༈ སི་ཏུའི་ཞབས་བརྟན་བསྡུས་པ།
ཨོཾ་སྭཱསྟི། འགྱུར་མེད་བདེ་བ་ཆེན་པོ་ཆོས་ཀྱི་སྐུ། །སྣ་ཚོགས་ཅིར་ཡང་འཆར་བ་གཟུགས་ཀྱི་གར། །ཟུང་འཇུག་རྡོ་རྗེའི་རང་བཞིན་བླ་མའི་སྐུ། །ཡུན་ནས་ཡུན་བཞིན་འཆི་མེད་ཞབས་བརྟན་གསོལ། །གདོད་ནས་རྣམ་དག་རྒྱལ་བའི་ངོ་བོ་ལ། །འགྲོ་བའི་དོན་དུ་རྒྱལ་བའི་སྲས་ཀྱི་གཟུགས། །མི་བརྗོད་གཟུངས་ཐོབ་ས་ནས་སེམས་དཔའ་ཆེ། །ལྡན་མ་རྩེ་མོ་ཡང་དག་རྡོ་རྗེའི་ཐུགས། །དུས་འདིར་འགྲོ་བའི་འདྲེན་པ་མཚུངས་མེད་མགོན། །བསྟན་པའི་ཉི་མ་ཆོས་ཀྱི་འབྱུང་གནས་གང་། །འཆི་མེད་འཚོ་བཞེས་རྡོ་རྗེའི་རི་བོ་བཞིན། །བསྐལ་པ་རྒྱ་མཚོའི་བར་དུ་ཞབས་བརྟན་ཤོག །གང་གི་འཕྲིན་ལས་དགེ་བའི་སྒོ་འཕར་བརྒྱ། །ཀུན་ཏུ་དབྱེ་བས་ཕུན་ཚོགས་འདོད་དགུའི་སྐྱིད། །མཐའ་ཡས་འགྲོ་བའི་ཉེར་འཚོར་ཡོངས་འཕེལ་ཞིང་། །ཀུན་ཀྱང་སྙིང་པོའི་བསྟན་ལ་སྤྱོད་པར་ཤོག །
ཅེས་སི་ཏུ་ཐམས་ཅད་མཁྱེན་པ་ཆོས་ཀྱི་འབྱུང་གནས་གང་གི་ཞབས་པད་ཡུན་རིང་དུ་འཚོ་ཞིང་བཞེད་པའི་སླད་དུ་རིག་པ་འཛིན་པ་ཚེ་དབང་ནོར་བུས་ས་འབྲུག་རྒྱལ་ཟླའི་ཚེས་བཅོ་ལྔར་འཆི་མེད་གྲུབ་པའི་སློབ་དཔོན་མང་པོས་བསྙེན་པའི་གནས་ཇོ་མ་ཁ་རག་གི་འདབས་ནས་ཕུལ་བ་སརྦ་མངྒ་ལཾ།