༈ དཔལ་དང་པོའི་སངས་རྒྱས་དབྱེར་མ་མཆིས་པའི་ཁྱབ་བདག་འཁོར་ལོའི་མགོན་པོ་མཆོག་གི་ཞབས་པད་རིན་པོ་ཆེའི་དྲུང་དུ།

བདག་ཤཱཀྱའི་དགེ་བསྙེན་རྙིང་མའི་རིག་པ་འཛིན་པ་ཚེ་དབང་ནོར་བུ་འཇམ་དབྱངས་རྒྱ་མཚོའི་བསོད་ནམས་དང་ཡེ་ཤེས་ཀྱི་ཚོགས་འཕེལ་ཞིང་ཁྱབ་བདག་རྩ་བའི་བླ་མ་ཐུན་མོང་མ་ཡིན་པ། དཔལ་པདྨ་བདེ་ཆེན་གླིང་པ་དང་གསུང་རབ་རྒྱ་མཚོའི་ཞབས་ཀྱི་དགོངས་པ་བསྐང་བའི་མཆོག་རྒྱལ་བའི་བསྟན་པ་རིན་པོ་ཆེ་རིགས་སུ་མ་གྲུབ་པར་ཐོས་བསམ་གྱི་ཁུལ་ལས་མཆོག་ཏུ་སྟོན་པའི་གསུང་གི་མཐར་ཐུག་འཁོར་ལོ་གསུམ་པའི་དགོངས་དོན་ཕྱིར་མི་ལྡོག་པར་གཞན་སྟོང་སེང་གེའི་སྒྲ་སྲིད་རྩེའི་བར་དུ་སྒྲོགས་པ་ཀུན་མཁྱེན་ཆོས་ཀྱི་རྒྱལ་པོ་དོལ་པོ་ཤེས་རབ་རྒྱལ་མཚན་དཔལ་བཟང་པོའི་སྡེ་དང་། རྗེ་བཙུན་རྡོ་རྗེ་འཆང་སྒྲོལ་མགོན་ཞབས་ཀྱི་གསུང་རྡོ་རྗེའི་ཚིག་རྒྱུན་མ་ཆད་པ་ཇི་ཙམ་བཞུགས་པ་དེ་ཉིད། དུས་འདིར་རིགས་བརྒྱའི་ཁྱབ་བདག་དཀོན་མཆོག་མཚུངས་མེད། རྗེ་བཙུན་བླ་མ་དམ་པ་ཀུན་བཟང་དབང་པོའི་ཞབས་གང་ཉིད་ཀྱི་ཐུགས་རྗེར་བརྟེན་ཐོབ་པར་གྱུར་པའི་བཀའ་དྲིན་གྱི་མཚོན་བྱེད་ཙམ་དང་ཁྱད་པར་དུ་བཅོམ་ལྡན་འདས་དུས་ཀྱི་འཁོར་ལོའི་སྨིན་བྱེད་དབང་གི་བཀའ། སྒྲོལ་བྱེད་ཁྲིད་ཀྱི་བཀའ། རྒྱུད་འགྲེལ་བཤད་ཀྱི་བཀའ་རྣམས་ལེགས་པར་སྩལ་བ་དང་། གཞན་ཡང་བཅོམ་ལྡན་འདས་འཁོར་ལོ་སྡོམ་པའི་དབང་ཁྲིད་ཊིཀྐའི་ལུང་དང་། མདོ་སྔགས་ཀྱི་ཆོས་ཚུལ་རྒྱ་མཚོའི་ཁྲིད་བཀའི་རྒྱུན་བཅུ་ཕྲག་གསུམ་དང་གཅིག་གི་ལྷག་པའི་བརྒྱ་ཕྲག་ལེགས་པར་ཐོབ་པའི་བཀའ་དྲིན་ནི་བསྐལ་པ་རྒྱ་མཚོའི་མཐར་ཡང་གཞལ་བར་མི་ནུས་མོད། འོན་ཏེ་མོས་པས་ཚེ་སྲོག་བསོད་ནམས་འདུས་བྱས་དང་འདུས་མ་བྱས་པའི་དགེ་ཚོགས་ཆ་ཤས་བཅས་ཏེ་འབུལ་བར་བགྱིད་པ་གཙོ་བོ་དང་། སྐབས་འདིར་ཟང་ཟིང་དངོས་པོ་ཕྲ་མོ་ཚན་གྲངས་ཙམ་དུ་ཐོག་མར་དབུ་ཞྭ། སྐུ་འགག མནབ་གཟན། དེ་ནས་བདུན་ཚན་བདུན་དུ་བྱས་པའི་ཐོར་མར་དཀོན་མཆོག་གི་རྟེན་གྱི་ལེ་ཚན། ཤེར་ཕྱིན་གྱི་སྐུ་ཆོས་རྗེ་ཡང་དགོན་པའི་ཐུགས་དམ་རྟེན། སློབ་དཔོན་པདྨའི་སྐུ། ཏ་ར་ནཱ་ཐའི་སྐུ་ཐང་ཕྱག་ནས་མ། བཀའ་གདམས་གླེགས་བམ་སྤུ་གཙང་། བྱང་སེམས་ཆོས་འཕགས་ཀྱི་འཕེལ་གདུང་། འཇིགས་མེད་དབྱངས་ཅན་དགའ་བའི་སྐུ་ཚལ་ཁྲག་མ། མ་ཧཱ་པཎྜི་ཏ་སྨྲི་ཏིའི་ཕྱག་ཚྭ། ཐུབ་དབང་གི་སྐུ་དེ་བདུན་ཚན། བདུན་ཚན་གཉིས་པ་མཆོད་པའི་ཡོ་བྱད་ཀྱི་ལེ་ཚན། བུམ་པ། ཀ་པ་ལ་མནྫའི་སྟེགས་བཅས། མར་མེ་ཏིང་བདུན། ཏིང་ཤག སྤོས་ཕོར། སྤོས་བམ་པོ་བཞི་སྟེ་བདུན་ཚན། བདུན་ཚན་གསུམ་པར་རིན་པོ་ཆེའི་ལེ་ཚན། གསེར་གྱི་མེ་ཏོག་ཞོ་གང་། དངུལ་བལ་ཊཾ་སོ་བདུན། དུང་གི་འཕྲེང་བ་རྒྱན་ལྡན། འཆང་འཕྲེང་། གཡུ་བྱི་རུ་སྤོས་ཤེལ་གྱི་དོ་ཤལ། མུ་མེན་གྱི་ལག་གདུབ་བརྒྱན་ལྡན། ཤེལ་འཕྲེང་བཅས་བདུན་ཚན། བདུན་ཚན་བཞི་པ་ཉེར་སྤྱད་ཀྱི་ལེ་ཚན། བཞེས་དཀར་སྟེགས་ཤུབས་ཅན་སྤུས་གཙང་། རྒྱ་ཤིང་གི་བཞེས་ཅན་གོས་ཅན་གྱི་ཤུབས་བཅས། སེང་ལྡེང་གི་གསོལ་ལྡོང་རག་ཤན་མ། ལི་སྡེར། བསེ་སྡེར། གསོལ་པར། རག་སྡིག་སྤུས་གཙང་བཅས་བདུན་ཚན། བདུན་ཚན་ལྔ་པར་དར་རས་གོས་ཆེན་གྱི་ལེ་ཚན། ཁ་བཏགས་ཉིན་མཚན་བདེ་ལེགས་མ། མ་ཧཉྩི། གོས་མཐིང་ཁ་འབྲལ། གོས་ལྗང་ཡུག ལ་དར་ཁྲ་བོ་ཡུག