འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྒྲུབ་ཐབས་གསོ་སྦྱོང་དང་འབྲེལ་བ་བཀླག་ཆོག་ཐར་གླིང་བགྲོད་པའི་གྲུ་རྫིང་།

༄༅། །འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྒྲུབ་ཐབས་གསོ་སྦྱོང་དང་འབྲེལ་བ་བཀླག་ཆོག་ཐར་གླིང་བགྲོད་པའི་གྲུ་རྫིང་དམ་པ། །

༈ ཨོཾ་སྭསྟི། ན་མཿསརྦ་བུདྡྷ་བོ་དྷེ་ས་ཏྭ་བྷྱཿ འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྒྲུབ་ཐབས་གསོ་སྦྱོང་དང་འབྲེལ་བ་བཀླག་ཆོག་ཐར་གླིང་བགྲོད་པའི་གྲུ་རྫིང་དམ་པ་ཞེས་བྱ་བ་བླ་མ་ཐུབ་དབང་འཇིག་རྟེན་མགོན་པོ་ལ་ཕྱག་འཚལ་ལོ། །ཀུན་ཁྱབ་དག་པ་བདེ་ཆེན་ནམ་མཁའ་ལ། །ཆོས་ཀྱི་སྤྲིན་བཟང་ཐུགས་རྗེའི་གྲུ་ཆར་ཅན། །སྲིད་པའི་ཚད་སེལ་ཐར་དབང་སྨན་འབྲུ་ཀུན། །རྒྱས་མཛད་མགོན་པོ་བླ་མར་དང་པོར་འདུད། །རབ་དཀར་ཟླ་བ་འབུམ་གྱི་མདངས་འཕྲོག་ཅིང་། །རབ་མཛེས་ལྟ་བས་བསྐལ་པར་ཆོག་མི་ཤེས། །རབ་ཡངས་བརྩེ་སྤྱན་གདུལ་བྱར་རྟག་ཏུ་གཟིགས། །རབ་མཆོག་འཇིག་རྟེན་མགོན་པོར་ཕྱག་འཚལ་ནས། །གང་གི་སྒྲུབ་ཐབས་འཕྲིན་ལས་བཟང་པོའི་རྒྱུན། །དམ་པ་མང་པོས་ལན་བརྒྱར་གསལ་མཛད་ན། །ཉིན་སྣང་གནས་བཞིན་སྣང་གསལ་བཏེགས་པ་ལྟར། །བདག་གིས་ཡི་གེའི་ངལ་བས་ཅི་ཞིག་བྱ། །འོན་ཀྱང་བསླབ་གསུམ་རྒྱལ་མཚན་འཛིན་རྣམས་དང་། །ཁྱིམ་པ་དད་ལྡན་བྱང་ཆུབ་སེམས་འཆང་འགས། །ཡང་ཡང་བསྐུལ་གང་རེ་བ་བསྐང་བའི་ཕྱིར། །སྔོན་གསུང་བསྐྱར་བཟློས་ཚུལ་འཆད་དགེ་གྱུར་ཅིག །

འདི་ལྟར་འཁོར་བ་སྒྲོལ་བའི་གྲུ་ཆེས་རྙེད་པར་དཀའ་བ་དལ་འབྱོར་གྱི་རྟེན་ཕུན་སུམ་ཚོགས་པ་ནི་བརྒྱ་ལམ་རེས་འགའ་ཨུ་དུམ་ཝ་རའི་མེ་ཏོག་ཤིན་ཏུ་རྙེད་པར་དཀའ་བས་རྟེན་བཟང་པོ་འདི་ལྟ་བུ་ཐོབ་པ་ཉིད་དོན་མེད་སྟོང་ལས་ཀྱི་ཆུད་ཟོས་སུ་མ་སོང་བར་སྙིང་པོ་ལེན་པ་ཅིས་ནས་ཀྱང་གལ་ཆེ་ལ། དེ་ཡང་ཚེག་ཆུང་ཞིང་འཇུག་བདེ་ལ་དོན་ཆེ་བ་མངོན་པར་མཐོ་བ་མཐོ་རིས་ཀྱི་ཡོན་ཏན་དང་། ངེས་པར་ལེགས་པར་ཐར་པ་གསུམ་གྱི་འབྲས་བུ་མཐའ་དག་ཐོབ་པར་བྱེད་པའི་ལམ་བཟང་སྡོམ་པ་གསུམ་ཀ་ལ་འཇུག་ཅིང་བསླབ་པ་གསུམ་གྱི་གཞི་འཛིན་པ་གསོ་སྦྱོང་གི་ཆོ་ག་འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྒྲུབ་ཐབས་ལ་རྟེན་པ་དམ་པ་མཆོག་གྱུར་མང་པོའི་གཤེགས་ཤུལ་བྱིན་རླབས་ཀྱི་རྒྱུན་མ་ཆད་པ་བསྙུང་གནས་ཀྱི་ཆོ་ག་དཔལ་མོ་ལུགས་སུ་གྲགས་པ་འདི་ལ་ཅི་ནུས་སུ་ངེས་པར་འབད་པར་བྱ་སྟེ།

དེ་ལ་ཐོག་མར་སངས་རྒྱས་ཀྱི་དུས་ཁྱད་པར་ཉ་སྟོང་བརྒྱད་ལྟ་བུ་ཚེས་བཟང་པོ་ལ་ཡིད་དང་མཐུན་པའི་གནས་ཁང་བྱི་དོར་གཙང་སྦྲ་ལེགས་པར་བྱས་ལ་དཀོན་མཆོག་གི་རྟེན་ཅི་འབྱོར་འོས་པ་བཤམས་པའི་དྲུང་དུ་དེ་ཉིད་ལྔ་པའི་སྐབས་སུ་བཤད་པའི་དཀྱིལ་འཁོར་བུམ་པ་མཆོད་གཏོར་ཡང་དུས་འདིར་བཅའོ། །དེ་ནས་ཉམས་སུ་ལེན་བྱ་ཆོ་གའི་ཚུལ་བདེ་གཞུང་གྲགས་ཆེ་བ་རྩ་བ་ལྟ་བུ་ནི་རྒྱལ་སྲས་ཐོགས་མེད་བཟང་པོས་མཛད་པ་དེ་ཡིན་ལ། དེར་ས་བཅད་སྡོམ་མ་མཛད་པས་དམ་པ་མང་པོས་ཡང་དེ་མཐུན་དང་། ཁ་ཤས་ནས་སྤྱི་འདྲའི་ས་བཅད་ཙམ་དང་། དམ་པ་ཁ་ཅིག་ནས་རྒྱུད་སྡེ་རིགས་མཐུན་གྱི་ཆོ་གའི་བརྡའ་དང་སྦྱར་ནས། རྒྱལ་སྲས་པས་མཛད་པའི་གཞུང་དོན་ལ་སྡོམ་དེ་ཉིད་བཅུ་དྲུག་ཏུ་བྱས་པ་ནི་རྩ་བ་དང་མི་འགལ་བར་འཕྲལ་རྣམ་པ་གསལ་བ་ལྟར་སྣང་བས་འདིར་ཡང་སྐྱིད་གྲོང་ལོཙྪ་བ་ངག་དབང་གྲགས་པས་མཛད་པ་དེ་བློ་ལ་བབས་པ་དེ་དང་ཕྱོགས་མཐུན་དུ་བཀོད་པའི་སྡོམ་ཚིག་ནི།

སྔོན་དུ་གཙང་ཁྲུས་མཎྜལ་སྤྱི་བཤགས་དང་། །གསོ་སྦྱོང་བསླབ་པ་དངོས་གཞི་ཉིད་དང་བཞི། །བཅས་བཤམས་སྦྱོར་བ་བདག་བསྐྱེད་བཟླས་པ་དང་། །དེ་བཞིན་མདུན་བསྐྱེད་བཟླས་པ་བཅས་ཏེ་བཞི། །ཐུན་མཚམས་ཕྱག་མཆོད་བསྟོད་དང་འདོད་དོན་གསོལ། །གཏོར་འབུལ་སྨོན་ལམ་གདབ་པ་རྣམས་ཏེ་བཞི། །མནོང་བཤགས་གཟུངས་བསྒྲུབ་ཁྲུས་ཆུའི་བྱིན་རླབས་བླངས། །གཤེགས་བསྡུད་བསྔོ་བ་བཀྲ་ཤིས་རྗེས་བཞིའོ། །ཞེས་སོ། །དེ་ལྟར་གསོ་སྦྱོང་གི་སྡོམ་པ་ལེན་པར་འདོད་པ་རྣམས་ཐོག་མ་གཙང་མར་བྱ་བའི་ཕྱིར་ཁྲུས་བགྱིད་པའི་དེ་ཉིད་ནི།

