རྒྱལ་བ་ཀུན་འདུས་རྩ་བའི་བླ་མ་ལ་གསོལ་འདེབས་རྣལ་འབྱོར་ཐུན་མོང་མ་ཡིན་པ་བྱིན་རླབས་ཡིད་བཞིན་གཏེར་མཛོད།

༄༅། །རྒྱལ་བ་ཀུན་འདུས་རྩ་བའི་བླ་མ་ལ་གསོལ་འདེབས་རྣལ་འབྱོར་ཐུན་མོང་མ་ཡིན་པ་བྱིན་རླབས་ཡིད་བཞིན་གཏེར་མཛོད་ཅེས་བྱ་བ་བཞུགས་སོ། །

༈ ན་མོ་གུ་རུ་པདྨ་ཀ་ར་ཨ་ཀརྵ་གརྦྷ་ཡ། ན་མོ་ཧཱུྃ༔ སྐྱབས་གནས་དཀོན་མཆོག་རྩ་གསུམ་འདུས་སྤྱི་དཔལ། །རྡོ་རྗེ་སློབ་དཔོན་ཞབས་ལ་སྐྱབས་སུ་མཆིའོ། །མཁའ་མཉམ་འགྲོ་ཀུན་ཕ་མར་གྱུར་པ་ལ། །སྙིང་བརྩེ་མ་ཧཱ་གུ་རུ་བསྒྲུབ་པར་བྱ། །བདག་ལུས་གདོད་ནས་ལྷུན་གྲུབ་གདན་གསུམ་ལ། །སྤྱི་བོའི་ཁ་དབྱིངས་པདྨའི་གུར་ཁང་དབུས། །རྡོ་རྗེའི་ཁྲི་ལ་ཟླ་བའི་གདན་སྟེང་དུ། །ཁྱབ་བདག་རྡོ་རྗེ་སློབ་དཔོན་ཀུན་འདུས་པའི། །པདྨ་ཐོད་འཕྲེང་རྩལ་འཆང་ནམ་མཁའི་སྙིང་། །བོད་གྲུབ་དགེ་སློང་ཆ་བྱེད་ཆོས་གོས་ཅན། །སྐུ་མདོག་དཀར་སྨུག་ཤ་རྒྱས་པཎ་ཞྭ་གསོལ། །ཕྱག་གཡས་ཁྲོ་བོའི་ཁུ་ཚུར་ཐུགས་ཀར་སྦྲེང་། །གཡོན་པ་རྡོ་རྗེ་ཁུ་ཚུར་དཀུ་རུ་བརྟེན། །རྡོར་སྐྱིལ་སྐུ་ལ་འཇའ་འོད་མེ་དཔུང་འཕྲོ། །སྤྱི་བོར་གུ་རུ་གསང་བ་འདུས་པ་བཞུགས། །ཐུགས་ཀར་བཛྲ་ཧེ་རུ་ཀ་དཔལ་འཆར། །གནས་གསུམ་རྡོ་རྗེ་གསུམ་དངོས་འབྲུ་གསུམ་ལས། །འོད་འཕྲོས་རང་བཞིན་དུར་ཁྲོད་མེ་འབར་ནས། །ཡེ་ཤེས་སྤྱན་དྲངས་དམ་ཚིག་དབྱེར་མེད་བཞུགས། །བདག་གི་སྒོ་གསུམ་གུས་པས་ཕྱག་འཚལ་ཞིང་། །བདག་ལུས་ལོངས་སྤྱོད་དཔལ་འབྱོར་ཚེ་བསོད་རྣམས། །གཏན་གྱི་འདུན་མར་བཅས་པས་ཡོངས་མཆོད་ནས། །སྐྱབས་གནས་གཅིག་མཆོག་ཕུར་ཚུགས་གདུང་བ་ཡི། །གུས་པའི་ཡིད་ཀྱིས་རབ་ཏུ་གསོལ་བ་འདེབས། །ཨོཾ་ཨཱ་ཧཱུྃ༔ རབ་འབྱམས་རྒྱལ་བ་རྒྱ་མཚོ་འབྱུང་བའི་གནས། །བླ་མེད་བླ་མ་ཀུན་གྱི་གཙོ་བོ་མཆོག །དམ་པ་སྐུ་གཉིས་སྤྱི་དཔལ་རྡོ་རྗེ་སེམས། །གུ་རུ་ནམ་མཁའི་སྙིང་པོར་གསོལ་བ་འདེབས། །ཧེ་རུ་ཀ་དཔལ་ཡོངས་ཀྱི་དཔྱིད་གྱུར་པ། །གཉིས་མེད་ཡེ་ཤེས་དྲ་བ་ཡོངས་སྡོམ་མཛད། །ཐུགས་མཆོག་ཡང་དག་རྡོ་རྗེ་ཁྲག་འཐུང་རྒྱལ། །དཔལ་ཆེན་ནམ་མཁའི་སྙིང་པོར་གསོལ་བ་འདེབས། །ཆོས་དབྱིངས་མཁའ་ལ་བདེ་ཆེན་སྤྲིན་འཕོ་བས། །ཕྱི་ནང་གཞན་གསུམ་ཡོངས་སྤྱོད་མཁའ་འགྲོ་མ། །ཀུན་གྱི་ངོ་བོར་གྱུར་ཅིང་ཀུན་གྱི་བདག །མཁའ་འགྲོ་ནམ་མཁའི་སྙིང་པོར་གསོལ་བ་འདེབས། །ཡེ་ཤེས་དབྱིངས་ནས་འབར་བའི་ཆོ་འཕྲུལ་གར། །ཅིར་ཡང་བསྒྱུར་ཞིང་འཕྲིན་ལས་རྣམ་བཞི་ཡིས། །བྱང་ཆུབ་འབྲས་བུ་མྱུར་དུ་སྨིན་མཛད་པ། །ཆོས་སྐྱོང་ནམ་མཁའི་སྙིང་པོར་གསོལ་བ་འདེབས། །སངས་རྒྱས་ཀུན་གྱི་གཉིས་མེད་ཡེ་ཤེས་ཐུགས། །དམ་ཆོས་རྒྱ་མཚོའི་སྒྲ་དབྱངས་རྟག་འཆར་གསུང་། །འཕགས་པའི་དགེ་འདུན་མ་ལུས་འཕྲོ་བའི་སྐུ། །མཆོག་གསུམ་ནམ་མཁའ་སྙིང་པོར་གསོལ་བ་འདེབས། །ཀུན་ཁྱབ་ཡེ་ཤེས་རྟག་བརྟན་སྤྲོས་བྲལ་ངང་། །ལྷུན་གྲུབ་འཐུག་པོ་བཀོད་པར་ངེས་ལྔའི་བདག །གང་འདུལ་ཆོ་འཕྲུལ་སྤྲུལ་པ་རྒྱ་མཚོའི་གཞི། །སྐུ་གསུམ་ནམ་མཁའི་སྙིང་པོར་གསོལ་བ་འདེབས། །མཐའ་བརྒྱད་ལས་འདས་སྟོང་ཉིད་འོད་གསལ་ལྟ། །ཟབ་གསལ་བདེ་ཆེན་ཡོངས་སྒྲུབ་བསྒོམ་པ་ཆེ། །ཆོས་ཀུན་འུབ་ཆུབ་རང་རྫོགས་སྤྱོད་པའི་རྩེ། །རྩལ་རྫོགས་ནམ་མཁའི་སྙིང་པོར་གསོལ་བ་འདེབས། །སངས་རྒྱས་ཀུན་གྱི་ངོ་བོར་ཡོངས་གྲུབ་ཅིང་། །སྲས་གྱུར་བྱང་སེམས་རིག་འཛིན་གྲུབ་ཆེན་ཚུལ། །སྒྱུ་འཕྲུལ་རྒྱ་མཚོ་འདོད་དགུའི་གར་བསྒྱུར་མཛད། །ཁྱབ་བརྡལ་ནམ་མཁའ་སྙིང་པོར་གསོལ་བ་འདེབས། །ཁྱོད་ནི་གསང་བདག་ཐུགས་ཀྱི་རྡོ་རྗེ་སེམས། །དངོས་གྱུར་སྤྲུལ་པས་མཁའ་ཁམས་མཐར་ཐུག་ཁྱབ། །རྫོགས་སངས་རྒྱས་ལས་གཞན་གྱིས་གྲངས་བཟུང་ཅི། །ཚད་མེད་ནམ་མཁའི་སྙིང་པོར་གསོལ་བ་འདེབས། །གདུལ་བྱ་ཚུར་མཐོང་ཉི་ཚེའི་སྣང་ངོ་རུ། །ཁྱེད་ཀྱི་སྒྱུ་འཕྲུལ་རིམ་གྱིས་གཅིག་ཅར་ཚུལ། །དཔེ་མེད་གྲོང་འཁྲུངས་རིན་ཆེན་རྡོ་རྗེ་འཛིན། །བོད་སྔགས་སྦྱོར་གྲོལ་རྩེར་སོན་ཤེས་རབ་གྲགས། །འོད་གསལ་འཁོར་ཡུག་མེས་ཚོམ་དྭགས་སྒོམ་ཚུལ། །མཁའ་འགྲོས་ཡོངས་མཆོད་ནམ་འོད་རྩ་རིས་རས། །བྱམས་དཔལ་བྱམས་འབུམ་གཞན་ཕན་མཁའ་ལྟར་བརྡལ། །ཨེ་མ་མ་ཎི་རིན་ཆེན་འགྲོ་འདུལ་མཁས། །ཐང་དབོན་གྲགས་དཔལ་འོད་གསལ་རྡོ་རྗེའི་ཐུགས། །བདེ་ཆེན་ཞིང་གཤེགས་རི་ཁྲོད་དར་བརྒྱས་ཞབས། །ཟབ་གཏེར་མཛོད་འབྱེད་བྱང་ཆུབ་གླིང་པ་དཔལ། །སངས་རྒྱས་བློ་གྲོས་རྩ་གསུམ་གྲུབ་པའི་གཙོ། །བྱང་ཆུབ་སེམས་བསྙེས་ཆོས་ཀྱི་རིན་པོ་ཆེ། །འཇའ་ལུས་རྡོ་རྗེའི་སྐུར་གཤེགས་བསོད་ནམས་མཆོག །ལུང་རིགས་རྔ་སྒྲ་རྒོད་པ་སངས་རྒྱས་འཕེལ། །རྣམ་དག་ཚུལ་ཁྲིམས་འཛིན་མཁས་བཟོད་དཔལ་གྲུབ། །མཁས་དབང་དམ་པ་ཡེ་ཤེས་རྒྱ་མཚོའི་སྡེ། །སྦས་ཚུལ་སྔགས་སྤྱོད་པདྨ་མ་ཎི་སོགས། །སྤྲུལ་པའི་འདོད་གར་ཅིར་ཡང་བྱེད་པ་པོ། །སྤྲུལ་བཞི་ནམ་མཁའི་སྙིང་པོར་གསོལ་བ་འདེབས། །དེང་དུས་སྙིགས་མ་བདག་འདྲའི་གདུལ་བྱ་ལ། །སོ་སྐྱེས་རང་གཟུགས་ཚུལ་གྱིས་འདུལ་བའི་ཕྱིར། །དགེ་བཤེས་ཐ་མལ་ཀུན་རྒྱུ་རྣལ་འབྱོར་སྤྱོད། །བྱིན་རླབས་ཅུང་ཟད་ཞུགས་ལ་སྤྲུལ་པའི་མཚན། །འཆང་གྱུར་རིག་འཛིན་ཚེ་དབང་ནོར་བུའི་སྡེ། །གཞན་ཕན་ནུས་པའི་རྩལ་ཤུགས་ཅི་ཙམ་ཀུན། །པད་འབྱུང་ནམ་སྙིང་མཐུ་སྟོབས་ཁོ་ན་སྟེ། །སྐྱབས་གཅིག་ནམ་མཁའི་སྙིང་པོར་གསོལ་བ་འདེབས། །མགོན་ཁྱོད་མཚན་ཙམ་གྱིས་ཀྱང་བྱིན་རླབས་མཐུས། །འདི་ལྟ་དོན་གཉིས་སྒྲུབ་ལ་གཡེལ་མེད་པས། །རང་ཉིད་ཕྱིར་མི་ལྡོག་པའི་ལམ་ལ་གཤེགས། །གདུལ་བྱ་ཐར་པའི་ལམ་ལ་དཀྲི་བྱེད་པའི། །གང་འདུལ་འཕྲིན་ལས་བཞི་ཡི་མཛད་པ་སྐྱོང་། །འཕྲིན་ལས་འགྲོ་འདུལ་འགྲོ་བ་ཡོངས་འདུལ་ཞེས། །ལྕགས་ལ་གསེར་འགྱུར་རྩི་ཞིང་བརྒྱས་འདེབས་སོ། །འདྲེན་མཆོག་ནམ་མཁའི་སྙིང་པོར་གསོལ་བ་འདེབས། །དེ་ལྟར་རྩ་བའི་བླ་མའི་ངོ་བོ་ཉིད། །ནམ་མཁའི་སྙིང་པོར་རྩེ་གཅིག་གསོལ་བཏབ་མཐུས། །བདག་སོགས་གདུལ་བྱ་འགྲོ་ཀུན་ཚེ་རབས་རྟག །དལ་འབྱོར་ཕུན་ཚོགས་མཐོ་རིས་འཕགས་ནོར་ལྡན། །པད་འབྱུང་ནམ་སྙིང་དངོས་རྒྱུད་སྤྲུལ་པ་ཡིས། །རྗེས་བཟུང་ངེས་འབྱུང་དད་པ་ལྷག་བསམ་རྒྱས། །ཚུལ་ཁྲིམས་ཏིང་འཛིན་ཤེས་རབ་བསླབ་རྩལ་རྫོགས། །བྱང་ཆེན་གོ་འཕང་རིང་མིན་མྱུར་འགྲུབ་ཤོག །མདོར་ན་པད་འབྱུང་ནམ་སྙིང་སྤྲུལ་བཅས་ཀྱི། །མི་དགེ་དུས་མཐའི་སྐད་ཅིག་ཡུན་མི་སྤྱད། །དགྱེས་ན་བསྐལ་པར་དམྱལ་བ་མནར་མེད་ཀྱང་། །ཡིད་འོང་གྲོང་བཞིན་སྤྲོ་པས་འཇུག་བྱེད་ན། །མགོན་ཁྱེད་བསྙེན་ཕྱིར་ལུས་སྲོག་སྨོས་ཅི་འཚལ། །གཏན་གྱི་འདུན་མའང་བླ་མ་མཉེས་ཕྱིར་སྟེ། །རྒྱལ་བས་བསྔགས་ཤིང་དམ་པའི་རྣམ་ཐར་མཆོག །ཇི་བཞིན་དད་མོས་གུས་ལ་རྟག་གནས་ཤོག །དུས་ཀུན་བདག་མེད་སྙིང་བརྩེའི་གཉིས་མེད་པས། །སྲིད་པར་མི་གནས་ཞི་ལ་མི་ཆགས་པར། །དེ་བཞིན་གཤེགས་པ་བླ་མ་རྡོ་རྗེ་སེམས། །གོ་འཕང་དམ་པ་མངོན་པར་ཐོབ་ནས་ཀྱང་། །མ་བསྒྲུབ་བཞིན་སྣང་སྒྱུ་མ་ལྟ་བུའི་འགྲོར། །གང་འདུལ་ཐབས་ཀྱི་མཛད་པ་རྒྱ་ཆེ་ལ། །རྒྱུན་མི་ཆད་པས་མཁའ་མཉམ་སེམས་ཅན་ཀུན། །རྫོགས་སངས་རྒྱས་སར་བདག་གིས་སྦྱོར་བཪ་ཤོག །རྩ་བའི་བླ་མ་ཁྱེད་མཐུ་ལ་བརྟེན་ནས། །བཀའ་ཡི་བླ་མར་ཡིད་ཆེས་ཚུལ་བཞིན་སྤྱོད། །བརྡ་ཡི་བླ་མས་ཅིར་སྣང་རང་སར་གྲོལ། །ཚུལ་དེས་རང་རིག་དོན་གྱི་བླ་མ་མཆོག །གདོད་ནས་རྣམ་དག་ངོ་བོ་ཆོས་ཀྱི་དབྱིངས། །རིག་པ་སངས་རྒྱས་ཀུན་གྱི་ཆོས་སྐུ་མཆོག །གློ་བུར་དྲི་མའི་ཚོགས་སྤངས་མི་འགྱུར་བདེ། །རང་ཞལ་དུས་འདིར་མཐོང་བར་བྱིན་གྱིས་རློབས། །ཚེ་དབང་རིག་འཛིན་པད་འབྱུང་མཁའ་དབྱིངས་ལས། །ནམ་མཁའི་སྙིང་པོ་ནོར་བུ་འོད་ཟེར་འཕྲོ། །བདག་བློ་འཁྲུལ་པའི་མུན་པ་ཡོངས་གསལ་ནས། །ཁྱོད་དང་མཚུངས་པ་ཉིད་དུ་བདག་མཛོད་ཅིག །ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ། དེ་ལྟར་རྩེ་གཅིག་གུས་པས་ལྟོས་དྲག་ལ། །ཡུན་རིང་གདུང་བས་གསོལ་བ་བཏབ་པའི་མཐར། །གུ་རུའི་སྐུ་ལས་ཡེ་ཤེས་བདུད་རྩི་རྒྱུན། །དཀར་ལ་དམར་ལྡང་སྔོ་བའི་འོད་འཕྲོ་བ། །མར་བབ་བདག་གི་ཚང་བའི་སྒོ་ནས་ཞུགས། །ནད་གདོན་སྡིག་སྒྲིབ་ཐམས་ཅད་སང་སང་དག །མགྲིན་ཡན་ཁེངས་པས་བུམ་དབང་ལམ་འབྲས་རྫོགས། །སྙིང་ག་གསང་དབང་ལྟེ་བ་ཤེར་ཡེའི་དབང་། །གསང་བ་ཁེངས་པས་དབང་བཞིའི་ལམ་འབྲས་རྫོགས། །ལུས་ཀུན་ཡོངས་ཁེངས་རིགས་རྩལ་དབང་རྫོགས་ཤིང་། །བླ་མ་བདག་སྙིང་དབུས་བྱོན་འོད་གསལ་ངང་། །རྟག་ཆད་མཐའ་བྲལ་བླ་མ་རང་རིག་འདྲེས། །སྣང་གྲགས་རིག་ཀུན་བླ་མའི་སྐུ་གསུང་ཐུགས། །ལམ་ཁྱེར་ཟབ་གསལ་བདེ་ཆེན་ངང་ལ་བཞག །དེ་ལྟར་གུ་རུ་ནམ་སྙིང་རྣལ་འབྱོར་ལ། །འབད་པའི་དགེ་ཀུན་བྱང་ཆུབ་ཆེན་པོར་བསྔོ། །དེ་མཐུས་རྒྱལ་བ་རྒྱ་མཚོའི་གཙོ་བོ་མཆོག །ནམ་སྙིང་སྐུ་གསུང་ཐུགས་དང་དབྱེར་མེད་པར། །སངས་རྒྱས་བྱང་སེམས་མཛད་འཕྲིན་མ་ལུས་ཀུན། །བདག་གིས་ཡོངས་སྒྲུབ་འགྲོ་ཀུན་འདྲེན་པར་ཤོག ། ༣༨

