ཞབས་དྲུང་དགེ་སློང་རྡོ་རྗེ་འཛིན་པ་བློ་བཟང་ནམ་མཁའ་འཇིགས་མེད་ཀྱི་ངོར།
ན་མོ་གུ་རུ་ཝེ། བདག་ལུས་འཛིན་མེད་སྤྱི་བོར་འོད་ལྔའི་གུར། །སེང་གེ་བརྒྱད་དང་པདྨའི་ཉི་ཟླའི་སྟེང་། །རིག་པ་ཧཱུྃ་ལས་ཀུན་བཟང་རྡོ་རྗེ་སེམས། །རྣམ་པ་རྩ་བའི་བླ་མའི་ཆ་ལུགས་ལ། །བག་དྲོ་བྱིན་ཆགས་རིན་ཆེན་རྒྱན་གྱིས་སྤྲས། །འཁོར་ལོས་བསྒྱུར་བ་ཆས་སུ་ཞུགས་པར་གྱིས། །འཁོར་དུ་མཆོག་གསུམ་རྩ་གསུམ་རྒྱ་མཚོའི་ཚོགས། །དཔག་མེད་སྤྲིན་གྱི་ཕུང་པོ་ཐིབ་བཞིན་གསལ། །བདག་གི་སྒོ་གསུམ་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་དཔལ་ཀུན་མཆོད་པར་འབུལ། །ཚེ་རབས་ཐོག་མེད་ནས་བསགས་སྡིག་ཀུན་བཤགས། །བླ་མེད་བླ་མ་བསྒྲུབ་ལ་རྗེས་ཡི་རང་། །གསང་སྔགས་བླ་མེད་ཆོས་འཁོར་བསྐོར་བར་བསྐུལ། །འགྲོ་དོན་བསྐལ་པ་རྒྱ་མཚོར་བཞུགས་གསོལ་འདེབས། །བདག་གིས་དུས་གསུམ་བསགས་པའི་དགེ་ཚོགས་ཀུན། །འགྲོ་ཀུན་བླ་མ་མཆོག་འགྲུབ་ཆེད་དུ་བསྔོ། །ཨོཾ་ཨཱ༔་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཀུན་བཟང་རྡོར་སེམས་པད་འབྱུང་ཀཧྣ། །རིགས་བདག་བླ་མ་མཆོག་ལ་གསོལ་བ་འདེབས། །ནམ་སྙིང་རིན་ཆེན་རྡོ་རྗེ་ཟུར་ཆུང་པ། །ཡེ་ཤེས་སྐུ་བརྙེས་བླ་མར་གསོལ་བ་འདེབས། །དྭགས་བསྒོམ་ཚུལ་ཁྲིམས་ནམ་འོད་ཙཱ་རི་རས། །རྡོ་རྗེ་ཐུགས་བརྙེས་བླ་མར་གསོལ་བ་འདེབས། །བྱམས་འབུམ་གྲགས་དཔལ་རྡོ་རྗེ་རྒྱལ་པོ་སོགས། །གྲུབ་པའི་སྒྲོན་མེ་བླ་མར་གསོལ་བ་འདེབས། །བྱང་གླིང་ཚུལ་འབུམ་ཀུན་མཁྱེན་སངས་རྒྱས་འཕེལ། །འགྲོ་འདྲེན་སྤྲུལ་པའི་བླ་མར་གསོལ་བ་འདེབས། །སེམས་དཔའ་ཆེ་དང་གྲོལ་མཆོག་ཀུན་དགའ་སྙིང་། །བསྟན་པའི་སྲོག་ཤིང་བླ་མར་གསོལ་བ་འདེབས། །ཡེ་ཤེས་རྒྱ་མཚོ་པདྨ་མ་ཎི་སོགས། །སྦས་ཚུལ་འགྲོ་སྐྱོང་བླ་མར་གསོལ་བ་འདེབས། །དུས་འདིར་བདག་སོགས་འགྲོ་ལ་སྨིན་གྲོལ་སྟོན། །དྲིན་ཆེན་རྩ་བའི་བླ་མར་གསོལ་བ་འདེབས། །ཁྱེད་ལ་གདུང་ཤུགས་དྲག་པོའི་གསོལ་བཏབ་མཐུས། །བདག་སོགས་དུས་འདི་ནས་བཟུང་བྱང་ཆེན་སར། །པད་འབྱུང་ནམ་སྙིང་དངོས་བརྒྱུད་སྤྲུལ་པ་ཡིས། །རྗེས་བཟུང་སྨིན་གྲོལ་ཟབ་དགུའི་གདམས་ངག་ཐོབ། །རིམ་གཉིས་སྒོམ་པའི་ཡོན་ཏན་གོང་དུ་འཕེལ། །མི་རྟོག་ལྟ་བའི་གདེང་ཆེན་མཐའ་རུ་ཕྱིན། །གཞན་ཕན་འཕྲིན་ལས་སྤྱོད་པ་ཕྱོགས་བཅུར་རྒྱས། །ཀུན་བཟང་བླ་མའི་འབྲས་བུ་མྱུར་ཐོབ་ཤོག །ཅེས་གསོལ་བ་གདབ། མཐར་ནི་བླ་མ་རང་ལ་ཐིམ་པ་ཡིས། །བདག་ལུས་བླ་མའི་སྐུར་ཞུགས་བུམ་དབང་ཐོབ། །བདག་ངག་བླ་མའི་གསུང་གྱུར་གསང་དབང་ཐོབ། །བདག་ཡིད་བླ་མའི་ཐུགས་གཅིག་ཤེར་དབང་ཐོབ། །སྒོ་གསུམ་དབྱེར་མེད་རིག་པའི་རྩལ་དབང་ཐོབ། །ཆོས་ཀུན་གདོད་ནས་སྤྲོས་བྲལ་བདེ་ཆེན་དབྱིངས། །ཟབ་གསལ་མཉམ་ཉིད་ངང་དུ་མཉམ་པར་བཞག །དེ་ཡི་དགེ་ཚོགས་འགྲོ་ལ་ཡོངས་སུ་བསྔོ། །དེ་མཐུས་ཁམས་གསུམ་འཁོར་བའི་སེམས་ཅན་ཀུན། །གློ་བུར་འཁྲུལ་པའི་དྲི་མ་ཡོངས་སངས་ཏེ། །མི་འགྱུར་བདེ་ཆེན་སྐུ་གསུམ་ཡོན་ཏན་རྒྱས། །དཔལ་ལྡན་བླ་མའི་གོ་འཕང་མྱུར་ཐོབ་ཤོག །
ཅེས་དཔལ་ལྡན་རྡོ་རྗེ་སེམས་དཔའ་དང་གཉིས་སུ་མེད་པ་འཇིགས་མེད་དབྱངས་ཅན་དགའ་བའི་ཞལ་སྔ་ནས་གང་གི་རིང་ལུགས་དྲི་མ་མེད་པར་འཛིན་ཅིང་རང་གི་རྡོ་རྗེ་སློབ་མར་གྱུར་པ་ལ་སྟོད་ལྟོ་འབུར་པ་ཞབས་དྲུང་དགེ་སློང་རྡོ་རྗེ་འཛིན་པ་བློ་བཟང་ནམ་མཁའ་འཇིགས་མེད་གང་གི་གསུང་གིས་གསོལ་བ་བཏབ་པའི་ངོར་བོད་ཆེན་གྱི་མངའ་རིས་སུ་སྐྱེས་ཤིང་ཡངས་པའི་རྒྱལ་ཁམས་སུ་ཆོས་སྨྲ་བ་རིག་པ་འཛིན་པ་ཚེ་དབང་ནོར་བུས་གང་ཤར་ལྷུག་པ་ཉིད་དུ་ཤིང་བྱི་སྣྲོན་ཟླའི་དམར་ཕྱོགས་ཀྱི་རྒྱལ་བ་གསུམ་པར་ཤར་ཕྱོགས་ཀོང་ཡུལ་ལྗོན་པ་ལུང་ནས་སྤེལ་བ་སརྦ་མངྒ་ལཾ།