དང་པོར་ཐལ་མོ་སྦུབ་སོར་སྦྱོར་བ་ལས་གུང་མོ་གཉིས་རྩེ་མོར་བྱས་ཤིང་སོར་མོ་གཞན་རྣམས་ཀྱང་རྩེ་མོ་ཅུང་ཟད་མ་རེག་པ་པདྨ་ཁ་འབུས་པའི་རྣམ་པ་པདྨའི་རིགས་ཀྱི་དམ་ཚིག་གི་ཕྱག་རྒྱ་དེ་སྙིང་གར་བཞག་ནས། ཨོཾ་པདྨ་ཏ་བྷ་ཝ་ཡེ་སྭཱ་ཧཱ། ཞེས་བརྗོད། དེ་ནས་པདྨ་སེམས་དཔའ་འམ་རྡོ་རྗེ་སེམས་དཔའི་ཡི་གེ་བརྒྱ་པ་བཟླས་བཞིན་པས་གདོང་པ་ཁ་དང་ཡན་ལག་ལེགས་པར་བཀྲུའོ། །

གཉིས་པ་མཎྜལ་དེ་ཉིད་ནི། གསོ་སྦྱོང་ལ་འཇུག་པ་རྣམས་འདུས་ཏེ་ཐོག་མར་བརྒྱུད་པའི་བླ་མ་ལ་གསོལ་བ་འདེབས་པ་ནི་རང་མདུན་ཏ་ལའི་སྲིད་ཙམ་གྱི་མཁའ་ལ་རྩ་བའི་བླ་མ་མཚན་དཔེ་ཡོངས་སུ་རྫོགས་པ་སངས་རྒྱས་བཅོམ་ལྡན་འདས་ཀྱི་སྐུར་སྣང་མདོ་ཡི་སྟེང་སོགས་ཐོ་ཕྱི་ཀུན་ཏུ་ནམ་མཁའི་གནས་སུ་རྒྱུ་སྐར་རམ་འཇའ་སྤྲིན་འཁྲིགས་པ་བཞིན་རང་གི་རྩ་བ་ཡན་ལག་གི་བླ་མ་གཞན་དང་བརྒྱུད་པའི་བླ་མ་སྤྱི་དང་བྱེ་བྲག་པ་ཡི་དམ་སངས་རྒྱས་བྱང་སེམས་ཉན་རང་འཕགས་ཚོགས་མ་ལུས་པ་དང་མཁའ་འགྲོ་ཆོས་སྐྱོང་བཅས་མངོན་སུམ་བཞུགས་པ་ལ་མོས་པས་སྐད་ཅིག་གིས་གསལ་བཏབ་སྟེ་དེ་ལ་བདག་སོགས་སེམས་ཅན་ཐམས་ཅད་ཀྱིས་གུས་པ་ཆེན་པོས་གསོལ་བ་བཏ་པར་བསམ་སྟེ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་བ་ཕན་ཕྱིར་སངས་རྒྱས་མྱུར་འགྲུབ་ཤོག །རབ་འབྱམས་ཕྱོགས་བཅུའི་ཞིང་རྣམས་མ་ལུས་པར། །བཞུགས་པའི་བླ་མ་ཡི་དམ་དཀྱིལ་འཁོར་ལྷ། །མཁའ་འགྲོ་ཆོས་སྐྱོངས་བསྲུང་མའི་ཚོགས་ཀུན་ཀྱང་། །གནས་མཆོག་འདི་རུ་བྱོན་ལ་བྱིན་གྱིས་རློབས་མཛོད་ཅིག །བླ་མ་འགྲོ་བའི་མགོན་པོ་ལ་གསོལ་བ་འདེབས་སོ། །སངས་རྒྱས་འགྲོ་བའི་མགོན་པོ་ལ་གསོལ་བ་འདེབས་སོ། །རྒྱལ་ཚབ་འགྲོ་བའི་མགོན་པོ་ལ་གསོལ་བ་འདེབས་སོ། །བྱང་སེམས་འགྲོ་བའི་མགོན་པོ་ལ་གསོལ་བ་འདེབས་སོ། །ཀུན་མཁྱེན་འགྲོ་བའི་མགོན་པོ་ལ་གསོལ་བ་འདེབས་སོ། །རྗེ་བཙུན་འགྲོ་བའི་མགོན་པོ་ལ་གསོལ་བ་འདེབས་སོ། །ཆོས་རྗེ་འགྲོ་བའི་མགོན་པོ་ལ་གསོལ་བ་འདེབས་སོ། །དྲིན་ཅན་འགྲོ་བའི་མགོན་པོ་ལ་གསོལ་བ་འདེབས་སོ། །

ཞེས་གནས་མཆོག་སོགས་ཚིགས་རྐང་དགུ་པོ་འདི་འོག་གི་ཚིགས་མཚམས་རྣམས་སུ་ཡང་རིམ་པས་སྦྱར། བསྡུ་ན་བླ་མ་འགྲོ་བའི་མགོན་པོ་མན་གྱི་ཚིགས་རྐང་བརྒྱད་པོའི་ཐོག་མཐར་སྦྱར་བ་དཀྱུས་སུ་བྲིས་ལྟར་ཉིད་ཀྱིས་འགྲུབ། དྲིན་ཅན་རྩ་བའི་བླ་མ་དང་། རྒྱལ་བ་འོད་དཔག་མེད་པ་དང་། འཕགས་པ་སྤྱན་རས་གཟིགས་དབང་རྣམས་ཀྱང་། གནས་མཆོག་སོགས་འགྲེའོ། །གྲུབ་མཆོག་དགེ་སློང་མ་དཔལ་མོ་དང་། པཎ་ཆེན་ཟླ་བ་གཞོན་ནུ་དང་། པཎ་ཆེན་ཡེ་ཤེས་བཟང་པོ་རྣམས་ཀྱང་། གནས་མཆོག་སོགས་འགྲེ། པཎ་ཆེན་བལ་པོ་པེ་ཉ་དང་། བྱང་སེམས་ཟླ་བ་རྒྱལ་མཚན་དང་། གྲུབ་ཐོབ་ཉི་ཕུག་པ་ཆེན་པོ་རྣམས་ཀྱང་། གནས་མཆོག་སོགས་འགྲེ། སྲུལ་པ་རྡོ་རྗེ་རྒྱལ་པོ་དང་། ཞང་སྟོན་དགྲ་འཇིགས་པ་ཆེན་པོ་དང་། མཁན་ཆེན་རྩེ་འདུལ་བ་ཆེན་པོ་རྣམས་ཀྱང་། གནས་མཆོག་སོགས་མཁན་ཆེན་བདེ་བ་ཅན་པ་དང་། བྱང་སེམས་ཆུ་བཟང་པ་ཆེན་པོ་དང་། ཆོས་རྗེ་ཤེས་རབ་འབུམ་པ་རྣམས་ཀྱང་། གནས་མཆོག་སོགས། ཆོས་རྗེ་རྒྱལ་སྲས་ཐོགས་མེད་དང་། སེམས་དཔའ་ཆོས་ཀྱི་རིན་ཆེན་དང་། བྱང་སེམས་བསོད་ནམས་རིན་ཆེན་རྣམས་ཀྱང་། གནས་མཆོག་སོགས། སེམས་དཔའ་བསོད་ནམས་རྒྱལ་མཚན་དང་། རྗེ་བཙུན་ཀུན་དགའ་གྲོལ་མཆོག་དང་། ཆོས་རྗེ་ཀུན་དགའ་རྒྱལ་མཚན་ཡང་། གནས་མཆོག་འདི་རུ་སོགས། རྗེ་བཙུན་ཀུན་དགའ་སྙིང་པོ་དང་། སྐྱེས་མཆོག་ཡེ་ཤེས་རྒྱ་མཚོ་དང་། རྒྱལ་ཚབ་རིན་ཆེན་རྒྱ་མཚོ་ཡང་། གནས་མཆོག་སོགས། སྙིང་པོ་བློ་གྲོས་རྣམ་རྒྱལ་དང་། འཇམ་དབྱངས་ངག་དབང་ཕྲིན་ལས་དང་། རྗེ་བཙུན་ཀུན་བཟང་དབང་པོ་དང་། གནས་མཆོག་སོགས། རྩ་བ་རྒྱུད་པའི་བླ་མ་དང་། རྒྱལ་ཁམས་གྲུབ་ཐོབ་མ་ལུས་དང་། མཆེད་གྲོགས་ཆོས་མཛད་གོང་མ་རྣམས་ཀྱང་། གནས་མཆོག་སོགས། ཡི་དམ་དཀྱིལ་འཁོར་ལྷ་ཚོགས་དང་། གནས་གསུམ་དཔའ་བོ་མཁའ་འགྲོ་དང་། མཐུ་ལྡན་ཆོས་སྐྱོངས་བསྲུང་མ་རྣམས་ཀྱང་། གནས་མཆོག་འདི་རུ་བྱོན་ལ་བྱིན་གྱིས་རློབས་མཛོད་ཅིག བླ་མ་འགྲོ་བའི་མགོན་པོ། སངས་རྒྱས། རྒྱལ་ཚབ། བྱང་སེམས། ཀུན་མཁྱེན། རྗེ་བཙུན། ཆོས་རྗེ། དྲིན་ཅན་འགྲོ་བའི་མགོན་པོ་ལ་གསོལ་བ་འདེབས་སོ། །

