༈ འབའ་ར་བ་ངག་དབང་ཡེ་ཤེས་ཀྱི་ཞབས་བརྟན་གསོལ་འདེབས།
ཨོཾ། རྒྱལ་བ་རྒྱལ་སྲས་རབ་འབྱམས་རྒྱ་མཚོ་ཡི། །བདེན་པས་བདག་གི་གསོལ་འདེབས་འགྲུབ་གྱུར་ཅིག །དྲི་མེད་ཟླ་ཤར་ཐུགས་རྗེའི་རྒྱ་མཚོ་ལས། །སྨོན་ལམ་རྒྱ་མཚོ་ཡོངས་བསྐྲུན་གཞན་ཕན་གྱིས། །འོད་དཀར་གདུལ་བྱའི་དཔལ་དུ་ལྷམ་མེ་བ། །པད་འབྱུང་རྡོ་རྗེ་གསུང་གི་ལུང་བསྟན་ཅིང་། །རྗེ་བཙུན་བླ་མའི་ཐུགས་ལས་སྐྱེས་པའི་སྲས། །དཔལ་ལྡན་བླ་མ་ངག་དབང་ཡེ་ཤེས་ཏེ། །གང་ཁྱོད་གདུལ་བྱའི་དཔལ་དུ་བསྐལ་པ་བརྒྱར། །མི་ཤིག་རྡོ་རྗེ་རྟག་བརྟན་གཡུང་དྲུང་ཁྲིར། །ཚེ་དཔག་མེད་ལྟར་སྐུ་ཚེ་འཚོ་བཞེས་ཤིང་། །སྨིན་གྲོལ་ཆོས་ཀྱི་སྙན་གྲགས་རྒྱུན་མི་ཆད། །མཛད་འཕྲིན་ཡར་ངོའི་ཟླ་ལྟར་ཡོངས་སུ་སྣང་། །ཀུན་ཏུ་དགའ་བའི་དཔལ་གྱི་ནོར་འཛིན་ཁྱབ། །ཟུང་འཇུག་གོ་འཕང་བསྒྲུབ་པའི་བསྒྲུབ་རྒྱུད་རྒྱུས། །རྟག་བརྟན་དགེ་ལེགས་རབ་ཏུ་འཕེལ་གྱུར་ཅིག །
ཅེས་སྐྱེས་མཆོག་ཆེན་པོ་འབའ་ར་བ་གང་གི་མི་འཇིགས་སེང་གེའི་ཁྲིར་ཆོས་སྨྲ་བའི་རྡོ་རྗེ་འཛིན་པ་ཨོ་རྒྱན་ངག་དབང་ཡེ་ཤེས་དཔལ་བཟང་པོར་ཆེད་དུ་བསྔགས་པའི་ཞབས་བརྟན་དུ་རིག་འཛིན་པ་ཚེ་དབང་ནོར་བུས་ཁྱབ་བདག་བླ་མའི་གདན་ས་དཀར་ཅོག་ཏུ་བརྗོད་པ་དགེའོ། །སརྦ་མངྒ་ལཾ།