༈ མེ་ལུག་ཟླ་ཚེས་ལ་རི་བོ་དཔལ་འབར་ནས་རྗེ་བློ་གྲོས་ཆོས་འཕེལ་ལ་སྩལ་བ།
རྒྱལ་བསྟན་སྙིང་པོའི་རྩ་ལག་རྡོ་རྗེ་འཛིན་དེའི་དྲུང་དུ། ཞུ་བ། དེང་དུས་ཇི་ལྟའི་མཁྱེན་པ་མངོན་གྱུར་མཚོར། །ཇི་སྙེད་བྱེ་བྲག་མ་འདྲེས་ཁ་དོག་བཀྲ། །གཞན་ཕན་དལ་རླུང་གིས་བསྐུལ་ཐུགས་རྗེའི་རླབས། །ཆེ་གཡོ་སྨིན་གྲོལ་ཆུ་རྒྱུན་འབེབས་དེར་སྤྲོ། །ཕྲན་ནི་མཆོག་ཀུན་ངོ་བོ་པད་འབྱུང་གི །ཐུགས་རྗེ་གོཪྴའི་ལ་རྟེན་ཉེས་བྱས་ཀྱི། །ཚད་དུབ་ལས་རིང་དོན་གཉིས་བག་ཡངས་སུ། །སྤྱོད་པའི་ངང་ཚུལ་རི་མོ་ཙམ་དུ་གནས། །འཚམས་ཞུ། རྗེ་ཉིད་གྲངས་མེད་ནས་གོམས་ཐུགས་བསྐྱེད་མཐུས། །སྙིགས་དུས་འགྲོ་བ་འདྲེན་ལ་ཆེས་རིང་བས། །ཆང་ཐུབ་མང་བརྟེན་གསར་རྙིང་ཆོས་ཀྱི་བཅུད། །དུ་མར་ལོངས་སྤྱོད་གྱུར་ལ་བདག་ཡི་རང་། །དེས་ན་བདག་ཀྱང་ཕྱོགས་མེད་རྒྱལ་ཁམས་སུ། །ཡུལ་དང་ཆོས་ཀྱི་བདུད་རྩིར་བརྟེན་ཁུལ་ཏེ། །ཕྱོགས་འདིར་རྟེན་འབྲེལ་ཤུགས་ཀྱི་ལེགས་འགྲིགས་མཐུས། །ཉིད་སྲས་༼དགེ་སློང་རིན་འཛིན་༽དམ་པར་རི་ཆོས་ནོས་གྱུར་ཕྲལ། །དྲུང་དུ་བཅར་འདོད་སྐུ་ཁམས་སྟབས་ཀྱི། །དུས་དེར་མཇལ་མ་ཐུབ་ཀྱང་དངོས་འདི་ནས། །བཅད་རྒྱ་གྲོལ་བསྟུན་སྔར་ནས་སྙན་གསོལ་བཞིན། །བྱང་གླིང་ཀུན་བཟང་ཐུགས་གཏེར་གྱིས་གཙོས་པའི། །གསར་རྙིང་འདོད་ཆོས་འགའ་ཞིག་ཞུ་མོས་པས། །ཐུགས་རྗེ་ཆེན་པོས་༼བྱ་བཏང་ཡིན་ཕུལ་གྱི་ཟང་ཟིང་དངོས་པོའི་མཎྜལ་ནི་འབུལ་རྒྱུ་མི་འདུག་པས་ཐུགས་མི་ཁྲེལ་བ་༽གནང་བའི་སྐབས་དབྱེ་གསོལ། །དེ་སྐད་ཞུ་ཡིག་སྟོང་མིན་རྟེན་དང་བཅས། །བོད་ཆེན་འཛིན་མར་ཡོངས་སུ་གྲགས་པའི་མིང་། །ཚེ་དབང་ནོར་བུ་ཞེས་གྲགས་བྱ་བཏང་དེས། །རི་བོ་དཔལ་འབར་ནས་ཕུལ་དགེ་གྱུར་ཅིག །