ས་ར་ཧ། པ་རི་དཀར་པོ་ཆ་བཅས་བདུན་ཚན། བདུན་ཚན་དྲུག་པ་གཅན་ཤུན་ལ་སྣམ་གྱི་ལེ་ཚན། སྟག་ལྤགས། གཟིག་ལྤགས། ཝ་ལྤགས། སྣམ་དམར་ཆ། སྣམ་དཀར་ཆ། སླེའུ་ཆ། ཤིང་སྒམ་ཆ་བཅས་བདུན་ཚན། བདུན་ཚན་བདུན་པར་ཉེར་མཁོའི་སྤྱད་པར་རས་སོགས་ཀྱི་ལེ་ཚན། ས་རི་ཁྲ་བོ། སྦུ་ལའི་ལྷམ། གའུ་སྤུས་གཙང་། བལ་ཟམ་སྔོན་པོ། མོན་ཁ་སེར་པོ། ཟངས་དཀར་ཡུག་བཅས་བདུན་ཚན། དེ་ལྟར་བདུན་ཚན་གྱི་དངོས་པོ་ཡིད་ཀྱི་ཀུན་བཟང་མཆོད་པའི་སྤྲིན་ཆེན་པོར་བྱིན་གྱིས་བརླབས་ཏེ། མགོན་ཁྱེད་བསྐལ་པ་རྒྱ་མཚོའི་བར་དུ་ཞབས་པད་བརྟན་པའི་ཕྱིར་དུ་འབུལ་བས་འདོད་དོན་ཇི་བཞིན་དུ་འགྲུབ་པ་དང་། བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་ཚེ་རབས་ཐོག་མ་མེད་པ་ནས་བསགས་པའི་ལས་དང་ཉོན་མོངས་པའི་སྒྲིབ་ཚོགས་མཐའ་དག་ཡོངས་སུ་བྱང་ཞིང་། ཁྱད་པར་རྡོ་རྗེ་སློབ་དཔོན་རྩ་བ་དང་ཡན་ལག་རྣམས་ཀྱི་སྤྱན་ལམ་དུ་གསང་སྔགས་ཀྱི་དམ་ཚིག་གཞུང་བཞིན་དུ་མ་བསྲུང་པ། བཀའ་བཞིན་དུ་མ་འགྲུབ་པ། ཚོར་ཏེ་ཉམས་དང་། མ་ཚོར་ཏེ་ཉམས་པ། སྒོ་གསུམ་བག་མེད་པའི་དབང་དང་། ཉོན་མོངས་པ་ཤུགས་ཆེས་པ། བདུད་ཀྱི་བྱིན་གྱིས་ནོན་ཏེ་ཉམས་ཆག་འགལ་འཁྲུལ་དུ་གྱུར་པ་ཐམས་ཅད་རྩ་བ་ནས་དག་ཅིང་སྒྲིབ་པ་མེད་པ་ཚངས་པ་ཡིད་བཞིན་དུ་གྱུར་ཏེ། བདག་རྡོ་རྗེའི་རྣལ་འབྱོར་པ་ཚེ་དབང་ནོར་བུས་ཚེ་འདིར་དང་པོའི་སངས་རྒྱས་རྡོ་རྗེ་སེམས་དཔའ་རང་བཞིན་ཟུང་འཇུག་རྡོ་རྗེའི་སྐུ་ངེས་པར་ཐོབ་པ་དང་། གནས་སྐབས་སུ་གྲུབ་པ་བརྒྱད་དང་ལྟ་སྟངས་ས་བཅུ་གཉིས་སོགས་ལས་རབ་འབྱམས་ལ་དབང་འབྱོར་ཞིང་། མཁའ་མཉམ་སེམས་ཅན་གྱི་དོན་རླབས་པོ་ཆེ་འགྲུབ་པའི་དཔང་པོ་རྩ་བའི་བླ་མ་དམ་པ་བཀའ་དྲིན་གསུམ་ལྡན་ཆོས་ཀྱི་རྗེ་ཀུན་བཟང་དབང་པོའི་ཞལ་སྔ་ནས་གཙོ་བོར་གྱུར་པའི་རྒྱུན་ལྡན་བླ་མ་ཡི་དམ་མཁའ་འགྲོ་ཆོས་སྐྱོང་བསྲུང་མའི་ཚོགས་དང་བཅས་པ་ཐམས་ཅད་ཀྱིས་མཛད་ནས་མྱུར་དུ་འགྲུབ་པར་གྱིས་ཤིག དེ་ལྟར་ཡང་རྫོགས་པའི་སངས་རྒྱས་རྡོ་རྗེ་སེམས་དཔས་སྔགས་ཀྱི་རྒྱུད་སྡེ་ཐོས་པ་དང་། དེ་ཉིད་སྟོན་པའི་རྡོ་རྗེ་སློབ་དཔོན་བསྙེན་ཅིང་གུས་པར་བགྱི་བའི་ཕན་ཡོན་འབྱམས་ཀླས་པར་གསུང་ན། བདག་གི་དགེ་འབྲས་འདིའི་ནུས་པ་ཡང་ཉམས་མེད་གོང་དུ་འཕེལ་ཞིང་། འཕྲལ་དུའང་དུས་དེ་རིང་ནས་བཟུང་རགས་པ་འཁྲུལ་རྟོག་སྤུན་པོ་ངེས་པར་ཆད་དེ། རྣམ་པར་མི་རྟོག་པའི་ཡེ་ཤེས་བདེ་གཤེགས་སྙིང་པོའི་ཡོན་ཏན་ཡོངས་སུ་རྫོགས་ཤིང་། གཟུངས་དང་། ཤེས་རབ་དང་། སྤོབས་པ་དང་། དབང་རྣམ་པ་བཅུ། མི་འཇིགས་པ་བཞི་ལྡན་རྣམས་གདོན་མི་ཟ་བར་ད་ལྟ་ཉིད་དུ་ཐོབ་པར་གྱུར་ཅིག མདོ་ཆོས་ཀྱི་མཐར་ཐུག་གཞན་སྟོང་དབུ་མ་ཆེན་པོ་རྒྱལ་བའི་དགོངས་པ་ཇི་བཞིན་རྟོགས་པད་ང་། སྔགས་རྒྱུད་བདེ་དགེས། གསུང་འདུས། ཁྱད་པར་དུ་དུས་ཀྱི་འཁོར་ལོའི་རྒྱུད་དོན་མ་ལུས་ཤིང་ལུས་པ་མེད་པ་དཔྱིད་ཕྱིན་པར་རྟོགས་ན། དེ་ཐམས་ཅད་ཀྱིས་ཀྱང་བཀའ་གསང་བ་ལས་ཀྱང་ཆེས་གསང་བ་མཚན་ཙམ་གྱིས་ཀྱང་སྲིད་པའི་འཕྲུལ་འཁོར་འཇིག་པར་བྱེད་པ་ཐེག་དགུའི་རྩེ་རྒྱལ་ཨ་ཏི་རྫོགས་པ་ཆེན་པོའི་དགོངས་པ་འདྲེན་པའི་ཤིང་རྟ་ཆེན་པོའི་འཇུག་ངོགས་ཡང་དག་པར་གྱུར་ཏེ། དུས་གསུམ་སངས་རྒྱས་ཐམས་ཅད་ཀྱི་གསུང་གི་རྡོ་རྗེ་ཆོས་དཔལ་པདྨ་འབྱུང་གནས་དང་། དྲི་མེད་བཤེས་གཉེན། དྲི་མེད་འོད་ཟེར་ཞབས་ཀྱི་དགོངས་དོན་མཐར་ཕྱིན་པ་བདེ་བླག་ཏུ་མ་ནོར་ཞིང་མ་འཁྲུལ་བར་རྟོགས་ནས་ཚེ་འདིར་ཚོགས་གཉིས་ཀྱི་མཐར་ཐུག་རྫོགས་པའི་སངས་རྒྱས་ཀུན་ཏུ་བཟང་པོ་དང་སྐལ་བ་མཉམ་ཞིང་། བདག་དང་འབྲེལ་འགྱུར་གྱི་འགྲོ་བ་མཐོང་ཐོས་དྲན་རེག་ཀུན་ཀྱང་དེའི་གོ་འཕང་ལ་འགོད་ནུས་པར་གྱུར་ཅིག དེ་སྐད་ཁ་ཞེ་མེད་པར་སྨོན་ལམ་གདབ་པ་འདི་ཉིད་ངེས་པར་འགྲུབ་པའི་འདུས་བྱས་དང་འདུས་མ་བྱས་པ། ཀུན་རྫོབ་དང་དོན་དམ་གྱི་དཀོན་མཆོག་སངས་རྒྱས་ཆོས་དང་དགེ་འདུན་རྣམ་པ་གསུམ་གྱིས་མཛོད་ཅིག སྟོན་པ་ཚད་མ་རྡོ་རྗེ་སེམས་དཔའ་ཡིས། །རྒྱུད་སྡེ་ཚད་མ་སྔགས་རྒྱུད་ནས་གསུང་དོན། །ཡིད་ཆེས་ཚད་མ་བླ་མ་མཉེས་པ་ཡི། །དགེ་འདུན་ཚད་མ་དུས་འདུ་ཉིད་ཐོབ་ཤོག །

