༈ ཨོ་རྒྱན་ངག་དབང་ཡེ་ཤེས་བཟང་པོར་ཕུལ་བ།
ན་ཆུང་ཡོངས་ཀྱི་སྙིང་ནོར་ཡན་པ་བློ་བདེ་མ་བཅོས་གདོད་མའི་ཟོག་པོས། སྙིང་གི་ཐིག་ལེར་རབ་མཛེས་ཤཱཀྱའི་དགེ་སློང་གང་གི་སྐུ་མདུན་དུ། ཕུལ་ལགས།
སྙིང་གི་ཐིག་ལེར་རབ་ཏུ་མཛེས་པ་བླ་མ་ཨོ་རྒྱན་ངག་དབང་ཡེ་ཤེས་དཔལ་བཟང་པོའི་ག་ལ་བར། སྟབས་བདེར་ཕུལ་བའི་ཡི་གེ །དེར་སྐབས་བཅུ་དྲུག་ཆ་ཤས་སེང་གེ་མོ་ཡི་བུ་ལས་ཐར་ལྟར། སྐུའི་དཀྱིལ་འཁོར་ཉེས་ཚོགས་ལས་གྲོལ་ཏེ་བཞུགས་པ་མཆོག་ཏུ་དགའ་བའི་ཡིད་བདེ་ཐོབ། འདིར་གནས་རིགས་སྔགས་འཆང་བ་ཡང་། བསྟན་འགྲོར་ལྷག་བསམ་ལྷོད་མེད་རིམ་གཉིས་བརྩོན་ཁུལ་ངང་དུ་གནས། མཚམས་ཞུ། རྗེ་བཙུན་བླ་མ་དམ་པ་གཞན་དོན་གཟིགས་རྐྱེན་ལ་བརྟེན་ཐུགས་རླུང་སྐྱེས་པ་སྔོན་ལས་འཕྲལ་རྐྱེན་གང་ཡིན་ཕེབས་པ། འཕྲལ་གཡེང་དབང་གིས་རྨི་ལམ་ངེས་ཏིག་མ་བྱུང་ཡང་། ཡིད་ལ་ནི། ཕལ་ལ་སྡུག་བསྔལ་བྱས་པས་ཡུལ་དེར་གནོད་ཀྱང་། བླ་མའི་ཆེད་དུ་སྡུག་བསྔལ་གྱིས་མཆིལ་མ་སྲན་ཙམ་བཀླགས་པས་ཡང་། སྐལ་པ་རེ་ཡིས་སྒྲིབ་པ་དག་པར་བཤད་པས་ན། བླ་མ་ཞིང་གཞན་གཤེགས་པའི་སྐྱོ་ཤས་ཀྱིས་ནད་ཁམས་དེ་ལྟར་བསྐྱེད་པ་ནི།
སྔོན་ལས་སྐུ་ཚེ་ཕྱི་མར་སྨིན་འོས་ཤིག་ཚེ་འདིར་དག་ནས། ཕྱིས་ཀྱི་ཉེར་ལེན་བཅོམ་པར་གོར་མ་ཆག་སེམས་བྱུང་། འོན་ཀྱང་འཕྲལ་རྐྱེན་ཆ་ཤས་ཙམ་ནི། གནས་རྙིང་མཚུན་འདྲེ་ཞིག་གི་འཚུབ་ལྡོག་ལྟས་ཀྱང་ཤར་བས། མདོས་བསྐང་གི་སྐར་བཅོས་མི་རིགས་དང་། གཉེན་པོ་དྲག་བསྙེན་ལ་འབད་ན་ལེགས་པས་དགོངས་འཚལ་ལ།
