གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་གཏོར་དབང་བྱིན་རླབས་ཆར་འབེབས།
༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ གཏོར་དབང་བྱིན་རླབས་ཆར་འབེབས་བཞུགས་སོ༔
ན་མོ་མ་ཧཱ་གུ་རུ་པདྨ་བཛྲ་ཡེ༔ སྤྲོས་པ་མེད་པའི་བླ་མ་ཡིས༔ དད་པ་ལྡན་པའི་སློབ་མ་ལ༔ བྱིན་རླབས་ཅིག་ཆར་འཕོ་བའི་ཐབས༔ གཏོར་དབང་བྱིན་རླབས་ཆར་འབེབ་བསྟན༔ རིན་ཆེན་སྣོད་དུ་གཏོར་མ་བཤམ༔ མཆོད་པས་དུ་མས་མཐའ་ནས་བསྐོར༔ གུ་རུ་ཡིད་བཞིན་ནོར་བུ་ལ༔ གསོལ་བ་བཏབ་ལ་དབང་བཞི་བླངས༔ ཁྲུས་བྱས་བགེགས་བསྐྲད་སྲུང་འཁོར་སྒོམས༔ ཆོས་བཤད་ཡོན་ཕུལ་གསོལ་བ་བཏབ༔
༈ ལོ་རྒྱུས་བརྗོད་པ་ནི༔ འོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེ་ཡི་ཆེད་དུ་ཀུན་བཟང་པདྨ་ཞི་ཁྲོ་བསམ་པ་ལྷུན་གྲུབ་ཀྱི་གུ་རུ་པདྨ་ཡིད་བཞིན་ནོར་བུའི་གཏོར་དབང་བྱིན་རླབས་ཆར་འབེབས་ཞུ་སྙམ་པའི་རྟོག་པ་བསྡུས་ཏེ་ཡིད་རྩེ་གཅིག་མོས་པ་བརྟན་པོས་གསན་པར་ཞུ། དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་དེས་གདུལ་བྱའི་བློ་དང་འཚམས་པར་ཐར་པའི་འཇུག་སྒོ་དམ་པའི་ཆོས་ཚུལ་ཇི་སྙེད་གསུང་པ་ལ་མཆོག་ཏུ་གྱུར་པ་འབྲས་བུ་གསང་སྔགས་རྣལ་འབྱོར་བླ་ན་མེད་པ་སྟེ། དེ་ཡང་སྤྱིར་བྱིན་རླབས་ཀྱི་འཇུག་སྒོ་རྨད་དུ་བྱུང་ཞིང་ཁྱད་པར་དཀྱིལ་འཁོར་ཐམས་ཅད་ཀྱི་གཙོ་མཆོག་བདེ་བར་གཤེགས་པ་ཡོངས་སུ་འདུས་པའི་ངོ་བོ་ཆིག་དྲིལ་ལམ་ཟབ་མོ་བླ་མའི་སྒྲུབ་པ་ཁོ་ན་ཡིན་ལ། དེ་ཡང་། བདུད་རྩི་འབྱུང་བའི་རྒྱུད་ལས༔ ལྷ་སྐུ་འབུམ་ཕྲག་བསྒོམ་པ་བས༔ བླ་མ་གཅིག་པུ་སྒོམ་པ་མཆོག༔ ཅེས་དང་༔ རྒྱུད་ཆེན་དྲ་བ་ལས། བླ་མ་སངས་རྒྱས་ཀུན་གྱི་རྗེ༔ རྒྱལ་བའི་མན་ངག་གསང་ཆེན་རྣམས༔ སྟོན་པ་རྡོ་རྗེའི་ཐུགས་ལ་གནས༔ གཙོ་རུ་བླ་མ་རྡོར་འཛིན་སྒོམ༔ ཅེས་དང་༔ སངས་རྒྱས་འདུས་པ་ལས༔ གང་གི་གདུལ་བྱའི་ཡིད་བཞིན་དུ༔ བླ་མ་སྒྲུབ་པའི་ཐབས་བརྩམས་ཏེ༔ དེ་ཉིད་དོན་དུ་སུས་གཉེར་བ༔ ཐེག་ཆེན་བླ་མའི་ས་ཡིན་ནོ༔ ཀུན་གྱི་བདག་ཉིད་ཆེན་པོར་འགྱུར༔ ཅེས་གསུངས༔ ནམ་མཁའ་ཆེའི་རྒྱུད་ལས༔ ཚོགས་གཉིས་མྱུར་རྫོགས་སྙིང་པོ་ཡི༔ དོན་རྟོག་འདོད་ན་བླ་མ་སྒྲུབ༔ ཅེས་སོགས་ལུང་འབྱམས་ཀླས་པར་འབྱུང་བ་བཞིན་བླ་མའི་སྒྲུབ་ཐབས་ནི་མཆོག་དང་གཙོ་བོར་གྱུར་པ་སྟེ། དེ་ཡི་སྒྲུབ་ཐབས་ཀྱི་སྒོ་བསམ་གྱིས་མི་ཁྱབ་པ་ལས་འདིར་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་འདུས་པའི་རང་གཟུགས་གདོད་མ་ཉིད་ནས་ཆོས་སྐུ་ཀུན་ཏུ་བཟང་པོར་མངོན་པར་བྱང་ཆུབ་པ་ཉིད་པདྨ་རྣམ་པར་བཀོད་པའི་ཞིང་དུ་འོད་སྣང་དཔག་མེད་གངས་ཅན་མཚོ་སོགས་ལོངས་སྤྱོད་རྫོགས་པའི་སྐུ་དང་ཐུགས་རྗེའི་གདུལ་ཞིང་འབྱམས་ཀླས་