རིག་འཛིན་ཤེས་རབ་འབྱུང་གནས་ཀྱི་བསྐུལ་ངོར།
ཨོཾ་ཨཱ༔ཧཱུྃ བདག་ལུས་གཞན་མེད་སྣང་སྟོང་འོད་ཀྱི་སྐུ། །ཧེ་རུ་ཀ་དཔལ་ཆུ་ཟླ་ལྟར་གསལ་བའི། །བདེ་ཆེན་འཁོར་ལོ་ཆོས་དབྱིངས་འོད་གུར་ཀློང་། །ཡེ་ཤེས་ལྔ་ལྡན་ཐིག་ལེ་གསལ་འཚེར་དབུས། །རང་རིག་ངོ་བོ་པད་འབྱུང་རྡོ་རྗེ་སེམས། །རང་མདངས་སྒྱུ་འཕྲུལ་ཧཱུྃ་ཀར་ནམ་མཁའི་སྙིང་། །དབྱེར་མེད་རོལ་རང་རྩལ་དྲན་མཆོག་འཁོར་ལོའི་མགོན། །རིག་འཛིན་དྲི་མེད་གཟི་བརྗིད་བདེ་གཤེགས་སྙིང་། །འཕྲིན་ལས་འགྲོ་འདུལ་དཔལ་ལྡན་བླ་མ་ནི། །དམར་སྨུག་ཁྲོ་འཛུམ་ཐོར་ཚུགས་དར་དམར་ཕུར། །སྟག་ཤམ་རུས་རྒྱན་གྲུ་མོར་ཁ་ཊཾ་འཁྱུད། །ཅང་ཏེའུ་དྲིལ་ཁྲོལ་སྣང་སེམས་ཟིལ་གྱིས་གནོན། །ཧ་ཧོ་ཕཻཾ་ཕཊ་ཧཱུྃ་གི་གད་རྒྱང་སྒྲོགས། །མེ་ཀློང་རྟོགས་མེད་གར་སྟབས་བུན་བུན་འཁྱུག །འཁོར་དུ་རིག་འཛིན་དཔའ་བོ་འབུམ་དང་བཅས། །དཱ་ཀི་ཆོས་སྐྱོང་ཕོ་ཉ་སྤྲིན་ལྟར་འཁྲིགས། །སྤྱི་བོར་བརྒྱུད་པའི་བླ་མ་ཐོ་བརྩེགས་ནི། །ཧཱུྃ་ནགས་ཀློང་གསལ་གཏེར་བཞད་འཇའ་ཚོན་སྙིང་། །མཚོ་རྒྱལ་བི་མ་པད་འབྱུང་དགའ་རབ་རྗེ། །རྡོར་སེམས་རིག་ལྔ་ཁྱབ་བདག་ཀུན་ཏུ་བཟང་། །རང་རང་ཆས་རྫོགས་གཟི་བྱིན་འོད་ཕུང་འབར། །བག་དྲོ་ལྷུན་ཆགས་བདེ་བའི་གར་ཆེན་གཡོ། །བདག་སོགས་རྗེས་འཇུག་བུ་ལ་བརྩེར་དགོངས་ནས། །སྨིན་གྲོལ་དངོས་གྲུབ་ཡོངས་སྩོལ་ངོ་བོར་གསལ། །ཨ་ཧོ། མཚོན་བྲལ་ཡེ་ཐོག་སངས་རྒྱས་ཀུན་ཏུ་བཟང་། །གསང་ཆེན་དཀྱིལ་འཁོར་ཡོངས་གཙོ་རྡོ་རྗེ་སེམས། །རྒྱལ་ཀུན་སྒྱུ་འཕྲུལ་འདུས་དངོས་པདྨ་འབྱུང་། །ཟག་མེད་བདེ་ཆེན་ཡོངས་སྩོལ་མཚོ་རྒྱལ་མ། །བྱར་མེད་ཀློང་གྲོལ་འཇའ་ཚོན་གཏེར་བཞད་སྙིང་། །གྲུབ་ཀུན་རྒྱལ་པོ་ཀློང་གསལ་ཐུགས་མཆོག་རྩལ། །ཀུན་གྱི་བྱིན་རླབས་ཟབ་གསང་མཛོད་འཛིན་པ། །རང་རིག་དབང་འབྱོར་པདྨ་ནོར་བུའི་མཚན། །སྒྱུ་འཕྲུལ་རྩ་གསུམ་རབ་འབྱམས་ཚོགས་བཅས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐོག་མེད་ནས་འཁྲུལ་སེམས་ཀྱི་མུན་པ་དེ། །བླ་མའི་བྱིན་གྱིས་དེ་རིང་ཉིད་གསལ་ཞིང་། །འདི་སྣང་ཞེན་ལོག་ངེས་འབྱུང་སྙིང་ནས་ཤར། །དད་གུས་མོས་པ་ཤེས་རབ་བརྩོན་འགྲུས་རྒྱས། །རྒྱུ་འབྲས་དམ་ཚིག་སྤང་བླངས་བསྲུང་སྡོམ་གྱི། །རྟེན་འབྲེལ་གནད་ལ་རབ་ཏུ་མཁས་པར་ཤོག །སྐྱེ་ཀུན་འབྲེལ་ཚད་དོན་ལྡན་མཆོག་ཁྱེད་དང་། །མི་འབྲལ་རྟག་འགྲོགས་རྫོགས་ཆེན་ཆོས་དང་འཕྲད། །ཚིག་དོན་གོ་ཡུལ་མ་ལུས་གནད་དུ་ལོན། །ཕྱིར་མི་ལྡོག་ལ་རབ་ཏུ་འཁོད་པར་ཤོག །ཆོས་ཀུན་སྟོང་ཉིད་རྟོགས་པའི་གདེང་ཚད་དང་། །ཡིད་དཔྱོད་ལས་འདས་མངོན་སུམ་མཐར་ཐུག་རྟོགས། །ཤུགས་འབྱུང་སྙིང་རྗེ་འགྲོ་བའི་དོན་ཆེན་སྤྱོད། །མཐོང་ཐོས་དྲན་རེག་འཁོར་བ་དོང་སྤྲུག་ཤོག །ཨོཾ་ཨཱ༔ ཧཱུྃ་ཧོ། སརྦ་སིདྡྷི་ཕ་ལ་ཧཱུྃ་ཨཱ༔ ཞེས་བརྗོད་ཚེ་ན་བླ་མའི་གནས་གསུམ་ནས། །དཀར་དམར་མཐིང་གསུམ་ཐིག་ལེ་འོད་བཅས་ཀྱིས། །བདག་གི་གནས་གསུམ་བྱིན་རླབས་སྒྲིབ་ཀུན་དག །དབང་ཐོབ་བསྐྱེད་རྫོགས་རྫོགས་ཆེན་དོན་མངོན་གྱུར། །སྐུ་བཞི་ཡེ་ཤེས་རྡོ་རྗེ་གསུམ་གྱི་དངོས། །སྐད་ཅིག་མ་ལ་ཡོངས་སུ་སྨིན་ཐོབ་བསམ། །རྗེས་སུ་བླ་མ་ཐོ་བརྩེགས་མས་རིམ་ཐིམ། །རྩ་བའི་བླ་མ་རང་དང་དབྱེར་མེད་འདྲེས། །རང་རིགས་བརྗོད་བྲལ་དམིགས་མེད་ཀ་དག་ཀློང་། །དེ་ལྟར་བསམ་བསྒོམ་དོན་རྟོགས་དགེ་བའི་མཐུས། །འགྲོ་ཀུན་སྡུག་བསྔལ་མཚོ་ལས་ཡོངས་སྒྲོལ་ཤོག །
ཞེས་མང་ཡུལ་སྐྱིད་གྲོང་གྲྭ་ཕུའི་ཆོས་གླིང་རི་ཁྲོད་དུ། རིགས་བདག་བླ་མའི་སྲས་གྱུར་རིག་འཛིན་ཤེས་རབ་འབྱུང་གནས་ཀྱི་གསུང་གིས་ཡང་ཡང་བསྐུལ་ངོར། མདོ་ཁམས་ཀཿཐོག་ལྷོ་ཕྱོགས་སུ་སྐྱེས་ཤིང་རྒྱལ་ཁམས་ཀུན་ཏུ་མྱུལ་བའི་སྤྲང་བན་ཚེ་དབང་ནོར་བུའི་མེ་ལུག་སྤྲེལ་ཟླའི་ཚེས་བཟང་པོ་ལ་བཀོད་པ་དགེའོ། །