Nitartha Digital Library
Tibetan
 
no previousབརྒྱུད་འདེབས་དང་གསོལ་འདེབས་ཞབས་བརྟན་གྱི་སྐོར།next

བརྒྱུད་འདེབས་དང་གསོལ་འདེབས་ཞབས་བརྟན་གྱི་སྐོར།

དབང་ཁྲིད་མན་ངག་གི་བླ་མ་བརྒྱུད་པ་ལ་གསོལ་འདེབས་ཇི་སྙེད་པ།

ཚེ་སྒྲུབ་རྡོ་རྗེ་རྒྱ་མདུད་ཀྱི་གསོལ་འདེབས་མི་ཤིགས་དྭངས་མའི་དངོས་གྲུབ།

༈ ཚེ་སྒྲུབ་རྡོ་རྗེ་རྒྱ་མདུད་ཀྱི་གསོལ་འདེབས་མི་ཤིགས་དྭངས་མའི་དངོས་གྲུབ་ཅེས་བྱ་བ་བཞུགས་སོ། །

ཨོཾ་ཨཱ་ཧཱུྃ་ཧྲཱིཿ མི་ཤིག་དྭངས་མ་རྟག་བརྟན་གཡུང་དྲུང་གི །ངོ་བོར་རབ་བཞུགས་བདེ་ཆེན་འཁོར་ལོས་བསྒྱུར། །རྒྱལ་བ་རྒྱ་མཚོའི་སྤྲུལ་བཞི་འོད་དཔག་མེད། །ཚེ་བདག་མགོན་པོ་མཆོག་དེར་གསོལ་བ་འདེབས། །པདྨའི་རིགས་ཅན་ཡོངས་ཀྱི་བདག་པོ་ཆེ། །རྒྱལ་བ་སྲས་བཅས་ཐུགས་རྗེ་གཅིག་བསྡུས་དཔལ། །ལག་ན་པདྨོས་བརྒྱན་པ་སྤྱན་རས་གཟིགས། །འཇིག་རྟེན་དབང་ཕྱུག་མཆོག་དེར་གསོལ་བ་འདེབས། །ཕྱོགས་དུས་རྒྱལ་བ་ཡོངས་དང་སངས་རྒྱས་སྟོང་། །མཐུ་སྟོབས་བྱིན་རླབས་གཅིག་བསྡུས་ཀོ་ཥའི་མཚོར། །རང་བྱུང་རྡོ་རྗེ་སྐུ་བརྙེས་པདྨ་འབྱུང་། །མ་ནོར་བླ་མ་མཆོག་དེར་གསོལ་བ་འདེབས། །ཁ་སྦྱོར་ཡན་ལག་བདེ་བ་ཆེན་པོའི་སྐུ། །གྲུབ་པའི་རྒྱལ་མོ་ཡེ་ཤེས་མཚོ་རྒྱལ་མ། །སྟོང་ཉིད་མཁའ་ལ་སྙིང་རྗེའི་གཏེར་འགྲོ་བ། །མཁའ་འགྲོ་ཡིད་བཞིན་ནོར་བུར་གསོལ་བ་འདེབས། །སྤང་རྟོགས་མཐར་ཕྱིན་རྒྱལ་བར་ཡོངས་གྲུབ་ཀྱང་། །གདུལ་བྱར་སྨན་པའི་གཟུགས་སྐུར་ཅིར་ཡང་འཆར། །འདྲེན་པ་ཡོངས་ཀྱི་གཙོ་མཆོག་བདེ་ཆེན་གླིང་། །རིག་འཛིན་འཁོར་ལོས་གྱུར་དེར་གསོལ་བ་འདེབས། །གང་གིས་རྗེས་བཟུང་ཐུགས་ལས་སྐྱེས་པའི་སྲས། །ལུང་རྟོགས་ཆོས་ཀྱི་དམ་པའི་གདུང་འཚོབ་བ། །རྣལ་འབྱོར་རྡོ་རྗེ་ཚེ་དཔག་ནོར་བུའི་སྡེ། །དྲིན་ཆེན་བླ་མ་མཆོག་དེར་གསོལ་བ་འདེབས། །སྨིན་དབང་ཆུ་རྒྱུན་གྲོལ་བྱེད་གདམས་པའི་གཏེར། །ལེགས་པར་སྩོལ་ནས་ཐར་པ་མཆོག་སྦྱིན་མཛད། །འགྲོ་བའི་འདྲེན་མཆོག་བཀའ་དྲིན་ཟླ་མེད་མགོན། །འདྲེན་མཆོག་རྩ་བའི་བླ་མར་གསོལ་བ་འདེབས། །ཡི་དམ་དཀྱིལ་འཁོར་ཡོངས་ཀྱི་གཙོ་བོ་མཆོག །ཀུན་རྫོབ་དོན་དམ་འཆི་མེད་རྡོ་རྗེ་ཚེ། །འགྱུར་མེད་དངོས་གྲུབ་སྩོལ་མཛད་ཚེ་དཔག་མེད། །གོས་དཀར་མགྱོགས་མར་བཅས་ལ་གསོལ་བ་འདེབས། །ཚེ་ཡི་བར་ཆད་སེལ་ཞིང་འཕྲིན་ལས་བསྒྲུབ། །ཚངས་པ་བརྒྱ་བྱིན་ཕྱོགས་སྐྱོང་རྒྱལ་ཆེན་བཞི། །བདག་སྐྱོབས་ལྷ་དང་དཀར་པོའི་ཆོས་བསྲུང་བའི། །དམ་ཆེན་རྒྱ་མཚོའི་ཚོགས་ལ་གསོལ་བ་འདེབས། །དེ་ལྟར་ཚེ་ཡི་དཀྱིལ་འཁོར་བླ་མ་ལྷར། །རྩེ་གཅིག་གསོལ་བ་བཏབ་པའི་བྱིན་རླབས་ཀྱིས། །བདག་སོགས་སྐྱེ་བ་ཚེ་རབས་ཐམས་ཅད་དུ། །མཐོ་རིས་ཡོན་ཏན་འཕགས་ནོར་བདུན་གྱིས་ཕྱུག །དལ་འབྱོར་རྟེན་ཐོབ་བཤེས་གཉེན་དམ་པས་བཟུང་། །བསླབ་གསུམ་རྣམ་དག་ཐེག་ཆེན་ས་ལམ་གྱིས། །ཡོན་ཏན་མ་ལུས་མྱུར་ཐོབ་རྩལ་ཆེན་རྫོགས། །དོན་གཉིས་ཕུན་ཚོགས་རྒྱལ་བའི་གནས་དམ་པ། །བདུད་སྡེའི་བཞི་བཅོམ་འཆི་མེད་རྡོ་རྗེའི་སྐུ། །སྐལ་པ་དྲུག་ལྡན་མཐའ་ཡས་འགྲོ་བའི་དཔལ། །སྲིད་ཞི་ལས་འདས་དེ་བཞིན་གཤེགས་པའི་གནས། །བདེ་ཆེན་མགོན་པོའི་གོ་འཕང་ལ་འཁོད་ཤོག །

དེ་ལྟར་ཚེ་དང་ཡེ་ཤེས་དཔག་ཏུ་མེད་པའི་མན་ངག་འཆི་མེད་རྡོ་རྗེའི་རྒྱ་མདུད་ཀྱི་རྒྱུད་པའི་གསོལ་འདེབས་མི་ཤིག་དང་མ་ཡོངས་འགྲུབ་ཅེས་བྱ་བ་འདི་ནི་ཞ་ལུ་དགེ་སློང་རྡོ་རྗེ་འཛིན་པ་རིན་ཆེན་འཇམ་དཔལ་ཆོས་དར་གྱིས་ཡང་ནས་ཡང་དུ་གསུང་གིས་བསྐུལ་བར་བརྟེན་རིག་འཛིན་ཚེ་དབང་ནོར་བུས་དྲག་པོ་ལྕགས་སྤྲེལ་ཆོ་འཕྲུལ་ཟླ་བའི་དམར་ཕྱོགས་ཚེས་བཅུའི་ཐུན་ཆ་ཤས་གཅིག་ཏུ་གློ་ལམ་དཀར་ནག་གི་དབུས་རྟག་བརྟན་རིན་པོ་ཆེ་དེ་དབུའི་སྐྱེད། བསམ་གཏན་སྒོམ་པའི་སྤྱིལ་པོ་འཆི་མེད་གཡུང་དྲུང་འཁྱིལ་བར་བྲིས་པ་སྟེ་དགེའོ། །སརྦ་མངྒ་ལཾ།

རྫོགས་ཆེན་དཀོན་མཆོག་སྤྱི་འདུས་བརྒྱུད་པའི་གསོལ་འདེབས་རྒྱུན་ཁྱེར་ཡིད་བཞིན་གཏེར་སྦྱིན།

༈ རྫོགས་ཆེན་དཀོན་མཆོག་སྤྱི་འདུས་བརྒྱུད་པའི་གསོལ་འདེབས་རྒྱུན་ཁྱེར་ཡིད་བཞིན་གཏེར་སྦྱིན་ཞེས་བྱ་བ་བཞུགས་སོ། །

གུ་རུ་པདྨ་སིདྡྷི་ཧཱུྃ་ཧྲཱི༔ གདོད་ནས་བྱང་ཆུབ་སྤྲོས་བྲལ་བདེ་བ་ཆེ། །ཀུན་བཟང་འོད་དཔག་མེད་ལ་གསོལ་བ་འདེབས། །ཚད་མེད་སྙིང་རྗེའི་གཏེར་ཆེན་ཀུན་ཏུ་རྒྱས། །འཕགས་མཆོག་ནམ་མཁའི་རྒྱལ་པོར་གསོལ་བ་འདེབས། །རྒྱལ་ཀུན་ཡེ་ཤེས་འཕྲིན་ལས་གཅིག་བསྡུས་པ། །སངས་རྒྱས་པདྨ་འབྱུང་ལ་གསོལ་བ་འདེབས། །བདེ་ཆེན་གཉུག་མའི་ཆོས་དབྱིངས་ཞིང་གི་བདག །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །དྲི་མེད་འོད་གསལ་རྒྱས་པའི་རང་གཟུགས་ཉིད། །རིག་འཛིན་འཇའ་ཚོན་སྙིང་པོར་གསོལ་བ་འདེབས། །ཐོག་མེད་ཟང་ཐལ་བརྟུལ་ཞུགས་སྤྱོད་པའི་དཔལ། །རིག་འཛིན་བདུད་འདུལ་རྡོ་རྗེར་གསོལ་བ་འདེབས། །རྒྱུན་མཐའི་སར་བཞུགས་བྱང་སེམས་འགྲོ་བའི་མགོན། །རིག་འཛིན་ཀློང་གསལ་སྙིང་པོར་གསོལ་བ་འདེབས། །སྲིད་ཞི་སྤྱི་དཔལ་ཀུན་བཟང་སྒྱུ་འཕྲུལ་གར། །པདྨ་བདེ་ཆེན་གླིང་པར་གསོལ་བ་འདེབས། །སྙིགས་དུས་འགྲོ་འདུལ་དལ་བའི་འཕྲིན་ལས་པ། །རིག་འཛིན་ཚེ་དབང་ནོར་བུར་གསོལ་བ་འདེབས། །བདག་རྒྱུད་སྨིན་གྲོལ་མཛད་པའི་བཀའ་དྲིན་ཅན། །འདྲེན་མཆོག་རྩ་བའི་བླ་མར་གསོལ་བ་འདེབས། །ཡི་དམ་དཀྱིལ་འཁོར་རྒྱ་མཚོའི་གཙོ་བོ་མཆོག །གུ་རུ་ཞི་དང་དྲག་པོར་གསོལ་བ་འདེབས། །གནས་གསུམ་མཁའ་འགྲོ་ཡོངས་ཀྱི་སྤྱི་དཔལ་ཆེ། །ཌཱཀྐི་སིདྡྷ་མུ་ཁར་གསོལ་བ་འདེབས། །དེ་ལྟར་བླ་བསྒྲུབ་དཀོན་མཆོག་སྤྱི་འདུས་ཀྱི། །རྩ་བརྒྱུད་བླ་མ་ཡི་དམ་མཁའ་འགྲོ་མར། །རྩེ་གཅིག་གསོལ་བ་བཏབ་མཐུས་རྣལ་འབྱོར་བདག །དུས་འདི་ནས་བརྩམས་སྐྱེ་བ་ཇི་སྲིད་དུ། །དད་གུས་ཤེས་རབ་ལས་འབྲས་ཡིད་ཆེས་ལྡན། །དམ་པས་རྗེས་བཟུང་དབང་ཁྲིད་གདམས་པ་རྫོགས། །དམ་ཚིག་རྣམ་དག་བསྐྱེད་རྫོགས་ཡོན་ཏན་རྒྱས། །མཐོང་ཐོས་དྲན་རེག་འགྲོ་ཀུན་ཐར་ལམ་ལ། །འདྲེན་པའི་བྱེད་པོར་བདག་ཉིད་འགྱུར་བ་དང་། །མཐར་ཐུག་རང་དོན་ཆོས་ཀྱི་སྐུར་གྲོལ་ནས། །གཞན་དོན་གཟུགས་སྐུ་རྒྱུན་མི་ཆད་པ་ཡི། །ནམ་མཁའི་མཐའ་ཀླས་འགྲོ་བ་འདྲེན་བྱེད་པ། །མགོན་པོ་འོད་དཔག་མེད་དང་མཚུངས་པར་ཤོག །

དེ་ལྟར་བླ་བསྒྲུབ་གསོལ་འདེབས་ཡིད་བཞིན་གཏེར་སྦྱིན་ཞེས་བྱ་བ་འདི་ཡང་ས་ཕོ་རྟ་ཡི་ལོ་ཆོ་འཕྲུལ་ཟླ་བའི་དམར་ཕྱོགས་གང་བ་བོད་ཡུལ་དབུས་འགྱུར་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་དབུས་སུ་རིག་འཛིན་ཚེ་དབང་ནོར་བུས་སྤོམ་རོང་རྗེ་འབངས་དད་པ་ཅན་གྱི་ངོར་བརྗོད་པ་དགེའོ། །དགེའོ། །དགེའོ། །བཀྲ་ཤིས།

འཇམ་དཔལ་ནག་པོ་ཐུགས་ཀྱིས་ཡང་ཞུན་གྱི་བླ་མ་བརྒྱུད་པའི་གསོལ་འདེབས།

༄༅། །འཇམ་དཔལ་ནག་པོ་ཐུགས་ཀྱིས་ཡང་ཞུན་གྱི་བླ་མ་བརྒྱུད་པའི་གསོལ་འདེབས་སོ། །

ཨོཾ་ཨཱཿཧཱུྃ། ཀུན་བཟང་འཇམ་དཔལ་པདྨ་ཐོད་ཕྲེང་རྩལ། །མངའ་བདག་ཡབ་སྲས་ཡེ་ཤེས་མཚོ་རྒྱལ་མ། །ཟབ་གཏེར་མངའ་བདག་ཨོ་རྒྱན་སངས་རྒྱས་གླིང་། །རང་སྲས་བདུན་བརྒྱུད་བདེ་ཆེན་དར་རྒྱས་དང་། །བཀའ་དྲིན་མཚུངས་མེད་བདེ་ཆེན་རབ་གསལ་ཞབས། །རྩ་བའི་བླ་མ་དྲན་ཆོག་འཁོར་ལོའི་མགོན། །འཇམ་དཔལ་ཡང་ཞུན་སྨིན་གྲོལ་བརྒྱུད་པ་ཡི། །བླ་མ་རྣམ་དང་ཡི་དམ་ལྷག་པའི་ལྷར། །རྩེ་གཅིག་གསོལ་བ་བཏབ་པའི་མཐུ་སྟོབས་ཀྱིས། །ལས་བཞི་ལྷུན་གྲུབ་གྲུབ་པ་ཆེ་བརྒྱད་ཐོབ། །ཁྱད་པར་ཚེ་དབང་ཕྱག་རྒྱ་ཆེ་མཆོག་གྲུབ། །འཇམ་དཔལ་གོ་འཕང་ཚེ་འདིར་ཐོབ་བྱིན་རློབས། །ཞེས་འཇམ་དཔལ་ནག་པོ་ཐུགས་ཀྱི་ཡང་ཞུན་གྱི་བླ་མ་བརྒྱུད་པའི་གསོལ་འདེབས་འདི་ཡང་རིག་པ་འཛིན་པ་ཚེ་དབང་ནོར་བུས་སྦྱར་བའོ། །སརྦ་མངྒ་ལཾ། །

སྙན་བརྒྱུད་བླ་མ་ཡང་གསང་པདྨ་འོད་འབར་གྱི་བརྒྱུད་པའི་གསོལ་འདེབས་ཡིད་བཞིན་ཏོག་གི་ཕྲེང་བ།

༈ སྙན་བརྒྱུད་བླ་མ་ཡང་གསང་པདྨ་འོད་འབར་གྱི་བརྒྱུད་པའི་གསོལ་འདེབས་ཡིད་བཞིན་ཏོག་གི་ཕྲེང་བ་བཞུགས་སོ། །

ཨོཾ་ཨཱཿཧཱུྃ་ཧྲཱིཿ ཁྱབ་བརྡལ་ཕྱོགས་བྲལ་ཆོས་དབྱིངས་ཞིང་ཁམས་སུ། །རང་བྱུང་ཡེ་སངས་རྒྱས་པ་གདོད་མའི་མགོན། །རྒྱལ་ཀུན་མེས་པོ་ཀུན་བཟང་ཡབ་ཡུམ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ བདེ་ཆེན་འདུས་མ་བྱས་པའི་ཞིང་ཁམས་སུ། །སྐུ་ལྔའི་བདག་ཉིད་གསུང་གི་རྡོ་རྗེ་འཆང་། །པདྨ་རྒྱལ་པོ་འོད་དཔག་མེད་མགོན་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ འོད་ལྔ་ཐིག་ལེ་འདུས་པའི་ཞིང་ཁམས་སུ། །རིགས་རྣམས་ཀུན་འདུས་སྒྱུ་འཕྲུལ་དྲ་བའི་གཙོ། །རིག་པ་ཡེ་ཤེས་རྡོ་རྗེ་སེམས་མཆོག་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ འགྱུར་མེད་པདྨ་འོད་ཀྱི་ཞིང་ཁམས་སུ། །དུས་གསུམ་སངས་རྒྱས་ཡོངས་ཀྱི་ངོ་བོ་ཉིད། །མཚོ་སྐྱེས་སངས་རྒྱས་པདྨ་འབྱུང་གནས་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ འཕོ་མེད་དགའ་བཞིའི་དངས་མའི་ཞིང་ཁམས་སུ། །རྒྱལ་ཀུན་སྐྱེད་མཛད་ཤེས་རབ་ཕ་རོལ་ཕྱིན། །བདེ་ཆེན་རྒྱལ་ཡུམ་ཡེ་ཤེས་མཚོ་རྒྱལ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ ཟག་བྲལ་གཉུག་མ་རང་གསལ་ཞིང་ཁམས་སུ། །རིག་པའི་རྩལ་རྫོགས་རྒྱལ་བ་ཀུན་གྱི་སྲས། །བདུད་འདུལ་ནུས་ལྡན་རྡོ་རྗེ་རྩལ་འཆང་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ མ་ཚོགས་མཁའ་འགྲོ་འདུ་བའི་ཞིང་ཁམས་སུ། །འགྲོ་བ་ཡོངས་འདུལ་བརྟུལ་ཞུགས་ནུས་པའི་བདག །པདྨ་ནོར་བུ་རྡོ་རྗེ་གཟི་བརྗིད་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ སྐལ་ལྡན་སྨིན་ཅིང་གྲོལ་བའི་ཞིང་ཁམས་སུ། །རིག་འཛིན་ཆེན་པོ་ཡོངས་ཀྱི་འཁོར་ལོས་བསྒྱུར། །དྲན་མཆོག་དང་མ་པདྨ་བདེ་ཆེན་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ ཕྱོགས་མེད་འགྲོ་དོན་སྐྱོངས་པའི་ཞིང་ཁམས་སུ། །འབྲེལ་ཚད་དོན་ལྡན་མཆོག་གི་སྤྲུལ་བའི་སྐུ། །རིག་པ་འཛིན་པ་ཚེ་དབང་ནོར་བུ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ སྤྱི་གཙུག་བདེ་ཆེན་དག་པའི་ཞིང་ཁམས་སུ། །བཀའ་དྲིན་གསུམ་ལྡན་འཁོར་ལོའི་དབང་ཕྱུག་ཆེ། །རྩ་བའི་བླ་མ་རྡོ་རྗེ་འཆང་ཆེན་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ སྣང་བ་དག་པ་ཆོས་ཀྱི་ཞིང་ཁམས་སུ། །རྡོ་རྗེ་སློབ་དཔོན་དབང་ཁྲིད་ལྟ་སྤྱོད་མཐུན། །དམ་ཚིག་ཆིག་འདྲེས་རྡོ་རྗེ་མཆེད་ལྕམ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ འཇའ་ལུས་མེ་དཔུང་ཐིག་ལེའི་ཞིང་ཁམས་སུ། །ཡི་དམ་དཀྱིལ་འཁོར་ཀུན་གྱི་གཙོ་བོ་མཆོག །གཏུམ་དྲག་མེ་འཕྲེང་རྡོ་རྗེ་གྲོ་ལོད་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ གནས་གསུམ་དག་པ་ལྷ་ཡི་ཞིང་ཁམས་སུ། །སྒྲུབ་མཆོག་རྟག་ཏུ་སྐྱོང་ལ་གཡེལ་མེད་པ། །མ་མོ་མཁའ་འགྲོ་དཔའ་བོའི་ཚོགས་བཅས་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ མཁའ་སྤྱོད་རྔམ་པ་སྒྲ་སྒྲོག་ཞིང་ཁམས་སུ། །ལས་དང་ཡེ་ཤེས་སྲུང་མ་ཀུན་གྱི་མཐུ། །གཅིག་འདུས་ཉེ་མགོན་གཟི་ལྡན་ཡབ་ཡུམ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཧཱུྃ་ཧཱུྃ་ཧཱུྃཿ དེ་ལྟར་སྙིང་ཐིག་བླ་བསྒྲུབ་བརྒྱུད་པ་ཡི། །བླ་མ་ལྷ་དང་མཁའ་འགྲོ་ཆོས་སྐྱོང་ལ། །རྩེ་གཅིག་གུས་པ་དྲག་པོས་གསོལ་བཏབ་མཐུས། །ཁྱེད་ཀྱི་བརྩེ་ཆེན་ཐུགས་རྗེ་གཟི་བྱིན་གྱིས། །ནུས་པའི་ཤུགས་ཕྱུང་སྐད་ཅིག་ད་ལྟ་འདིར། །བདག་གི་ཉོན་མོངས་འཁྲུལ་རྟོག་ཀུན་བཅོམ་ནས། །འཇིག་རྟེན་འཇིག་རྟེན་ལས་འདས་དངོས་གྲུབ་ཀུན། །རྩ་བའི་བླ་མའི་བྱིན་རླབས་ཡོངས་ཞུགས་ཏེ། །ཨ་ཏི་རྫོགས་ཆེན་ཉམས་རྟོགས་རྩལ་རྫོགས་ཤིང་། །ཕུང་ཁམས་འཕོ་ཆེན་འཇའ་ལུས་རྡོ་རྗེའི་སྐུ། །མངོན་གྱུར་ཡེ་ཤེས་ཡོན་ཏན་ཡོངས་རྫོགས་ཤོག །དེ་ལྟར་མ་ཐོབ་བར་དུ་སྐྱེ་བ་ཀུན། །ཁམས་དྲུག་མངོན་མཐོ་ངེས་ལེགས་བརྒྱན་ཐོབ་ཅིང་། །འཇིགས་ཞི་འབྱོར་རྒྱས་ཆོས་མིན་རྣམ་རྟོག་འགག །དམ་ཚིག་སེལ་མེད་བླ་མའི་དགྱེས་དགུ་འགྲུབ། །ས་ལམ་ཡོན་ཏན་གོང་ནས་གོང་འཕེལ་ཤོག །སྣང་སྲིད་ཐམས་ཅད་འོད་གསལ་གཞོམ་མེད་ཅིང་། །སྒྲ་གྲགས་ནཱ་ད་དྲན་རྟོག་གཟུང་འཛིན་བྲལ། །འུབ་ཆུབ་ཀུན་བཟང་དགོངས་པའི་དབྱིངས་ཉིད་དུ། །ཁམས་གསུམ་འགྲོ་འདྲེན་བྱེད་པོར་བདག་གྱུར་ཅིག །

ཅེས་སྙིང་ཐིག་སྙན་བརྒྱུད་བླ་བསྒྲུབ་ཀྱི་གསོལ་འདེབས་འདི་ནི་དད་ལྡན་སྦྱིན་བདག་དཔོན་དྲུང་ཚེ་དབང་དཔལ་འབྱོར་རབ་རྒྱས་དང་ཆོས་མཛད་ཡེ་ཤེས་པད་དཀར་ཆོས་ཉིད་རང་བྱུང་སྙན་གྲགས་ལྔའི་ཡང་ཡང་བསྐུལ་ངོར། མདོ་ཁམས་ཀཿཐོག་ལྷོ་ཕྱོགས་འོད་གསལ་ལྷ་རིས་སྐྱེས་པའི་རིག་པ་འཛིན་པ་ཚེ་དབང་ནོར་བུ་འགྲོ་བ་ཡོངས་འདུལ་རྩལ་གྱིས་སྟོད་མངའ་རིས་གློ་བོ་སྨད་རྒྱ་གར་དང་བོད་ཀྱི་མཚམས་བཀག་པའི་ས་མཐའ་བསམ་འགྲུབ་ཆོས་ལྡིངས་སུ་ས་བྱ་རྒྱལ་ཟླ་དམར་ཕྱོགས་ཉ་ལ་༸བླ་མའི་དུས་མཆོད་སྐབས་སུ་ཐུན་གཅིག་བྲིས་པའོ། །མངྒ་ལཾ། བཀྲ་ཤིས།

རྫོགས་པ་ཆེན་པོ་མཁའ་འགྲོ་སྙིང་ཐིག་གི་བརྒྱུད་པ་བླ་མའི་གསོལ་འདེབས་ངེས་དོན་སྙིང་པོའི་བཅུད་ལེན།

༈ རྫོགས་པ་ཆེན་པོ་མཁའ་འགྲོ་སྙིང་ཐིག་གི་བརྒྱུད་པ་བླ་མའི་གསོལ་འདེབས་ངེས་དོན་སྙིང་པོའི་བཅུད་ལེན་ཞེས་བྱ་བ་བཞུགས་སོ། །

ཨ་ཧོ། མ་བཅོས་མཐའ་བྲལ་གདོད་ནས་སྣང་བའི་མགོན། །གཡོ་མེད་ཡེ་ཤེས་རྒྱལ་བ་ཀུན་གྱི་དཔྱིད། །མ་སྐྱེ་འགག་མེད་བརྡལ་ཁྱབ་ཀུན་ཏུ་བཟང་། །གསོལ་བ་འདེབས་སོ་མཆོག་གི་དངོས་གྲུབ་སྩོལ། ། ༡ དམིགས་མེད་སྤྲོས་བྲལ་འོད་གསལ་མི་འགྱུར་ཡུམ། །རྒྱལ་ཀུན་ཐུགས་མཆོག་རྡོར་སེམས་གསང་བའི་བདག །མཚན་དཔེ་ཡོངས་རྫོགས་མཆོག་སྤྲུལ་དགའ་རབ་རྗེ། །གསོལ་བ་འདེབས་སོ་མཆོག་གི་དངོས་གྲུབ་སྩོལ། ། ༢ རང་རིག་དབང་ཐོབ་རིག་འཛིན་ཤྲཱི་སེང་། །རྫོགས་སངས་རྒྱས་དངོས་གུ་རུ་པདྨ་འབྱུང་། །ཟག་མེད་འཇའ་ལུས་མཁའ་འགྲོ་མཚོ་རྒྱལ་ལ། །གསོལ་བ༴ གསང་གཏེར་སྙིང་ཐིག་སྒོ་འབྱེད་ལས་འབྲེལ་སྩལ། །བསྟན་པའི་སྒྲོན་མེ་རྒྱལ་སྲས་ལེགས་ལྡན་པ། །རྒྱལ་བ་གཉིས་པ་རང་བྱུང་རྡོ་རྗེ་འཆང་། །གསོལ་བ༴ གསང་སྔགས་གྲུབ་པའི་དབང་ཕྱུག་གཡུང་སྟོན་དཔལ། །ཐམས་ཅད་མཁྱེན་གཟིགས་ཀརྨ་ཀ་རོལ་རྡོར། །གསོལ་བ༴ རྟོགས་ལྡན་རྒྱལ་པོ་ནམ་མཁའ་རྡོ་རྗེ་མཆོག །ལུང་རྟོགས་བསྟན་པའི་གསལ་བྱེད་ཚུལ་ཁྲིམས་འབུམ། །ཡང་དག་དོན་བརྙེས་ཚུལ་ཁྲིམས་རྒྱལ་བའི་མཚན། །གསོལ་བ་འདེབས་སོ༴ ངེས་གསང་འཕྲིན་ལས་སྤེལ་མཁས་ཆོས་འབུམ་ཞབས། །འདུལ་དཀའ་ཡོངས་འདུལ་ཡེ་ཤེས་རྒྱལ་བའི་མཚན། །འགྲོ་ལ་བརྩེ་གཟིགས་ཆོས་རྗེ་བྱང་ཆུབ་སེང་། །རྫ་ཡིག་ཀུན་མཁྱེན་ཆེན་པོ་ཚུལ་ཁྲིམས་རྒྱལ། །རྩེ་ལེ་རིག་འཛིན་བསོད་ནམས་རྣམ་པར་རྒྱལ། །རྒྱལ་བའི་ཐུགས་སྲས་བསྟན་འཛིན་མཆོག་དབྱངས་ཞབས། །གསོལ་བ༴ ཆོས་ཉིད་མངོན་གྱུར་ཀུན་བཟང་དཔལ་འབྱོར་བ། །གསང་སྔགས་གྲུབ་བརྙེས་མདོ་སྔགས་བསྟན་འཛིན་བཟང་། །རིམ་གཉིས་མངོན་འགྱུར་འཕྲིན་ལས་ལྷུན་གྲུབ་ལ། །གསོལ་བ༴ གསང་ཆེན་སྟོན་པ་འགྱུར་མེད་རྡོ་རྗེ་སྩལ། །ཐུགས་ཀྱི་སྲས་མཆོག་ཨོ་རྒྱན་རྣམ་གྲོལ་བཟང་། །སྙིང་པོའི་དོན་གཏེར་དཔལ་ལྡན་བླ་མ་རྗེ། །གསོལ་བ༴ རབ་འབྱམས་རིགས་དང་དཀྱིལ་འཁོར་ཀུན་གྱི་གཙོ། །བྱིན་རླབས་རྩ་བ་བརྒྱུད་པའི་བླ་མ་དང་། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་ལ། །རྩེ་གཅིག་གུས་པའི་སེམས་ཀྱིས་གསོལ་བ་འདེབས། །བདག་ནི་དེང་ནས་རྫོགས་སངས་མ་རྒྱས་བར། །ངན་སོང་གནས་སྤོང་བདེ་འགྲོ་རྟག་ཐོབ་ཅིང་། །མཐོ་རིས་ཡོན་ཏན་འཕགས་ནོར་བདུན་གྱིས་ཕྱུག །ཡང་དག་ལམ་ནས་ཕྱིར་མི་ལྡོག་པར་ཤོག །སྐྱེ་ཀུན་མཚན་ཉིད་ཀུན་ཚང་བླ་མ་དང་། །ལེགས་འཕྲད་ཐུགས་ཀྱི་དགྱེས་དགུ་བདག་གིས་གྲུབ། །ཟབ་གསང་འོད་གསལ་རྡོ་རྗེ་སྙིང་པོའི་དོན། །མ་འདུས་ཡོངས་རྫོགས་བདག་གིས་ཐོབ་པར་ཤོག །ཆོས་མིན་ལས་ལ་སྐད་ཅིག་མི་འཇུག་ཅིང་། །ཆོས་བཞིན་སྤྱོད་པར་ཉིན་མཚན་དུས་འདའ་ནས། །ས་ལམ་དྲོད་ཚད་མ་ལུས་ཚེ་གཅིག་རྫོགས། །རང་གཞན་དོན་གཉིས་འབད་མེད་ལྷུན་གྲུབ་ཤོག །ཁྲེགས་ཆོད་ལྟ་བའི་གནས་ལུགས་མཐར་ཐུག་རྟོགས། །ཐོད་བརྒལ་མངོན་གསུམ་སྒོམ་པ་ཟད་པར་འཁྱོལ། །རྣམ་དག་སྤྱོད་པས་འགྲོ་ལ་ཕན་ཆེན་འགྲུབ། །མི་སློབ་ས་མཆོག་ཚེ་འདི་ཉིད་བརྙེས་ཤོག །ཆོས་ཀུན་གདོད་མའི་གནས་ལུགས་སྤྲོས་དང་བྲལ། །མཐའ་རྒྱས་ལས་འདས་ཐེག་དགུའི་ཡོངས་རྩེ་མཆོག །ཡིད་དཔྱོད་བྱར་མེད་འོད་གསལ་རྫོགས་པ་ཆེ། །མངོན་འགྱུར་གདོས་བཅས་འོད་སྐུར་ཡལ་བར་ཤོག །དམིགས་བསམ་བློ་ཡིས་བཅོས་མས་མ་གོས་པ། །ཡིད་བྱེད་ཀུན་བྲལ་ཆོས་ཉིད་མངོན་སུམ་དུ། །སྣང་བ་བརྡ་དོན་རྟགས་གསུམ་དབྱེར་མེད་ལམ། །རྩོད་བྲལ་ཨ་ཏིའི་རྟོགས་པ་མངོན་གྱུར་ཤོག །དུས་ཀུན་རྒྱུ་འབྲས་ལས་ལ་ཡིད་ཆེས་ཤིང་། །རྒྱུ་འབྲས་ལས་འདས་ལྟ་བའི་གདེངས་ཚད་ཐོབ། །ནམ་ཡང་གསང་སྔགས་དམ་ཚིག་ཉམས་མེད་བསྟན། །ཡེ་བསྲུང་སྤྲོས་བྲལ་ཆེན་པོར་རྟག་གནས་ཤོག །ཚེ་འདིའི་བསླུ་བྲིད་ཆོས་ལ་མི་ཞེན་པར། །ངེས་གསང་བླ་མེད་ལམ་མཆོག་ལ་ཞུགས་ནས། །རང་གཞན་དོན་གཉིས་འགྲུབ་པའི་དབང་ཕྱུག་ཆེ། །སྐུ་གསུམ་རྒྱལ་བའི་གོ་འཕང་མཆོག་བརྙེས་ཤོག །ཚེ་རབས་རྟག་ཏུ་ཡང་གསང་རྫོགས་ཆེན་དོན། །དབང་འབྱོར་རྒྱལ་བསྟན་འགྲོ་ལ་ཕན་ཆེན་གྲུབ། །འཕགས་ནོར་བདུན་ལྡན་རྒྱུད་འཛིན་སློབ་སྲིད་རྒྱས། །ཚོམ་བུ་གཅིག་ཏུ་འགྲོ་ཀུན་བྱང་ཆུབ་ཤོག །

ཅེས་རྫོགས་ཆེན་མཁའ་འགྲོ་སྙིང་ཐིག་གི་གསོལ་འདེབས་སུ་རྣམ་པར་དཀར་བའི་ལས་ལ་མཆོག་ཏུ་བརྩོན་ཞིང་ངེས་གསང་རྫོགས་པ་ཆེན་པོར་མི་ཕྱེད་པའི་དད་གུས་ཅན་སྐལ་ལྡན་མི་མཆོག་ལྕགས་བྲག་སྡེ་པ་ལྟ་བུ་ཚེ་རིང་དོན་ལྡན་ནམ་ཀུན་བཟང་ངེས་དོན་རང་གྲོལ་དབང་པོའི་གསུང་གིས་བསྐུལ་ངོར་མདོ་ཁམས་ཀཿཐོག་གི་ལྷོ་ཕྱོགས་ལྷ་བན་ཚེ་དབང་ནོར་བུས་མང་ཡུལ་སྐྱིད་གྲོང་གྲ་ཕུ་ཆོས་གླིང་རི་ཁྲོད་དུ་མེ་ལུག་སྟོན་རའི་ཚེས་བཟང་པོར་བྲིས་པ་དགེའོ། །སརྦ་མངྒ་ལཾ་ཀུརྦནྟུ།

རྫོགས་ཆེན་མཁའ་འགྲོ་ཡང་ཞུན་གྱི་གསོལ་འདེབས་རྩ་གསུམ་བྱིན་རླབས་འདྲེན་པའི་ལྕགས་ཀྱུ།

༈ རྫོགས་ཆེན་མཁའ་འགྲོ་ཡང་ཞུན་གྱི་གསོལ་འདེབས་རྩ་གསུམ་བྱིན་རླབས་འདྲེན་པའི་ལྕགས་ཀྱུ་ཞེས་བྱ་བ་བཞུགས་སོ། །

ཨོཾ་ཨཱ་ཧཱུྃ་ཧྲཱི༔ ཁྱབ་བརྡལ་ཡེ་ཤེས་གཡོ་མེད་ཞིང་ཁམས་ནས། །རིག་པ་རང་བྱུང་སངས་རྒྱས་ཀུན་གྱི་ཡབ། །གདོད་མའི་མགོན་པོ་འོད་དཔག་མེད་པ་ལ། །གསོལ་བ་འདེབས་སོ་དབང་བསྐུར་མཆོག་མཐུན་སྩོལ། །ཡེ་ཤེས་ལྔ་ལྡན་རང་འོད་ཐིག་ལེ་ཀློང་། །སྒྱུ་འཕྲུལ་ཞི་ཁྲོ་འདུས་པའི་ངོ་བོ་ཉིད། །ཧེ་རུ་ཀ་དཔལ་རྟ་ཕག་ཡབ་ཡུམ་ལ། །གསོལ་བ༴ རྒྱལ་བའི་ཞིང་ཁམས་མུ་མཐའ་མེད་པ་རུ། །སྔགས་ཀྱི་སྟོན་པ་མཚོ་སྐྱེས་རྡོ་རྗེ་སེམས། །འགྱུར་མེད་ཡེ་ཤེས་པདྨ་འབྱུང་གནས་ལ། །གསོལ་བ༴ མཁའ་སྤྱོད་གསང་བ་མཆོག་གི་དུར་ཁྲོད་དུ། །བདེ་སྟོང་དབང་ཕྱུག་རྒྱལ་བ་ཀུན་གྱི་ཡུམ། །བདུད་འདུལ་དྲག་མོ་ཡེ་ཤེས་མཚོ་རྒྱལ་ལ། །གསོལ་བ༴ ཤཱཀྱའི་ཞིང་ཁམས་བོད་ཆེན་ཤར་ཕྱོགས་སུ། །རྒྱལ་ཀུན་ཡེ་ཤེས་འདུས་པའི་སྲས་གཅིག་པུ། །དྲན་མཆོག་པདྨ་བདེ་ཆེན་གླིང་པ་ལ། །གསོལ་བ༴ ཕྱོགས་མེད་འགྲོ་དོན་སྐྱོང་བའི་གནས་མཆོག་ནས། །གུ་རུའི་ལུང་བསྟན་འབྲེལ་ཚད་དོན་དང་ལྡན། །རིག་པ་འཛིན་པ་ཚེ་དབང་ནོར་བུ་ལ། །གསོལ་བ༴ མོན་ཡུལ་དབེན་པའི་གནས་མཆོག་རྟ་གྲུ་ནས། །རིམ་གཉིས་མངོན་གྱུར་གྲུབ་པའི་དབང་ཕྱུག་ཆེ། །རྡོ་རྗེ་སློབ་དཔོན་ཨོ་རྒྱན་བསྟན་འཛིན་ལ། །གསོལ་བ༴ སྤྱི་གཙུག་བདེ་བ་ཆེན་པོའི་ཕོ་བྲང་དུ། །བཀའ་དྲིན་མཚུངས་མེད་རིགས་ཀུན་འདུས་པའི་གཙོ། །རྩ་བའི་བླ་མ་རྡོ་རྗེ་འཆང་ཆེན་ལ། །གསོལ་བ༴ ཧྲཱི༔ དབང་ཆེན་མེ་རླུང་འཁྲུལ་དཀྱིལ་ཟླ་གམ་དབུས། །ཡི་དམ་དཀྱིལ་འཁོར་ཀུན་གྱི་སྤྱི་དཔལ་གཙོ། །པདྨ་གར་དབང་གསུང་དམར་ཞི་ཁྲོ་ལ། །གསོལ་བ༴ གནས་གསུམ་དག་པ་རྩ་རླུང་ཐིག་ཞིང་དུ། །བདེ་ཆེན་ཕོ་ཉ་ཡོངས་ཀྱི་དབང་ཕྱུག་སྐུར། །བཅོམ་ལྡན་འདས་མ་རྡོ་རྗེ་རྣལ་འབྱོར་ལ། །གསོལ་བ༴ དུར་ཁྲོད་མེ་རི་འབར་བའི་ཕོ་བྲང་དུ། །རྫོགས་སངས་རྒྱས་ཉིད་བསྟན་པ་བསྲུང་ཕྱིར་སྐུ། །སྟོན་གྱུར་ཡེ་ཤེས་མགོན་པོ་མ་ནིང་ལ། །གསོལ་བ༴ གཏེར་གནས་སྨུ་རྡོ་མཁའ་འགྲོ་འབུམ་འདུས་ནས། །ཟབ་མོའི་གཏེར་མཆོག་མཁའ་འགྲོ་སྙིང་ཏི་ཀ །གཏེར་སྲུང་མ་གཟའ་རྡོར་གསུམ་བཅས་པ་ལ། །གསོལ་བ༴ སྨོན་ལམ་ལས་འཕྲོ་དག་པའི་ཞིང་ཁམས་སུ། །རྡོ་རྗེ་ཐེག་པའི་དམ་ཚིག་གིས་བསྡུས་པའི། །དག་སྣང་ཆིག་འདྲེས་མཆེད་དང་ལྕམ་དྲལ་ལ། །གསོལ་བ༴ དེ་ལྟར་སྙིང་ཐིག་བླ་མ་དཀྱིལ་འཁོར་ལྷ། །བཀའ་བསྟོད་བཅས་ལ་གུས་པས་གསོལ་བཏབ་མཐུས། །ཆོས་ཀྱི་ཕྱག་རྒྱ་བསྐྱེད་རིམ་སྣང་སྟོང་འབྱོངས། །དམ་ཚིག་ཕྱག་རྒྱ་གཏུམ་མོའི་བདེ་དྲོད་འབར། །ལས་ཀྱི་ཕྱག་རྒྱ་དབབ་ལྡོག་དགའ་བཞི་རྫོགས། །ཕྱག་ཆེན་བདེ་གཤེགས་སྙིང་པོའི་གནས་ལུགས་རྟོགས། །འོད་གསལ་ཐོད་བརྒལ་སྣང་བཞི་མཐའ་རུ་ཕྱིན། །ཟུང་འཇུག་རྡོར་སེམས་ཚེ་འདིར་ཐོབ་པར་ཤོག །

ཞེས་རྫོགས་ཆེན་མཁའ་འགྲོ་ཡང་ཞུན་གྱི་གསོལ་འདེབས་འདི་ནི། གློ་བོ་དོམ་པོའི་བླ་མ་རིན་པོ་ཆེ་དཔལ་ལྡན་གྲུབ་པའི་དབང་ཕྱུག་ཨོ་རྒྱན་བསྟན་འཛིན་མཆོག་གི་ཞལ་སྔ་ནས་བསྐུལ་བའི་ངོར། །མདོ་ཁམས་པ་རིག་འཛིན་ཚེ་དབང་ནོར་བུ་ཡིས་ལྕགས་ཀྱི་ཆུ་ཟླའི་དམར་ཕྱོགས་གང་བའི་ཚེས་ཀྱི་ཉི་མ་རྩེ་ཤར་ལ་མོན་ཡུལ་རྟ་གྲུ་གནས་མཆོག་ཏུ་སྨྲས་པ་སརྦ་མངྒ་ལཾ།

བླ་མ་དགོངས་པ་འདུས་པའི་དབང་ལུང་མན་ངག་གི་རྒྱུད་པའི་བླ་མར་གསོལ་བ་འདེབས་པ་བྱིན་རླབས་སྙིང་པོའི་བཅུད་ལེན།

༈ བླ་མ་དགོངས་པ་འདུས་པའི་དབང་ལུང་མན་ངག་གི་རྒྱུད་པའི་བླ་མར་གསོལ་བ་འདེབས་པ་བྱིན་རླབས་སྙིང་པོའི་བཅུད་ལེན་ཞེས་བྱ་བ་བཞུགས་སོ། །

ན་མོ་གུ་རུ་དྷེ་ཝ་དྷཱ་ཀི་ནི་བྷྱ༔ གདོད་ནས་རྣམ་དག་བྲི་གང་ཡོངས་བྲལ་བ། །ཆོས་སྐུ་ཀུན་བཟང་མཐའ་ཡས་ཡབ་ཡུམ་ལ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །དོན་གཉིས་ལྷུན་གྱི་གྲུབ་པར་བྱིན་གྱིས་རློབས། །རབ་འབྱམས་ཞིང་ཁམས་སྤྲུལ་མཛད་གངས་ཅན་གཙོ། །ལོངས་སྐུ་འཁོར་ལོས་བསྒྱུར་བ་རིགས་ལྔ་ལ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །དོན་གཉིས་ལྷུན་གྱི་གྲུབ་པར་བྱིན་གྱིས་རློབས། །འགྲོ་འདུལ་རྒྱལ་ཀུན་སྤྲུལ་བཞི་སྤྲུལ་སྐུ་ཆེ། །རྒྱལ་བ་རྒྱ་མཚོ་སྤྱན་རས་གཟིགས་དབང་ལ། །གསོལ་བ་འདེབས་སོ༴ དོན་གཉིས༴ སངས་རྒྱས་ཀུན་འདུས་སྐུ་གསུམ་ངོ་བོ་ཉིད། །བདེ་ཆེན་རྡོ་རྗེ་པདྨ་འབྱུང་གནས་ལ། །གསོལ་བ་འདེབས་སོ༴ དོན་གཉིས༴ གསུང་རབ་རྒྱ་མཚོ་ཡོངས་འཆང་ཤེར་ཕྱིན་མ། །འཁོར་ལོའི་བདག་མོ་ཡེ་ཤེས་མཚོ་རྒྱལ་ལ། །གསོལ་བ་འདེབས་སོ༴ དོན་གཉིས༴ འཇམ་དཔལ་དཔའ་བོ་གངས་ཅན་མི་རྗེའི་ཚུལ། །བསྟན་པའི་སྒྲོན་མེ་ཁྲི་སྲོང་ལྡེའུ་བཙན་ལ། །གསོལ་བ༴ དོན་གཉིས༴ སྤྱན་རས་གཟིགས་དབང་སྨོན་ལམ་གྱིས་བསྐྲུན་སྐུ། །ལྷ་སྲས་ཚུལ་བཟུང་མུ་ཏིག་བཙན་པོ་ལ། །གསོལ་བ༴ དོན་གཉིས༴ གུ་རུས་རྒྱལ་ཚབ་དབང་བསྐུར་ཟབ་གཏེར་བདག །མཆོག་གྱུར་སྤྲུལ་སྐུ་སངས་རྒྱས་གླིང་པ་ལ། །གསོལ་བ༴ དོན་གཉིས༴ ཆོས་བདག་ཡོངས་གཙོ་དངོས་གྲུབ་གཉིས་བརྙེས་པ། །སྲས་མཆོག་འགྲོ་འདུལ་ཡེ་ཤེས་རྡོ་རྗེ་ལ། །གསོལ༴ དོན་གཉིས༴ དབང་ཆེན་སྤྲུལ་པ་སྤྱི་བོར་རྟ་སྐད་སྒྲོགས། །གྲུབ་པའི་དབང་ཕྱུག་སངས་རྒྱས་བློ་གྲོས་ལ། །གསོལ༴ དོན་གཉིས༴ སྐྱེས་མཆོག་གདུང་འཛིན་སྨིན་གྲོལ་ཡོངས་སུ་རྫོགས། །རིགས་སྔགས་འཆང་བ་བསོད་ནམས་ལྷུན་གྲུབ་ལ། །གསོལ་བ༴ དོན་གཉིས༴ སྦས་པའི་ཚུལ་གྱིས་གསང་སྔགས་ཡོན་ཏན་བརྙེས། །རྣལ་འབྱོར་དབང་ཕྱུག་ཀརྨ་བཟང་པོ་ལ། །གསོལ་བ༴ དོན་གཉིས༴ གུ་རུའི་བཀའ་གསང་གསེར་ཆོས་ཟབ་དགུ་ཡི། །སྐལ་ལྡན་གསོས་མཛད་ཀརྨ་སྔགས་འཆང་ལ། །གསོལ༴ དོན་གཉིས༴ གདམས་པའི་རྒྱུད་ཀྱིས་འགྲོ་ཕན་བསམ་མི་ཁྱབ། །ཡེ་ཤེས་ཆེས་བརྙེས་གྲུབ་མཆོག་བཟང་པོ་ལ། །གསོལ་བ༴ དོན་གཉིས༴ གཏེར་སྲས་བདུན་རྫོགས་གདུང་མཐར་མཁས་གྲུབ་མཆོག །ལྷ་སྲས་སྐྱེ་མཐའ་རིག་འཛིན་སྙིང་པོ་ལ། །གསོལ་བ་འདེབས་སོ༴ དོན་གཉིས༴ ཟབ་མོའི་ལམ་ལ་གཡེལ་མེད་རིག་འཛིན་གཙོ། །མངོན་པར་གྲུབ་པ་བདེ་ཆེན་དར་རྒྱས་ལ། །གསོལ་བ༴ དོན་གཉིས༴ གུ་རུའི་ལུང་ཟིན་འབྲེལ་ཚད་སྨིན་གྲོལ་སྦྱོར། །མཚུངས་མེད་རྗེ་བཙུན་བདེ་ཆེན་རབ་གསལ་ལ། །གསོལ་བ༴ དོན་གཉིས༴ པདྨ་དབང་བསྐུར་དེས་སྟོན་བསྟན་པའི་བདག །རྒྱལ་སྲས་རིག་འཛིན་ཚེ་དབང་ནོར་བུ་ལ། །གསོལ་བ༴ དོན་གཉིས༴ ཚེ་གཅིག་ཉམས་ལ་གཏན་བདེ་སངས་རྒྱས་སར། །དཀྲི་མཛད་དྲིན་ཆེན་རྩ་བའི་བླ་མ་ལ། །གསོལ་བ༴ དོན་གཉིས༴ བླ་མའི་རང་བཞིན་པདྨ་བཛྲ་རྩལ། །ཚོམ་བུ་དགུ་རྫོགས་ཡི་དམ་རབ་འབྱམས་ལ། །གསོལ་བ༴ དོན་གཉིས༴ བླ་མའི་རོལ་རྩལ་དཔའ་བོ་མཁའ་འགྲོ་མ། །བཀའ་སྲུང་གཏེར་བདག་གྲངས་མེད་འཆར་བ་ལ། །གསོལ་བ༴ དོན་གཉིས༴ དེ་ལྟར་བླ་མ་དགོངས་པ་སྤྱི་འདུས་ཀྱི། །རྩ་བརྒྱུད་བླ་མ་ཡི་དམ་མཁའ་འགྲོ་མར། །རྩེ་གཅིག་གསོལ་བ་བཏབ་པའི་མཐུ་ནུས་ཀྱིས། །རྩ་གསུམ་ལྷ་ཡི་བྱིན་རླབས་སྙིང་ལ་ཞུགས། །དབང་བཞིས་བདག་རྒྱུད་ཡོངས་སུ་སྨིན་གྱུར་ཅིང་། །བསྐྱེད་རིམ་ཡེ་ཤེས་དབང་ཕྱུག་མྱུར་ཐོབ་ཤོག །ལས་ཕྲན་ལས་ཆེན་མཐའ་དག་ཐོགས་མེད་གྲུབ། །རྡོ་རྗེ་འཛིན་པའི་ས་མཆོག་ཡོངས་བརྙེས་ཤོག །རྫོགས་རིམ་མཐར་ཐུག་རྒྱལ་ཀུན་བསྒྲོད་ཅིག་ལམ། །ཆེས་གསང་ཐེག་དགུའི་རྩེ་རྒྱལ་རྫོགས་པ་ཆེ། །ཁྲེག་ཆོད་ལྟ་བུའི་ཕུ་ཐག་གཏིང་ནས་ཆོས། །ཐོད་བརྒལ་སྣང་བཞི་ཟད་པར་འཁྱོལ་བར་ཤོག །རྫོགས་རིམ་གདུལ་བྱ་བྱེ་བྲག་ལ་སྣང་ཆོས། །མཐའ་བྲལ་ཕྱག་ཆེན་ཆོས་ཀུན་རང་རྒྱལ་ཐོབ། །ཕར་ཕྱིན་ཡུལ་འཁྲུལ་སྣང་གྲག་གྲོགས་སུ་གཅེས། །ཚུལ་དེས་འཕགས་པའི་བདེན་པ་མངོན་གྱུར་ཤོག །ཟུང་འཇུག་ཡེ་ཤེས་མཁའ་འགྲོའི་གསེང་ལམ་མཆོག །ཕོ་ཉ་མྱུར་མགྱོགས་སྟེང་འོག་སྒོ་གཉིས་ཀྱི། །རྩ་རླུང་ཐིག་ལེ་གནད་དུ་བསྣུན་པ་ཡི། །ཟུང་འཇུག་བདེ་ཆེན་སྐུ་མཆོག་མྱུར་འགྲུབ་ཤོག །དེ་ལྟར་ཚེ་འདི་ཉིད་ལ་མངོན་སངས་རྒྱས། །སྐལ་བརྩོན་དམན་པས་དེ་ལྟར་མ་འགྲུབ་ཀྱང་། །རིགས་དྲུག་འཁོར་བའི་སྐྱེ་སྒོ་ཡོངས་ཆད་དེ། །སྤྲུལ་སྐུའི་ཞིང་དུ་དབུགས་དབྱུང་བྱང་ཆུབ་ཤོག །གལ་ཏེ་སྲིད་པར་སྐྱེས་ཀྱང་ལས་སྨོན་མཐུས། །དལ་འབྱོར་ལུས་ཐོབ་བླ་མ་དམ་པ་མཇལ། །དགེ་བའི་བཤེས་གཉེན་བསྟེན་ཚུལ་ལ་མཁས་ཤིང་། །སྨིན་གྲོལ་ཡོངས་རྫོགས་དོན་གཉིས་ལྷུན་གྲུབ་ཤོག །མདོར་ན་བདག་ནི་དུས་འདི་ནས་ཙམ་སྟེ། །བྱང་ཆུབ་སྙིང་པོ་ཐོབ་ཀྱི་བར་དུ་ནི། །བླ་མ་སངས་རྒྱས་དངོས་སུ་མཐོང་བ་དང་། །རྒྱུ་འབྲས་ཡིད་ཆེས་འདོར་ལེན་མཁས་པར་ཤོག །ཁྱད་པར་གསང་སྔགས་དམ་ཚིག་སྙིང་པོ་ནི། །སྐྱིད་སྡུག་ལེགས་ཉེས་ཇི་ལྟར་གྱུར་ཀྱང་རུང་། །མ་ཉམས་རང་སྲོག་ལ་ཡང་ལྟོས་མེད་པར། །རྒྱལ་བ་ཀུན་ལམ་མཆོག་དེར་འབད་བརྩོན་ཤོག །དེ་ལྟར་བླ་མར་མོས་གུས་རྣམ་དག་གི །ཡོངས་དྲངས་སྟོང་ཉིད་སྙིང་རྗེ་ཟུང་འཇུག་གི །ཚོགས་གཉིས་ཡོངས་རྫོགས་མཐའ་ཡས་འགྲོ་བའི་མགོན། །བདག་གྱུར་བླ་མའི་ཕྲིན་ལས་ཡོངས་བསྒྲུབ་ཤོག །

ཅེས་བླ་མ་དགོངས་འདུས་ཀྱི་དབང་ཁྲིད་ལུང་བཅས་ཀྱི་གཏེར་སྲས་ནས་བརྒྱུད་པའི་གསོལ་འདེབས་སྨོན་ལམ་བཅས་པ་འདི་ནི། ལོང་པོ་གྱིང་གི་ཞལ་ངོ་ཉང་རྗེ་གཙོས་པའི་རིགས་རྒྱུད་དད་གུས་དཔལ་གྱིས་འཚོ་བ་བསྟན་འཛིན་འབྲུག་གྲགས་ཡབ་སྲས་ཀྱིས་ཡང་ཡང་ནན་ཏན་ཆེན་པོའི་གསོལ་བ་བཏབ་པའི་ངོར་ཤར་ཕྱོགས་བོད་ཆེན་དུ་སྐྱེས་པའི་རིག་པ་འཛིན་པ་སྔགས་ཀྱི་པཎྜི་ཏ་དཔལ་ཚེ་དབང་ནོར་བུས་མེ་སྦྲུལ་ཁྲུམས་ཟླའི་དམར་ཕྱོགས་གང་བའི་དུས་ཆེན་པོར་དགོངས་འདུས་གཏེར་གནས་རིན་ཆེན་འབར་བར་ཐུན་བར་ཡུད་ཙམ་ཅིག་ལ་བྲིས་པ་དགེའོ། །

བྱང་གཏེར་ཐུགས་བསྒྲུབ་ཡང་ཏིག་གཅེས་སྒྲོན་གྱི་ཁྲིད་ཀྱི་གསོལ་འདེབས་བྱིན་རླབས་འདྲེན་པའི་ལྕགས་ཀྱུ།

༈ བྱང་གཏེར་ཐུགས་བསྒྲུབ་ཡང་ཏིག་གཅེས་སྒྲོན་གྱི་ཁྲིད་ཀྱི་གསོལ་འདེབས་བྱིན་རླབས་འདྲེན་པའི་ལྕགས་ཀྱུ་ཞེས་བྱ་བ་བཞུགས་སོ། །

ཨོཾ་ཨཱཿཧཱུྃ། རྒྱལ་བ་ཀུན་མེས་མཁའ་ཁྱབ་ཆོས་དབྱིངས་བདག་པོ་ཀུན་བཟང་ཧེ་རུ་ཀ །ལྷུན་གྲུབ་དག་པའི་ཞིང་ནས་ཡེ་ཤེས་ལྔ་ལྡན་རིག་ལྔ་བདེ་བར་གཤེགས། །མེ་རི་འབར་བར་རྒྱལ་བ་ཀུན་གྱི་གསང་འཛིན་ལག་ན་རྡོ་རྗེ་འཆང་། །གསོལ་བ་འདེབས་སོ་རང་རིག་སྐུ་གསུམ་མངོན་གྱུར་དུས་འདིར་ཐོབ་བྱིན་རློབས། །ཀུན་ཏུ་བཟང་མོའི་ཐུགས་སྤྲུལ་རྒྱུད་སྡེའི་བདག་མོ་སྨུག་ནག་དབང་མཁའ་འགྲོ། །རྒྱལ་བའི་རྣམ་འཕྲུལ་ལྷ་ཀླུའི་ཚུལ་འཛིན་ཚངས་དབང་བརྒྱ་བྱིན་འཇོག་པོ་ཆེ། །མི་ཡི་རིགས་འཁྲུངས་གྲུབ་པ་ཀུན་གཙོ་གསང་བའི་བདག་པོ་རྒྱལ་པོ་ཛ། །གསོལ་བ༴ ཟ་ཧོར་རྒྱལ་སྲས་རིམ་དགུ་ཐེག་པའི་མངའ་བདག་ཤཱཀྱ་པྲ་བྷ་ཝ། །རྒྱལ་བ་ཡོངས་ཀྱི་སྤྱི་གཟུགས་ཡེ་ཤེས་ཟླུམ་པའི་སྐུར་གྱུར་པདྨ་འབྱུང་། །ཕྱག་རྒྱ་ཆེ་མཆོག་བརྙེས་པ་དྲི་མེད་བཤེས་དང་བལ་པོ་ངང་ཚུལ་འཇམ། །གསོལ༴ སྣ་ནམ་རིགས་འཁྲུངས་ཡི་དམ་ལྷ་ཡིས་རྗེས་བཟུང་རྡོ་རྗེ་བདུད་འཇོམས་དཔལ། །མཛོད་ལྔ་དབང་བསྒྱུར་རྒོད་སྒྲོའི་ཕུད་ཅན་དངོས་གྲུབ་རྒྱལ་མཚན་ཉི་ཟླ་འོད། །དེ་ཡི་ཐུགས་སྲས་ཟབ་དགུ་ཆོས་ཀྱི་སྡུད་པོ་སངས་རྒྱས་བྱམས་པ་བཟང་། །གསོལ༴ སེ་ཡི་རིགས་ལས་སྦྱོར་སྒྲོལ་ནུས་པ་དཔག་མེད་ཉི་མ་བཟང་པོའི་ཞབས། །མགོན་པོ་བཟང་པོ་ལུང་རྟོགས་ཡོན་ཏན་དུ་མས་ཡོངས་ཕྱུག་སྐལ་ལྡན་དཔལ། །རིག་ཆེན་རྒྱལ་མཚན་སྔ་འགྱུར་བསྟན་པའི་སྲོག་ཤིང་འཆང་ལ་ལན་བརྒྱར་མཁས། །གསོལ་བ༴ མགོན་པོ་ཟླ་བ་ཆོས་སྦྱིན་ཕྱོགས་ཀུན་དགྱེས་པའི་སྤྱན་རས་ཟུམ་མེད་གཟིགས། །གྲུབ་མཆོག་ནམ་སྙིང་སྤྲུལ་པར་ཞལ་བཞེས་བསྟན་པའི་སྒྲོན་མེ་བྱམས་པ་ཆོས། །གང་གི་ཆོས་སྲས་བློ་གྲོས་རྒྱལ་མཚན་ཀུན་ཏུ་རྒྱས་པ་ནུབ་དགོན་ཞབས། །གསོལ༴ རྣམ་པར་རིག་པ་གྲོལ་བའི་སྒྲ་བརྒྱ་རབ་ཏུ་སྒྲོགས་མཛད་བྱམས་པ་བཟང་། །སྲིད་གསུམ་རྣམ་རྒྱལ་རྡོ་རྗེའི་སྤོ་ལ་ངེས་དོན་གསལ་མཛད་ཀུན་བཟང་ཉི། །རྟོགས་པའི་གར་མཁན་འོད་གསལ་རྡོ་རྗེ་སྙིང་པོ་རྒྱས་མཛད་འབྲུག་སྒྲ་བཟང་། །གསོལ༴ རིགས་པ་སྔགས་འཆང་རིམ་གཉིས་ཡོན་ཏན་ཡོངས་བརྙེས་ཕྲིན་ལས་ལྷུན་གྲུབ་ཆེ། །སྡོམ་བརྩོན་རྒྱལ་པོའི་ཚུལ་གྱིས་གཙུག་གི་མངོན་མཆོད་ཆོས་དབྱིངས་རང་གྲོལ་ཞབས། །འཕགས་ཆེན་ས་ལ་ལེགས་བཞུགས་རྒྱལ་བས་ལུང་བསྟན་པདྨ་འཕྲིན་ལས་ཅན། །གསོལ༴ སྤྱན་རས་གཟིགས་སྤྲུལ་སྡོམ་བརྩོན་མཁས་པའི་དབང་པོ་པདྨ་རིག་འཛིན་དབང་། །བླ་མའི་ཐུགས་སྲས་འབྲེལ་ཚད་དོན་ལྡན་རིག་འཛིན་ཚེ་དབང་ནོར་བུའི་སྡེ། །རང་རིག་དྲི་མེད་ཆོས་སྐུའི་རང་ཞལ་སྟོན་མཛད་རྩ་བའི་བླ་མ་མཆོག །གསོལ༴ ཡི་དམ་བདེ་གཤེགས་ཀུན་འདུས་སྤྱི་དཔལ་རྡོ་རྗེ་དྲག་པོ་ལྷ་ཡི་ལྷ། །རྡོ་རྗེ་ཕག་མོ་ཡེ་ཤེས་འཇིག་རྟེན་ལས་ཀྱི་མཁའ་འགྲོ་ཡོངས་ཀྱི་གཙོ། །ཕོ་མོ་མ་ནིང་དྲེགས་པའི་རྗེ་བཙུན་བསྟན་བསྲུང་ཡོངས་རྫོགས་ནག་པོ་ཆེ། །གསོལ༴ རང་ཉིད་ཤེས་རབ་ཕར་ཕྱིན་ཉིད་ལས་གཞན་མིན་འདུལ་བར་རག་གདོང་མ། །དམ་ལྡན་བུ་ལྟར་སྐྱོང་བ་དམ་ཅན་རྡོ་རྗེ་འབར་བ་ཐིག་ལེ་རྩལ། །མ་མོ་བསྟན་མ་སྟོང་དཔོན་གཏེར་གནས་བསྲུང་མ་ཁྲོམ་སྐྱེས་ཞིང་སྐྱོང་ཚོགས། །གསོལ༴ དེ་ལྟར་གུ་རུའི་སྐུ་གསུང་ཐུགས་ཡོན་འཕྲིན་ལས་ཚབ་གྱུར་ཐུགས་བསྒྲུབ་ཀྱི། །ཡོངས་སྙིང་ཐུགས་ཀྱི་ཡེ་ཤེས་མངོན་བྱེད་ཐུགས་ཚབ་ཡང་ཏིག་གཅེས་སྒྲོན་གང་། །བརྒྱུད་པའི་བླ་མ་དམ་པ་རྣམས་དང་ཡི་དམ་ཆོས་སྐྱོང་བསྲུང་བ་ལ། །རྩེ་གཅིག་གསོལ་བ་བཏབ་པའི་བདེན་མཐུ་བྱིན་རླབས་ནུས་པའི་སྟོབས་དག་གིས། །བདག་གི་སྐྱེ་ཀུན་རང་གཞན་དོན་གཉིས་སྤྱོད་ལ་གཡེལ་མེད་ངེས་འབྱུང་རྒྱས། །སྐྱབས་ཀྱི་མཆོག་གྱུར་དཀོན་མཆོག་གསུམ་བཟུང་སྨོན་འཇུག་བྱང་ཆུབ་སེམས་མཆོག་བསྐྱེད། །འགལ་སྤང་མཐུན་རྐྱེན་སྒྲུབ་ལ་རབ་བསྔགས་རྡོར་སེམས་བསྒོམ་བཟླས་མཎྜལ་བརྩོན། །ཆོས་ཀུན་སྙིང་པོ་བླ་མའི་རྣལ་འབྱོར་ལ་འབད་ཐུགས་ཡིད་གཅིག་འདྲེས་ཤོག །མ་དག་དངོས་ཞེན་ཡོངས་འགོག་བདག་ལུས་སྣང་སྲིད་ལྷ་ཡི་རོལ་པར་རྒྱས། །གཉིས་མེད་ཡེ་ཤེས་རང་སྒྲས་གཉིས་སྣང་ཀུན་རྟོགས་ཚོགས་ཀུན་ཟིལ་གྱིས་གནོན། །གནད་བཞིའི་རྟེན་འབྲེལ་ལ་བརྟེན་སེམས་ཉིད་མ་བཅོས་གཉུས་མ་བཟོ་བྲལ་ཉིད། །རྟག་ཏུ་མཉམ་བཞག་སྐྱོན་ལྔ་བླ་མའི་བྱིན་རླབས་ཏིང་འཛིན་གྱིས་སེལ་ཤོག །རྡོ་རྗེ་ཧཱུྃ་ཡིག་བྱུང་གནས་འགྲོར་བརྟགས་སྒོ་གསུམ་མ་འཁྲུལ་སྲང་དུ་གཞུགས། །རྒྱལ་བ་ཀུན་གྱི་གསུང་དབྱངས་རྡོ་རྗེ་སློབ་དཔོན་གཟུགས་ཤར་པདྨ་འབྱུང་། །དེ་ཡང་རང་རིག་ཆོས་སྐུར་ངོ་སྤྲད་མཛད་པོ་བླ་མ་དབྱེར་མེད་པར། །ལྟེམ་རྐྱང་ཡིད་གཉིས་མེད་པར་ཕུར་ཚུགས་ཉིད་ཀྱི་བྱིན་རླབས་བདག་འཇུག་ཤོག །ནམ་མཁའ་ལ་བརྗེན་སྐྱེ་འགགས་གནས་བྲལ་རིག་པ་རང་ངོས་བར་དོ་སྒྲོལ། །དངས་གསལ་མན་ཤེལ་སྣང་སེམས་ཅེར་གྲོལ་ཡེ་ཤེས་མི་འགྱུར་འདུ་བྲལ་མེད། །མཛུབ་ཚུགས་གཟུང་འཛིན་གློ་བུར་དྲི་བྲལ་འོད་གསལ་རང་ངོ་བརྟན་པར་རྟོགས། །རྣམ་གསུམ་ངོ་སྤྲོད་རྒྱུད་ལ་སྦྱར་ནས་ཀ་དག་གནས་ལུགས་གཏན་ཕེབས་ཤོག །མཉམ་རྗེས་དབྱེར་མེད་ཆོས་ཉིད་རོ་གཅིག་མངོན་དུ་མ་གྱུར་བར་དུ་ནི། །པད་འབྱུང་ཞལ་གདམས་དགོངས་པར་བརྒྱད་དང་མི་འབྲེལ་ཡང་དག་འཇོག་བརྩོན་ཞིང་། །སྙིང་པོ་བླ་མར་དད་གུས་མོས་པའི་གདུང་ཤུགས་ནམ་ཡང་ལྷོད་མེད་བརྟེན། །སྤངས་བླང་གནས་རྣམས་ཀུན་བཟང་རྡོ་རྗེ་འཆང་གི་གསུང་བཞིན་སྤྱོད་པར་ཤོག །མདོར་ན་ཚེ་རབས་རྟག་ཏུ་རྫོགས་སངས་རྒྱས་ཀྱི་བསྟན་བཞུགས་དམ་པ་མཇལ། །སྨིན་བྱེད་དབང་གི་ཡོངས་སྨིན་གྲོལ་བྱེད་རིམ་གཉིས་བསྒོམ་རྩལ་ཡོན་ཏན་རྫོགས། །དོན་དམ་ནོར་འཁྲུལ་སྐྱོན་མེད་ཡིན་ལུགས་གཏན་ལ་ཕབས་པ་རང་དོན་ཆོས་སྐུ་གྲུབ། །སྙིང་རྗེའི་འབྲས་བུ་གཞན་དོན་གཟུགས་སྐུའི་འགྲོ་དོན་རྟག་ཏུ་སྤྱོད་པར་ཤོག །

ཅེས་བྱང་གཏེར་ཐུགས་བསྒྲུབ་ཀྱི་ཡང་སྙིང་གུ་རུ་པདྨའི་དགོངས་པའི་ཚབ་རྫོགས་པ་ཆེན་པོ་ཡང་ཏིག་གཅེས་པའི་སྒྲོན་མེའི་བརྒྱུད་པའི་བླ་མ་ལ་གསོལ་བ་བཏབ་པ་འདི་ནི་རྒྱལ་བསྟན་འདྲེན་པའི་ཤིང་རྟ་གཞུང་རྣམ་གྲངས་བཅོ་བརྒྱད་ཐོགས་པ་མེད་པར་སྨྲ་བའི་རབ་འབྱམས་པ་པདྨ་རིག་འཛིན་གྱིས་ཡང་ནས་ཡང་དུ་གསོལ་བ་བཏབ་པའི་ངོར། མདོ་ཁམས་ཀཿཐོག་ལྷོ་ཕྱོགས་སུ་སྐྱེས་ཤིང་རྫོགས་པ་ཆེན་པོ་ལ་མོས་པས་སྤྱོད་པའི་རིག་འཛིན་ཚེ་དབང་ནོར་བུས་ཡོངས་འཛིན་དབྱུག་གུ་ཟླ་བའི་ཡར་ཚེས་བཞི་ལ་ལ་སྟོད་བྱང་པ་བསམ་རྫོང་དུ་་སྨྲས་པའི་ཡི་གེའི་རིས་བྱེད་ནི་ཤཱཀྱའི་དགེ་སློང་རིག་གནས་མཁན་པདྨ་གཡུང་དྲུང་གིས་བགྱིས་པའོ། །དགེའོ། །དགེའོ། །དགེའོ། །སརྦ་མངྒ་ལཾ།

རྫོགས་ཆེན་ཕུང་པོ་ཟག་མེད་ཀྱི་བརྒྱུད་འདེབས་རིན་པོ་ཆེའི་ཕྲེང་བ།

༈ རྫོགས་ཆེན་ཕུང་པོ་ཟག་མེད་ཀྱི་བརྒྱུད་འདེབས་རིན་པོ་ཆེའི་ཕྲེང་བ་བཞུགས་སོ། །

ཨོཾ་ཨཱཿ ཧཱུྃ་ཧོཿ གདོད་ནས་བྱང་ཆུབ་འདུས་མ་བྱས་པའི་སྐུ། །ཡེ་ཤེས་ཉིད་གྱུར་རྒྱལ་བ་ཀུན་གྱི་ཡབ། །མཐའ་བྲལ་གཤིས་ལུགས་ཀུན་བཟང་ཡབ་ཡུམ་ལ། །གསོལ་བ་འདེབས་སོ་མཆོག་གི་དངོས་གྲུབ་སྩོལ། །འོད་ལྔ་རང་གསལ་དྭངས་མ་ཆོས་ཉིད་དབྱིངས། །མཚོན་མེད་ཁྱབ་བརྡལ་སྐུ་དང་ཐིག་ལེའི་གར། །ཡོངས་བརྩོན་རིགས་དྲུག་རྡོར་འཆང་ཡབ་ཡུམ་ལ། །གསོལ་བ༴ རྒྱལ་བ་ཀུན་གྱི་ཐུགས་ཀྱི་ཡེ་ཤེས་མཐུ། །གཅིག་ཏུ་བཟླུམ་པ་རང་རིག་དོན་དམ་གཤིས། །མ་བཅོས་སངས་རྒྱས་སེམས་དཔའ་ཡབ་ཡུམ་ལ། །གསོལ༴ ལྟ་ངན་མཐོང་འདིར་བླ་མེད་ཐེག་པའི་སྙིང་། །འོད་གསལ་རྡོ་རྗེའི་སྟོན་པ་གཅིག་པུ་པ། །ཐུབ་པ་ཆེན་པོ་དགའ་རབ་རྡོ་རྗེ་ལ། །གསོལ༴ ཆོས་ཀུན་དབྱེར་མེད་ཆོས་ཉིད་དབྱིངས་སུ་ཐིམ། །མི་སློབ་ལམ་རྫོགས་གདོད་མའི་ས་ལ་གཤེགས། །ཐུགས་རྗེ་ཆེན་པོ་དཔལ་གྱི་སེང་གེ་ལ། །གསོལ༴ སངས་རྒྱས་ཀུན་དངོས་མཚོ་སྐྱེས་རྡོ་རྗེ་འཆང་། །དཔལ་ཆེན་པོར་གྱུར་ཀུན་བཟང་ཐོད་ཕྲེང་རྩལ། །ཨོ་རྒྱན་རྒྱལ་པོ་པདྨ་འབྱུང་གནས་ལ། །གསོལ༴ རྡོ་རྗེ་རྣལ་འབྱོར་མི་ཡི་གཟུགས་བཟུང་ནས། །གསང་སྔགས་རྒྱ་ཆེན་བཀའ་ཡི་བསྡུ་བ་པོ། །ཡེ་ཤེས་མཁའ་འགྲོའི་གཙོ་མོ་མཚོ་རྒྱལ་མ། །གསོལ༴ སྨོན་ལམ་ལས་སད་སྦྱངས་པ་མཆོག་དང་ལྡན། །དག་པའི་སར་འཁོད་འབྲེལ་ཚད་སྨིན་གྲོལ་གྱུར། །ཟབ་གཏེར་མངའ་བདག་ཚེ་དབང་རྒྱལ་པོ་ལ། །གསོལ༴ བསྐྱེད་རྫོགས་མངོན་གྱུར་ཐབས་ལམ་ཡོན་ཏན་བརྙེས། །པདྨས་ལུང་བསྟན་ལས་སྐལ་མཆོག་དང་ལྡན། །རྣལ་འབྱོར་དབང་ཕྱུག་གསང་སྔགས་རྡོ་རྗེ་ལ། །གསོལ༴ བླ་མས་རྗེས་བཟུང་ཡང་དག་དོན་རྟོགས་ཤིང་། །ཡི་དམ་ཞལ་གཟིགས་མཁའ་འགྲོའི་གཏད་རྒྱ་ཐོབ། །རིག་འཛིན་ཐེག་ཆེན་མཆོག་རང་གྲོལ་རྡོ་རྗེ་ལ། །གསོལ༴ གཞུང་ལུགས་དུ་མ་སྨྲ་བའི་སྟོབས་ལྡན་ཞིང་། །ཕྱི་ནང་རིག་པའི་གནས་རྟོགས་བྱ་བྲལ་བ། །ཐོགས་མེད་རབ་འབྱམས་ངག་གི་དབང་ཕྱུག་ལ། །གསོལ༴ སྔོན་སྦྱངས་མཐུ་ལྡན་དམ་པའི་ཡོན་ཏན་སྨིན། །མུན་པར་སྣང་བ་བཞི་ཡི་རྩལ་རྫོགས་ཤིང་། །མཆོག་གཟིགས་གྲུབ་དབང་ནམ་མཁའ་སངས་རྒྱས་ལ། །གསོལ༴ དཀའ་སྤྱད་མཐར་ཕྱིན་གནས་ལུགས་མངོན་དུ་གྱུར། །རླུང་སེམས་ལས་རུང་བསྒྲུབ་པའི་རྒྱལ་མཚན་བཙུགས། །རྣལ་འབྱོར་གྲུབ་མཆོག་འཆི་མེད་འོད་ཟེར་ལ། གསོལ༴ པདྨའི་སྤྱན་སྔར་གཞན་ཕན་སྨོན་ལམ་མཐུས། །སྙིགས་དུས་སྤྲུལ་པའི་གཟུགས་བསྟན་འགྲོ་འདུལ་སྐུར། །སྣང་བ་སྐྱེས་མཆོག་རྒྱལ་བ་སེངྒེ་ལ། །གསོལ༴ བླ་མའི་བཀའ་བཞིན་ཚེ་གཅིག་བསྒྲུབ་ལ་བརྩོན། །སྐྱེ་མེད་སྤྲོས་བྲལ་འོད་གསལ་རྟོགས་པ་བརྙེས། །སྦས་པའི་ཚུལ་འཛིན་ཤཱཀྱ་སེངྒེ་ལ། །གསོལ༴ བླ་མའི་བྱིན་རླབས་ཉམས་མྱོང་རྒྱུད་ལ་སྐྱེས། །དམ་ཚིག་ཚུལ་འཛིན་མཁའ་འགྲོ་གྲིབ་ལྟར་འགྲོགས། །རྣལ་འབྱོར་གཟུགས་འཛིན་ཚེ་དབང་ནོར་བུ་ལ། །གསོལ༴ རྒྱལ་ཀུན་གཤེགས་ཤུལ་ཡང་དག་རྟོགས་པ་ཆེ། །མངོན་སྟོན་བླ་མེད་དཀྱིལ་འཁོར་ཀུན་གྱི་གཙོ། །བཀའ་དྲིན་མཚུངས་མེད་རྩ་བའི་བླ་མ་ལ། །གསོལ༴ རང་ལུས་ཕུང་ཁམས་དག་པའི་དཀྱིལ་འཁོར་ནས། །ཡེ་ཤར་རྒྱལ་བའི་དཀྱིལ་འཁོར་ལྷ་མི་ཚོགས། །ཞི་ཁྲོ་རབ་འབྱམས་དཔའ་བོ་མཁའ་འགྲོ་ལ། །གསོལ༴ རང་བྱུང་མཁའ་ཀློང་གནས་ཡུལ་ཕོ་བྲང་ནས། །རྒྱལ་བའི་བསྟན་སྲུང་དམ་ལྡན་བུ་ལྟར་སྐྱོང་། །མ་གཟའ་རྡོར་ལེགས་དམ་ཆེན་རྒྱ་མཚོ་ལ། །གསོལ་བ་འདེབས་སོ༴ གཏེར་གནས་ཚེ་དཔུང་མི་ཤིག་བྷ་ག་ནས། །ཟབ་ཆོས་སངས་རྒྱས་ཀུན་གྱི་དགོངས་པའི་བཅུད། །སྐད་ཅིག་གྲོལ་བྱེད་རྫོགས་ཆེན་ཟག་མེད་ལ། །གསོལ༴ སྔོན་གྱི་སྨོན་ལམ་དག་པས་སྐལ་མཉམ་ཞིང་། །ལྷ་དང་ཐ་མ་གདམས་ངག་གཅིག་གྱུར་བའི། །མཆེད་དང་ལྕམ་དྲལ་རྡོ་རྗེ་སྤུན་རྣམས་ལ། །གསོལ༴ དེ་ལྟར་རྩ་བརྒྱུད་བླ་མ་ཡི་དམ་ལྷར། །རྩེ་གཅིག་གསོལ་བ་བཏབ་པའི་བྱིན་རླབས་ཀྱིས། །ཚེ་འདིར་ཞེན་པའི་སྣང་བ་ཀུན་བྲལ་བར། །དབེན་པའི་གནས་སུ་བསྒྲུབ་པ་མཐའ་རུ་ཕྱིན། །སྣང་བཞི་མཐར་ཕྱིན་ཟག་མེད་འོད་སྐུར་འགྲུབ། །ཀུན་བཟང་རྡོར་སེམས་ས་ལ་གཤེགས་པར་ཤོག །བྱ་བ་ཐམས་ཅད་འགྲོ་ཕན་ཉིད་འགྲུབ་ཅིང་། །རྒྱལ་བའི་བསྟན་པ་ཕྱོགས་བཅུར་སྤེལ་བ་དང་། །ཁྱད་པར་འོད་གསལ་རྡོ་རྗེ་སྙིང་པོའི་དོན། །སྟོན་པའི་སྒྲོན་མེ་བདག་ཉིད་འགྲུབ་པར་ཤོག །མདོར་ན་བདག་དོན་རྡོར་སེམས་གོ་འཕང་ཐོབ། །གཞན་དོན་འབྲེལ་ཚད་འཁོར་བ་དོང་སྤྲུག་ཤོག །

