མཁས་མཆོག་དྷརྨཱ་ཤྲཱི་རབ་བྱུང་བདེ་འབྱུང་གི་བློ་ངན་ལྕགས་བྱ་ལོར་བརྩམས་པའི་རྩིས་གཞུང་ཉིན་སྣང་གི་བསྟན་རྩིས་ལྟར་ན།
༈ སྭཱསྟི་མཁས་མཆོག་དྷརྨཱ་ཤྲཱི་རབ་བྱུང་བདེ་འབྱུང་གི་བློ་ངན་ལྕགས་བྱ་ལོར་བརྩམས་པའི་རྩིས་གཞུང་ཉིན་སྣང་གི་བསྟན་རྩིས་ལྟར་ན།
རྫོགས་པའི་སངས་རྒྱས་ཆོས་སྐུར་གཤེགས་ནས་ལོ་བདུན་བརྒྱ་དང་ལྔ་བཅུ་རྩ་བཞི་འདས་པའི་ཤིང་སྟག་ལོར་གཉའ་ཁྲི་བཙན་པོ་བོད་རྗེར་ཕེབས། དེ་ནས་ལོ་ལྔ་བརྒྱ་བཟླས་པ་ཤིང་ཁྱིར་རྗེ་ཐོ་ཐོ་རི་འཁྲུངས། དེ་སྐབས་ཤམྦྷ་ལ་རིག་ལྡན་ཁྱབ་འཇུག་པ་དགུང་ལོ་ལྔ་བཅུ་རྩ་གཅིག་བཞེས་པ་ཡིན་སྐད། ཐོ་ཐོ་རི་དགུང་ལོ་དྲུག་ཅུ་པ་ཆུ་བྱ་ལ་གཉན་པོ་གསང་བ་ནམ་མཁའ་ལས་ཕོ་བྲང་སྟེང་དུ་བབ་སྟེ་དམ་པ་ཆོས་ཀྱི་དབུ་བརྙེས། ལྷ་ཐོ་ཐོ་རི་གཉན་བཙན་དེ་དགུང་ལོ་བརྒྱ་དང་ཉི་ཤུ་བཞུགས་ཏེ་ཆུ་བྱ་ལོར་གཤེགས། དེ་ནས་ལོ་བརྒྱ་དང་བཅུ་གཅིག་འདས་པ་ཤིང་བྱི་ལ་གནམ་རི་སྲོང་བཙན་འཁྲུངས། གནམ་རི་སྲོང་བཙན་གྱི་ལོ་ཉི་ཤུ་པ་ཤིང་སྤྲེལ་ལ་མ་ཁའི་ཡུལ་དུ་ཀླ་ཀློ་ཞུགས་ཤིང་ཤམྦྷ་ལར་རིགས་ལྡན་རྒྱ་མཚོ་རྣམ་རྒྱལ་ཁྲིར་འཁོད་པ་དང་མེ་མཁའ་རྒྱ་མཚོའི་དབུ་ཚུགས་པ་དུས་མཉམ། དེ་ནས་ལོ་ལྔ་འདས་པ་གླང་ལོར་སྤྱན་རས་གཟིགས་ཀྱི་སྤྲུལ་པའི་སྐུ་སྲོང་བཙན་སྒམ་པོ་སྐུ་འཁྲུངས་ཉེར་གཉིས་ལྕགས་ཕག་ལ་ར་ས་བཏབ། གྱ་གཉིས་ལྕགས་ཁྱི་ལ་ཐུགས་རྗེ་ཆེན་པོའི་ཐུགས་ཀར་ཐིམ། དབོན་མང་སྲོང་ལོ་བཅུ་གསུམ་ནས་རྒྱལ་སྲིད་ལོ་སུམ་ཅུ་བྱས་པ་ཡོས་ལ་གཤེགས། འདུས་སྲོང་ས་ཡོས་ནས་ཤིང་འབྲུག་བར་རྒྱལ་སྲིད་ལོ་ཉེར་དྲུག་བྱས། མེས་ཨག་ཚོམ་གྱིས་ཤིང་འབྲུག་ནས་ཤིང་རྟ་བར་ལོ་ལྔ་བཅུ་རྩ་གཅིག་རྒྱལ་སྲིད་མཛད་དེ་གཤེགས་༸ཁྲི་སྲོང་ལྡེའུ་བཙན་ཆུ་རྟ་ལ་འཁྲུངས་བཅུ་གསུམ་པར་ཡབ་གཤེགས་བཅུ་བཞི་ལུག་ལ་རྒྱལ་སྲིད་བྱས། ཉེར་