ཅེས་ས་ག་ཟླ་བའི་དུས་ཆེན་བཅོ་ལྔ་ལ་གུས་པས་ཕུལ་བ་དགེའོ། །

ན་མཿཤྲི་ཀ་ལ་ཙཀྲ་ཡ། རྣམ་པ་ཀུན་གྱི་མཆོག་ལྡན་ཞིང་། །རང་བཞིན་གྱི་ནི་འོད་གསལ་བ། །ཟབ་གསལ་མི་འགྱུར་བདེ་བ་ཆེ། །དུས་ཀྱི་འཁོར་ལོ་དེ་ལ་འདུད། །གང་ཞིག་སྒྲིབ་གསུམ་དྲི་མ་ཡོངས་སུ་བཅོམ་པ་དུས་གསུམ་རྒྱལ་བ་ཡི། །དཀྱིལ་འཁོར་གཙོ་བོར་དབང་བསྐུར་རྡོ་རྗེ་ཐེག་པའི་སྟོན་པར་མངའ་གསོལ་བ། །རྡོ་རྗེ་སློབ་དཔོན་གང་ནི་འགྲོ་བ་ཀུན་གྱི་མཆོད་འོས་བཀུར་འོས་བསྟོད་པར་འོས། །དེས་ན་བདག་གུས་མི་ཕྱེད་བླ་མར་མཆོད་པ་ཀུན་བཟང་སྤྲིན་འདིར་སྤྲོས། །

དེ་ཡང་སངས་རྒྱས་ཀྱི་བསྟན་པ་ལ་རིས་སུ་མ་གྱུར་ཀྱང་། །རྒྱལ་བའི་བཀའ་འཁོར་ལོ་གསུམ་པ་ངེས་དོན་གྱི་བསྟན་པ་སྟོན་པར་མཛད་པ་ཀུན་མཁྱེན་ཇོ་ནང་པའི་བསྟན་པ་འདི་གསང་ཆེན་རྙིང་མའི་རིང་ལུགས་ཀྱི་ལྟ་བ་དང་ཤིན་ཏུ་མཐུན་ཞིང་སྔགས་གསར་མར་གྱུར་པ་རྣམས་ཀྱི་ཡང་སྙིང་རྩེ་རྒྱལ་དུ་གྱུར་པ་ཡིན་འདུག་ནའང་། དེང་སང་དུས་ཀྱི་དབང་གིས་ཉག་ཤིན་ཏུ་ནས་ཕྲ་ཞིང་མིང་གི་ལྷག་མ་ཙམ་དུ་ཉེ་བར་གྱུར་པའི་སྐབས་སུ་སྣང་བས། ཉམས་སྨད་པའི་ཆོས་དེ་གསོ་ཐུབ་ན་ཕན་ཡོན་བླ་ལྷག་ཏུ་ཆེ་བར་མཐོང་བ་དང་། རང་ཉིད་ཀྱང་སྐྱེ་བ་སྔ་མའི་ལས་དང་སྨོན་ལམ་རྣམ་པར་དག་པས་ཚེ་རབས་གཏན་གྱི་བླ་མ་སློབ་དཔོན་པདྨས་རྗེས་སུ་བཟུང་ཞིང་། དེས་བྱིན་གྱིས་བརླབས་པ་གང་ཡིན་པ། ཚེ་འདིའི་རྩ་བའི་བླ་མ་དཔལ་པྡམ་བདེ་ཆེན་གླིང་པ་དང་གསུང་རབ་རྒྱ་མཚོས་མཚམས་སྦྱར་ནས། དུས་དེང་སང་ཇལ་དཔག་པའི་ཕྱག་རྫོགས་ཀྱི་ལྟ་གདེང་དྲོད་ཚད་ཆུང་ངུའི་སྣེ་ཙམ་མདོ་ཁམས་སུ་སྡོད་རིང་ནས་ཐོབ་པར་བྱས་ཤིང་དེ་ཉིད་རྟོགས་པ་གོང་འཕེལ་དུ་གཏང་བར་འདོད་ནས།

ཙཱ་རི་ཏྲ་སོགས་གནས་དབེན་པ་ཞིག་ཏུ་རང་གཅིག་པུ་རི་དྭགས་རྨས་པའི་སྤྱོད་པ་སྐྱོང་བར་འདོད་ཀྱང་། སྐྱེ་སྔོན་སྐལ་བས་དེ་ལྟར་མ་གྱུར་རུང་། སྐྱེས་བུ་དམ་པ་རྣམས་ཀྱི་ཞབས་ལ་བལྟ་བ་དང་ཡུལ་གྱི་བདུད་རྩི་གནས་རྟེན་མཇལ་ཕྱིར་རུ་བཞི་མངའ་རིས་རྒྱལ་ཁམས་མཐའ་དག་ཉུལ་ནས་རང་གཞན་དོན་གཉིས་ཅི་འགྲུབ་བྱས་ཤིང་། དམ་པ་རྣམས་ལ་ཞི་གཅོད། ཕྱག་རྫོགས། ནཻ་གུ། ནཱ་རོ། སྦྱོར་དྲུག་སོགས་གདམས་པའི་རྒྱུན་རྣམས་རང་སྐལ་དང་འཚམས་པར་ཐོས་ཤིང་། དེ་དག་སྟོན་པའི་དགེ་བའི་བཤེས་གཉེན་ལ་ཡང་བསྟེན་ཚུལ་རྒྱུད་སྡེ་དང་གང་མཐུན་དུ་དུས་དེང་སང་ལ་དཔག་པར་ཅི་ནུས་ཀྱིས་རང་ཉིད་གོ་ས་སྐྱེ་བརྒྱུད་དང་གཞུང་ལུགས་ཀྱི་རྣམ་དཔྱོད་ཉམས་དང་རྟོགས་པའི་ཡོན་ཏན་ཕྲ་མོ་ཡོད་པའི་ཁེངས་པ་རྣམས་བོར་ཞིང་། བླ་མ་རྣམས་ལ་ཁམས་རྨོངས་ཀྱི་དཔྱད་པ་མེད་པ་དང་། སྐུ་འགངས་ཆེ་ཆུང་ལ་མ་ལྟོས་པར་ཆོས་ཀྱི་བཀའ་དྲིན་ནོས་པའི་བླ་མ་དེ་ལ་ཆེས་གུས་པས་རང་ཉིད་དམའ་བའི་གདན་ལ་འདུག གུས་པས་ཞབས་སྤྱི་བོར་བླངས། ཚིག་གི་ཞེ་ས་འབུལ། བླ་མ་རྣམས་ཀྱི་བསྟན་པ་དང་འཕྲིན་ལས་སྤེལ་བའི་ཐབས་ལ་འབད་པར་བྱས་ཤིང་། དེ་ཡང་ངས་བྱས་ཡུས་དང་མ་འབྲེལ་བ་ནི་རང་ཉིད་ཀྱི་ངང་ཚུལ་ལགས་ཤིང་།

