༈ མེ་ཡོས་བླ་མ་རིན་ཆེན་བཟང་པོ་ལ་བསྩལ་བ།
དེར་གནས་ཐོས་ལྡན་དམ་པའི་རིགས་གྱུར་བླ་མ་གང་དེ་ལ། །བསམ་བཞིན་སྨོན་ལམ་དབང་གིས་སྲིད་པར་འཇུག་པའི་གྲགས་ལྡན་ནི། །མདོ་ཁམས་སར་སྐྱེས་རིས་མེད་གྲུབ་མཐའ་རྒྱ་མཚོར་འཇུག་པ་ལ། །འཇིགས་མེད་བློ་གྲོས་གྲུ་རྫིང་ལེགས་ཐོབ་ཀུན་ཏུ་ཆོས་སྨྲ་དེའི་འཕྲིན། །གང་གི་སྒྲ་འཛིན་བུ་ག་ལེགས་པར་བསལ་ཏེ་ཐུགས་བུམ་དུ། །འཇུག་པར་འོས་སོ་བསྟན་ལ་སེམས་ཏེ་སྨྲེངས་འདི་བརྒྱད་ལྡན་ཆབ། །
ཀྱེ་ཧོ། རྒྱལ་བཀའ་འབུམ་ཕྲག་གྲངས་ལྡན་ངོ་མཚར་སྔགས་རྒྱུད་འཕྲེང་བ་གང་། །བཀླགས་ལུང་རྒྱུན་དང་ལྡན་པ་ཡིན་ཞེས་དོན་དུའང་ལྡན་ངེས་པ། །གང་ཟག་བརྒྱ་ཕྲག་དུ་མའི་གྲངས་ལས་ཡང་ནི་ལྷག་པ་ཡིས། །བོད་དང་བོད་ཆེན་ཀུན་ཏུ་ཁེངས་སོ་ཚུལ་དེ་རྙེད་དཀའ་མིན། །འོན་ཀྱང་སྒྲོལ་མགོན་མཆོག་གི་རྣམ་འཕྲུལ་པདྨ་མ་ཎི་ཡི། །ཡོངས་འཛིན་བསྟན་པའི་ཉི་མར་འབོད་པ་གང་དེ་ལས་འོང་བའི། །རྒྱུན་ལ་རྨོངས་ཞེན་ཁོ་ནས་ཁྱོད་ལ་ཡང་ཡང་ཁོ་ན་རུ། །འབོད་པ་བགྱིས་རུང་བདག་གི་ངག་ཀྱང་ཆུད་ཟོས་པར། །དམ་པ་གོང་མའི་དགོངས་པ་བསྐང་བར་མི་མཛད་འདི་ཅི་ཞིག །བསྟན་པའི་ཉི་མའི་ཆོས་རྒྱུན་ཆད་འདི་འཕང་ངོ་བོར་ཕོད་དམ། །བདག་ནི་ཐོས་བསམ་བསྒོམ་ལ་རོ་བྲོ་ཅུང་ཟད་ལྟ་ཟིན་ཅིང་། །ད་ནི་ལང་ཚོ་ཉིད་ཀྱང་ཡོལ་བར་ཉེ་མོད་འོན་ཏེ་ཆོས། །ཐོས་ན་སྙམ་པའི་ལྷག་བསམ་བསྐྱེད་ཀྱང་གྲོགས་བྱེད་མ་མཆིས་འདི། །གཞུ་མེད་མདའ་འདྲ་དེས་ན་བསྟན་པའི་ཉི་མ་ཡབ་སྲས་ཀྱི། །དགོངས་པ་བསྐངས་ཐབས་ཟད་ཀྱི་མི་མངོན་དབྱིངས་ནས་དགོངས་མ་ཁྲེལ། །གང་ཁྱེད་ལང་ཚོས་གཏུག་པ་བདེན་མོད་རྒྱལ་བསྟན་རིན་ཆེན་ལ། །ལྷག་བསམ་བསྐྱེད་ན་ངལ་བ་ཀུན་ཀྱང་འབྲས་ལྡན་ཉིད་ཡིན་གྱི། །དོན་མེད་ཀྱི་ནར་སྤྱོད་པས་ཅི་བྱ་དེ་བས་བསྟན་ལ་དགོངས། །སྙིགས་མའི་དུས་འདིར་བསྟན་ལ་ལྷག་བསམ་དག་པ་ཉིན་སྐར་ཙམ། །རྒྱུན་ལྡ་ན་བླ་མ་དཀོན་མོད་དེ་བས་ཡང་ནི་རྩོལ་ལྡན་གྱི། །སློབ་མ་ཨུ་དུམྺ་ར་འདྲ་བས་བདག་གི་སྩོལ་བ་བསྐྱེད་འདིར་གཟིགས། །གཡེལ་བར་མ་དོར་བསྟན་པའི་ཉི་མའི་བསྟན་ལ་ལྷག་བསམ་མཆོག །བསྐྱེད་པར་འཚལ་ལོ་སྔགས་སྐྱེས་རཏྣ་བྷ་དྲར་བདག་གི་འབོད། །བདག་ནི་མདོ་ཁམས་ཉིད་དུའང་གྲགས་ལྡན་གོ་ས་ཉིད་དུ་སྐྱེས། །རྒྱལ་ཁམས་ཀུན་ཏུ་འཕྲིན་ལས་སྐྱོང་མོད་ད་ལྟ་ཆེ་དགུ་ཡིས། །བཀུར་ཡང་དྲེགས་ཁེངས་བསམ་པ་སྤང་ནས་གང་ཁྱོད་ཆོས་ཀྱི་རྒྱུན། །བཏུང་བར་འདོད་པ་འདི་ཡང་དམ་པའི་རྣམ་ཐར་ཡིན་མིན་སོམ། །དམ་པའི་རྣམ་ཐར་ཡིན་པས་གཡེལ་བར་མ་བོར་བླ་མ་ཀྱཻ། །འཆི་བས་མི་ཚུགས་ས་ཕྱོགས་གང་དུའང་མེད་མོད་ཕྱོགས་འདི་རུ། །འཆི་འཕོ་སྟོན་ཡང་དམ་པ་གང་བཞུགས་དགེ་བའི་ངང་ཚུལ་རྒྱས། །དེས་ན་ཚེགས་ཆེ་གནོག་ཆུང་འཚེ་མང་ཞིང་ཁང་དེ་ཡི་ཅི། །བསྟན་པའི་ཉི་མའི་བསྟན་ལ་དགོངས་ནས་ཚུར་བྱོན་འདིར་གཤེགས་འཚལ། །གལ་ཆེན་ཉིད་དུ་དེ་ཙམ་གསོལ་ནས་གསན་པར་མི་མཛད་ན། །བསྟན་ལ་བརྩེ་བའི་གོ་ཆ་ཆུང་བར་ཟད་པས་དེ་བས་ན། །རྡོ་རྗེ་ཐེག་པའི་གཡར་དམ་གཉན་ལ་དགོངས་ཤིག་རིན་ཆེན་བཟང་། །དེས་ན་ཡང་ཡང་གསོལ་བའི་འབྲས་བུ་མཆིས་པར་མཛོད་ཅིག་གུ །སྔར་གསོལ་དུས་ནས་ཕྱོགས་འདིར་བྱོན་ན་དམ་ཆོས་ཀྱི། །བྱ་བ་ཆོས་ཀྱི་འཁོར་ལོ་བསྐོར་ཟིན་ད་བར་འགྱང་བ་འདི། །དོན་མེད་སོང་སྟེ་ད་ནི་དོན་ལྡན་བརྩོན་པ་བསྐྱེད་ཀྱང་རིགས། །བསམ་པ་ལྷག་མར་མ་གྱུར་ཕན་ཚུན་ཡིད་ཀྱི་རེ་བ་ཡི། །ཤིང་རྟ་འདོད་དོན་ནོར་བུས་ཕྱུར་བུ་ཉིད་དུ་ཡོངས་ཁེངས་བར། །སྨོན་མོ་དེ་དོན་ཇི་བཞིན་བསླུ་མེད་ཉིད་དུ་འགྲུབ་པར་ཤོག །
ཅེས་པ་གངས་རིའི་ཁྲོད་ཀུན་ཏུ་མ་སྦས་པའི་མིང་རླུང་ལྟར་གྲགས་པ་དཔལ་ཆེན་པོའི་རིག་པ་འཛིན་པ་རྒྱལ་ཁམས་པས་འཕྲུལ་སྣང་རྒྱལ་པོའི་ཁབ་ནས་མེ་ཡོས་ཆུ་སྟོད་ཟླ་བའི་ཚེས་དགེ་བ་ལ་སྤེལ་བ་སརྦ་མངྒ་ལཾ།