པར་སྤྲུལ་པའི་བཀོད་པ་བསམ་གྱིས་མི་ཁྱབ་པ་ལས་མི་མཇེད་འཇིག་རྟེན་འདིར་ཡང་བསྐལ་པ་བཟང་པོའི་སངས་རྒྱས་སྟོང་ལ་དབང་བསྐུར་ནས་ལུང་སྟོན་པར་བྱེད་པ་པོ་སངས་རྒྱས་ནུས་ལྡན་རྡོ་རྗེར་གྱུར་ཞིང་བསྐལ་བཟང་སངས་རྒྱས་རེ་རེ་བཞིན་དེ་ཡི་ཕྲིན་ལས་མཐའ་དག་གི་བྱེད་པོ་རྒྱལ་བའི་བསྟན་ལ་སྟོན་པ་གཉིས་པ་ལྟ་བུར་རྟག་ཏུ་སྤྲུལ་བཞིན་བདག་ཅག་གི་སྟོན་པ་ཐུབ་པའི་དབང་པོའི་བསྟན་པ་ལ་ཡང་སྲིད་པ་གསུམ་དང་འཛམ་གླིང་འགྲོ་བ་རྣམས་ལ་རྒྱལ་བ་ཉིད་དང་རྣམ་དབྱེར་མེད་པའི་འཕྲིན་ལས་བཞིའི་སེམས་ཅན་གྱི་དོན་མཛད་པ་ཡིད་བཞིན་ནོར་བུ་རིན་པོ་ཆེ་ལྟ་བུའི་གུ་རུ་པདྨ་འབྱུང་གནས་ཀྱི་སྒྲུབ་ཐབས་ཏེ། རྒྱལ་བ་དེ་ཉིད་ལ་གངས་ཅན་གྱི་རྗེ་འབངས་སྐལ་ལྡན་ལས་ཅན་རྣམས་ཀྱི་གསོལ་བ་བཏབ་པར་བརྟེན་ཟབ་རྒྱས་ཀྱི་ཆོས་ཚུལ་ཇི་སྙེད་གསུངས་ཤིང་སྙིགས་མའི་དོན་དུ་ཟབ་མོའི་གཏེར་དུ་བཙས་པར་མཛད་པ་ལས། འདིར་ནི་རང་གཞུང་རྩ་བ་རྡོ་རྗེའི་ཚིག་རྐང་ལས། རིགས་དང་དཀྱིལ་འཁོར་ཀུན་གཙོ་ཆེ་བའི་མཆོག༔ བླ་མེད་བླ་མའི་སྒྲུབ་ཐབས་བྱེ་བ་འབུམ༔ ཡང་སྙིང་ཞུན་ཏིག་མོས་གུས་གསོལ་འདེབས་ཉིད༔ དེ་ཡི་མཐར་ཐུག་དགོས་འདོད་ཀུན་འབྱུང་གཏེར༔ གངས་ཅན་ལྷ་གཅིག་སངས་རྒྱས་པད་འབྱུང་གིས༔ བོད་ཡུལ་ཐུན་མོང་སྐུ་དངོས་གདུལ་བྱ་རྣམས༔ བཏུལ་བྱས་རྔ་ཡབ་གཤེགས་སྐབས་གུང་ཐང་ལར༔ རྗེ་འབངས་རྣམས་ལ་ཞལ་ཆེམས་ཚུལ་གསུངས་པའི༔ གསོལ་འདེབས་རྒྱལ་པོ་བསམ་པ་ལྷུན་གྲུབ་ཅེས༔ མན་ངག་བཅུ་གསུམ་བསམ་འཕེལ་དངོས་གྲུབ་མཛོད༔ ཅེས་པའི་གདམས་པ་འདི་ཉིད་ནི། གཏེར་ཆེན་རྡོ་རྗེ་གླིང་པའི་གཏེར་ལུང་ལས། ནམ་སྙིང་ཐུགས་སྤྲུལ་པདྨའི་གསུང་གི་འཕྲུལ༔ ནག་པོ་སྤྱོད་པའི་སྐུ་ཡི་སྤྲུལ་བ་ཞིག༔ ཨིནྡྲའི་མཚན་འཆང་སྟག་ལོར་སྤྲུལ་གར་སྒྱུར༔ དུས་འཁྲུགས་བཟློག་ཅིང་བསྟན་པ་ཐབས་ཀྱིས་གསོ༔ འབྲེལ་ཚད་བདེ་བ་ཅན་དུ་ཨེ་མ་ཧོ༔ ཞེས་དང་རོལ་བའི་རྡོ་རྗེས་གཏེར་ལུང་ལས༔ ནམ་སྙིང་སྤྲུལ་བ་འཕོ་བའི་བག་ཆགས་བཅོམ༔ སྟག་ལོ་བརྟུལ་ཞུགས་སྤྱོད་པ་དབང་པོའི་མིང༔ རྟེན་འབྲེལ་ཚོགས་ན་མཆོག་གི་གཏེར་ལྔ་འདྲེན༔ མཐའ་དམག་བཟློག་ཅིང་རྒྱལ་བསྟན་ཉམས་པ་གསོ༔ ཞེས་དང་པདྨ་བདེ་ཆེན་གླིང་པའི་གསང་བ་ཡེ་ཤེས་ཀྱི་མཆོག་གི་ཆོས་བདག་ལུང་དུ་བསྟན་པ་ལས། རྒྱལ་སྲས་ཤནྟ་དེ་བ་དང༔ ནག་པོ་སྤྱོད་པའི་སྐུ་ཡི་གར༔ ཙནྡྲ་གོ་མའི་གསུང་གི་བྱིན༔ འཕགས་ཡུལ་གྲུབ་པའི་རིག་འཛིན་བརྒྱད༔ གཅིག་འདུས་པདྨ་ཐོད་ཕྲེང་དང༔ ནམ་མཁའི་སྙིང་པོའི་ཐུགས་ལས་སྤྲུལ༔ བཻ་རོ་ཙཱ་ནའི་ཡོན་ཏན་དང༔ ཆོས་རྒྱལ་ཆེན་པོའི་འཕྲིན་ལས་ཉིད༔ ཨ་ཡི་ཐབས་ལ་བཛྲ་ཡུམ༔ ཚེ་དབང་མཚན་ཅན་སྟག་གི་ལོ༔ གྲུབ་པའི་རྟགས་ནི་ཐོགས་མེད་སྟོན༔ ལུས་ལ་སྨེ་བའི་དོ་ཤལ་ཅན༔ དཔྲལ་བར་དབང་གི་ཆོས་འབྱུང་བཀྲ༔ རང་བྱུང་མཁྱེན་རབ་ཁོངས་ནས་རྡོལ༔ གསང་ཆེན་བསྟན་པ་ཕྱོགས་བརྒྱར་སྤེལ༔ འཕྲིན་ལས་ཉི་ལྟར་གསལ་བ་འབྱུང༔ ཞེས་གསུང་པའི་སྤྲུལ་བའི་གཏེར་ཆེན་གང་གི་ཆོས་སྐལ་མཆོག་གི་གཏེར་ལྔ་རྟེན་འབྲེལ་གྱིས་འགྲོ་བའི་བསོད་ནམས་ཀྱི་དཔལ་དུ་མ་གྱུར་ཀྱང་། ས་གཏེར་ཀོང་པོ་བུ་ཆུའི་གདམས་ཕྲན་སྐོར་བཏོན་པ་དང་། འགྱུར་མེད་གཏན་འཁྱིལ་གྱི་མཚོའི་རོལ་བའི་རྡོ་རྗེའི་གཏེར་མཇུག་བསྐྱངས་པ་དང་། དགོངས་གཏེར་ལ་ཟབ་ལམ་ཨུ་པ་དེ་ཤ་དང་སྙན་བརྒྱུད་ཌཱཀྐིའི་གན་མཛོད། གསང་ལམ་ཌཱཀྐིའི་སྙིང་ཁྲག་དེ་སྐོར་སོ་གསུམ་བཞུགས་པ་ལས། འདི་ནི་ཡིག་མེད་ཨུ་པ་དེ་ཤའི་རྩ་བར་གྱུར་པ་དམ་པ་མཆོག་ལ་ཨོ་རྒྱན་ཆེན་པོས་ཡང་ཡང་གསུངས་པའི་གདམས་པ་རྒྱ་མཚོ་ལྟ་བུའི་སྙིང་པོ་འདི་ནི་གུ་རུ་མཆོག་གིས་ལན་གྲངས་བདུན་དུ་ཞལ་གཟིགས་ཤིང་དགོངས་པའི་གཏེར་མཛོད་ཆེན་པོ་ནས་སྤྱན་དྲངས་ཏེ་སྲས་སློབ་རིག་འཛིན་བར་མ་ཆད་པའི་བརྒྱུད་པ་བྲེང་ཆགས་སུ་བྱོན་པའི་གདམས་པ་ཟབ་མོ་ལ་སྨིན་གྲོལ་གཉིས་སུ་བཞུགས་པའི་སྔ་མ། རྒྱས་བསྡུས་གཉིས་སུ་བཞུགས་པའི་ཤིན་ཏུ་བསྡུས་པ་བྱིན་རླབས་ཆིག་རྫོགས་སུ་འཕོ་བའི་གཏོར་དབང་བྱིན་རླབས་ཆར་འབེབ་ཡིན་ནོ། དེ་ལ་བླ་བསྒྲུབ་ཐམས་ཅད་ཀྱི་དྭངས་མ་ཀུན་འདུས་ཡིད་བཞིན་ནོར་བུའི་དབང་བསྐུར་སྒྲུབ་པར་བྱེད་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་བྱིན་རླབས་དབང་བསྐུར་ཟབ་མོ་ཞུ་བའི་ཡོན་ཏུ་མཎྜལ་འབུལ་བ་ཞུ་ཞེས་བརྗོད། སློབ་མས་ཀྱང་མཎྜལ་འབུལ། བླ་མ་དང་དཀྱིལ་འཁོར་གཙོ་མཆོག་གུ་རུ་ཡིད་བཞིན་ནོར་བུ་ཐ་མི་དད་པའི་སྤྱན་སྔར་དབང་སྐུར་ཟབ་མོ་ཞུ་བའི་དོན་ཏུ་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཞི་ཁྲོ་འདུས་པའི་བླ་མ་རྗེཿ གུ་རུ་ཡིད་བཞིན་ནོར་བུ་ཡི༔ སྐུ་གསུང་ཐུགས་ཀྱི་ཡེ་ཤེས་བྱིན༔ དབང་མཆོག་མ་ལུས་བསྩལ་དུ་གསོལ༔ ལན་གསུམ། བླ་མས། ལྡོག་མེད་དད་དང་དམ་ཚིག་ཅནཿ གསང་བའི་གནས་འདིར་ཞུགས་པ་ལེགསཿ བཟང་ངན་བརྟུལ་ཞུགས་སྤྱོད་པ་ཡིསཿ རྡོ་རྗེའི་དམ་ཚིག་ཁྱོད་ཀྱིས་ལོངསཿ ཞེས་བཀའ་བགོས། ཐོག་མར་སྒྲིབ་པ་བསལ་བ་ནི། མེ་ཐབ་བཤམ་ལ། དེ་ནས་དཀྱིལ་འཁོར་གཉན་པོར་འཇུག་པའི་སྒྲིབ་པ་བསལ་བའི་ཕྱིར་ཏུ། མདུན་དུ་དྲག་པོའི་ཐབས་ཁུང་གྲུ་གསུམ་དུ་མེ་སྦར། ཏིལ་ནག་ལ་སྡིག་པའི་དབྱིབས་བཅོས། གཡས་ནས་ཞེ་སྡང་གི་རླུང་དཀར་པོ། གཡོན་ནས་འདོད་ཆགས་ཀྱི་རླུང་དམར་པོ། མཉམ་དུ་གཏི་མུག་གི་རླུང་ནག་པོ་སོགས་ཐོག་མེད་ནས་བསག་པའི་སྡིག་པ་དང་སྒྲིབ་པ་ཐམས་ཅད་ཏིལ་ལ་སིབ་ཀྱིས་ཐིམ་པ་ཤ་དང་ཁྲག་གི་རྒྱ་མཚོ་ཟགས་མེད་བདུད་རྩིའི་རང་བཞིན་དུ་གྱུར་ཏེ་མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་ནང་གི་དཔལ་རྟ་མགྲིན་ནག་པོའི་ཞལ་ཏུ་དམར་ལྕིབ་ལྕིབ་གསོལ་བས་ཚོགས་གཉིས་རྫོགས། སྒྲིབ་གཉིས་དག