ཅེས་བྱིན་རླབས་རྨད་བྱུང་གུ་རུའི་རྣལ་འབྱོར་ཐུན་མོང་མ་ཡིན་པ་འདི་ནི་ལང་འབྲོ་དཀོན་མཆོག་འབྱུང་གནས་ཀྱི་གདུང་ལས་སྔ་་འགྱུར་བརྟན་པའི་གསལ་བྱེད་སྒྲོལ་ཕུག་ཆེན་པོ་པདྨ་ཀུན་གསལ་འགྲོ་ཀུན་པའི་བཤེས་གང་གི་དང་། ཁྱབ་བདག་བོན་ལུང་པ་དཔལ་འབྱོར་ཚུལ་ཁྲིམས་རྒྱལ་མཚན་གྱི་ཡང་སྲིད་གཉིས་པ་གར་དབང་བློ་བཟང་ཚུལ་ཁྲིམས་དཔལ་བཟང་ནས་ཀྱང་བསྐུལ་ཞིང་། ལྷག་ཏུ་སྐྱེས་མཆོག་ཆེན་པོ་འབའ་ར་བའི་ཁྲི་ཆེན་སྨྲ་བ་འཇམ་གླིང་བླ་མ་ཨོ་རྒྱན་ངག་དབང་ཡེ་ཤེས་དཔལ་བཟང་དང་། མཁས་གྱུར་རྫོགས་ཆེན་རྣལ་འབྱོར་ལྷ་རྗེ་དམ་པ་ཡེ་ཤེས་དཔལ་འབར་དྲུང་ནས་ཀྱང་ཡང་ཡང་ནན་གྱིས་བསྐུལ་བ་མཛད་ཅིང་། དེ་བཞིན་སྙེ་མོ་བདེ་གླིང་སྡེ་པ་རྡོ་རྗེ་བཀྲ་ཤིས་དང་། ཨ་ཐ་གླིང་གི་རྟ་མགྲིན་ཚེ་དབང་སོགས་སྙེ་མོས་འདུས་སྡེ་དད་ལྡན་ཕོ་མོ་ཐམས་ཅད་ཀྱིས་གུས་པ་ཆེན་པོའི་མགྲིན་གཅིག་ཏུ་གསོལ་བ་བཏབ་པ་དང་། མང་མམ་ལྕམ་ཨོ་རྒྱན་དཔལ་འཛིན་ནས་ཀྱང་དངོས་ངག་ཁོ་ན་རྒྱུད་ནས་དོ་གལ་གྱི་བསྐུལ་བས་རྐྱེན་བྱས་ཏེ། མདོ་ཁམས་ཀཿཐོག་ལྷོ་རྒྱུད་དུ་འོད་གསལ་ལས་བབ་པ་དངུ་ཡི་རིགས་སུ་སྐྱེས་གྱུར་ཤཱཀྱའི་དགེ་བསྙེན་སྔགས་ཀྱི་རིག་འཛིན་ཚེ་དབང་ནོར་བུ་འཕྲིན་ལས་འགྲོ་འདུལ་འགྲོ་བ་ཡོངས་འདུལ་རྩལ་གྱིས་རབ་བྱུང་བཅུ་གཉིས་པའི་མེ་འབྲུག་ས་ག་ཟླ་བའི་ཚེས་བཅུ་ལ་གཞུ་ཡུལ་ས་ཡི་ཐིག་ལེ་འབྲོང་དཀར་རྫོང་དུ་ཐུན་གཅིག་ལ་གྲུབ་པར་བྱས་ཡི་གེ་པ་ཤེས་རབ་བསྟན་འཛིན་ཏེ། འདི་ཡང་འགྲོ་བ་ཀུན་གུ་རུ་ནམ་མཁའི་སྙིང་པོའི་གོ་འཕང་མྱུར་དུ་ཐོབ་པའི་རྒྱུ་གྱུར་ཅིག དགེའོ། །བཀྲ་ཤིས།