དཔལ་རིག་འཛིན་ཆེན་པོའི་བཀའ་འབུམ་ལས་གྲུབ་དབང་པདྨ་ནོར་བུའི་འཁྲུངས་རབས་དང་རྩ་བའི་བླ་མར་གསོལ་བ་འདེབས་པའི་རིམ་པ་ཇི་སྙེད་པ།

མཁས་ཤིང་གྲུབ་པའི་རྣལ་འབྱོར་པདྨ་ནོར་བུའི་སྐྱེ་བའི་ཕྲེང་བར་གསོལ་འདེབས་སུ་སྦྱར་བ།

༄༅། །དཔལ་རིག་འཛིན་ཆེན་པོའི་བཀའ་འབུམ་ལས་གྲུབ་དབང་པདྨ་ནོར་བུའི་འཁྲུངས་རབས་དང་རྩ་བའི་བླ་མར་གསོལ་བ་འདེབས་པའི་རིམ་པ་ཇི་སྙེད་པ་བཞུགས་སོ། །

༈ ཨོཾ་ཨཱ༔ཧཱུྃ༔ རང་བཞིན་སྤྲོས་མཚན་དང་བྲལ་ཆོས་ཀྱི་ལྷུམས། །རང་མདངས་འདུ་འཕྲོ་གཉིས་མེད་ཨེ་ཝཾ་དཔྱིད། །རང་ཤར་རོལ་བར་གཟུགས་ཀྱི་ཐིག་འཆར་བརྒྱུད། །རང་ངོར་སྣང་འདོད་རྒྱལ་བར་གསོལ་བ་འདེབས། །ངེས་སྣང་དག་པའི་ཞིང་ན་ལོངས་སྤྱོད་རྫོགས། །རིགས་བརྒྱ་གཅིག་བསྡུས་དཔལ་ལྡན་དང་པོའི་རྒྱལ། །སྒྱུ་འཕྲུལ་རྡོ་རྗེ་སེམས་དཔའ་ལྷ་ཡི་ལྷ། །རྒྱལ་གྱུར་གཙོ་བོ་མཆོག་དེར་གསོལ་བ་འདེབས། །ཡང་དག་བདེ་གཤེགས་ས་ནས་ལྷག་སེམས་ཆེར། །གདུལ་བྱའི་དོན་སྐུར་བཞེངས་པ་ཉེ་སྲས་ལས། །བྱང་ཆུབ་སེམས་དཔའ་རྒྱལ་སྲས་བྱམས་པ་མགོན། །ས་བཅུའི་དབང་ཕྱུག་དེ་ལ༴ མེ་རིགས་འབར་བར་རྟ་མཆོག་ཧེ་རུ་ཀ །ཐུགས་ཀྱི་ཡེ་ཤེས་ལས་སྐྱེས་གསང་བ་ཡི། །བསྡུད་པ་དཔའ་བོ་ཐུགས་ཀྱི་རྡོ་རྗེ་ཞེས། །རྡོ་རྗེ་ཆོས་མཆོག་དེ་ལ༴ མི་མཇེད་འཛམ་བུར་ཤཱཀྱའི་ཏོག་གི་དྲུང་། །འཕགས་པའི་ཉན་ཐོས་མཆོག་གྱུར་བརྒྱད་ལས་ནི། །འདུལ་བ་འཛིན་མཆོག་འདུལ་བའི་རྒྱུད་པ་ཆེ། །དགྲ་བཅོམ་ཉེ་བ་འཁོར་ལ༴ རྒྱ་གར་འཕགས་པའི་ཡུལ་དུ་རྒྱན་དྲག་ལས། །མཆོག་རྟེན་རྣམ་དག་དྲི་མ་མེད་པ་ནས། །འདུལ་བའི་ལུང་སྟོན་མཁན་པོ་ཡོན་ཏན་འོད། །བསླབ་པའི་བརྒྱན་གྱུར་དེ་ལ༴ བདེ་བྱེད་རྩེག་ནས་གསང་སྔགས་སྒྲུབ་པའི་རྒྱལ། །ལུང་བརྒྱུད་སྒྲོམ་བུ་མཁའ་འགྲོའི་རྒྱ་དཀྲོལ་ཚེ། །ཡང་དག་ཐུགས་ཀྱི་དཀྱིལ་འཁོར་བཀའ་བབས་པ། །རིག་འཛིན་ཧཱུཾ་ཀ་ར་ལ༴ སྔགས་ཀྱི་སྟོན་པ་རྒྱལ་དབང་པདྨའི་དྲུང་། །མེ་ཏོག་ཤར་བབས་ཐུགས་ཀྱི་སྒྲུབ་པ་ཐོབ། །རྫུ་འཕྲུལ་མཁའ་ལྡིང་བྲག་ལ་འཕུར་པ་བསྣུན། །གྲུབ་ཆེན་ནམ་མཁའི་སྙིང་པོར༴ བྲག་རྒྱ་བོ་རུ་དཔལ་ཆེན་ཉིད་དུ་གྲུབ། །ཚངས་པའི་དབྱངས་ལྡན་གསད་པ་བོས་བར་མཛད། །རྫུ་འཕྲུལ་ཐོགས་མེད་ལྟ་སྒོམ་རྩེ་མོར་ཕྱིན། །ཟུར་ཆུང་ཤེས་རབ་གྲགས་ལ༴ གྲུབ་ཐོབ་ཁྱུང་པོའི་ཐུགས་གསང་སྙན་བརྒྱུད་མཛོད། །ཡོངས་འཇོས་ཁམས་ཟད་འོད་གསལ་སྙིང་པོའི་སྦུབས། །རྣལ་མཁས་ཤངས་པ་རིན་ཆེན་བརྩོན་འགྲུས་ཞེས། །རྨོག་ཅོག་གྲུབ་ཐོབ་དེ་ལ༴ སྤྱན་རས་གཟིགས་སྤྲུལ་གུ་རུ་ཆོས་དབང་གི །རྗེས་བཟུང་བྱམས་པ་འབུམ་གྱི་ཐུགས་ཀྱི་སྲས། །ཐུགས་རྗེས་ཆེན་པོའི་གྲུབ་ཐོབ་དངོས་གྲུབ་བརྙེས། །མ་ཎི་རིན་ཆེན་ཞབས་ལ༴ གཙང་ཕྱོགས་ལ་སྟོད་དམ་པའི་ཞི་བྱེད་ཆོས། །ལེགས་འཆང་མདོ་སྔགས་ཆོས་ཚུལ་ཡོངས་རབ་འབྱམས། །འཁྲུལ་ཞིག་དཔལ་ཆེན་ཤེས་རབ་འོད་པོ་ཞེས། །བསྟན་པའི་ཉི་མ་དེ་ལ༴ རབ་འབྱམས་ཞྭ་དམར་ཞབས་ཀྱི་ཐུགས་རྗེ་ཡི། །རྟ་ལྗང་གིས་བསྐུལ་དོན་གཉིས་པདྨོའི་ཚལ། །རབ་བཞད་སྐལ་ལྡན་བུང་བ་ཚིམ་བྱེད་པ། །རི་ཁྲོད་ཆེན་པོའི་ཞབས་ལ༴ འཁོན་གྱི་གདུང་ལས་སྡེ་སྣོད་གཉིས་ཀྱི་བདག །དགྱེས་པ་རྡོ་རྗེ་དཀྱིལ་འཁོར་མངོན་སུམ་གྲུབ། །ཡོན་ཏན་མཐར་ཕྱིན་ས་སྐྱ་བཟང་པོ་དཔལ། །མཁས་མཆོག་དམ་པ་དེ་ལ༴ མཁྱེན་པའི་རྩལ་རྒྱས་སྒྲུབ་པའི་དངོས་གྲུབ་ཐོབ། །བསྟན་པ་སྙིང་པོའི་སྒྲོན་མ་སྦར་མཛད་པ། །ཉམས་རྟོགས་མཁའ་འདྲ་སངས་རྒྱས་དཔལ་བ་ཞེས། །རྣལ་འབྱོར་དམ་པ་དེ་ལ༴ དཔལ་ཐང་སྲིན་མོའི་མཚོ་ནས་ཨོ་རྒྱན་གྱི། །ཐུགས་གཏེར་འཁོར་འདས་རང་གྲོལ་སྤྱན་དྲངས་ཏེ། །སྐལ་ལྡན་དོན་མཛད་རྩོད་མེད་གཏེར་སྟོན་པ། །བྱང་ཆུབ་གླིང་པའི་ཞབས་ལ༴ ཡེ་ཤེས་མཁའ་འགྲོའི་དགོངས་འདུས་ཡང་གཅེས་ཆོས། །ཟབ་རྒྱ་གསང་ཐིག་གཏེར་ནས་བཏོན་མཛད་ནས། །ཉམས་ལེན་ལྷག་མེད་རིག་འཛིན་སར་གཤེས་པ། །གྲྭ་པ་བཛྲ་གྲགས་པ༴ བྲག་དཀར་རྡོ་རྗེའི་ཚལ་ནས་དྲག་སྔགས་ཆོས། །ཡང་ཟབ་སྙིང་གི་མེ་ལོང་ལ་སོགས་པ། །གཏེར་ནས་བཏོན་མཛད་ཟླ་བན་གཟི་བརྗིད་འབར། །མཐུ་སྟོབས་དབང་ཕྱུག་དེ་ལ༴ ལྷོ་བྲག་མཁོ་མཐོང་གནས་སུ་གྲུབ་ཆེན་པོ། །པདྨ་དབང་གི་དངོས་གྲུབ་གཉིས་བརྙེས་ཤིང་། །རྫུ་འཕྲུལ་དབང་འབྱོར་རྣལ་འབྱོར་ཙ་རི་པ། །གྲགས་པའི་དབང་ཕྱུག་དེ་ལ༴ མདོ་ཁམས་ཀཿཐོག་རྡོ་རྗེ་གདན་ཆེན་པོར། །སྒྱུ་འཕྲུལ་བཀའ་བབ་སེམས་སྡེ་ཀློང་དུ་གྱུར། །བཤད་སྒྲུབ་བསྟན་པ་སྤེལ་མཛད་ཚུལ་ཁྲིམས་འབུམ། །བསྟན་པའི་སྒྲོན་མེ་དེ་ལ༴ མཉམ་མེད་ས་སྐྱའི་གནས་གྲུབ་ཐོབ་ཆེ། །རླུང་སེམས་དབུར་འདུས་ལམ་འབྲས་མཐའ་རུ་ཕྱིན། །ཡེ་ཤེས་ཟང་ཐལ་ཐོགས་མེད་བརྟུལ་ཞུགས་སྤྱོད། །བདག་སྨྱོན་ཀུན་དགའ་ལེགས་པར༴ ཨོ་རྒྱན་ཆེན་པོའི་ཐུགས་བསྒྲུབ་བརྒྱ་རྩ་ཡི། །ཡང་སྙིང་སྦས་ཆོས་མཁའ་འགྲོའི་གསང་མཛོད་ཆོས། །སྟོན་མཛད་གསང་མཚན་པདྨ་དྲག་རྩལ་ཞེས། །ཟབ་གཏེར་མངའ་བདག་དེ་ལ༴ ལྷོ་བྲག་ཕྱོགས་སུ་སྔགས་འཆང་ཆེན་པོའི་སྲས། །ཐ་མལ་ཚུལ་གྱིས་གསང་སྔགས་སྙིང་པོའི་དོན། །ལྷུར་བླང་གསང་བདག་ཐུགས་ཀྱི་རྣལ་འབྱོར་པ། །གྲགས་པའི་མཚན་འཆང་དེ་ལ༴ གཙང་གི་ཟབ་ལུང་ཉེ་བར་སྦས་ཚུལ་གྱི། །སྔགས་སྤྱོད་རྡོ་རྗེ་གཞོན་ནུའི་དཀྱིལ་འཁོར་ལ། །བསྙེན་བསྒྲུབ་ཡན་ལག་བཞི་བརྙེས་རྣལ་འབྱོར་པ། །བསོད་ནམས་མཚན་ཅན་དེ་ལ༴ ཐུགས་བསྐྱེད་ཆེན་པོས་འགྲོ་དོན་སྤྲུལ་པའི་སྐུ། །བླ་སློབ་གཏེར་སྟོན་ཆོས་དག་རྒྱལ་བློན་ཚུལ། །རྔོན་པ་བཤན་པ་སྨད་འཚོང་ཐ་མལ་ཚུལ། །དུ་མས་གདུལ་བྱ་སྐྱོང་ལ༴ དེ་ལ་སོགས་ཏེ་སྐྱེ་བའི་ཕྲེང་བ་ནི། །སྣ་ཚོགས་འགྲོ་འདུལ་སྤྲུལ་པའི་ཟློས་གར་ཆེ། །མ་ངེས་གྲངས་མེད་སྐལ་ལྡན་ཁ་ལོ་སྒྱུར། །གང་འདུལ་དེ་མཚུངས་སྟོན་ལ༴ ཁྱད་པར་འབྲི་རྒྱུད་རེ་ཁེའི་གདུལ་བྱའི་དོན། །སྟག་འུར་དམ་པའི་གདུང་རིགས་ལས་བསྐྲུན་ཏེ། །སྐྱེས་ནས་བག་ཆགས་བཟང་སད་གསང་སྔགས་ཆོས། །ལེགས་འཆང་མཆོག་སྤྲུལ་དེ་ལ༴ ནར་སོན་གཏེར་གྲུབ་དུ་མས་རྗེས་བཟུང་ནས། །ཐུགས་རྗེ་དབང་བསྐུར་རྒྱལ་ཚབ་ཅོད་པཎ་བྱིན། །སྨིན་གྲོལ་མངའ་བརྙེས་པདྨ་ནོར་བུ་ཞེས། །རྒྱལ་སྲས་དམ་པ་དེ་ལ༴ དཀྱིལ་འཁོར་རབ་འབྱམས་བསྙེན་གྲུབ་དྲོད་ཚད་ཕེབས། །སྟོང་ཉིད་དོན་རྟོགས་སྣང་སེམས་མངོན་སུམ་འདྲེས། །བསྐྱེད་རྫོགས་རྫོགས་ཆེན་མན་ངག་དོན་བྱན་ཚུད། །གྲུབ་པའི་དབང་ཕྱུག་དེ་ལ༴ རྔ་ཡབ་དཔལ་རི་གུ་རུ་པདྨའི་དྲུང་། །དབང་བཞི་ཡོངས་རྫོགས་བསྐུར་ནས་གསང་བའི་མཚན། །གུ་རུ་ཞི་བའི་བློ་གྲོས་ཞེས་བྱ་བར། །གྲགས་གྱུར་རིག་འཛིན་དེ་ལ༴ ཀུན་བཟང་དྲི་མེད་རྡོ་རྗེ་གཟི་བརྗིད་དང་། །པདྨ་ཆོས་དབྱིངས་འཕྲིན་ལས་འགྲོ་འདུལ་རྩལ། །པདྨ་དབང་གྲགས་པདྨ་རྣལ་རོལ་ཏེ། །སྐུ་གཅིག་མཚན་མང་གྲགས་ལ༴ པདྨས་ཟབ་གཏེར་བདག་པོར་མངའ་གསོལ་ཞིང་། །འབྲེལ་ཚད་དོན་དང་ལྡན་པར་དབུགས་རབ་དབྱུང་། །སྐྱེ་བའི་ཕྱིར་མར་ཁ་བྱང་འཛིན་ལུང་བསྟན། །དུས་གསུམ་འགྲོ་དོན་མཛད་ལ༴ ཁྱོད་ཀྱི་དགོངས་པ་ཕྱག་རྒྱ་ཆེན་པོའི་གཤིས། །རྡོ་རྗེ་གཞོན་ནུའི་གསང་དང་དབྱེར་མེད་པར། །འཐིམས་ཀྱང་སླར་ཡང་སྤྲུལ་པས་འགྲོ་བའི་དོན། །རྒྱུན་ཆད་མེད་པར་མཛད་ལ༴ ལྷུན་གྲུབ་ཕྱག་རྒྱའི་སྐུ་ཡི་གནས་ལྔ་ནས། །སྤྲོ་བསྡུས་འོད་ཟེར་འགྱེད་ལས་ཁྱད་པར་དུ། །ཐུགས་དབྱིངས་ས་བོན་ཧཱུྃ་མཚན་ཡང་འཆར་བ། །སླར་ཡང་གདུལ་བྱ་སྐྱོང་ལ༴ ལྷོ་བྲག་ཕྱོགས་ནས་ཐུགས་གཏེར་གསང་བ་ཆེ། །ཞལ་ཕྱེས་སྐལ་ལྡན་སྨིན་གྲོལ་དོན་ལ་སྦྱོར། །དུས་སྙིགས་བཟློག་པའི་བརྟུལ་ཞུགས་པདྨའི་མཚན། །འབྱུང་འགྱུར་ཕྱོགས་སྤྲུལ་དེ་ལ༴ དེ་ལྟར་རྒྱལ་བ་རྒྱལ་སྲས་རབ་འབྱམས་ཚོགས། །སྐུ་དང་ཡེ་ཤེས་རོལ་བ་དཔག་མེད་པ། །སྟོང་ཉིད་སྙིང་རྗེ་ཟུང་འཇུག་ལས་འཆར་བའི། །རྟེན་འབྲེལ་རོལ་པར་རྒྱས་ལ༴ ཐམས་ཅད་ཤིས་མདང་རྩལ་ཆ་དབྱེར་མེད་པར། །འགྲོ་དོན་ལྷུན་གདུལ་བྱའི་སྣ་ཚོགས་བཞིན། །རྟོག་མེད་ངང་ཤར་སྤྲུལ་པའི་སྒྱུ་འཕྲུལ་ཆེ། །བསམ་མི་ཁྱབ་སྟོན་མཛད་ལ༴ འདིར་སྣང་ངོར་ཁྱེད་སྐྱེ་བའི་སྲིད་གྲགས་གྱུར། །གྲུབ་པའི་བ་སྤུ་ཉག་གཅིག་བྱེ་བ་འབུམ། །གཤག་འཚལ་འོད་ཟེར་ཙམ་གཅིག་ཞུགས་གྱུར་སྤྲུལ། །མིང་འཛིན་ཚེ་དབང་ནོར་བུར་གསོལ་བ་འདེབས། །སྐྱེས་ནས་མཆོག་གཏེར་སྟོན་པས་རྗེས་བཟུང་ཞིང་། །དམ་པ་དྲུག་གི་ཞབས་ཟིན་གདམས་པའི་གནས། །ལེགས་འཇོས་རང་རིག་རྟོགས་པའི་ངོ་བོ་མཐོང་། །བག་ཆགས་ཅུང་ཟད་དེ་ལ༴ ཨོ་རྒྱན་ཆེན་པོའི་གསང་བའི་མཛོད་བཟང་པོར། །ལེགས་སྤྱོད་ཉམས་ལེན་སྦས་ཚུལ་བསྒྲུབ་ལ་བརྩོན། །དམན་པའི་ཚུལ་འཛིན་གང་འདུལ་གཞན་དོན་སྐྱོངས། །རྣལ་འབྱོར་ཙམ་པ་དེ་ལ༴ དེ་ལྟར་རིག་འཛིན་ཆེན་པོའི་སྐྱེ་བ་ཡིས། །འཕྲེང་བར་གསོལ་བ་བཏབ་པའི་བྱིན་རླབས་ཀྱིས། །བདག་ཉིད་སྐྱེ་ཀུན་མཚན་ལྡན་དམ་པ་ཡི། །རྗེས་བཟུང་དམ་ཚིག་སེལ་མེད་ཐུགས་ཡིད་འཕྲོག །དབང་བཞིས་རྒྱུད་སྨིན་བསྐྱེད་རྫོགས་རྫོགས་པ་ཆེ། །རབ་གྲོལ་བདག་གཞན་དོན་གཉིས་ལྷུན་གྱིས་གྲུབ། །མི་གནས་ཆོས་སྐུ་སྟོང་ལ་རྟགས་བརྣལ་ངང་། །གང་འདུལ་གཟུགས་སྐུས་འགྲོ་དོན་སྤྱོད་པར་ཤོག །

ཅེས་པ་མཁས་ཤིང་གྲུབ་པའི་རྣལ་འབྱོར་པདྨ་ནོར་བུའི་སྐྱེ་བའི་ཕྲེང་བར་གསོལ་འདེབས་སུ་སྦྱར་བ་སྟེ། བདག་ནི་དེའི་སྤྲུལ་པར་གྲགས་ཀྱང་རང་ལ་གང་ནས་བལྟས་ཀྱང་ཡོན་ཏན་མི་ལྡན་པར་གྱུར་ཚེ་དམ་པ་དེ་ལྟ་བུའི་སྤྲུལ་སྐུ་མིན་པར་ངེས་ཀྱང་དད་ལྡན་གྱི་གྲོགས་འགའ་ཞིག་གིས་ནན་ཏུ་བསྐུལ་ངོར་སྤྲུལ་སྐུ་ཡིན་རྫུའི་གསོལ་འདེབས་ས་ཅུང་ཙམ་དུ་བྲིས་ཀྱང་ཀུན་གྱི་ཐུགས་ཀྱི་བྱ་བའི་གནས་ཅི་ཞིག་ལགས། ཀྭ་ཡི་སྤྲུལ་སྐུར་གྲགས་པ་དེ་ལྟ་བུ། །གྲུབ་པའི་སྐྱེ་བུ་མུ་ཏིག་ཕྲེང་བ་ལ། །སོ་སྐྱེས་བདག་ནི་ཞེ་ནེ་རྡོག་པོ་བཟིན། །མཛེས་པར་མི་འགྱུར་འགྲོ་བའི་ཡ་གི་རྒྱུ། །རང་ལ་ཡོན་ཏན་བརྗོད་རུང་རྒྱུ་མེད་པ། །སྙིམ་པའི་ཆུ་ལ་ཆུ་གཏེར་བརྗོད་པ་དང་། །བྱི་བར་གླང་ཆེན་ཆེ་དྲུག་སར་བསྔགས་མཚུངས། །དེས་ན་རྨོངས་ལས་ཆེས་རྨོངས་བདག་ཏུ་འཁུམ། །ཞེས་ཤར་འབྱུང་དུ་གླེང་ལགས། རང་ལོ་ཉེར་གཉིས་པ་དཔྱིད་གསུམ་ལོ་མ་འབུས་པའི་དུས་རོལ་ལམ་དྲགས་ཡོ་ལེ། ནགས་ཀློང་གྲུ་བཞི་འདོམ་གང་ཡངས་པ་ཅན་དུ་ཚེ་དབང་ནོར་བུ་པདྨ་གར་དབང་འགྲོ་འདུལ་རྡོ་རྗེས་བྱུང་རྒྱལ་དུ་སྦྱར་བའི་ཡི་གེའི་རིག་བྱེད་རབ་འབྱམས་པས་བྲིས་པ་དགེའོ། །དགེའོ། །དགེའོ། །

༈ རིག་འཛིན་ཚེ་དབང་ནོར་བུའི་གསོལ་འདེབས།

ཨོཾ་ཨཱ་ཧཱུྃ། དང་པོའི་སངས་རྒྱས་ཀུན་བཟང་ཐུགས་ཀྱི་ཀློང་། །རིག་འདུས་རྡོ་རྗེ་སེམས་དཔའི་སྒྱུ་འཕྲུལ་རྒྱལ། །འཁོར་ལོ་སྡོམ་པ་རིག་འཛིན་པདྨ་འབྱུང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཕགས་ཡུལ་ཡང་ངག་རིག་འཛིན་ཧཱུྃ་ཀ་ར། །བོད་ཡུལ་གྲུབ་པའི་དབང་ཕྱུག་ནམ་མཁའ་སྙིང་། །ཟུར་རིག་སྔགས་འཆར་རིག་འཛིན་ཤེས་རབ་གྲགས། །གསོལ་བ༴ སྙི་ཡི་གདུང་ལས་འཁྲུལ་ཞིག་ཉི་མ་སེང་། །འཁོན་གྱི་གདུང་ལས་གྲུབ་བརྙེས་བཟང་པོ་དཔལ། །གསོལ་བ༴ ལ་སྟོད་དཔལ་ཐང་གཏེར་སྟོན་བྱང་ཆུབ་གླིང་། །ཀཿཐོག་ཕྱོགས་སུ་ཚུལ་ཁྲིམས་འབུམ་པ་དང་། །འབྲས་ཡུལ་སྐྱིད་ཚལ་ཀུན་མཁྱེན་སངས་རྒྱས་འཕེལ། །གསོལ་བ༴ སྟག་བུར་རིག་འཛིན་པདྨ་ནོར་བུའི་མཚན། །དེ་སོགས་གྲུབ་པའི་ཟློས་གར་མཁན་དཔྱིད། །དུ་མར་སྣང་མཛད་དཔལ་ལྡན་བླ་མ་ལ། །གསོལ་བ༴ ཚེ་འདིར་འཁྲུལ་ཟད་ཆོས་སྐུའི་ཐུགས་ཀློང་གྲོལ། །དབང་ཕྱུག་ཡོན་ཏན་བརྒྱད་སྙེད་སྐུ་ཉིད་འགྲུབ། །ནོར་འཁྲུལ་མ་མཆིས་ཐམས་ཅད་མཁྱེན་པ་ཐོབ། །འབྲེལ་ཚད་སངས་རྒྱས་འབྲས་བུ་མཆོག་འགྲུབ་ཤོག །

ཅེས་དྭགས་པོ་ཀླུ་མཁར་ཞབས་དྲུང་པའི་གསང་ཡུམ་རང་བཞིན་དོན་གྱི་རྣལ་འབྱོར་མ་ཡེ་ཤེས་ལྷ་མོ་ཞེས་པས་བསྐུལ་ངོར་ཕྱོགས་ཀུན་རྒྱུ་བའི་སྔགས་འཆང་ཚེ་དབང་ནོར་བུས་ཤིང་འབྲུག་ཧོར་ཟླའི་ཚེས་ལ་སྤུ་བོ་ཡིད་འོང་དུ་བྲིས་མངྒ་ལཾ།

རིག་འཛིན་པདྨ་ནོར་བུའི་སྐྱེས་རབས་ཀྱི་འཕྲེང་བར་གསོལ་འདེབས་བྱིན་རླབས་ཆར་འབེབས།

༈ རིག་འཛིན་པདྨ་ནོར་བུའི་སྐྱེས་རབས་ཀྱི་འཕྲེང་བར་གསོལ་འདེབས་བྱིན་རླབས་ཆར་འབེབས་བཞུགས།

ཨོཾ་ཨཱ༔་ཧཱུྃ མི་ཤིག་མ་སྐྱེས་སྟོང་ཉིད་རྡོ་རྗེ་མཁའ། །སྒྱུ་འཕྲུལ་འགག་མེད་སྣ་ཚོགས་རོལ་པའི་རྩལ། །བདེན་གཉིས་ཟུང་འཇུག་ཅིར་ཡང་སྣང་བའི་བདག །ཁྱབ་བདག་རྩ་བའི་བླ་མར་གསོལ་བ་འདེབས། །གྲངས་མེད་མངོན་སྒོམ་ཐུགས་སྐྱེས་ཚོགས་གཉིས་ཀྱི། །མཛད་པས་རྒྱལ་བའི་གོ་འཕང་འཁོད་བཞིན་དུ། །འགྲོ་བའི་དོན་དུ་གང་འདུལ་སྤྲུལ་བསྒྱུར་འགྱེད། །རྡོར་སེམས་ཆོས་ཀྱི་བླ་མར་གསོལ་བ་འདེབས། །ཞེན་མེད་སྒྱུ་མའི་ངང་ཚུལ་དོན་དམ་ཉིད། །འགྱུར་བ་མི་མངའ་བསམ་བཞིན་ཐུགས་རྗེ་ཡི། །གདུལ་བྱར་བརྩེ་བས་འགྲོ་འདྲེན་སྤྲུལ་པའི་སྐུ། །སྐྱེ་བའི་འཕྲེང་བར་སྟོན་ལ༴ ཤཱཀྱའི་ཏོག་དྲུང་དགྲ་བཅོམ་ཉེ་བ་འཁོར། །འཕགས་ཡུལ་ཕྱོགས་ཀྱི་རིག་འཛིན་ཧཱུྃ་ཀ་ར། །པདྨའི་སྤྱན་སྔར་གྲུབ་དབང་ནམ་མཁའི་སྙིང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཟུར་རིགས་སྔགས་འཆང་ཟུར་ཆུང་ཤེས་རབ་གྲགས། །སྙི་གདུང་རྟོག་པའི་དབང་ཕྱུག་ཚུལ་ཁྲིམས་སྙིང་། །རོག་བན་ཆེན་པོ་སུཪྻ་སིངྒའི་མཚན། །གསོལ་བ༴ པདྨ་དབང་གྲུབ་རྣལ་འབྱོར་ཙ་རི་པ། །སྤྱན་གཟིགས་འཕྲིན་ལས་མ་ཎི་རིན་པོ་ཆེ། །དགྱེས་རྡོར་མངོན་བརྙེས་འཁོན་རིགས་བྷཱ་དྲ་ཤྲཱི། །གསོལ་བ༴ གྲགས་སེང་རྗེས་བཟུང་རི་ཁྲོད་དར་རྒྱས་ཞབས། །མདོ་ཁམས་ཀཿཐོག་བསྟན་འཛིན་ཚུལ་ཁྲིམས་འབུམ། །ལུང་རྟོགས་ཐར་ཕྱིན་དྭགས་རབ་ཆོས་ཀྱི་རྒྱལ། །གསོལ་བ༴ དྲག་སྔགས་མངའ་བརྙེས་རིག་འཛིན་གཟི་བརྗིད་འབར། །མཁའ་འགྲོའི་དབང་ཕྱུག་གྲྭ་པ་བཛྲ་མཚན། །ཟབ་གསང་མཛོད་འཛིན་བྱང་ཆུབ་གླིང་པ་དཔལ། །གསོལ་བ༴ ཡེ་ཤེས་ཟང་ཐལ་དག་མྱོན་ཀུན་དགའ་ལེགས། །འཁྲུལ་མེད་གྲུབ་བརྙེས་དབང་༼འཁྲུལ་ཞིག་དབང་གྲགས་རྒྱ་མཚོའི་གསུང་གི་སྤྲུལ་པ་པདྨ་ནོར་བུ་ཐུགས་ཀྱི་སྤྲུལ་པ་མི་འགྱུར་རྡོ་རྗེ། ཐེ་མ་ཚོམ་གཅིག ཐེ་ཚོམ་ན་གྱིས། ང་ལ་ནི་ཕན་གནོད་མེད། གང་དགའ་བགྱིས། ཧ་ཧ།༽ ཆེན་དྲག་པོ་རྩལ། །ཡང་དག་མཆོད་ཏོག་པདྨ་ནོར་བུའི་མཚན། །གསོལ་བ༴ སྙིགས་དུས་འདུལ་དོན་སྤྲུལ་པའི་ཆོ་འཕྲུལ་གྱི། །གདུལ་བྱའི་ཁ་ལོ་གྱེན་དུ་སྒྱུར་མཛད་པ། །ངོ་བོ་གཅིག་ལ་རྣམ་པ་སྤྲུལ་དཔག་མེད་དུ། །སྟོན་མཛད་བླ་མ་མཆོག་དེར་གསོལ་བ་འདེབས། །དེ་ལྟར་བླ་མ་མཆོག་གི་སྐྱེ་བའི་ཕྲེང་། །དམ་པར་གུས་པས་གསོལ་བ་བཏབ་པའི་མཐུས། །བདག་གི་འཁྲུལ་འཛིན་དྲི་ཚོགས་ཡོངས་དག་ནས། །བདེ་ཆེན་སྐུ་གཉིས་མཆོག་གྲུབ་བྱིན་གྱིས་རློབས། །

ཞེས་དད་བསྐལ་མཆོག་དང་ལྡན་པ་དུ་མས་བསྐུལ་བའི་ངོར། རྫོགས་ཆེན་རྣལ་འབྱོར་ཟོལ་འཛིན་ཚེ་དབང་ནོར་བུས་ཤིང་སྤྲུལ་སྟོན་འབྲུ་བཅུད་སྨིན་པའི་དུས་སུ་ཀོང་ཡུལ་བྲག་གསུམ་མཚོ་རྫོང་དུ་སྨྲས་པ་དགེའོ་མངྒ་ལཾ།

འགྲན་བྲལ་གྲུབ་པའི་དབང་ཕྱུག་ནོར་བུ་འཕྲིན་ལས་འགྲོ་འདུལ་གྱི་སྐྱེ་རྒྱུད་གསོལ་འདེབས་ཡིད་བཞིན་དབང་གི་ཕྲེང་བ།

༈ འགྲན་བྲལ་གྲུབ་པའི་དབང་ཕྱུག་ནོར་བུ་འཕྲིན་ལས་འགྲོ་འདུལ་གྱི་སྐྱེ་རྒྱུད་གསོལ་འདེབས་ཡིད་བཞིན་དབང་གི་ཕྲེང་བ་ཞེས་བྱ་བཞུགས།

