སངས་རྒྱས་ཀྱི་བསྟན་པ་རིན་པོ་ཆེ་ཇི་ལྟར་གནས་གྱུར་དུས་ཀྱི་ངེས་པ་རྗེས་སུ་དྲན་པ་བསྐྱེད་པ་ལེགས་བཤད་ས་བོན་ཙམ་སྨོས་པ་ཉུང་ངུ་དོན་གསལ་རིམ་པོ་ཆེའི་སྒྲོན་མེ།
སྐབས་དང་པོ། བསྟན་རྩིས་ཀྱི་རྣམ་གྲངས་ཇི་སྙེད་པ་བཀོད་པ།
༄༅། །སངས་རྒྱས་ཀྱི་བསྟན་པ་རིན་པོ་ཆེ་ཇི་ལྟར་གནས་གྱུར་དུས་ཀྱི་ངེས་པ་རྗེས་སུ་དྲན་པ་བསྐྱེད་པ་ལེགས་བཤད་ས་བོན་ཙམ་སྨོས་པ་ཉུང་ངུ་དོན་གསལ་རིམ་པོ་ཆེའི་སྒྲོན་མེ་ཞེས་བྱ་བ་བཞུགས་སོ། །
༈ ཨོཾ་སྭཱ་སྟི་སིདྡྷི་ཛྙིཾ་རཱ་ཛ་ཀུ་རུ་བྷྲུཾ། སངས་རྒྱས་བསྟན་པ་རིན་པོ་ཆེ་ཇི་ལྟར་གནས་གྱུར་དུས་ཀྱི་ངེས་པ་རྗེས་སུ་དྲན་པ་བསྐྱེད་པ་ལེགས་བཤད་ས་བོན་ཙམ་སྨོས་པ་ཉུང་ངུ་དོན་གསལ་རིན་པོ་ཆེའི་སྒྲོན་མེ་ཞེས་བྱ་བ། བླ་མ་རིན་པོ་ཆེ་དང་པོའི་སངས་རྒྱས་དཔལ་ཀུན་བཟང་དུས་ཀྱི་འཁོར་ལོར་ཕྱག་འཚལ་ལོ། །ཇོ་བོ་འཕགས་པ་དཀོན་མཆོག་རིན་པོ་ཆེ་རྣམ་པ་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །ཐུགས་རྗེས་བཟུང་ཞིང་བྱིན་གྱིས་བརླབ་པར་མཛད་དུ་གསོལ། །རྒྱལ་ཀུན་ངོ་བོ་རྩ་བའི་བླ་མ་ཆེ། །ཀུན་བཟང་དང་པོའི་མགོན་དེར་ཕྱག་བྱས་ནས། །རྒྱལ་བསྟན་རིན་ཆེན་གནས་གྱུར་དུས་ངེས་པ། །དད་པས་རྗེས་དྲན་ཆེད་དུ་འདིར་བརྗོད་བྱ། །དེ་ཡང་བདག་ཅག་གི་སྟོན་པ་མཚུངས་པ་མི་མངའ་བ། མཚུངས་པའི་ཟླས་དབེན་པ་འགྲོ་བ་ལྷ་དང་བཅས་པའི་སྐྱབས་གནས་གཅིག་པུར་གྱུར་པ་ཤཱཀྱ་ཏོག་ཤཱཀྱ་ཐུབ་པ་ཆེན་པོ་གང་མི་མཇེད་འཛམ་བུའི་གླིང་གི་འགྲོ་རྣམས་རྩོད་ལྡན་གྱི་དུས་ལ་སྤྱོད་ཅིང་ཚེ་ལོ་བརྒྱ་པར་ཐུབ་པ་ན་དགའ་ལྡན་གྱི་གནས་ནས་གཟིགས་པ་ལྔས་སྒྱུ་འཕྲུལ་ཆེན་མོའི་ལྷུམས་སུ་ཞུགས་ཤིང་སྐུ་བལྟམས་པ་དང་། ཁྱིམ་ན་གནས་པ་དང་། རབ་ཏུ་བྱུང་བའི་སྤྱོད་པ་དང་། བདུད་བཅོམ་ཞིང་མངོན་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདའ་ཚུལ་སོགས་མཛད་པ་བཅུ་གཉིས་སུ་སྟོན་པར་མཛད་པ་ནི། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་དགྱེས་རོལ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་ཡོངས་སུ་གྲགས་པར་གྱུར་པ་དེ་ལྟ་ལས། སྐུ་བལྟམས་པ་དང་། མངོན་པར་བྱང་ཆུབ་པ་དང་། མྱ་ངན་ལས་འདས་པ་རྣམས་ཀྱི་ལོ་ཡི་ངེས་པ་ནི་བསམ་གྱིས་མི་ཁྱབ་པའི་གནས་ལུགས་ཉིད་ཀྱི་རྒྱ་བོད་ཀྱི་མཁས་པ་རྣམས་ཀྱི་བཞེད་གཞུང་མི་མཐུན་པ་མང་ཞིང་མྱ་ངན་ལས་འདས་ནས་ཅི་ཙམ་སོང་གི་དུས་ཀྱང་ཚུལ་དེ་དང་འདྲ་བར་སྣང་ཞིང་། དེ་བཞིན་རྒྱལ་བའི་བསྟན་པ་ཇི་ཙམ་གནས་པའི་ཡུན་ཚད་ཀྱང་དགོངས་པའི་དབང་གིས་རྣམ་གྲངས་དུ་མ་ཅན་དུ་འབྱུང་སྟེ། འདུལ་བ་ལུང་ཕྲན་ཚེགས་དང་། གསེར་འཕྲེང་ཅན་གྱི་རྟོགས་བརྗོད། མདོ་སྡེ་བསྐལ་པ་བཟང་པོ། སྤྲིན་ཆེན་པོའི་མདོ། བློ་གྲོས་མི་ཟད་པས་བསྟན་པའི་མདོ་འགྲེལ། མཛོད་འགྲེལ་རྣམས་མཐུན་པར་བསྟན་པ་དངོས་དང་བཏགས་པ་ལྔ་བརྒྱ་རེ་བྱས་པ་ལོ་སྟོང་དུ་གནས་པར་གསུང་བ་དང་སྙིང་རྗེ་པད་དཀར་ནས། དངོས་སྟོང་བཏགས་པ་ལྔ་བརྒྱ་དང་། ཆོས་ཉིད་རང་མི་གཡོ་ཐ་དད་སྣང་བའི་མདོར་སྟོང་ལྔ་བརྒྱ་དང་། བྱང་ཆུབ་སེམས་དཔའ་ཟླ་བ་སྙིང་པོས་ཞུས་པའི་མདོ་དང་ད་ལྟའི་དཔེར་ལོ་ཉིས་སྟོང་བྱས་པ་མང་ཡང་སུམ་སྟོང་བྱས་པ་མདོ་ཞེས་དམ་པ་མཆོག་དག་གི་གསུངས་པས་ངེས་པ་ཉིད་དང་། བྱམས་པ་ལུང་བསྟན་གྱི་མདོ་ཐར་ལོའི་འགྱུར་དང་། དབྱིག་གཉེན་གྱི་གནོད་འཇོམས་དང་། མཆེ་སྡེའི་འབུམ་ཊིཀ་སོགས་སུ་ལྔ་སྟོང་བཤད་པ་སོགས་མི་ཡི་གདུལ་བྱ་སྤྱིར་བཏང་གཙོ་བོ་དང་། མི་མ་ཡིན་ཕལ་པ་དང་བཅས་པའི་སྣང་ངོ་ལ་དགོངས་ཤིང་། གཞན་དུ་མི་མ་ཡིན་ཆེན་པོ་ཀླུའི་རྒྱལ་པོ་རྒྱ་མཚོའི་གནས་དང་། སུམ་ཅུ་རྩ་གསུམ་དང་། དགའ་ལྡན་གྱི་གནས་རྣམས་སུ་ནི་སངས་རྒྱས་སྟོང་གི་བསྟན་པ་བསྐལ་པ་ཆེན་པོ་འདི་མ་རྫོགས་བར་ཆོས་ཀྱང་ནུབ་པར་མི་འགྱུར་བར་ཀླུ་ཡི་རྒྱལ་པོ་རྒྱ་མཚོས་ཞུས་པའི་མདོར་གསུངས་པ་སོགས་ཀྱིས་མཚོན་པ་དང་། ཐེག་ཆེན་ངེས་དོན་འཁོར་ལོ་གསུམ་པའི་ནང་ཚན་གསེར་འོད་དམ་པ་མདོ་སྡེའི་དབང་པོ་དང་། སྔགས་བླ་མེད་སྒྱུ་འཕྲུལ་རྡོ་རྗེ་སེམས་དཔའ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་གསུངས་པ་དང་། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་ནུབ་པ་མེད། །ཞེས་སངས་རྒྱས་མྱ་ངན་ལས་མི་འདའ་ཞིང་དམ་པའི་ཆོས་ཀྱང་ནུབ་པ་མེད་པར་གསུང་བ་དང་། གཞན་ཡང་སྔགས་ཀྱི་རྒྱུད་སྡེ་རྣམས་ནས་བསྟན་པའི་གནས་ཚད་ངེས་པ་ཅན་དང་། ངེས་པ་མེད་པ་དང་། ནུབ་པ་མེད་པར་གསུང་བ་སོགས་མང་དུ་བྱུང་བའི་ལུང་ཚིག་རྒྱས་པར་འདིར་མ་སྤྲོས་ལ། དེ་ལྟར་བསྟན་པའི་གནས་ཚད་དེ་དག་གི་སྟེང་ནས་སྔོན་ཆད་དུས་ཇི་ཙམ་ཞིག་སོང་སྙམ་ན། དེ་ཡང་འདོད་པ་མང་དུ་བྱུང་བ་ཀུན། མདོར་བསྡུས་ཏེ་བསྟན་ན། རྣམ་གྲངས་གཞན་བཀོད་པ་དང་། རང་གི་འདོད་པ་བརྗོད་པ་དེ་གཉིས་སོ། །དེའི་དང་པོ་ལ་སྤྱིར་ནི་བོད་ཡུལ་ཁ་བའི་ལྗོངས་འདིར་གྲགས་པའི་བསྟན་རྩིས་རྣམས། དུས་ཀྱི་འཁོར་ལོའི་ཕྱོགས་ལ་བརྟེན་པ་དང་། མ་བརྟེན་པ་གཉིས་སུ་འདུ་ཞིང་། དེ་ཡང་མ་བརྟེན་པའི་ཕྱོགས་ལ་ཨོ་རྒྱན་གྱི་སློབ་དཔོན་མ་ཧཱ་གུ་རུའི་རྣམ་ཐར་རྣམས་སུ་གདུལ་བྱའི་མོས་ངོ་དང་མཐུན་པའི་འདས་ལོ་མང་ཉུང་སྣ་ཚོགས་པ་དག་སྣང་བ་ཕྱོགས་གཅིག་ཏུ་བསྒྲིགས་པར་དཀའ་ཡང་ད་ལྟའི་གྲགས་ཆེ་བའི་ཐང་ཡིག་དག་ཏུ་མང་ཉུང་གཉིས་ཀྱི་མང་བ་ནི། དེ་བཞིན་གཤེགས་པ་ཞི་བར་གཤེགས་ཏེ། གུ་རུ་རིན་པོ་ཆེ་བོད་ཡུལ་ནས་ལྷོ་ནུབ་སྲིན་པོ་འདུལ་ཕྱིར་ཕེབས་ཀྱི་བར་ལོ། སུམ་སྟོང་བདུན་བརྒྱ་དང་ཉི་ཤུ་ཙམ་འགྲོ་བ་ཐང་ཡིག་ཁ་ཅིག་གི་དགོངས་པ་དང་། ཉུང་བ་ལ་ལོ་སུམ་སྟོང་ཆིག་བརྒྱ་དང་དྲུག་ལ་རེག་ཉེར་སོང་བ་ཐང་ཡིག་ཕལ་ཆེའི་བཞེད་པ་སྟེ། དེ་གཉིས་ཕྱིན་ཆད་ཀྱི་ལོ་ད་ལྟའི་བསྟན་རྩིས་གྲགས་ཆེ་བ་དག་དང་བསྟུན་ཏེ་བསྣན་པས་རགས་རྩིས་སུ་བཞི་སྟོང་དང་དྲུག་བརྒྱ་ལྷག་ཙམ་འགྲོ་བའམ། ཡང་ན་བཞི་སྟོང་དང་ཉིས་བརྒྱའི་ཁོངས་སུ་གནས་པར་སྣང་བས་དེ་ལྟར་ཐང་ཡིག་ལས་བྱུང་བ་བསྟན་རྩིས་ལུགས་གཉིས་དང་། དེ་བཞིན་བཞི་སྟོང་ཆིག་བརྒྱ་རེ་གཅིག་(༤༡༦༡)འདས་པ་འཕགས་མཆོག་ཆོས་ཀྱི་རྒྱལ་པོ་སྲོང་བཙན་སྒམ་པོའི་བཀའ་ཆེམས་ཀྱི་ལུགས་དང་། ལོ་བཞི་སྟོང་དང་ཉག་མ་རེ་དགུ་(༤༠༦༩)འདས་པ་རྫོགས་ཆེན་སེམས་ཕྱོགས་ལ་ཤིན་ཏུ་མཁས་པ་རྟ་སྟོན་གཟི་བརྗིད་དཔལ་གྱི་བཞེད་པ་དང་། སུམ་སྟོང་བརྒྱད་བརྒྱ་བརྒྱད་ཅུ་རྩ་བདུན་(༣༨༨༧)ནི་ནེལ་པ་པཎྜི་ཏ་ཡི་ལུགས་དང་། སུམ་སྟོང་བརྒྱད་བརྒྱ་བདུན་ཅུ་རྩ་བརྒྱད་(༣༨༧༨)འདས་པ་ཇོ་བོ་རྗེ་དཔལ་ལྡན་ཨ་ཏི་ཤ་ཡི་ལུགས་སུ་གྲགས་ཤིང་གངས་ཅན་གྱི་དགེ་བཤེས་སྟོད་ལུང་པ་ཇོ་བོ་ཚུལ་ཁྲིམས། གསང་ཕུ་ཞང་ཚེ་སྤང་ཆོས་ཀྱི་བླ་མ་སྣར་ཐང་པ་རིག་པའི་རལ་གྲི་སོགས་མཁས་པ་མང་པོའི་བཞེད་པ་སྟེ། བོད་སྔ་རབས་ཀྱི་རྒྱ་ནག་གི་གབ་རྩེ་མཁན་རྣམས་ཀྱིས་ཀྱང་འདོད་པ་འདི་དང་མཚུངས་པར་གནས་ཞེས་ཁ་ཅིག་ནས་གསུང་པ་དེ་དང་། སུམ་སྟོང་བརྒྱད་བརྒྱ་བདུན་ཅུ་རྩ་ལྔ་(༣༨༧༥)འདས་པ་ནི་རྒྱལ་པོའི་གཏམ་གྱི་ལུགས་ཀྱི་བསྟན་རྩིས་གང་བདག་ཉིད་ཆེན་པོ་དཔལ་ས་སྐྱ་པཎྜི་ཏའི་ཞལ་བཞེས་ཏེ་གྲགས་ཆེ་བ་དང་། སུམ་སྟོང་བདུན་བརྒྱ་ཉི་ཤུ་རྩ་གསུམ་པ་(༣༧༢༣)རས་ཆུང་རྡོ་རྗེ་གྲགས་པའི་ལུགས། སུམ་སྟོང་དང་བཞི་བཅུ་(༣༠༤༠)ལྷག་ངེས་འགྲོ་བ་དགྲ་བཅོམ་པ་དགེ་འདུན་འཕེལ་གྱི་ལུང་བསྟན་པའི་ལི་ཡུལ་ལུགས་ཀྱི་བསྟན་རྩིས་དང་། རྒྱ་ནག་ཐང་ཐ་ཛུང་རྒྱལ་པོའི་ཡིག་ཚང་དང་བསྟུན་པའི་ལུགས་ལ་ཉིས་སྟོང་བདུན་བརྒྱ་བཞི་བཅུ་ཞེ་དགུ་(༢༧༤༩)སྟེ་མང་བ་དང་། ཉིས་སྟོང་དྲུག་བརྒྱ་གྱ་དགུ་(༢༦༨༩)འདས་པ་ཉུང་བ་སྟེ་གཉིས་དང་། རྒྱ་ནག་གི་ཡིག་ཚང་ཙནྡན་ཇོ་བོའི་ལོ་རྒྱུས་ལས་བྱུང་བའི་བསྟན་རྩིས་ལ་ཡང་མང་བ་ཉིས་སྟོང་ལྔ་བརྒྱ་དྲུག་ཅུ་རེ་བརྒྱད་(༢༥༦༨)ལོན་པ་དང་། ཉུང་བ་ནི་ཉིས་སྟོང་བཞི་བརྒྱ་དགུ་བཅུ་གོ་གཅིག་པ་(༢༤༩༡)སྟེ་ལུགས་གཉིས་དང་། ཉིས་སྟོང་བཞི་བརྒྱ་ལྔ་བཅུ་(༢༤༥༠)ཙམ་འགྲོ་བ་རྒྱ་ནག་ཆོས་འབྱུང་ད་ལྟ་གསར་བྱུང་ལ་བརྟེན་རགས་རྩིས་སུ་དཔྱད་པ་དང་། ཉིས་སྟོང་ཉིས་བརྒྱ་བརྒྱད་ཅུ་རྩ་ལྔ་(༢༢༨༥)འདའ་པ་འདོད་པ་ནི་བལ་པོའི་ལམ་རྩིས་དང་། སིངྒ་ལ་ཡི་ཉན་ཐོས་ཚོགས་ནས་ཤིང་བུ་བསྐྱུར་བའི་ལོ་རྩིས་དང་བལ་པོ་པཎྜི་ཏ་བུདྡྷ་ཤྲཱི་དང་ཁ་ཆེ་བསོད་སྙོམས་པ་མ་ཧཱ་པཎྜི་ཏ་ཤཱཀྱ་ཤྲཱི་རྣམས་ཀྱི་བཞེད་པ་མཐུན་པའི་བསྟན་རྩིས་དང་། ཉིས་སྟོང་ཉིས་བརྒྱ་ང་གཉིས་(༢༢༥༢)ནི་རྫོགས་ཆེན་སྙིང་ཐིག་མཁན་པོ་རྒྱལ་བ་ཞང་སྟོན་གྱིས་བཞེད་པའི་བསྟན་རྩིས་དེ་དག་གི་སྔར་ཕན་ཆད་མཐོང་བ་རགས་པ་ནི་དེ་ལྟར་ཐང་ཡིག་གི་གཉིས་ཏེ་གཅིག་ཏུ་སྡོམ་པས་འདིར་རྣམ་གྲངས་བཅུའོ། །
