༈ གཙང་སྟོད་གྱེ་རེ་ལོ་ཙཱ་བ་ཆེན་པོར་ཕུལ་བའི་ཞུ་ཡིག

གནས་ལྔ་རིག་པའི་ཉི་མར་ཡངས་གྱུར་པས། །འཇིག་རྟེན་འདི་ན་བློ་ལྡན་བལྟ་བའི་མིག །མཁས་གྱུར་སྐྱེ་བོའི་གཙུག་ན་མངོན་མཐོ་བ། །ངག་དབང་བཀྲ་ཤིས་རྣམ་རྒྱལ་ཞབས་པད་དུ། །མང་དུ་ཐོས་པའི་རྒྱ་མཚོ་ལས་འོང་པའི། །རྣམ་དཔྱོད་ལང་ཚོ་རྒྱས་པ་སྐྱེ་ལྔའི་དུང་། །ལེགས་བཤད་གཏམ་གྱི་ང་རོ་སྒྲོག་སྤོབས་པའི། །གྲགས་ལྡན་གཞོན་ནུ་དེ་ཡི་ཞུ་བའི་མཆིད། །མགོན་ཁྱེད་སྐྱེ་བ་དུ་མར་ལེགས་སྤྱད་འབྲས། །བྱང་ཆེན་ཡོངས་བསྔོ་སྨོན་ལམ་བཟང་པོ་ཡི། །དུས་འདིར་དམ་པ་མགོན་གྱི་རྗེས་སུ་བཟུང་། །མ་ནོར་སྒྲུབ་བརྒྱུད་སྙིང་པོའི་གྲུབ་མཐའ་ཞུགས། །ཁྱབ་བདག་བླ་མའི་རིམ་གྲོ་ཆོས་བཞིན་སྤྱོད། །ཐ་སྙད་གཙུག་ལག་རྒྱ་མཚོའི་ཕ་མཐར་རོལ། །བསྟན་པའི་འབྱུང་ཁུངས་རིག་གནས་རྒྱ་མཚོ་སྤེལ། །ལེགས་སྦྱར་སྨྲ་བའི་སེང་གེ་གཅིག་པུ་པ། །བློ་ལྡན་ཡོངས་ཀྱི་ཕྱག་འོས་བཀུར་བའི་འོས། །དེ་ནི་བདག་གི་སློབ་དཔོན་ཁོ་ནར་དྲན། །ཚུལ་འདི་འདྲ་བའི་སྐྱེས་མཆོག་འཇིག་རྟེག་མིག །གང་དེ་དེང་དུས་རུ་བཞིའི་གཙང་གི་སྟོད། །རུ་ལག་སྐྱེ་རེ་རིག་གནས་ལྡིང་ཁང་ན། །ཁམས་དྲུག་རྡོ་རྗེའི་སྐུ་མཆོག་བསྙེལ་མེད་ཅིང་། །ཇི་སྙེད་རྣལ་འབྱོར་ལང་ཚོ་རྒྱས་བཞིན་དུ། །ཇི་ལྟར་ཕྱག་ཆེན་ཉམས་ལེན་མཉམ་གཞག་དང་། །སྐལ་ལྡན་དོན་དུ་འཚོ་བཞུགས་སྙན་པའི་གཏམ། །ཐོས་པས་བདག་སེམས་འཆི་མེད་གསོས་སུ་གྱུར། །འདི་ན་གནས་པའི་བྱ་བྲལ་གྱི་ན་བ། །མིང་གི་བླ་བཏགས་ཚེ་དབང་ནོར་བུ་ཞེས། །གདན་སའི་ཁུར་བོར་སྤྲང་པོའི་གྲལ་སྙེགས་ཤིང་། །ལྷག་ཚུགས་རྒྱབ་སྐྱུར་དམ་ཆོས་དོན་གཉེར་ཞིང་། །ཁེངས་གྲགས་སྤང་ནས་རང་གཞན་འགྲོ་བའི་དོན། །རང་འདོད་མེད་པར་སྤྱད་བློ་མཆིས་མོད་ཀྱང་། །འདི་སྣང་ཆོས་བརྒྱད་གངྒཱའི་རླབས