བླ་མའི་རྣལ་འབྱོར་སྙིང་གི་ཐིག་ལེ།
བླ་མའི་རྣལ་འབྱོར་སྙིང་གི་ཐིག་ལེ་ཞེས་བྱ་བ་བཞུགས་སོ། །
ཨོཾ་ཨཱ༔་ཧཱུྃ་ཧྲཱི༔ སྐྱབས་མཆོག་ཀུན་འདུས་ངོ་བོ། །མཚོ་སྐྱེས་རྡོ་རྗེ་པདྨ་འབྱུང་། །ཡབ་ཡུམ་སྲས་བཅས་རྣམ་འཕྲུལ། །རྩ་བའི་བླ་མར་སྐྱབས་མཆི། །མཁའ་མཉམ་འགྲོ་ཀུན་ཕ་མ། །དེ་དག་འཁྲུལ་སྣང་བསལ་ནས། །བྱང་ཆུབ་ས་ལ་འགོད་ཕྱིར། །ལམ་ཟབ་བླ་བསྒྲུབ་རྒྱས་འདེབས། །བདག་ལུས་འཛིན་མེད་གདན་གསུམ་ལྷར་གསལ། །སྤྱི་བོའི་ནམ་མཁར་པདྨ་ཉི་ཟླར། །འདྲེན་མཆོག་རིག་འཛིན་ཚེ་དབང་ནོར་བུ། །དམར་སྨུག་ཁྲོ་ཆགས་འདྲེས་པའི་ཉམས་ལྡན། །སྨིན་མཚམས་ཧཱུྃ་དང་ཐུགས་ཀར་ཨཱ་མཚན། །སྟོད་སྨོན་ཤམ་དཀར་རྔུལ་གཟན་དམར་གསོལ་ལ། །རྡོར་དྲིལ་རྣམ་རོལ་རྡོ་རྗེ་དཀྱིལ་ཀྲུང་། །རིན་ཆེན་པྲོག་ཞུ་རུས་པའི་རྒྱན་ཅན། །དེ་ཡི་སྤྱི་གཙུག་པདྨའི་སྡོང་པོ། །ཡལ་ག་བཞི་རུ་གྱེས་པའི་དབུས་སུ། །གསུང་གི་རྡོ་རྗེ་པདྨ་འབྱུང་གནས། །རྣམ་རོལ་ཕྱག་རྒྱས་རྡོ་རྗེ་ཐོད་འཆང་། །ཧེ་རུའི་ཆས་ཅན་རྡོ་རྗེ་དཀྱིལ་ཀྲུང་། །མཚོ་རྒྱལ་གྲི་ཐོད་འཛིན་དང་མཉམ་འཁྱུད། །གཡས་གཡོན་པདྨའི་ཡལ་ག་གྱེས་བར། །དྲི་མེད་འོད་ཟེར་རྡོ་རྗེ་གླིང་པའི། །ངོ་བོ་བི་མ་ལ་དང་བཻ་རོ། །མདུན་རྒྱབ་པདྨ་གྱེས་པའི་དབུས་སུ། །ཀརྨ་རིག་པ་འཛིན་དང་སྒྲོལ་མགོན། །ངོ་བོ་རི་ཁྲོད་ཞབས་དང་ནག་པོ། །ཀུན་ཀྱང་རིག་མ་མཉམ་རོལ་བརྗིད་ལྡན། །པད་འབྱུང་སྤྱི་བོ་པད་སྡོང་སྟེང་དུ། །འོད་དཔག་མེད་ལ་རིགས་ལྔས་བསྐོར་ཞིང་། །དེ་ཡི་དབུ་སྟེང་ཀུན་བཟང་ཡབ་ཡུམ། །གཞན་ཡང་དགོངས་བརྡ་སྙན་བརྒྱུད་བླ་མ། །རིག་འཛིན་རྒྱ་མཚོ་སྤྲིན་དུ་འཁྲིགས་བཞུགས། །ཀུན་གྱི་གནས་ལྔར་འབྲུ་གསུམ་ཧྲཱི༔་ཕཊ། །ཐུགས་ཀའི་འོད་ཀྱིས་ཡེ་ཤེས་བཀུག་བསྟིམ། །ཕྱི་ནང་གསང་མཆོད་ཀུན་བཟང་སྤྲིན་ཕུང་། །རྩེ་གཅིག་མོས་གུས་དྲག་པོས་གསོལ་འདེབས། །བྱིན་གྱིས་རློབས་ཤིག་དྲན་མཆོག་དྭངས་མ། །འཁོར་ལོའི་མགོན་པོ་ཐུགས་རྗེ་ཅན་ནོ། །ཨོཾ་ཨཱ༔་ཧཱུྃ་ཧྲཱི༔་ཕཊ། དཀོན་མཆོག་རྩ་གསུམ་འདུས་པའི། །ངོ་བོ་གཅིག་མཆོག་བླ་མ། །དྲན་པས་སྲིད་ཞིའི་གདུང་སེལ། །རྩ་བའི་བླ་མ་མཁྱེན་ནོ། །སྐུ་བཞི་གནས་ལྔའི་འོད་ཀྱིས། །དབང་བསྐུར་སྒྲིབ་དག་ལམ་འབྱོངས། །འབྲས་བུ་མངོན་བྱེད་བླ་མའི། །བྱིན་རླབས་བདག་ལ་རྫོགས་གྱུར། །བདག་ནི་འཁོར་ཚོགས་རིམ་བཞིན། །གཙོ་བོ་ལ་འདུས་དེ་ཡང་། །རྩ་བའི་བླ་མ་ལ་ཐིམ། །དེ་བདག་རོ་མཉམ་འདྲེས་གྱུར། །དགེ་བ་འདི་ཡིས་མྱུར་བདག །སངས་རྒྱས་ཀུན་གྱི་ངོ་བོ། །རྩ་བའི་བླ་མ་འགྲུབ་ནས། །དབང་ཕྱུག་བརྒྱད་ཐོབ་གྱུར་ཅིག །
ཞེས་རྩ་བའི་བླ་མ་ལ་གསོལ་བ་འདེབས་ཚུལ་འདི་ལྟ་བུ་ཞིག་དགོས་ཞེས་གཙང་ལ་སྟོད་བྱང་པ་བཀྲ་བཟང་ཞབས་དྲུང་རིན་པོ་ཆེ་ཀུན་བཟང་ཡེ་ཤེས་ཞལ་སྔ་ནས་དང་། ལྷོ་ཕ་དྲུག་རབ་བཞི་དང་། སྔགས་འཆང་པདྨ་འགྱུར་མེད་དང་། གྲགས་ཆེན་བཅོ་བརྒྱད་འཛིན་པའི་རབ་འབྱམས་པ་པདྨ་རིག་འཛིན་ལ་སོགས་པའི་་སྐལ་ལྡན་མང་པོས་གསོལ་བ་བཏབ་པའི་ངོར་ཀུན་དགའ་དབྱུག་ཟླའི་ཚེས་བཅོ་ལྔ་ལ་བྲག་སྟོད་ཆོས་སྐུའི་ཕོ་བྲང་དུ་རིག་འཛིན་ཚེ་དབང་ནོར་བུས་སྨྲས་པ་སརྦ་མངྒ་ལཾ།