ཁྱད་པར་དུ། སེམས་ཀྱི་འཚུབ་ཉམས། སྡུག་བསྔལ། ཡེང་མ་ཡེང་སྙམ་པའི་བློ་སོགས། གང་མི་བདེ་བ་དེ་ཀ་སྤང་གཉེན་ཀློད་བྱར་མེད། ཁོ་རང་དེ་ཀ་བསྒོམ་ཡིན། དྲན་པ་ཡིན། རིག་པ་ཡིན་གྱི། ཡིད་མི་བདེ་བ་དེ་ལས་གཞན་པའི་སེམས་དང་། སེམས་ལས་གཞན་པའི་ཡིད་མི་བདེ་བ་མེད་དེ། སེམས་ཉིད་དང་རྣམ་རྟོག་གཉིས་ཚན་དང་། བྱེ་བྲག་ནམ་དུ་ཡང་མ་བྱུང་བས། ཡིད་བདེ་མི་བདེ་ལ་སྤང་བླང་ཅི་ཡོད། གང་ཤར་གདོང་འདེད་ངང་ལ་ལམ་དུ་ཁྱེར་བ་སྟེ། ལམ་ཁྱེར་ཞེས་པ་སྟེ་ཡང་གཉེན་སྤྲད་རྒྱུ་ནི་མེད་མོད། དཔལ་དྭགས་པོ་ཡབ་སྲས་ཀྱི་མ་ཡེངས་དྲནཔར་བཏགས་པ་དེ་ཀ་སྟེ། དྲན་པ་ཞེས་པ་དེ་ཡང་། བསྒོམ་འདུན་དང་རིག་རིག་ཏུར་ཏུར་པོ་ག་ལ་ཡོད། ཡང་དག་པའི་དྲན་པ་ནི་དཔེར་བརྗོད་བསམ་པའི་ཡུལ་ཐམས་ཅད་ལས་འདས་པ་སྟེ། དེའི་གནད་ཐུན་མོང་མ་ཡིན་པ་རྫོགས་ཆེན་ནས་རིག་པ་ཅོག་གཞག་ཏུ་གྲགས་ཏེ།
ལས་དང་པོའི་སྐབས་སུ་གཞག་ཐབས་གྲིམ་ལྷོད་དུ་མ་བཤད་ཀྱང་། ལྷག་མཐོང་རྒྱུད་ལ་སྐྱེས་ཚེ་དྲན་པའམ། རིག་པ་འདི་བྱ་འདི་བྱེད་འདི་བསྒོམ་དེ་བསྒོམ་མེད་པའི་ཡན་པ་བློ་བདེ་བྱ་བ་དེ་ལགས་ཏེ། བདེ་སྡུག་གང་ཡང་ལྟ་བ་ལས་གཞན་དུ་མ་གྲུབ་པ་དེ་ག དེ་དང་ལ་རྒྱུན་ཆད་མེད་པར་ཉམས་སུ་ལེན་པ་ལམ་ཁྱེར་ཏེ། ཡང་དག་པ་མཐར་ཐུག་ཚེ་ཉམས་སུ་ལེན་བྱ་ལེན་བྱེད་ཀྱང་གཞི་མེད་རྩ་བྲལ་ཡེ་སྟོང་དུ་ཐག་ཆོད་པ་ཉིད་དེ། གང་ཡང་བྱ་རྒྱུ་མེད་པའོ། །ཅི་ཞུ་ན་སྡུག་བསྔལ་འཚུབ་ཉམས་དེ་ཉིད་ལམ་དུ་ཁྱེར་བའི་ཡུལ་མཐིལ་པོ་ལགས་པས་དེ་ལྟར་འཚལ། དེས་ནི་རྐྱེན་ངན་གྱི་སྟེང་དུ་གྲུབ་པ་ཐོབ་ཞེས་པ་དེ་ཡོང་བ་ལགས། དེ་དག་ཐུགས་ནང་ཆེས་དག་དམ་ཚིག་འདྲེ་ལ་བརྟེན་དགོངས་པར་དུས་སུ་བབས་སྙམ་ནས་ཕུལ་བ་ཐུགས་ལ་འཇུག་པ་དང་།
ཕྱིས་ངོས་སུ་མཇལ་བར་གྱུར་ན་ཞིབ་མོལ་རྒྱས་པར་སྤྲོ་ལགས། ཐུགས་ལ་བབས་པའི་ཆོས་བཀའ་འདྲ་ཡང་ཕུལ་བཞེད་དོ། །དེ་སྲིད་དུས་རྣམས་ཀུན་ཏུ་རང་རིག་དག་པ་ཆོ་འཕྲུལ་གྱི་འཁོར་ལོ་རུ་གཡེལ་མེད་བརྩེ་བར་བགྱིད་ཀྱི་དགོངས་པར་འཚལ།
ད་ལམ་བསྙུན་ལས་གྲོལ་བའི་ལེགས་སྐྱེས་སུ། །དཀར་དམར་རེག་བྱ་ཐབས་དང་ཤེས་རབ་མཚོན། །ལྔ་ལྡན་རྡོར་མདུད་སྐུ་དང་ཡེ་ཤེས་ཏེ། །སྣ་གསུམ་དེར་ཕུལ་ཚེ་འཕྲང་གསུམ་གྲོལ་ཤོག །
དེ་སྐད་རྟ་མཆོག་བྱིན་རླབས་བཙན་ཡུལ་བྱང་། །གུ་རུའི་ཞབས་བཅགས་ཟླ་གམ་འབར་བ་ཡིས། །ཕུག་ནས་སྔགས་འཆང་ཡན་པ་བློ་བདེ་བས། །ཐུན་མོང་གྲོ་ཞུན་ཟླ་༢པའི་ཚེས་༣ལ་སྤེལ།
རྗེ་བཙུན་བླ་མ་རིན་པོ་ཆེ་བློ་གྲོས་ཆོས་འཕེལ་ཞབས་ཀྱི་རྣམ་ཐར་སྔར་གནང་བ་དེ་ལ་བསྣོན་འོས་རྣམས་བསྣོན་པ་དང་མྱ་ངན་འདས་འབྱུང་བཅས་རྒྱས་པ་ཞིག་གནང་བ་དང་། ཕྱག་ཆེན་བླ་བརྒྱུད་འབའ་ར་ནས་ནམ་མཁའ་རྒྱལ་མཚན་བར་ཡིད་ལ་མ་ངེས་འདུག་པས་ཤོག་ཚར་ཞིག་ཀྱང་གནང་འཚལ།
ལགས། རྗེ་བཙུན་བླ་མ་དམ་པ་རྡོ་རྗེ་འཆང་ཁམས་ལོངས་སྐུ་ཞབས་ཀྱི་རྣམ་པར་ཞིག ཕྱིས་ཀྱི་ཆོས་བརྒྱུད་ལ་མཁོ་ཁ་གཅེས་པར་འདུག རབ་སྐུ་ཞབས་རང་ནས་གསུང་རྩོམ་དང་། མ་གནང་ན། ཞལ་ལས་ལོ་རྒྱུས་གནང་བ་རྣམས་མ་བར་བསྡུ་བ་དང་། ཐུན་མིན་རྣམས་ཀྱང་སྐལ་ལྡན་དངས་པ་འདྲེན་ཕྱིར་ཅིས་ཀྱང་གནང་བའི་གསོལ་བ་འདེབས་པ་ལ་བརྩོན་དགོས་ལགས། ཤིན་ཏུ་གལ་ཆེ་ཆེའོ། །རྣམ་ཐར་བསྡུ་བ་པོ་འོས་སུ་བབ་པ་ཉིད་ཁོ་ན་མཐོང་བས་དགོངས་པར་ལེ་ལོ་མེད་པར་ཞུ་ཞུ།
ཞེས་རྟེན་འབྱུང་བའི་ཤུ་ཀྲ་ཟླ་བ་རྒྱས་འདྲ་དུས་ཀྱི་གྲངས་ལྡན་ཕུལ། ཤེས་བྱའི་གནས་ལ་བློ་གྲོས་ཀྱི་པདྨོ་རྒྱས་པ་དགེ་སློང་རྡོ་རྗེ་འཛིན་པ་གང་གི་སྐུ་དྲུང་དུ། སྐྱེ་རེ་ཡང་དབེན་ནས་རིག་པ་འཛིན་པས། པདྨའི་སྤྱན་སྔར་སྨོན་ལམ་རྣམ་པར་དག །ཆེ་མཆོག་ཕུར་པའི་བཀའ་བབ་རིག་པ་འཛིན། །ཡེ་ཤེས་གཞོན་ནུའི་འོད་ཟེར་བརྒྱ་ཕྲག་འགྱེད། །དེས་བྱིན་རླབས་ཁྱོད་རྟག་ཏུ་རྒྱལ་གྱུར་ཅིག །དེང་དུས་ཁམས་དྲུག་རྡོ་རྗེ་སྐུ་གཡོ་མེད། །འཚོ་ཞིང་གཞེས་ནས་རྡོ་རྗེ་གསུམ་དཀྱིལ་འཁོར། །བསྒོམ་བཟླས་ཏིང་འཛིན་རོལ་པར་རྟག་བརྩོན་ཞིང་། །རང་གཞན་དོན་གཉིས་བསྒྲུབ་ལ་རྗེས་ཡི་རང་། །འདིར་གནས་རྒྱལ་དབང་པདྨའི་ཕོ་ཉ་བར། །གང་དེས་རྡོ་རྗེའི་གསུང་གི་དབུགས་དབྱུང་བའི། །རིག་པ་འཛིན་ཞེས་མིང་སྐམ་ཕྱོགས་ཐ་གྲུར། །ཁྱབ་པ་དེ་ཡང་སྔ་ཕུང་སྙོམས་ཁུལ་མཆིས། །རང་ཅག་སྐྱེ་སྔོན་སྨོན་ལམ་བཟང་པོའི་མཐུས། །ཚེ་འདི་ལ་ཡང་འཕྲད་ཅིང་བདག་བློར་གཤིས། །དེ་བཞིན་ཁྱོད་བློ་དད་པའི་བུམ་བཟང་ལ། །མོས་གུས་ལམ་འགྱངས་མེད་པའི་བཅུད་ཀྱིས་གཏམ། །ངེད་དང་མེ་ལུག་ལོར་འཕྲད་ད་ལྟའི་བར། །དམ་ཚིག་སེལ་མེད་དཔག་བསམ་ཤིང་ལྟར་མཛེས། །སླད་མར་ཇི་སྲིད་འཚོ་ཡི་བར་དག་ཏུ། །བར་ཆད་བདུད་ཀྱི་ནམ་ཡང་ཕྱེད་མིན་པ། །ཕ་ལམ་རྡོ་རྗེའི་རི་བོ་ཇི་བཞིན་དུ། །དམ་ཚིག་གཉེན་ལས་འདའ་མེད་སྤྱོད་པར་སྨོན། །རིང་པོ་མ་ཡིན་མྱུར་བ་ཉིད་འཕྲད་ནས། །དམ་པའི་དགའ་སྟོན་འབེལ་མཆིད་བགྱིད་ཀྱང་སྤྲོ། །དུས་རྣམས་ཀུན་ཏུ་དགེ་བའི་བསྲུང་འཁོར་གྱིས། །ར་བ་དག་ལས་ཁྱོད་ཉིད་འདོར་མིན་པས། །ནམ་ཞིག་པདྨ་འོད་དུ་པད་འབྱུང་གིས། །སྤྱན་སྔར་ཚོམ་བུ་གཅིག་ཏུ་འཁོད་པར་སེམས། །དེ་སྐད་སྐྱེ་རེ་རིག་གནས་སྒྲུབ་ཕུག་ནས། །ཆུ་གླང་ཧོར་ཟླ་དྲུག་པའི་ཚེས་༢༣བཟང་པོར། །ལྷ་རྫས་རྣམ་པར་དཀར་བའི་རྟེན་དང་བཅས། །ལྷག་བསམ་དགེ་བ་ཡིད་ཀྱི་ལེགས་པར་སྤེལ། །