ཅེས་སངས་རྒྱས་དགོངས་འདུས་ཀྱི་རྫོགས་ཆེན་ཟག་མེད་དབང་ཁྲིད་ལུང་དང་བཅས་པའི་བརྒྱུད་འདེབས་སུ་བླ་མའི་བཀའ་དང་མཆོག་གི་སྤྲུལ་སྐུ་ཀརྨ་གར་དབང་དོན་འགྲུབ་ཀྱི་གསུང་གིས་བསྐུལ་ངོར། མངའ་རིས་གུང་ཐང་ནུབ་རི་གློ་མོན་བོད་ཀྱི་མཚམས་ས་མཐའ་ཏ་ལ་ཞེས་པར་ས་སྤྲེལ་ཧོར་ཟླ་གཉིས་པའི་ཚེས་བཅུ་བདུན་བཟང་པོར་སྔགས་ཀྱི་རྣལ་འབྱོར་པ་ཚེ་དབང་ནོར་བུ་དཔལ་གྱི་རྒྱ་མཚོས་སྨྲས་པ་སརྦ་མངྒ་ལཾ།

༈ ཚེ་སྒྲུབ་རྡོར་ཕྲེང་བརྒྱུད་འདེབས།

ཨོཾ་བྷྲུཾ། འཆི་མེད་རྒྱལ་བ་ཡོངས་ཀྱི་སྤྱི་མེས་ཆེ། །གདོད་ནས་བྱང་ཆུབ་ཀུན་བཟང་ཡབ་ཡུམ་ལ། །གསོལ་བ་འདེབས་སོ་སྨིན་གྲོལ་འབྲས་བུ་མཆོག །འཆི་མེད་རྒྱལ་བ་དུས་འདིར་འགྲུབ་བྱིན་རློབས། །དག་པ་གཞན་དབང་སྟུག་པོ་བཀོད་པའི་བདག །ཚེ་བདག་པདྨ་གངས་ཅན་ཡབ་ཡུམ་ལ། །གསོལ་བ་འདེབས་སོ་སྨིན་གྲོལ་འབྲས་བུ་མཆོག །འཆི་མེད་རྒྱལ་བ་དུས་འདིར་འགྲུབ་བྱིན་རློབས། །སྡུག་བསྔལ་ཀུན་སྤངས་བདེ་ལྡན་ཞིང་གི་མགོན། །ཚེ་འོད་ཡེ་ཤེས་དཔག་མེད་ཡབ་ཡུམ་ལ། །གསོལ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །བཟང་པོའི་ཞིང་དུ་ཐུབ་ཆེན་སྤྲུལ་པའི་སྐུ། །གསུང་གི་རྡོ་རྗེ་པདྨ་འབྱུང་གནས་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །རྒྱལ་བ་ཀུན་གྱི་གསང་གསུམ་དབང་བསྒྱུར་མཛད། །མཁའ་སྤྱོད་གཙོ་མོའི་གཟུགས་འཆང་མཚོ་རྒྱལ་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །རྒྱལ་བ་མར་མེ་རི་རབ་རྒྱལ་པོ་ཡིས། །སྤྲུལ་པའི་རྣམ་རོལ་གཏེར་སྟོན་པདྨ་གླིང་། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །གང་གི་གསུང་ལས་སྐྱེས་པའི་སྲས་ཀྱི་མཆོག །གདམས་པའི་མཛོད་འཛིན་གྲུབ་པ་ཀུན་འདུས་ཞབས། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །པདྨའི་གདམས་པ་ཆད་མེད་ཡིད་བཞིན་གཏེར། །ལེགས་པར་སྤེལ་མཁས་པདྨ་འཕྲིན་ལས་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །པད་གླིང་གསུང་གི་འོད་ཟེར་ལས་སྤྲུལ་པའི། །མཚུངས་མེད་བླ་མ་ཚུལ་ཁྲིམས་རྡོ་རྗེའི་ཞབས། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །སྔ་འགྱུར་རིང་ལུགས་གསལ་བའི་སྒྲོན་མེ་མཆོག །བོན་ལུང་དཔལ་འབྱོར་ཚུལ་ཁྲིམས་རྒྱལ་བའི་མཚན། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །མཁྱེན་པའི་སྤྱན་ཡངས་ངེས་དོན་ཉམས་རྟོགས་རྒྱས། །རྣལ་འབྱོར་དབང་ཕྱུག་ཡེ་ཤེས་དཔལ་འབར་ཞབས། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །བྱིན་རླབས་བརྒྱུད་ལྡན་སྨིན་གྲོལ་གཏེར་མཛོད་མགོན། །སངས་རྒྱས་ཀུན་འདུས་རྩ་བའི་བླ་མ་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །ཡི་དམ་དཀྱིལ་འཁོར་རྒྱ་མཚོའི་ངོ་བོ་ཉིད། །ཚེ་དཔག་མེད་མགོན་དཀྱིལ་འཁོར་ལྷ་ཚོགས་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །ཚེ་ཡི་མཐུན་རྐྱེན་བསྒྲུབ་ཅིང་བར་ཆད་སེལ། །མཁའ་འགྲོ་ཆོས་སྐྱོང་ནོར་ལྷ་གཏེར་བདག་ལ། །གསོལ་བ་འདེབས་སོ༴ འཆི་མེད་རྒྱལ་བ་དུས་འདིར་འགྲུབ་བྱིན་རློབས། །དེ་ལྟར་ཚེ་སྒྲུབ་རྡོ་རྗེ་ཕྲེང་བ་ཡི། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །མཁའ་འགྲོ་ཆོས་སྐྱོང་སྲུང་མའི་ཚོགས་བཅས་ལ། །རྩེ་གཅིག་གསོལ་བ་བཏབ་པའི་བྱིན་རླབས་ཀྱིས། །དམ་ཆོས་སྒྲུབ་པའི་རྟེན་བཟང་མཐོ་རིས་ལུས། །སྐྱེ་ཀུན་རིགས་བཟང་གཟུགས་མཛེས་དབང་པོ་གསལ། །ནད་མེད་ཚེ་རིང་ཕུན་ཚོགས་འབྱོར་བ་རྒྱས། །རྒྱུ་འབྲས་བླང་དོར་ལ་མཁས་འཕགས་ནོར་ཕྱུག །མ་ནོར་ལམ་སྟོན་དགེ་བའི་བཤེས་གཉེན་མཇལ། །དམ་པ་བསྟེན་མཁས་སྔགས་ཀྱི་སྨིན་གྲོལ་ནོད། །དམ་ཚིག་སྲོག་ལས་ལྷག་པར་གཅེས་སྲུང་ཞིང་། །རིམ་གཉིས་ལ་བརྩོན་ཡོན་ཏན་མངོན་དུ་གྱུར། །ཕུང་པོ་དག་པ་ལྷ་ཡི་སྐུ་རུ་སྨིན། །འཕོ་བཅས་འཆི་བ་འཕོ་མེད་དབྱིངས་སུ་གྲོལ། །ཉོན་མོངས་འཛག་མེད་མི་འགྱུར་བདེ་ལ་ཐིམ། །སྒྲིབ་གཉིས་ལྷ་བུ་སྒྲིབ་བྲལ་མཁའ་ལ་སངས།།མཁའ་མཉམ་རྒྱལ་བའི་དཀྱིལ་འཁོར་ཡོངས་གྲུབ་ནས།།སྤྲུལ་པས་མཁའ་ཁྱབ་སེམས་ཅན་མ་ལུས་པ། །གང་འདུལ་རོལ་པས་སྲིད་དང་ཞི་བ་ཡི། །མཐའ་གྲོལ་བྱང་ཆུབ་མཆོག་ལ་འགོད་པར་ཤོག །

ཅེས་དེ་ལྟར་ཚེ་གྲུབ་རྡོ་རྗེ་ཕྲེང་བ་ཡི་དབང་ཁྲིད་ལུང་གསུམ་ཀའི་བརྒྱུད་པའི་བླ་མ་ལ་གསོལ་བ་གདབ་པ་འདི་ནི་རྡོ་རྗེའི་སློབ་མ་དད་གུས་ཀྱི་ལང་ཚོ་མཆོག་ཏུ་བསྟན་པ་ཉང་སྟོད་སྡེ་བ་ཁང་དམར་འཆི་མེད་རྒྱལ་ཕུར་གྱིས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ཤིང་གླང་ས་ག་ཟླ་བའི་དམར་ཕྱོགས་ཀྱི་རྒྱལ་བ་གསུམ་པ་ལ་ཀོང་ཡུལ་གསུང་འཁོར་གྱི་ཕུ་གྲུབ་པའི་བསྟི་གནས་ཁྱུང་ཕུག་ཏུ་བྲིས་པ་དགེའོ། །སརྦ་མངྒ་ལཾ།

ཚེ་སྒྲུབ་འཆི་མེད་དཔལ་གཏེར་གྱི་གསོལ་འདེབས་ཟབ་ཡངས་མཆོག་སྒྲུབ།

༈ ཚེ་སྒྲུབ་འཆི་མེད་དཔལ་གཏེར་གྱི་གསོལ་འདེབས་ཟབ་ཡངས་མཆོག་སྒྲུབ་བཞུགས་སོ། །

ཨོཾ་ཨཱཿཧཱུྃ་ཧྲཱིཿ ཧྲཱིཿ སྣང་བ་མཐའ་ཡས་འགྲོ་ཀུན་རྗེས་སུ་སྐྱོང་། །ཚེ་དཔག་མེད་མགོན་འགྲོ་ལ་འཆི་མེད་གཏེར། །རྟ་མགྲིན་དབང་རྒྱལ་འགྲོ་བའི་བར་ཆད་སེལ། །པདྨ་འབྱུང་གནས་སྙིགས་དུས་འགྲོ་བའི་སྐྱབས། །ཐང་སྟོང་རྒྱལ་པོར་གསོལ་བཏབ་བསླུ་བ་མེད། །གསོལ་བ་འདེབས་སོ་འགལ་རྐྱེན་བར་ཆད་སེལ། །བྱིན་གྱིས་རློབས་ཤིག་འཆི་མེད་དངོས་གྲུབ་སྩོལ། །ཟུང་འཇུག་སྒྱུ་འཕྲུལ་གར་དབང་གཏེར་བཞེད་གླིང་། །འགྲོ་འདུལ་རིག་འཛིན་གུ་རུ་ཞི་བ་འོད། །པདྨའི་ཐུགས་སྤྲུལ་བདེ་བ་ཆེན་པོའི་ཞབས། །གང་འདུལ་འགྲོ་འདྲེན་ཚེ་དབང་ནོར་བུའི་སྡེ། །བཀའ་དྲིན་མཚུངས་མེད་རྩ་བའི་བླ་མ་ལ། །གསོལ༴ བྱིན༴ འཆི་བ་མེད་པ་དོན་དམ་གདོད་མའི་གཤིས། །མི་ཤིག་དྭངས་མ་འཕོ་བྲལ་རྡོ་རྗེ་ཚེ། །གཡོ་མེད་རིག་པ་རང་འབྱུང་བདེ་བ་ཆེ། །མངོན་གྱུར་ཟུང་འཇུག་མཆོག་འབྲས་ཐོབ་བྱིན་རློབས། །

ཞེས་པ་ཡང་བྱར་མེད་རྫོགས་པ་ཆེན་པོའི་རྣལ་འབྱོར་པ་གསང་སྔགས་པས་ནང་གི་དགེ་སློང་ཕྱོགས་སུ་རློམ་པ་ཚེ་དབང་ནོར་བུ་གང་ཤར་གཟའ་གཏད་བྲལ་བ་དེས་ཞི་བ་ས་བྱ་ཆོ་འཕྲུལ་ཟླ་བའི་ཚེས་བཟང་ཉེར་གཉིས་ལ་རུ་ལག་གྲོམས་པ་རྒྱང་དུ་སྦྱར་བ་སརྦ་མངྒ་ལཾ། དགེའོ། །

གསང་ལམ་སྙན་བརྒྱུད་ཀྱི་གསོལ་འདེབས་བྱིན་རླབས་ནུས་མྱུར་རྡོ་རྗེའི་ཐོལ་གླུ།

༈ གསང་ལམ་སྙན་བརྒྱུད་ཀྱི་གསོལ་འདེབས་བྱིན་རླབས་ནུས་མྱུར་རྡོ་རྗེའི་ཐོལ་གླུ་བཞུགས་སོ། །

ཨོཾ་ཨཱ་ཧཱུྃ་ཧྲཱི། དབྱིངས་ཡེ་གདངས་ལྔ་ལྷུན་གྲུབ་དཀྱིལ་འཁོར་ནས། །རང་བྱུང་ཀ་དག་གཤིས་ལུགས་ཀུན་བཟང་མོ། །རིག་གྲོལ་གདོད་མའི་རྒྱལ་བ་ཀུན་ཏུ་བཟང་། །གསོལ་འདེབས་བུ་ལ་དབང་བསྐུར་བྱིན་ཕོབ་ཅིག །རྩ་རླུང་ལས་རུང་རླུང་སེམས་དབུ་མར་ཆུད། །བདེ་དྲོད་རང་འབར་ཉམས་རྟོགས་གོང་དུ་འཕེལ། །ཐིག་ལེ་ལས་རུང་རང་རིག་རྩལ་དབང་ཐོབ། །ཉམས་ལེན་ནུས་པ་མྱུར་ཐོབ་བྱིན་གྱིས་རློབས། །ཟག་མེད་བདེ་ཆེན་ཡེ་ཤེས་དཀྱིལ་འཁོར་ནས། །རང་རིག་རྒྱལ་པོ་གཟི་བརྗིད་སྣང་མཐའ་ཡས། །འབྱུང་ཁམས་གནས་དག་རང་རྩལ་གོས་དཀར་མོ། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ དབྱིངས་རིག་ལྷན་སྐྱེས་རང་གྲུབ་དཀྱིལ་འཁོར་ནས། །སྣང་བ་ཐབས་མཆོག་དཔའ་བོ་རྟ་གདོང་ཅན། །སྟོང་དབྱིངས་ཤེས་རབ་ཌཱ་ཀི་ཕག་གདོང་མ། ། གསོལ་བ༴ རྩ་རླུང༴ ཐིག་ལེ༴ ཉམས་ལེན༴ ཆོས་དབྱིངས་བདེ་བ་ཐིག་ལེའི་ཕོ་བྲང་ནས། །རིག་རྩལ་དབང་ཐོབ་རིག་འཛིན་པདྨ་འབྱུང་། །བདེ་ཆེན་ལྷུན་གྲུབ་རྣལ་འབྱོར་མཚོ་རྒྱལ་ལ། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ དབུ་མའི་མདུད་གྲོལ་ཀ་དག་ཕོ་བྲང་ནས། །ཐོག་མེད་ནུས་ལྡན་མངྒ་ཨ་ཡུའི་མཚན། །བདེ་འཕེལ་གསང་བའི་ལས་མཛད་ལྕམ་བཅས་ལ། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ ཕྱོགས་བྲལ་ཟང་ཐལ་སྒྱུ་འཕྲུལ་ཕོ་བྲང་ནས། །འཇིགས་མེད་རྣལ་འབྱོར་སེང་གེའི་རྩལ་རྫོགས་དཔལ། །དགྱེས་བདེ་ལྡན་ཞིང་ཌཱ་ཀི་བཅས་རྣམས་ལ། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ དུ་མ་རོལ་གཅིག་ཤར་བའི་ཕོ་བྲང་ནས། །སྣང་སེམས་དབྱེར་མེད་མངོན་གྱུར་བདེ་ཆེན་གླིང་། །ཟུང་འཇུག་རྒྱུད་ལ་མངོན་མཛད་ཡེ་ཤེས་མར། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ འཛིན་མེད་སྟོང་གསལ་དག་པའི་ཕོ་བྲང་ནས། །གསང་བའི་དོན་སྟོན་རྣལ་འབྱོར་ཆེན་པོའི་ཞབས། །བདག་གྲོལ་བྱིན་གྱིས་བརླབས་མཛད་ཌཱ་ཀིར་བཅས། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ དག་པ་རབ་འབྱམས་བདེ་ཆེན་ཕོ་བྲང་ནས། །བཀའ་དྲིན་མཉམ་མེད་རྒྱལ་མཆོག་རིག་འཛིན་རྗེ། །གནས་ཡུལ་མཚན་ལྡན་ཕྱག་རྒྱའི་ཚོགས་བཅས་ལ། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ གཞོན་ནུ་བུམ་སྐུ་ཚོམ་བུའི་ཕོ་བྲང་ནས། །རྒྱུད་སྡེ་བཞི་དྲུག་ཡི་དམ་དཀྱིལ་འཁོར་ལྷ། །མཁའ་འགྲོ་སྡེ་ལྔ་གནས་ཡུལ་སྐྱོང་བའི་ཚོགས། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ རབ་འཇིག་མེ་འབར་བསྟན་སྲུང་ཕོ་བྲང་ནས། །དཔལ་མགོན་མ་ནིང་ཞིང་སྐྱོང་གཟི་ལྡན་ཆེ། །སྔགས་སྲུང་དབྱིངས་ཀྱི་མ་མོ་རལ་གཅིག་མར། །གསོལ་བ༴ རྩ་རླུང༴ ཐིག་ལེ༴ ཉམས་ལེན༴ ཧཱུྃཿ བརྒྱུད་ལྡན་བླ་མར་གསོལ་འདེབས་བྱིན་ཕོབས་ཅིག །ཡི་དམ་ལྷ་ཚོགས་གསོལ་འདེབས་བྱིན་ཕོབས་ཅིག །མ་སྲིང་མཁའ་འགྲོར་གསོལ་འདེབས་བྱིན་ཕོབས་ཅིག །གསོལ༴ བསྟན་སྲུང་དམ༴ བྱིན་ཆེན་བྱིན་རླབས་སྤྲིན་ཕུང་ཐིབ་སེ་ཐིབ། །བྱིན་ཆེན་ཐུགས་རྗེའི་གློག་ཞགས་ཁྱུག་སེ་ཁྱུག །བྱིན་ཆེན་དྲག་སྔགས་འབྲུག་སྒྲ་འུར་རུ་རུ། །བྱིན་ཆེན་དངོས་གྲུབ་ཆར་བ་ད་ཕོབ་ཅིག །བར་ཆད་བསྐྲད་བྱེད་ཁྲོ་ཆུང་ཐ་ར་ར། །བག་ཆགས་སྲེག་བྱེད་མེ་ཕུང་ལྷབ་སེ་ལྷབ། །དགྲ་བགེགས་གྲོལ་བྱེད་མཚོན་ཆ་སྐར་ལྟར་འཁྲུག །བྱང་ཆུབ་གྲུབ་པའི་བར་ཆད་ད་བཟློག་ཅིག །རྣལ་འབྱོར་ལུས་ལ་རས་གོས་བག་རེ་བརྗིད། །ལྕང་ལོ་རུས་རྒྱན་ཁ་ཊྭཱཾ་བྱིན་རེ་ཆེ། །གཅེར་བུའི་ལུས་ལ་བདེ་དྲོད་ཞག་རེ་སྣུམ། །དམ་ལྡན་བུ་ལ་ཡེ་ཤེས་ད་སྦོར་ཞོག །ལུས་ལ་བདེ་དྲོད་ངག་ལ་ནུས་པ་བསྐྱེད། །སེམས་ལ་རང་རིག་རིག་པའི་རྩ་དབང་བསྐུར། །རྐྱེན་ངན་ཀུན་ཞི་སྣང་སྲིད་ཆོས་སྐུར་རོལ། །རྩ་རླུང་ཐིག་ལེ་སྐུ་གསུམ་མངོན་དུ་བསྒྱུར། །ཆོས་ཟད་བློ་འདས་འཕོ་མེད་དབྱིངས་གྲོལ་ཤོག །ཨཿ མཿ ཧཿ རིཿ ནིཿ སཿ ཨཿ དྷིཥྛཿ ཏེཿ ཛྙིཿ ན་ཛོ་ལ་ཨཿ

ཞེས་པ་རྩ་རླུང་ཐིག་ལེའི་གདམས་པ་སྙན་བརྒྱུད་ཡིག་མེད་ཀྱི་བརྒྱུད་པའི་གསོལ་འདེབས་བྱིན་རླབས་ནུས་མྱུར་རྡོ་རྗེའི་ཐོལ་གླུ་འདི་ཉིད། བདེ་རས་པ་རྣལ་འབྱོར་ཚེ་དབང་ནོར་བུའམ། བསོད་ནམས་ཐེག་མཆོག་བསྟན་འཛིན་པས་སྟག་ཡུལ་སེའུ་ལུང་ཆོས་གྲྭར་ས་ཕག་ཟླའི་ཚེས་གསུམ་ལ་སྦྱར་བ་དགེའོ། །

ཉམས་ལེན་བུ་ལ་སྔགས་ཀྱི་སྲུང་མས་གྲོགས་མཛོད་ཅིག །ཚོད་ལྟ་ཐེ་ཚོམ་མཁན་ལ་བཀའ་ཆད་ཆོད། །

ཨོཾ་ཨཱཿཧཱུྃ། སྤྲོས་བྲལ་དབྱིངས་རིག་སྣང་མཐའ་གོས་དཀར་མོ། །བདེ་སྟོང་ཟུང་འཇུག་རྟ་མཆོག་ཕག་གདོང་མ། །ཟག་མེད་འཇའ་སྐུ་པད་འབྱུང་མཚོ་རྒྱལ་མ། །གསོལ་བ་འདེབས་སོ་སྨིན་གྲོལ་བྱིན་དབང་སྩོལ། །བར་འབྲུག་གྲུབ་གཙོ་མང་ག་ཨ་ཡུའི་ཞབས། །ཟང་ཐལ་སྤྱོད་པའི་མངའ་བདག་གཏེར་བཞེད་སྙིང་། །རིམ་གཉིས་མཆོག་བརྙེས་པདྨ་མ་ཎིའི་མཚན། །གསོལ་བ༴ ཆོས་ཀུན་རོ་མཉམ་པདྨ་བདེ་ཆེན་གླིང་། །ཟབ་གསང་མཛོད་འཛིན་བི་བྷུ་ཏི་ཤྲཱི། །བཀའ་དྲིན་མཚུངས་མེད་རྩ་བའི་བླ་མའི་ཞབས། །གསོལ༴ ཟབ་གསང་བརྒྱུད་པའི་བླ་མ་ཡི་དམ་ལྷ། །མཁའ་འགྲོ་སྲུང་མར་བཅས་པར་གསོལ་འདེབས་མཐུས། །དབང་བཞིའི་ཆུ་བོས་བདག་རྒྱུད་རབ་ཏུ་སྨིན། །བསྐྱེད་རྫོགས་ཟུང་འཇུག་ཐབས་ལམ་ཕོ་ཉ་ཡི། །ཟག་བྲལ་བདེ་བ་ཆེན་པོའི་དཀྱིལ་འཁོར་དུ། །དམིགས་མེད་ཆོས་སྐུ་རྡོ་རྗེ་འཆང་ཆེན་པོའི། །གོ་འཕང་མཆོག་ལ་ཚེ་འདི་ཉིད་འཁོད་དེ། །འཇའ་ལུས་འོད་གསལ་རྡོ་རྗེའི་སྐུ་བརྙེས་ཤོག །

ཅེས་གཙང་སྙེ་མོའི་བསྒྲུབ་ཆེན་ཀུན་བཟང་ཉི་མས་བསྐུལ་ངོར་རང་བཞིན་རྣལ་འབྱོར་གྱི་གཟུགས་འཛིན་ཚེ་དབང་ནོར་བུ་གར་དབང་འགྲོ་འདུལ་གྱིས་གཡས་རུ་ཤངས་ཀྱི་སྟག་ནར་ཆོ་འཕྲུལ་ཟླ་བའི་ཚེས་ཉེར་དྲུག་ལ་བཀོད་པ་ཡིག་རིགས་ཨོ་རྒྱན་བློ་གྲོས་དབང་པོའོ། །

བཅོམ་ལྡན་འདས་དྲག་པོ་ལྷ་གསུམ་གྱི་གསོལ་འདེབས་བྱིན་རླབས་མྱུར་སྩོལ།

༈ བཅོམ་ལྡན་འདས་དྲག་པོ་ལྷ་གསུམ་གྱི་གསོལ་འདེབས་བྱིན་རླབས་མྱུར་སྩོལ་ཞེས་བྱ་བ་བཞུགས་སོ། །

ཨོཾ་ཨཱཿཧཱུྃཿ ཆོས་རྣམས་ཀུན་གྱི་གདོད་མའི་གནས་ལུགས་ཉིད། །རང་བྱུང་གི་རྟག་ཀུན་བཟང་དང་པོའི་མགོན། །ཞི་ཁྲོ་སྒྱུ་འཕྲུལ་རྒྱ་མཚོའི་མངའ་བདག་གཙོ། །གསོལ་འདེབས་བདག་ལ་དབང་བསྐུར་བྱིན་གྱིས་རློབས། །ཆོས་ཉིད་ཞི་ལས་མ་གཡོལ་གདུལ་བྱའི་ངོར། །བདུད་དང་རུ་ཏྲ་འདུ་ཕྱིར་ཁྲོས་པའི་གར། །བསྒྱུར་མཛད་སྤྱན་རས་གཟིགས་དབང་རྟ་མཆོག་དཔལ། །གསོལ་འདེབས༴ རྒྱལ་བ་ཡོངས་ཀྱི་གསང་གསུམ་དབང་བསྒྱུར་ཞིང་། །དྲེགས་པ་ཀུན་གྱི་གཉེན་པོ་ལྷ་ཡི་ལྷ། །བཅོམ་ལྡན་ལག་ན་རྡོ་རྗེ་སེམས་དཔའ་ཆེ། །གསོལ་འདེབས༴ ཆོས་དབྱིངས་མཁའ་ལ་རིག་པ་སྐུ་རུ་ལྡིང་། །མི་སྲུན་གདུག་པ་འདུལ་མཛད་བཅོམ་ལྡན་འདས། །རབ་འཇིགས་རྡོ་རྗེ་མཆུ་ཅན་ཁྲོ་ཆེན་གཙོར། །གསོལ་འདེབས༴ རྒྱལ་བ་ཀུན་གྱི་ཐུགས་རྗེ་འཕྲིན་ལས་དཔྱིད། །གཅིག་བསྡུས་སྤྱི་དཔལ་རྡོ་རྗེ་ཁྲག་འཐུང་ཆེ། །རིག་འཛིན་ཚུལ་སྣང་པདྨ་ཐོད་ཕྲེང་ལ། །གསོལ་འདེབས༴ རྒྱལ་བ་ཀུན་གྱི་གསུང་གི་གསང་བ་གང་། །ལྷ་མོའི་གཟུགས་སུ་ཤར་བ་དབྱངས་ཅན་ནི། །བོད་ཀྱི་དཔལ་མགོན་སྣང་བསྒྱུར་མཚོ་རྒྱལ་མར། །གསོལ་འདེབས༴ སྟུག་པོ་བཀོད་པར་ངེས་ལྔ་རྒྱལ་བའི་གཙོ། །སྙིགས་དུས་འགྲོ་ལ་ཕན་མཛད་པད་འབྱུང་གི །ཕོ་ཉའི་ཚུལ་གཟུང་བདུད་འཇོམས་རྡོ་རྗེ་ལ། །གསོལ་འདེབས༴ སྐྱབས་ཀུན་ངོ་བོ་རྡོ་རྗེ་སེམས་དཔའ་གང་། །མི་ཡི་སྲིད་པར་རྡོ་རྗེ་སློབ་དཔོན་ཚུལ། །རྒྱལ་བས་བསྔགས་གྱུར་རྩ་བའི་བླ་མ་ལ། །གསོལ་འདེབས༴ རྫོགས་སངས་རྒྱས་གང་ཡེ་ཤེས་སྒྱུ་འཕྲུལ་གར། །རབ་འབྱམས་རྒྱ་མཚོ་ཡི་དམ་རྒྱུད་སྡེ་བཞིའི། །ཀུན་འདུས་ངོ་བོ་དྲག་པོ་ལྷ་གསུམ་ལ། །གསོལ་འདེབས༴ རྒྱལ་བ་རྣམས་ཀྱི་རང་གི་འཕྲིན་ལས་ཉིད། །སྐྱོང་ཕྱིར་ཡེ་ཤེས་ངང་ལས་ལས་ཀྱི་ཚུལ། །མ་མགོན་ལྕམ་དྲལ་སྤྲུལ་པའི་མཆེད་གསུམ་ལ། །གསོལ་བ་འདེབས༴ དེ་ལྟར་ལྷག་པའི་ལྷ་མཆོག་ཧེ་རུ་ཀ །རྡོ་རྗེ་པདྨ་ཁྲག་འཐུང་འཇིགས་བྱེད་གཙོ། །བདུད་སྡེའི་དཔུང་འཇོམས་གཙོ་འཁོར་བཅས་པ་ཡིས། །ལྷ་ཡི་ཚོགས་དང་བརྒྱུད་པའི་བླ་མ་ལ། །བདག་གིས་རྩེ་གཅིག་གསོལ་བ་འདེབས་པ་ཡིས། །རྒྱལ་བའི་སྨོན་ལམ་ཐུགས་རྗེ་ཤུགས་ཆེན་པོས། །མ་དོར་བརྩེ་བའི་སྤྱན་གྱིས་དུས་འདིར་གཟིགས། །བྱིན་རླབས་དངོས་གྲུབ་མཐུ་དབང་མྱུར་དུ་སྩོལ། །བདག་ནི་དུས་རྟག་ལྷ་ཁྱེད་རྗེས་སུ་ཟུངས། །ཐེག་ཆེན་སྤྱི་ལས་ཁྱད་པར་གསང་སྔགས་ཀྱི། །དོན་སྟོན་རྡོ་རྗེ་སློབ་དཔོན་ཆོས་རྗེས་བཟུང་། །དབང་བཞི་ཐོབ་ཅིང་དེ་སྲོག་དམ་ཚིག་བརྟན། །གྲོལ་བྱེད་བསྐྱེད་རིམ་ལྷ་སྐུ་འོད་ལུས་གྲོལ། །སྔགས་དབྱངས་དྷུ་ཏིར་གཞོམ་མེད་ནཱ་དར་གྱུར། །སེམས་ཉིད་འོད་གསལ་ཆོས་ཀྱི་སྐུ་རུ་གྲོལ། །ལྷ་མཆོག་ཉིད་དང་མཚུངས་པར་བྱིན་གྱིས་རློབས། །དུས་འདི་ནས་བཟུང་བྱང་ཆུབ་སྙིང་པོའི་བར། །ཡི་དམ་ཁྱེད་དང་མི་འབྲལ་རྟག་ཏུ་འགྲོགས། །བདག་ཉིད་མཐོང་ཐོས་དྲན་རེག་འགྲོ་ཀུན་ཡང་། །ལྷ་མཆོག་ཁྱེད་ཀྱི་གདུལ་བྱར་འགྱུར་བར་ཤོག །བདག་ནི་ཚེ་རབས་རྟག་ཏུ་ལྷག་པའི་ལྷ། །ཁྱེད་བསྙེན་ཁྱེད་ཀྱི་ཞལ་མཇལ་གསུང་ཐོས་ཤིང་། །བརྩེ་བས་རྗེས་བཟུང་ལས་བཞི་གྲུབ་ཆེན་བརྒྱད། །ཕྱག་རྒྱ་ཆེ་མཆོག་དངོས་གྲུབ་ཐོབ་པར་ཤོག །ནང་གི་གཟུང་འཛིན་འཁྲུལ་པའི་བཞིན་རས་མདངས། །གཉིས་སྣང་མེ་ལོང་ལ་འཕོས་མི་བསྲུན་གཟུགས། །གཟའ་ཀླུ་རྒྱལ་སོགས་དྲེགས་པའི་ཉེར་འཚེ་ཀུན། །གཉིས་མེད་འོད་གསལ་ཀློང་དུ་གྲོལ་བར་ཤོག །སྲིད་པར་འཆིང་བྱེད་བདག་འཛིན་རྟོག་པ་ཀུན། །བདག་མེད་སྟོང་པའི་དབྱིངས་སུ་དག་པ་དང་། །ཞི་བར་གནས་པ་འགོག་པའི་ཏིང་འཛིན་གང་། །སྙིང་རྗེའི་སྒྲ་དབྱངས་ཆེན་པོས་སད་པར་ཤོག །སྲིད་ཞི་ལས་གྲོལ་སངས་རྒྱས་ཀུན་ཡེ་ཤེས། །ཧེ་རུ་ཀ་དཔལ་པདྨ་ཐོད་ཕྲེང་རྩལ། །དྲག་པོ་ལྷ་གསུམ་རྣམ་པར་ཡོངས་ཤར་བའི། །གོ་འཕང་དེ་ལ་བདག་ནི་མྱུར་འཁོད་ཅིག །

དེ་ལྟར་དྲག་པོ་ལྷ་གསུམ་གྱི་གསོལ་འདེབས་བྱིན་རླབས་མྱུར་སྩོལ་འདི་ནི་གྲུབ་པའི་སློབ་དཔོན་རྩ་རི་རས། རྒྱུད་གཙང་རོང་ཆུང་དཀར་པོ་ཆོས་ལུང་དབུ་རྩེའི་བླ་མ་གསོ་རིག་པ་ཚེ་དབང་གི་དུས་རིང་བཀོན་བཏེན་ཆེན་པོས་ཡང་ཡང་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་དུས་ཀྱི་ཕོ་ཉ་ཞེས་པ་རྟ་ཡི་ལོ་སྣྲོན་ཟླ་བའི་དཀར་ཚོགས་གུ་རུའི་དུས་ཆེན་ཚེས་བཅུ་ལ་བོད་ཡུལ་དབུས་ས་ཡི་ཐིག་ལེ་ལྷ་ལྡན་གཙུག་ལག་ཁང་དང་མི་རིང་བའི་འདབས་གུང་ཐང་བླ་མ་ཞང་གི་གཟིམ་སྤྱིལ་དུ་ཐུན་གཅིག་ལ་སྨྲས་པའི་ཡི་གེ་པ་ཤེས་རབ་བསྟན་འཛིན་ནོ། །དགེའོ། །སརྦ་མངྒ་ལཾ།

སྙིང་དོན་གསུམ་གྱི་བླ་མ་བརྒྱུད་པའི་གསོལ་འདེབས།

༈ སྙིང་དོན་གསུམ་གྱི་བླ་མ་བརྒྱུད་པའི་གསོལ་འདེབས་སོ། །

ན་མོ་གུ་རུ་ཝེ། ཐུགས་རྗེས་མངའ་བདག་སྤྱན་རས་གཟིགས་དབང་པོ། །ལྷ་སྲས་བློ་གྲོས་རིན་ཆེན་སྤྲུལ་པའི་སྐུ། །སྒྲུབ་པ་མཆོག་བརྙེས་ཏེ་ལོར་གྲགས་པའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གནས་ལྔ་རིག་པའི་པཎ་ཆེན་ན་རོ་པ། །བཤེས་གཉེན་རྣལ་འབྱོར་མཚན་གསོལ་སྒྱུ་མའི་སྐུ། །བྱམས་པའི་རྣམ་སྤྲུལ་རྗེ་བཙུན་ལོ་ཙཱ་བ། །གསོལ་བ་འདེབས་སོ༴ དེ་སྲས་མཚུངས་མེད་སེམས་དཔའ་ཆེན་པོ་དང་། །ཡ་རྩེ་པར་གྲགས་རིན་ཆེན་སེངྒེའི་ཞབས། །དགྲ་བཅོམ་ཆེན་པོ་ཡོན་ཏན་བློ་གྲོས་ལ། །གསོལ་བ་འདེབས་སོ༴ ལྕང་ལུང་བ་གྲགས་མཁས་གྲུབ་གཞོན་ནུའི་མཚན། །གདམས་པའི་མཛོད་འཛིན་མཆོག་ལྡན་ལེགས་པའི་བློ། །གཞོན་ནུ་ཆོས་གྲུབ་དམན་འགྲོ་ཕ་མའི་མགོན། །གསོལ༴ འཇམ་མགོན་གྲུབ་པའི་དཔའ་བོ་ཆོས་ཀྱི་རྗེ། །ལུང་རིགས་རྒྱ་མཚོ་ཡེ་ཤེས་རོལ་བའི་མཚོ། །སྤྱོད་འཆང་དཔའ་བོ་འགྲོ་ཀུན་གྲོལ་བའི་མགོན། །གསོལ་བ༴ འཕྲིན་ལས་དབང་མོ་བདེ་ཆེན་དགའ་བཞིའི་གཏེར། །གསུང་རབ་རིན་ཆེན་རྒྱ་མཚོའི་སྐེ་རག་ཅན། །སྙིང་པོའི་དོན་སྟོན་མཐའ་ཡས་གདུལ་བྱའི་དཔལ། །གསོལ་བ༴ ཀུན་བཟང་སྙིང་རྗེའི་དབང་པོ་འཁོར་ལོའི་མགོན། །གང་གི་ཐུགས་ལས་སྐྱེས་གྱུར་ཆོས་ཀྱི་སྲས། །རིག་པ་འཛིན་པ་ཚེ་དབང་ནོར་བུའི་སྡེ། །གསོལ་བ༴ ཐུགས་རྗེའི་སྤྱན་རས་རྟག་ཏུ་རྒྱས་གྱུར་མགོན། །རྩ་བའི་བླ་མ་སྐྱབས་གནས་ཀུན་གྱི་དངོས། །གཞན་ཡང་རྩ་བརྒྱུད་བླ་མ་ཐམས་ཅད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྔོན་འགྲོའི་ཆོས་ཀྱིས་ཆོས་མིན་སྤོང་བ་དང་། །དངོས་བཞིའི་ཆོས་ཀྱིས་རང་རྒྱུད་སྨིན་པ་དང་། །བསྲེ་འཕོའི་ཆོས་ཀྱིས་གཞན་རྒྱུད་གྲོལ་བྱས་ནས། །སྤྱན་རས་གཟིགས་ཀྱི་གོ་འཕང་དེ་ཐོབ་ཤོག །

ཅེས་རྗེ་བཙུན་ཆེན་པོ་ཏཱ་ར་ན་ཐའི་གསུང་གི་འཕྲོ་ཚེ་དབང་ནོར་བུས་མཐུད་པ་དགེའོ། །མངྒ་ལཾ།

ཟབ་གསལ་རྡོ་རྗེ་རྣལ་འབྱོར་གྱི་བརྒྱུད་པའི་བླ་མར་གསོལ་བ་བཏབ་པ་ཡིད་བཞིན་དབང་གི་རྒྱལ་པོ།

༈ ཟབ་གསལ་རྡོ་རྗེ་རྣལ་འབྱོར་གྱི་བརྒྱུད་པའི་བླ་མར་གསོལ་བ་བཏབ་པ་ཡིད་བཞིན་དབང་གི་རྒྱལ་པོ་ཞེས་བྱ་བ་བཞུགས་སོ། །

ཨོཾ་ཨཱ་ཧཱུྃ་ཧོ་ཧཾ་ཀྵ། དང་པོའི་སངས་རྒྱས་རྣམ་ཀུན་མཆོག་དང་ལྡན། །འཁོར་འདས་སྒྱུ་འཕྲུལ་འཆར་དག་དུས་འཁོར་ལོ། །གསོལ་བ་འདེབས་སོ་ཟུང་འཇུག་རྡོ་རྗེ་སེམས། །བདག་གིས་དེ་རིང་ཉིད་ཐོབ་བྱིན་གྱིས་རློབས། །ལྷ་མིའི་བླ་མ་བླ་མེད་རྫོགས་སངས་རྒྱས། །སྤྲོས་བྲལ་མཁའ་ཁྱབ་ཡེ་ཤེས་ཤཱཀྱ་ཐུབ། །གསོལ་བ་འདེབས་སོ་ཟུང་འཇུག་རྡོ་རྗེ་སེམས། །བདག་གིས་དེ་རིང་ཉིད་ཐོབ་བྱིན་གྱིས་རློབས། །རྒྱལ་ཉིད་གྲུབ་ཀྱང་ཆོས་སྤྲིན་དབང་ཕྱུག་ཚུལ། །ཆོས་རྒྱལ་རིག་ལྡན་སོ་ལྔ་གདུལ་བྱའི་དཔལ། །གསོལ་བ་འདེབས་སོ་ཟུང་འཇུག་རྡོ་རྗེ་སེམས། །བདག་གི་དེ་རིང་ཉིད་ཐོབ་བྱིན་གྱིས་རློབས། །ལྷ་དང་དབྱེར་མེད་འོད་གསལ་རྡོ་རྗེའི་སྐུར། །ཡོངས་གཤེགས་དུས་ཞབས་ཆེན་པོ་འཇམ་རྡོ་རྗེ། །གསོལ་བ་འདེབས་སོ༴ བདག་གི་རིང་ཉིད༴ མཁས་ཤིང་རྫུ་འཕྲུལ་འཕྲིན་ལས་ཅི་ཡང་བསྒྱུར། །མཆོག་གཟིགས་དུས་ཞབས་ཆུང་བ་ཤྲཱི་བྷ་དྲ། །གསོལ་བ་འདེབས་སོ༴ བདག་གི་དེ་རིང་ཉིད་ཐོབ༴ རིག་གནས་ཀུན་མཁས་ལས་བཞི་རླུང་གིས་གྲུབ། །རྒྱལ་བའི་སྲས་པོ་བྷོ་དྷི་བྷ་དྲ་ལ། །གསོལ༴ བདག་གི༴ མཁས་གྱུར་མི་བརྗེད་གཟུངས་ལྡན་ལྟ་སྟངས་ཐོབ། །ཡེ་ཤེས་སྐུ་བརྙེས་པཎྜི་ཏ་ཟླ་མགོན། །གསོལ་བ་འདེབས་སོ༴ བདག་གི༴ གཉིས་སྨྲ་རྒྱུད་སྡེ་དུ་མར་ཡོངས་མཁས་ཤིང་། །དམ་པའི་ཐུགས་ཟིན་འབྲོ་སྟོན་ཤེས་རབ་གྲགས། །གསོལ༴ བདག་གི༴ སྔགས་ཤེས་བླ་མ་ཆེར་དགྱེས་ཉམས་རྟོགས་རྫོགས། །མངོན་ཤེས་ནུས་པ་དཔག་མེད་དཀོན་མཆོག་སྲུང་། །གསོལ་བ༴ བདག་གི༴ ཡི་དམ་ཞལ་གཟིགས་མཁའ་འགྲོས་ཅི་བསྒོ་ཉན། །སྒྲིབ་མེད་མཁྱེན་ལྡན་འགྲོ་དོན་རྣམས་ལ་གཟིགས། །གསོལ་བ་འདེབས་སོ༴ བདག་གི༴ སྣ་ཚོགས་ཡུལ་རྣམས་སྤྲུལ་སྒྱུར་སྐུ་ཡི་ཉུལ། །སྙིང་པོའི་དོན་གཟིགས་དད་པའི་རྒྱལ་པོ་ལ། །གསོལ་བ་འདེབས་སོ༴ བདག་གི༴ མཁྱེན་པས་མཁས་ཀུན་ཟིལ་ནན་རྟོགས་པ་ཡི། །འཇམ་དབྱངས་སྤྲུལ་པར་གྲགས་པའི་ཆོས་དབང་ཕྱུག །གསོལ་བ་འདེབས་སོ༴ བདག་གི༴ རྡོ་རྗེ་ཕག་མོ་དབྱངས་ཅན་ཞལ་གཟིགས་ཤིང་། །ལུང་རིགས་རྟོགས་པའི་མཛོད་འཛིན་ནམ་མཁའ་འོད། །གསོལ་བ༴ བདག་གི༴ བཅོམ་ལྡན་དཔལ་མོ་སྤྲུལ་པའི་སྒྱུ་འཕྲུལ་ནི། །ལྷག་མེད་འཇའ་སྐུར་གཤེགས་པའི་ཇོ་འབུམ་མ། །གསོལ་བ༴ བདག་གི༴ བཅུ་བཞི་སྐྱེ་བས་རྫོགས་སངས་རྒྱས་གྱུར་པ། །དུས་ཀུན་མཁྱེན་པ་ནམ་མཁའ་རྒྱལ་བའི་མཚན། །གསོལ་བ༴ བདག་གི༴ འཇམ་དབྱངས་ཞལ་གཟིགས་བློ་གསལ་ཁྱུ་མཆོག་ཆེ། །ཆོས་ཉིད་བདེན་མཐོང་ཤེས་རབ་འོད་ཟེར་ལ། །གསོལ་བ༴ བདག་གི༴ འོད་གསལ་འཁོར་ཡུག་སྤངས་རྟོགས་ཡོན་ཏན་རྫོགས། །སྤྲུལ་པའི་སྐུ་མཆོག་ཀུན་མཁྱེན་ཆོས་སྐུ་ལ། །གསོལ་བ་འདེབས་སོ་ཟུང་འཇུག་རྡོ་རྗེ་སེམས། །བདག་གི་དེ་རིང་ཉིད་ཐོབ་བྱིན་གྱིས་རློབས། །མཁྱེན་པའི་དཔལ་རྒྱས་ཀུན་སྤང་བརྟུལ་ཞུགས་ཀྱིས། །ངེས་གསང་རྒྱས་མཛད་ཐུགས་རྗེ་བརྩོན་འགྲུས་ལ། །གསོལ་བ༴ བདག་གི༴ འཕགས་མཆོག་དུ་མའི་ཐུགས་ཀྱི་བཅུད་སྡུད་མཛད། །བྱང་ཆུབ་སེམས་དཔའ་རྒྱལ་བ་ཡེ་ཤེས་ཞབས། །གསོལ་བ༴ བདག་གི༴ དྲི་མེད་བསླབ་པ་གསུམ་གྱི་ཡོན་ཏན་རྫོགས། །སྙིང་པོའི་དོན་སྤེལ་མཁས་བཙུན་ཡོན་ཏན་འོད། །གསོལ་བ༴ བདག་གི༴ རྒྱལ་ཀུན་འཕྲིན་ལས་གཅིག་བསྡུས་འགྲོ་འདུལ་སྐུ། །རྒྱལ་བའི་སྲས་པོ་ལག་ན་པད་དཀར་འཆང་། །གངས་རིའི་ལྗོངས་སུ་བདེ་གཤེགས་སྙིང་པོའི་ལམ། །རྡོ་རྗེ་རྣལ་འབྱོར་སྟོན་ཕྱིར་མི་ཡི་ཟོལ། །མཁས་བཙུན་བཟང་པོའི་མཐར་ཐུག་དོལ་པོ་པ། །ཀུན་མཁྱེན་སངས་རྒྱས་ཤེས་རབ་རྒྱལ་བའི་མཚན། །གསོལ་བ༴ བདག་གི༴ ཆོས་ཀྱི་སྤྱན་ལྡན་ལུང་རྟོགས་དབང་ཕྱུག་ཆེ། །རྒྱལ་བའི་རྒྱལ་ཚབ་ཕྱོགས་ལས་རྣམ་རྒྱལ་ལ། །གསོལ་བ༴ བདག་གི༴ ལོག་རྟོགས་ཀུན་འཇོམས་དབུ་མ་ཆེན་པོའི་སྲོལ། །སྤེལ་བའི་མངའ་བདག་ཉ་དབོན་ཀུན་དགའ་དཔལ། །གསོལ་བ༴ བདག་གི༴ རྒྱལ་རིགས་ཀུན་སྤངས་མཁས་ཤིང་གྲུབ་པ་ཡིས། །ཁྱུ་མཆོག་དམ་པ་ཀུན་དགའ་བློ་གྲོས་ལ། །གསོལ་བ༴ བདག་གི༴ འཇམ་དབྱངས་སྤྲུལ་པའི་སྐྱེས་བུ་སྐྱེ་བར་བརྒྱུད། །བདེན་གཉིས་མངོན་གྱུར་དཀོན་མཆོག་བཟང་པོའི་ཞབས། །གསོལ་བ༴ བདག་གི༴ བདག་གིས་བཤད་སྒྲུབ་བསྟན་པའི་ཉི་མ་འོད་པོ་ཆེ། །སྨྲ་བའི་སེངྒེ་ནམ་མཁའ་ཆོས་སྐྱོང་ལ། །གསོལ་བ༴ བདག་གི༴ དུས་ཀྱི་འཁོར་ལོའི་མན་ངག་དོན་ཀུན་གཟིགས། །ལྔ་རིག་གྲགས་ལྡན་ནམ་མཁའ་དཔལ་བཟང་པོ། །གསོལ་བ༴ བདག་གི༴ སྤྱན་རས་གཟིགས་དབང་རང་ཉིད་འཕྲིན་ལས་མཆོག །སྤྲུལ་ཕྱིར་སྤྲུལ་གར་རཏྣ་བྷ་དྲའི་ཞབས། །གསོལ་བ༴ བདག་གི༴ མཁའ་འགྲོའི་དབང་ཕྱུག་བསམ་བཞིན་སྤྲུལ་པའི་སྐུ། །གྲུབ་པའི་དཔའ་བོ་ཀུན་དགའ་གྲོལ་མཆོག་སྡེ། །གསོལ་བ༴ བདག་གི༴ སྡོམ་བརྩོན་གྲུབ་བརྙེས་ལུང་རིགས་རྒྱ་མཚོའི་དབང་། །ཆོས་སྐུ་ཇི་ལྟ་མངོན་རྟོགས་ལྷ་དབང་གྲགས། །གསོལ་བ༴ བདག་གི༴ རྒྱལ་བས་ལུང་བསྟན་བར་དོར་མངོན་སངས་རྒྱས། །བརྟུལ་ཞུགས་སྤྱོད་པའི་དབང་ཕྱུག་ཀ་ཧྣ་པ། །ཡང་སྲིད་མཁས་མཚོའི་དབུས་ན་ཡིད་བཞིན་དབང་། །སྔོན་མེད་ལེགས་བཤད་གསར་པའི་ལྔ་སྒྲ་ཅན། །འགྱུར་མེད་བདེ་བའི་སར་གཤེགས་ཧེ་རུ་ཀ །རྡོ་རྗེ་སེམས་དངོས་ཏཱ་ར་ནཱ་ཐའི་ཞབས། །གསོལ་བ༴ བདག་གི༴ རྒྱལ་སྲས་འཇམ་དབྱངས་རིན་ཆེན་རྒྱ་མཚོའི་སྡེ། །ཟབ་གསང་བསྟན་སྲོག་སྙིང་པོ་བློ་གྲོས་ཞབས། །གསོལ་བ༴ བདག་གི༴ སྒྲོལ་བའི་མགོན་པོ་རིང་ལུགས་སྙིང་མེད་པར། །ཡོངས་འཛིན་བླ་མ་ངག་དབང་འཕྲིན་ལས་དཔལ། །གསོལ་བ༴ བདག་གི༴ གྲངས་མེད་སྔོན་ནས་སྒྲིབ་རྫོགས་ཡོངས་སྤང་ཡང་། །རྒྱལ་བའི་བསྟན་ལ་རྒྱལ་སྲས་མི་ཡི་ཚུལ། །བཟུང་ནས་ཐོས་བསམ་ཡོན་ཏན་ཀུན་རྫོགས་ཤིང་། །ཉམས་རྟོགས་མཐར་ཕྱིན་ཟག་མེད་མངོན་ཤེས་ལྡན། །དཀྱིལ་འཁོར་ཡོངས་ཀྱི་གཙོ་བོ་བླ་མའི་སྐུར། །བཞེངས་གྱུར་འདྲེན་མཆོག་ཀུན་བཟང་དབང་པོའི་ཞབས། །གསོལ་བ༴ བདག་གི༴ ཡང་དག་བཅུད་འཆང་འདུལ་བྱ་སྨིན་གྲོལ་འགོད། །བཀའ་དྲིན་མཚུངས་མེད་རྩ་བའི་བླ་མ་ལ། །གསོལ་བ༴ བདག་གི༴ རྒྱལ་གསུང་ཆོས་ཀུན་སྙིང་པོ་རྣལ་འབྱོར་ཆེ། །གཉིས་མེད་དུས་ཀྱི་འཁོར་ལོ་བརྒྱུད་པ་ཡིས། །བླ་མ་ཡི་དམ་མཁའ་འགྲོ་སྲུང་མར་བཅས། །མི་ཕྱེད་རྩེ་གཅིག་གུས་པས་གསོལ་བཏབ་མཐུས། །སྐྱེ་ཀུན་ཁམས་དྲུག་རྡོ་རྗེའི་ལུས་ཐོབ་ཅིང་། །སྐྱེ་མ་ཐག་ཏུ་སྔོན་གནས་རྗེས་སུ་དྲན། །བདག་མེད་སྤྱོད་སྤོང་རྣམ་དཔྱོད་མཆོག་དང་ལྡན། །ཤེས་རབ་རྩལ་རྒྱས་དགེ་ལ་ཆོས་འདུན་ཤོག །རྒྱུད་སྡེ་ནས་བཟུང་མཚན་ལྡན་བླ་མ་དང་། །ལེགས་འཕྲད་རྗེས་བཟུང་བསླབ་གསུམ་ལམ་ལ་དཀྲི། །ཁྱད་པར་ཐེག་མཆོག་དུས་ཀྱི་འཁོར་ལོ་ཡི། །བཅུ་གསུམ་དབང་གིས་བདག་རྒྱུད་སྨིན་བྱས་ནས། །གྲོལ་ལམ་སངས་རྒྱས་ས་ལ་མངོན་སྦྱོར་བ། །ཡན་ལག་དྲུག་ལྡན་རྡོ་རྗེ་རྣལ་འབྱོར་གྱིས། །དགེ་བ་གསུམ་རྫོགས་ཟུང་འཇུག་རྡོ་རྗེ་སེམས། །ཚེ་གཅིག་ཉིད་ལ་མངོན་དུ་བྱེད་པར་ཤོག །དུས་གསུམ་སངས་རྒྱས་ཀུན་དངོས་ཐམས་ཅད་མཁྱེན། །དོལ་པོ་པ་དང་ཏཱ་ར་ནཱ་ཐ་ཡིས། །ཇི་བཞིན་གྲུབ་མཐའི་སྙིང་པོ་གང་ཡིན་པ། །བདག་གི་བློ་རུ་དྲི་མེད་ཡོངས་སུ་འཆར། །ཕྱིར་མི་ལྡོག་པ་མཐཀད། །ངེས་དོན་བསྟན་པ་ནུབ་མེད་བྱེད་པར་ཤོག །མདོར་ན་ཚེ་རབས་ཀུན་ཏུ་རྒྱུ་དང་འབྲས། །འདོར་ལེན་ལ་མཁས་དམ་ཚིག་བསྲུང་སྡོམ་བརྩོན། །བླ་མར་མོས་གུས་འགྲོ་ཕན་སྙིང་རྗེ་རྒྱས། །སྤྱོད་ཀུན་བྱང་ཆུབ་ཆེན་པོའི་རྒྱུར་གྱུར་ཞིང་། །རྒྱལ་བའི་དབང་པོ་རིག་ལྡན་ཇོ་ནང་པའི། །ཐུགས་ཀྱི་དགྱེས་དགུ་བདག་གིས་འགྲུབ་པ་དང་། །ཐུགས་ཡིད་གཉིས་མེད་དེ་རིང་ཉིད་ནས་འདྲེས། །དེ་བསྟན་བསྐལ་པ་རྒྱ་མཚོར་རྒྱས་བྱེད་ཤོག །

ཅེས་དང་པོའི་སངས་རྒྱས་དུས་ཀྱི་འཁོར་ལོའི་དབང་ཁྲིད་ལུང་གི་བརྒྱུད་པའི་བླ་མར་གསོལ་བ་བཏབ་པ་འདི་རྒྱལ་ཀུན་ཡེ་ཤེས་གཅིག་ཟླུམ་མཚུངས་མེད་བླ་མ་རྡོ་རྗེ་སེམས་དངོས་གྲུབ་པའི་དབང་ཕྱུག་ཀུན་བཟང་དབང་པོའི་རྗེས་སུ་བཟུང་ཞིང་ཐུགས་ཡིད་གཅི་གཏུ་འདྲེས་པ་ཚེ་དབང་ནོར་བུ་རྡོ་རྗེ་ཡེ་ཤེས་རྣམ་པར་རྒྱལ་བས་ཞི་བ་ས་བྱ་དབྱུ་གུ་ཟླ་བའི་ཡར་ཚེས་ལྔ་ལ་སྟོད་མངའ་རིས་གློ་དང་མོན་ཡུལ་གྱི་ཚ་རྡོ་དང་ཆུ་ལ་རང་བྱུང་གི་མེ་འབར་བ་རྒྱུད་སྡེ་ནས་བསྔགས་པའི་གནས་ཆེན་མུ་ཁུ་བི་ཥེ་ཊ་ཞེས་ཟུར་ཆག་སྐད་དུ་མུ་ཏ་ཥ་ཊ་དང་། བོད་ཀྱི་ཆུ་མིག་བརྒྱ་རྩར་སྨྲས་པའི་ཡིག་རིག་ནི་རིགས་ལུང་རྒྱུད་སྡེ་སྨྲ་བ་སྤྲུལ་སྐུ་ཨོ་རྒྱན་འཕྲིན་ལས་བསྟན་འཛིན་དཔལ་བཟང་པོས་བགྱིས་པ་དགེའོ། །

བཀའ་རྫོགས་པ་ཆེན་པོ་སངས་རྒྱས་མཉམ་སྦྱོར་གྱི་བླ་མ་བརྒྱུད་པ་རྣམས་ལ་གསོལ་བ་བཏབ་པ་གསེར་གྱི་པདྨ་རྒྱས་པའི་ཕྲེང་བ།

༈ བཀའ་རྫོགས་པ་ཆེན་པོ་སངས་རྒྱས་མཉམ་སྦྱོར་གྱི་བླ་མ་བརྒྱུད་པ་རྣམས་ལ་གསོལ་བ་བཏབ་པ་གསེར་གྱི་པདྨ་རྒྱས་པའི་ཕྲེང་བ་ཞེས་བྱ་བཞུགས་སོ། །

ཨོཾ་ཨཱ༔ ཧཱུྃ། རྒྱལ་གསུང་བརྒྱད་ཁྲི་བཞི་སྟོང་སྒོ། །ཀུན་གྱི་སྙིང་པོ་བླ་མེད་པ། །སངས་རྒྱས་ཡེ་ཤེས་དྲང་ཐད་དུ། །སྟོན་གྱུར་རྫོགས་པ་ཆེ་ལ་འདུད། །དུས་གསུམ་ཡོངས་ཀྱི་འབྱུང་གནས་ནི། །ཆོས་དབྱིངས་རྣམ་དག་གདོད་མའི་ཡེ་ཤེས་ཏེ། །དེ་ཉིད་ཞལ་ཕྱག་བྲལ་ལས་ཞལ་ཕྱག་ཚུལ། །སྟོན་པ་ཀུན་ཁྱབ་ཀུན་ཏུ་བཟང་པོར་འདུད། །ཆོས་ཉིད་ངོ་བོར་གཉིས་འཛིན་སྤྲོས་པ་བྲལ། །གཅིག་པུ་གཉིས་མིན་དཔྱད་པའི་ཡུལ་ལས་འདས། །མཐའ་བྲལ་ཡེ་ཤེས་ཀུན་བཟང་ཡབ་དང་ཡུམ། །མཉམ་སྦྱོར་རྒྱལ་བ་མཆོག་དེར་གསོལ་བ་འདེབས། །ཡེ་ཤེས་ལྡོག་ཆས་རབ་སྣང་རྒྱལ་བ་རིགས། །ཆིག་བསྡུས་ཁྱབ་བདག་དང་པོ་རྡོ་རྗེ་སེམས། །འཁོར་ལོས་བསྒྱུར་བ་དེ་ལ་གསོལ་བ་འདེབས། །ལྷ་གནས་གསུམ་དང་མི་ཡི་གདུལ་བྱའི་ངོར། །རྒྱལ་བ་འགྲོ་འདུལ་ཐབས་ལ་མཁས་པ་ཡི། །རྒྱལ་སྲས་ཚུལ་བཟུང་བྱམས་མགོན་སེམས་ལྷག་ཅན། །དགའ་རབ་རྡོ་རྗེ་འཆང་ལ་གསོལ་བ་འདེབས། །སྤྱན་རས་གཟིགས་དབང་ཐུགས་རྗེའི་འོད་ཟེར་ནི། །མ་ཧཱ་ཙི་ནའི་ཡུལ་དུ་སྐུ་འཁྲུངས་ཤིང་། །གནས་ལྔ་རིག་གཙོ་འཇའ་ལུས་རྡོ་རྗེའི་སྐུ། །ཤྲཱི་སིངྷའི་ཞབས་ལ་གསོལ་བ་འདེབས། །ཕྱོགས་དུས་རྒྱལ་བ་ཡོངས་འདུས་ངོ་བོ་ཉིད། །པདྨ་ཀ་ར་རྒྱལ་བ་འོད་དཔག་མེད། །རབ་འབྱམས་དཀྱིལ་འཁོར་གཙོ་མཆོག་ཧེ་རུ་ཀ །ཐུབ་ཆེན་སེངྒེ་དེ་ལ་གསོལ་བ་འདེབས། །འཇམ་དཔལ་དཔའ་བོ་ས་སྐྱོང་རྒྱལ་པོའི་ཚུལ། །ལྷ་ཡི་མེ་ཏོག་བོད་ཁམས་སྐྱེ་རྒུའི་མགོན། །དབྱངས་ཅན་ལྷ་མོའི་རང་བཞིན་ཀུན་ཏུ་བཟང་། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །གུ་རུ་པདྨའི་སྲས་གྱུར་ཟབ་གཏེར་བདག །ཡོངས་ཀྱི་གཙོ་གྱུར་ཆོས་ཀྱི་དབང་ཕྱུག་ཅེས། །འཇིག་རྟེན་དབང་ཕྱུག་སྤྲུལ་པ་མཆོག་གྱུར་ཅིང་། །ཐུགས་ཀྱི་གཏེར་གཅིག་བདག་པོར་གསོལ་བ་འདེབས། །དེ་ཡི་རིགས་སྲས་བཀའ་བབ་ཆོས་ཀྱི་བདག །ལང་གྲོ་ལོ་ཙཱའི་རྣམ་སྤྲུལ་པདྨ་དབང་། །རྟ་མཆོག་ཞལ་གཟིགས་མཆོག་གི་དངོས་གྲུབ་བརྙེས། །རྒྱལ་སྲས་མཆོག་གྱུར་དེ་ལ་གསོལ་བ་འདེབས། །དེ་བཞིན་དམ་པའི་གདུང་འཛིན་ཆོས་རྒྱལ་མཚན། །ཡེ་ཤེས་མཁའ་འགྲོའི་རྣམ་འཕྲུལ་ཀུན་གྲོལ་མ། །བསྐྱེད་རྫོགས་གདེང་བརྙེས་ཆོས་ཀྱི་རྡོ་རྗེ་འཛིན། །སྤྲུལ་སྐུ་ནོར་བུ་འཛིན་ལ་གསོལ་བ་འདེབས། །སྨིན་གྲོལ་མཛོད་འཛིན་དོན་ཡོད་རྒྱལ་བའི་མཚན། །སྤྲུལ་པའི་སྐུ་མཆོག་བཤེས་གཉེན་ནོར་བུའི་ཞབས། །སྔ་འགྱུར་བསྟན་པའི་སྲོག་ཤིང་ཆོས་ཀྱི་དབང་། །ཀརྨ་གུ་རུའི་ཞབས་ལ་གསོལ་བ་འདེབས། །དམ་པའི་སྲོལ་འཆང་ཀརྨ་དབང་ཕྱུག་ཆེ། །མང་ཐོས་བླ་ཆེན་བློ་མཆོག་རྡོ་རྗེ་རྩལ། །རྒྱལ་བའི་སྲས་པོ་ངག་དབང་འཇམ་དབྱངས་པ། །འཇམ་དབྱངས་ལྷུན་གྲུབ་དཔལ་ལ་གསོལ་བ་འདེབས། །ཉང་རིགས་གྲུབ་པའི་སྲས་གྱུར་རིག་པ་འཛིན། །ངེས་སངས་རྫོགས་ཆེན་རྣལ་འབྱོར་ཡོངས་ཀྱི་གཙོ། །སྦས་ཚུལ་གྲུབ་པའི་སྐྱེས་བུ་མཆོག་དམ་པ། །པདྨ་དབང་གྲགས་ཞབས་ལ་གསོལ་བ་འདེབས། །དེ་ཡི་ཆོས་ལས་སྐྱེས་གྱུར་སྲས་ཀྱི་གཙོ། །དེང་དུས་སངས་རྒྱས་མཉམ་སྦྱོར་བསྟན་འཛིན་མཆོག །མདོ་ཁམས་ཤར་འཁྲུངས་མཁས་ཤིང་ཉམས་རྟོགས་ལྡན། །ཚེ་དབང་ནོར་བུར་གྲགས་ལ་གསོལ་བ་འདེབས། །ཟབ་དགུ་དམ་ཆོས་ཡོངས་ཀྱི་སྙིང་པོ་འདི། །ཚེ་གཅིག་སངས་རྒྱས་ལམ་མཆོག་རྫོགས་པ་ཆེ། །སྨིན་གྲོལ་ཟབ་དགུའི་ཡང་སྙིང་མཉམ་སྦྱོར་གྱི། །དེ་སྟོན་རྩ་བའི་བླ་མར་གསོལ་བ་འདེབས། །ཤུ་བྷཾ།

ནེ་གུ་གསེར་ཆོས་ཀྱི་བརྒྱུད་འདེབས་རིན་ཆེན་དབང་གི་འཕྲེང་བ།

༈ ནེ་གུ་གསེར་ཆོས་ཀྱི་བརྒྱུད་འདེབས་རིན་ཆེན་དབང་གི་འཕྲེང་བ་ཞེས་བྱ་བ་བཞུགས་སོ། །

རང་བཞིན་ཡེ་གྲོལ་ཀུན་ཁྱབ་རྫོགས་སངས་རྒྱས། །ཟབ་ཞི་འོད་གསལ་ཤེས་རབ་རྒྱལ་བའི་ཡུམ། །འགྱུར་མེད་སྐུ་གསུང་ངོ་བོ་བླ་མ་ཆོག །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རིགས་དྲུག་ཁྱབ་བདག་ཆོས་སྐུ་རྡོ་རྗེ་འཆང་། །དབྱེར་མེད་འཇའ་ལུས་མཁའ་འགྲོ་ནཻ་གུ་མ། །སྤྲུལ་པའི་སྐུ་མཆོག་ཁྱུང་པོ་རྣལ་འབྱོར་ལ། །གསོལ་བ་འདེབས་སོ༴ འོད་གསལ་གཉིས་འདྲེས་རྨོག་ཅོག་རིན་བརྩོན་པ། །སྤྱན་རས་གཟིགས་དབང་སྐྱེར་སྒང་ཆོས་སེང་གེ །མཁྱེན་པའི་དབང་ཕྱུག་གཉེན་སྟོན་ཆོས་ཤེས་རབ། །གསོལ་བ་འདེབས་སོ༴ མཆོག་གྲུབ་སངས་རྒྱས་སྟོན་པ་བརྩོན་འགྲུས་སང་།།སྒྲིབ་མེད་མཁྱེན་མངའ་དག་པའི་ས་བརྙེས་པ།།ཤངས་པ་བཀའ་བརྒྱུད་རིན་ཆེན་སྣ་བདུན་ལ།།གསོལ་བ་འདེབས་སོ་༝ཚུལ་ཁྲིམས་མཐར་ཕྱིན་སྟོན་གཙང་རིན་ཆེན་འབུམ།།བླ་མའི་ཐུགས་སྲས་མཁས་གྲུབ་རྒྱལ་མཚན་འབུམ།།ཆོས་ཀུན་མངོན་གཟིགས་འཇག་ཆེན་བྱམས་པ་དཔལ།།གསོལ་བ་འདེབས་སོ་༝གྲུབ་པའི་མངའ་བདག་ཆོས་འབྱུང་རིན་པོ་ཆེ།།སྐྱེས་མཆོག་དམ་པ་ཀུན་ནས་དགའ་བའི་མཚན། །ལུང་རྟོགས་དབང་འབྱོར་ཤེས་རབ་བཟང་པོ་ལ། །གསོལ་བ་འདེབས་སོ༴ འབྲེལ་ཚད་དོན་ཡོད་སྙིང་པོའི་རྒྱལ་མཚན་འཛིན། །མཁྱེན་རབ་ཡོན་ཏན་དཔལ་ཀུན་འབྱུང་བའི་གནས། །དོན་གཉིས་ལྷུན་གྲུབ་བསོད་ནམས་ཤེས་རབ་ཅན། །གསོལ་བ་འདེབས་སོ༴ བྱ་བ་ཀུན་བཏང་ཀུན་དགའ་རྒྱལ་མཚན་ཆེ། །འཇམ་པའི་དབྱངས་དངོས་ཨ་ནནྟ་བྷ་དྲ། །འགྲོ་བའི་མགོན་པོ་ཀརྨ་བསྟན་འཕེལ་སྡེ། །གསོལ་བ་འདེབས་སོ༴ གྲུབ་པའི་དབང་ཕྱུག་ཀུན་དགའ་ཆོས་ལྷུན་མཚན། །རྣལ་འབྱོར་རྒྱལ་པོ་ཀུན་མཁྱེན་ཆོས་འཕེལ་ཞབས། །མཁས་བཙུན་གྲུབ་གྱུར་བསོད་ནམས་རྒྱལ་བའི་མཚན། །༝ དམ་པའི་རིགས་ལ་སྤྲུལ་པའི་སྐུ་རུ་འཁྲུངས། །སྦས་པའི་ཚུལ་ལ་མཆོག་གི་གྲུབ་པ་བརྙེས། །ཡོངས་འཛིན་འདྲེན་མཆོག་ཆོས་དབང་རྡོ་རྗེ་ལ། །གསོལ་བ༴ རྒྱལ་ཀུན་ཡེ་ཤེས་ངོ་བོ་འདུས་པའི་གར། །འོད་གསལ་སྒྱུ་མའི་གཟུགས་སྐུ་ཡོངས་ཤར་ནས། །ཚེ་གཅིག་སངས་རྒྱས་སྙན་བརྒྱུད་འགྲོར་སྟོན་མཛད། །རྩ་བརྒྱུད་བླ་མ་རྣམས་ལ་གསོལ་བ་འདེབས། །དག་པ་སྒྱུ་འཕྲལ་དྲ་བ་འཁོར་ལོས་བསྒྱུར། །རྒྱུད་སྡེའི་སྙིང་པོ་ལྔ་ལྡན་ཡེ་ཤེས་ལྷ། །རིག་རྩལ་ཐོགས་མེད་དཔའ་བོ་མཁའ་འགྲོ་མ། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། །རྒྱལ་བའི་བསྟན་སྲུང་རྨད་བྱུང་ཐུགས་རྗེ་ཆེ། །མྱུར་མཛད་མགོན་པོ་ལྕམ་དྲལ་འཁོར་དང་བཅས། །གསོལ་བ་འདེབས་སོ་འཕྲིན་ལས་རྣམ་བཞི་བསྒྲུབ། །ཆོས་མིན་རང་སར་གྲོལ་བར་བྱིན་གྱིས་རློབས། །དེང་ནས་བདག་གི་སྐྱེ་བ་ཐམས་ཅད་དུ། །མཐོ་རིས་ཡོན་ཏན་འཕགས་ནོར་བདུན་ལྡན་ཞིང་། །དམ་པས་རྗེས་བཟུང་འཁོར་བར་ཞེན་ལོག་སྟེ། །ཐར་པའི་གྲོང་ལ་རབ་ཏུ་འཇུག་པར་ཤོག །ཆོས་མིན་མི་སྤྱོད་ཆོས་ནས་ཆོས་བཞིན་དུ། །ལེ་ལོ་མེད་པར་བརྩོན་པས་རྒྱུད་བསྐུལ་ནས། །ཡང་དག་བླ་ན་མེད་པ་སྙིང་པོའི་དོན། །ཕྱིར་མི་ལྡོག་ལ་མྱུར་དུ་འཁོད་པར་ཤོག །དམིགས་མེད་སྤྲོས་བྲལ་འོད་གསལ་འདུས་མ་བྱས། །ཕྲ་ཟབ་ཡངས་པ་ཆེན་པོ་གཉུག་མའི་དོན། །བརྗོད་བྲལ་ལྷན་སྐྱེས་ཡེ་ཤེས་ངོ་བོ་སྟེ། །ཕྱི་མའི་དུས་མིན་དེ་རིང་ཉིད་རྟོགས་ཤོག །ཕ་མའི་རང་བཞིན་མཁའ་ཁྱབ་སེམས་ཅན་ལ། །རང་ཤུགས་སྙིང་རྗེ་བཟོད་མེད་ཉིད་འཁྲུངས་ཏེ། །ཐབས་མཁས་ཕྲིན་ལས་དཔག་ཏུ་མེད་པ་ཡི། །འགྲོ་ལ་ཕན་བདེ་རྒྱུན་མི་ཆད་སྟོན་ཤོག །བྱིན་རླབས་རྩ་བ་ཟབ་མོའི་དོན་སྟོན་པའི། །བླ་མ་མཆོད་དང་ཐུགས་ཡིད་གཅིག་ཏུ་འདྲེས། །དམ་ཚིག་སེལ་མེད་དགོངས་པ་དགྱེས་དགུ་འགྲུབ། །འཕྲིན་ལས་མཐའ་དག་བདག་གིས་སྐྱོང་པར་ཤོག །ཆོས་ཀུན་ཡང་ཞུན་ནཻ་གུའི་ཐུགས་ཀྱི་བཅུད། །ཐབས་ལམ་གཏུམ་མོའི་བདེ་དྲོད་རབ་འབར་ཏེ། །བདེ་ཆེན་མི་ཤིགས་དྭངས་མར་རབ་ཏུ་སྨིན། །ཆོས་ཀུན་སྒྱུ་མར་རྟོགས་ཤིང་མངའ་བརྙེས་ཤོག །འཁྲུལ་པའི་རྨི་ལམ་རྨི་ལམ་ཆེན་པོ་ཀུན། །བདེན་མེད་ངོ་ཤེས་ཆོས་ཉིད་དབྱིངས་སུ་གྲོལ། །བྱར་མེད་གཏིང་གསལ་དཔག་དཀའ་རང་བཞིན་གྱིས། །འོད་གསལ་འཛིན་མེད་མ་བུ་འདྲེས་པར་ཤོག །བདེ་ཆེན་དབུ་མའི་ལམ་ནས་རང་རིག་མདའ། །ལྷག་མེད་སྐུ་གསུམ་དབྱིངས་སུ་མངོན་གྱུར་ཅིང་། །བར་དོར་སྒྲིབ་པའི་ཚོགས་ཀུན་གཏན་སྤངས་ནས། །སྐུ་གཉིས་འབྲས་བུ་མངོན་དུ་འགྱུར་བར་ཤོག །སེམས་ཉིད་ཡིད་བཞིན་ནོར་བུ་ཕྱག་ཆེན་རྟོགས། །བདེ་ཆེན་འདུ་འབྲལ་མེད་པའི་མཁའ་ལ་སྤྱོད། །རང་བཞིན་འཆི་མེད་འོད་གསལ་བཙན་ས་ཟིན། །ལམ་འཁྱེར་རྒྱན་རྫོགས་ཚེ་གཅིག་སངས་རྒྱས་ཤོག །མདོར་ན་བདག་གི་སྒོ་གསུམ་བྱ་སྤྱོད་ཀུན། །ལོག་པའི་ལས་དང་བཏང་སྙོམས་མི་འགྱུར་བར། །རྣམ་དཀར་ལས་དང་རྒྱལ་བའི་བསྟན་ཕན་ཞིང་། །འགྲོ་ཀུན་བྱང་ཆུབ་མཆོག་སྦྱོར་རྒྱུར་གྱུར་ཅིག །

ཅེས་རྒྱང་སྟོན་རྗེ་བཙུན་ངག་དབང་རྡོ་རྗེ་མཆོག་གི་དྲུང་དུ་ནཻ་གུ་གསེར་ཆོས་རྩ་བ་ཆོས་དྲུག་སྔོན་འགྲོ་ཞེས་དེ་ཉམས་སུ་ལེན་སྐབས་རྨི་ལམ་ཕལ་ཆེར་རང་ངོ་ཟིན་ཞིང་ཡ་མཚན་ལྟས་མང་ཤར་ཞིང་མི་ཕྱེད་པ་སྙིང་ལ་ཐིམ་མཐུས་བསྟན་པ་ལུགས་ཆོས་དབྱར་མོ་བསིལ་གྱི་ཕོ་བྲང་གཙང་ཇོ་མོ་ནགས་རྒྱལ་མདུན་ངོས་ཚེ་མདོ་གཙང་ཆབ་ངོགས་སུ་རང་ཤོང་རས་གུར་གྲུ་བཞིའི་ནང་ནས་རྣལ་འབྱོར་པ་ཚེ་དབང་ནོར་བུས་མེ་རྟ་ཧོར་ཟླ་བཅུ་གཉིས་པའི་ཚེས་མངའ་གསོལ་བ་རྩེ་གཅིག་ཏུ་བཏབ་པ་དགེའོ། །

ཚམ་པ་ནས་བརྒྱུད་པའི་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཁྲིད་ཀྱི་བརྒྱུད་འདེབས་ནོར་བུའི་ཕྲེང་བ།

༈ ཚམ་པ་ནས་བརྒྱུད་པའི་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཁྲིད་ཀྱི་བརྒྱུད་འདེབས་ནོར་བུའི་ཕྲེང་བ་བཞུགས་སོ། །