དེས་ན་དམ་པ་རྣམས་ཀྱི་ཐུགས་སུ་ནི་མངོན་པར་མཁྱེན་པ་ཡང་གོར་མ་ཆག་མོད། གཞན་གྱུར་ནི་དུས་སྙིགས་མའི་མིར་གྱུར་པས་ཇི་ལྟར་བྱས་ཀྱང་མགུ་དཀའ་རུང་། ལྟོས་པ་ཡང་མི་འདུག་ཀྱི་དེ་ནི་ཞར་བྱུང་གི་འཕྲོས་སུ་བཏང་སྟེ། དོན་གྱི་སྙིང་པོ་རང་ཉིད་ཀྱི་ཚེ་འདིར་རང་གཞན་གྱི་དོན་གཉིས་ཕུན་ཚོགས་ཀྱི་གནས་ཀུན་སངས་རྒྱས་པདྨ་འབྱུང་གནས་ཀྱི་བསྟན་པའི་སྒོར་ཞུགས་པ་འདི་ཉིད་ཁོ་ནས་འགྲུབ་མོད་ཀྱང་། རྒྱལ་བའི་བསྟན་པ་རིས་སུ་མ་ཆད་པར་ལྷག་པའི་བསམ་པ་ཉིད་དང་། ཁྱད་པར་དུ་སློབ་དཔོན་ཆེན་པོ་པདྨ་འབྱུང་གནས་ཀྱི་མདོ་ཕྱོགས་ལྟ་བའི་གྲུབ་མཐའ་ཚུལ་བཞིན་སྐྱོང་བ་ནི་ཀུན་མཁྱེན་ཇོ་ནང་པ་ཡབ་སྲས་སུ་ངེས་ཤིང་གྲུབ་པ་དང་། དེ་བཞིན་རང་ཉིད་ཀྱི་འཁྲུལ་པའི་སྣང་བར་སྐྱེ་བ་སྔ་མའི་རིམ་པ་དུ་མ་ཞིག་རྨི་ལམ་དུ་དྲན་པ་ལས། འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཀུན་མཁྱེན་དོལ་པོ་པའི་སློབ་མའི་ཐུ་བོ་ཞིག་ཀྱང་ཡིན་སྙམ་པ་རབ་རིབ་ཤར་བ་དང་།

ཁྱད་པར་རྗེ་བཙུན་ཀུན་དགའ་སྙིང་པོའམ་ཏ་ར་ནཱ་ཐ་གང་གི་ཆོས་སྲས་ཀྱི་ཐུ་བོ་དམ་པར་ཏིང་སྐྱེས་རྒྱལ་པོའི་སྲས་ཆོས་རྗེ་འཇམ་དབྱངས་པར་སྐྱེས་པ་ནི་རེ་གསལ་དྲན་པས་དེ་སྐབས་ཀྱི་ཆོས་ཚུལ་ཐོས་པས་ཡང་རིང་གྱིས་དྲན་ནས་ཚེ་འདིའི་བསླབ་སྦྱངས་ནན་བཅས་ལ་ལྟོས་མ་དགོས་པར་རང་གི་བློ་གྲོས་མཐུས། རྗེ་བཙུན་ཏཱ་ར་ནཱ་ཐའི་གྲུབ་མཐའི་རྣམ་དག་མ་རྨོངས་པར་ཚུལ་བཞིན་དུ་འཆད་པ་མི་འཇིགས་པའི་སྤོབས་པ་དེ་ལྟ་ཀུན་གྱིས་སྤྱན་ལམ་དུ་བབ་པ་འདི་ཡིན། དེ་ནས་རྗེ་བཙུན་ཆེན་པོ་ཏཱ་ར་ནཱ་ཐ་ནས་བརྒྱུད་པའི་ཆོས་བཀའ་མིའི་གང་ཟག་ནས་བརྒྱུད་པ་བར་མ་ཆད་པ་ཐོས་འདོད་སྐོམ་པ་ཆུ་ལ་འདོད་པ་བཞིན་བྱུང་བས།

ཕྱོགས་མཐའ་དག་ཏུ་འཚོལ་འདོད་ལ་གསེར་མདོག་ཅན་ཆོས་མཛད་ཀྱི་གཙང་སྟོད་འབྲས་སྤུངས་སུ་བདེ་ཆེན་ཆོས་རྗེ་བྱ་བ་སྦྱོར་བ་ཡན་ལག་དྲུག་གི་རྣལ་འབྱོར་སྦས་ཚུལ་དུ་བཞུགས་པ་ཡོད་ཅེས་ཐོས་པས་ཡིད་ལ་དགའ་སྤྲོ་དཔག་ཏུ་མེད་པ་བྱུང་ཞིང་། དེ་དོན་ཀྲེ་བོ་ཆོས་ཀྱི་དབང་པོར་ཞུས་པས། དེ་བཞིན་ལེགས་ཞེས་ཡི་རང་ཡང་གནང་བར་བརྟེན་མེ་རྟ་ལ་ཕྱོགས་འདིར་ཡོང་ཀྱང་སྟབས་འགྲིགས་མ་བྱུང་བས། སྔ་ཕྱི་ཕོ་ནའི་ལམ་དང་། རང་ཉིད་ཀྱང་ལ་ཆེ་ཆུང་འཕྲང་གི་དཀའ་བར་རྣམས་ཁྱད་དུ་བསད་གོང་དུ་སྨོས་བཞིན་གོ་ས་སོགས་ཚེ་འདི་སྣང་གི་རྟག་ཚུགས་རྣམས་རྒྱབ་ཏུ་བོར། ཀུན་མཁྱེན་རྒྱལ་བ་ཇོ་ནང་པའི་བསྟན་པའི་དོན་དུ་གཉེར་ནས་རྗེ་བཙུན་བླ་མའི་ཞབས་པད་དུ་ས་བྱ་ལོ་ལ་ཐོག་མར་བཅར་ནས་སྦྱོར་བ་ཡན་ལག་དྲུག་གི་ཉམས་ཁྲིད་སོགས་ཅི་རིགས་ཞུས་ཤིང་།

སླད་མར་ལྕགས་ཕག་གི་ལོ་གཞུག་ནས། ད་ལྟ་ཀུན་དགའ་ཤིང་སྟག་ལོ་བར་བྱ་བ་གཞན་ཐམས་ཅད་ཆེ་གཞག་ཆུང་བཤོལ་གྱི་ལྕམ་དེ་གཞག་ནས་དབང་ཁྲིད་གདམས་པ་ཁོ་ན་དོན་དུ་གཉེར་བ་སྔོན་དུས་བསྐལ་པ་བཟང་པོའི་ཆོས་མཛད་ཀྱི་རྣམ་ཐར་རྗེས་སུ་མཐུན་པར་བྱས་ནས་དབང་བཀའ་རྣམས་རྒྱུད་དོན་ལ་ནོར་འཁྲུལ་མེད་པ་རང་ཉིད་ཀྱི་བློ་གྲོས་མཐུས་ཇི་བཞིན་ལག་ལེན་དུ་བཀལ། བྱིན་རླབས་ཀྱི་རྒྱུན་ཐུགས་རྗེ་ནུས་པའི་མཐུ། རྗེ་བཙུན་ཀུན་བཟང་དབང་པོས་སྟོན་ནས་བར་ཆད་འཚེ་བ་མེད་པར་ཀུན་མཁྱེན་ཇོ་ནང་པའི་བསྟན་པའི་རྒྱུན་དེང་སང་སྐབས་བཞུགས་པ་རྣམས་ལྷག་ལུས་མེད་པར་ལེགས་པར་བུམ་པ་གང་བྱོའི་ཚུལ་དུ་ལེགས་པར་ཐོས་ཤིང་། དམ་ཚིག་སེལ་མེད་པར་བཀྲ་ཤིས་པའི་དགེ་མཚན་དུ་མས་ཡོངས་སུ་ཁྱབ་པའི་མཐུར་ཀུན་དགའི་ལོ་ཉི་མ་ཀཪྐ་ཊའི་ཁྱིམ་དུ་ཞུགས་པ་ཡར་ངོ་རྒྱ་བ་གཉིས་པའི་ཚེས་རྣམ་པར་དཀར་བ་ལ།

