གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ།

༄༅། ། ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་བཞུགས་སོ༔

ན་མོ་པདྨ་བཛྲ་ཡེ༔ འགྲོ་བ་ཡང་དག་སངས་རྒྱས་ལམ༔ སྣ་ཚོགས་ཚུལ་གྱིས་སྟོན་མཛད་པ༔ རང་བྱུང་རང་གྲོལ་སྤྲུལ་བའི་སྐུ༔ སངས་རྒྱས་པདྨ་ལ་ཕྱག་འཚལ༔ ནང་སྒྲུབ་ཡིད་བཞིན་ནོར་བུ་མཆོག༔ ཉམས་ལེན་སྐལ་ལྡན་སྐྱེས་བུ་ཡིས༔ སྒྲུབ་པའི་གནས་སུ་དམ་རྫས་བསག༔ སྐུ་རྟེན་བདེ་བ་ཆེན་པོ་མཆོག༔ གསུང་རྟེན་གསང་སྔགས་གསེར་གྱིས་བྱས༔ ཐུགས་རྟེན་ཤེལ་རྡོ་མེ་ལོང་དང་༔ ཕྱི་ནང་གསང་མཆོད་རྒྱས་པར་བཀྲམ༔ དམ་ཚིག་གཙང་ལ་ལྟ་གདེང་བསྐྱེད༔ ཨ༔ ཀ་དག་དབྱིངས་ལས་ཡེ་ཤེས་རོལ་བའི་རྩལ༔ འོད་གསལ་ལྷུན་གྲུབ་རྒྱན་གྱི་འཁོར་ལོ་ལས༔ སྣང་སྲིད་རྣམ་དག་པདྨོ་བཀོད་པའི་ཞིང་༔ ཟག་མེད་འདོད་ཡོན་ཆོས་དབྱིངས་ཁྱོན་ཀུན་འགེངས༔ སྙོག་བྲལ་མཚོ་དབུས་དྲི་མེད་པདྨའི་སྟེང་༔ ཐོལ་སྐྱེས་རང་བྱུང་བླ་མ་པདྨ་འབྱུང་༔ སྐུ་མདོག་དཀར་དམར་ཞལ་གཅིག་ཕྱག་གཉིས་པ༔ ཞབས་གཉིས་བཞེངས་སྟབས་ཐབས་ཀྱིས་འགྲོ་བ་འདུལ༔ ཕྱག་གཡས་རྡོ་རྗེས་དཔའ་བོ་དབང་སྡུད༔ གཡོན་པའི་ཐོད་པས་མ་ཚོགས་མཁའ་འགྲོ་འགུགས༔ ཞལ་འཛུམ་སྤྱན་གདང་སྤྱན་རྩ་ཉི་ལྟར་འཁྱིལ༔ ཤངས་ཀྱི་གཟེངས་མཐོ་ཚེམས་དཀར་སྙན་ཤལ་རིང་༔ སྨིན་མ་གནག་སྣུམ་ཁྱུང་ཆེན་གཤོག་པ་འདྲ༔ དབུ་ལ་མཐོང་གྲོལ་པདྨའི་ཅོད་པཎ་མཛེས༔ གསང་བའི་གོས་དཀར་ཕོད་ཀ་མཐིང་ཀའི་སྟེང་༔ ཆོས་གོས་དམར་པོ་རིན་ཆེན་སྟོད་གཡོགས་གསོལ༔ ཁྲོ་ཆགས་སྒེག་པས་འགྲོ་བློ་དབང་དུ་སྡུད༔ ཧུར་བག་བརྩེ་བའི་སྤྱན་གྱིས་བདག་ལ་གཟིགས༔ འབྱུང་ལྔ་རྣམ་པར་དག་པའི་མཁའ་འགྲོ་ལྔ༔ ཚོགས་བརྒྱད་རང་སར་དག་པའི་མཚན་མཆོག་བརྒྱད༔ འགྲོ་བའི་རེ་སྐོང་བསམ་པ་ལྷུན་གྲུབ་པའི༔ མ་ངེས་རྣམ་འགྱུར་མཁའ་ལ་འཇའ་ལྟར་ཤར༔ སྐུ་ཡི་མཚན་དཔེས་སྣང་སྲིད་ཟིལ་གྱིས་གནོན༔ གསུང་དབྱངས་སྙན་པས་ལྷ་འདྲེ་མི་གསུམ་འདུལ༔ ཐུགས་ཀྱི་བརྩེ་བས་དད་ལྡན་རྗེས་སུ་འཛིན༔ མཐོང་ཐོས་དྲན་པས་བྱིན་རླབས་གཟི་བྱིན་འབར༔ ཁྱོད་སྐུ་རྡོ་རྗེ་གསུམ་གྱི་དཀྱིལ་འཁོར་ལས༔ ཆོས་ཉིད་སྐུ་དང་ལོངས་སྤྱོད་རྫོགས་པའི་གཏེར༔ ཞི་ཁྲོ་རབ་འབྱམས་བསམ་མི་ཁྱབ་པའི་འཕྲུལ༔ མ་ལུས་རྒྱལ་བའི་ཞིང་ཀུན་ཐེམ་མེར་གཏམ༔ རང་གི་སྙིང་དབུས་ཆོས་ཀྱི་འཁོར་ལོའི་དབྱིངས༔ དད་དམ་འགྱུར་མེད་མི་ཤིག་རྡོ་རྗེའི་ལྟེར༔ མཐིང་གསལ་ཧཱུྃ་གི་ནཱ་དའི་འོད་ཟེར་གྱིས༔ རྒྱལ་ཀུན་རྒྱུད་བསྐུལ་དབྱིངས་ནས་སྤྱན་དྲངས་གྱུར༔ སྤྱན་འདྲེན་པ་ནི༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ བུ་ངས་གདུང་བའི་དབྱངས་ཀྱིས་བསྐུལ༔ ཕ་གཅིག་ཐུགས་རྗེ་མ་གཡེལ་བྱོན༔ སྐུ་ཡི་གར་སྟབས་ཤིག་སེ་ཤིག༔ གསུང་གི་བརྡ་གླུ་གྱུ་རུ་རུ༔ ཐུགས་ཀྱི་བྱིན་རླབས་ད་ལ་ལ༔ བརྩེ་ཆེན་སྤྱན་གྱིས་ད་ལྟ་གཟིགས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ ཧཱུྃ་གིས་ཐུགས་དམ་བསྐུལ་ལོ་པདྨ་འབྱུང་༔ རྟོགས་སྒྲིབ་བག་ཆགས་སོལ་ཅིག་ཐུགས་རྗེའི་བདག༔ ཁྱོད་ཐུགས་ཟག་པ་ཀུན་བྲལ་མཁའ་ལྟར་བརྡལ༔ བདག་ཡིད་གཅིག་འདྲེས་རང་གྲོལ་དོན་ལ་བལྟ༔ རྩ་སྙིང་ནི༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དབྱངས་སུ་གྱེར་ཞིང་གསོལ་བ་འདེབས༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ མོས་གུས་རྩེ་གཅིག་ཏུ་བསྐྱེད༔ བླ་མ་ལས་བསམ་རྒྱུ་མེད་པ༔ དད་པ་ལས་བློ་སྣ་མེད་པ༔ སྣང་སྲིད་བླ་མར་ཤར་བའི་ངང་དུ་ལྟ་བའི་གདེང་བསྐྱེད་ལ༔ གསོལ་བ་ཕུར་ཚུགས་སུ་བཏབ་པས༔ དེ་མ་ཐག་ཏུ་བྱིན་རླབས་ཐོབ༔ བརྒྱུད་གསུམ་རིག་འཛིན་བླ་མའི་བྱིན་རླབས་སྙིང་ལ་ཞུགས་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་འགྱུར་རོ༔ ཐོད་ཕྲེང་རྩལ་གྱིས་ཛཔྲ་ཀྱིས་བསྐུལ༔ མཉམ་པར་བཞག༔ ཐུགས་དམ་གནད་ནས་བསྐུལ་བ་སོགས་ཉམས་དང་བསྟུན༔ བདུད་རྩི་བྱིན་རླབས་བྱ་འདོད་ན༔ བུམ་པ་གཞལ་ཡས་ཁང་གི་ནང་དུ༔ བུམ་ལྷ་གུ་རུ་པདྨ་འབྱུང་གནས་ཀྱི་ལྷ་ཚོགས་སྤྲིན་འཐིབ་པ་ལྟར་གསལ་བཏབ༔ གནས་གསུམ་ཡི་གེ་གསུམ་ལས་བྱུང་བའི་སྐུ་གསུང་ཐུགས་ཀྱི་བདུད་རྩི་དོན་གཉིས་སྒྲུབ་པའི་ནུས་ལྡན་དུ་དམིགས༔ ཨ་ལས་ཆོས་དབྱིངས་བུམ་པ་རུ༔ བདུད་རྩི་བདེ་ཆེན་དྲོད་རླངས་འཐིལ༔ ཨོཾ་ཨཱ༔ཧཱུྃ་གིས་བྱིན་རླབས་པས༔ མྱོང་གྲོལ་ཡེ་ཤེས་མཆོག་ཏུ་གྱུར༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང་༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཐོད་ཕྲེང་རྩལ་གྱི་ཛཔྲ་དབྱངས་བྱ༔ བདུད་རྩི་མྱོང་བས་རྩ་ཁམས་ཀྱི་དཔའ་བོ་མཁའ་འགྲོ་མཉེས་ཤིང་ཚིམ༔ རང་ལུས་རྡུལ་ཕྲ་རབ་ཀྱི་ཆ་རེ་རེ་ནས་པདྨ་འབྱུང་གནས་འཇའ་ལུས་དྭངས་མའི་སྐུ་འགུལ་འགུལ༔ ཤིག་ཤིག༔ འོད་ཆེམ་ཆེམ་དུ་གྱུར་བའི་ངང་ལ་མཉམ་པར་འཇོག༔ གཞན་དོན་ཁྲུས་དང་དབང་བསྐུར་བྱིན་རླབས་བྱས་པས་ཀྱང་དོན་འགྲུབ་པོ༔ ཐུན་སྐབས་སུ༔ ཨ༔ མཁའ་དབྱིངས་རྒྱལ་བ་རབ་འབྱམས་གཙོ་བོར་འདུས༔ གཙོ་བོ་འཇའ་ལུས་ཟུང་འཇུག་རྡོ་རྗེའི་སྐུ༔ འཐེབ་སོར་ཙམ་ཞིག་གཙུག་ནས་སྙིང་དབུས་བབ༔ བྱིན་རླབས་དབང་དང་དངོས་གྲུབ་མཆོག་ཐོབ་དམིགས༔ ཨ་ཨ་ཨ༔ བླ་མའི་ཐུགས་དང་རང་སེམས་དབྱེར་མེད་པ་ངེས་པའི་དོན་ལ་མཉམ་པར་འཇོག༔ སླར་ཡང་སྣང་གྲགས་རྟོག་ཚོགས་བླ་མའི་སྐུ༔ རྩོལ་མེད་མ་བཅོས་རིག་པའི་ངོ་བོར་བཞུགས༔ དགེ་བ་འདི་ཡིས་འགྲོ་བ་མ་ལུས་པ༔ ཡེ་ཤེས་བླ་མའི་ས་མཆོག་མྱུར་ཐོབ་ཤོག༔ ཨ་ཧོ༔ པདྨ་འབྱུང་གནས་ཐུགས་ཐིག་འདི༔ སྐལ་བ་ལྡན་པའི་དཔལ་དུ་ཤོག༔ གར་དབང་བདེ་ཆེན་རོལ་བ་ཡིས༔ ཡེ་ཤེས་ཟབ་མོ་དགོངས་གཏེར་རོ༔ ས་མ་ཡ༔ ཞེས་པའང་རྡོ་རྗེ་ཚེ་དབང་ནོར་བུའི་གཏེར་སྐལ་ལོ༔ བཀྲ་ཤིས་དགེ༎