༈ གསོལ་འདེབས་རྒྱལ་ཀུན་ཡེ་ཤེས།

རྒྱལ་བ་ཀུན་ཡེ་ཤེས་འདུས་དངོས་པདྨ་འབྱུང་། །མི་འགྱུར་བདེ་ཆེན་རང་གཟུགས་མཚོ་རྒྱལ་མ། །འོད་གསལ་འཕོ་ཆེན་བསྙེས་པའི་བི་མ་ལ། །སྙིང་ཐིག་བརྟེན་པའི་གསལ་བྱེད་ཀློང་ཆེན་ཞབས། །ཟུང་འཇུག་མཆོག་བརྙེས་བདུད་འདུལ་རྡོ་རྗེ་རྩལ། །ཀུན་གྱི་ངོ་བོ་པདྨ་བདེ་ཆེན་གླིང་། །རྒྱལ་ཚབ་མཆོག་གྱུར་འགྲོ་འདུལ་རིག་པ་འཛིན། །ཚེ་དབང་ནོར་བུ་དཔལ་ལ་གསོལ་བ་འདེབས། །སྐྱབས་མཆོག་ཁྱེད་ལ་གུས་པས་གསོལ་བཏབ་མཐུས། །བདག་སོགས་ཚེ་རབས་རྟག་ཏུ་ཁྱོད་རྗེས་གཟུང་། །མངོན་མཐོ་ངེས་ལེགས་ཐར་ལམ་ཡོན་ཏན་རྫོགས། །འཕགས་ཆེན་ས་བརྙེས་རྡོར་སེམས་མྱུར་འགྲུབ་ཤོག །

ཅེས་ཀྲེ་པ་སྟོད་ཀྱི་རྗེ་དཔོན་དད་འབྱོར་དུ་མས་བརྒྱན་པ་ཨ་ཇོ་གྲོ་ནམ་ཞལ་ངོ་རྣམས་ཀྱིས་བསྐུལ་ངོར་ཚེ་དབང་ནོར་བུས་སྤྲ་བདུན་གཙུག་ལག་ཁང་འདབས་སུ་ལྕགས་ཁྱི་གྲོ་ཞུན་ཟླ་བའི་ཚེས་ཉེར་བརྒྱད་ལ་སྨྲས་པ་སརྦ་མངྒ་ལཾ།