༈ གསོལ་འདེབས་གདོད་ནས་གྲུབ་པ།
ཨོཾ་སྭཱསྟི། གདོད་ནས་གྲུབ་པའི་སེམས་རྒྱུད་བྱིན་རླབས་མཐུས། །ཚེ་འདིར་ཐོས་བསམ་བསྒོམ་པའི་ཡོན་ཏན་རྒྱས། །དབང་གི་རྒྱལ་པོ་པདྨ་ཀ་ར་ཡིས། །རྗེས་སུ་བཟུང་མཐུས་གཞན་དྲིང་མི་འཇོག་པར། །རང་སྟོབས་གཉིས་ཀྱིས་དོན་གཉིས་ལྷུན་གྲུབ་སྐྱོངས། །མ་ནོར་ལྟ་བའི་གནས་ལུགས་ཚུལ་བཞིན་རྟོགས། །ཏམ་བུ་ར་ལྟར་འཆད་བརྩམ་སྒོ་བརྒྱ་བསྙེན། །མཁྱེན་བརྩེ་ནུས་ལྡན་བླ་མར་གསོལ་བ་འདེབས། །ཁྱེད་ལ་ཁ་ཞེ་མེད་པར་གསོལ་བཏབ་ན། །པདྨ་ཀ་རའི་བདེན་ཚིག་བསླུ་མེད་པས། །བདག་ཅག་གདུལ་བྱ་སྨིན་གྲོལ་ལ་སྦྱོར་ནས། །རིང་མིན་རྡོ་རྗེ་སེམས་ཐོབ་གདོན་མི་ཟ། །
ཅེས་གསེར་བཟང་གྲུབ་མཆོག་དམ་པའི་གདུང་འཛིན་པདྨ་འགྱུར་མེད་ནོར་བུས་གསུང་གིས་བསྐུལ་ངོར། རང་སྤངས་རྟོགས་ཡོན་ཏན་ཆ་ཕྲ་རུང་། རྒྱལ་བ་པདྨའི་གསུང་གི་བྱིན་གྱིས་རླབས་པ་ཁོ་ནར་སེམས་ནས་བྱི་བ་གླང་ཆེན་དཔེར་བརྗོད་རང་བསྟོད་ཚིགས་བཅད་གསུམ་པོ་འདི་ཡང་ཤིང་རྟ་ནག་ཟླའི་ཚེས་བཟང་ལྔ་པ་སྤེལ་བ་དགེའོ། །མངྒ་ལཾ།