐལ་བཟང་འགྲོ་བ་ཡོངས་ཀྱི་མགོན། །རྒྱལ་བ་རྒྱ་མཚོའི་ངོ་བོ་ཉིད། །གངས་ཅན་སྐྱེ་དགུའི་གཙུག་གི་རྒྱན། །བླ་མ་ཆེན་པོའི་ཞབས་སྟེགས་ངོགས། །ཀུན་བཟང་རྒྱལ་བའི་རིང་ལུགས་གང་། །དྲི་མེད་འཛིན་པ་རྡོ་རྗེ་ཡིས། །རྣལ་འབྱོར་སྙིང་པོ་གཞོལ་འདུན་ཅན། །ཕྲན་དེའི་དད་པའི་ཞུ་ཡིག་སོ། །སྭ་སྟི། ལྷ་མི་བློ་ལྡན་བགྲང་ཡསགཙུག་ན་མངོན་པར་མཆོག་ཏུ་འཕགས་པ་བཟང་པོ་ཉིད། །བསྐལ་བཟང་འགྲོ་བའི་འདྲེན་པར་ཐུབ་དབང་ཉིད་མཚུངས་ངུར་སྨྲིག་གར་གྱི་རྣམ་རོལ་བ། །རྒྱ་མཚོའི་གོས་ལ་འཁོད་ཀུན་ཐར་པ་མཆོག་ལ་དཀྲི་བྱེད་ཡོངས་ཀྱི་འདྲེན་པ་ཡི། །སྲིད་འདིར་ཟླ་བྲལ་ཀུན་གཟིགས་ངོ་བོ་གང་གི་ཞབས་སྟེགས་ཆུ་སྐྱེས་ག་ལ་བར། །ཕྲན་བུ་གངས་ལྡན་འཆར་ཕྱོགས་སྐྱེས་བུ་ཀུན་སྤང་བར་རློམ་ཀུན་ཏུ་རྒྱུ། །པདྨ་ཀ་རས་རྗེས་བཟུང་ཐ་ཤས་གང་གི་རིང་ལུགས་འཛིན་བློ་ཅན། །འཁྲུལ་པའི་སྣང་བར་རབ་ཏུ་སྤྱོད་ཀྱང་རྣལ་འབྱོར་ཡེ་ཤེས་རྒྱ་ཡི་ཟོལ། །གྱི་ནར་གནས་དེའི་ལེན་བྱེད་འཁྲི་ཤིང་གསེར་སྒོར་ཚངས་པའི་སྐྱེ་གནས་ལྟར། །འདུད་དེ་ཆེས་ཆེར་གུས་པའི་ཡིད་ནི་རྒོད་མའི་ཁབ་ཉེ་བླངས་ལྡན་བཞིན། །ཤིན་ཏུ་དངས་པའི་བློ་ནི་འཇིག་རྟེན་སྒོང་ངར་སྐྱེད་དེ་བྷཻ་ཊའི་བཞིན། །སིམ་པ་ཆེན་པོའི་ཡོང་བསྐུལ་མགྲོན་སྦྱོར་མཆེ་ལས་སྐྱེས་ཀྱི་ཧ་ཏ་བཞིན། །སྙན་པར་བརྗོད་པའི་གཟུགས་གང་མཚུན་དབང་སྲིང་གི་མཆོག་གྱུར་རྒྱུད་མང་བཞིན། །གསོལ་བ་མགོན་ཁྱེད་བཟོད་མར་འོད་ཟེར་དཔལ་བརྩེགས་རྒྱལ་བར་ཡོངས་བརྙེས་ཀྱང་། །ཀུན་ཁྱབ་སྙིང་བརྩེའི་དམིགས་མེད་ཐུགས་རྗེར་ཡོངས་གོམས་སྒྱུ་འཕྲུལ་ཅིར་ཡང་སྣང་། །ཀུན་ནས་འདྲེན་མཛད་མཆོག་གྱུར་གྲུ་འཛིན་བདག་གི་པད་དཀར