བར་ཆད་མ་ལུས་པ་ཆོས་དབྱིངས་བདེ་བ་ཆེན་པོའི་ངང་དུ་རྗེས་མེད་དུ་ཞི་བར་བསམ། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ས་པ་རི་ཝཱ་ར་སརྦ་པཱུ་ཛ་ཁ་ཧིཿ ཞེས་ལན་བདུན་དང༌། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ཧཱུྂ་ཕཊཿ དྲག་ཏུ་བརྗོད་དེ་ཏིལ་ནག་ཐབ་ཏུ་ཕུལ། རྫོགས་པའི་བྱང་ཆུབ་སྒྲུབ་པ་ལ། །ཕྱི་དང་ནང་གི་སོགས་སྨོན་ལམ་བྱ། ད་ཁྱེད་རྣམས་དཀྱིལ་འཁོར་དུ་འཇུག་པའི་དོན་དུ་ཐོག་མར་གསོལ་པ་གདབ་པ་འདིའི་རྗེས་ཟློས་མཛོད༔ ཧོ༔ ཁྱབ་བདག་སྟོན་པ་རིན་པོ་ཆེ༔ རྡོ་རྗེ་སློབ་དཔོན་དགོངས་སུ་གསོལ༔ བདག་ཅག་སྐལ་ལྡན་སྨིན་གྲོལ་མཛོད༔ རྡོ་རྗེའི་དམ་ཚིག་དུས་འདིར་སྩོལ༔ ལན་གསུམ། དེ་ནས་རྒྱུན་བཤགས་འདིའི་རྗེས་ཟློས་མཛོད༔ ཧོ༔ དགོངས་ཤིག་རྡོ་རྗེ་སློབ་དཔོན་དགོངས༔ བདག་ཅག་མ་རིག་དབང་གྱུར་པས༔ སོ་སོར་ཐར་པའི་སྡོམ་པ་ཉམས༔ བྱང་ཆུབ་སེམས་དཔའི་སེམས་བསྐྱེད་འཁྲུལ༔ རྡོ་རྗེ་ཐེག་པའི་དབང་བསྐུར་གྱི༔ རྩ་བ་ཡན་ལག་དམ་ཚིག་ཆག༔ ཕྱག་རྒྱ་ཆེན་པོར་གོ་བ་ལོག༔ རིམ་པ་གཉིས་ཀྱི་གསང་ཚིག་བསྒྲགས༔ མདོར་ན་ཚོར་དང་མ་ཚོར་བའི༔ ཐུགས་དང་འགལ་བ་ཅི་མཆིས་པ༔ གནོང་འགྱོད་དྲག་པོས་མཐོལ་ལོ་བཤགས༔ ཚངས་དབང་མཆོག་གི་དངོས་གྲུབ་སྩོལ༔ ཅེས་ལན་གསུམ། སྡོམ་པ་གསུམ་མ་ཐོབ་པ་དང་། ཐོབ་ཀྱང་ཉམས་པ་སླར་གསོ་དང་གོང་དུ་འཕེལ་བའི་ཆེད་དུ་འདིའི་ལད་མོ་མཛོད། ཧོ༔ དཀོན་མཆོག་གསུམ་ལ་སྐྱབས་སུ་མཆི༔ སོ་སོར་ཐར་དང་བྱང་ཆུབ་སེམས༔ རིག་འཛིན་ནང་གི་སྡོམ་པ་རྣམས༔ མ་ལུས་བདག་གིས་གཟུང་བར་བགྱི༔ ལན་གསུམ།
༈ །དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་ཏུ་རིན་པོ་ཆེ་རིན་ཐང་མེད་པའི་མེ་ཏོག་གི་ཕྲེང་བ་ཡངས་ཤིང་མ་ཉམས་པ་རེ་ཕྱག་ཏུ་སྤྲད་པར་མོས་ཤིག །ཨོཾ་ཨཱཿཧཱུྃ། ཞེས་མེ་ཏོག་གི་ཅོད་པན་གཏད། ཁྱེད་རྣམས་སྔོན་ཆད་གསང་ཆེན་བླ་ན་མེད་བའི་དལ་དུ་མ་ཞུགས་པའམ། ཞུགས་ཀྱང་བསྐྱར་ཏེ་འཇུག་བ་ལ་གསང་སྒྲོག་གི་ཉེས་པ་མི་འབྱུང་བའི་ཕྱིར་གདོང་གཡོགས་དམར་པོ་བཅིངས་པའི་མོས་པ་མཛོད། ཨོཾ་ཙཀྵུབྷནྡྷ་བྷནྡྷ་སྭཱཧཱ༔ མིག་དར་གཏད། ཡེ་ཤེས་དབབ་པ་ནི། ལུས་གཅུན། རླུང་བཟུང་། སེམས་དམིགས་པ་ལས་མ་ཡེངས་བར་བྱ། གུ་རུ་པདྨ་ཡིད་བཞིན་ནོར་བུའི་དབང་གི་དོན་དུ་མདུན་བསྐྱེད་དང་སློབ་དཔོན་འདི་ལྟར་གསལ་ཐོབ། མདུན་གྱི་ནམ་མཁར་རྒྱ་མཚོ་སྔོ་ལ་དྭངས་པ། འཇའ་འོད་ཀྱི་གུར་ཆེན་ཕུབ་ཅིང་། མེ་ཏོག་གི་ཆར་འབེབ་པ། དཔའ་བོའི་མཁའ་འགྲོས་ལྟ་བའི་གླུ་ལེན་ཞིང་རྡོ་རྗེའི་གར་བསྒྱུར་བའི་དབུས་སུ། དཔལ་ལྡན་སངས་རྒྱས་པདྨ་ལས་སྐྱེས་པ། སྐུ་མདོག་དཀར་ལ་དམར