༈ གསོལ་འདེབས་རྒྱལ་ཀུན་འཕྲིན་ལས།

ཨོཾ་སྭཱསྟི། རྒྱལ་ཀུན་འཕྲིན་ལས་གཅིག་བསྡུས་པདྨ་འབྱུང་། །དཔའ་བོ་ཐུགས་ཀྱི་རྡོ་རྗེ་ནམ་མཁའ་སྙིང་། །རྒྱལ་བའི་སྲས་པོ་ཚེ་དབང་ནོར་བུའི་སྡེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྩ་བའི་བླ་མ་ཚེ་དབང་ནོར་བུ་ཡིས། །ཐེག་ཆེན་སྨོན་ལམ་གང་བཏབ་བསླུ་མེད་འགྲུབ། །སྐྱེ་ཀུན་པད་འབྱུང་ནམ་སྙིང་སྤྲུལ་པ་ཡིས། །རྗེས་བཟུང་བྱང་ཆེན་སྨོན་ལམ་མྱུར་འགྲུབ་ཤོག །

ཅེས་མངའ་རིའི་བཙུན་མ་ལྔ་རང་གནས་སུ་འགྲོ་བར་ཁ་འདོན་གསོལ་འདེབས་སུ་ཚེ་དབང་ནོར་བུས་ཤིང་འབྲུག་ཟླ་བ་དང་པོའི་ཚེས་བཅོ་བརྒྱད་ལ་གནུབ་ཁུ་ལུང་དུ་བྲིས། མངྒ་ལཾ།