ཨོཾ་ཨཱ༔་ཧཱུྃ ཁྱབ་བདག་རྒྱལ་ཀུན་ཡབ་གཅིག་འོད་མའི་འགྱུར། །ལྷུན་གྲུབ་འོད་གསལ་གསང་ཆེན་རྡོ་རྗེ་སེམས། །ཟུང་འཇུག་རང་ཤར་རིག་པ་པདྨ་འབྱུང་། །རིག་བདག་སྐུ་གསུམ་བླ་མར་གསོལ་བ་འདེབས། །ཆོས་ཉིད་རྣམ་དག་སྤྲོས་བྲལ་ངང་ཉིད་ལས། །ཐུགས་རྗེའི་རོལ་རྩལ་རྟེན་འབྲེལ་གྱིས་སྣང་སྐུ། །གདུལ་བྱ་གང་འདུལ་འདིར་སྟོན་རྒྱལ་བའི་དབང་། །མཚུངས་མེད་རྩ་བའི་བླ་མར་གསོལ་བ་འདེབས། །མཆོག་ཁྱེད་ངེས་དོན་འཕོ་འགྱུར་ཀུན་བྲལ་བ། །ཟབ་བཞི་འོད་གསལ་ངང་དུ་གཡོ་མེད་ཀྱང་། །འགྲོ་བའི་དོན་དུ་འཕོ་དང་འཇུག་པའི་ཚུལ། །སྐྱེ་བའི་འཕྲེང་བར་སྟོན་ལ༴ ཆོས་ཀྱི་དབྱིངས་སུ་རྡོ་རྗེའི་ས་ཆེན་པོར། །ཀུན་བཟང་སེམས་དཔའ་མཆོག་གི་སྐུར་སྣང་ཞིང་། །དགོངས་པའི་རང་མདངས་ཐུགས་ཀྱི་རྡོ་རྗེ་ཆོས། །རིག་འཛིན་འཁོར་ལོས་གྱུར་དེར་གསོལ་བ་འདེབས། །སྤྲུལ་གཞི་དེ་ལས་སྤྲུལ་པ་སྣ་ཚོགས་པ། །བསམ་གྱིས་མི་ཁྱབ་ནམ་མཁའ་མཐའ་དང་མཉམ། །གདུལ་བྱའི་དོན་དུ་རྒྱུན་མི་ཆད་པའི་སྐུ། །སྣང་མཛད་དཔལ་ལྡན་མཆོག་དེར༴ འཕགས་ཡུལ་ཐུགས་ཀྱི་ཟབ་མཛོད་འཛིན་པའི་གཙོ། །རིག་འཛིན་ཧཱུྃ་ཀ་༼ནམ་སྙིང་གི་བླ་མ་ཡང་ཡིན་ཐུགས་རྒྱུད་གཅིག་༽ར་ལ་གསོལ་བ་འདེབ། །བོད་ཡུལ་མཁར་ཆུར་ཕྱག་རྒྱ་ཆེ་མཆོག་གྲུབ། །གནུབ་བན་ནམ་མཁའ་སྙིང་པོར་གསོལ༴ བྲག་རྒྱའི་བོ་རུ་ཡང་དག་མཆོག་ཐུན་བརྙེས། །ཟུར་ཆུང་ཤེས་རབ་༼ཟུར་ཆེན་ཤཱཀྱ་འབྱུང་གནས་ཀྱི་སློབ་མ་དབོན་གྱུར། ༽གྲགས་ལ་གསོལ༴ རི་བོ་ཤིནྟིར་དགོངས་པ་ཁ་ལྟར་བརྡལ། །དྭགས་སྒོམ་ཚུལ་ཁྲིམས་༼མཉམ་མེད་དྭགས་པོ་ལྷ་རྗེའི་སློབ་མ་སྐུ་དབོན་གཉིས་ཀ་ཡིན། ༽སྙིང་པོར་གསོལ་བ༴ ངེས་མེད་གནས་སུ་འོད་གསལ་འཁོར་ཡུག་འདྲེས། །ཞིག་པོ་ཉི་མ་གསེང་༼རྒྱལ་བ་རེ་ནེ་རྒྱུ་པའི་སློབ་མ་ཡིན།༽ གེར༴ ཕྱོགས་ཀུན་ཡིག་བདུན་མྱོང་གྲོལ་འགྲོ་དོན་སྤེལ། །མ་ཎི་གུ་རུ་ཆོས་དབང་སློབ་མ་རིན་ཆེན་ཞབས་ལ༴ འཇག་གི་གནས་ཀྱི་མཁའ་འགྲོ་བསྙེན་༼ནེ་གུ་ལི། ༽རྒྱུད་འཛིན། །རྒྱལ་མཚན་༼ཤང་སྟོན་གཙང་པའི་༽སློབ་མ་འབུམ་གྱི་ཞབས་ལ༴ ས་སྐྱའི་གནས་སུ་རིམ་གཉིས་ཡོན་ཏན་རྫོགས། །རྗེ་བཙུན་བཟང་པོ་དཔལ་ལ༴ མཚུར་གྱི་གནས་ནང་ངེས་དོན་སྒྲོན་མེ་སྦར། །རི་ཁྲོད་དར་རྒྱས་༼ཞྭ་དམར་གྲངས་སེང་སློབ་མ་༽ཞབས་ལ༴ སྙེ་ནམ་གསེར་ཕུག་ཟབ་གཏེར་ཆོས་འཁོར་བསྐོར། །བྱ་སྟོན་བྱང་ཆུག་གླིང་པར་གསོལ༴ ཀཿཐོག་གདན་སར་སྨིན་གྲོལ་བསྟན་པའི་བདག །ཚུལ་ཁྲིམས་༼འདི་ཡི་སྤུ་ལུང་གནས་སྒོ་ཡང་གསལ་བར་མཛད། ༽འབུམ་པར་གྲགས་ལ༴ ཀོང་ཡུལ་སྙིང་ཕུར་དགོངས་འདུས་གསེར་ཆོས་འཛིན། །མཚན་ལྡན་མ་ཏིར་༼འདི་ཡི་བག་ཆགས་ད་ལྟ་ཡང་ཅུང་ཟད་དྲན། སངས་རྒྱས་གླིང་པའི་གདུང་རྒྱུད་ཡིན། ༽གྲགས་ལ༴ སྟག་ལུང་སྐུ་འཁྲུངས་ཟབ་ཆོས་ཉི་འོད་གདལ། །ངག་དབང་གྲགས་པའི་༼འབྲི་གུང་དབང་གི་བླ་མ་མཛད། ༽ཞབས་ལ༴ མངོན་མཐོ་ངེས་ལེགས་ཀྱིས་ཕྱུག་འཕགས་གུ་རུ། །གོང་མ་ཀུན་དགའ་ལེགས་པར་༼གཏེར་སྟོན་རཏྣ་ཆོས་བདག་ཡིན། ༽གསོལ་བ༴ གཙང་རོང་སྐྱིད་ཚལ་ལུང་རྟོགས་འབྲུག་སྒྲ་སྒྲོགས། །ཀུན་མཁྱེན་སངས་རྒྱས་འཕེལ་ལ་གསོལ༴ གངས་དཀར་གནས་སུ་བསྟན་པའི་རྒྱལ་མཚན་འཛིན། །མཁས་པའི་༼རྡོ་རྗེ་གདན་པའི་སློབ་མ་ཀུན་དགའ་མཆོག་གྲུབ་སྟེ་གྲོལ་མཆོག་གི་བླ་མ་ཡིན་གསུང་། ༽ཁྱུ་མཆོག་དེ་ལ༴ རི་བུ་གླང་རུར་འཁྲུལ་ཞིག་སྨྱོན་པའི་ཚུལ། །བདག་སྨྱོན་ལེགས་པའི་༼སྔོན་ཆད་འདི་ཡི་སྐུལ་ནི་བདག་གི་མ་འཚལ་ཡང་ལུང་བསྟན་ལྟར་ན་པདྨ་ནོར་བུའི་སྐྱེ་བ་གོང་མ་འདྲ་ཞིག་སྣང་འདུག་གོ །༽ཞབས༴ སྔགས་རིགས་པདྨའི་ཟབ་གསང་ཕྱོགས་ཀུན་སྤེལ། །ཀུན་དགའ་གཏེར་༼སྟོན་རཏྣའི་གདུང་ཐལ། ༽བསྟན་འཛིན་ཞབས༴ དེ་ལྟར་བསམ་བཞིན་སྐྱེ་བའི་བསམ་གཟུང་ནས། །གདུལ་བྱ་འབྲེལ་ཚད་ཐར་པའི་ལམ་སྟོན་མཁན། །གང་འདུལ་ཆུ་སྣོད་ཟླ་གཟུགས་ལྟར་བཀྲ་བ། །སྒྱུ་འཕྲུལ་རབ་འབྱམས་འཆང་དེར་གསོལ༴ ཁྱད་པར་མདོ་ཁམས་རེ་ཁེར་སྤྲུལ་པའི་སྐུ། །མཆོག་གྱུར་ཧེ་རུ་ཀ་དཔལ་རིག་པ་འཛིན། །ལྷ་གདེང་སྦྱོར་སྒྲོལ་ནུས་པ་མཐར་ཕྱིན་པའི། །པདྨ་འགྲོ་འདུལ་ནོར་བུར་གསོལ༴ གང་ཁྱེད་རྒྱལ་དང་རྒྱལ་བ་སྲས་བཅས་ཀྱིས། །བྱིན་རླབས་དབང་བསྐུར་རྒྱུན་མི་ཆད་མཛད་ཅིང་། །གཏེར་གྲུབ་དུ་མའི་ལུང་ལས་ཆེར་བསྔགས་པ། །རྒྱལ་བའི་རྒྱལ་ཚབ་༼འདི་ཡི་བྱིན་གྱིས་བརླབས་པ་ཞིག་བདག་ཡིན་པའི་རྟགས་སོ། །༽ཁྱེད་ལ༴ བླ་མེད་ལམ་མཆོག་ཕྱི་མའི་ལྡོག་ཐོབ་ཅིང་། །བར་དོར་དཔལ་ཆེན་ཐུགས་ཀྱི་ཡེ་ཤེས་ཀློང་། །དབྱེར་མེད་ལྷུན་གྲུབ་ས་ལ་གཤེགས་གྱུར་དང་། །གང་འདུལ་སྤྲུལ་སྐུར་སྟོན་ལ༴ ད་ལྟ་སྦས་ཚུལ་རྣལ་འབྱོར་ཀུན་ཏུ་རྒྱུ། །ཕྱི་མ་ལྷོ་ཕྱོགས་དྷེ་ཝི་ཀོ་ཊ་ནས། །ཟབ་མོའི་གཏེར་སྟོན་བོད་ཁམས་བདེ་བར་སྟོན། །རྒྱལ་དབང་པདྨའི་སྲས་དེར༴ དེ་ནས་བདེ་ཆེན་པདྨ་འོད་ཀློང་དུ། །པདྨ་འབྱུང་གནས་ཐུགས་དང་རོ་གཅིག་སྟེ། །སྐུ་གསུམ་ཆོས་ཉིད་ངོ་བོར་ཟླ་མེད་པར། །བྱང་ཆུབ་ཆེ་བརྙེས་དེ་ལ༴ གཞན་ཡང་རྡོར་སེམས་པདྨའི་ཐུགས་ཉིད་དང་། །མི་གཉིས་ནམ་སྙིང་སྤྲུལ་པ་བསམ་ཡས་ཞིང་། །དུས་དེར་༼སྤྲུལ་པ་༽ལྔ་དང་༼ཡང་སྤྲུལ་༽ཉེར་ལྔ་བརྒྱ་རྩ་༼བྱིན་གྱིས་བརླབས་པའི་༽བརྒྱད། །འགྲོ་འདུལ་སྣང་བར་གསུང་ལ༴ དེ་ལྟར་འདྲེན་མཆོག་ཁྱེད་ཀྱི་དག་པ་ཡི། །སྐྱེ་ཕྲེང་ཆུ་གཏེར་དབུས་ནས་མོས་གུས་ཀྱི། །སྙིམ་པར་སྣང་བ་སྐལ་ལྡན་དུང་སེལ་བཅུད། །ཡིད་ཀྱི་བདུད་རྩི་བརྟེན་ནས་གསོལ་བ་འདེབས། །མི་ཕྱེད་དད་པའི་ང་རོས་མཚན་ནས་འབོད། །དབང་མེད་དུང་བའི་སྤུ་གཡོ་མཆི་མ་འཁྲུག །རྩེ་གཅིག་འདི་ཕྱིའི་རེ་ལྟོས་ཁྱེད་བགྱིས་ན། །ཐུགས་རྗེས་མ་འདོར་འཕྲིན་ལས་འགྲོ་འདུལ་རྩལ། །བྱིན་གྱིས་རློབས་ཤིག་དྲི་མེད་གཟི་བརྗིད་རྩལ། །བདག་རྒྱུད་སྨིན་མཛད་གུ་རུ་ཞི་བློ་གྲོས། །གྲོལ་བར་མཛོད་ཅིག་ཐུགས་མཆོག་བདེ་གཤེགས་སྙིང་། །བར་ཆད་གསོལ་ཅིག་གུ་རུ་དབང་གྲགས་རྩལ། །༼པདྨ་ནོར་བུའི་མཚན་གྱི་རྣམ་གྲངས། ༽བདག་སོགས་ཚེ་རབས་རྟག་ཏུ་མགོན་ཁྱོད་དང་། །འབྲལ་མེད་ཐུགས་ཀྱི་དགྱེས་དགུ་ཡོངས་འགྲུབ་ཅིང་། །པད་འབྱུང་ནམ་མཁའི་སྙིང་དང་ཚོམ་བུ་གཅིག །གྱུར་ནས་ཀུན་ཀྱང་རྡོ་རྗེའི་སར་གྲོལ་ཤོག །

དེ་ལྟར་གྲུབ་པའི་དབང་ཕྱུག་པདྨ་ནོར་བུའི་སྐྱེ་བརྒྱུད་གསོལ་འདེབས་ཤིག་དགོས་ཞེས་རྗེ་བཙུན་མི་ལ་བཞད་པ་རྡོ་རྗེ་མཆོག་གི་ས་བརྙེས་པའི་གནས་བྲག་དཀར་རྟ་སོའི་གདན་ས་ཀརྨ་ཆོས་འཕེལ་ཞེས་གཡུ་སྒྲ་སྙིང་པའི་ཕྲིན་ལས་ཀྱི་སྤྲུལ་པ་དེ་ཡི་རང་སྲིད་འཁྲུལ་མེད་བླ་མ་དཀར་མ་མཆོག་ལྡན་དང་། རིག་འཛིན་ཆེན་པོ་བསྟན་གཉིས་གླིང་པའི་གདུང་རུས་དྲི་མ་མེད་པ་ལས་གྲུབ་པའི་ཡོས་ལོའི་གནས་ཀྱི་བཀའ་བབས་ཤིང་དྲག་སྔགས་ནུས་པའི་མཐུ་གྲུབ་པ་དད་དམ་མཆོག་གྱུར་རྫོགས་ཆེན་རྣལ་འབྱོར་ཉི་མ་སེང་གེས་ཡང་ཡང་བསྐུལ་བ་དང་། གཞན་ཡང་གྲུབ་ཆེན་བསམ་གཏན་རྡོ་རྗེ་སོགས་གུས་ལྡན་མང་པོས་བཞེད་པ་བཀང་ཕྱིར་རྗེ་བཙུན་བླ་མའི་བྱིན་རླབས་ཅུང་ཟད་ཞུགས་པའི་རྣལ་འབྱོར་པ་ཚེ་དབང་ནོར་བུའམ་ཀརྨ་རིན་ཆེན་མཆོག་དགའ་དགེ་བའི་དཔལ་གྱིས་མེ་ལུག་སྨིན་དྲུག་ཟླ་བའི་ཡར་ཚེས་བཅུ་གཅིག་པར་མངའ་རིས་མང་ཡུལ་གུང་ཐང་ཆོས་རྒྱལ་ཕོ་བྲང་ཁྱུང་རྫོང་དཀར་པོའི་ཡང་རྩེར་མར་མེའི་ལྡང་ལ་སྨྲས་པའི་ཡིག་རིགས་ཀྱང་རང་ཉིད་ཀྱིས་བགྱིས་པའོ། །གཞན་ཡང་ཐུགས་རྒྱུད་གཅིག་གྱུར་རིན་ཆེན་བརྩོན་འགྲུས། ཤངས་པ་བསོད་ནམས་མཆོག་གྱུར། དྭགས་རབ་པ་འཁྲུལ་ཞིག་དབང་གྲགས་རྒྱ་མཚོ། ཟབ་ལུང་མི་འགྱུར་དབང་རྒྱལ་སོགས་ཀྱང་འདྲེན་པ་དང་གོང་དུ་སྨོས་པ་རྣམས་ཀྱང་དུས་མཚུངས་སུ་བྱུང་བ་ཡང་ཡོད། སྤྲུལ་པ་སོ་སོས་ངང་ཚུལ་དུ་སྣང་བའོ། །སརྦ་མངྒ་ལཾ།

༈ རིག་འཛིན་ཚེ་དབང་ནོར་བུའི་སྐྱེས་རབས་གསོལ་འདེབས།

ཨོཾ་ཨཱ་ཧཱུྃ། གཞོམ་བྲལ་ཆོས་དབྱིངས་འདུས་མ་བྱས་པའི་ངང་། །རང་མདངས་འགག་མེད་ཆོ་རལ་སྒྱུ་མའི་འཕྲུལ། །ཅིར་སྣང་གདུལ་བྱའི་དོན་དུ་བསམ་བཞིན་དུ། །སྤྲུལ་པའི་སྐྱེ་འཕྲེང་འཛིན་ལ་གསོལ་བ་འདེབས། །ངེས་པའི་དོན་ལ་རྡོ་རྗེ་སེམས་དཔའ་རུ། །གྲུབ་ཀྱང་མ་ངེས་འགྲོ་བ་འདྲེན་པའི་ཕྱིར། །ཆུ་ཟླའི་རོལ་རྩེད་བཞིན་དུ་ཕོ་དང་བལྟམས། །དུ་མར་སྣང་མཛད་ཁྱོད་ལ༴ ཐུགས་ཀྱི་རྡོ་རྗེ་རིག་འཛིན་ཧཱུྃ་ཀ་ར། །ནམ་མཁའ་སྙིང་པོ་ཟུར་ཆུང་ཤེས་རབ་གྲགས། །དྭགས་པོ་སྒོམ་ཚུལ་དགེ་སློང་ནམ་མཁའ་འོད། །མ་ཎི་རཏྣར་གྲགས་ལ༴ བཟང་པོ་དཔལ་དང་རི་ཁྲོད་དར་རྒྱས་ཞབས། །བྱང་ཆུབ་གླིང་དང་ཀཿཐོག་ཙུལ་ཁྲིམས་འབུམ། །ཀུན་མཁྱེན་སངས་རྒྱས་འཕེལ་དང་ཀུན་དགའ་ལེགས། །ཀུན་དགའ་བསྟན་འཛིན་གྲགས་ལ༴ སྙིགས་མའི་དུས་འདིར་སྔགས་ཀྱི་བརྟུལ་ཞུགས་ལ། །སུས་ཀྱང་འདྲེན་དུ་མེད་པ་གྲུབ་པའི་དབང་། །གསང་མཚན་གུ་རུ་ཞི་བ་འོད་ཅེས་པའི། །རིག་འཛིན་འཁོར་ལོས་བསྒྱུར་དེར༴ གང་ཁྱེད་གདུལ་བྱར་རྗེས་སུ་ཆགས་པའི་མདངས། །སྤྲུལ་པའི་ཟློས་གར་བསམ་གྱིས་མི་ཁྱབ་པལས། །སྦས་ཚུལ་མཆོག་ཀུན་རྒྱུ་བའི་སྤྱོད་པ་ཅན། །ཚེ་དབང་ནོར་བུའི་ཞབས་ལ༴ དེ་ལྟར་དཔལ་ལྡན་རྩ་བའི་བླ་མ་ཡི། །སྐྱེ་བའི་ཕྲེང་བར་གྱུར་ལ་གསོལ་བཏབ་མཐུས། །བདག་བརྒྱུད་ཡོངས་སུ་སྨིན་ཞིང་གྲོལ་གྱུར་ཏེ། །ཚེ་གཅིག་ཉིད་ལ་རྡོ་རྗེ་འཆང་ཐོབ་ཤོག །

ཅེས་གཙང་ལ་སྟོད་སོས་སྔར་གྱི་དབུ་མཛད་བསོད་ནམས་ཆོས་གྲགས་ཀྱི་གཙོས་གྲྭ་ཚང་སྤྱི་དང་། ལོ་ཙཱ་བ་རིན་ཆེན་བཟང་པོའི་གདུང་ལས་འཁྲུངས་པའི་བྲང་པོ་དགའ་ལྡན་སྡེ་པ་བསོད་ནམས་ལྷུན་གྲུབ་ཀྱིས་ནན་ཏུ་བསྐུལ་ངོར་རིག་པ་འཛིན་པ་ཚེ་དབང་ནོར་བུས་ཕུར་བུ་ཟླ་ཚེས་བཟང་པོར་སྨྲས་པའི་ཡིག་རིགས་སྤྲུལ་སྐུ་ཨོ་རྒྱན་ཕྲིན་ལས་བསྟན་འཛིན་དཔལ་བཟང་པོས་བགྱིས་པ་དགེའོ། །

༈ རིག་འཛིན་རྗེའི་འཁྲུངས་རབས་གསོལ་འདེབས།

ཨོཾ་སྭཱསྟི། ཧེ་རུ་ཀ་དཔལ་ངོ་བོ་པདྨ་འབྱུང་། །རེས་འགའ་བརྟུལ་ཞུགས་སྤྱོད་པ་ཀཧྣལ། །ཐུགས་ཀྱི་འབྱུང་གནས་འཇའ་ལུས་སྨན་པའི་ཞབས། །གསོལ་བ་འདེབས་སོ་མཆོག་གི་དངོས་གྲུབ་སྩོལ། །ཕྱག་རྒྱ་ཆེ་མཆོག་བརྙེས་པ་ནམ་མཁའ་སྙིང་། །ཡང་དག་གྲུབ་པའི་གཙོ་བོ་ཤེས་རབ་གྲགས། །འོད་གསལ་རྡོ་རྗེའི་ཐུགས་མངའ་ཚུལ་ཁྲིམས་སྙིང་། །གསོལ་བ་འདེབས་སོ༴ རྒྱ་ཆེན་སྤྱོད་འཆང་ལོ་ཙཱ་མཻ་ཏྲི་ཤྲཱི། །ཟབ་གཏེར་མངའ་བདག་བྱང་ཆུབ་གླིང་པ་དཔལ། །མཁས་པའི་ཁྱུ་མཆོག་སངས་རྒྱས་འཕེལ་བའི་སྡེ། །གསོལ་བ༴ འཇའ་ལུས་དྭངས་མའི་སྐུར་གྱུར་བསོད་ནམས་མཆོག །གནས་བརྟན་གཞུང་ལུགས་འཆད་མཁས་བཟོད་དཔལ་གྲུབ། །ཡོངས་རྫོགས་བསྟན་འཛིན་ཡེ་ཤེས་རྒྱ་མཚོའི་སྡེ། །གསོལ་བ༴ པདྨས་རྒྱལ་ཚབ་དབང་བསྐུར་སྨོན་ལམ་མཐུས། །སངས་རྒྱས་བསྟན་སྲོག་འཛིན་ཅིང་འགྲོ་བ་འདུལ། །སྤྲུལ་པའི་རིག་འཛིན་ཚེ་དབང་ནོར་བུ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དེ་ལྟར་བརྩེ་གཅིག་གུས་པས་འཁོར་ལོའི་མགོན། །རྩ་བའི་བླ་མར་གུས་ཤིང་དྭངས་བ་ཡིས། །ཡོན་ཏན་རྗེས་སུ་དྲན་པས་གསོལ་བཏབ་ན། །པད་འབྱུང་ནམ་སྙིང་ཅི་འདྲར་བདག་གྱུར་ཅིག །

ཅེས་རང་གི་སློབ་མ་དད་པའི་དཔལ་གྱི་དྲག་ཏུ་འཚོ་བར་གྱུར་པ་དགའ་ལྡན་ཕུན་ཚོགས་རྟག་བརྟན་ཆོས་སྡེའི་སྐུ་མཚམས་པ་སྙིང་པོ་བརྟེན་པ་རབ་རྒྱས་དང་། རབ་བྱུང་བློ་བཟང་དཔལ་འབར་སོའི་ལྔའི་བླ་མ་ཀུན་བཟང་དངོས་གྲུབ་བཟང་པོ། ལྷོ་ཟམ་གསར་པའི་སྡེ་པ་ཚེ་དབང་བསོད་ནམས་རྒྱ་མཚོ། རང་དང་ཉེ་བར་སྤྱོད་པ་པདྨ་བསྟན་འཕེལ་རྣམས་ཀྱི་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་རང་ཉིད་ཀྱི་སྦས་ཡུལ་འབྲས་ལྗོངས་བྱང་ཕྱོགས་འབྲི་མཚམས་གསང་རིར་ཤིང་ཡོས་ནག་ཟླར་སྨྲས་པ་དགེའོ། །མངྒ་ལཾ།

༈ རྣལ་འབྱོར་དབང་ཕྱུག་ཚེ་དབང་ནོར་བུའི་གསོལ་འདེབས།

ཨོཾ་སྭཱསྟི། ཀུན་ཁྱབ་གཉུག་མའི་ཡེ་ཤེས་གདོད་མའི་མགོན། །ཀུན་བཟང་ཡེ་ཤེས་ཨ་ལི་ཀ་ལིའི་འཕྲེང་། །ཟུང་འཇུག་རང་རིག་བཅོམ་ལྡན་རྡོ་རྗེ་སེམས། །སྐུ་གསུང་ངོ་བོར་ཤར་ལ་གསོལ་བ་འདེབས། །ཐུགས་རྗེའི་སྒྱུ་འཕྲུལ་སྤྲུལ་པ་རྒྱ་མཚོའི་བདག །ཐུགས་ཀྱི་རྡོ་རྗེ་སྤྱོད་འཆང་ཀཧྣ་པ། །ནམ་མཁའ་སྙིང་པོ་རིན་ཆེན་རྡོ་རྗེ་འཛིན། །གྲུབ་པའི་འཁོར་ལོ་བསྒྱུར་དེར་གསོལ་བ་འདེབས། །བསྒོམ་ཚུལ་ནམ་མཁའ་འོད་དང་བྱམས་པ་མགོན། །བྱམས་པ་དཔལ་དང་ཙ་རི་རས་པའི་ཞབས། །རི་ཁྲོད་དར་མ་གཏེར་སྟོན་བྱང་ཆུབ་གླིང་། །སྤྲུལ་པའི་སྐྱེ་འཕྲེང་འཛིན་ལ་གསོལ་བ་འདེབས། །སྙིགས་དུས་འགྲོ་འདྲེན་ཤིང་རྟ་སྒྲོལ་བའི་མགོན། །མཉམ་མེད་ཐུགས་ཀྱི་ཡེ་ཤེས་རྒྱ་མཚོའི་སྡེ། །འགྲོ་བའི་དཔལ་དུ་འཆར་བ་ཡིད་བཞིན་མགོན། །རྡོ་རྗེ་ཚེ་དབང་ནོར་བུར་གསོལ་བ་འདེབས། །མགོན་ཁྱོད་མི་ཤིག་ཟག་མེད་དྭངས་མའི་སྐུར། །བསྐལ་བར་འགྲོ་བའི་དོན་དུ་བཞུགས་གསོལ་འདེབས། །བདག་སོགས་འགྲོ་ལ་སྨིན་གྲོལ་ཆོས་ཀྱི་སྐུ། །རྒྱུན་ཆད་མེད་པར་རྟག་ཏུ་བསྐོར་བར་ཤོག །གངས་ཅན་འགྲོ་ཀུན་བདེ་ཞིང་སྐྱིད་པ་དང་། །བསྟན་འཛིན་སྐྱེས་བུ་མཐའ་དག་ཕན་ཚུན་མཛའ། །ཆོས་ཀྱི་རྒྱལ་པོའི་ཆབ་སྲིད་མི་ཉམས་བརྟན། །རྫོགས་ལྡན་ཇི་བཞིན་རྒྱལ་ཁམས་བདེ་བར་ཤོག །དེ་སྐད་ཞྭ་ལུ་བླ་མ་དགེ་བའི་བཤེས། །རིན་ཆེན་འཇམ་དཔལ་དོན་གྲུབ་ཀྱིས་བསྐུལ་ངོར། །རིག་འཛིན་ཚེ་དབང་ནོར་བུས་ས་ལུག་གི །ཆུ་སྟོད་ཚེས་བཅུར་སྐད་ཅིག་གང་ཤར་སྤེལ། །ལྒང་ལ་ཤྲཱི་ཛྭ་ལ་ཛམྦུ་དཱི་པཱ་ལྐང་ར་བྷ་ཝནྟུ།

ཨོཾ་སྭཱསྟི། ཀུན་ཁྱབ་དང་པོའི་སངས་རྒྱས་ཀུན་ཏུ་བཟང་། །ངེས་སོ་ལྔ་ལྡན་རྒྱལ་བ་རྡོ་རྗེ་སེམས། །འགྲོ་འདུལ་ཐུབ་ཆེན་རྒྱལ་བ་པདྨ་འབྱུང་། །རིགས་བདག་སྐུ་གསུམ་བླ་མར་གསོལ་བ་འདེབས། །འཕགས་བོད་ཡུལ་དུ་གྲུབ་པ་ཡོངས་ཀྱི་རྒྱན། །སྤྱོད་འཆང་ནག་པོ་པ་དང་ནམ་མཁའ་སྙིང་། །ཁ་ཆེར་མཆོག་བརྙེས་རིག་འཛིན་བཛྲ་སོགས། །གྲུབ་མཆོག་དཔལ་ལྡན་བླ་མར་གསོལ་བ་འདེབས། །ཞང་སྲས་སྐྱེ་མེད་མངོན་གྱུར་ནམ་མཁའ་འོད། །ཙ་རི་རས་ཆེན་བྱང་ཆུབ་འབུམ་དཔལ་ལྡན། །ལུང་རྟོགས་དབང་ཕྱུག་ཀཿཐོག་བྱམས་པ་འབུམ། །བསྟན་པའི་སྒྲོན་མེ་བླ་མར་གསོལ་བ་འདེབས། །གྲགས་པ་དཔལ་དང་མ་དྷེ་པཎྜི་ཏ། །བྱང་ཆུབ་གླིང་པ་ཀུན་མཁྱེན་སངས་རྒྱས་འཕེལ། །དེ་སོགས་གང་འདུལ་སྤྲུལ་པའི་ཟློས་གར་མཁན། །དྲིན་ཆེན་བླ་མ་མཆོག་དེར་གསོལ༴ སྙིགས་ལྔ་བདོ་བའི་དུས་འདིར་ངེས་གསང་གི །བསྟན་པ་སྤེལ་སླད་འགྲོ་འདུལ་སྤྲུལ་པའི་སྐུ། །རིག་འཛིན་ཚེ་དབང་ནོར་བུ་རྒྱ་མཚོའི་སྡེ། །རྗེ་བཙུན་རྩ་བའི་བླ་མར་གསོལ་བ་འདེབས། །གང་ཁྱེད་བདག་སོགས་ཞིང་འདིའི་གདུལ་བྱའི་ཆེད། །བསྐལ་པ་རྒྱ་མཚོར་སྐུ་ཚེ་འཚོ་བཞེས་བསྟན། །མཛད་པ་ཡར་ལྡན་འཕྲིན་ལས་གོང་དུ་འཕེལ། །ཆོས་བརྒྱུད་འཛིན་པས་འཛིན་ལ་ཡོངས་ཁེངས་ཤོག །གཞན་ཡང་གངས་ཅན་སྐྱེ་དགུ་མཐའ་དག་ལ། །དགའ་བདེ་རྫོགས་ལྡན་ཇི་བཞིན་སྤྱོད་པ་དང་། །ཆོས་ཀྱི་རྒྱལ་པོའི་ཆབ་སྲིད་བསྟན་པ་དང་། །ངེས་དོན་སྙིང་པོའི་བསྟན་པ་དར་རྒྱས་ཤོག །

ཅེས་ཤར་ཕྱོགས་ཀོང་ཡུལ་སོའི་ཐིག་ལེ་ལྗོན་པ་ཀླུང་གི་བླ་མ་ཀུན་བཟང་འཕྲིན་ལས་ཀློང་གྲོལ་གང་གི་གསུང་གིས་བསྐུལ་ངོར་རིག་པ་འཛིན་པས་རྔ་ཆེན་ཆུ་སྟོད་ཟླ་བའི་ཡར་ངོ་མཁའ་འགྲོ་འདུ་བའི་དུས་ཆེན་ཚེས་བཅུ་ལ་སྐད་ཅིག་མར་སྨྲས་པ་དགེའོ། །

༈ རིག་འཛིན་རྗེའི་གསོལ་འདེབས།

ཨོཾ་སྭཱསྟི། ཀུན་ཁྱབ་འོད་གསལ་གཞོམ་མེད་རྡོ་རྗེ་མདངས། །ཨ་ཕྲེང་ཀ་ཕྲེང་ཟུང་འཇུག་ཡེ་ཤེས་གར། །རང་རིག་དང་པོའི་སངས་རྒྱས་ཀུན་ཏུ་བཟང་། །ཧེ་རུ་དཔལ་བླ་མར་སྐྱབས་སུ་མཆི། །ཐུབ་དབང་བསྟན་ལ་སྔགས་ཀྱི་འཁོར་ལོས་བསྒྱུར། །འོད་དཔག་མེད་དངོས་པད་འབྱུང་ཐུགས་ཀྱི་སྲས། །སྤྱོད་འཆང་ནག་པོའི་རྣམ་འཕྲུལ་ནམ་མཁའི་སྙིང་། །རིག་འཛིན་འཁོར་ལོས་བསྒྱུར་དེར་ཕྱག་འཚལ་ལོ། །གང་ཐུགས་ཆོས་ཉིད་སྤྲོས་པ་ལས་འདས་ཀྱང་། །སྨོན་ལམ་དབང་གི་སྒྱུ་དྲ་སྤྲུལ་པའི་གར། །རྒྱ་ཆེ་རྒྱུན་མའི་ཆད་པས་གདུལ་བྱ་རྣམས། །ཐར་པ་མཆོག་ལ་དཀྲི་དེར་མགོ་བོས་བཏུད། །བསམ་མིའི་ཁྱབ་ལས་མོས་ངོ་ཉི་ཚེ་བ། །རིན་ཆེན་རྡོ་རྗེ་ཚུལ་སྙིང་ནམ་མཁའ་འོད། །འབྱམས་འབུམ་དྲག་དཔལ་རྡོར་རྒྱལ་བྱང་ཆུབ་གླིང་། །སངས་རྒྱས་འཕེལ་སོགས་དམ་པ་རྣམས་ལ་འདུད། །གཞན་ཡང་བཟོད་དཔལ་བྲག་དཀར་སེམས་དཔའ་ཆེ། །འཇིགས་མེད་ཤིང་རྟ་ཨ་ནནྟ་གཪྦྷ། །དམ་པ་དེ་རྣམས་བྱིན་རླབས་ཉེར་ཞུགས་པ། །རིག་འཛིན་ཚེ་དབང་ནོར་བུར་གསོལ་བ་འདེབས། །དུས་གསུམ་རྒྱལ་བས་གསང་སྔགས་དོན་སྟོན་མཛད། །དེ་ནི་སངས་རྒྱས་ཀུན་ལས་ལྷག་ཅེས་བསྔགས། །དེས་ན་སྨིན་གྲོལ་དོན་སྟོན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །དུས་འདི་ནས་ཙམ་བདག་གི་ཚེ་རབས་ཀུན། །རིགས་བཟང་བློ་གསལ་ང་རྒྱལ་མེད་པ་དང་། །བསླབ་གསུམ་རྣམ་དག་བླ་མའི་དགྱེས་དགུ་བསྒྲུབ། །སྨིན་གྲོལ་ས་ལམ་ཡོན་ཏན་རྩལ་ཆེན་རྫོགས། །མཐོང་ཐོས་དྲན་རེག་འབྲེལ་བཅས་འགྲོ་བ་ཀུན། །སྡུག་བསྔལ་ལས་གྲོལ་ཐར་པ་མཆོག་ལ་བཞག །ཀུན་ཀྱང་འཕྱམས་གཅིག་ཟག་མེད་བདེ་བའི་དཔལ། །ཀུན་གཟིགས་རྒྱལ་བའི་གོ་འཕང་ལ་འཁོད་ཤོག །

ཅེས་མདོ་ཁམས་ལྗང་ཆུའི་ངོགས་བྲག་དམར་གྱི་བླ་མ་ཀུན་བཟང་འཕྲིན་ལས་ཀྱི་གསེར་གྱི་མེ་ཏོག་དང་གསོལ་བ་བཏབ་པའི་ངོར་ས་འབྲུག་ས་ག་ཟླ་བའི་ཚེས་བཅུ་ལ་བལ་ཡུལ་མཆོད་རྟེན་ཆེན་པོ་བྱ་རི་ཁ ཤོར་གྱི་ངོགས་སུ་ད་སནྟཱ་རི་ཤྲཱི་ཤྲཱི་རིག་པ་འཛིན་པ་ཚེ་དབང་ནོར་བུས་སྨྲས་པའོ། །སརྦ་མངྒ་ལཾ།