་བའི་མདངས་ཆགས་པ། །ཞལ་གཅིག་ཕྱག་གཉིས་ཞབས་གཉིས་དཔའ་བོའི་བཞེངས་སྟབས་མཛད་པ། ཕྱག་གཡས་ཡེ་ཤེས་ལྔ་ལྡན་གྱི་རྡོ་རྗེ་རྩེ་ལྔ་བ་ནམ་མཁའི་དབྱིངས་སུ་ཕྱར་བས་ཕོ་རྒྱུད་དཔའ་བོའི་ཚོགས་རྣམས་དབང་དུ་སྡུད་པ། ཕྱག་གཡོན་ཀཱ་པ་ལ་བདུད་རྩིས་གང་བར་ཚེ་བུམ་དཔག་བསམ་ཤིང་གིས་ཁ་རྒྱན་པ་སྟ་ཟུར་གཡན་དུ་འཆང་བའི་འོད་ཟེར་གྱིས་མ་ཚོགས་མཁའ་འགྲོ་རྒྱ་མཚོའི་སྙིང་ནས་བསྐུལ་ཞིང་བདེ་བ་ཆེན་པོས་རོལ་རྩེད་བྱེད་པ། ཞལ་འཛུམ་པས་འགྲོ་བའི་གདུང་བ་སེལ་ཞིང་། སྤྱན་གདངས་བ་ཉི་ཟླ་ལྟར་འཁྱིལ་བས་ཇི་སྙེད་པའི་ཆོས་ཀུན་ཇི་ལྟ་བར་གཟིགས་པར་སྟོན་པ་དང་། ཤངས་ཀྱི་གཟེངས་མཐོ་བས་ཡེ་ཤེས་ཀྱི་རླུང་འགོགས་པ་མེད་པར་རྒྱུ་བ། བཞི་བཅུའི་ཚེམས་དཀར་བས་ཅི་ལྟར་གསུངས་པ་དེ་ལྟར་བདེན་པ། སྙན་ཤལ་རིང་ཞིང་རྒྱན་རྒྱན་མཛེས་པས་སྒྲ་གྲགས་གསུང་གི་འཁོར་ལོར་གོ་བ། དབུ་སྐྲ་གནག་ལ་སྣུམས་པ་སིལ་བུར་འཁྲོལ་བས་སྒྲུབ་མཆོག་རྗེས་སུ་འཛིན་པ། མཐོང་གྲོལ་པད་ཞྭའི་ཅོད་པན་དབུ་ལ་གསོལ་བས་སྣང་བ་ཟིལ་གྱིལ་གྱིས་གནོན་པ། རྡོ་རྗེའི་གསང་གོས་དཀར་པོ། སྔགས་ཀྱི་ཕོད་ཆེན་མཐིང་ཀ རབ་བྱུང་གི་ཆོས་གོས་དམར་པོ། ལོངས་སྤྱོད་རྫོགས་པའི་རིན་ཆེན་གྱི་སྟོད་གཡོག་དང་མགུལ་རྒྱན་གསོལ་བ། ཁྲོ་ཆགས་སྒེག་པས་འགྲོ་བློ་དབང་དུ་སྡུད་ཅིང་། ཧུར་བག་བརྩེ་བའི་སྤྱན་གྱིས་འགྲོ་ལ་གཟིགས་པ། སྐུ་མཐོང་བ་ཙམ་གྱིས་སྣང་བ་དབང་དུ་འདུ་ཞིང་། གསུང་ཐོས་པ་ཙམ་གྱིས་ཡེ་ཤེས་ཀྱི་བྱིན་ཆེན་འབེབ་པ། ཐུགས་དྲན་པ་ཙམ་གྱིས་འཕོ་བའི་དབང་ཆེན་སྐུར་བའི་རྩ་གསུམ་རྒྱལ་བ་མ་ལུས་འདུས་པའི་སྤྱི་དཔལ་ཆེན་པོ། དཔའ་བོ་མཁའ་འགྲོའི་སྤྲིན་ཚོགས་སྤྲོ་ཞིང་བསྡུ་བའི་བདག་ཉིད་གཅིག་པུར་བཞུགས་པར་མོས་མཛོད། བླ་མས་གསོལ་འདེབས་དབྱངས་སུ་གྱེར་བའི་ཚིག་རིས་དང་མཐུན་པར་ཡིད་ཀྱིས་གསོལ་བ་དྲག་ཏུ་ཐོབ་ཅིག ཐོད་ཕྲེང་རྩལ་གྱི་སྔགས། ཚིག་བདུན་སྤྱན་འདྲེན། གདུང་འབོད་དང་། ཐུགས་དམ་གནད་བསྐུལ། གསོལ་འདེབས་རྒྱས་བསྡུས་སྣ་ཚོགས་རྗེས་བཟློས་སམ་ལྷན་གཅིག་ཏུ་འདོན། མོས་གུས་ཀྱིས་རྐྱེན་གྱིས་བླ་མ་དཀྱིལ་འཁོར་བའི་ལྷ་ཚོགས་ཀྱི་སྐུ་ལས་འོད་ཟེར་འཕྲོས་པ་ཁྱོད་རང་རྣམས་ལ་ཕོག་པས་ཁྱོད་རང་རྣམ་ཀྱི་ཕུང་ཁམས་སྐྱེ་མཆེད་སོགས་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་མེ་ལོང་ལ་ཧ་བཏབ་པ་ཡལ་བ་ལྟར་ནས་སྟོང་པ་ཉིད་དུ་གྱུར་བར་མོས་མཛོད། སློབ་མ་ལ་ལས་བུམ་གྱི་ཆུས་བསངས་གཏོར་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ༔ ཨོཾ་མ་ཧཱ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སློབས་མ་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས། སྐད་ཅིག་གིས་པདྨ་འདབ་མ་སྟོང་དང་ལྡན་པའི་ལྟེ་བར་ཉི་ཟླའི་གདན་ལ། ཁྱེད་རང་རྣམས་རང་སེམས་རིག་པའི་ངོ་བོ་ལྷུག་པར་གནས་པ་དེ་ཉིད་མདུན་བསྐྱེད་ཀྱི་གུ་རུ་ཡིད་བཞིན་ནོར་དུ་ཅི་ལྟ་བར་རྒྱན་ཆ་ལུགས་མ་འདྲེས་ཡོངས་སུ་པར་གྱུར་སོང་སྙམ་པས་གསལ་ཐོབ་ཅིག དེ་ལྟར་གསལ་བའི་སྤྱི་བོར་ཨོཾ་མགྲིན་པར་ཨཱ༔ཐུགས་ཀར་ཧཱུྃ། སློབ་དཔོན་དང་གུ་རུ་པདྨ་ཡིད་བཞིན་ནོར་བུ་དབྱེར་མ་མཆིས་པའི་ཐུགས་ཀའི་འོད་ཟེར་གྱི་ནནམ་མཁའི་ཁམས་ཁེངས་དུས་གསུམ་གྱི་བླ་མ་ཡི་དམ་སངས་རྒྱས་བྱང་སེམས་མ་ལུས་ཤིང་ལུས་པ་མེད་པར་སྤྱན་དྲངས། དེ་ཐམས་ཅད་གུ་རུ་པདྨའི་སྐུ་གསུང་ཐུགས་ཀྱི་རྣམ་པར་འོད་ཟེར་དང་བཅས་ཤིང་། དེ་ཡང་སྐུའི་བྱིན་རླབས་ཐམས་ཅད་པདྨ་འབྱུང་གནས་ཀྱི་སྐུའི་རྣམ་པ་ཆེ་བ་རི་རབ་ཙམ། ཆུང་བ་ཡུངས་འབྲུ་དང་ཏིལ་འབྲུ་ཙམ། གསུང་གི་བྱིན་རླབས་ཐམས་ཅད་རྒྱ་ཡིག་ཨཱ་ལི་ཀཱ་ལི་བོད་ཡིག་དབྱངས་གསལ་སོགས་ཁ་དོག་སྣ་ཚོགས་དང་། ཐུགས་ཀྱི་བྱིན་རླབས་ཐམས་ཅད་རྡོ་རྗེའི་དྲིལ་བུ་དང་། པདྨ་རིན་ཆེན་ཁ་ཊྭཱཾ་དབྱུག་ཐོ་ལ་སོགས་པ་སྟེང་འོག་བར་གསུམ་ཐེ་མེར་ནེ་མེར་ཏིལ་གྱི་གང་བུ་ལྟར་གང་ཞིང་ཉི་ཟེར་གྱི་རྡུལ་འཁྲིགས་པ་ལྟར་འབྱོན་ནས་ཁྱེད་རང་རྣམས་ལ་སིབ་སིབ་ཐིམ་པའི་མོས་འདུན་དྲག་པོ་མཛོད་ཅིག ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཅིང་༔ བྱིན་གྱིས་རླབས་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ བསྒྲུབ་མཆོག་བདག་ལ་དབང་ཅིག་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿ ཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃཿ ཨ་ཝེ་ཤ་ཡ་ཨ་ཨཿ ཞེས་ཡེ་ཤེས་ཕབ་པའི་རྟགས་མ་བྱུང་བར་བསྐྱར་ནས་འབེབ། ཡང་བཞེངས་བསྐུལ་མ་བཏོན་ལ། སྤྲོ་ན་གར་ཁྲབ་དབྱངས་དང་བཅས་ཏེ་བྱའོ། ། ཨོཾ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ་ཧཱུྃ༔་ཕེཾ་ཕཻ༔ རཱ་རཱ་རཱ་རཱ༔ ཙ་ལཱ་ཡ་ཙ་ལཱ་ཡ༔ དོ་ཤ་ཡ་དོ་ཤ་ཡ༔ ཨཱ་ཝེ་ཤ་ཡ་ཨ་ཨཿ དེ་ནས་སྙིང་པོ་བཟླས་ནས་བྱིན་དབབ༔ བརྟན་ཕྱིར་སྤྱི་བོར་རྡོ་རྗེ་བཞག༔ གུ་རུ་མཎྜལ་ཏིཥྛ་བཛྲ་ཧཱུྃ༔ ༀ་ཨཱཿཧཱུྃ། མེ་ཏོག་ཕུལ། མིག་དར་བསལ། དང་པོ་བུམ་པའི་དབང་ནི། སློབ་མའི་བྱ་བ་ནི་བཤགས་པ་དང་དབང་ཐོབ་པའི་དམིགས་པ་སྟེ། བླ་མ་རྩ་བ་གསུམ་གྱི་སྤྱན་སྔར་སྲོག་གཅོད་མ་སྦྱིན་ལེན་དང་མི་ཚངས་སྤྱོད་པ་དང༌། ལུས་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། གཏོར་མ་འདི་གུ་རུ་པདྨ་ཡིད་བཞིན་ནོར་བུའི་དཀྱིལ་འཁོར་ཆེན་པོ་གསལ་བའི། རྩེ་མོ་ན་རྩ་བ་དང་བརྒྱུད་པར་བཅས་པའི་བླ་མ། བར་ན་ཡི་དམ་གྱི་དཀྱིལ་འཁོར། མཐའ་སྐོར་ན་དཔལ་བོ་མཁའ་འགྲོ། སྲུང་མ་ལས་བྱེད་ཉི་ཟེར་གྱི་རྡུལ་ལམ་ནམ་མཁའ་ལ་སྤྲིན་འཁྲིགས་པ་ལྟར་བཞུགས་པར་སྒོམས་ཤིག