གཅིག་ཆུ་སྟག་ལ་ཨོ་རྒྱན་ཆེན་པོ་བོད་དུ་ཕེབས་ཏེ་བསམ་ཡས་ཀྱི་ས་འདུལ་མཛད་ནས་རྨང་བཏིང་ལོ་ལྔ་མེ་རྟ་ལ་འབྱོང་། མེ་ལུག་ལ་སད་མི་བདུན་རབ་ཏུ་བྱུང་། ཞེ་གསུམ་ཤིང་བྱི་ལ་ལ་གནུབས་སངས་རྒྱས་ཡེ་ཤེས་འཁྲུངས། ང་དགུ་བཞེས་པ་ལྕགས་འབྲུག་ལ་ཞི་བར་གཤེགས། མུ་ནེ་བཙན་པོས་ཡབ་བཞུགས་བཞིན་པར་རྒྱལ་སྲིད་མཛད་ནས་ལོ་གཅིག་ཟླ་དགུ་ལོན་ཚེ་གཤེགས། མུ་ཁྲི་ལྕགས་འབྲུག་ཡབ་གཤེགས་པའི་ལོ་དེར་ཁྲིར་འཁོད་རྒྱལ་སྲིད་ལོ་བཅུ་བདུན་བྱས་པའི་མེ་སྤྲེལ་ལོར། གུ་རུ་རྔ་ཡབ་དུ་གཤེགས། མུ་ཁྲི་སྐུ་གཤེགས། མེ་སྤྲེལ་ལོ་དེར་ཁྲི་ལྡེ་སྲོང་བཙན་སད་ན་ལེགས་རྒྱལ་པོར་བསྐོས་རྒྱལ་སྲིད་ལོ་བརྒྱད་མཛད་དེ་ཆུ་ཡོས་ལ་འདས། དེ་ནས་མུ་ཁྲིའི་སྲས་ཁྲི་རལ་མེ་ཁྱི་ལོ་པ་བཅོ་བརྒྱད་ལོན་པས་རྒྱལ་སྲིད་མཛད་ནས་ལོ་བཅུ་བཞི་པ་སོ་གཅིག་མེ་འབྲུག་ལ་གཤེགས། དར་མ་རྒྱལ་པོར་གྱུར་ཏེ་ལོ་དྲུག་པ་ལྕགས་བྱར་དཔལ་གྱིས་བསྒྲལ། བླ་ཆེན་པོ་ནི་ཆུ་བྱི་ལ་འཁྲུངས་པ་རལ་པ་ཅན་གྱི་ཉེར་བདུན་སྐབས་སུ་བཞེད། མཁས་པ་འདིའི་སྒྲ་སྦྱོར་བམ་པོ་གཉིས་པར་ཁྲི་ལྡེ་སྲོང་བཙན་བཞེས་ཡོད་པ་ཡི་གེ་ནོར་ཏེ་ཁྲི་གཙུག་ལྡེ་བཙན་དུ་འབྱུང་དགོས་གསུང་བ་ནི་ལེགས་པར་བཤད་པར་བདག་གིས་སེམས་སོ། །ལྕགས་བྱ་ནས་ལོ་ལྔ་བཅུ་རྩ་གཉིས་འདས་པའི་ཆུ་གླང་བསྟན་པ་ཕྱི་དར་གྱི་ཐོག་མར་རང་ལུགས་སུ་བཞེད་འདུག འབྲོམ་གྱིས་བཞེད་པ་ལས། ལོ་ཉི་ཤུ་རྩ་ལྔས་སྔ་བར་སྣང་ལ་བསྟན་རྩིས་འདིར་འབྲོམ་གྱིས་བསྟན་པ་ཕྱི་དར་ཐོག་མ་ས་སྟག་ལོ་དེར་ཁྱུང་པོ་རྣལ་འབྱོར་འཁྲུངས་པར་བཞེད་ལ། གོང་གི་བསྟན་པ་ཕྱི་དར་གྱི་ཆུ་གླང་དེ་ནས་ད་ལྟ་རབ་བྱུང་བཅུ་གཉིས་པའི་ལྕགས་བྱ་ཡན་ལ་ལོ་དགུ་བརྒྱ་དང་ཉག་མ་དགུ་འདས་པ་ཤེས་པར་བྱའོ། །ཞེས་ཉིན་བྱེད་སྣང་བ་རྩ་འགྲེལ་ལས་མདོར་བསྡུས་པ་སརྦ་མངྒ་ལཾ།