༈ ཀཿཐོག་རིག་འཛིན་ཚེ་དབང་ནོར་བུའི་གསོལ་འདེབས།

ཨོཾ་སྭཱསྟི། ཀུན་བཟང་ཧེ་རུ་ཀ་དང་གཉིས་མེད་མགོན། །དཔའ་བོ་ཐུགས་ཀྱི་རྡོ་རྗེར་གསོལ་བ་འདེབས། །ལུང་རྟོགས་བསྟན་པའི་རྩ་ལག་རྨད་བྱུང་བ། །རྒྱལ་སྲས་ཤནྟ་དེ་ཝར་གསོལ་བ་འདེབས། །བརྟུལ་ཞུགས་རོལ་པའི་གར་གྱི་འཛམ་གླིང་རྒྱན། །གྲུབ་ཐོབ་ནག་པོ་སྤྱོད་པར༴ ཕྱག་རྒྱ་ཆེ་མཆོག་རིག་འཛིན་སར་གཤེགས་པ། །བོད་གྲུབ་ནམ་མཁའ་སྙིང་པོར༴ གནས་ལྔ་ཀུན་རིགས་དྲེགས་པ་བྲན་དུ་བཀོལ། །རོང་ཟོམ་ཆོས་ཀྱི་བཟང་པོར༴ རྫོགས་ཆེན་སྙིང་ཐིག་ཉིན་ལྟར་བརྡལ་མཛད་མགོན། །དྲི་མེད་འོད་ཟེར་འཕྲོ་དེར༴ རྣམ་སྨིན་རིག་འཛིན་མཆོག་བརྙེས་མཁྱེན་པའི་གཏེར། །རྗེ་བཙུན་སྒྲོལ་བའི་མགོན་པོར༴ ཀུན་ཀྱང་ལས་ལུས་མ་ཡིན་སྤྲུལ་པའི་གར། །སྨོན་ལམ་དབང་གི་འགྲོ་བའི་དོན་མཛད། །རླབས་ཆེན་རྒྱལ་བའི་འཕྲིན་ལས་བྱེད་པ་པོ། །ཡང་ཡང་སྐྱེ་བའི་འཕྲེང་བ་སྟོན་དེར་འདུད། །བཀའ་དྲིན་གསུམ་ལྡན་རྡོ་རྗེ་སློབ་དཔོན་ནི། །རྒྱལ་ཀུན་ངོ་བོར་རྒྱལ་བས་ཡོངས་བསྔགས་ན། །རྡོ་རྗེ་འཛིན་དབང་དེ་ཀུན་དུས་འདི་རུ། །རྩ་བའི་བླ་མར་ཤེས་བཞི་གསོལ་བ་འདེབས། །དཔལ་ལྡན་བླ་མར་སྙིང་ནས་གསོབ་བཏབ་མཐུས། །བྱང་ཆེན་གྲངས་མེད་ལམ་ལ་མི་ལྟོས་པར། །སྐྱེ་བ་གཅིག་ལ་ལམ་ལྔ་ས་བཅུ་རྫོགས། །བྱང་ཆུབ་ཆེན་པོའི་འབྲས་བུ་མྱུར་ཐོབ་ཤོག །གནས་སྐབས་ཚེ་རིང་ནད་མེད་འབྱོར་པ་རྒྱས། །དབང་ཕྱུག་ཆེ་ཐོབ་འདོད་དོན་འབད་མེད་འགྲུབ། །བྱ་བྱེད་ཀུན་ཀྱང་བྱང་ཆེན་ལམ་དུ་གཞོལ། །འབྲེལ་བཅས་གཏན་བདེ་མཆོག་ལ་བཀོད་པར་ཤོག །སྨོན་ལམ་དེ་དག་བསླུ་མེད་ཉིད་འགྲུབ་པར། །དཀོན་མཆོག་ཀུན་འདུས་བླ་མེད་བྱིན་གྱིས་རློབས། །

ཞེས་རྒྱལ་པོ་དད་པ་དང་ལྡན་པ་ཨཱ་ན་ཐ་ཡི་དད་པའི་རྟེན་དཔལ་ནམ་མཁའ་སྙིང་པོའི་སྐུ་བརྙན་རི་མོར་བཀོད་པའི་རྒྱབ་བྱང་དུ་རིག་པ་འཛིན་པ་ཚེ་དབང་ནོར་བུས་རབ་མྱོས་ལྕགས་རྟ་གསར་དུ་འཆར་བ་ཆོ་འཕྲུལ་ཟླ་བའི་ཡར་ཚེས་བཞི་ལ་མངའ་རིས་སྨད་ཀྱི་རྒྱལ་ཕྲན་སྨོན་ཐང་གི་ཁབ་ཏུ་བརྗོད་པ་ལའོ། །སརྦ་མངྒ་ལཾ།

༈ རིག་འཛིན་རྗེའི་གསོལ་འདེབས་བསྡུས་པ།

པདྨ་ཀ་རས་རྒྱལ་ཚབ་དབང་བསྐུར་བས། །སྨོན་ལམ་མཐུ་ཡི་སངས་རྒྱས་བསྟན་སྲོག་འཛིན། །ཕྲིན་ལས་འགྲོ་འདུལ་སྤྲུལ་པའི་རིག་པ་འཛིན། །ཚེ་དབང་ནོར་བུའི་དཔལ་ལ་གསོལ་བ་འདེབས། །མངྒ་ལཾ།

༈ རིག་འཛིན་ཆེན་པོའི་གསོལ་འདེབས་བསྡུས་པ།

དུས་གསུམ་རྒྱལ་ཀུན་ངོ་བོ་པདྨ་ཡི། །ཐུགས་ཀྱི་འོད་ཟེར་འགྲོ་འདུལ་ནོར་བུ་མཆོག །དྲི་མེད་རྡོ་རྗེ་བསམ་བཞིན་སྤྲུལ་པའི་སྐུ། །རྩ་བའི་བླ་མའི་ཞབས་ལ་གསོལ་བ་འདེབས། །ཁྱེད་ཀྱི་ཐུགས་རྗེས་ཡེ་ཤེས་གཟི་བྱིན་གྱིས། །བདག་གི་འཁྲུལ་རྟོག་སྒྲིབ་པའི་ཕྱོགས་ཀུན་བསལ། །རང་རིག་ཡེ་ཤེས་རྒྱལ་བའི་དགོངས་པ་རྟོགས། །དོན་གཉིས་ལྷུན་གྲུབ་ས་ཟིན་བྱིན་གྱིས་རློབས། །

མེ་ལུག་ལོར་ཚེ་དབང་དང་ཚེ་རིང་ལྷུན་གྲུབ་ལ་གནང་་བའོ། །

༈ གསོལ་འདེབས་རྒྱལ་ཀུན་ཐུགས་ཕྲིན་གཅིག་བསྡུས།

ཨོཾ་ཨཱ༔་ཧཱུྃ རྒྱལ་ཀུན་ཐུགས་འཕྲིན་གཅིག་བསྡུས་རྡོ་རྗེའི་ཆོས། །མཚོ་སྐྱེས་པདྨ་འབྱུང་གནས་འཕྲིན་ལས་ཀྱི། །ཕོ་ཉར་གྱུར་ཞིང་ཐུགས་དང་དབྱེར་མེད་པ། །གྲུབ་ཆེན་ནམ་མཁའ་སྙིང་པོར་གསོལ་བ་འདེབས། །གང་གི་རྗེས་ཆགས་འགྲོ་འདུལ་སྤྲུལ་པ་ཡི། །ཟློས་གར་ཅིར་ཡང་སྟོན་ལས་ད་དུས་འདིར། །ཐུགས་ཀྱི་འོད་མདངས་ཚེ་དབང་ནོར་བུའི་སྡེ། །རིག་པ་འཛིན་མཆོག་དེ་ལ་གསོལ་བ་འདེབས། །འགྲོ་བའི་སྣང་ངོར་དག་དང་མ་དག་པ། །ཇི་ལྟར་སྣང་ཡང་རང་ངོར་ལྐོག་འགྱུར་ནས། །གཞན་མེད་འབྲེལ་ཚད་དོན་ལྡན་ནུས་པའི་མཐུ། །ཐོབ་པར་གྱུར་པ་དེ་ལ་གསོལ་བ་འདེབས། །གང་ཁྱེད་ཆོས་གཉིས་དབྱིངས་ལས་མ་གཡོས་ཀྱང་། །རང་མདངས་གདུལ་བྱའི་དོན་དུ་ཞི་ཆགས་ཁྲོ། །འཕྲིན་ལས་བཞི་ཡི་རོལ་གར་དཔག་མེད་པ། །རྒྱུན་ཆད་མེད་པར་སྟོན་ལ་གསོལ་བ་འདེབས། །མདོར་ན་དད་ལྡན་སློབ་མས་ཁ་ཞེའི་ཚིག །སོ་སོར་མེད་པར་རྩེ་གཅིག་གསོལ་བཏབ་ན། །མཆོག་འབྲས་བདེ་བླག་སྟེར་བར་སོམ་ཉི་མེད། །དེས་ན་གསོལ་འདེབས་བདག་རྒྱུད་བྱིན་གྱིས་རློབས། །

ཞེས་གློ་བོ་ཆོས་རྒྱལ་མ་ལ་དཔལ་གྱི་གདུང་རིགས་དྲི་མ་མེད་པ་ལས་འཁྲུངས་པའི་དད་དམ་ཤེས་རབ་ཀྱི་ནོར་ལྡན་ཞབས་དྲུང་གཙུག་རྒྱན་ནོར་བུའི་གསུང་གིས་བསྐུལ་བ་དང་། གཞན་ཡང་ས་བདག་བླ་མ་ཀུན་བཟང་རྣམ་རྒྱལ་དང་། བར་ཕུག་སྦྱིན་བདག་ཡོན་ཏན་སོགས་དོན་གཉེར་མང་པོས་ནན་ཏུ་བསྐུལ་ངོར་ཚེ་དབང་ནོར་བུ་རང་ཉིད་ཀྱི་སྨྲས་པའི་ཡིག་རིས་སྤྲུལ་པའི་སྐུ་འཕྲིན་ལས་བསྟན་འཛིན་གྱིས་མཛད་དོ། །

༈ གསོལ་འདེབས་རྒྱལ་བ་ཡོངས་ཀྱི་ཐུགས་རྗེ།

ཨོཾ་རྒྱལ་བ་ཡོངས་ཀྱི་ཐུགས་རྗེ་ཕྲིན་ལས་དཔལ། །ཚིག་བསྡུས་ཨོ་རྒྱན་མཚོ་སྐྱེས་པདྨ་འབྱུང་། །ཐུགས་ཀྱི་རྣམ་རོལ་གནུབ་ཆེན་ནམ་མཁའ་སྙིང་། །གང་གི་སྙིགས་དུས་འགྲོ་ལ་ཕན་བཞེད་ནས། །དཔག་མེད་སྤྲུལ་པར་འཆར་ལས་ཆ་ཤས་གཅིག །ངེས་སྟོན་བསྟན་ལ་མི་ཕྱེད་སྙིང་སྟོབས་ཅན། །རིག་འཛིན་ཚེ་དབང་ནོར་བུ་རྒྱ་མཚོའི་སྡེ། །གང་ཁྱེད་ཁམས་དྲུག་རྡོ་རྗེའི་སྐུ་འདི་ཉིད། །དག་སོགས་སྣང་ངོར་འགོག་མེད་བརྟེན་འདི་ཡི། །འཕོ་ཆེན་ཟུང་འཇུག་སྐུ་མཆོག་ནས་བརྙེས་བར། །སྐུ་ཚེ་རྟག་བརྟན་ཐེར་ཚུལ་མི་ཕྱེད་པ། །མགོན་པོ་འོད་དཔག་མེད་ལྟར་བཞུགས་གྱུར་ཅིག །ངེས་དོན་སྙིང་པོ་མཐར་ཐུག་རྫོགས་ཆེན་གྱི། །བསྟན་པ་ཕྱོགས་ཀུན་དར་རྒྱས་ཡུན་རིང་གནས། །ཚེ་དབང་ནོར་བུའི་ཐེག་ཆེན་སྨོན་ལམ་གང་། །བཏབ་ཀུན་བསླུ་མེད་ཕུན་ཚོགས་མྱུར་འགྲུབ་ཤོག །བདག་སོགས་སྐྱེ་བ་ཀུན་ཏུ་མགོན་པོ་མཆོག །པད་འབྱུང་ནམ་སྙིང་དངོས་རྒྱུད་སྤྲུལ་པའི་སྐུ། །རྗེས་བཟུང་རྡོ་རྗེ་སྙིང་པོ་དགའ་སྟོན་ལ། །རབ་སྤྱོད་བྱང་ཆུབ་སྙིང་པོ་ཡོངས་ཐོབ་ཤོག །

ཅེས་གུས་ཅན་མང་པོས་སྐུལ་ཞིང་རྟེན་འབྲེལ་ལ་ཡང་བབས་པ་བཅས་རྣལ་འབྱོར་པ་ཚེ་དབང་ནོར་བུ་རང་ཉིད་ཀྱིས་ཆུ་གླང་མགོ་ཟླའི་ཉེར་གསུམ་ལ་གཙང་རུ་ལག་འབྲས་སྤུངས་སུ་སྨྲས་པ་སརྦ་མངྒ་ལཾ།

༈ རྗེ་ཉིད་ཀྱི་ཞབས་བརྟན་གསོལ་འདེབས།

ཨོཾ་སྭཱསྟི། བཀྲ་ཤིས་ཀུན་ཏུ་དགེ་བ་ཆོས་ཀྱི་དབྱིངས། །དབྱིངས་ཉིད་གཡོ་བ་མེད་པ་བདེ་གཤེགས་སྙིང་། །སྙིང་པོ་དྲི་མ་བྲལ་བ་དེ་བཞིན་གཤེགས། །གཤེགས་པ་བཅོམ་ལྡན་རྒྱལ་དེས་རྟག་ཏུ་བསྲུང་། །བསོད་ནམས་ཕུང་པོ་དཔག་བསམ་ལྗོན་པའི་དབང་། །ཡེ་ཤེས་དཀྱིལ་འཁོར་མཁའ་དབྱིངས་དབུས་སུ་བརྡོལ། །དྲི་མེད་དགེ་བའི་ལོ་འདབ་རབ་ཏུ་གཡུར། །ཕུན་ཚོགས་འབྲས་བུ་གཡུར་དེ་དགེ་ལེགས་མཛོད། །ནམ་མཁའི་མཐའ་སྙམ་འགྲོ་བ་མ་ལུས་ཀུན། །གཏན་བདེ་བྱང་ཆུབ་ས་ལ་མ་བཞག་པར། །རྒྱལ་བའི་སྲས་པོ་ཚེ་དབང་ནོར་བུ་གང་། །འགྲོ་བའི་དོན་དུ་འཚོ་ཞིང་བཞེས་གྱུར་ཅིག །བཀྲ་ཤིས་མཆོག་ཀུན་ཁྱབ་པ་ནམ་མཁའི་ཁམས། །ཁམས་ཉིད་འགྱུར་བ་མི་མངའ་རྟག་ཅིང་བརྟན། །བརྟེན་གཡོ་ཀུན་ལ་ཁྱབ་པ་ངོ་བོ་དཔལ། །དཔལ་དེས་བདག་ཅག་རྣམས་ལ་རྟག་ཏུ་བསྲུང་། །

ཞེས་རང་གི་སློབ་མ་ཀུན་སྤང་པ་ཀུན་བཟང་ངེས་དོན་དབང་པོས་སམ་བྷོ་ར་ཞིག་བྱིན་པར་ཐོག་མ་དགེ་ལེགས་ཀྱི་ཆེད་དུ་གང་ཉམས་ཚར་གྱི་ལག་པའི་རོལ་རྩེད་དུ་གྲོ་ཞུན་ཟླ་བའི་དམར་ཕྱོགས་ཀྱི་དགའ་བ་ལ་རུ་ལག་འབྲས་སྤུངས་གང་དེར་སྤེལ་བ་དགེ། །མངྒ་ལཾ། དགེའོ། །དགེའོ། །དགེའོ། །

༈ གསོལ་འདེབས་རྒྱལ་བ་རྒྱ་མཚོ།

ཨོཾ་སྭཱསྟི། རྒྱལ་བ་རྒྱ་མཚོ་འདུས་པའི་སྤྱི་གཟུགས་མཆོག །ཧེ་རུ་ཀ་དཔལ་པདྨ་ཐོད་ཕྲེང་རྩལ། །ཐུགས་ཀྱི་ཡེ་ཤེས་རང་མདངས་ནམ་མཁའ་སྙིང་། །དཔའ་བོ་ཐུགས་ཀྱི་རྡོ་རྗེར་གསོལ་བ་འདེབས། །གང་གི་བྱིན་གྱིས་རླབས་ལ་སྤྲུལ་པའི་སྐུ། །པད་འབྱུང་ཟབ་གཏེར་ཁ་བྱང་འཛིན་མངའ་གསོལ། །སྦས་ཚུལ་རྣལ་འབྱོར་གང་འདུལ་སྤྱོད་པ་སྐྱོང་། །རིག་འཛིན་ཚེ་དབང་ནོར་བུར་གསོལ་བ་འདེབས། །དེ་ལྟར་རྩ་བའི་བླ་མར་གསོལ་བཏབ་ན། །མཆོག་ཐུན་དངོས་གྲུབ་ཡིད་བཞིན་འགྲུབ་པ་ཞེས། །རྡོ་རྗེ་ཐེག་པར་རྒྱ་ཆེར་སྒྲོགས་པ་ན། །བདག་གི་གསོལ་འདེབས་དེ་བཞིན་དངོས་གྲུབ་སྩོལ། །ཚེ་རབས་ཀུན་ཏུ་མགོན་ཁྱོད་རྗེས་བདག་བཟུང་། །དམ་ཚིག་སེལ་མེད་བླ་མའི་དགྱེས་དགུ་བསྒྲུབ། །ས་ལམ་ཡོན་ཏན་ཡར་ངོའི་ཟླ་ལྟར་འཕེལ། །ཚོམ་བུ་གཅིག་ཏུ་བྱང་ཆུབ་ཆེ་བརྙེས་ཤོག །

ཅེས་རིག་འཛིན་ཚེ་དབང་ནོར་བུས་ཏེ་ཡེར་ས་ཀླུ་ཕུག་གོང་དུ་བྲིས་པའོ། །སརྦ་མངྒ་ལཾ། ཤངས་འབར་ར་ཡི་གདན་ས་བ་འཇམ་གླིང་བླ་མའི་ཐུགས་དམ་ཙན་ཙཀཱ་འདིའི་རྒྱབ་ཡིག་ཏུ་བྲིས་གདའ།

༈ གསོལ་འདེབས་འཛམ་གླིང་མ།

ཨོཾ་སྭཱསྟི། འཛམ་གླིང་འདི་ན་གྲུབ་པ་ཀུན་གྱི་གཙོ། །རྒྱལ་བ་ཤཱཀྱའི་རྒྱལ་ཚབ་པདྨ་འབྱུང་། །གང་གི་ཕོ་ཉ་གནུབ་ཆེན་ནམ་སྙིང་གི །ཤེས་རྒྱུད་བྱིན་གྱིས་བརླབསནས་སྤྲུལ་པའི་སྐུར། །གྲགས་པས་གངས་རི་འཛིན་མ་ཡོངས་ཁེངས་ཤིང་། །ལྐོག་འགྱུར་གཞན་མེད་རང་གཞན་དོན་གཉིས་མཆོག །བསྒྲུབ་ལ་ཚེས་བརྩོན་ཚེ་དབང་ནོར་བུ་ཞེས། །བསྐལ་བརྒྱར་འཚོ་བཞེས་ཞབས་པད་བརྟན་གསོལ་འདེབས། །ཁྱོད་ལ་འདོད་དོན་གསོལ་བ་བཏབ་འདིའི་མཐུས། །རེ་བ་ཇི་བཞིན་འགྲུབ་ཅིང་གང་ཁྱོད་ཀྱིས། །བྱང་ཆུབ་མཆོག་ཐུགས་བསྐྱེད་ནས་ཐེག་ཆེན་གྱིས། །སྨོན་ལམ་བཏབ་ཀུན་བདག་གི་འགྲུབ་པར་ཤོག །

ཅེས་རྩ་བའི་བླ་མ་རྫོང་ཕུ་སྤྲུལ་པའི་སྐུའི་བཀའ་རྩལ་ཐོད་དུ་བཅིང་ནས་བྱ་བྲལ་རིག་པ་འཛིན་པ་ཚེ་དབང་ནོར་བུས་སྨྲས་པའི་ཡིག་རིག་མཁས་མཆོག་དམ་པ་འཕྲིན་ལས་བསྟན་འཛིན་ནོ། །

༈ གསོལ་འདེབས་རྒྱལ་བ་ཀུན་གྱི་ཡེ་ཤེས།

ཨོཾ་སྭཱསྟི། རྒྱལ་བ་ཀུན་གྱི་ཡེ་ཤེས་འདུས་པའི་གར། །མཚུངས་མེད་བླ་མ་མཚོ་སྐྱེས་རྡོ་རྗེ་སེམས། །གཉིས་མེད་ཐུགས་ཀྱི་རོལ་རྩལ་ནམ་མཁའི་སྙིང་། །སྙིང་ནས་གསོལ་འདེབས་བདག་རྒྱུད་བྱིན་གྱིས་རློབས། །ཚེ་རབས་རྟག་གུ་མགོན་ཁྱོད་རྗེས་སུ་བཟུང་། །མ་ནོར་ཐེག་ཆེན་སྔགས་ལམ་ཚུལ་ཁྲིམས་དག །ས་ལམ་ཡོན་ཏན་རྩལ་རྫོགས་རྡོར་སེམས་ཀྱི། །གོ་འཕང་ཐོབ་ནས་འགྲོ་ཀུན་འདྲེན་པར་ཤོག །

ཅེས་དད་ལྡན་རབ་འབྱམས་པ་འཇམ་དར་དང་འབའ་རོ་ཚོགས་བདག་ཡར་འཕེལ་ཟུང་གི་གསོལ་བ་བཏབ་པའི་ངོར་ཚེ་དབང་ནོར་བུས་སྤེལ་བ་མངྒ་ལཾ།

༈ གསོལ་འདེབས་ཀུན་མཁྱེན་ཆོ་རོལ།

ཨོཾ་སྭཱསྟི། ཀུན་མཁྱེན་ཆོ་རོལ་ཨཱ་ལི་ཀཱ་ལིའི་འཕྲེང་། །མི་འགྱུར་བདེ་ཆེན་སྙིང་པོ་པདྨ་འབྱུང་། །གདལ་བྱའི་དོན་དུ་རྩ་བའི་བླ་མའི་སྐུ། །དྲན་མཆོག་དྭངས་མའི་མགོན་པོར་གསོལ་བ་འདེབས། །སརྦ་མངྒ་ལཾ།

འབྲས་སྤུངས་ནས་སྒྲོལ་མ་ལ་གནང་བའོ། །

༈ གསོལ་འདེབས་འཆི་མེད་མགོན་པོ།

ཨོཾ་སྭཱསྟི། འཆི་མེད་མགོན་པོ་པདྨ་བཛྲ་ཡི། །རྡོ་རྗེའི་བསྲུང་གི་དབུགས་དབྱུང་རྒྱལ་བའི་སྲས། །ཐ་མལ་ལྕགས་ཁམས་ཡེ་ཤེས་གསེར་འགྱུར་ཞིང་། །ཇི་བཞིན་རྒྱས་བཏབ་སྔགས་ཀྱི་རྣལ་འབྱོར་པ། །ཚེ་དབང་ནོར་བུ་འཕྲིན་ལས་འགྲོ་འདུལ་གྱི། །གཟུགས་སྐུའི་སྣང་བརྙན་འགག་མེད་འཚོ་ཞིང་བརྟན། །མཛད་འཕྲིན་བཟང་པོ་ཡར་ངོའི་ཟླ་ལྟར་འཕེལ། །ཐེག་ཆེན་སྨོན་ལམ་བཏབ་ཀུན་ཡོངས་འགྲུབ་ཤོག །

ཅེས་སྔ་འགྱུར་རྒྱལ་བའི་རིང་ལུགས་བསྟན་པའི་གསལ་བྱེད་སྒྲོལ་ཕུག་པ་ཆེན་པོའི་གསུང་གི་ངོར་མགོ་ཟླ་བའི་ཚེས་བཅུར་ཀོང་ཡུལ་རྩ་གང་དུ་རིག་འཛིན་ཚེ་དབང་ནོར་བུས་བརྗོད་པའོ། །མངྒ་ལཾ།

༈ གསོལ་འདེབས་བདེ་ཆེན་ཁམས་གང་།

ཨོཾ་སྭཱསྟི། བདེ་ཆེན་ཁམས་གང་སེམས་ཅན་བརྒྱུད་ལ་ལྟར། །སྤྱོད་འཆང་ཀཧྣ་དང་ནམ་མཁའ་སྙིང་། །རིན་ཆེན་རྡོ་རྗེ་སྒྲོལ་བའི་མགོན་པོ་ཡིས། །རྗེས་སུ་བཟུང་ལ་སྤྲུལ་པའི་རྣམ་རོལ་ཚུལ། །སྙིགས་དུས་གདུལ་བྱར་རང་གཟུགས་ཀྱིས་འདུལ་བ། །ཕྱི་ནང་རིག་པའི་གནས་དང་གནས་ལུགས་དོན། །ཡོངས་འཛིན་གུ་རུ་འཕྲིན་ལས་འགྲོ་འདུལ་ཞེས། །རིག་འཛིན་ཚེ་དབང་ནོར་བུར་གསོལ་འདེགས་ཀྱི། །འཆི་མེད་རྡོ་རྗེ་སྐུ་རུ་གྲུབ་པ་ཡིས། །གདུལ་བྱའི་དཔལ་དུ་འཕོ་འགྱུར་མེད་པ་དང་། །ཐེག་ཆེན་སྨོན་ལམ་བཟང་པོ་ཇི་བཏབ་པ། །བསླུ་མེད་དགེ་འབྲས་ད་ལྟ་ནས་སྨིན་ཤོག །

ཅེས་ཀོང་ཡུལ་དུང་མདོ་ཡི་ཁྱིམ་བདག་འབྱོར་པས་ཕྱུག་ཅིང་དད་པའི་དཔལ་དང་ལྡན་པ་ཚེ་དབང་ཆོས་འཕེལ་མཆོག་རྒྱས་དང་། རྣམ་རྒྱལ་བཀྲ་ཤིས་མཆེད་ཀྱི་གསོལ་བ་བཏབ་པའི་ངོར་ས་རྟ་མགོ་ཟླའི་ཚེས་ཉེར་གཅིག་ལ་གནས་དེ་ཉིད་དུ་ཚེ་དབང་ནོར་བུས་བརྗོད་པའོ། །མངྒ་ལཾ།

༈ གསོལ་འདེབས་འགྱུར་མེད་མཁའ་འདྲ།

ཨོཾ་སྭཱསྟི། དཔལ་བླ་མའི་སྐུ་ནི་འགྱུར་བ་མེད། །མཁའ་འདྲ་སྐྱེ་འཆི་གཞོམ་ཞིག་སྤྲོས་དང་བྲལ། །གདུལ་བྱའི་མོས་ངོར་ཡང་ནི་འོད་སྣང་མགོན། །ཇི་བཞིན་སྐུ་ཚེ་བརྟན་པར་གསོལ་བ་འདེབས། །དཔལ་ལྡན་བླ་མའི་གསུང་གི་ནཱ་དིའི་སྒྲ། །གང་གི་རྒྱུན་ལྟར་ཆད་མེད་རྡོ་རྗེའི་དབྱངས། །གདུལ་བྱའི་མོས་ངོར་ཡང་ནི་སྣང་མཛད་གསུང་། །ཇི་བཞིན་ཆད་པ་མེད་པར་གསོལ་བ་འདེབས། །དཔལ་ལྡན་བླ་མའི་ཐུགས་ནི་གསལ་གྲིབ་བྲལ། །འཕོ་མེད་བདེ་ཆེན་རྡོ་རྗེའི་ངོ་བོ་ཉིད། །གདུལ་བྱའི་མོས་ངོར་ཡང་ནི་རྒྱལ་བའི་ཐུགས། །ཡུན་ནས་ཡུན་བཞིན་བསྟན་པར་གསོལ་བ་འདེབས། །དཔལ་ལྡན་བླ་མའི་སྐུ་གསུང་ཐུགས་རང་བཞིན། །ཡེ་ནས་རྡོ་རྗེ་གསུམ་དུ་གནས་མོད་ཀྱི། །གདུལ་བྱའི་མོས་ངོར་ཡང་ནི་རྡོ་རྗེ་བཞིན། །བསྐལ་པ་རྒྱ་མཚོར་འཚོ་བཞེས་བཞུགས་གསོལ་འདེབས། །སྙིགས་མའི་དུར་འདིར་སངས་རྒྱས་ཐམས་ཅད་ཀྱི། །འཕྲིན་ལས་གཅིག་ཏུ་མཛད་པ་རྡོ་རྗེ་འཛིན། །བདག་ལ་སངས་རྒྱས་ལས་ལྷག་བཀའ་དྲིན་ཅན། །རྩ་བའི་བླ་མ་བསྐལ་བརྒྱར་བསྟན་བཞུགས་གསོལ། །སངས་རྒྱས་བྱང་སེམས་ཉན་རང་འཕགས་པའི་ཚོགས། །འགྲོ་བའི་དོནལ་གང་དུ་སུ་བཞུགས་དང་། །ཚེ་རབས་རྟག་ཏུ་འདྲེན་པ་དཔལ་མགོན་མཆོག །དཔལ་ལྡན་བླ་མ་འཆི་མེད་བསྟན་བཞུགས་གསོལ། །བདག་ནི་ཚེ་རབས་ཚེ་བརྒྱུད་ཐམས་ཅད་དུ། །སྐྱེས་བུ་མཆོག་རྣམས་སྐུ་ཚེ་བསྟན་བཞུགས་ཀྱི། །གསོལ་འདེབས་བྱེད་པོ་འཕགས་པ་ཙུནྡ་བཞིན། །རྟག་ཏུ་སྐྱེ་ཞིང་སྨོན་ལམ་ཐོབ་གྱུར་ཅིག །དགེ་བ་དེས་ཀྱང་མཁའ་མཉམ་འགྲོ་བ་རྣམས། །འཆི་བདག་འཁོར་བའི་སྤུང་ལས་ཡོངས་རྒྱལ་ཏེ། །འཆི་མེད་བདེ་ཆེན་རྡོ་རྗེར་བཙན་ས་མཆོག །རིང་མིན་མྱུར་བ་ཉིད་དུ་ཐོབ་གྱུར་ཅིག །དེ་སྐད་ཀོང་ཡུལ་ས་ཡི་ཐིག་ལེ་མཆོག །བུ་ཆུ་ཞེས་གྲགས་རང་འབྱུང་འཕགས་པ་ཡི། །སྤྲུལ་པའི་གཙུག་ལག་ཁང་གི་རྩོག་ཏུ། །ཆུ་ཕག་ནག་པ་ཟླ་བའི་ཚེས་བཟང་པོར། །རིག་པ་འཛིན་པ་ཚེ་དབང་ནོར་བུ་ཡི། །བསྐལ་བཟང་དམ་ལྡན་རྡོ་རྗེ་སློབ་མ་ཟུང་། །ཚེ་དབང་ཕུན་ཚོགས་ཚེ་དབང་ཕྱོགས་རྒྱས་ཀྱི། །ལྷག་བསམ་དག་པས་ར་ས་ཡ་ན་ཡི། །སྒྲུབ་ཆེན་སྐབས་སུ་འཕྲོ་ལ་གསོལ་འདེབས་ཞིག །དགོས་ཞེས་བསྐུལ་ངོར་སྨྲས་པ་དགེ་ལེགས་ཤོག །སརྦ་མངྒ་ལཾ།

༈ དཔལ་ལྡན་བླ་མའི་བརྟན་བཞུགས་ཀུན་ཁྱབ་རྡོ་རྗེའི་གླུ་དབྱངས་ཞེས་བྱ་བ་བཞུགས་སོ། །

ཨོཾ་སྭཱསྟི། ཀུན་ཁྱབ་མི་ཤིག་གདོད་མའི་ཡེ་ཤེས་ཁམས། །མ་སྐྱེས་འགགས་མེད་སྒྱུ་འཕྲུལ་རྒྱ་མཚོ་བདག །རང་རིག་སྟོང་གསལ་དོན་དམ་བླ་མ་མཆོག །ལྷན་སྐྱེས་ཆོས་ཀྱི་འཁོར་ལོར་བརྟན་བཞུགས་གསོལ། །ཅིར་སྣང་ཆོས་ཀུན་བརྡའ་ཡི་ཡེ་ཤེས་ཏེ། །གང་ལྟར་རྟོགས་ཚོགས་དྲྭ་ཝ་རང་སར་གཅོད། །འཁྲུལ་སྤངས་རང་གསལ་བརྡའ་ཡི་བླ་མ་མཆོག །དབང་ཡིད་ཡུལ་དུ་རྟགས་པར་བརྟན་བཞུགས་གསོལ། །དཔེ་མེད་བསམ་བྲལ་གདོད་མའི་ཡེ་ཤེས་ཉིད། །ཐབས་མཁས་རྒྱལ་བས་བརྡའ་ཐབས་ཚིག་གི་ཡུལ། །ཉེར་མཚོན་བྱིན་རླབས་དོན་རྒྱུད་བླ་མ་མཆོག །འཕོ་མེད་བདེ་ཆེན་འཁོར་ལོར་བརྟན་བཞུགས་གསོལ། །དོན་བརྒྱུད་རྩ་བའི་བླ་མ་བྱིན་རླབས་ཅན། །ཅིར་སྣང་བརྡའ་ཡི་བླ་མ་རང་གྲོལ་མཁན། །དོན་དམ་གཤིས་ཀྱི་བླ་མ་རང་རིག་དངོས། །བླ་མ་རྣམ་གསུམ་འབྲེལ་མེད་བརྟན་བཞུགས་གསོལ། །ཅིར་སྣང་ཆོས་ཉིད་རང་མདངས་བདེ་བ་ཆེ། །ངོ་བོ་བསམ་གྱིས་མི་ཁྱབ་ཆོས་ཀྱི་སྐུ། །གང་འདུལ་འགྲོ་ཀུན་དགེ་ལེགས་སྟོན་མཛད་མགོན། །རྩ་བའི་བླ་མ་བསྐལ་བརྒྱར་ཞབས་བརྟན་གསོལ། །འཕོ་བཅས་རྟོགས་ཚོགས་དྲི་མ་ཡོངས་དག་པ། །འཕོ་མེད་མི་འགྱུར་བདེ་བ་ཀུན་ཏུ་བཟང་། །འཆི་མེད་དོན་དམ་བདེན་པ་རྡོ་རྗེའི་ཚེ། །དེ་སྲིད་མངོན་གྱུར་བར་དུ་སྣང་བའི་ཚུལ། །དཔོན་སློབ་མི་འབྲལ་ལྷན་ཅིག་དགྱེས་དགུ་སྤྱོད། །སྲིད་བཞི་ཕུན་ཚོགས་དཔལ་ཀུན་འཕེལ་བར་ཤོག །

