སྐྱེས་མཆོག་དམ་པའི་སེང་ཁྲིར་བསྟི་བ་དཔལ་ལྡན་བླ་མ་དམ་པ་གང་གི་སྐུ་གཞོགས་སུ།
ནང་ལུགས་སྟབས་བདེར་ཞུ་བ། དེང་སྐུ་ཡི་སྣང་བ་རྡོ་རྗེ་གསུམ་གྱི་རང་བཞིན་དུ་མངོན་པར་གསལ་ཞིང་མཛད་འཕྲིན་བཟང་པོ་གོང་འཕེལ་དུ་བཞུགས་པ་ནི་མཆོག་ཏུ་སྤྲོ་ལ། ངོས་ཀྱང་ལྔ་འདུས་ཀྱི་འཚོ་བ་སྙོམས་པ་ནས། འབྲི་གུང་། ཏེ་གྲོ། དབུ་རུ་བརྒྱུད་ཀོང་ཡུལ་ནགས་མའི་ལྗོངས་ཆེན་པོར་འབྱོར་ཞིང་། བསྟན་འགྲོར་ལྷག་བསམ་མི་དམན་པར་གཞན་ཕན་གྱི་འཕྲིན་ལས་སྒོ་ཡོངས་པོར་སྤྱོད་པ་དང་། དབེན་པའི་གནས་རིར་བསྐྱེད་རྫོགས་དོན་བསྒོམ་ལ་བརྩོན་པར་མཆི། མཚམས་ཞུ། དམ་གྲུབ་ཆེ་ཆུང་བསྐོ་རྒྱུའི་དཔེ་བྲིས་གནང་རྒྱུ་ཕུལ་བ་འཁོད་གང་སྙོམས་བཀོད་གཙང་སྤུད་ལེགས་ཞིག་གནང་གྲོགས་ཅི་ནས་འཚལ་ཞིང་། འདི་ནང་འོང་དུས་ཀུན་དགེ་བའི་སྐྱབས་འཇུག་གཡེལ་མེད་བགྱིད་ལགས་པས་ཆོས་ཀློང་དུ་འཇུག་པ་འཚལ། ཞེས་འདེགས་རྟེན་ལྷ་ཚེས་རྣམ་པར་དཀར་བ་བཅས་ཟླ་༣ཚེས་༣དགེ་བར་ཕུལ།
དད་གུས་དམ་ཚིག་གི་ལང་ཚོས་འབྱོར་པ་དགེ་སློང་རྡོ་རྗེ་འཛིན་པ་གང་གི་སྐུའི་ག་ལ་བར། ཉེ་ལམ་གསོལ་འོས། དེང་དུས་ཐུགས་བསྐྱེད་ཀྱི་འཛིན་མ་ལས་བསོད་ནམས་ཀྱི་ལྗོན་ཤིང་། མངོན་མཐོའི་མེ་ཏོག་ངེས་ལེགས་འབྲས་བུའི་ཁུར་གྱིས་དུད་བཞིན་པ་ནས་རང་གི་གདུལ་བྱར་གྱུར་པའི་འགྲོ་བ་རྣམས་ཐུགས་རྗེའི་གྲིབ་བསིལ་གྱི་འཚོ་བར་མཛད་པ་ནས་བླ་མ་ལ་དད་གུས་ཀྱི་ལང་ཚོ་ཉམས་པ་མེད་པའི་རང་གཟུགས་སུ་སྔ་སོར་ལྕགས་མདུད་དཔོན་གྱི་སྲས་སྨོན་ལམ་རྒྱ་མཚོ་ཅན་ལ་འཚམས་འདྲི་དང་། ད་ལམ་གསུང་བྲིས་རྟེན་གྱི་དངོས་པོ་རྡོ་བཅུད་ཀྱི་དོང་རྩེ་བཅུ་ཕྲག་བཅུ་དང་ལྷ་གོས་རྣམ་པར་དཀར་པ་བཅས་ཆེད་མངགས་ཀྱི་བྱ་མ་རྟ་ཡིག་དམར་མགོ་ཟླའི་དཀར་ཕྱོགས་ཀྱི་དགའ་བ་དང་པོ་ལ་ཀོང་ཡུལ་གུ་རུའི་གནས་ཆེན་ལྗོན་པ་ལུང་དུ་གཙུག་ལག་ཁང་གསར་བཞེངས་གྲུབ་པའི་རབ་གནས་གྲུབ་འཕྲལ་ཚེ་དབང་སྐབས་སུ་འབྱོར་བས་སྙིགས་དུས་ཀྱི་སློབ་མའི་རང་གཟུགས་མ་ཡིན་པར་རྒྱུ་འབྲས་དམ་ཚིག་ལ་འཕྲིན་