བཅོམ་ལྡན་འདས་དུས་ཀྱི་འཁོར་ལོ་བདག་པོ་དང་བདག་པོ་ཆེན་པོའི་དབང་རྒྱུད་སྡེ་ནས་གསུང་བཞིན་ཞུ་བའི་བཀའ་དྲིན་གཏང་རག་གི་ཡོན་དུ་ཚོན་ཙམ་པ་དང་། དཔལ་ལྡན་བླ་མ་དམ་པ་ཞབས་པད་བསྐལ་བརྒྱར་བརྟན་པའི་ཆེད་དུ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་རྫོགས་པ་བྱང་ཆུབ་ཆེན་པོའི་རྒྱུར་ཡོངས་སུ་བསྔོས་ཏེ། རབ་ཤེས་རབ་ཀྱི་མཉེས་པར་བྱེད་པ། བླ་མ་ལ་ཐོས་པའི་སྨིན་གྲོལ་གདམས་པ་མངོན་པར་འཁྲུལ་པ་མེད་པ་གཞན་ལ་འདོམས་པར་བྱེད་པ་མཎྜལ་གྱི་མཆོག་ཕུལ་དུ་གྱུར་པ་དང་། རང་ཉིད་ཀྱི་ཀྱང་སྒོ་གསུམ་ལེ་ལོ་མེད་པར་འཇིག་བདེ་དུས་གསུམ་གྱི་ལྷ་སྔགས་ཀྱི་ཏིང་འཛིན་གྱི་རོལ་པར་ཅི་ནུས་སུ་བརྩོན་པ་ནི་བླ་མ་དགྱེས་བྱེད་ཀྱི་མཎྜལ་འབྲིང་པོའོ། །ཐ་མ་སྒོ་གསུམ་གྱི་ཞབས་ཏོག་གིས་དགྱེས་པར་བྱེད་པ་སྟེ། ཕྱག་བདར་དང་མངག་ཞུགས་ལས་རྣམས་ཡིན་འདུག་ནའང་། དེ་ལྟར་ནི་སྔོན་གྱི་ལས་སྐལ་གྱིས་མ་གྲུབ་ཡང་། དེ་དག་དང་སྒོ་མཐུན་པའི་དོད་མཚུངས་སུ་རང་ཉིད་ཀྱི་སྐྱེ་བ་གོ་ས་རིག་པའི་ཡོན་ཏན་གྱི་ཁེངས་པ་རྣམས་རྒྱབ་ཏུ་བོར་ནས་ལུས་ཀྱི་ཕྱག་སྔོན་དུ་འགྲོ་བས། ཞབས་སྤྱི་བོར་ལེན་ཞིང་ངག་གི་སྒོ་ནས་སྙན་པ་ཕྱོགས་བཅུར་བརྗོད།

སེམས་ཀྱི་སྒོ་ནས་དཀྱིལ་འཁོར་གྱི་གཙོ་བོ་དུས་ཀྱི་འཁོར་ལོ་དང་ཐ་མི་དད་པའི་མི་ཕྱེད་པའི་དད་པ་བརྟན་པོར་ལྡེམ་འགྱང་མེད་པར་བརྟན་པོར་བྱས་པ་འདི་ནི། མཎྜལ་མཐའ་དག་གི་གཞི་བཟུང་དུ་བྱས་ནས་ཡང་མཐའ་ཟང་ཟིང་གི་མཎྜལ་མཚོན་བྱེད་ཙམ་ལ་དེང་དུས་ཀྱི་བླ་སློབ་རྣམས་ཀྱི་ནི་འདི་ལ་གནང་ཆེ་ཆེ་པོར་མཛད་འདུག དཔལ་རྡོ་རྗེ་སེམས་དཔའ་ནི་ཡང་མཐའ་ཟང་ཟིང་གི་མཎྜལ་དུ་གསུང་མོད། རང་ཉིད་ཀྱི་སེམས་ལ་ཡང་གནང་ཧ་ཅང་གི་ཆེ་ཆེ་པོ་ཞིག་ནི་ཡེ་ནས་མི་ཤར་རུང་། ཡུལ་ལུགས་དང་བསྟུན་པའི་ཟང་ཟིང་གི་དངོས་པོ་མཎྜལ་མཚོན་བྱེད་ཙམ་དུ་དབང་བསྐུར་ནི་ཞུས་སུ་རྒྱུད་སྡེ་ནས་བཤད་བཞིན་པའི་མཎྜལ་ཟང་ཟིང་ཅི་འགྲུབ་དང་། ཁྲིད་བཀའ་ལུང་དེ་དག་གི་སྐབས་སུ་ཡང་རང་གི་དངོས་པོ་སྤུས་བཟང་ངན་ཅི་བྱུང་བར་མ་ཆད་པར་རིམ་པས་ཕུལ་བ་མཚོན་ཅིང་། ཆ་ཤས་ནི་དུག་ཆ་ཡིན་པར་གསུང་ནའང་། ཟང་ཟིང་གི་དངོས་པོ་བྱུང་ཚད་འཕྲལ་དུ་ཕྱག་ཏུ་བཏང་བ་དང་། རིན་པོ་ཆེའི་རིགས་ནི་སྤང་དག་གི་ཚུལ་གྱི་ཟང་ཟིང་མཎྜལ་གྱི་ཚུལ་ཏེ། འདི་ནི་ངོ་ཐོན་དྲིན་ཡུས་ལྟ་བུ་མ་ཡིན་གྱིས། ཕྱིན་ཆད་དུ་དབང་ཁྲིད་ཞུ་ཞིང་བླ་མ་བརྟེན་པ་རྣམས་ཀྱི་ཁ་སྟོང་ལག་སྟོང་དུ་མ་སོང་བར་འདི་ལྟར་དགོས་རྒྱུར་འདུག་ཅེས་དཔེར་བརྗོད་དུ་སྨྲས་པ་ཡིན་ལ། སྤྱིར་རྡོ་རྗེ་སེམས་དཔའ་གནང་ཆུང་ངུ་གསུང་འདུག་རུང་རང་ཉིད་ལ་ཞེན་པ་ཡོད་ཕྱིན་ཟང་ཟིང་གི་མཎྜལ་འདི་བསོད་ནམས་ཀྱི་ཚོགས་རྫོགས་པའི་ཐབས་ཟང་ཟིང་ལ་རག་ལུས་པ་ལྟ་བུར་འདུག་པས་འབུལ་བ་ལག་ལེན་བཏབ་པ་གལ་ཆེ་ངེས་སུ་ཡིན།

