དམ་པ་རྒྱ་གར་ལ་བརྟེན་པའི་བླ་མའི་རྣལ་འབྱོར་བྱིན་རླབས་དོན་གྱི་བཅུད་ལེན།

དམ་པ་རྒྱ་གར་ལ་བརྟེན་པའི་བླ་མའི་རྣལ་འབྱོར་བྱིན་རླབས་དོན་གྱི་བཅུད་ལེན་ཞེས་བྱ་བ་བཞུགས་སོ། །

དམ་པ་རྒྱ་གར་ལ་བརྟེན་པའི་བླ་མའི་རྣལ་འབྱོར་བྱིན་རླབས་དོན་གྱི་བཅུད་ལེན་ཞེས་བྱ་བ། བླ་མ་རྡོ་རྗེ་སེམས་དཔའ་ལ་ཕྱག་འཚལ་ལོ། །ན་མོ་ཧཱུྃ༔ སྐྱབས་གནས་དཀོན་མཆོག་གསུམ་ལ་སྐྱབས་སུ་མཆིའོ། །འགྲོ་རྣམས་བྱང་ཆུབ་ཐོབ་ཕྱིར་སེམས་བསྐྱེད་དོ། །མཎྜལ་རྣམ་གསུམ་སངས་རྒྱས་ཞིང་དུ་འབུལ། །སྒྲིབ་སྦྱང་བཟླས་མཆོག་བཛྲ་ས་ཏྭ་ཧཱུྃ། །ཨོཾ་ཨཱ༔ཧཱུྃ་ཧྲཱི༔ རང་ལུས་ཕུང་ཁམས་ཡི་དམ་ལྷར་གསལ་བའི། །སྤྱི་བོའི་འཇའ་འོད་ཐིག་ལེའི་མུ་འབྱམས་དབུས། །པདྨ་སྟོང་ལྡན་གེ་སར་ཉི་ཟླའི་སྟེང་། །ཨཱ༔ཡིག་དཀར་པོ་ཡོངས་གྱུར་ངོ་བོ་ནི། །རྩ་བའི་བླ་མ་པད་འབྱུང་དབྱེར་མེད་པའི། །རྣམ་པར་རྒྱ་གར་དམ་པ་མི་ཕམ་མགོན། །ཨ་ཙར་དར་བབས་དམར་སྨུག་དུ་བའི་མདོག །དབུ་སྐྲ་ཡོ་འབོག་སྡོང་པོ་ལྟར་ཟིང་ཞིང་། །སྤྱན་གསུམ་ཤངས་ཉག་བཞད་ཞལ་ཚེམས་དཀར་འཐགས། །སྨ་ར་ཨག་ཚོམ་རྒྱ་རྣམས་དམར་སེར་སྣུམ། །དྲང་སྲོང་འདུག་སྟངས་ཕྱག་གཉིས་ཐུགས་ཀ་རུ། །འཁོར་འདས་བདེན་གཉིས་རྟེན་འབྲེལ་ཕྱག་རྒྱ་མཛད། །གཅེར་བུ་རུས་རྒྱན་སྟག་ལྤགས་ཤམ་ཐབས་གསོལ། །སྣང་སྲིད་ཟིལ་གྱིས་གནོན་པའི་སྐུ་རུ་བསྐྱེད། །དེ་ཡི་སྤྱི་བོར་འཇམ་དཔལ་རྡོ་རྗེ་ནི། །དམར་སེར་ཆོས་འཆད་ཕྱག་རྒྱའི་ཐེབ་མཛུབ་ཀྱིས། །ཨུཏྤལ་ཡུ་འཛིན་སྙན་ཐད་ཁ་རྒྱས་པའི། །སྟེང་དུ་ཤེས་རབ་རལ་གྲི་པུསྟི་སྣམས། །གདོང་ལྔའི་སྟེང་དུ་རོལ་པའི་འདུག་སྟངས་འགྱིངས། །དར་དང་རིན་ཆེན་རྒྱན་ཆ་ཕུན་ཚོགས་གསོལ། །དེ་ཡི་སྤྱི་བོར་ཀུན་བཟང་རྡོ་རྗེ་འཆང་། །སྔོ་དྭངས་ལོངས་སྐུའི་