དུས་ཀྱི་འཁོར་ལོའི་ཕྱོགས་ལ་བརྟེན་པའི་བསྟན་རྩིས་ནི། དེ་ལ་ཡང་རྒྱལ་བས་བདུད་རྩི་བརྙེས་ནས་དེ་ཡི་ལོ་ཕྱི་མར་དུས་ཀྱི་འཁོར་ལོའི་རྩ་རྒྱུད་གསུང་ཞིང་ལོ་དེ་ནས་འདས་ལོ་བཟུང་བ་དང་། མྱ་ངན་འདས་པའི་ལོ་དེའམ་དེ་ཡི་སྔ་མར་རྒྱུད་གསུངས་ཤིང་མྱ་ངན་འདས་པའི་ལོ་དང་མཐུན་པའི་འདས་ལོ་སྟེ་ལུགས་སྲོལ་གཉིས་བྱུང་བའི། སྔ་མའི་ཕྱོགས་ལ་སུམ་སྟོང་དང་བཞི་བཅུ་ཞེ་དགུ་(༣༠༤༩)འདས་པ་ནི་འགོས་ལོ་གཞོན་ནུ་དཔལ་བའི་རྩིས་ཀྱི་འཁྲུལ་སེལ་དུ་གྲགས་པའི་ལུགས་དང་། ཉིས་སྟོང་ལྔ་བརྒྱ་བདུན་ཅུ་རྩ་ལྔ་(༢༥༧༥)ནི་རྭ་འབྲོའི་རྗེས་འབྲང་བར་སྐབས་ཀྱི་དུས་འཁོར་མཁན་ཕལ་ཆེ་བ་དང་། བྱེ་བྲག་ནི་འདི་སྐད་ཅེས་བྱ་སྟེ། ཀུན་མཁྱེན་དུས་གསུམ་སངས་རྒྱས་དོལ་པོ་པ། མཁྱེན་རབ་དབང་ཕྱུག་བུ་སྟོན་རིན་ཆེན་གྲུབ། བོ་དོང་འཇིགས་བྲལ་དབྱངས་ཅན་དགའ་བའི་ཞབས། དེ་ལྟར་རྒྱལ་བསྟན་ཡོངས་རྫོགས་ཤིང་རྟ་དང་། གཞན་ཡང་རྒྱལ་བསྟན་གསལ་བྱེད་ཇི་སྙེད་པ། ཇོ་ནང་ཕྱོགས་ལས་རྣམ་རྒྱལ་དང་རྟོགས་ལྡན། སྒྲ་པ་ནི་བཟང་འཇམ་དབྱངས་ཆོས་མགོན་པོ། ཉག་ཕུ་བསོད་བཟང་ཚུར་ཕུ་འཇམ་དབྱངས་ཆེ། ཐིལ་པ་ཀུན་རྒྱལ་པཎ་ཆེན་བྱམས་པ་གླིང་། བྱང་བདག་གྲགས་བཟང་རྒྱ་ཕྲུག་དཀོན་རིན་པ། །མཁས་གྱུར་རི་བོ་དགའ་ལྡན་པ། དགེ་ལེགས་དཔལ་དང་ཆོས་སྐྱོང་བཟང་། །རིག་འཛིན་བློ་གྲོས་རྒྱལ་མཚན་ལ་སོགས་ཏེ། །དེ་ལྟར་ཕྱི་ནང་རིག་པའི་གནས་རྣམས་ལ། །མཁས་གྱུར་སྤྱོད་ལྡན་དམ་པ་མང་པོ་དང་། །རྗེ་བཙུན་ཆེན་པོ་སྒྲོལབའི་མགོན་པོས་ཀྱང་། །རྣམ་གྲངས་ཚུལ་དུ་འདི་ཉིད་བཞེད་ཀྱང་སྣང་། །ཞེས་སོ། །དེ་རྣམས་ནང་ཁུལ་དུ་ལོ་ཁྱད་གཅིག་ཙམ་རེ་ལས་གཞན་ཁས་ལེན་མཐུན་པ་ཉིད་དང་། དེ་བཞིན་གཉིས་སྟོང་སུམ་བརྒྱ་དགུ་བཅུ་གོ་གཉིས་(༢༣༩༢)འདས་པ་རྡོ་རྗེ་གདན་དུ་ཉན་ཐོས་རྣམས་ཀྱི་ཤིང་བུ་བསྐྱུར་བའི་གྲངས་དང་། ཀམ་པོ་ཆེའི་གླིང་ནས་མགོན་པོའི་རྒྱུད་བཞུགས་པའི་ལུང་བསྟན་ལས་བྱུང་བའི་ལོ་ཚིགས་རམ་ཤིང་གི་རྒྱལ་རབས་དང་བསྟུན་ནས་གྲུབ་ཐོབ་ཨོ་རྒྱན་པས་རྩིས་པ་དང་། ཉིས་སྟོང་སུམ་བརྒྱ་བདུན་ཅུ་རྩ་བཞི་(༢༣༧༤)ཙམ་ལོན་པ་ནི་རྒྱ་དཀར་གྱི་རྒྱལ་རབས་ལོ་རྒྱུས་དག་དང་མཐུན་ཇོ་ནང་རྗེ་བཙུན་སྒྲོལ་མགོན་ཞབས་ཀྱིས་བཞེད་པ་སྟེ། དེ་རྣམས་ཀྱི་ལོ་དག་ཡང་། འདིར་ནི་བརྟག་སླ་བའི་ཆེད་དུ་རྒྱུད་གསུངས་པ་ནས་བརྩམ་པའི་ལོ་སོགས་མ་ཡིན་པར་སྤྱིར་བཏང་བཞིན་སངས་རྒྱས་མྱ་ངན་ལས་འདས་པས་པའི་ལོ་ནས་བགྲངས་བར་བྱས་པ་སྟེ། གལ་ཏེ་རྒྱུད་གསུང་པའི་ལོ་དག་བསྣན་པར་བྱས་ན་བཞི་བཅུ་རྩ་ལྔའམ་རྩ་བཞི་གང་རིག་བསྣན་པས་རྟོགས་པར་ནུས་པའོ། །ལུགས་ཕྱི་མའི་ཕྱོགས་ལ་ཉིས་སྟོང་བདུན་བརྒྱ་དགུ་བཅུ་རྩ་དགུ་(༢༧༩༩)འདས་ལོར་གྱུར་པ་གདན་དུས་ཀྱི་རྩིས་གཞི་མཁན་པོ་འབྲུག་པ་པུ་རེ་ཤ་མ་ཏིའི་བསྟན་རྩིས་དང་། ཉིས་སྟོང་དྲུག་བརྒྱ་ཉི་ཤུ་རྩ་གཉིས་སོང་བ་པད་དཀར་ཞལ་ལུང་དུ་གྲགས་པ་ཕུགས་ལུགས་ཀྱི་བསྟན་རྩིས་སྟེང་ཀོང་པོ་འབུམ་རམས་པ་ཡང་འདིའི་རྗེས་སུ་འབྲང་ནས་ཁོང་རྒྱ་གར་ཕྱིན་པས་བལ་པོ་པཎྜི་ཏ་ཀུ་སུ་མ་རཱ་ཛ་དང་། དབུས་འགྱུར་བྲམ་ཟེའི་པཎྜི་ཏ་ཆེན་པོ་བི་སྣུད་པ་ཞེས་དང་འཕྲད་ཅིང་དེ་དག་གིས་ཀྱང་ཚུལ་འདི་འདོད་ཀྱི་ཡོད་སྐད་པའི་སྒྲུབ་བྱེད་བཅས་སྨྲ་བ་དང་། ཉིས་སྟོང་དྲུག་བརྒྱ་བཅུ་དགུ་པ་(༢༦༡༩)ནི་མཁས་གྲུབ་གཡུང་སྟན་བཛྲ་ཤྲཱི་ལུགས་སུ་གྲགས་པ་མཁས་པ་ཁ་ཅིག་ནས་བུ་སྟོན་ཆེན་པོའི་བསྟན་རྩིས་ཐུན་མོང་མིན་པ་འདི་ཡིན་ཞེས་ཀྱང་སྒྲོགས་ཤིང་། གང་ལྟར་ཕྱི་མའི་སྐབས་སུ་འབྱོན་པའི་ཀམ་འབྲུག་གི་མཁས་པའི་དབང་པོ་དག་དང་དམ་པ་མང་པོས་ཀྱང་བཞེད་པར་མཛད་པ་དང་། ཉིས་སྟོང་དྲུག་བརྒྱ་བཅུ་བདུན་(༢༦༡༧)འདས་པ་དྭགས་པོ་པཎྜི་ཏར་གྲགས་པའི་བསྟན་རྩིས་དང་། ཉིས་བརྒྱ་བཞི་བརྒྱ་སུམ་ཅུ་རྩ་ལྔ་(༢༤༣༥)ལོན་པ་སེམས་དཔའ་ཆེན་པོ་རང་བྱུང་ཞབས་ཀྱི་བཞེད་པ་དང་། ཉིས་སྟོང་སུམ་བརྒྱ་དྲུག་ཅུ་རེ་བརྒྱད་(༢༣༦༧)ཙམ་སོང་བ་ནི་ཆགས་ལོ་གསུམ་པར་རིན་ཆེན་ཆོས་རྒྱལ་དང་། འདས་ལོ་ཉིས་སྟིང་སུམ་བརྒྱ་བཅོ་ལྔ་(༢༣༡༥)སྟེ་ས་སྐྱའི་བླ་མ་དམ་པའི་དགོངས་པ་དང་། ཉིས་སྟོང་ཉིས་བརྒྱ་དང་ཉག་མ་བཅུ་དྲུག་འགྲོ་བ་རོང་བ་ངག་དབང་གྲགས་པ་དང་། ཉིས་སྟོང་ཆིག་བརྒྱ་བཅོ་ལྔ་འདས་པ་ནི་རྗེ་བཙུན་མཁའ་སྤྱོད་དབང་པོའི་བཞེད་པ་སྟེ་དུས་འཁོར་གྱི་ཕྱོགས་སུ་བསླན་པ་ད་ལྟ་ཡན་མཐོང་ལམ་དུ་སྤྱོད་པ་ལ་ནང་གསེས་ཕྲ་མོ་རྣམས། བཞག་ནས་རགས་པ་ནི་རྣམ་གྲངས་བཅུ་གསུམ་སྟེ་དེ་ཙམ་མོ། །དེ་ལྟར་བསྟན་རྩིས་འདིར་མདོ་ཙམ་རེ་སྨོས་པའི་རྣམ་གྲངས་ཉི་ཤུ་རྩ་བདུན་པོ་དེ་དག་རྣམས་མཛད་པ་པོའི་གང་ཟག་དུས་སྔ་ཕྱི་དང་མཆོག་དམན་ལ་དབྱེ་བ་མ་བྱས་པར་འདས་ལོ་མང་རིམ་བཞིན་སྔོན་དུ་བྱས་ཏེ་བཀོད་པ་ཡིན་ལ། འདས་ལོའི་རྣམ་གྲངས་སུ་གྱུར་པ་དེ་རྣམས་ཐམས་ཅད་ཀྱང་དེ་བཞིན་གཤེགས་པ་མྱ་ངན་ལས་འདས་པའི་ལོ་དེ་ཉིད་ནས་བརྩམ་སྟེ་ད་ལྟ་རབ་བྱུང་བཅུ་གཉིས་པའི་བློ་ངན་ལྕགས་བྱ་ཡན་ཆད་འདས་ལོར་བྱས་པ་སྟེ། སླད་ནས་རྔ་ཆེན་ཆུ་ཁྱི་མན་རིམ་པས་བསྣན་འོས་སུ་ཤེས་པར་བྱའོ། །གཞན་ཕྲ་མོ་ནས་གཞལ་ན་བསྟན་རྩིས་འདིར་སྨོས་པ་དང་བཅས་པའི་སུམ་ཅུ་ལྷག་ངེས་ཤེས་པ་ཉིད་ཁོ་བོས་མཐོང་མོད། དེ་དག་ལས་སྔོན་གྱི་སྐབས་སུ་དུས་འཁོར་གྱི་ཕྱོགས་ལ་མ་བརྟེན་པ་ནི། ཇོ་བོ་རྗེ་དང་ས་སྐྱ་པའི་ཞལ་བཞེས་ཀྱི་སྲོལ་འཛིན་ཆེས་མང་ཞིང་། བར་སྐབས་སུ་དུས་འཁོར་མཁན་སྤྱིར་བཏང་གི་འདོད་པ་དང་གཡུང་སྟན་བཛྲ་ཤྲཱི་བཞེད་པ་ཡང་ཅི་རིགས་པ་དང་། ད་ལྟ་ཕྱི་མའི་སྐབས་འདིར་ནི་པད་དཀར་ཞལ་ལུང་ཞེས་ཕུག་ལུགས་སུ་འབོད་པ་འདི་ཡི་རྗེས་སུ་འབྲང་བ་ཁོ་ན་ཤས་ཆེའོ། །དེས་ན་བསྟན་རྩིས་གཞན་དག་ནི་རྣམ་གྲངས་སུ་སྨོས་པ་དང་། རང་རང་ཉི་ཚེར་སྤྱོད་པ་ཙམ་ལས་ཡོངས་གྲགས་སུ་འདོད་ཅིང་བཞག་པ་ནི་མང་དུ་མི་སྣང་ངོ་། །དེ་རྣམས་ཀྱི་ཚུལ་རྣམ་པར་བཞག་པ་རྒྱས་པ་ནི་ཕལ་ཆེ་བ་ཞིག་སྔར་མཁས་པ་རྣམས་ཀྱིས་ཡང་ཡང་སྒྲགས་པས་ཡི་གེ་མཐོང་སླ་བ་ཉིད་དང་། གཞན་ནི་འདིར་ཉུང་ངུའི་ངག་གིས་བརྗོད་པའི་སྐབས་སུ་ཞིབ་མོར་བྲིར་མ་ལོངས་པས་སླད་ནས་གཞན་དུ་ཅི་རིགས་པ་སྤྲོ་བར་འདོད་དོ། །
འདིར་སྨྲས་པ། རྒྱལ་བའི་མཛད་པ་ནམ་མཁའི་མཐའ་ཀླས་བཞིན། །རྒྱལ་བསྟན་གནས་ཚུལ་འདི་ཞེས་སུ་ཡིས་གཞལ། །ཐུན་མིན་སྣང་ངོར་དོན་དམ་རྒྱལ་བ་རྣམས། །མྱ་ངན་མི་འདའ་དམ་ཆོས་འཆར་ནུབ་ཡང་། །དེ་ལྟར་བསམ་གྱིས་མི་ཁྱབ་ངོ་བོ་ཉིད། །མདོ་རྒྱུད་ནས་བཤད་དམ་པས་ཡང་ཡང་གསུངས། །འོན་ཀྱང་མ་ངེས་ལྔ་ལྡན་སྤྲུལ་སྐུའི་ཚུལ། །མཆོག་གི་མཛད་པ་བཅུ་གཉིས་སྟོན་པ་དང་། །སྨོན་ལམ་དབང་གིས་བསྟན་པའི་གནས་ཚད་ཀྱང་། །ངེས་བཟུང་མཛད་ཚེ་དེ་ཡང་སུ་ཡིས་འགོག །བསྐལ་པའི་གྲངས་ཚད་དུས་ཀྱི་གོ་རིམ་དང་། །སངས་རྒྱས་འབྱོན་དཀའ་དམ་ཆོས་གནས་དཀའ་ཞེས། །མུན་བསྐལ་སྒྲོན་མེའི་བསྐལ་པར་ཡོངས་བཞག་ཅིང་། །རྒྱལ་བ་ཐ་དད་གདུལ་བྱ་མངོན་སུམ་པ། །རྣམ་དག་ལུང་དང་རིག་པས་ཐུན་མོང་ངོར། །རྒྱལ་བསྟན་འཆར་ནུབ་གནས་ཚུལ་ཚད་མར་གྲུབ། །དེས་ན་བདག་ཅག་འདྲེན་པ་ཐུབ་དབང་གི །བསྟན་པའི་གནས་ཚད་འདས་ལོ་ཇི་ཙམ་ཞིག །ཇི་བཞིན་གཏན་ལ་དབབ་པར་བྱ་བ་ན། །མཁས་གྱུར་དམ་པ་མང་པོའི་བཞེད་པའི་གཞུང་། །མི་མཐུན་དུ་མ་ཉིད་དུ་གནས་གྱུར་གང་། །གདུལ་བྱའི་བསམ་པ་སྐྱོ་བསྐྱེད་སྤྲོ་བསྲིངས་སླད། །དེ་དང་དེ་ལྟའི་གདུལ་བྱ་རང་རང་གི །ཤེས་ངོ་ཉིད་དུ་བདེན་པར་གྲུབ་སོ་ཞེས། །དམ་པའི་དམ་པ་འགའ་ཞིག་གིས་གསུངས་ན། །དེ་ཡང་ལེགས་བཤད་མཆོག་ཏུ་ངེས་པར་ཁུམས། །འོན་ཀྱང་འཁྲུལ་མེད་གཏན་ཚིགས་བརྟན་པོ་དང་། །དཔལ་མགོན་དམ་པའི་གསུང་གི་རྗེས་འབྲངས་ནས། །རང་འདོད་ཇི་བཞིན་བསྟན་རྩིས་བརྗོད་པ་ཡང་། །འགལ་བའི་སྐྱོན་དུ་གྱུར་པར་མི་སེམས་མོད། །དེ་ལྟར་གྲངས་མེད་གཏན་ཚིགས་པདྨའི་འཕྲེང་། །བདག་བློལའི་སྐྱེད་ཚལ་མཛེས་པའི་རྒྱན་དུ་སྣང་། །
ཞེས་ཚིགས་སུ་བཅད་པའོ། །དེ་ལྟར་རྒྱལ་བསྟན་གནས་གྱུར་དུས་ཀྱི་ངེས་པ་བརྗོད་པ་ཉུང་གསལ་རིན་ཆེན་སྒྲོན་མེ་ལས་བསྟན་རྩིས་ཀྱི་རྣམ་གྲངས་ཇི་སྙེད་པ་བཀོད་པའི་སྐབས་དེ་དང་པོའོ། །
སྐབས་གཉིས་པ། རང་ལུགས་ཀྱི་བསྟན་རྩིས་རྣམ་པར་དག་པ་བཤད་པ།
ཨ་ཐ། གྲུབ་པ་ཀུན་མཁྱེན་ཀུན་ལ་སྨན། །ཤཱཀྱ་ཏོག་ལ་ཕྱག་བྱས་ནས། །རང་གི་འདོད་བཞིན་བསྟན་པའི་རྩིས། །རྣམ་པར་དག་པ་བརྗོད་པར་སྤྲོ། །དོན་གཉིས་པ་རང་གི་འདོད་པའི་བསྟན་རྩིས་རྣམ་པར་བཞག་པར་བྱ་སྟེ། དེ་གང་ལ་སྟོན་ཏེ་ཞེས་ཞེ་ན་རྒྱ་བོད་དུ་རྒྱལ་བསྟན་གསལ་བྱེད་འཕགས་པའི་སྐྱེས་བུ་དམ་པའི་གསུང་བསྟན་རྩིས། ཇི་སྙེད་པ་ཡང་ངེས་པའི་སྒོ་ནས་རྫོགས་པའི་སངས་རྒྱས་བཅོམ་ལྡན་འདས་ཉིད་ཀྱི་འདུལ་བའི་ལུང་དང་མདོ་སྡེ་རྣམས་སུ་དང་། དཔལ་མཆོག་དང་པོའི་སངས་རྒྱས་དུས་ཀྱི་འཁོར་ལོའི་རྒྱུད་དང་། གཞན་ཡང་སྔགས་ཁྱད་པར་མཆོག་ཏུ་འཕགས་ཤིང་དྲི་མ་མེད་པ་རྣམས་ནས་ཟླ་བ་དང་ལོ་ཡི་ངེས་པ་གསལ་བར་བསྟན་པ་དང་། དེ་བཞིན་རྒྱལ་བ་ཐམས་ཅད་ཀྱི་གསུང་གི་རྡོ་རྗེ་འོད་དཔག་མེད་ཨོ་རྒྱན་གྱི་སློབ་དཔོན་ཆེན་པོར་སྣང་བ་པདྨ་ཀ་ར་དང་། མ་ཧཱ་པཎྜི་ཏ་བྱེ་མ་ལ་མུ་ཏྲ་དང་། ལོ་ཙཱ་བ་བཻ་རོ་ཙ་ན་རྣམས་ཀྱི་གསུང་དྲི་མ་མེད་པ་ཐུན་མོང་མ་ཡིན་པ་རྣམས་ལ་བརྟོན་ཏེ། བྱས་པ་སྟེ་དེ་འཕགས་ཡུལ་གྱི་ལོ་རྒྱུས་ཁུངས་ལྡན་གཞན་དང་བསྟུན་པ་འཆད་དུ་རུང་བའི་གནས་ཀྱང་མཐོང་མོད། འོན་ཀྱང་དཀར་རྩིས་རི་མོ་རྣམ་པར་དག་པའི་ལམ་ནས་གཞལ་བ་ན། བོད་ཡུལ་གྱི་དུས་འཁོར་བ་སྤྱི་དང་ཁྱད་པར་རྒྱལ་བས་ལུང་བསྟན་པའི་ཤིང་རྟ་ཆེན་པོར་གྱུར་པ་དག་གི་བཞེད་པ་དང་ཤིན་ཏུ་མཐུན་པར་གྱུར་པས་ན་གཞན་དག་ཐེ་ཚོམ་ཆུང་ཞིང་ཚུལ་དེ་ལེགས་པར་རྟོགས་པ་ཡི་སྐབས་འདི་ཉིད་དུ་དེ་བཞིན་བརྗོད་པར་བྱ་སྟེ། དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དེ་ཉིད་དགའ་ལྡན་གྱི་གནས་ནས་མདོ་རྒྱ་ཆེར་རོལ་པ་ནས་ཇི་ལྟར་གསུང་བཞིན། ས་ག་ཟླ་བའི་ཚེས་བཅོ་ལྔ་ཡུམ་གསོ་སྦྱོང་ལ་གནས་པའི་ལྷུམས་སུ་རྒྱུ་སྐར་རྒྱལ་ནུབ་པའི་དུས་སྦྱོར་ལ་ཞུགས་པ་ཡི་ལོ་ནི་སྣ་ཚོགས་དབྱིག་ཞེས་ཤིང་མོ་སྦྲུལ་ཡིན་ལ། དེ་ཡི་ས་གའི་དྷྲུ་བར་གཟའ་གནས་དབྱུག་ཉེར་དྲུག