ན་མོ་མ་ཧཱ་མུ་དྲ་ཡེ། ཁ་སྦྱོར་ཡན་ལག་བདུན་ལྡན་རྒྱལ་ཀུན་གཙོ། །རིགས་དྲུག་ཁྱབ་བདག་སངས་རྒྱས་རྡོ་རྗེ་འཆང་། །གསོལ་བ་འདེབས་སོ་བདག་ལ་ཐུགས་རྗེས་གཟིགས། །རྒྱལ་ཀུན་ཡེ་ཤེས་མྱུར་རྟོགས་བྱིན་གྱིས་རློབས། །སྙིང་ཉིད་རྡོ་རྗེ་བཙུན་མོ་འོད་གསལ་བ། །ཤེས་རབ་ཕར་ཕྱིན་བཅོམ་ལྡན་ལྷན་སྐྱེས་མ། །གསོལ་བ་འདེབས་སོ༴ རྒྱལ་ཀུན༴ མཁའ་ཁྱབ་བདག་པོའི་སྒྱུ་འཕྲུལ་སྟོན་པའི་སྐུ། །འགྲོ་འདུལ་ཡེ་ཤེས་མར་འབྱིན་ཏེ་ལོ་པ། །གསོལ་བ༴ རྒྱན་ཀུན༴ དཀའ་སྤྱད་ལམ་སྦྱངས་ཡེ་ཤེས་ཆེན་པོ་རྟོགས། །བྱིན་རླབས་མངའ་བ་རྩ་ནས་ན་རོ་པ། །གསོལ་བ༴ རྒྱན་ཀུན༴ འཕགས་པའི་ཡུལ་བགྲོད་རྒྱུད་སྡེ་བཞི་མངའ་བརྙེས། །རྟོགས་པའི་གར་མཁན་མར་སྟོན་ཆོས་བློ་གྲོས། །གསོལ་བ༴ རྒྱན་ཀུན༴ སྙིང་རུས་ཕུལ་བྱུང་བསྒྲུབ་པའི་རྒྱལ་མཚན་འཛིན། །རླུང་སེམས་མངའ་བརྙེས་མི་ལ་བཞད་རྡོར་ལ། །གསོལ་བ༴ རྒྱན་ཀུན༴ རྒྱལ་བས་ལུང་བསྟན་ངེས་དོན་སྟོན་པ་ཆེ། །སྤྲུལ་པའི་སྐུ་མཆོག་དྭགས་སྒོམ་ལྷ་རྗེ་ལ། །གསོལ་བ༴ རྒྱན་ཀུན༴ རྒྱལ་བའི་ཞིང་རྣམས་སྐད་ཅིག་སྤྲུལ་པས་ཉུལ། །འོད་གསལ་རྒྱུན་མཐར་དྭགས་པོ་བསྒོམ་ཚུལ་ལ། །གསོལ་བ༴ རྒྱན་ཀུན༴ གུ་རུའི་ཐུགས་སྤྲུལ་གསང་བའི་མཚན་བརྒྱད་ལྡན། །སྐྱེ་མེད་སྙིང་རྗེའི་གར་བསྒྱུར་རྒྱལ་དབང་ཞང་། །གསོལ་བ༴ རྒྱན་ཀུན༴ མཁའ་ལ་ལྡིང་ཞིང་རི་རབ་ཞབས་ཀྱིས་བརྙིལ། །སྦྱོར་སྒྲོལ་མཐར་ཕྱིན་མན་ལུང་བྱང་ཆུབ་སེམས། །གསོལ་བ༴ རྒྱན་ཀུན༴ ས་སྐྱོང་གཙུག་རྒྱན་བདུད་འཇོམས་སྐྱེ་བ་བརྒྱད། །པདྨས་བྱིན་རླབས་སྤྲུལ་སྐུ་སྟོན་པ་ལ། །གསོལ་བ༴ རྒྱན་ཀུན༴ བཅོ་ལྔར་རྒོལ་ངན་ཚར་བཅད་རྗེས་བཟུང་ནས། །མཁྱེན་རབ་ཆོས་རྒྱལ་འཇམ་དབྱངས་གྲགས་པ་ལ། །གསོལ་བ༴ རྒྱན་ཀུན༴ རྡོ་ལ་མེ་འབར་གྲུབ་རྟགས་སྣ་ཚོགས་བསྟན། །སྔགས་ཀྱི་རིག་འཛིན་དཔལ་ལྡན་གཞོན་ནུའི་སྡེ། །གསོལ་བ༴ རྒྱན་ཀུན༴ ནམ་མཁའ་མཛོད་བརྙེས་རྨད་བྱུང་ཆོ་འཕྲུལ་ལ། །དབང་བསྒྱུར་གྲུབ་མཆོག་འཇམ་དབྱངས་བསོད་ནམས་ཞབས། །གསོལ་བ༴ རྒྱན་ཀུན༴ འདས་ཚེ་སྒྲ་འོད་རིང་བསྲེལ་ངོ་མཚར་བྱོན། །རྟོགས་པ་མངོན་གྱུར་ཡེ་ཤེས་དཔལ་ལྡན་ལ། །གསོལ་བ༴ རྒྱན་ཀུན༴ མི་མིན་དྲེགས་པ་ཟིན་གནོན་བྲན་དུ་བཀོལ། །རིམ་གཉིས་མངོན་གྱུར་ཆོས་སྐྱོང་འཕགས་པ་ལ། །གསོལ་བ༴ རྒྱན་ཀུན༴ ཕྱག་རྒྱ་མཆོག་བརྙེས་མགོན་པོའི་ལུང་བསྟན་ཐོབ། །ནམ་མཁའི་རྣལ་འབྱོར་དཀོན་མཆོག་མཆོག་ལྡན་ལ། །གསོལ་བ༴ རྒྱན་ཀུན༴ ཡི་དམ་ཞལ་གཟིགས་མཆོག་ཐུན་དངོས་གྲུབ་བརྙེས། །སྣང་བ་དབང་བསྒྱུར་ཆོས་སྐྱོང་དཔལ་ལྡན་ལ། །གསོལ་བ༴ རྒྱན་ཀུན༴ བྱང་ཆུབ་སེམས་འབྱོངས་གང་ཤར་གདོང་འདེད་སྤྱོད། །རྣལ་འབྱོར་དབང་ཕྱུག་སེམས་དཔའ་ཆོས་རྗེ་ལ། །གསོལ་བ༴ རྒྱན་ཀུན༴ ཡང་དག་དོན་རྟོགས་བརྟུལ་ཞུགས་ནུས་པའི་བདག །སྤྲུལ་པའི་སྐྱེས་བུ་སྔགས་འཆང་མེ་འབར་ལ། །གསོལ་བ༴ རྒྱན་ཀུན༴ རིག་གནས་ཀུན་མཁྱེན་འཇམ་དབྱངས་སྤྲུལ་པར་གྲགས། །ངག་གི་དབང་ཕྱུག་ཉི་ཟླ་འོད་དཀར་ལ། །གསོལ་བ༴ རྒྱན་ཀུན༴ ཚུལ་ཁྲིམས་རྣམ་དག་སྒྲུབ་བརྒྱུད་རྒྱལ་མཚན་འཛིན། །རྡོ་རྗེ་འཛིན་པ་ཆོས་སྐྱོང་སེང་གེ་ལ། །གསོལ་བ༴ རྒྱན་ཀུན༴ རྟ་མགྲིན་ཞལ་ཁུམ་ཕྱག་རྒྱའི་རིག་འཛིན་བརྙེས། །གྲུབ་པའི་རྒྱལ་པོ་བསྟན་པ་རྒྱལ་མཚན་ལ། །གསོལ་བ༴ རྒྱན་ཀུན༴ དཔལ་ཆེན་དངོས་མཇལ་གཟའ་རྒོད་བྲན་དུ་འཁོལ། །ལྟ་བའི་གདེངས་ལྡན་བསྟན་པའི་ཉི་མ་ལ། །གསོལ་བ༴ རྒྱན་ཀུན༴ ལྷ་སྲས་རྣམ་སྤྲུལ་སྦས་ཚུལ་གྲུབ་པའི་དབང་། །རྣལ་འབྱོར་དམ་པ་བསྟན་འཛིན་སེང་གེ་ལ། །གསོལ་བ༴ རྒྱན་ཀུན༴ སྣང་སེམས་འདྲེས་པས་རྡོ་ལ་ཕྱག་རྗེས་བཞག །གནས་ལུགས་མངོན་གྱུར་ནམ་མཁའ་ཚེ་བརྟན་ལ། །གསོལ་བ༴ རྒྱན་ཀུན༴ མཉམ་བཞག་བརྟེན་ཐོབ་ཆོས་ཀུན་སྒྱུ་མར་གཟིགས། །འཁྲུལ་ཞིག་ནམ་མཁའ་ཆོས་ཀྱི་ཉི་མ་ལ། །གསོལ་བ༴ རྒྱན་ཀུན༴ རྒྱལ་བའི་གདུང་འཚོབ་བྱིན་རླབས་ཆུ་བོ་བརྙེས། །འདྲེན་མཆོག་མགོན་པོ་རྩ་བའི་བླ་མ་ལ། །གསོལ་བ༴ རྒྱན་ཀུན༴ ཁྱབ་བརྡལ་དབྱིངས་ནས་སྒྱུ་འཕྲུལ་དྲ་བའི་གར། །ཆེ་མཆོག་བདེ་བའི་འཁོར་ལོ་ཡབ་ཡུམ་ལ། །གསོལ་བ༴ རྒྱན་ཀུན་ཡེ་ཤེས༴ ཤེས་རབ་ཕར་ཕྱིན་གཏེར་མཛད་དགའ་ཆེན་ཡུམ། །བཅོམ་ལྡན་འདས་མ་བཛྲ་ཝཱ་ར་ཧི། །གསོལ་བ༴ རྒྱན་ཀུན༴ སྙིང་རྗེས་ཆེར་ཁྲོས་བདུད་དང་མུ་སྟེགས་བཅོམ། །བསྟན་སྲུང་སྐུར་སྟོན་བྱ་རོག་མཚན་ཐན་ལ། །གསོལ་བ༴ རྒྱན་ཀུན༴ བླ་མ་དཀྱིལ་འཁོར་ལྟ་སྤྱོད་གཅིག་གིས་བསྡུས། །དམ་ཚིག་སྲོག་འབྲེལ་རྡོ་རྗེ་མཆེད་ལྕམ་ལ། །གསོལ་བ་འདེབས་སོ་བདག་ལ་ཐུགས་རྗེས་གཟིགས། །རྒྱལ་ཀུན་ཡེ་ཤེས་མྱུར་རྟོགས་བྱིན་གྱིས་རློབས། །དེ་ལྟར་དོན་དམ་ལྷན་ཅིག་སྐྱེས་སྦྱོར་གྱིས། །བརྒྱུད་པའི་བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་རྡོ་རྗེ་མཆེད་རྣམས་ལ། །རྩེ་གཅིག་གུས་པ་དྲག་པོས་གསོལ་འདེབས་ན། །ཁྱེད་ཀྱི་མཁྱེན་བརྩེ་བྱིན་རླབས་ནུས་པ་ཡིས། །བདག་བློ་འཁོར་བའི་ཆོས་ལ་ཞེན་ལོག་ཅིང་། །ངེས་འབྱུང་བྱང་ཆུབ་ལམ་ལ་མི་ཕྱེད་པའི།།རྩེ་གཅིག་དབེན་པའི་གནས་སུ་ཆོས་སྤྱོད་ཤོག །སྐྱབས་སེམས་སྐྱེས་བུ་གསུམ་གྱི་ཡོན་ཏན་རྫོགས། །གཞན་ཕན་སྙིང་རྗེའི་བརྩེ་དང་འབྲལ་མེད་པར། །བྱ་བ་ཐམས་ཅད་བཏང་སྙོམས་མ་ལུས་ཤིང་། །འགྲོ་བའི་སྡུག་བསྔལ་སེལ་བའི་སྨན་པར་ཤོག །རང་གཞན་སྒྲིབ་སྦྱངས་ཚོགས་བསགས་ལ་མཁས་ཤིང་། །རྟེན་འབྲེལ་རབ་འབྱམས་ཀུན་རྟོགས་བྱང་ཆུབ་དེ། །རིང་པོར་མི་ཐོགས་བྱང་ཆུབ་ཆེན་པོའི་ཁབ། །དེ་རུ་རྒྱལ་བའི་མཛད་པ་བསྟན་པར་ཤོག །བླ་མ་བསྟན་མཁས་མོས་གུས་རྩེ་མོར་བྱིན། །སྐྱོན་བྲལ་ཡོན་ཏན་རྫོགས་པའི་དག་སྣང་འབྱོངས། །ཅི་མཛད་ལེགས་མཐོང་ཅི་གསུང་ཚད་མར་འཛིན། །དམ་ཚིག་སེལ་མེད་ཐུགས་ཡིད་གཅིག་འདྲེས་ཤོག །སྒྲུབ་དང་ཤེས་རབ་རྣམ་པར་དག་པ་ཡི། །ཉིན་མཚན་དུས་འདའ་བླ་མའི་བཞེད་དགུ་སྒྲུབ། །སུན་ངལ་རང་འདོད་མེད་པར་འགྲོ་བའི་དོན། །ལྷུར་ལེན་ངེས་དོན་བསྟན་པ་རྒྱས་བྱེད་ཤོག །སེམས་ཀྱི་མེ་ལོང་ཀུན་རྟོགས་གཟུགས་བརྙན་གཤིས། །སྒྱུ་འཕྲུལ་ལྷ་ཡི་འཁོར་ལོར་ཡོངས་བརྟས་ཏེ། །བདེན་གཉིས་འགྱུར་མེད་ཐིག་ལེར་ཡིད་འཇུག་པས། །གཡོ་མེད་བདེ་གསལ་མི་རྟོགས་བརྟན་པར་ཤོག །མ་བཅོས་དུས་གསུམ་གཟུང་འཛིན་བྲལ་བའི་སེམས། །རང་བབ་ཡེངས་མེད་གནད་དུ་བསྣུན་བྱས་ཏེ། །ཡུལ་སྣང་འཁྲུལ་རྒྱུན་ཆད་ནས་རང་ངོ་ལ། །ལྷོད་ཆགས་རྩེ་གཅིག་གནས་པ་བརྟན་པར་ཤོག །འགྱུར་མེད་སྐྱེ་འགག་གནས་བྲལ་རྟོགས་པའི་གདེངས་། །སྤྲོས་བྲལ་སྟོང་ཉིད་མཉམ་བཞག་རྟེན་ཐོབ་ཅིང་། །ཟུང་འཇུག་ཡེ་ཤེས་སྣང་བ་མངོན་མཐོང་ནས། །ཤེས་རབ་འོད་གསལ་རྒྱུན་མི་ཆད་པར་ཤོག །ཟབ་ཞི་སྤྲོས་བྲལ་འོད་གསལ་འདུས་མ་བྱས། །དྲི་བྲལ་ལྷུན་གྲུབ་བདེ་གཤེགས་སྙིང་པོའི་དངོས། །སྒྲིབ་མེད་དངོས་སུ་མཐོང་ནས་ཡེ་ཤེས་སྐུ། །ཡང་དག་ཚེ་འདི་ཉིད་ནས་ཐོབ་པར་ཤོག །ལྟ་བ་ཕྱག་ཆེན་བསྒོམ་པ་རྣལ་འབྱོར་བཞི། །གཟེར་ལྔས་གེགས་སེལ་བྱང་ཆུབ་སེམས་མཆོག་སྤྱོད། །བྱེད་ཅིང་གཏུམ་མོས་དྷི་ཏའི་རྩ་མདུད་བཀྲོལ། །ཡན་ལག་དྲུག་གི་འབྲས་བུ་བརྙེས་པར་ཤོག །ས་དང་ལམ་གྱི་ཡོན་ཏན་རྩལ་ཀུན་རྫོགས། །རང་གཞན་དོན་གཉིས་འབྲས་བུ་ཡོངས་སུ་སྨིན། །རྫོགས་པའི་སངས་རྒྱས་འོད་དཔག་མེད་ཅི་འདྲ། །དེ་འདྲ་བདག་ཀྱང་མྱུར་བ་ཉིད་ཐོབ་ཤོག །

དེ་ལྟར་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཉམས་ཁྲིད་སྐྱེ་མེད་ཞང་ཚལ་པ་ནས་བརྒྱུད་པའི་གསོལ་འདེབས་མ་ཎི་ཀའི་ཕྲེང་བ་ཞེས་སྨོན་ལམ་དང་བཅས་པ་འདི་ཉིད་མདོ་ཁམས་ཀཿཐོག་ལྷོར་ལྷ་རིག་རྔུ་ཡི་བཙུན་པ་ཚལ་པའི་སྒོམ་ཆུང་ཚེ་དབང་ནོར་བུ་འཇམ་དཔལ་རྒྱ་མཚོའམ་འཇམ་དབྱངས་སེང་གེ་ཡིས་སྙིང་ནས་མོས་གུས་དྲག་པོས་ས་བྱ་དབོ་ཟླའི་ཚེས་བཟང་ཉེར་ལྔའི་སྐབས་སུ་གང་ཤར་རང་བབ་ལྷུག་པར་གཙང་ལ་སྟོད་བྱང་། གྲུབ་པའི་དབང་ཕྱུག་ཐང་སྟོང་རྒྱལ་པོའི་བསྟི་གནས་ཡོངས་གྲུབ་ལྕགས་ཁ་ལོ་ཧི་ཏའི་ཀླུང་གནམ་སྔོན་ཞུ་བ་ལྟ་བུའི་འགྲམ་དུ་སྦྱར་གྲུབ་པ་བྱས་ཏེ།

འདིར་སྨྲས་པ། ངེས་སྟོན་བསྟན་པའི་ཤིང་རྟ་དྭགས་རྒྱུད་ཀྱི། །གྲུབ་མཐའ་འཆང་ནས་འཛིན་མའི་ཁུར་ལྕི་ཡང་། །ཚལ་བརྒྱུད་སྙིང་པོའི་ཆོས་ནི་ཆེས་ཕྲ་བར། །གྱུར་ཀྱང་ལེགས་པར་རྙེད་འདི་བདག་སྐལ་བཟང་། ། ༡ ཐབས་བཀྲོལ་ཟུང་རེས་ཆོག་མི་ཤེས་མིན་ཡང་། །ཕྱོགས་རེས་མ་ཡིན་བླ་མེད་རྒྱུད་བཞིའི་སྙིང་། །རེ་རེས་གང་ཟག་ཚེགས་མེད་གྲོལ་བའི་ལམ། །སྐྱེ་མེད་ཞང་གི་བཞད་པ་རྨད་དུ་བྱུང་། ། ༢ ཡིན་ངེས་བཞི་དང་གཉིས་བསྣན་རྣམ་པ་དྲུག །ཀུན་གྱི་ཐུགས་བཅུད་འདུས་པའི་བྱིན་རླབས་གཏེར། །མ་ཚང་མེད་པའི་ཡིད་བཞིན་དབང་གི་རྒྱལ། །ཚལ་པ་ལས་རྒྱུད་ཕྱག་ཆེན་དོན་གྱི་ཁྲིད། ། ༣ ངེས་པར་ཐོས་སོ་ཤར་ཕྱོགས་བདེ་ཆེན་ནས། །འོང་མི་ལྷ་རིགས་གཞོན་ནུ་རྣལ་འབྱོར་རོ། །དེ་ནི་མངའ་རིས་གུང་ཐང་ནུབ་རིས་སུ། །འཐོན་རིགས་འཁྲུལ་ཞིག་སྦས་པའི་སངས་རྒྱས་ནི། ། ༤ ནམ་མཁའ་བསྟན་འཛིན་ཆོས་ཀྱི་ཉི་མ་ཞེས། །རྗེ་བཙུན་དེ་ཡི་བཀའ་དྲིན་མཆོག་ལས་སོ། །ནམ་ཡང་བསྐྱུད་པ་མེད་དོ་འཐོན་བརྩོན་ཞབས། །བཀའ་དྲིན་སྙི་ནས་དྲན་ནོ་མན་ལུང་པ། །བདག་རྒྱུད་སྨིན་གྲོལ་མཛོད་ཅིག་ཚལ་ཆེན་རྗེ། །བྱིན་རླབས་ཉམས་ལེན་སྩོལ་ཅིག་ཆོས་གཉིས་མ། །བདག་ནི་སྐྱེ་ཀུན་གུ་རུ་ཞང་སྟོན་གྱིས། །བསྟན་པའི་སྲོག་ཤིང་འཆང་སྤེལ་བྱེད་པོར་ཤོག ། ༥

ཅེས་པའང་ལྷ་རིགས་གཞོན་ནུ་ཚེ་དབང་ནོར་བུས་སྨྲས་སོ། །སརྦ་མངྒ་ལཾ།

༈ གྲུབ་པའི་དབང་ཕྱུག་དབུས་སྨྱོན་ཧེ་རུ་ཀ་དཔལ་ཀུན་དགའ་བཟང་པོ་ནས་བརྒྱུད་པའི་ཕྱག་རྒྱ་ཆེན་པོའི་བླ་རབས་གསོལ་འདེབས།

ཨོཾ་ཨཱ༔ཧཱུཾ། མ་ཧཱ་མུ་ཏྲ་སིདྡྷི་ཕ་ལ་ཧཱུཾ། ཨཱ། རྒྱལ་བ་ཡོངས་ཀྱི་ཡེ་ཤེས་ཆིག་མཉམ་ཆོས་སྐུ་རྡོ་རྗེ་འཆང་། །འོད་གསལ་རང་བཞིན་ཤེས་རབ་ཕ་རོལ་ཕྱིན་སྐུ་རྣལ་འབྱོར་མ། །གསོལ་བ་འདེབས་སོ་གཉུག་མའི་ཡེ་ཤེས་ཕྱག་རྒྱ་ཆེན་པོ་གང་། །བླ་མའི་མཐུ་ཡིས་དེ་རིང་མངོན་རྟོགས་འབྲས་བུ་བརྙེས་བྱིན་རློབས། །ཛ་གོར་ཡུལ་ནས་བྲམ་ཟེའི་རིགས་ལ་སྤྲུལ་སྐུ་ཏེ་ལོ་པ། །དཔེ་མེད་གྲོང་འཁྲུངས་ནཱ་རོ་ཏ་པ་མཁས་གྲུབ་སྙན་གྲགས་བཟང་། །གསོལ་བ་འདེབས་སོ༴ བླ་མའི་མཐུ་ཡིས༴ མར་སྟོན་གཉིས་སྨྲ་རྒྱུད་སྡེ་བཞི་བརྙེས་དཔལ་ལྡན་ཆོས་བློ་གྲོས། །བླ་མའི་ཐུགས་ཟིན་དཀའ་སྤྱད་མཐར་ཕྱིན་མི་ལ་རས་ཆེན་ཞབས། །གསོལ་བ་འདེབས་སོ༴ བླ་མའི༴ ཟབ་གསལ་རྡོ་རྗེའི་ཐུགས་བརྙེས་དྭགས་པོ་ལྷ་རྗེ་ཟླ་འོད་པ། །སྨན་པའི་རྒྱལ་པོ་ཞིང་འདིར་སྤྲུལ་བསྒྱུར་དཔལ་ལྡན་ཕག་མོ་གྲུ། །གསོལ་བ༴ བླ་མའི༴ འདའ་བསྣུན་རྟོགས་པར་ཅོ་འདྲིའི་མཁའ་འགྲོའི་དབང་ཕྱུག་གླིང་རིས་པ། །ལག་ན་པདྨ་རས་གོས་ཀྱིས་དབྱིབས་འགྲོ་མགོན་རྒྱ་རས་ཞབས། །གསོལ་བ༴ བླ་མའི༴ ཁ་བ་ཅན་གྱི་དཔལ་རིར་ཡེ་ཤེས་གར་མཁན་རྒོད་ཚང་པ། །ཕྱི་ནང་གཞན་གསུམ་སྒྲིབ་མེད་སྤྱན་ལྡན་ཆོས་རྗེ་ལྷ་སྡོང་ཞབས། །གསོལ་བ༴ བླ་མའི༴ སྦས་ཚུལ་སྒྲུབ་པའི་སེངྒ་ཚེ་ལ་མངའ་བརྙེས་རྒྱལ་མཚན་འབུམ། །འོད་གསལ་གནས་ལུགས་ལེགས་གཟིགས་རྣལ་འབྱོར་དབང་པོ་ཤེས་རབ་མགོན། །གསོལ་བ༴ བླ་མའི༴ རིན་ཆེན་རྒྱལ་བའི་ཐུགས་མཆོག་རོལ་གར་མངོན་གྱུར་ཀུ་མ་ར། །དྲི་མེད་ཤེས་རབ་རྣམ་དག་མཁྱེན་མངའ་བསོད་ནམས་རྒྱལ་བའི་མཚན། །གསོལ་བ་འདེབས་སོ༴ བླ་མའི༴ རཏྣ་བྷ་དྲ་ཕག་གྲུར་སེང་ཁྲིར་དོན་དམ་འོད་གསལ་ཐུགས། །དབུས་སྨྱོན་ཀུན་བཟང་ཡེ་ཤེས་སྒྱུ་ལུས་བརྟུལ་ཞུགས་སྤྱོད་མཛད་གཙོ། །གསོལ་བ་འདེབས་སོ༴ བླ་མའི༴ རླབས་གསུམ་གྱིས་མཛེས་དམ་པ་མང་པོའི་གསང་འཛིན་རྣམ་གྲོལ་བཟང་། །མི་ཤིགས་གསུམ་འབྲས་ཆོས་ཉིད་བདེན་མཐོང་ཆོས་སྐྱོང་རྡོ་རྗེ་དཔལ། །གསོལ་བ༴ བླ་མའི༴ རླུང་སེམས་ལས་རུང་སྤྲོས་བྲལ་དོན་རྟོགས་ཡོན་ཏན་རྒྱ་མཚོའི་སྡེ། །སྦས་པའི་ཡུལ་བགྲོད་གཉིས་སྤངས་རྣལ་འབྱོར་ཤཱཀྱ་བཟང་པོ་ལ། །གསོལ་བ་འདེབས་སོ༴ བླ་མའི༴ རིམ་གཉིས་ལམ་ལ་ནམ་ཡང་གཡོ་མེད་ཡོན་ཏན་རྒྱལ་བའི་མཚན། །གནས་ལུགས་ཕྱག་རྒྱ་ཆེན་པོ་ཇི་བཞིན་མངོན་གྱུར་ཀརྨ་དཔལ་རྡོ་རྗེ། །གསོལ་བ༴ བླ་མའི༴ དམ་པས་རྗེས་བཟུང་ཡང་དག་ལམ་མཁན་ཤེས་རབ་གསུམ་གྱིས་ཕྱུག །ལྷ་སྔགས་ཏིང་འཛིན་རྟག་བརྩོན་གྲུབ་དབང་ཨོ་རྒྱན་རྒྱལ་མཚན་དཔལ་བཟང་པོ། །གསོལ་བ༴ བླ་མའི༴ སྨིན་གྲོལ་མཐར་ཐུག་གནས་ལུགས་ཡེ་ཤེས་རྒྱུད་ལ་སྟེར་མཛད་པ། །བཀའ་དྲིན་མཚུངས་མེད་རྡོ་རྗེ་སློབ་དཔོན་མཆོག་གྱུར་རྩ་བ་ལ། །གསོལ་བ༴ བླ་མའི༴ དངོས་གྲུབ་མཆོག་སྟེར་ཧེ་རུ་ཀ་དཔལ་འཁོར་ལོའི་བསྒྱུར་མཛད་པ། །བདེ་མཆོག་དྲ་བ་སྡོམ་པ་དགྱེས་མཛད་དཔའ་མ་ཝཱ་ར་ཧི། །གསོལ་བ༴ བླ་མའི༴ གནས་གསུམ་ལ་བརྟེན་ལྷན་སྐྱེས་བདེ་བ་སྦྱིན་མཛད་ཕོ་ཉ་མོ། །རྒྱལ་བའི་བསྟན་སྐྱོང་དམ་ཚིག་བཀའ་ཡིས་སྲུང་མ་མཐུ་ལྡན་ལ། །གསོལ་བ་འདེབས་སོ༴ བླ་མའི༴ དེ་ལྟར་ཕྱག་རྒྱ་ཆེན་པོ་ལྷན་གཅིག་སྐྱེས་སྦྱོར་བརྒྱུད་པ་ཡིས། །རྩ་བ་བརྒྱུད་པའི་བླ་མ་ཡི་དམ་མཁའ་འགྲོའི་མཆོག་རྣམས་ལ། །མི་ཕྱེད་གསོལ་བ་བཏབ་པས་དམིགས་མེད་ཡེ་ཤེས་མཆོག །བླ་མའི་མཐུ་ཡིས་དེ་རིང་ཉིད་དུ་བདག་གིས་མངོན་རྟོགས་ཤོག །གསལ་སྟོང་དབྱེར་མེད་ནམ་མཁའི་དཀྱིལ་ལྟར་རབ་ཤར་རྩེ་གཅིག་གནས། །སྐྱེ་འགག་གནས་བྲལ་རྟོགས་ཚོགས་རང་གྲོལ་ངོ་བོ་སྤྲོས་བྲལ་བ། །གཉིས་ཆོས་གཉིས་མེད་རོ་གཅིག་དཔེ་ཡི་འོད་གསལ་མངོན་གྱུར་ནས། །བྱ་རྩོལ་ལས་འདས་བསྒོམ་མེད་འོད་གསལ་དོན་དམ་མྱུར་ཐོབ་ཤོག །མེ་ལོང་ལྟ་བུའི་སྐུ་དང་ཡེ་ཤེས་ཟུང་འཇུག་བདེ་བ་ཆེ། །སངས་རྒྱས་ཀུན་གྱི་ཐུགས་མཆོག་ཆོས་ཀྱི་སྐུ་དེ་ཡོངས་གྲུབ་ནས། །ནམ་མཁའི་ཁྱོན་ཁེངས་འགྲོ་ངོར་བསམ་གྱིས་མི་ཁྱབ་གཟུགས་ཀྱི་སྐུ། །ལྷུན་གྱིས་གྲུབ་པ་སེམས་ཅན་མ་ལུས་བྱང་ཆུབ་ཆེར་བཀོད་ཤོག །

ཅེས་པ་ཡང་གྲུབ་པའི་དབང་ཕྱུག་དབུས་སྨྱོན་ཧེ་རུ་ཀ་དཔལ་ཀུན་དགའ་བཟང་པོ་ནས་བརྒྱུད་པའི་ཕྱག་རྒྱ་ཆེན་པོའི་བླ་རབས་གསོལ་འདེབས་འདི་ནི་མདོ་ཁམས་ཤཱཀྱའི་དགེ་བསྙེན་ཚེ་དབང་ནོར་བུས་རང་གཉིས་མོས་པའི་རྐྱེན་གྱི་ལྕགས་ཁྱི་རྒྱལ་ཟླའི་ཚེས་བཟང་བཅུ་ལ་མངའ་རིས་གློ་བོའི་རྒྱལ་ཁབ་སྨོན་ཐང་དུ་སྦྱར་བའི་ཡི་གེའི་གཟུགས་བརྙན་དུ་སྒྱུ་པ་པོ་སྤྲུལ་པའི་སྐུ་དམ་པ་འཕྲིན་ལས་བསྟན་འཛིན་ནོ། །དགེའོ། །

ཕྱག་ཆེན་ལྷན་སྐྱེས་བར་འབྲུག་ནས་བརྒྱུད་པའི་གསོལ་འདེབས་ཉུང་ངུ་བྱིན་རླབས་མྱུ་གུ།

༈ ཕྱག་ཆེན་ལྷན་སྐྱེས་བར་འབྲུག་ནས་བརྒྱུད་པའི་གསོལ་འདེབས་ཉུང་ངུ་བྱིན་རླབས་མྱུ་གུ་ཞེས་བྱ་བཞུགས་སོ། །

ན་མོ་མ་ཧཱ་མུ་དྲ་ཡེ། རྡོ་རྗེ་འཆང་དབང་རྡོ་རྗེ་རྣལ་འབྱོར་མ། །ཤེས་རབ་བཟང་པོ་དཔལ་ལྡན་རྩ་ཤད་པ། །ཆོས་ཀྱི་བློ་གྲོས་བཞད་པ་རྡོ་རྗེ་རྩལ། །གསོལ་བ་འདེབས་སོ་ཕྱག་ཆེན་དངོས་གྲུབ་སྩོལ། །དྭགས་པོ་ལྷ་རྗེ་འགྲོ་མགོན་རྡོ་རྗེ་རྒྱལ། །པདྨ་རྡོ་རྗེ་ཡེ་ཤེས་རྡོ་རྗེའི་ཞབས། །དབོན་རས་དར་སེང་གཞོན་ནུ་སེངྒེ་ལ། །གསོལ་བ་འདེབས་སོ༴ ཉི་མ་སེངྒེ་སེངྒེ་ཤེས་རབ་ཆེ། །སེངྒེ་རིན་ཆེན་སེངྒེ་རྒྱལ་པོ་མཆོག །ཀུན་དགའ་སེངྒེ་བཛྲ་རཏྣ་ལ། །གསོལ་བ་འདེབས༴ བློ་གྲོས་སེངྒེ་ཤེས་རབ་སེངྒེ་དཔལ། །ཛྙཱ་རཏྣ་བློ་གྲོས་མཆོག་ལྡན་པ། །ནམ་མཁའི་རྣལ་འབྱོར་འབྲུག་པ་རྒྱལ་དབང་རྗེ། །གསོལ་བ༴ ངག་དབང་ཆོས་རྒྱལ་བྱར་པ་ཆོས་ཀྱི་གྲགས། །གཉིས་སྤང་རྣལ་འབྱོར་མི་ཕམ་པདྨ་དཀར། །ངག་དབང་བཟང་པོ་ཤེས་རབ་སྤྲིན་སྒྲ་རྒྱས། །གསོལ་བ༴ སྒོམ་སྨྱོན་སྤྲུལ་སྐུ་ཕྱག་རྡོར་ནོར་བུ་དཔལ། །རང་རིགས་རས་པ་ཀུན་དགའ་རྒྱ་མཚོའི་སྡེ། །སྦས་པའི་སངས་རྒྱས་འཇམ་དབྱངས་འཕྲིན་ལས་ཞབས། །ཕྱག་ཆེན་ལྷན་སྐྱེས་ངོ་སྤྲོད་རྩ་བ་ཡི། །བླ་མ་བརྒྱུད་པར་བཅས་ལ་གསོལ་བཏབ་མཐུས། །ཚེ་རབས་རྟག་ཏུ་ངེས་དོན་ཆོས་དང་འཕྲད། །དབང་བཞིས་རྒྱུད་སྨིན་གནས་ལུགས་ལྟ་བ་རྟོགས། །ནོར་འཁྲུལ་ཡོངས་སྤངས་སྒྲུབ་བརྒྱུད་བསྟན་པ་སྤེལ། །བུ་སློབ་རྒྱ་མཚོའི་གོས་ཅན་ཡོངས་སུ་ཁྱབ། །འཁོར་བར་ཞེན་ལོག་བླ་མར་མོས་གུས་རྒྱས། །བརྩོན་འགྲུས་མཐར་ཕྱིན་རྒྱུ་འབྲས་རྟེན་འབྲེལ་ཤར། །རྐྱེན་ཀུན་རོ་སྙོམས་ཟབ་མོ་ཕྱག་རྒྱ་ཆེ། །དེ་ལས་མི་འདའ་སྐུ་གསུམ་འབྲས་ཐོབ་ཤོག །

ཞེས་ཕྱག་ཆེན་བརྒྱུད་པ་བར་འབྲུག་གདན་རབས་ནས་བརྒྱུད་པའི་གསོལ་འདེབས་རྒྱས་བསྡུས་ཤིན་ཏུ་མང་ལ་དད་པའི་མོས་པའི་ས་བོན་ཙམ་དུ་ཚེ་དབང་ནོར་བུས་གློ་བོ་སྨོན་ཐང་དུ་ལྕགས་ཁྱི་རྒྱལ་ཟླའི་ཚེས་བཅོ་ལྔར་སྨྲས་པའི་ཡིག་རིས་སྤྲུལ་པའི་སྐུ་འཕྲིན་ལས་བསྟན་འཛིན་གྱི་བགྱིས་པ་དགེའོ། །དགེའོ། །དགེའོ། །

ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་བོ་དོང་འཇིགས་མེད་དབྱངས་ཅན་དགའ་བ་ནས་བརྒྱུད་པའི་བླ་མ་རྣམས་ལ་གསོལ་འདེབས་རིན་ཆེན་ཕྲེང་བ།

༈ ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་བོ་དོང་འཇིགས་མེད་དབྱངས་ཅན་དགའ་བ་ནས་བརྒྱུད་པའི་བླ་མ་རྣམས་ལ་གསོལ་འདེབས་རིན་ཆེན་ཕྲེང་བ་བཞུགས་སོ། །

ན་མོ་མ་ཧཱ་མུ་དྲ་ཡ། གནས་སྤྱི་གཙུག་ཉི་ཟླའི་གདན་སྟེང་དུ། །རིན་ཆེན་རྩ་བའི་བླ་མ་ལ་གསོལ་བ་འདེབས། །སེམས་གསལ་སྟོང་འཛིན་མེད་དུ་འཆར་བ་དང་། །ཡུལ་སྣང་སྟོང་བདེན་མེད་དུ་རྟོགས་པ་རུ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཀུན་ལ་འདྲེའོ། །གནས་འོག་མིན་ཆོས་དབྱིངས་ཕོ་བྲང་དུ། །ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས། །ཤར་བྷང་ག་ལ་ཡི་ཡུལ་ལྗོངས་སུ། །ཏེ་ལོ་ཤེས་རབ་བཟང་པོ་ལ་གསོལ་བ་འདེབས། །བྱང་པུཥྤ་ཧ་རིའི་དགོན་པ་རུ། །མཁས་པ་ནཱ་རོ་པཎ་ཆེན་ལ་གསོལ་བ་འདེབས། །ལྷོ་གྲོ་བོ་ལུང་གི་ཕོ་བྲང་དུ། །སྒྲ་བསྒྱུར་མར་པ་ལོ་ཙཱ་ལ་གསོལ་བ་འདེབས། །གནས་ལ་ཕྱི་གངས་ཀྱི་ར་བ་རུ། །དབང་ཕྱུག་བཞད་པ་རྡོ་རྗེ་ལ་གསོལ་བ་འདེབས། །ཤར་དྭགས་ལ་སྒམ་པོའི་དགོན་པ་རུ། །ལྷ་རྗེ་ཟླ་འོད་གཞོན་དུ་ལ་གསོལ་བ་འདེབས། །གནས་ཕག་མོ་གྲུ་པའི་མཐར་རྩ་རུ། །བདེ་གཤེགས་རྡོ་རྗེ་རྒྱལ་པོ་ལ་གསོལ་བ་འདེབས། །གནས་སྣ་ཕུ་ཆོས་ལུང་གི་དགོན་པ་རུ། །གླིང་རས་པ་པདྨ་རྡོ་རྗེ་ལ་གསོལ་བ་འདེབས། །འབྲུག་ར་ལུང་གཉིས་ཀྱི་གདན་ས་རུ། །འགྲོ་མགོན་གཙང་པ་རྒྱ་རས་ལ་གསོལ་བ་འདེབས། །ཤྲཱི་རྒོད་ཚང་ཤེལ་གྱི་བྲག་ཕུག་ཏུ། །རྒོད་ཚང་མགོན་པོ་རྡོ་རྗེ་ལ་གསོལ་བ་འདེབས། །གནས་ལྷ་གདོངས་དཔལ་གྱི་ཡར་དགོན་ནས། །སྤྲུལ་སྐུ་རྒྱལ་མཚན་དཔལ་བཟང་ལ་གསོལ་བ་འདེབས། །གནས་ཀླུ་རྒྱལ་བུ་ལེའི་གངས་ཁྲོད་ནས། །ཐུགས་སྲས་སྤྱན་ལྔ་རིག་ལྡན་ལ་གསོལ་བ་འདེབས། །གནས་ཐར་ཕུག་དཔལ་གྱི་དགོན་པ་རུ། །ཆོས་རྗེ་རིན་ཆེན་དཔལ་བཟང་ལ་གསོལ་བ་འདེབས། །མུས་ཐ་གོང་དཔལ་གྱི་དགོན་པ་རུ། །བླ་མ་གཉེན་སྟོན་པ་ཆེན་པོ་ལ་གསོལ་བ་འདེབས། །མུས་ཤུ་གུ་འཚལ་གྱི་གཙུག་རྒྱན་དུ། །བླ་མ་ཤེས་རབ་འབུམ་ལ་གསོལ་བ་འདེབས། །གནས་དངུལ་ཆུ་ཆོས་རྫོང་གི་དགོན་པ་རུ། །སྐྱེས་མཆོག་རྒྱལ་སྲས་ཐོགས་མེད་ལ་གསོལ་བ་འདེབས། །གྱམ་བསམ་གཏན་གླིང་གི་དགོན་པ་རུ། །འཁྲུལ་ཞིག་ལོ་ཆེན་བྱང་རྩེ་ལ་གསོལ་བ་འདེབས། །གནས་ལ་སྟོད་ཤེལ་དཀར་གྱི་ཆོས་སྡེ་རུ། །ལོ་ཆེན་གྲགས་པ་རྒྱལ་མཚན་ལ་གསོལ་བ་འདེབས། །གནས་ཆོས་ལྡིངས་རྒྱལ་བའི་ཞིང་ཁམས་སུ། །པཎ་ཆེན་ཆོས་ཀྱི་རྒྱལ་མཚན་ལ་གསོལ་བ་འདེབས། །འཇིགས་མེད་དབྱངས་ཆེན་དགའ་བ་ལ་གསོལ་བ་འདེབས། །ཀུན་མཁྱེན་ཕྱོགས་ལས་རྣམ་རྒྱལ་ལ་གསོལ་བ༴ དྲིན་ཆེན་རྩ་བའི་བླ་མ་ལ་གསོལ་བ་འདེབས། །སེམས་གསལ་སྟོང་འཛི་མེད་དུ་འཆར་བ་དང་། །ཡུལ་སྣང་སྟོང་བདེན་མེད་དུ་རྟོགས་པ་རུ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གནས་སྒོ་མོ་ཆོས་སྡེའི་དགོན་པ་རུ། །སྤོ་པ་ཆོས་རྒྱལ་བཟང་པོ་ལ་གསོལ་བ༴ གནས་གར་བཞུགས་དག་པའི་དབེན་གནས་སུ། །སྐུ་ཞང་ཀུན་དགའ་སྙིང་པོ་ལ་གསོལ་བ༴ གནས་དཔལ་མོ་ཆོས་སྡིངས་ཀྱི་དགོན་པ་རུ། །ཉམས་མེད་ཤེས་རབ་རྒྱ་མཚོ་ལ་གསོལ་བ༴ གནས་བསམ་གཏན་རྩེ་མོའི་དགོན་པ་རུ། །མཁས་བཙུན་ནམ་མཁའ་འོད་ཟེར་ལ་གསོལ་བ༴ གནས་མངོན་དགའ་ཆོས་ཀྱི་ཕོ་བྲང་ནས། །ཆོས་རྒྱལ་ནམ་མཁའ་རིན་ཆེན་ལ་གསོལ་བ༴ གནས་བསམ་གཏན་ཞལ་གཟིགས་དགོན་པོ་རུ། །འདུལ་འཛིན་ནམ་མཁའི་རྒྱལ་པོ་ལ༴ གནས་གསང་སྔགས་བདེ་ཆེན་གྱི་དགོན་པ་རུ། །མཁས་གྲུབ་ནམ་མཁའ་དཀར་པོ་ལ༴ གནས་འབྲངས་རྒྱས་བསམ་གཏན་གླིང་གི་དབེན་གནས་སུ། །ཡོངས་འཛིན་ནམ་མཁའ་ནོར་བུ་ལ་གསོལ་བ༴ གནས་བྲང་མཚོ་རྫོང་ཕུག་གི་སྒྲུབ་ཁང་ནས། །འདྲེན་མཆོག་འཇམ་དབྱངས་འཕྲིན་ལས་ལ༴ གནས་ཕྱོགས་མེད་འགྲོ་དོན་སྐྱོང་བ་ནས། །རིག་འཛིན་ཚེ་དབང་ནོར་བུ་ལ་གསོལ་བ༴ གནས་སྤྱི་གཙུག་ཉི་ཟླའི་གདན་སྟེང་དུ། །འདྲེན་མཆོག་འཁོར་ལོའི་མགོན་པོ་ལ༴ གནས་རང་ལུས་རྒྱལ་བའི་དཀྱིལ་འཁོར་ནས། །ཡི་དམ་མཁའ་འགྲོའི་ལྷ་ཚོགས་ལ་གསོལ་བ༴ གནས་མཁའ་སྤྱོད་དག་པའི་ཞིང་ཁམས་སུ། །ཡུམ་ཆེན་རྡོ་རྗེ་ཕག་མོ་ལ༴ གནས་བསིལ་བ་ཚལ་གྱི་དུར་ཁྲོད་དུ། །ཆོས་སྐྱོང་མ་མགོན་ལྕམ་དྲལ་ལ༴ གནས་ཉི་ཤུ་རྩ་བཞིའི་གནས་མཆོག་ཏུ༴ ཆོས་བདག་དཔའ་བོ་མཁའ་འགྲོ་ལ༴ གནས་དམ་ཚིག་གཙང་མའི་གཞལ་ཡས་སུ། །མཆེད་ལྕམ་རྡོ་རྗེ་སྤུན་གྲོགས་ལ༴ དྲིན་ཆེན་རྩ་བའི་བླ་མ་ལ་གསོལ་བ༴ སེམས་གསལ་སྟོང་འཛིན་མེད་དུ་འཆར་བ་དང་། །ཡུལ་སྣང་སྟོང་བདེན་མེད་དུ་རྟོགས་པ་རུ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇིག་རྟེན་འདི་སྣང་བློ་ཡི་བོར་ནུས་ཤིང་། །ཟག་མེད་དག་སྣང་ལ་རང་བྱན་ཆུད་པ་ཡིས། །མཚན་ལྡན་བླ་མ་ལ་ཕུར་ཚུགས་དད་གུས་ཀྱིས། །བྱིན་རླབས་འཕོ་བ་མཆོག་སྙིང་དབུས་མྱུར་འཇུག་མཛོད། །འཕྲལ་རྐྱེན་ཕྱི་ནང་གི་བར་ཆད་སེལ་བ་དང་། །འདོད་དོན་ཡིད་བཞིན་དུ་ལྷུན་གྱིས་གྲུབ་པ་ཡི། །མཆོག་ཐུན་དངོས་གྲུབ་ཀུན་འབད་མེད་སྙིང་བརྙེས་པས། །ཚེ་གཅིག་སངས་རྒྱས་ཀྱི་གོ་འཕང་ཐོབ་བྱིན་རློབས། །

ཞེས་པ་མ་ཧཱ་པཎྜི་ཏ་འཇིགས་མེད་དབྱངས་ཅན་དགའ་བའི་ཞབས་ནས་བརྒྱུད་པའི་ཕྱག་ཆེན་ལྷན་སྐྱེས་ཀྱི་བླ་མ་རྣམས་ལ་གསོལ་འདེབས་སྔར་གྱི་རྙིང་པ་ལ་ཚིག་བསྒྱུར་བཅོས་ཁ་བསྐངས་བ་ནི་ཚེ་དབང་ནོར་བུས་བག་ཡོད་སྨིན་དྲུག་ཟླ་བའི་ཚེས་བཅུ་དྲུག་ལ་རུ་ལག་འབྲས་སྤུངས་སུ་བྲིས་པ་སརྦ་མངྒ་ལཾ།

ཡང་བརྒྱུད་པ་ལུགས་གཅིག་ལ། ནམ་མཁའ་ནོར་བུ་ནས། ནམ་མཁའ་བསྟན་འཛིན་དང་། དེས་ཟབ་གསལ་ཆོས་འཕེལ་ཏེ། དེ་ལ་ཁོ་བོས་ལེགས་པར་འཁུམ་པས། དེ་ལྟར་ན། གནས་ཆོས་དབྱིངས་རྒྱལ་བའི་གདན་ས་ནས། །ཆོས་རྗེ་ནམ་མཁའ་བསྟན་འཛིན་ལ་གསོལ་བ་འདེབས། །གནས་བསྟས་དགའ་ཙན་དན་ཤུག་ཁྲོད་ནས། །གྲུབ་མཆོག་ཟབ་གསལ་ཆོས་འཕེལ་ལ་གསོལ་བ་འདེབས། །གནས་ཕྱོགས་མེད་མན་ཆད་སྔར་ལྟར་རོ། །དེ་ཡང་ཚེ་དབང་ནོར་བུས་སོ། །སརྦ་མངྒ་ལཾ།

མན་ངག་ཟབ་མོ་བརྒྱུད་པའི་བླ་མའི་བརྒྱུད་པའི་གསོལ་འདེབས།

༈ མན་ངག་ཟབ་མོ་བརྒྱུད་པའི་བླ་མའི་བརྒྱུད་པའི་གསོལ་འདེབས་བཞུགས།

ན་མོ་བུདྡྷ་བྷོ་དྷི་ས་ཏྭ་བྷྱ༔ དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཡེ་ཤེས་ཟབ་གསལ་གཉིས་སུ་མེད་པ་ལ་ཕྱག་འཚལ་ལོ། །དེ་ཡི་མན་ངག་ཟབ་མོ་བརྒྱུད་པའི་བླ་མ་རྣམས་ལ་ཕྱག་འཚལ་ལོ། །གང་ཞིག་འཁོར་བའི་དུཿཁས་མནར་བའི་འགྲོ་བ་རྣམས། །ཡང་དག་ལམ་ལ་དཀྲི་བར་བྱེད་པ་རྗེ་བཙུན་མཆོག །འཇམ་དཔལ་དཔའ་བོ་བསམ་གྱིས་མི་ཁྱབ་སྒྱུ་འཕྲུལ་གྱིས། །སྣང་བ་ཆོས་ཀྱི་ཉི་མ་བླ་མ་ལ་ཕྱག་འཚལ་ལོ། །བདེ་གཤེགས་སྙིང་པོ་གདོད་ནས་མི་འཇིགས་སྟོབས་ལ་སོགས། །ཡོན་ཏན་ཀུན་ལྡན་གློ་བུར་དྲིས་སྒྲིབ་བདེ་གསལ་འབྲས་བུ་ནི། །སྤངས་རྟོགས་ཕུན་ཚོགས་རིགས་མཆོག་སྒྱུ་འཕྲུལ་སྲས་པོ་ལྷ་ཡི་ལྷ། །རྒྱལ་མཆོག་དོན་གྲུབ་རིན་ཆེན་སྙིང་པོ་དེ་ལ་ཕྱག་འཚལ་ལོ། །རྒྱལ་བ་ཉིད་དུ་གྱུར་ཀྱང་རྒྱལ་བའི་སྲས་ཚུལ་ཆོས་འཕྲིན་གྱིས། །དབང་ཕྱུག་ཆེན་པོ་རྒྱལ་བའི་སྲས་གསུམ་དབང་བྱེད་འཕགས་མཆོག་གིས། །རབ་དཀར་པདྨོ་ལག་དང་ཟུར་ཕུད་ལྔས་རྒྱན་གཞོན་ནུའི་ལུས། །གསང་བའི་རྒྱལ་པོ་རྡོ་རྗེ་མཆོག་གང་ལ་ཕྱག་འཚལ་ལོ། །ལྷ་ཡི་འགྲོ་ལ་ཕན་ཕྱིར་བྱང་ཆུབ་སེམས་དཔའ་ཆེན་པོ་ཉ་ཡི་མགྲིན། །རབ་མཛེས་ལྷ་ཡི་ལུས་སུ་སྤྲུལ་བསྒྱུར་རྒྱལ་སྲས་བློ་གྲོས་རིན་པོ་ཆེ། །རྒྱལ་བ་གཅིག་ཆར་རྟོགས་པའི་བདག་པོར་ལུང་བསྟན་ཐེག་ཆེན་གྱིས། །ཤིང་རྟ་མཆོག་གྱུར་དཔལ་ལྡན་མདའ་བསྣུན་སྒྲ་གཅན་འཛིན་ལ་ཕྱག་འཚལ་ལོ། །སངས་རྒྱས་ཡེ་ཤེས་འབྱུང་གནས་འོད་ཅེས་ཤཱཀྱའི་བསྟན་པའི་གདུལ་བྱའི་ངོར། །རབ་དགའི་སར་བཞུགས་སེམས་དཔའི་ཚུལ་བསྟན་མཚན་དཔེས་བརྒྱན་པའི་སྐུ། །སྲིད་གསུམ་དབང་པོ་ཀུན་གྱིས་མཆོད་པའི་ཞིང་གྱུར་འཇིག་རྟེན་མགོན་པོ་ནི། །སྡེ་སྣོད་བཞི་ཡིས་མཛོད་ལ་དབང་བརྙེས་ན་ག་ཛུ་ནར་ཕྱག་འཚལ་ལོ། །གང་གི་རྒྱལ་ཚབ་ཐུ་བོ་དམ་པ་སེངྒེ་ལ་ཡི་རྒྱལ་པོའི་སྲས། །ལུང་རྟོགས་ཆོས་ལ་དབང་བསྒྱུར་ཨརྱ་དེ་བ་ལྷ་ཡི་ལྷ་མཆོག་དཔལ། །འཕགས་པ་ཡབ་སྲས་ཐུགས་ཀྱི་བཅུད་གྱུར་མན་ངག་གསང་བའི་མཛོད་ཀུན་འཛིན། །འཆི་མེད་ཚེ་ལ་མངའ་བརྙེས་ཀླུ་ཡི་བྱང་ཆུབ་དེ་ལའང་ཕྱག་འཚལ་ལོ། །འཕགས་པའི་ཞབས་བརྟན་སྲས་ཀྱི་མཆོག་གྱུར་སྡེ་སྣོད་ཀུན་འཆང་ལུས་དེའི་འོག །བདེ་བ་ཅན་དུ་གཤེགས་གྱུར་བྱང་ཆུབ་སེམས་དཔའ་འམ་སྒྲ་གཅན་འཛིན་བཟང་པོ། །སྦྱངས་པའི་ཡོན་ཏན་ལ་སྤྱོད་ཐེག་ཆེན་འཛིན་མཁས་སྒྲ་གཅན་འཛིན་བཤེས་གཉེན། །འགྲོ་ལ་སྨན་ཆད་ཡུན་འཚོར་གྱུར་པ་ཀླུའི་བཤེས་གཉེན་ལ་ཕྱག་འཚལ་ལོ། །འཕགས་ཀླུའི་རྗེས་འབྲང་མཚན་མེད་ལྟ་བའི་སྲོལ་བཏོད་དགེ་འདུན་བསྲུང་བ་པ། །ངོ་བོ་ཉིད་མེད་སྨྲ་བའི་ཁྱུ་མཆོག་ཆེན་པོར་གྱུར་ཅིང་རིལ་བུ་ཡི། །རྣམ་སྨིན་ཕུང་པོ་མ་སྤངས་རིག་པ་འཛིན་པའི་སར་གཤེགས་སངས་རྒྱས་སྐྱོང་། །དེ་ཡི་རྗེས་ཞུགས་ཐེག་ཆེན་མིག་གྱུར་པདྨོའི་བློ་ལ་ཕྱག་འཚལ་ལོ། །སྐྱེ་བ་དུ་མར་འཇམ་དཔལ་དབྱངས་ཀྱི་བྱིན་རླབས་མཁས་ལ་མཁས་པའི་མཆོག །རྒོལ་པ་མཐར་བྱེད་ངག་གི་དབང་ཕྱུག་ངོ་མཚར་མཛད་པ་དུ་མའི་བདག །མཐའ་བྲལ་དོན་སྟོན་འཇའ་ལུས་རྡོ་རྗེའི་སྐུར་ཟླ་བ་གྲགས་པའི་དཔལ། །དེ་ཡི་རྗེས་བཟུང་རྫུ་འཕྲུལ་མཆོག་བརྙེས་སྲུང་བའི་ཞབས་ལ་ཕྱག་འཚལ་ལོ། །བྲམ་རིགས་ཆེས་མཁས་སེང་བཟང་སྒེག་རྡོར་དཔལ་མོ་བྱིས་སྦིས་ཞབས། །ལེགས་བསྙེན་སྡེ་སྣོད་བཞིར་སྦྱངས་ཤེས་རབ་རྒྱུད་ལས་ཆོས་རྒྱུན་ཏིང་འཛིན་བརྙེས། །བསྲུང་པ་ལི་ཏ་བའི་ཞབས་ལ་གསང་འདུས་བཅོ་བརྒྱད་ཚར་ཉན་དྲག་ཤུལ་སྤྱོད་པ་ཡིས། །ལུང་བསྟན་ཐོབ་ནས་འཇམ་དཔལ་སྤྲུལ་པའི་དགེ་སྦྱོང་གཉིས་སྤངས་ཚུལ་བཟུང་གྱུར། །པདྨའི་སྦུབས་སུ་སྐུ་འཁྲུངས་འཇམ་དཔལ་བཤེས་གཉེན་ཕྱི་མར་ཡོངས་གྲགས་པ། །གང་གི་སྒྱུ་འཕྲུལ་བདེ་བར་གཤེགས་འདུས་བཅུ་དགུའི་དཀྱིལ་འཁོར་མངོན་བསྟན་ནས། །དབང་བསྐུར་ཞལ་ལུང་ཐོབ་པས་མཆོག་ཏུ་ཕྱག་རྒྱ་ཆེན་པོ་ཁོ་ན་ཉིད། །མངོན་གྱུར་ནུས་པ་དཔག་མེད་སངས་རྒྱས་ཡེ་ཤེས་ཞབས་ལ་ཕྱག་འཚལ་ལོ། །དེ་སློབ་མཆོག་གི་བདེ་ཆེན་ཞིང་དུ་སངས་རྒྱས་འོད་དཔག་མེད་པ་གང་། །ཞིང་འདིར་ཐུབ་པའི་རྒྱལ་ཚབ་ཚུལ་བཟུང་ཨོ་རྒྱན་རྒྱལ་པོ་ཐོར་ཅོག་ཅན། །རྒྱལ་ཀུན་ཕྲིན་ལས་བྱེད་པོར་གྱུར་པས་སངས་རྒྱས་ཀུན་ལས་འཕགས་ཞེས་བྱ། །བདེ་བ་ཆེར་གྲགས་པདྨ་འབྱུང་གནས་ཞབས་ལ་རྟག་པར་ཕྱག་འཚལ་ལོ། །གཞན་ཡང་ཡེ་ཤེས་ཞབས་བརྟན་མཐོང་བའི་ཆོས་ལ་མྱང་འདས་གྱུར་པ་ནི། །སྒྲ་གཅན་འཛིན་བཟང་རབ་ཞི་བཤེས་གཉེན་མར་མེ་མཛད་དཔལ་ཡེ་ཤེས་དང་། །རྒྱལ་ཚབ་སར་གཤེགས་སངས་རྒྱས་ཞི་སངས་ཆོས་འབྱུང་གཙུག་ཏོར་སྨན་པའི་ཞབས། །རྡོ་རྗེ་སློབ་དཔོན་ཆེན་པོ་དེ་སྲས་སློབ་མའི་ཚོགས་ལ་གུས་པས་ཕྱག་འཚལ་ལོ། །བདེ་བ་ཆེན་པོ་པདྨ་འབྱུང་གནས་ཞབས་དང་སྨན་པའི་ཞབས་བསྙེན་ནས། །རིམ་གཉིས་ཡོན་ཏན་ཡོངས་རྫོགས་རྣལ་འབྱོར་དབང་ཕྱུག་དཔལ་ལྡན་ཡི་གེ་ཞབས། །དེ་ཡི་རྒྱུད་འཛིན་དམ་པ་ཡེ་ཤེས་ཚེ་དབང་བརྙེས་པ་ཀརྣ་ཧཱད། །གནས་ལྔ་རིག་པའི་ཕུལ་གྱུར་ཡེ་ཤེས་དཔལ་བཤེས་ཞབས་ལའང་ཕྱག་འཚལ་ལོ། །རྣམ་གནོན་གཏོར་མི་སློབ་དཔོན་བྱིན་རླབས་ནུས་མཐུ་ཆེ་ལྡན་ཀླུ་སྒྲུབ་མཚན། །དེ་ཡི་སློབ་མ་གངས་རིའི་ཁྲོད་དུ་གཉོས་ཀྱི་རིགས་འཁྲུངས་འབྱུང་པོ་ཞེས། །ཆོས་རྒྱལ་མྱ་ངན་མེད་པའི་སྐྱེ་བར་ཞལ་བཞེས་མ་ཧཱ་ལོ་ཙཱ་བ། །ཡོན་ཏན་གྲགས་ཞེས་མཁས་ཤིང་གྲུབ་པ་དེ་ལ་གུས་པས་ཕྱག་འཚལ་ལོ། །དེ་ཡི་རིགས་སྲས་ཆོས་ཀྱི་གདུང་འཚོབ་རྡོ་རྗེ་བླ་མ་ནུས་པར་ལྡན། །ཇོ་སྲས་དཔལ་ལེ་ཡི་དམ་ཞལ་གཟིགས་གྲགས་དཔལ་མཁས་ཤིང་ཆོས་སྐྱོང་ཁོལ། །སྤྱོད་འཆང་ནག་པོ་ངུར་སྨྲིག་གོས་ཀྱིས་མཛེས་བྱས་གནས་ལུགས་ཕྱག་ཆེན་ལ། །བྱན་ཆུད་ལྷ་ནང་པ་ཞེས་སངས་རྒྱས་རས་ཆེན་ཞབས་ལ་ཕྱག་འཚལ་ལོ། །སྟོད་ལུང་ཡེ་ཤེས་འབར་ནི་མཁྱེན་རབ་ཕུལ་བྱུང་ཟབ་གསལ་བདེན་དོན་རྟོགས། །ཆོས་འོད་གཞུང་ལུགས་ལ་སྦྱང་འཕགས་འོད་འོད་གསལ་རྒྱུན་གྱི་རྣལ་འབྱོར་གྱུར། །མི་བསྐྱོད་རྒྱལ་བས་བྱིན་རླབས་མཁས་པའི་ཕུལ་གྱུར་ཀུན་མཁྱེན་རིན་ཆེན་གྲུབ། །མཁས་ཤིང་ཡེ་ཤེས་ཆེ་ཐོབ་བྱང་རྩེ་གྲགས་རྒྱལ་ཞབས་ལ་ཕྱག་འཚལ་ལོ། །རྒྱལ་བ་རྣམ་གྲོལ་མཐའ་ཡས་མགོན་པོ་ཞིང་འདིའི་འགྲོ་སླད་རྒྱལ་སྲས་ཚུལ། །འཇིགས་མེད་དབྱངས་ཅན་དགའ་ཞེས་ལུང་རྟོགས་བསྟན་པ་ཡོངས་རྫོགས་འཛིན་པའི་དཔལ། །རྡོ་རྗེ་སེམས་དང་རྣལ་འབྱོར་མ་ཚོགས་ཀུན་གྱི་སྡུག་དབྱུང་སློབ་དཔོན་ཆེན་པོ་གསང་བ་སྦྱིན། །མ་ཧཱ་པཎྜི་ཏར་གྱུར་ཆོས་ཀྱི་རྒྱལ་བའི་རྒྱལ་མཚན་དེ་ལ་སྙིང་ནས་ཕྱག་འཚལ་ལོ། །གང་གི་ཞབས་བརྟན་མི་ཤིགས་དྭངས་མའི་སྐུ་ཐོབ་བསོད་ནམས་མཆོག་གྱུར་མཚན། །ཕྲ་རགས་དབུར་ཐིམ་འོད་གསལ་རྒྱུན་བརྙེས་མོན་རྫོང་ཟླ་བ་རྒྱལ་བའི་མཚན། །རྒྱལ་བསྟན་སྙིང་པོ་འཇིགས་མེད་བཞེད་པ་ལེགས་མཁྱེན་ནམ་མཁའ་རིན་པོ་ཆེ། །རྟོགས་པའི་གར་མཁན་རྣལ་འབྱོར་དབང་ཕྱུག་ལྷ་དབང་གྲགས་པར་ཕྱག་འཚལ་ལོ། །གདོད་ནས་བྱང་ཆུབ་བརྙེས་ཀྱང་སྙིང་རྗེ་མཆོག་གི་འགྲོ་རྣམས་བཏང་མིན་པས། །རྟག་ཏུ་གཟུགས་སྐུའི་རོལ་པ་སྟོན་ལ་གཡེལ་མེད་རྣམ་པ་ཐམས་ཅད་པ། །པདྨ་འབྱུང་གང་སྤྱོད་འཆང་ནག་པོའི་མཚན་གྱིས་བསྒྱུར་བའི་སྒྱུ་འཕྲུལ་མཆོག །སྔོན་མེད་ལེགས་བཤད་སྤྲོ་མཁས་སྒྲོལ་བའི་མགོན་པོའི་ཞབས་ལ་ཕྱག་འཚལ་ལོ། །དམ་པའི་རིགས་འཁྲུངས་བྱང་ཆུབ་སེམས་འབྱོངས་ཟབ་གསལ་ཉམས་མྱོང་ནམ་མཁའ་དཀར། །སྡོམ་བརྩོན་མང་ཐོས་བཤད་སྒྲུབ་བསྟན་པ་སྤེལ་བརྩོན་ནམ་མཁའ་ནོར་བུའི་ཞབས། །སྦས་པའི་ཚུལ་གྱིས་ངེས་དོན་གསལ་བྱེད་སྒྲོན་མེ་ཧེ་རུ་ཀ་དཔལ་དཔའ། །རྡོ་རྗེ་སློབ་དཔོན་འཕྲིན་ལས་རབ་བརྟན་ཞབས་ལ་རབ་ཏུ་གུས་ཕྱག་འཚལ། །སྔོན་ལས་བཟང་པོས་བློ་གྲོས་པདྨོ་རྒྱས་ཤིང་རིས་མེད་གྲུབ་པའི་མཐར། །གུས་པས་ཟབ་དགུའི་བཅུད་བླངས་མཐར་ཐུག་སྙིང་པོ་མི་ཤིག་དྭངས་མ་ཆེ། །ཟབ་གསལ་ངོ་བོ་སྒྲོ་འདོགས་ཆོད་པ་བྱ་བྲལ་ནམ་མཁའི་རྣལ་འབྱོར་པ། །རིག་སྔགས་འཛིན་པ་ཚེ་དབང་ནོར་བུ་འཇམ་དབྱངས་རྒྱ་མཚོར་ཕྱག་འཚལ་ལོ། །རྒྱལ་བ་ཀུན་གྱིས་བགྲོད་པ་གཅིག་གི་ལམ་གྱུར་ཟུང་འཇུག་སྔགས་ཀྱི་ཆོས། །ཟབ་གསལ་དབྱེར་མེད་གནས་ལུགས་སེམས་ཉིད་ངོ་བོ་སྟོན་པར་མཛད་པ་པོ། །རྒྱལ་བ་ཀུན་ལས་ལྷག་པའི་བཀའ་དྲིན་ཆེ་ཐོབ་རྩ་བའི་བླ་མ་གང་། །རབ་འབྱམས་དཀྱིལ་འཁོར་རྒྱ་མཚོའི་དབང་ཕྱུག་དེ་ལ་ཕྱག་འཚལ་ལོ། །བརྒྱད་ཁྲི་བཞི་སྟོང་ཆོས་རྣམས་ཀུན་གྱི་སྙིང་པོ་ཟབ་གསལ་དབྱེར་མེད་ལམ། །སངས་རྒྱས་ཡོངས་ཀྱི་གསང་ཚིག་འཇམ་དཔལ་དབྱངས་ཀྱི་ཞལ་ལུང་ཀུན་ཏུ་བཟང་། །དྭངས་མ་གསུམ་ལྡན་མི་ཤིག་གྲོལ་ཐིག་མཆོག་ཏུ་བདེ་བའི་རང་བཞིན་ཆེ། །རྒྱུད་ལ་འཆར་བྱེད་ཚིག་དང་ཡི་གེར་བྱོན་པའི་ཆོས་ལ་ཕྱག་འཚལ་ལོ། །དེ་ལྟར་ཟབ་གསལ་ལུང་རྟོགས་མངའ་བདག་བླ་མ་རྩ་བར་བརྒྱུད་པར་བཅས། །ཀུན་ལ་རྩེ་གཅིག་གུས་པས་ཕྱག་འཚལ་མཆོད་འབུལ་བདག་སོགས་སྡིག་ཀུན་བཤགས། །དགེ་ལ་ཡི་རང་ཆོས་གསུང་བསྐུལ་ཞིང་མྱ་ངན་མི་འདའ་བཞུགས་གསོལ་འདེབས། །དགེ་ཚོགས་ཐམས་ཅད་ཡོངས་བསྡུས་བྱང་ཆུབ་ཆེན་པོར་བསྔོ་བས་རྒྱས་གྱུར་ཅིག །སརྦ་མངྒ་ལཾ།

སྨྲ་བའི་སེང་གེའི་དོན་བརྒྱུད་གསོ་རིག་པ་གཅེར་མཐོང་དུ་གྲགས་པའི་བརྒྱུད་པའི་བླ་མར་གསོལ་བ་བཏབ་པ་སྙིང་པོ་དོན་གྱི་གཏེར་སྦྱིན།

༈ སྨྲ་བའི་སེང་གེའི་དོན་བརྒྱུད་གསོ་རིག་པ་གཅེར་མཐོང་དུ་གྲགས་པའི་བརྒྱུད་པའི་བླ་མར་གསོལ་བ་བཏབ་པ་སྙིང་པོ་དོན་གྱི་གཏེར་སྦྱིན་ཞེས་བྱ་བ་བཞུགས་སོ། །

ཨོཾ་ཨཱ༔ ཧཱུྃ༔ ཆོས་ཉིད་དབྱིངས་ལས་ནམ་ཡང་མ་གཡོགས་གཡོ་མེད་སྤྲོས་བྲལ་ངང་། །རང་བཞིན་དག་པའི་ཞིང་ན་ངེས་པ་ལྔ་ལྡན་རྒྱལ་བའི་གཙོ། །མི་མཇེད་གནས་ལ་བྱེ་བ་ཕྲག་བརྒྱ་སྤྲུལ་མཛད་ཤཱཀྱ་ཐུབ། །གསོལ་བ་འདེབས་སོ་རིག་པ་མངོན་གྱུར་སངས་རྒྱས་ཐོབ་བྱིན་རློབས། །གྲངས་མེད་སྔོན་སངས་རྒྱས་ཀྱང་འགྲོ་ངོར་རྩེ་རྒྱལ་སྲས་འཇམ་དཔལ་དབྱངས། །སྐལ་བཟང་རྣམ་འདྲེན་དྲུག་པ་སེངྒེར་ཞལ་བཞེས་དམ་པ་མགོན། །རང་རིག་དྲི་མེད་མངོན་གྱུར་དམ་པ་སོ་ཆུང་དགེ་འདུན་འབར། །གསོལ་བ་འདེབས་སོ༴ མཁྱེན་པས་རྒོལ་བ་ཚར་གཅོད་བླ་མའི་ཐུགས་ཟིན་འཆུས་དེར་བརྩོན། །གང་གི་རིགས་སྲས་གདམས་པའི་བུམ་བཟང་འཛིན་མཁས་བརྩོན་སེང་ཞབས། །མཁྱེན་བརྩེ་ནུས་ལྡན་ཚོགས་གཉིས་ཡོངས་རྫོགས་རྒྱལ་སྲས་ཤེས་རབ་འོད། །གསོལ་བ་འདེབས་སོ༴ ཆོས་རྣམས་མ་ལུས་ཐུགས་སུ་ཆུད་པ་ཀུན་མཁྱེན་བསོད་ནམས་དཔལ། །རྒྱལ་བ་མ་ཆགས་པདྨར་སྐྱེ་བར་གཅིག་ཐོག་ཀུན་དགའ་བཟང་། །གང་གི་རིགས་ཀྱི་གཅུང་དང་ཆོས་ཀྱི་སྲས་གྱུར་དོན་འགྲུབ་མཚན། །གསོལ་བ་འདེགས་སོ༴ རྒྱ་ཡི་རིག་པ་ཞི་བྱེད་བསྟན་གསལ་སྨོན་ལམ་ཤེས་རབ་པ། །ཆོས་རྗེ་མཁས་བཙུན་བློ་གྲོས་རྒྱ་མཚོ་ཞེས་བྱ་ཀུན་མཁྱེན་ཆེ། །རྡོ་རྗེ་བསྟན་པ་ལུང་རྟོགས་མངའ་བདག་གནས་ལུགས་གཟིགས་པའི་གཙོ། །གསོལ་བ་འདེབས་སོ༴ རྒྱ་མཚོ་སྦྱིན་པ་སྨིན་གྲོལ་ལམ་གྱི་ཡོན་ཏན་རྫོགས་པའི་དཔལ། །བདེ་ལྡན་ལྷུན་གྲུབ་ལམ་ལྔའི་གསང་ལ་ཞུགས་ནས་རང་རིག་རྟོགས། །ནམ་མཁའ་བཟང་པོ་རིམ་གཉིས་དྲོད་ཚད་ཡོན་ཏན་ཡོངས་སུ་རྫོགས། །གསོལ་བ་འདེབས་སོ༴ དཔལ་འབྱོར་ལྷུན་གྲུབ་བྱང་སེམས་གཉིས་བརྙེས་རང་རིག་བཙན་ས་ཟིན། །བཀྲ་ཤིས་བཟང་པོ་ཀུན་སྤངས་བརྟུལ་ཞུགས་ཡང་དག་རྟོགས་པའི་གདེང་ཚད་ལོན། །འཆི་མེད་བློ་བརྟན་སྙིགས་དུས་ཞི་བྱེད་སྒྲོན་མེ་འགྲན་ཟླ་བྲལ། །གསོལ་བ་འདེབས་སོ༴ གནས་ལུགས་ཕྱག་ཆེན་ཐུགས་ཆུད་རང་རིག་མངོན་གྱུར་སྤྲུལ་པའི་སྐུ། །སྦས་ཚུལ་འཁྲུལ་ཞིག་རྣལ་འབྱོར་སྤྱོད་པ་འཕྲིན་ལས་རབ་བརྟན་ཞབས། །གང་གི་བཀའ་དྲིན་སྨིན་གྲོལ་གདམས་པའི་མཛོད་འཛིན་ཚེ་དབང་ནོར་བུའི་དཔལ། །གསོལ་བ་འདེབས་སོ༴ ཁྱད་འཕགས་མན་ངག་རང་རིག་དྲི་མེད་ལམ། །མངོན་པར་བསྟན་མཛད་དྲིན་ཆེན་ཆོས་ཀྱི་རྗེ། །བརྒྱུད་པ་ཀུན་འདུས་རྩ་བའི་བླ་མ་ལ། །གསོལ་བ་འདེབས་སོ༴ རྒྱལ་ཀུན་གཤེགས་ཤུལ་དོན་བརྒྱུད་སྙིང་པོའི་ཆོས། །དེ་ཡི་ལམ་ལ་རྟག་ཏུ་བདག་ཞུགས་ཤིང་། །བསླུ་མེད་སངས་རྒྱས་བླ་མར་སྐྱབས་སུ་མཆི། །འགྲོ་ལ་ལྷག་བསམ་བྱང་ཆུབ་སེམས་བསྐྱེད་ཤོག །དལ་འབྱོར་རྙེད་དཀའ་འཇིག་སླ་འཁོར་བའི་རྒྱུན། །ཡུན་རིང་དུཿཁས་མནར་ལ་སྐྱོ་བ་སྐྱེ། །མ་ནོར་ལམ་སྟོན་རྩ་བའི་བླ་མ་ནི། །སངས་རྒྱས་ལས་ལྷག་འབད་པས་བསྟེན་པར་ཤོག །དད་པ་མི་ཕྱེད་མོས་གུས་ཕུར་ཚུགས་པས། །རྩེ་གཅིག་གསོལ་བ་བཏབ་པས་བདག་སོགས་འགྲོའི། །སྒྲིབ་དག་བླ་མའི་བྱིན་རླབས་སྙིང་ལ་ཞུགས། །གྲུབ་ཐོབ་དོན་བརྒྱུད་རྒྱལ་ས་ཟིན་པར་ཤོག །བཅའ་བ་ལྟ་སྟངས་བཞག་ཐབས་སེམས་ཀྱི་གནད། །དབང་དམན་རྟེན་ཅན་རྟེན་མེད་ལམ་ལ་བཀྲིས། །དབང་འབྲིང་སྣང་རིག་རྩ་བྲལ་ལམ་དུ་ཁྱེར། །དབང་རབ་རིག་པ་ཅོག་གཞགས་གདིང་ཐོབ་ཤོག །མ་ནོར་ངོ་འཕྲད་དེ་ཉིད་གོམས་འདྲིས་བརྟན། །སྐྱོན་སེལ་ཡོན་ཏན་དྲོད་ཚད་འཛིན་མཁས་ཤིང་། །རྗེས་ཐོབ་ཆུ་བོ་རྒྱུན་གྱིས་རྣལ་འབྱོར་གྱིས། །ཚེ་ལ་དབང་བརྙེས་དམ་པ་མི་ཕམ་མགོན། །གང་གི་དོན་བརྒྱུད་ཡིད་བཞིན་ནོར་བུ་བཞིན། །རིག་པ་གཅེར་མཐོང་གདམས་པ་མཆོག་དེ་ཡི། །ལམ་འབྲས་ཡོངས་རྫོགས་མྱུར་ཐོབ་བྱིན་གྱིས་རློབས། །

ཅེས་གསོ་རིག་པ་གཅེར་མཐོང་གི་དབང་ཁྲིད་ཀྱི་བརྒྱུད་འདེབས་སུ་ཡོངས་འཛིན་སྨིན་དྲུག་ཟླ་བའི་ཚེས་བཟང་པོ་ལ་སྟོད་བུད་ཀྱི་ལུང་མདོ་སྦས་མཁན་པ་རྫོང་གི་གནས་སྒོ་མཁའ་འགྲོ་ཞ་མི་ལྷ་ཁང་འདབས་སུ་རིག་པ་འཛིན་པ་ཚེ་དབང་ནོར་བུས་རང་གི་མོས་པས་སྨྲས་པའི་ཡིག་རིགས་དགེ་སློང་གཡུ་རུང་ངོ་། །སརྦ་མངྒ་ལཾ།

ནཱ་རོ་ཆོས་དྲུག་ཟབ་ཁྲིད་སྒམ་པོ་གདན་རབས་ནས་བརྒྱུད་པ་ཐུན་མོང་མ་ཡིན་པའི་བརྒྱུད་འདེབས་བྱིན་རླབས་མྱུར་འབེབས།

༈ ནཱ་རོ་ཆོས་དྲུག་ཟབ་ཁྲིད་སྒམ་པོ་གདན་རབས་ནས་བརྒྱུད་པ་ཐུན་མོང་མ་ཡིན་པའི་བརྒྱུད་འདེབས་བྱིན་རླབས་མྱུར་འབེབས་ཞེས་བྱ་བ་བཞུགས་སོ། །

རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས། །ལྷན་གཅིག་སྐྱེས་སྦྱོར་རྡོ་རྗེ་རྣལ་འབྱོར་མ། །གསོལ་བ་འདེབས་སོ་ཐབས་ལམ་སྔོན་དུ་གྱུར། །ཟུང་འཇུག་ཡེ་ཤེས་སྐུ་ཐོབ་བྱིན་གྱིས་རློབས། །རྒྱལ་བའི་སྲས་པོ་གྲུབ་ཆེན་ཏེ་ལོ་པ། །གནས་ལྔ་རིག་པའི་རྣལ་འབྱོར་ནཱ་རོ་པ། །གསོལ་བ་འདེབས་སོ༴ ཟུང་འཇུག་ཡེ་ཤེས༴ རྒྱུད་སྡེ་བཞི་བརྙེས་ལོ་ཙཱ་ཆོས་བློ་གྲོས། །ཡེ་ཤེས་སྒྱུ་མའི་སྐུ་བརྙེས་བཞད་རྡོ་རྗེ། །གསོལ་བ་འདེབས་སོ༴ ཟུང་འཇུག་ཡེ་ཤེས༴ པད་འབྱུང་ཐུགས་སྤྲུལ་མྱང་སྨད་ལྷ་རྗེའི་ཞབས། །རྒྱུད་མཐིལ་ས་བརྙེས་དྭགས་བསྒོམ་ཚུལ་ཁྲིམས་སྙིང་། །གསོལ་བ་འདེབས་སོ༴ ཟུང་འཇུག༴ འོད་གསལ་དཀྱིལ་འཁོར་མངོན་བརྙེས་བྱང་ཆུབ་གྲུབ། །བསླབ་གསུམ་དྲི་མེད་མཁའ་ཆེན་བྱེ་དཀར་བ། །གསོལ་བ་འདེབས་སོ༴ ཟུང་འཇུག༴ རྟོགས་པའི་དབང་ཕྱུག་སྙིབ་པ་སྒོམ་ཆེན་པ། །ཆོས་ཀྱི་རྒྱལ་པོ་འབྲི་གུང་གླིང་པ་མཆེད། །གསོལ་བ་འདེབས་སོ༴ ཟུང་འཇུགས༴ སྒྲུབ་རྒྱུད་འཛིན་མཁས་དཔལ་ལྡན་ལྷ་ལུང་པ། །ངེས་དོན་རྟོགས་པ་ལྷ་སའི་བཙུན་པ་ཆེ། །གསོལ་བ་འདེབས་སོ༴ ཟུང་འཇུག༴ གནས་ལུགས་མངོན་གྱུར་ཇོ་སྲས་རྡོ་རྗེ་བློ། །མཚུངས་མེད་བླ་མ་ཆོས་ཀྱི་རྒྱལ་བའི་མཚན། །གསོལ་བ་འདེབས་སོ༴ ཟུང་འཇུག༴ ཆོས་ཀྱི་སྤྱན་ལྡན་སྨྲ་བའི་སེངྒེ་པ། །ཆོས་ཀྱི་དབང་ཕྱུག་འགྲོ་བའི་བླ་མ་ཆེ། །གསོལ་བ་འདེབས་སོ༴ ཟུང་འཇུག༴ མཁས་བཙུན་བཟང་ལྡན་རྒྱལ་མཚན་དཔལ་བཟང་པོ། །སྤྱན་སྔ་ཆོས་རྒྱལ་བསོད་ནམས་རྒྱ་མཚོའི་སྡེ། །གསོལ་བ་འདེབས་སོ༴ ཟུང་འཇུག༴ གཉུག་མའི་དོན་གཟིགས་བསོད་ནམས་ལྷུན་གྲུབ་པ། །སྒམ་པོའི་སེང་ཁྲི་བསྲུང་མཛད་མཆོག་རྣམས་ལ། །གསོལ་བ༴ ཟུང་འཇུག༴ གཞལ་མེད་མཁས་གྱུར་དྭགས་པོ་པཎྜི་ཏ། །འོད་གསལ་རྡོ་རྗེ་ཐུགས་ལྡན་མངྒ་ལ། །གསོལ་བ༴ ཟུང་འཇུག༴ སྒྲུབ་པའི་སྐྱེས་མཆོག་དམ་པ་པུཎྱེའི་མཚན། །མཆོག་གི་སྤྲུལ་སྐུ་ནོར་བུ་རྒྱན་པའི་ཞབས། །གསོལ་བ༴ ཟུང་འཇུག༴ མཁས་ཤིང་གྲུབ་པ་སྤྱན་སྔ་རིན་རྡོར་བ།།འདྲེན་མཆོག་རྒྱལ་དབང་བཟང་པོ་རྡོ་རྗེ་དཔལ།། གསོལ་བ༴ ཟུང་འཇུག༴ སྦས་པའི་སངས་རྒྱས་འོད་གསལ་དབང་པོའི་ཞབས། །རིམ་གཉིས་དྲོད་བརྙེས་ཚེ་དབང་དཔལ་ནོར་བུ། །གསོལ་བ༴ ཟུང་འཇུག༴ བཀའ་དྲིན་མཚུངས་མེད་རྩ་བའི་བླ་མ་སོགས། །ཐབས་ལམ་ཆོས་དྲུག་བརྒྱུད་པའི་བླ་མ་ལྷར། །རྩེ་གཅིག་གསོལ་བ་བཏབ་པའི་བྱིན་རླབས་མཐུས། །སྲོག་རྩོལ་རླུང་ཀུན་དྷུ་ཏིར་ཞུགས་གནས་ཐིམ། །འབར་འཛག་དུཿཁ་ཉོན་དག་བདེ་བ་བརྙེས། །ཡས་བབས་མས་བརྟེན་དགའ་བ་ཡོངས་སུ་རྫོགས། །བསམ་གྱིས་མི་ཁྱབ་རྡོ་རྗེའི་སྐུ་ཐོབ་ཤོག །ཙཎྜ་ལི་ཡི་ཕུང་ཁམས་འོད་སྐུར་སྨིན། །སྒྱུ་མའི་བློ་ཡིས་དངོས་པོར་འཛིན་པ་ཞིག །འཁྲུལ་པའི་རྨི་ལམ་ངོ་ཤེས་རང་སར་གྲོལ། །འོད་གསལ་འཁོར་ཡུག་ལྟ་བའི་གདེངས་ཐོབ་ཤོག །བར་དོ་ཟུང་འཇུག་ཕྱག་རྒྱ་ཆེན་པོ་ཐོབ། །འཕོ་བས་བཙན་ཐབས་སངས་རྒྱས་ས་བརྙེས་ཤིང་། །མདོར་ན་སྲིད་ཞིའི་ལས་གྲོལ་དེ་བཞིན་གཤེགས། །རྡོ་རྗེ་སེམས་དཔའི་གོ་འཕང་མྱུར་ཐོབ་ཤོག །ཚེ་རབས་ཀུན་ཏུ་བླ་མེད་སྔགས་ལམ་འཕྲད། །དབང་ཐོབ་དེ་ཡི་སྡོམ་པ་ཉམས་མེད་ཅིང་། །མ་ནོར་དཔེ་དོན་ཡེ་ཤེས་མངོན་དུ་གྱུར། །ཚོམ་བུ་སྤྲུལ་པས་འགྲོ་ཀུན་དོན་བྱེད་ཤོག །

དེ་ལྟར་སྒམ་པོ་གདན་རབས་ནས་བརྒྱུད་པའི་ཆོས་དྲུག་གི་ཡིག་ཆ་རྗེ་བཙུན་གྲུབ་པའི་དབང་ཕྱུག་པཎྜི་ཏ་བཀྲ་ཤིས་རྣམ་རྒྱལ་གྱིས་མཛད་པ་དེ་ཉིད་ཤིན་ཏུ་ལེགས་པར་སྣང་བས་དེའི་ཁྲིད་ཀྱི་བརྒྱུད་འདེབས་སུ་མངའ་རིས་དོམ་པོའི་བླ་མ་རྡོ་རྗེ་འཛིན་པ་ཆེན་པོ་ཨོ་རྒྱན་རྒྱལ་མཚན་དཔལ་བཟང་པོའི་ཞལ་སྔ་ནས་བཞེད་ལྟར་མདོ་ཁམས་སུ་སྐྱེས་ཤིང་སྔགས་ལ་བློ་སྦྱངས་པའི་རྣལ་འབྱོར་ཚེ་དབང་ནོར་བུས་གློ་བོ་སྨོན་ཐང་གི་རྒྱལ་པོའི་ཁབ་ཏུ་ལྕགས་ཁྱི་རྒྱལ་ཟླ་ཚེས་པའི་སྔ་ཆར་སྨྲས་པ་དགེའོ། །

