རྒྱུད་དགོངས་ལོ་འཕོ་དགུན་འབྲིང་རྒྱལ་ཉ་ཟླ་བའི་དང་པོར་བཞག་པའི་ཚུལ་ཉུང་ངུ་དོན་གསལ།
༄༅། །རྒྱུད་དགོངས་ལོ་འཕོ་དགུན་འབྲིང་རྒྱལ་ཉ་ཟླ་བའི་དང་པོར་བཞག་པའི་ཚུལ་ཉུང་ངུ་དོན་གསལ་ཞེས་བྱ་བ་བཞུགས་སོ། །
༈ ན་མོ་བཛྲ་པི་ཋ་ཌཱ་ཀི་ནཱི་ས་མུ་ཏྲཱ་ཡ། རྡོ་རྗེ་གདན་བཞི་རྣལ་འབྱོར་ཀུན་སྤྱོད་རྒྱུད། །རྡོ་རྗེ་མཁའ་འགྲོ་མཁའ་འགྲོ་རྒྱ་མཚོ་དང་། །རྡོ་རྗེ་གཙུག་ལག་ལ་སོགས་ཚད་མ་ཡི། །རྒྱུད་སྡེ་མང་པོར་མཐུན་པར་གསུང་བ་བཞིན། །རྫོགས་སངས་རྒྱས་པ་པདྨ་སམ་བྷ་ཝས། །རྒྱལ་གྱི་ཟླ་བ་ལོ་འཕོའི་མཚམས་སུ་བཞེད། །འོན་ཀྱང་མར་ངོ་སྔོན་འགྲོ་བྱེད་པ་ན། །མགོ་ཟླའི་བཅུ་དྲུག་ལོ་ཡི་འཕོ་མཚམས་སྣང་། །ཅི་ཕྱིར་ས་ག་མར་ངོ་སྔོན་འགྲོའི་ཚེ། །ནག་པའི་བཅུ་དྲུག་ནས་བརྩམས་དུས་འཁོར་གྱི། །འགྲེལ་ཆེན་དགོངས་དོན་ཡིན་ཞེས་དུས་འཁོར་གྱི། །མཁས་གྱུར་མང་པོས་སྒྲོགས་ན་སུ་ཡིས་རྒོལ། །དུས་འཁོར་ཉི་ཁྱིམ་འཕོ་དབང་ནག་པའི་ཟླ། །དང་པོར་ཞག་ཀྱང་རྟེན་འབྲེལ་ཐོག་མ་ནི། །རྒྱལ་ཟླ་ནས་བརྩམས་རྒྱུད་དང་འགྲེལ་པས་བསྟན། །དེས་ཀྱང་རྒྱལ་ཟླ་དང་པོའི་བསྒྲུབ་བྱེད་གྱུར། །གཞན་གྱུར་འགའ་ཞིག་མཆུ་ཟླ་མོ་མགོ་དང་། །ཁ་ཅིག་དབོ་ཟླ་ཁ་ཅིག་སྣྲོན་ཟླ་དང་། །ཁ་ཅིག་སྨིན་དྲུག་ཁ་ཅིག་མགོ་ཟླ་དེ། །དེ་དག་ལོ་འཕོ་ཟླ་བའི་ཐོག་མ་རུ། །ཡིན་ཞེས་སྨྲ་བ་དེ་རྣམས་དགོས་དབང་གི །རྒྱལ་བས་རྣམ་གྲངས་ཅན་གསུང་སུ་ཡིས་འགོག །གཞན་ཡང་དུས་དྲུག་དུས་བཞིའི་རྣམ་བཞག་དང་། །ཟླ་བ་ཡར་ངོ་མར་ངོའི་སྔོན་འགྲོ་སོགས། །མནའ་ཆོག་ད་ཆོག་ཇི་བཞིན་མཁས་པའི་སྲོལ། །རང་རང་མ་འཁྲུལ་སྤྱོད་ན་དོན་ལྡན་ཡིན། །འོན་ཀྱང་རང་ལུགས་ལོ་མགོ་རྒྱལ་ཟླ་རུ། །གཏན་ཚིགས་ཚད་མའི་རྒྱུད་སྡེ་མང་པོ་དང་། །གྲུབ་པའི་སློབ་དཔོན་མང་པོའི་ཞལ་ལུང་གུང་། །མཐུན་པས་ཡིད་ཆེས་གནས་སུ་ཁས་བླང་བྱས། །དེ་ལ་དགག་བཞག་སྤང་བའང་བགྱིད་ཡོད་མོད། །དེ་ལྟ་ནའང་དེ་ཚུལ་བཏང་སྙོམས་མཛེས། །དེ་སྐད་རྣལ་འབྱོར་ཚེ་དབང་ནོར་བུ་ཡིས། །ཤེས་བཞིན་དྲང་པོར་ཉུང་གསལ་ངག་གིས་སྨྲས། །དེ་ལ་དགེ་བའི་ཆ་ཤས་མཆིས་པ་རྣམས། །བློ་ལྡན་རྣམས་ཀྱི་དགོངས་པ་བསྐང་བ་དང་། །བླང་དོར་གནས་ལ་འཁྲུལ་པ་མི་འབྱུང་ཞིང་། །ཀུན་རྫོབ་བདེན་པ་རྟེན་འབྲེལ་བཟང་པོའི་ཆ། །གོང་འཕེལ་ཕུན་ཚོགས་རྫོགས་ལྡན་དཔལ་འབྱོར་གྱིས། །ཕ་མའི་རང་བཞིན་འགྲོ་ཀུན་འཚོ་བར་ཤོག །
ཅེས་པ་ཡང་རྣལ་འབྱོར་པ་ཚེ་དབང་ནོར་བུ་འཇམ་དབྱངས་རྒྱ་མཚོས་རྐོང་ཡུལ་ཤིང་ལོའི་ཚལ་གུ་རུའི་གནས་ཆེན་ལྐོག་འཕྲང་དུ། རབ་ཉི་ཆུ་ཁྱི་སྦོ་ཟླའི་དཀར་ཕྱོགས་དགའ་བ་གསུམ་པར་སྨྲས་པ་སརྦ་མངྒ་ལཾ།
ན་མོ་བྷ་ཝ་ཏེ་པྲཛྙཱ་པཱ་ར་མི་ཏཱ་ཡེ། སརྦ་ཏ་ཐཱ་ག་ཏ་ཛྙཱ་ན་པ་རི་པུ་རི་ཀཱ་ཡེ། ཏདྱ་ཐཱ་བིཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ། རྒྱ་དཔེ་དངོས་ལས་རྣལ་འབྱོར་ཚེ་དབང་ནོར་བུས་བསྡུས་སོ། །ཙྱོག་ཀྱེ་ཏ་ཏ་ལ་ཙྱ་ཀྱེ། ལོ་ཧ་ལོ། མ་ཧཱ་ལོ་ཧ་ལོ། ཨ་ལ་ཙ་ལ་ཏ་ལ་སྭཱ་ཧཱ། དེ་བཞིན་གཤེགས་པ་ལ་འདོད་ཁམས་བདག་པོས་ཕུལ་བའི་རིགས་སྔགས་མདོ་སྡེ་མྱང་འདས་ནས་གསུང་བའོ། །པུརྦཔོཥཱདིསྠཱཔབྱཾ། ཤར་ནས་རྒྱལ་ཟླ་ལ་སོགས་བཞག་གདན་བཞིའི་རྒྱུད་རྩིས་འཁྲུལ་མེད་རྒྱ་དཔེར་བཞུགས་བཞིན་པ་ཡིན།