ཆུ་སྲུང་བཅོ་ལྔ། རོལ་པོ་བཅོ་བརྒྱད། ཆ་ཤས་བརྒྱ་དང་ལྔ། ཉི་སྐར་གཅིག ཆུ་ཚོད་དྲུག ཆུང་ཆུང་ཉེར་དགུ། ཚེས་བཅོ་ལྔའི་གཟའ་དག་པར་ཐིག་དང་། ཚེས་དབྱུག་དྲུག ཉི་མ་དག་པར་སྐར་གནས་གཉིས་དང་། ཆུ་ཚོད་ཞེ་གཉིས། རེས་འགྲོག་ཟླ་སྐར་བཅོ་ལྔ་དང་། ཆུ་ཚོད་ཞེ་དྲུག་འཆར་བ་ཡིན་ལ། དེ་ནས་ཟླ་བ་བཅུ་ལྷག་བཅས་ཡོངས་སུ་འདས་ཤིང་བཅུ་གཉིས་ལ་ཉེ་བ་ཟིལ་གནོན་ཞེས་མེ་ཕོ་རྟ་ཡི་ལོ་ས་ག་ཟླ་བའི་ཚེས་བརྒྱད་ཀྱི་སྔ་དྲོ་རེས་འགྲོགས་ཟླ་བའི་སྐར་མ་རྒྱལ་དང་ལྡན་ཅིང་རྒྱལ་འཆར་བའི་དུས་སྦྱོར་རྐང་པ་དང་པོར་བབ་པའི་སྐབས་སུ་ལུམྦི་ཚལ་དུ་སྐུ་འཁྲུངས་ཏེ། དེ་ཡང་ས་གའི་དྷྲུ་བར། གཟའ་གཉིས་དབྱུག་གུ་བཞི་བཅུ་ཞེ་བདུན་ཆུ་སྲང་བཅུ་དྲུག་རིལ་པོ་བཅུ་བཞི་ཆ་ཤས་བརྒྱ་དང་བཅུ་བདུན། ཉི་མའི་སྐར་གནས་ཐིག་ཆུ་ཚོད་བཅོ་བརྒྱད་ཚེས་བརྒྱད་ཀྱི་རྩིས་རེས་གཟའ་དག་ས་ལ་གཟའ་གནས་གསུམ། ཚེས་ལོངས་ཞེ་དགུ། ཉི་མ་དག་པར་སྐར་གནས་གཅིག དབྱུག་གུར་བཞི་རེས་འགྲོགས་ཟླ་སྐར་བདུན། ཆུ་ཚོད་ཉེར་བདུན་ཡོད། རྒྱལ་བ་དགུང་ལོ་ཉེར་དགུའི་བར་དུ་བཞུགས་ཤིང་ཉེར་དགུ་པ་དངོས་པོ་ཞེས་ཤིང་ཕོ་ཁྱི་ཡི་ལོ། དེ་ཡི་སྨིན་དྲུག་གི་ཟླ་བའི་ཚེས་བརྒྱད་ཀྱི་ནམ་གྱི་ཆ་སྟོད་དུ་གྲགས་འཛིན་མར་སྲས་ཀྱི་ས་བོན་བསྐྲུན་ཞིང་ནམ་གུང་རྒྱུ་སྐར་རྒྱལ་འཆར་བ་གཟིགས་པའི་དུས་སུ་སངས་རྒྱས་རྣམས་ལ་ཕྱག་མཛད་དེ་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་ལྟར་རབ་ཏུ་བྱུང་ནས་ཟླ་བ་དྲུག་གི་བར་ལམ་ཚོལ་བར་དྲང་སྲོང་སྣ་ཚོགས་བསྟི་བའི་གནས་སུ་དེ་རྣམས་ཀྱི་ལམ་གྱི་དཀའ་ཐུབ་དང་མཐར་ཐུག་སྲིད་རྩེའི་ཏིང་འཛིན་མཐའ་དག་ཀྱང་ཡུད་རེས་མངོན་དུ་བྱས་ཏེ་ལྗོངས་དང་གྲོང་བརྡལ་དུ་རྒྱུ་ཞིང་གཤེགས་པའི་ཚུལ་ཡང་བསྟན་པར་མཛད་དོ། །དེ་ནས་དགུང་ལོ་སུམ་ཅུ་པ་ན་ཚོད་ལྡན་ཞེས་ཤིང་ཕག་གི་ལོ་ས་གའི་ཚེས་བརྒྱད་ལ་ཆུ་ཀླུང་ནེ་རཉྫ་རའི་འགྲམ་དུ་བཀའ་ཐུབ་ལ་ཞུགས་ཏེ་ལོ་དྲུག་གི་བར་གཅིག་པུ་དང་གཉིས་སུ་མེད་པར་མཉམ་པར་བཞག་གོ །དེ་ཡི་མཐར་དགུང་ལོ་སུམ་ཅུ་རྩ་ལྔ་བཞེས་པ་དཔའ་བོ་ཞེས་ལྕགས་འབྲུག་ས་གའི་ཉ་ལ་བྱང་ཆུབ་ཤིང་དྲུང་དུ་གཤེགས་ཏེ་སྲོད་ལ་བདུད་བཏུལ། ནམ་གྱི་གུང་དུ་རྡོ་རྗེ་ཟླ་བ་དང་རྡོ་རྗེ་སྒྲ་གཅན་སྙོམསཔར་ཞུགས་པའི་སྐབས་མཉམ་པར་བཞག ཟླ་བ་སྒྲ་གཅན་ལས་གྲོལ་ལ་ཁད་སྐད་ཅིག་མ་གཅིག་གི་ཐོགས་པ་ཐོ་རེངས་སྐྱ་རེངས་འཆར་བ་རྒྱལ་རྔ་བརྡུང་བའི་ཚོད་དུ་མངོན་པར་རྫོགས་པར་སངས་རྒྱས་ཏེ། དེ་མ་ཐག་ཏུ་གནས་གཙང་མའི་ལྷ་རྣམས་ཀྱི་ཆེད་དུ་བརྗོད་པ་དང་བཅས་མེ་ཏོག་གི་ཆར་སྤུས་ནུབ་ཙམ་ཕབས་སོ། །
དེ་ལྟར་ཟླ་བ་སྒྲ་གཅན་གྱིས་བཟུང་བའི་སྐབས་སུ་སྲས་སྒྲ་གཅན་འཛིན་ཡང་ཡུམ་གྱི་མངལ་དུ་ལོ་དྲུག་བཞུགས་ནས་དུས་དེར་བཙས་ཤིང་། དེ་ཡི་བཙས་སྟོན་གྱི་སྐྱེ་བོ་ཀུན་དགའ་བར་གྱུར་པས་ན་ཀུན་དགའ་བོ་བཙས་སོ། །དེ་ཡང་ས་ག་ཟླ་བ་འདི་ཡི་དྷྲུ་བར་གཟའ་གནས་གསུམ་ཆུ་ཚོད་སུམ་ཅུ། སྲང་ང་བཞི། རིལ་པོར་ཉི་ཤུ་ཆ་ཤས་སོ་བཞི། ཉི་དྷྲུར་སྐར་གནས་གཅིག ཆུ་ཚོད་བཅུ་དྲུག ཆུ་སྲང་སོ་གསུམ། དེ་ཡི་ཚེས་བཅོ་ལྔའི་གཟའ་དག་གཟའ་གནས་ལ་བཞི། ཆུ་ཚོད་ལྔ་བཅུ། ཉི་དག་སྐར་མར་གཉིས། དབྱུ་གུར་སོ་གཅིག ཚེས་འཁྱུད་སྐར་མར་བཅུ་དྲུག དབྱུ་གུར་གཅིག རེས་འགྲོགས་སྐར་མར་བཅོ་ལྔ། དབྱུ་གུར་བཅུ་གཅིག སྒྲ་གཅན་བུལ་བར་སྐར་གནས་ཉེར་གསུམ་ཆུ་ཚོད་བཅོ་བརྒྱད། གདོང་སྐར་གསུམ། ཆུ་ཚོད་ཞེ་གཅིག དུས་མེའི་སྐར་མར་བཅུ་བདུན། ཆུ་ཚོད་བཅུ་གཅིག་སྟེ་མན་ངག་བཞིན་སྦྱངས་དོར་གྱི་ལྷག་སྐར་གནས་ཐིག་དང་ཆུ་ཚོད་སོ་བརྒྱད་ཤར་བས་མྱོང་རྩིས་ལྟར་བཞི་ཆ་གཅིག་འཛིན་པ་ཡིན་ནོ། །གཞན་མདོ་སྡེ་མྱ་ངན་འདས་པ་ཆེན་པོ་དང་། བོད་སྔགས་རྙིང་པའི་བཀའ་བརྒྱད་རྫོང་འཕྲང་དང་རྒྱ་ནག་ཧཱ་ཤང་བསམ་གཏན་མཁན་རྣམས་མཐུན་པར་ས་ག་ཟླ་བའི་ཚེས་བརྒྱད་ལ་སངས་རྒྱས་པར་བཞེད་པ་དང་། རྒྱ་དཀར་གྱི་སློབ་དཔོན་དཱ་རི་ཀ་སོགས་མ་རྒྱུད་སྨྲ་བ་པོས་ནི་མར་ངོའི་ཚེས་བཅུར་སངས་རྒྱས་པར་འདོད་པ་དག་ཀྱང་ཤེས་པར་བྱ་དགོས་ལ། འདིར་བཤད་པ་ནི་དཔལ་མཆོག་དང་པོའི་སངས་རྒྱས་ཀྱི་རྒྱུད་འགྲེལ་འཕགས་པ་སྤྱན་རས་གཟིགས་ཀྱི་མཛད་པའི་དགོངས་པ་སྟེ། དེ་ཡང་དྲི་མེད་འོད་ཀྱི་དབང་ལེའུ་ཡི་སྐབས་སུ། འཕགས་པའི་ཡུལ་འདིར་དཀར་པོའི་ཚེས་གཅིག་ལ་སོགས་པ་ཆ་བཅོ་ལྔའི་མཐར་ནག་པའོ་ཚེས་གཅིག་འཇུག་པ་ས་ག་ཉའི་སྐྱ་རེངས་འཆར་བའི་ཚེ་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ཏེ་ཞེས་དང་།
སྔགས་གཞུང་ཁྱད་པར་ཅན་གཞན་ནས་ཀྱང་འབྱུང་ལྟར་རོ། །དེ་ལྟར་སངས་རྒྱས་ནས་ཞག་བདུན་ཕྲག་བདུན་འདས་པ་ན་ཚངས་པ་ཆེན་པོས་གསོལ་བ་བཏབ་བཞིན་ཡུལ་ཝ་ར་ཎ་སིར་བདེན་པ་བཞི་ཡི་ཆོས་ཀྱི་འཁོར་ལོ་དང་པོར་བསྐོར་ཞིང་། དེ་ནས་རིམ་པར་བྱ་རྒོད་ཕུང་པོའི་རིར་བཀའ་བར་མ་མཚན་ཉིད་མེད་པ་ཤེས་རབ་ཀྱི་ཕ་རོལ་ཕྱིན་པ་དང་། གསུམ་པ་མ་ལ་ཡ་དང་གྱད་ཀྱི་ཡུལ་ལ་སོགས་པའི་གནས་སྣ་ཚོགས་པར་ཕྱིར་མི་ལྡོག་པ་ངེས་དོན་སྙིང་པོའི་ཐེག་པ་སྟེ་གདུལ་བྱའི་དབང་པོ་དང་འཚམས་པར་འཁོར་ལོ་རིམ་པ་གསུམ་དུ་བསྟན་པར་མཛད་པ་ཡིན་ལ། འཁོར་ལོ་གསུམ་གསུངས་པའི་ལོ་འདི་ཙམ་ཞེས་དམ་པ་འགའ་ཞིག་གིས་གྲངས་ནས་སྨོས་ཀྱང་རྣམ་པ་ཙམ་ལས་ཇི་བཞིན་དཔག་པར་དཀའ་ཞིང་། སྤྱིར་ཡང་ཐེག་པའི་གོ་རིམ་ལས་དུས་སྔ་ཕྱི་ཁོ་ནར་ཡང་འདོད་མི་ནུས་ཏེ་གཞན་དུ་བཤད་པར་བྱའོ། །དེ་ལྟར་ཐེག་པ་གསུམ་བསྟན་པར་མཛད་དེ། དེ་བཞིན་གཤེགས་པ་དགུང་ལོ་བདུན་ཅུ་རྩ་དགུ་བཞེས་ཤིང་། སངས་རྒྱས་ནས་ལོ་བཞི་བཅུ་རྩ་ལྔ་ལ་འཁོད་པ་དགའ་དབང་ཤིང་བྱིའི་ལོ་དཔྱིད་ཟླ་འབྲིང་པོ་ནག་པའི་ཚེས་བཅོ་ལྔར་ལྷོ་ཕྱོགས་ཤྲཱི་དྷཱ་ན་ཀ་ཊ་ཀར་དཔལ་མཆོག་དང་པོའི་སངས་རྒྱས་སོགས་སྔགས་བླ་མེད་ཀྱི་ཐེག་པ་མཐའ་ཡས་པ་གསུང་པ་སྟེ། དེ་ཡང་འཕགས་འགྲེལ་དྲི་མ་མེད་པའི་མདོ་གོང་གི་ལུང་གི་འཕྲོས་སུ། དེ་ནས་ཆོས་ཀྱི་ཐེག་པ་གསུམ་བསྟན་པར་མཛད་ནས་ཟླ་བ་བཅུ་གཉིས་པ་ནག་པའི་ཉ་ལ། ཤྲཱི་དྷཱ་ན་ཀ་ཊར་ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་ཆ་བཅུ་དྲུག་གི་རྣམ་པར་དབྱེ་བའི་མཚན་ཉིད་དང་། དེའི་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་དྲུག་གི་རྣམ་པར་དབྱེ་བ་ཅན་དང་པོའི་སངས་རྒྱས་རྣམ་པར་སྤྲོས་སོ། །ཞེས་དང་། འཕགས་འགྲེལ་དེར་རྩ་བའི་རྒྱུད་ཀྱི་ལུང་དྲངས་པ་ཡང་། བྱ་རྒོད་ཕུང་པོའི་རི་ཆེན་པོར། །ཐེག་པ་ཆེན་པོ་བླ་ན་མེད། །ཤེས་རབ་ཕ་རོལ་ཕྱིན་པའི་ཚུལ། །བྱང་ཆུབ་སེམས་དཔའ་རྣམས་ལ་བསྟན། །དེ་ནས་གཅིག་ཏུ་མཆོད་རྟེན་ཆེར། །ཆོས་ཀྱི་དབྱིངས་ཀྱི་དཀྱིལ་འཁོར་དུ། །དམ་པ་དང་པོ་དཔལ་ལྡན་རྒྱུད། །དཔྱིད་ཟླ་འབྲིང་པོའི་ཉ་ལ་གསུངས། །ཞེས་པ་ལྟར་རོ། །
ཚེས་བཅོ་ལྔའི་ཉིན་ཞག་དེ་ལ་ཡང་བདུད་འཇོམས་འཇིག་རྟེན་གསུམ་ལས་རྣམ་པར་རྒྱལ་བའི་དུས་སྦྱོར་དང་ལྡན་པའི་སྐབས་སུ་སྟེ་ཚུལ་དེ་ནི་དཔལ་ནཱ་རོ་ཏཱ་པས་མཛད་པའི་དབང་མདོར་བསྟན་གྱི་འགྲེལ་པར་རྩ་རྒྱུད་ཀྱི་ལུང་དྲངས་པར་ཡང་། མདུན་གྱི་ཉ་བ་ཟླ་བ་སྟེ། །རྒྱབ་ཀྱི་ཉ་བ་ཉི་མ་ལའོ། །གཡོན་གྱི་མུན་ཅན་གདོང་པ་ལ། །གཡས་ཀྱི་མཇུག་མར་གནས་པ་ན། །འཇིག་རྟེན་གསུམ་ལས་རྣམ་རྒྱལ་བ། །ཞེས་བྱ་བདུད་ནི་འཇོམས་པའི་དུས། །དེར་ནི་སྟོན་པ་ཤར་གྱི་ཞལ། །རིན་ཆེན་སེང་གེའི་ཁྲི་ལ་བཞུགས། །ཞེས་འབྱུང་བ་ཉིད་དོ། །དེས་ན་ཤིང་བྱིའི་ནག་པའི་དྷྲུ་བ་གཟའ་གནས་གཅིག ཚེས་དབྱུག་པོ་བདུན། སྲང་ཉེར་དྲུག རིལ་པོར་བཅོ་བརྒྱད། ཆ་ཤས་དོན་གསུམ། ཉི་སྐར་ཉེར་ལྔ། དབྱུ་གུ་སོ་ལྔ། དེ་ཡི་ཚེས་བཅོ་ལྔའི་རྩིས་ཡན་ལག་ལྔར། ཟླ་སྐར་བཅུ་གཉིས། དབྱུ་གི་ཉེར་ལྔ། ཉི་སྐར་ཉེར་དྲུག དབྱུ་གུ་ལྔ་བཅུ། སྒྲ་གཅན་གདོང་སྐར་ཉི་ཤུ། ཆུ་ཚོད་དང་བདུན། དུས་མེའི་སྐར་མ་བདུན། ཆུ་ཚོད་ཉེར་བདུན་མཆིས་སོ། །འདིར་བསྟན་པའི་རི་མོ་རྣམས་རྩིས་འཕྲོ་ལུགས་གཞན་གྱི་བགྱིར་ཡོད་ཀྱང་འཕྲལ་དུ་ཡིད་ཆེས་སླ་བའི་ཕྱིར་དེང་དུས་གྲགས་ཆེ་བའི་པད་དཀར་ཞལ་ལུང་གི་ལུགས་སུ་བྱས་པ་ཡིན་ནོ། །དེ་ཡི་ཚེ་དེ་བཞིན་གཤེགས་པ་ཤཱཀྱ་སེངྒེ་ཤར་དུ་ཞལ་ཕྱོགས་པའི་མདུན་ཅུང་ཟད་བྱང་ཤར་དུ་ཉེ་བར་ཟླ་བ་སྐུ་རྒྱབ་ནུབ་ལྷོ་ནུབ་ཉེ་བར་ཉི་མ་གཡས་ལྷོ་ཤར་ལྷོར་ཕྱོགས་པའི་དུས་མེ་གཡོན་བྱང་ནུབ་བྱང་ཉེ་བར་སྒྲ་གཅན་གནས་པ་ཉི་མ་ཕྱི་དྲོ་སེང་གེའི་དུས་སྦྱོར་ལ་དཔལ་ལྡན་རྒྱུ་སྐར་གྱི་དཀྱིལ་འཁོར་ཆེན་པོར་མངོན་པར་སྤྲུལ། འཁོར་སངས་རྒྱས་བྱང་སེམས་དཔལ་བོ་མཁའ་འགྲོ་དཔག་ཏུ་མེད་པ་དང་། ལྷ་ཆེན་བཅུ་གཉིས་སོགས་ལྷ་ཀླུ་གནོད་སྦྱིན་འབྱུང་པོའི་ཚོགས་དང་། ཆུ་བོ་སི་ཏའི་བྱང་ཕྱོགས་གྲོང་བྱེ་བ་ཕྲག་དགུ་བཅུ་རྩ་དྲུག་གི་མིའི་འགྲོ་བ་སྐལ་ལྡན་དཔག་ཏུ་མེད་པ་འདུས་པའི་དབུས་སུ་ཕྱག་ན་རྡོ་རྗེའི་སྤྲུལ་པའི་སྐུ་རྒྱལ་པོ་ཟླ་བ་བཟང་པོས་ཞུས་པའི་ངོར་གསུངས་པ་ཡིན་ལ། དེར་རྒྱུད་འདི་མ་ཟད་རྒྱུད་མཐའ་དག་གསུང་ནས་ཕྱག་ན་རྡོ་རྗེ་ལ་གཏད་པ་ཡིན་ཅིང་མི་དང་མི་མ་ཡིན་པ་གྲངས་ལས་འདས་པ་འདོད་པའི་དངོས་གྲུབ་ཐོར་པར་གྱུར། ལོ་དེའི་ཕྱི་མ་དགོངས་ལོ་བརྒྱད་ཅུ་ཉེ་བར་བཞེས་པ་ཁྲོ་བོ་ཞེས་ཤིང་གླང་ས་ག་ཟླ་བའི་ཚེས་བཅོ་ལྔའི་ནམ་གུང་ལ་གྱད་ཀྱི་ཡུལ་རྩྭ་ཅན་དུ་གཟུགས་སྐུ་ཆོས་ཀྱི་དབྱིངས་སུ་ལྷག་མ་མེད་པར་གཤེགས་པར་གྱུར་ཏེ་དེ་ནི་མདོ་སྡེ་མྱང་འདས་ལས་གསལ་བར་གསུང་བཞིན་རང་ལུགས་བཞག་ལ།
