ཉམས་སྣང་ལུང་བསྟན་སྣ་ཚོགས།
༈ །རང་ལོ་ཉེར་གསུམ་པའི་སྣེ་སོན་སྐབས། ཅི་རོང་ཟལ་དགོན་དུ་མགོ་ནད་དྲག་པོ་ཞིག་གིས་རབ་ཏུ་གཟིར་ཚེ་རྒྱལ་འགོང་གདུག་པ་ཅན་དེ་བླ་མ་རང་བྱུང་ཆས་ལྡན་དུ་བརྫུས་བྱུང་བ་ལ་བདག་ཆེ་མཆོག་རྡོ་རྗེ་གྲོ་ལོད་ཀྱི་ང་རྒྱལ་བརྟན་པོས་རྡོ་རྗེས་ཁོའི་ལུས་ཟང་ཐལ་དུ་ཁྲོལ་ཚག་ལྟར་མ་གྱུར་བར་བསྣུན་པས། ཕྱག་འཚལ་ཞིང་དམ་ལས་མི་འདའ་བར་ཁས་བླང་བྲོ་བོར་བར་གྱུར། དེ་ནས་བདག་གིས་འདི་སྐད་དྲིས་ཏེ། བདག་ནད་འདི་ལས་ཐར་རམ། ནད་འདིའི་རྒྱུ་གང་ཡིན་དྲིས་སྨྲས་པས། ཁོ་ན་རེ། གསོན་དང་རིག་འཛིན་དམ་པ་ལགས། །ནད་འདིའི་རྒྱུ་ནི་སྲུང་མ་ཡིས། །འཁུ་ལྡོག་དག་དང་ཁྱད་པར་དུ། །གྲིབ་ཅན་བུད་མེད་ཕྱག་རྒྱ་རུ། །བརྟེན་པས་མཁའ་འགྲོ་མ་དགྱེས་ནས། །འབྱུང་བཞི་འཁྲུགས་པའི་ནད་དུ་ཤར། །ད་རེས་འཆི་རྐྱེན་མི་ཡོངས་ཏེ། །རིམ་གྲོར་མཁའ་འགྲོའི་གྲིབ་སེལ་གཅེས། །ཞེས་ཟེར། ཡང་དྲིས་པ། དེང་དུས་ཁ་ཅིག་གིས་རྒྱལ་པོ་བེ་ཧར་སངས་རྒྱས་ཚར་ཟེར་བ་བདེན་ནམ་བྱས་པས། ཆོས་འཁོར་རྒྱལ་པོ་བེ་ཧ་ར། །ད་ལྟ་བསམ་ཡས་སྨྱུགས་དྲུང་ན། །ཨོ་རྒྱན་ཡུལ་ལ་ཁ་བསྒྱུར་ཏེ། །འདུག་མོད་སངས་རྒྱས་ག་ལ་ཟེར། སུམ་ཅུའི་ལོ་འམ་སུམ་བརྒྱའི་མཚམས། ༣༠་༣༠་༣༠་༩༠་༡༠༠ །བསམ་ཡས་མེ་ཡིས་བཤེགས་ཏེ་འགྲོ། །དེ་ནས་པེ་ཧར་རྒྱལ་པོ་ཡང་། །ཨོ་རྒྱན་གཙུག་ལག་ཁང་དུ་འགྲོ། །ཞེས་ཟེར། ཡང་དྲིས་པ། རྒྱལ་པོ་བེ་ཧར་ཨོ་རྒྱན་ཆེན་པོའི་དྲུང་དུ་དགེ་བསྙེན་བསྒྲུབ་ནས་འགྲོ་བ་ལ་གནོད་འཚེ་སྤངས་བར་དམ་བཅས་པ་དང་ས་བརྒྱད་ཀྱི་བྱང་ཆུབ་སེམས་དཔའ་ཡིན་པར་གྲགས་ཚེ་སེམས་ཅན་སྤྱི་དང་ཆོས་མཛད་རྣམས་ལ་འཚེ་དོན་ཡོད་དམ། འཁོར་འདུག་པ་ཅན་གྱི་འཚེ་བར་བྱེད་པ་གཙོ་བོས་ཤེས་སམ་བྱས་པའི་ལན་དུ། རྒྱལ་པོ་འཁོར་འདས་ས་མཚམས་ནས། ཁོ་རང་ཆོས་བཞིན་སྤྱོད་པ་ལ། །གནོད་འཚེ་ཆེན་པོ་མི་བསྐྱལ་ཡང་། ཁོ་ཡིས་སེམས་ལ་ཅི་འགྱུ་བ། །ཕན་གནོན་ཐམས་ཅད་སྤྲུལ་པས་བསྒྲུབ། །གཙོ་བོའི་ཐུགས་ལ་གང་དགོངས་ཏེ། །འཁོར་གྱིས་ཐོགས་མེད་བརྩོན་པ་ཡིན། །དེས་ན་ཕལ་ཆེར་ཁོང་གིས་ཤེས། །བདག་ནི་རྒྱལ་ཕྲན་ཚུལ་དུ་ནི། །རྒྱལ་པོ་ཆེན་པོའི་སྤྲུལ་བ་ཡིན། །ཞེས་ཟེར། གཞན་ལྐོག་གྱུར་གྱི་གནད་འགའ་རེ་དྲིས་པའི་ལན་ཡང་བརྗོད་ཀྱང་རུང་། ལ་ལ་ནི་སྣེ་ཟུར་ཐག་ཐུག་འགྲོ་འགྲོ་འདུག་པས་མི་བརྗོད་ལ། འགའ་ཞིག་སྟག་ཚང་གྲོ་ལོད་ཀྱི་ཆོས་སྐོར་དུ་གབ་རྒྱ་ཅན་བྱས་ནས་ཡོད། འགའ་ཞིག་ནི་ཡུན་རིང་བས་བརྗེད་སོང་། གང་ཡིན་ཡང་བསྟན་འགྲོ་ལ་སྨན་པ་ལས་ལབ་རྡོལ་ནི་ཆགས་སྡང་གི་རྒྱུར་འགྱུར་བས་ནམ་ཡང་མི་སྨྲའོ། ཚེ་དབང་ནོར་བུས་བྲིས།