༈ རྡོ་རྗེའི་སློབ་མ་ལས་སྐལ་ལྡན་པ་གང་དེའི་སྐུ་དྲུང་དུ།
རིག་སྔགས་འཛིན་པས་ཕུལ། ལགས། གནས་ཚུལ་སྟབས་བདེའི་འབུལ་བའི་ཡི་གེ །འདིར་གནས་པ་དཔལ་གྱི་བྷུ་ཊ་དང་། ལྷ་གདོང་། རྒྱལ་གྱི་ཤྲི་སོགས་བརྒྱུད་ནས་བུ་ལེ་གངས་ཀྱི་ར་བར་བགྲོད་པའི་ལམ་ལུགས་སུ་གནས་ཤིང་། ཕྱོགས་དེར་འཁོད་པའི་མི་དང་མི་མ་ཡིན་པ་རྣམས་ལ་སྨིན་པའི་བསམ་བློ་མི་དོར་བར་འོད་གསལ་རྡོ་རྗེ་སྙིང་པོའི་བསྟན་པ་སྤེལ་འདུན་བཅས་མཆིས་ཞེས་འདི་ཀའི་གནས་ཚུལ་དང་། དེ་ནས་འདི་ལོ་འབར་རར་ཕེབས་ཐུབ་པ་ཞིག་བྱུང་ན་བཀའ་བརྒྱུད་གོང་མའི་བསྟན་པ་ཕན་ཐོགས་འབྱུང་བ་དང་། ཉིད་ཀྱི་ཡང་བར་ཆད་འགའ་ཞིག་སེལ་བར་འགྱུར་བའི་ལེགས་ལམ་ཆེ་བར་ལྟས་ཡོད་རུང་། ཆོས་ལ་འཚེ་བ་མང་བ་ཇི་བཞིན་དུ་བོལ་བ་དེ་ཅུང་ཟད་རྟེན་འབྲེལ་ལ་གནོད་མོད་ཀྱང་། རང་བཞིན་རྫོགས་པ་ཆེན་པོའི་རྣལ་འབྱོར་ལ་གང་ཤར་གདོང་འདེད་ལས་ཆེད་འཛིན་ནི་བྱར་ཅི་ཡོད། དེས་ན་རེ་ཞིག་འབའ་རར་མ་ཕེབས་ཕྱིན་ཚེའི་བར་ཆད་སེལ་བའི་རྟེན་འབྲེལ་ལེགས་ལམ་གང་འགྲིགས་ཀྱི་ངོས་ཁྲེག་ཆོད་ལྟ་བའི་གནས་ལུགས་ཕྱག་རྒྱ་ཆེན་པོའི་ངོ་བོ་ལ། སེམས་ཀྱི་རང་བཞིན་འོད་གསལ་བ་ཐོད་བརྒལ་གྱི་ཉམས་ལེན་ཟུང་འཇུག་ཏུ་སྤེལ་བ་མཐིལ་དུ་བཙུགས། ལྷ་སྔགས་རླུང་ཐིག་གི་རྩལ་སྤར་ཏེ་ལོ་རེའི་སུམ་ཆ་གཉིས་བཅད་རྒྱ་དང་། སུམ་ཆ་གཅིག་གཞན་ཕན་གྱི་འཕྲིན་ལས་ལ་བརྩོན་པར་ཐུགས་ལ་བཞུགས་པ་གལ་ཆེ་ཞིང་།