རྒྱ་ནག་བསམ་གཏན་མཁན་རྣམས་ཀྱང་ཟླ་ཚེས་མདོ་མྱང་འདས་ཀྱི་འདི་དང་མཐུན་པར་སྣང་ཡང་དེ་བཞིན་གཤེགས་པ་དགུང་ལོའི་ཚད་གཞན་སྤྱི་དང་མི་མཐུན་པར་དོན་དགུ་ངོ་མཐོང་དུ་བྱས་སོ། །ཡང་སྨིན་དྲུག་ཟླ་བའི་ཚེས་བཅོ་ལྔ་ལ་མྱ་ངན་ལ་འདས་པར་བྱས་ཀྱང་མི་འཐད་པ་མེད་ཅིང་ལེགས་པར་བཤད་པའི་ཆ་ཅན་དུ་སྣང་ངོ་། །གཞན་ནི་སྨིན་དྲུག་ཟླ་བའི་ཚེས་བརྒྱད་ནམ་གུང་ལ་ཆོས་ཀྱི་སྐུར་གཤེགས་ཞེས་རྒྱ་གར་གྱི་སློབ་དཔོན་ཚུལ་ཁྲིམས་སྐྱོང་དང་པཎ་ཆེན་ཤཱཀྱ་ཤྲཱི་བཞེད་པ་ཡིན་ལ། བོད་ཀྱི་མཁས་མཆོག་བུ་སྟོན་སོགས་ཀྱིས་ཀྱང་འདི་ཉིད་ཁས་བླང་། ཡང་ཁ་ཅིག་ནས་དཔྱིད་འབྲིང་ཚེས་བཅོ་ལྔ་ལ་མྱ་ངན་ལས་འདའ་བར་བཞེད་པ་དང་། ཁ་ཅིག་ཆུ་སྟོད་ཟླ་བའི་ཚེས་བཅོ་ལྔ་ཡང་ཡིན་པར་འདོད་པ་འབྱུང་ངོ་། །གང་ལྟར་སྟོན་པའི་དགུང་ལོའི་ཚད་ནི་ཐུན་མོང་གདུལ་བྱའི་སྣང་ངོ་ཉིད་དུ་ནི་བརྒྱད་ཅུ་ཁོ་ནར་གསུང་སྟེ་ཐེག་པ་ཆུང་ངུའི་སྡེ་སྣོད་འདུལ་བ་ལུང་ཕྲན་ཚེགས་ལས་ཀུན་དགའ་བོ་དེ་བཞིན་གཤེགས་པ་ནི་ན་ཚོད་བརྒྱད་ཅུ་ལོན་ཏེ་སྐུ་བགྲེས་འཁོགས་གཏུགས་པར་གྱུར་ཏེ་ཞེས་དང་། སངས་རྒྱས་མྱ་ངན་ལས་འདས་པའི་ནུབ་མོར་ཀུན་ཏུ་རྒྱུ་རབ་བཟང་ལ་བཀའ་སྩལ་པ། རབ་བཟང་ངས་ནི་ན་ཚོད་ཉི་ཤུ་དགུ་ལོན་ཏེ། །རབ་ཏུ་བྱུང་ནས་ལོ་གྲངས་ལྔ་བཅུ་ལྷག་གཅིག་ཏུ། །དགེ་བ་གང་ཡིན་ཅི་ཞེས་གསལ་བར་བྱས་གྱུར་ཅིག །ཞེས་གསུངས་པས་ཀྱང་མཚོན་ལ། དེ་བཞིན་ཉན་ཐོས་འཕགས་པ་གནས་བརྟན་ཆེན་པོ་རྣམས་ཀྱི་དབྱར་གནས་གནས་པའི་གོ་རིམ་རྣམ་པར་བཞག་པ་ན། བདག་ཅག་གི་སྟོན་པ་ཤཱཀྱ་ཐུབ་པ་ལོ་བརྒྱད་ཅུ་གནས་པའོ། །ཞེས་དང་། བྱེ་བྲག་བཤད་མཛོད་ལས། རྒྱལ་བ་དེ་ལྟར་བརྒྱད་ཅུ་ལ། །ཐུབ་མཆོག་དམ་པ་མྱ་ངན་འདས། །ཞེས་འབྱུང་བ་དང་། ཐེག་ཆེན་ནས་ཀྱང་དེ་རྣམས་དང་མཐུན་པར་འབྱུང་སྟེ། ཇི་སྐད་དུ་མདོ་སྡེའི་དབང་པོ་གསེར་འོད་དམ་པ་ལས། སྐུ་ཚེ་བརྒྱད་ཅུ་ཞིག་ཐུབ་སྟེ། །ཞེས་དང་། སྙིང་རྗེ་པདྨ་དཀར་པོ་ལས་ཀྱང་། སྐུ་ཚེའི་ལྔ་ཆ་བཏང་བར་བཤད་པ་དང་། གཞན་ཡང་མདོ་སྡེ་མང་པོ་ནས་མཐུན་པར་སྐུ་ཚེའི་ཚད་བརྒྱད་ཅུར་བཤད་པ་སྟེ་དེ་ལྟར་རྒྱུ་ཡི་ཐེག་ཆེན་ནས་དང་། ཐེག་ཆེན་སྔགས་ནས་ཀྱང་། སྒྲོལ་མ་ཀུ་རུ་ཀུལླེའི་རྟོག་པ་ལས། གདུལ་བྱའི་འཇིག་རྟེན་ལ་བརྟེན་ནས། །རྐང་གཉིས་མཆོག་གི་བསྟུལ་ནས་ནི། །ལོ་ནི་བརྒྱད་ཅུར་བཞུགས་མཛད་དེ། །སངས་རྒྱས་རྒྱལ་བའི་གནས་སུ་གཤེགས། །ཞེས་འབྱུང་བས་ན།
རང་ལུགས་སུ་འཇིག་རྟེན་གྲགས་སྡེ་ལྟར་གྱི་དགུང་ལོ་བརྒྱད་ཅུ་ལས་མང་བ་དང་ཉུང་བ་དག་འདོད་པར་མི་བྱའོ། །གཞན་དུས་འཁོར་གསུང་བའི་དུས་ཀྱང་དམ་པ་འགའ་ཞིག་ནས། དྲི་མེད་འོད་ལས་ཟླ་བ་བཅུ་གཉིས་ཞེས་དུས་ཚིགས་ཀྱིས་བསྟན་པར་བརྟེན། སངས་རྒྱས་པའི་ཕྱི་ལོ་དེར་བཞེད་པ་ཡོད་ཀྱང་ལུང་ཚིག་དེ་ནི་རྒྱ་ནག་སོགས་སུ་ཊེའུ་ཡན་སྔོན་གྱི་རྒྱལ་པོ་རྣམས་རང་རང་གི་རྒྱལ་ཐབས་ཐོབ་པའི་ཟླ་བ་དེ་ཟླ་བ་དང་པོར་བཟུང་བ་བཞིན། རྒྱལ་བ་ཡང་ཆོས་ཀྱི་འཁོར་ལོས་བསྒྱུར་བའི་རྒྱལ་ཐབས་མངོན་པར་སངས་རྒྱས་པའི་ཟླ་བ་ཟླ་བའི་དང་པོར་བྱས་བཅུ་གཉིས་པ་ནག་ཟླ་ཇི་སྙེད་པའི་མཐར་དགོངས་པ་ལས། ལོ་དེ་ཡི་ཕྱི་མ་ཁོ་ནར་བཞེད་མི་དགོས་པ་གོང་དུ་བཤད་ལྟར་རྒྱལ་བ་མྱ་ངན་ལས་འདའ་ཉེ་བའི་སྐབས་སུ་བཀའ་ཆེམས་ཀྱི་ཚུལ་དུ་གསུངས་པ་ཉིད་དོ། །དུས་འཁོར་གྱི་འདས་ལོ་ཡང་རྒྱལ་བ་སངས་རྒྱས་པ་སོགས་ནས་མ་ཡིན་པར་སྤྲུལ་པའི་གཟུགས་སྐུ་མི་གནས་ཞི་བ་ཆེན་པོའི་ཚུལ་བསྟན་པ་ནས་བསྒྲང་བ་སྟེ། དེ་ཡང་གོང་དུ་དྲངས་པའི་ལུང་དང་། ཤམྦྷ་ལར་འཇམ་དཔལ་གྱི་ཆོས་བསྟན་པའི་དུས་ལུང་བསྟན་པས་ཀྱང་གསལ་བ་སྟེ། ཇི་སྐད་དུ་ཁམས་ལེའུ་ཡི་འགྲེལ་པར་རྩ་རྒྱུད་ཀྱི་ལུང་དྲངས་པར། ལོ་འདི་ནས་ནི་དྲུག་བརྒྱའི་ལོས། །དྲང་སྲོང་རྣམས་ནི་སྨིན་དོན་དུ། །འཇམ་དབྱངས་མི་བདག་གྲགས་པ་ནི། །ཤམྦྷ་ལ་ཞེས་བྱ་བར་འབྱུང་། །ཞེས་དང་།བསྡུས་རྒྱུད་ཉིད་ལས་ཀྱང་། ལོ་འདི་ནས་ནི་དྲུག་བརྒྱའི་ལོ་ཡི་གསལ་བར་མི་བདག་གྲགས་པ་ཤམྦྷ་ལ་ཞེས་བྱ་བར་འབྱུང་། ཞེས་པ་དང་། ཡེ་ལེའི་འགྲེལ་པར། འཇམ་དཔལ་དབྱངས་ཀྱང་མྱ་ངན་ལས་འདས་ནས་ལོ་དྲུག་བརྒྱ་ནས་འབྱུང་ཞེས་པ་སྟེ། རྒྱུད་དང་རྒྱུད་འགྲེལ་གྱི་ཚིག་ཚད་མས་གྲུབ་པ་ལས་སོ། །ཚུལ་འདི་ལ་རྗེ་རང་བྱུང་ཞབས་ཀྱིས། རྒྱལ་བས་བརྒྱད་ཅུའི་བར་དག་ཏུ། །སེམས་ཅན་རྣམས་ལ་ཆོས་བསྟན་ནས། །དམ་པ་དང་པོའི་དཔལ་ལྡན་རྒྱུད། །དཔྱིད་ཟླ་འབྲིང་པོའི་ཉ་ལ་གསུངས། །ཞེས་གསུངས་པ་ལྟར་རོ། །འདི་ལ་བར་སྐབས་ཀྱི་བསྟན་རྩིས་མཁན་ཁ་ཅིག་མྱ་ངན་ལས་འདས་པའི་ལོ་ཕྱི་མ་ནས་བགྲངས་བ་ཡོད་ཀྱང་མཁས་པ་ཆེན་པོར་གྱུར་པ་རྣམས་མྱ་ངན་ལས་འདས་པའི་ལོ་ཉིད་ནས་བགྲང་བར་མཛད་པས། དེ་ལ་ཇི་སྐད་དུ། རྒྱལ་བ་མྱ་ངན་འདས་པའི་ལོ། །དེ་ནི་འདས་ལོའི་ཐོག་མ་ཡིན། །ཞེས་སྨྲ་བ་འཐད་པ་ཉིད་དེ། འདིར་ཡང་ཚུལ་དེས་རིག་པར་བྱའོ། །
དེ་ལྟར་རྒྱལ་བ་ལོ་བརྒྱད་ཅུ་ལ་མྱ་ངན་འདས་པའི་ཕྱི་ལོ་ཟད་བྱེད་ཞེས་མེ་སྟག་ལོར་འཕགས་ཡུལ་དབུས་འགྱུར་དུ་ཉན་ཐོས་རྣམས་ཀྱི་དབྱར་གནས་པའི་སྐབས་སུ་བཀའི་བསྡུ་བ་དང་པོ་བྱས་ཤིང་། ལྷོ་ཕྱོགས་རི་བོའི་བི་མ་ལ་སྭ་བྷ་ཝར་འཕགས་པ་ཕྱག་ན་རྡོ་རྗེ་དང་། འཇམ་དཔལ་དང་། བྱམས་པ་སོགས་བྱང་ཆུབ་སེམས་དཔའ་འབུམ་ཕྲག་བཅུས་ཐེག་ཆེན་བསྡུས་པ་དང་། དེ་དང་དུས་མཚུངས་པར་བྱང་ཕྱོགས་ཤམྦྷ་ལར། དཔལ་གསང་བའི་བདག་པོ་བཅོམ་ལྡན་འདས་ཕྱག་ན་རྡོ་རྗེ་ཟླ་བ་བཟང་པོས་རྒྱུད་སྟོང་ཕྲག་བཅུ་གཉིས་པ་བྱང་ཆུབ་སེམས་དཔའི་ཚོགས་དང་ལྷ་དང་ཀླུ་ཡི་རྒྱལ་པོ་རྣམས་ཀྱི་དབུས་སུ་ཐུགས་ལས་ཕྱུང་སྟེ་རྒྱུད་བསྡུས་ཤིང་གླེགས་བམ་དུ་ཡུལ་བྱེ་བ་ཕྲག་དགུ་བཅུ་རྩ་དྲུག་སོ་སོའི་སྐད་དུ་བཀོད་པར་མཛད་ཅིང་། རྒྱུ་རིན་པོ་ཆེ་སྣ་ཚོགས་ལས་དུས་ཀྱི་འཁོར་ལོའི་ཐུགས་གསུང་སྐུ་ཡི་དཀྱིལ་འཁོར་ལྷ་ཡི་བཟོ་བོས་འདུ་བྱས་ཏེ་བཞེངས་ཤིང་སྐྱེ་བོ་མང་པོ་དངོས་གྲུབ་མཆོག་ལ་བཀོད། དེ་ཡི་ཕྱི་མ་རབ་བྱུང་མེ་ཡོས་ལ་འཕགས་ཡུལ་དགྲ་བཅོམ་པ་འོད་སྲུང་གི་འཕགས་པ་ཀུན་དགའ་བོ་ལ་བསྟན་པ་ཡོངས་སུ་གཏད་དེ་ལྷག་མ་མེད་པའི་དབྱིངས་སུ་མྱ་ངན་ལས་འདས་ཤིང་། དེ་བཞིན་ཤམྦྷ་ལར་གསང་བའི་བདག་པོ་ཟླ་བ་བཟང་པོས་དཔལ་མཆོག་རྩ་བའི་རྒྱུད་ཀྱི་འགྲེལ་བཤད་སྟོང་ཕྲག་དྲུག་ཅུ་པ་སོགས་དང་བདེ་མཆོག་རྩ་རྒྱུད་ཀྱི་འགྲེལ་པ་སྟོང་ཕྲག་དྲུག་པ་ཡང་ལོ་འདིར་མཛད་པ་སྟེ། བསྟོད་འགྲེལ་གཞུང་ཚིག་རང་གིས་ཀྱང་མཚོན་པར་ནུས་ལ། དེ་ཡང་སངས་རྒྱས་ཀྱི་རྒྱུད་བསྟན་ནས་ཉིན་ཞག་ཁ་ཤས་ཏེ། རྒྱུད་ལས། ཤམྦྷ་ལ་ཞེས་རབ་ཏུ་གྲགས་པའི་ཀཱ་ལཱ་པར་ནི་དཔལ་ལྡན་རྒྱལ་པོ་ཉི་མ་འགའ་ཞིག་གིས། ལྷ་ཡི་དབང་པོ་རབ་མཆོག་མི་ཡི་བདག་པོར་བཞག་ནས་ཁྱོད་ནི་རང་གི་གནས་སུ་འགྲོ་བར་གྱིས། ཞེས་ཉིན་ཞག་ཁ་ཤས་ཀྱི་སྒྲ་ནི་ལོ་གསུམ་ཡིན་པར་གསུང་བ་དང་། འགྲེལ་ཆེན་དྲི་མེད་འོད་ཀྱི་དགོངས་པ་བཞིན་རྩ་རྒྱུད་བསྟན་ནས་ལོ་ཧྲིལ་པོ་གཉིས་ཀྱི་སྐབས་སུ་རྒྱུད་བསྡུས་ཤིང་སངས་རྒྱས་གཤེགས་ནས་ལོ་ཧྲིལ་པོ་གཉིས་རྒྱུད་བསྟན་ནས་ལོ་གསུམ་ལོན་པའི་དུས་རབ་བྱུང་མེ་ཡོས་ལོ་དེར་སྲས་ས་ཡི་སྙིང་པོའི་སྤྲུལ་པ་ལྷ་ཡི་དབང་པོ་ཁྲིར་བཀོད་དེ་གསང་བདག་ཟླ་བ་བཟང་པོ་རང་ཉིད་གང་ནས་འབྱོན་པའི་གནས་ལོངས་སྤྱོད་རྫོགས་པའི་ཞིང་དུ་གཤེགས་སོ། །ཆོས་ཀྱི་རྒྱལ་པོ་ལྷ་དབང་ནི་ས་ཡི་སྙིང་པོ་ཡིན་པར་གསུང་ན་སྲས་ས་ཡི་སྙིང་པོ་ནི་རྡོ་རྗེ་སྙིང་པོ་དང་གཅིག་པར་རྒྱ་བོད་དམ་པ་ཕལ་ཆེ་བས་བཞེད་ཅིང་། དེ་ཡང་ས་ཡི་སྙིང་པོའི་མཚན་བརྒྱ་རྩ་བརྒྱད་ལས། ས་ཡི་སྙིང་པོ་སྙིང་པོ་ཆེ། །རྡོ་རྗེ་སྙིང་པོ་རྣམ་པར་འདྲེན། །ཞེས་གསུངས་པ་ལྟར་སྟེ། དེས་ན་ཀྱཻ་རྡོ་རྗེའི་འགྲེལ་པ་ཡང་ཆོས་རྒྱལ་འདིས་མཛད་དམ་སྙམ་པ་ནི་བདག་གི་རྣལ་འབྱོར་རྟོག་པའོ། །བོད་སྔགས་རྙིང་པའི་གཞུང་རྣམས་སུ་ལག་ན་རྡོ་རྗེའི་མཚན་གྱི་རྣམ་གྲངས་སུ་རྡོ་རྗེ་སྙིང་པོར་ཡང་གསུང་མོད། དེ་ལྟར་ལྷ་དབང་ནས་རིམ་པར་ས་བཅུའི་དབང་ཕྱུག་སོ་སོའི་སྤྲུལ་པའི་སྐུ། གཟི་བརྗིད་ཅན་དང་ཟླ་བས་བྱིན་དང་།
ལྷ་ཡི་དབང་ཕྱུག་དང་། སྣ་ཚོགས་གཟུགས་དང་། ལྷ་ཡི་དབང་ལྡན་ཏེ་དེ་རྣམས་ཀྱི་ལོ་བརྒྱ་ཕྲག་རེ་རེར་ཟླ་བ་བཟང་པོ་བཞིན་རྩ་བཞིན་རྒྱུད་བསྟན་པར་མཛད་དོ། །དེ་ལྟར་ལོ་དྲུག་བརྒྱ་འདས་པ་ན་འཕགས་པ་སྨྲ་བའི་དབང་ཕྱུག་འཇམ་དབྱངས་འཇམ་དཔལ་གྲགས་པ་འཕྲོག་བྱེད་སེངྒེའི་ཁྲིར་འཁོད་དེ་ཆོས་བསྟན་དེ་ལོ་དུ་མས་ལྷག་པའི་བརྒྱ་ཕྲག་གི་བར་ཆོས་རྒྱལ་སྔ་མ་རྣམས་དང་མཐུན་པར་རྩ་བའི་རྒྱུད་གསུང་ཞིང་དེ་ཡི་རྗེས་སུ་ཉི་མའི་ཤིང་རྟ་ལ་སོགས་དྲང་སྲོང་བྱེ་བ་ཕྲག་བྱེད་དང་བཞི་ལ་སོགས་པ་འདུལ་བྱར་གྱུར་པའི་མི་དང་མི་མ་ཡིན་དཔག་ཏུ་མེད་པའི་ངོར་བསྡུས་པའི་རྒྱུད་བསྟན་པ་སྟེ། དེ་ཡང་དྲི་མ་མེད་པའི་མདོ་ལས། འཇམ་དཔལ་རྒྱལ་པོ་གྲགས་པར་གྱུར་ཏེ་བྱང་ཆུབ་སེམས་དཔའ་སེངྒེའི་ཁྲི་དེ་ལ་ཆོས་ལོ་བརྒྱའི་བར་དུ་བསྟན་པར་མཛད་དོ། །དེ་ནས་ལོ་བརྒྱ་རྫོགས་པའི་རྗེས་ལ་དེ་བཞིན་གཤེགས་པས་ལུང་བསྟན་པའི་བྱིན་གྱིས་བརླབས་ཀྱི་སྟོབས་ཀྱིས་དྲང་སྲོང་རྣམས་ཀྱི་ཡོངས་སུ་སྨིན་པའི་དུས་སུ་གཟིགས་ཏེ་ཞེས་སོགས་གསུང་བ་ལས་ཆོས་ལོ་བརྒྱའི་བར་དུ་བསྟན་པར་མཛད་ཞེས་དང་། དེ་ནས་ལོ་བརྒྱ་རྫོགས་པའི་རྗེས་ལ་ཞེས་པ་ནི་ད་ལྟར་སྣང་བའི་གླེགས་བམ་རྣམས་སུ་འགྱུར་ཁྱད་ཙམ་ཡང་མེད་པར་ཐམས་ཅད་མཐུན་ན་རྗེས་ཀྱི་ཚིག་སྒྲས་རྩ་རྒྱུད་བསྟན་ནས་ལོ་བརྒྱ་ཐམ་པའི་སྐབས་སུ་བསྡུས་རྒྱུད་བསྡུས་པ་མ་ཡིན་པ་དང་། དེ་ཡི་རྗེས་ཀྱི་ལོ་གྲངས་ཇི་ལྟར་འོས་པ་ཞིག་ཏུ་བསྡུས་པའི་རྒྱུད་བསྡུས་པ་ཤིན་ཏུ་གསལ་བ་དང་། དེ་བཞིན་རིགས་ལྡན་རྣམས་ཀྱི་ལོ་གྲངས་བརྒྱ་ལ་སོགས་པ་ཡང་སྐུ་ཚེའི་ཚད་མ་ཡིན་པར་ཆོས་བསྟན་པའི་ལོ་གྲངས་སུ་འཕགས་འགྲེལ་གྱི་ལུང་འདིས་གྲུབ་པར་སྣང་ངོ་། །