ཅེས་པ་ཡང་ཤར་ཕྱོགས་ཤིང་ལོའི་ཚལ་ཀོང་ཡུལ་འཆིམ་གྱི་མི་ཡི་བདག་པོ་སྔགས་སྤྱོད་ཚེ་དབང་དགེ་ལེགས་ཕུན་ཚོགས་བསོད་ནམས་རབ་བརྟན་བཟང་པོའི་སྡེ་གང་གི་གསོལ་བ་བཏབ་པའི་ངོར་བོད་ཆེན་དབུས་འགྱུར་འཆང་དུ་སྐྱེས་པའི་རྣལ་འབྱོར་པ་རི་ཁ་ཅན་གྱི་ལྗོངས་ཐ་གྲུར་ཆོས་སྨྲ་བའི་བརྟུལ་ཞུགས་འཛིན་པ་ཚེ་དབང་ནོར་བུས་ཚངས་པ་རྒྱས་པའི་བུ་རོ་ཧི་དྲ་ཀླུང་འགྲམ་རང་བཟུང་རྒྱལ་བའི་གནས་ཆེན་ཆུ་བོ་གཡས་འཁྱིལ་དུ་ཆུ་ཕག་ཟླ་བ་དྲུག་པའི་ཚེས་བཅུར་སྐད་ཅིག་གང་ཤར་དུ་སྨྲས་པ་སརྦ་མངྒ་ལཾ།

༈ གསོལ་འདེབས་ཆོས་དབྱིངས་འབྱམས་ཀླས།

ཨོཾ་སྭཱསྟི། ཆོས་དབྱིངས་འབྱམས་ཀླས་སྙིང་པོ་འདུས་མ་བྱས། །ངོ་བོ་ཉིད་སྐུ་རང་རིག་རྡོ་རྗེ་སེམས། །ཀུན་ཁྱབ་སྤྲོས་བྲལ་བདེ་བ་ཆེན་པོའི་ཁམས། །མི་ཤིག་དྭངས་མ་འགྱུར་བ་མེད་པའི་དངོས། །དམིགས་མེད་སྙིང་རྗེ་མཁའ་ལྟར་གསལ་བའི་ཐུགས། །ཕན་བདེའི་འབྱུང་གནས་རྣམ་པ་ཐམས་ཅད་པ། །དངོས་གྲུབ་ཀུན་སྩོལ་ཡིད་བཞིན་ནོར་བུ་མཆོག །རྗེ་བཙུན་བླ་མ་དམ་པར་གསོལ་བ་འདེབས། །

ཅེས་མུལྦེའི་རྒྱལ་པོ་བཀྲ་ཤིས་རྣམ་རྒྱལ་གྱི་མདུན་ན་འདོན་རིན་ཆེན་དཔལ་འབྱོར་གྱིས་གསོལ་བ་བཏབ་པའི་ངོར་རིག་པ་འཛིན་པས་སོ། །སརྦ་མངྒ་ལཾ།

༈ གསོལ་འདེབབས་མཁའ་ཁྱབ་རྒྱལ་བ།

ཨོཾ་སྭཱསྟི། མཁའ་ཁྱབ་རྒྱལ་བ་ཀུན་གྱི་ཡེ་ཤེས་དཔྱིད། །གཅིག་གྱུར་མི་འགྱུར་བདེ་བ་ཆེན་པོའི་གཟུགས། །རྡོ་རྗེ་སེམས་དཔའ་དཔལ་ལྡན་དང་པོའི་མགོན། །རྗེ་བཙུན་བླ་མའི་ངོ་བོར་གསོལ་བ་འདེབས། །

ཞེས་མར་ཡུལ་རྒྱལ་པོའི་དྲུང་ཡིག་བརྟན་སྐྱོང་རྒྱ་མཚོའི་ངོར་རིག་པ་འཛིན་པས་སོ། །ཤུ་བྷཾ།

༈ གསོལ་འདེབས་གདོད་ནས་རྣམ་དག།

ཨོཾ་སྭཱསྟི། གདོད་ནས་རྣམ་པར་དག་པ་ཆོས་དབྱིངས་ཁམས། །མ་རྙོག་སྒྲིམས་མེད་རང་རིག་རྡོ་རྗེ་སེམས། །དུས་གསུམ་རྒྱལ་བ་ཀུན་གྱི་ངོ་བོ་ཉིད། །རྗེ་བཙུན་བླ་མའི་ངོ་བོ་གསོལ་བ་འདེབས། །

ཅེས་མར་ཡུལ་འཚོ་བྱེད་སྨན་བླ་རྡོ་རྗེའི་ངོར་རིག་པ་འཛིན་པས་སོ། །ཤུ་བྷཾ

༈ གསོལ་འདེབས་ཀུན་ཁྱབ་རྒྱལ་བ།

ཨོཾ་སྭཱསྟི། ཀུན་ཁྱབ་རྒྱལ་བ་ཚེ་མཆོག་འོད་དཔག་མེད། །ཐུགས་རྗེ་དབང་ཕྱུག་མགོན་པོ་སྤྱན་རས་གཟིགས། །ཡིད་བཞིན་ནོར་བུ་བླ་མ་པདྨ་འབྱུང་། །ཀུན་གྱི་ངོ་བོ་དྲིན་ཅན་བླ་མ་མཆོག །སྐྱབས་གནས་དམ་པར་རྩེ་གཅིག་གསོལ་བཏབ་མཐུས། །དུས་འདི་ནས་ཙམ་སྐྱེ་བ་ཇི་སྲིད་དུ། །མཚན་ཉིད་ཀུན་ལྡན་བླ་མས་རྗེས་སུ་བཟུང་། །དམ་ཚིག་སེལ་མི་ཐུགས་ཡིད་གཅིག་ཏུ་འདྲེས། །ས་ལམ་ཡོན་ཏན་ཡར་ངོའི་ཟླ་ལྟར་འཕེལ། །འབྲེལ་བས་འགྲོ་ཀུན་ཐར་པའི་ལམ་ལ་བཀོད། །ཀུན་ཀྱང་ཀུན་ཏུ་བཟང་པོའི་གོ་འཕང་མཆོག །རིང་མིན་མྱུར་བ་ཉིད་དུ་ཐོབ་པར་ཤོག །

ཅེས་སྙེ་ནམ་གནས་པོ་དད་པ་ཅན་ཀརྨ་བཟང་པོ་གང་གི་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ཆུ་སྤྲེལ་ནག་ཟླའི་དཀར་ཕྱོགས་ཀྱི་རྒྱལ་བ་དང་པོ་ལ་སྨྲས་པའོ། །

༈ གསོལ་འདེབས་མཁའ་ཁྱབ་འགྲོ་བ།

ཨོཾ་སྭཱསྟི། མཁའ་ཁྱབ་འགྲོ་བ་ཀུན་གྱི་ཉེར་འཚོའི་དཔལ། །མཁའ་ལྟར་བརྡལ་བ་ཚད་མེད་ཐུགས་རྗེ་སེམས། །མཁའ་དབྱིངས་ཡོངས་ཁེངས་རྒྱལ་བ་སྲས་བཅས་ཀྱིས། །མཁའ་ཀློང་དབྱིངས་སུ་དབྱེར་མེད་རྡོ་རྗེ་སེམས། །དོན་དམ་རྡོ་རྗེ་ཡེ་ཤེས་རྒྱལ་ཀུན་དངོས། །དམིགས་མེད་སྙིང་རྗེ་སེམས་དཔའ་ཡེ་ཤེས་སྐུ། །རྟག་བརྟན་འགྱུར་མེད་བདེ་ཆེན་ཧེ་རུ་ཀ །སྤྱོད་འཆང་ནམ་མཁའ་སྙིང་པོར་གསོལ་བ་འདེབས། །གང་སྐུ་རྣམ་པ་ཐམས་ཅད་འགྲོ་བའི་དོན། །ཚད་མེད་སྒྱུ་འཕྲུལ་རོལ་གར་ཅིར་ཡང་བསྒྱུར། །དུས་འདིར་བདག་ཅག་འདྲེན་པ་འཁོར་ལོའི་མགོན། །དཔལ་ལྡན་རྩ་བའི་བླ་མར་གསོལ་བ་འདེབས། །གང་གི་རྨད་བྱུང་ཐུགས་རྗེ་ལྕགས་ཀྱུ་ཡིས། །བདག་སོགས་གདུལ་བྱའི་སྙིང་ནས་ཉེར་བཟུང་ནས། །འཁོར་བའི་རྒྱ་མཚོ་ཆེ་ལས་ཡོངས་བསྒྲལ་ཏེ། །གཏན་བདེ་བྱང་ཆུབ་ས་ལ་དྲོངས་མཛད་ཀྱཻ། བདག་ནི་ཚེ་རབས་ཚེ་རྒྱུད་ཐམས་ཅད་དུ། །འཁྲུལ་མེད་དཔལ་མགོན་བླ་མས་རྗེས་སུ་བཟུང་། །དེ་དགྱེས་ལས་སྤྱོད་སྔགས་ཀྱི་ས་ལམ་རྫོགས། །རིང་མིན་རྡོར་སེམས་གོ་འཕང་ཐོབ་བྱིན་རློབས། །

ཞེས་གངས་རི་ཆེན་པོ་ཏི་སེའི་ནུབ་ཕྱོགས་བོད་ཡུལ་གྱི་སྟོད་མར་ཡུལ་རྫོགས་པའི་མཐའ། འབྲུ་ན་དང་སྟོད་ཧོར་གྱི་མཚམས་ནུབ་ར་མགོན་པོའི་སྐུ་བརྙན་རང་བྱུང་མཆོག་ཏུ་གསལ་ཞིང་ལྷ་སྟོང་ཡང་འོད་ཟེར་གྱི་ཕྲེང་བ་རྟག་ཏུ་འཕྲོ་བའི་ངོགས་མགོན་ཅིག་རྩེ་ཡི་བླ་མ་སྒྲུབ་པོ། དཔེའུ་རིང་ངམ་བཀའ་རྒྱུད་ཆོས་འཕེལ་རྒྱ་མཚོས་གསོལ་བ་བཏབ་པའི་ངོར་དཔལ་རིག་པས་འཛིན་པ་དཔལ་གདོང་ཆུ་བྱ་སྟོད་ཟླ་བའི་མར་ཕྱོགས་མཁའ་འགྲོ་འདུ་བའི་དུས་ཐོབ་པ་གཉིས་པར་ཧེ་མི་སྐྱེད་ཚལ་དུ་སྨྲས་པ་དགེའོ། །སརྦ་མངྒ་ལཾ།

༈ གསོལ་འདེབས་རབ་འབྱམས་རྒྱལ་བ།

ཨོཾ་སྭཱསྟི། རབ་འབྱམས་རྒྱལ་བ་མ་ལུས་ཐམས་ཅད་ཀྱི། །ཐུགས་རྗེས་བྱིན་རླབས་གཅིག་ཏུ་འདུས་པའི་དཔྱིད། །མཚན་ཉིད་ཀུན་ལྡན་རྡོ་རྗེ་སློབ་དཔོན་ཏེ། །དེ་ལྟར་ཚེ་རབས་རྟག་ཏུ་རྗེས་འཛིན་ཤོག །མཐའ་ཡས་འགྲོ་བའི་དཔའ་བོ་རུ། །གྲངས་མེད་བསྐལ་པའི་སྔོན་ནས་ནམ་བཅས་ནས། །ད་ལྟ་སྙིགས་དུས་འགྲོ་འདུས་འདྲེན་པ་རུ། །སྐྱེ་བའི་སྲིད་པ་འཛིན་དེར་གསོལ་བ་འདེབས། །འཕགས་པའི་སར་གནས་སྨོན་ལམ་མཐུས་སྤྲུལ་པའི། །འབྲེལ་ཚད་དོན་ལྡན་ཨུ་དུམ་ཝ་ར་འདྲ། །བརྒྱ་མ་ལན་གཅིག་མཇལ་བའི་དུས་སྐབས་སུ། །ལེགས་བསྙེན་དགྱེས་པ་མཐའ་དག་བསྒྲུབ་པར་ཤོག །མཚན་ལྡན་བུད་མེད་རྒྱལ་ཀུན་ཡེ་ཤེས་ཁམས། །མཚན་ལྡན་ཡོངས་སུ་བསྐྱེད་ལ་ཆེས་བསྔགས་ན། །མཚན་ལྡན་གཞོན་ནུའི་ལུས་བཟང་རྟག་ཐོབ་ནས། །མཚན་ལྡན་བླ་མ་མཉེས་པའི་ལས་བསྒྲུབ་ཤོག །

ཅེས་ཁ་ཆེ་ཟངས་དཀར་གྱི་སྐྱེས་མ་དཀར་རྒྱུད་ཆོས་སྒྲོན་གྱི་དད་པའི་ཡིད་གསོ་བའི་སླད་དུ་དཔལ་རིག་པ་འཛིན་པ་རྒྱལ་ཁམས་པས་དཔལ་གདོད་ཆུ་བྱ་ཁྲུམས་ཟླ་བའི་དམར་ཕྱོགས་ཚེས་བཅུ་མར་ཡུལ་གྱི་ཆུ་མགོ་སྭ་ར་ཆོས་སྒར་དུ་བྲིས་པའོ། །དགེའོ། །

༈ གསོལ་འདེབས་རྒྱལ་ཀུན་འཕྲིན་ལས།

ཨོཾ་སྭཱསྟི། རྒྱལ་ཀུན་འཕྲིན་ལས་གཅིག་བསྡུས་པདྨ་འབྱུང་། །དཔའ་བོ་ཐུགས་ཀྱི་རྡོ་རྗེ་ནམ་མཁའ་སྙིང་། །རྒྱལ་བའི་སྲས་པོ་ཚེ་དབང་ནོར་བུའི་སྡེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྩ་བའི་བླ་མ་ཚེ་དབང་ནོར་བུ་ཡིས། །ཐེག་ཆེན་སྨོན་ལམ་གང་བཏབ་བསླུ་མེད་འགྲུབ། །སྐྱེ་ཀུན་པད་འབྱུང་ནམ་སྙིང་སྤྲུལ་པ་ཡིས། །རྗེས་བཟུང་བྱང་ཆེན་སྨོན་ལམ་མྱུར་འགྲུབ་ཤོག །

ཅེས་མངའ་རིའི་བཙུན་མ་ལྔ་རང་གནས་སུ་འགྲོ་བར་ཁ་འདོན་གསོལ་འདེབས་སུ་ཚེ་དབང་ནོར་བུས་ཤིང་འབྲུག་ཟླ་བ་དང་པོའི་ཚེས་བཅོ་བརྒྱད་ལ་གནུབ་ཁུ་ལུང་དུ་བྲིས། མངྒ་ལཾ།

༈ གསོལ་འདེབས་རྗེ་བཙུན་རྒྱལ་བ།

ཨོཾ་སྭཱསྟི། རྗེ་བཙུན་རྒྱལ་བ་ཀུན་གྱི་ངོ་བོ་ཉིད། །ནོར་མཛོད་མཚོ་གླིང་སྐུ་འཁྲུངས་རྡོ་རྗེ་ཆོས། །འོད་ནང་མཐའ་ཡས་སངས་རྒྱས་ཀུན་གྱི་ཡབ། །པདྨ་བཛྲ་རྩལ་ལ་གསོལ་བ་འདེབས། །གང་གི་ཐུགས་ཀྱི་ཡེ་ཤེས་རང་འོད་ལས། །ཡོངས་སྣང་རྡོ་རྗེ་འཛིན་པ་ཀུན་གྱི་གཙོ། །ཐུགས་ཀྱི་རྡོ་རྗེ་དཔལ་ཆེན་ནམ་མཁའ་སྙིང་། །གྲུབ་པའི་དབང་པོ་མཆོག་དེར་གསོལ་བ་འདེབས། །ཁྱོད་ནི་འཕགས་ཆེན་ས་ལ་ཡོངས་བཞུགས་པས། །སྤྲུལ་པའི་སྒྱུ་འཕྲུལ་བགྲང་མི་བཟོད་པ་ལས། །བཀའ་དྲིན་གསུམ་ལྡན་རྡོ་རྗེ་སློབ་དཔོན་ལ། །རྩེ་གཅིག་གུས་པས་གསོལ་བ་བཏབ་གྱུར་ན། །བྱང་ཆུབ་ཆེན་པོ་དུས་འདིར་སྩོལ་གྱུར་ཞེས། །རྡོ་རྗེ་ཐེག་པར་རྒྱ་ཆེར་བསྔགས་པ་བཞིན། །བདག་གི་རྩེ་གཅིག་གུས་པས་གསོལ་བ་འདེབས། །ཚེ་རབས་རྟག་ཏུ་མགོན་ཁྱོད་རྗེས་སུ་གཟུང་། །སྔགས་བརྒྱུད་ནས་གསུང་དམ་ཚིག་ཚུལ་བཞིན་བསྲུང་། །བླ་མའི་ཐུགས་ཀྱི་དགྱེས་དགུ་བསྒྲུབ་བྱེད་ཤོག །ཆོས་རྣམས་བདག་མེད་རྟོགས་པའི་སྟོང་ཉིད་དང་། །འགྲོ་རྣམས་ནམ་ཡང་དོར་མེད་སྙིང་རྗེ་ཡི། །སྲིད་བཞི་ལས་གྲོལ་གདོད་ནས་བདེ་བ་ཆེ། །རྡོ་རྗེ་སེམས་པའི་གོ་འཕང་མྱུར་འགྲུབ་ཤོག །ཐེག་ཆེན་ཐུན་མོང་ཐུན་མིན་ས་ལམ་གྱི། །ཡོན་ཏན་ཇི་བཞིན་རྒྱས་ཤིང་རྩལ་མྱུར་རྫོགས། །ཀུན་གཟིགས་ཇི་བཞིན་སངས་རྒྱས་ས་སྦྱངས་ནས། །མཐའ་ཡས་འགྲོ་ཀུན་འདྲེན་པར་བདག་གྱུར་ཤོག །

ཅེས་པའང་ཤར་ཕྱོགས་ཀོང་པོ་མཆིམས་ཡུལ་དགའ་ཆགས་ཀྱི་མི་རྗེ་རྣམ་དཔྱོད་ཀྱི་གེ་སར་མཆོག་ཏུ་རྒྱས་ཤིང་དད་དམ་གྱི་དཔལ་དང་ལྡན་པ་འཕྲིན་ལས་ལྷུན་གྲུབ་གང་གི་གསུང་གིས་ངོར་མདོ་ཁམས་ལྷོ་རྒྱུད་རིག་སྔགས་ཀྱི་རྣལ་འབྱོར་གྱིས་སྨྲས་པ་དགེའོ། །མངྒ་ལཾ།

༈ གསོལ་འདེབས་ཀུན་བཟང་རྡོར་སེམས།

ཨོཾ་སྭཱསྟི། གདོད་ནས་རྣམ་དག་རྒྱལ་བ་ཀུན་ཏུ་བཟང་། །རིགས་དྲུག་འདུས་པའི་སྤྱི་དཔལ་རྡོ་རྗེ་སེམས། །རྨད་བྱུང་ཕྲིན་ལས་མངའ་བདག་པདྨ་འབྱུང་། །སྐུ་གསུམ་ཀུན་འདུས་ངོ་བོ་ནམ་མཁའ་སྙིང་། །ཐུགས་ཀྱི་སྒྱུ་འཕྲུལ་ཚེ་དབང་ནོར་བུའི་སྡེ། །རྩ་བའི་བླ་མར་བརྩེ་གཅིག་གསོལ་འདེབས་ན། །བདག་ནི་ཚེ་རབས་ཚེ་རྒྱུད་ཐམས་ཅད་དུ། །མགོན་པོ་ཁྱོད་ཀྱི་རྗེས་སུ་གཟུང་གྱུར་ཅིག །དམ་ཚིག་སེལ་མེད་ཐུགས་ཀྱི་དགྱེས་དགུ་བསྒྲུབ། །འཕྲིན་ལས་སྤེལ་ལ་རབ་ཏུ་བརྩོན་བྱེད་ཅིང་། །རྡོ་རྗེ་ཐེག་པའི་ས་ལམ་ཡོན་ཏན་རྫོགས། །ཚོམ་བུ་གཅིག་ཏུ་སངས་རྒྱས་འགྲུབ་པར་ཤོག །

ཅེས་སྙེ་མོ་ཨ་ཐ་གླིང་པའི་རྗེ་བཙུན་པདྨ་བདེ་ཆེན་མཚོ་སྒྲོན་དཔོན་གཡོག་གིས་གསོལ་བ་བཏབ་པའི་ངོར། རིག་པ་འཛིན་པ་ཚེ་དབང་ནོར་བུས་སྨྲས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།

༈ གསོལ་འདེབས་པདྨ་ཐོད་འཕྲེང་།

ཨོཾ་རབ་འབྱམས་རྒྱལ་བ་ཀུན་གྱི་ཐུགས་རྗེའི་མཐུ། །གཅིག་བསྡུས་པདྨ་ཐོད་འཕྲེང་རྒྱལ་དེ་དང་། །དབྱེར་མེད་ནམ་སྙིང་སྒྱུ་འཕྲུལ་རོལ་པའི་གར། །ཕྲིན་ལས་འགྲོ་ཀུན་འདུལ་དེར་གསོལ་བ་འདེབས། །སྐྱབས་མགོན་ཁྱེད་ཀྱི་ཐུགས་རྗེའི་ནུས་པ་ཡིས། །བདག་གི་རྣམ་གཡེང་འཆིང་བ་ངན་འགྲོ་སྤངས། །སྡུག་མེད་ཆོས་ཀྱི་བློ་གྲོས་རབ་རྒྱས་ན། །བྱང་ཆུབ་སྙིང་པོའི་གོ་འཕང་མྱུར་ཐོབ་ཤོག །

ཅེས་གྲང་པོ་སྨད་ཞལ་ངོ་ཕུན་ཚོགས་དར་རྒྱས་ཀྱིས་གསོལ་བ་བཏབ་པའི་ངོར་གུ་རུ་པདྨའི་སློབ་མ་ཚེ་དབང་ནོར་བུས་དབྱུག་གུ་ཟླ་བའི་ཚེས་བཅོ་ལྔར་བྲང་མཚོ་དཀྱིལ་མཐོང་དུ་སྤེལ་བ་མངྒ་ལཾ།

༈ གསོལ་འདེབས་རབ་འབྱམས་དཀྱིལ་འཁོར།

ཨོཾ་སྭཱསྟི། རྒྱལ་བ་རྒྱ་མཚོ་ཀུན་གྱི་ངོ་བོ་ཉིད། །རབ་འབྱམས་དཀྱིལ་འཁོར་ཡོངས་ཀྱི་སྤྱི་དཔལ་ཆེ། །མཚོ་སྐྱེས་རྡོ་རྗེ་འགྲོ་བ་ཡོངས་ཀྱི་མགོན། །དབྱེར་མེད་ནམ་མཁའ་སྙིང་པོར་གསོལ་བ་འདེབས། །གང་གི་སྒྱུ་འཕྲུལ་རོལ་པ་འབྱམས་ཀླས་པས། །ཕྱོགས་འདིར་བདག་སོགས་གདུལ་བྱའི་སྣང་ངོ་རུ། །སྔགས་ཀྱི་རྣལ་འབྱོར་སྤྱོད་གྱུར་རིག་པ་འཛིན། །ཚེ་དབང་ནོར་བུར་གྲགས་ལ་གསོལ་བ་འདེབས། །བཀའ་དྲིན་གསུམ་ལྡན་རྩ་བའི་བླ་མ་ལ། །གསོལ་འདེབས་ཕན་ཡོན་ཚད་གཟུང་ལས་འདས་པས། །རྒྱལ་དང་སྲས་བཅས་རྣམ་ཀུན་གསུང་མཛད་ན། །བདག་གི་སྙིང་ནས་བླ་མར་གསོལ་འདེབས་མཐུས། །དུས་འདི་ནས་གཟུང་བྱང་ཆུབ་སྙིང་པོའི་བར། །པད་འབྱུང་ནམ་སྙིང་སྤྲུལ་པས་རྗེས་བཟུང་ཞིང་། །ཐེག་ཆེན་ས་ལམ་ཡོན་ཏན་གོང་འཕེལ་རྫོགས། །འགྲོ་ཕན་རྡོ་རྗེ་སམས་འབྲས་མྱུར་ཐོབ་ཤོག །ཁྱད་པར་ལུས་འདི་བོར་བར་གྱུར་མ་ཐག །ཨོ་རྒྱན་མཁའ་ལ་སྤྱོད་པའི་ཞིང་སྐྱེས་ནས། །དཔའ་བོ་མཁའ་འགྲོ་རྣམས་དང་བསྐལ་མཉམ་ཞིང་། །ཡེ་ཤེས་ཚོགས་ཀྱིས་འཁོར་ལོ་ལོངས་སྤྱོད་ཤོག །གཞན་ཡང་གང་སྐྱེས་དེ་ནས་སྐད་ཅིག་ལ། །རྩ་བའི་བླ་མའི་དྲུང་སྐྱོད་རྫུ་འཕྲུལ་མཐུ། །ཐོབ་ནས་ཁྲག་འཐུང་ཚེ་དབང་ནོར་བུ་ཡི། །ཞབས་བསྙེན་རྡོ་རྗེ་ཐེག་ལ་ཁུགས་པར་ཤོག །མདོར་ན་ཚེ་རབས་ཚེ་རྒྱུད་ཐམས་ཅད་དུ། །མ་ནོར་འཁྲུལ་མེད་མཚན་ལྡན་བླ་མ་ཡི། །རྗེས་བཟུང་དེ་ཡི་འཕྲིན་ལས་ཡོངས་བསྒྲུབ་ནས། །མཁའ་སྦྱོར་ཡན་ལག་བདུན་ལྡན་ལོངས་སྤྱོད་ཤོག །

ཅེས་འདུས་འབྱུང་བདེ་གླིང་སྡེ་པའི་སྲས་མོ་དད་པ་ཅན་མཛེས་སྡུག་གི་ཉི་མའི་ནན་རྟེན་ཆེན་པོས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་སྨྲས་པའོ། །

༈ གསོལ་འདེབས་ཧེ་རུ་ཀ་དཔལ།

ཨོཾ་སྭཱསྟི། ཧེ་རུ་ཀ་དཔལ་གདོད་ནས་ཀུན་ཏུ་བཟང་། །ཐུབ་པའི་བསྟན་པ་བརྟུལ་ཞུགས་རོལ་པའི་རྒྱན། །མཚུངས་པ་མི་མངའ་སྤྱོད་འཆང་ཀཧྣ་པ། །ཁྱེད་ལ་གསོལ་བ་འདེབས་སོ་བདག་བྱིན་རློབས། །དུས་འདིར་སྨིན་གྲོལ་ཡེ་ཤེས་བྱིན་རླབས་མཐུ། །ཇི་བཞིན་བསྟེན་མཛད་རྡོ་རྗེ་སློབ་དཔོན་ཡང་། །ཧེ་རུ་ཀ་དཔལ་ཁྱེད་ཀྱི་ཆོ་འཕྲུལ་སྟེ། །རྩ་བའི་བླ་མར་གསོལ་འདེབས་བདག་བྱིན་རློབས། །བདག་ནི་ཚེ་རབས་ཚེ་རྒྱུད་ཐམས་ཅད་དུ། །རྡོ་རྗེ་འཆང་བརྙེས་བླ་མ་མཆོག་དང་མཇལ། །དེ་ཡིས་རྗེས་གཟུང་དམ་ཚིག་རྣམ་པར་དག །རིག་མིན་རྡོ་རྗེ་སེམས་དཔའི་གནས་ཐོབ་ཤོག །

ཅེས་དད་པ་ཅན་ཚེ་ལྷ་སྒྲོལ་དཀར་གྱིས་བསྐུལ་བའི་ངོར་ཕྱོགས་མེད་རྒྱལ་ཁམས་པ་རིག་པ་འཛིན་པ་ཚེ་དབང་ནོར་བུས་ཆོས་འཁོར་དཔལ་གྱི་ལྷ་སར་གྲོ་ཞུན་ཟླ་བའི་ཡར་ཚེས་དགའ་བ་གཉིས་པ་ལ་བྲིས་པ་སརྦ་མངྒ་ལཾ།

༈ གསོལ་འདེབས་ཆོས་ཉིད་དག་པ།

ཨོཾ་སྭཱསྟི། ཆོས་ཉིད་དག་པ་རྣམ་འགྱུར་སྒྱུ་མ་རུ། །རང་ཤར་བདེན་གཉིས་ཟུང་འཇུག་དོན་རྟོགས་ཤིང་། །རྒྱལ་བའི་བསྟན་དང་བསྟན་འཛིན་དུ་མའི་དཔལ། །རིག་འཛིན་ཚེ་དབང་ནོར་བུར་གསོལབ་འདེབས། །ཚེ་རབས་རྟག་ཏུ་ཡིད་བཞིན་གཏེར་དུ་གྲུབ། །དཔལ་མགོན་བླ་མའི་གོ་འཕང་མྱུར་ཐོབ་ཤོག །

ཅེས་ལ་སྟོད་དཔལ་མོ་ཆོས་ལྡིང་སྒྲུབ་སྡེའི་དབུ་མཛད་ནམ་མཁའ་རྒྱལ་མཚན་གྱིས་གསོལ་བ་བཏབ་པའི་ངོར་རིག་པ་འཛི་པ་ཚེ་དབང་ནོར་བུས་དྲང་སྲོང་སྲིན་པོ་རིར་སྨྲས་པ་སརྦ་མངྒ་ལཾ།

༈ གསོལ་འདེབས་ཀུན་ཁྱབ་མི་ཤིགས་དྭངས་མ།

ཨོཾ་སྭཱསྟི། ཀུན་ཁྱབ་མི་ཤིག་དྭངས་མ་གསུལ་ལྡན་མགོན། །ཀུན་བཟང་བདེ་བའི་ཐིག་ལེ་མི་འགྱུར་དཔྱིད། །ཀུན་དགའ་ཕུན་ཚོགས་དཔལ་ཀུན་འབྱུང་བའི་གནས། །ཀུན་ཏུ་དཔལ་ལྡན་བླ་མར་གསོལ་བ་འདེབས། །གང་གི་ཐུགས་རྗེ་ཚེ་རབས་ཇི་སྲིད་དུ། །དམ་པས་རྗེས་བཟུང་མ་ནོར་ལམ་ལ་ཞུགས། །བསླབ་གསུམ་རྣམ་དག་དོན་གཉིས་ལྷུན་གྱིས་འགྲུབ། །རྒྱལ་མཆོག་གོ་འཕང་མྱུར་དུ་འགྲུབ་པར་ཤོག །

ཅེས་རྗེ་དྲུང་ཚེ་དབང་མཆོག་ལྡན་ཁམས་གོ་འཇོའི་བླ་མར་འགྲོ་གདོང་རིག་པ་འཛིན་པས་བརྗོད་པ་སརྦ་མངྒ་ལཾ།

༈ གསོལ་འདེབས་ཀུན་ཁྱབ་སྤྲོས་བྲལ།

ཨོཾ་སྭཱསྟི། ཀུན་ཁྱབ་སྤྲོས་བྲལ་རང་རིག་རྡོ་རྗེ་སེམས། །ཨོ་རྒྱན་ཞིང་གི་གཙོ་མཆོག་ཐུགས་རྡོ་རྗེ། །གང་གི་སྨོན་ལམ་མཐུ་ལས་འཕགས་བོད་དུ། །སྤྱོད་འཆང་ནག་པོ་པ་དང་ནམ་མཁའ་སྙིང་། །རིག་འཛིན་མཆོག་གྲུབ་སླར་ཡང་རྗེས་ཆགས་ཀྱི། །སྤྲུལ་པའི་སྐྱེ་སྲིད་དུ་མར་འཛིན་མཛད་པ། །བཀའ་དྲིན་གསུམ་ལྡན་དྲིན་ཆེན་བླ་མ་མགོན། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གང་གི་ཞབས་བཟུང་མཐའ་བྲལ་རྡོར་དཀྱིལ་ནི། །ལྟེ་གསང་སང་གི་ཆུ་སྐྱེས་རྒྱས་པའི་མཁར། །སྙིང་མགྲིན་བདེ་ཆེན་ཉི་ཟླ་རིན་ཆེན་གཏེར། །གཞོམ་མེད་རྡོ་རྗེ་ལྟ་བུར་ཞབས་བརྟན་ཤོག །ས་གསུམ་ངེས་དོན་སྙིང་པོའི་ཆོས་སྨྲས་ཁྱབ། །འོད་གསལ་རྫོགས་ཆེན་བསྟན་འཛིན་ཀུན་ཏུ་རྒྱས། །བདག་སོགས་རྗེས་འཇུག་མཆོག་ཐུན་དངོས་གྲུབ་བརྙེས། །ཚོམ་བུ་གཅིག་ཏུ་འོད་དཔག་མེད་འགྲུབ་ཤོག །

ཅེས་པ་ཡང་ཙང་རོང་ཆོས་གཏེར་གླིང་གི་རྣམ་འདྲེན་འོད་མཆོག་སྤྲུལ་པའི་སྐུ་བསྐལ་བཟང་འཇིགས་མེད་ལྷུན་འགྲུབ་དཔལ་བཟང་པོའི་གསུང་གིས་བསྐུལ་བའི་ངོར་རིག་འཛིན་ཚེ་དབང་ནོར་བུས་སྣར་ཐང་དུ་སྨྲས་པ་སརྦ་མངྒ་ལཾ།

༈ གསོལ་འདེབས་གདོད་ནས་སྙོག་མེད།

ཨོཾ་སྭཱསྟི། གདོད་ནས་སྙོག་མེད་རྒྱལ་བ་འོད་མི་འགྱུར། །ཁ་སྦྱོར་ཡན་ལག་བདུན་ལྡན་ཚེ་དཔག་མེད། །རྒྱལ་ཀུན་ཕྲིན་ལས་བྱེད་པ་པདྨ་འབྱུང་། །སྐུ་གསུམ་ཀུན་འདུས་ངོ་བོ་བཀའ་དྲིན་ཅན། །སྙིགས་མའི་དུས་སུ་འགྲོ་འདུལ་རྒྱལ་བའི་སྲས། །མཚུངས་མེད་རྩ་བའི་བླ་མར་གསོལ་བ་འདེབས། །བདག་ནི་ཚེ་རབས་ཚེ་རྒྱུད་ཐམས་ཅད་དུ། །ཐར་པའི་ལམ་སྟོན་མཚན་ལྡན་བླ་མ་མཇལ། །དགྱེས་པའི་རྗེས་བཟུང་དམ་ཚིག་རྣམ་པར་དག །བདག་གི་སྒོ་གསུམ་བླ་མ་དགྱེས་ལ་སྤྱོད། །བསླབ་གསུམ་རྣམ་དག་ས་ལམ་ཡོན་ཏན་ཀུན། །ཡར་ངོའི་ཟླ་ལྟར་གོང་ནས་གོང་དུ་འཕེལ། །འབྲེལ་བཅས་འགྲོ་ཡང་ཚོམ་བུ་གཅིག་པ་རུ། །བྱང་ཆུབ་ཆེ་འབྲས་མྱུར་དུ་ཐོབ་པར་ཤོག །

ཅེས་དད་ལྡན་ལྕམ་ཕུན་ཚོགས་ལྷ་མོས་བསྐུལ་བའི་ངོར་དཔལ་རིག་པ་འཛིན་པས་སྤེལ་བ་སརྦ་མངྒ་ལཾ།