ཞེས་གདུང་ཤུགས་དྲག་པོས་གསོལ་བ་བཏབ་སྟེ་འདི་ནི་རྒྱལ་སྲས་ཐོགས་མེད་ཀྱི་དངོས་སློབ་བྲག་དཀར་སེམས་དཔའ་ཆེན་པོ་ཡབ་སྲས་ཀྱི་གསུང་རྒྱུན་རླབས་ཀྱི་མཆེད་དུ་བླ་མ་བརྒྱུད་པའི་ཁ་བསྐང་སྟེ་བཀོད་པའོ། །དེ་ནས་ཆོས་པས་གསལ་བཏབ་པའི་གོང་གི་ཚོགས་ཞིང་རྣམས་ཀྱི་སྤྱན་སྔར་མཎྜལ་ཕུལ་བ་དངོས་ནི། རིན་པོ་ཆེའམ་ཤིང་གི་མཎྜལ་གཙང་ཞིང་ཡིད་དུ་འོང་བ་ཉིད་རྡོ་རྗེ་སེམས་དཔའི་བརྒྱ་བཟླ་བཞིན་པས་རྡུལ་གཡས་བསྐོར་དུ་ཕྱིས་ཤིང་དྲི་བཟང་པོའི་ཆུའི་ཆག་ཆག་གདབ། འབྲུ་འམ་མེ་ཏོག་སིལ་མས་ཚོམ་བུ་བཀོད་ཅིང་། ཨོཾ་བཛྲ་བྷུ་མི་ཨཱཿཧཱུྃ། གཞི་ཡོངས་སུ་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རི་འཁོར་ཡུག་གིས་བསྐོར་བའི་དབུས་སུ་ཧཱུྃ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་གླང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་པོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་པ་མ། འཕྲེང་བ་མ། གླུ་མ། གར་མ། མེ་ཏོག་མ། བདུག་པ་མ། སྣང་གསལ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདོད་པའི་ཡོན་ཏན་མཐའ་དག་ཚང་ཤིང་ཡིད་དུ་འོང་བ་འདི་ཉིད་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་རྒྱུད་སྡེ་བཞི་དྲུག་གི་དཀྱིལ་འཁོར་གྱི་ལྷ་ཚོགས་ཕྱོགས་བཅུ་དུས་གསུམ་གྱི་སངས་རྒྱས་སྲས་དང་སློབ་མར་བཅས་པ་རྣམས་དང་སྐྱབས་གནས་དཀོན་མཆོག་ཀུན་འདུས་ཀྱི་ངོ་བོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་འཁོར་དང་བཅས་པ་ལ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་རླབས་སུ་གསོལ། །ཞེས་མཎྜལ་ཚོམ་བུ་སོ་བདུན་མ་ལེགས་པར་ཕུལ་ཞིང་བསྡུ་ན་ཚོམ་བུ་བཅོ་ལྔ་པའམ་བདུན་པ་ཡང་རུང་གི །ས་གཞི་སྤོས་ཀྱི་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པ་ཤོག །གཞན་ཡང་སློབ་དཔོན་སུ་ཙཱ་ཏི་ཏ་དང་། སྙོག་མེད་དཔལ་གྱི་མཎྜལ་གྱི་ཆོ་གར་འབྱུང་ཞིང་སྤྱིར་རྒྱུད་ཚིག་ཏུ་བཞེད་པའི་ཚིགས་བཅད་ནི།

བདག་གཞན་ལུས་ངག་ཡིད་གསུམ་དུས་གསུམ་དགེ་ཚོགས་དང་། །རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླང་ནས་བླ་མ་དཀོན་མཆོག་གསུམ་ལ་འབུལ། །ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། །ཡང་ཨ་མོ་གྷའི་དཀྱིལ་མཆོག་ནས། ཞིང་ཁམས་ཁྱད་པར་འཕགས་པའི་མཎྜལ་འདི། །དུས་གསུམ་བླ་མ་རྣམས་དང་ཡི་དམ་ལྷ། །བླ་མེད་དཀོན་མཆོག་ལ་གསུམ་དབུལ་བར་བགྱི། །བཞེས་ཤིང་བླ་མེད་དངོས་གྲུབ་སྩལ་དུ་གསོལ། །ཡང་མཎྜལ་སྔགས་ཀྱིས་འབུལ་བ་ནི། ཨོཾ་གུ་རུ་ལོ་ཀ་ནཱ་ཐ་དེ་ཝ་ཌཱ་ཀི་ནི་རཏྣ་ཏྲ་ཡཱ་ཡ་ཨི་དཾ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་པའོ། །བདག་སོགས་སེམས་ཅན་ཐམས་ཅད་ཀྱི་འཁོར་བ་ཐོག་མེད་ནས་ད་ལྟ་ལ་ཐུག་གི་བར་སྡིག་པ་མི་དགེ་བའི་ལས་སྤྱི་དང་། བྱེ་བྲག་སྡོམ་གསུམ་གྱི་ཉེས་ལྟུང་གི་ཚོགས་ཅི་ཡོད་པ་རྣམས་གནོང་ཞིང་འགྱོད་པའི་ཚིགས་འདི་རྣམས་ཀྱིས་མཐོལ་ཞིང་བཤགས་པར་བྱ་སྟེ། བླ་མ་རྡོ་རྗེ་འཛིན་པ་ཆེན་པོ་ལ་སོགས་ཏེ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཚེ་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ། ཉོན་མོངས་པ་འདོད་ཆགས་དང་ཞེ་སྡང་དང་གཏི་མུག་གི་དབང་གིས་ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མེད་པ་ལྔ་བགྱིས་པ་དང་། དེ་དང་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བར་བགྱིས་པ་དང་། བྱང་ཆུབ་སེམས་དཔའི་བསླབ་པ་དང་འགལ་བ་བགྱིས་པ་དང་། གསང་སྔགས་ཀྱི་དམ་ཚིག་དང་འགལ་བ་བགྱིས་པ་དང་། དཀོན་མཆོག་གསུམ་ལ་མ་གུས་པ་བགྱིས་པ་དང་། ཕ་མ་མ་ལ་མ་གུས་པ་བགྱིས་པ་དང་། མཁན་པོ་དང་སློབ་དཔོན་ལ་མ་གུས་པ་བགྱིས་པ་དང་། གྲོགས་ཚངས་པ་མཚུངས་པར་སྤྱོད་པ་རྣམས་ལ་མ་གུས་པ་བགྱིས་པ་དང་། དམ་པའི་ཆོས་སྤངས་པ་དང་། གསུང་རབ་ཀྱི་གླུད་ཟོས་པ་དང་། འཕགས་པའི་དགེ་འདུན་ལ་སྐུར་བ་བཏབ་པ་ལ་སོགས་པ། མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་འཁོར་བ་ངན་སོང་གི་རྒྱུར་གྱུར་པའི་སྡིག་པ་དང་ཉེས་པ་དང་། ལྟུང་བའི་ཚོགས་ཅི་བགྱིས་པ་དང་། བགྱིད་དུ་བསྩལ་བ་དང་གཞན་བགྱིད་པ་ལ་རྗེས་སུ་ཡི་རང་བ་བགྱིས་པ་དེ་དག་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། མི་སྦེད་དོ། །ཕྱིན་ཆད་སྡོམ་པར་བགྱིད་ལགས་སོ། །མཐོལ་ཞིང་བཤགས་ན་བདག་བདེ་ལ་རེག་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་དང་། སྐབས་འདིར་ཕུང་པོ་གསུམ་པའི་མདོ་ཡང་ལེགས་པར་བཀླགས་སོ། །དེ་ནས་སྐྱབས་ཡུལ་དཀོན་མཆོག་ཐམས་ཅད་རྩ་བའི་བླ་མ་སངས་རྒྱས་བཅོམ་ལྡན་འདས་ལ་ཐིམ། དེ་རང་གི་སྤྱི་བོའི་གཙུག་ནས་མར་བྱོན་བདག་དང་གཉིས་སུ་མེད་པར་བསམ་ལ་ཅུང་ཟད་མཉམ་པར་བཞག བཞི་པ་བསླབ་གཞི་གསོ་སྦྱོང་ཡན་ལག་བརྒྱད་ཀྱི་སྡོམ་པ་ལེན་པ་དེ་ཉིད་ནི། དེའི་ཚིག་རྫོགས་པའི་སངས་རྒྱས་ཀྱི་གསུང་འཕགས་གཞུང་དངོས་ནི།

