༈ གསོལ་འདེབས་གདོད་ནས་རྒྱལ་བ།

ཨོཾ་སྭཱསྟི། གདོད་ནས་རྒྱལ་བ་མཆོག་ཏུ་ཀུན་ཏུ་བཟང་། །ངེས་པ་ལྔ་ལྡན་ལོངས་སྐུ་འོད་དཔག་མེད། །འགྲོ་འདུལ་སྤྲུལ་སྐུ་ཚེ་དབང་པདྨ་འབྱུང་། །ཀུན་འདུས་སྤྱི་དཔལ་དྲིན་ཆེན་བླ་མའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཚེ་རབས་རྟག་ཏུ་བླ་མ་མཆོག་གི་ཟིན། །ས་ལམ་ཡོན་ཏན་ཡར་ངོའི་ཟླ་ལྟར་འཕེལ། །རྒྱལ་བའི་གནས་ཐོབ་འགྲོ་ཀུན་འདྲེན་པར་ཤོག །

ཅེས་ཡུལ་མདོ་ཁམས་ཞེ་ཞེ་འོན་གྱི་བླ་མ་བསོད་ནམས་གྲགས་པས་གསོལ་བ་བཏབ་པའི་ངོར་དཔལ་རིག་པ་འཛིན་པ་ཚེ་དབང་ནོར་བུས་སྨྲས་པ་སརྦ་མངྒ་ལཾ།