དེ་ལྟ་ན་ཡང་དད་པ་མོས་གུས་ཡོད་ཅིང་ཟང་ཟིང་ཡེ་ནས་མེད་པ་ལ་ནི་མ་རྟོགས་སོ། །དེ་སྐད་སྐབས་ཀྱི་འཕྲོས་དོན་དང་། འདིར་ད་ལམ་སྐབས་ཀྱི་ཟང་ཟིང་མཎྜལ་མཚོན་བྱེད་ཙམ་ནི་ཕྱག་དང་རིན་པོ་ཆེ་དངུལ་གྱི་མཎྜལ་ཚོམ་བུ་སོ་བདུན་བཀྲ་ཤིས་དགེ་ལེགས་ཚིགས་སུ་བཅད་པའི་དར་གྱིས་བཅིབས་ཏེ་ཕུལ་བ་སྔོན་དུ་བྱས་ནས་རྣམ་གྲངས་ཀྱི་ཐོག་མར། ཀ་ཤི་ཀའི་རས་ལ་རྡོ་རྗེ་འཆང་ཧེ་རུ་ཀ་གཙོ་བོར་བྱས་པའི་དུས་འཁོར་བློ་བརྒྱུད་དང་། རྒྱུད་རིས་ཤམྦྷ་ལའི་བཀོད་པ། མདོ་རིས་ངེས་དོན་སྙིང་པོའི་མདོ། མདོ་ལྔ་མིའི་གླིང་བཞིའི་བཀོད་པ། ནོར་འཁྲུལ་མེད་པའི་ཕུན་སུམ་ཚོགས་པའི་རི་མོ་རྣམ་པར་བཀྲ་བའི་ཡོལ་ཐང་གླིང་གསུམ་གྱི་གོང་བ་གོས་སྔོན་ཐག་བཟང་ཤོས་ཀྱི་སྒྲོག་དན་དངུལ་གྱི་ཨ་ཝཾ། འཇའ་གོས་དམར་སེར། ཤན་བུ་ལིང་གི་བྱས་པ་རྒྱུ་འགྲོ་དངུལ་བལ་ཊཾ་བརྒྱ་དང་བཅུ་ལྷག་ངེས་འགྲོ་བའི་སྤུས་ལེགས། སྐུ་ཡི་རྟེན་གྱི་མཚོན་བྱེད་དང་། གསུང་གི་རྟེན་དུ་ངེས་དོན་གྱི་པུ་སྟི་དྲུག སྦྱོར་དྲུག་ཁྲིད་རྩ་བ་དང་ལྷན་ཐབས། ངོ་སྤྲོད་གསང་དོན་རབ་གསལ་ཞེས་ཕྱོགས་ལས་པས་མཛད་པས། ཀུན་མཁྱེན་དོལ་པོ་པའི་རྣམ་ཐར། མཁན་ཆེན་འཇམ་པའི་དབྱངས་ཀྱི་རྣམ་ཐར་པུ་སྟི་ཀ་རྣམས་ཀྱིས་མཚོན་པ་དང་། ཐུགས་རྟེན་རྡོ་རྗེ་རྩེ་དགུ་གཏེར་བྱོན་དང་། ཡོན་ཏན་གྱི་རྟེན་དུ་རིན་པོ་ཆེའི་སྒྲུམ་བུ་གྲུ་བཞི་པ་དང་། རིན་ཆེན་དངུལ་གྱི་གའུ། འཕྲིན་ལས་ཀྱི་རྟེན་དུ་ཟངས་དུང་སྐད་པོ་ཆེ། ཞལ་དཀར་སྟེགས་བཅས། བཞུགས་གདན་རྡོ་རྗེའི་རི་མོ་བཀྲ་རྣམས་དང་། བདུན་ཚན་དང་པོར་བཀྲ་ཤིས་པའི་རྫས་ཤིང་འབྲས་བིལ་ཝ། ཁམ་གསེར་ཞོ་གང་། ཁམས་དངུལ་སྤུས་ལེགས་དངུལ་སྲང་བརྒྱད་དང་ཞོ་དོ། མཛོད་གོས་སེར་པོ་རྒྱ་ཡིག་ཁ་གང་། བྱང་དར་དམར་པོ་ཡུག ལྗང་ཁུ་ཡུག པ་རི་ཡུག བདུན་ཚན་གཉིས་པར་དུང་ཆོས། ཨོལ་ཐག་སྤོས་ཤེལ་ལྔ་དང་བྱི་རུ་བཅུ་བཞི་མུ་མེན་སོགས་ཡོད་པ། གོས་ཆེན་མི་ཤ་ཁ་ཁ་གྲུ། ཨ་ལ་ཅ་ཁ་དོ། བྱང་དར་ལྗང་ཁུ་ཡུག་གཅིག སྨན་ཡུག་གཅིག སོ་ར་ཧ་ཏི་ཡུག བདུན་ཚུན་གསུམ་པར་རྡོར་དྲིལ། ལྟག་ཚར་གཡུ་ལྔ། བྱི་རུ་ཉེར་བཞི། སྤོས་ཤེལ་བཞི། སྤོས་ཤེལ་གྱི་འཕྲེང་བ་དང་དུང་འཕྲེང་རྒྱན་ལྡན། ཨ་མ་མུ་ཏིག་གི་ཐོད་ཕུ། གོས་ཆེན་ཚོས་གཉིས་ཁ་གང་། བྱང་དར་སེར་པོ་ཡུག སྣམ་དཀར་གཉིས། བདུན་ཚན་བཞི་པར་རྣམ་རྒྱལ་བུམ་པ་དང་མེ་བུམ། གཡུ་དྲུག་དཀར་གྱི་གཟེར་གཡུ། མཆོང་འཕྲེང་རྒྱན་ལྡན་གཉིས་དང་བ་སོའི་འཕྲེང་བ་མཆོད་ཀོང་། རག་གི་ནང་མཆོད་ཀ་པཱ་ལི། ཏིང་བདུན་ཚར། བདུན་ཚན་ལྔ་པར་ཤེལ་དཀར་དྲི་མ་མེད་པ། གླ་རྩི། ཟངས་ཆས་གྲས་འགའ་ཁྲུ། གའུ་གཉིས། གཏོར་ཐེབ་ཆ་གཅིག ཟངས་ཆུང་གཅིག ལི་སྡེར་གཅིག རག་འགག་གཅིག ཀ་ཏོ་ར་གཅིག ཤིང་ཆའི་གྲས་ཞིབ་ཕོར་བཞི། ཕོར་པ་ཆེ་ཆུང་དགུ། ཤིང་སྡེར་གསུམ། སེར་སྡེར་གསུམ། གྱོན་པའི་གྲས་ཕྱུ་པ་རྒྱ་ཁྲ། སྐེ་རགས་སྦོ་ཆ་དང་བཅས་པ་གཉིས། རྒྱ་ཚོས་རྒྱན་ལྡན། སྤྲང་ལྡོང་སྦྲང་རྩིའི་དྲི་བཟང་དང་བཅས་པ། བཀྲ་ཤིས་རྟགས་བརྒྱད་རེ་ཁ་ཚང་བའི་མཛོད་འཐག་གངས་རིའི་མདངས་ལྡན་རྣམས་ཏེ། དེ་ལྟར་ཡན་ལན་བདུན་དང་ཡེ་ཤེས་ལྔའི་ཡོན་ཏན་རྣམས་རྡོ་རྗེ་སློབ་མ་ཚེ་དབང་ནོར་བུའི་རྒྱུད་ལ་མྱུར་དུ་རྩལ་རྫོགས་པའི་མཚོན་བྱེད་དུ་བདུན་ཚན་ལྔ་ཡི་དངོས་པོ་མཎྜལ་གྱི་ཚུལ་དུ་ཕུལ་བ་དང་། ཤེས་རབ་སྒྲུབ་པ་སྒྱུ་ལུས་ཟང་ཟིང་གི་དགེ་བ་བསགས་པ་རྣམས་ཀྱི་ནུས་པས་བདག་གི་ཚེ་རབས་གཞན་དང་ཚེ་འདི་རུ་མཐའ་ཡས་པའི་འགྲོ་བ་རྣམས་ལ་ཕན་པའི་ཕྱིར་དུ་ལྷག་པའི་བསམ་པས་ཐེག་པ་ཆེན་པོའི་སྨོན་ལམ་བཏབ་ཟིན་པ་དང་། ད་འདེབས་བཞིན་པ་དང་། སླད་མར་འདེབས་པར་འགྱུར་བ་རྣམས་བསླུ་བ་མེད་པར་སྐད་ཅིག་མ་འདི་ཉིད་དུ་འགྲུབ་པ་དང་། དུས་སྦྱོར་འདི་ཉིད་དུ་འགྲུབ་པར་བྱིན་གྱིས་བརླབ་པར་གསོལ་བ་འདེབས། དེ་ཁོ་ན་བཞིན་འགྱུར་བ་ཡང་དེ་བཞིན་གཤེགས་པ་རྡོ་རྗེ་སེམས་དཔའ་དཔལ་རབ་འབྱམས་རྒྱ་མཚོ་རྡོ་རྗེ་སློབ་དཔོན་བསྙེན་པར་མངགས་པའི་བདེན་ཚིག་དང་། བདག་གི་འདུས་དང་འདུས་མ་བྱས་པའི་དགེ་རྩ་མཐའ་དག་གི་ནུས་པས་ཐེག་པ་ཆེན་པོའི་སྨོན་ལམ་རྣམས་བསླུ་མེད་གེགས་མེད་པར་དུས་དེ་རིང་ཉིད་ནས་འགྲུབ་པར་གྱུར་ཅིག མངྒ་ལཾ།