དོན་དེ་ཡི་རང་བྱུང་ཞབས་ཀྱི་བསྟན་རྩིས་སྐབས་འཇམ་དཔལ་གྱི་ལོ་བརྒྱ་ཕྱུང་ཞེས་དང་། དཔལ་ལྡན་བླ་མ་དམ་པས་རྩ་རྒྱུད་བསྟན་པར་ལོ་བརྒྱ་ལ། བསྡུས་རྒྱུད་བསྟན་པར་ཡང་ལོ་བརྒྱ་འཇུག་པས་འཇམ་དཔལ་གྱི་ཆོས་བསྟན་པ་ལོ་ཉིས་བརྒྱ་ཡིན་ནོ་ཞེས་གསུངས་ཤིང་མཚུར་ཕུ་འཇམ་དབྱངས་པས་ཀྱང་འཇམ་དཔལ་གྱི་དུས་ལོ་བརྒྱ་མཛད་པར་གྲགས་ཏེ་འབྱིན་འཇུག དེ་དག་མི་འཐད་པའི་ཕྱོགས་བཟུང་བ་མང་ཡང་ད་ལྟའི་རྩིས་མཁན་རྣམས་རིགས་ལྡན་རྒྱ་མཚོ་རྣམ་རྒྱལ་དང་རྒྱལ་དཀའི་དགུང་ལོ་ལྷག་པར་རིང་བར་འདོད་པའི་ཕྱོགས་ལས་ནི་འདི་ངོས་ཆེས་འཐད་ཅིང་རིགས་པས་བདག་ཀྱང་དེ་ཡི་ཕྱོགས་དུ་འཇུག་མོད། འོན་ཀྱང་བསྡུས་རྒྱུད་གསུངས་པའི་ཡུན་ལོ་བརྒྱ་རང་སོ་ནི་དོན་གྱི་རྣམ་གྲངས་གཞན་གྱི་དང་འཕགས་འགྲེལ་དུ་ཡང་མ་གསལ་བས་མི་བྱེད་ལ། འདིར་ནི་རྒྱལ་པོ་འཇམ་དཔལ་གྲགས་པས་ཆོས་བསྟན་པའི་ལོ་གྲངས་སྤྱི་དང་མཐུན་པར་ལོ་བརྒྱ་དང་དེ་ནས་ཀྱང་གདུལ་བྱ་དྲང་སྲོང་རྣམས་འདུལ་ཞིང་སྨིན་པའི་དུས་ཀྱི་ཆེད་དུ་ལོ་སུམ་ཅུའི་བར་དུ་བཞུགས་ཏེ་དེ་སྲིད་དུ་རྩ་བའི་རྒྱུད་བསྟན་པར་མཛད་ནས་སོ་གཅིག་པ་དབང་ཕྱུག་མེ་གླང་གི་ལོར་དཔྱིད་སྦོ་ཟླའི་ཉ་ལ་དྲང་སྲོང་རྣམས་དྲག་པོའི་ཚིག་གི་འདུལ་བར་དགོངས་ནས་སྤྱོ་བར་མཛད་ཅིང་། ནག་པ་ཟླ་བར་རྫུ་འཕྲུལ་གྱི་མཐུས་རྗེས་སུ་བཟུང་ནས་ཀ་ལ་པཱ་ཡི་ལྷོ་ཕྱོགས་མ་ལའི་ཚལ་དབུས་སུ་དཀྱིལ་འཁོར་ཆེན་པོར་དབང་བསྐུར་ནས་དཔལ་མཆོག་རྩ་བའི་རྒྱུད་ལས་ཕྱུང་བ་བསྡུས་པའི་རྒྱུད་ལེའུ་ལྔ་པ་བསྟན་པ་དང་།
སྡུད་པ་པོ་ཡང་འཇམ་དཔལ་རང་ཉིད་ཀྱིས་མཛད་ནས་དྲང་སྲོང་རྣམས་ཡུན་རིང་པོར་མ་ཐེགས་པར་ཕྱག་རྒྱ་ཆེན་པོ་གྲུབ་པ་ཡི་ཟླ་བ་དེའི་ཕྱི་མ་ས་གའི་ཉ་ལ་ཡེ་ཤེས་མཆོག་གི་སྐུ་བརྙེས་པར་གྱུར། དེ་ཡི་ཚེ་སྲས་འཇིག་རྟེན་དབང་ཕྱུག་སྤྱན་རས་གཟིགས་ཀྱི་སྤྲུལ་པའི་སྐུ་པདྨ་དཀར་པོ་སེང་གེའི་ཁྲི་ལ་བཀོད་དེ་ཆོས་བསྟན་པར་དབང་བསྐུར་ནས་འཇམ་དཔལ་ཉིད་ཀྱི་ཞིང་ལོངས་སྤྱོད་རྫོགས་པའི་གནས་སུ་གཤེགས་སོ། །དེ་ལྟར་འཇམ་དཔལ་གྱི་ཆོས་བསྟན་པའི་དུས་ལོ་བརྒྱ་ནི་ཆོས་རྒྱལ་ཉིད་དང་། དེ་ཡི་རྗེས་སུ་ཕྱི་རོལ་གྱི་དྲང་སྲོང་རྣམས་འདུལ་བའི་དུས་གཙོ་བོར་གྱུར་ཞིང་ཡོངས་སུ་སྨིན་པའི་དུས་ཀྱི་ཆེད་དུ་སྐུ་ཚེ་ཚད་ཇི་ཙམ་བསྲིངས་པའི་ཡུན་བཅས་རགས་རྩིས་སུ་རིགས་ལྡན་གྱིས་མཛད་པའི་ཁོངས་སུ་བསྡུ་འོས་པར་སྙམ་མོ། །དེ་ནས་སྲས་རིགས་ལྡན་པདྨ་དཀར་པོས་བསྡུས་རྒྱུད་ཀྱི་འགྲེལ་ཆེན་དྲི་མ་མེད་པའི་འོད་སྟོང་ཕྲག་བཅུ་གཉིས་པ་ལ་སོགས་མཛད་ཅིང་ལོ་བརྒྱ་ཡི་བར་དུ་ཆོས་བསྟན་ནས་དེ་ཡི་རྗེས་སུ་ས་བཅུའི་དབང་ཕྱུག་སོ་སོའི་སྤྲུལ་སྐུའི་རིམ་པ་བཞིན་དུ་བཟང་པོ་དང་། རྣམ་རྒྱལ་དང་། བཤེས་གཉེན་བཟང་པོ་དང་། ཕྱག་ན་རིན་ཆེན་དང་། ཁྱབ་འཇུག་སྦས་པ་དང་། ཉི་མ་གྲགས་པ་དང་། ཤིན་ཏུ་བཟང་པོ་དང་། རྒྱ་མཚོ་དང་ནི་རྣམ་རྒྱལ་དང་། རྒྱལ་དཀའ་དང་། ཉི་མ་དང་། སྣ་ཚོགས་གཟུགས་དང་། ཟླ་འོད་དང་། མཐའ་ཡས་དང་། ས་སྐྱོང་དང་། དཔལ་སྐྱོང་དང་། སེང་གེ་དང་། རྣམ་པར་གནོན་པ་དང་། སྟོབས་པོ་ཆེ་དང་། མ་འགགས་པ་དང་། མིའི་སེང་གེ་དང་། དབང་ཕྱུག་ཆེན་པོ་དང་།
མཐའ་ཡས་རྣམ་རྒྱལ་དང་། འཁོར་ལོ་ཅན་ཏེ་གྲགས་པ་ནས་འདིའི་བར་ལ་ཉི་ཤུ་རྩ་ལྔའོ་ཞེས་འགྲོ་བའི་བླ་མ་རབ་དང་དམ་པ་འགའ་ཡི་བཞེད་པ་དང་གཞན་རྒྱ་བོད་ཀྱི་མཁས་གྲུབ་དུ་མ་ཞིག་གི་རིགས་ལྡན་ཉེར་དྲུག་ཏུ་དགོངས་ཤིང་། དེ་ཡང་རྡོ་རྗེ་གདན་ས་བྷོ་ཊ་པཎྜི་ཏ་ཙ་མི་སངས་རྒྱས་གྲགས་ཀྱི་རྒྱ་མཚོ་དང་རྣམ་རྒྱལ་གཉིས་སུ་མཛད་དེ། ཨ་ཛ་རྩོད་པ་བཅུ་གཉིས་པ། ཞེས་རིགས་ལྡན་བཅུ་གཉིས་པ་རྒྱལ་དཀའ་ཡིན་པས་གསལ་ལ། ཚུལ་འདི་ལྔ་བརྒྱའི་གཙུག་རྒྱན་དམ་པ་སློབ་དཔོན་ཆེན་པོ་ཨ་བྷ་ཡ་དང་། རྡོ་རྗེ་གདན་པ་སྔ་མ་རྣམས་ཀྱི་བཞེད་པ་ཡང་ཡིན་པར་གྲུབ། འཕགས་ཡུལ་གྱི་པཎྜི་ཏ་བི་བྷུ་ཏི་ཙནྡས་ལྷ་ཡི་དབང་པོ་དང་དྲག་པོའི་འཁོར་ལོ་གཉིས་སུ་གསུང་ཞིང་། བོད་དུ་རྭ་བ་སོགས་སྐྱེས་བུ་ཆེན་པོ་མང་ཞིག་གིས་ནི་རིགས་ལྡན་མཐའ་ཡས་དང་རྣམ་རྒྱལ་གཉིས་སུ་མཛད་ལ། རྒྱལ་བ་རང་བྱུང་ཞབས་ཀྱིས་ནི། གནམ་སུ་དབྱེ་བ་གང་ཡིན་མི་གསལ་ཡང་རིགས་ལྡན་གྲངས་ཉེར་དྲུག་ཏུ་མཛད་དོ། །དེ་དག་ཀྱང་རྒྱུད་ལས། སུམ་ཅུ་རྩ་གཉིས་གདན་གྱི་མཐར་ནི་ལྷ་མིན་དགྲ་བོ་ཚེ་ལོ་བརྒྱ་པ་ཕྱག་ན་འཁོར་ལོ་འགྱུར། ཞེས་གསུངས་པ་འཁོར་ལོ་ཅན་སུམ་ཅུ་རྩ་གཉིས་པའི་ཁོངས་སུ་བསྡུས་པ་དང་མ་བསྡུས་པའིཁྱད་པར་དང་། གདན་ནི་ཉི་ཤུ་རྩ་ལྔ་པོ་རྣམས་རིམ་པར་ཡོངས་སུ་བགྲངས་པ་དེ་ཡི་ནང་ནས་དུས་ཀྱི་མཐར་ཞེས་པ་ཡང་གདན་ཉེར་ལྔ་པོར་འཇམ་དཔལ་གྲགས་པ་བགྲངས་པ་དང་མ་བགྲངས་པས་དེ་ལྟར་འབྱུང་བ་ཡིན་ལ་རིགས་ལྡན་གྱི་ཐ་མ་ལྷ་ཡི་དབང་པོ་དང་དྲག་པོའི་འཁོར་ལོ་གཉིས་ནི་འཇམ་གྲགས་པ་ལ་སྐུ་ཚེ་སྟོད་ཆོས་རྒྱལ་དང་སྐུ་ཚེ་སྨད་རིགས་ལྡན་དུ་གྲགས་པ་བཞིན་འདི་ལ་ཡང་སྐུ་ཚེའི་སྟོད་དུ་ལྷ་ཡི་དབང་པོ་དང་སྐུ་ཚེ་སྨད་ཀླ་ཀློ་བཅོམ་པ་ན་དྲག་པོའི་འཁོར་ལོ་མཚན་སྒྲོགས་པར་ངེས་སོ། །
གང་ལྟར་པདྨ་དཀར་པོ་ནས་འཁོར་ལོ་ཅན་གྱི་བར་རིགས་ལྡན་ཉི་ཤུ་རྩ་ལྔའམ་རྩ་དྲུག་པོ་དེ་རྣམས་ཐམས་ཅད་ཀྱང་ཕལ་ཆེ་རགས་པར་ལོ་བརྒྱ་བརྒྱ་ཆོས་བསྟན་པར་མཉམ་ཞེས་སྔོན་གྱི་དམ་པ་མཆོག་རྣམས་ཀྱིས་བཞེད་ཅིང་དེ་ལས་ད་ལྟར་རྩིས་མཁན་ཕལ་ཆེ་བས་མེ་མཁའ་རྒྱ་མཚོ་ནི་རྒྱ་མཚོ་རྣམས་རྒྱལ་དང་རྒྱལ་དཀའ་ཡབ་སྲས་ཀྱི་ཆོས་བསྟན་པའི་དུས་ཡིན་གྱི། དེ་ཡང་རིགས་ལྡན་འཇམ་དཔལ་གྲགས་པས་ཆོས་བསྟན་ཟིན་ནས་ལོ་བརྒྱད་བརྒྱ་འདས་པ་ན་མེ་མཁའ་རྒྱ་མཚོ་དབུ་ཚུགས་ཤིང་དེ་ནས་ལོ་བརྒྱ་དང་བརྒྱད་ཅུ་རྩ་གཉིས་ཀྱི་བར་དུ་རིགས་ལྡན་རྒྱ་མཚོ་རྣམ་རྒྱལ་གྱིས་ཆོས་བསྟན་པའི་དུས་དང་། དེ་ནས་ཉིས་བརྒྱ་ཉེར་གཅིག་གི་བར་རིགས་ལྡན་རྒྱལ་དཀས་ཆོས་བསྟན་པ་ཡིན་ལ། དེ་དག་བསྡོམས་པས་གསུམ་གྱི་ལྷག་པའི་བཞི་བརྒྱའི་ལོ་ཚོགས་སུ་འགྱུར་པ་མེ་མཁའ་རྒྱ་མཚོར་བརྗོད་པའོ། །ཞེས་ཇོ་ནང་མཁན་ཆེན་ཕྱོགས་པའི་གསུང་གི་རྗེས་སུ་འབྲང་བ་དང་། ཡང་དུས་འཁོར་བ་བར་སྐབས་ཕལ་ཆེ་བ་དང་། ད་ལྟ་ཡང་ཁ་ཅིག་གི་ནི་འཇམ་དཔལ་གྱི་དུས་རྫོགས་པ་ནས་ལོ་བརྒྱད་བརྒྱ་འདས་པ་ཡན་མཐུན་ལ། དེ་ནས་ལོ་བརྒྱ་རྒྱ་མཚོ་རྣམ་རྒྱལ་གྱིས་ཆོས་བསྟན་པའི་དུས་དང་། དེ་ནས་བརྒྱད་ཅུ་རྩ་གཉིས་རིགས་ལྡན་རྒྱལ་དཀའ་ཡིས་ཆོས་བསྟན་ཅིང་། དུས་དེར་ཉུང་ངུ་བྱེད་པ་མཛད་པ་ཡིན་ལ། དེ་ནས་རྩིས་ལོ་ཉིས་བརྒྱ་ཉེར་གཅིག་པོ་རྒྱལ་དཀའ་ཡིས་ཆོས་བསྟན་པའི་ལོ་ལྷག་བཅོ་བརྒྱད་དང་ཉི་མ་དང་། སྣ་ཚོགས་གཟུགས་ཀྱི་ལོ་གཉིས་ཟླ་འོད་ཀྱིས་ཆོས་བསྟན་ནས་ལོ་གསུམ་འདས་པ་སྟེ། དེ་ནས་རབ་བྱུང་དང་པོར་ཚུགས་པར་འདོད་ཅིང་དེ་ལ་རང་རང་གི་ཐུགས་བཞེད་བཞིན་འགྲེལ་ཆེན་གྱི་ཚིག་ཀྱང་དེ་ཡི་རྒྱབ་སྐྱོར་དུ་འདྲེན་ནོ། །ལུགས་དེ་གཉིས་ཀྱི་རབ་བྱུང་བཅུ་གཉིས་པའི་ནང་འདིར་སྔ་མས་མེ་ལུག་ལོར་རིགས་ལྡན་རྣམས་གནོན་ཁྲིར་ཕེབས་པར་འདོད་པ་ཡི་ད་ལྟ་ལོ་བཅོ་ལྔ་ལོན་པ་དང་ཕྱི་མས་ཤིང་འབྲུག་ལོ་རིགས་ལྡན་མ་འགགས་པ་ཁྲིར་འཁོད་པར་བྱས་པས་དེ་ནས་ལོ་བཅོ་བརྒྱད་ད་ལྟའི་ལྕགས་བྱ་ཡན་ལ་སོང་ངོ་། །
ཡང་མེ་མཁའ་རྒྱ་མཚོ་ལ་ལག་པ་གདེངས་ཅན་ཟླ་བས་སྦྱངས་པའི་དགོས་པ་ནི་མཁས་པར་གྱུར་པ་ཁ་ཅིག་གི་ལོ་མཚམས་དེར་སྤྱིར་འདས་ལོ་ཉུང་བའི་སླད་དང་ལོ་ཚོགས་སྔ་མའི་ཟླ་བཤོལ་གནས་དེར་སྟོང་པ་དང་གསལ་བཞག་ཚོལ་ཚེ་རི་མཁའ་རི་ཡི་ལྷག་དང་ཆུ་རོའི་ལྷག་མ་རྣམས་སྟོང་བས་དེ་ནས་བརྩམ་ན་སླ་བ་ལ་དགོངས་སོ་སྨྲ་ཡང་། དེ་ནི་བྱེད་པའི་རྩིས་འཕྲོ་ཉི་ཚེ་ཁོ་ནར་དཔྱད་དེ་བཞག་པར་སྣང་ལ། རང་ལུགས་ནི་རྩིས་འཕྲོ་དང་བཅས་པར་ཞིབ་ཏུ་དཔྱད་དེ་མཐའ་ཆོད་རྒྱས་པར་སླད་གཞན་དུ་འཆད་པར་འགྱུར་ལ། འདི་རུ་རང་ལུགས་ཀྱི་མེ་མཁའ་རྒྱ་མཚོའི་དུས་ཀྱི་ངེས་པ་རེ་ཞིག་འདི་ལྟར་སྟེ། རིགས་ལྡན་ཆེན་པོ་འཇམ་དཔལ་གྲགས་པ་ལོངས་སྤྱོད་རྫོགས་སྐུའི་ཞིང་དུ་གཤེགས་ནས་ལོ་བདུན་བརྒྱ་འདས་པ་བརྒྱད་བརྒྱ་པའི་དབུས་དམར་སེར་ཅན་མེ་མོ་སྦྲུལ་ལ་རིགས་ལྡན་ཤིན་ཏུ་བཟང་པོ་སེང་གེའི་ཁྲིར་འཁོད་ཅིང་། དེ་ནས་ལོ་ཉི་ཤུ་རྩ་བདུན་ལོན་པ་ཉི་སྒྲོལ་བྱེད་ཤིང་སྤྲེལ་ལོར་རྒྱ་དཀར་ནུབ་ཕྱོགས་སུ་ཀླ་ཀློ་ཞུགས་ཤིང་མེ་མཁའ་རྒྱ་མཚོའི་དབུ་ཚུགས། དེ་ནས་ལོ་བདུན་ཅུ་རྩ་གསུམ་འདས་པ་གསེར་འཕྱང་མེ་མོ་བྱ་ལ་རིགས་ལྡན་རྒྱ་མཚོ་འཕྲོག་བྱེད་ཁྲིར་འཁོད་ནས་ལོ་བརྒྱའི་བར་དུ་ཆོས་བསྟན་པར་མཛད། དེར་རྗེས་སུ་དབང་ཕྱུག་མེ་མོ་གླང་ལོར་རིགས་ལྡན་རྣམ་པར་རྒྱལ་བ་དང་དམར་སེར་མེ་སྦྲུལ་ལ་རྒྱལ་དཀའ་འམ་མ་ཕམ་པ་སྡེ་ཀུན་ནས་ལོ་བརྒྱ་རེ་ཆོས་བསྟན་པ་སྤྱི་ལྟར་ལས་མ་ཕམ་པས་ཆོས་བསྟན་ནས་ལོ་བདུན་ཅུ་འདས་པ་ད་ལྟ་སྐར་རྩིས་མཁན་ལ་གྲགས་ཆེ་བའི་རབ་བྱུང་དང་པོ་ཚུགས་པ་ཡིན་ལ། དེ་ནས་ལོ་སུམ་ཅུ་སོང་བ་མེ་གླང་ལ་མ་ཕམ་པའི་སྲས་རིགས་ལྡན་ཉི་མ་ཁྲིད་འཁོད་དེ་ཆོས་བསྟན་པའི་དབུ་ཚུགས་ཏེ། དེ་ནས་ད་ལྟ་ལ་ཐུག་གི་བར་རབ་བྱུང་བཅུ་གཅིག་འདས་བཅུ་གཉིས་པའི་སྟེང་ནས་བློ་ངན་ཞེས་ལྕགས་བྱ་ཡན་ལྔ་བཅུ་རྩ་ལྔ་སོང་ཞིང་། རྔ་ཆེན་ཆུ་ཁྱི་འདི་ཉིད་ལྔ་བཅུ་རྩ་དྲུག་པའི་སྟེང་དུ་གནས་པ་སྟེ་ཁྱོན་རབ་བྱུང་བཅུ་གཉིས་ལྕགས་བྱ་ཡན་གྱི་ལོ་ཚོགས་གཅིག་ཏུ་བསྡོམ་པས་ལོ་བདུན་བརྒྱ་དང་ཉག་མ་བཅོ་ལྔ་སོགས་ལ། དེ་སྟེང་ཆུ་ཁྱི་སོགས་ལོ་ལྔ་བསྣན་པས་རབ་བྱུང་བཅུ་གཉིས་རྫོགས་ནས་བཅུ་གསུམ་པ་སླེབ་པ་ཡིན་ནོ། །དེ་ལྟར་རབ་བྱུང་བཅུ་གཉིས་ཀྱི་ལོ་ཚོགས་གྲངས་ཀྱི་རིགས་པ་དང་། སྐྱེས་བུ་ཆེན་པོ་ལྷའི་མིག་བརྙེས་ཤིང་ཡེ་ཤེས་ཀྱི་གཟིགས་པ་ཅན་གྱི་གསུང་བསྒྲོས་ཀྱི་ཆ་ལས་བྱུང་བདེ་འབྱུང་གནས་ཆ་བསགས་ཀྱི་ཕོ་བྲང་སེང་གེའི་གདན་ལ་རིགས་ལྡན་ཉི་མ་ནས་སྣ་ཚོགས་གཟུགས་དང་།
