མངའ་རིས་ཁྱུང་རྫོང་དཀར་པོའི་ཉེ་འདབས་ཀྱི་ནམ་ལིང་དགོན་སྡེར་སྡེ་པ་ལྷས་སྦྱིན་བསམ་འགྲུབ་ཀྱི་སྦྱོར་འཇགས་སོགས་གནང་བའི་དཀར་ཆག
༄༅། །མངའ་རིས་ཁྱུང་རྫོང་དཀར་པོའི་ཉེ་འདབས་ཀྱི་ནམ་ལིང་དགོན་སྡེར་སྡེ་པ་ལྷས་སྦྱིན་བསམ་འགྲུབ་ཀྱི་སྦྱོར་འཇགས་སོགས་གནང་བའི་དཀར་ཆག་བཞུགས་སོ། །
༈ ཨོཾ་སྭཱསྟི། འཁྲུལ་སྤང་ཡོན་ཏན་ཀུན་སྨིན་བྲི་གང་ཡང་བྲལ་སྟོན་པ་ཆེ། །བདེ་བར་གཤེགས་པ་མ་ལུས་ཀུན་བསྐྱེད་བརྗོད་དང་བརྗོད་བྲལ་ཡུམ། །གདུལ་བྱའི་ཚོགས་ཞིང་མྱ་ངན་འདས་པའི་ས་བོན་རྒྱལ་ཀུན་སྲས། །བླ་མེད་བླ་མ་འཇིག་རྟེན་གསུམ་མགོན་དཀོན་མཆོག་ལ་ཕྱག་འཚལ། །ཡང་དག་དོན་ལ་གདོད་མ་ཉིད་ནས་རང་བྱུང་ཀུན་ཏུ་བཟང་། །སྔགས་ཀྱི་འོག་མིན་གནས་སུ་བྱང་ཆུབ་རྒྱལ་བ་རྣམ་སྣང་མཛད། །ཐེག་ཆེན་ས་ཡི་བསྐལ་སྔོན་རྫོགས་སངས་རྒྱས་པ་རིན་ཆེན་ཏོག །མི་མཇེད་བསྐལ་བཟང་ཞིང་འདིར་རྣམ་འདྲེན་བཞི་པ་ཤཱཀྱ་ཐུབ། །བལྟམས་པའི་གླིང་མཆོག་གསེར་གྱི་ལྗོན་པས་ཡོངས་བརྒྱན་དབུས་འགྱུར་འཚལ། །མ་ག་དྷ་ཡི་བྱང་ཕྱོགས་ཧི་མ་ལ་ཡི་ཕྲེང་མཛེས་པའི། །བྷོ་ཊ་ཞེས་གྲགས་ཕྱག་ན་པདྨ་འཆང་དེའི་གདུལ་བྱའི་ཞིང་། །གྱུར་ཞིང་རྒྱལ་བསྟན་དྲི་མེད་མཆོག་ཏུ་གནས་པའི་ཡུལ་ལྗོངས་ཉིད། །ཆ་གསུམ་བྱས་པའི་སྟོད་ལ་མངའ་རིས་སྐོར་གསུམ་གྲགས་པ་ཡི། །མང་ཡུལ་གུང་ཐུང་ཞེས་པ་རྒྱལ་བས་བྱིན་གྱིས་བརླབས་པའི་གནས། །མཆོག་ཏུ་གྱུར་ཞིང་འཛམ་གླིང་འདི་ན་ས་སྐྱོངས་སུ་ཡིས་ཀྱང་། །འགྲན་མེད་མི་རྗེ་ལྷས་མཛད་ཆོས་རྒྱལ་མེས་དབོན་རྣམ་གསུམ་ཞེས། །བོད་ལ་བཀའ་དྲིན་ཆེ་བ་ལས་ཀྱང་ཆེས་ཆེར་རྨད་བྱུང་བ། །མཆོག་དེའི་གདུང་རྒྱུད་གུང་ཐང་ཆོས་རྒྱལ་བཞུགས་ནས་བཀའ་རྟགས་ཀྱི། །རྒྱལ་ཁབ་ཁྱུང་རྫོང་དཀར་པོའི་ནུབ་བྱང་མཚམས་ཀྱི་དབེན་པ་མཆོག །ནམ་མཁར་སྙེགས་འདྲ་གྱེན་ཕྱུར་རྩེ་མོར་ལིང་ངེ་ཆུ་འཛིན་ལྟར། །མཛེས་གྱུར་ནམ་ལིང་ཞེས་བྱ་སྲིད་གསུམ་འདི་ན་སྙན་པ་ཡི། །བ་དན་སྒྲེངས་བས་དཔལ་ལྡན་ས་སྐྱ་ཞེས་གྲགས་མཁས་ཤིང་གྲུབ། །དེ་ཡི་རིང་ལུགས་དྲི་མེད་འཆང་བའི་སྒྲུབ་སྡེ་གང་དེ་ལ། །རྫོང་དཀར་ཁྲིམས་འཛིན་མི་མཆོག་སྡེ་པ་ལྷས་སྦྱིན་བསམ་འགྲུབ་ཀྱིས། །ལྷག་བསམ་རྣམ་པར་དཀར་པས་རྒྱལ་བསྟན་འཛིན་པའི་སྐྱེས་སུ་ཡིས། །ཞབས་པད་རྟག་བརྟན་ཐེག་དགུའི་སྒྲོན་མེ་ཕྱོགས་མཐར་ཀུན་རྒྱས་ཤིང་། །རིས་མེད་འགྲོ་ཀུན་བདེ་དགའ་ཆེར་འཕེལ་མི་དབང་ཆབ་སྲིད་བརྟན། །ཕ་མར་གྱུར་པའི་སྒྲིབ་བྱང་གྱུར་ཅིང་བདག་གཞན་ཐམས་ཅད་ཀྱི། །འདི་དང་ཕྱི་མའི་བདེ་འབྲས་ཐོབ་ཕྱིར་སྐྱེས་བུ་ཆེན་པོའི་བློས། །དགོན་གནས་ནམ་ལིང་ཇི་སྲིད་བར་དུ་དགེ་འདུན་ལྔ་ཕྲག་ལྔས། །ལོ་རེ་བཞིན་དུ་ཆོ་འཕྲུལ་ཆེན་པོ་རྒྱལ་བའི་དུས་མཆོག་གི །དཀར་ཕྱོགས་ཚེས་པ་གསུམ་བཞི་ལྔ་པ་ཉིན་ལྟར་བཞིན་དུ་ནི། །སྟོང་ཉིད་མཁའ་ལ་སྙིང་རྗེས་སྤྱོད་མའི་སྒྲུབ་ཐབས་རྩ་བཤད་ལུགས། །རྡུལ་བྲལ་ད་ལར་འབྱུང་བའི་དམར་ཆས་ཡོངས་བྱུག་རྟེན་ཉིད་ལ། །ལྷ་སྔགས་ཏིང་འཛིན་ཡོངས་རྟེན་ཡན་ལག་བཞི་ལྡན་ཆོ་ག་མཆོག །ཉིན་རེ་ལ་ནི་ལན་གསུམ་དག་ཏུ་མཉེས་བྱས་མཁའ་སྤྱོད་ཀྱི། །གྲོང་ཁྱེར་འཆི་མེད་ཉམས་དགའི་གནས་སུ་ཡོངས་བགྲོད་སྐལ་འཇོགས་ཤིང་། །དམ་ཅན་དགྱེས་ནས་ལམ་གྱི་བར་ཆད་སེལ་ཕྱིར་ཟླ་བ་ནི། །བྱུང་ངོ་ཅོག་གི་ཉི་ཤུ་དགུའམ་ཡང་ན་གནམ་སྟོང་ལ། །ནག་པོ་ཆེན་པོ་རྡོ་རྗེའི་གུར་དང་ཞལ་བཞི་པ་ཡི་ནི། །