རྡོ་རྗེ་ལྷ་སྐྱབས་ཀྱི་ངོར།
ཨོཾ་སྭཱ་སྟི། བདག་གི་ཕུང་ཁམས་གདན་གསུམ་དག་པའི་དལ། །སྤྱི་བོར་འོད་གུར་སེང་ཁྲི་པད་ཟླའི་སྟེང་། །རྡོ་རྗེ་སེམས་དཔའི་རང་མདངས་གསང་བ་སྦྱིན། །པད་ཞུ་ཆོས་གོས་གསུམ་གསོལ་ཆོས་འཆད་རྒྱས། །པད་དཀར་རྡོར་དྲིལ་བརྒྱན་པ་གཡས་སུ་འཛིན། །པད་དམར་པོད་རལ་མཚན་པ་ཡོངས་སུ་བསྙེན། །སྤྱི་བོར་རྡོར་སེམས་ཐུགས་ཀར་འཇམ་པའི་དབྱངས། །གཡོན་ན་གཡང་གནས་ལྷ་མོ་བདུད་རྩི་སྟོབས། །མཐོང་དང་དྲན་པ་ཙམ་གྱིས་ཡེ་ཤེས་སྐྱེ། །བདག་ལ་དབང་བསྐུར་བྱིན་རླབས་མཛད་བཞུགས་བསམ། །ཨོཾ་ཨཱ༔ཧཱུྃ། ཀུན་བཟང་རྡོར་སེམས་ཐུགས་རྗེས་རང་མདངས་ལས། །གསང་བདག་ཨིནྡྲ་བྷོ་ཏི་ཀུན་དགའ་བོ། །ཟླ་བ་གྲགས་དང་ཐོན་མི་སམྦྷོ་ཊ། །ཞི་སྙིང་བཻ་རོ་ཙ་ན་འཇིག་རྟེན་མིག །ཨ་རོ་ཙཱ་མི་རོང་ཟོམ་མཁས་པའི་དབང་། །ཚལ་བསྒོམ་རྡོ་རྗེ་གླིང་དང་ཀུན་སྐྱོང་གླིང་། །སྙིང་རྗེ་ཆེན་པོས་སྒྱུ་མ་ལྟར་སྤྲུལ་སྐུ། །ཀུན་གྱི་སྤྱི་དཔལ་ཆོས་ཀྱི་རྒྱལ་བའི་མཚན། །དབྱངས་ཅན་དགའ་བ་འཇིགས་མེད་བློ་གྲོས་གཏེར། །དཀྱིལ་འཁོར་གཙོ་བོ་གསང་བ་སྦྱིན་པ་ཞེས། །འཇམ་པའི་རྡོ་རྗེ་རང་བཞིན་མཁའ་ཁྱབ་དངོས། །དཔལ་ལྡན་བླ་མ་མཆོག་དེར་གསོལ་འདེབས་ཀྱིས། །ཐུགས་རྗེས་གཟིགས་མཛོད་བདག་རྒྱུད་ཡོངས་བརྒྱན་ཅིང་། །ཐུན་མོང་གྲུབ་བརྒྱད་ཁྱད་པར་སྨིན་གྲོལ་མཆོག །ཚེ་འདིར་དུས་འདིར་གདན་ཐོག་འདི་ཉིད་དུ། །མངོན་སུམ་གྲུབ་པ་ཐོབ་པར་བྱིན་གྱིས་རློབས། །ཨོཾ་ཨཱ༔་མ་ཧཱ་གུ་རུ་ཨཱ་བྷ་ཡ་གུ་ཡ་དཱ་ན་སིདྡྷི་ཕ་ལ་ཧཱུྃ། མཐར་ནི་བླ་མ་འོད་ཀྱི་གོང་བུར་ཞུ། །རང་སྙིང་དབུས་ཐིམ་ཐུགས་སེམས་དབྱེར་མེད་འདྲེས། །དེ་ལྟར་བླ་སྒྲུབ་དགེ་བ་འགྲོར་བསྔོས་མཐུས། །ཀུན་ཀྱང་བླ་མའི་གོ་འཕང་མྱུར་ཐོབ་ཤོག །
ཅེས་རྗེ་བཙུན་འཇིགས་མེད་དབྱངས་ཅན་དགའ་བའི་དབོན་རིགས་འབུར་པ་མི་རྗེ་གཞོན་ནུ་དད་པ་རྡོ་རྗེ་ལྷ་སྐྱབས་ཀྱིས་གསོལ་བ་བཏབ་པའི་ངོར་ཡུལ་མདོ་ཁམས་ཀྱི་རྒྱུད་དུ་སྐྱེས་ཤིང་ཕྱོགས་ཀུན་ཏུ་ཆོས་སྨྲ་བའི་རྣལ་འབྱོར་རྒྱལ་ཁམས་པ་ཚེ་དབང་ནོར་བུས་ཤིང་བྱའི་སྣྲོན་ཟླའི་དམར་ཕྱོགས་གང་བའི་ཚེས་བཟང་པོར་ཀོང་ཡུལ་ལྗོན་པ་ལུང་ནས་སྤེལ་བ་སརྦ་མངྒ་ལཾ།