ཟླ་བའི་འོད་དང་མཐའ་ཡས་དཔལ་སྐྱོངས་དང་དྲུག་གི་བརྒྱ་བརྒྱར་ཆོས་བསྟན་ཟིན་ནས། ད་ལྟ་རིགས་ལྡན་ཆེན་པོ་སེང་གེས་ཆོས་བསྟན་ནས་ལོ་བརྒྱད་ཅུ་རྩ་ལྔ་འདས་པའི་སྐབས་ཡིན་ཞེས་རང་ལུགས་སུ་རྣམ་པར་བཞག་པར་དེང་དུས་ཀྱི་བསྟན་རྩིས་མཁན་གྲགས་ཆེ་བ་དག་གི་འདོད་པ་དང་རིགས་ལྡན་ཉི་མ་ཕྱིན་གྱི་ཆོས་བསྟན་པའི་དུས་ལོ་སུམ་ཅུའི་སྔ་ཕྱི་ཙམ་ལས་ཧ་ཅང་གི་འགལ་བ་ཅན་ཡང་མ་ཡིན་མོད། འོན་ཀྱང་འདི་ལ་ཅུང་ཟད་ཞིབ་མོར་བགྱིད་དགོས་པ་ཡང་ཡོད་པས་སླད་ནས་སྤྲོ་བར་བྱའོ། །ཡང་བཅོམ་ལྡན་འདས་འཇམ་དཔལ་གྱིས་བསྡུས་པའི་རྒྱུད་ཀྱི་རྒྱལ་པོ་ཆེན་པོར། ལྷ་མིན་གྱི་འཇུག་པ་ཀླ་ཀློའི་གནས་ཚད་དུབ་སྦྱོར་གྱི་དབུགས་ཀྱི་གྲངས་དང་མཉམ་པར་ལོ་སྟོང་དང་བརྒྱད་བརྒྱར་གསུང་ནས་ལོ་དེ་ཡི་སྟེང་ནས་སྔོན་ཆད་ལོ་སྟོང་དང་ཆིག་བརྒྱ་ཉག་བཅོ་བརྒྱད་འདས་ཤིང་། ད་དུང་ལོ་དྲུག་བརྒྱ་དང་བརྒྱད་ཅུ་རྩ་གཉིས་ཡོད་དོ། །དེ་ཡི་མཐར་སླར་ཡང་འཇམ་དཔལ་དབྱངས་ཀྱི་སྤྲུལ་པའི་སྐུ་རིགས་ལྡན་ཆེན་པོ་ལྷ་ཡི་དབང་པོའམ་དྲག་པོའི་འཁོར་ལོ་ཅན་གྱི་ལྷ་མིན་ཀླ་ཀློ་མཐའ་དག་འཇོམ་པར་བྱས་ཏེ་འཛམ་གླིང་ཆུང་ངུ་འདི་ཉིད་རྫོགས་ལྡན་ལ་བཀོད་པར་མཛད་པ་རྒྱུད་ལས་ཇི་ལྟར་གསུང་བཞིན་ཉིད་དོ། །དེ་ཡི་ཚུལ་ཞིབ་པར་ས་བོན་ཙམ་སྔར་གཞན་དུ་བཀོད་པ་ཟིན་པ་སླད་ནས་ཀྱང་འཆད་པར་འགྱུར་བ་ལས་ཤེས་སོ། །དེ་ལྟར་རང་ལུགས་ཀྱི་བསྟན་རྩིས་གནད་རྣམས་གསལ་བར་ཉུང་ངུའི་ངག་གི་བཤད་ཟིན་སྟེ་ཚུལ་འདི་ལ་རྣམ་པར་དག་པའི་ཡོན་ཏན་ཡན་ལག་བརྒྱད་དང་གསུམ་བཅས་ལྡན་པ་སྟེ། དེ་ཡང་ཟོར་ཡང་བའི་ཕྱིར་བསྡུས་དོན་ཚུལ་དུ་ཚིགས་སུ་བཅད་དེ་བརྗོད་པ་ནི། འདི་སྐད་ཅེས་བྱ་སྟེ། ཀུན་ཁྱབ་འགྲོ་བའི་ཉི་མ་དཔེ་མེད་པ། །ལྷ་ཆེན་ཀུན་གྱི་སྤྱི་བོའི་ནོར་བུ་ཡི། །ཉིན་རེ་བཞིན་དུ་ཞབས་ཀྱི་པདྨོ་ལ། །ཉེར་བསྙེན་ལྷ་ཡི་ལྷར་གྱུར་བཅོམ་ལྡན་འདས། །མ་འདྲིས་ཡོངས་ཀྱི་བཤེས་གྱུར་རྫོགས་སངས་རྒྱས། །ཤཱཀྱ་ཏོག་གྱུར་དོན་ཀུན་གྲུབ་པ་ཉིད། །དགའ་ལྡན་གནས་ནས་གཟིགས་པ་རྣམ་པ་ལྔས། །སྒྱུ་འཕྲུལ་ཆེན་མོའི་ལྷུམས་སུ་ཞུགས་པའི་དུས། །རྒྱ་ཆེར་རོལ་པའི་དགོངས་པ་ཇི་བཞིན་པར། །ས་ག་ཟླ་བའི་རྒྱལ་ནུབ་དུས་སྦྱོར་དང་། །སླར་ཡང་བཅུ་གཉིས་ལ་ཉེ་ཟླ་བའི་མཐར། །སྐུ་བལྟམས་ལུགས་མཐུན་ཡན་ལག་དང་པོར་གྲུབ། །བལྟམས་པའི་ཟླ་བ་དཔྱིད་ཐ་དུས་ཚེས་བརྒྱད། །འདུལ་བའི་ལུང་དང་མྱ་ངན་འདས་མདོར་གསུངས། །འཁྲུངས་སྐར་རྒྱལ་དུ་རིན་ཆེན་ཏོག་ལས་བཤད། །མངོན་སུམ་འདིར་འཆར་ཡན་ལག་གཉིས་པར་ཡིན། །ཁྱིམ་ནས་ཁྱིམ་མེད་རབ་ཏུ་བྱུང་བའི་དུས། །ནམ་གུང་རྒྱུ་སྐར་རྒྱལ་འཆར་དེ་ཡི་ཚེ། །ཕྱོགས་བཅུའི་སངས་རྒྱས་རྣམས་ལ་ཕྱག་མཛད་པ། །ཇི་བཞིན་གསལ་བྱེད་ཡན་ལག་གསུམ་པར་གྱུར། །རྫོགས་སངས་རྒྱས་དུས་ཟླ་བ་སྒྲ་གཅན་གྱི། །ནམ་གྱི་གུང་ཟིན་ཐོ་རངས་སྐབས་སུ་གྲོལ། །རྣམ་པར་དག་པ་རི་མོའི་ལམ་ཉིད་ནས། །འདི་རུ་གསལ་འཆར་ཡན་ལག་བཞི་པའོ། །དུས་འཁོར་གསུང་ཚེ་གཟའ་བཞི་གནས་པའི་ཚུལ། །ནཱ་རོ་པས་མཛད་མདོར་བསྟན་འགྲེལ་པ་རུ། །དུས་འཁོར་རྩ་རྒྱུད་ལུང་ཚིག་དོན་ཇི་བཞིན། །འཁྲུལ་མེད་འདིར་མཆིས་ཡན་ལག་ལྔ་པ་ཡིན། །ཉན་ཐོས་དབྱར་གནས་གྲངས་དང་ཐེག་ཆེན་མདོ། །དུ་མ་དགོངས་དོན་མཐུན་པར་ཐུན་མོང་ངོར། །ཐུབ་དབང་དགོངས་ལོ་བརྒྱད་ཅུར་གསུང་པ་ཉིད། །འཕྲི་བསྣན་མེད་འགྲིག་ཡན་ལག་དྲུག་པར་སེམས། །བསླད་མེད་རྫོགས་ཆེན་བབ་ལུགས་རྒྱུད་གཞུང་དང་། །བསྟན་བཅོས་ཀུན་མཐུན་སངས་རྒྱས་མྱང་འདས་སོ། །ཤིང་མོ་གླང་ཉིད་ངེས་པར་བརྟན་པོར་མཛད། །ཇི་བཞིན་འདིར་འབབ་ཡན་ལག་བདུན་པ་ཡིན། །འདས་ལོའི་གྲངས་ཀྱང་སྔོན་གྱི་དུས་འཁོར་མཁན། །ཕལ་ཆེ་ཉིད་དང་ཁྱད་པར་རྒྱལ་བ་ཡི། །རྣམ་འཕྲུལ་ཤིང་རྟའི་སྲོལ་འབྱེད་བཞེད་པ་སྟེ། །རང་བཟློག་མ་བསླད་ཡན་ལག་བརྒྱད་པར་ངེས། །དེ་ལྟར་བསྟན་རྩིས་རྣམ་པར་དག་པ་ཡི། །ཡོན་ཏན་ཡན་ལག་བརྒྱད་དང་ལྡན་གྱུར་པ། །འདི་ལྟ་གཟུར་གནས་བློ་ལྡན་འགའ་ཡོད་ན། །ཡིད་ཆེས་སྐྱེ་བའི་གནས་སུ་བདག་གིས་བརྗོད། །དེ་ཚེ་རྒྱལ་བའི་བསྟན་འདིར་ལོ་ཡི་གྲངས། །ཅི་ཙམ་སོང་ཞེས་རྟོག་ན་འདི་ལྟ་སྟེ། །སངས་རྒྱས་ལྷུམས་སུ་བཞུགས་ནས་ད་ལྟའི་བར། །མི་ལོ་ཉིས་སྟོང་དྲུག་བརྒྱ་ང་བདུན་སོང་། །བཀྲ་ཤིས་ལུམ་བིའི་ཚལ་དུ་སྐུ་བལྟམས་ནས། །གཉིས་སྟོང་དྲུག་བརྒྱ་ལྔ་བཅུ་རྩ་དྲུག་ལོན། །གང་གི་བདུད་རྩི་བརྙེས་ཤིང་ཆོས་འཁོར་ལོ། །བསྐོར་ནས་ཉིས་སྟོང་དྲུག་བརྒྱ་ཉེར་གཉིས་སོང་། །ལྷོ་ཕྱོགས་སོ་བ་བརྩེགས་པའི་མཆོད་རྟེན་དུ། །དུས་འཁོར་རྩ་རྒྱུད་སྟོང་ཕྲག་བཅུ་གཉིས་སོང་། །གསང་བདག་ཟླ་བ་བཟང་པོའི་ངོར་གསུངས་ནས། །མི་ལོ་ཉིས་སྟོང་ལྔ་བརྒྱ་དོན་བརྒྱད་ཡིན། །རྩ་ཅན་གྱད་ཀྱི་ཡུལ་དུ་རྒྱལ་བ་ཡི། །གཟུགས་སྐུ་ཆོས་ཀྱི་དབྱིངས་བསྡུས་གདུལ་བྱའི་དོན། །ཡུང་འབྲུ་ལྟ་བུའི་སྐུ་གདུང་རྒྱས་གྱུར་པ། །དེ་ནས་ཉིས་སྟོང་ལྔ་བརྒྱ་དོན་བདུན་འདས། །རྒྱལ་བ་ཞིར་གཟིམས་རྗེས་སུ་སྲས་སློབ་འཕགས། །རྣམ་མང་བྱོན་ཚུལ་གཞན་དུ་ཡོངས་ཤེས་བྱ། །ཐུབ་ཆེན་ཞིར་གཤེགས་ལོ་བརྒྱད་ཆུ་སྤྲེལ་སྟེང་། །རྒྱལ་ཀུན་གསུང་གི་རྡོ་རྗེ་འོད་དཔག་མེད། །པདྨ་འབྱུང་གནས་ཨོ་རྒྱན་ཡུལ་བལྟམས་པར། །སྔགས་རྙིང་བསླད་མེད་གཞུང་ཀུན་མཐུན་པར་མཐོང་། །དེ་བཞིན་ཐུབ་པ་གཤེགས་ནས་ལོ་ཉེར་བརྒྱད། །ལོན་ཚེ་སྐལ་ལྡན་རྒྱལ་པོ་ཛཿཞེས་པར། །གསང་བདག་མཐུ་ཡི་རིག་པ་འཛིན་སྡེ་སྣོད། །ཏནྟྲ་གླེགས་བམ་ལེགས་པར་བབ་པ་ཡིན། །རྒྱལ་བ་ཞིར་གཟིམས་སུམ་བརྒྱ་དྲུག་ཅུའི་ལོ། །ཤིང་ལོ་གླང་ལ་དྷཱ་ན་ཀོ་ས་རུ། །ལྷ་བུ་སེམས་ལྷག་ཅན་ཞེས་མི་ཕམ་མགོན། །རྫོགས་ཆེན་སྟོན་པ་དགའ་རབ་རྡོ་རྗེ་ཉིད། །འཁྲུངས་པར་བསླད་མེད་སྙིང་ཐིག་བས་གཞུང་ཀུན། །མཐུན་པས་འཁྲུལ་པའི་དྲི་མ་ནམ་ཡང་མེད། །སངས་རྒྱས་གཤེགས་ནས་བཞི་བརྒྱ་ཐམ་པའི་ལོར། །སངས་རྒྱས་ཉིད་མཚུངས་དཔལ་མགོན་ཀླུ་སྒྲུབ་འཁྲུངས། །དེ་ནས་བརྩམས་ཏེ་ཐེག་ཆེན་སློབ་དཔོན་ནི། །འཛམ་གླིང་རྒྱན་དྲུག་གྲགས་རྣམས་རིམ་པར་བྱོན། །འདས་ལོ་ལྔ་བརྒྱའི་སྟེང་གནས་ཤིང་སྤྲེལ་ལོར། །འབྲས་བུ་སྔགས་ཀྱི་སྟོན་པ་རྡོ་རྗེ་འཆང་། །རྡོ་རྗེ་ཐོད་འཕྲེང་མཚོ་གླིང་པདྨའི་དབུས། །བྱོན་ཞེས་རིག་འཛིན་གདུང་བསྒྲུབ་རྒྱུད་ནས་གསུངས། །འདས་ལོ་བདུན་བརྒྱ་ལོན་རྗེས་ཤམྦྷར། །འཇམ་དཔལ་དབྱངས་ཀྱི་ཉི་མའི་ཤིང་རྟའི་ངོར། །དུས་འཁོར་རྩ་བའི་རྒྱུད་ལས་བསྡུས་རྒྱུད་བསྡུས། །ལོ་དེ་ཉིད་ལ་ལོངས་སྐུའི་ཞིང་དུ་གཤེགས། །འཇམ་དཔལ་གཤེགས་ནས་མི་ལོ་བདུན་བརྒྱ་དང་། །ཉེར་བདུན་འདས་པ་ཤིང་ཕོ་སྤྲེལ་གྱི་ལོར། །བྱེད་ལོ་མེ་མཁའ་རྒྱ་མཚོ་ཟུག་དེ་ནས། །ད་བར་ཆིག་སྟོང་ཆིག་བརྒྱ་བཅོ་བརྒྱད་སོང་། །དེ་ཡི་ནང་ཚན་རབ་བྱུང་དང་པོ་ནས། །ད་ལྟ་རབ་བྱུང་བཅུ་གཉིས་པ་ཡི་ནང་། །བློ་ངན་ལྕགས་བྱ་ཡན་ཆོད་འདས་པའི་ལོ། །བརྒྱ་ཕྲག་བདུན་དང་ཉག་མ་བཅོ་ལྔ་ལོན། །རྔ་ཆེན་ཆུ་ཁྱི་འཆར་བ་འདི་ལ་སོགས། །རིམ་པས་སྔ་མའི་ལོ་ལ་བསྣན་བྱས་ཏེ། །ཚུལ་དེས་རྒྱལ་བསྟན་ལྔ་སྟོང་གནས་ཞེས་ན། །གཉིས་སྟོང་བཞི་བརྒྱ་ཉི་ཤུ་རྩ་གསུམ་ལྷག །གལ་ཏེ་མདོ་སྡེ་ཟླ་སྙིང་ལུང་ལྟར་ན། །མ་འོངས་གནས་ཚད་བཞི་བརྒྱ་ཉེར་གསུམ་གྱུར། །འོན་ཀྱང་ཟླ་སྙིང་དགོངས་པ་སྒང་ལོ་དང་། །ལྔ་སྟོང་ཕྱེད་ལོར་བྱས་ན་ཕལ་ཆེར་མཚུངས། །དེང་སང་སྙིགས་མའི་ངང་ཚུལ་ཆེས་ངོམས་འདི། །ལྔ་སྟོང་ཕྱེད་ལོར་མཛད་པ་ཉིད་དུ་དགོས། །འོན་ཀྱང་སྐྱེ་རྒུའི་བདག་མོ་རབ་བྱུང་བས། །ཐུབ་བསྟན་ལྔ་བརྒྱ་ནུབ་སྔའི་རྒྱུར་གསུང་ཡང་། །བསྟན་འདིར་མངོན་པར་སྤྱོད་པ་གསང་སྔགས་ཀྱི། །རིག་འཛིན་ཚོམ་བུ་འབུམ་ཕྲག་ཆེས་མང་པོ། །བྱུང་བའི་མཐུ་ལས་རྒྱལ་བསྟན་རིན་ཆེན་ཡང་། །ལྔ་བརྒྱ་ཕྲག་གཅིག་རིང་དུ་བསྲིང་འགྱུར་ཞེས། །རྣམ་དག་ཚད་ཐུབ་ལུང་ལས་གསལ་འབྱུང་ན། །དེ་ཚེ་ལྔ་སྟོང་ལྔ་བརྒྱ་ཡོངས་སུ་རིགས། །དུས་འཁོར་བསྟན་པ་སྔ་མའི་གནས་ཚད་ལ། །ལྷག་མ་རགས་རྩིས་བདུན་བརྒྱ་ཙམ་དུ་མཐོང་། །དེ་མཐར་ལྷ་ཡི་དབང་ཞེས་འཁོར་ལོ་ཅན། །སེང་ཁྲིར་ཆོས་བསྟན་དགོངས་ལོ་ལྔ་བཅུ་པ། །ཟད་བྱེད་ལོ་མཐར་དྲག་པོའི་དཔུང་བཅས་ཀྱིས། །ངན་འགྲོ་ལྷ་མིན་ཀླ་ཀློ་བཅད་མཛད་ནས། །འཛམ་གླིང་སྐྱེ་དགུའི་འགྲོ་ལ་རྫོགས་ལྡན་གྱི། །དགའ་སྟོན་བཟང་པོ་འགྱེད་པའི་དབུ་བརྩམས་ཤིང་། །བླ་མེད་སྔགས་བསྟན་འགའ་ཡང་གསལ་བར་བྱེད། །ཀླ་ཀློ་བཅོམ་ནས་འཁོར་ལོ་ཅན་འཁོར་བཅས། །རང་གནས་ཀཻ་ལ་ཤ་རུ་གཤེགས་བྱས་ཏེ། །མི་ལོ་ལྔ་བཅུའི་མཐའ་རུ་རིགས་ལྡན་གྱི། །བྱིན་གྱིས་བརླབས་པས་འཁོར་ན་གནས་པ་ཡི། །མི་དང་མི་མ་ཡིན་པའི་ཚོགས་རྣམས་ཀུན། །ཚོམ་བུའི་ཚུལ་དུ་ཕྱག་ཆེན་མཆོག་གྲུབ་འགྱུར། །ཚུལ་འདི་ལ་ཡང་མེ་མཁའ་རྒྱ་མཚོའི་ཡུན། །རྒྱལ་དཀས་རྩིས་གཞི་མཛད་པའི་དུས་ཀྱི་སྒྲར། །འཁྲུལ་ནས་རིགས་ལྡན་གཉིས་ཀྱི་སྐུ་ཚེའི་ཚད། །ནོར་བ་དེ་སྤང་འདི་ནི་དག་ལྡན་ཡིན། །ཡང་ནི་མེ་མཁའ་རྒྱ་མཚོའི་ལོ་ཚོགས་ལ། །ལག་པ་གདེངས་ཅན་ཟླ་བས་སྦྱངས་པའི་དུས། །རྒྱལ་དཀའི་དགོངས་ལོ་གྱ་གཉིས་བཞེད་པ་ཡི། །ཀླ་ཀློའི་གནས་ཚད་སྟོང་དང་བརྒྱད་བརྒྱ་ལ། །རྒྱ་མཚོའི་རྣམ་རྒྱལ་ནས་བརྩོན་དྲག་པོའི་བར། །བརྒྱ་ཕྲག་བཅུ་དྲུག་རིགས་ལྡན་གྲངས་གྲུབ་དེས། །གཉིས་བརྒྱ་མ་ཚང་སྔོན་དུ་དྲག་པོ་བྱུང་། །འགལ་བ་དེ་སྤང་འདི་ནི་དག་ལྡན་ཡིན། །ཀླ་ཀློ་འཇོམས་དུས་ཟད་པ་མེ་སྟག་དང་། །དྲག་པོས་ཆོས་བསྟན་དགུང་ལོ་ལྔ་བཅུ་པར། །རྒྱུད་ནས་གསུང་བཞིན་རང་བཟོས་ཇི་བདེར་སྤྱོད། །དེ་སྤངས་པས་ན་འདི་ནི་དག་ལྡན་ཡིན། །དེ་སྐད་བྱེད་པ་དག་པའི་ལོ་ལས་བརྩམས། །འཁྲུལ་འགལ་རང་བཟོའི་སྐྱོན་སྤང་དག་པ་ཡི། །ཡོན་ཏན་གསུམ་དང་ལྡན་པའི་ལེགས་བཤད་ཀྱང་། །སྐབས་འདི་ཇི་ལྟར་ནུས་དེ་གསལ་བྱས་སོ། །འཁོར་ལོ་ཅན་སྲས་ཚངས་དང་ལྷ་དབང་གི །ས་ཡི་འཁོར་ལོ་རྒྱབ་དང་བདུན་སྐྱོངས་ནས། །ཚེ་ཡང་སྟོང་དང་བརྒྱད་བརྒྱར་གོང་དུ་འཕེལ། །བསྟན་པ་རིན་ཆེན་དེ་ལྷག་མ་ཡང་། །ཆིག་ཁྲི་དགུ་སྟོང་བརྒྱད་བརྒྱའི་བར་གནས་པ། །དཔལ་མཆོག་དང་པོའི་སངས་རྒྱས་རྒྱུད་ཆེན་དང་། །དོན་ཡོད་ལྕགས་ཀྱུས་ཆ་བསགས་འཇུག་པར་གསུངས། །དེ་ལྟར་རྒྱལ་བསྟན་གནས་གྱུར་དུས་ངེས་པ། །རྣམ་པར་དག་འདི་སྔོན་ནས་གྲུབ་པ་ཉིད། །དམ་པ་རྣམས་ནས་ལེགས་པར་མཁྱེན་བཞིན་དུ། །བདག་གི་ལས་ཀྱི་བགོ་སྐལ་འཇོག་པར་ཤེས། །དེ་ཡང་རྫོགས་སངས་རྒྱས་དངོས་ཆོས་ཀྱི་རྗེ། །དཔལ་མགོན་བླ་མའི་བྱིན་རླབས་ཁོ་ན་ལས། །བདག་བློའི་སྟོབས་ཀྱིས་གཞལ་བ་མ་ཡིན་ན། །འཁྲུལ་བའི་དྲི་མ་རབ་ཏུ་ཉུང་བར་ངེས། །འདི་བཞིན་གཞན་གྱི་གསལ་བྱས་མ་མཐོང་བས། །སྔོན་མེད་ལེགས་བཤད་བརྗོད་ལ་ཉེས་པ་མེད། །གལ་ཏེ་འཁྲུལ་པའི་ཆ་ཤས་མཆིས་སྲིད་ན། །བདག་བློའི་སྐྱོན་ཏེ་མཁྱེན་ལྡན་རྣམས་ལ་བཤགས། །རྒྱལ་བའི་མཛད་པ་བསམ་གྱིས་མི་ཁྱབ་ཀྱང་། །གནས་དུས་འདིར་དགོངས་བསྟན་པའི་ཡུན་ཚད་གང་། །མ་འཁྲུལ་གསལ་བ་ནོར་བུའི་མེ་ལོང་ངོས། །སྲ་ཕབ་གཟུགས་བཞིན་རྒྱལ་བ་ཉིད་མཐུས་སྣང་། །ཅེས་སོ། །
དེ་ལྟར་རྒྱལ་བསྟན་གནས་གྱུར་དུས་ཀྱི་ངེས་པ་བརྗོད་པ་ཉུང་གསལ་རིན་ཆེན་སྒྲོ་མེ་ལས། རང་ལུགས་ཀྱི་བསྟན་རྩིས་རྣམ་པར་དག་པ་བཤད་པའི་སྐབས་ཏེགཉིས་པའོ། །
སྐབས་གསུམ་པ། མེ་མཁའ་རྒྱ་མཚོའི་ངེས་པ་དུ་མ་འཕྲོ་བཅས་བཤད་པ།
ད་ནི་རྣམ་གྲངས་ཤེས་སླད་དང་། །ལེགས་པར་བཤད་པ་ཡང་མཐོང་བས། །བྱེད་ལོ་མེ་མཁའ་རྒྱ་མཚོ་ཡི། །ངེས་པ་འགའ་ཡང་འདིར་བཤད་བྱ། །དེ་ཡང་མཁས་ཤིང་དམ་པ་མཆོག་ཏུ་གྱུར་པ་འགའ་ཞིག་གིས་བྱེད་པའི་ལོ་མེ་མཁའ་རྒྱ་མཚོའི་ངེས་པ་རྣམ་པར་བཞག་པ་དུ་མ་མཐོང་བ་དེ་དག་གི་དོན་ས་བོན་ཙམ་འདིར་བརྗོད་ན། ཆག་ལོ་གསུམ་པས་རིགས་ལྡན་ཁྱབ་འཇུག་སྦས་པའི་དགོངས་ལོ་ང་གཅིག་སྐབས་ཀླ་ཀློའི་སྟོན་པ་སྦྲང་རྩིའི་བློ་གྲོས་བྱུང་བས་མེ་མཁའ་རྒྱ་མཚོའི་དབུ་དུས་དེར་ཚུགས་པར་གསུངས་བ་དང་། རྗེ་བཙུན་ཆེན་པོ་སྒྲོལ་བའི་མགོན་པོས་རིགས་ལྡན་ཉི་མ་གྲགས་སེང་གེའི་ཁྲིར་འཁོད་པ་ཙམ་མ་ཁའི་ཡུལ་དུ་ཀླ་ཀློ་ལྷག་པར་དར་ཞིང་འཕགས་ཡུལ་ནུབ་ཕྱོགས་སུ་གསར་དུ་འཕེལ་བས་སྦྲང་རྩིའི་བློ་གྲོས་ཀྱང་དུས་འདི་ཙམ་དུ་བྱུང་བར་མངོན་ཞེས་གསུང་སྟེ་ཚུལ་འདི་འགོས་ལོ་གཞོན་ནུ་དཔལ་པཎྜི་ཏ་ཆེན་པོ་ཞིག་གིས་མཛད་པའི་རྩིས་ཀྱི་བསྟན་བཅོས་རྒྱ་དཔེ་ལས། ལོ་བརྒྱ་དང་བརྒྱད་ཅུ་རྩ་གཉིས་འཇམ་དཔལ་གྲགས་པའི་རྗེས་བརྒྱད་བརྒྱའི་ལོ་སྟེང་ནས་སྦྱང་བར་བྱས་པ་གཟིགས་གསུང་བ་ཡང་འདི་དང་གནད་གཅིག་ཏུ་བབ་པར་རྟོགས་ལ། གྲུབ་ཐོབ་ཨོ་རྒྱན་པ་རིན་ཆེན་དཔལ་ནི་འཇམ་དཔལ་གྲགས་པའི་རྗེས་ལོ་བརྒྱད་བརྒྱ་ལོན་པ་ན་མེ་མཁའ་རྒྱ་མཚོ་དབུ་ཚུགས་རིགས་ལྡན་ཉི་མས་ཆོས་བསྟན་ནས་ལོ་ཉེར་གསུམ་པའི་སྐབས་ཞག་གཉིས་ཀྱིས་ལྷག་པའི་འདས་ལོ་ཉིས་བརྒྱ་ཉེར་གཅིག་རྫོགས། དེ་ལ་བསྲེ་བྱ་རབ་བྱུང་མེ་ཡོས་ཤར། མེ་ཡོས་དེ་ནས་དྲུག་ཅུ་སྐོར་གསུམ་ལོ་བརྒྱ་དང་བརྒྱད་ཅུ་གོང་གི་ལོ་དག་དག་བསྲེས་པས་མེ་མཁའ་རྒྱ་མཚོ་ཤར་བ་བསྲེ་བྱ་རབ་བྱུང་དང་པོ་ཚུགས་པར་བཞེད་སྟེ། དེ་ད་ལྟའི་རྩིས་མཁན་གཞན་རྣམས་ཀྱིས་ནི་རབ་བྱུང་བཞི་པ་ཡིན་ལ་གང་ལྟར་དུས་དེར་མ་ག་དྷ་ཏུ་རུ་ཀས་བཅོམ་ནས་པཎྜི་ཏ་ཤཱཀྱ་ཤྲཱི་བོད་དུ་བྱོན་པ་ཡིན་ཞེས་གསུངས་ཏེ་རབ་བྱུང་དེ་ནས་ད་ལྟའི་བར་དྲུག་ཅུ་སྐོར་བརྒྱད་འདས་དགུ་པ་རྫོགས་ཉེ་བའི་སྐབས་ཏེ་གཞན་གྱི་རབ་བྱུང་བཅུ་གཉིས་པར་བཟུང་བ་འདི་ཉིད་རྟོགས་དགོས་སོ། །རྒྱལ་བ་རང་བྱུང་ཞབས་ཀྱི་འཇམ་དཔལ་གྲགས་པས་ཆོས་བསྟན་པའི་ལོ་བརྒྱ་དང་བཅས་པའི་བརྒྱད་བརྒྱ་ན་རིགས་ལྡན་ཤིན་ཏུ་བཟང་གི་ཆོས་བསྟན་པའི་ཅུང་ཟད་ཀྱི་སྔོན་ཙམ་ནས་མེ་མཁའ་རྒྱ་མཚོའི་དབུ་ཚུགས། དེ་ནས་ལོ་ཉིས་བརྒྱ་རྫོགས་སྐབས་རིགས་ལྡན་རྒྱལ་དཀའ་ཁྲིར་འཁོད་དེ་ཡི་ལོ་ཉི་ཤུ་ལོནཔ་ན་རྩིས་ལོ་ཉིས་བརྒྱ་ཉེར་གཅིག་བཞག་སྟེ་རྩིས་གཞི་མཛད་པ་དང་རབ་བྱུང་ཤར་བ་དུས་མཚུངས། དེ་ལ་བསྣན་རྒྱུ་དྲུག་བཅུ་སྐོར་གསུམ་ལོ་བརྒྱ་དང་བརྒྱད་ཅུ་སྦྱང་བྱའི་མིང་ཅན་དུ་མཛད་པ་ནི་ཀླ་ཀློ་རྡོ་རྗེ་གདན་དུ་ཞུགས་ཏེ་ཡུལ་དབུས་ཀྱི་བསྟན་པ་ནུབ་པ་ནུབ་པའི་དུས་སུ་རྒྱལ་བའི་ལུང་བསྟན་པར་བཞེད་པ་སོགས་ལྷག་མ་གྲུབ་ཐོབ་ཨོ་རྒྱན་པའི་དགོངས་པ་དང་མཐུན་པར་གནས་སོ། །ས་སྐྱ་བླ་མ་དམ་པ་བསོད་ནམས་རྒྱལ་མཚན་གྱིས་ནི་འཇམ་དཔལ་གྲགས་པའི་དུས་ལོ་ཉིས་བརྒྱ་ཡིན་ལ་དེ་དང་བཅས་པའི་ལོ་བརྒྱད་བརྒྱའི་ཁོངས་སུ་མེ་མཁའ་རྒྱ་མཚོ་ཡང་རྫོགས་པར་འདོད་ལ་དེ་ལ་བསྲེ་བྱའི་རབ་བྱུང་དང་པོ་ནི། ད་ལྟ་སྤྱི་ལ་གྲགས་པའི་རབ་བྱུང་དང་པོ་ཉིད་དང་མཐུན་ཞིང་། དེ་ཚེ་རིགས་ལྡན་མཐའ་ཡས་ཀྱིས་ཆོས་བསྟན་པའི་དུས་ཡིན་པར་དགོངས་ཤིང་འཇམ་དཔལ་གྲགས་པའི་རྗེས་ཀྱི་རིགས་ལྡན་རྣམས་ཀྱིས་ཆོས་བསྟན་པའི་དུས་ལོ་དྲུག་ཅུ་རེ་མཚུངས་པར་བཞེད་པའོ། །དཔལ་མཁའ་སྤྱོད་དབང་པོའི་ཞལ་སྔ་ནས་ནི་འཇམ་དཔལ་གྱི་དུས་ནས་ལོ་བརྒྱད་བརྒྱ་ལོན་པ་ན་ད་ལྟ་སྤྱིའི་རབ་བྱུང་དང་པོ་འདི་ཤར་བ་ཡིན་ལ་འདས་ལོ་ཉིས་བརྒྱ་ཉེར་གཅིག་བརྒྱད་བརྒྱའི་ཁོངས་སུ་བསྒྲངས་བར་མཛད་པ་སྣང་ངོ་། །དེ་ལྟར་མེ་མཁའ་རྒྱ་མཚོའི་འདོད་ཚུལ་གྲགས་ཆེ་བ་གཉིས་ནི་གོང་དུ་རང་ལུགས་བསྟན་རྩིས་ཀྱི་སྐབས་སུ་དྲང་བ་དང་། སྐབས་འདིར་སྨོས་པ་དྲུག་དང་། གཞན་དུ་འཁྲུལ་སེལ་དང་། གདན་དུས་ཀྱི་ལུགས་དང་བཅས་པས་ཁྱོན་དུས་རྣམ་གྲངས་བཅུར་མཐོང་ལ། འདིར་སྨོས་པ་དྲུག་ལས་རྒྱལ་བ་རང་བྱུང་ཞབས་དང་རྗེ་བཙུན་ཆེན་པོ་སྒྲོལ་བའི་མགོན་པོའི་དགོངས་པ་དག་རགས་རྩིས་སུ་མཐུན་ལ་དེ་ནི་གོང་དུ་ཞིབ་མོར་བྱེད་ཟིན་པའི་བསྟན་རྩིས་ལས་ལོ་དྲུག་ཅུ་སྐོར་དག་གི་དམན་པ་ཙམ་སྟེ་འདི་ཡང་འཕགས་ཡུལ་གྱི་གཏན་ཚིགས་མང་པོ་ཞིག་དང་འགྲིག་པས་ཁུངས་ལྡན་དུ་རྟོགས་མོད། དེ་ལྟ་ན་ཡང་རང་བྱུང་ཞབས་ཀྱི་དགོངས་པ་འཆད་པར་འདོད་པ་མཁས་པ་ཆེན་པོ་ཁ་ཅིག་རང་བྱུང་ཞབས་ཀྱི་བཞེད་ཚུལ། དེང་གི་ལག་རྩིས་པ་སྤྱི་དང་གཟའ་སྐར་ལུང་སྟོན་ཚུལ་ཆེས་མི་མཚུངས་པ་ཞིག་འབྱུང་བར་སྣང་བས་དེ་ལ་སྐྱེ་བོའི་ཡ་ཁ་སྤང་བ་སྐད་མཛད་ནས་འདས་ལོ་གྲངས་གཞན་དུ་ཀྱོག་དགོས་བྱུང་འདུག་ཀྱང་རང་བྱུང་ཞབས་ཀྱི་ལོ་བདག་མེ་མཁའ་རྒྱ་མཚོ་སྦྱངས་བཞག་གི་མཚམས་མ་ནོར་བར་རྒྱུད་ཀྱི་རྩིས་འཕྲོ་སྦྱིན་པས་གཟའ་སྐར་ལུང་སྟོན་ཚུལ་སོགས་མི་མཐུན་པ་གཏན་ནས་མི་འབྱུང་ཡང་སྟོན་པའི་འཁྲུངས་ལོ་དང་མེ་མཁའ་རྒྱ་མཚོའི་བར་ལོ་ཡི་ངེས་པ་སྔ་ཕྱི་ཅུང་ཟད་སྤྱི་བཏང་ཙམ་དང་རང་བཞེད་ཁྱད་པར་དབྱེ་བ་མ་ངེས་པ་དང་ལོ་དག་ནས་སྦྱངས་བྱར་དགོངས་ཏེ་གསུངས་པ་སྒྲ་ཇི་བཞིན་སེམས་པ་བྱུང་ན་འཁྲུལ་པ་དང་། མེ་ཡོས་ལ་རྩིས་འཕྲོ་བསྲེ་རྒྱུ་ཤིང་བྱི་ལ་བསྲེ་བར་དམིགས་པ་སོགས་ནི་མཁས་པའི་ཐུགས་དབྱིངས་ནས་རྨོངས་པའི་རྣམ་འགྱུར་བསྟན་པ་ཡིན་ལ། པཎྜི་ཏ་ཤཱཀྱ་ཤྲཱི་ཁྲོ་ལོས་གསུང་བཞིན་ཤིང་བྱི་ལོར་བོད་ཡུལ་གཙང་དུ་ཕེབས་པར་སྣང་ཡང་། གྲུབ་ཐོབ་ཨོ་རྒྱན་པ་དང་རྗེ་རང་བྱུང་བས་མེ་ཡོས་ལོར་བོད་ཡུལ་མཐིལ་དབུ་རུ་ཕེབས་པ་ལ་མཛད་པས་རགས་ཞིབ་ཙམ་དུ་གྱུར་ཅིང་། ལར་ལག་རྩིས་རི་མོ་ལ་སྐྱོན་མེད་ཕྱིན་གཏམ་རྒྱུན་ཐ་དད་དམ་རགས་རྩིས་སམ་དགོས་པའི་དབང་གི་ལོ་ཚིགས་སུ་སྔ་ཕྱི་ཅུང་ཟད་ནུར་བར་དེ་ཙམ་གྱི་སྐྱོན་དུ་བཟུང་མ་དགོས་པར་ཉིད་ནས་ཀྱང་རྩིས་འཕྲོ་འགྲིག་པར་དགོངས་གཏན་ཚིགས་སྤོས་པས་ཀྱང་གསལ་མོད། འོན་ཏེ་འདིར་མང་དུ་མི་སྨྲ་ཡི་ལོགས་སུ་དཔལ་རང་བྱུང་ཞབས་ཀྱི་དགོངས་བཞེད་ཡང་ཅི་ནུས་ཞིག་མོས་པའི་སྟོབས་ཀྱི་འཆད་པར་འདོད་ལ། ལར་གྱི་ལོ་ཡི་སྐོར་གྲངས་སྔ་ཕྱི་ཙམ་ལས་རྣམ་གྲངས་མང་ཞིག་ཞིབ་མོས་བྱས་པ་འདི་ཉིད་དུ་འཇུག་པས་རྒྱལ་བ་དེ་ཡི་དགོངས་པར་གྱུར་པ་ཡང་བློ་གྲོས་ཟབ་མོ་ཐོབ་པ་རྣམས་ཀྱིས་གཟིགས་པས་གསལ་བའོ། །མེ་མཁའ་རྒྱ་མཚོའི་ངེས་པ་གཞན་རྣམས་ཀྱང་མཛད་པ་པོ་འཕགས་པའི་སར་བཞུགས་པ་དང་། ཚད་མའི་གཏམ་དང་ཇི་རིགས་འབྲལ་ཞིང་འཕགས་ཡུལ་གྱི་དམ་པའི་ངག་སྒྲོས་ཅན་རྣམས་ནི་དག་སྣང་སྦྱང་བའི་ཡུལ་དུ་བྱ་ཞིང་ཀུན་ཏུ་གཤེ་བར་ཡང་མི་བྱའོ། །
