རིག་སྔགས་འཛིན་པ་རང་གྲོལ་བསྟན་འཛིན་གྱིས་བསྐུལ་པའི་ངོར།
ན་མོ་གུ་ར་ཝེ། སྐྱབས་གནས་ཀུན་འདུས་བླ་མར་སྐྱབས་སུ་མཆིའོ། །མཁའ་མཉམ་འགྲོ་དོན་བྱང་ཆུབ་མཆོག་སེམས་སྐྱེད། །གདོད་ནས་འདུ་བྲལ་མེད་པ་ཡེ་ཤེས་སྐུ། །རང་བྱུང་རང་ཤར་བདག་ཉིད་གསང་བའི་བདག །སྤྱི་བོར་བླ་མ་ཀུན་བཟང་རྡོ་རྗེ་འཆང་། །སྐད་ཅིག་མོས་པའི་སྣང་ངོར་ལམ་མེ་བ། །བདག་གི་དུས་གསུམ་ཚོགས་གཉིས་དལ་འབྱོར་ཀུན། །ལྟོས་མེད་ལིང་ཕུལ་གསོལ་བ་འདི་ལྟར་བཏབ། །ཨོཾ་ཨཱ༔ཧཱུྃ། དགོངས་བརྡ་སྙན་ཁུང་བརྒྱུད་པའི་བླ་མ་དང་། །སྤྱི་འདྲེན་ཤེར་བསྐང་དབང་ལུང་རྩ་ལན་ལགས། །བྱིན་རླབས་རྩ་བ་ཀུན་འདུས་འདྲེན་མཆོག་མགོན། །བླ་མ་ལག་ན་རྡོ་རྗེར་གསོལ་བ་འདེབས། །རྣམ་པ་ཐམས་ཅད་སྒྱུ་འཕྲུལ་དྲྭ་བའི་གར། །རྒྱུད་སྡེ་བཞི་དྲུག་དཀྱིལ་འཁོར་འཁོར་ལོའི་ལྷ། །མ་ལུས་སྤྲོ་བསྡུའི་བྱེད་པོ་བཅོམ་ལྡན་འདས། །ཡི་དམ་ཕྱག་ན༴ ཆོས་ཉིད་མཁའ་ལ་བདེ་ཆེན་ཤུགས་ཀྱིས་འགྲོ། །ས་གསུམ་ཕོ་ཉ་མཁའ་འགྲོ་རྒྱ་མཚོའི་གཙོ། །ཧེ་རུ་ཀ་དཔལ་དཔའ་བོ་རྣལ་འབྱོར་མ། །མཁའ་འགྲོ་ཕྱག་ན༴ རྒྱལ་བའི་ལུང་རྟོགས་བསྟན་དང་མི་མཐུན་ཚོགས། །མ་ལུས་ཕྱེ་མར་འཐག་མཛད་དྲག་ཤུལ་ཅན། །མ་མགོན་དྲེགས་པ་སྔགས་བདག་ཡོངས་ཀྱི་གཙོ། །ཆོས་སྐྱོང་ཕྱག༴ དཀོན་མཆོག་རྩ་གསུམ་རབ་འབྱམས་སྡུད་པའི་དཔྱིད། །དྲན་པ་ཙམ་གྱིས་བདུད་བཞིའི་དཔུང་ལས་རྒྱལ། །མ་ལུས་རྒྱལ་བ་ཀུན་གྱི་གསང་གསུམ་བདག །བཅོ་ལྡན་ཕྱག་ན༴ བདག་ནི་འདི་ནས་བྱང་ཆུབ་སྙིང་པོའི་བར། །བླ་མ་གསང་བདག་མགོན་དང་དབྱེར་མེད་པར། །སྙིང་ནས་སྐྱབས་སུ་མཆིའོ་ཐུགས་རྗེས་གཟིགས། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །བདག་གི་སྒོ་གསུམ་ནད་གདོན་སྡིག་སྒྲིབ་ཞི། །འཆི་མེད་སྐུ་གསུང་ཐུགས་ཀྱི་རྡོ་རྗེ་སེམས། །ལྷ་མཆོག་ཁྱེད་མཐུས་ཁྱེད་རང་ཇི་བཞིན་པར། །ད་ལྟ་དུས་འདི་ཉིད་དུ་འགྲུབ་བྱིན་རློབས། །ཨོཾ་ཨཱ༔ཧཱུྃ༔ མཐར་ནི་བླ་མ་རང་གི་སྤྱི་བོར་ཐིམ། །རང་སེམས་བླ་མ་གསང་བདག་ཐུགས་དང་འདྲེས། །སྟོང་གསལ་སིང་ངེ་བདེ་བ་ལྷན་ངེ་བ། །སྤྲོས་བྲལ་འོད་གསལ་ངང་དུ་མཉམ་པར་བཞག །དེ་སོགས་བདག་གི་དུས་གསུམ་བསགས་ཡོད་དགེ །ཡོངས་བཟླུམ་རྡོར་འཆང་གོ་འཕང་ཐོབ་ཕྱིར་བསྔོ། །ནམ་མཁའི་མཐའ་ཀླས་འགྲོ་བ་མ་ལུས་ཀུན། །གསང་བདག་བླ་མའི་ས་ལ་འགོད་པར་ཤོག །
ཞེས་ཕྱག་རྡོར་དང་གཉིས་སུ་མེད་པའི་བླ་མའི་རྣལ་འབྱོར་གསོལ་འདེབས་འདི་ནི་ཡུལ་དབུ་རུ་བྱང་ཕྱོགས་འཕན་ཡུལ་ཤ་ར་ཡི་འདབས་སུ་སྤྱོད་གྱུར་དཔལ་གསང་བའི་བདག་པོའི་རིག་སྔགས་འཛིན་པ་རང་གྲོལ་བསྟན་འཛིན་གྱིས་བསྐུལ་པའི་ངོར་རྒྱལ་ཁམས་པ་རིག་འཛིན་ཚེ་དབང་ནོར་བུས་རབ་བྱུང་བཅུ་གསུམ་པའི་ཐོག་མ་མེ་ཡོས་ལོ་ཆུ་སྟོད་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉེར་གཉིས་ལ་ཆོས་འཁོར་དཔལ་གྱི་ལྷ་སར་སྐད་ཅིག་མར་སྤེལ་བར་སརྦ་མངྒ་ལཾ།