རྒྱ་གར་སྐད་དུ། པོ་ཥ་དྷ་སྭ་ཡཾ་གྲ་ཧ་ན་བི་དྷི། བོད་སྐད་དུ། གསོ་སྦྱོང་རང་གིས་བླང་བའི་ཆོ་ག་བཅོམ་ལྡན་འདས་དོན་ཡོད་ཞགས་པ་ལ་ཕྱག་འཚལ་ལོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ་གླང་པོ་ཆེན་པོ། བྱ་བ་བྱས་ཤིང་། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ་སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་རྣམས་ཀྱི། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་བྱ་བའི་ཕྱིར། གསོ་སྦྱོང་ངེས་པར་བྱས་པ་དེ་བཞིན་དུ་བདག་མིང་འདི་ཞེས་བགྱིས་པས་ཀྱང་། དུས་འདི་ནས་བཟུང་སྟེ་ཇི་སྲིད་སང་ཉི་མ་མ་ཤར་གྱི་བར་དུ། གསོ་སྦྱོང་ངེས་པར་བླང་བར་བགྱིའོ། །དེང་ནས་སྲོག་གཅོད་མི་བྱ་ཞིང་། གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་མཉམ་བརྟེན་པ། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེན་པོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་འཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་པ། །དེ་ལྟར་སྲོག་གཅོད་ལ་སོགས་སྤང་། །བླ་མེད་བྱང་ཆུབ་ཐོབ་པར་ཤོག །སྡུག་བསྔལ་མང་དཀྲུགས་འཇིག་རྟེན་འདི། །སྲིད་པའི་མཚོ་ལས་སྒྲོལ་བར་ཤོག །ཅེས་བྱའོ། །གང་ཕྱིར་དགེ་བ་མ་ལུས་གསོ་བ་དང་། །རྙེད་པའི་སྡིག་པ་འདི་ཡང་ཟད་བྱེད་པ། །དེ་ནི་གསོ་དང་སྡིག་པ་དག་བྱེད་ཕྱིར། །དེ་བཞིན་གཤེགས་པས་གསོ་སྦྱོང་ཞེས་སུ་གསུངས། །གསོ་སྦྱོང་རང་གིས་བླངས་བའི་ཆོ་ག་རྫོགས་སོ། །པཎྜི་ཏ་དོན་ཡོད་རྡོ་རྗེ་དང་ལོ་ཙཱ་བ་དགེ་སློང་རིན་ཆེན་གྲགས་པས་བསྒྱུར་བའོ། །ཞེས་པ་སྟེ། དེ་ཐོག་མར་གསོ་སྦྱོང་གི་བསླབ་རྒྱུན་མ་ཆད་པའི་དགེ་བའི་བཤེས་གཉེན་ལ་ལེགས་པར་ནོད་ནས་རྗེས་སུ་ཉ་སྟོང་བརྒྱད་དང་བཅུ་བཞི་སོགས་དུས་ཚེས་བཟང་པོར་དཀོན་མཆོག་གི་རྟེན་ཡོད་ན་དེ་སྟོན་པར་མོས་ཤིང་། མེད་ན་གོང་གི་ཚོགས་ཞིང་སྡོམ་པ་བླང་ཟིན་རྗེས་བར་མ་བསྡུས་ལ། དེའི་སྤྱན་སྔར་གསོ་སྦྱོང་གི་སྡོམཔ་རང་གིས་བླང་བ་སྟེ། དེ་ཡང་ཐལ་མོ་སྦྱར་ནས་ཚིག་གིས་དོན་ལ་ཡིད་གཞིགས་བཞིན་འདི་སྐད་དུ།

ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བཅོམ་ལྡན་འདས་མཉམ་མེད་ཤཱཀྱའི་རྒྱལ་པོ་དང་། འཕགས་པ་སྤྱན་རས་གཟིགས་དབང་ཕྱུག་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། ཞེས་པ་ཇི་ལྟར་སྔོན་གྱི་དེ་བཞིན་གཤེགས་པ་ཞེས་པའི་མགོར་སྦྱར་ཏེ་གསོ་སྦྱོང་གི་ཚིག་སྲིད་པའི་མཚོ་ལས་སྒྲོལ་བར་ཤོག་གི་བར་ལན་གསུམ་དག་པར་བརྗོད་པས་སྡོམ་པ་སྐྱེ་བའོ། །གཞན་ཁ་ཅིག་གིས་བླང་བར་བགྱིའོ་ཡན་ཚར་གསུམ། དེང་ནས་སྲོག་གཅོད་མི་བྱ་སོགས་ཚིགས་བཅད་རྣམས་ཚར་གཅིག་གིས་ཆོག་ཀྱང་ཟེར། ཡི་གེ་ཁ་ཅིག་ཏུ་དེང་ནས་སྲོག་གཅོད་མི་བྱ་ཞེས་པར་དེ་ཚེ་སྲོག་གཅོད་མི་བྱ་བསྒྱུར་བ་རྟེན་ཁྱིམ་པ་ལྟ་བུའི་བསྙུང་གནས་བཟུང་ནས་ཚིག་རྣམས་ལ་འདོད་པ་ཙམ་སྣང་ཡང་གཞན་མང་པོས་མ་བསྒྱུར་ཞིང་གོང་དུ་དུས་མཚམས་བརྗོད་མ་ཐག་པས་དེང་ནས་ཞེས་པ་ཉིད་ལེགས་སོ། །སྡོམ་པ་སློབ་དཔོན་ལ་བླང་བའི་སྐབས་སུ་ལས་གཞན་དུ་སློབ་དཔོན་དགོངས་གསོལ་མི་དགོས། གསོ་སྦྱོང་གི་སྡོམ་པ་བླང་བ་དང་བཏང་བའི་དུས་མཚམས་ནི་ཉན་ཐོས་བྱེ་བྲག་པ་རྣམས་ཀྱིས་ཉི་མ་མ་ཤར་བའི་གོང་དུ་བླང་ནས་སང་ཉི་མ་མ་ཤར་གྱི་བར་ཞེས་སྐྱ་རེངས་གསལ་བས་མུན་པའི་དབལ་ཆ་ཉམས་པ་ན་འཛམ་གླིང་ཤར་ལྷོའི་རི་ཆེན་རྣམས་ཀྱི་རྩེ་མོར་ཉི་མ་འཆར་བས་དེའི་དུས་སུ་བཏང་སྟེ་ཉིན་ཞག་ཕྲུག་གཅིག་ལས་གཞན་པར་གསོ་སྦྱོང་གི་སྡོམ་པ་དངོས་མི་སྐྱེ་ཞིང་ཉིན་མཚན་སོ་སོར་བཟུང་བ་དག་ལེགས་སྤྱད་ཙམ་ལས་དངོས་མིན་པར་འདོད་པ་མངོན་པ་མཛོད་རྩ་འགྲེལ་དུ་ལྟར་དང་། མདོ་སྡེ་པ་རྣམས་ཀྱིས་ད་ནངས་ཉི་མ་མ་ཤར་ནས་མ་ནུབ་ཀྱི་བར་ཉིན་མོའི་ཆ་དང་། ཉི་མ་ནུབ་ནས་སང་ཉི་མ་མ་ཤར་བར་མཚན་མོའི་ཆ་སྟེ་ཉིན་མཚན་སོ་སོར་ཡང་སྡོམ་པ་དངོས་སྐྱེ་བར་དགོངས་སོ། །གསོ་སྦྱོང་བཟུང་བཏང་དེ་དག་ནི་གཙོ་བོར་དགེ་བསྙེན་ལ་དགོངས་ཤིང་རབ་ཏུ་བྱུང་བའི་ཕྱོགས་ལ་ཡན་ལག་བརྒྱད་ཀྱི་བསླབ་བྱ་རྟག་ཏུ་གཞིར་གནས་ཤིང་། གསོ་སྦྱོང་གི་ངེས་པ་ཁྱད་པར་བ་ཉིན་ཞག་གཅིག་ཏུ་བཟུང་བ་མང་ངོ་། །སྤྱིར་ནི་གསོ་སྦྱོང་ཞེས་རབ་ཏུ་བྱུང་བ་དང་། མ་བྱུང་བ་གཉིས་ཀ་ལ་ཡོད་པའི་རབ་ཏུ་མ་བྱུང་བའི་གསོ་སྦྱོང་ཡན་ལག་བརྒྱད་པ་ཉིན་ཞག་གི་མཐའ་ཅན་ནི་བསྙེན་གནས་དང་། ཇི་སྲིད་འཚོའི་བར་བཟུང་བ་ནི་གོ་མིའི་དགེ་བསྙེན་ཏེ། དེ་བཞིན་གཤེགས་པའི་སྤྱན་སྔར་ཀུན་ཏུ་རྒྱུ་སེམས་ཅན་རིང་བསྟན་པ་ལ་ཐོག་མར་འཇུག་པའི་སྡོམ་པ་བླང་ཚུལ་ཉིད་དང་། འཕགས་ཡུལ་སློབ་དཔོན་ཆེན་པོ་ཙནྡྲ་གོ་མི་བཞིན་ནོ། །

