ལ་དྭགས་ཀྱི་རྒྱལ་མོ་དད་པ་ཅན་བསྟན་སྐྱོང་དབང་མོའི་ངོར།
ཨོཾ་སྭཱ་སྟི། དཀོན་མཆོག་གསུམ་ལ་རྟག་སྐྱབས་མཆི། །འགྲོ་དོན་སངས་རྒྱས་ཐོབ་པར་བྱ། །བདག་ཉིད་རྡོ་རྗེ་རྣལ་འབྱོར་མའི། །སྤྱི་བོར་པད་དཀར་ཉི་ཟླའི་སྟེང་། །གུ་རུ་ནམ་སྙིང་ཐུགས་རྡོ་རྗེ། །མཐིང་གསལ་རྡོར་དྲིལ་རོལ་བཏབ་བཞུགས། །མཚན་དཔེ་ཞི་བའི་ཚུལ་ཆས་རྫོགས། །གནས་གསུམ་རྡོ་རྗེ་གསུམ་འབྲུ་གསུམ། །འོད་ཀྱིས་རྒྱལ་ཀུན་སྐུར་བསྡུས་ཐིམ། །དེ་ལ་མོས་གུས་གདུང་ཤུགས་ཀྱིས། །སྙིང་ནས་ཕུར་ཚུགས་གསོལ་བ་འདེབས། །ཨོཾ་ཆོས་སྐུ་མཁའ་ཁྱབ་བླ་མ་ལ། །གསོལ་འདེབས་འོད་གསལ་བྱིན་གྱིས་རློབས། །ཨ༔ ལོངས་སྐུ་ལྷུན་རྫོགས་བླ་མ་ལ། །གསོལ་འདེབས་སྒྱུ་ལུས་མཆོག་བྱིན་གྱིས་རློབས། །ཧཱུྃ༔ སྤྲུལ་སྐུ་འགྲོ་འདུལ་བླ་མ་ལ། །གསོལ་འདེབས་འགྲོ་ཕན་བྱིན་གྱིས་རློབས། །ཧྲཱི༔ ཀུན་འདུས་རྩ་བའི་བླ་མ་ལ། །གསོལ་འདེབས་བདག་རྒྱུད་སྨིན་གྲོལ་ནས། །མཐོང་ཐོས་དྲན་རེག་འགྲོ་བ་ཀུན། །རྡོ་རྗེ་འཛིན་ཐོབ་བྱིན་གྱིས་རློབས། །ཨོཾ་ཨཱ༔གུ་རུ་གྷ་གྷ་གརྦྷ་སིད་དྷི་ཕ་ལ་ཧཱུྃ༔ མཐར་ནི་བླ་མའི་གནས་གསུམ་ལས། །འོད་འཕྲོས་སྒྲིབ་སྦྱངས་སྐུ་གསུང་ཐུགས། །དབང་བསྐུར་བྱིན་རླབས་གཅིག་ཆར་ཐོབ། །བླ་མའི་ཐུགས་དང་རང་སེམས་འདྲེས། །ཟབ་གསལ་བདེ་བའི་དོན་རྟོགས་འགྱུར། །དེ་ལྟར་བླ་མ་བསྒྲུབ་པ་ཡི། །དགེ་བས་སྲིད་གནས་འགྲོ་བ་ཀུན། །སྡུག་བསྔལ་དང་བྲལ་བདེ་ལ་བཀོད། །འཕྲལ་དང་ཡུན་དུ་བདེ་ཐོབ་ཅིང་། །བླ་མ་སངས་རྒྱས་འོད་དཔག་མེད། །ཇི་བཞིན་གོ་འཕང་མྱུར་ཐོབ་ཤོག །
ཞེས་རྒྱ་གར་ཁ་ཆེའི་ཡུལ་མཚམས་མངའ་རིས་སྐོར་གསུམ་གྱི་མང་ཡུལ་ཆ་ལ་དྭགས་ཀྱི་རྒྱལ་མོ་དད་པ་ཅན་བསྟན་སྐྱོང་དབང་མོའི་ངོར་མེ་སྟག་ས་ག་ཟལ་བའི་ཡར་ཚེས་ལ་མཚུར་གྱི་གནྡྷོ་ལར་རིག་པ་འཛིན་པས་སྤེལ་བ་སརྦ་མངྒ་ལཾ།