་ཕྲེང་བཞིན། །ནམ་ཡང་འདོར་མེད་བདག་བློའི་སྐྱེད་འདི་དུབ། །འོན་ཀྱང་མཚན་ལྡན་བླ་མའི་བཀའ་དྲིན་ལས། །གནས་ལུགས་ཕྱག་རྒྱ་ཆེན་པོའི་ངོ་བོ་མཐོང་། །མདོ་རྒྱུད་དགོངས་དོན་ཇི་བཞིན་སྨྲ་ཡང་སྤོབས། །མཁས་ཁྲོད་ཞུམ་ཞིང་བླུན་ཁྲོད་ང་མི་རྒྱལ། །དམ་སྡོམ་དག་ཅིང་གཞན་ཕན་ལྷག་བསམ་ལྡན། །རྒྱལ་བསྟན་སྲོག་ལྟར་བཙའ་བའི་ཞེ་གདེང་དང་། །དད་ལྡན་སློབ་མ་མི་བསླུ་སྙམ་པ་བཅས། །རྦད་ཞོད་ཙམ་མིན་སྙིང་ཁུང་གཏིང་ནས་ཤར། །ཚུལ་དེར་སྐུ་སྐྱེར་གྲགས་པའི་ཞབས་མ་དྲང་། །རང་ཡང་དལ་འབྱོར་འདི་ཉིད་ཆུད་མ་ཟོས། །དེ་དག་གནས་ལུགས་ལྷུག་པར་བརྗོད་པའི་གཏམ། །དཔོན་སློབ་ཐུགས་ཡིད་གཅིག་འདྲེས་སྟབས་ཀྱི་གསོལ། །མཚམས་ཀྱི་ཞུ་མཆིད་གསེར་གྱི་རི་བོ་ལ། །གནས་བཅས་འདབ་ཆགས་གསེར་དུ་འགྱུར་བ་བཞིན། །རིག་པའི་ཉི་མ་འཇིག་རྟེན་མིག་གཅིག་པུ། །མཁས་མཆོག་ཁྱེད་ཀྱི་ཐུགས་རྗེ་ལ་བརྟེན་ནས། །ལེགས་སྦྱར་དབྱངས་ཅན་ཀ་ཙན་པཱ་ནིའི་མདོ། །ཆ་ལག་སྨྲ་སྒོ་སུམ་རྟགས་བསྟན་པའི་གཞི། །དེ་བཞིན་སྙན་པར་སྨྲ་བ་དཎྜིའི་གཞུང་། །མཁས་མཆོག་རིན་ཆེན་འབྱུང་གནས་པྲ་བྟ་ར། །གཞན་ཡང་དཀར་ནག་རྩིས་གཞུང་གཡུལ་རྒྱལ་བཅས། །ཐོས་བསམ་ཀློག་པའི་སྐལ་བ་ཅུང་ཟད་ཀྱི། །ཐ་སྙད་གཙུག་ལག་བལྟ་བ་བློ་མ་ཟུམ། །རིག་པའི་གནས་ལ་ཕྲོ་བ་ཆ་ཤས་རྙེད། །བདག་གི་ཚུལ་དེ་གཞན་ལས་མ་ཡིན་གྱིས། །གཙུག་ལག་སློབ་དཔོན་གཅིག་མཆོག་རྒྱལ་པོ་ནི། །མ་ཧཱ་པཎྜི་ཏ་གྱུར་སྐྱེ་རེ་བ། །མངྒའི་མཚན་ཅན་བཀའ་དྲིན་ཁོ་ནར་ངེས། །ཐ་སྙད་བློ་གྲོས་བསྐྱེད་མཛད་ཤེས་རབ་བརྒྱུད། །སློབ་དཔོན་དེ་ནི་ཕ་ལས་ལྷག་གོ་ཞེས། །ཀུན་བཟང་རྡོར་སེམས་རྡོ་རྗེའི་ལྗགས་ཀྱིས་བསྔགས། །མདོ་ལས་ཕ་མ་འཕགས་དང་མཉམ་ཞེས་གསུངས།།དོན་དེས་ཤེས་རབ་སློབ་དཔོན་བདག་གི་ཕ། །མཚན་ནས་འབོད་དོ་བཀྲ་ཤོས་