རྒྱུད་ཀྱི་དགོངས་དོན་ཏི་ཐུང་སྦྱོར་སྒྲོལ་ཟུང་འཇུག་བདེ་ལེན།
༄༅། །རྒྱུད་ཀྱི་དགོངས་དོན་ཏི་ཐུང་སྦྱོར་སྒྲོལ་ཟུང་འཇུག་བདེ་ལེན་ཞེས་བྱ་བ་བཞུགས་སོ། །
༈ ཨོཾ་སྭསྟི། ཀུན་བཟང་སྲིད་ཞིའི་སྤྱི་དཔལ་ངག་དབང་ཕྱུག །བླ་མ་མགོན་པོ་དུས་འཁོར་ལ་བཏུད་དེ། །བཀྲ་ཤིས་དགེ་བས་འགྲོ་རྣམས་མི་མཐུན་གཟའ་ཉིའི་དྷྲུ་ར། །ཚེས་རྟག་ལོངས་སྤྱོད་སོ་སོར་སྦྱིན། །དེ་ཡི་གཟའ་ཉི་བར་པར་འགྱུར། །ཉེ་བར་བྱ་ར་དང་བསྟུན་ཏེ། །ཉི་རྐང་སྣོན་འཕྲི་གཟའ་ཉིན་རེ་བཞིན་བྱེད། །དེ་ཡི་ཉི་མ་རྣམ་དག་འགྲུབ། །གཟའ་ཚེས་ཕྱེད་དག་ཉིད་དུ་འགྱུར། །རིལ་པོ་ཚེ་སྦྱིན་མེད་ཀྱི་བགོ །རྙེད་ནོར་མཉམ་བསྣན་མི་མཉམ་དབྲི། །ལིག་མས་ཟླ་རྐང་རེའུ་མིག་འཛིན། །ཆ་ཤས་གང་ཡིན་མ་ནོར་བར། །ངེས་གཟའ་དབྱུ་གུར་སྣོན་དབྲི་བྱ། །དེས་ནི་གཟའ་ཚེས་རྣམ་པར་དག །ཉི་དག་གནས་གཅིག་གཅིག་ལ་སྟེ། །ཟླ་ཚེས་རྟག་པའི་ལོངས་སྤྱོད་སྦྱིན། །དེ་ལ་ཚེས་འཁྱུད་ཟླ་སྐར་གྲགས། །སླར་ཡང་རེས་གཟའི་དབྱུ་གུ་ཡིས། །སྦྱངས་བས་ཟླ་སྐར་རྣམ་པར་དག །ཉི་ཟླ་དག་བསྲེས་སྦྱོར་བ་ཡིན། །ཚེས་གྲངས་མིག་བསྒྱུར་ཟླ་བས་དབྲི། །ཐུབ་པས་བགོས་པའི་ལྷག་མ་གང་། །བྱེད་པ་ཕྱི་མ་འཆར་བ་ཡིན། །བྱེད་གྲུབ་དྷྲུ་བ་བསྒྲུབ་ཚུལ་གྱི། །བསྒྱུར་ལས་འདིར་བསྟན་ལག་ལེན་མཚུངས། །དབྱུ་གུ་ཤིན་ཏུ་དག་འདོད་ན། །དྷྲུ་སོགས་གནས་གསུམ་བྱས་པས་འགྲུབ། །ཚུལ་འདི་རྒྱུད་རྒྱལ་ཁམས་ལེའུ་ཡི། །ཚིགས་བཅད་སོ་བཞི་རྐང་མཐའ་ནས། །གསལ་བསྟན་རྒྱུད་ལ་མོས་ཐོབ་པའི། །སྐལ་བཟང་གྱུར་རྣམས་མགུ་བར་ངེས། །འགྲོ་སྨིན་ལྷ་རྫིངས་ལས་བྱུང་བླང་དོར་རྣམས། །མ་ནོར་དོན་གྲུབ་ཉིད་ལས་བློ་གྲོས་ཀྱི། །པད་འཛུམ་ལེགས་བཤད་མ་རྡུའི་དོན་གཉེར་ཅན། །བུང་བ་རབ་དགའ་གཞན་ཕན་ཆེར་རྒྱས་ཤོག །
ཞེས་པ་ཡང་རྣལ་འབྱོར་པ་ཚེ་དབང་ནོར་བུས་འཕྲལ་དུ་སྤེལ་བ་སརྦ་མངྒ་ལཾ།