གོ་མི་མ་ཡིན་པའི་གསོ་སྦྱོང་ཡང་ཟླ་བ་གཅིག་གི་དང་ལོ་གཅིག་གི་སོགས་ཇི་སྙེད་པའི་ཟླ་བ་བྱུང་ངོ་ཅོག་གི་ཚེས་བརྒྱད་ཉ་སྟོང་དུས་སུ་བསྲུང་བའི་སྡོམ་པ་སློབ་དཔོན་ལ་དུས་ཅིག་ཅར་དུ་ལེན་རུང་བ་ཇོ་བོ་རྗེའི་བཞེད་ཞེས་མང་ཞིག་དེ་ལྟར་ཕྱག་ལེན་མཛད་པ་བྱུང་ཞིང་། དེ་ལ་མཁས་པ་ཁ་ཅིག་ལེགས་སྤྱད་ཙམ་རུང་ལ་སྡོམ་པ་དངོས་འབོག་པར་མི་འགྲོ་ཞེས་སུ་ངས་ཀྱང་གོང་གི་ཉན་ཐོས་བྱེ་བྲག་པ་མདོ་སྡེ་པ་ལྟར་སྡེ་པ་སོ་སོའི་འདོད་པས་མི་འགལ་ལོ། །འོན་ཀྱང་སློབ་དཔོན་ལ་ལན་གཅིག་བཟུང་བ་དེས་ཆོག་ཤེས་ནས་ཉ་སྟོང་བརྒྱད་སོགས་ནམ་བླང་འདོད་པའི་དུས་སུ་སོ་སོར་གསོ་སྦྱོང་རང་གིས་བླང་བར་མ་བྱས་ན་མི་རུང་སྟེ་ཁྲུམས་ཟླ་བའི་ཚེས་གཅིག་ནས་བཅོ་ལྔའི་བར་གྱི་གསོ་སྦྱོང་ཡང་ནང་རེ་བཞིན་བླང་དགོས་པ་མཁས་མཆོག་བུ་སྟོན་ཞབས་ཀྱིས་གསུངས་བཞིན་ངེས་པར་བྱ་ལ། རབ་ཏུ་བྱུང་བའི་ཕྱོགས་ཀྱི་ཐེག་ཆེན་སྔགས་ནས་སྟོན་པ་གསོ་སྦྱོང་འདི་ཡང་ནང་རེ་བཞིན་བླང་དགོས་པ་དེ་དང་མཐུན། སྡེ་སྣོད་འོག་མར་དགེ་བསྙེན་གྱི་སྡོམ་པ་བསྙེན་གནས་ཡན་ལག་བརྒྱད་པ་གསོ་སྦྱོང་གི་བརྡར་བཞག་པ་དེ་ནི་སོ་ཐར་སྡོམ་པ་ཕྱི་མས་སྔ་མ་འཇིག་ཕྱིར་རབ་ཏུ་བྱུང་བའི་ཕྱོགས་ཀྱིས་བཟུང་བར་མི་ནུས་ཀྱང་། ཐེག་ཆེན་སྔགས་ནས་བཤད་པའི་གསོ་སྦྱོང་ཡན་ལག་བརྒྱད་བསྙུང་བར་གནས་པ་དང་བཅས་པ་ནི་བཟུང་ཏུ་རུང་བར་རྒྱུད་གཞུང་དེའི་དགོངས་པར་བསྟན་པ་རྒྱ་བོད་དམ་པ་ཆེན་པོ་རྣམས་ཀྱིས་བཞེད་པ་མཐུན་པ་གནས་པ་ལ། ཕྱིས་ཁ་ཅིག་ནས་རབ་ཏུ་བྱུང་བས་གསོ་སྦྱོང་རྒྱད་ཚིག་དེ་བརྗོད་འོས་མི་འོས་མཐིང་བསླད་བྱས་ཀྱང་དོན་ལ་མི་རིགས་སྟེ་རྣམ་པར་འཁྱམས་པའོ། །དེ་ཡང་ཚུལ་ཁྲིམས་ཀྱི་ཕུང་པོའི་མདོར། རིགས་བརྒྱ་སྔོན་དུ་སོང་བ་ཡིན། ཉིན་བཞིན་དུ་གསོ་སྦྱོངས་བླང་། ཞེས་པ་དང་། དོན་ཞགས་རྒྱུད་ནས་ཡང་དེ་དང་མཐུན་པར་གསུངས་པས་སོ། །དེས་ན་འདིར་བསྟན་པའི་གསོ་སྦྱོངས་ནི་དགེ་བསྙེན་གྱི་བླང་ན་སྡོམ་པ་གསར་ཐོབ་དབུལ་པོས་ནོར་བུ་གསར་རྙེད་ལྟ་བུ་ཡིན་ལ། རབ་ཏུ་བྱུང་བའི་ཕྱོགས་ཀྱི་ནི་སྔར་ནས་ཐོབ་པའི་ནོར་བུ་བསམ་འཕེལ་སླར་ཡང་བྱི་དོར་བྱས་ཤིང་རྒྱལ་མཚན་རྩེ་མོར་མཆོད་པས་འདོད་དོན་ལྷག་པར་འགྲུབ་པའི་དཔེས་མཚོན་ཏེ་ཕན་ཡོན་ཆེ་ཆུང་གི་ཁྱད་ཀྱང་ཡོད་དོ། །

དེ་ནས་གསོ་སྦྱོངས་འདི་ནི་སོ་ཐར་བྱང་སེམས་སྔགས་ཀྱི་སྡོམ་པ་གསུམ་ཀ་ལ་འཇུག་པ་མདོ་སྔགས་ཐུན་མོང་པ་སྟེ་ཁྱབ་ཆེ་ཞིང་ཕན་ཡོན་མང་བ་ཡིན་ལ།དེ་ཡང་གསོ་སྦྱོངས་ཡན་ལག་བརྒྱད་ཚུལ་བཞིན་བླངས་ཤིང་མ་ཉམས་པ་བསྲུང་བ་ཡི་ཐུན་མོང་གི་ཕན་ཡོན་རྣམས་ཤེས་ན་བསླབ་བྱ་གཞི་མཐུན་པའི་དབང་གིས་ཁྱད་པར་གྱི་ཡོན་ཏན་ཡང་ངང་གིས་རྟོགས་པས་ན་ཁྱིམ་པ་རྣམས་ཀྱིས་སོ་ཐར་གྱི་གསོ་སྦྱོངས་བསྙེན་གནས་འབའ་ཞིག་ཉིན་ཞག་གཅིག་གི་མཐའ་ཅན་བསྲུང་བའི་ཕན་ཡོན་ཡང་གནས་འཇོག་གི་མདོ་ལས། གངྒཱ་ལ་སོགས་པའི་ཆུ་ཀླུང་ཆེན་པོ་ལྔ་དང་། རྒྱ་མཚོ་ཆེན་པོའི་ཆུ་བུམ་པའི་གྲངས་ཀྱིས་བཟུང་བར་ནུས་ཀྱི་བསྙེན་གནས་ཀྱི་ཕན་ཡོན་གྱི་ཚད་བཟུང་བར་མི་ནུས་ཤིང་། འཛམ་བུའི་གླིང་གང་བའི་དགྲ་བཅོམ་པ་ལ་རིན་པོ་ཆེ་ལ་སོགས་པའི་ཡོ་བྱད་ཐམས་ཅད་བྱིན་པའི་བསོད་ནམས་ཀྱིས། བསྙེན་གནས་ཀྱི་བསོད་ནམས་ཀྱི་བརྒྱའི་ཆར་ཡང་ཉེ་བར་མི་འགྲོ་སྟོང་གི་ཆར་ཡང་ཉེ་བར་མི་འགྲོའོ། །ཞེས་སྤྱིར་བསྟན་ཅིང་། བྱེ་བྲག་གནས་སྐབས་སུ་མཐོ་རིས་མངོན་མཐོ་ལྷ་མིའི་དཔལ་འབྱོར་ཕུན་ཚོགས་ཐོབ་པར་ཡང་གོང་གི་མདོར། བསྙེན་གནས་གཙང་མ་ལན་གཅིག་བསྲུང་བས་ཀྱང་། འདོད་ལྷ་དྲུག་གང་རིས་སུ་སྐྱེ་བར་གསུང་བ་དང་། གདགས་པའི་མདོར། བརྒྱ་བྱིན་གྱི་གོ་འཕང་ཚེགས་མེད་དུ་ཐོབ་པ་དང་། ཀླུ་སྒྲུབ་ཀྱི་བཤེས་སྤྲིངས་ལས་ཀྱང་། དགྲ་བཅོམ་ཚུལ་ཁྲིམས་རྗེས་སུ་བྱེད་པ་ཡི། །ཡན་ལག་བརྒྱད་པོ་འདི་དག་དང་ལྡན་ན། །གསོ་སྦྱོངས་འདོད་སྤྱོད་ལྷ་ཀླུས་ཡིད་འོང་བ། །སྐྱེས་པ་བུད་མེད་དག་ལ་སྩོལ་བར་བགྱིད། །ཞེས་པ་རྣམས་སོ། །ཁྱད་པར་དུ་ངེས་ལེགས་སངས་རྒྱས་བཅོམ་ལྡན་འདས་རྣམས་དང་མཇལ་བའི་རྒྱུ་ཕུན་སུམ་ཚོགས་པ་ཡིན་པར་ཡང་། བྱམས་པ་ལུང་བསྟན་ཚིགས་སུ་བཅད་པ་ལས། བཅུ་བཞི་དང་ནི་བཅོ་ལྔ་དང་། །དེ་བཞིན་ཟླ་ཤི་ཚེས་བརྒྱད་དང་། །ཆོ་འཕྲུལ་ཝ་ཡི་ཟླ་བ་ལ། །ཡན་ལག་བརྒྱད་ལེགས་མཉམ་བཞག་ཅིང་། །བསྙེན་གནས་གསོ་སྦྱོངས་བྱས་ནས་ནི། །ང་ཡི་བསྟན་ལ་ལྷག་པ་ཡིན། །ཞེས་གསོ་སྦྱོང་གི་དགེ་བའི་རྩ་བས་བྱམས་པ་འཛམ་གླིང་དུ་སངས་རྒྱས་བའི་ཚེ། དེའི་འཁོར་དུ་འདུས་ཏེ་འབྲས་བུ་ཐོབ་པར་གསུང་བ་སྟེ། དེས་མ་འོངས་པ་དང་ད་ལྟར་བཞུགས་པའི་སངས་རྒྱས་རང་གང་མོས་པའི་ཞིང་དུ་སྐྱེ་བར་སྨོན་པ་ཡང་འགྲུབ་པར་བསྟན་པ་ཡིན་ནོ། །

མཐར་ཐུག་གི་འབྲས་བུ་ཡང་ཉན་རང་ཙམ་མ་ཡིན་པར་སངས་རྒྱས་ཀྱི་གོ་འཕང་དངོས་ཐོབ་པར་འཇིག་རྟེན་གདགས་པར། ལྷའི་དབང་པོ་བརྒྱ་བྱིན་ལ་དེ་བཞིན་གཤེགས་པས་བཀའ་སྩལ་པ་དང་། དེ་བཞིན་གཤེགས་པ་ཤཱ་རིའི་བུ་དང་། རྫོགས་པའི་སངས་རྒྱས་ཀྱི་རྟོགས་བརྗོད་དུ། བཅུ་བཞི་དང་ནི་བཅོ་ལྔ་དང་། །ཚེས་བརྒྱད་དང་ནི་གནམ་སྟོང་ལ། །བསྙེན་གནས་ཡན་ལག་བརྒྱད་པ་བསྲུངས། །ང་ཉིད་ཇི་འདྲ་དེ་འདྲར་འགྱུར། །ཞེས་ཤཱ་རིའི་བུས་གསོལ་བ། དེ་བཞིན་གཤེགས་པས་དེ་ལས་བཟློག་སྟེ། བཅུ་བཞི་དང་ནི་བཅོ་ལྔ་དང་ཞེས་པ་ནས། ང་ཉིད་ཅི་འདྲ་དེ་འདྲར་འགྱུར་ཞེས་པ་སྟེ། དེ་ལྟར་ལན་གཅིག་མ་ཡིན་པར་གསུང་བ་དང་། ཀུན་ཏུ་རྒྱུ་སེན་རིངས་ཀྱིས་ཞུས་པའི་མདོར། སངས་རྒྱས་ཀྱི་མཚན་བཟང་པོ་གཉིས་ཀྱི་རྒྱུ་ཡང་གསོ་སྦྱོངས་ཡན་ལག་བརྒྱད་པས་འགྲུབ་པར་བཀའ་སྩལ་བ་སོགས་ཡང་ཡང་བསྔགས་པར་མཛད་པ་ཡིན་ལ། ལུང་ཁུངས་དེ་རྣམས་ཀྱི་དངོས་དོན་ནི་དུས་བཟང་སོ་སོར་སངས་རྒྱས་ཀྱི་ཡོན་ཏན་རྗེས་སུ་དྲན་ནས་བསྙེན་གནས་བསླབ་པ་བརྒྱད་གཙང་མར་བསྲུང་བ་ཙམ་ལ་དགོངས་ཤིང་། དེ་ལ་ཕན་ཡོན་ཚད་མེད་པ་དེ་ལྟ་བུ་ཡོད་པར་ཤེས་ན། འདིར་བསྟན་པའི་གསོ་སྦྱོངས་བསྙུང་བར་གནས་པའི་སྡོམ་པ་གསུམ་ཀ་ལ་འཇུག་པ་གང་ཞིག་བསྐྱེད་རིམ་གཟུངས་བཟླས་སོགས་དང་འབྲལ་བ་དེ་ཡི་ཕན་ཡོན་ནི་ཐོར་མར་བསྟན་པ་རྣམས་ལས་མྱུར་བ་དང་། རབ་ཏུ་བདེ་བ་དང་ཁྱད་པར་དུ་བྱས་པ་སོགས་བརྒྱ་སྟོང་དུ་མས་ལྷག་པར་གྱུར་པ་ཉིད་དུ་རྟོགས་དགོས་སོ། །འདིར་སྤྱན་རས་གཟིགས་གདོང་བཅུ་གཅིག་པའི་གཟུངས་ཀྱི་ཕན་ཡོན་ཡང་། གཞུང་དེ་ལས་འདི་སྐད་དུ། བཅོམ་ལྡན་འདས་བདག་གི་སྙིང་པོ་འདི་ནི་དེ་ལྟར་རྫུ་འཕྲུལ་ཆེ་བ་ལགས་སོ། །ལན་གཅིག་སྟོན་པས་རྩ་བའི་ལྟུང་བ་བཞི་པོ་དག་ཀྱང་བྱང་བར་འགྱུར། མཚམས་མ་མཆིས་པ་ལྔ་པོ་དག་ཀྱང་མ་ལུས་པར་ཡོངས་སུ་བྱང་བར་འགྱུར་ན། ཇི་སྐད་བཤད་པ་བཞིན་དུ་ནན་ཏན་དུ་བགྱིད་པ་ལྟ་སྨོས་ཀྱང་ཅི་འཚལ། དེ་དག་ནི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་ལ་དགེ་བའི་རྩ་བ་བསྐྱེད་པར་འགྱུར་བ་ལགས་ན། བཟླས་བརྗོད་བགྱིད་པ་དང་། ཇི་སྐད་བཤད་པ་བཞིན་དུ་བསྒྲུབ་པ་ལྟ་སྨོས་ཀྱང་ཅི་འཚལ་ལགས། ཞེས་དང་། སུ་ཞིག་བདག་གི་སླད་དུ་ཚེས་བཅུའམ། བཅོ་ལྔ་ལ་སྨྱུང་བར་བགྱིས་ཏེ་སྡོམ་པ་ཡང་དག་པར་བླང་ནས་ཆོས་བཞིན་དུ་ཡོངས་སུ་དག་པར་བགྱིས་ཏེ། སེམས་རྩེ་གཅིག་ཏུ་ཡོངས་སུ་དྲན་པར་བགྱིས་ནས། རིག་སྔགས་འདི་བཟླས་བརྗོད་བགྱིས་ན་བསྐལ་པ་བཞི་ཁྲིའི་འཁོར་བ་བརྙིལ་པར་འགྱུར་ལགས་སོ། །ཞེས་དང་། ལ་ལ་ཞིག་ཆོ་ག་བཞིན་དུ་སྦྱོར་བ་བགྱིད་ན། དེ་དག་གིས་སུག་པར་སངས་རྒྱས་ཀྱི་བྱང་ཆུབ་ཐོབ་པ་ལགས་སོ། །ཞེས་གསུངས་ཤིང་ཡང་། དེ་ཉིད་ལས་གང་ལ་ལ་ཞིག་གདུགས་མཚན་དུ་རིགས་སྔགས་འདི་ཀློག་པ་དང་། འདོན་པ་དང་འཛིན་པར་བགྱིད་ན་བདག་གིས་དེ་དག་གིས་སྨོན་ལམ་ཅི་མཆིས་པ་ཡིད་བཞིན་དུ་འགྲུབ་པར་བགྱིད་ལགས་སོ། །ཞེས་གསོ་སྦྱོང་མཚན་མོ་གཅིག་ཏུ་བཟུང་ཡང་རུང་བ་ཤུགས་ཀྱིས་བསྟན་པའོ། །