ཚེ་སྒྲུབ་སྤྱི་ཡི་ཁ་སྐོངས་གསོལ་འདེབས་འཆི་མེད་བུམ་བཟང་།

༈ ཚེ་སྒྲུབ་སྤྱི་ཡི་ཁ་སྐོངས་གསོལ་འདེབས་འཆི་མེད་བུམ་བཟང་བཞུགས་སོ། །

ཧྲཱི༔ ཚེ་བདག་རྒྱལ་བ་མགོན་པོ་འོད་དཔག་མེད། །ཚེ་ལྷ་སྤྲུལ་པའི་སྙིང་རྗེ་སྤྱན་རས་གཟིགས། །ཚེ་དབང་གྲུབ་པའི་རིག་འཛིན་པད་མ་འབྱུང་། །ཚེ་ཡི་མངའ་བདག་མཆོག་ལ་གསོལ་བ་འདེབས། །ཚེ་ཡི་ལྷ་མོ་གོས་དཀར་མན་དྷ་ར། །ཚེ་བདག་རྒྱལ་མོ་བདེ་ཆེན་མཐིང་འོད་འབར། །ཚེ་མཆོག་འོད་གསལ་གྲུབ་དཔལ་རྗེ་འབངས་སོགས། །ཚེ་ལམ་རིག་སྒྲུབ་རྣམས་ལ་གསོལ་བ་འདེབས། །ཚེ་ཡི་གཏེར་སྟོན་རིག་འཛིན་དབང་ཕྱུག་རྗེ། །ཚེ་ཆོས་བདག་པོ་བཀའ་བབ་རྒྱུད་འཛིན་དང་། །ཚེ་ཡི་དབང་བསྐུར་བྱིན་རླབས་རྩ་བ་ཡིས། །ཚེ་ཡི་བླ་བརྒྱུད་རྣམས་ལ་གསོལ་བ་འདེབས། །ཚེ་ཡི་ཡི་དམ་རིགས་ལྔ་ཡབ་ཡུམ་དང་། །ཚེ་བདག་འགྱོགས་མ་སྒོ་མ་བཞི་ལ་སོགས། །ཚེ་བསྲུངས་རྒྱལ་ཆེན་ལོ་ཟླ་ཞག་དུས་ལྷ། །ཚེ་ཡི་དཀྱིལ་འཁོར་རྣམས་ལ་གསོལ་བ་འདེབས། །ཚེ་དཀྱིལ་བརྒྱུད་པར་དེ་ལྟར་གསོལ་བཏབ་མཐུས། །ཚེ་འདིར་ཚེ་རིང་དཔལ་རྒྱས་བསོད་ནམས་འཕེལ། །ཚེ་དབང་རིག་འཛིན་ས་ལ་འཁོད་གྱུར་ནས། །ཚེ་དཔག་མེད་མགོན་གོ་འཕང་མྱུར་ཐོབ་ཤོག །ཚེ་ལྷ་རིག་འཛིན་རྣམས་ལ་གསོལ་བཏབ་པ། །ཚེ་སྒྲུབ་གང་ལ་སྦྱར་ཀྱང་རུང་བ་འདིར། །ཚེའི་རིག་འཛིན་པའི་དུས་ཆེན་ཚེས་བཅུ་ལ། །ཚེ་དབང་ནོར་བུས་གང་དྲན་ཤར་གྱིས་བྲིས། །རང་ལོ་བཅུ་བདུན་སྐབས་སུ་བྲིས་པ་དགེའོ། །དགེའོ། །དགེའོ། །

བརྡ་སྤྲོད་པ་དབྱངས་ཅན་མདོ་གཞུང་སྟོན་བྱེད་བླ་མ་བརྒྱུད་པར་གསོལ་འདེབས་དབྱངས་ཅན་དགྱེས་པའི་སྙན་གླུ།

༈ བརྡ་སྤྲོད་པ་དབྱངས་ཅན་མདོ་གཞུང་སྟོན་བྱེད་བླ་མ་བརྒྱུད་པར་གསོལ་འདེབས་དབྱངས་ཅན་དགྱེས་པའི་སྙན་གླུ་ཞེས་བྱ་བ་བཞུགས་སོ། །

ན་མཿསྭ་ར་སྭ་སྟི་ཡེ། ཆོས་དབྱིངས་ཁམས་ལ་རྟག་པར་གནས་གཡོ་འགྲོ་འོང་ལས་འདས་པ། །སྣང་སྲིད་ཀུན་གྱི་མགོན་བཅུད་དྭངས་མ་ཟབ་གསལ་མི་འགྱུར་སྐུ། །ཀུན་ཁྱབ་བདེ་ཆེན་རང་བཞིན་གདོད་ནས་རྣམ་དག་ཡེ་ཤེས་ངང་། །དེ་བཞིན་གཤེགས་པ་ཀུན་གྱི་ངང་ཚུལ་བདག་ཉིད་ཆེ་ལ་འདུད། ། ༡ མ་སྐྱེས་མི་འགག་མཁའ་ཁྱབ་སྤྲོས་བྲལ་ཉིད་ལ་རྟག་བཞུགས་ཤིང་། །བྲལ་ཞིང་སྨིན་པའི་ཡོན་ཏན་ཡོངས་རྫོགས་ཆུབ་པའི་མཐར་ཐུག་དཔལ། །གདུལ་བྱའི་དོན་ལ་རྒྱུན་ཆད་མེད་པ་རྒྱ་ཆེན་རྒྱལ་བའི་དབང་། །གོ་ཏམ་ཟས་གཙང་སྲས་པོ་ལྷ་ཡི་ལྷ་ལ་ཕྱག་འཚལ་ལོ། ། ༢ རྒྱལ་བ་ཀུན་གྱི་བསྐྱེད་བཞི་མ་མ་འོད་གསལ་བདེ་གཤེགས་སྙིང་། །དྲི་མ་ཡོངས་བྲལ་ཤེས་རབ་ཕ་རོལ་ཕྱིན་མ་བཅོམ་ལྡན་འདས། །མི་འགྱུར་བདེ་བ་འདྲེན་པའི་དཔལ་མོ་མཚོ་བྱུང་དབྱངས་ཅན་མ། །ལེགས་བཤད་རྒྱ་མཚོའི་འབྱུང་གནས་རྒྱུད་མང་འཛིན་ལ་ཕྱག་འཚལ་ལོ། ། ༣ རིག་གནས་བཅོ་བརྒྱད་མཁྱེན་པའི་ཕུལ་བྱུང་གཙང་མའི་མཆོག་དམ་པ། །ཕྱི་ནང་གཞུང་ལུགས་ཁོང་ཆུད་འཕགས་མ་བསྙེན་པ་ལྷོད་མིན་པ། །སྒྲིབ་སྦྱངས་སྨོན་ལམ་སྟོབས་ཀྱིས་བཅོན་ལྡན་མའི་ཞལ་མཇལ་ནས། །གསུང་གི་སྣང་བ་ལེགས་ཐོབ་རྗེས་སྦྱོར་ཞབས་ལ་ཕྱག་འཚལ་ལོ། ། ༤ གང་གི་རྗེས་འབྲང་དབྱངས་ཅན་བརྡ་སྤྲོད་གཞུང་ལ་ལེགས་སྦྱངས་ཤིང་། །ལེགས་པར་སྦྱར་བའི་སྐད་ཀྱི་འགྲོ་བློའི་མུན་སེལ་ཉི་མ་མཆོག །གནས་ལྔ་རིག་པའི་དབང་པོ་བློ་གྲོས་རྒྱུད་མང་མགྲིན་པའི་དབྱངས། །སྒྲོགས་མཁས་འཕགས་པའི་ཡུལ་བྱོན་བརྒྱུད་པའི་བླ་མར་ཕྱག་འཚལ་ལོ། ། ༥ འཕགས་ཡུལ་ས་ཡི་ཐིག་ལེ་ཝ་ར་ན་སིར་བྲམ་ཟེའི་རིགས། །སྐུར་འཁྲུངས་བྱེ་བྲག་པ་དང་རིག་ཅན་རིག་བྱེད་མཐའ་པའི་གཞུང་། །སྦྱངས་པ་ཆེ་ཐོབ་གྲུབ་འབྲས་ལེགས་སྦྱར་སྐད་མཁས་བྲམ་ཟེའི་གཙོ། །ལྔ་རིག་ཁྱུ་མཆོག་ཀྲིཥྞར་གྲགས་པ་དེ་ལ་ཕྱག་འཚལ་ལོ། ། ༦ འཕགས་ཡུལ་ནུབ་ཕྱོགས་ཀུ་རུ་ཀྵེ་ཏྲའི་གྲོང་ཁྱེར་ཆེན་པོ་རུ། །གནས་ལྔ་རིག་པ་ཆེན་པོ་གཅན་གྱུར་སྟོབས་བཟང་པོ་ཞེས་དང་། །གཅུང་གྱུར་པཎྜི་ཏ་གོ་ཀུ་ལ་ནཱ་ཐ་མི་ཤྲ། །བྲམ་ཟེའི་རིགས་འཁྲུངས་མཆེད་གྱུར་དམ་པ་དེ་ལ་ཕྱག་འཚལ་ལོ། ། ༧ བརྡ་སྤྲོད་དབྱངས་ཅན་གངས་རི་ཁྲོད་འདིར་གསར་འདྲེན་ཤིང་རྟ་མཆོག །སྤྱོད་འཆང་ནག་པོ་ལེགས་བཤད་སེང་གེའི་ང་རོ་སྒྲོགས་ཕྱིར་དུ། །བསམ་བཞིན་སྐྱེ་བཞེད་མཁས་ལ་མཁས་པའི་མཆོག་ཆེན་དཔེ་མེད་པ། །སྒྲོལ་བའི་མགོན་ཞེས་ཀུན་དགའ་སྙིང་པོ་དེ་ལ་ཕྱག་འཚལ་ལོ། ། ༨ མ་ཧཱ་ཙི་ནི་ཡུལ་ནས་ལེགས་བྱོན་ཁམས་པ་ཨ་སེ་ཞེས། །སྔ་འགྱུར་གྲུབ་དེའི་གདུང་རིགས་གནས་ལྔ་རིག་པའི་མཁས་པ་ནི། །འདར་པ་ངག་དབང་ཕུན་ཚོགས་ལྷུན་གྲུབ་བརྡ་སྤྲོད་དབྱངས་ཅན་མདོ། །སྟོབས་བཟང་མཆེད་པོས་སླར་གྱུར་སྤེལ་རྒྱས་མཛད་པ་ཕྱག་འཚལ་ལོ། ། ༩ བརྡ་སྤྲོ་ཀུན་གྱི་མཆོག་གྱུར་དེ་བཞིན་གཤེགས་པའི་རྡོ་རྗེའི་གསུང་། །དབྱངས་ཅན་མདོ་གཞུང་དགོངས་འགྲེལ་ལེགས་བཤད་མདོ་འདིར་བཞུགས་ཀུན་གྱི། །བསྡུ་བ་དཔེར་གྱུར་ཞུས་ཆེན་འཇིག་རྟེན་མིག་གྱུར་གཅིག་པུ་བ། །དགེ་མཛད་དཔལ་བོ་མི་ཡི་གཟུགས་སྤྲུལ་མི་ཕམ་ཆོས་རྒྱལ་ཞེས། ། ༡༠ མངོན་པར་མཐོ་དང་ངེས་ལེགས་དུ་མས་ཡོངས་བརྒྱན་རྒྱལ་ཚབ་སྐུར། །སྒྲུབ་བརྒྱུད་བསྟན་པའི་སྲོག་ཤིང་སྐྱེས་མཆོག་སྐྱེ་བ་འཕྲེང་བ་ནི། །མཚར་དངར་རྟག་འཆར་ངུར་སྨྲིག་གོས་འཆང་ཁྲོ་བུ་པཎྜི་ཏ། །ངག་དབང་བསྟན་འཛིན་དབང་པོ་གང་གི་ཞབས་ལ་ཕྱག་འཚལ་ལོ། ། ༡༡ སྐྱེ་བ་ཀུན་ཏུ་དམ་པས་རྗེས་གཟུང་སྐྱེ་བ་ཉིད་ཀྱི་དང་། །སྦྱངས་སྙིང་སྟོབས་མཆོག་གི་མཁས་པའི་ཞལ་ལུང་ཀུན་འཐུང་པས། །དབྱངས་ཅན་ཆ་བསགས་ཟླ་བའི་ཀུན་མུཏ་པ་ནའི་བརྡ་སྤྲོད་ཆེ། །སྡེབ་སྦྱོར་སྙན་ངག་མངོན་བརྗོད་སྐར་རྩིས་གཡུལ་ལས་རྒྱལ་བ་སོགས། ། ༡༢ རིག་གནས་རྒྱ་མཚོའི་མཐར་སོན་དེང་དུས་བསིལ་ལྗོངས་ར་བ་འདིར། །དཔེ་ཟླ་བྲལ་བའི་མཁས་མཆོག་ལེགས་བཤད་སྨྲ་དབང་བསླབ་གསུམ་འཛིན། །མ་ཧཱ་ལོ་ཙཱ་ངག་དབང་བློ་བཟང་བཀྲ་ཤིས་རྣམ་རྒྱལ་ཞེས། །འཇིག་རྟེན་མིག་གཅིག་གང་གི་ཞབས་ལ་གུས་ཕྱག་འཚལ་ལོ། ། ༡༣ རིག་པའི་གནས་ཆེན་བཞི་ལས་སཾ་སྐྲྀ་ཏ་ཡི་སྐད་གྱུར་པ། །མ་རྨོངས་དོན་སྟོན་བརྡ་སྤྲོད་ཀུན་གྱིས་འཇུག་སྒོ་མཆོག་གྱུར་ནི། །དབྱངས་ཅན་མདོ་དོན་མ་ནོར་འཁྲུལ་མེད་དོན་མཛད་མཁས་གྱུར་པ། །རྩ་བའི་བླ་མའི་ཞབས་ལ་རབ་དྭངས་གུས་པས་ཕྱག་འཚལ་ལོ། ། ༡༤ དེ་ལྟར་བརྡ་སྤྲོད་དབྱངས་ཅན་མདོ་སྟོན་རྩ་བརྒྱུད་བླ་མ་ལ། །ཕྱག་འཚལ་མཆོད་འབུལ་གསོལ་བཏབ་དགེ་ཚོགས་བྱང་ཆེན་རྒྱུར་བསྔོ་ཞིང་། །ལྷ་ལས་ཕུལ་བྱང་ཡང་དག་སངས་རྒྱས་བསྟན་པ་རྒྱས་སླད་དུ། །གཞན་གྱིས་རྒོལ་འཇོམས་རིག་པ་འདིར་སྦྱངས་ལྷག་བསམ་བསོད་ནམས་ཀྱིས། ། ༡༥ བདེན་འབྲས་ནམ་ཡང་བསླུ་མེད་མཆོག་གི་དུས་འདི་ནས། །ཇི་སྲིད་ཀུན་མཁྱེན་རྒྱལ་བའི་གོ་འཕང་མཆོག་ལ་འཁོད་ཀྱི་བར། །སྐྱེ་ཞིང་སྐྱེ་བ་ཀུན་ཏུ་རིགས་བཟང་མཚན་ལེགས་ལུས་ཐོབ་ཅིང་། །སྐྱེ་འཕྲལ་སྨྲ་ཤེས་འགྲོ་ཤེས་སྔོན་གནས་མ་ལུས་རྗེས་དྲན་ཤོག ། ༡༦ ཀུན་ཏུ་བཟང་མོ་དབྱངས་ཅན་ལྷ་མོའི་ཞལ་ལུང་བརྡ་སྤྲོད་མདོ། །བརྡ་ཆད་དབྱངས་དང་རང་བཞིན་གསལ་བྱེད་རྣམ་བཅད་མཚམས་སྦྱོར་ལྔ། །རྣམ་དབྱེ་གཉིས་ཀྱི་ཐོག་མ་པི་སོགས་གྲགས་གྱུར་ཉི་ཤུ་བཞི། །རྐྱེན་བྱིན་ཕོ་མོ་མ་ནོར་རྟགས་ཅན་དབྱངས་ཀྱི་མཐའ་ལས་སྐྱེས། ། ༡༧ དེ་བཞིན་གསལ་བྱེད་ཧ་སའི་མཐའ་ཅན་ཕོ་མོ་མ་ནིང་རྟགས་གྱུར་དང་། །ཟུར་བཀོལ་རྣམ་འགྱུར་མི་ཟད་སྡེ་རིགས་བུད་མེད་རྐྱེན་འཇུག་དང་། །དབྱེ་ཅན་ཞེས་གྲགས་རྒྱ་ཆེའི་དོན་ལ་རྣམ་དབྱེ་འཇུག་པའི་ཚུལ། །ཚིགས་སུ་དེ་ཕན་དེ་ཀུན་ཚེགས་མེད་སྐད་ཅིག་ཉིད་རྟོགས་ཤོག ། ༡༨ རྣམ་པ་གཉིས་པ་ཏེ་སོགས་རྣམ་གྲངས་བརྒྱ་དང་བརྒྱད་ཅུ་ཡིས། །འཇིག་པས་སྒྲ་ཡིས་རྣམ་གྲངས་མཐའ་ཀླས་སྟོན་དང་དེ་བཞིན་ཀྲྀཏ། །བྱིངས་མའི་སྒྲུབ་སོགས་སྐད་ཅིག་གི་ཤེས་དེ་བཞིན་གཞུང་ལུགས་ཆེ། །ཀུན་ཀྱང་ཐོགས་མེད་བདེ་བླག་ཉིད་དུ་ཁོང་ཆུད་བྱན་ཆུད་པས། ། ༡༩ སྒྲ་མདོ་དངོས་ཟིན་སྤྱི་མིག་ཤུགས་བསྟན་དོན་དང་དེ་ལས་གཞན། །འཇིག་རྟེན་མཁས་བཤད་ངེས་ཚིག་རིག་བྱེད་གསང་ཚིག་སྟེ། །བསྒྲུབ་ཚུལ་རྣམ་བཞི་ཕུལ་བྱུང་སྦྱོར་བཞི་ཆོ་ག་རྣམ་ལྔ་སོགས། །འཇིག་རྟེན་གྲུབ་ཀུན་གཞན་དྲིང་མི་འཇོག་རང་བྱུང་ཉིད་དུ་ཀུན་ཤེས་ཤོག ། ༢༠ མདོར་ན་བདག་ནི་ཚེ་རབས་ཚེ་རྒྱུད་ཇི་སྲིད་ཀུན། །ངག་དབང་ལྷ་མོས་དབང་སྐུར་སྒྲ་སྙན་སྡེབ་སྦྱོར་ཟློས་གར་རྩིས། །མ་ནོར་འཁྲུལ་མེད་ནོར་བུ་དྲི་མེད་ལྟ་བུའི་ཤེས་བྱའི་གནས་དེ་ཀུན། །མིང་ཙམ་རྣ་བའི་བུ་གར་ཐོས་དེ་བུདྷ་ཉིད་གྱུར་ནས། ། ༢༡ གཞན་གོལ་ཀུན་བཅོམ་རང་ལུགས་སྐྱོན་མེད་འཇོག་མཁས་ངག་གི་དབང་། །དབྱངས་ཅན་མགྲིན་པར་རྟག་ཞུགས་རྣམ་དཔྱོད་ལང་ཚོར་སུ་ཡིས་ཀྱང་། །སྡོ་མིན་མི་བརྗེད་གཟུངས་དང་སྤོབས་པ་མཐའ་ཀླས་གྲུབ་པའི་མཐུ། །རྡོ་རྗེ་ཕ་ལམ་ཇི་བཞིན་བདག་བློས་གཞན་དཔྱོད་ཀུན་བཅོམ་ཤོག ། ༢༢ དེ་ལྟར་ཡི་ནི་སྲིད་པ་ཀུན་ནས་མཚུངས་མེད་འགྲོ་འདྲེན་མཆོག །སངས་རྒྱས་བསྟན་ལ་བྱ་བ་རྟག་པར་ངལ་མེད་འཆད་རྩོད་རྩོམ། །བརྩོན་པས་རྒྱལ་བའི་བསྟན་པ་མཉམ་མེད་གོང་འཕེལ་ཕྱོགས་མཐའ་གྲུར། །སྤེལ་བའི་བྱེད་པོ་བདག་ཉིད་རྟག་པ་ཉིད་དུ་འགྲུབ་གྱུར་ཅིག ། ༢༣

ཅེས་བརྡ་སྤྲོད་པ་དབྱངས་ཅན་མདོ་གཞུང་མན་ངག་གི་བརྒྱུད་པའི་བླ་མར་གསོལ་བ་བཏབ་པ་དབྱངས་ཅན་དགྱེས་པའི་སྙན་གླུ་ཞེས་བྱ་བ་འདི་ནི་དེང་དུས་གངས་ཅན་བོད་ཡུལ་གྱི་རིག་གནས་པ་མཐའ་དག་གི་གཙུག་གི་ནོར་བུ་གཅིག་པུ་འཇིག་རྟེན་མིག་གཅིག་ངག་དབང་བཀྲ་ཤིས་རྣམ་རྒྱལ་ཞབས་ཀྱི་བཀའ་དྲིན་ལ་བརྟེན་ནས་བརྡ་སྤྲོད་གཙུག་ལག་དབྱངས་ཅན་མདོ་ལ་ཅུང་ཟད་སྦྱངས་པའི་མིང་དུ། ངག་དབང་དབྱངས་ཅན་གྲུབ་པའི་རྡོ་རྗེ་བཞེད་དང་ཕྱོགས་ཀུན་ཏུ་གྲགས་པའི་མིང་མ་སྦས་པའི་རིག་འཛིན་ཚེ་དབང་ནོར་བུ་འཇམ་དབྱངས་རྒྱ་མཚོའམ་པདྨ་ཐེག་མཆོག་བསྟན་པའི་གསལ་བྱེད་ངེས་སང་གྲུབ་པའི་ཤིང་རྟ་ཕྱོགས་ལས་རྣམ་རྒྱལ་དབང་པོའི་སྡེ་ཞེས་པ་རང་ཉིད་བརྡ་སྤྲོད་ཀྱི་མིང་སྟོན་དུ་ཆུ་སྟོད་ཟླ་བའི་ཚེས་བཅུ་གསུམ་སེང་གེའི་དུས་སྦྱོར་སྐབས་སུ་སྨྲས་པ་སྟེ་ཡི་གེ་པ་ནི་དམ་པའི་གདུང་རིགས་པདྨ་ཀུན་དགའ་བཀྲ་ཤིས་རབ་བརྟན་ལེགས་པའི་དཔལ་དེས་སོ། །དགེའོ། །དགེའོ། །བཀྲ་ཤིས།

བརྒྱུད་པའི་བླ་མ་རྣམས་ལ་གསོལ་བ་འདེབས་པ་རབ་ཏུ་དགའ་བའི་ཏམྦུ་ར།

༈ ཨོཾ་སྭཱསྟི། སྙན་ངག་གི་བརྒྱུད་པའི་བླ་མ་རྣམས་ལ་གསོལ་བ་འདེབས་པ་རབ་ཏུ་དགའ་བའི་ཏམྦུ་ར་ཞེས་བྱ་བ་བཅོམ་ལྡན་འདས་འཕགས་མ་དབྱངས་ཅན་མ་ཕྱག་འཚལ་ལོ། །

མཁའ་ཁྱབ་གསུང་གསུམ་དཔལ་འབར་དྲི་མེད་ཡེ་ཤེས་ཕུང་པོ་ཅན། །འགྲོ་ལ་བདུད་རྩི་ཉེར་རྩོལ་མཚན་དཔེ་མཆོག་ཏུ་གསལ་བའི་སྐུ། །སྲིད་ཞི་ལས་འདས་ཕུན་ཚོགས་དཔལ་རྣམས་མ་ལུས་འབྱུང་བའི་གནས། །ཚོགས་གཉིས་རྒྱུན་སྩོལ་ལྷུང་བཟེད་འཛིན་གྱུར་དེར་ཕྱག་འཚལ་འདུད། །སྟོབས་དང་མི་འཇིགས་མ་འདྲེས་ཆོས་རྣམས་ཡོངས་སུ་རྫོགས་གྱུར་ཅིང་། །འཇིགས་པ་མེད་པའི་ངག་ལྡན་ཀུན་ལ་ཕན་བདེ་འབའ་ཞིག་སྦྱིན། །ལྷར་བཅས་སྐྱེ་དགུའི་ཚོགས་ཞིང་ངུར་སྨྲིག་རྒྱལ་མཚན་འཆང་བ་པོ། །རང་བྱུང་སངས་རྒྱས་ཐུབ་དབང་འཇིག་རྟེན་མགོན་དེར་ཕྱག་འཚལ་འདུད། །མཁའ་ལྟར་ཡངས་པའི་སྤྱན་གྱི་མཁའ་མཉམ་འགྲོ་ལ་བརྩེ་བས་གཟིགས། །སྟོན་ཟླ་བྱེ་བའི་ཁ་དོག་ལ་ཁུ་མཆོག་ཏུ་དཀར་བའི་སྐུ། །ཚད་གདུང་སེལ་བ་བསིལ་ཟེར་ཇི་བཞིན་ཁམས་གསུམ་སྡུག་བསྔལ་གཞིལ། །རྫོགས་སངས་རྒྱས་པ་ཇི་འདྲ་སྤྱན་རས་གཟིགས་དེར་ཕྱག་འཚལ་འདུད། །འཕགས་ཚེམས་གཡས་འཁྱིལ་ཤར་རིའི་ཕྲག་ནས་ཉེར་འཕོས་སྒྲ་དབྱངས་ཀྱི། །ལྷ་མོ་ཟླ་བའི་དཀྱིལ་འཁོར་རབ་མཛེས་དཔེ་ཟླ་གཞན་མེད་པ། །ཚངས་པའི་དབྱངས་ཀུན་གཅིག་ཏུ་བསྡུས་པའི་རྒྱུད་མངས་ཕྱག་ན་བསྣམས། །ཤེས་རབ་ཕར་ཕྱིན་ངོ་བོ་དབྱངས་ཅན་ལྷ་མོར་ཕྱག་འཚལ་འདུད། །རྒྱུ་འོ་སྲིད་གསུམ་ཀུན་ཏུ་སྲོག་གྱུར་རླུང་གི་གཡོ་བ་སྟེ། །ཡིད་བཞིན་ནོར་བུ་མཆོག་གི་འགྲོ་བའི་དབུལ་ཕོངས་མཐའ་དག་སེལ། །ཁྱོད་རབ་སྙན་པའི་གྲགས་དཀར་འཛིན་མའི་ཁྱོན་གང་ངག་དབུལ་སེལ། །སྙན་ཚིག་ནོར་བུའི་དགའ་སྟོན་དགྱེས་མཁས་པཎྜིར་ཕྱག་འཚལ་འདུད། །བསྐོར་བའི་རྒྱན་མི་ཤེས་རྨོངས་པའི་ཚོགས་རྣམས་གཞན་དུ་སོང་ནས་ཤེས་རབ་འཕེལ། །བརྗེད་ངེས་ཡོངས་སུ་སྤོབས་པས་གཟུངས་མཆོག་ངག་གི་དབང་ཕྱུག་གྲུབ། །སོ་སྐྱེའི་སྤྱོད་པ་ལས་འདས་རབ་མཆོག་གྲུབ་པའི་དབང་པོར་གྱུར། །འཇིགས་མེད་སློབ་དཔོན་ངག་དབང་ཤཱི་ལ་ཀཏྟིར་ཕྱག་འཚལ་འདུད། །ཐེ་ཚོམ་འགོག་རྒྱན་སྡེབ་སྦྱོར་སྙན་ལེགས་མཛེས་པའི་ཚིག་ནི་འབབ་སྟེགས་དཀྲོལ་ལའང་ཅི། །བདག་མེད་དོན་སྟོན་ཐར་པ་མཆོག་ལ་འཇུག་འདི་གཞན་གྱི་མིན། །དེ་ཕྱིར་འཕགས་ཡུལ་པཎ་ཆེན་རརྣའི་མཚན་དང་ཕུན་ཚོགས་ལིཀྞཾ་ཀ་ར་བྱེད། །སངས་རྒྱས་གྲུབ་མཐའ་འཛིན་སྤེལ་ཡོངས་སུ་ཤེས་པས་ཕྱག་འཚལ་འདུད། །གངས་ཅན་བོད་དུ་བལྟམས་ཡང་འཕགས་ཡུལ་རྣམ་དཔྱོད་བློ་གྲོས་མཐུ། །མ་རྨད་རིག་གནས་ལྔ་ཕྲག་དག་གི་རྒྱུད་ཕྱུག་ཕྱགས་འདི་རུ། །བརྡ་སྤྲོད་སྡེབ་སྦྱོར་སྙན་ཚིག་རྒྱ་ཆེར་སྤེལ་མཛད་ལོ་ཙཱ བ། །རྡོ་རྗེ་རྒྱལ་མཚན་བློ་གྲོས་བརྟན་པ་མཆེད་པ་ཕྱག་འཚལ་འདུད། །ལག་གིས་མ་བཀུག་དབང་པོའི་གཞུ་ནི་དབྱར་གྱི་ལང་ཚོ་སྟེ། །རྨ་ཡིས་མ་མཚོན་རིག་པའི་མདའ་ཡི་གཞར་རྒོལ་ཡོངས་འབིགས་བྱེད། །གཟའ་སྐར་ཆུ་བཀྲ་རྣམ་དཔྱོད་བློ་ལ་རིག་པའི་གནས་ཀུན་གསལ། །མང་མཁར་ལོ་ཙཱ་མཆོག་ལྡན་ལེགས་པའི་བློ་དེར་ཕྱག་འཚལ་འདུད། །མུན་པའི་ཚོགས་གསལ་བླང་དོར་གནས་རྣམས་ཇི་བཞིན་སྣང་བྱེད་པར། །ཉིན་མོར་བྱེད་དང་དཔང་སྟོན་ལོ་ཙཱ་བློ་གྲོས་བརྟན་པ་དག །ཐ་དད་ཡོད་མིན་འོན་ཀྱང་ཉིན་བྱེད་བེམ་པོ་མཁའ་ལ་རྒྱུ། །ཁྱོད་ནི་ཤེས་ལྡན་རིག་དབང་ཉིད་དེ་དེ་ལ་ཕྱག་འཚལ་འདུད། །འཛིན་ཁྲི་དང་བྲལ་ཟབ་པའི་ཆུ་གཏེར་བྱང་ཆུབ་རྩེ་མོ་རྒྱས། །མཁྱེན་རབ་ཟླ་བ་སྐྱེ་བྲི་ཡོངས་སྤངས་ནམ་མཁའ་བཟང་པོའི་སྡེ། །རྩེ་མ་ཅན་སྤངས་འཁོར་བའི་སྣང་གསལ་ཐུགས་རྗེ་ཆེན་པོ་དཔལ། །གྲགས་པའི་རྒྱལ་མཚན་རབ་སྒྲེང་བླ་མ་རྣམས་ལ་ཕྱག་འཚལ་འདུད། །རིག་པའི་གནས་ཀུན་ཁུར་བླངས་བསླབ་གསུམ་རྒྱན་གྱིས་ཆེར་ཀླུབ་ཡང་། །ངལ་མེད་བདེར་སྤྱོད་འདི་ནི་སྲེད་མེད་བུ་ཡི་སྟོབས་རྙེད་དམ། །ཡིད་གཉིས་གནས་གྱུར་རྒྱལ་བསྟན་འཛིན་པའི་སྟོབས་ལྡན་ཆོས་སྐྱོང་བཟང་། །དེ་སྲས་རིན་ཆེན་བཀྲ་ཤིས་བཅས་ལ་ཕྱག་འཚལ་འདུད། །གངས་ཅན་བརྡ་དང་ལེགས་སྦྱར་སྐད་ལ་བདག་ནི་མཁས་གྱུར་ཞེས། །ལོ་ཆེན་རིག་བཟང་སྙེམ་མི་འཚལ་དེ་ཀུན་དགའ་རྒྱལ་མཚན་ཡངས། །ཕྱི་མའི་དུས་འདིར་གཤིན་རྗེ་རྣམ་རྒྱལ་དག་གི་དབང་པོ་དག །བརྡ་སྤྲོད་སྙན་ཚིག་སྨྲ་ལ་ཟླ་མེད་མཁས་དེར་ཕྱག་འཚལ་འདུད། །སྙན་པའི་རྒྱུད་མངས་མཐའ་དག་རྒྱུད་གཅིག་གིས་ཟིལ་གནོན་པ། །སྙན་ངག་གླེགས་བམ་ཀུན་ཀྱང་སྙན་ངག་གླེགས་བམ་གཅིག་གི་འགོག །དེ་ལྟའི་ངང་ཚུལ་འདི་གང་མི་བདག་ངག་དབང་འཇིགས་མེད་གྲགས། །དེ་སྲས་སྙན་ངག་མཁན་པོ་ཟླ་བཟང་ལ་ཡང་ཕྱག་འཚལ་འདུད། །གཞན་རྒོལ་འཇོམས་པ་སྤོབས་པའི་ཤེས་རབ་རལ་གྲི་འཆང་བར་འཛིན། །ཆོས་ཚུལ་མཐའ་དག་གསལ་བའི་གླེགས་བམ་ཤེས་རབ་གཟུགས་ཀྱིས་བཟུང་། །དེ་ཕྱིར་འཇམ་དཔལ་དཔའ་བོ་ཡང་ནི་ཁྱོད་དུ་བདག་བློ་འཁྲུལ། །ངག་དབང་སངས་རྒྱས་རྡོ་རྗེ་མཚན་འཆང་དེ་ལ་ཕྱག་འཚལ་འདུད། །དཔལ་མཆོག་བསྡུས་པ་རྒྱུད་དང་དེ་འབྲེལ་སྟོང་ཕྲག་བཅུ་གཉིས་པ། །མགྲིན་པར་ཡོངས་བརྒྱན་འཕགས་པས་དུས་ཞབས་དབྱེ་བ་གང་གི་ཕྱེད། །སྙན་ངག་མེ་ལོང་མེ་ལོང་གསར་བཀོད་དེ་ཚེ་པཎྜི་པུ། །དེ་འདྲ་དུས་ཞབས་པ་དང་བོད་མཁས་པ་ལ་ཕྱག་འཚལ་འདུད། །སྒྲུབ་བརྒྱུད་བསྟན་འཛིན་གཞུང་ལུགས་རྒྱ་མཚོ་སྨྲ་ལ་འཇིགས་མེད་པ། །ངག་གི་དབང་པོ་དེ་ནི་པདྨ་དཀར་པོ་ལ་ཡིན་ཏེ། །བསྟན་འཛིན་དབང་པོར་ཡོངས་དེས་སྙིགས་དུས་ཐམས་ཅད་དེ་དང་། །དེ་དང་མཚུངས་གྱུར་བཀྲ་ཤིས་རྣམ་པར་རྒྱལ་ལ་ཕྱག་འཚལ་འདུད། །དགེའོ། །

སྒྲུབ་ཐབས་གསོ་སྦྱོང་དང་འགྲེལ་པ་བརྒྱུད་པའི་བླ་མ་རྣམས་ལ་ཕྱག་འཚལ་གསོལ་འདེབས་ཚད་མེད་ཐུགས་རྗེ་རྒྱུན་འབེབས།

༈ ཐུགས་རྗེ་ཆེན་པོ་དཔལ་མོ་ལུགས་ཀྱི་སྒྲུབ་ཐབས་གསོ་སྦྱོང་དང་འགྲེལ་པ་བརྒྱུད་པའི་བླ་མ་རྣམས་ལ་ཕྱག་འཚལ་གསོལ་འདེབས་ཚད་མེད་ཐུགས་རྗེ་རྒྱུན་འབེབས་ཞེས་བྱ་བ་བཞུགས་སོ། །

ན་མོ་ལོ་ཀེ་ཤྭ་ར་ཡ། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་བླ་ན་མེད། །ཚེ་དང་ཡེ་ཤེས་དཔག་མེད་རྣམས་ངེས་པ། །གཟི་བརྗིད་རྒྱལ་པོའི་ཞབས་ལ་ཕྱག་འཚལ་ལོ། །ཤེས་བྱ་མ་ལུས་མཁྱེན་པའི་བཅོམ་ལྡན་འདས། །འགྲོ་བ་ཀུན་ལ་བུ་གཅིག་ལྟ་བུར་བརྩེ། །ལྷུན་གྲུབ་རྒྱུན་མི་ཆད་པའི་འཕྲིན་ལས་ཅན། །མགོན་པོ་སྤྱན་རས་གཟིགས་ལ་ཕྱག་འཚལ་ལོ། །ཨིཎྜ་བྷོ་དྷིས་ལུང་བསྟན་འཕགས་པ་བསྒྲུབ། །ཤིང་འཕེལ་གནས་སུ་མཆོག་གི་དངོས་གྲུབ་བརྙེས། །མཁར་ས་པཎིར་ཆོ་འཕྲུལ་ཆེན་པོ་བསྟན། །དཔལ་ལྡན་དཔལ་མོའི་ཞབས་ལ་ཕྱག་འཚལ་ལོ། །མི་བཟད་སྡུག་བསྔལ་ལམ་གྱི་གྲོགས་སུ་ཤར། །དད་པའི་སྟོབས་ཀྱི་བླ་མ་འཕགས་པར་གཟིགས། །བསྒྲུབ་ལ་བརྩོན་པས་མཆོག་གི་དངོས་གྲུབ་བརྙེས། །ཡེ་ཤེས་བཟང་པོའི་ཞབས་ལ་ཕྱག་འཚལ་ལོ། །འཇམ་དཔལ་སྨྲ་བའི་སེང་གེས་ལུང་བསྟན་ནས། །ཐུགས་རྗེ་ཆེན་པོ་སྒྲུབ་པས་དངོས་གྲུབ་བརྙེས། །གནས་ལྔ་རིག་པའི་བལ་པོ་པཎྜི་ཏ། །སེ་ཉ་པའི་ཞབས་ལ་ཕྱག་འཚལ་ལོ། །ཚོགས་གཉིས་ཟུང་གི་དཀྱིལ་འཁོར་རབ་རྫོགས་ཤིང་། །སྒྲིབ་གཉིས་གཡུལ་ལས་རྒྱལ་བའི་རྒྱལ་མཚན་ཅན། །ཐུགས་རྗེ་ཆེན་པོ་དགེ་སློང་ཚུལ་བསྟན་པའི། །བྱང་སེམས་ཟླ་རྒྱལ་ཞབས་ལ་ཕྱག་འཚལ་ལོ། །གུས་པས་བླ་མ་དམ་པ་ཉེར་བསྟེན་ཅིང་། །བསྒྲུབ་ལ་བརྩོན་པས་དངོས་གྲུབ་མཆོག་བརྙེས་ནས། །འགྲོ་ལ་བརྩེ་བས་གཞན་དོན་ལྷུར་ལེན་པའི། །གྲུབ་ཐོབ་ཉི་ཕུག་པ་ལ་ཕྱག་འཚལ་ལོ། །དད་དང་ཚུལ་ཁྲིམས་ཐོས་དང་གཏོང་བ་དང་། །ངོ་ཚ་ཤེས་དང་ཁྲེལ་ཡོད་ཤེས་རབ་སྟེ། །འཕགས་པའི་ནོར་བདུན་ལྡན་པ་འགྲོ་བའི་མགོན། །རྡོ་རྗེ་རྒྱལ་པོའི་ཞབས་ལ་ཕྱག་འཚལ་ལོ། །སྦྱིན་པས་བསྡུས་པའི་འགྲོ་ལ་ཕར་ཕྱིན་དྲུག །སྙན་པར་སྨྲ་ནས་དེ་བཞིན་བསྒྲུབ་འཇུག་ཅིང་། །བདག་ཉིད་ཕར་ཕྱིན་དྲུག་ལ་རྗེས་འཇུག་པའི། །ཞང་སྟོན་དགྲ་འཇིག་ཞབས་ལ་ཕྱག་འཚལ་ལོ། །མཐུན་པའི་ཡུལ་གནས་སྐྱེས་བུ་དམ་པ་བསྟན། །བདག་གི་ལེགས་སྨོན་སྔོན་བསགས་བསོད་ནམས་ཅན། །འཁོར་ལོ་བཞི་དང་ལྡན་པ་ཆོས་ཀྱི་རྗེ། །བདེ་བ་ཅན་པའི་ཞབས་ལ་ཕྱག་འཚལ་ལོ། །ཉེས་ལྟུང་དྲི་མའི་སྐྱོན་གྱིས་མ་གོས་ཤིང་། །གཡེལ་བ་མེད་པར་དགེ་བའི་ཆོས་ལ་བརྩོན། །རྒྱུན་ཆད་མེད་པར་འགྲོ་བའི་དོན་མཛད་པའི། །བྱང་སེམས་ཆུ་བཟང་པ་ལ་ཕྱག་འཚལ་ལོ། །དགོས་འདོན་མ་ལུས་འབྱུང་བའི་རིན་པོ་ཆེ། །གནས་ལུགས་ཇི་བཞིན་རྟོགས་པའི་ཤེས་རབ་ཅན། །ཡོན་ཏན་འབུམ་ཕྲག་དཔག་ཏུ་མེད་པའི་གཏེར། །ཆོས་རྗེ་ཤེས་རབ་འབུམ་ལ་ཕྱག་འཚལ་ལོ། །ཐོག་མེད་དུས་ནས་བྱང་ཆུབ་ཐུགས་བསྐྱེད་འབྲས། །རྫོགས་སངས་རྒྱས་ཀྱང་སྨོན་ལམ་མཐའི་གདུལ་བྱ། །འདྲེན་པའི་དེད་དཔོན་རྒྱལ་སྲས་སེམས་པའི་ཚུལ། །ཐོགས་མེད་བཟང་པོའི་ཞབས་ལ་ཕྱག་འཚལ་ལོ། །དེ་སྲས་གནོད་སེམས་འཚལ་ཚུལ་ཀུན་སྤངས་པ། །བློ་མཛོད་དམ་ཆོས་རིན་ཆེན་གྱིས་ཁེངས་ནས། །གདུལ་བྱའི་དབུལ་བ་སེལ་མཛད་སེམས་དཔའ་ཆེ། །ཆོས་ཀྱི་རིན་ཆེན་ཞབས་ལ་ཕྱག་འཚལ་ལོ། །ཡེ་ཤེས་དོན་དམ་སེམས་ཀྱི་ནམ་མཁའ་ལ། །བསོད་ནམས་ཀུན་རྫོབ་སེམས་ཀྱི་རིན་ཆེན་སྤྲིན། །གཞན་ཕན་བདུད་རྩིའི་རྒྱུན་འཛག་སེམས་དཔའ་ཆེ། །བསོད་ནམས་རིན་ཆེན་ཞབས་ལ་ཕྱག་འཚལ་ལོ། །འབྱམས་ཀླས་བསོད་ནམས་ཀླུ་དབང་ལས་བྱུང་བའི། །ཕུན་ཚོགས་བསམ་འཕེལ་རྒྱལ་མཚན་འོད་ཀྱིས་རྟོགས། །འགྲོ་བའི་རེ་འདོད་ཡོངས་སྩལ་སེམས་དཔའ་ཆེ། །བསོད་ནམས་རྒྱལ་མཚན་ཞབས་ལ་ཕྱག་འཚལ་ལོ། །ཀུན་ཏུ་རྒྱལ་བསྟན་མང་ཐོས་གླེགས་བམ་དང་། །རབ་དགའ་མཁྱེན་པའི་རལ་གྲི་ཟླ་མེད་འཛིན། །སེམས་ཀྱི་མདུད་གྲོལ་ཕྱོགས་ཀྱི་སྤྱོད་པ་སྐྱོང་། །འཇམ་མགོན་གྲོལ་མཆོག་ཞབས་ལ་ཕྱག་འཚལ་ལོ། །ཀུན་གསལ་རྣམ་དཔྱོད་གྲུ་གཟིངས་བཟང་པོ་ཡིས། །སྡེ་སྣོད་རྒྱ་མཚོར་དགའ་བས་རབ་འཇུག་ནས། །རིམ་གཉིས་ནོར་བུའི་རྒྱལ་མཚན་འཛིན་མཁས་པ། །ཀུན་དགའ་རྒྱལ་བའི་མཚན་ལ་ཕྱག་འཚལ་ལོ། །རྒྱལ་བས་ལུང་བསྟན་ཀུན་མཁྱེན་མཆོག་དགའི་གཏེར། །སྙིང་པོའི་གསལ་འབྱེད་ཟླ་མེད་ཤིང་རྟ་ཆེ། །གྲུབ་པ་བྱེ་བས་ཕྱག་བྱས་ཏེ་ཧེ་རུ་ཀ །འཇམ་མགོན་ཀུན་དགའ་སྙིང་པོར་ཕྱག་འཚལ་ལོ། །ཀུན་ནས་མཁྱེན་སྤྱོད་མ་སྨད་ཆེ་དགའ་བས། །རྗེ་བཙུན་ཡེ་ཤེས་སྐུ་ཆེན་ཐུགས་ཀྱི་བཅུད། །ངོམ་མེད་བདུད་རྩི་རྒྱ་མཚོར་རྟག་རོལ་མཛད། །སྐྱེས་མཆོག་ཡེ་ཤེས་རྒྱ་མཚོར་ཕྱག་འཚལ་ལོ། །རྒྱལ་བ་གཉིས་པས་རྒྱལ་ཚབ་དབང་བསྐུར་ཞིང་། །ཤེས་རབ་རིན་ཆེན་གསུམ་གྱི་སྨིན་གཏོང་གི །སྐལ་ལྡན་རྒྱ་མཚོའི་ཚོགས་ཀུན་ཚིམ་མཛད་པ། །རྒྱལ་ཚབ་རིན་ཆེན་རྒྱ་མཚོར་ཕྱག་འཚལ་ལོ། །ཟབ་ལམ་སྙིང་པོའི་བསྟན་པ་འཛིན་མཛད་མགོན། །བློ་གྲོས་རྒྱ་མཚོའི་འཇིང་ལ་དབང་བསྒྱུར་ཞིང་། །རྣམ་ཀུན་རྒྱལ་བའི་སྲས་གྱུར་རྣལ་འབྱོར་གཙོ། །སྙིང་པོ་བློ་གྲོས་ཞབས་ལ་ཕྱག་འཚལ་ལོ། །ངག་གི་དབང་ཕྱུག་ཀུན་ནས་དགའ་བའི་དཔལ། །རྡོ་རྗེའི་རྣལ་འབྱོར་བསྒྲུབ་པའི་འཕྲིན་ལས་རྒྱུན། །ཕྱོགས་ཀུན་རྒྱལ་མཛོད་དཔལ་ལྡན་ཆང་ལུང་པ། །ངག་དབང་འཕྲིན་ལས་དཔལ་ལ་ཕྱག་འཚལ་ལོ། །སྙིགས་དུས་འགྲོ་ལ་ཀུན་ཏུ་བཟང་པོ་ཉིད། །རྣལ་འབྱོར་དབང་པོའི་ཚུལ་དུ་བསྐུར་བསྟན་ནས། །སྙིང་པོའི་བསྟན་པས་ས་གསུམ་འགེངས་མཛད་པ། །རྗེ་བཙུན་ཀུན་བཟང་དབང་པོར་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱི་སྐུ་གསུང་ཐུགས། །གཅིག་བསྡུས་གདུལ་བྱའི་འདྲེན་པ་རྡོ་རྗེ་འཛིན། །བཀའ་དྲིན་གསུམ་ལྡན་འཁོར་ལོའི་མགོན་པོ་ཆེ། །དྲིན་ཆེན་རྩ་བའི་བླ་མར་ཕྱག་འཚལ་ལོ། །མཁའ་ཁྱབ་བླ་མ་སངས་རྒྱས་སྲས་བཅས་ལ། །མཁའ་ཁམས་ཁེངས་པར་རྡུལ་སྙེད་ལུས་སྤྲུལ་ཞིང་། །མཁའ་དབྱིངས་ཀུན་བཟང་མཆོད་སྤྲིན་གྱིས་གཏིབ་བཞིན། །མཁའ་ཁྱབ་འགྲོ་ཀུན་དོན་དུ་ཕྱག་འཚལ་ལོ། །རྩ་བརྒྱུད་བླ་མ་རྣམས་དང་ཡི་དམ་ལྷ། །རྒྱལ་བ་རྒྱ་མཚོ་ཀུན་དངོས་སྤྱན་རས་གཟིགས། །དེ་ལ་བདག་གི་སྙིང་ནས་རབ་གུས་ཤིང་། །མི་ཕྱེད་དད་མོས་དང་བའི་ཡིད་བཟང་པོས། །ངག་ནས་བསྟོད་སྙན་བརྗོད་ཅིང་ལུས་བཏུད་བྱས། །སྒོ་གསུམ་དགེ་བའི་རྩ་བ་བསགས་འདི་ཡི། །བདག་སོགས་སེམས་ཅན་ཀུན་གྱི་ཐོག་མེད་ནས། །བསགས་པའི་མི་དགེ་སྡིག་སྒྲིབ་ཀུན་དག་ཅིང་། །དགེ་བའི་རྩ་བ་ཅུང་ཟད་མཆིས་ཀུན་ཡང་། །མ་ཉམས་འགྲིམ་མེད་བྱང་ཆུབ་ཆེན་པོར་འབབ། །ཀུན་ཀྱང་རྒྱལ་བའི་ལམ་བཟང་ཐེག་པ་ཚོར། །ཞུམ་མེད་དགའ་བའི་སེམས་ཀྱི་གཞོལ་བར་ཤོག །བདག་སོགས་ཚེ་རབས་ཚེ་རྒྱུད་ཐམས་ཅད་དུ། །མཐོ་རིས་ཡོན་ཏན་བདུན་དང་འཕགས་ནོར་བདུན། །རྣམ་པར་སྨིན་པའི་ཡོན་ཏན་བཟང་པོ་བརྒྱད། །མི་འབྲེལ་འཁོར་ལོ་རྟག་ཏུ་སྤྱོད་པར་ཤོག །གཞན་རྐྱེན་མ་ལྟོས་སེམས་ལ་རང་རྡོལ་གྱི། །འགྲོ་ལ་རྟག་ཏུ་སྙིང་རྗེའི་རྒྱུན་འཛག་ཅིང་། །བྱམས་པས་བུ་བཞིན་བལྟས་ནས་གཞན་ཕན་སྤྱོད། །དེ་ལ་ལྡེམ་ཀྱང་ངལ་བ་མེད་པར་ཤོག །ཁྱད་པར་དགེ་མཐུ་འདི་ཡི་ཚེ་རབས་ཀུན། །ངེས་པ་དོན་གྱི་དགེ་བའི་བཤེས་གཉེན་མཆོག །མཚན་ལྡན་ཀུན་མཇལ་ཐུགས་ཀྱི་བརྩེ་བས་བཟུང་། །དེ་དགྱེས་ལས་ལ་རྟག་ཏུ་སྤྱོད་པར་ཤོག །ཆོས་ཀྱི་གེགས་གྱུར་ཁྲོ་འཁོན་འཛིན་པ་དམ། །ནོར་ལ་སྐམ་དང་བག་མེད་ལེ་ལོ་རྣམས། །རིང་སྤངས་དགེ་བའི་བཤེས་གྱུར་རྒྱུ་ཚོགས་ཀུན། །ཚང་ལ་མ་ཉམས་རྣམ་དག་ཉིད་ལྡན་ཤོག །སྤངས་འོས་རྣམ་རྟོག་སྤང་ཞིང་རྒྱུན་ཆད་ནུས། །འོས་རུང་དགེ་སེམས་ཀུན་འཆང་བརྟན་ཚུགས་ཤིང་། །ཉིན་མཚན་འཁོར་ཡུག་དམ་ཆོས་ཐོས་བསམ་སྒོམས། །དགེ་ལས་འཁོར་ལོ་རྒྱུན་མི་ཆད་སྤྱོད་ཤོག །སྐྱེ་ཀུན་གང་དུ་གནས་པའི་ས་ཕྱོགས་དེར། །ནད་ཉུང་གདོན་ཞི་དུག་མཚོན་སྐལ་བ་ཉམས། །མུ་གེ་མེད་པར་སྨན་འབྲུ་ཕྱུགས་འབྱོར་འཕེལ། །འགྲོ་ཀུན་མཛའ་བཤེས་བདེ་ལ་སྤྱོད་ཤོག །ཁྱད་པར་བདག་ཉིད་མཐོང་ཐོས་དྲན་རེག་གིས། །འགྲོ་བ་ཀུན་གྱི་སྡུག་བསྔལ་རྒྱུ་འབྲས་ཟད། །དྲི་མེད་ཚོགས་གསུམ་ལ་འཇུག་ཡོན་ཏན་འཕེལ། །ཀུན་ནས་ཀུན་བཟང་ཇི་འདྲ་དེ་ཐོབ་ཤོག །གནས་སྐབས་ནུབ་ཕྱོགས་ཞིང་ཁམས་བདེ་བ་ཅན། །མེ་ཏོག་པདྨའི་དབུས་སུ་བརྫུས་སྐྱེས་ཏེ། །སངས་རྒྱས་འོད་དཔག་མེད་ལ་ཆོས་ཉན་ཅིང་། །སངས་རྒྱས་མ་ལུས་མཆོད་པས་དགྱེས་བྱེད་ཤོག །མདོར་ན་འོད་དཔག་མེད་མགོན་སྤྱན་རས་གཟིགས། །གང་གི་བྱང་ཆུབ་བསྐྱེད་སྤྱོད་སྨོན་ལམ་གང་། །མདོར་ན་འོད་དཔག་མེད་མགོན་སྤྱན་རས་གཟིགས། །གང་གི་བྱང་ཆུབ་བསྐྱེད་སྤྱོད་སྨོན་ལམ་གང་། །དེ་འདྲ་ཇི་བཞིན་བདག་གི་ཉེར་འགྲུབ་ཅིང་། །དེ་ཡི་གོ་འཕང་མྱུར་ཏུ་ཐོབ་པར་ཤོག །

དེ་ལྟར་ཕྱག་འཚལ་རྒྱས་པ་དང་། འབྲིང་པོ་ནི་བཅུ་གཅིག་ཞལ་གྱི་མཆོག་གི་དཀྱུས་སུ་བསྟན་པ་གཉིས་དང་གལ་ཏེ་དེ་ཡང་མདོར་བསྡུས་པར་འདོད་ན་འདི་ལྟར་བྱ་སྟེ།

ན་མོ་ལོ་ཀེ་ཤྭ་ར་ཡ། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་བླ་ན་མེད། །ཚེ་དང་ཡེ་ཤེས་དཔག་མེད་རྣམ་ངེས་པ། །གཟི་བརྗིད་རྒྱལ་པོའི་ཞབས་ལ་ཕྱག་འཚལ་ལོ། །ཐུགས་རྗེས་མཁའ་ལྟར་བརྡལ་བའི་སྤྱན་རས་གཟིགས། །ཤེས་རབ་ངོ་བོ་དགེ་སློང་དཔལ་མོས་ཞབས། །གྲུབ་བརྙེས་ཟླ་བ་གཞན་དུ་ཡེ་ཤེས་ཞབས། །པེ་ཉ་པ་སྟེ་རྒྱ་བལ་པཎྜི་ཏ། །སྤྱན་རས་གཟིགས་སྤྲུལ་ཟླ་བ་རྒྱལ་བའི་མཚན། །གྲུབ་གྱུར་ཉི་ཕུག་སྤུ་སྟོན་ཞང་དགྲ་འཇིག །མཁན་ཆེན་རྩེ་འདུལ་བ་དང་བདེ་བ་ཅན། །བྱང་སེམས་ཆུ་བཟང་ཆོས་རྗེ་ཤེས་རབ་འབུམ། །རྒྱལ་བའི་སྲས་པོ་ཐོགས་མེད་བཟང་པོའི་ཞབས། །སེམས་དཔའ་ཆོས་རིན་བསོད་ནམས་རིན་པོ་ཆེ། །བསོད་ནམས་རྒྱལ་མཚན་སེམས་ཀྱི་མདུད་གྲོལ་ཏེ། །མཆོག་གཉིས་ཐུགས་སྲས་ཀུན་དགའ་རྒྱལ་བའི་མཚན། །རྡོ་རྗེ་སེམས་དཔའ་དངོས་གྱུར་ཀུན་དགའ་སྙིང་། །སྐྱེས་མཆོག་ཡེ་ཤེས་རིན་ཆེན་རྒྱ་མཚོ་སྟེ། །སྙིང་པོ་བློ་གྲོས་ངག་དབང་འཕྲིན་ལས་དཔལ། །རིགས་བརྒྱའི་ཁྱབ་བདག་རྗེ་བཙུན་ཀུན་བཟང་དབང་། །མཚུངས་མེད་རྩ་བརྒྱུད་བླ་མར་ཕྱག་འཚལ་ལོ། །བདག་གི་ཚད་མེད་བྱམས་པའི་ཆུ་རྒྱུན་གྱིས། །ཐོག་མེད་ནས་རེངས་བདག་བློའི་ཐ་རྒོད་བརླན། །ཐུགས་རྗེའི་གཤོལ་གྱིས་ཡོངས་སུ་རོལ་བྱས་ཏེ། །བྱང་ཆུབ་མཆོག་ཏུ་དགའ་བའི་ས་བོན་བསྐྲུན། །སྡང་སྲེད་ཡོངས་སྤངས་བཏང་སྙོམས་རླུང་གིས་བསྐུལ། །ཀུན་རྫོབ་བྱང་ཆུབ་སེམས་ཀྱི་སྨྱུ་གུ་ལ། །དོན་དམ་བྱང་ཆུབ་སེམས་ཀྱི་སྟོན་འབྲས་སྨིན། །བྱང་ཆུབ་མཆོག་གི་བདག་པོའི་མཛོད་ཁེངས་ནས། །ཕུན་ཚོགས་ཀུན་ཏུ་བཟང་པོའི་དགའ་སྟོན་གྱིས། །མཁའ་མཉམ་གདུལ་བྱའི་ཡིད་ཀྱི་དབུས་སེལ་ཞིང་། །མངོན་མཐོའི་དཔལ་འབྱོར་མཐར་ཐུག་ངེས་ལེགས་འབྲས། །འཇིག་རྟེན་དབང་ཕྱུག་གོ་འཕང་བཀོད་པར་ཤོག །

ཅེས་སྤྱན་རས་གཟིགས་དཔལ་མོ་ལུགས་ཀྱི་སྒྲུབ་ཐབས་གསོ་སྦྱོང་དང་འབྲེལ་བའི་བརྒྱུད་པའི་བླ་མ་རྣམས་ལ་ཕྱག་འཚལ་རྒྱས་པའི་ཆོས་རྗེ་ཤེས་རབ་འབུམ་ཡན་རྒྱལ་བའི་སྲས་པོ་ཐོགས་མེད་བཟང་པོའི་གསུང་དང་། དེ་འཕྲོས་སུ་བླ་བརྒྱུད་ཁ་སྐོང་དང་ཕྱག་འཚལ་བསྡུས་པ་གོང་འོག་གི་སྨོན་ལམ་དང་བཅས་ཤཱཀྱའི་དགེ་བསྙེན་རིག་པ་འཛིན་པ་རྒྱལ་ཁམས་པ་ཚེ་དབང་ནོར་བུའི་རབ་བྱུང་བཅུ་གསུམ་པའི་དཔལ་གདོང་ཆུ་བྱ་ནག་ཟླའི་ཚེས་དྲུག་ཀུན་མཁྱེན་དོལ་པོ་པའི་དུས་ཆེན་དུ་བོད་ཡུལ་སྟོད་མངའ་རིས་མང་ཡུལ་ལྗོངས་ལ་དྭགས་རྒྱལ་པོའི་ཁ་ཊྭ་ཝཾ་ལེའི་གཙུག་ལག་ཁང་འཕགས་པ་བཅུ་གཅིག་ཞལ་གྱི་སྐུ་བརྙན་ལྷ་བཙུན་ན་ག་ར་ཛའི་ཐུགས་དམ་རྟེན་མཆོག་བཞུགས་པའི་ངོགས་སུ་བཀོད་པ་དགེའོ། །འདིའི་བརྒྱུད་པར་ཟླ་བ་གཞོན་ནུ་དང་ཡེ་ཤེས་བཟང་པོ་གཉིས་ཀ་དཔལ་མོའི་ཞབས་ལ་ཐུག་པ་ཡིན་པས་རྒྱལ་སྲས་ཆོས་རྫོང་བས་ཕྱག་འཚལ་སྐབས་ཡེ་ཤེས་བཟང་པོས་བཀོད་ཅིང་། རྒྱལ་སྲས་ཐོགས་མེད་ནས་གྲོལ་མཆོག་བར་བརྒྱུད་པའི་རྣམ་གྲངས་གཞན་ཡིན་ཡང་། རྗེ་རྡོ་རིང་བས་སེམས་པ་བསོད་ནམས་རྒྱལ་མཚན་དང་། གྲོལ་མཆོག་ཞབས་ལ་གསན་པས། སེམས་དཔའ་ཆེན་པོ་དང་ལྷན་དུ་བགྲང་བ་ཡིན་ལ། གཞན་ཡང་འདི་ལ་བརྒྱུད་པའི་རྣམ་གྲངས་ཁ་ཤས་ཡོད་པ་ཡང་ཤེས་པར་བྱའོ། །སརྦ་མངྒ་ལཾ།

ཕྱག་རྒྱ་ཆེན་པོ་ཡང་དག་པ་སྙིང་པོའི་དོན་གྱི་གཏེར་མཛོད་ཀྱི་བརྒྱུད་པའི་བླ་མར་གསོལ་འདེབས་བྱིན་རླབས་མྱུར་འདྲེན།

༈ ཕྱག་རྒྱ་ཆེན་པོ་ཡང་དག་པ་སྙིང་པོའི་དོན་གྱི་གཏེར་མཛོད་ཀྱི་བརྒྱུད་པའི་བླ་མར་གསོལ་འདེབས་བྱིན་རླབས་མྱུར་འདྲེན་ཞེས་བྱ་བ་བཞུགས་སོ། །

མ་ཧཱ་གུ་རུ་ཨ་དྷིཥྛ་ཏེ་ན་མ། གདོད་ནས་ཉིད་དག་ཡེ་ཤེས་ངང་ཉིད་ལས། །མ་གཡོས་ཆོས་ཉིད་དྲི་བྲལ་གནས་ལུགས་གཤིས། །གདངས་རྩལ་མ་འགག་སྒྱུ་འཕྲུལ་བདེ་ཆེན་སྐུ། །དབང་ཕྱུག་བརྒྱད་ལྡན་རིགས་དྲུག་རྡོ་རྗེ་འཆང་ལ། །གསོལ་བ་འདེབས་སོ་ལྷན་སྐྱེས་ཕྱག་རྒྱ་ཆེ། །བདེ་ཆེན་གཉུག་མའི་ཡེ་ཤེས་ངོ་བོ་ཉིད། །བརྗོད་བྲལ་བློ་འདས་འོད་གསལ་བླ་མེད་མཆོག །དེ་རིང་ཉིད་ནས་རྟོགས་བྱིན་གྱིས་རློབས། །རྡོ་རྗེ་ཅན་ཉིད་མི་ཡི་གཟུགས་གྱུར་ཏེ། །རིམ་གསུམ་གང་ཟག་བློ་ངོ་དང་མཐུན་ཕྱིར། །ཕྱོགས་དང་སྤྲུལ་པ་རང་རྒྱུད་ཚུལ་སྟོན་མཁས། །བདེ་བའི་འཁོར་ལོ་ཆེན་པོ་ཏེ་ལོ་པར། །གསོལ་བ་འདེབས་སོ༴ ལ་སོགས་ཤྭ་ལོ་ཀ་གྲེས་ཕྱུང་། །བླ་མེད་ལམ་ལ་མའི་བཀའ་བཞིན་དུ། །སྤྱད་པས་སྐྱེ་བ་གཅིག་གི་བྱང་ཆུབ་ཆེ། །སྦྱོར་བར་དེ་ཉིད་གདུལ་བྱ་ལ་སྟོན་ཕྱིར། །ཕྱག་རྡོར་མི་ཟོལ་དཔལ་ལྡན་ན་རོ་པར། །གསོལ་བ་འདེབས་སོ༴ འཕགས་ཡུལ་གྲུབ་པའི་མན་ངག་རྟོགས་པའི་བཅུད། །བསིལ་ལྡན་ལྗོངས་སུ་འདྲེན་ནས་བསྐལ་བཟང་ཀུན། །ཚིམ་ཕྱིར་མཁའ་འགྲོའི་ཡབ་གཅིག་དགྱེས་པ་ཆེ། །སྐད་གཉིས་སྨྲ་བའི་ཚུལ་སྟོན་ཆོས་བློ་གྲོས། །གསོལ་བ་འདེབས་སོ༴ འཇམ་དཔལ་དའ་བོ་ཐོས་པ་དགའ་བའི་སྐུར། །བསྟན་ནས་འཁོར་བའི་ཆོས་བརྒྱས་དམག་དཔུང་ཀུན། །དཀའ་སྤྱད་བརྩོན་འགྲུས་མཚོན་གྱིས་མཐར་བྱས་ཏེ། །སྒྲུབ་བརྒྱུད་འཁོར་ལོ་བསྒྱུར་བ་མི་ལ་རས། །གསོལ་བ་འདེབས་སོ༴ རྩིབས་སྐྱེས་གསེར་གྱི་བུ་ཆུང་འགྲོ་འདུལ་གྲོགས། །སྙིང་པོ་དོན་གྱིས་བསྟན་པ་རྒྱས་ཕྱིར་དུ། །གསུང་གི་རྡོ་རྗེ་ཞིང་འདིར་སྣང་གྱུར་པ། །དམྱལ་མེད་ལྷ་རྗེ་དཔལ་ལྡན་སྒམ་པོ་པར། །གསོལ་བ་འདེབས་སོ༴ སྨན་པའི་རྒྱལ་པོ་སྐལ་བཟང་ཞིང་འདི་ཡི། །འདྲེན་པ་ཐོག་མ་འཁོར་བ་འཇིག་གྱུར་ཀྱང་། །ཐུབ་བསྟན་སྙིགས་དུས་འགྲོ་ལ་བརྩེ་བ་ཡི། །སྤྲུལ་པའི་སྐུར་བྱོན་ཕག་གྲུ་རྡོར་རྒྱལ་ལ། །གསོལ་བ་འདེབས་སོ༴ ཕྱག་ན་པདྨོའི་ལུང་བསྟན་བདེ་གཤེགས་མཇལ། །བྱིན་རླབས་ཆེར་ཞུགས་ཅིག་ཆར་བསྒོམ་མེད་རྟོགས། །ཚེ་གཅིག་སངས་རྒྱས་མདའ་སྣུན་ཡོངས་སྐྱོང་བའི། །མཆོག་སྙེས་གླིང་རས་པདྨ་རྡོ་རྗེ་ལ། །གསོལ་བ་འདེབས་སོ༴ བླ་མའི་ཐུགས་བཅུད་ལྷག་མེད་ངོམ་པར་བླངས། །བདེན་དོན་མངོན་གྱུར་རྟེན་འབྲེལ་ཐམས་ཅད་མཁྱེན། །རོ་མཉམ་ནམ་མཁའི་རྣལ་འབྱོར་ཧེ་རུ་ཀ །གཙང་པ་རྒྱ་རས་ཡེ་ཤེས་རྡོ་རྗེ་ལ། །གསོལ་བ་འདེབས་སོ༴ གླུ་མཁན་ལེགས་བཤད་རྐྱེན་གྱི་སྔོན་ལས་འཕྲོ། །པད་མའི་ཚུལ་བཅས་མགོན་རྟེན་ཆོས་སྐུ་རྟོགས། །སྐྱེ་བ་གཅིག་གི་རྒྱལ་བ་པདྨའི་སྤྱན། །ཞལ་བཞེས་རྒོད་ཚང་མགོན་པོ་རྡོ་རྗེ་ལ། །གསོལ་བ༴ སྐྱེ་མ་ཐག་ནས་དམ་པའི་རྣམ་ཐར་འཛིན། །སྐྱེ་མཐར་མཆོག་གི་མཛད་པ་ཇི་བཞིན་སྐྱོང་། །ཕྱི་ནང་གཞན་གསུམ་ཐམས་ཅད་མཁྱེན་པའི་དཔལ། །ཡང་དགོན་མི་བསྐྱོད་ཐུགས་ཀྱི་རྡོ་རྗེ་ལ། །གསོལ་བ༴ མཆོག་གི་སྤྲུལ་སྐུ་གཙུག་གི་ནོར་བུ་རུ། །འབྲེལ་མེད་བརྟེན་ནས་ཐུགས་ཀྱི་གསང་བའི་མཛོད། །ཡོངས་འཛིན་དོན་ཉིད་འབྲས་བུ་མཐར་ཕྱིན་པའི། །སྤྱན་སྔ་རིན་ཆེན་དཔལ་དང་ལྡན་པ་ལ། །གསོལ་བ༴ མཁས་ཤིང་གྲུབ་གྱུར་བླ་མ་ཟུང་བརྟེན་ནས། །ཐུགས་ཀྱི་སྲས་གྱུར་ཟབ་དགུའི་མན་ངག་རྫོགས། །གྲུབ་པ་མཆོག་བརྙེས་བསྒྲུབ་པའི་སྡེ་ཆེན་བཙུགས། །ཤྲཱི་ཟུར་ཕུག་རིན་ཆེན་དཔལ་བཟང་ལ། །གསོལ་བ༴ གཞོན་ནུ་ཉིད་ནས་བསྐྱེད་རྫོགས་དྲོད་ཚད་ཐོབ། །དམ་པ་མང་བསྟེན་སྨིན་གྲོལ་རྒྱ་མཚོ་ནོད། །དོན་ཉིད་ལྷུན་གྲུབ་རྡོ་རྗེ་འཆང་ཆེན་པོ། །འབར་ར་སྐྱེས་མཆོག་རྒྱལ་མཚན་དཔལ་བཟང་ལ། །གསོལ་བ༴ བྱིན་རླབས་རྟོགས་པའི་བཀའ་བབ་ལེགས་ཐོབ་ནས། །དོན་བརྒྱུད་ཆུ་བོ་གཉིས་མེད་འཛིན་པའི་བདག །བསྐལ་བཟང་སྐྱེས་བུ་དགའ་བའི་རྣལ་འབྱོར་མཆོག །སྒྲོལ་མ་བསམ་ལྡིང་ནམ་མཁའ་སེང་གེ་ལ། །གསོལ་བ༴ བསླབ་པ་རྣམ་དག་བྱང་ཆུབ་སེམས་དཔའ་ཆེ། །ལུང་དང་རྟོགས་པའི་མཛོད་འཛིན་འཆང་ཐུབ་ཀྱི། །མཆོག་གྱུར་གྲུབ་པའི་བདག་ཉིད་དམ་པ་རྗེ། །ཀུན་ནས་དགའ་བ་ཆོས་ཀྱི་རྒྱལ་པོ་ལ། །གསོལ་བ༴ སྔོན་ལས་འཕྲོ་སད་ཆོ་ཀུན་སྒྱུ་མར་གཟིགས། །དབུ་མའི་མདུད་གྲོལ་རྩ་རླུང་རང་དབང་ཐོབ། །འོད་གསལ་གཉིས་འདྲེས་འབྲེལ་ཚད་སྨིན་གྲོལ་སྦྱོར། །མོན་རྫོང་ར་ས་ཟླ་བ་རྒྱལ་མཚན་ལ། །གསོལ་བ༴ དུས་ཀུན་དབེན་པའི་གནས་ལས་མི་འདའ་ཞིང་། །བསྒྲུབ་པའི་གོ་ཆ་དཀའ་སྤྱོད་མཐར་ཕྱིན་ཏེ། །ཉམས་དང་རྟོགས་པ་ཀློང་གྱུར་གྲུབ་ཐོབ་ཆེ། །མངའ་རིས་རས་ཆེན་ནམ་མཁའ་རྡོ་རྗེ་ལ། །གསོལ་བ༴ མང་དུ་ཐོས་ཤིང་བསམ་པའི་མཐུ་ཆེན་ཐོབ། །མཆོག་བརྙེས་བླ་མར་བསྙེན་ནས་མཉེས་བྱས་ཤིང་། །གནས་ལུགས་བསྒོམ་པས་ལྟ་བ་མངོན་དུ་གྱུར། །རབ་འབྱམས་ཆེན་པོ་ལྷུན་གྲུབ་དཔལ་འབྱོར་ལ། །གསོལ་བ༴ མཁས་གྲུབ་བླ་མ་དམ་པའི་ཞབས་ལ་བཏུད། །བསྙེན་བསྒྲུབ་མཐར་ཕྱིན་ཡི་དམ་ཞལ་དངོས་གཟིགས། །ཐབས་ལམ་ལས་རུང་མཉམ་ཉིད་ཕྱག་ཆེན་རྟོགས། །འཛམ་གླིང་མཁས་གྲུབ་སངས་རྒྱས་ཆོས་འཕེལ། །གསོལ་བ༴ སྙིགས་དུས་འདུལ་དཀའ་འགྲོ་ལ་བརྩེ་བ་ཡི། །སྨིན་གྲོལ་བསྟན་པའི་སྒྲོན་མེ་སྦར་བའི་ཕྱིར། །སྤྲུལ་པའི་སྐུར་བྱོན་འབའ་ར་གསུམ་པ་རྗེ། །བྱ་བཏང་ཆེན་པོ་ཀརྨ་གསལ་བྱེད་ལ། །གསོལ་བ༴ མི་ཆོས་ཟང་ཟིང་མི་གཙང་རྩྭ་ལྟར་སྤངས། །སྦས་ཡུལ་དབེན་རྟེན་ཚེ་དང་སྒྲུབ་པ་མཉམ། །འཁྲུལ་ཞིག་བདེ་ཆེན་གཉུག་མའི་རྣལ་འབྱོར་པ། །སྐྱིད་གྲོང་རས་པ་དཀོན་མཆོག་རྒྱལ་མཚན་ལ། །གསོལ་བ༴ བསམ་བཞིན་གདུལ་བྱའི་དོན་དུ་འཇུག་པ་ཡི། །སྐྱེ་བཞེད་ཤིས་བཞིན་དོན་བསྒོམས་བསྟན་པ་མཆོག །གསོ་མཛད་འབའ་ར་བཞི་པ་སྤྲུལ་པའི་སྐུ། །རྗེ་བཙུན་རིན་ཆེན་བརྟེན་པའི་གསལ་བྱེད་ལ། །གསོལ་བ༴ དམ་པ་མང་བརྟེན་ཐུགས་བཅུད་བུམ་པ་བཟང་བལྟམས། །སྦས་པའི་ཚུལ་ལ་བསྒྲུབ་པའི་སྡེ་ཆེན་འཛིན། །གནས་ལུགས་བདེན་པ་ཕྱག་ཆེན་ངོ་བོ་མཐོང་། །འཛམ་གླིང་རིན་ཆེན་བློ་གྲོས་ཆོས་འཕེལ་ལ། །གསོལ་བ༴ དཔེ་མཚོན་ཚིག་གི་བརྡ་སྦྱོར་སྟོན་མཛད་ཅིང་། །དོན་དམ་དཔེ་མཚོན་ཚིག་ཡུལ་ལས་འདས་དོན། །བྱིན་རླབས་འཕོ་བ་ཐུགས་ནས་ཐུགས་བརྒྱུད་པའི། །ཡེ་ཤེས་ལྔ་བདག་རྩ་བའི་བླ་མ་ལ། །གསོལ་བ༴ དེ་ལྟར་ཆོས་སྐུ་ཡེ་ཤེས་ངོ་བོའི་གཤིས། །འགྲོ་ཀུན་སྙིང་ལ་སར་རང་ངོ་རང་། །སྟོན་བྱེད་རྡོ་རྗེ་འཆང་ནས་རྩ་བ་ཡི། །བླ་མའི་བར་བྱོན་དོན་གྱི་ཤིང་རྟ་ཆེ། །གསོལ་བ༴ རྟེན་དང་བརྟེན་པ་སྣོད་བཅུད་དཀྱིལ་འཁོར་ནས། །འབྱུང་དང་ཕུང་ཁམས་ལྷན་སྐྱེས་རྒྱལ་བའི་དངོས། །དག་པ་རབ་འབྱམས་ཅིར་སྣང་བདེ་ཆེན་འཕྲུལ། །རྒྱུད་སྡེ་བཞི་རིམ་ཡི་དམ་ལྷ་ཚོགས་ལ། །གསོལ་བ༴ ཕྱི་ནང་གསང་བའི་གནས་ཡུལ་དུར་ཁྲོད་ནས། །སྐུ་གསུམ་ཌཱ་ཀི་ས་གསུམ་དབང་བསྒྱུར་མ། །སྐད་ཅིག་ཐོགས་མེད་འཕྲིན་ལས་སྒྲུབ་པའི་དཔལ། །ཡེ་ཤེས་འཇིག་རྟེན་ལས་ཀྱི་ཚོགས་རྣམས་ལ། །གསོལ་བ༴ བདེ་བར་གཤེགས་ཀྱང་འགྲོ་ལ་སྨན་པའི་སླད། །རྒྱལ་བའི་བཀའ་དང་དེ་འཛིན་གསུངས་པའི་ཕྱིར། །ཐུགས་རྗེ་སྐུར་སྟོན་དམ་ཅན་རྒྱ་མཚོ་ཆེ། །ཆོས་མཛད་བུ་ལྟར་སྐྱོང་བའི་ཚོགས་རྣམས་ལ། །གསོལ་བ༴ འདི་ལྟར་སྙིང་ནས་གུས་པའི་གསོལ་འདེབས་ཀྱིས། །རྩ་བརྒྱུད་བླ་མའི་ཐུགས་རྗེ་རབ་གཡོས་ཏེ། །བདག་རྒྱུད་ཐོག་མེད་ནས་གོམས་འཁྲུལ་མུན་སྟེ། །དེ་རིགས་བྱིན་རླབས་སྒྲོན་མེས་གསལ་བྱས་ནས། །མི་རྟག་འཆི་བ་སྙིང་ནས་དྲན་པ་དང་། །ཆོས་བརྒྱད་ཞེན་ལོག་འཇིག་རྟེན་འཁྲི་བ་ཆོད། །རྒྱུ་འབྲས་ངེས་ཤེས་སྤང་བླང་གནས་ལ་མཁས། །ཚེ་འདི་བློ་ཡིས་མཐོང་བར་བྱིན་གྱིས་རློབས། །བླ་མར་མོས་གུས་ཆུག་མེད་སྙིང་ལ་གཟེར། །དད་པ་འགྱུར་ལྡོག་མེད་པར་རྟག་ཏུ་བརྟེན། །ཅི་མཛད་ལེགས་པར་མཐོང་བའི་དག་སྣང་འབྱོངས། །ཅི་གསུང་འདའ་མེད་བདག་གི་གཉེན་གྱུར་ཤོག །བླ་མའི་བྱིན་རླབས་སྙིང་ལ་ཞུགས་གྱུར་ཏེ། །གནས་ལུགས་གཉུག་མ་དག་ལ་ཕྱག་རྒྱ་ཆེ། །མངོན་སུམ་རྟོགས་ནས་ས་ལམ་གེགས་མེད་པར། །ཚེ་གཅིག་ཉིད་ལ་རྡོ་རྗེ་འཆང་བྱིན་རློབས། །ཐབས་ལམ་ཆོས་དྲག་གནད་དུ་ཚུད་ནས་ཀྱང་། །བདེ་ཆེན་སྤྲུལ་ལོངས་ཆོས་སྐུ་ལྷུན་གྲུབ་དོན། །ཟུང་འཇུག་མངོན་གྱུར་འགྲོ་ཀུན་འདྲེན་གྱུར་པའི། །དེད་དཔོན་དམ་པར་བདག་ཉིད་གྱུར་བར་ཤོག །

ཅེས་ཕྱག་རྒྱ་ཆེན་དོན་ཁྲིད་སྐྱེ་མཆོག་ཡང་མགོན་པའི་བཀའ་བརྒྱུད་འབའ་ར་རྒྱལ་མཚན་དཔལ་གྱིས་མཛད་པའི་ཁྲིད་ཡིད་ཆེན་མོ་ཡང་དག་པ་སྙིང་པོ་དོན་གྱི་གཏེར་མཛོད་ཀྱི་ཁྲིད་ལུང་ལེགས་པར་ཐོག་པའི་ཚེ་བརྒྱུད་པའི་གསོལ་འདེབས་སུ་མདོ་ཁམས་ཀཿཐོག་པ་འོད་གསལ་ལྷ་རིགས་རྔུ་ཡི་བཙུན་གཟུགས་རྣལ་འབྱོར་ཚེ་དབང་ནོར་བུ་ཀརྨ་རིན་ཆེན་མཆོག་ཏུ་དགའ་བ་དགེ་བའི་དཔལ་གྱིས་མེ་ལུག་ནག་པ་ཟླ་བའི་དམར་ཕྱོགས་གང་བ་ཐུབ་པའི་དུས་བཟང་པོར་བལ་བོད་ཀྱི་མཚམས་མང་ཡུལ་གྱི་གྲོང་གྲྭ་འཇམ་དཔལ་གླིང་དུ་ཨ་ལོ་ཀེའི་མདང་ལ་གྲུབ་པར་སྦྱར་བའོ། །དགེའོ་དགེའོ། །