མཆོད་བསྐང་གསོལ་ཁ་དག་གཙང་བརྒྱ་རྩ་རེ་ནི་དུས་རྟག་པར། །འཛུག་པའི་མཐུན་རྐྱེན་རྡོ་བཅུད་ནཻམྤ་ལ་ཡི་ལྟང་རྩེ་གྲངས། །བརྒྱ་ཕྲག་གཅིག་དང་ཟུང་གཉིས་གཅིག་གི་ལྷག་བཅས་སྦྱོར་འཇགས་སུ། །བགྱིས་པའི་དགེ་རྩ་དེ་དང་དེ་རིགས་ལས་བྱུང་གཅིག་སྡོམས་པའི། །བསོད་ནམས་གྱུར་ཀུན་རྣམ་མཁྱེན་རྫོགས་སངས་རྒྱས་པའི་རྒྱུར་བསྔོ་ཞིང་། །གནས་སྐབས་སུ་ཡང་སྐྱེ་བ་འདི་ནས་མཐར་ཐུག་བར་དུ་ནི། །ངན་སོང་གནས་སུ་མི་སྐྱེ་མཐོ་རིས་བདེ་ཐོབ་སྡིག་སྒྲིབ་ཟད། །རྒྱལ་བའི་བསྟན་ལ་ལྷག་ཏུ་བྱ་བ་ཆེར་བྱས་དོན་གཉིས་འགྲུབ། །ནམ་ཞིག་འཆི་ཚེ་འཁྲུལ་པའི་འཇིགས་སྐྲག་མེད་པར་དེ་བཞིན་དུ། །རྒྱལ་བ་རྡོ་རྗེ་བཙུན་མོའི་མཁའ་སྤྱོད་དགའ་བའི་གྲོང་ཁྱེར་དུ། །བསུས་ནས་དག་པའི་ས་ལ་ཡོངས་སྤྱོད་དཔའ་བོ་དྷཱཀྐི་མཆོག །རྣམས་དང་སྐལ་བ་མཉམ་ནས་ཧེ་རུ་ཀ་འབྲས་རབ་ཐོབ་ཤོག །གང་དུ་སྐྱེ་དང་གནས་ཡུལ་བཀྲ་ཤིས་དགེ་ལེགས་ཡོན་ཏན་ཚོགས། །རབ་བརྒྱན་ཚེ་རིང་ནད་མེད་ཕུན་ཚོགས་འབྱོར་པ་མཐའ་དག་རྒྱས། །མི་མཐུན་ཀུན་ཞི་བསམ་དགུ་ཐམས་ཅད་ཆོས་མཐུན་འབད་མེད་འགྲུབ། །རྒྱལ་བས་བསྔགས་གྱུར་རྡོ་རྗེ་སློབ་དཔོན་མཆོག་གི་ཞལ་མཇལ་ཞིང་། །སྡེ་སྣོད་གསུམ་དང་རྡོ་རྗེ་ཐེག་མཆོག་བདུད་རྩིའི་ཡོངས་མྱོང་ནས། །རྒྱལ་ཀུན་གཤེགས་ཤུལ་ཚེ་གཅིག་ཉེ་ལམ་ངེས་གསང་སྙིང་པོའི་དོན། །བརྗོད་བྲལ་ལྷན་སྐྱེས་གཉུག་མ་ཀ་དག་ཡེ་ཤེས་ཆེན་པོ་གང་། །དྲི་མ་ཀུན་སྤངས་ཡང་དག་མཆོག་རྟོགས་སྐུ་གཉིས་མྱུར་ཐོབ་ཤོག །གཞན་ཡང་གངས་རིས་བརྒྱན་པའི་ལྗོངས་འདིར་སངས་རྒྱས་པ་མཆོག །ནུབ་མེད་རབ་ཏུ་རྒྱས་ཤིང་དེ་འཛིན་སྐྱེས་བུ་དམ་པ་རྣམས། །ཐུགས་ཡིད་རབ་མཐུན་མཛའ་གཅུགས་མཛད་བཟང་གོང་བུ་གཅིག་འདྲེས་ཤིང་། །སྐུ་ཚེ་ཉི་ཟླ་ལྟར་བརྟན་འཕྲིན་ལས་ཉམས་མེད་ཀུན་ཏུ་འཕེལ། །མཐའ་དམག་དུས་འཁྲུགས་མཚོན་དང་མུ་གེའི་བསྐལ་པ་རབ་ཞི་ཞིང་། །རྒྱལ་བསྟན་སྙིང་པོ་ལ་གུས་མི་དབང་ཆེན་པོའི་ཆབ་སྲིད་རྒྱས། །སྐྱེས་འགྲོ་ཐམས་ཅད་བདེ་དགའི་དཔལ་ལ་ལོངས་སྤྱོད་དགེ་མཚན་ཆེ། །ཕྱོགས་དུས་ཀུན་ཁྱབ་ཡུན་ནས་ཡུན་དུ་རྟག་པར་རབ་གནས་ཤོག །
ཅེས་མངའ་རིས་ཁྱུང་རྫོང་དཀར་པོར་སྐྱེ་འགྲོ་མཐའ་དག་བདེ་བར་སྐྱོང་བའི་ཁྲིམས་འཆང་མི་མཆོག་དམ་པ་གཞུང་བཟང་དད་གུས་ཤེས་རབ་ལ་སོགས་ཡོན་ཏན་དུ་མ་ཡིས་ཡོངས་སུ་བརྒྱན་ཞིང་སྡེ་ཐེག་པ་ཆེན་པོ་ལ་ལས་སྨོན་བཟང་པོས་མཐུས་གྲུབ་པའི་སྡེ་པ་ཀུན་གསལ་བ་ལྷས་སྦྱིན་བསམ་འགྲུབ་ཀྱིས་བསྟན་འགྲོའི་དོན་དང་རང་གཞན་གྱི་སྒྲིབ་བྱང་ཚོགས་རྫོགས་ཆེད་དུ་ནམ་ལིང་དགོན་སྡེར་ཕུར་བུ་ཞེས་སྤྲེལ་ནས་བཟུང་དགོན་གནས་ཇི་སྲིད་བར་དུ་ལོ་ལྟར་བཞིན་ཟླ་བ་དང་པོའི་ཚེས་གསུམ་ནས་ལྔ་ཡི་བར་ནཱ་རོ་མཁའ་སྤྱོད་ཀྱི་ཆོ་ག་ཉིན་རེ་བཞིན་ཚར་གསུམ་རེ་དང་། ཟླ་བ་བྱུང་ངོ་ཅོག་གི་དགུའམ་སྟོང་ལ་གུར་ཞལ་གྱི་བསྐང་གསོལ་བརྒྱ་ཕྲག་རེ་ཆགས་མེད་གནང་རྒྱུའི་མཐུན་རྐྱེན་རྡོ་བཅུད་ནཻམྤ་ལ་ཡི་ལྟང་རྩེ་བརྒྱ་དང་བཞི་ལྷག་སྦྱོར་འཇགས་མཛད་པའི་དཀར་ཆག་སྨོན་ལམ་ས་བོན་ཙམ་དུ། རྒྱལ་དབང་པདྨ་འབྱུང་གནས་ཀྱི་བྱིན་རླབས་ཅུང་ཟད་ཞུགས་པར་རློམས་པའི་ཀཿཐོག་སྔགས་འཆང་རིག་པ་འཛིན་པ་ཚེ་དབང་ནོར་བུས་ས་སྤྲེལ་ཆོ་འཕྲུལ་ཟླ་བའི་དུས་བཟང་ཚེས་བཅུར་གང་ཤར་ཆུ་བབས་དུ་བྲིས་པའི་དགེ་བས་སྦྱིན་བདག་མཆོག་གི་སྐུ་ཚེ་འཕྲིན་ལས་ཉམས་མེད་བརྟན་པར་གྱུར་ཅིག མངྒ་ལཾ།