༈ རིག་འཛིན་ཚེ་དབང་ནོར་བུའི་གསོལ་འདེབས།
ཨོཾ་ཨཱ་ཧཱུྃ། དང་པོའི་སངས་རྒྱས་ཀུན་བཟང་ཐུགས་ཀྱི་ཀློང་། །རིག་འདུས་རྡོ་རྗེ་སེམས་དཔའི་སྒྱུ་འཕྲུལ་རྒྱལ། །འཁོར་ལོ་སྡོམ་པ་རིག་འཛིན་པདྨ་འབྱུང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཕགས་ཡུལ་ཡང་ངག་རིག་འཛིན་ཧཱུྃ་ཀ་ར། །བོད་ཡུལ་གྲུབ་པའི་དབང་ཕྱུག་ནམ་མཁའ་སྙིང་། །ཟུར་རིག་སྔགས་འཆར་རིག་འཛིན་ཤེས་རབ་གྲགས། །གསོལ་བ༴ སྙི་ཡི་གདུང་ལས་འཁྲུལ་ཞིག་ཉི་མ་སེང་། །འཁོན་གྱི་གདུང་ལས་གྲུབ་བརྙེས་བཟང་པོ་དཔལ། །གསོལ་བ༴ ལ་སྟོད་དཔལ་ཐང་གཏེར་སྟོན་བྱང་ཆུབ་གླིང་། །ཀཿཐོག་ཕྱོགས་སུ་ཚུལ་ཁྲིམས་འབུམ་པ་དང་། །འབྲས་ཡུལ་སྐྱིད་ཚལ་ཀུན་མཁྱེན་སངས་རྒྱས་འཕེལ། །གསོལ་བ༴ སྟག་བུར་རིག་འཛིན་པདྨ་ནོར་བུའི་མཚན། །དེ་སོགས་གྲུབ་པའི་ཟློས་གར་མཁན་དཔྱིད། །དུ་མར་སྣང་མཛད་དཔལ་ལྡན་བླ་མ་ལ། །གསོལ་བ༴ ཚེ་འདིར་འཁྲུལ་ཟད་ཆོས་སྐུའི་ཐུགས་ཀློང་གྲོལ། །དབང་ཕྱུག་ཡོན་ཏན་བརྒྱད་སྙེད་སྐུ་ཉིད་འགྲུབ། །ནོར་འཁྲུལ་མ་མཆིས་ཐམས་ཅད་མཁྱེན་པ་ཐོབ། །འབྲེལ་ཚད་སངས་རྒྱས་འབྲས་བུ་མཆོག་འགྲུབ་ཤོག །
ཅེས་དྭགས་པོ་ཀླུ་མཁར་ཞབས་དྲུང་པའི་གསང་ཡུམ་རང་བཞིན་དོན་གྱི་རྣལ་འབྱོར་མ་ཡེ་ཤེས་ལྷ་མོ་ཞེས་པས་བསྐུལ་ངོར་ཕྱོགས་ཀུན་རྒྱུ་བའི་སྔགས་འཆང་ཚེ་དབང་ནོར་བུས་ཤིང་འབྲུག་ཧོར་ཟླའི་ཚེས་ལ་སྤུ་བོ་ཡིད་འོང་དུ་བྲིས་མངྒ་ལཾ།