༈ ཨོ་རྒྱན་སྨིན་གྲོལ་གླིང་གི་ཁྲི་རིག་འཛིན་རིན་ཆེན་རྣམ་རྒྱལ་ལ་ཕུལ་བ།
དུས་གསུམ་རྒྱལ་བའི་སྤྱི་དཔལ་འཕུར་འགྲོའི་རྒྱལ་པོ་ཐོར་ཅོག་ཅན། །གང་གི་རིང་ལུགས་དྲི་མེད་ཐེག་རྒྱལ་རྩེ་དགུའི་རྫོགས་པ་ཆེ། །འཛིན་སྐྱང་སྤེལ་ལ་འཇིགས་མེད་རྒྱལ་བའི་སྲས་པོ་རྡོ་རྗེ་འཛིན། །སྔ་འགྱུར་བསྟན་པའི་གསལ་བྱེད་ཐིག་ལེར་གྱུར་པ་དེའི་ཞབས་དྲུང་། །དམ་པ་མགོན་གྱིས་རྗེས་བཟང་དལ་འབྱོར་རྟེན། །ཅུང་ཟད་དོན་ལྡན་རྣམ་དཔྱོད་མ་སྨད་ཅིང་། །ངེས་དོན་སྙིང་པོའི་དོན་བསྒོམ་རྒྱལ་ཁམས་པ། །བྱ་བྲལ་རིག་པ་འཛིན་དེས་ཞུ་བའི་མཆིད། །དེང་སང་ཐུབ་བསྟན་ཆེས་སྙིགས་ཁྱད་པར་དུ། །སྔ་འགྱུར་རླུང་འཚུབ་མར་མེ་ཚོང་འདུས་འོ། །ཇི་བཞིན་གྱུར་ཅིང་རྡོ་རྗེ་ཐེག་པ་ཡིས། །ཐོས་བསམ་བསྒོམ་པའི་སྲོལ་ཀ་ཉམས་དམས་ཡང་། །གྲངས་མེད་སྔོན་ནས་ཐུགས་བསྐྱེད་སྨོན་ལམ་གྱི། །འཇིག་རྟེན་མིག་གྱུར་རྣམ་པར་སྣང་མཛད་བསྲུང་། །གང་གི་སྤྲུལ་པའི་ཟློས་གར་འགྲོ་བའི་མགོན། །གཏེར་ཆེན་བླ་མ་འགྲོ་བའི་སྐྱབས་གཅིག་དེའི། །ཐུགས་བསྐྱེད་ཤར་རིའི་ཕྲག་ནས་སྙིང་བསྟན་གྱིས། །འོད་དཀར་གསར་དུ་ཤར་བས་གདུལ་བྱ་ཡིས། །བློ་མུན་སྲིད་མཐར་གཞིལ་ཞིང་སྐལ་ལྡན་གྱིས། །ཨུཏྤལ་དཀར་པོ་རྒྱལ་བྱས་རྨད་དུ་གྱུར། །དེ་ལྟ་ནའང་འགྲོ་འདིའི་བསོད་དབང་གིས། །མ་ཤོང་བ་ཡི་རྡོ་རྗེ་སྙིང་པོ་ཡི། །བསྟན་པའི་དགྲ་བོ་ནག་པོའི་རྩ་ལག་ཅན། །དེ་ཡི་རེ་ཞིག་རྒུད་པར་གྱུར་ན་ཡང་། །དཔག་མེད་བསོད་ནམས་མཐུ་ཡི་ལུགས་གཉིས་ཀྱི། །མངོན་མཐོ་ངེས་ལེགས་ཡོངས་འཆང་སྤྱི་དཔལ་ཆེ། །གང་གི་ཐུགས་རྗེ་མཐུ་ལས་སླར་ཡང་ནི། །གསང་ཆེན་སྙིང་པོའི་རྒུད་པ་སེལ་བྱེད་ནི། །དམ་པ་རྒྱལ་བའི་སྲས་གྱུར་ཁྱོད་ཉིད་ཀྱི། །དྲིན་ལས་སྔ་འགྱུར་ཆོས་ཀྱི་ལང་ཚོ་དཔལ། །ལེགས་པར་སྟོན་པའི་དགའ་སྟོན་བཟང་པོ་འདི། །བདག་སོགས་དཔྱོད་ལྡན་ཡོངས་ཀྱི་སྤྱི་ནོར་གྱུར། །དེས་ན་མགོན་ཁྱེད་སྐལ་བཟང་གདུལ་བྱའི་ངོར། །གཟུགས་སྐུའི་སྣང་བརྙན་ནམ་ཡང་འགོག་མེད་པར། །བསྐལ་པ་རྒྱ་མཚོའི་བར་དུ་འཆི་མེད་མགོན། །དགའ་སྟོན་རྒྱས་པར་མཛོད་ཀྱི་རྒྱལ་བའི་སྲས། །ཚུལ་འདི་ཁ་དཔག་ཅམ་བུ་ཙམ་མིན་གྱིས། །སྙིང་ནས་སྨོན་པའི་རྟེན་འབྲེལ་ཇི་བཞིན་ཤོག །འདིར་གནས་རྫོགས་ཆེན་པར་རློམ་རྒྱལ་ཁམས་པ། །བདག་ཀྱང་ལྔ་འདུས་སོ་སོར་མ་གྱུར་བཞིན། །རྒྱལ་བའི་བསྟན་ལ་སྙིང་ནས་ལྷག་བསམ་ངང་། །པདྨའི་ལུང་བཞིན་འགྲོ་དོན་བསྒྲུབ་ཁུལ་མཆིས། །མཚམས་ཀྱི་ཞུ་ཁོལ་བོད་ཆེན་མངའ་རིས་ནས། །བླ་མའི་གོ་ས་འཛིན་པ་ཟུང་གཅིག་ཀྱང་། །སྔ་འགྱུར་རྒྱུད་སྡེའི་བཤད་བཀའ་བསྒྲུབ་ཆེན་གྱིས། །ཕྱག་ལེན་བསླབ་ཕྱིར་ཆེད་གནེར་དེར་བརྫང་པས། །ད་ལམ་ཕྱག་རྟེན་དངོས་པོ་ཕྲ་འདུག་ཀྱང་། །སྔར་གྱི་མནའ་གཞུང་ཕྱི་ཐག་ལ་དགོངས་ནས། །ལུགས་གཉིས་བདག་རྐྱེན་ཁྱད་འཕགས་གནང་འོས་ཞེས། །གཟུར་གནས་བློ་ཡི་གསོལ་བ་དགྱེས་ཀྱང་འཚལ། །བདག་ལའང་དུས་ཀུན་དགེ་བའི་སྐྱབས་འཇུག་ནི། །རང་གཞན་དོན་གཉིས་རྒྱ་ཆེན་ཡོངས་འགྲུབ་པ། །ཚེ་འདི་ཉིད་ལ་ཟུང་འཇུག་རྡོ་རྗེ་སེམས། །བརྙེས་པའི་ཐུགས་སྨོན་བཟང་པོ་བྱབ་ཀྱང་འཚལ། །དེ་སྐད་ཞུ་ཡིག་མ་བཅོས་ལྷུག་པར་བརྗོད་པའི་ངང་མོ་ལ། །ལྷག་བསམ་མོས་པའི་ཞེན་གྱིས་གཡེར་ཁ་རབ་འཁྲོལ་ཞིང་། །མ་ཧཱ་ཙི་ནའི་འཕྲུལ་ལག་གིས་བསྐྲུན་ལྷ་གོས་གཤོག་རྒྱང་པ། །མང་མཁར་བསམ་འགྲུབ་རྫོང་ནས་སྨིན་གྲོལ་ཆོས་ཀྱི་རྒྱལ་ཁབ་ཆེ་དེར་ཕུལ། །མངྒ་ལཾ།