སྭཱསྟི། གངས་ཅན་འདི་ན་དེང་སང་སྐར་རྩིས་མཁན། །གྲགས་པ་ཆེས་ཐོབ་གྲྭ་མདའ་ཕུག་ལུགས་པས། །བཅུ་གཉིས་ཟླ་བར་དབུགས་ཐོབ་སྒང་ཚད་ཞེས། །རྒྱ་ནག་ལི་ཐུར་དཔེ་བྱས་བཀོད་དེ་ཡང་། །རགས་རྩིས་ཟླ་བ་སོ་སོའི་དབུགས་ཐོབ་ནས། །ཞག་བརྒྱད་འདས་པར་དེ་ནས་ཁྱིམ་སླེབ་བརྒྱད། །སྒང་ཐོབ་དེ་འོག་བཅུ་བཞིའི་ཕྱི་དབུགས་ཐོབ། །ཞིབ་པར་ཞག་ཚད་ལག་ལེན་རྩིས་ཀྱི་ཤེས། །དེང་དུས་གྲགས་ཆེ་རྟོགས་ཀྱང་སླ་བར་འགྱུར། །ཕུག་པའི་རྗེས་འབྲངས་མངའ་རི་རྡོ་རྗེ་དང་། །ཀོང་པོ་འབུམ་རམས་པ་ཡི་ཅུང་ཟད་ཀྱི། །འདྲ་མིན་མཛད་མོད་ཕུག་ལུགས་ནང་ཚན་ཡིན། །གཞན་འགྱུར་དྭགས་པོ་པཎ་ཆེན་གསུམ་པ་ཞེས། །ཀརྨ་འཕྲིན་ལས་པ་ཡི་ཚུལ་དེ་འདྲ། །ལེགས་དཔྱད་རང་བཞེད་ཐུན་མིན་སྒང་ཚད་དང་། ཁྱིམ་སླེབས་མྱོང་རྩིས་མན་ངག་རྒྱན་དག་གཅིག །དབུགས་ཐོབ་དེ་ཡི་ཞོར་ལ་རྟོགས་པ་དང་། །གཙུག་ལག་སྨན་དཔྱད་གཞུང་ནས་དུས་བཞི་རུ། །འབྱུང་ཁམས་རྩ་ལྔ་རྒྱུ་ཚུལ་ཁྱིམ་སླེབ་དང་། །བསྟུན་ནས་ཤིན་ཏུ་ཞིབ་པའི་ཚུལ་ཀྱང་མཛད། །དཔལ་ལྡན་འབྲུག་པའི་རྗེས་འཇུག་མཁས་པ་ནི། །རྔོག་བཙུན་ལྷ་བློས་གདན་དུས་རྩིས་གཞུང་དུ། །སྔ་ཁྱི་ཁྱིམ་རྫོང་དབུགས་སླེབས་མཚུངས་དེ་ནས། །བཅུ་ཞག་བཟློག་གཉིས་གཟེར་གྱི་སྒང་ཚད་མཛད། །དེ་ལྟར་ཕུག་ལུགས་དབུགས་ཐོབ་སྒང་ཚད་ཉིད། །མཁས་པས་ལེགས་བརྟག་རྣམ་གྲངས་གསུམ་དུ་བྱུང་། །བདག་གི་སྔོན་ཆད་མཐོང་བ་དེ་རྣམས་ཏེ། །རྣམ་གྲངས་གྱུར་པ་དེ་རྣམས་ཡིན་ཀྱང་མངོན། །གོང་གི་ལུགས་གསུམ་བདེ་བླག་རྟོགས་པ་ཡི། །རེ་མིག་རྩིས་མཁན་གཞོན་ནུ་མགུ་ཕྱིར་དང་། །རང་གི་རྟོགས་དཔྱོད་དྲན་གསོའི་ཆེད་དུ་བྲིས། །དགེ་མཆིས་འགྲོ་རྣམས་ཀུན་མཁྱེན་མྱུར་ཐོབ་ཤོག །
ཞེས་པ་ཡང་རིག་པ་འཛིན་པའི་གཟུགས་བརྙན་ཚེ་དབང་ནོར་བུས་སྨྲས་པའོ། །སརྦ་མངྒ་ལཾ།