གཞན་ཡང་ཐེག་པ་ཆེན་པོའི་མདོ་དང་སྔགས་རྒྱུད་སྤྱི་དང་བྱེ་བྲག་རྣམས་སུ་ཕན་ཡོན་དངོས་དང་རིགས་མཐུན་ཤུགས་བསྟན་རྣམས་ཀྱང་ཐོས་པས་སྤྲོ་བ་སྤེལ་བར་བྱ་ལ། གང་ལྟར་དང་པོའི་བློ་ཅན་རྣམས་ལ་སྡོམ་པ་འབོག་པའི་ཐོག་མར་བློ་བཅོས་ཏེ་ངེས་འབྱུང་གི་བསམ་པ་བཟང་པོ་བསྐྱེད་དུ་གཞུག་ཅིང་། བསླབ་གཞི་ཡན་ལག་བརྒྱད་འཛིན་ཚུལ་ཡང་ཅི་ནུས་བཤད་པ་ནི་གལ་ཆེའོ། །སྡོམ་པ་བླང་ཟིན་ནས་ཚུལ་ཁྲིམས་རྣམ་པར་དག་པའི་གཟུངས་བཀླགས་པར་བྱ་སྟེ། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཨོཾ་ཨ་མོ་གྷ་ཤཱི་ལ། སམྦྷ་ར་སམྦྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ། པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར་ས་མནྟ། ཨ་བ་ལོ་ཀི་ཏེ། ཧཱུྃ་ཕཊ་སྭཱ་ཧཱ། ཞེས་པའོ། །དོན་ཡོད་ཞགས་པའི་སྙིང་པོ་ནི། ཨོཾ་ཧྲཱིཿཏྲཻ་ལཽ་ཀྱ་བི་ཛ་ཡ། ཨ་མོ་གྷ་པཱ་ཤ་ཨ་པྲ་ཏི་ཧ་ཏ་ཧྲི་ཧ་ཧཱུྃ་ཕཊ་སྭཱ་ཧཱ། ཞེས་པ་སྟེ་གཟུངས་དེ་གཉིས་ལན་ཉི་ཤུ་རྩ་གཅིག་ཏུ་བཟླས་པར་བྱའོ། །

དེ་ལྟར་བཀླགས་པའི་ཕན་ཡོན་ནི་དོན་ཞགས་ཀྱི་གཟུངས་མདོ་དེ་ཉིད་དུ་འདི་སྐད་ཅེས་འབྱུང་སྟེ་བཟླས་བརྗོད་བྱས་པ་ཙམ་གྱིས་མདོ་ལ་ཚུལ་ཁྲིམས་ཡོངས་སུ་དག་པ་ཆེན་པོ་དང་ལྡན་པར་འགྱུར་རོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཚུལ་ཁྲིམས་ཀྱི་དྲི་ཞིམ་པོའི་དྲི་མང་པོ་ལུས་ལ་བྱུང་ཞིང་ཕྱོགས་བཅུའི་འཇིག་རྟེན་དུ་གྲགས་པར་འགྱུར་རོ། །གང་ཞིག་ཉི་མ་རེ་རེ་བཞིན་གཟུངས་འདི་དྲན་ན་ནི་དེ་ནི་རྟ་གཏུ་ཚུལ་ཁྲིམས་ཡོངས་སུ་དག་པར་འགྱུར་རོ། །དགེ་སློང་གང་ཞིག་ཚུལ་ཁྲིམས་ཉམས་པས་བསྙུང་བར་བྱས་ཏེ་འདི་བཟླས་བརྗོད་བྱས་པ་ཙམ་གྱི་མོད་ལ་ཚུལ་ཁྲིམས་ཡོངས་སུ་དག་པར་འགྱུར་རོ། །ཚུལ་ཁྲིམས་མང་པོ་དང་ལྡན་པར་འགྱུར་ཞེས་གསུངས་པ་ཡང་དྲན་པར་བྱའོ། །སྨོན་ལམ་བདག་སོགས་སེམས་ཅན་ཐམས་ཅད་ཀྱི་རྒྱུད་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་གྱུར་ཅིག ཉོན་མོངས་པས་ཚུལ་ཁྲིམས་འཆལ་བ་ལས་བྱུང་བའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག འཕགས་པ་དགེ་བའི་ཚུལ་ཁྲིམས་ཀྱི་སྐལ་བ་དང་ལྡན་པར་གྱུར་ཅིག ཉོན་མོངས་པས་མི་རྫི་བར་རྣམ་པར་གྲོལ་བའི་བདེ་བ་གནས་པར་གྱུར་ཅིག ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཅིག །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ཞེས་བརྗོད་དོ། །

ལྔ་པ་མཆོད་བཤོམས་ཀྱི་དེ་ཉིད་ནི། གོང་དུ་བཤད་པའི་གནས་ཁང་དུ་ཇི་ལྟར་འཛོམ་པའི་རྟེན་དང་། ཁྱད་པར་ཐུགས་ཆེན་པོ་གདོང་བཅུ་གཅིག་པའི་སྐུ་བྲིས་འབུར་གང་རིགས་ཤིག་འཛོམ་ན་ཤིན་ཏུ་ལེགས་ཤིང་། གང་ལྟར་སྒྲུབ་པའི་མཎྜལ་བ་བྱུང་ལྔ་དང་དྲི་བཟང་པོས་བྱུགས་པའི་སྟེང་པདྨ་འདབ་བརྒྱད་ལྟེ་བ་དཀར་པོ། ཤར་སྔོ། ལྷོ་སེར། ནུབ་དཀར། བྱང་ལྗང་། མཚམས་བཞིར་མཛེས་ཚོན་སྟེ། དབུས་དང་ཕྱོགས་བཞིར་ཟླ་གདན་ལ་ཁ་དོག་གོང་མཐུན་གྱི་ཚོམ་བུ་དབུས་ཀྱི་རྒྱབ་ངོས་སུ་ཚོམ་བུ་དམར་པོ་ཆུང་དུ་གཅིག མཚམས་ཀྱི་འདབ་མར་ཚོམ་བུ་སེར་པོ་རེ་བཀོད།་གཏོར་མ་འདས་གཏོར་གཅིག་བྱ། ཆ་གསུམ་གཏོར་མ་དང་འདིའི་སྒོས་ཀྱི་ཆོས་སྐྱོངས་ཆུ་བདག་ཝ་རུ་ཎ་དང་། ཡུལ་བདག་ལ་ཡང་གཏོར་མ་བཤམས། བསྡུ་ན་སྤྱན་རས་གཟིགས་ཀྱི་མཆོད་གཏོར་དང་སངས་རྒྱས་བྱང་སེམས་སྤྱི་དང་ཆོས་སྐྱོངས་སྤྱི་སྟེ་མཆོད་གཏོར་གསུམ་མམ། ཡང་འདས་གཏོར་གཅིག་པུས་ཆོག་པར་གསུངས། གང་ལྟར་གཙང་སྦྲ་ཤིན་ཏུ་ཆེ་བ་བྱ་ཞིང་ཀླུ་གཏོར་བཤམས་ཚེ་བ་དམར་སེར་གྱི་འོ་མ་འབྱོར་ན་ཀླུ་སྨན་བཏབ། བུམ་པ་ཡང་མཚན་ལྡན་གཙང་མ་རྒྱན་གྱིས་མཛེས་པར་སྤྲས་པ་རྒྱུན་འབབ་ཆུ་བུམ་རྫས་ཉེར་ལྔ་སྦྱར་བས་སུམ་གཉིས་བཀང་། ཐོག་མར་འཕགས་པའི་གཟུངས་རིང་གིས་བགེགས་བསྐྲད་ལ་བཀོད། དྲུག་པ་སྦྱོར་བ་སྐྱབས་སེམས་ཚོགས་བསགས་པའི་དེ་ཉིད་ལ།

