༈ གསོལ་འདེབས་མཁའ་ཁྱབ་འགྲོ་བ།
ཨོཾ་སྭཱསྟི། མཁའ་ཁྱབ་འགྲོ་བ་ཀུན་གྱི་ཉེར་འཚོའི་དཔལ། །མཁའ་ལྟར་བརྡལ་བ་ཚད་མེད་ཐུགས་རྗེ་སེམས། །མཁའ་དབྱིངས་ཡོངས་ཁེངས་རྒྱལ་བ་སྲས་བཅས་ཀྱིས། །མཁའ་ཀློང་དབྱིངས་སུ་དབྱེར་མེད་རྡོ་རྗེ་སེམས། །དོན་དམ་རྡོ་རྗེ་ཡེ་ཤེས་རྒྱལ་ཀུན་དངོས། །དམིགས་མེད་སྙིང་རྗེ་སེམས་དཔའ་ཡེ་ཤེས་སྐུ། །རྟག་བརྟན་འགྱུར་མེད་བདེ་ཆེན་ཧེ་རུ་ཀ །སྤྱོད་འཆང་ནམ་མཁའ་སྙིང་པོར་གསོལ་བ་འདེབས། །གང་སྐུ་རྣམ་པ་ཐམས་ཅད་འགྲོ་བའི་དོན། །ཚད་མེད་སྒྱུ་འཕྲུལ་རོལ་གར་ཅིར་ཡང་བསྒྱུར། །དུས་འདིར་བདག་ཅག་འདྲེན་པ་འཁོར་ལོའི་མགོན། །དཔལ་ལྡན་རྩ་བའི་བླ་མར་གསོལ་བ་འདེབས། །གང་གི་རྨད་བྱུང་ཐུགས་རྗེ་ལྕགས་ཀྱུ་ཡིས། །བདག་སོགས་གདུལ་བྱའི་སྙིང་ནས་ཉེར་བཟུང་ནས། །འཁོར་བའི་རྒྱ་མཚོ་ཆེ་ལས་ཡོངས་བསྒྲལ་ཏེ། །གཏན་བདེ་བྱང་ཆུབ་ས་ལ་དྲོངས་མཛད་ཀྱཻ། བདག་ནི་ཚེ་རབས་ཚེ་རྒྱུད་ཐམས་ཅད་དུ། །འཁྲུལ་མེད་དཔལ་མགོན་བླ་མས་རྗེས་སུ་བཟུང་། །དེ་དགྱེས་ལས་སྤྱོད་སྔགས་ཀྱི་ས་ལམ་རྫོགས། །རིང་མིན་རྡོར་སེམས་གོ་འཕང་ཐོབ་བྱིན་རློབས། །
ཞེས་གངས་རི་ཆེན་པོ་ཏི་སེའི་ནུབ་ཕྱོགས་བོད་ཡུལ་གྱི་སྟོད་མར་ཡུལ་རྫོགས་པའི་མཐའ། འབྲུ་ན་དང་སྟོད་ཧོར་གྱི་མཚམས་ནུབ་ར་མགོན་པོའི་སྐུ་བརྙན་རང་བྱུང་མཆོག་ཏུ་གསལ་ཞིང་ལྷ་སྟོང་ཡང་འོད་ཟེར་གྱི་ཕྲེང་བ་རྟག་ཏུ་འཕྲོ་བའི་ངོགས་མགོན་ཅིག་རྩེ་ཡི་བླ་མ་སྒྲུབ་པོ། དཔེའུ་རིང་ངམ་བཀའ་རྒྱུད་ཆོས་འཕེལ་རྒྱ་མཚོས་གསོལ་བ་བཏབ་པའི་ངོར་དཔལ་རིག་པས་འཛིན་པ་དཔལ་གདོང་ཆུ་བྱ་སྟོད་ཟླ་བའི་མར་ཕྱོགས་མཁའ་འགྲོ་འདུ་བའི་དུས་ཐོབ་པ་གཉིས་པར་ཧེ་མི་སྐྱེད་ཚལ་དུ་སྨྲས་པ་དགེའོ། །སརྦ་མངྒ་ལཾ།