༈ གསོལ་འདེབས་མཆོག་གསུམ་རྩ་གསུམ།

ཨོཾ་མཆོག་གསུམ་རྩ་གསུམ་རྒྱ་མཚོ་ཀུན་འདུས་དཔལ། །དཔལ་ལྡན་རྩ་བའི་བླ་མའི་ངོ་བོ་ཉིད། །འོད་དཔག་མེད་མགོན་སྤྱན་རས་གཟིགས་དབང་ཕྱུག །པདྨ་ཀ་ར་སྙིང་ནས་གསོལ་བ་འདེབས། །བདག་གི་དུས་གསུམ་བསགས་ཡོད་དགེ་བ་ཀུན། །འོད་དཔག་མེད་མགོན་ཅི་འདྲ་དེ་ཐོབ་པའི། །རྒྱུ་རུ་ཡོངས་བསྔོ་བསླུ་མེད་གེགས་མེད་པར། །རིགས་མིན་རྫོགས་སངས་རྒྱས་དེ་འགྲུབ་གྱུར་ཅིག །དེ་སྲིད་སྐྱེ་ཀུན་མཐོ་རིས་འཕགས་པའི་ནོར། །ཕུན་ཚོགས་ཐོབ་ཅིང་བཤེས་གཉེན་དམ་པས་ཟིན། །ཚོགས་གསུམ་གོང་འཕེལ་ས་ལམ་ཡོན་ཏན་རྫོགས། །འབྲེལ་བཅས་འགྲོ་ཀུན་མཐར་མཆོག་ལ་བཀོད་ཤོག །

ཅེས་གཙང་ཉང་སྟོད་པ་རྣམ་སྲང་ཕུག་གི་སྡེ་པ་བློ་གྲོས་ཀྱི་ནོར་ལྡན་ཆོས་གྲགས་གང་གིས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུ་འཕྲུལ་སྣང་གི་གཙུག་ལག་ཁང་འདབས་སུ་སྨྲས་པ་སརྦ་མངྒ་ལཾ།

༈ གསོལ་འདེབས་གདོད་ནས་རྒྱལ་བ།

ཨོཾ་སྭཱསྟི། གདོད་ནས་རྒྱལ་བ་མཆོག་ཏུ་ཀུན་ཏུ་བཟང་། །ངེས་པ་ལྔ་ལྡན་ལོངས་སྐུ་འོད་དཔག་མེད། །འགྲོ་འདུལ་སྤྲུལ་སྐུ་ཚེ་དབང་པདྨ་འབྱུང་། །ཀུན་འདུས་སྤྱི་དཔལ་དྲིན་ཆེན་བླ་མའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཚེ་རབས་རྟག་ཏུ་བླ་མ་མཆོག་གི་ཟིན། །ས་ལམ་ཡོན་ཏན་ཡར་ངོའི་ཟླ་ལྟར་འཕེལ། །རྒྱལ་བའི་གནས་ཐོབ་འགྲོ་ཀུན་འདྲེན་པར་ཤོག །

ཅེས་ཡུལ་མདོ་ཁམས་ཞེ་ཞེ་འོན་གྱི་བླ་མ་བསོད་ནམས་གྲགས་པས་གསོལ་བ་བཏབ་པའི་ངོར་དཔལ་རིག་པ་འཛིན་པ་ཚེ་དབང་ནོར་བུས་སྨྲས་པ་སརྦ་མངྒ་ལཾ།

༈ གསོལ་འདེབས་གཟི་བརྗིད་འོད་དཔག་མེད།

ཨོཾ་སྭཱསྟི། གཟི་བརྗིད་འོད་དཔག་མེད་མགོན་པདྨ་འབྱུང་། །བརྟུལ་ཞུགས་གྲུབ་པ་ཡོངས་གཙོ་ཀཧྣ། །མཚུངས་མེད་འཁོར་ལོའི་མགོན་པོ་བདེ་བ་ཆེ། །རྩ་བའི་བླ་མའི་ངོ་བོར་གསོལ་བ་འདེབས། །བདག་ནི་ཚེ་རབས་ཚེ་རྒྱུད་ཐམས་ཅད་དུ། །མཐོ་རིས་ཡོན་ཏན་འཕགས་ནོར་བདུན་གྱིས་ཕྱུག །བཤེས་གཉེན་མཆོག་གིས་རྗེས་བཟུང་བསླབ་གསུམ་དག །རིང་མིན་རྡོ་རྗེ་འཆང་འབྲས་མྱུར་འགྲུབ་ཤོག །

ཅེས་ཡུལ་ཀསྨི་ར་ཡི་མཚོ་ལ་དྭགས་རྒྱལ་པོའི་བློན་པོ་དད་པ་ཅན་དགེ་སློང་ཆོས་འབྲུག་བརྒྱས་དང་། བླ་མ་རྒྱ་མཚོ་མཆེད་ཀྱི་ངོར་དཔལ་རིག་པ་འཛིན་པ་ཚེ་དབང་ནོར་བུས་སྨྲས་པ་དགེའོ། །

༈ གསོལ་འདེབས་ཀུན་ཁྱབ་སྤྲོས་བྲལ།

ཨོཾ་སྭཱསྟི། ཀུན་ཁྱབ་སྤྲོས་བྲལ་ཀུན་གྱི་སྙིང་དབུས་སུ། །རྟག་བརྟན་གཡུང་དྲུང་བདེ་བ་ཆེན་པོའི་སྐུ། །དཔལ་ལྡན་དང་པོའི་རྡོ་རྗེ་སེམས་དཔའ་ཆེ། །ལྷག་པའི་ལྷ་མཆོག་རྗེ་བཙུན་བླ་མ་གང་། །བདག་གི་ཆོས་ཀྱི་འཁོར་ལོ་འདབ་རྒྱས་རྩ། །མོས་གུས་གེ་སར་ཟེའུ་འབྲུ་མཛེས་པའི་དབུས། །བྱང་ཆུབ་སྙིང་པོའི་བར་དུ་བརྟན་བཞུགས་ཤིང་། །བདག་གི་སྒོ་གསུམ་བླ་མའི་སྐུ་གསུང་ཐུགས། །དབྱེར་མེད་ཟུང་འཇུག་མི་ཤིག་རྡོ་རྗེ་འཆང་། །འདུ་འབྲལ་མེད་པའི་ངོ་བོར་ལྷུན་གྲུབ་ཅིང་། །མཐའ་ཡས་འགྲོ་བ་ཡོངས་ཀྱི་འདྲེན་པ་མཆོག །ཀུན་གཟིགས་རྒྱལ་བ་ཇི་འདྲ་མྱུར་ཐོབ་ཤོག །

ཅེས་སྤྲུལ་པའི་སྐུ་རིང་འཛིན་ཡོན་ཏན་རྒྱ་མཚོ་གང་གིས་བསྐུལ་བའི་ངོར་རིག་པ་འཛིན་པ་ཚེ་དབང་ནོར་བུས་སུ་སྦྲུལ་གྱི་ལོ་སྣྲོན་ཟླ་བའི་ཚེས་བཟང་པོར་བརྗོད་པ་དགེ་ལེགས་སུ་གྱུར་ཅིག་སརྦ་མངྒ་ལཾ།

༈ གསོལ་འདེབས་གསང་གསུམ་མཁའ་ཁྱབ།

ཨོཾ་སྭཱསྟི། རྒྱལ་བ་ཀུན་གྱི་གསང་གསུམ་མཁའ་ཁྱབ་དཔལ། །ཀུན་གྱི་སྙིང་པོ་གངས་ཆེན་རིགས་གཅིག་བདག །སྐུ་དང་ཡེ་ཤེས་ཟུང་འཇུག་རྡོ་རྗེ་སེམས། །དཔལ་ལྡན་བླ་མའི་ངོ་བོར་གསོལ་བ་འདེབས།

༈ གསོལ་འདེབས་ཀུན་ཁྱབ་འགྱུར་མེད།

ཨོཾ་སྭཱསྟི། ཀུན་ཁྱབ་འགྱུར་མེད་སྤྲོས་བྲལ་བདེ་བ་ཆེ། །སངས་རྒྱས་ཀུན་གྱི་ཐུགས་ཀྱི་ཡེ་ཤེས་ཉིད། །བླ་མ་རྡོ་རྗེ་སེམས་དཔའ་ཆོས་ཀྱི་སྐུར། །གསོལ་བ་འདེབས་སོ་ཆེ་མཆོག་དངོས་གྲུབ་སྩོལ། །སྐུ་དང་ཞིང་ཁམས་འདུ་བྲལ་མེད་པའི་བདག །ཁ་སྦྱོར་ཟུང་འཇུག་མཉམ་ཉིད་རྒྱལ་ཀུན་གསུང་། །བླ་མ་རྡོ་རྗེ་སེམས་དཔའ་ལོངས་སྤྱོད་རྫོགས། །གསོལ་བ་འདེབས་སོ༴ ཐུགས་རྗེ་རོལ་རྩལ་མཁའ་ཁྱབ་གདུལ་བྱའི་མགོན། །གང་འདུལ་སྒྱུ་འཕྲུལ་བྲལ་བ་རྒྱལ་བའི་ཐུགས། །བླ་མ་རྡོ་རྗེ་སེམས་དཔའ་སྤྲུལ་པའི་སྐུར། །གསོལ་བ༴ སངས་རྒྱས་ཀུན་གྱི་སྐུ་གསུང་ཐུགས་ངོ་བོ། །ཆོས་ལོངས་སྤྲུལ་སྐུ་ཀུན་གྱི་སྤྱི་དཔལ་ཆེ། །ངོ་བོ་ཉིད་སྐུ་བླ་མ་རྡོར་སེམས་ལ། །གསོལ་བ༴ ལྷག་པའི་ལྷ་མཆོག་བླ་མ་རྡོར་སེམས་མཐུའི། །བདག་ལུས་ཕུང་ཁམས་ལྷན་སྐུ་ཕྱག་རྒྱར་གྲོལ། །བདག་ངག་གཞོམ་མེད་རྡོ་རྗེའི་དབྱིངས་སུ་ཤར། །བདག་གཉིས་རྡོར་སེམས་ཐུགས་དང་རོ་མཉམ། །ནམ་མཁའ་མཐར་ཐུག་སེམས་ཅན་ཀུན་གྱི་དོན། །འབད་མེད་ལྷུན་གྲུབ་ཡིད་བཞིན་ནོར་བུ་ལྟར། །ཕན་བདེ་དགེ་བའི་བཙས་སུ་ཡོངས་གྲུབ་ནས། །ཀུན་ཀྱང་རྡོར་སེམས་གོ་འཕང་ལ་བཀོད་ཤོག །

ཅེས་མང་ཡུལ་གུང་ཐང་དུ་སྔགས་འགྱུར་གྱི་རིག་སྔགས་འཆང་བ་མཚར་དུ་མངར་བ་མདོ་འོ་ཆེ་ཡི་གདུང་ལས་བྱོན་པ་སྔགས་འཆང་རྒྱལ་སྲས་སེངྒེའི་གསུང་གིས་བསྐུལ་བའི་ངོར་རིག་པ་འཛིན་པ་ཚེ་དབང་ནོར་བུའི་སྟོད་མངའ་རིའི་ཆ་ཙན་ཡུལ་ཟངས་ཐང་དམར་པོའི་འདབས་རྒྱབ་སྐྱིབ་ཞེས་པར་ས་སྦྲུལ་སྣྲོན་ཟླའི་དམར་ཕྱོགས་ཀྱི་རྒྱལ་བ་གསུམ་པ་ལ་སྨྲས་པ་སརྦ་མངྒ་ལཾ།

༈ གསོལ་འདེབས་རྒྱལ་ཀུན་འདུས་ཞལ།

ཨོཾ་སྭཱསྟི། རྒྱལ་ཀུན་འདུས་ཞལ་མཚོ་སྐྱེས་རྡོ་རྗེ་འཆང་། །རྒྱལ་བའི་རྒྱལ་ཚབ་དཔལ་ལྡན་ནམ་མཁའི་སྙིང་། །སྙིགས་དུས་འགྲོ་འདུལ་གསུམ་ལྡན་རྡོ་རྗེ་འཛིན། །ཚེ་དབང་ནོར་བུར་སྙིང་ནས་གསོལ་འདེབས་ཀྱི། །ཚེ་རབས་རྟག་ཏུ་ཡོངས་འཛིན་དམ་པ་ཡི། །རྗེས་བཟུང་དབང་བསྐུར་གདམ་པས་རྒྱུད་གྲོལ་ནས། །ཐེག་ཆེན་རྟག་ཏུ་ཡོངས་འཛིན་དམ་པ་ཡི། །རྗེས་བཟུང་དབང་བསྐུར་གདམ་པས་རྒྱུད་གྲོལ་ནས། །ཐེག་ཆེན་ས་ལམ་ཡོན་ཏན་རྩལ་ཆེན་རྫོགས། །མྱུར་དུ་རྡོ་རྗེ་སེམས་དཔའ་ཉིད་འགྲུབ་ཤོག །ཅེ

ས་དད་ལྡན་བླ་མ་འགྱུར་མེད་དང་ལྕམ་སྲིང་ལ་ནོར་བུ་ཆོས་འཛོམ་ཞེས་པས་གསོལ་བ་བཏབ་པའི་ངོར་རིག་འཛིན་རྒྱལ་ཁམས་པས་སྨྲས་པ་མངྒ་ལཾ།

༈ གསོལ་འདེབས་ཕྱོགས་མེད་རྒྱལ་ཁམས།

ཨ་ཧཾ། ཕྱོགས་མེད་རྒྱལ་ཁམས་ཡངས་པ་རུ། །བདེ་ཆེན་དགའ་མར་སྟག་རྩེན་ནས། །ཆགས་ཅན་རོས་མྱོས་གླུ་མཆོག་མཁན། །ཡན་པ་བློ་དེར་གསོལ་བ་འདེབས། །ཆོས་དབྱིངས་འོད་གསལ་བྷ་ག་རུ། །རིག་པའི་རྡོ་རྗེ་བསྣུན་བྱེད་ནས། །ལྷན་སྐྱེས་དགའ་བའི་གད་མོ་སྒྲོགས། །འཁྱལ་པོ་དེ་ལ་གསོལ་བ་འདེབས། །

ཅེས་གྲུབ་ཆེན་ཨོ་རྒྱན་བདེ་ཆེན་དབང་ཕྱུག་གིས་བསྐུལ་ངོར་སྨྱོན་པ་ཚེ་དབང་ནོར་བུས་སྨྲས།

༈ གསོལ་འདེབས་སྲིད་པའི་མུན་བཅོམ།

ཨོཾ་སྭཱསྟི། ཇི་བཞིན་འོད་གསལ་སྲིད་པའི་མུན་བཅོམ་པ། །སྣང་བ་མཐའ་ཡས་སངས་རྒྱས་ཀྱི་ཡབ། །མཁའ་ཁྱབ་གདོད་མའི་མགོན་པོ་ཆོས་ཀྱི་སྐུར། །གསོལ་འདེབས་སྨིན་ཅིང་གྲོལ་བར་བྱིན་གྱིས་རློབས། །ཚད་མེད་ཐུགས་རྗེའི་སྤྱན་རས་ཡངས་པོ་ཡི། །མཐའ་ཡས་འགྲོ་ལ་རྟག་གཟིགས་གངས་ཅན་མགོན། །རྒྱལ་བ་རྒྱ་མཚོ་ལོངས་སྤྱོད་རྫོགས་པའི་སྐུར། །གསོལ་འདེབས་སྨིན་ཅིང༴ རྒྱལ་ཀུན་ཡེ་ཤེས་གཅིག་བསྡུས་པདྨོ་ནས། །རང་འབྱུང་སྤྲོས་ཀུན་བྲལ་ནས་རྫོགས་སངས་རྒྱས། །མཚོ་སྐྱེས་རྡོ་རྗེ་མཆོག་གི་སྤྲུལ་པའི་སྐུར། །གསོལ་བ་འདེབས༴ སྐུ་གསུམ་རྒྱལ་བ་ཀུན་ཀྱང་རོ་མཉམ་ཞིང་། །ཆོས་ཉིད་སྙིང་རྗེས་ཟུང་འཇུག་ངོ་བོ་ཉིད། །བདག་སོགས་དཔལ་མགོན་རྩ་བའི་བླ་མ་ལ། །གསོལ་བ་འདེབས༴ དེ་ལྟར་སྐུ་གསུམ་དབྱེར་མེད་བླ་མ་ལ། །ཟོལ་མེད་སྙིང་ནས་གུས་པས་གསོལ་འདེབས་ན། །བྱིན་གྱིས་རློབས་ཤིག་མཚུངས་མེད་འགྲོ་བ་མགོན། །དབང་བཞི་བསྐུར་ཞིང་དཀྱིལ་འཁོར་འཁོར་ལོའི་གཙོ། །ཐེག་ཆེན་ས་དང་ལམ་གྱི་ཡོན་ཏན་ཀུན། །སྐད་ཅིག་གདན་ཐོག་འདི་རུ་རྫོགས་བསྒྲོད་དེ། །མཁའ་ཁྱབ་གདུལ་བྱ་སེམས་ལྡན་མ་ལུས་ཀུན། །སྐུ་གསུམ་རྒྱལ་བའི་ས་ལ་བཀོད་པར་ཤོག །

ཅེས་མངའ་རིས་སྨད་མ་ཡུལ་གུང་ཐང་གི་རི་ཁྲོད་པ་དགེ་སློང་རྡོ་རྗེ་འཛིན་གྱུར་དཔལ་འབྱོར་རྒྱ་མཚོས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ལོ་པཎ་དམ་པ་མང་པོས་བསྟི་བའི་གནས་ཡང་དོག་ནགས་མཚོ་ལོ་ཙཱ་བའི་མཆོད་རྟེན་ངོགས་སུ་དཀར་པོས་ལོ་སྣྲོན་ཟླའི་དམར་ཕྱོགས་རྒྱལ་བ་གཉིས་པ་ལ་སྨྲས་པ་སརྦ་མངྒ་ལཾ།

༈ གསོལ་འདེབས་སྤྲོས་བྲལ་ཆོས་དབྱིངས།

ཨོཾ་སྭཱསྟི། ཀུན་གྱི་རང་བཞིན་སྤྲོས་བྲལ་ཆོས་ཀྱི་དབྱིངས། །ཡེ་ཤེས་ལྔ་ལྡན་དམ་པ་དང་པོའི་མགོན། །མཐའ་ཡས་འགྲོ་བའི་ཕུན་ཚོགས་ཀུན་འབྱུང་བཞི། །ཁྱབ་བདག་རྩ་བའི་བླ་མར་གསོལ་བ་འདེབས། །རང་ངོ་ཆོས་ཉིད་གཞན་ངོ་ཐུགས་རྗེའི་དཔལ། །རབ་འབྱམས་དཀྱིལ་འཁོར་སྤྲོ་ཞིང་བསྡུད་པ་པོ། །མཁའ་འགྲོ་དྲྭ་བ་སྡོམ་མཛད་ཧེ་རུ་ཀ །ཡང་དག་རྩ་བའི་བླ་མར་གསོལ་བ་འདེབས། །གདུལ་བྱའི་སྣང་ངོར་གྲུབ་པའི་བརྟུལ་ཞུགས་ཀྱི། །འཕགས་ཡུལ་རྒྱན་གྱུར་དཔལ་ལྡན་ཀཧྣ་པ། །བོད་ཡུལ་འདི་ན་ཐུགས་ཀྱི་གྲུབ་བརྙེས་གཙོ། །ནམ་སྙིང་རྩ་བའི་བླམ་མར་གསོལ་བ་འདེབས། །གང་གི་སྤྲུལ་པ་ཆུ་སྣོད་ཟླ་གཟུགས་བཞིན། །རིན་ཆེན་རྡོ་རྗེ་བསྒོམ་ཚུལ་ནམ་མཁའ་འོད། །ཀཿཐོག་བྱམས་ཆོས་ལུང་བྱང་ཆུབ་འབུམ། །སྤྲུལ་གྱུར་རྩ་བའི་བླ་མར་གསོལ་བ་འདེབས། །སྙིགས་མའི་དུས་འདིར་གཞན་ཕན་འཕྲིན་ལས་ཅན། །ཀློང་ཆེན་རབ་འབྱམས་རྗེ་བཙུན་ཀུན་དགའ་སྙིང་། །གང་གི་རིང་ལུགས་འཆད་སྤེལ་སྙིང་སྟོབས་ཅན། །དྲིན་ཅན་རྩ་བའི་བླ་མར་གསོལ་བ་འདེབས། །རང་ལ་བཀའ་དྲིན་བཞི་ལྡན་བླ་མ་ནི། །སངས་རྒྱས་ཀུན་ལས་ལྷག་ཞེས་རྒྱལ་བས་བསྔགས། །དེས་ན་དྲིན་ཆེན་རྩ་བའི་བླ་མ་ལ། །སྙིང་ནས་རྩེ་གཅིག་གུས་པས་གསོལ་འདེབས་ཀྱི། །བདག་ཅག་དུས་འདི་ནས་བཟུང་བྱང་ཆེན་བར། །ཚེ་རབས་ཚེ་བརྒྱུད་ཀུན་ཏུ་དལ་འབྱོར་བརྟེན། །ཕུན་ཚོགས་དགེ་བའི་བཤེས་གཉེན་མཆོག་གི་ཟིན། །བསླབ་གསུམ་རྣམ་དག་ས་ལམ་ཡོན་ཏན་འཕེལ། །འབྲེལ་བཅས་འགྲོ་ཀུན་མཐར་མཆོག་ལ་ཏྲི་ཤོག །ཁྱད་པར་མཚན་ལྡན་རྡོ་རྗེ་སློབ་དཔོན་གྱིས། །དབང་བསྐུར་དམ་ཚིག་རྣམ་དག་བསྐྱེད་རྫོགས་དྲོད། །མྱུར་ཐོབ་ཚེ་གཅིག་རྡོར་འཆང་ས་བསྙེས་ནས། །མཁའ་མཉམ་འགྲོ་བ་འདྲེན་པའི་བྱེད་པར་ཤོག །

ཅེས་མདོ་ཆེན་རིག་སྔགས་འཆང་བའི་གདུང་དྲི་མ་མེད་པ་ལས་ཉེ་བར་བྱོན་པ་སྒྱུ་འཕྲུལ་རྡོ་རྗེའི་རྣལ་འབྱོར་པ་གསང་བདག་རྒྱལ་སྲས་སེངྒེའི་གསུང་གིས་བསྐུལ་བ་ལ་བརྟེན་རིག་པ་འཛིན་པ་ཚེ་དབང་ནོར་བུས་རབ་བྱུང་བཅུ་གསུམ་པ་ས་འབྲུག་མགོ་ཟླའི་དམར་ཕྱོགས་ཀྱི་རྒྱལ་བ་གསུམ་པ་ལ་གུང་ཐང་ར་ལ་ཟ་འོག་ཕུག་ནས་སྨྲས་པ་སརྦ་མངྒ་ལཾ།

༈ གསོལ་འདེབས་རྒྱལ་ཀུན་མཁའ་ཁྱབ།

ཨོཾ་སྭཱསྟི། རྒྱལ་ཀུན་མཁའ་ཁྱབ་ཡེ་ཤེས་གདོད་མའི་གཤིས། །རང་བཞིན་འོད་གསལ་ཟུང་འཇུག་རྡོ་རྗེ་སེམས། །གདུལ་བྱའི་སྣང་ངོར་རྡོ་རྗེ་སློབ་དཔོན་གཟུགས། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཕགས་ཡུལ་གྲུབ་པའི་སློབ་དཔོན་སྤྱོད་པ་བའི། །སྨོན་ལམ་མཐུས་གྲུབ་བོད་གྲུབ་ནམ་མཁའ་སྙིང་། །གང་གི་རྗེས་ཆགས་ཆ་ཤས་བྱིན་བརླབས་པ། །འཕྲིན་ལས་འགྲོ་ཀུན་འདུལ་དེར་གསོལ་བ་འདེབས། །བདག་གི་ཚེ་རབས་ཚེ་བརྒྱུད་ཐམས་ཅད་དུ། །ཡང་དག་བླ་མས་རྗེས་བཟུང་དམ་ཚིག་བརྟན། །སྨིན་གྲོལ་དྲོད་ཐོབ་ས་ལམ་ཡོན་ཏན་རྫོགས། །རྡོ་རྗེ་འཆང་འབྲས་རིང་མིན་མྱུར་འགྲུབ་ཤོག །

ས་མདོ་ཁམས་ཡུལ་ཀླུང་གི་བཙུན་པ་མཚོ་བྱེད་ཀུན་བཟང་བློ་གྲོས་ཀྱིས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ཇོ་མོ་ཁ་རེག་གི་འདབས་སུ་སྨྲས་པ་སརྦ་མངྒ་ལཾ།

༈ གསོལ་འདེབས་ཁྱབ་བརྡལ་རང་བྱུང་།

ཨོཾ་སྭཱསྟི། ཁྱབ་བརྡལ་རང་བྱུང་སངས་རྒྱས་ཀུན་ཏུ་བཟང་། །ལྔ་ལྡན་ལོངས་སྤྱོད་རྫོགས་སྐུ་རྡོ་རྗེ་འཆང་། །སྤྲུལ་པའི་སྐུ་མཆོག་རྒྱལ་བ་ཤཱཀྱ་ཐོག །སྐུ་གསུམ་ངོ་བོ་ཀུན་འདུས་པདྨ་འབྱུང་། །སྐུ་བཞི་བདག་ཉིད་འདྲེན་མཆོག་དང་མའི་མགོན། །དྲིན་ཆེན་རྩ་བའི་བླ་མར་གསོལ་བ་འདེབས། །སྐད་ཅིག་མ་འདིར་བདག་གི་ལུས་ངག་ཡིད། །དཔལ་ལྡན་བླ་མ་རྡོ་རྗེ་འཆང་ཆེན་པོའི། །སྐུ་གསུང་ཐུགས་དང་དབྱེར་མེད་གཅིག་ཏུ་མཉམ། །མཐོང་ཐོས་དྲན་རེག་མཐའ་ཡས་འགྲོ་བ་ཀུན། །དེ་ལྟའི་གོ་འཕང་མཆོག་ལ་ཡང་དག་པར། །འགོད་པའི་བྱེད་པོར་བདག་གི་མྱུར་ཐོབ་ཤོག །

ཅེས་བོད་ལྗོངས་ཀྱི་ཤཱཀྱ་དགེ་སློང་དད་པ་ཅན་བླ་མ་རིན་ཆེན་དོན་ཡོད་ཀྱི་གསོལ་བ་བཏབ་པའི་དཔལ་རིག་པ་འཛིན་པས་སྨྲས་པ་དགེའོ། །

༈ གསོལ་འདེབས་འགྱུར་མེད་སྤྲོས་བྲལ།

ཨོཾ་སྭཱསྟི། ན་མོ་གུ་རུ། འགྱུར་མེད་སྤྲོས་བྲལ་རང་བྱུང་ཆོས་ཀྱི་དབྱིངས། །བླ་མ་སངས་རྒྱས་ཆོས་སྐུར་གསོལ་བ་འདེབས། །བདེ་ཆེན་ལྷུན་གྲུབ་ངེས་པ་ལྔ་ཡི་བདག །བླ་མ་སངས་རྒྱས་ལོངས་སྐུར་གསོལ་བ་འདེབས། །གང་འདུལ་དེར་སྟོན་ཕན་བདེ་ཀུན་གྱི་དཔྱིད། །བླ་མ་སངས་རྒྱས་སྤྲུལ་སྐུར་གསོལ་བ་འདེབས། །ཟབ་སལ་བདེ་ཆེན་དབྱེར་མེད་ཀུན་ཏུ་བཟང་། །བླ་མ་ངོ་བོ་ཉིད་སྐུར་གསོལ་བ་འདེབས། །སྐྱབས་གནས་དཀོན་མཆོག་རྩ་གསུམ་ཡོངས་འདུས་དཔལ། །བརྟན་གཡོ་ཀུན་གྱི་མགོན་བཅུད་དྭངས་མའི་མགོན། །ཁྱབ་བདག་འདྲེན་མཆོག་རྩ་བའི་བླ་མ་ལ། །སྙིང་ནས་རྩེ་གཅིག་གསོལ་བ་བཏབ་པའི་མཐུས། །བདག་གཞན་འགྲོ་བའི་རྒྱུད་ལ་ཡེ་བཞུགས་པའི། །གདོད་མའི་སངས་རྒྱས་བདེ་གཤེགས་སྙིང་པོའི་ཁམས། །རང་བཞིན་འོད་གསལ་བྲི་གང་བྲལ་བའི་དབྱིངས། །རང་བྱུང་གློ་བུར་དྲི་མ་ཀུན་སྤངས་ཤོག །མ་འཁྲུལ་སངས་རྒྱས་མངོན་དུ་བྱེད་པའི་ལམ། །སྟོན་མཛད་རྩ་བརྒྱུད་བླ་མའི་བྱིན་རླབས་ཞུགས། །རྣམ་རྟོག་རང་བཞིན་དྲན་པ་གཡེངས་མེད་ནས། །བདེ་གསལ་མི་རྟག་ཞི་གནས་མངོན་བྱེད་ཤོག །གནས་འགྱུར་དབྱེར་མེད་དྲན་པའི་རང་ངོ་བརྟན། །རྩེ་གཅིག་གནས་པའི་བསམ་གཏན་རྩལ་རྫོགས་ཤིང་། །རྟོག་མེད་དྲན་པ་འགྱུ་བ་རང་སར་གྲོལ། །སྤྲོས་བྲལ་མི་གཡོ་ཤེས་རབ་མངོན་གྱུར་ཤོག །ཡུལ་དང་ཡུལ་ཅན་གཉིས་མེད་རང་མདང་གཤིས། །མཉམ་ཉིད་རོ་གཅིག་རྟོགས་པ་རྩལ་རྫོགས་ནས། །དྲན་པ་རང་ནུབ་རིག་པ་མངོན་དུ་འགྱུར། །ལྷུན་གྲུབ་བསྒོམ་མེད་རྒྱལ་ཐབས་དབང་བསྒྱུར་ཤོག །རང་དོན་ལྷུན་གྲུབ་དྲི་མེད་ཆོས་སྐུ་བརྙེས། །གཞན་དོན་གཟུགས་སྐུ་ཉིད་ཀྱི་འཕྲིན་ལས་ཀྱི། །མཐའ་ཡས་འགྲོ་ཀུན་ཀུན་གཟིགས་རྒྱལ་བ་ཡི། །གོ་འཕང་མཆོག་ལ་མྱུར་དུ་འགོད་པར་ཤོག །

ཅེས་བོད་ཆེན་ཉི་འོག་གི་ལྗོངས་སུ་བལྟམས་པ། ཐོས་བསམ་བསྒོམས་པའི་ནོར་གྱི་ཕྱུག་པའི་ལོ་ཙཱ་བ་ཆེན་པོས་ལོ་རི་སྤྲུལ་པའི་སྐུ་དགེ་སློང་རྡོ་རྗེ་འཛིན་མི་ཕམ་བསྟན་འཛིན་སྲིད་ཞི་ཡོངས་གྲོལ་ཞེས་བྱ་བ་གསུང་གིས་བསྐུལ་བའི་ངོར་དཔལ་རིག་པ་འཛིན་པ་ཚེ་དབང་ནོར་བུས་སྐད་ཅིག་མར་ཡུལ་གུང་ཐང་གི་ཆ་ར་ལ་འོག་ཕུག་ཏུ་སྨྲས་པའོ། །སརྦ་མངྒ་ལཾ།

༈ གསོལ་འདེབས་རྒྱལ་བའི་སྒྱུ་འཕྲུལ།

ཨོཾ་སྭཱསྟི། རྒྱལ་བའི་སྲས་གྱུར་རྒྱལ་བའི་སྒྱུ་འཕྲུལ་གར། །འཕགས་མཆོག་རྣམས་ཀྱི་མཛད་པ་བློ་ཡི་ཡུལ། །ཡོངས་འདུས་བསམ་གྱིས་མི་ཁྱབ་ཉིད་ལགས་པས། །དྭངས་བའི་སེམས་ཀྱི་དེ་ལ་གུས་ཕྱག་འཚལ། །གསང་གསུམ་བདག་པོ་དཔའ་བོ་ཐུགས་རྡོ་རྗེ། །གང་གི་འོད་ཟེར་ཧཱུྃ་ཀར་ནམ་མཁའ་སྙིང་། །ཟུར་ཆུང་ཤེས་གྲགས་བསྒོམ་པ་ཚུལ་ཁྲིམས་སྙིང་། །མཚུངས་མེད་བླ་མར་སྙིང་ནས་གསོལ་བ་འདེབས། །ལྷ་རི་ནམ་འོད་ཞིག་པོ་བདུད་རྩིའི་ཞབས། །མ་ཎི་རིན་ཆེན་རི་ཁྲོད་དར་རྒྱས་པ། །རྩོད་བྲལ་གཏེར་སྟོན་བྱང་ཆུབ་གླིང་པ་སྟེ། །སྐྱེས་མཆོག་བླ་མར་སྙིང་ནས་གསོལ་བ་འདེབས། །ཚུལ་ཁྲིམས་འབུམ་དང་ཀུན་མཁྱེན་སངས་རྒྱས་འཕེལ། །ཀུན་དགའ་ལེགས་དང་ཀུན་དགའ་བསྟན་འཛིན་པ། །རིག་འཛིན་གྲུབ་གཙོ་པདྨ་མ་ཎིའི་ཞབས། །འགྲོ་འདུལ་བླ་མར་སྙིང་ནས་གསོལ་བ་འདེབས། །གང་གི་སྐྱེ་བར་མཚན་གྱིས་བྱིན་རླབས་པ། །ཕྱོགས་མེད་ཀུན་རྒྱུའི་རྣལ་འབྱོར་རིག་པ་འཛིན། །ཟབ་ཆོས་སྒོ་བརྒྱ་བྱེད་མཁས་བློ་མཐུ་ཅན། །ཚེ་དབང་ནོར་བུར་གྲགས་ལ་གསོལ་བ་འདེབས། །དེ་ལྟར་རྩ་བའི་བླ་མ་སྐྱེ་བའི་འཕྲེང་། །ཀུན་ལ་གུས་པས་རྩེ་གཅིག་གསོལ་བཏབ་མཐུས། །ཚེ་རབས་རྟག་ཏུ་པད་འབྱུང་ནས་སྙིང་གིས། །རྗེས་གཟུང་རྡོར་སེམས་གོ་འཕང་མྱུར་ཐོབ་ཤོག །

ཅེས་བོད་ཆོལ་ཁ་གསུམ་གྱི་མངའ་བདག་བླ་ཆེན་ས་སྐྱ་བདག་ཉིད་ཆེན་པོ་རྣམ་རྗེ་འཛིན་པ་འཇམ་དབྱངས་ཀུན་དགའ་བཀྲ་ཤིས་ཞབས་གང་གི་སྤྱན་སྔར་ཕན་ཚར་ཚད་ཀྱི་གཞུང་ལུགས་སྨྲ་བ་བློ་གྲོས་ཀྱི་ལང་ཚོ་མཆོག་ཏུ་རྒྱས་གྱུར་རབ་འབྱམས་པ་ཀུན་དགའ་མཚོ་ཞེས་པས་གསོལ་བ་བཏབ་པའི་ངོར་རྒྱལ་ཁམས་ཕྱོགས་རིས་མེད་ཀྱི་རྣལ་འབྱོར་པ་ཚེ་དབང་ནོར་བུས་ཤིང་སྟག་སྦོ་ཟླའི་དམར་ཕྱོགས་ཀྱི་གྲལ་ཚེས་རྒྱལ་བ་གསུམ་པ་ལ་རུ་ལགས་འབྲས་སྤུངས་སུ་སྨྲས་པའི་ཡིག་དམ་པའི་གདུང་གྱུར་བཀྲ་ཤིས་རབ་བརྟན་ནོ། །སརྦ་མངྒ་ལཾ།

༈ གསོལ་འདེབས་ཚེ་རབས་ཀུན་ཏུ།

ཨོཾ་སྭཱསྟི། ཚེ་རབས་ཀུན་ཏུ་བླ་མ་ཧེ་རུ་ཀ །དུ་མས་རྗེས་གཟུང་རྣལ་འབྱོར་གྲུབ་པའི་དབང་། །མ་ནོར་མང་དག་ལམ་སྟོན་རྡོ་རྗེ་འཛིན། །སྐྱེས་བུ་མཆོག་ཁྱེད་བསྐལ་བརྒྱར་ཞབས་བརྟན་གསོལ། །སྐྱབས་གནས་བསླུ་མེད་དཀོན་མཆོག་རྣམ་པ་གསུམ། །ཀུན་འདུས་སྤྱི་དཔལ་རྩ་བའི་བླ་མ་མཆོག །ཁྱེད་ལ་ཁ་ཙམ་མ་ཡིན་སྙིང་ཁུང་ནས། །ཕུར་ཚུགས་དད་པའི་ཤུགས་ཀྱིས་གསོལ་འདེབས་མཐུས། །བདག་སོགས་ཚེ་རིང་ནད་མེད་དཔལ་འབྱོར་རྒྱས། །སྙན་གྲགས་མངའ་ཐང་འཕེལ་བརྟན་ཐུན་མོང་གི །འདོད་དོན་བཀྲ་ཤིས་ལྷུན་གྲུབ་ཁྱད་པར་མཆོག །རྡོ་རྗེ་སེམས་དཔའི་གོ་འཕང་མྱུར་འགྲུབ་ཤོག །

ཅེས་དད་གུས་ཤེས་རབ་ཀྱི་ནོར་ལྡན་མི་རྗེ་འཚོ་མཛད་ཚ་རོང་ཚེ་བརྟན་བཀྲ་ཤིས་དང་། གྲུབ་ཆེན་རིན་ཆེན་འགྱུར་མེད་ཀུན་བཟང་རང་གྲོལ། རིག་གནས་པ་ཀུན་དགའ་དཔལ་འབྱོར་གྱིས་བསྐུལ་ངོར་གུ་རུ་པདྨའི་རིག་སྔགས་འཆང་བ་ཚེ་དབང་ནོར་བུས་ཐུན་མོང་གྲོ་ཞུན་ཟླ་བའི་དམར་ཕྱོགས་ཚེས་བཅུར་གང་དྲན་སྨྲས་པ་དགེའོ། །

༈ གསོལ་འདེབས་རྒྱལ་ཀུན་ཡེ་ཤེས།

རྒྱལ་བ་ཀུན་ཡེ་ཤེས་འདུས་དངོས་པདྨ་འབྱུང་། །མི་འགྱུར་བདེ་ཆེན་རང་གཟུགས་མཚོ་རྒྱལ་མ། །འོད་གསལ་འཕོ་ཆེན་བསྙེས་པའི་བི་མ་ལ། །སྙིང་ཐིག་བརྟེན་པའི་གསལ་བྱེད་ཀློང་ཆེན་ཞབས། །ཟུང་འཇུག་མཆོག་བརྙེས་བདུད་འདུལ་རྡོ་རྗེ་རྩལ། །ཀུན་གྱི་ངོ་བོ་པདྨ་བདེ་ཆེན་གླིང་། །རྒྱལ་ཚབ་མཆོག་གྱུར་འགྲོ་འདུལ་རིག་པ་འཛིན། །ཚེ་དབང་ནོར་བུ་དཔལ་ལ་གསོལ་བ་འདེབས། །སྐྱབས་མཆོག་ཁྱེད་ལ་གུས་པས་གསོལ་བཏབ་མཐུས། །བདག་སོགས་ཚེ་རབས་རྟག་ཏུ་ཁྱོད་རྗེས་གཟུང་། །མངོན་མཐོ་ངེས་ལེགས་ཐར་ལམ་ཡོན་ཏན་རྫོགས། །འཕགས་ཆེན་ས་བརྙེས་རྡོར་སེམས་མྱུར་འགྲུབ་ཤོག །

ཅེས་ཀྲེ་པ་སྟོད་ཀྱི་རྗེ་དཔོན་དད་འབྱོར་དུ་མས་བརྒྱན་པ་ཨ་ཇོ་གྲོ་ནམ་ཞལ་ངོ་རྣམས་ཀྱིས་བསྐུལ་ངོར་ཚེ་དབང་ནོར་བུས་སྤྲ་བདུན་གཙུག་ལག་ཁང་འདབས་སུ་ལྕགས་ཁྱི་གྲོ་ཞུན་ཟླ་བའི་ཚེས་ཉེར་བརྒྱད་ལ་སྨྲས་པ་སརྦ་མངྒ་ལཾ།

༈ གསོལ་འདེབས་རྒྱལ་བའི་འཕྲིན་ལས།

རབ་འབྱམས་རྒྱལ་བའི་འཕྲིན་ལས་གཅིག་བསྡུས་པ། །པདྨ་ཐོད་འཕྲེང་ཐུགས་དང་དབྱེར་མེད་པ། །གྲུབ་མཆོག་གནུབ་ཆེན་ནམ་མཁའི་སྙིང་པོ་ཡི། །སྤྲུལ་པའི་ཟློས་གར་སྙིགས་དུས་འགྲོ་བའི་དོན། །སྣང་བ་རིག་པ་འཛིན་གྲགས་མདོ་ཁམས་པ། །ཚེ་དབང་ནོར་བུ་ཞེས་ལ་གསོལ་བ་འདེབས། །འདི་ཕྱིར་བར་དོ་དུས་ཀུན་མགོན་ཁྱོད་ཀྱིས། །རྗེས་བཟུང་བྱང་ཆེན་སར་འདྲེན་བྱིན་གྱིས་རློབས། །

ཞེས་གཙང་ལ་སྟོད་ཅུང་རི་བོ་ཆེ་ཡི་ཕྱག་མཛོད་ཨོ་རྒྱན་ལྷུན་གྲུབ་ཀྱིས་གསོལ་བ་བཏབ་ངོར་ལྷ་གདོང་དུ་སྨྲས།

༈ གསོལ་འདེབས་རྔ་ཡབ་རྒྱལ་པོ།

ཨོཾ་སྭཱསྟི། རྔ་ཡབ་རྒྱལ་པོ་པདྨ་ཐོད་འཕྲེང་གི །སྐྱེ་བ་ཀུན་ཏུ་རྗེས་བཟུང་རིག་པ་འཛིན། །ལྐོག་གྱུར་གཞན་མེད་འགྲོ་ལ་ལྷག་བསམ་ཅན། །རང་དོན་བསྒྲུབ་མཁས་ཁྱོད་ཞབས་རྟག་བརྟན་ཤོག །ཚེ་དབང་ནོར་བུ་གདོད་མའི་རྣལ་འབྱོར་པ། །བླ་མའི་ཐུགས་སྲས་མཁའ་འགྲོའི་མཛའ་འོ་ཁྱེད། །བསྐལ་བཟང་གདུལ་བྱའི་དོན་དུ་བརྟན་བཞུགས་ནས། །བདག་ཀྱང་ཁྱོད་དང་གོ་འཕང་མཉམ་སྦྱོར་ཤོག །

༈ གསོལ་འདེབས་ཀུན་བཟང་པད་འབྱུང་།

ཨ་ཧོ། རྒྱལ་བ་ཡོངས་ཀྱི་ཐུགས་ཕྲིན་མ་ལུས་ཀུན། །རབ་རྫོགས་ཀུན་བཟང་པད་འབྱུང་ཡབ་ཡུམ་གྱིས། །རྗེས་བཟུང་བསྟན་པ་འཛིན་པའི་སྐྱེས་བུ་མཆོག །གསང་བདག་རྣལ་འབྱོར་ཚེ་དབང་ནོར་བུ་ཁྱེད། །ངེས་པའི་དོན་དུ་མཉམ་གཉིས་ཡེ་ཤེས་ཁམས། །བདེ་གཤེགས་སྙིང་པོ་ཏིལ་མར་བཞིན་དུ། །སྣང་ལས་རྒྱལ་བའི་ཐུགས་རྗེས་རྨད་བྱུང་བདག །རྡོར་སེམས་པད་འབྱུང་ཧཱུྃ་དཀར་ནམ་སྙིང་གིས། །བྱིན་རླབས་རོལ་གར་བྱང་ཆུབ་སར་གནས་ཤིང་། །གདུལ་བྱ་དྲང་དོན་མ་ངེས་དུ་མའི་གཟུགས། །གང་འདུལ་ཆུ་ཟླའི་རོལ་རྩེད་བསྒྱུར་མཁས་པ། །དེང་དུས་རིག་འཛིན་ལས་ཀྱི་རྡོ་རྗེ་ཞེས། །ལུས་ནི་ལེགས་ཉེས་མ་ངེས་སྨྱོན་སྤྱོད་སྐུ། །ངག་གི་སྣ་ཚོགས་མ་ངེས་ཆལ་ཆོལ་གསུང་། །ཡིད་ནི་གྲོལ་འཁྲུལ་མ་ངེས་བན་བུན་ཐུགས། །ཡང་ཡང་འགྲོ་འདུལ་ཐར་ལམ་བཤེས་གཉེན་ཆེ། །དེ་ལ་ཁ་ཞེ་མེད་པར་གསོལ་འདེབས་ཀྱིས། །མགོན་ཁྱེད་སྙིགས་དུས་འདུལ་དཀའི་འགྲོ་བ་རྣམས། །འདུལ་ཞིང་བདེ་སྦྱོར་རྡོར་གསང་འོད་གསལ་གྱི། །རྟེན་འབྲེལ་བསྐལ་བཟང་སྨིན་གྲོལ་ཆེད་དུ། །སྐུ་ཡི་ངོ་བོ་ཚེ་ཡི་རང་བཞིན་ལ། །འགལ་རྐྱེན་གང་གི་མ་ཚུགས་རབ་ཏུ་གནས། །ཐུགས་ཀྱི་འཕོ་འགྱུར་མེད་པར་ཁམས་དྲུག་སྦུབ། །ཡུན་རིང་འཚོ་བཞེས་རབ་ཏུ་བརྟན་གྱུར་ཅིག །དེ་ལྟར་ཞབས་པད་བརྟན་པར་གསོལ་འདེབས་འདི། །དཀོན་མཆོག་རྩ་གསུམ་བདེན་པས་ཡོངས་འགྲུབ་ཅིང་། །བདག་ནི་བྱང་ཆུབ་ཆེ་བར་ཁྱོད་ཉིད་དང་། །འབྲེལ་མེད་སྨིན་གྲོལ་རྡོ་རྗེ་འཆང་ཐོབ་ཤོག །

དེ་སྐད་གནས་མཆོག་ཟབ་ཕུར་བཞུགས་པའི་སྡོམ་བརྩོན་བླ་མ་ཨོ་རྒྱན་ཚུལ་ཁྲིམས། རྗེ་དྲུང་ཡེ་ཤེས་རྣམ་རྒྱལ། དཀོར་གཉེར་རིག་འཛིན་དབང་པོ་དང་། ཟླ་བ་འཇམ་དབྱངས་རྣམས་ཀྱིས་ཡང་ཡང་བསྐུལ་ངོར། མདོ་ཁམས་པ་ལྷ་བཙུན་ཚེ་དབང་ནོར་བུས་ཟབ་ཕུ་ལུང་དུ་མེ་རྟ་ཁྲུམས་ཟླའི་ཚེས་གཉིས་ལ་གང་ཤར་དུ་སྨྲས་པའི་ཡིག་རིག་སྤྲུལ་པའི་སྐུ་འཕྲིན་ལས་བསྟན་འཛིན་བཟང་པོས་བགྱིས་པ་དགེའོ། །

༈ གསོལ་འདེབས་དང་པོའི་སངས་རྒྱས།

ཨོཾ་ཨཱ༔་ཧཱུྃ དང་པོའི་སངས་རྒྱས་རྒྱལ་བ་ཀུན་གྱི་ཡབ། །ཀུན་བཟང་རྡོ་རྗེ་སེམས་མཆོག་པདྨ་འབྱུང་། །ཐུགས་ཀྱི་ཡེ་ཤེས་གཅིག་བསྡུས་རང་གཟུགས་མདངས། །རྩ་བའི་བླ་མ་ཞབས་ལ་གསོལ་བ་འདེབས། །སྒྱ་འཕྲུལ་ཞི་ཁྲོ་རབ་འབྱམས་རྒྱུད་སྡེའི་ལྷ། །ཧེ་རུ་ཀ་དཔལ་ཀུན་གྱི་ཕྱག་རྒྱ་ཆེ། །ཐུགས་ཕྲིན་བདག་ཉིད་རྡོ་རྗེ་ཅན་གྱི་འཕྲུལ། །རྩ་བའི་བླ་མའི་ཞབས་ལ་གསོལ་བ་འདེབས། །སྙིང་ཉིད་མཁའ་ལ་སྙིང་རྗེའི་སྤྲིན་འཕྲོ་བ། །གསང་ཆེན་བདག་མོ་ཀུན་གྱི་བྱང་ཆུབ་ཆེ། །བླ་མེད་མཛོད་འཛིན་དཔའ་བོ་ཆེ་བའི་མཆོག །རྩ་བའི་བླ་མའི་ཞབས་ལ་གསོལ་བ་འདེབས། །རྒྱལ་བ་ཀུན་གྱི་རྗེས་ཆགས་ཐུགས་རྗེ་ཡི། །ས་གར་ཁྱོད་ཉིད་སྣང་ནས་གདུལ་བྱ་ཡི། །དོན་མཛད་མཚུངས་མེད་རྡོ་རྗེ་འཛིན་དབང་རྗེ། །རྩ་བའི་བླ་མའི་ཞབས་ལ་གསོལ་བ་འདེབས། །གང་ཁྱེད་ཞིང་འདིར་བདག་སོགས་གདུལ་བྱའི་དོན། །སྐྱོ་དུབ་མེད་པར་ཞབས་པར་རྟག་བརྟན་ཅིང་། །མཛད་ཕྲིན་མཉམ་མེད་ཆོས་ཀྱི་འཁོར་ལོས་བསྒྱུར། །ཀུན་ཀྱང་སྨིན་གྲོལ་རྡོ་རྗེ་འཆང་ཐོབ་ཤོག །

ཅེས་རིག་སྔགས་འཆང་བ་བཛྲ་ར་ཌ་པ་ཡི་བྱིན་གྱིས་བརླབས་པ་ཞིང་། ཚང་བའི་མེ་ཏོག་གི་ཁ་ལོ་སྐྱེ་བའི་ཐ་མ་སྤྲུལ་པའི་སྐུ་རིག་འཛིན་ཡོན་ཏན་རྒྱ་མཚོ་འམ་མཚན་གཞན་དུ་པདྨ་སྟོབས་ལྡན་དཔའ་བོ་དབང་ཕྱུག་འཆང་རྡོ་རྗེ་སྙིང་པོ་རྩལ་གྱིས་ནན་ཏན་དུ་གསོལ་འདེབས་ཞིག་དགོས་ཞེས་གསུང་ངོར་རིག་པ་འཛིན་པ་ཚེ་དབང་ནོར་བུས་ཕུར་བུ་ཞེས་པ་སྤྲེལ་ཟླ་བ་དང་པོ་ལ་ཟ་འོག་ཕུག་ཏུ་སྨྲས་པའི་ཡིག་རིག་འགྱུར་མེད་ཕུན་ཚོགས་དགེ་ལེགས་ཀྱིས་བགྱིས་པའོ། །

དད་པའི་ཆུ་སྟོད་ལས་སྐྱེས་བླ་མའི་གསོལ་འདེབས་པདྨའི་ཕྲེང་བ་བསྐལ་བཟང་རྐང་དྲུག་དགའ་བའི་བཅུད་འཛིན།

༈ དད་པའི་ཆུ་སྟོད་ལས་སྐྱེས་བླ་མའི་གསོལ་འདེབས་པདྨའི་ཕྲེང་བ་བསྐལ་བཟང་རྐང་དྲུག་དགའ་བའི་བཅུད་འཛིན་བཞུགས་སོ། །

ཨ་ཧོ། ཆོས་ཉིད་ཀ་དག་ཁྱབ་བརྡལ་ཆེན་པོའི་ཀློང་། །འཁོར་དས་ལྷུན་གྲུབ་འོད་གསལ་རོལ་པ་ཆེ། །རིག་པ་སྟོང་གསལ་བདེ་གཤེགས་སྙིང་པོའི་ཁམས། །ཀུན་བཟང་གདོད་མའི་སྲས་དེར་གསོལ་བ་འདེབས། །དག་དང་མ་དག་ཁམས་ཀུན་ཆོས་ཉིད་གཤིས། །འདུ་བྲལ་མེད་པས་སྦྱངས་སྨིན་ཆོ་འཕྲུལ་མཆོག །སྟོན་ནས་མ་དག་འགྲོ་ཀུན་ཡང་དག་ལམ། །སྦྱོར་མཛད་སྤྲུལ་པའི་སྐུ་དེར་གསོལ་བ་འདེབས། །སྒྱུ་མའི་ངང་དུ་ཆོས་ཉིད་རོལ་པའི་རྩལ། །དཔག་པར་དཀའ་བ་ཡེ་ཤེས་ཆེན་པོའི་འཕྲུལ། །གྲངས་མེད་དུས་ཞེས་སྣ་ཚོགས་མ་མ་མས། །གཉུག་མའི་སྙིང་པོ་རྟོགས་དེར་གསོལ་བ་འདེབས། །མེད་བཞིན་ཡོད་སྣང་སེམས་ཞེས་ཕྲ་བ་འདི། །ཀུན་བཟང་ཐོད་འཕྲེང་ཅན་གྱི་ཡང་ནས་ཡང་། །ཐུགས་རྗེས་ལྕགས་ཀྱུས་དྲངས་ནས་ལྷན་སྐྱེས་མཆོག །སྙེགས་གྱུར་དཔའ་བོ་དམ་པར་གསོལ་བ་འདེབས། །ཅི་ལྟར་སྣང་ཡངས་ངོ་བོ་སྐྱེ་མེད་ཤར། །མ་ངེས་གང་འདུལ་སྣང་བ་ཅིར་ཡང་སྟོན། །བྱ་བྲལ་ངང་ལ་བྱ་བ་འདོད་དགུར་བསྒྱུར། །རྣལ་འབྱོར་དབང་ཕྱུག་མཆོག་དེར་གསོལ་བ་འདེབས། །སྙིགས་དུས་གདུལ་བྱ་རང་གཟུགས་ཀྱིས་འདུལ་ཕྱིར། །གུ་རུའི་རྗེས་འཇུག་གསང་སྔགས་དོན་ལ་སྤྱོད། །རལ་པའི་གདེང་ཅན་གང་ཤར་སྤྱོད་པ་སྐྱོང་། །རིག་པ་འཛིན་མཆོག་དེར་ལ་གསོལ་བ་འདེབས། །ཁྱེད་ལ་སྙིང་ནས་ང་རོས་གསོལ་བཏབ་ན། །བདག་བརྒྱུད་བྱིན་རློབས་རྒྱལ་ཀུན་ཡེ་ཤེས་མཐུ། །གཅིག་འདུས་བླ་མེད་དོན་གྱི་སྙིང་པོ་དེ། །དེ་རིང་ཉིད་ནས་རྟོགས་པར་མཛད་དུ་གསོལ། །

ཅེས་པ་འདི་ཡང་ལ་ཡོན་ཏན་ག་ནས་ལྟས་ཀྱང་མེད་གཤིས་རང་གི་རང་ལ་གསོལ་འདེབས་བྲི་བ་ཤིན་ཏུ་མི་འོས་ཀྱང་བསྐུལ་བ་པོ་ཡུལ་གཉེན་བཤེས་མཚོན་ཙམ་བདེ་གཤེགས་སྙིང་པོའི་འགྲོ་ལ་ཁྱབ་དོན་བཞིན་བགྱིས་པ་འདི་ནི་རང་གི་སྙིང་གི་བུ་པདྨ་གུང་ཙན་ཐུགས་ཀྱི་འདོད་གར་དཔའ་བ་རྡོ་རྗེ་ཤུགས་འཆང་གཏེར་དང་། བདུད་བཅོམ་བྱིན་རླབས་རྩོད་བྲལ་གཏེར་སྟོན་གར་དབང་སྙིང་པོའི་སྤྲུལ་སྐུ་དང་། ཅོག་རོ་ཀླུའི་རྒྱལ་མཚན་གྱི་སྤྲུལ་པ་ཀརྨ་གར་དབང་དོན་འགྲུབ་དང་། ཡན་ལུང་འཁྲུལ་ཞིག་ཆེན་པོ་ཆོས་ཀྱི་ཉི་མ་དང་། སྦས་པའི་རྣལ་འབྱོར་དབང་ཕྱུག་བཀྲ་ཤིས་རྒྱ་མཚོ་སོགས་ཀྱིས་ཡང་ཡང་བསྐུལ་ངོར་མདོ་ཁམས་ཀཿཐོག་ལྷོ་ཕྱོགས་པ་ལྷ་ཡི་བཙུན་པ་ཚེ་དབང་ནོར་བུས་མངའ་རིས་གུང་ཐང་གློ་བོ་བོད་ཀྱི་མཚམས་བས་མཐའ་བྲ་ལར་སྦོ་ཟླའི་དམར་ཕྱོགས་ཀྱི་ཚེས་བཅུ་གཉིས་ལ་བྲིས་པ་མངྒ་ལཾ། དད་པ་བྱས་ན་ཁྱིའི་སོ་རིང་བསྲེལ་དཔེར་འདྲེན་ནོ། །དགེའོ། །

༈ གསོལ་འདེབས་ཀུན་མཁྱེན་རྒྱལ་བའི་སྤྱི་མེས།

ཨོཾ་སྭཱསྟི། ཀུན་མཁྱེན་རྒྱལ་བའི་སྤྱི་མེས་ཀུན་ཏུ་བཟང་། །འཁོར་འདས་ཀུན་ལ་ཁྱབ་པའི་བདེ་གཤེགས་སྙིང་། །རང་རིག་དྲི་བྲལ་ཆོས་དབྱིངས་རྡོ་རྗེ་སེམས། །དཔལ་ལྡན་བླ་མའི་ངོ་བོར་གསོལ་བ་འདེབས། །སྲིད་དང་ཞི་བའི་ཕུན་ཚོགས་མ་ལུས་ཀྱི། །འབྱུང་གནས་སེམས་ཉིད་ཆོས་སྐུ་རིན་པོ་ཆེ། །རང་ངོ་ཤེས་བཞིན་ཡིན་ལུགས་གདོད་མའི་གཤིས། །དཔལ་ལྡན་བླ་མའི་ངོ་བོར་གསོལ་བ་འདེབས། །གདོད་ནས་ཆོས་སྐུའི་ངོ་བོར་རྟག་གནས་ཀྱང་། །རང་བྱུང་གློ་བུར་དྲི་མ་གསལ་ཕྱིར་དུ། །མ་ཡེངས་རིག་པ་ལམ་བྱེད་བསྒོམས་ཀྱི་མཆོག །དཔལ་ལྡན་བླ་མའི་ངོ་བོར་གསོལ་བ་འདེབས། །ཚོགས་དྲུག་སྤྱོད་ལམ་བདེ་སྡུག་བཏང་སྙོམས་ཀུན། །རང་རིག་རང་མདངས་རྒྱ་མཚོའི་རྦ་རླབས་བཞིན། །རང་བབ་རང་གྲོལ་རང་དུ་རྟག་སྤྱོད་པ། །དཔལ་ལྡན་བླ་མའི་ངོ་བོར་གསོལ་བ་འདེབས། །དུས་གསུམ་སངས་རྒྱས་སྐུ་གསུམ་ཡོངས་ཀྱི་དཔལ། །ཆེ་བའི་ཡོན་ཏན་ཀུན་ཀྱང་རང་རིག་པ། །དྲི་མེད་མངོན་དུ་གྱུར་ལས་གཞན་ཡོད་མིན། །དཔལ་ལྡན་བླ་མའི་ངོ་བོར་གསོལ་བ་འདེབས། །ཆོས་ཀུན་རང་རིག་དེ་ཉིད་ཇི་བཞིན་པ། །ངོ་སྤྲོད་བྱེད་པོ་དཔལ་ལྡན་བླ་མ་ནི། །སངས་རྒྱས་ཀུན་འདུས་སངས་རྒྱས་ཀུན་ལས་ལྷག །དེ་ལ་སྙིང་ནས་གསོལ་འདེབས་ཕུར་ཚུགས་མཐུས། །བདག་གཞན་གཉིས་འཛིན་རྟོགས་པའི་དྲི་མ་ཀུན། །བདག་མེད་སྟོང་པའི་མཁའ་ལ་འཇའ་ལྟར་ཡལ། །དམ་པ་སྐུ་གཉིས་ཕུན་ཚོགས་ཡོན་ཏན་ཀུན། །འབད་མེད་ལྷུན་གྱི་འགྲུབ་པར་བྱིན་གྱིས་རློབས། །བྱང་ཆུབ་མཆོག་གི་གོ་འཕང་མ་ཐོབ་བར། །སྐྱེ་ཀུན་རྡོ་རྗེ་འཆང་གི་མཆོག་དང་མཇལ། །དམ་ཚིག་རྣམ་དག་ཤེས་བརྩོན་མཆོག་ལྡན་པས། །རང་གཞན་དོན་གཉིས་རྒྱ་མཚོར་སྤྱོད་པར་ཤོག །

ཅེས་རྣམ་དཔྱོད་ལང་ཚོ་དང་ལྡནཔ་ཞལ་ངོ་ཀུན་ཤར་གྱི་ལྕམ་སྲིང་ཆོས་མཛད་མ་བསོད་ནམས་ཆོས་དར་དང་ཀུན་དགའ་ཟུང་གིས་བསྐུལ་བའི་ངོར་གངས་ཅན་བོད་ཡུལ་ཀུན་ཏུ་རྒྱུ་བའི་མི་རིག་པ་འཛིན་པར་བརྗོད་པ་ཚེ་དབང་ནོར་བུས་ཇོ་མོ་གངས་དཀར་ལའི་ངོགས་སུ་བརྗོད་དེ་བསྐུར་བ་སརྦ་མངྒ་ལཾ།

༈ གསོལ་འདེབས་རྒྱལ་ཀུན་ཡེ་ཤེས་མཁའ་ཁྱབ།

ཨོཾ་སྭཱསྟི། རྒྱལ་བ་ཀུན་གྱི་ཡེ་ཤེས་མཁའ་ཁྱབ་ནི། །ཆོས་དབྱིངས་སྤྲོས་བྲལ་བདེ་བ་ཆེན་པོའི་ཁམས། །དེ་ནི་དཔལ་ལྡན་རྩ་བའི་བླ་མའི་ཐུགས། །བླ་མ་ཆོས་ཀྱི་སྐུ་ལ་གསོལ་བ་འདེབས། །ཡེ་ཤེས་རང་སྣང་སྒྱུ་འཕྲུལ་དྲ་བའི་གར། །སྐུ་དང་ཞིང་ཁམས་འབྲལ་མེད་འོད་གསལ་དབྱངས། །དེ་ནི་དཔལ་ལྡན་རྩ་བའི་བླ་མའི་གསུང་། །བླ་མ་ལོངས་སྤྱོད་རྫོགས་སྐུར་གསོལ་བ་འདེབས། །སྤྲོས་པ་མེད་དང་ཚད་མེད་ཐུགས་རྗེའི་མཐུས། །གང་འདུལ་རྣམ་པ་ཐམས་ཅད་རོལ་པའི་སྐུ། །དེ་ཡང་དཔལ་ལྡན་བླ་མའི་སྐུ་ཡིན་ཏེ། །བླ་མ་སྤྲུལ་པའི་སྐུ་ལ་གསོལ་བ་འདེབས། །འཁོར་འདས་བསྟན་གཡོ་མ་ལུས་ཐམས་ཅད་ཀྱང་། །དཔལ་ལྡན་བླ་མའི་ཆོ་འཕྲུལ་རོལ་པ་སྟེ། །ཀུན་ཀྱང་ཕན་བདེ་ཐར་བའི་ལམ་མཆོག་སྟོན། །འཛད་མེད་རྒྱན་གྱི་འཁོར་ལོར་གསོལ་བ་འདེབས། །དེ་ལྟར་གསང་སྔགས་དོན་སྟོན་རྡོ་རྗེ་འཛིན། །དཔལ་ལྡན་བླ་མར་ཤེས་བཞིན་དད་པ་ཡི། །རྩེ་གཅིག་གུས་པ་གསོལ་བ་འདེབས་པའི་མཐུས། །སྐུ་གསུམ་འབྲས་བུ་མྱུར་དུ་འགྲུབ་བྱིན་རློབས། །གང་ཞིག་ཟུང་འཇུག་མཆོག་སྐུ་མ་ཐོབ་བར། །ཚེ་རབས་ཀུན་ཏུ་མཐོ་རིས་རྟེན་བཟང་ཐོབ། །རྡོ་རྗེ་འཆང་དངོས་བླ་མས་རྗེས་སུ་བཟུང་། །བླ་མེད་དཀྱིལ་འཁོར་མཆོག་གི་དབང་བསྐུར་ཐོབ། །དམ་ཚིག་རྣམ་དག་རིམ་གཉིས་དྲོད་གདེངས་བརྙེས། །ཕྱིར་མའི་ལྡོག་པའི་གོ་འཕང་མྱུར་ཐོབ་ནས། །འབྲེལ་བཅས་འགྲོ་བ་ཀུན་ཀྱང་དེ་ཇི་བཞིན། །འོད་དཔག་མེད་མགོན་ས་ལ་འཁོད་པར་ཤོག །

ཅེས་སྙེ་མོ་མདོ་མཁར་རྗེ་བོའི་བཙུན་མ་ཀརྨ་ཆོས་བཟང་དབང་མོས་གསོབ་པ་བཏབ་པའི་ངོར། རྒྱལ་ཁམས་པ་རིག་འཛིན་ཚེ་དབང་ནོར་བུས་མེ་སྟག་ཆུ་སྟོད་ཟླ་བའི་ཚེས་བཟང་པོར་ཇོ་མོ་གངས་དཀར་མའི་ངོགས་སུ་སྤེལ་བ་སརྦ་མངྒ་ལཾ།

༈ གསོལ་འདེབས་གདོད་ནས་གྲུབ་པ།

ཨོཾ་སྭཱསྟི། གདོད་ནས་གྲུབ་པའི་སེམས་རྒྱུད་བྱིན་རླབས་མཐུས། །ཚེ་འདིར་ཐོས་བསམ་བསྒོམ་པའི་ཡོན་ཏན་རྒྱས། །དབང་གི་རྒྱལ་པོ་པདྨ་ཀ་ར་ཡིས། །རྗེས་སུ་བཟུང་མཐུས་གཞན་དྲིང་མི་འཇོག་པར། །རང་སྟོབས་གཉིས་ཀྱིས་དོན་གཉིས་ལྷུན་གྲུབ་སྐྱོངས། །མ་ནོར་ལྟ་བའི་གནས་ལུགས་ཚུལ་བཞིན་རྟོགས། །ཏམ་བུ་ར་ལྟར་འཆད་བརྩམ་སྒོ་བརྒྱ་བསྙེན། །མཁྱེན་བརྩེ་ནུས་ལྡན་བླ་མར་གསོལ་བ་འདེབས། །ཁྱེད་ལ་ཁ་ཞེ་མེད་པར་གསོལ་བཏབ་ན། །པདྨ་ཀ་རའི་བདེན་ཚིག་བསླུ་མེད་པས། །བདག་ཅག་གདུལ་བྱ་སྨིན་གྲོལ་ལ་སྦྱོར་ནས། །རིང་མིན་རྡོ་རྗེ་སེམས་ཐོབ་གདོན་མི་ཟ། །

ཅེས་གསེར་བཟང་གྲུབ་མཆོག་དམ་པའི་གདུང་འཛིན་པདྨ་འགྱུར་མེད་ནོར་བུས་གསུང་གིས་བསྐུལ་ངོར། རང་སྤངས་རྟོགས་ཡོན་ཏན་ཆ་ཕྲ་རུང་། རྒྱལ་བ་པདྨའི་གསུང་གི་བྱིན་གྱིས་རླབས་པ་ཁོ་ནར་སེམས་ནས་བྱི་བ་གླང་ཆེན་དཔེར་བརྗོད་རང་བསྟོད་ཚིགས་བཅད་གསུམ་པོ་འདི་ཡང་ཤིང་རྟ་ནག་ཟླའི་ཚེས་བཟང་ལྔ་པ་སྤེལ་བ་དགེའོ། །མངྒ་ལཾ།

༈ གསོལ་འདེབས་ཀུན་ཁྱབ་བདེ་ཆེན།

ཨོཾ་སྭཱསྟི། ཀུན་ཁྱབ་བདེ་ཆེན་ཡེ་ཤེས་བཟང་པོའི་གར། །དབང་ཕྱུག་བརྒྱད་ལྡན་རྡོ་རྗེ་འཆང་ཆེན་པོའི། །སྒྱུ་འཕྲུལ་དཀྱིལ་འཁོར་ཡོངས་གཙོ་བླ་མའི་སྐུ། །གང་དེར་གསོལ་འདེབས་བསྐལ་བརྒྱར་ཞབས་བརྟན་ཤོག །པདྨ་ཀ་རས་ཚེ་རབས་དུ་མ་རུ། །རྗེས་བཟུང་འཇིག་རྟེན་དབང་ཕྱུག་ཇོ་ནང་པའི། །ལྟ་གྲུབ་མ་ནོར་སྐྱོང་མཁས་རིག་པ་འཛིན། །ཁྱོད་ལ་གཅམ་བུ་མ་ཡིན་གསོལ་བཏབ་ན། །བདག་ནི་སྐྱེ་ཀུན་ཁྱོད་ཀྱི་རྗེས་བཟུང་ཞིང་། །སྨིན་གྲོལ་རྡོར་སེམས་འབྲས་བུ་མྱུར་ཐོབ་པར། །བྱིན་གྱིས་རློབས་མཛོད་བདག་སོགས་འགྲོ་དོན་དུ། །མགོན་ཁྱོད་ཞབས་པད་རྡོ་རྗེ་ལྟར་བརྟན་ཤོག །

ཅེས་ཆོས་གྲྭ་ཆེན་པོ་གཙང་གཡས་རུ་གསེར་མདོག་ཅན་གྱི་དགེ་སློང་བློ་བཟང་རིན་ཆེན་པོས་བསྐུར་ངོས་རྒྱལ་ཁམས་ཚེ་དབང་ནོར་བུས་རི་ཁྲོད་ཆེན་པོ་ཇོ་ནང་དུ་ས་ག་ཟླ་བའི་ཚེས་དྲུག་ལ་བྲིས་པ་སརྦ་མངྒ་ལཾ།