ཅུང་ཟད་ཚུད་པ་དམ་པའི་རྣམ་ཐར་དུ་མཐོང་བས་ཡིད་དགའ་བ་བཟང་པོ་རྙེད། ངོས་ཀྱང་སྔ་སོར་སྐྱེས་ཡུལ་གདན་ས་རྒྱབ་ཏུ་བོར་ཆོས་བརྒྱད་འཛིན་པའི་དོས་ཐག་བཅད་དེ་འཇའ་ལུས་རྡོ་རྗེའི་སྐུ་ཨེ་ཐོབ་ཀྱི་རེ་བས་རྒྱལ་ཁམས་སུ་ཞུགས་པ་ཡིན་ཀྱང་བར་ཆད་ཀྱི་བདུད་རྣམ་གཡེང་དུ་བརྫུས་ཏེ་མིང་བླ་མར་སྒྲོ་བཏགས་པ་འདིས་ཚེ་གཅིག་སངས་རྒྱས་ཀྱི་བདུད་དུ་གཉེར་ཏེ་ལང་སོང་།
ད་ནི་མདོ་ཁམས་རྒྱལ་རོང་སྡེ་དགེ་སོགས་སྡེ་དཔོན་མཐའ་དག་པ་དང་། དེ་བཞིན་དགོན་སྡེ་ཆེ་ཕྲ་དུ་མ་ཡི་མགྲིན་གཅིག་དབྱངས་གཅིག་ཏུ་མདོ་ཁམས་ཕྱོགས་སུ་ཡོང་དགོས་ཚུལ་དང་། བླ་མ་ཆེ་བགྲེས་ཞི་བར་གཤེགས་པ་མཐའ་དག་གིས་ཀྱང་ཞལ་ཆེམས་ཀྱི་ཚུལ་དུ་ཡི་གེ་བཞག་ནས་ཡོང་དགོས་ཚུལ་འདུག་པ་བཅས་འཕྲལ་མར་མ་ཤི་ན་བླ་མ་གོང་མ་རྣམས་ཀྱི་དགོངས་པ་བསྐང་བའི་སླད་དུ་མདོ་ཁམས་ཀཿཐོག་རྡོ་རྗེ་གདན་གྱི་བསྟན་པ་ལ་བྱ་བ་ཅུང་ཟད་བགྱིད་བློ་དང་། གཞན་ཡང་རིས་སུ་མ་ཆད་པའི་རྒྱལ་བསྟན་ལ་རིམ་གྲོ་ཅི་ནུས་བགྱིད་རྩིས་ཀྱི་བོད་ཆེན་ཕྱོགས་སུ་བགྲོད་རྩིས་ལགས་ཤིང་། དེས་ན་འཕྲལ་དུ་གནས་ཡུལ་གྱིས་བསྐལ་བས་དངོས་སུ་མཇལ་བར་མ་གྱུར་ཀྱང་། དངས་པའི་ཐུགས་ཀྱི་མི་བསྐྱུད་པ་གནང་ན་དགེ་ལེགས་ཀྱི་བརྩས་སུ་འཕེལ་བར་ངེས་པ་དགོངས་པར་གཅགས་པར་འཚལ་ལ། ཡུན་རིང་མ་ཤི་གནས་ཚེ་འཕྲད་པར་ཡང་སྨོན་ལ། གང་ཅིར་རྣམ་ཀུན་དགེ་བའི་སྐྱབས་འཇུག་ཡང་དག་བགྱིད་པ་དགོས་པར་གཅགས་པ་དང་། སྐྱེས་མཆོག་འབའ་ར་བའི་བསྟན་པ་རྟ་རྔ་ལྟར་ཉག་ཕྲ་བའི་སྐབས་འདིར་དེ་ཡི་གདན་ས་རིན་པོ་ཆེ་ལ་ཞབས་འགྱུར་གང་ཆེ་ཡོད་པ་ཅི་ཀྱང་ཞུ་ཞུ།
ཞེས་ཀཿཐོག་གི་མངའ་རིས་སུ་ཆོས་སྨྲ་བའི་གོ་སར་སྐྱེས་ཤིང་རྒྱལ་དབང་པདྨ་ཀ་རས་དབང་བསྐུར་བའི་མཐུ་ལ་བརྟེན་ཡངས་པའི་རྒྱལ་ཁམས་ཀུན་ཏུ་གཞན་དྲིན་མ་ཡིན་རང་གི་འཕྲིན་ལས་སྐྱོང་བ་ཀཿཐོག་སྤྲུལ་སྐུའི་སྔགས་མདུད་ལྷ་གོས་མ་ཧཉྫི་ཁ་བྲུ་ཟུང་གཉིས་འབྲེལ་བ་ཀོང་སྣམ་སྤུས་གཙང་དཀར་པོ་ཡུག་གསུམ་བཅས་ཟླ་ཚེས་དགེ་་ལ་སྤེལ་སརྦ་མངྒ་ལཾ།