བདག་དང་མདུན་བསྐྱེད་གཏོར་མའི་གནས་གསུམ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། བཛྲ་ས་མ་ཡ་ཛཿ དབང་བསྐུར་བའི་གསོལ་བ་བཏབ་པས་རིག་ལྔ་འཁོར་བཅས་ཀྱི་ལས་སོ་སོའི་བུམ་པ་ཐོགས་སྟེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ག་ཏེ་ས་མ་ཡ་ཤྲཱི་ཡེ་ཧཱུྂ། ལྷ་རྣམས་འོད་དུ་ཞུ་ནས་སློབ་མ་ལ་ཐིམ། ཛ་ཧཱུྂ་བྂ་ཧོཿ རིགས་བདག་འོད་དཔག་མེད་ཀྱིས་དབུ་བརྒྱན་པར་གྱུར། སླར་ཡང་གཏོར་མ་གུ་རུ་པདྨ་ཡིད་བཞིན་ནོར་བུ་དང་གཉིས་སུ་མེད་པའི་བླ་མའི་སྤྱི་བོའི་གུ་རུ་པདྨ་ཡིད་བཞིན་ནོར་བུ་དཀར་པོའི་སྐུ་ལས་རང་འདྲ་འཕྲོས། འཁོར་རྣམས་ཀྱི་སྐུ་ལུས་ཀྱང་དེ་བཞིན་འཕྲོས། སློབ་མའི་སྨིན་མཚམས་ཀྱི་གུ་རུ་པདྨ་ཡིད་བཞིན་ནོར་བུ་དཀར་པོ་ལ་ཐིམ་པར་མོས་ལ། ཨོཾཿ རྒྱལ་བ་རབ་འབྱམས་སྐུ་ཡི་དབང་༔ དེ་རིང་བུ་ལ་སྦྱིན་པར་བྱཿ མཐོང་ཚད་ཁྲོ་བོའི་དཀྱིལ་འཁོར་རྫོགསཿ བུམ་དབང་ཡོངས་རྫོགས་ཐོབ་པར་ཤོགཿ ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྂ། བུམ་པ་ཡོད་ན་བདུད་རྩི་བླུད་མེད་ན་དམིགས་པ་བྱས་པས་འགྲུབ། དེ་ལྟར་དབང་བསྐུར་བས། སྐུ་ཡི་སྒྲིབ་དག བསྐྱེད་རིམ་བསྒོམ་པ་ལ་དབང༌། སྤྲུལ་སྐུའི་གོ་འཕང་ཐོབ་པའི་བསྐལ་བ་ཅན་དུ་བྱས།
༈ གསང་དབང་ནི། སློབ་མའི་བྱ་བ་ཁ་བསྒྱུར་བ་ལ། བླ་མ་རྩ་བ་གསུམ་གྱི་སྤྱན་སྔར་ངག་གི་སྒོ་ནས་བསག་པའི་རྫུན་དང་ཕྲ་མ། ཚིག་རྩུབ་ངག་འཆལ་དང༌། ངག་གི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། བླ་མ་དང་མདུན་བསྐྱེད་ཀྱི་མགྲིན་པའི་གུ་རུ་པདྨ་ཡིད་བཞིན་ནོར་བུ་དམར་པོའི་མགྲིན་པའི་ཨཱ་ལས་དབྱངས་དང་གསལ་བྱེད་སོགས་ཡི་གེའི་སྤྲིན་འཕྲོས་ཏེ། མཚོ་ཆེན་ལ་ཁ་བ་བབས་པ་བཞིན་སློབ་མ་ལ་ཐིམ་པར་མོས་ལ། ཨཱཿ བརྗོད་པ་བྲལ་བ་ནཱ་དའི་དབྱངསཿ སྒྲ་རུ་ཤར་བ་ཡི་གེའི་ཚོགསཿ སྐལ་ལྡན་ཁྱོད་ལ་སྦྱིན་པ་ཡིཿ གསང་བའི་དབང་མཆོག་ཐོབ་པར་ཤོགཿ ཨཱ་ཝཱཀྐ་ཨ་བྷི་ཥིཉྩ་ཧཱུྂ། ཡང་མདུན་བསྐྱེད་ཡབ་ཡུམ་སྦྱོར་བའི་བདུད་རྩི་འཛགས་པ་ལྕེ་ལ་བཞག་པས་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་མོས། རྩ་སྔགས་བཟླ། བདུད་རྩི་ཡོད་ན་བྱིན། དམིགས་པ་བྱས་ཀྱང་རུང༌། དེས་ངག་གི་སྒྲིབ་པ་དག རང་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ལོངས་སྐུ་ཐོབ་པའི་བསྐལ་བ་རྒྱུད་ལ་བཞག བཟླས་ལུང་ནི། སླར་ཡང་དཀྱིལ་འཁོར་ལྷ་ཚོགས་ཀྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཆད། ཞལ་ནས་ཐོན་སློབ་མའི་ཞལ་དུ་ཐོན། ཐུགས་ཀའི་སྔགས་འཁོར་ལ་ཐིམ་པས་སྔགས་ཀྱི་བྱིན་རླབས་ཞུགས་པར་དམིགས་ལ། རྩ་སྔགས་ལས་སྔགས། ཆོ་ག་བཅས་ཀྱི་ལུང་སྦྱིན།