ཕྱག་ཆེན་ལྷན་སྐྱེས་གསོལ་འདེབས་བྱིན་རླབས་མྱུར་སྩོལ།

༈ ཕྱག་ཆེན་ལྷན་སྐྱེས་གསོལ་འདེབས་བྱིན་རླབས་མྱུར་སྩོལ་ཞེས་བྱ་བ་བཞུགས་སོ། །

ཨོ་ཨཱ་ཧཱུྃ༔ ཡན་ལག་བདུན་ལྡན་རིགས་དྲུག་རྡོ་རྗེ་འཆང་། །ལྷན་སྐྱེས་ཡེ་ཤེས་རྡོ་རྗེ་བཙུན་མོ་ཆེ། །ས་བཅུའི་དབང་ཕྱུག་བློ་གྲོས་རིན་པོ་ཆེ། །གཅིག་འཆར་རིགས་གྲོལ་བྲམ་ཟེ་ས་ར་ཧ། །གསོལ་བ་འདེབས་སོ་ལྷན་སྐྱེས་མཉམ་སྦྱོར་ཆེ། །ཆོས་ཉིད་ཕྱག་རྒྱ་མྱུར་དུ་རྟོགས་གྱུར་ནས། །ཉམས་ལེན་མཐར་ཕྱིན་ལྟ་བའི་གདེང་ཚད་སྐྱོལ། །འབྲས་བུ་མྱུར་དུ་ཐོབ་པར་བྱིན་རླབས་སྩལ། །ཆོས་སྒོ་བརྒྱད་ཁྲི་མཆོག་བརྙེས་ཀླུ་སྒྲུབ་སྙིང་། །འོད་གཟུགས་གྲུབ་པའི་རྒྱལ་པོ་ཤ་བ་རི། །བྱང་ཆུབ་སེམས་མཆོག་མངའ་བདག་མཻ་ཏྲི་པ། །གཉིས་སྨྲའི་ངང་ཚུལ་དགྱེས་རྡོར་ཆོས་བློ་གྲོས། །གསོལ་བ་འདེབས་སོ༴ ༼སོགས་ཤོ་ལོ་ཀ་འདྲེས་སྣང་། ༽གསང་བ་འདུས་དངོས་མཁའ་སྤྱོད་མི་ལ་རྗེ། །གསུང་གི་རྡོ་རྗེ་དཔལ་ལྡན་སྒོམ་པོ་པ། །འཁོར་བ་འཇིག་བྱེད་ཕག་གྲུ་རྡོ་རྗེ་རྒྱལ། །ཆོས་ཀྱི་ཁྱུ་མཆོག་སྨར་ཚང་ཤེས་ཡེའི་ཞབས། །གསོལ་བ༴ གྲུབ་པའི་དབང་པོ་ཤ་ཡངས་ཡེ་ཤེས་རྒྱལ། །ཡང་དག་བརྩོན་ལྡན་སྤྱན་སྔ་བྱང་ཆུབ་གྲགས། །རྟོགས་མཆོག་དབུ་རྩེ་བསོད་ནམས་ཡེ་ཤེས་པ། །སྙིང་པོའི་བཅུད་ལེན་དཔལ་ལྡན་རིན་ཆེན་གླིང་། །གསོལ་བ༴ འཇིག་རྟེན་དབང་ཕྱུག་སྤངས་མཁན་འོད་ཟེར་ཞབས། །འཁྲུལ་གྲོལ་ཤིང་མགོ་དཀོན་མཆོག་རྒྱལ་བའི་མཚན། །ཞིག་པོ་རུ་དབོན་ཆོས་ཀྱི་རྡོ་རྗེ་བ། །བསྟན་པའི་ཟླ་ཤར་ཛྙ་ན་ཀེ་རུ་ཆེ། །གསོལ་བ༴ ལུང་རྟོགས་གཉིས་སྤེལ་བྱང་སེམས་རྒྱལ་སིང་པ། །གྲུབ་པའི་མཚན་རཏྣ་ཏྲ་ཡ་ཀེ་རུ་ཆེ། །གྲུབ་པ་མཆོག་ཐོག་རོང་པ་ཏྲ་བཛྲ། །བཤད་སྒྲུབ་བསྟན་སྤེལ་ཤཱཀྱ་རྒྱལ་བའི་མཚན། །གསོལ་བ་འདེབས་སོ༴ ལྟ་བ་ཀློང་གྱུར་བྷོ་དྷི་སིངྒ་པ། །མཚུངས་མེད༴ མཆོག་སྤྲུལ་བཀྲ་ཤིས་རྒྱ་མཚོ་ཆེ། །ཚེ་གཅིག་གྲུབ་བརྙེས་བསྟན་པ་སེངྒེ་བ། །གནས་ལུགས་མཐར་ཕྱིན་ཆོས་ཉིད་རྒྱ་མཚོའི་ཞབས། །གསོལ་བ༴ རྟོགས་ལྡན་རྒྱལ་པོ་ཤེས་རབ་རྒྱ་མཚོ་དཔལ། །སྣང་སེམས་མངོན་འདྲེས་ཡེ་ཤེས་རྒྱལ་བའི་མཚན། །རིག་འཛིན་མཆོག་གཙོ་པདྨ་བདེ་ཆེན་གླིང་། །གདམ་ངག་རྗེན་བཤད་རྩ་བ་རྒྱུད་པ་ལ། །གསོལ་བ༴ དེ་ལྟར་བྱིན་རླབས་རྟོགས་པ་ཁོ་ན་ཉིད། །སྙིང་པོའི་དོན་རྟེན་གདམས་བརྒྱུད་བླ་མ་ལ། །རྩེ་གཅིག་འདྲེན་མཆོག་རྟག་ཏུ་གུས་པ་ཆེས། །སྙིང་ནས་གསོལ་བ་བཏབ་པའི་བདེན་ནུས་འབྲས། །གཞི་ཡི་གནས་ལུགས་ལྟ་བ་ཕྱག་རྒྱ་ཆེ། །ཡོད་མེད་མཐའ་བསམ་བློ་འདས་ཡིད་བྱེད་ཟད། །ཤིང་གདོང་རྩལ་ཕྲོ་ལྷུན་གྲུབ་སྤྲོས་བྲལ་ཆེ། །སྣང་སྲིད་ཆོས་ཉིད་རྟོགས་པར་བྱིན་གྱིས་རློབས། །ལམ་གྱི་ཉམས་ལེན་བསྒོམ་པ་ཕྱག་རྒྱ་ཆེ། །བཞི་གནས་བརྟེན་སྐྱེས་ལྷག་མཐོང་མངོན་དུ་གྱུར། །རྣལ་འབྱོར་བཞི་ཡི་ཉམས་ལེན་མཐའ་རུ་ཕྱིན། །ཆོས་ཟད་བློ་འདས་རྟོགས་པར་བྱིན་གྱིས་རློབས། །འབྲས་བུ་མངོན་གྱུར་སྐུ་གཉིས་ཕྱག་རྒྱ་ཆེ། །སྟོང་ཉིད་རང་གཟུགས་རང་དོན་ཆོས་སྐུར་ཐིམ། །སྙིང་རྗེའི་རང་གཟུགས་གཞན་དོན་གཟུགས་སྐུར་འཆར། །མཁྱེན་གཉིས་ཡན་ལག་བདུན་འགྲུབ་བྱིན་གྱིས་རློབས། །

ཅེས་ཕྱག་རྒྱ་ཆེན་པོ་ལྷན་གཅིག་སྐྱེས་སྦྱོར་གྱི་བརྒྱུད་པ་སྨར་ཚང་བ་ལས་འབྱུང་བའི་བདེ་ཆེན་གླིང་པ་ལས་ཐོབ་པའི་གསོལ་འདེབས་བྱིན་རླབས་མྱུར་སྩོལ་ཞེས་བྱ་བ་རྣལ་འབྱོར་པ་ཚེ་དབང་ནོར་བུ་དཔལ་གྱི་རྒྱ་མཚོས་ལྕགས་བྱི་ཟླ་བ་བཞི་པའི་ཚེས་ཉིན་ལ་ཏིར་རི་ལྗོན་པའི་ར་བར་བྲིས་པ་དགེ་ལེགས་འཕེལ། །དགེའོ། །

ཐུགས་རྗེ་ཆེན་པོའི་བརྒྱུད་འདེབས་བྱིན་རླབས་གཏེར་མཛོད།

༈ ཐུགས་རྗེ་ཆེན་པོའི་བརྒྱུད་འདེབས་བྱིན་རླབས་གཏེར་མཛོད་ཅེས་བྱ་བ་བཞུགས་སོ། །

ཨོཾ་ཨཱ༔ཧཱུྃ། ཁྱབ་བརྡལ་ཆོས་ཉིད་མགོན་པོ་འོད་དཔག་མེད། །ཐུགས་རྗེའི་དབང་ཕྱུག་འཕགས་པ་སྤྱན་རས་གཟིགས། །སངས་རྒྱས་ཀུན་འདས་མཚོ་སྐྱེས་པདྨ་འབྱུང་། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །རྒྱལ་བ་བསྐྱེད་ཡུམ་དབང་མོ་མཚོ་རྒྱལ་མ། །གངས་ཅན་གཏེར་སྟོན་རྒྱལ་པོ་ཆོས་དབང་ཕྱུག །ཐུགས་ཆེན་བཀའ་བབ་མ་ཎི་རིན་པོ་ཆེ། །གསོལ་བ༴ འགྲོ་འདུལ་ཆོས་རྗེ་ཀེ་རུ་སིང་ཧ་པ། །ཆོས་ཉིད་དོན་རྟོགས་མཐར་ཕྱིན་ཐུགས་རྗེ་དཔལ། །རིམ་གཉིས་དངོས་གྲུབ་མཆོག་བརྙེས་ཚུལ་ཁྲིམས་འབུམ། །གསོལ་བ༴ སྤང་རྟོགས་རྩལ་རྫོགས་དྷརྨཱ་པཀྵི་ཞབས། །བསྟན་པའི་སྒྲོན་མེ་གྲུབ་མཆོག་ཡེ་ཤེས་རྒྱལ། །འཁྲུལ་ཞིག་རང་གྲོལ་ཕྱོགས་མེད་བྱང་ཆུབ་སེམས། །གསོལ་བ༴ ཤེས་རབ་གསུམ་རྒྱས་ཡེ་ཤེས་ཀློང་དུ་གྱུར། །ཆོས་ཉིད་མངའ་བརྙེས་བསྟན་འཛིན་དབང་པོ་རྗེ། །པདྨ་འཕྲིན་ལས་མངའ་བདག་གུ་རུ་དཔལ། །གསོལ་བ༴ སྨིན་གྲོལ་རྩ་ལག་པདྨ་རྒྱལ་བའི་མཚན། །མཁས་གྲུབ་ཁྱུ་མཆོག་པདྨ་བློ་གྲོས་ཆེ། །ཟབ་གསང་འགྱེད་མཁས་རིག་འཛིན་རྣམ་པར་རྒྱལ། །གསོལ་བ༴ ཀུན་བཟང་གོ་འཕང་མངོན་གྱུར་ཁྱབ་བརྡལ་ལྷུན། །རྡོ་རྗེ་འཆང་དབང་པདྨ་བདེ་ཆེན་གླིང་། །བཀའ་དྲིན་མཉམ་མེད་རྩ་བའི་བླ་མའི་ཞབས། །གསོལ་བ༴ དངོས་གྲུབ་མྱུར་གཏེར་ཡི་དམ་ཞི་དང་ཁྲོ། །རྟེན་ཅིང་འབྲེལ་བར་འབྱུང་སྟོན་མཁའ་འགྲོ་མ། །བར་ཆད་སེལ་མཛད་ཆོས་སྐྱོང་སྲུང་མ། །གསོལ་བ༴ གཏེར་གནས་དྷེ་ཝི་ཀོ་ཊའི་ཕུག་རིགས་ནས། །ས་འོག་གཏེར་གཅིག་ཐུགས་ཆེན་ཡོངས་སྙིང་འདུས། །མཐོང་ཐོས་སྨིན་ཅིང་གྲོལ་བའི་དམ་ཆོས་ལ། །གསོལ་འདེབས་ཚིག་ཁོང་དོན་ཆུད་བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འཕྲལ་རྐྱེན་ཀུན་སེལ་གཏན་བདེའི་བཞི་མ་ཐིང་། །སྟོང་ཉིད་སྙིང་རྗེ་རབ་རྒྱས་འབྲས་བུ་སྨིན། །སྐུ་གཉིས་ལྷུན་གྲུབ་འཁོར་བ་དོང་སྤྲུག་ཤོག །ཨོཾ་མ་ཎི་པདྨེ་ཧཱུྃ་ཧྲཱི༔

ཞེས་པ་རང་གི་སློབ་མ་དད་མོས་དང་ནན་པ་རབ་འབྱམས་པས་ཡང་ཡང་སྐུལ་བའི་ངོར་ཁྲོ་ལོ་ཞེས་ཤིང་འབྲུག་གི་ལོ་སྟག་གི་ཟླ་བའི་ཚེས་བཅུ་གཅིག་ཉིན་ཚེ་དབང་ནོར་བུ་པདྨ་གར་གྱི་དབང་ཕྱུག་ཙམ་གྱི་ཏིང་རི་ལྗོན་པ་ཡིད་བཞིན་དབང་གི་ར་བར་སྦྱར་བའི་ཡིག་རིགས་བསྐུལ་པ་པོ་ཉིད་དོ། །དགེའོ། །དགེའོ། །

དཔལ་མཆོག་དང་པོའི་སངས་རྒྱས་ཀྱི་མན་ངག་ཟབ་ལམ་རྡོ་རྗེའི་རྣལ་འབྱོར་བྱིན་རླབས་བཀའ་བརྒྱུད་བླ་མར་གསོལ་བ་འདེབས་པ་རྒྱུད་འཛིན་མཆོག་རྒྱལ།

༈ དཔལ་མཆོག་དང་པོའི་སངས་རྒྱས་ཀྱི་མན་ངག་ཟབ་ལམ་རྡོ་རྗེའི་རྣལ་འབྱོར་བྱིན་རླབས་བཀའ་བརྒྱུད་བླ་མར་གསོལ་བ་འདེབས་པ་རྒྱུད་འཛིན་མཆོག་རྒྱལ་ཞེས་བྱ་བ་བཞུགས་སོ། །

ཨོཾ་ཨཱ༔ཧཱུྃ་ཧོ། མཆོག་རྒྱས་དང་པོའི་སངས་རྒྱས་ཀུན་ཏུ་བཟང་། །ཡན་ལག་བདུན་ལྡན་བཅོམ་ལྡན་དུས་འཁོར་ལོ། །གསོལ་བ་འདེབས་སོ་ཐུགས་རྗེ་བདག་བློ་ཟུངས། །རྒྱུད་པ་འཛིན་ནོ་རྣམ་ཐར་མཚུངས་བྱིན་རློབས། །ཨེ་ཝཾ་རྡོ་རྗེ་འཆང་ཆེན་ཤཱཀྱ་ཐུབ། །རྒྱལ་བ་གཉིས་པ་གསང་བདག་ཟླ་བ་བཟང་། །གསོལ་བ་འདེབས་སོ་ཐུགས་རྗེ་བདག་བློ་ཟུངས། །རྒྱུད་པ་འཛིན་ནོ་རྣམ་ཐར་མཚུངས་བྱིན་རློབས། །ས་བཅུའི་སེམས་དཔའ་ཆེ་དང་མཁའ་འགྲོའི་གཙོ། །རྣམ་སྤྲུལ་ཆོས་རྒྱལ་རིགས་ལྡན་སུམ་ཅུ་ལྔར། །གསོལ་བ་འདེབས་སོ༴ རྒྱུད་པ་འཛིན་ནོ་རྣམ་ཐར་མཚུངས་བྱིན་རློབས། །གྲུབ་པ་ཡོངས་གཙོ་དུས་ཞབས་འཇམ་རྡོ་རྗེ། །མཁས་གྲུབ་དུས་འཁོར་བོ་དྷི་ས་ཡབ་སྲས། །གསོལ་བ་འདེབས་སོ༴ རྒྱུད་པ་འཛིན་ནོ༴ མཁས་ཤིང་མཆོག་གཟིགས་པཎ་ཆེན་ཟླ་བ་མགོན། །འཇིག་རྟེན་མི་འགྱུར་འབྲོ་ལོ་ཤེས་རབ་གྲགས། །གསོལ་བ༴ རྒྱུད་པ་འཛིན༴ རྫོགས་སྦྱོར་ལམ་གྱིས་གྲུབ་བརྙེས་དཀོན་མཆོག་གསུམ། །མཁའ་འགྲོས་ཆོས་གྱུར་དཔའ་བོ་གནམ་ལ་བརྩེགས། །གསོལ་བ༴ རྒྱུད་པ་འཛིན་ནོ༴ འདུལ་འཛིན་ཡེ་ཤེས་ཆེས་རྙེད་དད་པའི་རྒྱལ། །འཇམ་དཔལ་གཞོན་ནུའི་རྣམ་འཕྲུལ་ཆོས་དབང་ཕྱུག །གསོལ་བ༴ རྒྱུད་པ་འཛིན་ནོ༴ ལྷག་ལྷས་རྗེས་བཟུང་མཁས་པ་ནམ་མཁའ་འོད། །མཁའ་སྤྱོད་ཡོངས་གཙོ་འཇའ་ལུས་ཇོ་འབུམ་ལ། །གསོལ་བ་འདེབས་སོ༴ རྒྱུད་པ་འཛིན་ནོ༴ ས་བཅུའི་དབང་ཕྱུག་ནམ་མཁའ་རྒྱལ་མཚན་པ། །འཇམ་དཔལ་དཔའ་བོས་རྗེས་བཟུང་ཤེས་རབ་འོད། །གསོལ་བ་འདེབས་སོ༴ རྒྱུད་པ་འཛིན་ནོ༴ སངས་རྒྱས་རབ་གསལ་ངོ་བོ་ཆོས་འོད་ཟེར། །རིགས་ལྡན་རྣམ་འཕྲུལ་ཀུན་སྤངས་ཞང་བརྩོན་འགྲུས། །གསོལ་བ་འདེབས་སོ༴ རྒྱུད་པ་འཛིན་ནོ༴ བྱང་སེམས་ཆེན་པོ་རྒྱལ་བ་ཡེ་ཤེས་དཔལ། །མཁས་བཙུན་བཟང་པོའི་མཐར་ཐུག་ཡོན་ཏན་མཚོ། །གསོལ་བ༴ རྒྱུད་པ་འཛིན་ནོ༴ པད་དཀར་འཆང་དངོས་ཀུན་མཁྱེན་དོལ་པོ་པ། །དེ་བསྟན་འཛིན་མཁས་ཕྱོགས་ལས་རྣམ་རྒྱལ་ཞབས། །གསོལ་བ༴ རྒྱུད་པ་འཛིན་ནོ༴ སྨྲ་བའི་སེངྒེ་ཉ་དབོན་ཀུན་དགའ་དཔལ། །འཁྲུལ་ཞིག་རྣལ་འབྱོར་གྲུབ་ཆེན་ཀུན་བློ་གྲོས། །གསོལ་བ༴ རྒྱུད་པ་འཛིན་ནོ༴ ལུང་རྟོགས་བསྟན་པ་ཡོངས་རྫོགས་དཀོན་མཆོག་བཟང་། །ངེས་དོན་གསལ་སྒྲོན་ནམ་མཁའ་ཆོས་སྐྱོང་མཚན། །གསོལ་བ༴ རྒྱུད་པ་འཛིན་ནོ༴ གནས་ལྔ་རིག་པ་ནམ་མཁའ་དཔལ་བཟང་པོ། །འཕགས་པའི་རྣམ་སྤྲུལ་ཡོངས་གྲགས་རིན་ཆེན་བཟང་། །གསོལ་བ༴ རྒྱུད་པ་འཛིན་ནོ༴ འཇམ་མགོན་གྲུབ་པ་སྤྱོད་འཆང་གྲོལ་མཆོག་ཞབས། །འདུལ་འཛིན་མཁས་གྲུབ་ལུང་རིགས་རྒྱ་མཚོའི་སྡེ། །གསོལ་བ༴ རྒྱུད་པ་འཛིན་ནོ༴ འཇིགས་མེད་ཤིང་རྟ་ཀུན་རྙིང་རྡོ་རྗེ་འཆང་། །རྒྱལ་ཚབ་གནས་བརྟན་རིག་ཆེན་རྒྱ་མཚོ་ཆེ། །གསོལ་བ༴ རྒྱུད་པ་འཛིན་ནོ༴ ཟབ་ལམ་བསྟན་པའི་སྲོག་འཛིན་བློ་གྲོས་རྒྱལ། །རྡོ་རྗེའི་རྣལ་འབྱོར་ངག་དབང་འཕྲིན་ལས་དཔལ། །གསོལ་བ༴ རྒྱུད་པ་འཛིན་ནོ༴ སྦས་པའི་སངས་རྒྱས་ཆོས་རྗེ་ཀུན་བཟང་དབང་། །རྒྱལ་སྲས་རིག་འཛིན་ཚེ་དབང་ནོར་བུའི་སྡེ། །གསོལ་བ༴ རྒྱུད་པ་འཛིན་ནོ༴ གདུལ་བྱ་ཐར་ལམ་མཆོག་གྱུར་ཕྱག་རྒྱ་ཆེ། །སྟོན་མཛད་མཚུངས་མེད་རྩ་བའི་བླ་མ་ལ། །གསོལ་བ༴ རྒྱུད་པ་འཛིན་ནོ༴ རྒྱུད་སྡེའི་མཐུ་ཡི་དམ་ཡོངས་ཀྱི་གཙོ། །དུས་ཀྱི་འཁོར་ལོ་བཅོམ་ལྡན་རྡོ་རྗེ་སེམས། །གསོལ་བ༴ རྒྱུད་པ་འཛིན་ནོ༴ རྒྱུད་ཀྱི་བདག་མོ་རྣལ་འབྱོར་མ་རིགས་བརྒྱ། །བར་ཆད་སེལ་མཛད་སྲུང་མ་དྲུག་ཅུ་ལ། །གསོལ་བ༴ རྒྱུད་པ་འཛིན་ནོ༴ དེ་ལྟར་ཟབ་ལམ་རྡོ་རྗེ་རྣལ་འབྱོར་གྱི། །རྒྱུད་པ་ཡིད་བཞིན་ནོར་བུས་གསོལ་བཏབ་མཐུས། །གང་གི་ཐུགས་རྗེ་བདག་བློ་དད་པ་དང་། །ངེས་འབྱུང་ལྷག་བསམ་རྣམ་དག་སྡོམ་གསུམ་བརྟན། །བྱིན་རླབས་ཞུགས་མཐུས་གཞན་སྟོང་ལྟ་བའི་གནད། །ཅི་བཞིན་བློར་ཆུད་རྡོ་རྗེ་རྣལ་འབྱོར་ལམ། །སྒོམ་པས་ཚེ་གཅིག་ཉིད་ལ་དབང་བཞིའི་དོན། །མ་ནོར་རྡོར་སེམས་འབྲས་བུ་ཐོབ་བྱིན་རློབས། །

ཅེས་རྒྱུད་རྒྱལ་དུས་ཀྱི་འཁོར་ལོའི་མན་ངག་ཟབ་ལམ་རྡོ་རྗེའི་རྣལ་འབྱོར་པ་ཡན་ལག་དྲུག་བྱིན་རླབས་རྒྱུད་པའི་བླ་མ་ལ་གསོལ་བ་འདེབས་པ་འདི་ཡང་རྒྱལ་ཁམས་པ་ཚེ་དབང་ནོར་བུས་ལྷོ་ཕྱོགས་ཀྱི་ཤམ་བྷ་ལ་ཇོ་ནང་དཔལ་གྱི་རི་ཁྲོད་དུ་ཤིང་སྟག་ནག་ཟླའི་ཚེས་ཉེར་གསུམ་མ་ཆོས་འཆད་པའི་ཐུན་སྐབས་གཅིག་ཏུ་བརྗོད་པའོ། །དགེའོ། །དགེའོ། །དགེའོ། །

ཐུགས་རྗེ་ཆེན་པོ་དམར་ཁྲིད་ཚེམ་བུ་ལུགས་ཀྱི་རྒྱུད་སྡེ་བདེ་ཆེན་ལྕགས་ཀྱུ།

༈ ཐུགས་རྗེ་ཆེན་པོ་དམར་ཁྲིད་ཚེམ་བུ་ལུགས་ཀྱི་རྒྱུད་སྡེ་བདེ་ཆེན་ལྕགས་ཀྱུ་ཞེས་བྱ་བ་བཞུགས་སོ། །

ཨོཾ། ཕྱོགས་དུས་སངས་རྒྱས་ཀུན་གྱི་བསྐྱེད་མཛད་སྙིང་རྗེ་ཡིས། །སྤྱན་རབ་རྟག་གཟིགས་དེ་དང་ལྷན་སྐྱེས་ཤེས་རབ་ཀྱི། །ཕ་རོལ་ཕྱིན་མ་དོན་དམ་འོད་གསལ་རྒྱལ་བ་ཀུན། །ཡུམ་གྱུར་བཅོམ་ལྡན་འདས་མ་དེ་ལ་ཕྱག་འཚལ་ལོ། །དྲི་མེད་འོད་གསལ་རང་ཤར་རྡོ་རྗེ་རྣལ་འབྱོར་མས། །རྗེས་བཟུང་ཡང་དག་དོན་ལ་གཡོ་མེད་ཚེམ་བུ་པ། །བདེ་ཆེན་མཆོག་བརྙེས་སྤྱི་བོ་ལྷ་ལས་བྱང་ཆུབ་འོད། །འཁྲུལ་སྣང་བཅོམ་མཁས་བྱང་ཆུབ་ཚུལ་ཁྲིམས་ཞེས་པ་ལ་འདུད། །ཆོས་ཉིད་ངོ་བོ་རབ་གཟིགས་བསོད་ནམས་སྙིང་པོའི་མཚན། །མཐའ་ཡས་ཞིང་སྦྱོང་རྒྱལ་སྲས་ཐུགས་རྗེས་བརྩོན་འགྲུས་ཞབས། །བྱང་སེམས་གཉིད་མཉེས་རྒྱལ་ཀུན་ཐུགས་གསང་ཡེ་ཤེས་འཆང་། །བསླབ་གསུམ་རྩེར་སོན་ཡོན་ཏན་རྒྱ་མཚོའི་སྡེ་ལ་འདུད། །ལག་ན་པདྨོ་མངོན་གསུམ་འགྲོ་ངོར་དོལ་པོ་བ། །ངེས་དོན་བསྟན་པའི་མངའ་བདག་ཉ་དབོན་ཀུན་དགའ་དཔལ། །སྙིང་པོ་སྨྲ་བའི་སེངྒེ་ཉག་ཕུ་བསོད་ནམས་བཟང་། །ཡོངས་འཛིན་ཆེན་པོ་འཇམ་དཔལ་བཟང་པོའི་ཞབས་ལ་འདུད། །སྐྱེ་ཀུན་བརྟན་པའི་གསལ་བྱེད་གཉན་པ་བཀྲ་ཤིས་དཔལ། །མཁས་གྱུར་ཁྱུ་མཆོག་མི་བསྐྱོད་མཐོན་མཐིང་ཅོད་པཎ་ཅན། །རྒྱལ་བ་འོད་མཚན་རྣམ་སྤྲུལ་གར་དབང་ལྔ་པའི་ཞབས། །དཀྱིལ་འཁོར་རྒྱ་མཚོའི་དབང་ཕྱུག་རྡོ་རྗེ་འཆང་ལ་འདུད། །ཆོས་རྣམས་མ་ལུས་མཁྱེན་གཟིགས་ཐུགས་མངའ་ཆོས་དབང་ཕྱུག །ས་བཅུའི་དབང་ཕྱུག་སྐྱེ་བ་བཅུ་པ་ཆོས་དབྱིངས་མཚན། །བསམ་བཞིན་འགྲོ་དོན་སྐུར་བཞེངས་མི་ཤེས་སྙིང་པོ་དཔལ། །ཀུན་ཏུ་ས་ལ་གཡོ་མེད་ཡེ་ཤེས་རྡོ་རྗེར་འདུད། །ཨོ་རྒྱན་མཚོ་སྐྱེས་རྒྱལ་དེ་གངས་རིའི་ཁྲོད་འདི་རུ། །འགྲོ་འདྲེན་བླ་མར་སྐུར་བསྟན་དཔལ་ཆེན་ཆོས་དོན་གྲུབ། །རྫོགས་སངས་རྒྱས་ཀུན་འཕྲིན་ལས་ཆིག་བསྡུས་བདག་གི་ཆེད། །རྨད་བྱུང་མཆོག་སྤྲུལ་བྱང་ཆུབ་མཆོག་གི་རྡོ་རྗེར་འདུད། །ཡོན་ཏན་བཀོད་པའི་ཞིང་ན་མགོན་མཆོག་ཚེ་དཔག་མེད། །གྱུར་ཀྱང་འགྲོ་ལ་བརྩེ་ཆེན་གྱིས་བཞུགས་སྤྲུལ་པའི་སྐུ། །རྒྱལ་སྲས་ཚུལ་བཟུང་མངའ་སྤང་གཉིས་པ་ཆོས་ཀྱི་རྗེ། །ཏྲེའོ་བྱང་ཆུབ་ཆོས་ཀྱི་དབང་པོར་གུས་པས་འདུད། །སྐྱེ་བ་དུ་མར་བྱང་ཆུབ་སྤྱད་ཆོས་དག་པ་ཡི། །སྨོན་ལམ་སྟོབས་ལྡན་རིག་འཛིན་ཚེ་དབང་ནོར་བུ་དཔལ། །རྒྱལ་བའི་གདུང་འཚོབ་མཁས་ཤིང་གྲུབ་གྱུར་སྐྱེས་བུ་མཆོག །འབྲེལ་ཚད་དོན་ལྡན་རྩ་བའི་བླ་མར་ཕྱག་འཚལ་ལོ། །མཐའ་ཡས་འགྲོ་རྣམས་འཁོར་བའི་རྒྱ་མཚོ་སྒྲོལ་བྱེད་པ། །ཐར་ལམ་གྲུ་འཛིན་དཔལ་ལྡན་རྩ་བའི་བླ་མ་མཆོག །དབྱེར་མེད་ཡི་དམ་རྒྱ་མཚོའི་རང་བཞིན་དཔལ། །སྤྱན་རས་གཟིགས་དབང་ཡིད་བཞིན་ནོར་བུ་པདྨ་མཆོག །མ་མོ་མཁའ་འགྲོ་མ་ཚོགས་བསྟན་བསྲུང་རྒྱ་མཚོར་བཅས། །དཀོན་མཆོག་རིན་ཆེན་རྩ་གསུམ་ལྷ་ཚོགས་ཁྱེད་རྣམས་ལ། །མི་ཕྱེད་རྩ་གཅིག་སྙིང་ཁོང་གཏིང་ནས་གསོལ་འདེབས་ཀྱི། །བདག་སོགས་ཁམས་གསུམ་འགྲོ་རྣམས་སྡུག་བསྔལ་མྱུར་གྲོལ་ཞིང་། །འདི་གཟུང་རྫོགས་སངས་རྒྱས་འབྲས་ནམ་བསྙེས་ཚེ་རབས་ཀུན། །གར་སྐྱེ་རང་དབང་ཐོབ་ནས་བྱང་ཆུབ་སྤྱོད་ལ་བསླབ། །མཐོ་རིས་འཕགས་ནོར་ཡོན་ཏན་ཡོངས་ཚང་ཕྱིན་དྲུག་རྫོགས། །འཕགས་མཆོག་པད་དཀར་འཆང་དང་མཚམས་བུ་ཆིག་འགྲུབ་ཤོག །དེ་ཡང་བདག་ནི་བཟོད་ཐོབ་བར་དུ་ཁམས་གསུམ་གནས། །ཡོངས་སྤངས་བདེ་ཆེན་ཞིང་དུ་སྐྱེས་ནས་བྱང་ཆུབ་སྤྱོད། །ཐེག་ཆེན་ས་ལམ་ཡོན་ཏན་མ་ལུས་སྔགས་ལམ་གྱིས། །ཚེ་གཅིག་ལ་བགྲོད་དབང་ཕྱུག་བརྒྱད་ལྡན་རྡོ་རྗེ་སེམས། །ཡིད་བཞིན་ནོར་བུ་བདེ་བ་མཆོག་གི་གནས་དམ་པར། །རྟག་ཏུ་རྒྱལ་བའི་གོ་འཕང་མྱུར་བ་ཉིད་ཐོབ་པ། །རྒྱལ་བ་རྣམས་ཀྱི་ཐུགས་བསྐྱེད་སྨོན་ལམ་མཐུ་ཆེན་པོས། །བདག་གི་ལྷག་བསམ་སྨོན་ལམ་འདི་འགྲུབ་བྱིན་གྱིས་རློབས། །

དེ་ལྟར་ཐུགས་རྗེ་ཆེན་པོ་ཚེམ་བུ་ནས་ལུགས་ཡི་དམ་སྤྱིའི་དམར་ཁྲིད་དུ་བྱུང་བ་དེའི་བརྒྱུད་པའི་གསོལ་འདེབས་འདི་ནི་ཕ་ཆོས་ཀྱི་རྒྱལ་པོ་ཏྲེ་བོ་ཆོས་ཀྱི་དབང་པོས་ཞབས་བསྐུལ་སྤྱི་བོས་བཏུད་པའི་མདོ་ཁམས་ཀྱི་སྔགས་འཆང་རིག་འཛིན་ཚེ་དབང་ནོར་བུའམ། ཀརྨ་རིན་ཆེན་མཆོག་དགའ་དགེ་བའི་དཔལ་གྱི་ལྕགས་ཕོ་ཁྱིའི་ལོ་ཞལ་གསར་དུ་ངོམ་པ་ཆུ་འཕྲུལ་ཟླ་བའི་ཚེས་བཟང་པོ་ཉི་ཤུར། གངས་ཅན་རི་བརྒྱུད་པཉྩ་ལིའི་མདུན་པ་འདུས་ཞེས་བོད་ཡུལ་གྱི་མཐར་ཐུག་ནས་རྒྱ་གར་ཡུལ་གྱི་ཆ་ཟུར་ཆག་སྐད་སྨྲ་བའི་ས་དེར་དོན་གཉེར་ཅན་འགས་བསྐུལ་ངོར་སྨྲས་པའོ། །མངྒ་ལཾ།

༈ ལས་འཕྲོའི་གཏེར་མ་ཐུགས་རྗེ་ཆེན་པོ་དོན་གསལ་སྒྲོན་མེའི་བརྒྱུད་འདེབས།

ཨོཾ་ཨཱ༔ཧཱུྃ་ཧྲཱི། ཁྱབ་བརྡལ་མཁའ་མཉམ་ཆོས་དབྱིངས་ཞིང་ཁམས་སུ། །དང་པོའི་སངས་རྒྱས་རྒྱལ་ཀུན་སྤྱི་དཔལ་ཆེ། །སྤྱན་རས་གཟིགས་དབང་ཀུན་བཟང་ཡབ་ཡུམ་ལ། །བདག་གི་གསོལ་འདེབས་དངོས་གྲུབ་མཆོག་ཀུན་སྩོལ། །ཡེ་ཤེས་ལྔ་ལྡན་འོད་ལྔའི་ཞིང་ཁམས་སུ། །ཡེ་ཤེས་རྩལ་རྫོགས་བདེ་བ་ཆེན་པོའི་སྐུ། །སྤྱན་རས་གཟིགས་དབང་རིགས་ལྔ་ཡབ་ཡུམ་ལ། །བདག་གི་གསོལ་འདེབས༴ གདུལ་བྱ་རྒྱས་པ་སྣང་བ་ཚོགས་ཞིང་དུ། །རྒྱུད་པ་གདོང་སྤྲུག་ཁམས་གསུམ་འགྲོ་བའི་མགོན། །སྤྱན་རས་གཟིགས་དབང་ཐུབ་པ་རིགས་དྲུག་ལ། །བདག་གི་གསོལ་འདེབས༴ རྒྱལ་བའི་འཕྲིན་ལས་རྒྱུན་ཆད་མེད་ཞིང་དུ། །སངས་རྒྱས་ཀུན་གྱིས་ཐུགས་རྗེས་འདུས་པའི་སྤྱི། །སྤྱན་རས་གཟིགས་དབང་པདྨ་འབྱུང་གནས་ལ། །བདག་གི་གསོལ༴ ཐབས་ཤེས་ཟུང་འཇུག་ཆོས་ཀྱི་ཞིང་ཁམས་སུ། །རྡོ་རྗེ་ཆོས་དང་དབྱེར་མེད་ལྷ་མོའི་ཚུལ། །སྤྱན་རས་གཟིགས་དབང་ཡེ་ཤེས་མཚོ་རྒྱལ་ལ། །བདག་གི་གསོལ་འདེབས༴ སྨོན་ལམ་རྣམ་པར་དག་པའི་ཞིང་ཁམས་སུ། །སྤྱན་རས་གཟིགས་ཀྱི་ཟབ་གཏེར་རྒྱ་བཀྲོལ་ནས། །སྐལ་ལྡན་འགྲོ་འདུལ་ལམ་འཕྲོ་གླིང་པ་ལ། །བདག་གི་གསོལ་འདེབས༴ གཏེར་ཆོས་ཞིང་དུ་གཏེར་སྤྱོད་རིག་འཛིན་གདུང་། །འོད་གསལ་རྒྱ་མཚོ་ལུང་རིགས་རྒྱ་མཚོའི་སྡེ། །བསྟན་འཛིན་དབང་བསྒྱུར་ཨོ་རྒྱན་འཕྲིན་ལས། །བདག་གི་གསོལ་འདེབས༴ པདྨས་ལུང་བསྟན་གདུང་རབས་ལྔ་རྫོགས་མཐའ། །དམ་ཆོས་ཚངས་པའི་དབྱངས་ཀྱི་གཞན་ཕན་ཅན། །རིག་འཛིན་རྩལ་འཆང་པདྨ་ཚངས་དབྱངས་ལ། །བདག་གི་གསོལ་འདེབས༴ ཐུགས་རྗེ་ཆེན་པོའི་ཟབ་ཆོས་ཞིང་ཁམས་སུ། །དོན་གསལ་སྒྲོན་མེ་སྨིན་གྲོལ་ཁྲིད་ཀྱི་རྒྱུན། །བྱི་བཞི་བཞུགས་གྱུར་ཚེ་དབང་ནོར་བུ་ལ། །བདག་གི་གསོལ་འདེབས་དངོས་གྲུབ་མཆོག་ཀུན་སྩོལ། །སྤྱི་གཙུག་བདེ་ཆེན་འཁོར་ལོའི་ཞིང་ཁམས་སུ། །ཐུགས་རྗེ་ཆེན་པོའི་དབང་ཁྲིད་མན་ངག་མཛོད། །ཉེར་མཛད་འདྲེན་མཆོག་རྩ་བའི་བླ་མ་ལ། །བདག་གི་གསོལ་འདེབས༴ དེ་ལྟར་འཕགས་མཆོག་སྤྱན་རཟ་གཟིགས་དབང་ཕྱུག །ཐུགས་རྗེ་ཆེན་པོའི་དོན་གསལ་སྒྲོན་མེ་ཡི། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །མཁའ་འགྲོ་ཆོས་སྐྱོང་རྣམས་ལ་གསོལ་བཏབ་མཐུས། །སྔོན་འགྲོ་ངེས་འབྱུང་བསམ་པས་བརྒྱུད་ཁོལ་ཞིང་། །ཚོགས་བསགས་སྒྲིབ་སྦྱངས་ལམ་ལ་ངལ་མེད་བརྩོན། །བླ་མའི་མོས་གུས་སྙིང་གི་དཀྱིལ་དུ་ཐེབས། །དབང་བཞིའི་བདག་བརྒྱུད་མ་ལུས་ཡོངས་སུ་སྨིན། །གྲོལ་བྱེད་བསྐྱེད་པས་མ་དག་དངོས་སྣང་ཁེག །སྔགས་ཀྱི་ནུས་པས་རླུང་གི་འཕོ་བ་དག །ཡེ་ཤེས་འཁོར་བཅས་མི་འགྱུར་བདེ་བ་ཆེ། །ཟབ་གསལ་དབྱེར་མེད་གདོན་ནས་དག་པའི་ཁམས། །བདེ་གཤེགས་སྙིང་པོ་གློ་བུར་དྲི་མའི་ཚོགས། །ཡོངས་སྤངས་རྡོ་རྗེ་བཞིའི་རང་བཞིན་ཉིད། །རྒྱལ་བ་གཟི་བརྗིད་འོད་དཔག་མེད་མགོན་ཆེ། །སྤྱན་རས་གཟིགས་དབང་ཅི་འདྲ་དེ་བཞིན་དུ། །ཕ་མའི་རང་གཞན་ནམ་མཁའ་མཐར་ཐུག་པའི། །སེམས་ཅན་ཀུན་གྱིས་མྱུར་བ་ཉིད་ཐོབ་ནས། །ཀུན་ནས་ཀུན་ཏུ་བཟང་པོའི་དཀྱིལ་འཁོར་ཉིད། །རྒྱས་ཤིང་རབ་ཏུ་རྒྱས་པ་ཉིད་གྱུར་ཅིག །

ཟབ་ལམ་ནེ་གུ་ཆོས་དྲུག་གི་བླ་མ་བརྒྱུད་པའི་གསོལ་འདེབས་བྱིན་རླབས་སྤྲིན་ཕུང་།

༈ ཟབ་ལམ་ནེ་གུ་ཆོས་དྲུག་གི་བླ་མ་བརྒྱུད་པའི་གསོལ་འདེབས་བྱིན་རླབས་སྤྲིན་ཕུང་བཞུགས་སོ། །

ན་མོ་གུ་རུ། གནས་སྤྱི་གཙུག་ཉི་ཟླའི་གདན་སྟེང་དུ། །དྲིན་ཅན་རྩ་བའི་བླ་མ་ལ་གསོལ་བ་འདེབས། །གསོལ་བ་འདེབས་སོ་བླ་མ་རིན་པོ་ཆེ། །གསོལ་བ་འདེབས་སོ་བདག་བརྒྱུད་བྱིན་གྱིས་རློབས། །གནས་འོག་མིན་ཆོས་དབྱིངས་ཕོ་བྲང་དུ། །ཆོས་སྐུ་རྡོ་རྗེ་འཆང་ཆེན་ལ༴ གནས་སེང་ལྡེང་འཁྲིག་པའི་ནགས་ཁྲོད་དུ། །ཡེ་ཤེས་མཁའ་འགྲོ་ནེ་གུ་ལ༴ ནུབ་བདེ་བ་ཅན་གྱི་ཞིང་ཁམས་སུ། །མཁས་གྲུབ་ཁྱུང་པོ་རྣལ་འབྱོར་ལ༴ ཤར་མངོན་པར་དགའ་བའི་ཞིང་ཁམས་སུ། །རྨོག་ཅོག་པ་རིན་ཆེན་བཅུ་བདུན་ལ༴ ཤར་འོད་འཕྲོ་ཅན་གྱི་ཞིང་ཁམས་སུ། །དབོན་སྟོན་སྐྱེར་སྒང་པ་ཆེན་པོ་ལ༴ ཤར་མེ་ཏོག་བཀྲམ་པའི་ཞིང་ཁམས་སུ། །གཉེན་སྟོན་སྦས་པའི་སངས་རྒྱས་ལ༴ གནས་དག་པ་ཤར་ཕྱོགས་ཀྱི་ཞིང་ཁམས་སུ། །འགྲོ་མགོན་སངས་རྒྱས་སྟོན་པ་ལ༴ ཆོས་རྗེ་སྟོན་པའི་ཞབས་དྲུང་དུ། །མཁས་གྲུབ་གཙང་མ་ཤངས་སྟོན་ལ། །ནུབ་པདྨོ་ཅན་གྱིས་ཞིང་ཁམས་སུ། །ཁྱུང་པོ་ཚུལ་ཁྲིམས་མགོན་པོ༴ སྟེང་དགའ་ལྡན་ལྷའི་བཞུགས་གནས་སུ། །བྱ་བྲལ་རི་ཁྲོད་རས་ཆེན་ལ༴ བྱང་ཤམྦྷ་ལ་ཡི་ཕོ་བྲང་དུ། །ཤང་དཀར་བ་རིན་ཆེན་རྒྱལ་མཚན་ལ༴ ལྷ་མི་འཁྲུག་མགོན་པོའི་ཞིང་ཁམས་སུ། །མཉམ་མེད་སངས་རྒྱས་དཔལ་བཟང་ལ༴ རྗེ་བླ་མ་གོང་མའི་དག་ཞིང་དུ། །གྲུབ་ཆེན་ནམ་མཁའ་རྒྱལ་མཚན་ལ༴ ཞིང་མེ་ཏོག་པདྨའི་ཟེའུ་འབྲུ་ལ། །རྒྱ་སྒོམ་ལེགས་པ་རྒྱལ་མཚན་ལ༴ གནས་ཕྱོགས་མེད་ཡངས་པའི་རྒྱལ་ཁམས་སུ། །གྲོལ་མཆོག་སེམས་ཀྱི་མདུད་གྲོལ་ལ༴ གནས་བྲག་སྟོད་ཆོས་སྐུའི་ཕོ་བྲང་དུ། །ཆོས་སྐུ་ལྷ་དབང་གྲགས་པ་ལ༴ གནས་སྨན་པའི་རྒྱལ་པོའི་ཞིང་ཁམས་སུ། །རྗེ་བཙུན་ཏཱ་ར་ཏཱ་ཐ་ལ༴ གནས་པདྨ་འོད་ཀྱི་ཕོ་བྲང་ནས། །རྗེ་བཙུན་ཡེ་ཤེས་རྒྱ་མཚོ་ལ༴ གནས་དག་པ་སྤྲུལ་སྐུའི་ཞིང་ཁམས་ནས། །བྱམས་པ་ཡོན་ཏན་མགོན་པོ་ལ༴ གནས་འོད་གསལ་མཁའ་སྤྱོད་ཞིང་ཁམས་ནས། །འཇའ་ལུས་མགོན་པོ་དཔལ་འབྱོར་ལ༴ གནས་མངོན་པར་དགའ་བའི་ཞིང་ཁམས་ནས། །གྲུབ་མཆོག་མགོན་པོ་གྲགས་པ་ལ༴ གནས་བདུད་རྩི་རྒྱུན་གྱི་ཡོངས་རྫོགས་ནས། །ཁྱབ་བདག་མགོན་པོ་རྣམ་རྒྱལ་ལ༴ གནས་འོད་ཡུག་ཕྱི་གོ་ཛ་ར་ནས། །རིག་འཛིན་ཚེ་དབང་ནོར་བུ་ལ༴ སེམས་དག་པའི་འདུ་ས་ངེས་མེད་དུ། །མཆེད་ལྕམ་རྡོ་རྗེ་སྤུན་གྲོགས་ལ༴ གནས་རང་ལུས་རྒྱལ་བའི་དཀྱིལ་འཁོར་དུ། །ཡི་དམ་རྒྱུད་སྡེའི་ལྷ་ཚོགས་ལ༴ གནས་བསིལ་བའི་ཚལ་གྱི་དུར་ཁྲོད་དུ། །མྱུར་མཛད་ཡེ་ཤེས་མགོན་པོ་ལ༴ ཡུལ་ཉི་ཤུ་རྩ་བཞིའི་གནས་མཆོག་ཏུ། །ཆོས་བདག་དཔའ་བོ་མཁའ་འགྲོ་ལ་གསོལ་བ་འདེབས། །གསོལ་བ༴༝

ཕྱག་ཆེན་ལྷན་སྐྱེས་གསོལ་འདེབས་ཉུང་ངུ་བསྡུས་པ།

༈ ཕྱག་ཆེན་ལྷན་སྐྱེས་གསོལ་འདེབས་ཉུང་ངུ་བསྡུས་པ་བཞུགས།

ཨོཾ་མ་ཧཱ་མུ་དྲ་ཡེ། རྡོ་རྗེ་འཆང་དབང་ཏེ་ལོ་ནཱ་རོ་པ། །མར་པ་མི་ལ་དྭགས་པོ་རིན་པོ་ཆེ། །ཕག་གྲུ་གླིང་རས་འགྲོ་མགོན་རྒྱལ་རས་ཞབས། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །རྒྱལ་བ་རྒོད་ཚང་ལྷ་གདོང་སྤྱན་སྔ་པ། །ཟུར་ཕུ་པ་དང་སྐྱེས་མཆོག་འབའ་ར་བ། །སྟག་མཚང་རས་ཆེན་བརྩོན་འགྲུས་དར་པོ་དྲུང་ཆེན་ཀུན་དགའ་ཆུ་བོ་རི་པ་རྣམ་རྒྱལ་ཞབས། །གསོལ་བ༴ བཀའ་དྲིན་གསུམ་ལྡན་ཨོ་རྒྱན་རྒྱལ་མཚན་དཔལ། །ཕྱག་ཆེན་ལྷན་སྐྱེས་བརྒྱུད་པའི་བླ་མ་ལྷ། །དཔལ་བོ་མཁའ་འགྲོ་སྲུང་མར་བཅས་པ་ལ། །གསོལ་བ༴ བྱིན་རླབས་རྒྱུད་པ་བླ་མའི་ཡེ་ཤེས་མཐུས། །བདག་རྒྱུད་དེ་རིང་ཉིད་དུ་སྨིན་ཅིང་གྲོལ། །ཕྱག་ཅེས་གཉིས་མེད་ཡེ་ཤེས་ངོ་བོ་ལ། །རྒྱ་ཞེས་འཁོར་བའི་མདུད་པ་ཀུན་གྲོལ་བ། །ཆེན་པོ་ཟུང་འཇུག་འོད་གསལ་མངོན་གྱུར་པའི། །འབྲས་བུ་སྐད་ཅིག་མ་འདིར་ཐོབ་བྱིན་རློབས། །

ཅེས་ཕྱག་རྒྱ་ཆེན་པོ་རྒྱུད་པའི་བྱེ་བྲག་འདི་ཡང་༸ཚེ་དབང་ནོར་བུས་ལྕགས་ཁྱི་རྒྱལ་ཟླའི་ཚེས་བཟང་བཅོ་ལྔར་སྨྲས་པའི་ཡིག་རིགས་སྤྲུལ་པའི་སྐུ་འཕྲིན་ལས་བསྟན་འཛིན་ནོ། །

ཕྱག་རྒྱ་ཆེན་པོ་ཡི་གེ་བཞི་པའི་དོན་ཁྲིད་བརྒྱུད་པའི་བླ་མར་གསོལ་འདེབས་བསྡུས་པ་རིན་ཆེན་འཕྲེང་བ།

༈ ཕྱག་རྒྱ་ཆེན་པོ་ཡི་གེ་བཞི་པའི་དོན་ཁྲིད་བརྒྱུད་པའི་བླ་མར་གསོལ་འདེབས་བསྡུས་པ་རིན་ཆེན་འཕྲེང་བ་བཞུགས་སོ། །

ན་མོ་མ་ཧཱ་མུ་ཏྲ་ཤྲཱི་ཧེ་རུ་ཀ །གཉིས་མེད་ཆོས་སྐུ་ཡོངས་ཟླུམ་རྡོ་རྗེ་འཆང་། །གསང་གསུམ་དབང་བསྒྱུར་རྒྱལ་སྲས་རྡོ་རྗེ་སྙིང་། །གསོལ་བ་འདེབས་སོ་ལྷན་སྐྱེས་རང་ངོ་ཤེས། །སྐུ་གསུམ་འབྲས་བུ་བརྙེས་པར་བྱིན་གྱིས་རློབས། །རྡོ་རྗེའི་སྐུ་བརྙེས་སྤྲུལ་སྐུ་ཏེ་ལོ་པ། །ཚངས་རིགས་མཁས་མཆོག་གྲུབ་ཆེན་ན་རོ་པ། །གསོལ་བ་འདེབས་སོ༴ འདྲེས་འོ་སྐུ་གསུམ་འབྲས་བུ༴ གཉིས་སྨྲ་རྒྱུད་སྡེའི་དབང་ཕྱུག་ཆོས་བློ་གྲོས། །ཟད་པའི་ཟིལ་གནོན་མཆོག་གྲུབ་བཞད་རྡོ་རྗེ། །གསོལ་བ་འདེབས་སོ༴ སྐུ་གསུམ༴ ཏིང་འཛིན་ཁྲག་ཁྲིག་དབང་ཐོབ་མཚོ་མཛད་ཞབས། །འཁོར་བ་འཇིག་མཛད་དཔའ་བོ་ཕག་གྲུ་པ། །གསོལ་བ་འདེབས་སོ༴ སྐུ་གསུམ༴ འཁྲུལ་ཞིག་རྣལ་འབྱོར་སྒེར་བསྒོམ་ཞིག་པོ་ཆེ། །འོད་གསལ་མངོན་གྱུར་གསེར་ལྡིང་ཀུ་མ་ར། །གསོལ་བ་འདེབས་སོ༴ སྐུ་གསུམ༴ མཆོག་གི་དངོས་གྲུབ་ཡོངས་བརྙེས་ཆོས་འོད་ཟེར། །རྣལ་འབྱོར་དབང་ཕྱུག་ཐུགས་རྗེ་བརྩོན་འགྲུས་དཔལ། །གསོལ་བ༴ སྐུ་གསུམ༴ བྱང་ཆུབ་སེམས་དཔའ་རྒྱལ་བ་ཡེ་ཤེས་སྡེ། །མཁས་ཤིང་གྲུབ་གྱུར་བློ་གྲོས་བཟང་པོ་པ། །གསོལ་བ༴ སྐུ་གསུམ༴ གནས་ལུགས་མངོན་གཟིགས་རསྨི་སིདྷའི་ཞབས། །འོད་གསལ་འཁོར་ཡུག་ནམ་མཁའ་རྒྱལ་བའི་མཚན། །གསོལ་བ༴ སྐུ་གསུམ༴ མཁས་བཙུན་བཟང་པོར་གྱུར་བ་ངག་དབང་པོ། །གནས་ལྔ་རིག་པ་སྟག་ལུང་ངག་དབང་གྲགས། །གསོལ་བ༴ སྐུ་གསུམ༴ སྦས་པའི་སངས་རྒྱས་སྨྲ་བའི་སེངྒེ་མཆོག །ཕྱོགས་ལས་རྣམ་རྒྱལ་གཙང་སྨྱོན་ཧེ་རུ་ཀ །གསོལ་བ༴ སྐུ་གསུམ༴ སྙན་བརྒྱུད་བསྟན་པའི་སྒྲོན་མེ་ལྷ་རྒོད་གཉིས། །ལུང་རྟོགས་དབང་ཕྱུག་བློ་གྲོས་རབ་ཡངས་པ། །གསོལ་བ༴ སྐུ་གསུམ༴ སྒྲུབ་རྒྱུད་གསལ་བྱེད་གྲུབ་ཐོབ་དབང་པོ་ཆེ། །དེས་དོན་ཕྱོགས་མཐར་རྒྱས་མཛད་སུ་མ་ཏི། །གསོལ་བ༴ སྐུ་གསུམ༴ རིམ་གཉིས་གྲུབ་པ་རྒྱལ་དབང་སེང་གེའི་སྒྲ། །སྦས་ཚུལ་མཆོག་གྲུབ་ཤཱཀྱའི་སིངྷའི་ཞབས། །གསོལ་བ༴ སྐུ་གསུམ༴ བླ་མེད་བྱིན་རླབས་ཡེ་ཤེས་བརྒྱུད་ལ་སྐྱེ། །རྟོགས་པའི་གར་མཁན་ཚེ་དབང་ནོར་བུའི་སྡེ། །གསོལ་བ༴ སྐུ་གསུམ༴ མཐའ་བྲལ་གནས་ལུགས་ཟབ་མོ་ཕྱག་རྒྱ་ཆེ། །མངོན་སུམ་འདོམས་མཛད་རྩ་བའི་བླ་མ་ལ། །གསོལ་བ༴ སྐུ་གསུམ༴ རབ་འབྱམས་དཀྱིལ་འཁོར་ཡོངས་ཀྱི་ངོ་བོ་ཉིད། །བླ་མ་བདེ་དགྱེས་ཧེ་རུ་ཀ་ཡི་དམ། །གསོལ་བ༴ སྐུ་གསུམ༴ ས་གསུམ་ལ་བསྟན་ལྷན་སྐྱེས་བདེ་བ་ཆེ། །རྣལ་འབྱོར་མཆོག་སྦྱིན་ཡེ་ཤེས་ཕོ་ཉ་མ། །གསོལ་བ༴ སྐུ་གསུམ༴ རང་གི་ངོ་བོ་རྣམ་པ་གཞན་གྱིས་ཚུལ། །དམ་ལྡན་སྐྱོང་མཛད་མ་མགོན་རྒྱ་མཚོ་ལ། །གསོལ་བ༴ སྐུ་གསུམ༴ དེ་ལྟར་ཕྱག་ཆེན་རྩ་བ་རྒྱུད་པ་ཡིས། །བླ་མ་ཡི་དམ་མཁའ་འགྲོ་ཆོས་སྲུང་ལ། །རྩེ་གཅིག་གསོལ་བཏབ་པའི་ནུས་སྦྱིན་གྱིས། །མཐའ་བཞི་རྐྱེན་གསུམ་བྲལ་བའི་ཕྱག་རྒྱ་ཆེ། །ཆོས་ཉིད་གནས་ལུགས་བདེར་གཤེགས་སྙིང་པོའི་དོན། །ཇི་བཞིན་བླ་མའི་བྱིན་རླབས་འཕོ་བ་མཆོག །སྙིང་ལ་ཞུགས་པའི་ནུས་པ་མངོན་དུ་བྱས། །སྐུ་གསུམ་འབྲས་བུ་མྱུར་དུ་སྨིན་པར་ཤོག །སྐྱེ་འགག་གནས་བཞིའི་རྩ་བྲལ་རྒྱུ་ཡི་སྟོང་། །རྐྱེན་བྲལ་བཞག་ཐབས་དྲུག་གི་རང་ངོ་འཕྲོད། །རེ་དོགས་གང་དུ་མི་གནས་གོམས་པ་ཆོད། །གཉིས་མེད་ཡེ་ཤེས་ལམ་ཁྱེར་རྣམ་པ་དྲུག །ཧེ་རུ་ཀ་ཤྲཱི་རྡོ་རྗེའི་རང་སྒྲ་ཆེ། །ཕྱག་རྒྱ་ཆེན་པོ་ཡི་གེ་རྣམ་པ་བཞི། །དབང་དོན་ཐུན་དྲུག་ལྷན་སྐྱེས་གཉུག་མའི་ཁམས། །གདན་འདི་ཉིད་དུ་གྲུབ་པ་ཐོབ་པར་ཤོག །ཨ་མ་ན་སི་སྤྲོས་བྲལ་ཆོས་ཉིད་དོན། །ལྟ་སྒོམ་སྤྱོད་པའི་རིམ་པ་མཐར་ཕྱིན་ནས། །རྒྱལ་ཀུན་ཐུགས་རྗེའི་འཕྲིན་ལས་སྒོ་རབ་འབྱམས། །མ་ལུས་བདག་གི་མྱུར་དུ་འགྲུབ་བྱིན་རློབས། །

ཅེས་ཕྱག་རྒྱ་ཆེན་པོ་ཡི་གེ་བཞི་པའི་བརྒྱུད་པའི་གསོལ་འདེབས་འདི་ནི་སྨོན་མཐོང་མཁན་པོ་ཆོས་ཀྱི་སྤྱན་ལྡན་ཀུན་དགའ་ཕུན་ཚོགས་དཔལ་བཟང་པོས་གསུང་གི་བསྐུལ་བར་བརྟེན་རིག་པ་འཛིན་པ་ཚེ་དབང་ནོར་བུས་མངའ་རིས་སྨད་གློ་བོ་སྨོན་ཐང་རྒྱལ་པོའི་ཁབ་ཏུ་སྦྱར་བའི་ཡི་གེ་པ་ནི་རིང་ལུགས་རྒྱུད་སྡེ་སྨྲ་བའི་མཆོག་གི་སྤྲུལ་སྐུ་འཕྲིན་ལས་བསྟན་འཛིན་ནོ། །

ཕྱག་རྒྱ་ཆེན་པོ་སྙན་བརྒྱུད་ཟུང་འབྲེལ་གྱི་བརྒྱུད་འདེབས་བྱིན་རླབས་གཏེར་མཛོད་འབྱེད་ཅིང་ཉམས་རྟོགས་འབྲས་བུ་མྱུར་དུ་སྨིན་བྱེད།

༈ ཕྱག་རྒྱ་ཆེན་པོ་སྙན་བརྒྱུད་ཟུང་འབྲེལ་གྱི་བརྒྱུད་འདེབས་བྱིན་རླབས་གཏེར་མཛོད་འབྱེད་ཅིང་ཉམས་རྟོགས་འབྲས་བུ་མྱུར་དུ་སྨིན་བྱེད་བཞུགས་སོ། །

ཨོཾ་ཨཱ༔ཧཱུྃ༔ ཟུང་འཇུག་ཡན་ལག་ཆེན་པོ་བདུན་ལྡན་ཅིང་། །དབང་ཕྱུག་ཡོན་ཏན་བརྒྱད་ཀྱི་བདག་ཉིད་ཆེ། །རིགས་དྲུག་སངས་རྒྱས་བཅོམ་ལྡན་རྡོ་རྗེ་འཆང་། །གསོལ་བ་འདེབས་སོ་བྱིན་རློབས་རྟོགས་མཆོག་སྩོལ། །བསམ་གྱིས་མི་ཁྱབ་བཱ་གིའི་དཀྱིལ་འཁོར་དུ། །ཟག་བྲལ་ལྷན་ཅིག་སྐྱེས་དགར་སྦྱོར་བྱེད་པ། །མི་གནས་བཙུན་མོ་རྡོ་རྗེ་རྣལ་འབྱོར་མར། །གསོལ་བ་འདེབས་སོ༴ རྡོ་རྗེ་ཅན་བདག་སྒྱུ་འཕྲུལ་རོལ་པའི་གར། །བདེན་གཉིས་མཐའ་ཀླས་མཛད་པ་དཔག་དཀའ་སྟོན། །བྲམ་ཟེའི་ཁྱིའུ་འོད་ལྡན་ཏེ་ལོ་པ། །གསོལ་བ༴ ལྔ་རིག་མཐར་ཕྱིན་མཁའ་འགྲོས་ལུང་བསྟན་ཐོབ། །བཅུ་གཉིས་དཀའ་སྤྱོད་དབང་དོན་མཐའ་རུ་ཕྱིན། །བརྟུལ་ཞུགས་ཆེར་སྤྱོད་བྲམ་ཟེ་ནཱ་རོ་པ། །གསོལ་བ༴ སྙད་གཉིས་མཐར་ཕྱིན་དཀའ་བ་ཁྱད་དུ་བསད། །རྒྱུད་སྡེ་བཞི་བརྙེས་དངོས་གྲུབ་རྣམས་གཉིད་སྤྱོད། །གྲུབ་པའི་དབང་ཕྱུག་སྨར་སྟོན་ཆོས་བློ་གྲོས། །གསོལ་བ༴ བླ་མའི་ལུང་བསྟན་དཔའ་སྤྱོད་བསྒྲུབ་ལ་བརྩོན། །རླུང་སེམས་དབུར་ཚུད་འབྱུང་ལྔ་རང་དབང་བརྙེས། །འཇིག་རྟེན་ཆོས་བཅོམ་མི་ལ་བཞད་རྡོ་རྗེ། །གསོལ་བ༴ རྒྱལ་བས་ཏིང་འཛིན་རྒྱལ་མདོར་ལུང་བསྟན་པའི། །མི་སློབ་མཐར་ཕྱིན་སྒྲུབ་བརྒྱུད་གཙུག་གི་རྒྱུན། །མདོ་སྔགས་གཉིས་སྟོན་སྙི་བསྒོམ་ཟླ་འོད་གཞོན། །གསོལ་བ༴ བསྐལ་བཟང་སངས་རྒྱས་དྲུག་པ་སེངྒེ་ཉིད། །ཚངས་སྤྱོད་མཐོན་མཐིང་བན་འཆང་ཀརྨ་པ། །དུས་གསུམ་མཁྱེན་གྱུར་ཀྲེ་བོ་རྟོགས་གྲོལ་ཞབས། །གསོལ་བ༴ ཡི་དམ་ཞལ་གཟིགས་ཆོས་སྐྱོང་བྲན་དུ་ཁོལ། །རླུང་སེམས་དབང་ཚུད་འཕྲིན་ལས་བསམ་མི་ཁྱབ། །འཁྲུལ་ཞིག་རས་ཆེན་བསོད་ནམས་གྲགས་པ་ཆེ། །གསོལ་བ༴ བྱིན་རླབས་སྐད་ཅིག་ཉིད་ཞུགས་བསྒོམ་མེད་རྟོགས། །མི་དང་མི་མིན་དབང་བསྡུད་ཆོས་ལ་བཀོད། །རྒྱལ་སྲས་པོམ་བྲག་བསོད་ནམས་རྡོ་རྗེ་རྒྱལ། །གསོལ་བ༴ མི་མཐུན་ཀུན་འཇོམས་འཇིགས་མེད་རྡོ་རྗེ་འཆང་། །སྣང་བ་དབང་ཐོབ་རྫུ་འཕྲུལ་ནུས་པའི་མཐུ། །དཔག་མེད་ཞྭ་ནག་ཅན་གྱུར་ཀར་པཀྴི། །གསོལ་བ༴ རྟོགས་པ་ཀློང་གྱུར་ཨོ་རྒྱན་ལ་སོགས་ཡུལ། །དགུར་གཤེགས་བརྟུལ་ཞུགས་རྟེན་འབྲེལ་གྲུབ་པའི་མཆོག །རྣལ་འབྱོར་དབང་ཕྱུག་སེངྒེ་དཔལ་ཆེན་པོར། །གསོལ་བ༴ ཀུན་བཟང་རྡོ་རྗེ་ལྗགས་ཀྱི་ཐལ་གྱུར་དུ། །ལུང་བསྟན་ཐམས་ཅད་མཁྱེན་གྱུར་རྒྱལ་བའི་དབང་། །ཅོད་པན་གསུམ་པ་ཀརྨ་རང་བྱུང་ཞབས། །གསོལ་བ༴ ལྔ་རིག་ལ་སོགས་མདོ་སྔགས་ཆོས་སྤྱི་ལ། །མཁས་ཤིང་ཁྱད་པར་གསང་ཆེན་སྙིང་པོ་ཉིད། །གྲུབ་བརྙེས་གྱུར་པ་གཡུང་སྟོན་རྡོ་རྗེ་དཔལ། །གསོལ་བ༴ བྱང་ཆུབ་སེམས་དཔའ་བསླབ་གསུམ་སྙིང་པོའི་དོན། །ལེགས་བསྟན་ཐོགས་མེད་མཁྱེན་བརྩེ་མཐར་ཕྱིན་པ། །ཀརྨ་སྐུ་བཞི་རང་བྱུང་རོལ་པ་རྗེ། །གསོལ་བ༴ ཞྭ་དམར་ཅོད་པན་འཛིན་གྱུར་མཁའ་ལ་སྤྱོད། །རྟོགས་ལྡན་དྲི་མེད་དཔལ་གྱིས་ཡེ་ཤེས་ཞབས། །གསོལ་བ༴ འཕགས་མཆོག་ལག་ན་པད་དཀར་གདུལ་བྱའི་ངོར། །ཉེར་བརྟེན་ལུང་རྟོགས་མཐར་སོན་ས་སྐྱོང་གིས། །གཙུག་རྒྱན་ཀརྨ་དེ་བཞིན་གཤེགས་ཆོས་དཔལ། །གསོལ་བ༴ རྒྱལ་བ་གཟི་བརྗིད་མཐའ་ཡས་བྱང་སེམས་ཚུལ། །སྣང་ནས་ཟབ་གདམས་སྙན་བརྒྱུད་མཛོད། །མངའ་བདག་མེ་ཉག་རྣལ་འབྱོར་བློ་རིན་ཆེ། །གསོལ་བ༴ ཇི་བཞིན་གནས་ལུགས་རྩེ་མོར་མངོན་གཟིགས་ཤིང་། །ཉམས་ལེན་ཆོས་སྐུའི་དགོངས་པ་ཉིད་གྱུར་པའི། །ཚབ་བཞིར་རྣལ་འབྱོར་འོད་ཟེར་སེངྒེ་བ། །གསོལ་བ༴ ལུགས་གཉིས་དཔལ་གྱུར་བཤད་སྒྲུབ་བསྟན་པ་ཉིད། །རྒྱ་ཆེར་བསྐྱེད་མཁས་སྙན་བརྒྱུད་སྒྲོན་མེ་མཆོག །རྒྱལ་བའི་སྲས་པོ་ཇོ་གདན་བློ་གྲོས་གྲགས། །གསོལ་བ༴ ཨུ་རྒྱན་གུ་རུའི་ལུང་བསྟན་ཕྱག་རྫོགས་ཀྱིས། །ཉམས་ལེན་མཐར་ཕྱིན་ངོ་མཚར་མཛད་པ་ཆེ། །སྟོན་མཛད་བྱ་བཏང་བློ་གྲོས་རྒྱ་མཚོའི་ཞབས། །གསོལ་བ༴ སྦས་པའི་ཚུལ་གྱིས་རིམ་གཉིས་གྲུབ་པ་ལ། །དུས་མཐའ་བདེན་གཉིས་ཐོབ་པའི་རྣལ་འབྱོར་པ། །དོན་ཀུན་གྲུབ་པ་བཀྲ་ཤིས་མཚནའཆང་བ། །གསོལ་བ༴ གཞན་དུ་མ་ཡིན་ཕྱག་རྒྱ་ཆེན་པོ་ལ། །ཉམས་ལེན་མཆོག་གྲུབ་གསང་སྔགས་འཆང་བ་པོ། །རླུང་སེམས་དབུར་འདུད་སངས་རྒྱས་རིན་པོ་ཆེ། །གསོལ་བར་སྔོན་སྦྱང་ཆོས་ཚུལ་ཞི་ལམ་ཕྱག་རྫོགས་ཆེ། །དུ་མ་ཐུགས་ཐུད་མཁྱེན་རྟོགས་རྩལ་རྒྱས་པའི། །སྤྲུལ་པའི་སྐུ་མཆོག་ཨ་ནནྟ་བི་ཛ། །གསོལ་བ༴ སྦྱངས་པ་མཆོག་ཐོབ་གྲུབ་ཆེན་སྤྲུལ་པའི་སྐུ། །ཀརྨའི་བསྟན་སྐྱོང་སྙན་བརྒྱུད་སྙིང་པོའི་གནད། །མངོན་རྟོགས་བློ་གྲོས་བསྟན་པའི་ཉི་མ་ཆེ། །གསོལ་བ༴ བསོད་ནམས་གཉིས་རྫོགས་གདུལ་བྱ་འདྲེན་པའི་དཔལ། །རྟོགས་པ་འགྱུར་མེད་རྣལ་འབྱོར་བཞི་མཐར་ཕྱིན། །སྙིང་པོའི་དོན་སྟོན་ཆེ་ཚང་ལྔ་པ་ཞབས། །གསོལ་བ༴ རྒྱལ་བུ་རྒོད་རས་སྒྱུ་མའི་འདོད་གར་ཆེ། །ལེགས་བསྒྱུར་ཕྱོགས་བྲལ་ཁྱབ་བདག་རྡོ་རྗེ་འཆང་། །དཀོན་མཆོག་ཀུན་འདུས་ལེགས་བཤད་བསྟན་པ་འཛིན། །གསོལ་བ༴ རྒྱལ་ཀུན་རིགས་བསྡུས་གསང་ཡུམ་རྡོ་རྗེ་འཛིན། །མཁྱེན་པའི་སྤྱན་ཡངས་གསུང་རབ་རྒྱ་མཚོ་ཆེར། །ལེགས་སྤྱོད་འཇམ་མགོན་ཀརྨ་རིག་པ་འཛིན། །གསོལ་བ༴ བྱིན་རླབས་རྒྱུད་ལྡན་རྟོགས་པའི་ཆུ་བོ་ཆེ། །སྐལ་ལྡན་ཞིང་ས་བརླན་མཁས་སྨིན་གྲོལ་གཉིས། །སྟོན་མཛད་མཉམ་མེད་རྩ་བའི་བླ་མ་ལ། །གསོལ་བ༴ ཧེ་རུ་ཀ་དཔལ་སྣ་ཚོགས་སྒྱུ་མའི་བདག །རྡོ་རྗེ་བཙུན་མོའི་བྷ་གར་སྙོམས་གནས་ཤིང་། །བདེ་བར་གཤེགས་གྱུར་བདེ་མཆོག་འཁོར་ལོ་ཆེ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །གནས་ཡུལ་ལྷན་ཞིང་སྔགས་ཀྱི་དྷཱ་ཀྐིའི་གཙོ། །མམ་གནས་ཀུན་གྱིས་རྒྱུད་ལ་རྟག་འཆར་བ། །བདེ་བའི་རང་ཞལ་རྡོ་རྗེ་རྣལ་འབྱོར་མར། །གསོལ་བ་འདེབས་སོ་རྟེན་འབྲེལ་གཉིས་འཆར་སྩོལ། །བཅོམ་ལྡན་ཐུགས་ཀྱི་དབྱིངས་ནས་གདུལ་བའི་ཚོགས། །ཞི་བས་འདུལ་མིན་ཀུན་བཏུས་ཡེ་ཤེས་མགོན། །ཚད་མེད་ཐུགས་རྗེ་སྐུ་འཆང་ཕྱག་བཞི་པར། གསོལ་བ་འདེབས་སོ་རིམ་གཉིས་བར་ཆད་སེལ། །འདས་མ་བཞི་ལས་གཟུགས་འཆར་རལ་གཅིག་མ། །འདོད་ཁམས་དབང་བསྒྱུར་སེམས་མ་དུས་སོལ་ཆེ། །བསྟན་པ་གཉན་སྲུང་ཤན་པ་སྲོག་བསྒྲུབ་མོ། །གསོལ་བ་འདེབས་སོ་འཕྲིན་ལས་རྣམ་བཞི་སྩོལ། །དེ་ལྟར་བླ་མ་ལྷ་ལ་རྩེ་གཅིག་ཏུ། །བཅོས་མིན་དད་པའི་དུང་བས་གསོལ་བཏབ་མཐུས། །མོས་གུས་དག་སྣང་དམ་ཚིག་བརྟེན་ཕུར་གཙུག །ཞེན་ལོག་གོས་མེད་བརྩོན་འགྲུས་རྒྱུད་ལ་སྐྱེ། །སྙིང་རྗེ་བྱང་སེམས་བཏང་སྙོམས་གཞི་མ་ཐིང་། །ཟབ་ལམ་ཕྱག་རྒྱ་ཆེན་པོའི་ངོ་བོ་མཐོང་། །འཁོར་བ་བརྟེན་གྱིས་བསྒྲུབ་པའི་རྐང་ཚུགས་ཟིན། །གདམས་ངག་བྱན་ཚུད་འཁོར་འདས་ཉག་གཅིག་ཐིམ། །བྱིན་རླབས་མཚོ་རྡོལ་རྐྱེན་ངན་གྲོགས་སུ་འཆར། །སྐྱེ་ཤི་རྩད་ཆོད་གཉིས་སྣང་རྫུན་ཁྲིད་ཡལ། །རེ་དོགས་སྒྲོག་ཆོད་གང་བགྲོད་ལྟོས་བཞི་ཟད། །སྐུ་གཉིས་ཟུང་འཇུག་རྩལ་སྣང་རྒྱས་བྱིན་རློབས། །

ཅེས་ཕྱག་རྒྱ་ཆེན་པོའི་གཞུང་སྨིན་སྒྲོལ་ཡོངས་རྫོགས་ཀྱི་ཁྱད་པར་སྙན་བརྒྱུད་རིན་པོ་ཆེ་དང་འབྲེལ་བའི་བརྒྱུད་འདེབས་ཆེན་མོ་བྱིན་རླབས་གཏེར་མཛོད་འབྱེད་པའི་ལྡེ་མིག་ཉམས་རྟོགས་འབྲས་བུ་མྱུར་སྨིན་ཐུགས་རྗེ་ཆུ་འབེབ་ཞེས་བྱ་བ་འདི་ནི། ཆེ་ཚང་སྤྲུལ་པའི་སྐུ་ཀརྨ་རིག་འཛིན་གྱི་ཞབས་བསྐུལ་གྱིས་བོས་ལོན་པའི་རྣལ་འབྱོར་པ་ཚེ་དབང་ནོར་བུ་དཔལ་གྱི་རྒྱ་མཚོས་ཀུན་ལྡན་ལྕགས་བྱའི་དུས་ཀྱི་ཟླ་བ་བདེ་འབྱུང་གི་ཚེས་གཟའ་སྐར་ནམ་མཁའི་རྟོགས་དང་སྣ་ཚོགས་ལྷ་ལྡན་གྱི་འགྲུབ་སྦྱོར་ཉམས་རྟོགས་མཆེད་པ་ལ་སྦྱར་ནས་སྨར་ཁམས་དབེན་རྫོང་སྒར་ཐོག་ཏུ་བྲིས་པ་ཡིན་ཏེ། །

སྨྲས་པ། བདག་ལྟ་སྔོན་སྦྱངས་མེད་པས་ད་ལྟ་རྨོངས། །ད་ལྟའི་བརྩོན་པས་མ་ཕུལ་རིག་གནས་སྡུག །རྟེན་འབྲེལ་མ་རྟོགས་པས་ན་བསྒོམས་ཆུང་ཡང་དབེན། །སྒྲ་དང་སྙན་ངག་མངོན་བརྗོད་ཡོངས་མི་ཤེས། །དེས་ན་རྩོམ་ཆོས་བྱེད་པའི་སྤོངས་མིན་ཀྱང་། །གང་ཤར་ཆལ་ཆོལ་བྲིས་པའི་བློ་ཤར་ཚེ། །འབོད་རྩོམ་བཏགས་བཞིན་བྱེད་པའང་ཆེར་མ་གྲུབ། །དེས་ན་གང་དྲན་བྲིས་ཉེས་མཁས་པ་བཤགས། །ལེགས་གྱུར་དེ་བས་འགྲོ་ཀུན་ཕྱམ་གཅིག་ཏུ། །མཐའ་བྲལ་གནས་ལུགས་བཞི་ཡི་ཕྱག་རྒྱ་རྟོགས། །རྣལ་འབྱོར་བཞི་བགྲོད་ལམ་གྱིས་ཕྱག་རྒྱ་རྫོགས། །སྐུ་གསུམ་འབྲས་བུ་ཕྱག་རྒྱ་ཆེ་ཐོབ་ཤོག །དེ་སྐད་སྨྲ་བ་པོ་ཡང་ཚེ་དབང་ལགས། །དགེའོ། །སརྦ་མངྒ་ལཾ། དགེའོ། །

ཕྱག་ཆེན་དོན་དམ་གཉུག་མའི་བླ་མ་ཉེ་བརྒྱུད་བྱིན་རླབས་ཆུ་རྒྱུན།

༈ ཕྱག་ཆེན་དོན་དམ་གཉུག་མའི་བླ་མ་ཉེ་བརྒྱུད་བྱིན་རླབས་ཆུ་རྒྱུན་བཞུགས་སོ། །

ཨོཾ་ཨཱ༔ཧཱུྃ། རང་བཞིན་རྣམ་དག་ཆོས་ཉིད་ཡེ་ཤེས་སྐུ། །རིགས་དྲུག་ཁྱབ་བདག་སངས་རྒྱས་རྡོ་རྗེ་འཆང་། །གསོལ་བ་འདེབས་སོ་བདག་རྒྱུད་ཕྱག་རྒྱ་ཆེ། །ཡང་དག་རྟོགས་པ་མངོན་ཤར་བྱིན་གྱིས་རློབས། །ཟག་བྲལ་བདེ་ཆེན་སྟོང་ཉིད་ཡེ་ཤེས་ཁམས། །ཀུན་ཁྱབ་བཅོམ་ལྡན་རྡོ་རྗེ་རྣལ་འབྱོར་མ། །གསོལ་བ༴ ཡང་དག་རྫོགས་པ༴ གང་གི་དཔེ་བྲལ་ཡེ་ཤེས་མཐར་ཐུག་ཉིད། །ཡོངས་གང་བདེ་ཆེན་སྒྱུ་ལུས་ཤ་ཝ་རི། །གསོལ་བ༴ ཡང༴ འདྲེས་འབྱུང་། །ཟབ་མོའི་ལམ་མཆོག་གཉུག་མ་ལྷན་ཅིག་སྐྱེས། །སྙིང་པོའི་མངའ་བདག་དཔལ་ལྡན་བྱམས་པ་དཔལ། །རྒྱུད་སྡེ་བཞི་བརྙེས་ལུང་རྟོགས་གཉིས་ཀྱི་བདག །གཉིས་སྨྲ་མར་སྟོན་ཆོས་ཀྱི་བློ་གྲོས་ཆེ། །གསོལ་བ༴ ཡང༴ དཀའ་སྤྱད་མཐར་ཕྱིན་སྙན་བརྒྱུད་ཟབ་མཛོད་འཛིན། །མཁའ་འགྲོའི་དབང་ཕྱུག་མི་ལ་རས་པ་ཞབས། །གསོལ་བ༴ ཡང༴ གྲངས་མེད་བྱང་ཆུབ་མཆོག་བསྐྱེད་བདེན་གཉིས་དོན། །མངོན་གྱུར་མཚོ་བྱེད་དྭགས་བསྒོམ་རིན་པོ་ཆེ། །གསོལ་བ༴ ཡང༴ མི་བསྐྱོད་སྨན་པའི་རྒྱལ་པོ་གདུལ་བྱའི་དོན། །གཟུགས་སྐུར་སྟོན་པ་འཕགས་གྲུ་རྡོ་རྗེ་རྒྱལ། །གསོལ་བ༴ ཡང༴ རྟོགས་པའི་མཐུན་དྲུག་བླ་ན་མེད་པའི་ལམ། །རབ་གཟིགས་གླིང་རས་པདྨ་རྡོ་རྗེ་འཆང་། །གསོལ་བ༴ ཡང༴ དོན་དམ་སྐྱེ་མེད་ངོ་བོ་དྲི་བྲལ་ཉིད། །མངོན་གྱུར་རྒྱ་སྟོན་ཆོས་ཀྱི་བཟང་པོ་སྡེ། །གསོལ་བ༴ ཡང༴ ཁྱད་པར་མཆོག་དང་ཐུན་མོང་གྲུབ་པ་རྒྱས། །རབ་བརྙེས་མཆོག་ལྡན་རྡོ་རྗེ་དྲག་འབུམ་པ། །གསོལ་བ༴ ཡང༴ ཕྱི་ནང་གསང་བ་ཁོ་ན་ཉིད་གཏེར་ལ། །ལོངས་སྤྱོད་དཔའ་བོ་སྟག་ཤམ་ནུས་ལྡན་རྗེ། །གསོལ་བ༴ ཡང༴ ཆོས་ཀུན་དུ་མ་རོལ་གཅིག་ཉིད་དུ་གཟིགས། །ཁྱབ་བརྡལ་རྡོ་རྗེ་འཛིན་དབང་བདེ་ཆེན་གླིང་། །གསོལ་བ༴ ཡང༴ བྱིན་རླབས་ཡོན་ཏན་དུ་མའི་གཏེར་འཆང་ཞིང་། །སྙིགས་རྒྱས་འགྲོ་འདྲེན་རྩ་བའི་བླ་མའི་ཞབས། །གསོལ་བ༴ ཡང༴ རྨད་བྱུང་ཡེ་ཤེས་རྟོགས་པའི་ཆུ་བོ་གང་། །རྒྱུད་ལ་རང་བབ་མཚུངས་མེད་ཆོས་ཀྱི་རྗེ། །བཀའ་རྒྱུད་བླ་མ་མཆོག་ལ་གསོལ་འདེབས་ཀྱི། །བདག་དོན་ཆོས་སྐུ་ཡེ་ཤེས་ཉིད་རབ་རྟོགས། །གཞན་དོན་བདག་འབྲེལ་མཐོང་ཐོས་དྲན་རེག་ཀུན། །བདེ་ཆེན་མཆོག་ལམ་ལ་སྦྱོར་ཕྱིར་མི་ལྡོག །དོན་གཉིས་ལྷུན་གྲུབ་འགྲོ་མགོན་རྒྱལ་བ་ཡི། །གོ་འཕང་དེ་རིང་ཉིད་ནས་ཐོབ་བྱིན་རློབས། །ཨོཾ་ཨཱ༔ཧཱུྃ་ཧོ་སརྦ་སིདྡྷི་ཕ ལ་ཧཱུྃ་ཨཱ༔