ཆས་རྫོགས་ཕྱག་གཉིས་ཀྱིས། །རྣམ་རོལ་ཕྱག་རྒྱས་རྡོ་རྗེ་དྲིལ་བུ་འཛིན། །ཞབས་གཉིས་རྡོར་སྐྱིལ་རང་འོད་ཡུམ་དང་དགྱེས། །དེ་དག་སྐུ་ཡི་མཐའ་སྐོར་འོད་གུར་ནང་། །གྲུབ་ཐོབ་ཕོ་མོ་ལྔ་བཅུ་རྩ་བཞི་དང་། །རིག་གནས་གཡོ་རླུང་བདེ་ཉམས་ཕྱག་རྒྱ་བརྡའི། །བླ་མ་བཅུ་གཅིག་རིག་པ་ངོ་སྤྲད་ཀྱི། །བླ་མ་གསུམ་དང་མཁའ་སྤྱོད་སུམ་ཅུ་དྲུག །ཐུགས་དམ་བདེ་གཤེགས་བླ་མ་བཅུ་གཉིས་སོགས། །རྒྱལ་དང་རྒྱལ་སྲས་ནམ་མཁའི་ཁྱོན་ཁེངས་པའི། །མདུན་དུ་བདག་གི་སྒོ་གསུམ་གུས་ཕྱག་འཚལ། །ཕྱི་ནང་གསང་བ་བླ་མེད་མཆོད་སྤྲིན་འབུལ། །བྱང་ཆུབ་ཆེན་པོའི་བར་དུ་སྐྱབས་སུ་མཆི། །འགྲོ་ཀུན་འདྲེན་ཕྱིར་བྱང་ཆུབ་སེམས་བསྐྱེད་བགྱེད། །སྤྱི་དང་བྱེ་བྲག་སྔགས་སྡོམ་བརྟན་པོར་བཟུང་། །ཁྱེད་ཀྱི་ཡེ་ཤེས་ཐུགས་རྗེ་བྱིན་རླབས་ཀྱིས། །བདག་རྒྱུད་སྨིན་གྲོལ་ཟུང་འཇུག་རྡོ་རྗེ་སེམས། །གདན་ཐོག་འདི་རུ་སྐད་ཅིག་དེ་ཉིད་དུ། །འགྲུབ་མཛོད་རྒྱལ་བ་ནུས་པའི་མཐུ་མ་ཆུང་། །ཞེས་འདོན་སྒོམ་སྦྲག་ལ་སྣང་སྲིད་ཀུན་གྱིས་སྒྲོགས་པར་བསམ་ནས་ཨ་ལི་ཀ་ལི་ཚར་བཞི་བཟླས། དེ་ནས་བླ་མའི་གནས་བཞིར་རྡོ་རྗེ་བཞི། རང་བཞིན་ཨོཾ་ཨ༔་ཧཱུྃ་ཧྲཱི༔་འོད་འབར་བའི། །ཟེར་ཕྲེང་དཀར་དམར་མཐིང་འདུས་རང་ལུས་སྣང་། །ཁེངས་པར་བསམ་ངང་གསང་སྔགས་འདི་ཉིད་ཟླའོ། །ཨོཾ་ཨཱ༔་ཧཱུྃ་གུ་རུ་སིདྡྷི་ཧཱུྃ། ཐུན་བསྡུ་ཚེ། སྤྱི་བོའི་བླ་མ་འཁོར་རྣམས་ལ་འདུས། །གཙོ་ཡང་འོད་ཞུ་རང་གི་སྙིང་གར་ཐིམ། །རང་སེམས་བླ་མའི་ཐུགས་དང་རོ་མཉམ་པ། །བྱིན་རླབས་དོན་གྱི་འཕོ་བ་ཐོབ་པར་བསམ། །དར་ཅིག་སྒོ་གསུམ་རང་གནས་སུ་སྐྱོང་ངོ་། །མཐར་གྲུབ་པར་གྱུར་ཅིག་མན་ངག་གི་དཔལ་ལྡན་བླ་མའོ། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ནས། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་པོ་ཐོབ་པར་ཤོག །ཅེས་བརྗོད། དེ་ལྟར་གྲུབ་པའི་དུས་བསྙེན་ཟླ་བ་དྲུག གྲངས་བསྙེན་ས་ཡ་བརྒྱད། རྟགས་བསྙེན་བླ་མ་དངོས་མཉམ་རྨི་ལམ་དུ་མཇལ་ཞིང་ཁྱད་པར་འཁོར་བར་སྐྱོ་ཤས་ཐར་པར་ངེས་འབྱུང་། བླ་མར་མོས་གུས། འགྲོ་ལ་སྙིང་རྗེ་གནས་ལུགས་ཉམས་རྟོགས་རྒྱུད་ལ་སྐྱེ་བ་མཆོག་གི་རྟགས་སོ། །ཐུན་མོང་དུ་ཡང་ཕྲིན་ལས་བཞི་དང་། ལྷ་འདྲེ་མི་གསུམ་འདུ་བར་འགྱུར་རོ། །དེ་ལྟར་དུས་གྲངས་རྟགས་ཀྱི་བསྙེན་པ་ཐེབ་པས་རྩ་བ་ཡན་ལག་བླ་མར་དམ་སེལ་མ་ཤོར་ན་བར་དོར་བྱང་ཆུབ་ལམ་ན་ཟིན་པར་ཐེ་ཚོམ་མེད་པར་རྡོ་རྗེ་འཆང་གི་ཞི་བྱེད་ཨ་ལི་ཀ་ལིའི་རྒྱུད་དུ་གསུང་པས་ན་མི་སླུ་ངེས་པས། མཆོག་ལམ་དོན་དུ་གཉེར་བ་རྣམས་ཀྱིས་སྙིང་ལ་འཆང་ཞིང་། དེ་ལྟར་དམ་པའི་ཞི་བྱེད་ཉམས་ལེན་བཅུད། །ཟབ་དྲིལ་ཉུང་མིན་རྒྱ་ཆེན་དོན་གསལ་བྱེད། །ཆིག་ཆོས་ལས་མཆོག་བློ་སྦྱོང་བླ་སྒྲུབ་འདི། །བྱིན་རླབས་བླ་མའི་མཐུ་ཡིས་སྨྲ་བར་བྱེད། །དགེ་དེས་འགྲོ་ཀུན་ཐར་པའི་ལམ་མཆོག་ལ། །ཞུགས་ཏེ་མྱུར་དུ་མྱ་ངན་འདས་ཐོབ་ཤོག །རྣམ་མང་ཆོས་ལ་ཟད་པའི་མཐའ་མེད་ཀྱི། །ཆིག་ཆོས་བླ་བསྒྲུབ་འདི་ལ་ཀུན་འབད་བྱོས། །

ཞེས་དཔལ་ཆེན་རྡོ་རྗེ་སེམས་དཔའ་དང་གཉིས་སུ་མེད་པའི་རྡོ་རྗེ་སློབ་དཔོན་མང་པོས་རྗེས་སུ་བཟུང་ཞིང་གནས་ལུགས་ཀྱི་དོན་ལ་བློ་ཕྱོགས་པ་མདོ་ཁམས་ཀཿཐོག་ལྷོ་ཕྱོགས་སུ་སྐྱེས་པའི་རིག་འཛིན་ཚེ་དབང་ནོར་བུས་མངའ་རིས་སྨད་ཀྱི་གུས་ལྡན་བླ་མ་འཇིགས་མེད་ཉི་མ་རྒྱལ་མཚན་གྱིས་གསོལ་བ་བཏབ་ངོར་ལྕགས་ཁྱི་ནག་ཟླའི་ཚེས་བཅུར་བརྗོད་པ་དགེའོ། །