་འཆང་ཡང་བྱ། །སྣ་ཚོགས་དགེ་བའི་དཔལ་སྦྱིན་ལྷ་མིའི་བླ་མ་མཚུངས་པ་མི་མངའ་བ། །ཡོངས་ཀྱི་མགོན་པོར་གྱུར་ཀྱང་གངས་ཅན་འགྲོ་བའི་བདེ་སྐྱིད་ལྷག་པར་བསྐྱེད། །འཁོར་འདས་མཉམ་ཉིད་གཟིགས་ཀྱང་ལུང་རྟོགས་དམ་ཆོས་རིན་ཆེན་ལྷག་པར་སྤེལ། །རྒྱལ་བ་གཞན་ལས་ལྷག་པའི་ཐུགས་བསྐྱེད་ཐུགས་རྗེ་རྨད་བྱུང་མཆོག་མངའ་བས། །རྒྱལ་ཀུན་འཕྲིན་ལས་གཅིག་ཅར་གྲུབ་བྱེད་ཀུན་བཟང་ཇི་འདྲ་མཁྱེན་པ་ཅན། །སྙིགས་ལྔ་བདོ་བའི་དུས་འདི་ནམ་ཡང་བསྐལ་པ་རྫོགས་ལྡན་བཟང་པོ་ཡི། །དགའ་སྟོན་བདེ་ལེགས་མཆོག་གི་རྒྱ་མཚོ་ཀུན་ཏུ་འཕེལ་ཞིང་རྒྱས་མཛད་པ། །མཁྱེན་བརྩེ་ནུས་པ་ཕུལ་བྱུང་འགྲོ་ཀུན་མདྲེན་མཛད་སྙན་པའི་རྔ་བོ་ཆེ། །འོག་མིན་ཆེ་བར་ཡོངས་སྒྲོག་སྒྱུ་འཕྲུལ་ཆེན་མོའི་སྲས་ཀྱི་མཚུངས་ཟླར་ཉིད། །ངེས་པའི་དོན་དུ་བདུད་བཞིའི་དཔུང་ཚོགས་མ་ལུས་རྨེགས་མེད་འཇོམ་པ་ཡི། །དཔའ་བོ་དེ་ལགས་རང་སྣང་ལོངས་སྤྱོད་འཁོར་ལོར་གཞོམ་གཞིག་སྣང་མིན་ཡང་། །བདག་སོགས་གདུལ་བྱ་བློ་དམན་བྱིས་པའི་རྟོག་དྲས་བཅིངས་པ་འཕགས་མཆོག་རྣམས། །སྐྱེ་འཕོའི་ངང་ཚུལ་བརྟོན་པ་ལྟར་དུ་སྣང་བ་དེ་གང་གཞོམ་སླད་དུ། །གསོལ་བ་འདེབས་པ་འདི་ལྟ་ལགས་ཀྱི་མགོན་ཁྱེད་དགོངས་པས་ཡོངས་མ་དོར། །བདེ་བ་ཅན་གྱི་ཞིང་གི་བསྐལ་པའི་ཡུན་ཚད་ཇི་ཙམ་དེ་སྲིད་དུ། །ལག་ན་པདྨོའི་བདག་གིར་བཟུང་བ་རང་གི་གདུལ་བྱའི་ཞིང་གི་གཙོ། །མི་ཕྱེད་བཟོད་པ་ཅན་ཞེས་འཇིག་རྟེན་ཁམས་གྱུར་དེ་ཡི་མཆོག་གི་ས། །དྲག་པོས་ཡོངས་བཟུང་ཨེ་ཡི་ཆ་བྱད་སྭཪྞ་ས་དྲ་པཿཉེ་བར་བརྒྱན་པའི་འདིསཿ ཡུལ་གྱུར་དྲུག་གི་ཡོངས་བགོད་བ་ར་ཏ་ཡི་ཆ་གྱུར་ལྷ་བབས་ཀྱིས་སྤུད་ལྗོངས། །འགྲོ་འཆང་དབུས་གྱུར་གྲུ་འཛིན་ཞེས་བརྗོད་པཱུ་ར་ཤྲིཏྟཾ་རང་གི་བསྟི་བའི་གནས། །ས་ལ་གནས་པའི་བདེ་ལྡེན་མཆོག་དེར་ཤརྟ་ལ་ཡི་ཡོངས་འདེགས་རིན་ཆེན་ཁྲིར། །མིག་མི་འཛིན་པའི་རང་བཞིན་ཁྱེད་ནི་འཆི་མེད་མགོན་པོ་མཆོག་གི་སྐུར། །ཡོངས་སུ་བཞེས་ཏེ་མཚན་དཔེའི་རྒྱན་སྐུ་རྡོ་རྗེའི་རི་བོ་ཇི་བཞིན་པར། །སྐྱེ་འཇིག་ན་གེགས་ཀུན་ནི་གཉིས་སྤང་མི་ཤིག་དྭངས་མར་ཡོངས་སུ་དག །གཡོ་འགྱུར་ནཱ་དའི་ཚོགས་ནི་ཡེ་ཤེས་མཆོག་གྱུར་གཞོམ་མེད་སྲོལ་ལ་ཐིམ། །འཕོ་བཅས་ཤུ་ཀྲ་མི་འགྱུར་བདེ་བ་ཆེན་པོའི་དབྱིངས་སུ་ཀུན་ནས་ཞི། །སྒྲིབ་གསུམ་དྲི་མའི་ཚོགས་ཀུན་སྤངས་བ་འཆི་མེད་རྡོ་རྗེའི་ཏིང་འཛིན་གྱི། །འཆི་བདག་བདུད་སྡེའི་དཔུང་ཚོགས་མ་ལུས་ཕྱེ་མར་ཡོངས་སུ་འཐག་བྱས་ཏེ། །གངས་ཅན་ས་གསུམ་ལ་འཁོད་འགྲོ་བའི་ཚོགས་གྱུར་མ་ལུས་ཐམས་ཅད་རྣམས། །དྲི་མའི་ཚོགས་སྤངས་གདོད་མའི་གནས་ལུགས་ཇི་ལྟར་ཇི་སྙེད་ཆོས་ཁོང་ཆུད། །གྲོལ་བའི་མཐར་ཐུག་དེ་ཉིད་མངོན་དུ་མ་བྱས་བར་དུ་མགོན་ཁྱེད་ཉིད། །ཨ་ཧཾ་ཉི་ཟླའི་གུར་ཁང་དབུས་སུ་ཚེ་ཞེས་ལྔ་ལྡན་རྡོ་རྗེ་ཡི། །རང་བཞིན་རྟག་པ་བརྟན་པ་འཇིག་མེད་ཀ་བ་ཉིད་དུ་ཡོངས་འཐས་ཤིང་། །རྩིབས་སྟོང་རི་མོས་ཉེར་འཁྱུད་བགྲོད་བྱེད་རྡོ་རྗེའི་གཟུགས་བྱས་འཕྲོག་བྱེད་ཁྲིར། །ལེགས་བཀོད་གདུལ་བྱ་ཐུགས་རྗེ་ནམ་ཡང་དོར་མིན་ཏིང་འཛིན་ཕྱག་རྒྱའི་ངང་། །ཞབས་པད་བརྟན་པར་གཞག་ནས་རང་གི་ཐུགས་བསྐྱེད་ཐུགས་དམ་ཇི་བཞིན་པ། །འཁོར་བའི་རྒྱ་མཚོར་བྱིང་རྣམས་ཞི་བའི་ལྕགས་ཀྱུས་བདེ་བར་རབ་དྲངས་ཤིང་། །ཞི་ལ་གནས་ཀུན་སྙིང་རྗེའི་སྒྲ་ཡི་ཡོངས་སད་མཐའ་བྲལ་མཆོག་གི་སར། །བཀོད་པར་མཛོད་ཞེས་རྒྱལ་དང་རྒྱལ་སྲས་རབ་འབྱམས་ཀུན་གྱི་ཁྱེད་བསྐུལ་ངེས། །དེ་ལྟ་ན་ཡང་གདུལ་བྱར་གྱུར་པ་གང་གིས་དད་པས་ཡོངས་བསྐྱེད་པའི། །གསོལ་གདབ་ཚིག་ལ་རྒྱལ་བ་རྣམས་ནི་མི་དགྱེས་ནམ་ཡང་མི་མངའ་བས། །འགྲོ་ལ་ཕན་བཞེད་མགོན་པོ་ཞབས་པད་བརྟན་པར་ཆེད་དུ་གསོལ་འདེབས་ཚིག །འདི་འདྲ་བསྟན་འགྲོའི་བརྩས་སུ་ལྷག་བསམ་བཟང་པོས་ཡོངས་བསྐུལ་བརྗོད་ལགས་ན། །དགོངས་པར་བཞེས་ནས་རྫུ་འཕྲུལ་རྐང་པ་ལ་བརྟེན་ཞིང་འདིའི་དོན་ཉིད་དུ། །ཚེ་འོད་དཔག་ཏུ་མེད་པ་ཇི་བཞིན་འཚོ་ཞིང་གཞེས་ནས་བཞུགས་གྱུར་ཏེ། །བདག་སོགས་གདུལ་བྱར་གྱུར་ཀུན་ཁྱེད་ཀྱི་ཐུགས་རྗེའི་གྲུ་ཆེན་ལ་བརྟེན་ནས། །གནས་སྐབས་ཉིད་ནས་ཕུན་ཚོགས་དཔལ་འབྱོར་དབང་ཕྱུག་ཆེ་ཀུན་སྩལ་བ་དང་། །མཆོག་ཏུ་འགྲོ་རྣམས་བརྒལ་དཀའ་འཇིགས་རུང་བརླབ་འཕྲེང་རྟག་པར་འཁྲུག་པ་ལས། །ཡོངས་སུ་སྒྲོལ་བྱས་གནས་སྐབས་ཐར་པ་ཙམ་པོ་ཡང་ནི་མ་ཡིན་པར། །མི་གནས་བདེ་བའི་ཁབ་གྱུར་རྡོ་རྗེ་གྲུབ་ཀུན་གྱི་གནས་དམ་པར། །བཀོད་པར་མཛོད་ཅེས་གསོལ་བ་གདབ་ཀྱི་རེ་བ་ཡིད་བཞིན་འགྲུབ་མཛོད་ཀྱི། །ཀྱེ་མ་རབ་ཏུ་གུས་པའི་ཡིད་ཀྱི་ཡོངས་བཏུལ་ཞུ་བ་དེ་སྐད་ན། །དབང་པོའི་ཐ་གྲུར་ཤིང་ལོའི་ཚལ་ཞེས་རྐང་འཐུང་ཚང་ཞིང་འཁྲིག་དེ་ནས། །བིཀྵ་རྣམས་ནི་དྲི་བཞོན་དག་ནི་གར་བྱེད་བདག་ནི་དད་པའི་གར། །ནཱ་དའི་རྣམས་ནི་འབབ་རྒྱུན་ཅ་ཅོའི་སྒྲ་འབྱིན་བདག་གི་གུས་པའི་གླུ། །གྷ་ན་རབ་དཀར་བརྩེགས་པའི་བཞིན་ངོམ་བདག་ནི་དངས་བས་འཕྱོར་ཞིང་སྒེག །བྲིཥྚི་རྒྱུན་བཟང་ཆུན་པོའི་འཕྲེང་འཕྱང་བདག་ནི་དགའ་བ་རིན་ཆེན་འཕྲེང་། །དེ་ལྟར་འགྲོ་བའི་མགོན་ལ་བདག་ནི་དགའ་གུས་དད་དང་རང་བཞིན་གཟུགས། །དེ་དང་ལྷན་ཅིག་བེམ་པོའི་ཚོགས་ཀྱང་སྒེག་སོགས་བྱ་བ་བྱེད་བཞིན་འགྱུར། །གྱུར་པ་འདི་ཡང་ནམ་དུ་མི་དམན་བློ་ཡིས་ཀུན་བཟང་སྤྲིན་འཐུག་པོར། །འཇིག་རྟེན་དབང་ཕྱུག་སྒྱུ་འཕྲུལ་མཆོག་དེ་མཆོད་པའི་སླད་དུ་འཕྲོ་བར་གྱིས། །ཡང་གཅིག་བདག་བློ་མ་ལ་ཡ་རི་ས་བརྟོལ་མིག་ཡང་མཛེས་པའི་ཤིང་། །ཤེས་རབ་སྣང་བ་ས་མཆོག་མཆོག་གང་ཡོངས་རྒྱལ་དཀར་འཛིན་བརྟས་པའི་ཀླུང་། །སྙན་པའི་ངག་སྦྱོར་དྲི་བསུང་སྲུང་བཟང་མེ་ཏོག་ཟུར་མིག་འཁྱུག་ཅིང་གཡོ། །ཞུ་བའི་ཡི་གེ་སིམ་གྱུར་ངད་པ་འབྲས་གཡུར་བདེ་བའི་རེག་བྱ་སྤྱོད། །རྣམ་པར་སྤྱོད་པ་གང་ནི་གསེར་མངལ་ཅན་གྱི་བུ་མོར་གྱུར་པ་དེ་ཡི་གླུ། །ཡིད་འོང་གཏམ་དུ་སྦྱོར་ནི་གང་གི་ཏམ་བུ་ར་ཡི་སྒྲ་རུ་ཉེར་བཅུག་འདི། །ཀུན་མཁྱེན་ཀུན་གཟིགས་རྒླ་བའི་ངོ་བོ་རྒྱལ་བ་རྡོ་རྗེ་རྣོན་པོའི་ཕྱག་རྒྱ་ཅན། །ཀུན་མཛེས་ཀུན་དཔལ་ཨུཏྤལ་གདེངས་ཅན་མཆོག་གི་མཆོག་ཁྱེད་དགྱེས་པའི་རོལ་མོར་བྱས། །དེ་ལྟར་བདག་བློའི་རྫིང་བུ་ལས། །ལེགས་ཐོན་ཞུ་ཡིག་ངང་པའི་གཟུགས། །སྙན་ཚིག་གསེར་གྱི་གཡེར་ཁ་ཅན། །ལྷ་གོས་བཟང་པོའི་སྒྲོ་གཤོག་ཅན། །ཕོ་ཉའི་རླུང་ཤུགས་ལ་བརྟེན་ཏེ། །གྲུ་འཛིན་འདོད་དགུའི་རྒྱ་མཚོའི་དབུས། །མིག་མི་འཛུམ་པའི་ཞབས་ཀྱི་སྟེགས། །ཡིད་འོང་པད་ཚལ་དེར་ཞུགས་གྱུར། །ལེགས་པར་དགྱེས་པའི་རྒྱུར་གྱུར་ནས། །ལེགས་པའི་འདྲེན་བྱེད་དཀྱུས་རིང་པོས། །ལེགས་པར་སྐྱོང་ནས་ཕུན་ཚོགས་ཆེ། །ལེགས་པའི་དཔལ་ཀུན་སྩལ་ཡང་གསོལ། །མངྒ་ལཾ་བྷ་ཝནྟུ།
ཅེས་ཤར་ཕྱོགས་ཤིང་ལོའི་ཚལ་ཞེས་ཀོང་ཡུལ་ཉང་ཁ་རི་ཁྲོད་འབོལ་ཆུ་མིག་ནས་དོན་གྲུབ་ས་ལུག་གི་ལོ་སྦོ་ཟླའི་ཚེས་བཅུ་གཅིག་ལ་དཔལ་རིག་པ་འཛིན་པས་ཕུལ་བའི་ལི་ཀ་རཿ མངྒ་ལཾ།