ཞེས་ཕྱག་ཆེན་གཉུག་མའི་བླ་མ་ཉེ་རྒྱུད་དཔའ་བོ་སྟག་ཤམ་གྱི་གསང་བའི་རྣམ་ཐར་ནས་གསུང་པ་ལྟར་ལ་གསོལ་འདེབས་སུ་སྣ་ཚོགས་དབྱིག་གི་སྟོན་ཟླ་གསུམ་པའི་ཚེས་བཟང་ཉེར་གཉིས་ལ་ངོམ་ཞོས་ཀུན་བཟང་ནག་ཁྲོད་གདན་ས་མཐིལ། འགྲོ་མགོན་བཛྲ་ར་ཛ་ཡི་འཇག་སྤྱིལ་སྐུ་མདུན་དུ་ཚེ་དབང་ནོར་བུ་ཡི་སྨྲས་པ་མངྒ་ལཾ།

རྒྱལ་བའི་གསུང་རབ་མཐའ་དག་གི་སྙིང་པོ་ཟབ་གསལ་གཉིས་སུ་མེད་པའི་མན་ངག་གི་བརྒྱུད་པའི་བླ་མར་གསོལ་བ་བཏབ་པ་རིན་པོ་ཆེ་འོད་འབར།

༈ རྒྱལ་བའི་གསུང་རབ་མཐའ་དག་གི་སྙིང་པོ་ཟབ་གསལ་གཉིས་སུ་མེད་པའི་མན་ངག་གི་བརྒྱུད་པའི་བླ་མར་གསོལ་བ་བཏབ་པ་རིན་པོ་ཆེ་འོད་འབར་ཞེས་བྱ་བ་བཞུགས་སོ། །

ན་མོ་ཤྲཱི་མཉྫུ་བཛྲ་གུ་རུ་བྷེ༔ རྒྱལ་བའི་གསུང་རབ་མཐའ་དག་གི །སྙིང་པོ་ཟབ་གསལ་ཟུང་འཇུག་གི །བརྒྱུད་པའི་བླ་མ་ཡི་དམ་ལྷ། །མཁའ་འགྲོའི་བཅས་ལ་ཕྱག་འཚལ་ལོ། །རྒྱལ་བ་ཀུན་གྱིས་ཐུགས་ཀྱི་ཡེ་ཤེས་གཅིག་བསྡུས་ཟབ་མོ་གང་། །གདུལ་བྱར་བརྩེ་བས་ཡེ་ཤེས་རང་སྣང་གསལ་བ་གཞོན་ནུའི་ལུས། །གཉིས་སྣང་རྙོག་པ་ཀུན་བྲལ་འཇམ་པའི་དཔལ་ཞེས་པ། །ཀུན་ཏུ་བཟང་པོ་ཟུར་ཕུད་ལྔ་པ་དེ་ཕྱག་འཚལ་ལོ། །རང་གི་སྤྲུལ་པས་རང་སློབ་ཚུལ་བཟུང་ཟབ་གསལ་ཟུང་འཇུག་པའི། །བདེན་དོན་མངོན་གྱུར་དཀྱིལ་འཁོར་གཙོ་མཆོག་རྡོ་རྗེ་སློབ་དཔོན་སྐུ། །དཔལ་ལྡན་སངས་རྒྱས་ཡེ་ཤེས་འཕགས་ཡུལ་གྲུབ་གྱུར་བྱེ་བ་ཡི། །བརྒྱུད་གྱུར་འཇམ་དཔལ་སྒྱུ་འཕྲུལ་མཆོག་ལ་གུས་པས་ཕྱག་འཚལ་ལོ། །གང་དེའི་སློབ་མའི་ཚུལ་བཟུང་བདེ་ཆེན་ཞིང་གི་བདག་པོ་ནི། །ཞིང་འདིར་རྒྱལ་ཚབ་ཚུལ་བཟུང་ཨུ་རྒྱན་སིནྡྷུའི་མཚོ་པད་ལས། །བརྫུས་སྐྱེས་རྒྱལ་བ་མཚན་མཆོག་བརྒྱད་འཆང་བདེ་བ་ཆེན་པོ་ཞེས། །རྫོགས་སངས་རྒྱས་དངོས་པདྨ་འབྱུང་གནས་ཞབས་ལ་ཕྱག་འཚལ་ལོ། །དེ་དང་སྨན་ཞབས་ལ་བརྟེན་གྲུབ་པ་མཆོག་བརྙེས་ཡི་གེའི་ཞབས། །དེའི་བརྒྱུད་འཛིན་ཀརྨ་པ་དང་པཎ་ཆེན་ཡེ་ཤེས་དཔལ། །གནམ་གནོན་གཏོར་མའི་སློབ་དཔོན་ཏེ་བ་ལིང་ཨ་ཙརྱ། །འཕགས་པའི་ཡུལ་བྱོན་འཇམ་གསང་སློབ་བཤད་འཛིན་དེར་ཕྱག་འཚལ་ལོ། །བ་ལིང་ཨ་ཙརྱ་ཡི་རྗེས་བཟུང་གངས་རིའི་ཁྲོད་འཁྲུངས་པ། །གཉོས་ལོ་ཡོནཏན་གྲགས་དང་དེའི་རིགས་སྲས་རིམ་བྱོན་པ། །རྡོ་རྗེ་བླ་མ་ཇོ་སྲས་དཔལ་ལེ་སྔགས་འཆང་གྲགས་པ་དཔལ། །སྤྱོད་འཆང་ནག་པོའི་རྣམ་སྤྲུལ་ལྷ་ནང་པ་ལ་ཕྱག་འཚལ་ལོ། །དེའི་ཆོས་ཀྱི་བརྒྱུད་འཛིན་སྟོད་ལུང་ཛྙ་ན་ཛ་ལ་དང་། །གསེར་ལྡིང་ཆོས་འོད་མཁས་གྲུབ་འཕགས་བོད་བུ་སྟོན་རིན་ཆེན་གྲུབ། །མཁས་པའི་ཁྱུ་མཆོག་བྱང་ཆུབ་རྩེ་མོ་ལོ་ཆེན་གྲགས་རྒྱལ་པ། །བརྒྱུད་ལྡན་བླ་མ་མཁས་ཤིང་གྲུབ་བརྙེས་རྣམས་ལ་ཕྱག་འཚལ་ལོ། །འཕགས་མཆོག་རྣམས་ནི་བཞི་ལ་བཞུད་མིན་འགྲོ་ལ་ཐུགས་བརྩེ་བ། །བསམ་བཞིན་སྐྱེ་བ་སྤྲུལ་སྐུར་ཡོངས་བཞེས་དབྱངས་ཅན་དགའ་བ་ཞེས། །མཁས་ཀུན་གཙོ་བོར་རྡོ་རྗེ་སེམས་དང་འཕགས་མོས་དབང་བསྐུར་བ། །ཧེ་རུ་ཀ་དཔལ་གྲུབ་པའི་འཁོར་ལོས་འགྱུར་དེར་ཕྱག་འཚལ་ལོ། །དེའི་ཞབས་བརྙེས་མི་ཞིག་དྭངས་མའི་སྐུ་བརྙེས་བསོད་ནམས་མཆོག །ཐུགས་ཀྱི་སྒོ་གཉིས་ཡོངས་དགྱེས་མངོན་ཤེས་མཐུ་བརྙེས་ཟླ་རྒྱལ་བ། །གནས་ལུགས་དོན་རྟོགས་ནམ་མཁའ་རིན་ཆེན་གྲུབ་མཆོག་ལྷ་དབང་གྲགས། །ཟབ་གསལ་བསྟན་པའི་མངའ་བདག་རྣམས་ལ་གུས་པས་ཕྱག་འཚལ་ལོ། །སྤྱོད་འཆང་དཔའ་བོ་རྒྱལ་བསྟན་རྒུད་པ་གསལ་ཕྱིར་མི་ཡི་གཟུགས། །དངོས་སྤྲུལ་ཀུན་དགའ་སྙིང་པོ་ཞེས་བྱ་ངེས་དོན་ཤིང་རྟ་ཆེ། །མི་འགྱུར་བདེ་བའི་སྐུ་མཉེས་ཟབ་གསལ་ཇི་བཞིན་སྟོན་མཁས་དབང་། །སྨྲ་བའི་ཉི་མ་ཧཱ་ར་ནཱ་ཐའི་ཞབས་ལ་ཕྱག་འཚལ་ལོ། །དེ་ཡི་ཞབས་བསྙེས་དམ་པའི་རིགས་འཁྲུངས་སྐྱེས་མཆོག་ནམ་མཁའ་དཀར། །མང་ཐོས་སྡོམ་བརྩོན་ནམ་མཁའ་ནོར་བུའི་ཞབས་དང་དེའི་སློབ་ལ། །སྦས་ཚུལ་ཉིད་ཀྱི་གྲུབ་པ་ཡོངས་གཙོ་འཕྲིན་ལས་རབ་བརྟན་ཞབས། །དེའི་ཆོས་སྲས་ཡོངས་གཙོ་ཚེ་དབང་ནོར་བུར་ཕྱག་འཚལ་ལོ། །རྒྱལ་ཀུན་བགྲོད་པ་གཅིག་ལམ་ཟབ་གསལ་ལམ་སྟོན་བཀའ་དྲིན་ཅན། །འདྲེན་མཆོག་འཁོར་ལོའི་དབང་ཕྱུག་རྩ་བའི་བླ་མར་ཕྱག་འཚལ་ལོ། །དེ་ལྟར་བརྒྱད་ཁྲི་བཞི་སྟོང་ཆོས་སྒོ་ཀུན་གྱི་སྙིང་པོ་མཆོག །འཇམ་དཔལ་ཞལ་ལུང་གྲོལ་ཐིག་དམ་པའི་ཆོས་ལ་ཕྱག་འཚལ་ལོ། །ཟབ་གསལ་ཟུང་འཇུག་བླ་མ་ལྷ་ལ་ཕྱག་འཚལ་མཆོད་འབུལ་ཞིང་། །སྡུག་བཤགས་དགེ་རང་ཆོས་འཁོར་རྒྱུན་འཁོར་མྱ་ངན་མི་འདའ་བཞུགས། །གསོལ་བ་འདེབས་བགྱིད་ཟབ་གསལ་བསྒོམ་སོགས་དགེ་ཀུན་ཡོངས་སྡོམ་ནས། །བྱང་ཆེན་རྒྱུར་བསྔོ་དེའི་འཇམ་དཔལ་གོ་འཕང་མྱུར་ཐོབ་ཤོག །དེ་སྲིད་སྐྱེ་བ་གང་དང་གང་དུ་ཇི་སྲིད་བཟོད་ཐོབ་པར། །དལ་འབྱོར་རིན་བཟང་མཚར་སྡུག་ཡིད་འཕྲོག་ཞི་དུལ་བྱང་སེམས་ལྡན། །འཁོར་བར་ཞེན་ལོག་དད་ངེས་འབྱུང་ལྷག་བསམ་ཡོངས་རྒྱས་པས། །སངས་རྒྱས་བསྟན་པའི་སྒོར་བཞུགས་སངས་རྒྱས་དགྱེས་བྱེད་ལས་འབད་ཤོག །དམ་ཆོས་སྟོན་བྱེད་མཚན་ཉིད་བཟང་པོ་མདོ་རྒྱུད་ནས་བསྔགས་ཀུན། །ཚངས་པས་རྗེས་བཟུང་དེ་ཡི་བཀའ་བཞིན་སྤྱད་ཅིང་བསླབ་པ་གསུམ། །ཚུལ་ཁྲིམས་ཏིང་འཛིན་ཤེས་རབ་ལ་སྤྱོད་བསླབ་པ་དྲི་མེད་པར། །ཚུལ་བཞིན་ཉིད་ཀྱི་རྒྱལ་བསྟན་རྒྱས་པའི་བྱེད་པོར་རྟག་གྱུར་ཤོག །རྫོགས་སངས་རྒྱས་འབྲས་སྒྲུབ་བྱེད་མ་ནོར་ལམ་མཆོག་ཀུན་གྱི་སྙིང་། །ཟབ་གསལ་ཟུང་འཇུག་ལམ་བཟང་དང་འཕྲད་དེ་སྒོར་མི་ཕྱེད་པའི། །དད་པས་ཡོངས་ཞུགས་དེ་སྟོན་བླ་མ་སངས་རྒྱས་ལས་ལྷག་པའི། །མོས་གུས་གྱིས་བརྟེན་དམ་ཚིག་ལས་ལ་འདའ་མེད་ཉིད་སྤྱོད་ཤོག །དབང་བཞིའི་རྒྱུད་སྨིན་གྲོལ་བྱེད་ལམ་མཆོག་ཟབ་གསལ་དབྱེར་མེད་པ། །ཟབ་པ་སྤྲོས་པས་ཡོངས་དབེན་བདག་མེད་སྟོང་པ་ཉིད་ཆེན་པོ། །གསལ་བ་ཡེ་ཤེས་ངག་མེད་ལྷ་ཡི་དཀྱིལ་འཁོར་རང་སྣང་བ། །ཟུང་འཇུག་གདོད་མའི་གཤིས་ལུགས་མི་ཤིག་འབྲས་བུ་མངོན་གྱུར་ཤོག །མདོར་ན་ཚེ་གཅིག་ཉིད་ལ་ཡེ་ཤེས་སྐུ་འགྲུབ་རྣམ་པ་བཅུར། །དབང་ཐོབ་འཕྲིན་ལས་རབ་འབྱམས་འབད་མེད་དཔག་བསམ་ཡིད་བཞིན་ནོར། །ཇི་བཞིན་འགྲོ་བའི་དོན་བརྩོན་མཐའ་ཡས་ཕ་མའི་རང་བཞིན་ཀུན། །ཀུན་ཁྱབ་ཆ་མེད་སྐུ་གཉིས་རོ་མཉམ་ཚོམ་བུ་གཅིག་འགྲུབ་ཤོག །

ཞེས་ཨེ་བོ་དོང་འཇིགས་བྲལ་ཐམས་ཅད་མཁྱེན་པ་གསང་བ་སྦྱིན་གྱི་བསྟན་པའི་ཐིག་ལེ་ཟབ་གསལ་ལྟ་བ་ནི་བརྒྱད་ཁྲི་བཞི་སྟོང་ཆོས་སྒོ་མཐའ་དག་གི་སྙིང་པོར་གྱུར་པ་དེ་ཉིད་ཀྱི་ཁྲིད་རྒྱུན་ལ་སྟོད་བྲང་སོ་རྫོང་སུ་བུ་སྤྲུལ་པའི་སྐུ་རིན་པོ་ཆེ་བཞུགས་འདུག་པས་བསྟན་པར་ལྷག་བསམ་གྱི་འབད་པས་ཞུས་ཤིང་སླར་ལ་སྟོད་དཔལ་མོ་དཔལ་ཕུད་ཀྱི་ཆོས་ལྡིང་རྒྱལ་བའི་བསྟི་གནས་གང་གི་བླ་མ་དམ་པ་དད་གུས་དམ་ཚིག་ཤེས་རབ་ཀྱི་རྒྱན་པ་ཀུན་བཟང་རིག་འཛིན་དབང་པོ་ལ་ཁྲིད་དགའ་ལེགས་པར་བཤད་པས་གང་བདེ་བརྒྱུད་པའི་གསོལ་འདེབས་ཤིག་དགོས་ཞེས་དངོས་རྒྱུད་དུ་མར་གསུང་གི་བསྐུལ་བར་བརྟེན་ཀུན་དགའ་ཞེས་ཤིང་སྟག་ལོ་ཞལ་གསར་དུ་ངོམ་པ་སྣྲོན་ཟླའི་ཚེས་བཅུ་གཉིས་སྤྱོད་འཆང་ནག་པོས་ཆོ་འཕྲུལ་རྟེན་པའི་དུས་ཆེན་དེའི་དགོངས་མཐུན་སྐབས་སུ་རྒྱལ་ཁམས་པ་ཚེ་དབང་ནོར་བུས་གདན་ཐོག་གཅིག་ཏུ་སྨྲས་པའི་ཡི་གེ་དམ་པའི་གདུང་འཛིན་བཀྲ་ཤིས་རབ་བརྟན་ནོ། །དགེའོ། །སརྦ་མངྒ་ལཾ།

དྭགས་པོ་དེང་ལམ་གྱི་བརྒྱུད་པའི་གསོལ་འདེབས་བྱིན་རླབས་གངྒཱའི་ཆུ་རྒྱུན།

༈ དྭགས་པོ་དེང་ལམ་གྱི་བརྒྱུད་པའི་གསོལ་འདེབས་བྱིན་རླབས་གངྒཱའི་ཆུ་རྒྱུན་ཞེས་བྱ་བ་བཞུགས་སོ། །

ཨོཾ་ཨཱ༔ཧཱུྃ༔ ཐོག་མཐའ་མེད་པའི་རྡོ་རྗེ་དང་པོའི་མགོན། །ལྷན་སྐྱེས་ཡེ་ཤེས་དཔལ་ལྡན་རྡོ་རྗེ་སེམས། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །གནས་ལུགས་ཕྱག་རྒྱ་ཆེན་པོར་གསོལ་བ་འདེབས། །རྒྱལ་བ་ཀུན་གྱི་ཡེ་ཤེས་རྡོ་རྗེ་དཔལ་ཧེ་རུ་ཀ །རིགས་དྲུག་ཁྱབ་བདག་བཛྲ་དྷཱ་ར་སྔོ་སེང་སྒེག་པའི་སྐུ། །རྡོ་རྗེ་དྲིལ་འཛིན་རང་འོད་ཡུམ་ལ་རོལ་དེར་ཕྱག་འཚལ་ལོ། །དེ་བཞིན་གཤེགས་ཀུན་ཡུམ་གྱུར་ཤེས་རབ་ཕར་ཕྱིན་རྣལ་འབྱོར་མ། །དགའ་རྒྱས་བཅུ་དྲུག་ན་ཚོད་དམར་སྨུག་ཁྲོད་འཛུམ་རལ་རྗེས་དབུས། །ཕག་ཞལ་ཕྱག་གཉིས་གྲི་ཐོད་འཆང་མཛད་ཞབས་ནི་བརྐྱང་བསྐུམ་གར། །མེ་ལོང་རབ་ཏུ་མཛེས་སྒེག་ལྷ་མོ་དེ་ལ་ཕྱག་འཚལ་ལོ། །རྒྱལ་བའི་སྲས་པོ་ས་བཅུའི་དབང་ཕྱུག་དཔལ་ལྡན་རྡོ་རྗེའི་སྙིང་། །གདུལ་བྱའི་དོན་དུ་སྤྲུལ་པའི་སྒྱུ་འཕྲུལ་གྲུབ་མཆོག་ཏིལ་བཏུང་ཞབས། །སྔོ་བསངས་གཅེར་བུ་རལ་པའི་ཐོར་ཚུགས་ཕྱག་གཉིས་སྐྱབས་སྦྱིན་ཅན། །སྟག་ཤམ་རུས་རྒྱན་རྣལ་འབྱོར་སྤྱོད་འཆང་ཚུལ་དེར་ཕྱག་འཚལ་ལོ། །གསང་གསུམ་བདག་པོའི་རྣམ་འཕྲུལ་བྲམ་ཟེའི་རིགས་འཁྲུངས་པཎྜི་ཏ། །བླ་མ་སྙན་ལ་འགྲན་མེད་མཁས་པ་དཔལ་ཆེན་ནཱ་རོ་པ། །དམར་སྨུག་ཟིལ་ལྡན་ཐོར་ཚུགས་རུས་རྒྱན་རྣལ་འབྱོར་ཙཏྱཱའི་ཆས། །ཐོད་ཁྲག་ལ་རོལ་མི་ལྤགས་རློན་པ་གསོལ་དེར་ཕྱག་འཚལ་ལོ། །དགེས་མཛད་དཔའ་བོ་རིག་སྔགས་འཆང་བའི་ཚུལ་བསྟན་ཧེ་རུ་ཀ །རྒྱུད་སྡེ་བཞི་ཡི་མངའ་བདག་མར་སྟོན་ཆོས་ཀྱི་བློ་གྲོས་ཆེ། །ཤ་ཉམས་རབ་རྒྱས་སྣུམ་བརྗིད་ཕྱག་གཉིས་དབུས་སྟེང་ས་ནོན་མཛད། །དབུ་སྐྲ་ལྕང་ལོ་འདུད་དམར་བེར་ཕྱམ་བཀླུབས་དེར་ཕྱག་འཚལ་ལོ། །འཇམ་དཔལ་གཤིན་རྗེ་འཇམ་དཔལ་ཉིད་ལས་གཞན་མིན་བོད་ཡུལ་གྱིས། །སྒྲུབ་བརྒྱུད་སྤེལ་བར་སྤྲུལ་སྐུ་མི་ལ་བཞད་པ་རྡོ་རྗེ་འཆང་། །སྐུ་མདོག་སྔོ་སྨུག་དབུ་སྐྲ་རལ་པ་ཁྲིལ་བུ་ནག་ལ་སེར། །རས་དཀར་གོས་གསོལ་་ས་གནོན་མཉམ་གཞག་བཞུགས་དེར་ཕྱག་འཚལ་ལོ། །དུས་གསུམ་རྒྱལ་བ་ཡོངས་ཀྱི་ངོ་བོ་འཕྲིན་ལས་གཅིག་བསྡུས་དཔལ། །འོད་དཔག་མེད་མགོན་འགྲོ་བའི་བླ་མ་པདྨ་འབྱུང་གནས་ཞབས། །སླར་ཡང་། ཐུབ་དབང་བསྟན་པ་རྒྱལ་ཚབ་སྤྲུལ་སྐུ་ས་བཅུའི་གཙོ། །གཉལ་སྨད་ལྷ་རྗེ་སྒམ་པོ་པ་ཞེས་ཟླ་འོད་གཞོན་ནུའི་ཞབས། །དཀར་དམར་མདངས་ལྡན་ཚངས་སྤྱོད་ཞི་དུལ་དབུ་ལ་དྭགས་ཞྭ་གསོལ། །ཆོས་གོས་རྣམ་གསུམ་བེར་ཟླུམ་པདྨ་དཔུང་ལྟར་མཛེས་ཤིང་བརྗིད། །རྡོ་རྗེ་སྐྱིལ་ཀྲུང་ཕྱག་གཉིས་མཉམ་བཞག་ཏིང་འཛིན་རབ་བཀྲམ་བརྒྱར། །གཡོ་མེད་ངང་བཞུགས་བསོད་ནམས་རིན་ཆེན་མཆོག་དེར་ཕྱག་འཚལ་ལོ། །སྣང་བཞི་མཐར་ཕྱིན་ཏིང་འཛིན་བཟང་པོ་སྐྱེ་བ་ཡེ་ཤེས་མཚན། །གདུལ་བྱའི་དོན་དུ་གཟུགས་ཀྱི་སྐུར་སྣང་གར་དབང་འཇའ་ཚོན་སྙིང་། །གཟུགས་མཐུང་དབུ་སྦོམ་དམར་སྨུག་རབ་ཆུང་ཆ་བྱད་པཎ་ཞུ་གསོལ། །རྡོ་རྗེ་ཕུར་གདེང་འཇའ་ཡི་གཤོག་པ་བཀྲ་ལ་ཕྱག་འཚལ་ལོ། །ཟླ་འོད་གཞོན་ནུ་རྒྱལ་བར་གྱུར་ཡང་ཞིང་འདིས་གདུལ་བྱའི་ཆེད། །སྐྱེ་བ་སྤྲུལ་སྐུ་འབྲེལ་ཚད་དོན་ལྡན་བཟང་པོ་དཔལ། །དཀར་སེར་ཞི་འཛུམ་དགེ་སློང་ཆ་བྱད་དྭགས་ཞུ་ལྷུན་བརྗིད་མནབས། །ཕྱག་གཉིས་མཉམ་བཞག་གླེགས་བམ་འཛིན་ལ་གུས་པས་ཕྱག་འཚལ་ལོ། །གང་གི་ངེས་དོན་བསྟན་པ་འཛིན་མཛད་ཆོས་ཀྱི་སྲས་ཐུ་བོ། །འོད་གསལ་བརྒྱུད་ལྡན་རྣལ་འབྱོར་དབང་ཕྱུག་འོད་གསལ་དབང་པོ་ནི། །ངང་སེར་བགྲེས་ཉམས་དགེ་སློང་ཆ་བྱད་ཞི་ཞིང་འཛུམ་བག་ལྡན། །ཕྱག་གཉིས་ཌཱ་མ་རུ་དྲིལ་བུ་འཛིན་ལ་གུས་ཕྱག་འཚལ་ལོ། །དེའི་ཆོས་སྲས་གཉུག་མའི་དོན་གཟིགས་རྣལ་འབྱོར་དམ་པ་ནི། །ཚེ་དབང་ནོར་བུ་བོད་སྔགས་ཆས་ལྡན་གཙུག་ན་དོ་གེར་ཅན། །ཁ་དོག་སྣ་ཚོགས་མཉམ་བཞག་ཕྱག་སྟེང་ནོར་བུ་འོད་འབར་འཛིན། །རྡོ་རྗེ་སྐྱིལ་ཀྲུང་ཏིང་ངེ་འཛིན་ངང་བཞུགས་དེ་ལ་ཕྱག་འཚལ་ལོ། །གསང་ལམ་བླ་མའི་མན་ངག་བྱིན་རླབས་དོན་རྒྱུན་ཆུ་བོ་གང་། །ལེགས་གདམས་བདག་རྒྱུད་བྱིན་གྱིས་རླབས་མཛད་རྡོ་རྗེ་འཛིན་དབང་ཆེ། །མཚན་དཔེ་ཡོངས་རྫོགས་ཡེ་ཤེས་གཟི་འོད་འབར་བ་རྡོ་རྗེའི་སྐུ། །འདྲེན་མཆོག་འཁོར་ལོའི་མགོན་གྱུར་དཀྱིལ་འཁོར་གཙོ་ལ་ཕྱག་འཚལ་ལོ། །དེ་ལྟར་རྒྱལ་བའི་རྒྱལ་སྲས་མཉམ་མེད་དྲགས་པོ་མཚོ་བྱེད་ཞབས། །གང་གི་ཐུགས་བཅུད་ཡེ་ཤེས་མཁའ་འགྲོའི་སྙིང་ཁྲག་མཆོག །གསང་ལམ་བླ་སྒྲུབ་སྨིན་གྲོལ་བརྒྱུད་པའི་བླ་མ་ཡི་དམ་ལྷ། །མཁའ་འགྲོ་ཆོས་བསྲུང་བཅས་ལ་གུས་པས་ཕྱག་འཚལ་ཞིང་། །གསོལ་བ་བཏབ་མཐུས་བདག་གི་སེམས་ཀྱི་ཁམས་འདི་མགོན་ཁྱོད་ཀྱི། །ཐུགས་རྗེས་ཉེར་དྲངས་སྐྱེ་བ་ཀུན་ཏུ་དལ་འབྱོར་མཐོ་རིས་ཀྱི། །ཡོན་ཏན་བདུན་རྫོགས་འཕགས་ནོར་བདུན་ལྡན་མཚན་དཔེ་ལུས་བཟང་ཐོབ། །ཡིད་གཞུང་མི་བརྗེད་བཟུང་ལྡན་དམ་པའི་ཆོས་ལ་བློ་འཇུག་ཤོག །མདོ་སྔགས་གནས་གསུང་དགེ་བའི་བཤེས་གཉེན་རྡོ་རྗེ་སློབ་དཔོན་གྱིས། །མཚན་ཉིད་ཡོངས་རྫོགས་བླ་མ་དམ་པས་རྗེས་སུ་ཡོངས་བཟུང་ནས། །མདོ་རྒྱུད་ཀུན་གྱི་སྙིང་པོ་བསམ་གྱིས་མི་ཁྱབ་གནས་ལུགས་ནི། །ཕྱག་རྒྱ་ཆེན་པོ་མཉམ་མེད་ལྷ་རྗེའི་བཞེད་སྒོ་ལ་ཞུགས་ཤོག །སྙེད་དཀའ་དལ་འབྱོར་རྟེན་འདི་ནམ་འཇིག་ཆ་མེད་འཇིག་སླ་ཉིད། །སྙིང་ལ་ཞེན་པས་འདི་སྣང་ཞེན་ལོག་ཆོས་བརྒྱད་འདུ་འཛི་སྤངས། །རྒྱུ་འབྲས་ལས་ལ་ཡིད་ཆེས་གྱུར་པས་མི་དགེའི་བྱ་བ་ཀུན། །ཡོངས་སྤངས་དགེ་བའི་ལས་ལ་འདོར་མེད་བརྩོན་པ་བསྐྱེད་པར་ཤོག །འཁོར་བའི་འཇིགས་མས་མ་ནོར་སྐྱབས་མཆོག་བླ་མ་དཀོན་མཆོག་ལ། །སྙིང་ནས་སྐྱབས་མཆིས་འགྲོ་ཀུན་དྲུག་འཁྲུལ་པའི་དུཿཁས་མནར་བ་ན། །ཕ་མར་ཤེས་པས་གཟོད་མེད་སྙིང་རྗེས་བྱང་ཆུབ་སེམས་བསྐྱེད་ཅིང་། །བདག་གཞན་ཚོགས་རྫོགས་ཆེད་དུ་མི་དལ་ལས་ལ་རབ་སྤྱོད་ཤོག །བདག་གཉིས་རྒྱལ་བའི་ཡུམ་ཤེར་སྙིང་གིས་དབུས་སུ་བརྟན་གཡོའི་བདག །ཁྱབ་བདག་བླ་མ་རྡོ་རྗེ་ཆོས་མཆོག་པད་འབྱུང་ཟླ་འོད་ཞབས། །རྩ་བའི་བླ་མ་བཞུགས་ལ་སྙིང་ནས་ཐང་ལྷོད་མེད་པ་ཡི། །ཕུར་ཚུགས་དད་པས་རླབས་ཆེན་བྱིན་ཉིད་བདག་རྒྱུད་ལ་འཇུག་ཤོག །སེམས་ཉིད་གནས་ལུགས་སྐྱེ་འགགས་མེད་པ་གནས་འགྱུར་གཏན་ཕབ་ཅིང་། །རང་རིག་རྗེན་པ་རྩེ་གཅིག་ཉོན་མོངས་འཐོར་བྱེད་སྤྲོས་བྲལ་རྟོགས། །ཕྱི་ནང་དབྱེར་མེད་རོ་གཅིག་རྩོལ་བྲལ་བསྒོམ་མེད་མངོན་གྱུར་ཤོག །རྡོ་རྗེ་ཐེག་པའི་ལམ་མཆོག་ཟུང་འཇུག་གསང་ལམ་ཆེ། །ཕག་མོའི་སྐུར་སྣང་ཕོ་ཉ་གསུམ་འདྲེས་སྣང་སྲིད་ལྷ་སྔགས་རྒྱས། །སྦྱངས་རྟོགས་སྦར་བའི་བདུད་རྩི་དམ་དབྱེ་རོ་མཉམ་རྒྱ་མཚོ་ཡི། །མཁའ་འགྲོ་ཡོངས་བསྐངས་དངོས་གྲུབ་བཅུད་གྱུར་བདག་གིས་མྱོང་བར་ཤོག །སྙིང་པོར་བསྐྱེད་བྱ་ལྷ་དང་རྟོགས་བྱ་ལྷ་ཀུན་རང་རིག་དངོས། །གཏན་ལ་ཕབ་མཛད་རྩ་བའི་བླ་མ་སངས་རྒྱས་ཀུན་འདུས་གཙོ། །པད་འབྱུང་ལྷ་རྗེ་དབྱེར་མེད་ཆོས་ཀྱི་སྐུར་སྣང་བདེ་བ་ཆེ། །དེ་ལྟར་གསོལ་བཏབ་ལྷ་སྔགས་རྡོ་རྗེ་གསུམ་འབྲས་མངོན་གྱུར་ཤོག །གཅིག་མཆོག་བླ་མར་གསོལ་བཏབ་སེམས་ཉིད་བླ་མ་ཆོས་སྐུར་མཇལ། །མི་འགྱུར་བདེ་བའི་དམ་རྫས་ལ་མྱོང་ཕྱིར་མི་ལྡོག་པ་ཐོབ། །ལྟ་བསྒོམ་བོགས་འདོན་སྤྱོད་པ་སྤོངས་གྱུར་ཤེས་པས་གཞི་ཐོག་བསྐྱལ། །སྐྱེ་འཆི་རྨི་ལམ་སྲིད་པའི་བར་དོ་ངོ་ཤེས་རང་གྲོལ་ཤོག །མདོར་ན་སྔགས་ལམ་ལ་བརྟེན་ཚེ་གཅིག་ཉིད་ལ་ཡེ་ཤེས་ཀྱི། །སྐུ་མཆོག་རྣམ་བཅུ་དབང་བསྒྱུར་འཕྲིན་ལས་རབ་འབྱམས་རྒྱ་ཆེ་བས། །དཔག་མེད་འགྲོ་བའི་དོན་ཆེན་འབད་རྩོལ་མེད་པ་ཡིད་བཞིན་ནོར། །བྱང་ཆུབ་ཆེན་པོའི་གོ་འཕང་ཉིད་ལ་ཚོམ་བུ་གཅིག་འགྲུབ་ཤོག །

ཅེས་གསང་ལམ་བླ་སྒྲུབ་ཀྱི་དབང་ཁྲིད་བཀླག་ལུང་གསུམ་ཚང་བའི་བླ་མ་རྒྱུད་པར་གསོལ་བ་བཏབ་པ་འདི་ནི་རྫོགས་པའི་སངས་རྒྱས་མཛད་བྱང་ཆུབ་སེམས་པའི་སྐུ་སྤྲལ་པ་རྡོ་རྗེ་འཛིན་མཆོག་འཇིགས་མེད་གསང་བ་སྦྱིན་པའི་དབོན་བརྒྱུད་གཉིས་མངོན་པར་མཐོ་བ་ཆོས་ཀྱི་རྗེ་ནམ་མཁའ་དཔལ་བཟང་གི་དངོས་རྒྱུད་དུ་མར་གསོལ་བ་བཏབ་པའི་ངོར་ཕྱག་ཆེན་གྱི་རྟོགས་ལྡན་རྒྱལ་ཁམས་པ་ཚེ་དབང་ནོར་བུས་ཀུན་དགའ་ཞེས་ཤིང་སྟག་དབོ་ཟླའི་ཚེས་བཅུ་གཉིས་ལ་སྨྲས་པ་མངྒ་ལཾ།

ཡང་། བརྒྱུད་པའི་རྣམ་གྲངས་གཅིག་ནི་གཏེར་སྟོན་འཇའ་ཚོན་པ་ནས་བསྒམ་པོ་ནོར་བུ་བརྒྱན་པ། སྤྱན་སྔ་རིན་ཆེན་རྡོ་རྗེ། མཆོག་སྤྲུལ་བཟང་པོ་དཔལ། དེས་འོད་གསལ་དབང་པོ་ཡང་བགྲངས་མོད། འདི་བརྒྱུད་པ་བདུན་མ་རྫོགས་བར་བཀླག་ལུང་ཐོབ་པས་གྲོལ་བར་རྡོ་རྗེའི་གསུང་གི་དམ་བཅས་པ་ཡིན་པས། དེས་ན་རྒྱུད་ཐག་ཉེ་བཞིན་བྱིན་རླབས་ཆེ་བས་གོང་གི་དཀྱུས་ལྟར་ཉིད་ལེགས་སོ། །བརྒྱུད་པ་བདུན་བགྲང་ཚུལ་ནི་གཏེར་སྟོན་འཇའ་ཚོན་པ་ནས་བགྲང་རྒྱུ་ཡིན་པ་གོ་དགོས་ལ། གཞན་ཡང་ཆོས་འདི་ཆོས་སྐུ་ཡེ་ཤེས་མཁའ་འགྲོ་ནས་སྒམ་པོ་པར་རྒྱུད་མཆོག་གི་ཏེ་ན་མར་མི་བརྒྱུད་པར་མ་བགྲང་ཡང་ཆད་པའི་སྐྱོན་མེད་ལ། ཕྱིས་བརྒྱུད་པའི་ཁ་སྐོང་དགོས་ཚེ་རྩ་བའི་བླ་མའི་གསོལ་འདེབས་མི་བསྒྱུར་བར་དེའི་གོང་དུ་བཞུགས་པར་བྱའོ། །

གསོལ་འདེབས་མདོར་བསྡུས་ལ་དགའ་ན་འདི་ལྟར་བྱ་སྟེ།

ཨོཾ་སྭསྟི་སིདྷི་རསྟུ། ཡང་དག་སངས་རྒྱས་མཐའ་དག་བསྐྱེད་མ་འཁྱུང་ཡུམ་གནས་པའི་དལ། །ཨེ་ཡིག་ཕྱག་རྒྱ་ཆེན་མོ་ཤེས་རབ་ཕར་ཕྱིན་རྡོ་རྗེ་ཕག །མི་འགྱུར་བདེ་བ་མཚན་དཔེས་ཡོངས་བརྒྱན་རྒྱལ་བ་ཀུན་ཡབ་ནི། །ཝཾ་ཡིག་གསུང་གི་རྡོ་རྗེ་པདྨ་འབྱུང་གནས་སྤྲུལ་སྒམ་པོ་པ། །དབྱེར་མེད་སྒྱུ་འཕྲུལ་འགོག་པ་མེད་ལས་སྤྲུལ་གྱུར་འཇའ་ཚོན་སྙིང་། །གང་གི་ཐུགས་དང་གཉིས་མེད་རྒྱལ་ཚབ་ས་བརྙེས་བཟང་པོ་དཔལ། །དེ་ཡིས་ཆོས་སྲས་ཐུ་བོ་འོད་གསལ་དབང་པོ་གྲུབ་པའི་གཙོ། །དེ་སྲས་ཚེ་དབང་ནོར་བུ་སྣ་ཚོགས་སྤྱོད་པས་འགྲོ་བ་འདུལ། །གསང་ལམ་རྩ་བརྒྱུད་བླ་མ་རྣམས་ལ་གསོལ་བ་འདེབས་སོ་ཀྱེ། །བདག་རྒྱུད་བྱིན་རློབས་སྐྱེ་ཀུན་ལམ་མཆོག་འདི་དང་རྟག་འཕྲོས་ནས། །འཁོར་བར་ཞེན་ལོག་ཐར་ལམ་ལ་ཞུགས་མཆོག་གསུམ་ལ་སྐྱབས་སོང་། །རྒྱ་ཆེན་སེམས་བསྐྱེད་ཚོགས་རྫོགས་ལ་བརྩོན་བླ་མར་གསོལ་འདེགས་ཤོག །གནས་ལུགས་ཕྱག་ཆེན་གནས་འགྱུ་གཏན་ཕབ་རིག་པ་གཅེར་ལ་ཕུད། །ཉོན་མོངས་རང་གྲོལ་སྣང་རོ་སྙམ་སྒོམ་མེད་འོད་གསལ་བ། །ཆུ་རྒྱུན་རྣལ་འབྱོར་ཟུང་འཇུག་སྐུ་ཐོབ་ཡན་ལག་བདུན་བསྙེས་ནས། །མཁའ་མཉམ་འགྲོ་ཀུན་སྲིད་མཚོ་ལས་སྒྲོལ་འདྲེན་པར་བདག་གྱུར་ཤོག །མདོར་ན་ཚེ་གཅིག་སངས་རྒྱས་ཉེ་ལམ་ཟུང་འཇུག་རྟག་རྙེད་ཅིང་། །དབང་གི་ཡེ་ཤེས་བདུད་རྩི་ལེགས་མྱོང་སྤྱོད་ལམ་ཡེ་ཤེས་རྩལ། །གདོད་ནས་ཡིན་ལུགས་མངོན་གྱུར་བར་དོ་རྣམ་དྲུག་རང་སར་གྲོལ། །སེམས་ཉིད་བླ་མ་ནོར་བུར་ཞལ་མཇལ་དོན་གཉིས་ལྷུན་གྲུབ་ཤོག །

ཞེས་པའང་གོང་གི་གསོལ་འདེབས་རྒྱས་པའི་ཁྲོས་གདན་ཐོག་གཅིག་ཏུ་སྦྱར་བ་པོ་ནི་རིག་འཛིན་པ་ཚེ་དབང་ནོར་བུའོ། །སརྦ་མངྒ་ལཾ།

༈ སྟོད་འབྲུག་མ་བདུན་བཀའ་བརྒྱུད་ཕྱག་ཆེན་བརྒྱུད་འདེབས།

ན་མོ་གུ་རུ་བྷྱ༔ གནས་འོག་མིན་ཆོས་དབྱིངས་ཕོ་བྲང་དུ། །རྒྱལ་བ་རྡོ་རྗེ་འཆང་ཆེན་ལ་གསོལ་བ་འདེབས། །ཤར་ཟ་ཧོར་ནོར་བུའི་གྲོང་ཁྱེར་དུ། །ཏེ་ལོ་ཤེས་རབ་བཟང་པོ་ལ་གསོལ་བ་འདེབས། །བྱང་པུལླ་ཧ་རིའི་དགོན་པ་རུ། །མཁས་པ་ནཱ་རོ་པཎ་ཆེན་ལ་གསོལ་བ་འདེབས། །ལྷོ་གྲོ་བོ་ལུང་གི་དགོན་པ་རུ། །སྒྲ་སྒྱུར་མར་པ་ལོ་ཙཱ་ལ༴ འབྲོག་ལ་ཕྱི་གངས་ཀྱི་ར་བ་རུ། །དབང་ཕྱུག་མི་ལ་རས་པ་ལ༴ ཤར་དྭགས་ལ་སྒོམ་པོའི་དགོན་པ་རུ། །ལྷ་རྗེ་ཟླ་འོད་གཞོན་ནུ་ལ༴ དཔག་ཕག་མོ་གྲུ་ཡི་མཐའ་རྩ་རུ། །འགྲོ་མགོན་ཕག་མོ་གྲུ་པ་ལ༴ གནས་སྣ་ཕུ་ཆོས་ལུང་གི་དགོན་པ་རུ། །གྲུབ་ཐོབ་གླིང་རྗེ་རས་པ་ལ༴ འབྲུག་སེ་བ་རི་བྱང་ཆུབ་ཀྱི་དགོན་པ་རུ། །གྲུབ་ཐོབ་གཙང་པ་རྒྱ་རས་ལ༴ རོང་དཀར་པོ་ཆོས་ལུང་གི་དབེན་གནས་སུ། །འགྲོ་མགོན་ལོ་རས་པ་ཆེན་པོ་ལ་གསོལ༴ བར་འབྲོག་རྡོ་རྗེ་གླིང་གི་དགོན་པ་རུ། །རྒོད་ཚངས་མགོན་པོ་རྡོ་རྗེ༴ གནས་གུང་ཐང་མདོ་ཆེན་གྱི་དགོན་པ་རུ། །ཆོས་རྗེ་མ་བདུན་རས་ཆེན་ལ༴ གནས་ལྕོགས་རི་བྱང་ཆུབ་ཀྱི་དབེན་གནས་སུ། །ཐུགས་སྲས་གདན་པ་རིན་ཆེན་ལ༴ གནས་དཔལ་ལྡན་ལྡིང་གི་དགོན་པ་རུ། །མཉམ་མེད་བྱིན་རླབས་རྡོ་རྗེ་ལ༴ གནས་ནང་ཁོང་དཔལ་གྱི་དགོན་པ་རུ། །ཆོས་རྗེ་སངས་རྒྱས་དབོན་ལ་གསོལ༴ གནས་མདོ་ཆེན་དཔལ་གྱི་དགོན་པ་རུ། །ཆོས་རྗེ་བསོད་ནམས་དབང་ཕྱུག་ལ༴ གནས་ཆོས་རྫོང་དཔལ་གྱི་དགོན་པ་རུ། །ཆོས་རྗེ་བསོད་ནམས་སྙིང་པོ་ལ༴ གནས་མདོ་ཆེན་དཔལ་གྱི་གཙུག་ལག་ཏུ། །མཉམ་མེད་ལྷུན་གྲུབ་བཀྲ་ཤིས་ལ༴ གནས་དམ་པ་ཆོས་ཀྱི་ཕོ་བྲང་ནས། །ཆོས་རྗེ་མགོན་པོ་དཔལ༴ གནས་གཞན་ཕན་ལྷུན་གྱིས་གྲུབ་པ་ནས། །ཆོས་རྗེ་ཀུན་དགའ་གཟི་བརྗིད་ལ༴ གནས་གུང་ཐང་མདོ་ཆེན་དགོན་པ་རུ། །ཆོས་རྗེ་ཆེ་མཆོག་རྡོ་རྗེ་ལ༴ གནས་བདེ་ཆེན་དཔལ་གྱི་ལྡིང་ཁང་ནས། །ཆོས་རྗེ་དཀོན་མཆོག་རྡོ་རྗེ་ལ༴ གནས་གར་བཞུགས་དག་པའི་ཞིང་ཁམས་ནས། །ཆོས་རྗེ་ནམ་མཁའ་ལྷུན་གྲུབ་ལ༴ གནས་ལས་འཕྲོ་དག་པའི་ཞིང་ཁམས་ནས། །ཆོས་རྗེ་ནམ་མཁའ་སེངྒེ་ལ༴ གནས་ཚེ་བསྒྲུབ་མཐར་ཕྱིན་གྱི་ཕོ་བྲང་ནས། །ཆོས་རྗེ་ནོར་བུ་བདེ་ཆེན་ལ༴ གནས་མཁྱེན་རབ་ལྷུན་གྲུབ་ཀྱི་ཕོ་བྲང་ནས། །ཆོས་རྗེ་བརྟན་པའི་ནོར་བུ་ལ༴ གནས་བསྐྱེད་རྫོགས་ཟུང་འཇུག་གི་ཕོ་བྲང་ནས། །སྔགས་འཆང་རྒྱལ་སྲས་སེངྒེ་ལ༴ གནས་ཕྱོགས་མེད་གདུལ་བྱའི་ཞིང་ཁམས་སུ། །རིག་འཛིན་ཚེ་དབང་ནོར་བུ་ལ༴ གནས་སྤྱི་གཙུག་ཉི་ཟླའི་གདན་སྟེང་དུ། །དྲིན་ཅན་རྩ་བའི་བླ་མ་ལ༴ གསོལ་བ་འདེབས་སོ་བདག་ལ་བྱིན་གྱིས་རློབས། །

གྲུབ་རྒྱལ་ཚེ་སྒྲུབ་ཀྱི་བརྒྱུད་འདེབས་འཆི་མེད་བུ་མོའི་གླུ་དབྱངས།

༈ གྲུབ་རྒྱལ་ཚེ་སྒྲུབ་ཀྱི་བརྒྱུད་འདེབས་འཆི་མེད་བུ་མོའི་གླུ་དབྱངས་ཞེས་བྱ་བ་བཞུགས་སོ། །

ཨོཾ་ཨཱ༔ཧཱུྃ་ཧྲཱི༔་ཧྲཱི༔ ཚེ་དཔག་མེད་མགོན་འདོད་དགུའི་དཔག་བསམ་ཤིང་། །གྲུབ་པའི་རྒྱལ་མོ་མཚན་དཔེ་མེ་ཏོག་བརྒྱན། །ཏི་པུ་པ་མི་རྟོགས་པའི་འབྲས་བུ་བརྗིད། །རས་ཆུང་རྡོར་གྲགས་འཆི་མེད་ཆང་གིས་བཟི། །མི་ལ་རས་ཆེན་ཏིང་འཛིན་ཉམས་ཀྱིས་མྱོས། །དྭགས་པོ་ལྷ་རྗེ་རྟོགས་པའི་ནོར་གྱིས་ཕྱུག །ཕག་མོ་གྲུ་པ་ཕག་མོའི་སྐུ་ལ་འཁྱུད། །འཇིག་རྟེན་མགོན་པོ་འཇིག་རྟེན་གསུམ་གྱི་མགོན། །སྤྱན་སྔ་གྲགས་འབྱུང་སྤྱན་སྔ་མངོན་ཤེས་ཅན། །ཡང་དགོན་ཆོས་རྗེ་ཡང་ཡང་བསྒྲུབ་རྒྱུད་འཛིན། །ཐུགས་སྲས་རིག་ལྡན་ཐུགས་བརྒྱུད་ཆོས་བཞིན་སྤྱོད། །ཟུང་ཕུག་པ་ནི་ཉམས་རྟོགས་ཟུར་ངོམ་བྱེད། །སྐྱེས་མཆོག་ཆེན་པོ་སྐྱེ་འགྲོ་ཡོངས་ཀྱི་མགོན། །ནམ་མཁའ་རྒྱལ་མཚན་ཚེ་ཡི་རིག་འཛིན་བརྙེས། །འཇམ་དཔལ་རྒྱ་མཚོ་གྲུབ་པའི་འཁོར་ལོ་བསྐོར། །ཆོས་ཀྱི་རྒྱ་མཚོ་སྐལ་བཟང་འགྲོ་བའི་མགོན། །འཇམ་དགོན་བླ་མ་མཁྱེན་བརྩེ་ནུས་པར་ལྡན། །ལྷ་དབང་གྲགས་པ་ལྷ་བཅས་འགྲོ་བའི་མགོན། །སྒྲོལ་བའི་མགོན་པོས་འཁོར་བ་ཀུན་སྒྲོལ་མཛད། །བློ་གྲོས་རྣམ་རྒྱལ་ཐེག་མཆོག་རྒྱལ་མཚན་འཛིན། །ཀུན་དགའ་འཕྲིན་ལས་སྙིང་པོའི་དགའ་སྟོན་སྤེལ། །ཀུན་བཟང་དབང་པོ་དབང་བཞིའི་འབྲས་བུ་སྨིན། །རྩ་བའི་བླ་མ་བྱིན་རླབས་ཀུན་གྱི་མཛོད། །འཆི་མེད་རིགས་གྲུབ་རྒྱུད་པའི་ཚོགས་བཅས་ལ། །སྙིང་ནས་རྩེ་གཅིག་གུས་པས་གསོལ་བ་འདེབས། །བདག་རྒྱུད་བྱིན་རློབས་ཚེ་ཡི་དངོས་གྲུབ་སྩོལ། །གདོད་ནས་འགྱུར་མེད་ཡེ་ཤེས་སྙིང་པོའི་ཁམས། །གློ་བུར་དྲི་མའི་སྐྱེ་འཆི་ཀུན་སངས་བ། །མི་ཤིགས་དྭངས་མ་འོད་གསལ་རྡོ་རྗེའི་ཚེ། །བདག་སོགས་འགྲོ་བས་ད་ལྟ་ཉིད་ཐོབ་མཛོད། །ཞེས་གྲུབ་རྒྱལ་ཚེ་དབང་གི་བརྒྱུད་འདེབས་སྙིང་པོ་ལ། སྒྲོལ་མགོན་མ་ཧ་ཆད་ཁ་སྐོང་ཤོ་ལོ་ཀ་གསུམ་པོ། རྩ་བའི་བླ་མ་ཀུན་བཟང་དབང་པོའི་བཀའ་ཡི་སྣང་བ་ཐོབ་འཕྲལ་སྐུ་མདུན་ཉིད་དུ་ཚེ་དབང་ནོར་བུས་ཕུར་བུ་རྒྱལ་ཟླའི་ཚེས་བཟང་ཉེར་བརྒྱད་ལ་སྦྱར་བ། སརྦ་བྷ་མངྒ་ལཾ།

༈ བླ་མ་ཡང་ཏིག་གི་བརྒྱུད་པའི་ཕྱག་འཚལ་གྱི་འཕྲོ་ནི།

ཤེས་བྱའི་དཀྱིལ་འཁོར་རབ་གཟིགས་ཤིང་། །དམ་ཆོས་རིན་ཆེན་མཛོད་འཛིན་པས། །ཟབ་མོའི་དགོངས་གཏེར་རྒྱས་མཛད་པ། །ཀུན་མཁྱེན་ཆོས་རྗེ་ལ་ཕྱག་འཚལ། །བདེ་ལེགས་ཡོན་ཏན་ཐམས་ཅད་ཀྱི། །འབྱུང་གནས་མཁྱེན་བརྩེའི་རྒྱ་མཚོ་ཆེ། །བྱམས་དང་སྙིང་རྗེའི་གཏེར་གྱུར་པ། །བདེ་ལེགས་རྒྱ་མཚོ་ལ་ཕྱག་འཚལ། །འཁོར་བའི་བྱ་བ་ཀུན་སྤངས་ནས། །གཅིག་པུ་འོད་གསལ་སྙིང་པོ་བརྙེས། །མཁའ་འགྲོ་འབར་བའི་སྤྲིན་ཕུང་ཅན། །བྱ་བྲལ་ཆོས་རྗེ་ལ་ཕྱག་འཚལ། །དུས་གསུམ་སངས་རྒྱས་ཐམས་ཅད་ཀྱིས། །ལེགས་གསུང་དམ་ཆོས་མཛོད་འཛིན་ཅིང་། །བཀྲ་ཤིས་འདོད་དགུ་འབྱུང་བའི་གནས། །སངས་རྒྱས་བཀྲ་ཤིས་ལ་ཕྱག་འཚལ། །ཡོན་ཏན་རིན་ཆེན་དཔལ་འབར་ཞིང་། །ཟབ་མོའི་དེ་ཉིད་ལེགས་རྟོགས་ན། །འགྲོ་རྣམས་སྨིན་གྲོལ་འགོད་མཛད་པའི། །གུ་ཎ་ཤྲི་ལ༴ སྣང་སྲིད་ཡེ་སངས་རྒྱས་པའི་དོན། །མ་ལུས་ཐུགས་སུ་ཆུད་མཛད་ཅིང་། །ཡེ་ཤེས་མཆོག་གི་ལམ་བགྲོད་པའི། །སངས་རྒྱས་ཡེ་ཤེས༴ སངས་རྒྱས་མ་ལུས་ཐམས་ཅད་ཀྱི། །ཐུགས་ཀྱི་སངས་བ་རིན་པོར་ཆེ། །སྙིང་ཐིག་བསྟན་པའི་རྒྱལ་མཚན་འཛིན། །སངས་རྒྱས་རྒྱལ་མཚན༴ བསླབ་གསུམ་ཚུལ་ཁྲིམས་རྒྱན་གྱིས་སྤྲས། །རྡོ་རྗེ་གསུམ་གྱི་རྣལ་འབྱོར་ཆེ། །བླ་མེད་བསྟན་པའི་རྒྱལ་མཚན་འཛིན། །ཚུལ་ཁྲིམས་རྒྱལ་མཚན༴ བསོད་ནམས་ཚོགས་ཆེན་ལྷུན་རྫོགས་ཤིང་། །ཡེ་ཤེས་རང་སྣང་འོད་གསལ་བས། །སྲིད་ཞིའི་མཐའ་ལས་རྣམ་པ་རྒྱལ། །བསོད་ནམས་རྣམ་རྒྱལ་ལ༴ ཨོ་རྒྱན་སློབ་དཔོན་པདྨ་ཡིས། །རྗེས་བཟུང་ཤེས་བྱའི་དོན་རྣམས་གཟིགས། །སྙིང་པོའི་བསྟན་པ་འཛིན་མཛད་པ། །ཨོ་རྒྱན་བསྟན་འཛིན༴ རྒྱལ་བའི་འཕྲིན་ལས་མ་ལུས་ཀུན༴ འགྲོ་ལ་ཕན་པའི་རླབས་ཆེན་སྤྱོད༴ ཀུན་གྱིས་བླ་མ་རིན་པོ་ཆེ། །ཀརྨ་གུ་རུ༴ དྲི་མེད་ཚུལ་ཁྲིམས་པདྨའི་མཚོར། །བླ་མེད་ཡིད་བཞིན་སྙིང་པོ་བླང་། །བསྟན་པའི་རྒྱལ་མཚན་རྩེར་མཆོད་པའི། །པདྨ་རྒྱལ་མཚན༴ བློ་གསལ་པདྨའི་སྐྱེད་ཚལ་དུ། །བློ་གྲོས་འདབ་སྟོང་སྦྲང་རྩིའི་བཅུད། །བློ་ལྡན་བུང་བ་ཚིམ་བྱེད་པ། །པདྨ་མ་ཏི༴ རྣམ་གྲོལ་ཡོན་ཏན་དུ་མའི་མཛོད། །བཀྲ་ཤིས་ཕུན་ཚོགས་འདོད་དགུའི་གཏེར། །དགོས་འབྱུང་ཡིད་བཞིན་རིན་པོ་ཆེ། །མངྒ་རཏྣ༴ ཆོས་དབྱིངས་གདོད་ནས་དག་པའི་ཐུགས། །བཀྲ་ཤིས་དགེ་མཚན་འབུམ་གྱིས་སྤྲས། །བློ་ལྡན་སྨིན་གྲོལ་ལ་འགོད་མཛད། །བཀྲ་ཤིས་བློ་གྲོས༴ རྒྱལ་ཀུན་ཐུགས་ཀྱི་པདྨ་ལས། །ལེགས་འོང་མཚོ་སྐྱེས་རྡོ་རྗེའི་འཕྲུལ། །སྐལ་ལྡན་དབུལ་སེལ་ནོར་བུ་མཆོག །པདྨ་ནོར་བུ༴ ཨོ་རྒྱན་ཡེ་ཤེས་དྷཱཀྐི་ཡིས། །རྗེས་བཟུང་སྔགས་ཀྱི་བསྟན་པ་འཛིན། །བསྡུ་བ་བཞི་ཡིས་འགྲོ་བ་འདུལ། །གུ་རུ་སྐལ་བཟང་ལ༴ གོང་གི་བཀྲ་ཤིས་བློ་གྲོས་མན་མ་ཧཱ་གུ་རུའི་གསུང་ཡིན་ལགས།

སྙིང་ཏིག་ཡང་རྫོང་མའི་བླ་བརྒྱུད་ཁ་སྐོང་།

༈ སྙིང་ཏིག་ཡང་རྫོང་མའི་བླ་བརྒྱུད་ཁ་སྐོང་ནི།

གར་གྱི་དབང་ཕྱུག་དགོས་འདོད་རེ་བ་བསྐོང་། །མཆོག་བརྙེས་དམ་པ་གསུམ་ལ་གསོལ་བ་འདེབས། །ཡ་ཏི་དྷ་ཚ་མཁྱེན་བརྩེ་ནུས་པའི་གཏེར། །མི་འགྱུར་དབང་རྒྱལ་ཟབ་དོན་གསལ་བའི་དཔལ། །ཀུན་བཟང་རྣམ་རྒྱལ་རྫོགས་ཆེན་བསྟན་པའི་སྲོག །སྐྱེས་མཆོག་རིན་ཆེན་གསུམ་ལ༴ འབྲུག་སྒྲ་བཟང་པོ་སྨིན་གྲོལ་ཆུ་ཁུར་ཅན། །བསྟན་པའི་ཉི་མ་སྦས་པའི་སངས་རྒྱས་དངོས། །འཇིགས་བྲལ་ནམ་མཁའ་རྫོགས་ཆེན་རྣལ་འབྱོར་བ། །བསྟན་འཛིན་དམ་པ་གསུམ་ལ༴ རིན་ཆེན་བཟང་པོ་ཆོས་ཀྱི་རྒྱལ་མཚན་པར། །ཚེ་དབང་ནོར་བུ་གཞན་ཕན་འཕྲིན་ལས་སྤྱོད། །རྩ་བའི་བླ་མ་རྒྱལ་ཀུན་འདུས་པའི་ཞལ། །མཆོག་ཐུན་དངོས་གྲུབ་སྩོལ་བ་གསོལ་བ་འདེབས། །གར་གྱིས་དབང་ཕྱུག་མན་ཆད་ཀྱི་ཁ་བསྐང་རིག་འཛིན་ཚེ་དབང་ནོར་བུའི་ཆོས་འདིའི་ཁྲིད་ལུང་རྣམས་རྫོགས་པར་ཐོབ་པའི་དུས་སུ་སྦྱར་བའོ། །སརྦ་མངྒ་ལཾ།

༈ མ་ཅིག་རྒྱམ་ཐང་གསོལ་འདེབས་ཁ་སྐོང་།

ཆོས་ལུང་བྱང་བརྩེའི་དབེན་གནས་སུ། །རྗེ་བཙུན་གྲོལ་མཆོག་བྱིན་རླབས་ཅན། །བྲག་སྟོད་རྡོ་རྗེའི་ཕོ་བྲང་དུ། །ཆོས་སྐུ་ལྷ་དབང༴ ཆོས་ལུང་བདེ་ཆེན་ཕོ་བྲང་དུ། །ལུང་རིགས་རྒྱ་མཚོ༴ ཁམས་གསུམ་འགྲོ་བའི་སྤྱི་བོ་རུ། །ཀུན་དགའི་སྙིང་པོ༴ ཟར་གྱིས་གསང་རིའི་དགོན་པ་རུ། །རིན་ཆེན་རྒྱ་མཚོ༴ ཇོ་སྣང་དཔལ་གྱི་རི་ཁྲོད་དུ། །སྙིང་པོ་མཐའ་ཡས༴ དགེ་ཕུའི་རི་ཁྲོད་འབྲས་སྤུངས་ནས། །ཀུན་བཟང་དབང་པོ༴ ཕྱོགས་མེད་གདུལ་བྱའི་ཞིང་ཁམས་སུ༴ རིག་འཛིན་ཆེན་པོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །

༈ ཨ་ཏི་ཟབ་དོན་གྱི་བརྒྱུད་འདེབས་ཁ་སྐོང་།

མངའ་རིས་དོལ་པོ་ཆོས་ཀྱི་སྐྱེད་ཚལ་ནས། །གྲུབ་མཆོག་ཨོ་རྒྱན་རྒྱལ་མཚན་ལ་གསོལ་བ་འདེབས། །ཕྱོགས་མེད་གཞན་ཕན་འཕྲིན་ལས་སྐྱོངས་བ་ནས། །རིག་འཛིན་ཚེ་དབང་ནོར་བུ་ལ་གསོལ་བ་འདེབས། །

༈ ཤའུ་གཏེར་བྱོན་ཐུགས་རྗེ་ཆེན་པོའི་དབང་ཁྲིད་ལུང་གསུམ་བརྒྱུད་འདེབས་ཁ་སྐོང་།

མོན་བོད་ས་མཚམས་གུ་རུའི་སྦས་ཡུལ་ངོགས། །ཟབ་བཟང་རྡོ་རྗེ་རྣལ་འབྱོར་གད་མོ་སྒྲོགས། །སྦས་པའི་རྣལ་འབྱོར་ཨུ་རྒྱན་རྒྱལ་མཚན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཕྱོགས་མེད་འགྲོ་དོན་སྐྱོངས་བའི་ཞིང་ཁམས་སུ། །གུ་རུའི་བྱིན་རླབས་ནམ་སྙིང་ཐུགས་སྤྲུལ་ནི། །འབྲེལ་ཚད་དོན་ལྡན་ཚེ་དབང་ནོར་བུ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སརྦ་མངྒ་ལཾ།

༈ ཁྲིད་བརྒྱ་བརྒྱུད་པ་ཀུན་གྱི་འཕྲོ་མཐུད།

རྒྱུད་པའི་ཆུ་བོ་ཀུན་འདུས་གྲོལ་མཆོག་ཞབས། །ཆོས་ཉིད་གཉུག་མའི་དོན་གཟིགས་ལྷ་དབང་གྲགས། །འཇིགས་མེད་ཤིང་རྟ་མཆོག་གྱུར་ཀུན་དགའ་སྙིང་། །མཁའ་སྤྱོད་གྲུབ་གཙོ་འཕྲིན་ལས་དཔལ་དབང་པོ། །རིན་ཆེན་རྒྱ་མཚོ་གནས་བརྟན་རྡོ་རྗེ་འཛིན། །སྙིང་པོ་མཐའ་ཡས་གྲུབ་བརྙེས་སྦས་པའི་ཚུལ། །འཁོར་ལོའི་མགོན་པོ་བརྩེ་ཆེན་ཀུན་བཟང་དབང་། །རྩ་རྒྱུད་བླ་མ་མཆོག་ལ་གསོལ་བ་འདེབས། །ཁྲིད་བརྒྱ་བརྒྱུད་པ་ཀུན་གྱི་འཕྲོ་མཐུད་དེ་ཁོ་ན་སྦྱར་བས་ཆོག་གོ །སརྦ་མངྒ་ལཾ།

༈ སྨར་ཁྲིད་རིགས་བཞི་དང་རྒྱལ་པོ་བཀའ་འབུམ་གྱི་རྒྱུད་པའི་འཕྲོ་རྣམས་ཆབ་གཅིག་ཏུ།

ཟབ་མོ་ཁྲིད་ཆེན་བརྒྱ་དང་རྩ་བརྒྱད་ཀྱི། །ལུང་རྟོགས་བྱིན་རླབས་གཅིག་ཏུ་སྡུད་མཛད་པའི། །རྗེ་བཙུན་བླ་མ་ཀུན་དགའ་གྲོལ་མཆོག་ཞབས། །ཐུགས་སྲས་ལྷ་དབང་གྲགས་པར་གསོལ་བ་འདེབས། །ཡོངས་རྫོགས་བསྟན་པའི་མངའ་བདག་རྡོ་རྗེ་འཆང་། །རྗེ་བཙུན་བླ་མ་ཀུན་དགའ་སྙིང་པོ་དཔལ། །ཕྲིན་ལས་དབང་མོ་རིན་ཆེན་རྒྱ་མཚོའི་སྡེ། །སྙིང་པོ་མཐའ་ཡས་ཞབས་ལ་གསོལ་བ་འདེབས། །འཁོར་ལོའི་མགོན་པོ་ཀུན་བཟང་དབང་པོ་དང་། །དེ་སྲས་མཐུ་བོ་ཚེ་དབང་ནོར་བུའི་སྡེ། །གདམས་ཟབ་ཆུ་རྒྱུན་སྩོལ་མཛད་བླ་མ་རྗེ། །བཀའ་དྲིན་མཚུངས་མེད་མགོན་པོར་གསོལ་བ་འདེབས། །ཞེས་ཁྲིད་ཆེན་ཐམས་ཅད་བརྒྱུད་པ་མཐུན་པར་འདྲེན། །

སངས་རྒྱས་པདྨ་འབྱུང་གནས་ལ་ངེས་པ་དོན་གྱི་སྒོ་ནས་བསྟོད་དབྱངས་ཡན་ལག་བདུན་པ་གྲུབ་མཐའ་ངེས་པའི་སྙིང་པོ་ཐེག་ཆེན་བསྟན་བཅོས་རྒྱ་མཚོའི་སྒྲ་དབྱངས་རྒྱུན་མི་ཆད་པ་རིན་པོ་ཆེའི་གཏེར།

༄༅། །སངས་རྒྱས་པདྨ་འབྱུང་གནས་ལ་ངེས་པ་དོན་གྱི་སྒོ་ནས་བསྟོད་དབྱངས་ཡན་ལག་བདུན་པ་གྲུབ་མཐའ་ངེས་པའི་སྙིང་པོ་ཐེག་ཆེན་བསྟན་བཅོས་རྒྱ་མཚོའི་སྒྲ་དབྱངས་རྒྱུན་མི་ཆད་པ་རིན་པོ་ཆེའི་གཏེར་ཞེས་བྱ་བ་བཞུགས་སོ། །

༈ གུ་རུ་པདྨ་སིདྡྷི་ཧཱུྃ་ཧྲཱི༔ རྒྱལ་བ་རྒྱ་མཚོ་ཀུན་གྱི་ངོ་བོ། །གསུང་གི་རྡོ་རྗེ་འོད་དཔག་མེད་མགོན། །དཀྱིལ་འཁོར་རབ་འབྱམས་རྒྱ་མཚོའི་གཙོ་བོ། །སངས་རྒྱས་པདྨ་འབྱུང་ལ་ཕྱག་འཚལ། །གདོད་མ་ཉིད་ནས་ཡོངས་གྲུབ་ཆོས་དབྱིངས། །སྐྱེ་འགག་གནས་བྲལ་བདེ་གཤེགས་སྙིང་པོ། །ཀུན་ཁྱབ་ཀུན་བཟང་ངོ་བོ་ཉིད་སྐུ། །སངས་རྒྱས་པདྨ་འབྱུང་ལ་ཕྱག་འཚལ་ལོ། །ཕྲ་རབ་རྡུལ་འདས་རིག་པའི་ངོ་བོ། །ཡེ་ཤེས་སྐུ་ནི་མེ་ལོང་ལྟ་བུ། །སོར་རྟོག་བྱ་གྲུབ་མ་འདྲེས་རྩལ་རྫོགས། །སངས་རྒྱས་པདྨ་འབྱུང་ལ་ཕྱག་འཚལ་ལོ། །ཆོས་ཀུན་མཉམ་ཉིད་ཡེ་ཤེས་ཡངས་པ། །ཐ་དད་མ་ཡིན་གཅིག་པུ་དང་བྲལ། །བློ་འདས་སྤྲོས་བྲལ་གཉིས་མེད་ཐིག་ལེ། །སངས་རྒྱས་པདྨ་འབྱུང་ལ་ཕྱག་འཚལ་ལོ། །སྲིད་པར་རྟག་ཏུ་ཁྱོད་ཉིད་སྣང་ཞིང་། །ཞི་དབྱིངས་རྟག་ཏུ་ཁྱོད་ནི་སྙོམས་བཞུགས། །སྲིད་ཞི་ཀུན་ལ་ཁྱབ་པའི་བདག་ཉིད། །སངས་རྒྱས་པདྨ་འབྱུང་ལ་ཕྱག་འཚལ་ལོ། །འཁོར་བར་གནས་ཀྱང་འཁོར་འི་སྐྱོན་མེད། །མྱ་ངན་འདས་ཀྱང་ཞི་བར་གཟིམ་མིན། །དྲི་མེད་རྒྱལ་བ་ཀུན་གྱི་ངོ་བོ། །སངས་རྒྱས་པདྨ་འབྱུང་ལ་ཕྱག་འཚལ། །ཁྱོད་ནི་རྟག་མཐར་ནམ་ཡང་མ་ལྷུང་། །སྟོང་ཞིང་བདག་མེད་ཁས་ལེན་དང་བྲལ། །རྟོག་མེད་ངང་ལ་རྟག་ཏུ་མཉམ་བཞག །སངས་རྒྱས་པདྨ་འབྱུང་ལ་ཕྱག་འཚལ། །ཁྱོད་ནི་མཐའ་གཉིས་གང་དུ་མི་གནས། །དབུ་མར་ཡང་ནི་དམིགས་པ་མ་ཡིན། །སྨྲ་བསམ་བརྗོད་མེད་སྐྱེ་འགག་ལས་འདས། །སངས་རྒྱས་པདྨ་འབྱུང་ལ་ཕྱག་འཚལ། །ཁྱོད་ནི་ཉག་ཅིག་ཉིད་དུ་གནས་ཤིང་། །རྣམ་པ་ཐམས་ཅད་དུ་མར་སྣང་བ། །བསམ་གྱིས་མི་ཁྱབ་རིག་པའི་ངོ་བོ། །སངས་རྒྱས་པདྨ་འབྱུང་ལ་ཕྱག་འཚལ། །ཁྱོད་ནི་སངས་རྒྱས་ཀུན་གྱི་ངོ་བོ། །སངས་རྒྱས་ཀུན་གྱི་སྲས་ཀྱི་མཐུ་བོ། །སངས་རྒྱས་ཡོངས་ཀྱི་བསྐྱེད་པའི་ཡབ་ཡིན། །སངས་རྒྱས་པདྨ་འབྱུང་ལ་ཕྱག་འཚལ། །ཁྱེད་ནི་རྒྱལ་བ་མཐའ་དག་སྤྲུལ་པ། །རྒྱལ་བ་ཡོངས་ཀྱི་སྤྲུལ་གཞི་གྱུར་པ། །རྒྱལ་བ་ཀུན་ལ་དབང་བསྐུར་མཛད་དོ། །སངས་རྒྱས་པདྨ་འབྱུང་ལ་ཕྱག་འཚལ། །འཁོར་འདས་ཀུན་གྱི་སྔ་རོལ་ཉིད་ནས། །ཡོངས་སུ་གྲུབ་ཅིང་འཁོར་འདས་དབུས་གནས། །འཁོར་འདས་མཐར་བཞུགས་དུས་གསུམ་དུས་མེད། །སངས་རྒྱས་པདྨ་འབྱུང་ལ་ཕྱག་འཚལ། །འཁོར་འདས་མེད་པའི་ངོ་བོ་ལ་བཞུགས། །གྲོལ་འཁྲུལ་མིང་རྟགས་ལས་འདས་གཤིས་ལུགས། །ཀུན་ལ་སྣང་ཞིང་ཀུན་གྱི་གཞིར་གྱུར། །སངས་རྒྱས་པདྨ་འབྱུང་ལ་ཕྱག་འཚལ། །རྣམ་ཤེས་ཚོགས་བརྒྱད་པདྨའི་དབུས་ན། །རིག་པ་རང་བྱུང་སྤྲོས་བྲལ་ངང་གནས། །འཁོར་འདས་ཀུན་གྱི་དྭངས་མ་ཉིད་གྱུར། །སངས་རྒྱས་པདྨ་འབྱུང་ལ་ཕྱག་འཚལ། །མཐའ་དག་སྣང་བ་གདོད་ནས་མ་གྲུབ། །མ་གྲུབ་བཞིན་སྣང་གྲུབ་དང་མ་གྲུབ། །སྣང་ཞེས་བརྗོད་གཞི་གཞི་མེད་རྩལ་བྲལ། །སངས་རྒྱས་པདྨ་འབྱུང་ལ་ཕྱག་འཚལ། །སྣང་བ་སེམས་ཞེས་ཚུར་མང་མི་བསྡུད། །སེམས་མིན་གཞན་དུ་ནམ་ཡང་མ་གྲུབ། །རོ་མཉམ་ཞེས་སུ་བསྲེ་བའི་ཡུལ་སྟོང་། །སངས་རྒྱས་པདྨ་འབྱུང་ལ་ཕྱག་འཚལ། །གདོད་ནས་གཞི་མེད་རྩ་བྲལ་སྟོང་པ། །སྟོང་ཉིད་རིག་པ་གཞོམ་ཞིང་ལས་འདས། །སྣང་སེམས་གློ་བུར་རྟག་པ་ཀུན་སྟོང་། །སངས་རྒྱས་པདྨ་འབྱུང་ལ་ཕྱག་འཚལ། །གཤིས་ལུགས་འདི་ནི་ཤིན་ཏུ་རྟོགས་དཀའ། །ཡེ་ཤེས་འདི་ནི་ཆེས་ཆེར་ཕྲ་བ། །བསམ་གྱིས་མི་ཁྱབ་ཆོས་ཉིད་གནས་ལུགས། །སངས་རྒྱས་པདྨ་འབྱུང་ལ་ཕྱག་འཚལ། །སྒམ་པོས་བཅོས་དང་བསྒྲིམ་པོས་མ་སླད། །ཀུན་གྱི་སྙིང་པོ་ཤིན་ཏུ་བཟང་པོ། །བཟང་ངན་བླང་དོར་སྤྲོས་པ་བྲལ་བ། །སངས་རྒྱས་པདྨ་འབྱུང་ལ་ཕྱག་འཚལ། །ཀུན་ཁྱབ་སྐུ་དང་ཡེ་ཤེས་ལུས་གཅིག །དྲི་མའི་དབུས་བཞུགས་དྲི་མས་མ་གོས། །རབ་ཏུ་རྒྱ་ཆེ་ཤིན་ཏུ་ཕྲ་བ། །སངས་རྒྱས་པདྨ་འབྱུང་ལ་ཕྱག་འཚལ། །རྣམ་པར་ཤེས་པའི་ཆ་ཀུན་ཡོངས་སྤངས། །ཡེ་ཤེས་མ་ལུས་རྩལ་ཁ་རྫོགས་པ། །སྤངས་རྟོགས་འབྲས་བུ་མངོན་དུ་གྱུར་པའི། །སངས་རྒྱས་པདྨ་འབྱུང་ལ་ཕྱག་འཚལ། །ཀུན་ནས་བརྟག་པ་རང་ངོས་སྟོང་ཞིང་། །གཞན་དབང་དོན་དམ་ངོ་ངོས་སྟོང་སྟེ། །སྟོང་ཉིད་རིག་པ་ཡོངས་གྲུབ་རྟག་བརྟན། །སངས་རྒྱས་པདྨ་འབྱུང་ལ་ཕྱག་འཚལ། །ཀུན་རྫོབ་ཆོས་ནི་ནམ་ཡང་མི་བརྟན། །དོན་དམ་བདེན་པ་ཤིན་ཏུ་བརྟག་སྟེ། །མི་ཤིགས་འགྱུར་མེད་རྡོ་རྗེའི་རང་བཞིན། །སངས་རྒྱས་པདྨ་འབྱུང་ལ་ཕྱག་འཚལ། །བརྟན་པའི་འཛིན་རྟོག་དམིགས་བཅས་ཞེན་པ། །བརྟན་དང་མི་བརྟན་གཞི་རྩ་སྟོང་པའི། །ཆོས་དབྱིངས་ཡེ་ཤེས་འཕོ་འགྱུར་མེད་དོ། །སངས་རྒྱས་པདྨ་འབྱུང་ལ་ཕྱག་འཚལ། །གང་ཟག་བདག་དང་ཆོས་ཀྱི་བདག་བྲལ། །བདག་མེད་ངོ་བོ་ཤེས་རབ་ཕར་ཕྱིན། །སྟོང་པ་ཉིད་དེ་མཚན་མ་སྨོན་མེད། །སངས་རྒྱས་པདྨ་འབྱུང་ལ་ཕྱག་འཚལ། །འབྲས་བུ་སྡུག་བསྔལ་རྒྱུར་གྱུར་ཀུན་འབྱུང་། །སྤང་བྱེད་ལམ་གྱི་ཐོབ་བྱ་འགོག་པ། །བདེན་བཞིའི་རང་བཞིན་གཉུག་མའི་འོད་གསལ། །སངས་རྒྱས་པདྨ་འབྱུང་ལ་ཕྱག་འཚལ། །འཁོར་བའི་གཞི་རྩ་མ་རིག་ངོ་བོ། །བདག་གཅེས་འཁྲུལ་པའི་དུཿཁ་གཟིར་ལ། །བདག་མེད་སྟོང་པའི་སེང་གེའི་སྒྲ་ཆེན། །སངས་རྒྱས་པདྨ་འབྱུང་ལ་ཕྱག་འཚལ། །བདག་གི་གཉེན་པོར་བསྔགས་པའི་སྟོང་པ། །དེར་དམིགས་སྟོང་པ་བཅོམ་ཕྱིར་བདག་མེད། །ངོ་བོ་ཆོས་དབྱིངས་དོན་དམ་བདག་མཆོག །སངས་རྒྱས་པདྨ་འབྱུང་ལ་ཕྱག་འཚལ། །ཕྱི་དོན་ཞེན་སྤངས་སྣང་བ་སེམས་བརྟན། །སེམས་འཛིན་བཅོམ་ཕྱིར་སྟོང་པར་ཡོངས་གསུངས། །གཉིས་ཀ་འགོག་ཕྱིར་ཟུང་འཇུག་སྟོང་ཉིད། །སངས་རྒྱས་པདྨ་འབྱུང་ལ་ཕྱག་འཚལ། །འགོག་བདེན་རང་བཞིན་ཞི་བར་གནས་པ། །རང་རིག་རང་གསལ་ལྷག་མཐོང་ངོ་བོ། །ཞི་ལྷག་ཟུང་འཇུག་གདོད་མའི་ཡེ་ཤེས། །སངས་རྒྱས་པདྨ་འབྱུང་ལ་ཕྱག་འཚལ། །གནས་ཞེས་ངོ་བོ་གཞི་རྟེན་མ་གྲུབ། །འགྱུ་ཞེས་རྣམ་པར་རྟོག་པས་མ་སྐྱོད། །གནས་དང་འགྱུ་ཞེས་གང་དུ་མ་དམིགས། །སངས་རྒྱས་པདྨ་འབྱུང་ལ་ཕྱག་འཚལ། །རིག་པ་ཞེས་བརྗོད་མིང་ལ་དོན་ཞེན། །དོན་ལ་མིང་ཞེས་རྣམ་པ་ཡོངས་སྤངས། །མི་ཤིག་ངོ་བོར་ཁས་ལེན་བྲལ་ངོས། །སངས་རྒྱས་པདྨ་འབྱུང་ལ་ཕྱག་འཚལ། །ཕུང་ཁམས་དབང་ཡུལ་སྤང་གཞི་དེ་གཞན། །གཤེགས་པ་ཡབ་ཡུམ་སེམས་དཔའ་སེམས་མ། །དཀྱིལ་འཁོར་འཁོར་ལོ་རབ་འབྱམས་སྤྲོ་མཛད། །སངས་རྒྱས་པདྨ་འབྱུང་ལ་ཕྱག་འཚལ། །གཟུགས་མེད་གཟུགས་གསལ་མཚན་དཔེ་འོད་གསལ། །བདག་མེད་སྟོང་པ་རྣམ་རྟོག་སྤྲོས་བྲལ། །ཤེས་བྱ་ཀུན་ཁྱབ་ཟབ་གསལ་དབྱེར་མེད། །སངས་རྒྱས་པདྨ་འབྱུང་ལ་ཕྱག་འཚལ། །དྲི་མ་འགྱུར་བཅས་བདུད་ཀུན་བཅོམ་ནས། །དྲི་མེད་མི་འགྱུར་བཅོམ་ལྡན་བདེ་ཆེན། །ཆ་མེད་ཀུན་འགྲོ་ཉག་གཅིག་རྒྱལ་བ། །སངས་རྒྱས་པདྨ་འབྱུང་ལ་ཕྱག་འཚལ། །དེ་ལྟར་འཁོར་འདས་ཡོངས་ཀྱི་སྤྱི་དཔལ། །བརྟན་དང་གཡོ་བ་ཀུན་གྱི་རང་བཞིན། །སྲོག་ལྡན་ཀུན་གྱི་མགོན་དང་བཅུད་གྱུར། །སྐུ་གསུམ་རྒྱལ་བ་ཡོངས་ཀྱི་འབྱུང་ཁུངས། །འཁོར་འདས་ཐོག་མཐའ་མེད་པའི་མཚོ་ཀློང་། །རྣམ་ཤེས་པདྨ་རྒྱས་པའི་དབུས་སུ། །ཡོན་ཏན་ཀུན་འབྱུང་སྙིང་པོ་རིག་པ། །མི་འགྱུར་བདེ་ཆེན་ངོ་བོར་རྟག་གནས། །སངས་རྒྱས་ཀུན་དངོས་ཀུན་གྱི་རྒྱལ་པོ། །ཐུགས་རྗེ་ནུས་མཐུ་རྨད་དུ་བྱུང་གྱུར། །མ་ཧཱ་གུ་རུ་པདྨ་འབྱུང་གནས། །ལྷ་མི་ཡོངས་ཀྱི་བླ་མ་མཆོག་དེར། །བདག་གི་སྒོ་གསུམ་གུས་པ་ཆེན་པོས། །ཐལ་མོ་སྤྱི་བོར་སྦྱར་ནས་བློ་ཡི། །རྡུལ་སྙེད་ལུས་གོས་རང་བཞིན་མཉམ་ཉིད། །རབ་ཏུ་ཕྱག་འཚལ་ཕྱག་འཚལ་འདུད་ཀྱི། །མཐའ་ཡས་འགྲོ་བའི་སྒྲིབ་ཀུན་བཅོམ་ནས། །དྲི་མེད་ཟླ་བ་རྒྱས་བཞིན་བྱིན་རློབས། །བདག་ལུས་ལོངས་སྤྱོད་དཔལ་འབྱོར་དབང་ཕྱུག །ཚེ་སྲོག་རྣམས་དང་ཚོགས་གཉིས་དགེ་ཚོགས། །རྣམ་པ་ཀུན་ཏུ་བླ་མ་མཆོག་ལ། །བདག་མེད་ངང་དུ་འབུལ་གྱི་བཞེས་གསོལ། །སྒྲིབ་པའི་ངོ་བོ་གདོད་ནས་མ་གྲུབ། །གློ་བུར་རྣམ་རྟོག་དབང་གིས་བསགས་པའི། །སྡིག་པ་མི་དགེ་ཅི་མཆིས་པ་རྣམས། །མཐོལ་བཤགས་རོ་མཉམ་ངང་དག་གྱུར་ཅིང་། །ཡེ་ནས་རང་བྱུང་འདུས་མ་བྱས་དགེ །རྣམ་ཤེས་ཀྱིས་བསླུ་འདུ་བྱས་དགེ་བ། །འདུས་དང་འདུས་མ་བྱས་པས་སྐུ་གཉིས། །ཡེ་ཤེས་བསྒྲུབ་ལ་རྗེས་སུ་ཡི་རང་། །རྒྱལ་བའི་གསུང་གི་རྒྱུན་ཆད་མི་མངའ། །གསུང་དང་མི་གསུང་སྤྲོས་པས་དབེན་མོད། །ཡལ་ཡོལ་བཏང་སྙོམས་ནམ་ཡང་མི་གནས། །ཚུར་མཐོང་གདུལ་བྱར་ཆོས་ཀྱི་འཁོར་ལོ། །བསམ་གྱིས་མི་ཁྱབ་མོས་ངོ་དང་མཐུན། །རྟག་ཏུ་བསྐོར་བར་གསོལ་བ་འདེབས་སོ། །རྒྱལ་བ་གཤེགས་བཞུགས་ནམ་ཡང་མེད་ཅིང་། །མི་རྟག་འདུས་བྱས་ཆོས་ལས་འདས་མོད། །རྟག་བརྟན་ཉིད་ཡིན་བྱིས་པའི་ངོར་བསྟུན། །མྱ་ངན་མི་འདའ་གསོལ་བ་འདེབས་སོ། །ཡང་དག་དོན་ལ་འཁོར་གསུམ་དམིགས་མེད། །རྣམ་རྟོག་འབྱུང་བ་ཡོད་པ་དེ་སྲིད། །དགེ་བ་བསགས་དང་འཕགས་པའི་ས་ལམ། །རྒྱ་ཆེན་སྤྱོད་པའི་ཚོགས་གཉིས་འབྲས་བུ། །བྱང་སེམས་རྒྱ་མཚོ་དཔག་ཀླས་ཉིད་ཀྱི། །ཐེག་ཆེན་རྒྱ་མཚོ་སྨོན་ལམ་གང་བཏབ། །དགེ་ལེགས་རྒྱ་མཚོ་ཇི་བཞིན་འགྲུབ་གྱུར། །རྒྱལ་བ་རྒྱ་མཚོའི་འཕྲིན་ལས་མཐའ་དག །ཚེ་འདི་ཉིད་ནས་འགྲུབ་པའི་རྒྱུར་བསྔོ། །དབང་བཅུའི་མཐར་ཐུག་མྱུར་དུ་ཐོབ་ནས། །སེམས་ཅན་ཀུན་གྱི་རེ་བསྐང་ནོར་གྱུར། །ཡིད་བཞིན་བདེ་ལ་ཚོམ་བུ་གཅིག་སྤྱོད། །འཇམ་དཔལ་ལ་སོགས་བྱང་སེམས་མཐུ་ཆེན། །དབྱངས་ཅན་མ་སོགས་སེམས་མ་རབ་འབྱམས། །རྒྱ་ཆེན་སྨོན་ལམ་མཐུ་བརྙེས་མཛད་པ། །མཚོ་ལྟར་རྒྱས་ཀུན་མྱུར་འགྲུབ་བདག་སྨོན། །དེ་ལྟར་སངས་རྒྱས་པདྨ་འབྱུང་ལ། །བསྟོད་བསྔགས་ཡན་ལག་བདུན་གྱི་དགེ་བས། །བདག་སྐྱེ་ཀུན་ཏུ་པདྨ་ཀ་རས། །རྗེས་སུ་བཟུང་ཞིང་ཐེག་པ་མཆོག་གྱུར། །ངེས་དོན་ཆོས་འཁོར་ཡོངས་ཀྱི་མཐུན་འཇུག །བསྟན་པའི་སྙིང་པོ་ཤིན་ཏུ་རྣལ་འབྱོར། །ཆེས་ཆེར་གསལ་བའི་བྱེད་པོར་གྱུར་ཅིང་། །ངེས་གསང་རྡོ་རྗེའི་སྙིང་ལས་འགྲོ་ཀུན། །རབ་སྦྱོར་གྲུབ་པའི་གཙོ་མཆོག་པ་ལ། །རབ་བཞག་བྱང་ཆེན་བགྲོད་པའི་ཤིང་རྟ། །མུ་བཞི་བདུད་བཞིའི་ཕྱོགས་ལས་རྣམ་རྒྱལ། །ལྷུན་གྲུབ་རིག་འཛིན་དབང་པོའི་སྡེ་འགྲུབ། །རྒྱལ་བ་གཞན་གྱི་མཛད་འཕྲིན་རབ་འབྱམས། །རྒྱ་མཚོ་ཀུན་ཀྱང་བདག་གི་ཡོངས་གྲུབ། །རྒྱལ་ཀུན་མཁྱེན་བརྩེ་ནུས་འདུས་པདལ། །པད་འབྱུང་ཇི་ལྟར་བདག་འགྲུབ་རྒྱུར་བསྔོ། །