༈ ཤེས་རབ་ཡེ་ཤེས་ཀྱི་དབང་ནི། སློབ་མའི་བྱ་བ་ཁ་བསྒྱུར་བ་ནི། བླ་མ་རྩ་བ་གསུམ་གྱི་སྤྱན་སྔར་ཡིད་ཀྱི་སྒོ་ནས་བསག་པའི་བརྣབ་སེམས། གནོད་སེམས། ལོག་ལྟ་དང༌། ཡིད་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། བླ་མ་དང་བདུན་བསྐྱེད་ཀྱི་ཐུགས་ཀ་ནས་རིགས་དང་ལང་ཚོ་ལྡན་པའི་ཕྱག་རྒྱ་མ་སྤྲོས་ཏེ་སློབ་མ་ལ་གཏད་པར་མོས། བླ་མསཿ ཧོཿ རྨད་བྱུང་བདེ་ཆེན་ཕྱག་རྒྱ་ཆེཿ བདེ་བ་ཐམས་ཅད་འབྱུང་བའི་གནསཿ ཐར་བའི་ལམ་དུ་འཁྲིད་པ་མོཿ གཉིས་མེད་ཡེ་ཤེས་ཁྱོད་ཀྱིས་ཟུངསཿ སློབ་མ་རྟ་མགྲིན་དུ་གསལ་བའི་ཡུམ་ཕག་མོ་དང་གཉིས་སུ་མེད་པར་གྱུར། སྙོམ་འཇུག་གི་བདེ་བ་ཉམས་སུ་མྱོང་པས། ཡིད་ཀྱི་ལས་དང་ཐུགས་ལེའི་སྒྲིབ་པ་དང༌། གཞན་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ཆོས་སྐུའི་གོ་འཕང་ཐོབ་པའི་སྐལ་བ་ཅན་དུ་བྱས་སོ། །
༈ ཀ་དག་ཚིག་གི་དབང་ནི། བླ་མ་རྩ་བ་གསུམ་གྱི་སྤྱན་སྔར་ཀུན་གཞིའི་ཁམས་ཀྱི་བག་ལ་ཉལ་བའི་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ་པས། བླ་མ་དང་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ནས་ཡེ་ཤེས་ལྔ་ལྡན་གྱི་འཇའ་དང་འོད་ཀོར་ཕྱག་མཚན་ལྕགས་ཀྱུ། རྡོ་རྗེ་དྲིལ་བུ། ཐོད་ཚེ་བུམ། ཁ་ཊྭཱཾ་པདྨ་སོགས་དཔག་ཏུ་མེད་པ་སྤྲོས་ཏེ་སློབ་པའི་སྙིང་གར་ཐིམ་པར་མོས། ཨཿ སྣང་བར་ཤར་བའི་ཆོས་ཐམས་ཅདཿ དོན་ལ་རང་སྣང་སྟོང་པའི་གཟུགསཿ དབང་ཆེན་འབར་བའི་ཡེ་ཤེས་བྱིནཿ གཞན་ན་མེད་དེ་ཆོས་ཀྱི་དབྱིངསཿ ཨ་ཨ་ཨ་ཕཊཿ དེས་མཆོག་གི་ཡོན་ཏན་བསྐྱེད་པའི་དབང་ཐོབ། ཀུན་གཞིའི་ལས་དང་ཤེས་བྱའི་སྒྲིབ་པ་དག ལམ་རྫོགས་པ་ཆེན་པོ་བསྒོམ་པའི་སྣོད་དུ་གྱུར། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། ། བླ་མ་བརྒྱུད་པའི་གསོལ་འདེབས་བཏོན་ཞིང་གཏོར་མའི་བཀའ་བསྒོ་བྱ། མཐར་སློབ་མ་དམ་ལྡན་ཡིན་ན་གཏོར་མའི་ལྷ་བསྟིམ། སྤྱི་ལ། གཏོར་མའི་ལྷ་ཆོས་ཀྱི་དབྱིངས་སུ་ཐིམ། བདག་དང་སྣང་བ་ཐམས་ཅད་རིམ་བཞིན་སྙིང་ཀའི་སྔགས་འཁོར། དེ་ཐུགས་སྲོག། དེ་ནཱ་ད། རིམ་པར་ཆོས་ཀྱི་དབྱིངས་སུ་ཐིམ་པར་བསམ། སླར་ཡང་སྔགས་སྒྲ་ཕྲ་བ་ནས་ཆེན་པོར་བསྒྲགས་པས་སྣོད་བཅུད་ཐམས་ཅད་དཀྱིལ་འཁོར་ཆེན་པོ་གསུམ་དུ་གྱུར་བར་བསམ། དམ་ཚིག་ཁས་ལེན་པ་ནི། གཙོ་བོའི་ཇི་ལྟར། མཎྜལ། དེང་ནས་བརྩམས་ཏེ། བསོད་ནམས་འདི་ཡིས་སོགས་བསྔོ་བ་དང་སྨོན་ལམ་གྱིས་མཐའ་བརྒྱན་པར་བྱའོ། །ཅེས་པའང་གསང་བདག་རིག་འཛིན་ཆེན་པོ་ཚེ་དབང་ནོར་བུའི་གཏེར་ཆོས་བསམ་པ་ལྷུན་གྲུབ་ཀྱི་ལས་ཚོགས་སྐོར་གྱི་གཏོར་དབང་ལ་ཁ་གསལ་ཕྲན་བས་བརྒྱན་པ་འདི་ནི་སྟག་བུའི་དབོན་བརྒྱུད་བསྟན་འཛིན་རྡོ་རྗེས་སོ། །མངྒ་ལཾ༎