སྤྱིར་གསང་བར་འོས་པ་ཅུང་ཟད་ཞིག་འདིར་བརྗོད་ན། བདག་ཚེ་དབང་ནོར་བུ་ལ་སངས་རྒྱས་ཐམས་ཅད་ཀྱི་འཁོར་ལོས་བསྒྱུར་བ་གསུང་གི་རྡོ་རྗེ་ཆོས་འོད་དཔག་ཏུ་མེད་པ། གུ་རུ་པདྨས་ལུང་བསྟན་པ་ལྟར་ན་རང་གཞན་གྱི་དོན་གཉིས་འགྲུབ་ངེས་པའི་སློབ་མ་བདུན་ཅུ་རྩ་ལྔ། ཐར་པའི་ལམ་རྐང་ཟིན་ངེས་པ་བདུན་བརྒྱ། ཕྲ་མ་ཆོས་ཀྱི་འབྲེལ་པ་ཁྲི་ཕྲག་ལོང་བ་རུ་ལུང་བསྟན་པས། དེ་དག་རྣམས་ཀྱང་བདག་གི་སྐྱེ་བ་འདི་གཅིག་པུར་ནི་མ་ངེས་ལ། དེ་ཡང་ལྷོ་བྲག་མཁར་ཆུ་གནམ་སྐས་ཅན་གྱི་ཐུགས་གཏེར་གུ་རུ་ཆོས་དབང་དང་། གསང་གཏེར་གྱི་རཏྣ་གླིང་པས་སྤྱན་དྲངས་ཚར་བ་ཉིད་སྟེ། ཟབ་གཏེར་ནི་ཁོ་བོ་ལ་དབང་བར་ལུང་བསྟན་པ་ལགས་ན་ཡང་སྐྱེ་བ་སྔ་མ་འགའ་ཞིག་གི་རྟེན་འབྲེལ་ལ་བརྟེན་ནས་ཚེ་འདིར་རྔོ་ཐོགས་པ་ཞིག་མི་ཡོང་བ་འདྲ་བས། དེས་ན་སྐྱེ་བ་ཕྱི་མར་ཟབ་གཏེར་དེ་འདོན་སྐབས་གོང་དུ་ལུང་བསྟན་པ་ཕལ་ཆེར་ཀྱང་འགྲིག་པར་མངོན།
ལྷོ་བྲག་གི་ཟབ་གཏེར་ཐོན་པའི་སྐྱེ་བ་དེ་ནས་ལས་རླུང་གི་རྒྱུ་བ་ཆད་དེ། ད་ལྟའི་སྤྲུལ་པའི་རིགས་རྒྱུད་འི་ཀ་སྤྲུལ་གཞི་བཛྲ་ཧེ་རུ་ཀའི་གོ་འཕང་ལ་ངེས་པར་བཞུགས་པ་རིག་འཛིན་ཐུགས་ཀྱི་རྡོ་རྗེའི་དགོངས་ཀློང་དུ་ཐིམ་པར་བཤད་སྟེ། དེ་དག་ནི་གསང་བར་འོས་པའི་ཚིག་ཡིན་ཀྱང་སྐལ་བ་དང་ལྡན་པའི་སློབ་མ་ཉིད་ལ་གནས་ཚུལ་མ་སྦས་པར་སྨྲས་པ་ཡིན་ལ། འདིར་བརྗོད་བྱའི་དངོས་པོ་ནི་གོང་གི་འཕྲོས་རང་གཞན་གྱི་དོན་གཉིས་ལྷུན་གྱིས་གྲུབ་ངེས་པའི་སློབ་མ་བདུན་ཅུ་རྩ་ལྔའི་ནང་ནས་མཆོག་གི་སྐྱེས་བུ་སུམ་ཅུ་རྩ་དྲུག་ལས་ཉེ་བའི་བུ་བརྒྱད་ཀྱི་ནང་ནས་གཅིག་དམ་པ་ཉིད་ཡིན་སྟེ། དེ་ཡང་གསང་བའི་ལུང་བྱང་ལས། ད་ལྟའི་ཛྙཱ་ན་ཀུ་མའི་རྣམ་སྤྲུལ་ནི༔ མང་ཡུལ་རི་རྒྱལ་དཔལ་འབར་ཤར་གྱི་ཆར༔ སྔགས་སྐྱེས་ཛྙཱ་ནའི་མིང་ཅན་སྙིང་སྨེ་ཅན༔ བྱང་སེམས་ཤེས་རབ་ལྡན་པའི་སྐྱེས་བུ་འབྱུང་༔ ཞེས་པའི་ལུང་དོན་ལྟར་སོམ་ཉི་མེད་པར་ཉིད་ཡིན་གྱི། དེས་ན་ཕྱོགས་དེར་སློབ་མའི་ཐུ་བོར་གྱུར་པ་སྙིང་གི་བུ་བཞིའི་ནང་ཚན་སྤྲུལ་པའི་སྐུ་པདྨ་འགྱུར་མེད་ནོར་བུ་དེ་དང་། རྗེ་ཉིད་རང་ལུང་ཟིན་གྱི་སློབ་མ་ལགས་པས་ཆོས་ཀྱི་བརྒྱུད་བཟུང་ལ་གཞན་དོན་གྱི་འཕྲིན་ལས་ནམ་ཡང་མི་སློད་པར་ཐེག་ཆེན་སྤྱི་དང་། ཁྱད་པར་སྔགས། དགོས་སུ་བཀའ་བརྒྱུད་ཀྱི་རྒྱལ་པོ་དྲི་མ་མེད་པ་སྟོད་འབྲུག་རང་ལུགས་ཀྱི་མན་ངག་ཕྱག་རྒྱ་ཆེན་པོའི་ཁྲིད་ཆེན་བརྒྱད་དང་བཅས་པ། རྫོགས་པ་ཆེན་པོ་ཀློང་གསལ་མཁའ་འགྲོ་སྙིང་ཐིག་གི་མན་ངག་གཞན་ལས་ཁྱད་པར་དུ་མ་བྱས་པའི་སྨར་ཁྲིད་རྣམས་སྐལ་ལྡན་གྱི་སློབ་མ་རྣམས་ལ་སྐྱོ་དུབ་མེད་པར་གང་ནུས་སུ་སྤེལ་བར་འཚལ་ཞིང་། དེས་ནི་དུས་གསུམ་གྱི་རྒྱལ་བ་རྣམས་ཀྱི་དགོངས་པ་བསྐངས་ཤིང་བརྒྱུད་པའི་བླ་མ་གོང་མ་རྣམས་ཀྱི་ཐུགས་ཀྱི་དགེས་དགུ་འགྲུབ་པ། དེ་བཞིན་དུ་གདུལ་བྱའི་དོན་དུ་ཡང་སྲིད་འཇུག་པར་རློམ་པའི་རིག་པ་འཛིན་པ་ཚེ་དབང་ནོར་བུའི་ཡང་ཁྱོད་ལ་རྗེས་སུ་ཡི་རང་ཞིང་། གཞན་དོན་དུ་དབུགས་དབྱུང་བ་དང་གཟེངས་བསྟོད་དོ། །
ཅིའི་ཕྱིར་ཞེ་ན། ཚེ་འདིར་དམ་སེལ་མེད་ཅིང་རིམ་གཉིས་ཀྱི་སྦྱོར་བ་ལ་བརྩོན་ན་ད་སྟེ་རགས་པའི་སྐྱེ་བ་བཅུ་གཉིས་བགྲོད་མཐར་ཧེ་རུ་ཀའི་གོ་འཕང་ལ་རེག་སྟེ་རང་ཅག་དཔོན་སློབ་ཐུགས་ཡིད་གཅིག་ཏུ་འདྲེས་ཤིང་ཚོམ་བུ་རུ་འཁོད་པར་འགྱུར་རོ་ཞེས་པ་ཐ་ཚིག་གོ །འོན་ཀྱང་འདིར་ལྟར་སྨྲ་བར། ཁ་ཅིག་གི་བློ་རུ་མི་ཤོང་ཞིང་ཡིད་གཉིས་ཀྱི་ཆུ་རླབས་དྲག་ཏུ་གཡོ་བའི་རྐྱེན་དུ་འགྱུར་བས་བརྗོད་པའི་གོ་སྐབས་མེད་ཀྱང་། ཉིད་ཀྱི་ཡང་ནས་ཡང་དུ་དོ་གལ་ཆེན་པོས་བསྐུལ་ཚེ་གསུང་གཅོག་པའི་ཉེས་བྱས་སུ་དོགས་ནས་འདིར་བརྗོད་པ་ཡིན་གྱིས། དེ་ལ་གཞན་དག་མགུ་དང་མི་མགུ་ཇི་ལྟར་ཤར་ཡང་རང་གི་དྲང་པོའི་གཏམ་ཚིག་སྦྱོར་བ་ལ་ཡ་ང་བ་དང་བག་ཚ་བ་མ་མཆིས་ཏེ།
གང་ཞེ་ན། སློབ་དཔོན་ཆེན་པོ་པདྨ་འབྱུང་གནས་ཀྱི་གསུང་སྔ་རབས་གཏེར་སྟོན་ཚད་ལྡན་གྱི་ལུང་དུ་མ་ནས་ནི་རང་ཉིད་བསྔགས། འཕགས་ཆེན་གྱི་ས་ལ་བཞུགས་པའི་སྐྱེས་བུ་དམ་པ་རྣམས་ཀྱི་ནི་གཟེངས་བསྟོད། ཁྱད་པར་དུ་བླ་མ་དམ་པའི་བྱིན་རླབས་སྙིང་ལ་ཞུགས་པས་ལྟ་བའི་གནས་ལུགས་མ་འཁྲུལ་བ་མཐོང་བས་ན་རང་གིས་རང་ལ་དབུགས་དབྱུང་། བླ་མ་ཡི་དམ་མཁའ་འགྲོ་རྣམས་ཉམས་དང་རྨི་ལམ་གྱི་སྣང་བར་ཡང་ཡང་མཇལ་ཞིང་རྒྱུད་བྱིན་གྱིས་རླབས། ཚེ་འདི་སྣང་གི་ཞེན་པ་ནི་སྔོན་ལས་ཀྱི་འཕེན་པས་བྱིས་པའི་དུས་ནས་ཆ་ཕྲ་བས་རང་འདོད་གཡོ་སྒྱུའི་གཞན་མགོ་བསྐོར་བ་ནི་གཏན་ནས་མེད། ཁྱད་པར་མི་ཆོས་བླ་མའི་རྫུན་ནི། སོ་ཐར་གྱི་ཕམ་ལྟུང་དང་། བྱང་སེམས་ཀྱི་རྩ་ལྟུང་དུ་འགྱུར་ཞིང་།
རིག་འཛིན་སྔགས་ཀྱི་སྐབས་སུ་ཡང་ངག་གི་ནུས་པ་བདེན་ཚིག་ལས་འབྱུང་ཕྱིར་དེས་ན་དེ་ལྟ་བུའི་བརྫུན་ཚིག་ནི་སྨྲ་བའི་དོ་གལ་ཅི་ལ་མཆིས་པས། ཚུལ་བཞིན་བརྗོད་པའི་གཏམ་ལ་གཞན་མི་འགུ་བར་སྲིད་ཀྱང་། དོན་དེས་རང་ཉིད་ཞུམ་པ་མ་མཆིས་སོ། །དེ་ལྟར་ད་ལམ་གནས་ཚུལ་ལས་འཕྲོས་ཏེ་ཚད་མའི་ལུང་གི་སྐྱེ་འཕྲེང་གི་སྙིང་པོ་གསལ་བར་བྱས་ཤིང་། ཆ་ཤས་འགའ་ཞིག་ནི་རྟེན་འབྲེལ་ལ་དམིགས་ཏེ་སླད་མར་གླེང་བར་འདོད་དོ། །ཞེས་རྟེན་ཙཎྜ་ལིའི་ཁ་དོག་ཅན་གྱི་དར་རྡོ་རྗེའི་མདུན་པ་གསུམ་གྱིས་བརྒྱན་ཏེ་ལྕགས་ཕག་ཧོར་ཟླ་བཅུ་པའི་ཡར་ཚེས་༤ལ་ལ་སྟོད་རྒྱལ་གྱི་ཤྲིའི་ངོགས་ནས་རིག་པ་འཛིན་པར་གྲགས་པ་དེས་སྤེལ།