དུས་གསུམ་སངས་རྒྱས་ཐམས་ཅད་ཀྱི་ངོ་བོ་མགོན་པོ་གཟི་བརྗིད་འོད་དཔག་ཏུ་མེད་པ་པདྨ་འབྱུང་གནས་ལ་ངེས་པ་དོན་གྱི་སྒོ་ནས་བསྟོད་དབྱངས་ཡན་ལག་བདུན་པ་གྲུབ་མཐའ་ངེས་པའི་སྙིང་པོ་ཐེག་ཆེན་བསྟན་བཅོས་རྒྱ་མཚོའི་སྒྲ་དབྱངས་རྒྱུན་མི་ཆད་པའི་རིན་ཆེན་གཏེར་ཞེས་བྱ་བ་འདི་ཡང་སྐྱེ་བ་དུ་མའི་རིགས་བདག་བླ་མ་པདྨ་ཀ་ར་གང་གི་སྒྱུ་འཕྲུལ་ཤིང་རྟ་ཆེན་པོ་དག་དང་། རྩ་བའི་བླ་མ་རྣམས་ཀྱི་བྱིན་རླབས་སྙིང་ལ་ཅུང་ཟད་ཞུགས་པའི་ནུས་པས། གྲུབ་མཐའ་ལ་ངེས་པ་ཇི་ཙམ་རྙེད་པ་དེའི་རྟོགས་བརྗོད་ཀྱི་ཚུལ་དུ། རིག་པ་འཛིན་པ་ཚེ་དབང་ནོར་བུ་འཇམ་དབྱངས་རྒྱ་མཚོ་ཡིས་རང་ལོ་སུམ་ཅུའི་གུང་དུ་སླེབས་པ་ཀུན་དགའ་ཤིང་སྟག་ཆུ་སྟོད་ཟླ་བའི་ཡར་ཚེས་རྒྱལ་བའི་བདེན་བཞིའི་ཆོས་འཁོར་བསྐོར་བའི་དུས་ཆེན་གྱི་ཐུན་སྐབས་ཤིག་ལ་ཕྱག་འཚལ་ཡོངས་སུ་རྫོགས་པ་དང་། ཚེས་ལྔའི་སྔ་ཁའི་ཐུན་གཅིག་ཏུ་ཡན་ལག་བདུན་གྱི་ལྷག་མ་རྣམས་གྲུབ་པར་བྱས་པ་སྟེ། རྒྱལ་མཆོག་གུ་རུ་པདྨའི་སྒྲུབ་གནས་སུ་ལག་གྲོལ་པ་རྒྱང་དུའོ། །

འདིར་སྨྲས་པ། ཐ་སྙད་ཀློག་པའི་གྲར་མ་ཞུགས། །བསླབ་སྦྱང་དཔེ་འཛིན་ཤིན་ཏུ་ཉུང་། །མཁས་པར་ཞེན་པའི་ཡོན་ཏན་སྐོར། །ཐོས་བསམ་མོས་ཀྱང་བརྩོན་པས་དཀོན། །འོན་ཀྱང་རྒྱལ་གསུང་ལ་ཡིད་ཆེས། །བསྟན་འདི་ལ་ནི་སྲོག་ལྟར་བརྩེ། །ཚུལ་འདིའི་ཆོས་ལ་དད་པས་བལྟས། །སྦྱང་པ་དུས་སུ་སད་པའི་རྐྱེན། །བླ་མའི་བྱིན་རླབས་སྙིང་ལ་ཞུགས། །ཉམས་མྱོང་རྟོགས་པ་ཅུང་ཟད་སྐྱེས། །དེས་ན་མཁས་པ་མགུ་ནུས་ཤིང་། །རྨོངས་པ་དཀྲི་བའི་ལམ་ལ་མཁས། །གཞན་ལ་འགྲམ་ཆུ་མི་ལྡང་ཞིང་། །ཧ་ཅང་བདག་མཐོང་ང་རྒྱལ་མེད། །ངེས་དོན་མཐར་ཐུག་ལྟ་གྲུབ་ལ། །ཤེས་བཞིན་མི་བྱེད་དད་རྐང་ཚུགས། །དེས་ན་རང་གི་རྟོགས་བརྗོད་ཚུལ། །ཡི་གེར་བརྗོད་པ་འདི་དག་རྣམས། །ལག་དལ་འབྲི་བསྲུབ་སྐྱེན་པོ་དང་། །གཞན་གསུང་ནས་བཏུས་བཅོས་བསྒྱུར་སོགས། །བྱས་པ་ཡིན་ཏེ་རང་བློ་རུ། །རྒྱལ་བཀའ་བླ་མའི་མན་ངག་དང་། །ཚད་མའི་བསྟན་བཅོས་བསྒོམ་པའི་དོན། །ཇི་ཙམ་བདག་བློར་འཁྱིལ་བ་དེ། །མཁས་འདོད་རྩབ་རྩུབ་ཀྱིས་ལ་སྦགས། །རང་དང་བསྐལ་བ་མཉམ་པ་དང་། །ཚད་མར་བྱེད་པའང་ཡོད་སྲིད་ན། །དེ་ཕན་སླད་དུ་འདི་དག་བྲིས། །ཁ་ཅིག་རྣམ་རྟོག་འཕྲོ་རྒོད་པའི། །གང་དྲན་ཁ་ནས་ཅི་ཐོན་དུ། །ཁུངས་མེད་སྨྲ་བའི་ལེགས་བཤད་ཉིད། །རློམ་ཡང་རྒྱལ་བསྟན་གསལ་བྱེད་མིན། །མུ་ཏོ་གྲོ་ཞེས་མཁར་འགའ་ཞིག །ཚིག་སྙན་སྦྱོར་བའི་བློ་གསལ་ཡང་། །རྒྱལ་བསྟན་གསལ་བྱེད་ག་ལ་འགྱུར། །ལེགས་ཀྱང་སྲིན་བུའི་ཤིང་རྗེས་འདྲ། །དེ་བས་ཚད་མའི་ཁུངས་ལ་སྡོག །རང་བློས་བཅད་པར་མི་ནུས་ཚེ། །སྔོན་རབས་མཁས་གསུངས་རྗེས་འབྲང་གཅེས། །དེ་ནི་བསྟན་པའི་གསལ་བྱེད་ཉིད། །བདག་ནི་ས་སྐྱེ་བློ་དམན་ཡང་། །ཚིག་འདི་རྒྱལ་བའི་རྗེས་སུ་འབྲང་། །དེས་ན་འདམ་གྱི་པདྨ་བཞིན། །སྐལ་ལྡན་བུང་བའི་གསོ་བླང་འཚལ། །

ཞེས་པའང་གྲུབ་མཐའ་ལ་ངེས་ཤེས་ཆ་ཙམ་ཞིག་རྙེད་པའི་རྟོགས་བརྗོད་གུ་རུ་པདྨའི་བསྟོད་དབྱངས་སུ་སྨྲས་པས་འཕྲོས་པའོ། །དགེའོ། །དགེའོ། །དགེའོ། །

གསོལ་འདེབས་རབ་སྙན་ལྷ་ཡི་རྔ་སྒྲ།

༄༅། །བཅོམ་ལྡན་འདས་སྤྱན་རས་གཟིགས་དབང་། དཔལ་༼ སྤྲུལ་པ་༽རྒྱ་མཚོའི་ཚོགས་བཅས་ལ་གསོལ་འདེབས་རབ་སྙན་ལྷ་ཡི་རྔ་སྒྲ་ཞེས་བྱ་བ་བཞུགས་སོ། །

༈ ཨོཾ་མ་ཎི་པདྨེ་ཧཱུྃ། མཁའ་ཁྱབ་སངས་རྒྱས་ཀུན་གྱི་འཁོར་ལོས་བསྒྱུར། །གཟི་བརྗིད་ཚེ་འོད་དཔག་མེད་བཅོམ་ལྡན་འདས། །འགྲོ་བ་འདུལ་ཕྱིར་རྒྱལ་སྲས་ཚུལ་བཟང་ཞིང་། །སངས་རྒྱས་ཀུན་གྱི་སྤྲུལ་གཞི་བྱེད་པ་པོ། །རྒྱལ་བ་རྒྱ་མཚོ་ཡིད་བཞིན་ནོར་བུ་མཆོག །པདྨའི་དཀྱིལ་འཁོར་མངའ་བདག་ཐུགས་རྗེའི་གཏེར། །སེམས་ཅན་ཀུན་ལ་རྟག་དགྱེས་སྤྱན་རས་གཟིགས། །འོད་ཟེར་དཔལ་རྩེགས་རྒྱལ་པོར་གསོལ་བ་འདེབས། །སྤྱན་རས་གཟིགས་དབང་སྤྲུལ་པའི་ཟློས་གར་ནི། །ནམ་མཁའི་མཐར་ཐུག་ཚད་བཟུང་བགྲང་ལས་འདས། །བཟང་མཐོང་ཞིང་འདིར་གཙོ་མཆོག་རྫོགས་སངས་རྒྱས། །བཅུ་ཕྲག་བརྒྱ་དང་འཁོར་ལོས་བསྒྱུར་རྒྱལ་སྟོང་། །ཀུན་གྱི་འཕྲིན་ལས་གཅིག་བསྡུས་སིནྡྷུའི་མཚོར། །རང་བྱུང་རིག་མཆོག་ཐུབ་ཆེན་པདྨ་འབྱུང་། །རྒྱལ་ཀུན་གསང་གསུམ་ཡོངས་བསྡུས་རྒྱལ་ཚབ་ཚུལ། །གུ་རུ་བདེ་བ་ཆེ་དེར་གསོལ་བ་འདེབས། །སྤྱན་རས་གཟིགས་དབང་མཁའ་ཁྱབ་འགྲོར་བརྩེ་བཞིན། །གཡེལ་མེད་སྐྱོངས་ལས་ལྷག་ཏུ་གདུལ་དཀའ་ཡི། །ལྷ་སྐལ་ཞལ་བཞེས་གདོང་དམར་བོད་ཀྱི་ཆེད། །སྤྱི་བོར་ཨ་མི་ཏ་བྷའི་ཅོད་པཎ་ཅན། །མཚན་དཔེ་ཡོངས་རྫོགས་ཆོས་ཀྱི་རྒྱལ་པོའི་ཚུལ། །རྫུ་འཕྲུལ་བཀོད་པ་རབ་འབྱམས་རྒྱ་མཚོའི་བདག །ཡེ་ཤེས་རྡོ་རྗེའི་སྐུ་མི་མངོན་སྟོན་པའི། །འཕགས་མཆོག་སྲོང་བཙན་སྒམ་པོར་གསོལ་བ་འདེབས། །སྤྱན་རས་གཟིགས་དབང་འཛམ་གླིང་སཱི་ཏའི་བྱང་། །བྱེ་བ་དགུ་བཅུ་རྩ་དྲུག་ཡུལ་བདག་པོ། །རྣམས་ཀྱི་གཙུག་གི་ནོར་བུས་མངོན་བཏུད་པའི། །གངས་ལྡན་ཆ་བསགས་སེང་ཁྲིར་མི་དབང་ཆེ། །ལྷ་ཡི་ལུས་གྱུར་འཆི་མེད་མཚན་དཔེ་ཅན། །པདྨ་དཀར་པོ་ལ་སོགས་རིགས་ལྡན་དང་། །སཱི་ཏའི་ལྷོ་ཕྱོགས་ཨོ་རྒྱན་རྒྱ་ཧོར་ལི། །བལ་བོད་སོགས་སུ་འཇིག་རྟེན་དབང་ཕྱུག་གི །སྤྲུལ་པའི་རྒྱལ་པོ་རྣམས༴ སྤྱན་རས་གཟིགས་དབང་བུད་མེད་གཟུགས་སྣང་བ། །སྒྱུ་འཕྲུལ་ཆེན་པོའི་སྤྲུལ་པའི་ཟློས་གར་ལས། །དཔལ་མཛད་བདེ་བའི་དངོས་གྲུབ་མཁའ་སྤྱོད་གཙོ། །མཚོ་ཡི་པདྨོ་གྲུབ་རྒྱལ་ངེས་སྦས་བདག །དུ་མར་འཆར་བ་ཀུན་གྱི་ངོ་བོ་ཉིད། །གངས་ཅན་འགྲོ་ལ་བཀའ་དྲིན་ཟླ་མེད་མགོན། །ཡེ་ཤེས་རྒྱ་མཚོ་རྒྱས་པའི་གཏེར་འཆང་བ། །མ་ཅིག་སྤྲུལ་པ་བཅས་ལ༴ སྤྱན་རས་གཟིགས་དབང་གཅིག་ཆར་སྐྱེས་བུའི་ཚུལ། །ཡོངས་བཟུང་མདའ་སྣུན་ཆེན་པོ་སྒྲ་གཅན་འཛིན། །རབ་དགའི་ས་ལ་བཞུགས་ཚུལ་དཔལ་མགོན་ཀླུ། །དེ་བཞིན་འདི་བྱང་སར་གནས་ཐོགས་མེད་ཞབས། །གྲུ་འཛིན་བདག་པོར་ཡོངས་གཤེགས་ཙནྡྲ་གོ །བྱིན་རླབས་ཆུ་རྒྱུན་བསྡུད་མཛད་ཏེ་ལོ་པ། །ཡེ་ཤེས་སྒྱུ་མའི་སྐུར་ཤར་དགའ་བའི་བཤེས། །མི་ཏྲ་ཛོ་ཀིར་གྲགས་ལ༴ སྤྱན་རས་གཟིགས་དབང་གྲུབ་ཆེན་ཆོས་སྤྲིན་པར། །བཞུགས་བསྟན་དམ་པ་རྒྱ་དཀར་མི་ཕམ་མགོན། །རྣལ་འབྱོར་ཚུལ་བཟུང་གོ་རཀྵ་ནཱ་ཐ། །གནས་ལྔ་རིག་པ་ཆེན་པོ་བོད་ཀྱི་ལྷ། །མར་མེ་མཛད་དཔལ་ཡེ་ཤེས་ཨ་ཏི་ཤ །དེ་བཞིན་དབུས་འགྱུར་པཎ་ཆེན་འཇིགས་མེད་འབྱུང་། །ཁ་ཆེ་བསོད་སྙོམས་པར་སྣང་ཤཱཀྱ་ཤྲཱི། །སྐལ་བཟང་སེམས་དཔའ་སྤྲུལ་ལ༴ སྤྱན་རས་གཟིགས་དབང་བྱང་ཆུབ་ལམ་སྤྱོད་ཚུལ། །འབྲོམ་སྟོན་རྒྱལ་འབྱུང་རྣལ་འབྱོར་དགོན་པ་བ། །སྐུ་མཆེད་རིགས་གསུམ་མགོན་ཞེས་བཀའ་གདམས་ཏེ། །ཇོ་བོའི་རྗེས་འཇུག་དམ་པའི་ཚོགས་སྤྱི་དང་། །ཡོངས་འཛིན་བཤེས་གཉེན་བློ་བཟང་གྲགས་པའི་དཔལ། །དངོས་རྒྱུད་སློབ་མའི་ཚོགས་དང་སྤྱིའི་འདྲེན་པ། །བློ་བཟང་རྒྱ་མཚོའི་རྒྱལ་བསྟན་སྒྲོན་མེ་ཆེ། །ཡབ་སྲས་སྐྱེས་མཆོག་རྣམས་ལ༴ སྤྱན་རས་གཟིགས་དབང་རྣལ་འབྱོར་རས་པའི་ཚུལ། །རྗེ་བཙུན་མི་ལ་ཞུ་བདེའི་འབྲས་བུ་རྒྱས། །རས་ཆུང་རྡོར་གྲགས་མཁའ་སྤྱོད་ཞིང་གི་བདག །གཙང་པ་རྒྱ་རས་འགྲོ་བ་ཡོངས་ཀྱི་མགོན། །ལོ་རྒོད་དབོན་རས་སྒྲུབ་རྒྱུད་བསྟན་པའི་བདག །རྒྱལ་མཚན་དཔལ་བཟང་ངེས་དོན་སྙིང་པོའི་མཛོད། །བྱང་འབུམ་རིན་དཔལ་ཕྲིན་ལས་རབ་འབྱམས་འཆང་། །སྐྱེ་རྒྱུད་སློབ་ཚོགས་བཅས་ལ༴ སྤྱན་རས་གཟིགས་དབང་ངེས་དོན་སྟོན་བསྒོམ་ཚུལ། །ཁ་རག་སྒོམ་ཆུང་སྒྲུབ་རྒྱུད་རྣ་བའི་རྒྱན། །ཁྱུང་པོ་ཚུལ་མགོན་སྒྱུ་ལུས་གྲུབ་ཀུན་གཙོ། །དྭགས་པོ་ལྷ་རྗེ་པད་འབྱུང་ཐུགས་ལས་སྤྲུལ། །རྡོར་རྒྱལ་ཞང་ཚལ་ཀུན་ཏུ་འོད་སར་བཞུགས། །ཟླ་རྒྱལ་སྐྱེར་སྒང་ཚེལ་བུ་དམ་པ་དམར། །འབྲི་སྟག་སྐྱེས་མཆོག་གཞན་ཕན་རྒྱ་མཚོའི་སྤྲིན། །སྐྱེ་སྤྲུལ་རྒྱུད་འཛིན་བཅས་ལ༴ སྤྱན་རས་གཟིགས་དབང་ཤཱཀྱའི་དགེ་སློང་ཚུལ། །ཀུན་གཟིགས་ཆོས་ཀྱི་གྲགས་ལྡན་མཁྱེན་བརྩེ་ནུས། །འཛམ་གླིང་རྒྱན་གྱུར་དཔལ་ཆེན་ཆོས་བླ་མ། །ཀུན་བཟང་རྡོ་རྗེ་ལྗགས་ཀྱི་ཐལ་འགྱུར་དུ། །ལུང་བསྟན་འཕགས་མཆོག་རང་བྱུང་རྡོ་རྗེ་སེམས། །དངོས་ཚུལ་རྡོ་རྗེའི་ཅོད་པཎ་འཛིན་བཅུ་གསུམ། །སློབ་ཚུལ་པདྨའི་ཅོད་པཎ་འཛིན་ཉེར་གཅིག །ཡབ་སྲས་སློབ་མར་བཅས་ལ་གསོལ་བ་འདེབས། །སྤྱན་རས་གཟིགས་དབང་མཁས་མཆོག་གཉིས་སྨྲའི་ཚུལ། །བློ་ཤེར་བྱམས་དཔལ་རྒྱལ་བསྟན་འབྱུང་ཁུངས་ཆེ། །གནས་ལྔ་རིག་གཙོ་ས་པཎ་འགྲོ་བའི་མགོན། །ཡོངས་རྫོགས་བསྟན་སྒྲོན་ཞ་ལུ་བོ་དོང་བ། །བདེ་གཤེགས་སྙིང་པོའི་གཏམ་མཆོག་སྨྲ་བའི་སེང་། །དོལ་པོ་ཀུན་མཁྱེན་ཤེས་རབ་རྒྱལ་མཚན་དཔལ། །བློ་གྲོས་མཐུ་ཆེན་མཆོག་ལྡན་ལེགས་བློ་སོགས། །བསྟན་པའི་ཤིང་རྟ་རྣམས་ལ་གསོལ་བ་འདེབས། །སྤྱན་རས་གཟིགས་དབང་རིགས་སྔགས་འཆང་བའི་ཚུལ། །འཇིག་རྟེན་ཀུན་རིག་རོང་ཟོམ་ཆོས་བཟང་པོ། །ཟབ་གཏེར་སྟོན་པའི་ཚུལ་གྱུར་མྱང་རལ་ཅན། །ཆོས་དབང་རྒོད་ལྡེམ་སངས་རྒྱས་གླིང་སོགས་དང་། །ཕྱོགས་དུས་རྫོགས་སངས་རྒྱས་ཀུན་ཐུགས་ཀྱི་དཔྱིད། །མ་ལུས་གཅིག་ཆར་སྟོན་ཕྱིར་སྤྱན་རས་གཟིགས། །ངག་དབང་དྲི་མེད་འོད་ཟེར་དྲི་མེད་བཤེས། །རྒྱལ་ཀུན་ངོ་བོར་འཆར་ལ༴ སྤྱན་རས་གཟིགས་དབང་སྙིགས་དུས་འགྲོ་འདྲེན་དཔལ། །ཞི་བ་སྦས་པ་བདེ་ཆེན་རྡོ་རྗེའི་སྐུ། །རྒྱལ་ཀུན་གསང་བའི་མཛོད་འཛིན་སྒྲོལ་བའི་མགོན། །ཞིག་པོ་འཇའ་ཚོན་གཏེར་བཞད་ཀློང་གསལ་སྙིང་། །སྟག་ཤམ་རྡོ་རྗེ་རོལ་པ་བདེ་ཆེན་གླིང་། །འཁོར་ལོའི་དབང་ཕྱུག་ཀརྨ་རིག་པ་འཛིན། །དཔལ་མཆོག་དང་པོ་ཆོས་དབང་ཀུན་བཟང་དབང་། །ཁྱབ་བདག་རྩ་བའི་བླ་མར་གསོལ་བ་འདེབས། །སྤྱན་རས་གཟིགས་དབང་སྤྲུལ་པའི་རོལ་གར་ལས། །ཡོངས་གྲུབ་འགྲོ་བའི་འདྲེན་པ་མཐའ་དག་དང་། །ཁྱད་པར་གངས་རིའི་ཁྲོད་ཀྱི་སྐྱེས་བུ་མཆོག །གྱུར་ཀུན་སྤྱན་རས་གཟིགས་ཀྱི་སྒྱུ་འཕྲུལ་ཏེ། །མཁས་བཙུན་གྲུབ་པའི་བརྟུལ་ཞུགས་སྤྱོད་པ་དང་། །ཞི་ཆགས་དྲག་པོ་ཐ་མལ་ཚུལ་ལ་སོགས། །མ་ངེས་ལྐོག་གྱུར་དུ་མས་འགྲོ་འདུལ་མཛད། །ཀུན་ལ་སྙིང་ནས་གུས་པས་གསོལ་འདེབས་ཀྱི། །དེ་ལྟར་ཐུགས་རྗེ་ཆེན་སྤྲུལ་བླ་མའི་ཚོགས། །ཀུན་ལ་རྩེ་གཅིག་གུས་པས་གསོལ་འདེབས་མཐུས། །བདག་ནི་དུས་འདི་ནས་བཟུང་ཚེ་རབས་ཀུན། །བཟོད་པ་མཆོག་གྱུར་ཡོངས་སུ་མ་ཐོབ་པར། །ངན་འགྲོ་སྤང་ཞིང་མཐོ་རིས་ཡོན་ཏན་བདུན། །འཕགས་ནོར་བདུན་བརྒྱན་དལ་འབྱོར་རྟེན་བཟང་ཐོབ། །དེས་ཀྱང་མི་དགེའི་བཤེས་གཉེན་ཡོངས་སྤངས་ནས། །དགེ་བཤེས་དམ་པས་རྗེས་སུ་བཟུང་བར་ཤོག །དད་པ་བརྟན་ཚུགས་ངེས་འབྱུང་རྣམ་པར་དག །རྒྱུ་འབྲས་ཡིད་ཆེས་དགེ་སྡིག་སྤང་བླངས་མཁས། །ལྷག་བསམ་ཕུལ་བྱུང་བྱང་ཆུབ་སྤྱོད་པར་བརྩོན། །ཁྱད་པར་སྨིན་གྲོལ་གདེང་ཐོབ་སློབ་དཔོན་གྱི། །རྗེས་བཟུང་དཔལ་ལྡན་སྔགས་རྒྱུད་ནས་གསུང་བའི། །དམ་ཚིག་བཅས་ལ་འདའ་མེད་རྣམ་པར་དག །རིམ་གཉིས་ཡོན་ཏན་མཐའ་དག་གྲུབ་པར་ཤོག །མདོར་ན་སྐྱེ་ཀུན་ལྷ་མཆོག་སྤྱན་རས་གཟིགས། །སློབ་དཔོན་ཐོབ་ནས་ཞལ་བལྟ་གསུང་རྟག་ཉན། །ཅི་མཉེས་ཆེད་དུ་ལུས་སྲོག་ལྟོས་མེད་བསྙེན། །ཁྱེད་ཀྱི་དགྱེས་དགུ་བདག་གི་ཐོགས་མེད་འགྲུབ། །འོད་དཔག་མེད་མགོན་སྤྱན་རས་གཟིགས་དབང་པོ། །པད་འབྱུང་སྤྲུལཔར་བཅས་པས་ཐེག་ཆེན་གྱི། །སྨོན་ལམ་གང་བཏབ་ཇི་བཞིན་བདག་གི་འགྲུབ། །མགོན་ཁྱོད་གོ་འཕང་བདག་གི་མྱུར་ཐོབ་ཤོག །དེ་ལྟར་བདག་གི་ལེགས་སྤྱད་དགེ་བའི་མཐུ། །ཡོངས་བསྡོམས་མཁའ་མཉམ་འགྲོ་ཀུན་ལ་བསྔོ་བས། །དེ་དག་སྡུག་བསསྔལ་སེལ་གྱུར་དགེ་བ་ཐོབ། །བྱང་ཆུབ་ཆེ་འབྲས་རིང་མིན་རྙེད་གྱུར་ཅིག །

ཤླཽ་ཀ་ ༣༧ ཞེས་པའང་རི་ཁ་བ་ཅན་གྱི་ཁོངས་རྒྱལ་བསྟན་རིས་སུ་མ་ཆད་པར་ཁ་ཙམ་མ་ཡིན་སྙིང་ནས་དག་སྣང་གི་བློ་མིག་རྒྱས་པས་གྲུབ་མཐའ་ཐ་དད་ཀྱི་སྐྱེས་བུ་ཆེན་པོ་ཡོངས་གྲགས་རྣམས་ལ་གསོལ་འདེབས་ཤིག་འབྲི་འདུན་ཡོད་པས་ཉེ་ལམ་གཙང་སྙེ་མོ་བྱ་གོ་བ་ཐོན་རིགས་མི་རྗེ་ཕུན་ཚོགས་བཀྲ་ཤིས་དབང་ཕྱུག་གི་ཐུགས་རྗེ་ཆེན་པོའི་གསོལ་འདེབས་ཤིག་དགོས་ཞེས་གསོལ་བ་བཏབ་པས་རྐྱེན་བྱས་རང་དང་བསྐལ་མཚུངས་ཚུལ་འདི་ལྟར་དོན་དུ་གཉེར་བ་དག་ལ་སྨན་པའི་ཆེད་དུ་སྐྱེས་བུ་དམ་པ་རྣམས་ཐུགས་རྗེ་ཆེན་པའི་སྤྲུལ་པར་ངེས་པའི་སྒོ་ནས་རྒྱས་པར་རྒྱུན་གྱི་ཁ་འབྲི་འདོན་དུ་མ་བདེ་དོན་ད་ལམ་འཕགས་པའི་སྤྲུལ་པ་ཆེ་ལོང་ཙམ་གྱི་གསོལ་འདེབས་ཉུང་ངུར་དྲིལ་བ་སྟེ་འདི་ནི་མདོ་ཁམས་ཀཿཐོག་ལྷོ་རྒྱུད་འོད་གསལ་ལྷ་ལས་བབ་པ་དངུ་ཡི་རིགས་སུ་སྐྱེས་གྱུར་ཤཱཀྱའི་དགེ་བསྙེན་རིག་པ་འཛིན་པ་ཚེ་དབང་ནོར་བུ་འཇམ་དབྱངས་རྒྱ་མཚོའམ་ཀུན་བཟང་འཕྲིན་ལས་འགྲོ་བ་ཡོངས་འདུལ་རྩལ་གྱིས་མེ་འབྲུག་ས་ག་ཟླ་བའི་དཀར་ཕྱོགས་ཚེས་ལྔའི་སྔ་ཆར་གྲུབ་པར་སྙེ་མོ་པ་གོར་བཻ་རོའི་སྒྲུབ་ཕུག་ཏུ་བྲིས་པ་སྟེ། དགེ་བས་འགྲོ་ཀུན་རྒྱུད་ལ་རིས་མེད་དགེ་བའི་བཤེས་གཉེན་གྱི་བྱིན་བརླབ་སྙིང་ལ་ཞུགས་ཤིང་འཕགས་མཆོག་སྤྱན་རས་གཟིགས་ཀྱི་གོ་འཕང་ལ་མྱུར་དུ་འཁོད་པར་གྱུར་ཅིག །དགེའོ། །དགེའོ། །དགེའོ། །

འཕགས་པ་སྤྱན་རས་གཟིགས་ཀྱི་བསྟོད་པ་པད་དཀར་རྒྱས་པ།

༄༅། །འཕགས་པ་སྤྱན་རས་གཟིགས་ཀྱི་བསྟོད་པ་པད་དཀར་རྒྱས་པ་ཞེས་བྱ་བ་བཞུགས་སོ། །

༈ ཨོཾ་སྭཱསྟི། ནམ་མཁའི་མཐར་ཐུག་ཆོས་དབྱིངས་ཡེ་ཤེས་ཁམས། །དྲི་མེད་ངོ་བོར་རྟག་བཞུགས་རྒྱལ་ཀུན་གྱི། །ཐུགས་རྗེའི་རང་བཞིན་གཅིག་ཏུ་བསྡུས་པའི་གཟུགས། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༡ དང་པོའི་སངས་རྒྱས་ཀུན་བཟང་འོད་མི་འགྱུར། །ཚེ་དང་ཡེ་ཤེས་དཔག་མེད་སྣང་མཐའ་ཡས། །སྲས་ཚུལ་འགྲོ་ཀུན་འདྲེན་མཛད་འཕྲིན་ལས་ཅན། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༢ ལོངས་སྤྱོད་རྫོགས་སྐུའི་ཞིང་ན་ཨ་རོ་ལིཀ །སྲིད་ཞི་ཀུན་གྱི་སྤྱི་དཔལ་གཉེན་གཅིག་པུ། །ཐུབ་ཆེན་འཇིག་རྟེན་དབང་ཕྱུག་གངས་ཅན་མཚོ། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༣ མི་མཇེད་འཇིག་རྟེན་འོག་མིན་གནས་ཉིད་དུ། །གཙང་མ་ལྷ་ཡི་བུ་གྱུར་དབང་ཕྱུག་ཆེ། །སྤྲུལ་པ་བྱེ་བ་ཕྲག་བརྒྱའི་གཞི་སྤྲུལ་པའི། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༤ མི་མཇེད་འཛམ་གླིང་རི་བོ་གྲུ་འཛིན་དུ། །ས་བཅུའི་དབང་ཕྱུག་ཚུལ་བཟང་སྲིད་གསུམ་མགོན། །སྡུག་བསྔལ་ཆེ་ལ་ལྷག་པར་བརྩེ་བའི་བདག །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༥ བཟང་པོའི་ཀལྤར་སྒྲོན་མ་སངས་རྒྱས་སྟོང་། །འཁོར་ལོས་བསྒྱུར་བ་སྟོང་གི་སྐུ་འཕྲུལ་མཛད། །ནམ་མཁའི་རྒྱལ་པོ་རྒྱལ་བ་ཀུན་གྱི་ཡབ། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༦ གང་འདུལ་སྐུ་ཡི་རོལ་པ་བསམ་ཡས་པ། །རིགས་དྲུག་དུཿཁ་མཐའ་དག་སེལ་མཁས་ཤིང་། །ཁམས་གསུམ་འཁོར་བ་དོང་ནས་སྤྲུག་མཛད་མགོན། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། ། ༧ ཁྱེད་ནི་བདག་གི་ཚེ་རབས་ཡུན་གྱི་ལྷ། །སྲོག་གི་ཕྱིར་ཡང་མི་སྤང་ཡི་དམ་སྟེ། །ཐུགས་རྗེའི་སྤྱན་གྱི་གཟིགས་ཤིག་སྤྱན་རས་གཟིགས། །བྱིན་གྱིས་རློབས་ཤིག་འཇིག་རྟེན་གསུམ་གྱི་མགོན། ། ༨ བདག་ནི་དུས་འདི་ནས་བཟུང་བྱང་ཆེན་བར། །འཕགས་མཆོག་ཁྱེད་ཀྱི་དགེ་བའི་བཤེས་མཛད་ནས། །མི་དགེ་ལོག་པའི་ལམ་ནས་བཟློག་པ་དང་། །བྱང་ཆུབ་མཆོག་གི་བཤུལ་དུ་དཀྲི་མཛོད་ཅིག ། ༩ བདག་ཉིད་མཐོང་ཐོས་དྲན་རེག་འགྲོ་ཀུན་ཡང་། །འཕགས་མཆོག་སྤྱན་རས་གཟིགས་ཀྱི་ཞལ་བཟང་པོ། །སྒྲིབ་ལྡན་བྱིས་པ་ཉིད་ནས་ལྟ་ནུས་ཤིང་། །གསུང་གི་སྣང་བ་ཐོབ་ཅིང་ཆོས་སྤྱོད་ཤོག ། ༡༠ ཁྱེད་མཐུའི་བདག་ཅག་སོ་སྐྱེ་ཕལ་ཉིད་ནས། །འཕགས་ཆེན་རྒྱལ་བའི་རྣམ་ཐར་རྗེས་སུ་སློབ། །འབྲེལ་ཚད་ཐར་པ་མཆོག་གི་སར་བཀོད་པའི། །རྨད་བྱུང་རླབས་ཆེན་སྤྱོད་པ་རྟག་ཐོབ་ཤོག ། ༡༡ བདག་སོགས་འབྲེལ་པར་བཅས་ཀུན་འཆི་བའི་དུས། །དེ་མ་ཐག་པར་ནུབ་ཕྱོགས་བདེ་ཆེན་ཞིང་། །པདྨར་རྫུས་སྐྱེས་སངས་རྒྱས་སྲས་བཅས་མཇལ། །ཕྱིར་མི་ལྡོག་པའི་གོ་འཕང་དེར་ཐོབ་ཤོག ། ༡༢ མདོར་ན་འཇིག་རྟེན་དབང་ཕྱུག་སྤྱན་རས་གཟིགས། །ཁྱེད་ཀྱི་བྱང་ཆུབ་སྨོན་ལམ་ཇི་འདྲ་བ། །མངོན་མཐོ་ངེས་ལེགས་ཡོན་ཏན་འཕྲིན་ལས་བཟང་། །དེ་འདྲ་ཁོ་ན་བདག་གི་མྱུར་འགྲུབ་ཤོག ། ༡༣

ཅེས་འཕགས་མཆོག་སྤྱན་རས་གཟིགས་ལ་བསྟོད་པ་པད་དཀར་རྒྱས་པ་ཞེས་བྱ་བ་འདི་ཡང་སྡིག་སྒྲིབ་ཉེས་སྐྱོན་ཟད་པར་བྱེད་པ་ཟད་བྱེད་ལོ་སྣྲོན་གྱི་ཟླ་བར་བྱང་གནམ་གྱི་དབུ་རིར་གྲུབ་པའི་སློབ་དཔོན་ཆེན་པོ་རྒྱལ་བ་ལོ་རས་ཀྱི་སྐུ་གདུང་མཐོང་གྲོལ་ཞིག་གསོ་ཡང་དག་བགྱིད་པའི་སྐབས་རིག་པ་འཛིན་པ་ཚེ་དབང་ནོར་བུས་སྨྲས་པའོ། །སརྦ་མངྒ་ལཾ།

རྗེ་བཙུན་མ་འཕགས་མ་སྒྲོལ་མའི་སྐུ་རྨི་ལམ་དུ་མཇལ་བ་ལ་བསྟོད་པ་མདོངས་མཐའ་ཅན་གྱི་གར་བསྒྱུར།

༄༅། །རྗེ་བཙུན་མ་འཕགས་མ་སྒྲོལ་མའི་སྐུ་རྨི་ལམ་དུ་མཇལ་བ་ལ་བསྟོད་པ་མདོངས་མཐའ་ཅན་གྱི་གར་བསྒྱུར་ཞེས་བྱ་བ་བཞུགས་སོ། །

༈ ཨོཾ་སྭཱསྟི། རྣམ་དག་རྒྱལ་བའི་ཞིང་ཁམས་གཡུ་ལོ་བཀོད། །ཡིད་འོང་རབ་མཛེས་མར་གད་ས་གཞི་ལ། །འདོད་དགུ་ལྷུན་གྲུབ་དཔག་བསམ་ནགས་ཚལ་འཁྲིགས། །ཨུཏྤལ་འཕྲེང་བ་རྣམ་པར་བཀྲ་ལ་འདུད། །སྤོས་ཀྱི་སྤྲིན་ལྡིང་མེ་ཏོག་ཆར་པ་འབེབས། །ཡན་ལག་བརྒྱད་ལྡན་བདུད་རྩིའི་མཚོ་ཆུ་གཡོ། །རི་དྭགས་བྱ་ཚོགས་རྐང་དྲུག་འཕུར་ལྡིང་ཞིང་། །བྱང་ཆུབ་སེམས་ལྡན་འགྲོ་བས་གང་ལ་འདུད། །འཆི་མེད་གྲུབ་པ་དྲང་སྲོང་ལྷ་ཡི་ཚོགས། །རིག་པ་འཛིན་པ་དུ་མས་ཡོངས་གང་ཞིང་། །འཇིགས་པ་བརྒྱད་དང་བཅུ་དྲུག་བྲལ་བ་ཡི། །བདེ་བ་མཆོག་གི་ཞིང་ཁམས་དེ་ལ་འདུད། །དེ་དབུས་བཀོད་ལེགས་ཁྲུས་ཀྱི་རྫིང་བུའི་ནང་། །འདབ་སྟོང་ཨུཏྤལ་ཉི་ཟླ་སྒྲ་གཅན་སྟེང་། །ཏཾ་ཡིག་ལས་སྐྱེས་དུས་གསུམ་རྒྱལ་ཀུན་གྱིས། །ཡུམ་གྱུར་འཕགས་པ་དེ་ལ་གུས་པས་འདུད། །མཐིང་ལྗགས་ཞལ་གཅིག་རལ་མཛེས་སྤྱན་གསུམ་ལྡན། །ཕྱག་གཉིས་གཡས་པས་མཆོག་སྦྱིན་ཕྱག་རྒྱ་དང་། །གཡོན་པས་པད་སྡོང་ལས་སྐྱེས་བྱང་ཆུབ་ཤིང་། །མེ་ཏོག་རྒྱས་པ་སྐྱབ་རྒྱས་འཛིན་ལ་འདུད། །དབུ་སྐྲ་རྟག་པར་བཅིང་ཞིང་གཙུག་ཏོར་རྩེར། །རིགས་ཀྱི་བདག་པོ་འོད་དཔག་མེད་པ་བཞུགས། །རིན་ཆེན་དུ་མའི་རྒྱན་གྱིས་ཡོངས་མཛེས་ཤིང་། །པཉྩ་ལི་ཀའི་སྨད་གཡོགས་གསོལ་ལ་འདུད། །ཞལ་གྱི་དཀྱིལ་འཁོར་རབ་སྒེག་འོད་ཟེར་གྱི། །ཆ་ཤས་ཟུར་ཙམ་གྱིས་ཀྱང་འཇིག་རྟེན་འདིར། །ཚངས་པའི་བུ་མོ་འབུམ་ཀྱང་མོག་མོག་པོར། །བྱེད་མཛད་འཕགས་མ་སྒྲོལ་མ་དེ་ལ་འདུད། །ཞབས་གཉིས་དྲང་པོར་བཞེངས་ཤིང་གདན་ལ་བརྟེན། །བཅུ་དྲུག་ལང་ཚོ་དཀར་འཛིན་ཆུ་འཛིན་རྒྱས། །ཟུར་མིག་མདའ་ཡི་ཟག་ཟད་དགྲ་བཅོམ་ཡང་། །ཡིད་བསྲུབ་བླང་ནུས་རབ་མཛེས་ཁྱོད་ལ་འདུད། །ཁྱོད་ནི་འདས་དང་ད་ལྟ་མ་འོངས་ཀྱི། །རྒྱལ་བ་ཀུན་གྱི་བསྐྱེད་པའི་ཡུམ་དུ་གྱུར། །མཚན་ཐོས་ཙམ་གྱི་སྡུག་བསྔལ་ཀུན་སེལ་ཞིང་། །བདེ་བ་རྒྱས་མཛད་བཅོམ་ལྡན་མ་ལ་འདུད། །ཁྱོད་ཉིད་ཡིད་བྱས་གུས་པས་གསོལ་བཏབ་ན། །འདི་དང་ཕྱི་མ་བར་དོ་དགེ་བ་ཡི། །འདོད་དོན་ཡོངས་སྟེར་མཐུན་འཇུག་བྱང་ཆེན་ཡང་། །སྩོལ་བར་མཛད་པའི་དམ་བཅའ་མཆིས་ཞེས་ན། །བདག་གི་ཁྱོད་སྐུ་སྒོམ་ཞིང་གུས་པའི་ཡིད། །རྩེ་གཅིག་གདུང་བས་གསོལ་བ་འདེབས་བྱེད་ཀྱི། །འཇིགས་ཞི་འབྱོར་རྒྱས་དགྲ་བགེགས་གདུག་པ་སྒྲོལ། །ཁམས་གསུམ་དབང་དུ་འདུ་བའི་དངོས་གྲུབ་སྩོལ། །བདག་ཉིད་གང་དུ་གནས་པའི་ཡུལ་ཕྱོགས་དེར། །རྒྱལ་བའི་བསྟན་པ་དྲི་མེད་གོང་དུ་འཕེལ། །རྒྱལ་བློན་དགེ་ལྡན་ཆབ་སྲིད་དར་ཞིང་རྒྱས། །མི་ཕྱུགས་ནད་མེད་དམག་འཁྲུག་རྩོད་པ་ཞི། །རྫོགས་ལྡན་དང་པོ་ཇི་བཞིན་གནས་པར་མཛོད། །ཁྱད་པར་བདག་མཐོང་ཐོས་དྲན་རེག་པའི་འགྲོ། །ཀུན་ཀྱང་སྒྲིབ་ཚོགས་བྱང་ནས་མཆོག་འབྲས་སྨིན། །འཚེ་ཚེ་བར་དོར་ལྷ་ཁྱོད་ཞལ་མཐོང་ཞིང་། །བདེ་བ་ཅན་གྱི་ཞིང་དུ་འདྲེན་པར་ཤོག །མདོར་ན་དུས་འདི་ནས་བཟུང་བྱང་ཆུབ་བར། །འཕགས་མ་ཁྱོད་ཀྱིས་བྱིན་གྱིས་བརླབས་ནས་ཀྱང་། །ས་ལམ་ཡོན་ཏན་མྱུར་རྫོགས་འོད་དཔག་མེད། །ཇི་བཞིན་བདག་སོགས་འགྲོ་ལ་ཡོངས་གྲུབ་ཤོག །

ཅེས་རྨི་ལམ་གྱི་སྣང་བར་འཕགས་མ་དེ་ལྟ་བུའི་ཚུལ་མཇལ་བས་རྐྱེན་བྱས་མོད་ཀྱི་རྒྱལ་པོ་ཟུང་གི་འཆིངས་བསྒྲིགས་ཀྱི་སྐབས་ཀག་ཞེས་པར་རིག་པ་འཛིན་པ་ཚེ་དབང་ནོར་བུས་སྦྱར་བའི་ཡི་གེའི་རིས་ནི་ཤཱཀྱའི་དགེ་སློང་རྡོ་རྗེ་འཛིན་པ་ཀརྨ་ངེས་དོན་ཆོས་ཀྱི་རྒྱལ་མཚན་གྱིས་བགྱིས་པ་དགེའོ། །

ཧེ་ཧེ། རྒྱལ་བ་ཡོངས་ཀྱི་ཡུམ་གྱུར་ཤེར་ཕྱིན་མ། །ཀུན་ཏུ་བཟང་པོ་དེ་བཞིན་གཤེགས་གྱུར་མ། །རབ་འབྱམས་དཀྱིལ་འཁོར་གཙོ་མཆོག་བཅོམ་ལྡན་མ། །ཁྱོད་ཞབས་དྲན་པས་འཇིགས་སེལ་རྣལ་འབྱོར་མ། ། ༡ ཡང་དག་དོན་དུ་རང་རིག་གདོད་མའི་གཤིས། །རྡོ་རྗེ་ཅན་མ་ཉིད་ཡིན་འདུ་འབྲེལ་མེད། །འོན་ཀྱང་དེ་ཉིད་མངོན་དུ་མ་གྱུར་བར། །དམ་ཡེའི་ཚུལ་གྱི་ཡི་དམ་བསྙེན་བྱེད་བཞིན། ། ༢ བདག་གི་ཡུན་ནས་ལྷ་ཡི་ལྷ་མཆོག་མ། །ཁྱེད་བསྙེན་རྟག་ཏུ་གུས་པས་གསོལ་འདེབས་ན། །འདི་ལྟར་གནས་སྐབས་བླང་དོར་གནས་ཙམ་ཡང་། །མི་སྟོན་གཡེལ་བར་བོར་བ་ཅི་ཞིག་བྱུང་། ། ༣ འཇིག་རྟེན་འདྲེ་ངན་ཡི་དྭགས་ཕྲ་མོ་ཡང་། །གུས་བསྙེན་མཛད་ན་ཐུགས་རྗེ་ཆེ་ཞེས་ཅི། ། ༤ བེམ་པོའི་རང་བཞིན་ནོར་བུ་འབར་བ་ཡང་། །སེམས་ཅན་རེ་བ་ཡིད་བཞིན་བསྐང་མཛད་ན། །ཁྱོད་ནི་ལྷ་ཡི་ལྷ་ཞེས་འཁོར་འདས་མགོན། །གྲུབ་བཞིན་བདག་གི་རེ་བ་ཅིས་མི་བསྐངས། ། ༥ སྒྲིབ་པ་ཆེ་ཞེས་གཡེལ་བར་བོར་མཛད་ན། །སྒྲིབ་པ་མེད་ཚེ་ཁྱོད་ཀྱི་ཐུགས་རྗེས་ཅི། །བདག་ནི་སྒྲིབ་ལྡན་སྐྱབས་དང་མགོན་མེད་ན། །ཐུགས་རྗེ་ཆེ་མོའི་སྤྱན་གྱིས་ད་གཟིགས་ཤིག ། ༦ ལས་ལ་ཡིད་ཆེས་བཞིན་དུ་བདེན་འབྲས་གང་། །བཏང་སྙོམས་བཞག་ན་ཁྱོད་ཀྱི་དམ་བཅས་ཅི། །མི་བཟོད་དུཿཁས་གཟིར་བའི་སྐྱེ་བོ་རྣམས། །ལས་ཀྱི་མཐུ་ཞེས་ཁྱེད་ཀྱི་སྤངས་མཛད་ན། ། ༧ བཅོམ་ལྡན་འདས་མ་ཚད་མེད་ཐུགས་རྗེ་ཅན། །མིང་ཙམ་ཁོ་ནས་འགྲོ་ལ་ཇི་ལྟར་ཕན། །འཇིག་རྟེན་ལྷ་ཆེན་མཐུས་ཀྱང་ལུས་འགའ་ཞིག །རིང་དུ་སྤང་བར་ནུས་ན་ལྷ་ཡི་ལྷ། ། ༨ ཁྱོད་ཀྱི་ནུས་མཐུའི་འགྲོ་བའི་ལས་ངན་ཡང་། །རིང་སྤངས་གཞིལ་བའི་འཕྲིན་ལས་ཅིས་མི་མཛད། །བྷཽ་བྷཽ། ཨོ་རྒྱན་ཡུལ་གྱི་དབང་ཕྱུག་དཀྱིལ་འཁོར་གཙོ། །ལྷན་སྐྱེས་ཡེ་ཤེས་མཁའ་འགྲོས་འཁོར་ལོ་བསྒྱུར། ། ༩ བཅོམ་ལྡན་ཐུགས་རྗེའི་སྤྱན་རས་མ་བཏུལ་ཞིག །དག་པ་ཡེ་ཤེས་སྙན་གྱིས་མི་གསན་ནམ། །མཁའ་ཁྱབ་མཁྱེན་པའི་ཐུགས་ཀྱིས་མི་དགོངས་སམ། །སྐད་ཅིག་རྫུ་འཕྲུལ་ཞབས་ཀྱིས་མི་བགྲོད་དམ། ། ༡༠ སྔོན་གྱི་ཞལ་བཞེས་བདེན་ཚིག་མ་བསླུ་བར། །འདིར་གཤེགས་བདག་གི་འགྲོ་ལ་ཕན་དོན་དུ། །རྒྱལ་བའི་བསྟན་ལ་ལྷག་པར་བསམ་པའི་དོན། །འབད་པ་ཆེན་པོས་གསོལ་བ་བཏབ་པ་འདི། ། ༡༡ ཇི་བཞིན་རེ་བའི་འབྲས་བུ་བསླུ་མེད་པར། །དུས་འདི་ཉིད་དུ་གསལ་བར་སྟོན་མཛོད་ཀྱཻ། །

ཡང་ལྕགས་རྟ་ལོར་རྗེ་བཙུན་སྒྲོལ་མ་ལ་གསོལ་བཏབ་པ་ཡིན། །

འཇམ་དཔལ་གྱི་ལྷ་ཚོགས་ལ་ཕྱག་འཚལ་བ་རྡོ་རྗེ་དགའ་བའི་རྒྱུད་མང་།

༄༅། །འཇམ་དཔལ་གྱི་ལྷ་ཚོགས་ལ་ཕྱག་འཚལ་བ་རྡོ་རྗེ་དགའ་བའི་རྒྱུད་མང་ཞེས་བྱ་བ་བཞུགས་སོ། །

༈ ཨོཾ་སྭཱསྟི། སངས་རྒྱས་བཅོམ་ལྡན་འདས་ཀུན་གཟིགས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་ཐོག་མཐའ་དབུས་མེད་ཅིང་། །ཆོས་ཀུན་ངོ་བོ་ཆོས་ཀྱི་དབྱིངས། །རྟག་ཏུ་ཞི་བ་གཡུང་དྲུང་ཆེ། །འཇམ་དཔལ་ཀུན་ཏུ་བཟང་ལ་འདུད། ། ༡ རྣམ་པ་ཐམས་ཅད་ཁྱེད་ཀྱི་སྐུ། །དེ་བཞིན་སྒྲ་ཚིག་ཀུན་ཀྱང་གསུང་། །ཡིད་ཀྱང་ཁྱོད་ཀྱི་སྒྱུ་འཕྲུལ་སྟེ། །ཀུན་ཀྱང་འཇམ་དཔལ་ཉིད་ལ་འདུད། ། ༢ དེ་ལྟ་ནའང་སེམས་ཅན་གྱིས། །བློ་ཡི་དྲི་མ་སྦྱངས་སླད་དུ། །དྲི་མ་མེད་པ་ཡེ་ཤེས་སྐུ། །མཚན་དཔེ་ཀུན་ཏུ་རྒྱས་ལ་འདུད། ། ༣ ཆོས་ཀུན་ནམ་མཁའ་ལྟ་བུ་ལ། །ཕྱོགས་རིས་སྤྲོས་པའི་ཡུལ་ལས་འདས། །འོན་ཀྱང་གདུལ་བྱ་མོས་པའི་བློ། །ཐ་དད་སྣང་ངོར་ཐེག་པའི་ཚུལ། ། ༤ རིམ་པར་རྒྱུ་དང་འབྲས་བུའི་ཆོས། །གསང་བ་སྔགས་རྒྱུད་ཀྲི་ཡ་དང་། །ཨུ་པ་ཡ་དང་ཡོ་ག་དང་། །བླ་མེད་སྟོན་མཛད་ཁྱོད་ལ་འདུད། ། ༥ བྱ་རྒྱུད་དཔའ་བོ་གཅིག་གྲུབ་འཇམ་དཔལ་གཞོན་ནུ་ཆུ་སྐྱེས་ཚུལ། །འོ་མའི་མཚོ་དབུས་པད་དཀར་འདབ་སྟོང་ཟླ་བའི་དཀྱིལ་འཁོར་སྟེང་། །གཞོན་ནུ་བརྒྱད་གཉིས་ལང་ཚོ་ཟླ་བ་ཆུ་ཤེལ་ལྟར་དཀར་སྐུ། །སུམ་ཅུ་རྩ་གཉིས་མཚན་དང་དཔེ་བྱད་བརྒྱད་ཅུ་ཡོངས་སུ་རྫོགས། ། ༦ ཕྱག་གཡས་མཆོག་སྦྱིན་གཡོན་པས་རྩ་བ་མཐེབ་སྲིན་གྱིས་བཟུང་བའི། །ཨུཏྤལ་དཀར་པོ་སྙན་ཐད་གྱེས་སྟེང་ཤེར་ཕྱིན་གླེགས་བམ་མཛེས། །དར་དཀར་སྟོད་གཡོགས་སྣ་ཚོགས་སྨད་དཀྲིས་ཞབས་གཉིས་རྡོར་དཀྱིལ་བཞུགས། །བུང་བ་ལྟར་ནག་ཟུར་ཕུད་ལྔ་ཡིས་རབ་མཛེས་དེར་ཕྱག་འཚལ། ། ༧ སྤྱོད་རྒྱུད་བྱ་སྤྱོད་ཐུན་མོང་མ་ཡིན་གསང་བའི་བདག་པོ་ཕྱག་རྡོར་དབང་བསྐུར་རྒྱུད་ཆེན་པོར། །འཇམ་དཔལ་ཉིད་དང་གསང་བའི་བདག་པོ་མཐུ་སྟོབས་གཅིག་ཉིད་དུ། །སྟོན་སླད་རྡོ་རྗེ་ཅན་གྱི་མཚོན་ཆ་རང་གི་མཚན་མ་གང་། །ཨུཏྤལ་དབུས་སུ་ཉེར་བཟུང་དོན་ཆེན་དོན་ལྡན་རབ་མཛེས་པ། ། ༨ དཀར་སྔོ་རིན་ཆེན་པྲོག་ཞུས་དབུ་བརྒྱན་ཕྱག་གཡས་ཡེ་ཤེས་ཀྱིས། །རལ་གྲི་རྣོན་པོ་འཕྱར་བས་མི་ཤེས་དྲྭ་བ་མཐའ་དག་གཅོད། །ཁྲོ་འཛུམ་རྡོ་རྗེའི་གདན་གྱི་པད་ཟླ་ཉི་དལ་ལ་བཞུགས་པ། །བཅོམ་ལྡན་འཇམ་དཔལ་རྡོ་རྗེ་འཛིན་མཛད་དེ་ལ་ཕྱག་འཚལ་ལོ། ། ༩ འཇམ་དཔལ་སྒྱུ་འཕྲུལ་རྡོ་རྗེའི་གླུ་ཉིད་མཚན་བརྗོད་ཞེས་བྱ་བ། །རྒྱུད་རྣམས་ཀུན་ཁྱབ་དང་པོའི་སངས་རྒྱས་སྤྱི་ཏི་ཡོ་ག་སྟེ། །གསང་བའི་མཛོད་དེ་རྣལ་འབྱོར་ཡོ་གའི་རྒྱུད་ཀྱང་ཀུན་ཏུ་གྲགས། །མཚན་བརྗོད་འཇམ་དཔལ་ཡེ་ཤེས་སེམས་དཔའ་དཀར་ལ་གསེར་བའི་མདངས། ། ༡༠ དོ་ཀེར་ལྔ་བཅིངས་ཕྱག་བཞི་དང་པོ་གཉིས་ཀྱིས་རལ་གྲི་དང་། །ཨུཏྤལ་གླེགས་བམ་གྱིས་སྤྲས་འོག་མ་གཉིས་ཀྱིས་མདའ་དང་གཞུ། །འཛམ་བུའི་ཆུ་གསེར་དྲ་བ་བརྒྱན་འཕྲེང་ཡོངས་སྤྲད་འཇའ་ཚོན་གྱིས། །སྨད་དཀྲིས་པད་ཟླར་རྡོ་རྗེ་སྐྱིལ་དྲུང་མཛད་དེར་ཕྱག་འཚལ་ལོ། ། ༡༡ བླ་མེད་ཕ་རྒྱུད་གསང་འདུས་དཀྱིལ་འཁོར་འཁོར་ལོའི་དབང་ཕྱུག་ཆེ། །འཇམ་པའི་རྡོ་རྗེ་ཞལ་གསུམ་རྩ་ཞལ་སྐུ་ལུས་གུར་གུམ་མདོག །གཡས་སྔོ་སྔོན་དཀར་ཕྱག་དྲུག་དང་པོ་རང་སྣང་ཡུལ་ལ་འཁྱུད། །བར་མ་རལ་གྲི་ཨུཏྤལ་མཐའ་གཉིས་མདའ་དང་གཞུ་འཛིན་མཛད། ། ༡༢ རལ་པ་ཟུར་ཕུད་ལྔ་བཅིངས་སྙན་གོང་ཨུཏྤལ་ལྟེང་ཀ་ཅན། །རིན་ཆེན་རྒྱན་ལྡན་དར་གྱི་ཆས་རྫོགས་རྡོ་རྗེ་སྐྱིལ་ཀྲུང་གི །པད་ཟླ་ལ་བཞུགས་རང་འོད་ཡུམ་གྱུར་རང་འདྲ་ཉིད་དང་སྦྱོར། །འོད་ཟེར་ལྔ་ལྡན་ཀུན་ཏུ་འཕྲོ་གྱུར་དེ་ལ་ཕྱག་འཚལ་ལོ། ། ༡༣ བླ་མེད་མ་རྒྱུད་འཁོར་ལོ་བདེ་མཆོག་འཇམ་པའི་རྡོ་རྗེ་ནི། །ཞལ་དྲུག་རྩ་ཞལ་སྐུ་ལུས་ལི་ཁྲི་མདངས་ལྡན་གཡས་གཡོན་ཞལ། །སྔོ་སེར་ལྗང་དམར་སྟེང་ཞལ་དཀར་པོ་རབ་ཞི་གཞན་ཀུན་ཁྲོས། །ཐོད་སྐམ་ཨུ་རྒྱན་སངས་རྒྱས་ལྔས་སྤྲས་རལ་པ་དོ་ཀེར་ཅན། ། ༡༤ བཅུ་གཉིས་ཕྱག་རྒྱ་གཡས་ལྔ་རྡོ་རྗེ་རལ་གྲི་ལྕགས་ཀྱུ་མདའ། །ཅང་ཏེའི་གཡོན་ལ་དྲིལ་བུ་ཨུཏྤལ་ཞགས་པ་གཞུ་མཚང་མགོ །མཐའ་གཉིས་མ་ཚངས་པགས་ཞབས་གཉིས་བསྐྱང་སྐུམ་པད་ཉིར་དྲེགས་དུས་གནས། །ཕག་མོ་ལ་འཁྱུད་ཧེ་རུ་ཀ་དཔལ་དེ་ལ་ཕྱག་འཚལ་ལོ། ། ༡༥ དེ་ལྟར་རྒྱུད་སྡེ་རྣམ་པ་བཞིའི་དཀྱིལ་འཁོར་གཙོ་བོའི་སྐུར་སྣང་མཛད། །ཁྱབ་བདག་འཇམ་དཔལ་དཔའ་བོ་ལ། །སྙིང་ནས་གུས་པས་ཕྱག་འཚལ་འདུད། ། ༡༦ ཀུན་རྫོབ་འདུས་བྱས་འབྱུང་བ་བཞིར། །འདུས་མ་བྱས་པ་མཁའ་ཁྱབ་གདལ། །ཡེ་ཤེས་ལྷ་ཡི་སྒྱུ་འཕྲུལ་ཆེ། །བདེན་གཉིས་ཟུང་འཇུག་ལ་ཕྱག་འཚལ། ། ༡༧ རང་བྱུང་དུར་ཁྲོད་འཇིགས་རུང་རྦ་དོང་དང་པོར་བཞུགས་པའི་ལྷ། །འཇམ་དཔལ་སྐུ་མདོག་པུཎྜ་རི་ཀ་ཇི་བཞིན་དཀར་བ་ཡི། །ཞལ་བཞི་རང་མཛེས་ཕྱག་བརྒྱད་དང་པོ་རྡོ་རྗེ་དྲིལ་བུ་ཡི། །ཤེར་ཕྱིན་མ་འཁྱུད་དེ་འོག་ཉིད་ཀྱི་རལ་གྲི་ཨུད་པ་ལ། ། ༡༨ གསུམ་པ་མདའ་གཞུ་བཞི་པ་ལྕགས་ཀྱུ་ཞགས་པ་བསྣམ་པའི་པང་། །ཤེར་ཕྱིན་དམར་མོ་གྲི་ཁུག་ཐོད་པ་འཛིན་དང་མཉམ་སྦྱོར་ཞབས། །རྡོ་རྗེ་པདྨའི་སྐྱིལ་ཀྲུང་དར་དང་རིན་ཆེན་རུས་པའི་བརྒྱན། །ཡོངས་སྤྲས་མཚན་དཔེ་རབ་རྫོགས་པད་ཟླར་བཞུགས་ལ་ཕྱག་འཚལ་ལོ། ། ༡༩ རང་བྱུང་དུར་ཁྲོད་འཇིགས་རུང་རྦ་དོང་གཉིས་པར་བཞུགས་པའི་ལྷ། །བཅོམ་ལྡན་འདས་དཔལ་གཤིན་རྗེའི་གཤེད་པོ་གདོང་དྲུག་པ། །ཞལ་དྲུག་ཀུན་ཀྱང་རབ་ཁྲོས་མཐོང་ཀ་སྟེང་ཞལ་ལྷག་པར་གནག །ཕྱག་དྲུག་གཡས་གཡུམ་ར་ལྡན་རྡོ་རྗེ་ཐོ་བ་འཕྱར། ། ༢༠ གཡོན་གསུམ་ཞགས་པས་ཁམས་གསུམ་མ་ལུས་འཆིང་བར་བྱེད། །ཞབས་དྲུག་རྡོ་རྗེའི་སྐྱིལ་ཀྲུང་དོར་སྟབས་དང་ནི་གར་སྟབས་ཀྱི། །འཆི་བདག་བདུད་བཞི་ཕོ་མོ་རབ་མནན་ཡེ་ཤེས་མེ་ཀློང་དུ། །དཔའ་གཏུམ་དུར་ཁྲོད་ཆས་བརྒྱན་པད་ཉིར་བཞུགས་དེར་ཕྱག་འཚལ་ལོ། ། ༢༡ རང་བྱུང་དུར་ཁྲོད་འཇིགས་རུང་རྦ་དོང་གསུམ་པར་བཞུགས་པའི་ལྷ། །དཔལ་ཆེན་ཐུགས་སྤྲུལ་ཚེ་བདག་མཐིང་ནག་དབུ་དགུ་ཕྱག་བཅོ་བརྒྱད། །སྟེང་གསུམ་ཁྱུང་དང་རྨ་བྱ་ཀང་ཀ་བར་གསུམ་ཁྲོ་བའི་ཞལ། །མཐིང་དམར་དཀར་པོ་འོག་གསུམ་སྟག་སེང་མ་ཧེ་ཁྲོས་པའི་གདོང་། ། ༢༢ གཡས་དགུ་འཁོར་ལོ་རལ་གྲི་རྡོ་རྗེ་ཁ་ཊཾ་མདུང་ཞིང་དབྱུག །རྡོ་རྗེ་རྒྱ་གྲམ་མདའ་ཕུར་གཡོན་དགུ་བེ་ཅོན་གཏུན་ཤིང་དང་། །རྒྱུ་མ་སྦྲུལ་ཞགས་སྡིག་མཛུབ་ཏྲི་ཤུལ་དགྲ་སྟ་གཞུ་མི་སྙིང་། །དུར་ཁྲོད་ཆོས་རྫོགས་ཞབས་བརྒྱད་རུ་ཏྲ་རྫི་དེར་ཕྱག་འཚལ་ལོ། ། ༢༣ རང་བྱུང་དུར་ཁྲོད་འཇིགས་རུང་རྦ་དོང་བཞི་པར་བཞུགས་པའི་ལྷ། །རྣལ་འབྱོར་དབང་ཕྱུག་འཆར་ཁ་ནག་པོ་སྐུ་ཆེ་ཡན་ལག་རགས། །དབུ་སྐྲ་དམར་སེར་ཐོར་ཚུགས་རྩེ་མོར་སྐུ་གདུང་མཆོད་རྟེན་དཀར། །གཡས་གཡོན་ཕྱག་ན་མཆོད་རྟེན་དམར་དང་ནག་པོ་རབ་ཏུ་བརྗིད། ། ༢༤ ཞབས་གཉིས་བསྐྱང་བསྐུམ་དགྲ་བགེགས་ཀུན་མནན་འཁོར་ལོའི་གདན་ལ་བཞུགས། །ཐོད་སྐམ་དབུ་བརྒྱན་མགོ་འཕྲེང་དོ་ཤལ་སྟག་ཤམ་མི་པགས་གོས། །གདུག་པའི་སྦྲུལ་དང་རུས་པའི་རྒྱན་ལྡན་ཁྲག་ཞགས་ཐལ་ཆེན་བྱུག །སྲིད་གསུམ་ལྟོར་འཆང་མི་བཟད་ཁྲོ་བོ་དེ་ལ་ཕྱག་འཚལ་ལོ། ། ༢༥ རང་བྱུང་དུར་ཁྲོད་འཇིགས་རུང་རྦ་དོང་ལྔ་པར་བཞུགས་པའི་ལྷ། །སྤྲུལ་པའི་སྤྲུལ་པ་ལས་ཀྱི་ཚུལ་འཆང་གཤིན་རྗེ་ཆོས་ཀྱི་རྒྱལ། །དམར་སྨུག་སྤྱན་གསུམ་སྡང་མིག་ཞལ་གདངས་མཆེ་བ་ཟང་ཡག་གཙིགས། །སྐྲ་སེར་གྱེན་བརྫེས་སྨིན་མ་སྨ་ཚོམ་མེ་ཡི་གློག་སྟོང་འཁྱུག ། ༢༦ ཐོད་སྐམ་དབུ་རྒྱན་ཐོད་རློན་དོ་ཤལ་ཞིང་པགས་སྟོད་གཡོགས་གསོལ། །སྟག་ཤམ་སྦྲུལ་དང་རུས་པའི་རྒྱན་སྤྲས་ཆུ་གླང་སྔོན་པོའི་ཁྲིར། །བཙན་སྐྱིལ་གྱིས་བཞུགས་ཕྱག་གཉིས་ཁྲམ་བམ་དང་ནི་ཞགས་པ་བསྣམས། །ལྷོ་ཕྱོགས་སྐྱོང་མཛད་སྲོག་བདག་དེ་ལ་ཕྱག་འཚོལ་ལོ། ། ༢༧ དེ་ལྟར་ཆོས་གཉིས་སྐྱེ་མེད་ངང་། །འགག་མེད་གཟུགས་སྐུའི་རོལ་པ་ནི། །ཅིར་ཡང་སྟོན་ནས་འགྲོ་དོན་མཛད། །སྣ་ཚོགས་གཟུགས་ཅན་ལ་ཕྱག་འཚལ་ལོ། ། ༢༨ གངས་ཅན་བོད་ཡུལ་ཤིང་ལོའི་ཚལ། །ཟད་པ་ལྷོ་མོན་རྒྱ་གར་གྱི། །ཆུ་མགོ་སྦས་ཡུལ་དགུ་བརྒྱ་ལ། །རང་བྱུང་དུར་ཁྲོད་ཆེ་དེར་འདུད། ། ༢༩ ལས་ཀྱི་གཤིན་རྗེ་རྟག་གནས་གྲོང་། །འཇམ་དཔལ་དཔའ་བོས་བྱིན་བརླབས་ཤིང་། །རང་བྱུང་སྐུ་གསུང་ཐུགས་ཀྱི་རྟེན། །འགྲོ་བའི་དཔལ་དུ་བཞུགས་དེར་འདུད། ། ༣༠ དོན་དམ་སྤྲོས་པའི་ཡུལ་ལས་འདས། །འགྲོ་དོན་གཟུགས་སྐུ་ཅིར་ཡང་སྤྲོ། །བེམ་པོའི་ཚུལ་ལ་སེམས་པ་གསུམ། །བདེན་གཉིས་ཟུང་འཇུག་སྣང་དེར་འདུད། ། ༣༡ སྐུ་བརྙན་རྡོ་རྗེའི་བྲག་ལ་ཤར། །གསུང་དབྱངས་ཆུ་རྒྱུན་ཧྲཱི༔་ཥྚིའི་སྒྲ། །ཆད་མེད་ཆོས་དབྱིངས་ངང་དུ་གནས། །བྱིན་རླབས་མཐུ་དང་ལྡན་དེར་འདུད། ། ༣༢ ཁྱད་པར་ཐུགས་རྟེན་བུམ་པ་ནི། །རྡོ་རྗེའི་ཡོ་ལས་ཆེས་འབུར་ཚུལ། །ཁྲི་འཕང་བང་རིམ་བུམ་པ་སྟེ། །ཆོས་འཁོར་མངོན་སྣང་དེར་གུས་འདུད། ། ༣༣ དེ་ལྟར་རྟེན་དང་བརྟེན་པའི་ཚུལ། །འཇམ་དཔལ་སྐུ་གསུང་ཐུགས་རྡོ་རྗེ། །སྒྱུ་འཕྲུལ་དཔག་ཡས་སྣང་བ་ལ། །གུས་པས་ཕྱག་འཚལ་གསོལ་འདེབས་པས། ། ༣༤ བདག་སོགས་འགྲོ་བའི་སྒྲིབ་གཉིས་དག །ཚོགས་གཉིས་ཡོན་ཏན་རབ་ཏུ་རྒྱས། །འཇམ་དཔལ་དཔའ་བོ་དེ་ཇི་འདྲའི། །གོ་འཕང་རིང་མིན་མྱུར་ཐོབ་ཤོག ། ༣༥

ཅེས་ཀོང་ཡུལ་རྒྱ་ལྷ་རང་བྱུང་མཆོད་རྟེན་གྱི་ཞབས་རྟོགས་སུ་གཙུག་ལག་ཁང་གྲུ་བཞི་འདོམ་གང་པ་ཞིག་བཞེངས་པའི་ལོགས་རིས་བྲིས་ཡིག་དང་ལྷན་ཅིག་འཇམ་དཔལ་ལྷ་ཚོགས་ལ་ཕྱག་འཚལ་བ་རྡོ་རྗེ་དགའ་བའི་རྒྱུད་མངས་ཞེས་བྱ་བ་འདི་ཡང་རང་གི་སློབ་མ་རྣམ་དཔྱོད་ཀྱི་སྣང་བ་རྒྱས་པ་འཇམ་དབྱངས་བློ་གྲོས་རབ་རྒྱས་པས་གསོལ་བ་བཏབ་པའི་ངོར་༸དཔལ་རིག་པ་འཛིན་པ་ཚེ་དབང་ནོར་བུ་རྡོ་རྗེ་གཟི་བརྗིད་ཀྱིས་བསྲུང་བྱེད་མེ་སྟག་གི་ལོ་སྣྲོན་ཟླའི་ཚེས་བཟང་པོར་བོད་ཡུལ་དབུས་རུས་ཆ་གཞུ་ཚུར་མཚམས་རྒྱལ་བ་ལོ་རས་ཀྱི་བསྟི་གནས་བྱང་གནས་དབུ་རིས་འབྲིས་པ་དགེའོ། །དགེའོ། །

བྱ་རྒྱུད་ཀྱི་གཙོ་བོ་འཇམ་དཔལ་རྩ་རྒྱུད་ཡིན་ཡང་། བྲི་བདེ་བའི་འདིར་དཔའ་བོ་གཅིག་གྲུབ་ཀྱི་མངོན་རྟོགས་ལྟར་དང་ཕྱག་ན་རྡོ་རྗེའི་དབང་བསྐུར་གྱི་རྒྱུད་བྱ་རྒྱུད་ཤས་ཆེ་ཡང་། མཁས་པ་ཁ་ཅིག་གི་སྤྱོད་རྒྱུད་སོགས་དང་ཐུན་མོང་དུ་བཀྲལ་བ་ལྟར་འདིར་སྤྱོད་རྒྱུད་དུ་བསྡུས་པ་ཡིན་ལ། དེ་ལྟར་བྱ་སྤྱོད་རྣལ་འབྱོར་བླ་མེད་ཕ་མ་གཉིས་ཀྱི་ལྷ་ལོག་གཡས་སུ་བྲིས་ཤིང་། ཐོ་དོང་གི་ལྷ་ལྔ་ནི་གཡོན་ལོགས་སུ་འབྲི་བ་ཡང་ཤེས་པར་བྱའོ། །སརྦ་མངྒ་ལོ། དེ་བཞིན་ཟེ་ཕུའི་ལྷ་ཁང་དེར། དབུས་སུ་མ་ཧཱ་མཱ་ཡ་དང་། གཡས་སུ་སློབ་དཔོན་ཆེན་པོ་པདྨ་འབྱུང་གནས་དཀོན་མཆོག་སྤྱི་འདུས་ཞི་དྲག་སེང་གསུམ་གྱིས་མཚོན་པ་དང་། གཡོན་ངོས་སུ་གྲུབ་ཐོབ་ཆེན་པོ་ཀུ་ཀུ་རི་པ། རི་ལླི་ནཱ་རོས་མཚོན་ཇི་ལྟར་འོས་པ་འབྲི་ལུགས་ཀྱིས་ས་ལེགས་པར་གུམ། ཤུ་བྷཾ།

དཔལ་དམ་པ་དང་པོའི་སངས་རྒྱས་དུས་འཁོར་བརྒྱུད་པའི་བླ་མ་རྒྱལ་སྲས་གྱུར་ཤམྦྷ་ལར་སེངྒེའི་གདན་ཅན་ཆོས་རྒྱལ་རིག་ལྡན་རྣམས་ལ་ཕྱག་འཚལ་བ་གངས་ཅན་ཟླ་བའི་ཆུ་གཏེར།

༄༅། །དཔལ་དམ་པ་དང་པོའི་སངས་རྒྱས་དུས་འཁོར་བརྒྱུད་པའི་བླ་མ་རྒྱལ་སྲས་གྱུར་ཤམྦྷ་ལར་སེངྒེའི་གདན་ཅན་ཆོས་རྒྱལ་རིག་ལྡན་རྣམས་ལ་ཕྱག་འཚལ་བ་གངས་ཅན་ཟླ་བའི་ཆུ་གཏེར་ཞེས་བྱ་བ་བཞུགས་སོ། །

