༈ སྟོད་ཁ་ཆེ་དང་བོད་ཀྱི་ཡུལ་མཚམས་ལ་དྭགས་རྒྱལ་པོར་གནང་བ།
ཨོཾ་སྭཱསྟི། དགེ་ལེགས་བསོད་ནམས་འབུམ་གྱི་གཟི་འབར་བས། །ས་ཆེན་དཀྱིལ་འཁོར་དབང་བསྒྱུར་དངོས་གྲུབ་མཆོག །ཡོངས་ཐོབ་མི་དབང་རིགས་ཀྱི་ཐིག་ལེ་ཆེ། །སྐྱེ་དགུ་བདེ་འཚོ་མགོན་དེའི་སྐུ་གཞོག་དྲུང་། །བོད་ཆེན་ས་ཡི་ལྟེ་བར་ཡོངས་སྐྱེས་ཤིང་། །ཕྱོགས་མེད་རྒྱལ་ཁམས་ཀུན་རྒྱུའི་རྣལ་འབྱོར་པ། །མང་ཐོས་ཟབ་ཆོས་སྒོ་བརྒྱ་འབྱེད་མཁས་པ། །ངེས་གསང་རྫོགས་ཆེན་པ་དེས་ཞུ་བའི་མཆིད། །མངའ་རིས་ཀསྨི་ར་ཡི་ཡུལ་མཚམས་སུ། །གནས་གྱུར་མི་མཆོག་ས་བདག་གང་བདེ་ལ། །ཁྱབ་བདག་སངས་རྒྱས་ཡོངས་ཀྱི་གཙོ་བོ་མཆོག །ཨོ་རྒྱན་སིན་དྷུའི་མཚོར་འཁྲུངས་བདེ་བ་ཆེ། །པདྨ་ཀ་ར་འོད་དཔག་མེད་མགོན་དེ། །ཐུགས་རྗེའི་སྤྱན་གྱི་མ་དོར་རྟག་སྐྱོང་ཞིང་། །བརྩེ་བའི་ཕྱག་གི་བཀྲ་ཤིས་མེ་ཏོག་ཆར། །སྲིད་ཞིའི་དགེ་ལེགས་ཀུན་དང་ལྷན་ཅིག་ཏུ། །མི་ཡི་རྗེ་བོ་དེ་ལ་ཕྱག་བྱས་ནས། །སྙན་པ་ཚང་གནས་བར་དུ་རྒྱས་གྱུར་ཤོག །གང་ཁྱོད་དགེ་བའི་གཟིགས་པ་ཡངས་པོ་ཡིས། །འདིར་གནས་རིག་པ་འཛིན་པ་ཡང་ན་ཡང་། །ཕྱོགས་དེའི་བསྟན་འགྲོའི་བརྩས་སུ་འོང་འོས་ཞེས། །སྙན་ཚིག་རྔ་སྒྲ་བཟང་པོས་བསྐུལ་གྱུར་པས། །དེ་དོན་གེགས་མེད་འགྲུབ་པར་ཡོངས་སྨོན་མོད། །རེ་ཞིག་བོད་ཡུལ་ཤར་ཕྱོགས་ཤིང་ལོའི་ཚལ། །ཉེ་བའི་འཐུང་སྤྱོད་ཙཱ་རི་ཏྲ་བལྟ་བར། །བསྐྱེད་འདུན་ལགས་པའང་དགོངས་པར་གཞོལ་བ་དང་། །དེ་བཞིན་བོད་ཆེན་ཕྱོགས་ནས་འཁོར་དང་བསྟུན། །ས་བདག་མི་རྗེ་ཁྱེད་ཀྱི་གསུང་ཇི་བཞིན། །ཕྱོགས་དེར་ངེས་པར་སླེབ་བྱེད་དུས་དེ་རུ། །འགྲོ་ཕན་རྒྱལ་བསྟན་བྱ་བ་ཆོས་བསྒྲུབ་སྤྲོ། །དེ་སྲིད་ཀུན་ཏུ་ཁྱོད་སྐུ་འཚོ་གཞེས་ཤིང་། །གཟི་མདངས་ཆེས་རྒྱས་ཆབ་སྲིད་གོང་དུ་འཕེལ། །ས་གསུམ་འགྲོ་བས་ཁྱོད་ཀྱི་སྙན་པའི་གཏམ། །བརྗོད་པས་བྲལ་ཅིང་བདེ་བས་འཚོ་བར་ཤོག །དེ་སྐད་ལྷུག་པར་བརྗོད་ཚིག་ངང་མོ་ལ། །ཙི་ནའི་འཕྲུལ་ལག་གིས་བསྒྲུབ་གཤོག་པ་ཡིས། །མཛེས་བྱེད་རུ་ལག་འབྲས་སྤུངས་གཙུག་ལག་ནས། །ཀུན་དགའ་ཤིང་སྟག་ནག་ཟླའི་ཚེས་བཟང་པོར། །ལྷིང་སྟེ་སོང་བ་ས་སྐྱོང་མི་ཡི་བདག །ཆོས་བཞིན་མཛད་དེའི་ཐུགས་མཚོར་འཇུག་དགྱེས་སྨོན། །མངྒ་ལཾ།