རྣམ་པར་རྒྱལ། །ངག་གི་དབང་ཕྱུག་མཁྱེན་རབ་རྒྱ་མཚོའི་གཏེར། །གང་གི་བཀའ་དྲིན་རྒྱ་མཚོའི་མཐའ་དང་མཉམ། །དེ་ལྟར་ཤེས་ཤིང་གོ་བོ་པཎྜི་ཏ། །བདག་ནི་ཚེ་རབས་འདི་ནས་བྱང་ཆེན་བར། །སྐྱེ་ཀུན་ཁྱེད་དང་མི་འབྲལ་ལྷན་ཅིག་འགྲོགས། །བྱང་ཆུབ་སྤྱོད་པ་ལྷན་ཅིག་ཉིད་ཙམ་ནས། །ཐེག་ཆེན་ས་ལམ་ཡོན་ཏན་གོང་འཕེལ་ཞིང་། །མཐའ་ཐུག་བདག་ནི་རྫོགས་སངས་རྒྱས་པའི་ཚེ། །ཚོམ་བུ་གཅིག་ཏུ་བྱང་ཆུབ་མཆོག་ཐོབ་པའི། །སྨོན་ལམ་སྙིང་ནས་འདེབས་སོ་བཀའ་དྲིན་ཅན། །བདག་ནི་ཐ་སྙད་རིག་པའི་གནས་རྣམས་ལ། །དགའ་བཞིན་གཙིགས་སུ་མཁས་པའི་རྒྱུ་ཡིན་བཟུང་། །འོན་ཀྱང་ཐ་སྙད་གནས་ལ་མི་ཞེན་གྱིས། །ཅི་ཞེས་རྣམ་རྟོག་བཅོས་མས་བསླད་པར་གོ །དེ་ཡང་སྟོང་ཉིད་སྙིང་རྗེའི་ཟིན་པ་ཡིས། །བྱང་ཆེན་བསྔོས་ན་དེ་ཡི་རྒྱུར་འགྲོ་མོད། །འོན་ཀྱང་འབྲས་བུ་མྱུར་དུ་བསྒྲུབ་པ་ལ། །ཚུལ་འདི་དོ་གལ་ཆེན་ཆེ་བའི་གནས་མ་ཡིན། །དེ་བས་བླ་མར་སངས་རྒྱས་ལས་ལྷག་པའི། །མོས་གུས་གཞི་བཟུང་དམ་ཚིག་སྲོག་ཕུར་བཙུགས། །གཞི་ཡི་ཕྱག་ཆེན་རང་བཞིན་བདེ་གཤེགས་སྙིང་། །བློ་བུར་འཁྲུལ་པའི་དྲི་མ་གསལ་བྱེད་ལམ། །ཡིན་ལུགས་ཕྱག་ཆེན་བསྒོམ་ཡེང་བྱར་མེད་གཤིས། །རྩོལ་བྲལ་གཉུག་མའི་རང་ཞལ་རྟག་བལྟ་བས། །ངེས་འབྱེད་རྣལ་འབྱོར་བཞི་ཡིས་ས་ལམ་བགྲོད། །ཚེ་གཅིག་སངས་རྒྱས་གོ་འཕང་ཐོབ་དེ་སྨོན། །དེ་ལྟ་ན་ཡང་རིག་སྟོང་བསྒོམ་པའི་གནད། །མཉམ་བཞག་བརྟན་པ་ཐོབ་ན་ཇི་སྣང་ཀུན། །ཕྱག་རྒྱ་ཆེ་ལས་གཞན་མིན་སྣང་སྲིད་ཀུན། །སྐུ་གསུང་མཁས་ལེན་ཉིད་ལ་སུ་ཞིག་བསྙོན། །བཀའ་བརྒྱུད་མཆོག་གི་རྣམ་རྟོག་ཆོས་ཀྱི་སྐུར། །བཞེད་ཚེ་རིག་གནས་རྣམ་རྟོག་ཡིན་སྨྲ་བཞིན། །རིག་གནས་རྣམ་རྟོག་ཆོས་སྐུ་ཡིན་དོན་ཅི། །བསྒོམ་ཆེན་རིག་གནས་གཤེ་རྣམས་འདི་དཔྱད་འོས། །གསོང་པོར་སྨྲ་ན་རིག་གནས་ལ་མི་སྨོད། །འདུས་བྱས་དགེ་ལ་དེ་བས་ཀྱང་མི་སྨོད། །གནས་ལུགས་དོན་བསྒོམ་རྒྱུ་འབྲས་འདོར་ལེན་འབད། །དམ་ཚིག་ཚུལ་བཞིན་མྱོང་རྟོགས་རྡོ་རུས་གཏུག །བརྟན་པ་མ་ཐོབ་བར་དུ་དབེན་བསྒོམ་གཙོ། །བརྟན་པ་ཐོབ་ན་ཅིར་སྣང་བསྒོམ་གྱི་གྲོགས། །བསྟན་འགྲོར་ཕན་ན་རླབས་ཆེན་སྤྱོད་ཡིན་པས། །སྐབས་རེ་བསྒོམ་པ་ལས་ཀྱང་ཐོས་བསམ་བཟང་། །ལྷག་བསམ་གྱིས་ཟིན་བྱང་ཆེན་རྒྱུར་བསྔོས་ན། །བྱ་བ་ཕལ་ཆེ་དགེ་བའི་འཁོར་ལོ་ཡིན། །རང་འདོད་འདི་སྣང་ཁེ་གྲགས་ཀྱིས་འཆིང་ན། །ལྟར་སྣང་བསྒོམ་བསྒྲུབ་བདུད་ཀྱི་ཞགས་པ་ཡིན། །བདག་ནི་སྔོན་སྦྱངས་བླ་མའི་ཐུགས་རྗེ་ཡིས། །ལུང་རྟོགས་བསྟན་ལ་བློ་མིག་མ་ཟུམ་པས། །དེ་ལྟར་ཤེས་ཤིང་ཁོང་དུ་ཆུད་ལགས་ཀྱི། །གཞན་གྱུར་རྣལ་འབྱོར་འགའ་ཡི་ངག་ནས་ནི། །བསྒོམ་ཆེན་ཐ་སྙད་གཙུག་ལག་མི་སློབ་ཞེས། །དམ་བཅའ་འཆའ་ཞིང་བདག་སོགས་བསླབ་སྦྱངས་ལ། །ཁྲེལ་ཚུལ་བྱེད་པ་རྣ་བར་སོན་ལགས་པས། །ཕྱོགས་རེར་ཞེན་པའི་འཆིང་བ་བཟློག་སླད་དུ། །གཟུར་གནས་བརྩེ་བའི་སེམས་ཀྱི་ཡིན་ལུགས་ཚུལ། །དཔྱོད་ལྡན་བློ་ནོར་ལེགས་བཤད་ཉིད་དུ་སྤེལ། །དེ་ཡང་ཤེས་རབ་སློབ་དཔོན་བཀའ་དྲིན་ཅན། །རིག་པའི་ཉི་མ་གང་གིས་སྙན་ལམ་དུ། །ཕ་མར་བུ་ཚས་གནས་ཚུལ་གསོལ་བ་བཞིན། །བརྗོད་ལ་ཉེས་པའི་སྐྱོན་ཡོད་མ་ཡིན་གྱིས། །ལེགས་པར་ཤེས་ལ་དགྱེས་པའི་ཐུགས་རྗེ་ཆེ། །ཞལ་རས་འཛུམ་པའི་མདངས་ཀྱི་བྱབ་ཀྱང་གསོལ། །བཀའ་དྲིན་ཆེ་འོ་མ་ཧཱ་ལོ་ཙཱ་ན། །དགའ་བའི་ཡིད་ཀྱི་ཉིན་མཚན་འཁོར་མོ་ཡུག །ཁྱེད་ཞལ་བལྟ་བར་བདག་ཉིད་ཆེས་གདུང་ཞིང་། །དམ་པའི་འབེལ་མཆི་བགྱིད་ལ་རབ་སྤྲོ་མོད། །དེ་ལྟ་ན་ཡང་སྔོན་ལས་རྣམ་གཡེང་གི །དལ་མེད་བྲལ་བས་རྟག་ཏུ་མནར་བཞིན་དང་། །ལྷག་ཏུ་བྲང་སོ་དཔལ་ལྡན་བླ་མ་མཆོག །ཚུར་མཐོང་སྐྱེ་བོའི་སྣང་ངོར་བྲོ་འཚལ་བར། །ཡང་ཡང་ཕོ་ཉ་བཏུད་ནས་འོང་དགོས་ཚུལ། །ཕེབས་ཤིང་བླ་མའི་ཆེད་དུ་གལ་ཆེ་གཤིས། །ཕྱོགས་དེར་འགྲོ་བའི་སྒོ་དོད་ལམ་ཞུགས་ཤིང་། །རིམ་པས་ཀོང་ཡུལ་ཙཱ་རིར་བསྐྱོད་འདུག་ལགས། །དེས་ན་ཕྱིས་སུ་མཇལ་བའི་སྨོན་ལམ་དང་། །རེ་ཞིག་མ་མཇལ་བར་དེར་སྐུ་འཚོ་གཞེས། །དྭངས་ཤིང་རིམ་གཉིས་དགེ་སྦྱོར་གོང་འཕེལ་དང་། །བསྟན་པའི་གསལ་བྱེད་ཉིད་དུ་བརྟན་བཞུགས་གསོལ། །བདག་ནི་ཚེ་རབས་ཚེ་རྒྱུད་ཐམས་ཅད་དུ། །ཤེས་རབ་དབང་འབྱོར་དབང་ཕྱུག་ཆེན་པོ་ཐོབ། །མ་ནོར་གྲུབ་མཐའ་གཙུག་ནོར་བཞིན་འཆང་བའི། །གྱུར་ནས་མཁའ་མཉམ་སེམས་ཅན་མ་སྟོང་བར། །ཆོས་ཀྱི་སྦྱིན་པ་རྒྱུན་མི་ཆད་འགྱེད་ནས། །རྒྱལ་བ་སྲས་བཅས་དགྱེས་ཀུན་བདག་འགྲུབ་ཤོག །ཤེས་རབ་རྒྱུད་སོགས་སློབ་དཔོན་བསྙེན་བྱས་དགེ །སྐྱེ་ཀུན་ཐ་སྙད་གཙུག་ལག་མ་བསླབ་པར། །རང་ཤེས་ཤེས་རབ་འཇམ་དཔལ་དཔའ་བོ་བཞིན། །མཁས་ཀུན་མཆོད་འོས་བདག་ཉིད་འགྲུབ་པར་ཤོག །དེ་སྐད་ཞུ་ཡིག་འཕྲལ་གྱི་བྲལ་བ་ཡི། །སྙན་ངག་དཔེར་བརྗོད་བལྟ་བར་མ་ལོང་པས། །བློ་ལ་གང་ཤར་ཆུ་འབབ་གཉུག་མའི་ཚིག །སྙན་ངག་རྒྱལ་སྲིད་རང་བཞིན་རྒྱན་ཉིད་ཀྱིས། །ཚིགས་སུ་བཅད་པ་བཅུ་ཕྲག་བཞི་ལྷག་པ། །བཅུད་ལྡན་རྐང་འཐུང་དབང་པོའི་འདབ་བམ་དང་། །རིན་ཆེན་ཟླ་མདངས་དོང་རྩེ་ཡན་ལག་བརྒྱད། །ཤིས་ཚིག་གིས་སྤྲས་རྣམ་དཀར་དར་བཟང་པོས། །སྤུད་བྱས་ཀུན་དགའ་ཆུ་སྟོད་ཟླ་བ་ཡིས། །ཡར་ཚེས་རྒྱལ་བ་དང་པོའི་དུས་སྦྱོར་བ། །སེང་གེའི་སྐབས་སུ་རུ་ལག་གྲོམ་པ་རྒྱང་། །གུ་རུ་པདྨའི་སྒྲུབ་གནས་བྱ་སྐྱིབས་ནས། །གནས་ལུགས་ཕྱག་རྒྱ་ཆེན་པོའི་རྟོགས་ལྡན་པ། །འོད་གསལ་རྫོགས་པ་ཆེན་པོའི་རྣལ་འབྱོར་ནི། །བྱ་བྲལ་རིག་འཛིན་ཚེ་དབང་ནོར་བུ་དཔལ། །འཇམ་དབྱངས་རྒྱ་མཚོའི་སྡེ་ཡིས་གུས་པས་ཕུལ། །