༈ ཀཿཐོག་རིག་འཛིན་ཚེ་དབང་ནོར་བུའི་གསོལ་འདེབས།
ཨོཾ་སྭཱསྟི། ཀུན་བཟང་ཧེ་རུ་ཀ་དང་གཉིས་མེད་མགོན། །དཔའ་བོ་ཐུགས་ཀྱི་རྡོ་རྗེར་གསོལ་བ་འདེབས། །ལུང་རྟོགས་བསྟན་པའི་རྩ་ལག་རྨད་བྱུང་བ། །རྒྱལ་སྲས་ཤནྟ་དེ་ཝར་གསོལ་བ་འདེབས། །བརྟུལ་ཞུགས་རོལ་པའི་གར་གྱི་འཛམ་གླིང་རྒྱན། །གྲུབ་ཐོབ་ནག་པོ་སྤྱོད་པར༴ ཕྱག་རྒྱ་ཆེ་མཆོག་རིག་འཛིན་སར་གཤེགས་པ། །བོད་གྲུབ་ནམ་མཁའ་སྙིང་པོར༴ གནས་ལྔ་ཀུན་རིགས་དྲེགས་པ་བྲན་དུ་བཀོལ། །རོང་ཟོམ་ཆོས་ཀྱི་བཟང་པོར༴ རྫོགས་ཆེན་སྙིང་ཐིག་ཉིན་ལྟར་བརྡལ་མཛད་མགོན། །དྲི་མེད་འོད་ཟེར་འཕྲོ་དེར༴ རྣམ་སྨིན་རིག་འཛིན་མཆོག་བརྙེས་མཁྱེན་པའི་གཏེར། །རྗེ་བཙུན་སྒྲོལ་བའི་མགོན་པོར༴ ཀུན་ཀྱང་ལས་ལུས་མ་ཡིན་སྤྲུལ་པའི་གར། །སྨོན་ལམ་དབང་གི་འགྲོ་བའི་དོན་མཛད། །རླབས་ཆེན་རྒྱལ་བའི་འཕྲིན་ལས་བྱེད་པ་པོ། །ཡང་ཡང་སྐྱེ་བའི་འཕྲེང་བ་སྟོན་དེར་འདུད། །བཀའ་དྲིན་གསུམ་ལྡན་རྡོ་རྗེ་སློབ་དཔོན་ནི། །རྒྱལ་ཀུན་ངོ་བོར་རྒྱལ་བས་ཡོངས་བསྔགས་ན། །རྡོ་རྗེ་འཛིན་དབང་དེ་ཀུན་དུས་འདི་རུ། །རྩ་བའི་བླ་མར་ཤེས་བཞི་གསོལ་བ་འདེབས། །དཔལ་ལྡན་བླ་མར་སྙིང་ནས་གསོབ་བཏབ་མཐུས། །བྱང་ཆེན་གྲངས་མེད་ལམ་ལ་མི་ལྟོས་པར། །སྐྱེ་བ་གཅིག་ལ་ལམ་ལྔ་ས་བཅུ་རྫོགས། །བྱང་ཆུབ་ཆེན་པོའི་འབྲས་བུ་མྱུར་ཐོབ་ཤོག །གནས་སྐབས་ཚེ་རིང་ནད་མེད་འབྱོར་པ་རྒྱས། །དབང་ཕྱུག་ཆེ་ཐོབ་འདོད་དོན་འབད་མེད་འགྲུབ། །བྱ་བྱེད་ཀུན་ཀྱང་བྱང་ཆེན་ལམ་དུ་གཞོལ། །འབྲེལ་བཅས་གཏན་བདེ་མཆོག་ལ་བཀོད་པར་ཤོག །སྨོན་ལམ་དེ་དག་བསླུ་མེད་ཉིད་འགྲུབ་པར། །དཀོན་མཆོག་ཀུན་འདུས་བླ་མེད་བྱིན་གྱིས་རློབས། །
ཞེས་རྒྱལ་པོ་དད་པ་དང་ལྡན་པ་ཨཱ་ན་ཐ་ཡི་དད་པའི་རྟེན་དཔལ་ནམ་མཁའ་སྙིང་པོའི་སྐུ་བརྙན་རི་མོར་བཀོད་པའི་རྒྱབ་བྱང་དུ་རིག་པ་འཛིན་པ་ཚེ་དབང་ནོར་བུས་རབ་མྱོས་ལྕགས་རྟ་གསར་དུ་འཆར་བ་ཆོ་འཕྲུལ་ཟླ་བའི་ཡར་ཚེས་བཞི་ལ་མངའ་རིས་སྨད་ཀྱི་རྒྱལ་ཕྲན་སྨོན་ཐང་གི་ཁབ་ཏུ་བརྗོད་པ་ལའོ། །སརྦ་མངྒ་ལཾ།