ད་ནི་འཕྲོས་སུ་དེང་གི་རྩིས་མཁན་སྤྱི་ལ་གྲགས་པའི་རབ་བྱུང་སྐོར་ཇི་སྙེད་སོང་བའི་སོ་སོའི་དུས་ཀྱི་ངེས་པ་སངས་རྒྱས་པར་གཞན་དུ་སྤྲོས་བཞིན་དང་འདིར་ས་བོན་ཙམ་དུ་གྲགས་ཆེ་བའི་སྐྱེས་བུ་ཁ་ཅིག་གི་དགོངས་ལོའི་ཚད་དང་། སྦྱར་ཏེ་གོ་བདེར་བཤད་པར་བྱ་སྟེ། དེ་ཡང་རབ་བྱུང་དང་པོ་ཤར་བ་ན་ལོ་ཆེན་རིན་ཆེན་བཟང་པོ་དགུང་ལོ་བདུན་ཅུ་ཐམ་པ། ཇོ་བོ་རྗེ་ང་དྲུག་པ། ཁྱུང་པོ་རྣལ་འབྱོར་སོ་བརྒྱད། མར་པ་ཆུ་སྟག་ལོ་པའི་ཉེར་དྲུག རྒྱལ་བ་འབྲོམ་ཉེར་གསུམ་ཡིན་ལ། དེ་བཞིན་རབ་བྱུང་གཉིས་པ་ཤར་པ་ན་མྱི་ལ་ས་འབྲུག་ལ་འཁྲུངས་པའི་དྲུག་ཅུ་ཐམ་པ། པུ་ཏོ་པ་ང་བདུན། རྗེ་སྒམ་པོ་པ་དགུང་ལོ་དགུ་པའོ། །རབ་བྱུང་གསུམ་པ་ཤར་བ་ན། ས་སྐྱའི་རྗེ་བཙུན་གྲགས་རྒྱལ་དང་། ཞང་གི་གདན་ས་བ་མཉམ་མེད་ཤཱཀྱ་ཡེ་ཤེས་རྣམས་འཁྲུངས། ས་ཆེན་གྱི་ང་དྲུག ཕག་མོ་གྲུབ་པ་དང་ཀརྨ་པ་དུས་གསུམ་མཁྱེན་པ་དགུང་ལོ་སོ་བརྒྱད། ཀཿཐོག་དམ་པ་བདེ་གཤེགས་ཀྱི་ལོ་བཅུ་བཞི །ས་སྐྱའི་རྗེ་བཙུན་བསོད་ནམས་རྩོ་མོ་དང་དཔལ་སྟག་ལུང་ཐང་པའི་ལོ་དྲུག་པ། འཇིག་རྟེན་གསུམ་མགོན་གྱི་ལོ་ལྔ་ལོན་པ་ཡིན་ནོ། །རབ་བྱུང་བཞི་པ་ལ་རྒྱལ་བ་ལོ་རས་ཀྱི་དབོན་ཙཱ་རི་རས་པ་བྱང་ཆུབ་འབུམ་སྐུ་འཁྲུངས། དཔལ་འབྲུག་པ་གཙང་པ་རྒྱ་རས་དགུང་ལོ་ཞེ་བདུན་པ། ས་པཎ་ཉེར་དྲུག གཏེར་སྟོན་གུ་རུ་ཆོས་དབང་ལོ་བརྒྱད་པ། ཀརྨ་པ་དགུང་ལོ་བཞི་པའོ། །རབ་བྱུང་ལྔ་པ་ཤར་བ་ན་ཚལ་པ་བཀའ་རྒྱུད་ལྷ་རི་བ་བཛྲ་ནཱ་ཐ་འཁྲུངས། གྲུབ་ཆེན་ཨོ་རྒྱན་པའི་སོ་བརྒྱད། ས་སྐྱ་ཆོས་རྒྱལ་འཕགས་པ་སོ་གསུམ། རིག་འཛིན་ཀུ་མ་རཱ་ཛའི་དགུང་ལོ་གཉིས་པའི་སྐབས་ཡིན་ནོ། །རབ་བྱུང་དྲུག་པ་ཤར་བ་ན། ཀརྨ་པ་རང་བྱུང་རྡོ་རྗེ་དགུང་ལོ་ཞེ་བཞི། བུ་སྟོན་སོ་བརྒྱད། ཇོ་ནང་ཀུན་མཁྱེན་སོ་དྲུག ཀུན་མཁྱེན་དྲི་མེད་འོད་ཟེར་ཉི་ཤུ་ཐམ་པའོ། །རབ་བྱུང་བདུན་པ་ཤར་བ་ན། བྲག་དཀར་སེམས་དཔའ་ཆེན་པོ་བསོད་ནམས་རིན་ཆེན་དང་། ལྷ་རི་གྲགས་པ་བསོད་ནམས་རྒྱལ་མཚན་འཁྲུངས། གཏེར་སྟོན་སངས་རྒྱས་གླིང་པ་བཞི་བཅུ་ཞེ་བརྒྱད་དང་། ཞྭ་དམར་བ་མཁའ་སྤྱོད་དབང་པོ་གཏེར་སྟོན་དྲི་མེད་ལྷུན་པོ་སུམ་ཅུ་སོ་བརྒྱད། ཤར་ཙོང་ཁ་པ་རྗེ་བློ་བཟང་གྲགས་པ་སོ་གཅིག བོ་དོང་ཀུན་མཁྱེན་འཇིགས་བྲལ་བཅུ་གསུམ། ངོར་ཆེན་ཀུན་དགའ་བཟང་པོ་དང་རྫོང་པ་ཀུན་དགའ་རྒྱལ་མཚན་དྲུག་པ། ཀརྨ་པ་དེ་བཞིན་གཤེགས་པ་དགུང་ལོ་བཞི་པའོ། །རབ་བྱུང་བརྒྱད་པ་ཤར་བ་ན། ཕུག་པ་ལྷུན་གྲུབ་རྒྱ་མཚོས་པད་དཀར་ཞལ་ལུང་གི་འདས་ལོ་ཐོག་མར་བྱས། ཆག་ལོ་གསུམ་པ་རིན་ཆེན་ཆོས་ཀྱི་རྒྱལ་པོ་སྐུ་འཁྲུངས། གྲུབ་ཐོབ་ཐང་སྟོང་རྒྱལ་པོ་དགུང་ལོ་ང་བདུན་པ། འགོས་ལོ་གཞོན་ནུ་དཔལ་བ་ང་དྲུག གཏེར་སྟོན་རཏྣ་གླིང་པ་ཞེ་ལྔ། ཀུན་མཁྱེན་སངས་རྒྱས་འཕེལ་པོ་བདུན། ཀརྨ་མཐོང་བ་དོན་ལྡན་གྱི་སུམ་ཅུ་རྩ་གཉིས། པཎ་ཆེན་ཤཱཀ་མཆོག་ཉི་ཤུ་ཐམ་པ། ཆོས་རྗེ་གོ་རམས་པ་བཅུ་དགུ་པ། གཡོ་རུ་གོང་དཀར་རྡོ་རྗེ་གདན་པ་ཀུན་དགའ་རྣམ་རྒྱལ་བཅུ་དྲུག་པའོ། །རབ་བྱུང་དགུ་པ་ཤར་བ་ན། ཀརྨ་ཅོད་པཎ་འཛིན་པ་བརྒྱད་པ་མི་བསྐྱོད་རྡོ་རྗེ་དང་རྗེ་བཙུན་ཀུན་དགའ་གྲོལ་མཆོག་སྐུ་འཁྲུངས། གཏེར་སྟོན་པདྨ་གླིང་པའི་ང་བརྒྱད། གཙང་སྨྱོན་སངས་རྒྱས་རྒྱལ་མཚན་ང་དྲུག དབུས་སྨྱོན་ཀུན་དགའ་བཟང་པོ་ལྔ་བཅུ་ཐམ་པ་ཡིན་ནོ། །རབ་བྱུང་བཅུ་པ་ཤར་པ་ན། སྒམ་པོ་བཀྲ་ཤིས་རྣམ་རྒྱལ་ལྔ་བཅུ་རྩ་ལྔ་པ། ཟུར་མཁར་མཚོ་བྱེད་བློ་གྲོས་རྒྱལ་པོ་ལྔ་བཅུ་ང་དགུ་པ། འཕྲང་མགོ་གཏེར་སྟོན་ཤེས་རབ་འོད་ཟེར་ལྔ་བཅུ་ཐམ་པ། མི་ཕམ་པ་པདྨ་དཀར་པོ་བཞི་བཅུ་ཞེ་གཅིག་པ། རིག་འཛིན་བློ་གྲོས་རྒྱལ་མཚན་དགུང་ལོ་བཅུ་དྲུག་པ། ཀརྨ་དབང་ཕྱུག་རྡོ་རྗེ་བཅུ་བཞི་པའོ། །རབ་བྱུང་བཅུ་གཅིག་པ་ཤར་པ་ན་ཇོ་ནང་རྗེ་བཙུན་ཏཱ་ར་ནཱ་ལྔ་བཅུ་རྩ་གསུམ་པ་རིག་འཛིན་འཇའ་ཚོན་སྙིང་པོ་བཞི་བཅུ་ཞེ་གསུམ། སྒམ་པོ་ནོར་བུ་རྒྱན་པའི་སོ་དགུ། ཀརྨ་པ་ཆོས་དབྱིངས་རྡོ་རྗེ་ཉེར་གསུམ། རྒྱལ་དབང་བློ་བཟང་རྒྱ་མཚོ་དགུང་ལོ་བཅུ་ཐམ་པའོ། །རབ་བྱུང་བཅུ་གཉིས་པ་ཤར་བ་ན། སྒམ་པོ་སྤྲུལ་སྐུ་བཟང་པོ་རྡོ་རྗེ་ང་གཉིས་པ། ཡོང་དགེ་གཏེར་སྟོན་མི་འགྱུར་རྡོ་རྗེ་དང་བྱང་བདག་པདྨ་འཕྲིན་ལས་ཀྱི་ཞེ་བདུན། ཏྲེ་བོ་ཆོས་ཀྱི་དབང་པོ་སོ་ལྔ། ཀརྨ་པ་བཅུ་གཅིག་ཡེ་ཤེས་རྡོ་རྗེ་དགུང་ལོ་བཅུ་གཉིས་པ་ཡིན་ནོ། །ད་ལྟའི་ཆ་ཁྱི་འདི་ནས་ལོ་ལྔ་འདས་པ། རབ་བྱུང་བཅུ་གསུམ་པ་ཤར་བ་ན། ཀུན་མཁྱེན་སི་ཏུ་ཆོས་ཀྱི་འབྱུང་གནས་ཀྱི་དགུང་ལོ་ཞེ་བརྒྱད་པ། རྒྱལ་བ་བསྐལ་བཟང་རྒྱ་མཚོའི་ཞབས་དགུང་ལོ་བཞི་བཅུ། འབྲུག་པ་སྤྲུལ་པའི་སྐུ་རིན་པོ་ཆེ་རྒྱལ་དབང་འཕྲིན་ལས་ཤིང་རྟ་དང་དཔའ་བོ་གཙུག་ལག་དགའ་བ་ཡི་དགུང་ལོ་སུམ་ཅུ་ཐམ་པ། ཀརྨ་ཅོད་པཎ་འཛིན་བཅུ་གསུམ་འབྱོན་པར་གསུངས་པའི་མཐའ་མ་བདུད་འདུལ་རྡོ་རྗེ་དགུང་ལོ་བཅོ་ལྔའི་སྟེང་དུ་སླེབ་པར་འགྱུར་བ་སྟེ་སྐྱེས་བུ་ཆེན་པོ་དེ་རྣམས་སྐུ་ཚེ་བརྟན་པར་གྱུར་ཅིག །
འདིར་སྨྲས་པ། དེ་ལྟར་དཔལ་ལྡན་དང་པོའི་སངས་རྒྱས་མཆོག །དུས་ཀྱི་འཁོར་ལོ་བསྡུས་པའི་རྒྱུད་ཆེན་ལས། །ཕྱི་ཡི་དུས་འཁོར་སྐར་རྩིས་གསུངས་པའི་སྐབས། །རྣམ་པར་སྦྱངས་དང་ངེས་པར་བཞག་པ་ཡི། །བྱེད་པའི་ལོ་དག་མེ་མཁའ་རྒྱ་མཚོ་ཞེས། །དགོངས་པ་དོན་དང་ལྡན་པས་གསུང་བ་དང་། །སྤྱན་རས་གཟིགས་ཀྱི་འགྲེལ་པར་ལེགས་བཀྲལ་ཡང་། །ཟབ་བརླིང་རྡོ་རྗེའི་ཚིགས་སུ་གྱུར་པས་ནི། །བོད་ཡུལ་འདིར་བྱོན་མཁས་པའི་དབང་ཕྱུག་ཆེ། །སྐྱེས་མཆོག་མང་པོས་འདོད་ཚུལ་དུ་མ་དང་། །འཕགས་ཡུལ་དུ་ཡང་བདག་ཉིད་ཆེན་པོ་མཆོག །འགའ་ཡང་བཞེད་པ་ཐ་དད་གནས་པར་མངོན། །འཕགས་ཆེན་གོ་འཕང་ངེས་བརྙེས་དགོངས་པ་ནི། །འདོད་ཚུལ་སྤྱི་དང་ལྟར་སྣང་མ་མཐུན་ཡང་། །དགོངས་པ་ཅན་རྣམས་གདུལ་བྱ་འགའ་ཞིག་ངོར། །བདེན་པར་འགྱུར་བས་དག་སྣང་བསྐྱེད་པར་བྱ། །གཞན་གྱུར་སོ་སྐྱེས་རྟོག་གེའི་རྟོག་དཔྱོད་ཀྱི། །རིགས་གྲས་ཕོ་ཚོད་དག་གི་བཞག་པ་དང་། །གཏམ་རྒྱུད་མ་དག་པའམ་མ་ངེས་པ། །གྲགས་པའི་རྗེས་འབྲང་སྐྱོ་མ་སྔ་བཙོན་དང་། །ཁུངས་མེད་བརྡོལ་ཐབས་སྨྲ་བ་ཡང་མཐོང་ན། །དོན་གྱི་སྙིང་པོས་དབྱེན་པས་དོར་བྱར་ངེས། །དེ་ཕྱིར་དག་དང་མ་དག་མཐའ་གཉིས་ནི། །བློ་ལྡན་དམ་པ་རྣམས་ཀྱིས་རབ་དཔྱད་འོས། །འདིར་ནི་ས་ཕྱོགས་ཡངས་པའི་ཡུལ་རིས་ཀུན། །དྭངས་པའི་མེ་ལོང་ངོས་སུ་ཞུགས་པ་བཞིན། །མཁས་བཞེད་རྣམ་མང་གླེགས་བམ་དུ་མ་ཡང་། །བདག་བློ་གསལ་བའི་ཚིག་ཉུང་དོན་མང་བསྡུས། །གཟུར་གནས་བློ་ལྡན་མགུ་བའི་དགའ་སྟོན་དུ། །ཚེ་དབང་ནོར་བུ་དཔལ་དེས་རོལ་རྩེད་ཡིན། །དེ་བཞིན་རབ་བྱུང་དུས་ཀྱི་ངེས་པ་ཡང་། །དོན་གཉེར་བློ་གསལ་དང་བས་བླང་བར་མཛོད། །ཞེས་ཚིགས་སུ་བཅད་པའོ། །
དེ་ལྟར་རྒྱལ་བསྟན་གནས་གྱུར་དུས་ཀྱི་ངེས་པ་བརྗོད་པ་ཉུང་གསལ་རིན་ཆེན་སྒྲོན་མེ་ལས། མེ་མཁའ་རྒྱ་མཚོའི་ངེས་པ་དུ་མ་འཕྲོ་བཅས་བཤད་པའི་སྐབས་ཏེ་གསུམ་པའོ། །
དེ་སྐད་རྣམ་དག་རྒྱལ་བསྟན་གནས་པའི་ཚུལ། །རྒྱལ་བཀའ་བླ་མའི་གསུང་རྟེན་འདི་བགྱིས་པར། །ལེགས་མཆིས་འགྲོ་བསྔོ་ཀུན་མཁྱེན་མྱུར་ཐོབ་ཤོག །ཉེས་བཤགས་དགེ་བར་དབུགས་དབྱུང་རྒྱལ་བས་སྩོལ། །
སངས་རྒྱས་ཀྱི་བསྟན་པ་རིན་པོ་ཆེ་ཇི་ལྟར་གནས་གྱུར་དུས་ཀྱི་ངེས་པ་རྗེས་སུ་དྲན་པ་བསྐྱེད་པ་ལེགས་བཤད་ས་བོན་ཙམ་སྨོས་པ་ཉུང་ངུ་དོན་གསལ་རིན་པོ་ཆེའི་སྒྲོན་མེ་ཞེས་བྱ་བ་འདི་ནི་རྒྱལ་བསྟན་ལྔ་བརྒྱ་ཕྲག་དྲུག་པ་ལ་འཇུག་ཞིང་རྩིས་ལོ་རབ་བྱུང་བཅུ་གཉིས་པའི་བློ་ངན་ལྕགས་བྱ་མཛད་པར་ཉེ་ཞིང་རྔ་ཆེན་ཆུ་ཁྱི་འཆར་བར་ཕྱོགས་པ་དབྱུ་གུ་ཟླ་བའི་ཤར་ཕྱོགས་རྒྱལ་བ་སུམ་ཅུ་རྩ་གསུམ་ནས་འཛམ་བུའི་གླིང་དུ་གཤེགས་པའི་དུས་ཆེན་ལ་ཐང་འབྲོག་འདོལ་རྩེ་མོར་དབུ་བཙུགས་ཏེ་ཅུང་ཟད་རེ་བྲིས་པའི་མཐར་སྨིན་དྲུག་གི་ཉ་བའི་དམར་ཕྱོགས་ཆེས་བཅུ་རྒྱུད་རྩིས་ཀྱི་ཉི་མ་མེ་བཞིའི་འགྲུབ་སྦྱོར་བཟང་པོ་ལ་ཀོང་ཡུལ་སྨད་གུ་རུའི་གནས་ཆེན་ལྐོག་འཕྲང་གི་མདུན་ཆུ་ཀླུང་ཆེན་པོ་རོ་ཧི་ཏ་ཡི་འགྲམ་སྔོན་ལྷ་བཙད་པོས་བཟུང་པའི་ཡུལ་གཏམ་སྙན་གླང་མཁར་རྡོ་རིང་གི་ངོགས་སུ་གྲུབ་པར་བོད་ཆེན་མདོ་ཁམས་དབུས་འགྱུར་དུ་ཆོས་སྨྲ་བའི་གོ་སར་སྐྱེས་ཤིང་གདོད་མ་ནས་རྣལ་འབྱོར་པར་གྱུར་པ་ཚེ་དབང་ནོར་བུས་ལེགས་པར་སྦྱར་བ་སྟེ་སླར་ཡང་རྔ་ཆེན་གྱི་ལོ་དེ་ཉིད་དུ་ཞུས་དག་ལེགས་པར་བགྱིས་པའི་རི་མོ་ནན་ཏུར་གྱི་གྲོགས་ལྡན་འགའ་ཞིག་རང་གི་སློབ་མ་མ་དྷེ་པྲ་བློ་གྲོས་རབ་རྒྱས་པུ་ཥྱཿཞེས་པས་ཀྱང་བྱས་པ་སྟེ་ཚུལ་འདི་ལ་འབད་པའི་དགེ་བས་འགྲོ་བ་ཀུན་རྒྱལ་བའི་བསྟན་པ་རིན་པོ་ཆེ་མཆོག་ཏུ་གུས་པས་ཞུགས་ཤིང་རྒྱས་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ། །