ཞབས་པད་བརྟན་པའི་ཚིགས་བཅད་བཀྲ་ཤིས་བརྟག་པའི་རི་བོ།

༄༅། །ཞབས་པད་བརྟན་པའི་ཚིགས་བཅད་བཀྲ་ཤིས་བརྟག་པའི་རི་བོ་ཞེས་བྱ་བ་བཞུགས་སོ། །

༈ ཨོཾ་སྭཱསྟི། ཟུང་འཇུག་ཡེ་ཤེས་མཆོག་གི་ཕུང་པོ་ཅན། །འགྱུར་མེད་གདོད་ནས་རྣམ་པར་དག་པའི་ཁམས། །བདེ་ཆེན་རྡོ་རྗེའི་རང་བཞིན་བླ་མའི་སྐུ། །རྟག་པར་རྡོ་རྗེའི་ཁྲི་ལ་བརྟན་བཞུགས་གསོལ། །གཞོམ་མེད་ཀུན་ལ་ཁྱབ་པ་ནཱ་དའི་མདངས། །ཡན་ལག་དྲུག་ཅུའི་ངོ་བོ་ནམ་མཁའི་ཁམས། །སྣ་ཚོགས་འགྲོ་ཕན་སྒྲ་དབྱངས་བླ་མའི་གསུང་། །ཆད་མེད་རྟག་ཏུ་སྣང་བཞིན་རྟག་བཞུགས་གསོལ། །སྤྲོས་བྲལ་ཟབ་དབྱིངས་ཞི་བ་འོད་གསལ་བ། །ཆོས་ཉིད་སྣང་བ་གསུམ་བརྩེགས་འདུས་མ་བྱས། །ཕུན་ཚོགས་གཏེར་གྱུར་དཔལ་ལྡན་བླ་མའི་ཐུགས། །མཁའ་ཁྱབ་གཡུང་དྲུང་ཞིང་འདིར་བརྟན་བཞུགས་གསོལ། །རྒྱལ་བ་ཀུན་གྱི་ཡོན་ཏན་ནམ་མཁའི་མཛོད། །འཛད་མེད་འཕྲིན་ལས་འགྲོ་ཕན་བདེ་སྟེར་མགོན། །སྙིགས་དུས་གདུལ་བྱའི་སྐྱབས་གཅིག་ལྷ་ཡི་ལྷ། །གངས་ཅན་མགོན་པོ་བསྐལ་བརྒྱར་ཞབས་བརྟན་གསོལ། །སངས་རྒྱས་ཀུན་དངོས་གསུང་གི་རྡོ་རྗེ་ཆོས། །པད་འབྱུང་གསུང་གི་ཚངས་པ་ལྷའི་མེ་ཏོག །སྤྲུལ་པའི་ཟློས་གར་གངས་ཅན་བདེ་བའི་རྩལ། །སྔགས་འགྱུར་བླ་མ་བསྐལ་བརྒྱར་ཞབས་བརྟན་གསོལ། །སྔོན་སྒོམ་བློ་ཅན་སྨོན་ལམ་བཟང་པོ་ཡི། །བསྐལ་དུས་བཟང་པོར་བསྒྱུར་བའི་མཐུ་སྟོབས་ཅན། །རྒྱལ་བ་རྒྱ་མཚོ་བདག་ཉིད་འཇིག་རྟེན་མགོན། །མཆོག་གི་བླ་མ་བསྐལ་བརྒྱར་ཞབས་བརྟན་གསོལ། །འགྲོ་བའི་མགོན་པོ་མཚུངས་མེད་དམ་པའི་ཞབས། །སྙིགས་དུས་ཉམ་ཐག་འགྲོ་ལ་བརྩེ་བ་ཡི། །བསྐལ་པ་རྒྱ་མཚོར་རྟག་བརྟན་རྡོ་རྗེ་ལྟར། །སྙིང་ནས་ཞབས་པད་བརྟན་པར་གསོལ་བ་འདེབས། །གང་གི་ཚད་མེད་ཐུགས་རྗེའི་གྲུ་རྫིང་ལ། །བརྟེན་ནས་གངས་ཅན་སྐྱེ་དགུའི་རྣམ་མང་ཀུན། །ཕྲལ་དང་ཡུན་གྱིས་དགེ་ལེགས་དཔལ་ཀུན་འཕེལ། །མཆོག་ཏུ་བདེ་བའི་དགའ་སྟོན་རྒྱས་པར་ཤོག །

ཅེས་གངས་རིའི་ཁྲོད་ཀྱི་ལྷ་ཡི་ལྷ་འཇིག་རྟེན་གསུམ་གྱི་མགོན་པོ་ཐམས་ཅད་མཁྱེན་གཟིགས་རྒྱལ་བ་མཆོག་གི་ཞབས་པད་ཡུན་རིང་དུ་འཚོ་བཞེས་བརྟན་པའི་ཆེད་དུ་གསོལ་བ་འདེབས་པ་འདི་ནི་བོད་ཆེན་གྱི་མངའ་རིས་སུ་ཆོས་སྨྲ་བའི་གོ་སར་སྐྱེས་ཤིང་ཕྱོགས་མེད་ཀུན་ཏུ་རྒྱུ་བའི་རྒྱལ་ཁམས་དཱ་རི་བ་ཌ་པ་རིག་པ་འཛིན་པ་ཕྲན་གྱུར་ཨཱ་ཡུཪྻ་ཤ་མ་ནི་བཛྲ་གྱི་ཨིངྐ་ར་ཆར་ཉེ་བ་མགོ་ཟླའི་དཀར་ཕྱོགས་རྒྱལ་བ་དང་པོ་ལ་གྲུབ་པའི་གནས་ཆེན་རྒྱལ་གྱི་རྩིབས་རི་ནས་གུས་པས་ཕུལ་བ་དགེ་ལེགས་རྟེན་འབྲེལ་བཟང་པོའི་རྒྱུ་རུ་གྱུར་ཅིག་ཛ་ཡ་ཛ་མ་སུ་ཛ་ཡ། ཞབས་པད་ཡིད་བཞིན་ནོར་བུ་ཡུན་ནས་ཡུན་དུ་གྱུར་པ་བསྐལ་པ་རྒྱ་མཚོར་བཞེས་གསོལ་བ་འདེབས་པའི་ཆེད་དུ་རྟེན་མཚོན་བྱེད་དུ། སྐུ་རྟེན་རྒྱ་གར་ཤར་ལི་ཁྱད་འཕགས་གསང་འདུས་དཀྱིལ་འཁོར་འཁོར་ལོའི་བདག་པོ་རྡོ་རྗེ་མི་བསྐྱོད་པའི་སྐུ་བརྙན་རྨད་བྱུང་། གསུང་རྟེན་རང་ཉིད་གཞོན་ནུའི་དུས་སྐབས་སུ་ཡེ་ཤེས་མཁའ་འགྲོས་འབོག་པར་རློམ་པའི་ཚེ་གྲུབ་བཀའ་རྒྱ་ཅན། ཐུགས་རྟེན་རྒྱུད་སྡེ་ཁུངས་ལྡན་རྣམས་ནས་སྒྲོལ་མ་དམར་མོ་སོགས་ཀྱི་བཟླས་འཕྲེང་དུ་མཆོག་ཏུ་ཤིས་པར་བསྔགས་པ་པདྨའི་ཕྲེང་བ་ཞེས་ཙན་དན་དམར་མོ་འབྲས་བུར་འདོད་པ་འདི་ཡང་ནེ་པལ་རྒྱལ་པོས་བདག་ལ་སྦྱིན་པ་ལ་ཉེ་ལེགས་པར་བཟུང་ནས་རྒྱན་དང་དངུལ་གྱི་བཅུ་གྲངས་གསར་དུ་སྦྱར་བ། མི་འཇིགས་སེང་གེས་ཉེ་བར་མཚོན་པའི་གནད་དཀར་རྡོ་རྗེའི་རེ་ཁ་ཅན། ཤེ་བལ་གྱི་དོང་ཙེའི་འཕྲེང་བ་བརྒྱ་དང་རྩ་བརྒྱད། ལྷ་ཡི་རེག་བྱ་རྣམ་པར་དཀར་ཞིང་འཇམ་མཛེས་སྲིད་དུ་རིང་བ་དང་བཅས་ཏེ། ཕྲན་བུ་ལས་ཀྱང་ཕྲན་བུ་བྱ་བྲལ་དཱ་རི་ཌ་བར་གྱུར་པ་ཡི་འབུལ་ངོར་ཆེར་ཕྲ་ཡང་། མཆོག་གྱུར་རྣམས་ཀྱི་མཐའ་དག་གཟིགས་ངོར་ཡངས་ཤིང་མཉམ་པའི་ཐུགས་རྗེ་ཆེན་པོའི་སྤྱན་རས་ཀྱིས་བྱབ་ཅིང་ཞབས་པད་མཆོག་གི་སྐུ་ཚེ་འཚོ་བཞེས་རྡོ་རྗེའི་རི་བོ་ལྟར་བརྟན་པར་གསོལ་བ་འདེབས་པ་ཇི་བཞིན་རེ་འབྲས་དོན་ལྡན་དུ་མཛད་དུ་གསོལ། ཨ་ཡུ་དཱ་རརྒ་སརྦ་ཀ་ལྱཱ་ཝད་ནྡྷུ། རྡོ་རྗེ་མི་བསྐྱོད་པའི་སྐུ་འདི་འཕགས་ཡུལ་ལྔ་བརྒྱའི་གཙུག་རྒྱན་ཨཱ་ཙརྱ་ཙན་དྲཱ་ཀིདྷེའི་ཐུགས་དམ་རྟེན་ཡིན་ལ། དེ་ཇི་ལྟར་ཡང་ངོར་ཆེན་རྡོ་རྗེ་འཆང་གི་ཐུགས་དམ་རྟེན་ཡིན་ངེས་གློ་བོ་རྒྱལ་པོ་ཨ་བ་དཔལ་ལ། དད་པའི་རྟེན་དུ་རྩལ་བ་རིམ་རྒྱུད་སྨོན་ཐང་མཁར་ཟུར་ལ་སྣང་བ་བདག་གི་རྟེན་ཚབ་འཕགས་མོའི་སྐུ་བརྙན་ལེགས་པ་ཞིག་སྤྲད་ནས་གོང་སར་འབུལ་རྒྱུར་བྱས་པ་ལགས།

༈ སྨིན་གླིང་ཁྲི་རིན་ཆེན་རྣམ་རྒྱལ་གྱི་ཞབས་བརྟན་གསོལ་འདེབས།

ཨོཾ་སྭཱསྟི། གདོད་ནས་མི་འགྱུར་དྭངས་མ་ཡེ་ཤེས་དངོས། །མ་ལུས་འཁོར་འདུས་གཉིས་མེད་སྤྱི་དཔལ་ཆེ། །ཀུན་མཉམ་ཀུན་འཕྲོ་རིན་ཆེན་སྙིང་པོའི་གཏེར། །རྣམ་ཀུན་མཆོག་ལྡན་རྒྱལ་ཀུན་ཡེ་ཤེས་གར། །མཐའ་ཡས་འགྱུར་བཅས་འགྲོ་ལ་ཐུགས་རྗེའི་སྤྱི། །དཔག་མེད་སྒྱུ་འཕྲུལ་ཡོངས་སྟོན་འཕགས་པ་མཆོག །སྔགས་རིགས་གཙུག་ན་མངོན་མཐོ་རིན་ཆེན་དབང་། །རྣམ་མང་འགྲོ་འདྲེན་རྒྱལ་བའི་སྲས་མཆོག་ནི། །གཞོམ་འགྱུར་ཡོངས་སྤངས་རྡོ་རྗེའི་ཁྲི་བཟང་པོར། །འོད་དཔག་མེད་བཞིན་སྐུ་ཚེ་འཚོ་བཞེས་བརྟན། །གདུལ་བྱའི་རེ་བསྐང་ཡིད་བཞིན་རིན་ཆེན་བཟང་། །ཕྱོགས་ལས་རྣམ་པར་རྒྱལ་བར་བཞུགས་གསོལ་འདེབས། །པད་འབྱུང་རྡོ་རྗེའི་གསུང་གི་འགྱུར་མེད་པར། །རྨ་བན་རིན་ཆེན་ཕྲིན་ལས་སྤྲུལ་པ་རུ། །ཡོངས་བསྔགས་རྣམ་ཀུན་རྒྱལ་བསྟན་སྒྲོན་མེ་མཆོག །དཔལ་ལྡན་བླ་མ་བསྐལ་བརྒྱར་ཞབས་བརྟན་ཤོག །མགོན་ཁྱོད་འགྱུར་བྲལ་ཟུང་འཇུག་རྡོ་རྗེའི་སྐུ། །ཉེ་བར་བརྟེན་ནས་ཚད་མེད་ཐུགས་རྗེའི་གྲུབ། །གདུལ་བྱ་དོན་ཉིད་རིན་ཆེན་གླིང་བཟང་པོར། །ཡོངས་དཀྲིས་རྣམ་ཀུན་རྒྱལ་བའི་སར་བཀོད་ཤོག །

ཅེས་སྔ་འགྱུར་རིང་ལུགས་འཛིན་པ་མཐའ་དག་གི་གཙུག་ན་མངོན་པར་མཐོ་བ་ཨོ་རྒྱན་སྨིན་གྲོལ་གླིང་གི་སེང་གེ་ཁྲི་སྐྱོང་མཛད་རིག་འཛིན་རྒྱལ་བའི་གདུང་རྡོ་རྗེ་ཐེག་པའི་བརྟན་པའི་ཉི་མ་གང་གི་ཞབས་པད་ཡུན་རིང་དུ་བརྟན་སླད་མདོ་ཁམས་ཀཿཐོག་ལྷོ་རྒྱུད་དུ་སྐྱེས་ཤིང་རི་ཁ་བ་ཅན་གྱི་ཁོངས་ཀུན་ཏུ་རྒྱུ་བའི་མིང་དཔལ་རིག་འཛིན་ཚེ་དབང་ནོར་བུས་གུས་པ་ཆེན་པོས་ས་ཕོ་རྟ་ཡི་དབོ་ཟླ་དམར་ཕྱོགས་མཁའ་འགྲོ་འདུ་བའི་ཚེས་ཉེར་གཉིས་ལ་ཆེད་དུ་བརྗོད་དེ་ཕུལ་བ་མངྒ་ལཾ།

༈ ཀརྨ་པ་བདུད་འདུལ་རྡོ་རྗེའི་ཞབས་བརྟན་གསོལ་འདེབས།

ཨོཾ་སྭཱསྟི། བཅོམ་ལྡན་དཔལ་ཆེན་མཆེ་མཆོག་ཧེ་རུ་ཀ༔ ཀུན་ཏུ་བཟང་པོ་ཆེ་བཙན་ཁྲོ་བོའི་རྒྱལ། །ཁམས་གསུམ་རྣམ་རྒྱལ་འཇིགས་བྱེད་འཇིགས་པའི་སྐུ། །འཁོར་ལོ་བདེ་མཆོག་དཔལ་ལྡན་བདེ་བ་ཆེ། །མཁའ་འགྲོ་མཁའ་འགྲོ་མ་ཡི་དྲྭ་བ་བསྡོམས། །རྡོ་རྗེ་རྣལ་འབྱོར་ཡུམ་དང་གཉིས་སུ་མེད། །ཁྱེད་ཀྱི་སྐུ་གསུང་ཐུགས་ཀྱི་བདེན་པའི་མཐུའི། །བདག་གི་གཅེས་སྐྱོང་སྙིང་ལས་སྐྱེས་པའི་སྲས། །རྒྱལ་ཀུན་ཕྲིན་ལས་བྱེད་པོར་དབང་བསྐུར་བ། །ཀརྨ་པ་དཔལ་བདུད་འདུལ་རྡོ་རྗེ་གང་། །སྐུ་ཚེ་བརྟན་ཅིང་འཕྲིན་ལས་གོང་དུ་འཕེལ། །མཛད་བཟང་ཡར་ངོའི་ཟླ་བཞིན་འཕེལ་བར་ཤོག །

ཅེས་བཟོད་མི་རྣལ་འབྱོར་འགྲོ་འདུལ་རྡོ་རྗེ་སེམས་པ་མཚུར་ཆུ་རྒྱུན་རིན་ཆེན་རྒྱུན་གྱི་ངོགས་སུ་བྲིས་པ་བཀྲ་ཤིས་སོ། །

༈ དཔལ་ལྡན་དཔའ་བོའི་ཞབས་བརྟན་གསོལ་འདེབས།

ཨོཾ་སྭཱསྟི། རྒྱལ་ཀུན་ཐུགས་ཀྱི་ཡེ་ཤེས་རྒྱ་མཚོ་ཆེར། །བརྩེ་ཆེན་སྙིང་རྗེའི་པདྨའི་སྡོང་པོ་ལས། །ལེགས་འཁྲུངས་སྐུ་ཉིད་སྤྱི་དཔལ་པདྨ་འབྱུང་། །དེ་དང་གཉིས་མེད་དབྱིངས་ཕྱུག་ནོར་འཛིན་མ། །གང་གི་ཐུགས་ལས་ཉེར་སྐྱེས་བྲན་མོའི་ཚུལ། །བདེ་བའི་དཔལ་མོ་སྨོན་ལམ་དག་པའི་མཐུའི། །ཉེར་སྐྱེས་པཎ་ཆེན་ཤེས་རབ་འབྱུང་གནས་སོགས། །དམ་པའི་སྐྱེ་སྲིད་ཆུ་སྣོད་ཟླ་བ་བཞིན། །ཅིག་དང་དུ་མ་འགོག་མེད་ཆར་བ་ལས། །དུས་འདིར་དཔལ་ལྡན་དཔའ་བོ་སྙན་པའི་རྔ། །ཆེ་ཆེར་རྒོད་པ་གཙུག་ལག་དགའ་བའི་ཞབས། །འཆི་མེད་མགོན་པོ་ཇི་བཞིན་འཚོ་བཞེས་ཤོག །མཆོག་གསུམ་རྩ་གསུམ་རྒྱ་མཚོའི་བདེན་ནུས་དང་། །དྲང་སྲོང་ལྷ་ཆེན་སྨོན་ལམ་འགྲུབ་ཀུན་གྱི། །བདག་གི་ལྷག་བསམ་དག་པའི་གསོལ་འདེབས་འདི། །བསླུ་བ་མེད་པ་ཇི་བཞིན་འགྲུབ་པ་ཡི། །རྣམ་འདྲེན་སྤྲུལ་སྐུ་གཙུག་ལག་དགའ་བའི་ཞབས། །གཞོམ་མེད་རྡོ་རྗེའི་སྲོག་གི་ཀ་བ་བཙུགས། །གཞིག་མེད་གཡུང་དྲུང་ཚེ་ཡི་ལང་ཚོ་ལྟས། །ཕྲིན་ལས་མཁའ་ཁྱབ་རྟག་ཏུ་གནས་པར་ཤོག །

ཅེས་རྣམ་འདྲེན་དཔའ་བོ་སྤྲུལ་པའི་སྐུ་བདུན་པ་གཙུག་ལག་དགའ་བའི་ཞལ་སྔ་ནས་གང་གི་ཞབས་བརྟན་གསོལ་འདེབས་སུ་དཔལ་རིག་པ་འཛིན་པ་ཀཿཐོག་སྤྲུལ་སྐུའི་ཆུ་ཕག་དབོ་ཟླ་བའི་ཡར་ཚེས་རྒྱལ་བ་དང་པོ་ལ་གུ་རུའི་གནས་ཆེན་ཀོང་ཡུལ་ལྗོན་པ་ལུང་ནས་ཕུལ་བ་སརྦ་མངྒ་ལཾ།

༈ ཆོས་རྗེ་གླིང་པའི་ཡང་སྲིད་ཀྱི་ཞབས་བརྟན་གསོལ་འདེབས།

ཨོཾ་སྭཱསྟི། རྒྱལ་བ་ཀུན་གྱི་འཕྲིན་ལས་གཅིག་བསྡུད་དཔྱིད། །མཚོ་སྐྱེས་རྡོ་རྗེ་པདྨ་ཐོད་ཕྲེང་རྩལ། །དེ་དང་ཐ་མི་དད་ཀྱང་ཐ་དད་ཚུལ། །རྒྱལ་སྲས་ལྷ་རྗེ་ཨོ་རྒྱན་ཆོས་རྗེ་གླིང་། །གང་གི་བྱིན་རླབས་སྒྱུ་འཕྲུལ་རོལ་པའི་གདངས། །འཇིག་རྟེན་དབང་ཕྱུག་འགྲོ་འདྲེན་སྤྲུལ་པའི་སྐུ། །གང་ཁྱེད་གདུལ་བྱའི་དཔལ་དུ་བསྐལ་པ་བརྒྱར། །མཚོ་བཞེས་བརྟན་ཅིང་འཕྲིན་ལས་རྒྱས་གྱུར་ཅིག །

ཅེས་རས་ཆུང་ཕུག་རྣམ་འདྲེན་སྤྲུལ་པའི་སྐུ་རིན་ཆེན་ཆོས་རྗེ་གླིང་པའི་ཡང་སྲིད་གང་འཚོ་བཞེས་བརྟན་ཅིང་འཕྲིན་ལས་རྒྱས་པའི་ཆེད་དུ་རྒྱ་བལ་བོད་ཡུལ་ཀུན་ཏུ་མ་སྦས་པའི་མིང་རིག་པ་འཛིན་པས་ལྕགས་བྱའི་ལོ་སྨིན་དྲུག་ཟླ་བའི་ཡར་ཚེས་ལ་ཐང་འབྲོག་སྨིན་གྲོལ་གླིང་ནས་ཆེད་དུ་བརྗོད་པར་བྱས་པའོ། །

ཨོཾ་སྭཱསྟི། གུ་རུ་པདྨའི་གྲུབ་གནས་སྦས་ཆགས་སུ་ཁོད་པ་རྣམས་ནས་སྤྱོད་ལམ་བྱ་བཞག་དགའ་ཆགས་མི་རྗེས་འགོད་པའི་བཅས་ཡིད་བཞིན་འདི་དོན་ལ་མི་འདའ་བར་ཚངས་པས་སྤངས་བླང་ངོས། དཔལ་མགོན་གཏེར་ཆེན་རིག་འཛིན་ཆོག་སྟག་ཤམ་ཅན་དང་ཆོས་རྗེ་གླིང་པ་སྟེ་ཡབ་སྲས་ཟུང་གི་ཟབ་ཆོས་གཙང་མར་སྤྱོད་པ་གལ་ཆེ་བས་དེ་ལྟར་འཚལ།

ཞེས་རྒྱལ་དབང་པདྨའི་སློབ་མ་གངས་ཅན་དུ་ཁྱབ་པར་གྱུར་པའི་མིང་རིག་འཛིན་ཚེ་དབང་ནོར་བུས་དོན་གྲུབ་ས་ལུག་ཟླ་ཚེས་བཟང་པོ་ལའོ། །མངྒ་ལཾ།

ཨོཾ་སྭཱསྟི། རིག་འཛིན་ཆེན་པོ་ཆོས་རྗེ་གླིང་པ་དེ་པདྨ་བདེ་གླིང་པའི་གཏེར་ཁ་འདིར་ལུང་གསལ་བར་བསྟན་ཅིང་། འདྲ་མིན་ཁམས་ནས་བྱུང་བ་དེ་ཡང་ཤིན་ཏུ་འགྲིག་པས་ངེས་པ་ཅན་དང་། རྗེ་སྟག་ཤམ་པའི་མཚོ་རྒྱལ་རྣམ་ཐར་ལས་ཀྱང་། དེ་ལ་འགྲིག་ཤམ་པའི་ཕྱོགས་དེའི། རཱ་ཛའི་མིང་ཅན་བརྟུལ་ཞུགས་ཅན་གྱི་བཏོན༔

ཞེས་པ་ཡང་རྗེ་བོ་དང་རྒྱལ་པོ་ཡང་སྒྲ་ཅུང་ཟད་ཐ་དད་ཀྱང་དོན་དུ་གཅིག་པས་ཆོས་རྗེ་ཞེས་པ་དྷརྨ་སྭ་མི་དང་དྷརྨ་ར་ཛཱ་གཉིས་ཀ་འཇུག་རུང་ཅན་ཡིན་པས་འདི་ཡང་བཞུགས་ནས་རས་ཅུང་ཕུག་ཤམྦུའི་ཕྱོགས་སུ་ལན་ཅིག་སྣང་བའི་ངེས་པ་བཅས་དེ་ལས་གཞན་མི་གསལ་གྱི། ངེས་པ་ཉིད་དུ་བདག་གི་རྣམ་པར་རྟོག་པ་ལས་སོ་ཞེས་པ་ཡང་ཚེ་དབང་ནོར་བུས་བྲིས། བཀྲ་ཤིས།

༈ གར་དབང་ཕྲིན་ལས་ཀྱི་ཞབས་བརྟན་གསོལ་འདེབས།

ཨོཾ་སྭཱསྟི། དུས་གསུམ་རྒྱལ་བའི་ཕྲིན་ལས་གོང་བུ་གཅིག །ཡོངས་བཟླུམ་ཨོ་རྒྱན་རྒྱལ་པོ་ཐོད་ཕྲེང་རྩལ། །གང་གི་རིང་ལུགས་དྲི་མེད་འཛིན་པ་ལ། །གཞར་ཡང་གཡེང་བ་མེད་པའི་སྙིང་སྟོངས་ཅན། །དཔལ་ལྡན་བླ་མ་གར་དབང་ཕྲིན་ལས་མཚན། །ཞིང་འདིའི་གདུལ་བྱའི་ཆེད་དུ་བསྐལ་པ་བརྒྱར། །གཞོམ་མེད་འོད་དཔག་མེད་ལྟར་འཚོ་བཞེས་བརྟན། །མཐའ་ཡས་གདུལ་བྱའི་སྨིན་གྲོལ་སར་འགོད་ཤོག །

ཅེས་དབྱངས་ཆོས་རྣམ་འདྲེན་སྤྲུལ་པའི་སྐུ་དམ་པ་གང་གི་སྐུ་ཚེ་འཚོ་བཞེས་ཡུན་རིང་དུ་བརྟན་པའི་སླད་དུ་རྒྱལ་ཁམས་པ་རིག་པ་འཛིན་པས་ཕུལ་བ་སརྦ་མངྒ་ལཾ།

༈ ཕྲིན་ལས་རྡོ་རྗེའི་ཞབས་བརྟན་གསོལ་འདེབས།

ཨོཾ་སྭཱསྟི། རྒྱལ་བ་ཀུན་གྱི་གསང་གསུམ་གཅིག་བཏུས་དཔྱིད། །བླ་མེད་སྔགས་ཀྱི་སྟོན་པ་རྡོ་རྗེ་སེམས། །ཨོ་རྒྱན་རྒྱལ་པོས་པདྨ་ཐོད་ཕྲེང་གི །སྲས་གྱུར་དུ་མས་བྱིན་རླབས་དམ་པ་མགོན། །གང་འདུལ་ཕྲིན་ལས་སྤྲོ་མཛད་རྡོ་རྗེ་འཛིན། །གང་ཁྱེད་ལྗོངས་དེའི་གདུལ་བྱ་རྣམས་ཀྱི་ཆེད། །སྐུ་ཚེ་འཚོ་བཞེས་གཞན་ཕན་ཕྲིན་ལས་རྒྱས། །སེལ་མེད་སྔགས་ཀྱི་བདེ་ཆེན་རྒྱས་པར་ཤོག །

ཅེས་རིག་འཛིན་རྩལ་འཆང་དག་གི་བྱིན་རླབས་ཞུགས་ཤིང་གཏེར་སྒྲུབ་མང་པོས་རྗེས་སུ་བཟུང་བའི་དམ་པ་བླ་མ་འཕྲིན་ལས་རྡོ་རྗེ་གང་དེའི་ཆེད་དུ་བརྗོད་པ་འདི་ཡང་མིང་ཡོངས་སུ་གྲགས་པ་དཔལ་རིག་པ་འཛིན་པ་ཞེས་རང་གཞན་གྱི་གྲུབ་མཐའ་རྒྱ་མཚོ་ལ་འཇུག་པའི་བློ་གྲོས་ཀྱི་གྲུ་རྫིངས་ཅན་དེའི་སྨྲས་པ་སརྦ་མངྒ་ལཾ།

༈ མི་ཡི་དབང་པོའི་རིང་འཚོའི་སྨོན་ཚིག་ཚན་པ་གཉིས།

ཨོཾ་སྭཱསྟི། དམ་པའི་སྒྱུ་འཕྲུལ་ཅིར་ཡང་མི་འགོག་པ། །ནམ་ཡང་གདུལ་བྱའི་གཉེན་འགྱུར་མཁའ་བཞིན་དྭངས། །ཚེ་བདག་རྒྱལ་བའི་ལུང་བསྟན་མི་ཡི་དབང་། །གང་ཁྱེད་འཚོ་བཞེས་བདག་གཞན་དགེ་ལེགས་ཤོག །

ཅེས་རྟེན་འབྲེལ་གྱི་ཆེད་དུ་དམིགས་ཏེ་རྒྱ་བལ་བོད་ཡུལ་ཀུན་ཏུ་མ་སྦས་པའི་མིང་རིག་པ་འཛིན་པར་བརྗོད་པ་ཀཿཐོག་སྤྲུལ་སྐུས་སོ། །སརྦ་མངྒ་ལཾ།

ཨོཾ་སྭཱསྟི་ཛྙཱིཾ་རཱ་ཛ་ཛ་མ་ཀུ་རུ་བྷྲཱུཾ། རྒྱལ་བ་རབ་འབྱམས་རྒྱ་མཚོའི་ཚོགས་རྣམས་དང་། །རྒྱལ་སྲས་སློབ་བཅས་འཕགས་ཚོགས་ཞིང་གི་རྡུལ། །གསུང་རབ་དམ་པ་ལུང་དང་རྟོགས་པའི་ཆོས། །བསྲུང་མར་བཅས་པས་བདག་མོས་འདི་འགྲུབ་མཛོད། །འཕགས་མཆོག་མིག་མི་འཛུམ་གྱི་ཉེར་གཟར་བ། །བསིལ་ལྡན་རིའི་བསྐོར་འབུམ་ཕྲག་བརྒྱ་ཡི་ཡུལ། །ལྗོངས་འདིར་སྐྱེ་དགུ་ཡོངས་ཀྱི་བདེ་ལེགས་དཔལ། །མངོན་གྱུར་ས་སྐྱོང་བྱང་ཆུབ་སེམས་པ་ཆེ། །བསོད་ནམས་སྟོབས་ཀྱི་འཁོར་ལོ་བསྒྱུར་བ་པོ། །ཆོས་ཀྱི་རྒྱལ་པོ་གང་གི་ཞབས་པད་མཆོག །གཞིག་མེད་རྡོ་རྗེའི་ཁྲི་རྐང་མི་འཇིག་པ། །སེང་གེའི་ཟེར་སྟོང་རྟག་བརྟན་གཡུང་དྲུང་ཁྲིར། །བདེ་ལྡན་བདག་པོ་ཇི་བཞིན་བསྐལ་པའི་བར། །སྐུ་ཚེ་ཉམས་མེད་རྡོ་རྗེའི་རི་བོ་ལྟར། །མཛད་པ་ཡར་ངོའི་ཟླ་ལྟར་གོང་དུ་འཕེལ། །མངའ་ཐང་ཀལྤའི་ཤིང་ལྟར་རྒྱས་པར་ཤོག །ཕྱི་ནང་མི་མཐུན་སྐྱོན་ཀུན་ཉེར་ཞི་ཞིང་། །ཕྱོགས་ཀྱི་ས་སྐྱོང་རྣམས་ཀྱིས་བསྔགས་ཤིང་བཏུད། །ནད་མུག་མཚོན་ཞི་དགེ་ལེགས་དཔྱིད་དུ་འཕེལ། །གངས་ཅན་བདེ་བའི་དཔལ་གང་ཞབས་བརྟན་ཤོག །

ཅེས་གངས་ཅན་ས་ཡི་དཀྱིལ་འཁོར་མ་དབང་བསྒྱུར་བ་མི་ཡི་བདག་པོ་ཆོས་རྒྱལ་བྱང་ཆུབ་སེམས་དཔའ་གང་གི་ཞབས་པད་ཡུན་རིང་དུ་འཚོ་བཞེས་བརྟན་པའི་ཆེད་དུ་སྙིང་ཐག་པ་ནས་གསོལ་བ་འདེབས་པ་འདི་ནི་ཀཿཐོག་སྤྲུལ་སྐུ་རིག་པ་འཛིན་པས་དབོ་ཟླའི་དཀར་ཕྱོགས་ཀྱི་རྒྱལ་བ་གསུམ་པ་ལ་ཕུལ་བ་སརྦ་མངྒ་ལཾ།

༈ བཀའ་བརྒྱུད་འབྲུག་པ་རིན་པོ་ཆེའི་ཞབས་བརྟན་གསོལ་འདེབས།

ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཚེ་མི་འགྱུར་བདེ་ཆེན་རྡོ་རྗེའི་ཁམས། །ཚེ་ནམ་ཡང་གཞོམ་པ་མེད་པའི་དངོས། །ཚེ་འབྲི་གང་ལས་འདས་གདོད་མའི་གཤམས། །ཚེ་རྡོ་རྗེ་སེམས་དཔའི་བཀྲ་ཤིས་ཤོག །ཚེ་རྒ་ཤི་ལས་འདས་གཡུང་དྲུང་སྐུ། །ཚེ་འགག་པ་མེད་པ་ནཱ་ཏཱའི་དབྱངས། །ཚེ་ཕོ་འགྱུར་བྲལ་བ་རྡོ་རྗེའི་ཐུགས། །ཚེ་དཔལ་དུ་འབར་ཞིང་ཉམས་མེད་ཞབས། །དཔལ་ཚེ་འོད་དཔག་མེད་བྱིན་རླབས་ཀྱི། །དཔལ་འགྲོ་བའི་མགོན་པོ་འབྲུག་པ་རྗེ། །དཔལ་བཀའ་བརྒྱུད་འཕྲིན་ལས་ཤིང་རྟའི་ཞབས། །དཔལ་འཚོ་བཞེས་ཉམས་མེད་ཞབས་བརྟན་གསོལ། །ཚེ་འོད་དུ་འབར་བ་ཉི་ཟླའི་ཁམས། །ཚེ་གས་ཆགས་མེད་པ་བསྐལ་པའི་ཤིང་། །ཚེ་གཡོ་འགྱེལ་མེད་པ་ལྷུན་པོ་ཆེ། །ཚེ་འབྲི་གང་གཏིང་ཟབ་ཆུ་གཏེར་རྫིངས། །ཚེ་ཕུན་ཚོགས་དཔལ་ལྡན་ཚངས་པའི་ཚེ། །ཚེ་འདོད་དགུ་འགྱུར་བ་འཁོར་ལོས་བསྒྱུར། །ཚེ་ངེས་པ་ལྔ་ལྡན་རྒྱལ་བའི་ཚེ། །ཚེ་བཀྲ་ཤིས་བུམ་རྩེན་ལྷ་མོ་བརྒྱད། །དཔལ་གཡང་དུ་འཁྱིལ་བ་དེ་ཀུན་གྱི། །དཔལ་མཚན་ལྡན་བླ་མའི་སྐུ་ཚེ་སྲིངས། །དཔལ་བཀའ་བརྒྱུད་འཕྲིན་ལས་ཤིང་རྟའི་ཞབས། །དཔལ་སྐུ་ཚེ་ཉིས་མེད་བརྟན་བཞུགས་གསོལ། །ཚེ་ངེས་དོན་བདེ་གཤེགས་སྙིང་པོའི་ཁམས། །ཚེ་ཡེ་ནས་ཉམས་པ་མེད་མོད་ཀྱང་། །ཚེ་ཀུན་རྫོབ་བདེན་པ་གློ་བུར་ཆ། །ཚེ་ཕོ་འགྱུར་རྣམ་པར་སྣང་ཀུན་ཡང་། །ཚེ་དཔག་མེད་སངས་རྒྱས་མཆོག་དེ་དང་། །ཚེ་ལྷ་གྱུར་དྲང་སྲོང་རིག་འཛིན་མཐུས། །ཚེ་ཉི་ཟླ་ལྷུན་པོ་དཔག་བསམ་བཞིན། །ཚེ་ཡུན་རིང་གནས་པར་བྱིན་རླབས་ནས། །མཆོག་དཔལ་དང་བླ་མའི་སྐུ་ཚེ་སྲིང་། །མཆོག་བཀའ་རྒྱུད་ཕྲིན་ལས་ཤིང་རྟའི་ཞབས། །མཆོག་ཕྲིན་ལས་ས་གསུམ་ཁེངས་ཀྱི་བར། །མཆོག་འཆི་མེད་ཞབས་པད་བརྟན་གསོལ་འདེབས། །