༈ ཨོཾ་སྭཱ་སྟི་སིདྡྷནྟུ། ན་མོ་གུ་ར་ཝེ། ན་མ༔ཤྲཱི་ཀཱ་ལ་ཙཀྲ་ཡ། བཅོམ་ལྡན་འདས་དཔལ་དུས་ཀྱི་འཁོར་ལོ་མཆོག་གི་དང་པོའི་སངས་རྒྱས་ལ་གུས་པས་ཕྱག་འཚལ་ལོ། །ཕན་བདེའི་སྤྲིན་ཕུང་ཆེར་དགྱེས་དེ་བཞིན་གཤེགས། །ས་བཅུའི་མངའ་བདག་ཀུན་གྱི་ཐུགས་གསང་བཅུད། །བདུད་རྩིའི་ཆར་གྱིས་སྐལ་ལྡན་ཚིམ་མཛད་པའི། །དངོས་བརྒྱུད་དཔལ་ལྡན་བླ་མ་རྒྱལ་གྱུར་ཅིག །མཆོག་ཏུ་མི་འགྱུར་བདེ་བ་ཆེན་པོའི་ངོ་བོ་ཉིད། །མི་ཤིག་དངས་མ་ཐིག་ལེ་རྣམ་པ་ཐམས་ཅད་པ། །ཀུན་ཏུ་མཆོག་ལྡན་རིག་པ་དཔལ་མཆོག་རྡོ་རྗེ་སེམས། །ཀུན་ཏུ་བཟང་པོ་དུས་ཀྱི་འཁོར་ལོར་ཕྱག་འཚལ་ལོ། །གདོད་མ་ཉིད་ནས་རང་བྱུང་སངས་རྒྱས་དམ་པ་དང་པོའི་མགོན། །སྐྱེ་འཇིག་འགྱུར་མེད་སྤྲོས་བྲལ་ཀུན་ཁྱབ་མི་འགྱུར་བདེ་བ་ཆེ། །རྣམ་ཀུན་མཆོག་ལྡན་རྣམ་པ་ཐམས་ཅད་སྣ་ཚོགས་དབང་པོ་ནི། །ཀུན་ཏུ་བཟང་པོ་འོད་མི་འགྱུར་བ་རང་བཞིན་འོད་གསལ་བ། ། ༡ གཙང་བདེ་རྟག་པ་བདག་གི་ཕར་ཕྱིན་ཆ་མེད་ཀུན་འགྲོ་བ། །ཐིག་ལེ་ཆེན་པོ་ཡི་གེ་དྲུག་དང་སྟོང་ཆེན་ཡི་གེ་ལྔ། །ཟུང་འཇུག་དུས་ཀྱི་འཁོར་ལོ་ནོར་བུ་པདྨ་སངས་རྒྱས་ཀུན། །འབྱུང་གནས་ཨེ་ཝཾ་ངོ་བོ་ཉིད་ལ་ཕྱག་འཚལ་འདུད། ། ༢ ཀུན་ཏུ་བཟང་པོ་ཆོས་དབྱིངས་གཡུང་དྲུང་ངང་ལས་མ་གཡོས་པར། །མཁའ་ཁྱབ་སྒྱུ་འཕྲུལ་དྲ་བ་རྒྱ་མཚོ་སྤྲོ་དང་བསྡུ་བར་སྣང་། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་ཧེ་རུ་ཀ་ཤྲཱི་དང་། །ཡང་དག་མཉམ་སྦྱོར་མཁའ་འགྲོ་སྡོམ་པ་ཆེ་མཆོག་རྔམ་པ་གློག ། ༣ རིག་པའི་ཁུ་བྱུག་ཀུན་འདུས་རིག་པ་ཀུན་བྱེད་རྒྱལ་པོ་ཆེ། །དཔལ་མཆོག་དུས་འཁོར་སྣ་ཚོགས་དབང་པོ་ཨ་ཏི་ཡོ་ག་སོགས། །དུ་མའི་མཚན་སྤྲད་གཟུགས་སྐུ་རྒྱ་མཚོའི་འཆར་གཞི་ཆོས་ཀྱི་སྐུ། །ཐིག་ལེ་ཉག་གཅིག་ངོ་བོ་ཉིད་སྐུ་ཆེ་དེར་ཕྱག་འཚལ་འདུད། ། ༤ དང་པོའི་སངས་རྒྱས་ཀུན་ཏུ་བཟང་པོ་གདུལ་བྱའི་དོན་དུ་སྐུ། །ལྷ་མིའི་བླ་མ་ཤཱཀྱ་ཐུབ་ཞེས་མི་མཇེད་ཞིང་གི་དཔལ། །ཡོངས་སུ་སྣང་སྟེ་ཐུན་མོང་དུ་ཡང་གྲངས་མེད་བསྐལ་བའི་སྔོན། །དབང་པོའི་རྟོགས་དང་སྤྱན་ཆེན་པོའི་ཞེས་ཡང་དག་རྫོགས་སངས་རྒྱས། ། ༥ སླར་ཡང་འགྲོ་བའི་དོན་བརྩོན་ཤཱཀྱའི་རིགས་སུ་ཉེར་བལྟམས་ནས། །བཅུ་གཉིས་མཛད་པས་གདུལ་དཀའ་འདུལ་མཛད་སྒྱུ་འཕྲུལ་དྲ་བ་ཅན། །སྐུ་གསུང་ཐུགས་ཀྱི་རྡོ་རྗེ་མི་འཛད་རྒྱན་གྱི་འཁོར་ལོའི་བདག །ཐུབ་པ་སངས་རྒྱས་ཤིན་ཏུ་ཞི་བ་དེ་ལ་ཕྱག་འཚལ་འདུད། ། ༦ ཆོས་དབྱིངས་ད་ལ་སྲིད་གསུམ་རིན་ཆེན་དཔུང་པའི་མཆོད་རྟེན་དབུས། །བདུད་བཞི་མནན་སྟེང་སྣ་ཚོགས་རྡོ་རྗེའི་ལྟེ་བར་སེང་གེ་ཡི། །རྡོ་རྗེའི་གདུང་སྟེག་ཆུ་སྐྱེས་འདབ་འབུམ་ཉི་ཟླ་སྒྲ་གཅན་སྟེང་། །གསེར་སྦྱངས་བཙོ་མ་འབའ་ཞིག་ལས་བྱས་མི་མཇེད་བྱེ་བ་བརྒྱ། ། ༧ ཉི་མ་རབ་བཀྲམ་གྱིས་འཁྱུད་འོད་མདངས་ཁ་དོག་བསྡུས་འདྲའི་སྐུ། །མཚན་དཔེ་རབ་བརྒྱན་རྡོ་རྗེ་དཀྱིལ་ཀྲུང་ཆོས་གོས་རྣམ་གསུམ་གསོལ། །བདུད་འདུལ་ཏིང་འཛིན་ཕྱག་བརྒྱ་ཉེར་བཅས་ཤིན་ཏུ་དྲང་བར་བཞུགས། །དཔེ་མེད་བླ་མ་བཅོམ་ལྡན་ལྷ་ཡི་ལྷ་དེར་ཕྱག་འཚལ་འདུད། ། ༨ མུ་མཐའ་མེད་པའི་བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་སངས་རྒྱས་ཀུན་གྱི་ཡབ་གྱུར་ཀུན་གྱི་གཙོ་བོ་མཆོག །འཇིག་རྟེན་མགོན་མཛད་སྣང་མཛད་དག་པ་ཞི་བ་ཟས་གཙང་སྲས། །བསམ་གྱིས་མི་ཁྱབ་བསམ་ཡས་ཡུལ་དེ་དཔེ་མེད་དཔེར་བྱ་བ། ། ༩ གང་སྐུ་བསྐལ་པ་བརྒྱ་མཚོར་བལྟས་ཀྱང་ངོམ་པས་ཡོངས་སུ་དབུལ། །ཞི་ཆགས་ཁྲོ་གར་ཅིར་ཡང་སྟོན་ཀྱང་ཐུགས་རྗེའི་དབང་གི་སྡུག །མཁའ་ཁྱབ་བརྟན་གཡོའི་རྡུལ་ཕྲན་གཅིག་གི་གཡོ་བའང་སྒྲིབ་མེད་མཁྱེན། །གསང་གསུམ་མཁའ་མཉམ་བདེ་བར་གཤེགས་པ་དེ་ལ་ཕྱག་འཚལ་འདུད། ། ༡༠ དེ་སྲས་བསྐལ་ཆེན་གྲངས་མེད་དུ་མའི་སྔོན་དུ་སངས་རྒྱས་ཀྱང་། །གདུལ་བྱའི་ཆེད་དུ་བྱང་ཆུབ་སེམས་དཔའ་ས་བཅུའི་རྒྱུན་མཐའ་ནི། །ཆོས་ཀྱི་སྤྲིན་ཆེན་དབང་བསྒྱུར་དབང་ཕྱུག་ཆེན་པོ་ཡོངས་སྤྲུལ་པ། །ནམ་མཁའི་མཐའ་མཉམ་སྒྱུ་འཕྲུལ་རྒྱ་མཚོའི་བདག་ལ་ཕྱག་འཚལ་ལོ། ། ༡༡ འཛམ་གླིང་ཆུང་ངུའི་བྱང་ཕྱོགས་ཤམྦྷ་ལ་ཞེས་ཡུལ་གྱུར་ནི། །བྱེ་བ་དགུ་བཅུ་རྩ་དགུའི་དབུས་ན་མངོན་མཐོ་ཀཻ་ལ་ཤས། །ཡོངས་བསྐོར་བྱེ་བ་བཅུ་གཉིས་ཡུལ་གྱི་སྙིང་པོར་ཀ་ལ་པའི། །ཆོས་རྒྱལ་རིགས་ལྡན་ས་བཅུའི་དབང་ཕྱུག་རྣམས་ལ་འཚལ་འདུད། ། ༡༢ ཆོས་རྒྱལ་རྣམས་ཀྱི་དབང་པོ་བགེགས་རྣམས་མཐར་བྱེད་ཉི་མའི་འོད། །སྔོ་བསངས་ཁྲོ་ཚུལ་ཨམ་རྩིག་བསྡམ་ཞིང་རལ་པ་ཝང་མིག་སེར། །རིན་ཆེན་ཁྲི་ལ་རོལ་པའི་འདུག་སྟངས་གཡོན་བསྐྱངས་པདྨ་བརྫིས། །ཕྱག་གཉིས་མེ་འབར་རལ་གྲི་ཕུབ་བསོར་གར་གྱི་ཕུ་དུང་ཅན། ། ༡༣ དགྱེས་ཡུམ་རྡོ་རྗེ་གཞོན་ནུ་ལྷ་མོ་རྣམ་རྒྱལ་དཀར་སེར་མདོག །ཡབ་ལ་ཐབས་སྦྱོར་ཤཀྟི་མ་འཁྱུད་མཉམ་པའི་ཞབས་ཀྱིས་བཞེངས། །ཡེ་ཤེས་སྒྱུ་མའི་འཁྲུལ་ལས་བདེ་ལྡན་དབང་པོའི་འཛིན་པའི་ཡུལ། །ཐབས་མཁས་དགེ་བའི་སྒོ་བརྒྱ་འབྱེད་པར་མཛད་ལ་ཕྱག་འཚལ་ལོ། ། ༡༤ རྒྱལ་བ་ཀུན་གྱིས་གསང་གསུམ་བདག་པོ་ལག་ལ་རྡོ་རྗེ་འཆང་། །རྡོ་རྗེ་ཟླ་བའི་འོད་ཟེར་བཟང་པོ་མཐོན་མཐིང་འབར་བའི་མདོག །གཙུག་ཕུད་གསུམ་པ་རིན་ཆེན་པྲོག་ཞུ་རྡོ་རྗེ་ནོར་བུའི་ཏོག །སྐུ་ལ་མེ་ཏོག་འཕྲེང་བ་རིན་ཆེན་དར་གྱིས་རྒྱན་ཀུན་རྫོགས། ། ༡༥ ཕྱག་གཉིས་རྣམ་རོལ་ཕྱག་རྒྱས་ཐུགས་ཀར་ཨུཏྤལ་སྔོ་དམར་གྱིས། །འབྲས་བུ་རྡོ་རྗེ་དང་ནི་དྲིལ་བུས་མཚན་པ་རྩ་བ་གཟུང་། །སེམས་པའི་སྐྱིལ་ཀྲུང་དག་གི་ཟླ་བ་ཉི་མ་པདྨ་དང་། །རིན་ཆེན་ཁྲི་བཟང་དང་བཅས་ནོར་བུ་བྱེ་བ་ལས་བྱུང་བའི། ། ༡༦ ལྷ་ཡི་ཁང་པ་མཆོག་གྱུར་དྲག་པོ་འཇུག་སེལ་དབྱིག་སྙིང་དང་། །མཛོད་ལྡན་རྣམས་ཀྱི་ཤུགས་བཅས་ཀྱིས་བཏེགས་དབུས་སུ་བརྗིད་པར་བཞུགས། །སྐུ་ཡི་འོད་ཟེར་མཐོན་ཀ་དངོས་པོར་ཐོགས་མེད་མཁའ་མཉམ་འཕྲོ། །བགེགས་ཚོགས་ཀུན་འདུལ་ལྷ་རྣམས་ཡོངས་ཀྱི་དཔའ་བོ་རྨད་བྱུང་བ། ། ༡༧ དགྱེས་བསྐྱེད་ཡུམ་མཆོག་རྡོ་རྗེ་སྒྲ་དབྱངས་ལྷ་མོ་ནི་ལའི་མདོག །སྔོ་བའི་གོས་དང་རིན་ཆེན་གྱིས་སྤྲས་ཡབ་ཀྱི་སྐུར་བརྟེན་ནས། །ལྷ་ཡི་ཏམྦུ་ར་ཡི་ཕྲེང་སྤེལ་ཡན་ལག་དྲུག་ཅུའི་སྒྲ། །མ་ལུས་སྒྲོག་མཛད་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༡༨ ས་ཡི་སྙིང་པོ་ཆོས་རྒྱལ་ལྷ་དབང་དམར་པོ་རབ་ཏུ་མཛེས། །རལ་པ་མཐོན་མཐིང་ཐོར་ཅོག་མེ་ཏོག་སྔོན་པོས་ཐོད་བྱས་ཤིང་། །ཕྱག་གཡས་ཌཱ་རུ་གཡོན་ན་པད་དཀར་ནོར་བུ་བརྒྱན་པ་བསྣམས། །སྟོད་གཅེར་རིན་ཆེན་རྒྱན་སྤུད་ལྷ་གོས་སྨད་གཡོག་ནོར་བུའི་ཁྲི། ། ༡༩ གངས་བྲག་ནགས་རིས་བསྐོར་དབུས་རིན་ཆེན་ཁང་བཟང་དབུས་སུ་ནི། །རོལ་པའི་སྟབས་བཞུགས་སྟེང་ན་མཁའ་ལྡིང་དབང་པོས་ཚད་སྐྱོབས་མཛོད། །དགྱེས་ཡུམ་གཟུགས་ཀྱི་རྡོ་རྗེ་དཀར་མོ་འཇོ་སྒེག་རྒྱན་ཀུན་རྒྱས། །མེ་ལོང་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༢༠ གཤིན་རྗེ་མཐར་བྱེད་ཆོས་རྒྱལ་གཟི་བརྗིད་ལྡན་པ་གསེར་གྱི་མདོག །རལ་པ་དམར་སེར་ཐོད་གཙུག་མེ་གུར་འབར་ཞིང་གཡོ་བའི་ཚུལ། །སྐུ་སྟོད་གཅེར་བུ་འཇའ་ཡིས་སྨད་དཀྲིས་སྟག་ལྤགས་ཤམ་ཐབས་ཅན། །རིན་པོ་ཆེ་དང་སྦྲུལ་གྱིས་མཛེས་རྒྱན་ཞབས་གཉིས་རོལ་པའི་སྟབས། ། ༢༡ ཕྱག་གཉིས་གསེར་གྱི་འཁོར་ལོ་སྐྱེ་བ་ལྔ་པའི་དུང་གིས་བརྒྱན། །ཆུ་གླང་དམར་པོ་བརྒྱད་ཀྱི་བཏེགས་པའི་ཁྲི་ལ་བརྗིད་པར་བཞུགས། །དགྱེས་ཡུམ་ཤིན་ཏུ་སྟོབས་མ་སྔོན་མོ་འཇའ་ཡི་སྨད་དཀྲིས་ཅན། །གྲི་ཐོད་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༢༢ སྒྲིབ་པ་རྣམ་སེལ་ཆོས་རྒྱལ་ཟླ་བས་བྱིན་པ་སྦུར་ལེན་མདོག །རལ་པའི་དོ་ཀེར་སྐུ་སྟོད་གཅེར་བུ་ནོར་བུའི་དོ་ཤལ་འཕྱང་། །དར་གྱི་སྨད་གཡོག་རིན་ཆེན་བྲག་རིར་རོལ་པའི་འདུག་སྟངས་ཅན། །པདྨར་ཞབས་བརྟན་སྐུ་ལ་རིན་ཆེན་དུ་མས་མཛེས་པར་བྱས། ། ༢༣ ཨུཏྤལ་སྔོན་པོའི་འབྲས་བུས་རྡོ་རྗེ་མཚན་གཡས་པདྨ་དམར། །དྲིལ་བུས་སྤྲས་པ་གཡོན་མཛེས་ཕྱག་གཉིས་ཆོས་འཆད་ཕྱག་རྒྱ་ཅན། །དགྱེས་ཡུམ་རེག་བྱ་རྡོ་རྗེ་སྔོན་མོ་འཇའ་ཚོན་སྨད་དཀྲིས་ཅན། །ལྷ་མོས་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༢༤ ཤེས་རབ་མཐར་བྱེད་ཆོས་རྒྱལ་ལྷ་ཡི་དབང་ཕྱུག་དམར་འཚེར་འབར། །དམར་སེར་རལ་པའི་ཐོར་ཅོག་གཟིག་ལྤགས་སྟོད་གོས་སྟག་ཤམ་ཅན། །པདྨ་དཀར་དམར་སྦྲུལ་གྱིས་ཆུན་པོ་དག་གིས་སྐུ་བརྒྱན་ཅིང་། །སེང་གེ་སྔོན་པོས་ཡོངས་སུ་བཏེགས་པའི་རིན་ཆེན་ཁྲིར་བཞུགས་ཞབས། ། ༢༥ བྱམས་པའི་བཞུགས་སྟངས་ཀྱིས་བརྗིད་ཕྱག་གི་དཀྱིལ་འཁོར་ཟུང་ཐག་ནི། །ཁ་ཊྭཱཾ་ཀ་གྱུར་དཀར་དང་རིན་ཆེན་ཞབས་པས་མཛེས་པར་བྱས། །དགྱེས་ཡུམ་ཁེངས་བྱེད་དཀར་མོ་ཁྲོ་མོས་ཆོས་ཅན་མི་ཡི་མདའ། །གཞུ་ཡི་ཕྱག་བརྒྱན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༢༦ པདྨ་ཐར་བྱེད་ཆོས་རྒྱལ་སྣ་ཚོགས་གཟུགས་ནི་གངས་རིའི་མདོག །རལ་པ་ཝང་མིག་དམར་སེར་སྐུ་ལ་སྦྲུལ་གྱི་ཆུན་པོས་མཛེས། །སྟོད་རྗེན་པདྨའི་ཕྲེང་བ་དར་གྱི་སྨད་གཡོག་རིན་ཆེན་སྤྲད། །དཔའ་གཏུམ་སྟག་གིས་བཏེགས་བྱེད་རིན་ཆེན་ཁྲི་ལ་རོལ་སྟངས་བཞུགས། ། ༢༧ ཕྱག་གཡས་རིན་ཆེན་སྙིང་པོ་ལས་གྲུབ་ཐོས་པ་ངོམ་པའི་ཚུལ། །གཡོན་ན་རབ་རྒྱས་པདྨ་དཀར་པོ་འདབ་མ་བརྒྱ་པ་འཛིན། །དགྱེས་ཡུམ་རྨུག་བྱེད་དམར་མོ་ཁྲོ་མོའི་ཚུལ་འཆང་ཅང་ཏིའུ་ཁྲོལ། །ཐོད་པ་ཡབ་སྟོབས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༢༨ ནམ་མཁའི་སྙིང་པོ་ཆོས་རྒྱལ་ལྷ་ཡི་དབང་ལྡན་དབང་སྔོན་མདོག །ཐོར་ཚུགས་མེ་ཏོག་སྔོན་པོའི་ཕྲེང་བས་ཐོད་བཅིང་ལུས་ཀུན་བརྒྱན། །ལྷ་གོས་སྔོན་པོ་ཤ་མིག་སྒྲིབ་པའི་ན་བཟའ་ལྷབ་ལྷུབ་གསོལ། །རྟ་མཆོག་སྔོན་པོ་གསུམ་གྱིས་དྲངས་བའི་རིན་ཆེན་ཁྲི་བཟང་པོར། ། ༢༩ དལ་པོའི་འདུག་སྟངས་དག་གིས་བཞུགས་ནས་ཕྱག་གིས་པདྨོ་གཟུང་། །རྡོ་རྗེའི་གྲི་གུག་དང་ནི་བདེ་སྐྱོང་བདུད་རྩིས་བཀང་བས་བརྒྱན། །སྣ་ཚོགས་ཡུམ་གྱུར་དྲི་མ་སེར་མོ་སྤོས་བཅས་སྣོད་དང་ལྷའི། །མེ་ཏོག་འཛིན་མཛད་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༣༠ གང་ཞིག་དཔལ་མཆོག་དམ་པ་དང་པོའི་སངས་རྒྱས་བཅོམ་ལྡན་འདས། །རྒྱུད་རྒྱལ་དུས་ཀྱི་འཁོར་ལོ་འཛིན་མཛད་ཤིང་རྟ་ཆེར་གྱུར་པ། །མཁའ་ཁྱབ་འགྲོ་ལ་ལྷན་ཅིག་སྐྱེས་དགའ་ཡེ་ཤེས་མཆོག་གི་དཔལ། །སྩོལ་མཛད་ཆོས་རྒྱལ་དེ་ལྟའི་ཡབ་ཡུམ་རྣམས་ལ་ཕྱག་འཚལ་འདུད། ། ༣༡ སངས་རྒྱས་གཉིས་དང་གཉིས་སུ་མེད་པར་དམ་པ་དང་པོ་ཡིས། །རྒྱུད་རྒྱལ་སྟོང་ཕྲག་བཅུ་གཉིས་སྟོང་ཕྲག་གཅིག་ཏུ་བསྡུས་མཛད་པའི། །སྟོན་པར་ཡོངས་བསྔགས་རྒྱལ་བ་གཉིས་པ་འཇམ་དཔལ་གཞོན་ནུ་ནི། །མ་ལུས་རྡོ་རྗེའི་རིགས་གཅིག་བསྡུས་མཛད་ཆོས་རྒྱལ་རིགས་ལྡན་ཆེ། ། ༣༢ འཇམ་དཔལ་གྲགས་པ་ཁ་དོག་ཉི་མ་སྟོང་གི་འོད་ཀྱང་ཟིལ་ནོན་པའི། །དམར་སེར་མདངས་འབར་མཛེས་སྡུག་ལྷུན་ཆགས་དཔྲལ་བར་མཛོད་སྤུ་ཅན། །མཐོང་མཐིང་རལ་པ་ཟུར་ཕུད་ལྔ་འཕྱངས་ཡིད་བཞིན་བསམ་འཕེལ་གྱི། །པྲོག་ཞུ་མཛེས་བཅིངས་སྙན་གོང་ཨུཏྤལ་སྔོན་པོའི་གདན་ཀ་འཕྱར། ། ༣༣ ལྷ་གོས་ལྷབ་ལྷུབ་ནོར་བུ་མེ་ཏོག་ཡིད་འོང་ཕྲེང་བ་ནི། །རབ་བཟང་སྤེལ་ལེགས་སྐུ་ལ་བརྒྱན་ཅིང་ཞབས་གཉིས་སྐྱིལ་མོ་ཀྲུང་། །རྒྱུད་རྒྱལ་གླེགས་བམ་གཡོན་བསྣམས་གཡས་པ་ཆོས་འཆད་སྐུའི་གཡས་གཡོན། །ཨུཏྤལ་པདྨ་སྔོ་དཀར་རལ་གྲི་དང་ནི་གླེགས་བམ་བརྒྱན། ། ༣༤ སྐུ་ཡི་གཡོན་ན་དགྱེས་ཡུམ་འཕགས་མ་སྒྲོལ་མ་ལྗང་སྔོན་མཛེས། །མཚར་སྡུག་ལྷ་གོས་རིན་ཆེན་བརྒྱན་སྤྲས་ཨུཏྤལ་དཀར་པོ་འཆང་། །ཡབ་ཡུམ་གཉིས་ཀ་རིན་པོ་ཆེ་ཡི་གདན་གཅིག་ལ་གནས་ཤིང་། །སྟེང་ན་ནོར་བུའི་གདུགས་རྒྱས་འོག་ནས་སེང་གེ་དུ་མས་སྟེགས། ། ༣༥ གཡོན་ཕྱོགས་བློན་པོ་བྱང་སེམས་བློ་གྲོས་རྒྱ་མཚོ་ཨག་ཚོམ་གྱིས། །བྲང་ཡོད་གནོན་པ་དར་ཐོད་ཕོད་ཁ་གསོལ་བ་ཐལ་སྦྱར་འགྲེངས། །མདུན་དུ་དྲང་སྲོང་ཉི་མའི་ཤིང་རྟ་ལ་སོགས་སྐལ་ལྡན་མི། །ལྷ་ཀླུང་དུ་མས་ཡོངས་བཏུད་རྒྱལ་བ་དེ་ལ་ཕྱག་འཚལ་འདུད། ། ༣༦ གསུང་གི་རྡོ་རྗེ་འཇིག་རྟེན་མགོན་པོ་པདྨ་འབྱུང་གནས་ནི། །རྡོ་རྗེའི་རིགས་ལྡན་པདྨ་དཀར་ཞེས་བདེ་འབྱུང་རྒྱལ་པོའི་ཚུལ། །རབ་དཀར་ཟླ་བ་འབུམ་གྱིས་གཟི་བརྗིད་འཕྲོགས་ཤིང་མཚན་དཔེས་སྤྲས། །ལྟ་ན་སྡུག་པའི་རིན་ཆེན་ཁྲི་ལ་བྱམས་པའི་བཞུགས་སྟངས་ཀྱི། ། ༣༧ ཞབས་ཀྱི་མཐིལ་གཉིས་ཆུ་སྐྱེས་དཀར་དམར་ཟུང་གི་ཟེའུ་འབྲུ་གནོན། །ཕྱག་གི་པདྨོ་ཙིནྟ་མ་ཎིའི་ཕྲེང་དང་པད་དཀར་བརྒྱན། །རི་དྭགས་པགས་པས་ནུ་མ་གཡོན་བཀབ་གསེར་གྱི་ཚང་སྐུད་ཅན། །བུང་བ་ལྟར་ནག་རལ་པའི་ཐོར་ཅོག་ངོས་ལ་འོད་དཔག་མེད། ། ༣༨ ཉེར་རྒྱན་རབ་ཏུ་དཀར་བའི་འོད་ལ་ཁ་དོག་ལྔ་ཡི་ཟེར། །བྱེ་བ་འབུམ་འཕྲོ་སྙིང་རྗེའི་སྤྱན་རས་ཟུམ་མེད་འགྲོ་ལ་གཟིགས། །དགྱེས་ཡུམ་དཀར་ཤམ་ཆེན་མོ་པུས་བཙུག་ཙོག་བུ་རིན་ཆེན་བརྒྱན། །ཐལ་སྦྱར་གཙོར་བཏུད་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༣༩ གཤིན་རྗེ་མཐར་བྱེད་རིགས་ལྡན་བཟང་པོ་ཨིནྡྲ་ནཱི་ལིའི་མདོག །ཁྲོས་པའི་ཉམས་ལྡན་དབུ་སྐྲ་དམར་སེར་ཚོམ་བུ་གཡས་སུ་འཁྱིལ། །སྟག་ཤམ་སྦྲུལ་ཆུན་རིན་ཆེན་རུས་པའི་བརྒྱན་གྱིས་རབ་མཛེས་ཤིང་། །མ་ཧེ་དྲེག་པས་བཏེག་པའི་རིན་ཆེན་ཁྲི་ལ་རོལ་བཏབས་བཞུགས། ། ༤༠ རྡོ་རྗེའི་ཏོག་ལྡན་རྩ་བར་ནོར་བུས་སྤྲས་པས་དབྱུག་པ་ནི། །ཕྱག་གཡས་མཚན་ཞིང་དབང་གི་ལྕགས་སྒྲོག་འབར་བ་གཡོན་ན་བསྣམས། །དགྱེས་ཡུམ་རྡོ་རྗེ་རོ་ལངས་ནག་མོ་ཁྲོ་འཛུམ་ཐོད་ཁྲག་གཡས། །བླ་གོས་གཡོན་ཐོག་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༤༡ ས་སྙིང་རིགས་ལྡན་རྣམ་རྒྱལ་སྔོ་ལྗང་ཀར་ཀེ་ཏ་ཡི་མདོག །རྡོ་རྗེ་དང་ནི་ནོར་བུའི་འཕྲེང་བས་ཡོངས་སུ་བརྒྱན་བྱས་ཤིང་། །སྨད་གཡོག་སེར་པོ་རིན་ཆེན་ཁྲི་ལ་རོལ་བའི་སྟབས་བཞུགས་མདུན། །ལྷ་ཡི་ན་ཆུང་རྔ་བརྡུང་པི་ཝང་རྒྱུད་མངས་ཐོགས་པས་མཆོད། ། ༤༢ པདྨ་དཀར་པོ་ནོར་བུས་བརྒྱན་པ་གཡས་ཀྱི་ཕྱག་ན་སྟེ། །འབྲས་བུ་རྒྱས་པའི་ལྗོན་ཤིང་ཡལ་ག་གཡོན་གྱི་ཕྱག་ན་བཅིངས། །དགྱེས་ཡུམ་གཟུགས་ཀྱི་རྡོ་རྗེ་དཀར་མོ་གར་སྟབས་ཕྱག་པད་བསྐོར། །སྟེང་འོག་ལ་བསྒྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༤༣ ཤེས་རབ་མཐར་བྱེད་རིགས་ལྡན་བཤེས་གཉེན་བཟང་པོ་དུང་ལྟར་དཀར། །གཅེར་བུ་སྟག་ཤམ་སྔོ་ལྗང་གསེར་གྱི་སྦྲུལ་གྱིས་སྐུ་ལ་བརྒྱན། །དམར་སེར་རལ་མཛེས་ཁྲོས་པའི་ཉམས་ཅན་ཕྱག་གཉིས་ནོར་བུའི་ཏོག །རྡོ་རྗེའི་མས་བརྟེན་དབྱུག་པ་དང་ནི་རྡོ་རྗེའི་ཞགས་པ་བསྣམས། ། ༤༤ ལྷ་ཡི་ཁྱེའུ་རིན་ཆེན་རྒྱན་སྤྲས་ལྷ་མིན་སྐྱེས་བུ་ནི། །གོ་མཚོན་ཐོགས་པས་ཡོངས་བཏེགས་རིན་ཆེན་ཁྲི་ལ་རོལ་བའི་སྟབས། །དགྱེས་ཡུམ་གཞན་གྱི་མི་ཐུབ་སེར་མོ་གཡས་པ་ཐལ་མོས་བཏུད། །གཡོན་ན་ཞགས་ཐོགས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༤༥ ཕྱག་ན་རྡོ་རྗེའི་རིགས་ལྡན་ཕྱག་དམར་བཻཌཱུར་སྔོན་པོའི་མདངས། །རིན་ཆེན་པྲོག་ཞུ་རྡོ་རྗེ་ཕྲེང་བ་དུ་མས་སྐུ་ལ་བརྒྱན། །འཇའ་ཡི་སྨད་གཡོག་རྡོ་རྗེའི་སྐྱིལ་ཀྲུང་ཕྱག་གཡས་དགྲ་སྟ་དང་། །གཡོན་ན་ཚངས་མགོ་སེར་པོ་གདོང་བཞི་མེ་ཏོག་ཐོད་ཅན་བསྣམས། ། ༤༦ སེངྒེ་ཡན་ལག་དྲུག་པ་གླང་ཆེན་གཟུགས་བྱས་དངུལ་མདོག་ལུས། །ལི་ཁྲི་བྲང་ལྡན་རལ་པ་དམར་སེར་གཡོ་བའི་ཁྲི་ལ་བཞུགས། །དགྱེས་ཡུམ་རྡོ་རྗེ་གནྡྷཾ་རི་སྔོ་མཛེས་པའི་ཉམས་འགྱུར་བཅས། །རྡོ་རྗེར་དྲིལ་འཛིན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༤༧ པདྨ་མཐར་བྱེད་རིགས་ལྡན་ཁྱབ་འཇུག་སྦས་པ་ཆེས་དམར་བ། །ཨུ་དུམ་ཝ་རའི་མདངས་འབར་ཁྲོ་ཉམས་དབུ་སྐྲ་ཝང་མིག་སེར། །རིན་ཆེན་སྦྲུལ་གྱི་སྐུ་ལུས་བརྒྱན་ཅིང་སྟག་ལྤགས་ཤམ་ཐབས་བྱས། །ཕྱག་གཉིས་པད་དཀར་འདབ་བརྒྱ་པ་དང་རིན་ཆེན་ཞགས་པ་བསྣམས། ། ༤༨ ཀླུ་རྒྱལ་རྣམས་ཀྱིས་བཏེགས་པ་རིན་ཆེན་པད་དཀར་ཉི་མའི་ཁྲིད། །བྱམས་པ་བཞུགས་སྟངས་ཞབས་མཐིལ་ཉེར་དགའ་དགའ་བོས་གུས་པས་བརྟེན། །དགྱེས་ཡུམ་རྡོ་རྗེ་རལ་གཅིག་ནག་མོ་སྦྲུལ་བརྒྱན་སྤྲིན་སྟག་གོས། །གྲི་ཐོད་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༤༩ ནམ་མཁའི་སྙིང་པོ་རིགས་ལྡན་ཉི་མ་གྲགས་པ་ནམ་མཁའི་མདོག །རིན་ཆེན་པདྨའི་ཁྲི་ལ་འཇའ་ཡི་སྨད་དཀྲིས་སེམས་སྐྱིལ་བཞུགས། །མེ་ཏོག་སྔོན་པོའི་བརྒྱན་སྤུད་རི་དྭགས་ལྤགས་གསོལ་ཐོར་ཚུགས་ཅན། །ཐུགས་ཀར་ཆོས་འཆད་ཕྱག་རྒྱས་པད་དཀར་རལ་གྲི་མཚན་པ་གཡས། ། ༥༠ ཨུཏྤལ་སྔོན་པོ་ཆོས་འབྱུང་ཕྱི་དཀར་ནང་དམར་སྤྲས་གཡོན་བསྣམས། །སྟེང་གི་མཁའ་ནས་རིན་ཆེན་མེ་ཏོག་འཐུག་པོ་ཆར་དུ་འཕྲོ། །དགྱེས་ཡུམ་རྡོ་རྗེ་དྲི་མ་སེར་ལ་དྲི་ཞིམ་ཆུ་བཟང་གི །དུང་ཞལ་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༥༡ བགེགས་རྣམས་མཐར་བྱེད་རིགས་ལྡན་ཤིན་ཏུ་བཟང་པོ་མཐིང་ནག་མཚེར། །ཨམ་གཙིགས་གླང་སྟག་ལྤགས་གོས་རིན་ཆེན་དར་བརྒྱན་སྦྲུལ་ཆུན་སྤྲས། །སྐྲ་མཚམས་ཐོད་སྐམ་དབུ་སྐྲ་དམར་སེར་ཐོར་ཚུགས་རྡོ་རྗེའི་ཏོག །ཕྱག་གཉིས་རྡོ་རྗེའི་འཆར་འབེབས་རྡོ་རྗེ་དང་ནི་སྦྲུལ་ཞགས་བསྣམས། ། ༥༢ ཙོག་པུ་ཕྱེད་སྐྱིལ་རིན་ཆེན་ཁྲི་བཟང་གླང་གདོང་དཀར་པོ་དང་། །ཕག་གདོང་དམར་པོ་སྲིན་པོ་སྨུག་པས་བཏེག་པར་བརྗིད་ཚུལ་བཞུགས། །དགྱེས་ཡུམ་རེང་བྱེད་སེར་མོ་འཁོར་ལོ་ནོར་བུ་སྤྲད་པའི་ཕྱག །ཁྲོ་འཛུམ་ཉམས་འབར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༥༣ འཇིག་རྟེན་དབང་ཕྱུག་རིག་ལྡན་རྒྱ་མཚོ་རྣམ་རྒྱལ་གུར་གུམ་མདོག །རིན་ཆེན་ཁྲི་ལ་རོལ་པའི་སྟབས་བཞུགས་དར་གྱི་སྨད་དཀྲིས་ཅན། །ཡིད་བཞིན་ནོར་བུ་བསམ་འཕེལ་ལས་བྱས་དབུ་རྒྱན་འཕྲེང་བ་མཛེས། །དོ་ཤལ་འཕྱང་འཕྲུལ་དུ་མས་རབ་སྡུག་ལྷ་ཡི་མེ་ཏོག་སྤེལ། ། ༥༤ ནོར་བུ་ཏོག་གི་བློ་གྲོས་ཀྱིས་སྤྲས་པདྨ་དམར་པོ་གཡས། །ཟླ་ལྟར་རབ་དཀར་རྙོགས་པ་བྲལ་བའི་པདྨ་འདབ་བརྒྱ་གཡོན། །དགྱེས་ཡུམ་རོ་ཡི་རྡོ་རྗེ་སྔོན་མོ་དུང་ཤལ་ཤིང་ཐོགས་བསྣམས། །རིན་ཆེན་དར་རྒྱན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༥༥ མི་གཡོ་མགོན་པོ་རིག་ལྡན་རྒྱལ་དཀའ་ཤིན་ཏུ་དཀར་བའི་སྐུ། །ཙོག་པུ་པུས་བཙུགས་སྟག་ལྤགས་ཤམ་ཐབས་རིན་ཆེན་སྦྲུལ་ཆུན་བརྒྱན། །སྐྲ་སེར་གྱེན་བརྫེས་སྤྱན་གཉིས་འབྲུ་ཚུག་ཡ་སོས་མས་མཆུ་གནོན། །གཟའ་ཡིས་མདའ་འདྲ་མེ་འབར་རལ་གྲི་གཡས་ཀྱི་ཕྱག་ན་སྟེ། ། ༥༦ རྒྱ་མཚོ་འཇིང་གི་སྦྲུལ་འདྲ་ཞགས་པ་ཐུགས་ཀར་སྡིག་མཛུབ་གཡོན། །སེང་གེ་ལྔས་དྲངས་ཤིང་རྟ་ལ་བཞུགས་འོད་ཟེར་མེ་དཔུང་འཕྲོ། །དགྱེས་ཡུམ་ཁྲོ་གཉེར་སྤྱན་སེར་དབུ་སྐྲ་དོ་ཀེར་མཁའ་འགྲོའི་ཚུལ། །གྲི་ཐོད་ཕྱག་འཆང་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༥༧ འཇམ་དཔལ་དབྱངས་ནི་རིགས་ལྡན་ཉི་མ་སྔོ་ལ་དྭངས་པའི་ལུས། །བུང་བ་ལྟར་གནག་ཐོར་ཅོག་ལྔ་བཅིངས་སྙན་གོང་ཨུཏྤལ་རྒྱས། །ཨུཏ་པ་ལ་དང་རིན་ཆེན་ནོར་བུ་ལས་བྱས་བརྒྱན་བརྒྱད་སྤྲས། །འཇའ་ཡི་སྨད་དཀྲིས་རྡོ་རྗེ་སྐྱིལ་ཀྲུང་ཀླུ་དང་འདོད་ལྷ་གནན། ། ༥༨ གཡོན་ན་གཞུ་བཅས་པདྨ་དཀར་པོ་པུ་སྟིས་མཚན་བསྣམས་གཡས། །མདའ་དང་པདྨར་རལ་གྲི་ཅན་འཆང་རིན་ཆེན་ཁྲི་ལ་བརྗིད། །དགྱེས་ཡུམ་ཤེར་ཕྱིན་སྔོན་མོ་རིན་ཆེན་རྒྱན་བརྒྱན་མཛེས་སྡུག་མཆོག །གྲི་གུག་ཐོད་འཛིན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༥༩ འདོད་པའི་རྒྱལ་པོ་རིགས་ལྡན་སྣ་ཚོགས་གཟུགས་ནི་ལི་ཁྲིའི་མདོག །གཅེར་བུ་སྦྲུལ་རིགས་བརྒྱད་དང་རིན་ཆེན་པདྨ་དམར་པོ་ཡི། །ཉེར་བརྒྱན་སྟག་ལྤགས་འདོམ་དཀྲིས་དབུ་སྐྲ་རལ་པའི་ཐོར་ཚུགས་ཅན། །ཁམས་གསུམ་དབང་བསྡུད་ལྕགས་ཀྱུ་གཡས་འཛིན་སྲིད་གསུམ་ཟིལ་གནོན་པའི། ། ༦༠ པདྨ་དམར་པོའི་འཕྲེང་བ་གཡོན་འཆང་ཙོག་པུའི་ཕྱེད་སྐྱིལ་གྱིས། །རྟ་མཆོག་དཀར་པོ་བདུན་གྱིས་དྲངས་པའི་ཤིང་རྟའི་དབུས་ན་གནས། །དགྱེས་ཡུམ་ཙུནྡྷཾ་གླེགས་བམ་ལྷུང་བཟེད་བསྣམས་དཀར་ལྷ་གོས་མཆོག །ལྷབ་ལྷུབ་ཀྱིས་མཛེས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༦༡ སྒྲིབ་པ་རྣམ་སེལ་རིགས་ལྡན་ཟླ་འོད་པད་རྩ་ལྟར་དཀར་བ། །ལྷ་མིན་ཀླུ་ཡི་དབང་པོ་དང་ནི་སེང་གེ་དམར་པོས་བཏེགས་པ་ཡིས། །རིན་ཆེན་ཁྲི་ལ་ཕྱེད་སྐྱིལ་གྱིས་བཞུགས་དར་དང་རིན་ཆེན་བརྒྱན། །ཕྱག་གཡས་ཐུགས་དཀར་བདུད་རྩི་ཁེང་བའི་བུམ་བཟང་འཛིན་ཅིང་གཡོན། ། ༦༢ ས་གནོན་མཛད་པའི་མཐེབ་མཛུབ་བར་ན་རྩ་བ་གནས་པ་ཡིས། །པདྨ་དཀར་པོ་ར་རིབ་མེད་པའི་ཟླ་བ་རྒྱས་སྤྲས་འཛིན། །དགྱེས་ཡུམ་རེག་བྱ་རྡོ་རྗེ་དཀར་མོ་ཡིད་འོང་བརྒྱན་འཆང་མཛེས། །ལྷ་གོས་འཛིན་སྟོབས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༦༣ དབྱུག་པ་སྔོན་པོ་རིགས་ལྡན་མཐའ་ཡས་པ་ལ་ཤ་ལྟར་སྔོ། །ཐོད་སྐམ་དབུ་བརྒྱན་ཕྲེང་བ་དོ་ཤལ་སྦྲུལ་རིགས་བརྒྱད་ཀྱིས་བརྒྱན། །མི་ལྤགས་སྟོད་གཡོག་སེང་ལྤགས་སྨད་གཡོག་སྐྲ་སེར་ཐོར་ཚུགས་ཅན། །གཡས་ན་དབྱུག་པ་རྩ་རྩེ་ནོར་བུའི་མཚན་པ་འཕྱར། ། ༦༤ གཡོན་པ་སྡིག་མཛུབ་ཁྲོས་པའི་རོལ་སྟངས་པད་དཀར་ཉི་མ་བརྫིས། །ཕག་པ་ནག་པོ་བདུན་གྱིས་དྲངས་པའི་ཤིང་རྟ་ལ་གནས་ཤིང་། །དགྱེས་ཡུམ་འོད་ཟེར་ཅན་མ་དམར་སེར་ཕྱག་གཉིས་མཆོག་སྦྱིན་དང་། །ཨ་ཤྭ་ཏ་འཛིན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༦༥ ཀུན་ཏུ་བཟང་པོ་རིགས་ལྡན་ས་སྐྱོང་འཆར་ཁའི་འོད་ལྟར་དམར། །སྐུ་སྟོད་གཅེར་བུ་རིན་ཆེན་དྲ་བས་ཡོངས་གཡོགས་སྐུ་སྨད་དུ། །ལྷ་གོས་ལྷབ་ལྷུབ་རིན་ཆེན་ནོར་བུའི་བརྒྱན་གྱིས་རབ་ཏུ་སྤུད། །ཕྱག་གཡས་གཏེར་གྱི་བུམ་པ་ཐུགས་ཀར་འཛིན་ཅིང་གཡོན་ངལ་གསོ། ། ༦༦ གདན་ལ་བརྟེན་པའི་ཕྱག་གིས་པདྨ་དཀར་པོ་ཉིན་བྱེད་ལ། །བྱ་ཡི་རི་མོ་བཀྲ་བ་འཛིན་ཅིང་མཚོ་དབུས་པདྨར་བཞུགས། །དགྱེས་ཡུམ་མེ་ཏོག་དཀར་མོ་རིན་ཆེན་དང་སྤེལ་མེ་ཏོག་བརྒྱན། །མེ་ཏོག་གཞོང་ཐོགས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༦༧ ཁྲོ་བོ་སྟོབས་ཆེན་རིགས་ལྡན་དཔལ་སྐྱོངས་ཚོན་ཤེལ་སྔོ་སྐྱའི་མདོག །ཐོད་པ་སྐམ་པོས་དབུ་ལུས་ཡོངས་བརྒྱན་དར་དང་རིན་ཆེན་སྦྲུལ། །དུ་མས་མཛེས་ཚུལ་ཁྲོས་བྱས་ཁྲོས་ཚུལ་ཨམ་གཙིགས་པུས་བཙུག་ཕྱེད་སྐྱིལ་གྱིས། །བདུད་ཀྱི་ལུས་གནོན་ཕྱག་གཡས་ཁ་ཊྭཱཾ་དཀར་པོ་ངོམ་ཚུལ་འཛིན། ། ༦༨ གཡོན་ན་མ་རུང་འཆིང་བྱེད་ཞགས་པ་དང་བཅས་ཐོད་པ་བསྣམས། །གླང་ཆེན་མཆེ་དྲུག་བདུན་གྱིས་དྲངས་པའི་ཤིང་རྟའི་དབུས་སུ་བཞུགས། །དགྱེས་ཡུམ་ལུག་རྒྱུད་ལྗང་ཁུ་རིན་ཆེན་རུས་རྒྱན་ལྕགས་སྒྲོགས་སྐྱབས་སྦྱིན་ཅན། །ཁྲོ་བོའི་འཚུབ་འཆང་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༦༩ མགོན་པོ་བྱམས་པ་རིགས་ལྡན་སེང་གེ་དམར་སེར་སྦྲང་རྩིའི་མདོག །རལ་པའི་ཐོར་ཚུགས་མཆོད་རྟེན་གྱིས་བརྒྱན་ཞབས་གཉིས་སྐྱིལ་ཀྲུང་བཞུགས། །ཆོས་འཆད་ཕྱག་རྒྱས་མེ་ཏོག་སྔོ་དམར་དབྱུག་གུ་རྩེ་གསུམ་ཅན། །པད་དཀར་སྤྱི་བླུག་མཚན་པ་དཔུང་པ་གཡས་གཡོན་ཐད་དུ་འཛིན། ། ༧༠ རི་དྭགས་ལྤགས་པས་སྟོད་གཡོག་ལྷ་ཡི་རྒྱལ་པོའི་ཚུལ་དུ་ནི། །རིན་ཆེན་ཁང་བཟང་མེ་ཏོག་འཛིན་པའི་ལྷ་བཞིས་བཏེགས་དབུར་བཞུགས། །དགྱེས་ཡུམ་ཟླ་མཆོག་ཟླ་བ་ལྟར་དཀར་རྨ་བྱའི་བསིལ་ཡབ་ཅན། །མེ་ཏོག་འཛིན་པ་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༧༡ གཙུག་ཏོར་འཁོར་བསྒྱུར་རིགས་ལྡན་རྣམས་གནོན་དཀར་སེར་བཻ་ཌཱུར་མདོག །རིན་ཆེན་རུས་པ་སྦྲུལ་གྱིས་རྒྱན་སྤྲས་སྟག་ལྤགས་ཤམ་ཐབས་ཅན། །མཁའ་ལྡིང་དབང་པོ་ཁ་དོག་ལྔ་པ་མདུན་གྱིས་ནམ་མཁའ་ལ། །ཉེ་བར་དྲངས་པའི་ཤིང་རྟ་ལ་བཞུགས་ཕྱག་གཡས་རྩེ་གསུམ་རྩེར། ། ༧༢ འཁོར་ལོས་མཚན་པས་བསྣམས་ཤིང་གཡོན་ན་ཁ་ཊྭཱཾ་ག་དཀར་པོ། །འཛིན་མཛད་དམར་སེར་རལ་པ་ཐོར་ཚུགས་ཞབས་གཉིས་རོལ་པའི་སྟབས། །དགྱེས་ཡུམ་ཤིན་ཏུ་སྔོན་མོ་སྟག་ཤམ་སྦྲུལ་དང་རྡོ་རྗེས་བརྒྱན། །རྡོར་དྲིལ་འཛིན་གྱུར་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༧༣ ས་ཡི་སྙིང་པོ་རིགས་ལྡན་སྟོབས་ཆེན་ཁ་བ་ལྟར་དཀར་འཚེར། །རིན་ཆེན་དུ་མས་ཉེ་བར་བརྒྱན་བཅིང་དར་སེར་སྟོད་གཡོག་ཅན། །མེ་ཏོག་སྔོན་པོའི་ཕྲེང་བས་ཐོད་བཅས་ཞི་བའི་སྤྱན་རྩ་དམར། །བྲག་རིའི་གདན་ལ་གཡས་བརྐྱང་ཞབས་ཀྱི་རིན་ཆེན་བུམ་པ་བརྗིད། ། ༧༤ ཕྱག་གཡོན་ལྗོན་ཤིང་ཡལ་བ་འཆང་ལ་འཁོར་ལོར་ནོར་བུའི་མཚན། །གཡས་ན་ཤིང་ལོ་འབྲས་བུ་དུད་པའི་ཆུན་པོ་རྒྱས་པ་འཛིན། །དགྱེས་ཡུམ་ས་ལྷ་སེར་མོ་མདུན་ན་རིན་ཆེན་གཏེར་ཆེན་ཡོངས་རྒྱས་ཤིང་། །ཕྱག་ན་བུམ་ཐོགས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༧༥ ཕྱག་ན་རྡོ་རྗེ་རིགས་ལྡན་མ་འགགས་དཀར་པོ་ཤེལ་ལྟར་དྭངས། །སྔོ་དང་ལྗང་ཁུའི་གོས་སུ་གསོལ་བྱས་ནོར་བུའི་རྒྱན་རྫོགས་ཤིང་། །རྡོ་རྗེའི་ཕྲེང་བ་དུ་མས་ཡོངས་ནི་ལུས་ཀུན་མཛེས་པར་བྱས། །རྡོ་རྗེ་འབར་བ་གཡས་ཀྱིས་མཐེབ་སྲིན་དག་ནི་ཐུགས་ཀར་འཛིན། ། ༧༦ ཕྱག་གཡོན་དྲིལ་བུ་དཀུར་བརྟེན་རོལ་པའི་སྟངས་སྟབས་དག་གིས་ནི། །གནོད་སྦྱིན་དུ་མས་བཏེགས་པའི་རིན་པོར་ཆེ་ཡི་ཁྲི་ལ་བཞུགས། །དགྱེས་ཡུམ་ནོར་རྒྱུན་སྔོ་ལྗང་ཕྱག་དག་བུམ་བཟང་རིན་ཆེན་ཆར། །ཐུགས་ཀར་སྐྱབས་སྦྱིན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༧༧ ཁྲོ་བོ་གནོད་མཛེས་རི་ལྡན་མི་ཡི་སེང་གེ་ཁ་དོག་སྔོ། །མཛེས་པའི་རི་བོ་མཚོ་གླིང་དབུས་རྟེན་ཤིང་ལྟར་ཁང་བཟང་ནི། །གངས་སེང་བཞི་དང་སེང་གེ་གཤོག་ལྡན་གསུམ་གྱིས་འདྲེན་པ་ལ། །ཕྱེད་སྐྱིལ་གྱིས་བཞུགས་རྡོ་རྗེའི་ཁྲབ་གསོལ་སྦྲུལ་དང་རྡོ་རྗེས་བརྒྱན། ། ༧༨ དབུ་སྐྲ་ནག་པོ་ཐོར་ཚུགས་རྡོ་རྗེའི་ཏོག་བྱས་ཕྱག་གཡས་ཀྱིས། །རྡོ་རྗེའི་གྲི་ཁུག་སྐུ་ཡི་སྐྱེད་རྟེན་གཡོན་ན་ཐོད་པ་འཆང་། །དགྱེས་ཡུམ་ཤིན་ཏུ་སྔོན་མོ་སྦྲུལ་བརྒྱན་ལྤགས་གོས་གསོལ་ཕྱག །དགྲ་སྟ་སྡིག་མཛུབ་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༧༩ ནམ་མཁའ་སྙིང་པོ་རིག་ལྡན་དབང་ཕྱུག་ཆེན་པོ་ནམ་མཁའི་ལུས། །རྟ་བདུན་གྱིས་དྲངས་ཉི་མའི་རྒྱབ་ཡོལ་པད་སྔོན་ཟླ་བའི་གདན། །ཕྱག་གཡས་སྤྲིན་དཀར་གཟུང་ཞིང་དེར་གནས་རྙོག་བྲལ་ཟླ་བ་ལ། །རི་ཕོང་སྤོས་ཕོར་ལྗོན་ཤིང་གྱིས་མཚན་གཡོན་ནི་ངལ་གསོ་ཡིས། ། ༨༠ གདན་ལ་ཉེར་བརྟེན་པདྨ་སྔོན་པོ་ཡིད་བཞིན་ནོར་བུས་བརྒྱན། །ལྷ་གོས་སྔོ་དང་མེ་ཏོག་སྔོན་པོས་རྒྱན་ཞལ་སྔོན་འཕྲོ། །དགྱེས་ཡུམ་ཟླ་བ་ལ་ནི་སེར་མོ་དྲི་བཟང་སྣོད་བཅས་འཛིན། །ངུར་པ་ལ་ཞོན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༨༡ སྤྱན་རས་གཟིགས་དབང་རིགས་ལྡན་མཐའ་ཡས་རྣམ་རྒྱལ་སྐྱ་རེངས་མདོག །རྒྱ་ནག་བླ་གོས་སྟོད་གཡོག་རི་དྭགས་ལྤགས་པས་སྨད་གཡོག་བྱས། །རིན་པོ་ཆེ་དང་པདྨ་ཟླ་བར་རྡོ་རྗེ་སྐྱིལ་ཀྲུང་བཞུགས། །རལ་པ་སྣག་སྣུམ་ཐོར་ཚུགས་བཅིང་བྱས་ངོས་ལ་ངོས་དཔག་མེད། ། ༨༢ གཡས་ཀྱིས་ཕྱག་ན་རྡོ་རྗེ་ལྕགས་ཀྱུ་གཡོན་ན་རིན་ཆེན་ཞགས། །ཟླ་བ་ལྟར་དཀར་འོད་ཟེར་རབ་ཏུ་འཚེར་བས་རྒྱབ་ཡོལ་བྱས། །དགྱེས་ཡུམ་རོ་ཡི་རྡོ་རྗེ་དཀར་མོ་ཤེལ་གྱི་ལྷུང་བཟེད་ནི། །བདུད་རྩིས་བཀང་སྟོབས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༨༣ བཅོམ་ལྡན་འཇམ་དཔལ་དྲག་པོ་རིགས་ལྡན་ལྷ་ཡི་དབང་པོ་ཞེས། །འཁོར་ལོ་ཆེ་གྱུར་སེངྒེ་བརྒྱད་ཀྱིས་བཏེགས་པའི་རིན་ཆེན་ཁྲིར། །མཉམ་པའི་སྐྱིལ་ཀྲུང་གིས་བཞུགས་ཁ་དོག་དམར་སེར་ཉི་མའི་འོད། །རིན་ཆེན་བརྒྱན་བརྒྱད་དར་གྱིས་ཆས་ལྔས་ཉེར་སྤུད་ཕྱག་གཉིས་ཀྱིས། ། ༨༤ ཆོས་འཆད་ཕྱག་རྒྱས་ཡོངས་གཟུང་གཡས་སུ་པདྨ་དམར་པོ་ལ། །གསེར་གྱི་འཁོར་ལོས་ཉེར་བརྒྱན་གཡོན་ན་ཨུཏ་པ་ལ་སྔོན་པོར། །རལ་གྲི་གླེགས་བམ་མཚན་པ་འཛིན་ཞིང་སྟེང་ན་རིན་ཆེན་གདུགས། །ལྷ་ཡི་བུ་དང་བུ་མོ་མང་པོས་མེ་ཏོག་ཆར་སོགས་དུ་མས་མཆོད། ། ༨༥ དགྱེས་ཡུམ་གཡས་སུ་དབྱངས་ཅན་ལྗང་ཁུ་ཙོག་པུ་ཕྱག་གཉིས་ཀྱིས། །ལྷ་ཡི་རྒྱུད་མངས་བསྐུལ་ཅིང་རིན་ཆེན་བྱེ་བས་ཡོངས་སུ་བརྒྱན། །གཡོན་ན་སྐྲ་ཅན་དཀར་མོ་ཐལ་སྦྱར་པད་དཀར་པོད་རལ་གྱིས། །སྤྲས་པ་ལེགས་འཛིན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༨༦ འཇམ་དཔལ་དཔའ་བོ་རིགས་ལྡན་འཁོར་ལོ་ཆེན་པོ་ཐུགས་རྗེའི་སྟོབས། །ཁྲོས་ནས་ཀླ་ཀློའི་དཔུང་ཚོགས་མ་ལུས་གཅོད་མཛད་དྲག་པོའི་ཚུལ། །རྡོ་ལས་གྲུབ་པའི་རྟ་མཆོག་སྔོན་པོ་རླུང་གི་གཤོག་ལྡན་སྟེང་། །རྟ་མཆོག་ཏིང་འཛིན་ལ་གནས་འདར་མེད་རྡོ་རྗེའི་སྐྱིལ་མོ་ཀྲུང་། ། ༨༧ མི་བཤིག་རྡོ་རྗེ་ཕ་ལམ་ལས་གྲུབ་ལ་ཡད་སྐུར་གསོལ་ཞིང་། །ཀླུ་ཡི་དབང་པོ་བཅུ་ཡིས་ཉེར་བརྒྱན་གཟི་བརྗིད་ཆེར་འབར་བ། །ཉི་མ་སྟོང་གི་འོད་འཕྲོས་དམར་སེར་རབ་ཏུ་འཚེར་བའི་མདོག །འཁོར་ལོ་དང་ནི་མདུང་ཐུང་ཕྱག་ན་བྱས་ཏེ་བདུད་ཚོགས་འཇོམས། ། ༨༨ དྲག་པོ་གདོང་དྲུག་ཚོགས་ཀྱི་དབང་པོ་འཕྲོག་བྱེད་ཀྱིས་བསྐོར་ནས། །དགའ་འཕྲོག་ལྷ་མིན་ཀླ་ཀློའི་རིགས་རྣམས་མ་ལུས་འཇོམས་བྱེད་ནས། །འཛམ་གླིང་ས་ཆེན་ཀུན་ཏུ་དགེ་བ་རྫོགས་ལྡན་དང་པོའི་དུས། །གསར་དུ་འགོད་མཛད་དྲག་པོ་ལྷ་མིའི་བླ་མར་ཕྱག་འཚལ་འདུད། ། ༨༩ འཁོར་ལོ་ཅན་སྲས་ས་ཡི་དཀྱིལ་འཁོར་ཕྱེད་ཕྱེད་སྐྱོང་བ་བཟུངས། །འཇམ་དཔལ་དབྱངས་ནི་རིགས་ལྡན་ཚངས་པ་རུ་ཛ་ན་ཡ་ནི། །མེ་ཏོག་ལྟར་དམར་རྡོ་རྗེ་དྲིལ་བུ་རྣམ་རོལ་ཕྱག་རྒྱས་འཛིན། །མཛེས་བྱེད་རྨ་བྱས་བཏེགས་པའི་རིན་ཆེན་ཁྲི་ལ་རོལ་སྟངས་བཞུགས། ། ༩༠ ཁ་དོག་སྣ་ཚོགས་ཨུཏྤལ་རིན་ཆེན་རྒྱན་ལྡན་འཇའ་རྣམས་ཅན། །རལ་པ་ཟུང་ཕུད་ལྔ་བྱས་སྟེང་ན་རྨ་བྱའི་སྒྲོ་གདུགས་མཛེས། །དགྱེས་ཡུམ་རྡོ་རྗེ་ཆོས་ལ་ལྗང་ཁུ་སྤྱི་བོར་ཐལ་མོ་སྦྱོར། །རྨ་བྱ་ལ་ཞོན་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༩༡ སྤྱན་རས་གཟིགས་དབང་རིགས་ལྡན་ལྷ་ཡི་དབང་པོ་སྐུ་ཡི་མདོག །ཏཱི་ལ་ཀ་ཡི་མེ་ཏོག་ལྟ་བུར་ཤིན་ཏུ་དཀར་ཞིང་མཛེས། །ནུ་གཡོག་རི་དྭགས་ལྤགས་བཀབ་གསེར་གྱི་ཚང་སྐུད་ཐོར་ཆོག་ཅན། །ཕྱག་གཡས་མཆོག་སྦྱིན་གཡོན་པ་གདན་བརྟེན་པད་དཀར་རབ་རྒྱས་འཆང་། ། ༩༢ དར་གྱི་སྨད་དཀྲིས་ཞབས་གཉིས་སྐྱིལ་ཀྲུང་མཛེས་པའི་ཁྲི་བཅས་པའི། །རྩ་ཡི་སྤྱིལ་བོ་ཚང་དང་བརྒྱ་བྱིན་དག་གིས་བཏེགས་དབུས་བཞུགས། །དགྱེས་ཡུམ་འོད་ལྡན་མར་མེ་ལྷ་ཡི་ན་ཆུང་འཆོར་སྒེག་ཚུལ། །ནོར་བུ་འཛིན་པ་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༩༣ དུམ་བུའི་ས་སྐྱོང་བརྒྱད་ཀྱི་དང་པོ་རྡོ་རྗེ་སྙིང་པོ་ནི། །རིགས་ལྡན་འོད་བསྲུང་སྔོ་སྐྱ་ཀེ་ཀེ་རུ་ཡི་མདོག་ལྟར་མཚར། །རིན་ཆེན་ཁྲི་ལ་ཕྱེད་སྐྱིལ་ཀྱིས་བཞུགས་གཡོན་བརྐྱང་ཞབས་དག་ནི། །བྲག་རིའི་སྟེང་དུ་ཤིང་གི་ལོ་མར་ཉེར་བརྟེན་ལྷ་གོས་མཆོག ། ༩༤ གར་གྱི་ཕུ་དུང་དང་བཅས་རིན་ཆེན་དུ་མའི་རྒྱན་ལྡན་པ། །ཕྱག་གཉིས་རྡོ་རྗེ་གླེགས་བམ་བསྣམས་ཤིང་རལ་པའི་ཐོར་ཚུགས་ཅན། །དགྱེས་ཡུམ་ཕྲེང་མ་ལྗང་ནག་མདོག་འཚེར་རོལ་པའི་གར་དང་བཅས། །རིན་ཆེན་ཕྲེང་བསྣམས་དེ་ལྟའི་ཡབ་ཡུམ་ཟུང་ལ་ཕྱག་འཚལ་འདུད། ། ༩༥ དེ་ལྟར་བདེ་བ་འཛིན་པའི་ཡུལ་དབུས་གངས་ཅན་རི་སྟེགས་སུ། །རིན་ཆེན་ཆ་ཀུན་ཉེར་བསགས་མཛེས་པས་ཡོངས་ནི་ཆ་བསགས་ཞེས། །རྒྱལ་པོའི་ཁབ་དེར་མི་འཇིགས་སེངྒེ་གདན་ལ་འགྲོ་བའི་མགོན། །འཕགས་པ་ཆེན་པོ་ཆོས་རྒྱལ་རྡོ་རྗེའི་རིགས་ལྡན་རྣམ་སྤྲུལ་ནས། ། ༩༦ མ་ལུས་འགྲོ་བ་མཐའ་དག་འདྲེན་པའི་བླ་མར་གྱུར་པ་གང་། །དེ་རྣམས་ཡབ་ཡུམ་སྲས་བློན་འབངས་གྱུར་བྱང་ཆུབ་སེམས་དཔའ་དང་། །བྱེ་བའི་ཡུལ་དེར་དབང་བསྒྱུར་ལྷ་ཀླུའི་རྗེ་བོ་མི་བདག་ཚུལ། །རིགས་ལྡན་དཀར་གནས་དགུ་བཅུ་རྩ་དགུའི་ཚོགས་ལའང་ཕྱག་འཚལ་འདུད། ། ༩༧ འཛམ་གླིང་ཆུང་ངུའི་སི་ཏའི་ལྷོ་ཕྱོགས་ཡུལ་ན་རིགས་ལྡན་གྱིས། །རྣམ་པར་འཕྲུལ་པ་སྐུ་ཡི་བཀོད་པ་ཡོངས་སུ་ཤར་གྱུར་པ། །ཤིན་ཏུ་སྦྱོར་བ་དམ་པ་དང་པོའི་སངས་རྒྱས་སྟོན་མཛད་མགོན། །རྩ་བ་དང་ནི་རྒྱུད་པར་བཅས་པའི་བླ་མའི་ཚོགས་རྣམས་ལ། ། ༩༨ རབ་ཏུ་གུས་པ་ཆེན་པོའི་ཡིད་ལྡན་ལུས་ངག་མཐུན་སྦྱོར་ནས། །ཤིན་ཏུ་དྭངས་བ་མཆོག་གིས་ཕྱག་འཚལ་ཀུན་ཏུ་ཕྱག་འཚལ་འདུད། །བདག་གི་གཟུང་དང་མ་གཟུང་ཡོ་བྱད་འཇིག་རྟེན་ཁམས་ཀུན་གྱིས། །དལ་འབྱོར་མ་ལུས་བདག་བློ་དག་པས་ཁྱེད་རྣམས་ལ་ནི་འབུལ། ། ༩༩ སྲིད་འགྲོ་ཉམས་དར་བྱིས་པའི་བློ་ཡིས་ཤིན་ཏུ་མི་ཟད་སྡིག །སྟོབས་བཅུ་མངའ་བའི་སྤྱན་སྔར་དེ་ཀུན་སོ་སོར་བཤགས་པར་གྱིས། །སངས་རྒྱས་བྱང་སམས་རྣམས་དང་འཕགས་པའི་ཚོགས་ཀྱི་རྣམ་མང་དགེ །མཛད་གྱུར་མཐའ་དག་ལ་ནི་སྡིག་བྲལ་བྱང་ཆུབ་རྗེས་ཡི་རང་། ། ༡༠༠ བྱང་ཆུབ་སྤྱད་པ་སྤྱོད་བྱས་མཐར་ནི་རྫོགས་སངས་རྒྱས་བརྙེས་ཀྱང་། །ཆོས་གསུང་མི་བཞེད་སྙོམས་པར་བཞུགས་ལ་བདག་གིས་ཆོས་འཁོར་སྐོར། །བསྐོར་བར་བསྐུལ་ཞིང་མྱ་ངན་མི་འདའ་བཞུགས་པར་གསོལ་བ་འདེབས། །མཐའ་ཡས་འགྲོ་བའི་དོན་དུ་རྫོགས་སངས་རྒྱས་སུ་བདག་གྱུར་ཅིག ། ༡༠༡ དེ་ལྟར་རྒྱལ་བ་མཆོག་དང་སྲས་གྱུར་ས་བཅུའི་དབང་ཕྱུག་ཆེ། །ཆོས་རྒྱལ་རིགས་ལྡན་བླ་མ་དམ་པ་རྣམས་ཀྱི་ཞབས་བདག་གི །ཆུ་སྐྱེས་ཡིད་ལ་འདྲེན་པའི་མཐུ་ཡི་འཁོར་བའི་དུཿཁ་ཀུན། །བཅོམ་བྱེད་ཞི་བའི་རྣལ་དུ་འཇུག་མིན་ཐར་པ་མཆོག་གི་གྲོང་། ། ༡༠༢ བདེ་བར་གཤེགས་པའི་ཁབ་ཏུ་ཉེ་བར་ཡོངས་སུ་འཇུག་བྱས་ནས། །མཐའ་ཡས་འགྲོ་བའི་ཚོགས་རྣམས་མ་ལུས་རང་གི་གོ་འཕང་ཇི་བཞིན་པ། །འོད་ཀྱི་ཕ་རོལ་ཕྱིན་པའི་རྒྱལ་བ་མཆོག་གི་ཡོན་ཏན་ཀུན། །རྫོགས་པའི་འབྲས་བུ་ཉིད་ལ་བདག་གཞན་འགྲོ་ཡིས་མྱུར་ཐོབ་ཤོག ། ༡༠༣ དེ་ལྟར་རྒྱལ་བ་མཆོག་གི་གོ་འཕང་བགྲོད་པར་བྱེད་པའི་ལམ། །རྨད་བྱུང་ཟབ་གསལ་ཟུང་འཇུག་རྡོ་རྗེའི་རྣལ་འབྱོར་ཤིན་ཏུ་ཡི། །ཐེག་པ་དཔལ་མཆོག་སངས་རྒྱས་ཀུན་གྱིས་ཟ་མ་ཏོག་གང་ཨེ་ཝམ། །དུས་འཁོར་མན་ངག་བླ་མའི་ཞལ་ལུང་ཡིད་ཆེས་གསུམ་ཐོབ་ལམ། ། ༡༠༤ བྱང་ཆུབ་སྙིང་པོ་མ་ཐོབ་བར་དུ་དེ་འཐུང་ངོམ་མེད་སྤྱོད། །བྱེད་ཅིང་གཡོ་མེད་ནུས་པས་ཁུ་རྡུལ་མུན་པའི་སྒྲིབ་ཀུན་བཅོམ། །མི་ཤིག་དྭངས་མ་གསུམ་ལྡན་རྡོ་རྗེའི་རང་བཞིན་མཁའ་ཁྱབ་ཀྱི། །གསང་གསུམ་ཚེ་འདི་ཉིད་ལ་ཐོབ་ནས་འགྲོ་ཀུན་འདྲེན་པར་ཤོག ། ༡༠༥ གལ་ཏེ་བདག་གི་སྐལ་བ་དམན་པས་མཆོག་གི་དངོས་གྲུབ་གང་། །ཚེ་འདིར་ཐོབ་པར་མ་གྱུར་ནའང་འཆི་བའི་དུས་གྱུར་འཆི་ཁ་དམར། །སྣང་གསུམ་སྒྲིབ་ཀུན་ཡོངས་བཅོམ་ཤིན་ཏུ་ཕྲ་བའི་འོད་གསལ་བ། །མངོན་བྱེད་བཞི་ལམ་འོད་གསལ་རོ་གཅིག་འབྲས་བུ་སངས་རྒྱས་ཐོབ། ། ༡༠༦ ཅིས་ཀྱང་སྐྱེ་བའི་སྲིད་པར་སྣང་ཚེ་རྒྱལ་བའི་བདེན་པའི་མཐུ། །སྔགས་ཀྱིས་ནུས་པས་ཐ་མལ་སྐྱེ་འོས་མངལ་དུ་མི་འཇུག་པར། །འདོད་གཟུགས་གཙོ་བོ་མཁའ་སྤྱོད་རིག་འཛིན་གྲོང་དུ་སྔགས་ལམ་ལ། །སྤྱོད་པའི་སྐལ་ལྡན་ལུས་དེས་བྱང་ཆེན་བགྲོད་བྱེད་སྐྱེ་འཛིན་ཤོག ། ༡༠༧ གལ་ཏེ་མི་རུ་སྣང་བར་གྱུར་ན་འཛམ་གླིང་ཆུང་ངུའི་བྱང་། །མི་བདག་ས་བཅུ་པས་བྱས་ཤམྦྷ་ལ་ཡི་ཡུལ་གྱི་དབུས། །ཀཻ་ལ་ཤ་སྟེང་ལྷ་ཡི་གྲོང་བཞིན་ཕུན་ཚོགས་མི་ཡི་ལྗོངས། །རྡོ་རྗེའི་རིགས་ལྡན་གྱིས་སྐྱོང་གནས་དེར་ཁམས་དྲུག་ལྡན་པའི་ལུས། ། ༡༠༨ དལ་འབྱོར་རྒྱན་ཐོབ་སྐྱེ་མ་ཐག་ཏུ་སྨྲ་ཤེས་འགྲོ་ཤེས་ཤིང་། །སྔོན་གྱིས་སྨོན་ལམ་དྲན་བཞིན་རིགས་ལྡན་ཞབས་ཀྱི་པདྨོར་བསྙེན། །སེམས་དཔའ་ཆེ་དེས་བརྩེ་བས་ཡོངས་སུ་རྗེས་གཟུང་སྨིན་གྲོལ་ཐོབ། །ལུས་དེས་དང་པོའི་སངས་རྒྱས་གོ་འཕང་བར་མེད་ཉིད་བགྲོད་ཤོག ། ༡༠༩ ཡང་གཅིག་ཆུ་བོ་སི་ཏའི་ལྷོར་གྱུར་འཕགས་པའི་ཡུལ་གྱི་ཆར། །སྐྱེས་པར་གྱུར་ཀྱང་མཐའ་ཁོབ་དང་ནི་གྲུབ་མཐའ་ངན་པ་ཡི། །རྗེས་སུ་འབྲང་མིན་དམ་པའི་ཆོས་སྟོན་རྣམ་དག་ཤེས་ཀྱིས་ཟིན། །བྱང་ཆུབ་སེམས་བསྐྱེད་སྔགས་ཀྱི་དབང་བསྐུར་བསྐྱེད་རྫོགས་དྲོད་ཚད་ཐོབ། ། ༡༡༠ བླ་མ་ལྷ་ཡི་གནང་བའི་མཚན་མ་ཐོབ་ནས་ཤམྦྷ་ལར། །འཇུག་པའི་བློ་ལ་ནམ་ཡང་ཞུམ་མེད་མཐའ་ཡས་འགྲོ་བ་ཡི། །སྒྲིབ་པ་སྦྱངས་སླད་ཀེ་ལ་ཤར་ཕྱིན་ས་བཅུའི་དབང་ཕྱུག་གི །རྗེས་གཟུང་མཆོག་གྲུབ་འགྲོ་ཀུན་འདྲེན་པའི་དཔའ་བོར་བདག་གྱུར་ཤོག ། ༡༡༡ མདོར་ན་ཡང་དག་རྫོགས་སངས་རྒྱས་ཀྱི་གོ་འཕང་མཆོག །མ་ཐོབ་བར་དུ་ངེས་དོན་ལྟ་བ་རྣམས་རིགས་དང་། །ཟུང་འཇུག་ལམ་མཆོག་ཨ་ཏི་ཟབ་གསལ་རྡོ་རྗེ་སྤྱོད། །འགྲོ་ཀུན་ལྟ་སྒོམ་དེ་ལ་གཞུག་བྱེད་བདག་གྱུར་ཤོག །ཚེ་རབས་རྟག་ཏུ་ས་བཅུའི་འཕགས་པ་མཇལ། །དབང་ཕྱུག་ཡོན་ཏན་བརྒྱད་ལྡན་མྱུར་དུ་ཐོབ། །མ་ནོར་ལམ་ལ་འགྲོ་ཀུན་འདྲེན་བྱེད་ནས། །ཚོམ་བུ་གཅིག་ཏུ་སངས་རྒྱས་གྲུབ་པར་ཤོག །དེ་ལྟར་འཛམ་གླིང་པ་ཡི་དུམ་བུ་ལྷོ་ཕྱོགས་འཛམ་གླིང་ཆུང་ངུའི་བྱང་གྱུར་ཤམྦྷ་ལ་ཡི་དབུས་གྱུར་ཀཻ་ལ་ཤར་མི་ཡི་བདག་པོ་སེང་གེ་བདེན་ཅན་ས་བཅུའི་དབང་ཕྱུག་རྣམས་ཀྱི་སྤྲུལ་བཞི་བོད་དུ་བྱོན་པའི་ཤིང་རྟ་དམ་པར་གྱུར་པ་དག་གི་བཞེད་པ་ཅུང་ཟད་མི་འདྲ་བ་ལ་བརྟེན་སྐུ་ཡི་བཀོད་ཚུལ་ཡང་མང་དུ་ཡོད་མོད། དེ་ལས་འདིར་ནི་ཆོས་རྒྱལ་རིག་ལྡན་སུམ་ཅུ་རྩ་གཉིས་སམ་སུམ་ཅུ་རྩ་དྲུག་གི་སྤྲུལ་བཞི་ནི། འཇིག་རྟེན་དབང་ཕྱུག་དོལ་པོ་པ་ཀུན་མཁྱེན་ཤེས་རབ་རྒྱལ་མཚན་དཔལ་བཟང་པོས་གསུང་ལྟར་ལ། སྐུ་ཡི་བཀོད་པ་དེ་ཡི་རྗེས་འབྲང་འབྲི་འབུར་མང་དུ་བཞུགས་པ་ལས་མཆོག་ཏུ་རྗེ་བཙུན་དམ་པ་སྒྲོལ་བའི་མགོན་པོ་ནས་ཇོ་ནང་དམ་ཆོས་གླིང་གི་མཐིལ་ཁང་རྡོ་རྗེའི་རྣལ་འབྱོར་བསྒྲུབ་པའི་གཟིམ་སྤྱིལ་ལོག་བྲིས་སུ་རང་བཞེད་ཁྱད་པར་བ་འཁོད་པ་མཛད་པ་དེ་ཤིན་ཏུ་ལེགས་ཤིང་བཀོད་པ་རྒྱས་པར་མཐོང་བས་འདིར་ཡང་དེ་དོན་བཞིན་བརྗོད་པར་བྱེད་པ་ཡིན་ནོ། །དེ་ཡང་ས་བཅུའི་དབང་ཕྱུག་ཆོས་རྒྱལ་རིགས་ལྡན་འདི་དག་གི་མཚན་ལན་གཅིག་ཐོས་པས་ཀྱང་འཁོར་བའི་རྒྱ་མཚོ་ལས་བསྒྲལ། དེ་ཕྱིར་མི་ལྡོག་པ་བྱང་ཆུབ་མཆོག་གི་ལམ་ལ་ངེས་པར་བཀོད་པའི་ཕན་ཡོན་ཆེན་པོ་ཡིད་དྲངས་ནས་མངོན་རྟོགས་དང་བཅས་པའི་ཕྱག་འཚལ་ནི་སྔོན་ཆད་གཞན་གྱི་མཛད་པ་ཞིག་མ་མཐོང་བས་རང་ཉིད་ཀྱི་བྲི་འདུན་རིང་ནས་བྱུང་ཡང་ལེ་ལོར་གྱུར་པ་ལས། སླར་ས་བཅུ་པ་འདི་རྣམས་ཀྱི་སྐུ་ཡི་སྣང་བ་བློ་ལ་བཀོད་པར་འདོད་པ་དག་འབྱུང་སྲིད་ཚེ་འཕགས་པའི་སྐྱེས་བུ་མཆོག་གི་བཀོད་པ་བྱིན་རླབས་ཆེ་ཞིང་ཁུངས་དང་ལྡན་པ་འདི་ལྟས་ཤིན་ཏུ་ཕན་པར་མཐོང་བས་བསྐུལ་ནས་ལྷག་པའི་བསམ་པས་ཇོ་སྣང་ཡབ་སྲས་ཀྱི་བཞེད་པ་ཇི་བཞིན་པར་རྒྱལ་དང་ས་བཅུའི་དབང་ཕྱུག་རྣམས་ལ་ཕྱག་འཚལ་བའི་རིམ་པ་གངས་ཅན་ཟླ་བའི་ཆུ་གཏེར་ཞེས་བྱ་བ་ཚིགས་སུ་བཅད་པ་དབང་པོ་བདེ་འབྱུང་གི་གྲངས་དང་ལྡན་པ་ནི། དོན་གྲུབ་ཞེས་ས་མོ་ལུག་གི་ལོ་ས་ག་ཟླ་བའི་དགའ་བ་གཉིས་པ་ཀུན་མཁྱེན་དོལ་པོ་པའི་དུས་ཆེན་སྐབས་སུ་དབུ་བརྩམས་ནས་ཐུན་བར་དུ་ཚིགས་བཅད་རེ་ཟུང་བྲིས་པའི་འཕྲོ་རྒྱལ་བ་མངོན་པར་བྱང་ཆུབ་པའི་དུས་ཆེན་ཚེས་བཅོ་ལྔ་ལ་གྲུབ་པར་རྡོ་རྗེའི་རིག་འཛིན་ཚེ་དབང་ནོར་བུ་ཁྲོ་འདུལ་རྡོ་རྗེ་སེམས་དཔའ་འམ་མིང་གཞན་དུ་འཇིག་རྟེན་དབང་ཕྱུག་ཐུགས་རྗེས་ཆུ་རྒྱུན་ཆད་པ་མེད་པའི་དཔལ་ཞེས་པས་ཀོང་ཡུལ་ཉང་ཁ་ཅུམ་རིའི་གཡས་འདབས་བསམ་གཏན་ནགས་ཁྲོད་དུ་བཀོད་པར་བྱེད་པའོ། །འདིར་སྨྲས་པ། སངས་རྒྱས་ས་བཅུའི་དབང་ཕྱུག་ཚུལ་བསྟན་ནས། །དེ་ཡང་རྡོ་རྗེ་རིག་ལྡན་མི་བདག་ཚུལ། །འདི་ལྟའི་མཚན་ཙམ་གྱིས་ཀྱང་འཁོར་བ་ཡི། །སྡུག་བསྔལ་མཐའ་དག་དྲུང་ནས་འབྱིན་བྱེད་ན། །གང་སྐུ་ཡིད་ལ་བྱས་ནས་གུས་པ་ཡི། །བརྟེན་ན་བྱང་ཆེན་དངོས་ལ་ཅི་མི་སྦྱོར། །དེ་ན་དོན་ཆེན་མཆོག་ལ་རིགས་འདོད་ཀུན། །ཚུལ་འདི་རབ་ཏུ་འབད་པས་སྒྲུབ་འོས་ཡིན། །དེས་ན་བདག་གི་འདི་བགྱིས་དགེ་བ་ཡང་། །མི་བདག་ས་བཅུའི་མགོན་པོས་འཕྲིན་ལས་སྒྱུར། །བསྔོ་མཐུས་མཐའ་ཡས་འགྲོ་ཀུན་རིགས་ལྡན་མ། །ཆེར་གུས་ཞལ་མཇལ་དངོས་གྲུབ་མཆོག་ཐོབ་ཤོག །ཞེས་པའང་དཔལ་ཚེ་དབང་ནོར་བུས་ངེས་པར་བརྗོད་པའོ། །མངྒ་ལཾ། དགེའོ། །དགེའོ། །དགེའོ། །


no previousབརྒྱུད་འདེབས་དང་གསོལ་འདེབས་ཞབས་བརྟན་གྱི་སྐོར།next