རང་མདུན་ནམ་མཁར་སེང་ཁྲི་པད་ཟླའི་སྟེང་། །རིགས་ཀུན་ཁྱབ་བདག་རྩ་བའི་བླ་མ་མཆོག །སྔགས་སྤྱོད་ཆས་རྫོགས་རྡོར་དྲིལ་ཐུགས་ཀར་བསྣོལ། །རོལ་པའི་སྐྱིལ་ཀྲུང་འཇའ་འོད་ཀློང་དུ་བཞུགས། །དེ་ཡི་ཐུགས་ཀར་རིག་འཛིན་གཏེར་བདག་གླིང་། །དཀར་དམར་མདངས་ལྡན་རྡོ་རྗེ་ཐོད་པ་འཛིན། །བླ་མའི་སྤྱི་བོར་རིག་བདག་པདྨ་འབྱུང་། །ཀུན་གྱི་གནས་གསུམ་ཡི་གེའི་འོད་ཟེར་གྱིས། །རང་བཞིན་གནས་ནས་སྲས་བཅས་རྒྱལ་བ་ཀུན། །སྤྱན་དྲངས་རྩ་བའི་བླ་མར་གཉིས་མེད་ཐིམ། །ཨོཾ་ཨཱ༔ཧཱུྃ། ཞེས་ཅི་ནུས་སུ་བཟླས་མཐར། ཨོཾ་ཨཱ༔་ཧཱུྃ་ཀུན་བཟང་སྣང་མཐའ་གུ་རུ་པདྨ་འབྱུང་། །ཀུན་གྱི་ངོ་བོ་རིག་འཛིན་གཏེར་བདག་གླིང་། །རྩ་བརྒྱུད་བླ་མར་བཅས་ལ་གསོལ་བ་འདེབས། །བདག་རྒྱུད་སྨིན་གྲོལ་མཆོག་གི་དངོས་གྲུབ་སྩོལ། །རྒྱལ་ཀུན་འདུས་པའི་སྤྱི་དཔལ་དཀྱིལ་འཁོར་གཙོ། །བདེ་ཆེན་འཁོར་ལོའི་དབང་ཕྱུག་རིག་པ་འཛིན། །རྩ་བའི་བླ་མའི་ཞབས་ལ་གསོལ་བ་འདེབས། །རང་རིག་ཆོས་སྐུའི་རང་ཞལ་དུས་འདིར་སྟོན། །ཨོཾ་ཨཱ༔ཧཱུྃ་སརྦ་སིདྡྷི་ཕ་ལ་ཧཱུྃ་ཨ། ཞེས་པའི་གསོལ་བཏབ་བླ་མའི་གནས་བཞི་ནས། །འོད་ཟེར་དཀར་དམར་མཐིང་ལྗང་བར་མ་ཆད། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་དག་ལམ་འབྱོངས་འབྲས་བུ་སྐུ་བཞི་བརྙེས། །མཐར་ནི་བླ་མ་རང་ལ་ཐིམ་གྱུར་ཏེ། །རང་སེམས་བླ་མའི་ཐུགས་དང་དབྱེར་མེད་འདྲེས། །དགེ་འདིས་ཆོས་དང་གཟུགས་ཀྱི་སྐུ་འགྲུབ་ནས། །ཁམས་གསུམ་འཁོར་བ་དོང་ནས་སྤྲུག་པར་ཤོག །

དེས་གཙང་ཉང་གི་གྲུབ་ཆེན་མི་ཕྱེད་པའི་མོས་གུས་དད་བརྩོན་དམ་ཚིག་དང་ལྡན་པ་འགྱུར་མེད་ཀུན་བཟང་རང་གྲོལ་གྱིས་གཏེར་བདག་གླིང་པ་དབྱེར་མེད་པའི་བླ་མའི་རྣལ་འབྱོར་ཞིག་དགོས་ཞེས་བསྐུལ་ངོར་ཚེ་དབང་ནོར་བུས་ལྕགས་ཁྱི་གྲོ་བཞིན་ཟླ་བའི་ཚེས་ཉེར་བརྒྱད་ཀྱི་ཐུན་སྐབས་ཞིག་ཏུ་སྨྲས་པ་དགེའོ། །