ཅེས་པ་སྒྲུབ་བརྒྱུད་འཛིན་པ་ཐམས་ཅད་ཀྱི་སྤྱི་ཕུད་འགྲོ་བའི་མགོན་པོ་འབྲུག་པ་མཆོག་གི་སྤྲུལ་པའི་སྐུ་རྒྱལ་དབང་བཀའ་བརྒྱུད་འཕྲིན་ལས་ཤིང་རྟའི་ཞབས་སྐུ་ཚེ་འཚོ་བཞེས་ཡུན་རིང་དུ་བརྟན་པར་གསོལ་བ་འདེབས་པ་འདི་ཡང་ན་ཚོད་ལྡན་པ་ས་ག་ཟླ་བའི་དཀར་ཕྱོགས་ཐུབ་དབང་བྱང་ཆུབ་མཆོག་གི་དུས་བཟང་པོར་རིག་འཛིན་ཚེ་དབང་ནོར་བུས་སྙིང་ནས་གདུང་ཤུགས་ཀྱི་གང་ཤར་མུག་པར་བརྗོད་པ་དེ། དེ་ཁོ་ན་བཞིན་རེ་འབྲས་དོན་ལྡན་ཆེན་པོར་བྱིན་གྱིས་བརླབ་ཏུ་གསོལ། སརྦ་མངྒ་ལཾ།

༈ འབའ་ར་ཆོས་རྗེ་ངག་དབང་ཡེ་ཤེས་བཟང་པོའི་ཞབས་བརྟན་གསོལ་འདེབས།

ཨོཾ་སྭཱསྟི། ཚེ་འོད་དཔག་མེད་གསུང་གི་རྡོ་རྗེ་འཆང་། །དབང་ཕྱུག་བརྒྱད་ལྡན་མགོན་པོ་སྤྱན་རས་གཟིགས། །ཡིད་བཞིན་ནོར་བུ་བླ་མ་པདྨ་འབྱུང་། །གང་བདེའི་འཆི་མེད་ཚེ་ཡི་དངོས་གྲུབ་སྩོལ། །ངེས་དོན་སྙིང་པོའི་བསྟན་པ་སྤེལ་བའི་ངག །ཉམས་མེད་དབང་པོ་དགེ་བའི་སྒྲ་དབྱས་ཅན། །ཨོ་རྒྱན་རྒྱལ་བའི་ལུང་ལས་ཉེར་ཟིན་པ། །ཡེ་ཤེས་གཞོན་ནུའི་བྱིན་གྱིས་རླབས་གྱུར་གང་། །དཔལ་ལྡན་བླ་མ་རྡོ་རྗེ་འཛིན་བཟང་པོ། །གང་ཁྱེད་ཨ་ཧཾ་ཉི་ཟླའི་གུར་ཁང་དབུས། །མི་ཤིག་དྷུ་ཏི་སྲོག་གི་ཀ་བ་ཚུགས། །ཚེ་ཡི་རང་བཞིན་གཡུང་དྲུང་ཉིད་དུ་བསྟན། །བསྐལ་པའམ་ནི་བསྐལ་པ་ལས་ལྷག་པར། །འཚོ་བཞེས་འཆི་མེད་རྡོ་རྗེ་ཡོངས་འགྲུབ་ཤོག །གཞན་ཕན་ཕྲིན་ལས་བཟང་པོ་ཀུན་ཏུ་རྒྱས། །ལྷུན་གྲུབ་རྒྱལ་བའི་རྒྱལ་ས་ཉིད་ཐོབ་ཤོག །

ཅེས་པ་ཡང་སྐྱིད་གྲོང་འཇམ་གླིང་གི་གདུ་རིགས་སྐྱེས་མཆོག་འབར་ར་བའི་སེང་གེའི་ཁྲི་བསྲུང་བར་བྱེད་པ་པོ་ཆོས་ཀྱི་རྗེ་བླ་མ་དམ་པ་ངག་དབང་ཡེ་ཤེས་དཔལ་བཟང་པོ་ཡི་སྐུ་ཚེ་འགལ་རྐྱེན་སེལ་བའི་ཆེད་དུ་དཔལ་རིག་པ་འཛིན་པ་ཚེ་དབང་ནོར་བུས་འཆི་མེད་གྲུབ་པའི་དཔའ་བོ་རས་པ་ཡབ་སྲས་ཀྱི་སྒྲུབ་གནས་ར་ལ་ཟ་འོག་ཕུག་ནས་སྤེལ་བ་སརྦ་མངྒ་ལཾ།

བདེ་ལྡན་བཀོད་པའི་མདོ་དོན་ཇི་བཞིན་པའི་སྨོན་ལམ་ཐར་པའི་སྒོ་འབྱེད།

༄༅། །བདེ་ལྡན་བཀོད་པའི་མདོ་དོན་ཇི་བཞིན་པའི་སྨོན་ལམ་ཐར་པའི་སྒོ་འབྱེད་ཅེས་བྱ་བ་བཞུགས་སོ། །

༈ ན་མོ་བུདྡྷ་བོ་དྷི་སཏྭེ་བྷྱཿ བཅོམ་ལྡན་དེ་བཞིན་གཤེགས་པ་དགྲ་བཅོམ་ཡང་དག་རྫོགས་སངས་རྒྱས། །རིག་པ་ཞབས་ལྡན་བདེ་གཤེགས་འཇིག་རྟེན་མཁྱེན་པ་སྐྱེས་བུ་འདུལ། །ཁ་བསྒྱུར་བླ་མེད་ལྷ་མིའི་སྟོན་པ་སངས་རྒྱས་བཅོམ་ལྡན་འདས། །གཟི་བརྗིད་ཚེ་དང་ཡེ་ཤེས་འོད་དཔག་མེད་ལ་ཕྱག་འཚལ་ལོ། །འདི་སྐད་བདག་ཐོས་དུས་གཅིག་བཅོམ་ལྡན་ཐུབ་མཆོག་མཉན་ཡོད་དུ། །རྒྱལ་བ་རྒྱལ་བྱེད་ཚལ་གྱུར་མགོན་མེད་ཟས་སྦྱིན་ཀུན་དགའ་རར། །ཉན་ཐོས་འཕགས་པ་ཤཱ་རིའི་བུ་དང་མཽང་གལ་བུ་དང་ནི། །འོད་སྲུངས་ཆེན་པོ་ཀ་ཏྱའི་བུ་དང་ཀ་བི་ན་ཆེན་པོ། །གསུས་ཆེན་ནམ་གྲུ་ལམ་ཕྲན་བརྟན་པ་དགའ་བོ་ཀུན་དགའ་བོ། །བྷ་ར་དྷྭ་ཛ་འཆར་བྱེད་ནག་པོ་བ་ཀུལ྄་སྒྲ་གཅན་འཛིན། །བ་གླང་བདག་དང་མ་འགགས་པ་སོགས་དགེ་འདུན་ཆིག་སྟོང་དང་། །ཉིས་བརྒྱ་ལྔ་བཅུས་བསྐོར་བ་དེ་ལ་གུས་པས་ཕྱག་འཚལ་ལོ། །དུས་དེར་གཞན་དག་བྱང་ཆུབ་སེམས་དཔའི་འཁོར་གྱིས་བསྐོར་གྱུར་པ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུ་དང་། །མི་ཕམ་པ་དང་སྤོས་ཀྱི་གླང་པོ་རྟག་ཏུ་བརྩོན་པ་དང་། །བརྩོན་པ་མི་འདོར་བ་སོགས་བྱང་ཆུབ་འཁོར་ཚོགས་དཔག་མེད་དང་། །གཞན་ཡང་དབང་པོ་བརྒྱ་བྱིན་མི་མཇེད་བདག་པོ་ཚངས་པ་ཆེ། །དེ་སོགས་བྱེ་བ་ཁྲག་ཁྲིག་འབུམ་ཕྲག་མང་པོར་གྱུར་པ་ཡི། །ལྷ་ཡི་ཚོགས་ཀྱིས་ཡོངས་སུ་བསྐོར་ཏེ་བཞུགས་པ་རྫོགས་སངས་རྒྱས། །ཤཱཀྱ་ཐུབ་པ་འཁོར་དང་བཅས་པ་དེ་ལ་ཕྱག་འཚལ་ལོ། །དེ་ཚེ་ཤཱ་རིའི་བུ་ལ་བཀའ་སྩལ་མཆོག་ཏུ་བསྔགས་པའི་གནས། །ཞིང་འདིའི་ནུབ་ཕྱོགས་སངས་རྒྱས་ཞིང་ཁམས་བྱེ་བ་ཁྲག་ཁྲིག་འབུམ། །འདས་པ་དེ་ན་ཚེ་དཔག་མེད་བཞུགས་ཞིང་ཁམས་བདེ་བ་ཅན། །ཅིའི་ཕྱིར་དེར་གནས་སེམས་ཅན་རྣམས་ཀྱི་ལུས་དང་སེམས་ལ་ནི། །སྡུག་བསྔལ་མེད་ཅིང་བདེ་རྒྱུ་ཚད་མེད་ལྡན་པས་བདེ་བ་ཅན། །སངས་རྒྱས་ཞིང་དེ་ཞིང་གི་ཡོན་ཏན་བཀོད་པ་རྣམ་མང་པོས། །ལེགས་པར་བརྒྱན་པ་ཀུན་ཀྱང་ཤིན་ཏུ་བཀྲ་ཞིང་ལྟ་ན་སྡུག །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །ཞིང་དེ་ཁ་ཁྱེར་རིམ་བདུན་ཏཱ་ལའི་ཕྲེང་བ་རིམ་བདུན་ལྡན། །དྲིལ་གཡེར་དྲྭ་བས་ཡོངས་བསྐོར་ཞིང་ཀུན་རིན་ཆེན་བདུན་གྱིས་བརྒྱན། །རིན་ཆེན་བདུན་རྫིང་བརྒྱད་ལྡན་ཆུས་གང་རིན་ཆེན་པདྨོས་ཁེབས། །བྱ་རོག་བཏུང་རུང་ཁ་ང་ཅང་གྱུར་གསེར་གྱི་བྱེ་མ་བརྡལ། །རྫིངས་ཀྱི་ཕྱོགས་བཞིར་ཐེམ་སྐས་བཞི་བཞི་གསེར་དངུལ་བཻཌཱུར་ཤེལ། །རྫིངས་འགྲམས་བཻཌཱུཪྻ་དང་གསེར་དངུལ་ཤེལ་དང་རྡོ་སྙིང་སྤུག །མུ་ཏིག་དམར་སྟེ་རིན་ཆེན་བདུན་གྱི་ལྗོན་ཤིང་ཀུན་ཏུ་རྒྱས། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །རྫིངས་ཀྱི་པདྨོ་དེ་ཀུན་ཤིང་རྟའི་འཕང་ལོ་ཙམ་དུ་སྐྱེས། །གསེར་མདོག་གསེར་གྱི་འོད་འབྱུང་གསེར་ལྟར་སྟོན་དང་དེ་བཞིན་དུ། །སྔོ་སེར་དཀར་དམར་མདོག་དང་སྣ་ཚོགས་བཀྲ་བས་ཡོངས་ཁེངས་ཤིང་། །ཏཱ་ལའི་ཕྲེང་དང་དྲིལ་གཡེལ་ཕྲེང་རྣམས་རླུང་བསྐྱོད་སྒྲ་ཡིད་འོང་། །རོལ་མོ་མཁན་གྱུར་ཡན་ལག་བྱེ་བ་འབུམ་ལྡན་ལྷའི་སིལ་སྙན། །བླང་འདྲ་བྱང་ཆུབ་ཆོས་སྒྲ་དེར་སྐྱེས་སེམས་ཅན་གྱིས་ཐོས་པས། །སངས་རྒྱས་དམ་ཆོས་དགེ་འདུན་དྲན་པ་ལུས་ལ་གནས་པར་བྱེད། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །ཞིང་དེར་ལྷ་ཡི་སིལ་སྙན་སྒྲ་དབྱངས་རང་བཞིན་རྟག་འབྱུང་ཞིང་། །ས་གཞི་གསེར་གྱི་ཁ་དོག་ཇི་བཞིན་ཤིན་ཏུ་ཉམས་དགའ་གསལ། །དེ་ན་དམྱལ་བ་གཤིན་རྗེ་བྱོལ་སོང་སྐྱེ་གྱུར་མིང་ཡང་མེད། །སྤྲུལ་པའི་བྱ་ཚོགས་ངང་པ་ཁྲུང་ཁྲུང་རྨ་བྱ་ལ་སོགས་པས། །ཉིན་མཚན་ཐུན་དྲུག་རྣམས་སུ་རང་རང་སྐད་ཀྱི་ཆོས་བགྲོ་བ། །དབང་པོ་སྟོབས་དང་བྱང་ཆུབ་ཡན་ལག་རབ་ཏུ་སྙན་པའི་སྒྲ། །ཐོས་པའི་སེམས་ཅན་ཀུན་ཀྱང་དཀོན་མཆོག་རྗེས་སུ་དྲན་ལ་སྦྱོར། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །ཉིན་མོ་ལན་གསུམ་མཚན་ཐུན་གསུམ་དུ་མེ་ཏོག་མནྡ་རའི། །ཆར་ཆེན་བབ་པས་ས་གཞི་ཀུན་ནས་ཡོངས་སུ་མཛེས་བཀྲ་བྱེད། །དེར་གནས་སེམས་ཅན་ཀུན་ཀྱང་སངས་རྒྱས་མཐུ་ཡིས་སྔ་དྲོ་བཞིན། །སངས་རྒྱས་ཞིང་ཁམས་གཞན་དུ་འདོང་ནས་སངས་རྒྱས་བྱེ་བ་ཕྲག །འབུམ་ལ་ཕྱག་བྱས་སངས་རྒྱས་རེ་ལའང་མེ་ཏོག་སྐོན་བུ་བཅས། །བྱེ་བ་འབུམ་གྱིས་མངོན་པར་མཆོད་ཅིང་དགྱེས་བྱས་ཆོས་ཉན་ཏེ། །སླར་ཡང་རང་གི་གནས་སུ་ཉི་མ་དེ་ལ་འདོང་བར་བྱེད། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །དེ་བཞིན་གཤེགས་དེའི་ཉན་ཐོས་དགྲ་བཅོམ་ཚད་མེད་གྲངས་མེད་པའི། །གྲངས་ནི་འཕགས་པ་རྫུ་འཕྲུལ་ཆེན་པོས་ཡང་ནི་བརྗོད་ནུས་མིན། །གཞན་ནི་སངས་རྒྱས་ཞིང་དེར་སྐྱེས་པའི་སེམས་ཅན་གང་སུ་ཡང་། །སྐྱེ་བ་གཅིག་གིས་ཐོག་པའི་བྱང་ཆུབ་སེམས་དཔའ་དམ་པ་ཆེ། །ཕྱིར་མི་ལྡོག་པ་འབའ་ཞིག་ལས་ནི་གཞན་ཡོད་མ་ཡིན་ཏེ། །དེ་ལྟའི་བྱང་ཆུབ་སེམས་དཔའ་ཇི་སྙེད་ཚད་དང་གྲངས་དག་ནི། །བརྗོད་པ་སླ་བ་མ་ཡིན་སངས་རྒྱས་ཞིང་ཁམས་ཀུན་ཁྱབ་བྱེད། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །ཞིང་དེའི་རྒྱལ་བ་དེ་ནི་སྐུ་ཚེ་དཔག་ཏུ་མེད་པས་ན། །བཅོམ་ལྡན་དེ་བཞིན་གཤེགས་པ་ཚེ་དཔག་མེད་པ་ཞེས་སུ་བྱ། །དེ་བཞིན་འོད་སྣང་དཔག་མེད་སངས་རྒྱས་ཞིང་ཀུན་ཐོག་མེད་ཁྱབ། །དེ་ཕྱིར་དེ་བཞིན་གཤེགས་པ་འོད་དཔག་མེད་པ་ཞེས་བྱའི་མཚན། །ཕྱོགས་བཅུའི་སངས་རྒྱས་གྲངས་མེད་ཀུན་གྱིས་དུས་རྣམས་རྟག་བསྔགས་མཛད། །གང་དེ་བླ་མེད་ཡང་དག་རྫོགས་བྱང་མངོན་པར་ཆུབ་ནས་ཡུན། །ཞིང་འདིའི་བསྐལ་པ་བཅུ་ལོན་ད་ལྟ་འཚོ་གཞེས་ཆོས་སྟོན་མཛད། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །ངན་ངོན་ཙམ་མིན་དག་པའི་དགེ་རྩ་ཐམས་ཅད་གུས་པ་ཡིས། །ཡོངས་སུ་བདེ་ཆེན་ཞིང་གི་སྐྱེས་བུ་ཆེ་དེ་མཇལ་བར་བསྔོ། །ཚེ་འོད་དཔག་མེད་དེའི་མཚན་ཐོས་ནས་ཡིད་ལ་བྱེད་པའི་སེམས། །ནུབ་མོ་གཅིག་ནས་བདུན་བར་གཡེང་མེད་བྱས་པས་འཆི་བའི་ཚེ། །ཕྱིན་ཅི་མ་ལོག་སེམས་ཀྱིས་དུས་བྱས་དེ་ཚེ་འོད་དཔག་མེད། །ཉན་ཐོས་དགེ་འདུན་གྱིས་བསྐོར་བྱང་ཆུབ་སེམས་དཔའི་ཚོགས་བཅས་པ། །མདུན་དུ་བལྟ་བའི་མདུན་ན་མངོན་སུམ་བཞུགས་མཐོང་གྱུར་པ་ཡི། །ཞིང་དེར་བདག་ནི་ལུས་འདི་འཕོས་མ་ཐག་ཏུ་སྐྱེ་བར་ཤོག །བདག་ཅག་སྟོན་མཆོག་ཡང་དག་རྫོགས་པའི་སངས་རྒྱས་ཐུབ་དབང་གིས། །སེམས་ཅན་གང་དག་འོད་དཔག་མེད་པའི་ཞིང་ཁམས་བདེ་བ་ཅན། །སེམས་ཀྱིས་སྨོན་པར་བྱེད་དམ་བྱས་པ་བྱེད་འགྱུར་དེ་ཐམས་ཅད། །བླ་མེད་ཡང་དག་རྫོགས་པའི་བྱང་ཆུབ་ལས་ནི་ཕྱིར་མི་ལྡོག །ཕྱིར་མ་ལྡོག་ཅིང་ཕྱིར་མི་ལྡོག་འགྱུར་དོན་ཆེན་ཡོངས་གཟིགས་ནས། །སངས་རྒྱས་ཞིང་དེར་གུས་པས་སྨོན་ལམ་གདབ་ཞེས་ཆེས་བསྔགས་པའི། །ལྗགས་ཀྱི་དབང་པོས་ཞིང་ཀུན་ཁྱབ་བྱས་བདེན་པའི་མཐུ་དེས་བདག །ལུས་འདི་བོར་ཐག་ཉིད་དུ་བདེ་ཅན་སྐྱེ་བར་ཤོག །ཐུབ་པས་ཇི་ལྟར་གསུང་བཞིན་ཤར་ཕྱོགས་བཅོམ་ལྡན་དེ་བཞིན་གཤེགས། །མི་འཁྲུགས་པ་དང་ལྷུན་པོའི་རྒྱལ་མཚན་ལྷུན་པོ་ལྷུན་པོ་ཆེ། །ལྷུན་པོ་ཆེ་སྣང་འཇམ་སྒྲ་འཇམ་དབྱངས་ལ་སོགས་སངས་རྒྱས་ནི། །གངྒཱའི་ཀླུང་གི་བྱེ་སྙེད་ཀུན་གྱིས་རྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་འོད་དཔག་མེད་ཀྱི། །ཡོན་ཏན་བསམ་ཡས་ཡོངས་རྫོགས་སངས་རྒྱས་ཀུན་གྱིས་ཡོངས་བཟུང་བའི། །ཆོས་ཀྱི་རྣམ་གྲངས་འདི་ལ་ཡིད་ཆེས་ཀྱིས་གསུང་བདེན་དེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །དེ་བཞིན་ལྷོ་ཕྱོགས་སངས་རྒྱས་ཞིང་ན་བཅོམ་ལྡན་དེ་བཞིན་གཤེགས། ཉི་ཟླའི་སྒྲོན་མ་དང་ནི་གྲགས་པ་གྲགས་པའི་འོད་ཞེས་དང་། །འོད་འཕྲོའི་ཕུང་པོ་ལྷུན་པོའི་སྒྲོན་མ་བརྩོན་འགྲུས་མཐའ་ཡས་སོགས། །གངྒཱའི་ཀླུང་གི་བྱེ་སྙེད་ཀུན་གྱིས་རྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་འོད་དཔག་མེད་ཀྱི། །ཡོན་ཏན་བསམ་ཡས་ཡོངས་བརྗོད་སངས་རྒྱས་ཀུན་གྱིས་ཡོངས་བཟུང་བའི། །ཆོས་ཀྱི་རྣམ་གྲངས་འདི་ལ་ཡིད་ཆེས་ཁྲིད་གསུང་བདེན་ངེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །དེ་བཞིན་ནུབ་ཀྱི་ཕྱོགས་ན་སངས་རྒྱས་ཚེ་དཔག་མེད་པ་དང་། །ཕུང་པོ་དཔག་མེད་རྒྱལ་མཚན་དཔག་མེད་འོད་ཆེན་འོད་ཟེར་སྣང་། །རིན་ཆེན་ཏོག་དང་འོད་ཟེར་དག་སོགས་ནུབ་ཕྱོགས་སངས་རྒྱས་ནི། །གངྒཱའི་ཀླུང་གི་བྱེ་སྙེད་ཀུན་གྱིས་བརྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་འོད་དཔག་མེད་ཀྱི། །ཡོན་ཏན་བསམ་ཡས་ཡོངས་བརྗོད་སངས་རྒྱས་ཀུན་གྱིས་ཡོངས་གསུང་པའི། །ཆོས་ཀྱི་རྣམ་གྲངས་འདི་ལ་ཡིད་ཆེས་ཀྱིས་གསུང་བདེན་དེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །བྱང་ཕྱོགས་དེ་བཞིན་གཤེགས་པ་འོད་འཕྲོའི་ཕུང་པོ་ཆེན་པོ་དང་། །ཐམས་ཅད་སྒྲོལ་དབྱངས་རབ་ཏུ་ཐུལ་དཀའ་ཉི་མ་འབྱུང་ཞེས་དང་། །དྲྭ་ཅན་གྱི་འོད་དང་འོད་ཀྱི་འབྱུང་གནས་སོགས་སངས་རྒྱས། །གངྒཱའི་ཀླུང་གི་བྱེ་སྙེད་ཀུན་གྱིས་བརྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་འོད་དཔག་མེད་ཀྱི། །ཡོན་ཏན་བསམ་ཡས་ཡོངས་བརྗོད་སངས་རྒྱས་ཀུན་གྱིས་ཡོངས་བཟུང་བའི། །ཆོས་ཀྱི་རྣམ་གྲངས་འདི་ལ་ཡིད་ཆེས་གྱིས་གསུང་བདེན་ངེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །དེ་བཞིན་འོག་ཕྱོགས་བཞུགས་པ་རྫོགས་པའི་སངས་རྒྱས་སེང་གེ་དང་། །གྲགས་པ་དང་ནི་གྲགས་འོད་ཆོས་ཤེས་ཆོས་འཛིན་ཅེས་བྱ་དང་། །ཆོས་ཀྱི་རྒྱལ་མཚན་ལ་སོགས་སངས་རྒྱས་བཅོམ་ལྡན་དེ་བཞིན་གཤེགས། །གངྒཱའི་ཀླུང་གི་བྱེ་སྙེད་ཀུན་གྱིས་རྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་འོད་དཔག་མེད་ཀྱི། །ཡོན་ཏན་བསམ་ཡས་ཡོངས་བརྗོད་སངས་རྒྱས་ཀུན་གྱིས་ཡོངས་བཟུང་བའི། །ཆོས་ཀྱི་རྣམ་གྲངས་འདི་ལ་ཡིད་ཆེས་ཀྱིས་གསུང་བདེན་ངེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །སྟེང་ནས་ཚངས་དབྱངས་སྐར་རྒྱལ་སྤོས་མཆོག་སྤོས་འོད་སྤོས་ཕུང་པོ། །རིན་ཆེན་མེ་ཏོག་ཤིན་ཏུ་རྒྱས་རིགས་ས་ལའི་དབང་པོའི་རྒྱལ། །རིན་ཆེན་ཨུཏྤ་ལའི་དཔལ་མཐོང་བ་དོན་ཡོད་ལྷུན་ལྟར་སོགས། །གངྒཱའི་ཀླུང་གི་བྱེ་སྙེད་རྒྱལ་ཀུན་རྫུན་མེད་བདེན་གསུང་ལྗགས། །རང་རང་ཞིང་ཁམས་ཁེབ་པར་བྱས་ཏེ་ཚེ་དཔག་མེད་ཀྱི། །ཡོན་ཏན་བསམ་ཡས་ཡོངས་བརྗོད་སངས་རྒྱས་ཀུན་གྱིས་ཡོངས་བཟུང་བའི། །ཆོས་ཀྱི་རྣམ་གྲངས་འདི་ལ་ཡིད་ཆེས་ཀྱིས་གསུང་བདེན་དེས་བདག །ལུས་འདི་བོར་ཐག་ཉིད་དུ་བདེ་ཅན་ཞིང་དེར་སྐྱེ་བར་ཤོག །འོད་དཔག་མེད་ཞིང་བཀོད་དང་བཅོམ་ལྡན་སངས་རྒྱས་དེ་རྣམས་མཚན། །ཐོས་གྱུར་ཐོས་པ་ཐོས་འགྱུར་དེ་ཀུན་སངས་རྒྱས་བཅོམ་ལྡན་འདས། །རྣམས་ཀྱིས་ཡོངས་སུ་བཟུང་བར་འགྱུར་ཞེས་བདེན་གྱུར་དམ་པས་གསུང་། །ཐུབ་དེས་སངས་རྒྱས་དེ་དག་ཡོན་ཏན་བསམ་མི་ཁྱབ་བརྗོད་བཞིན། །སངས་རྒྱས་དེ་དག་ཀུན་གྱིས་ཤཱཀ་ཐུབ་ཡོན་ཏན་དེ་བཞིན་བསྔགས། །སྙིགས་མ་ལྔ་བདོའི་དུས་སུ་སངས་རྒྱས་གཞན་གྱིས་མཛད་དཀའ་ཀུན། །ཡོངས་སུ་བཟུང་མཛད་ཐུབ་དབང་དེ་ལ་སྙིང་ནས་སྐྱབས་སུ་མཆིའོ། །བདག་ནི་ལུས་འདི་བོར་ཐག་བདེ་ཅན་ཞིང་དེར་སྐྱེ་བར་ཤོག །བཅོན་ལྡན་རྒྱལ་བའི་བཀའ་ལ་ཉན་ཐོས་བྱང་ཆུབ་སེམས་དཔའ་དང་། །ལྷ་མི་ལྷ་མིན་དྲི་ཟེར་བཅས་པའི་འཇིག་རྟེན་ཀུན་ཡི་རངས། །སངས་རྒྱས་བཀའ་སྩལ་མངོན་བསྟོད་ནམ་ཡང་མི་བསླུ་ཤིན་ཏུ་བདེན། །བདེན་པ་མཆོག་གསུམ་ཕྱོགས་བཅུ་དུས་གསུམ་སངས་རྒྱས་བདེན་མཐུ་དང་། །དེ་བཞིན་གཤེགས་པ་འོད་དཔག་མེད་དང་ཤཱཀ་ཐུབ་བྱིན་རླབས་ཀྱིས། །བདག་སོགས་ལུས་འདི་བོར་མ་ཐག་ཏུ་བར་མཚམས་གཞན་མེད་པར། །སངས་རྒྱས་ཞིང་མཆོག་འཇིག་རྟེན་ཁམས་གྱུར་བདེ་ལྡན་བཀོད་པ་རུ། །སྐྱེ་བར་གྱུར་ཅིག་དུས་གསུམ་བདེ་བ་ཀུན་ཀྱང་དེའི་ཕྱིར་བསྔོ། །བདག་ནི་སོ་སྐྱེ་མོས་སྤྱོད་ས་ལ་གནས་པའི་སྐབས་ཉིད་ནས། །མཐོང་ཐོས་དྲན་རེག་གྱུར་དང་དེ་རྣམས་ཀྱིས་ཀྱང་རླུང་རྩི་ཕྱོགས། །ཕོག་གྱུར་འགྲོ་ཀུན་ལྷག་བསམ་སྨོན་ལམ་སྟོབས་གང་རྒྱལ་བའི་མཐུས། །ཀུན་ཀྱང་ཕྱམས་ཅིག་བདེ་ལྡན་བཀོད་པའི་ཞིང་དུ་སྐྱེ་བར་ཤོག །

ཅེས་པ། བདེ་བ་ཅན་གྱི་བཀོད་པའི་མདོ་དོན་ཚང་བའི་སྨོན་ལམ་ཚིགས་སུ་བཅད་པ་ཐར་པའི་སྒོ་འབྱེད་ཞེས་བྱ་བ་འདི་ནི། རྣམ་འདྲེན་དཔའ་བོ་སྤྲུལ་པའི་སྐུ་རིན་པོ་ཆེ་གཙུག་ལག་དགའ་བའི་ཞལ་སྔ་ནས་ཀྱི་གསུང་གིས་བསྐུལ་བ་ལ་བརྟེན། བོད་ཡུལ་ཁ་བ་ཅན་གྱི་དབུས་གྱུར་ལྷ་ལྡན་རང་བྱུང་སྤྲུལ་པའི་གཙུག་ལག་ཁང་ཇོ་བོ་འོད་ཟེར་ལྷ་བརྒྱད་ཀྱི་སྤྱན་སྔར་སྙིང་ནས་གུས་པས། ཕྱོགས་མེད་རྒྱལ་ཁམས་པ་རིག་འཛིན་ཚེ་དབང་ནོར་བུས། མེ་ཡོས་རབ་བྱུང་བཅུ་གསུམ་པ་ཆུ་སྟོད་ཟླ་བའི་དཀར་ཕྱོགས་གང་བ་ལ་གྲུབ་པར་བྲིས་པའོ། །དགེའོ། །དགེའོ། །ཤུ་བྷཾ།

དེ་ལྟར། ཚིགས་ལ་མི་སྟོན་དོན་ལ་སྟོན་པའི་ལུང་ལ་བརྟེན་ནས། གང་ཟག་ཅི་རིགས་པའི་ངོར་སྐབས་འགར་ཚིག་ཟོལ་ཡངས་ཤིང་བརྗོད་པ་བདེ་བར་དགོངས་ཏེ། འཕགས་ཡུལ་གྱི་སློབ་དཔོན་ཆེན་པོ་དཔའ་བོས་མདོ་སྡེ་ཚིགས་ལྷུག་པ་འགའ་ཞིག་ཚིགས་བཅད་དུ་སྡེབས་པར་མཛད་ཅེས་བཀའ་གདམས་ཀྱི་གསུང་བསྒྲོས་ཁུང་མར་བྱུང་བ་དང་། བོད་ཀྱི་ལོ་ཙཱ་བ་དམ་པ་འགས་ཀྱང་སྔགས་རྒྱུད་ལ་ལ་རྒྱ་སྐད་ལྷུག་པར་བོད་སྐད་ཚིགས་བཅད་བསྒྱུར་བ་དང་འདྲ་བར། འདི་ཡང་ཡེ་ཤེས་དམ་པ་བརྙེས་པའི་སྐྱེས་བུ་ཆེས་ཆེ་བ་མཆོག་གིས་བདེ་བ་ཅན་གྱི་ཞིང་གི་བཀོད་པའི་མདོ་ཚིགས་ལྷུག་པའི་དོན་ཚིགས་སུ་བཅད་པར་སྡེབས་ནས་སྨོན་ལམ་དུ་ཁ་བསྒྱུར་བར་གནང་བ་ཡིན་ཕྱིར། ཡིད་རྩེ་གཅིག་ཏུ་ཁ་འདོན་བགྱིས་ན། དེ་བཞིན་གཤེགས་པའི་བཀའ་མདོ་སྡེ་རིན་པོ་ཆེ་དེ་ཉིད་བཏོན་པའི་ཕན་ཡོན་འབྱུང་ཐོག །ཁ་བསྒྱུར་སྨོན་ལམ་མཐུ་ཡིས་ལུས་འདི་འཕོས་མ་ཐག་ཏུ་ཞིང་དེར་ངེས་པར་སྐྱེ་བ་ཐེ་ཚོམ་མེད་པས། སྨོན་ལམ་ཁྱད་པར་ཅན་འདི་ལ་ཀུན་གྱིས་ནན་ཏན་དུ་འབད་འཚལ་ལོ། །ཡང་དམ་པ་མཆོག་རྣམས་ཀྱིས་ངོ་བོ་རྣམ་པ་གཉིས་ཀ་སངས་རྒྱས་བཀའ་རྨ་མེད་པའི་དོན་ལས་ནམ་ཡང་མི་འདའ་བཞིན་ཐབས་མཁས་ཟབ་མོས་མཛད་པ་དེ་ལྟར་བསྟན་པ་ལ། ཐ་སྙད་མཁན་དང་རག་གན་གསེར་བརྫུས་བ་ཚོས་འགྲན་སྟེ་སྟག་གིས་མཆོངས་སར་ཝས་ཕྱོགས་པའི་དཔེ་བཞིན་རྒྱལ་བའི་བཀའ་རྣམས་རང་འདོད་ཀྱིས་བཟོ་བཅོས་ཕྲི་བསྣན་འདྲ་མིན་སྣ་ཚོགས་ཀྱིས་བསླད་ནས་ངོམ་ངོམ་བྱེད་པ་ནི། ཕྲལ་སྣང་ཡིན་ཡང་འདྲ་ཡང་བྱིན་རླབས་མེད་ཅིང་དོན་གནད་ཁྱོགས་པ་ཡི་ཉེས་པའི་གཡང་ས་ཆེན་པོར་ལྷུང་བ་འགྱུར་བས་ནམ་ཡང་དོར་དགོས་སུ་ཤེས་པ་གལ་ཆེའོ། །ཅེས་པའང་རིག་འཛིན་བླ་མ་རྗེ་ཡི་བཀའ་འབང་ཐ་ཤལ་གཙུག་ལག་དགའ་བའི་དབང་པོས་འདི་ཉིད་པར་དུ་བསྒྲུབ་སྐབས་སྨྲས་པ་ལགས་སོ། །སརྦ་མངྒ་ལཾ། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཧོ་ཧྱ་བ་ད་ཏ་ཏེ་ཥཱཉྩ་ཡོ་ནི་རོ་དྷ་ཨེ་ཝཾ་ཝཱ་དཱི་མ་ཧཱ་ཤྲ་མ་ནཿ