ན་མཿབཛྲ་ས་ཏྭ་གུ་རུ་བྷྱཿ རྒྱལ་ཀུན་ཡེ་ཤེས་ཀུན་འདུས་ངོ་བོ་ཉིད། །མཚོ་སྐྱེས་བླ་མ་ཚེ་རབས་ཀུན་གྱི་སྐྱབས། །དེ་དང་ཐ་དད་མི་དམིགས་འཁོར་ལོའི་མགོན། །པདྨ་བདེ་གླིང་གསུང་རབ་རྒྱ་མཚོ་རྒྱལ། །འོད་དཔག་མེད་མགོན་རྒྱལ་སྲས་པདྨ་འབྱུང་། །གང་གི་རྣམ་སྤྲུལ་ཀུན་མཁྱེན་ཇོ་ནང་པའི། །བསྟན་འཛིན་སྐྱེས་མཆོག་མི་ཡི་སེང་གེ་གང་། །ཀུན་བཟང་དབང་པོར་གྲགས་ལ་གུས་ཕྱག་འཚལ། །

ཞེས་ཆེད་དུ་བརྗོད་ནས། ཀུན་དགའ་ཤིང་སྟག་སྣྲོན་ཟླའི་ཚེས་མཁའ་འགྲོ་འདུ་བའི་ཉེར་གཉིས་སྔ་ཆར་བདག་པོ་དང་། བདག་པོ་ཆེན་པོའི་དབང་བསྐུར་བར་མཛད་པའི་བཀའ་དྲིན་ནི་ནམ་མཁའི་མཐའ་ཡངས་ཤོང་བར་དཀའ་ཞིང་། རྨད་དུ་བྱུང་བའི་ཐུགས་རྗེ་མཆོག་གི་འཛིན་པ་ལ་མཎྜལ་དུ་འདུས་དང་འདུས་མ་བྱས་པའི་དགེ་ཚོགས་ཀུན་བྱང་ཆེན་རྒྱུར་ཡོངས་སུ་བསྔོ་བ་ཉིད་དང་། གནས་སྐབས་སུ་ཡང་ཤེས་རབ་སྒྲུབ་པས་གཞི་བཟུང་། སྒོ་གསུམ་གུས་པས་ཕྱག་སྔོན་དུ་འགྲོ་ཞིང་། ཡང་དག་དོན་ལ་རྗེ་བཙུན་བླ་མ་དུས་རྣམས་ཀུན་ཏུ་ཁོ་བོའི་སྤྱི་གཙུག་གནས་ལས་གཞན་དུ་མི་གཡོ་མོད། འོན་ཀྱང་ཚུར་མཐོང་སྐྱེ་བོའི་སྣང་ངོར་ཙམ་དུ་སླད་མར་མཇལ་བར་སྨོན་ཅིང་། བདག་རེ་ཞིག་ཕྱོགས་མེད་གདུལ་བྱའི་ཕྱིར་དུ་འགྲོ་བར་འགྲོ་ཕྱག་གི་རྟེན་མཚོན་བྱེད་དུ། དཀོན་མཆོག་གསུམ་གྱི་བཀྲ་ཤིས་པའི་ཚིགས་བཅད་ཀྱི་རི་མོ་བཀྲ་བའི་ལྷ་རྫས་རྣམ་པར་དཀར་བ། རིན་ཆེན་དངུལ་གྱི་དོང་རྩེ་སོ་བདུན་ཚོམ་བུར་བཀོད་པ་གསེར་གཡུས་སྤྲས་པ་མཎྜལ་མཚོན་བྱེད་ཙམ་དང་རྣམ་གྲངས་མཚོན་པའི་བདུན་ཚན་ལྔ་ཡི་དང་པོར། དངུལ་གྱི་མཎྜལ་རྒྱ་ཐུར་གྱི་སྲང་གང་ཞོ་ལྔ། ལྟག་ཚར་གཡུ་གཉིས། སྤོས་ཤེལ་བཅུ་དགུ། བྱི་རུ་བཅོ་ལྔ། མུ་མེན་གསུམ་དང་མཆོང་བཅས་ཡོད་པ། ཧོར་དར་དམར་པོ་ཁ་དོག་འབྲལ། སྨན་རྙིང་ཁ་འབྲལ། རྒྱ་ཟམ་ཡུག་བཅས། ལ་དཀར་ཡུག ཐེར་མ་དཀར་པོ་སྦུག་རྣམས། བདུན་ཚར་གཉིས་པར་ཀོང་རྣ་ཨ་བསྐོར་གཡུ་བཅས། ཁ་བཏགས། སྨན་ཁ་འབྲལ། རྒྱ་ཟམ་ཟུག ཤམ་ཐབ་སྣམ་བརྒྱད། སེར་སྐེད། ཐེར་མ་དཀར་པོ་སྦུག་རྣམས། བདུན་ཚན་གསུམ་པར་ཁྲོམ་ཚར། ཁ་བཏགས་སྨན་ཁ་འབྲལ། སྟོད་དར་ཁ་འབྲལ། མོན་སྐེད་སྲན་ཐིག་མ། སྣམ་དཀར་རིང་ཐུང་གཉིས་རྣམས། བདུན་ཚན་བཞི་པར་ཀོང་རྣ་གཡུ་བཅས། ཁ་བཏགས། སྨན་རྙིང་ཁ། སྟོད་དར་ལི་དབང་ཁ་འབྲལ། སླེའུ་རྣམ་པ། འགའ་སྣམ། སྣམ་དཀར་སྦུག་བཅས། བདུན་ཚན་ལྔ་པར་མཆོད་ཀོང་ལི་ཏིང་བདུན་ཚར། ཡས་འགུ། མས་འགུ། རག་ཐུར་གཉིས། ལྕུང་འགག གའུ་གཉིས། ལི་སྡེར་བཅས་བཟང་དྲུག་སྨན་སྣས་གང་བ། བཀྲ་ཤིས་པའི་ལྷ་རྫས་བཅས་བདུན་ཚན་ལྔས་མཚོན་དངོས་པོའི་མཎྜལ་ཆ་ཕྲ་བར་ཡང་རྣམ་པར་དཀར་པོའི་བསམ་པས་རྡོ་རྗེ་སེམས་དཔའི་གསུང་ལ་ཡིད་ཆེས་པ་ཉིད་ཀྱི་སློབ་དཔོན་མཆོད་པ་ལ་དགའ་བ་དང་། སྤྲོ་བ་དང་། ཀུན་ནས་དུང་བ་དང་། མི་ཕྱེད་པའི་ཡིད་ཀྱི་བྱང་ཆུབ་ཆེན་པོའི་རྒྱུར་མྱུར་དུ་འཇུག་པར་འདོད་ཅིང་། སྨོན་ལམ་རྣམ་པར་དག་པ་དང་བཅས་པས་རྒྱ་མཚོ་ཆུ་ཐིགས་བཞིན་བགྱིས་པ་ན། རྡོ་རྗེའི་རྣལ་འབྱོར་པ་ཚེ་དབང་ནོར་བུས་སྐྱེ་བ་འདི་ནས་རྫོགས་པའི་སངས་རྒྱས་ཀྱི་གོ་འཕང་ནམ་ཐོབ་བར་དུ། འཇིག་རྟེན་དང་འཇིག་རྟེན་ལས་འདས་པའི་ཕུན་ཚོགས་ཀྱི་དཔལ་མ་ལུས་ཤིང་ལུས་པ་མེད་པར་ཐོབ་ཅིང་། སངས་རྒྱས་སྲས་དང་སློབ་མར་བཅས་པ་དགྱེས་པའི་ལས་ལ་བརྩོན་པ་དང་། རྡོ་རྗེ་སློབ་དཔོན་དགེ་བའི་བཤེས་གཉེན་བསྟེན་ཚུལ་མདོ་རྒྱུད་ནས་གསུང་པ་ཇི་བཞིན་ཉམས་པ་མེད་པར་སྤྱོད་ནུས་པ་དང་། བདག་ཉིད་མཐོང་ཐོས་དྲན་རེག་གི་འགྲོ་བ་རྣམས་ཀྱི་སྡུག་བསྔལ་རྩད་ནས་བཅད་ཅིང་བདེ་བ་མཆོག་ལ་བཀོད་པའི་མཐུ་སངས་རྒྱས་སྲས་གྱུར་གཞན་ཐམས་ཅད་ལས་ལྷག་པ་བདག་གི་བསྒྲུབ་ནུས་པར་གྱུར་ཅིག་སརྦ་མངྒ་ལཾ།