སྔོན་བསགས་བསོད་ནམས་དག་པའི་ལས་འབྲས་ཀྱི། །མངོན་མཐོ་རྣམ་པར་དགེ་བའི་རིགས་འཁྲུངས་ཤིང་། །ངེས་ལེགས་བསླབ་གསུམ་ཡོན་ཏན་ཡོངས་ཀྱི་སྤུད། །བཤེས་གཉེན་དམ་པ་རྡོ་རྗེ་འཛིན་དེའི་དྲུང་། །རྣམ་མང་འདུ་འཛིའི་རྒྱ་མཚོ་འཁྲུག་པའི་དབུས། །ལྷག་བསམ་གསེར་གྱི་གླིང་ལ་ཡོངས་བརྟན་ནས། །དོན་གཉིས་རིན་ཆེན་བླང་ལ་ཆེས་བརྩོན་པའི། །སྤྲུལ་པའི་མིང་ཙམ་འཛིན་པ་དེས་སྨྲ་མཆིད། །རྣམ་དཀར་དགེ་བས་སྤྱོད་པའི་བློ་མཚོ་ལ། །དྲི་མེད་ཟླ་ཤར་བྱིན་རླབས་ཟླ་རིས་ཀྱི། །ཡོངས་འཁྱུད་སྙིགས་དུས་འགྲོ་བའི་ཚ་གདུང་རྣམས། །སེལ་མཁས་སྙིང་གི་བུ་ཁྱོད་རྒྱལ་གྱུར་ཅིག །
ཁྱོད་ཀྱི་བློ་ལ་ཉེས་པའི་སྐྱོན་མེད་ན། །ཅལ་སྒྲོགས་གཏམ་གྱིས་སྒྲིབ་པར་འགྱུར་མིན་གྱིས། །ཆ་ཤས་སྲིད་ཀྱང་སྟོབས་བཞི་ཚང་བ་ཡིས། །བཤགས་པས་དེང་ནས་སོར་ཆུད་བདག་དབུགས་དབྱུང་། །འོན་ཀྱང་རྟག་ཏུ་མཉམ་གཞག་དྲན་པ་ཡི། །ཕྱིན་ཆད་གཡོ་མེད་དམ་ཚིག་ཆེ་སྐྱོང་འཚལ། །ཁྱོད་དང་བདག་གཉིས་སྨོན་ལམ་དག་པའི་མཐུས། །སྐྱེ་བ་འགའ་རུ་ཚོམ་བུ་གཅིག་ཚོགས་སེམས། །དམ་སེལ་མ་བྱུང་སྐྱེ་བ་ཕྱི་མ་ཡང་། །རྟག་ཏུ་འགྲོགས་པར་འགྱུར་ལ་ཐེ་ཚོམ་མེད། །དེ་ཕྱིར་འདི་ཕྱི་དགེ་བའི་ལེགས་སྨོན་ལ། །འབད་པ་ཆབས་ཅིག་གཡེལ་བ་མེད་ཀྱང་འཚལ། །དེ་སྐད་རང་བཞིན་རྫོགས་ཆེན་རྣལ་འབྱོར་པ། །གུ་ཡངས་ཁྱབ་བརྡལ་སྤྱོད་པའི་སྨྱོན་པ་ནི། །ཚེ་དབང་ནོར་བུ་གཟའ་གཏད་བྲལ་བ་ཡིས། །རུ་ལུག་གྱོང་ནས་ཟླ་ཚེས་དགེ་ལ་ཕུལ། །