ན་མོ་མ་ཧཱ་མུ་དྲ་ཡེ། གདོད་ནས་རང་གི་ངོ་བོ་དྲི་མ་དང་བྲལ་ཡང་། །དྲི་མའི་གནས་ལུགས་རྟག་པར་བཞུགས་ཀྱང་དེ་མི་སྐྱོན། །ནམ་ཡང་མ་གོས་ཀུན་གཞི་བདེ་གཤེགས་སྙིང་པོ་ཞེས། །དེ་ཡི་རང་ཞལ་གསལ་བར་བསྟན་མོད་བླ་མ་རྗེ། །གང་གི་ཞབས་སེན་ཟླ་བ་ཚེས་འདྲ་བ། །སྐལ་ལྡན་བདེ་འབྱུང་དོན་དུ་ཉེར་བཅིངས་པས། །སྐྱེ་དགུའི་འཁྲུལ་མིན་ཡང་ནས་ཡང་གསལ་མཛོད། །གང་དེ་སྲིད་གསུམ་མགོན་དུ་རྟག་བརྩོན་མཛོད། །གྲུབ་པའི་ཤིང་རྟ་བཞི་པའི་དབང་གི་དོན། །ཕྱག་རྒྱ་ཆེ་ཞེས་གྲགས་པའི་མན་ངག་མཛོད། །རྡོ་རྗེ་སློབ་དཔོན་མཆོག་གྱུར་གང་ཁྱེད་ཀྱི། །ཞབས་ལ་ཕྱག་བྱས་ཚོགས་གཉིས་མཆོད་སྤྲིན་སྤེལ། །

ཞེས་གུས་པས་ཕྱག་དང་བཅས་ཏེ་ཆེད་དུ་བརྗོད་པ་སྔོན་དུ་བཏང་ནས་བཀའ་དྲིན་གསུམ་ལྡན་རྡོ་རྗེ་སློབ་དཔོན་འཇམ་དབྱངས་འཕྲིན་ལས་རབ་བརྟན་གང་གི་སྤྱན་སྔར་བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་ཚོགས་རྣམ་པར་གཉསི་ཡོངས་སུ་རྫོགས་པའི་ཆེད་དུ་ཟང་ཟིང་གི་མཎྜལ་མཚོན་ཙམ་ཕུལ་བ། ལྷ་རྫས་གངས་རིའི་མདངས་ལྡན། གོས་ཆོས་ངུར་སྨྲིག་ཁ་གྲུ། ཇ་ནག་པོ་ཤར་བརྡར། སྨན་ཁ་དོག་འབྲལ། གསེར་སྤུས་གཙང་ཞོ་གང་། རྡོ་བཅུད་ནཻ་པ་ལའི་དོང་རྩེ་སོ་བདུན། རས་དཀར་ཡུག རས་སྔོ་ཡུག རྣམ་དཀར་སྤུས་ལེགས་ཡུག རག་སྡིག་སྤུས་ལེགས། ལྕགས་སྐྱོགས་སྤུས་ལེགས། གཏོར་ཐེབས་གཅིག གོས་ཆེན་ཚོས་གཉིས་མ་ཁ་འབྲལ། གཡུ་གཅིག དུང་འཕྲེང་རྒྱན་ལྡན་གཅིག་བཅས་རྣམ་གྲངས་བཅོ་ལྔ་རྒྱ་མཚོ་རྒྱ་མཚོ་ཆུ་ཐིགས་ལྟར་འབུལ་ལམ་ཞུས་ནས་འདོད་དོན་གསོལ་བ། བདག་ནི་སྐྱེ་བ་འདི་ནས་བྱང་ཆེན་བར། །ཁམས་དྲུག་ལུས་ཐོབ་མཚན་ལྡན་བླ་མ་མཇལ། །རྒྱལ་བསྟན་སྒོར་ཞུགས་ཐེག་ཆེན་ལམ་ལ་སྤྱོད། །སྔགས་ལམ་སྨིན་གྲོལ་གདམས་པ་མྱུར་ཐོབ་ཤོག །འཁོར་བ་ལ་སུན་ཞེན་ལོག་རྒྱུད་ལ་སྐྱེས། །ཐར་པའི་ལམ་སྟོན་བླ་མར་མོས་གུས་བརྟན། །རྒྱུ་འབྲས་འདོར་ལེན་དམ་ཚིག་བསྲུང་ལ་བསྟོན། །རྣམ་རྟོག་གཞི་མེད་རྩ་བྲལ་སྤྲོས་བྲལ་ཤར། །གཉིས་ཚོགས་མཉམ་ཉིད་རྟོགས་པའི་རོ་གཅིག་མྱོང་། །བསྒོམ་མེད་རྒྱལ་བའི་གདན་ས་ཟིན་པར་ཤོག །མདོར་ན་བཀའ་བརྒྱུད་རྒྱལ་པོ་འབྲུག་པ་ཡི། །རྣམ་དག་འཛིན་པ་རྒྱ་ཆེན་འཕྲིན་ལས་ལྡན། །མ་ནོར་འཁྲུལ་པ་མེད་པའི་རྣམ་རྟོག་ཀུན། །དེ་རིང་ཉིད་ནས་བདག་གི་ཐོབ་པར་ཤོག །

ཅེས་བྲང་སོ་རྫོང་ཕུའི་སྤྲུལ་པའི་སྐུ་འཕྲིན་ལས་རབ་བརྟན་ཞབས་དགྱེས་པར་བྱེད་པ་ཤེས་རབ་དང་། སྒྲུབ་པའི་མཎྜལ་གཙོ་བར་གསུངས་པའི་རྗེས་མཐུན་ཙམ་དང་། གནས་སྐབས་དངོས་པོའི་མཎྜལ་ཆ་ཤིན་ཏུ་ཕྲ་བ་ཅུང་ཟད་འབུལ་བའི་འབུལ་ཡིག་ཏུ་རྒྱལ་ཁམས་བྱ་བྲལ་རྟོགས་ལྡན་ཚེ་དབང་ནོར་བུས་སྨྲས་པའི་ཡིག་རིས་མཁས་པ་དམ་པ་འཕྲིན་ལས་བསྟན་འཛིན་ནོ། །མངྒ་ལཾ། དགེའོ། །