འོ་སྐོལ་རང་སྐུ་ཚེ་སྔོན་མ་ལ་བསོད་ནམས་ཀྱི་གཙོ་བོར་གྱུར་པའི་དགེ་བ་རྒྱ་ཆེན་པོ་བསགས་པ་ལ་བརྟེན་ནས་ཚེ་འདིར་ཡང་དལ་འབྱོར་གྱི་མི་ལུས་རྣམ་པར་དག་པ་ཐོབ། སངས་རྒྱས་ཀྱི་བསྟན་པ་རིན་པོ་ཆེ་དང་མཇལ་བའི་དུས་འདིར་སྤྱིར་གྱི་ལུས་ངག་ཡིད་གསུམ་གྱི་མི་དགེ་བ་སྤངས་ཤིང་། སྒོ་གསུམ་གྱི་དགེ་བ་ལ་འབད་པར་བྱ་དགོས། དེའང་ནམ་འཆི་ཆ་མེད་ད་ལྟ་ཉིད་དུ་འབད་པར་བྱའོ། །ཤི་ནས་ངན་སོང་གསུམ་དུ་སྐྱེས་ན་སྡུག་བསྔལ་མྱོང་འགྱུར་ལ་བསམ་སྟེ། ཆོས་སྤྱོད་རྣམ་པར་དག་པ་འདི་ལྟ་བུ་ལ་ཕ་མས་ཐོག་དྲངས་པའི་སེམས་ཅན་ཐམས་ཅད་ཀྱི་དོན་དུ་འཇུག་པར་བྱ་སྙམ་དུ་སེམས་སྐྱེད་པར་ཞུ་ཞེས་འཚོགས་ཡོད་ན་བསྐུལ། མེད་ན་མི་དགོས། ཐོག་མར་སྐྱབས་སེམས་ནི། སེམས་ཅན་ཐམས་ཅད་ལ་དམིགས་པའི་བྱང་ཆུབ་ཀྱི་སེམས་དྲག་ཏུ་སྒོམ་ལ། བདག་སོགས་ཁམས་གསུམ་སེམས་ཅན་ནམ་མཁའི་མཐའ་དང་མཉམ་པ་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོར་མ་མཆིས་ཀྱི་བར་དུ། དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །མཁའ་འགྲོ་ཆོས་སྐྱོངས་བསྲུང་མ་ཡེ་ཤེས་ཀྱི་སྤྱན་ལྡན་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་དྲུག་སྐོར་ཡང་བྱ། བྱང་ཆུང་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆིའོ། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ཡང་། །རིམ་པ་བཞིན་དུ་བསླབ་པར་བགྱིའོ། །ལམ་གསུམ་གྱིས་སྐྱབས་འགྲོ་སེམས་བསྐྱེད་བླངས། གནས་ཡོ་བྱིན་གྱིས་བརླབས་པ་ནི། ན་མོ་སངས་རྒྱས་དང་། ཆོས་དང་། དགེ་འདུན་རྣམས་ཀྱི་བཀའ་བདེན་པ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པ་དང་། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་སྟོབས་ལས། དམིགས་པའི་རྟེན་འདི་ཙམ་ལ་བརྟེན་གནས་པའི་ཕྱོགས་འདིར་འཕགས་པ་དེ་བཞིན་གཤེགས་པ་སྲས་དང་བཅས་པ་ཐམས་ཅད་བྱོན་ཞིང་བཞུགས་པའི་གནས། ཞིང་ཁམས་རྣམ་པར་དག་པ་བདེ་བ་ཅན་ལྟ་བུ་རྒྱན་ཐམས་ཅད་ཀྱིས་བརྒྱན་པ་དང་། གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པ། རྡོ་རྗེ་རིན་པོ་ཆེ་སེངྒེའི་ཁྲི་དང་རིན་པོ་ཆེ་པདྨ་ལ་སོགས་པ་གདན་གྱི་བཀོད་པ་ཕུན་སུམ་ཚོགས་པ་དང་ལྡན་པ་ཕྱི་ནང་ཐམས་ཅད་དུ་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ཡོངས་སུ་གང་བ། རྒྱ་དང་ཚད་ཡོངས་སུ་ཆད་པ་མེད་པ། ཡང་དག་པའི་ཡེ་ཤེས་ཀྱི་བདག་ཉིད་ཅན་སངས་རྒྱས་དང་། བྱང་ཆུབ་སེམས་དཔའ་རྣམས་དང་། འཕགས་པ་ཆོས་སྐྱོང་བ་ཡེ་ཤེས་ཀྱི་སྤྱན་དང་ལྡན་པ་རྣམས་དང་། དཀར་ཕྱོགས་སྐྱོང་བ་རྣམས་ཀྱི་སྤྱན་ལམ་དུ་འབྱུང་བར་གྱུར་ཅིག

ཇི་སྲིད་འཁོར་བ་མ་སྟོང་གི་བར་དུ་རྒྱུན་མི་ཆད་པར་འབྱུང་བར་གྱུར་ཅིག ནམ་མཁའི་མཐའ་གཏུགས་པའི་ཞིང་ཁམས་ཐམས་ཅད་གང་ཞིང་རྒྱས་པར་གྱུར་ཅིག དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས་དེ་དེ་བཞིན་དུ་འགྲུབ་པར་གྱུར་ཅིག ཨོཾ་སརྦ་བིད་པུ་ར་པུ་ར། སུ་ར་སུ་ར་ཨ་ཝཏྟ་ཡ་ཨ་ཝཏྟ་ཡོ་ཧོཿཨོཾ་བཛྲ་སྥ་ར་ཎ་ཁཾ། རོལ་ཆེན་དང་བཅས། ན་མོ་བྷ་ག་ཝ་ཏེ་བཛྲ་ས་ར་པྲ་མདྷ་ན་ཡེ་ཏ་ཐཱ་ག་ཏ་ཡ། ཨརྷ་ཏེ་སམྱཀ་སཾ་བུདྷ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ་མ་ཧཱ་དེ་ཛ་བཛྲེ་མ་ཧཱ་བིདྱ་བཛྲེ། མ་ཧཱ་བོ་དྷི་ཙིཏྟ་བཛྲ་མ་ཧཱ་བོ་དྷཱི་མནྡྲོ་པ་སམ་ཀྲ་མ་ཎི་སརྦ་ཀརྨ་ཨ་ཝ་ར་ཎི་བི་ཤོ་དྷ་ནི་ཡེ་སྭཱ་ཧཱ། ཞེས་ཚར་གསུམ་བྱ། རང་ཉིད་གནས་པའི་ས་ཕྱོགས་འདི་ཡང་ལྷའི་ཞིང་ཁམས་གནས་ཁང་ལྷའི་གཞལ་ཡས་ཁང་རིན་པོ་ཆེའི་རང་བཞིན་མེ་ཏོག་སྣ་ཚོགས་ཀྱིས་མཛེས་པར་སྤྲས་པ་མཆོད་རྫས་རྣམས་ལྷ་ཡི་ཉེར་སྤྱོད་དང་བདུད་རྩི། རང་ཉིད་སྐད་ཅིག་གིས་ཐུགས་རྗེ་ཆེན་པོ་ལོ་ཀ་ན་ཐར་གསལ་བའི་ཐུགས་ཀར་ཟླ་སྟེང་ཧྲཱིཿདཀར་པོས་མཚན་པ་རང་གི་མདུན་ཕྱོགས་སུ་བྱང་ཆུབ་ཀྱི་ཤིང་མཐོ་ཁྱད་པར་ལྡན་པ་ཡལ་ག་ལོ་འདབ་འབྲས་བུའི་ཚོགས་རབ་ཏུ་རྒྱས་ཤིང་རིན་པོ་ཆེའི་མེ་ཏོག་དུ་མས་བརྒྱན་པ་གདུགས་དཀར་འཁྱིལ་བའི་རྩེ་མོར་འདབ་མ་འབུམ་དང་ལྡན་པའི་པདྨ་གེ་སར་ཟེའ་འབྲུའི་དབུས་དང་ཕྱོགས་བཞིར་པད་ཟླའི་གདན་རེ་དང་། དེའི་ཕྱི་རོལ་ཏུ་པད་ཟླའི་གདན་ཕྲེང་བ་ལྟར་མུ་མཁྱུད་དུ་མས་བསྐོར་བར་བསམ་ལ། དེ་ནས་རང་གི་སྙིང་གའི་ཧྲཱིཿལས་འོད་ཟེར་འཕྲོས་སངས་རྒྱས་ཀྱི་ཞིང་རབ་འབྱམས་ནས་འཕགས་པ་སྤྱན་རས་གཟིགས་དབང་ཕྱུག་བླ་མ་ཡི་དམ་སངས་རྒྱས་བྱང་སེམས་ཉན་རང་བཀའ་སྡོད་དང་བཅས་པས་བསྐོར་བ་སྤྱན་དྲངས་ནས་དབུས་ཀྱི་པད་ཟླའི་སྟེང་དུ་བརྒྱུད་པ་ཀུན་འདུས་ཀྱི་ངོ་བོ་རྩ་བའི་བླ་མ་འཕགས་པ་སྤྱན་རས་གཟིགས་དང་ཐ་མི་དད་པའི་སྤྱི་བོར་འོད་དཔག་མེད་པ་བཞུགས་པ་ཕྱོགས་བཞིའི་པད་ཟླའི་གདན་ལ་སངས་རྒྱས་རིགས་བཞི་དང་། དེའི་ཕྱི་རོལ་གྱི་གདན་ལ་ཡི་དམ་རྒྱུད་སྡེ་བཞིའི་ལྷ་ཚོགས། དེའི་ཕྱི་རོལ་གྱི་གདན་ལ་སངས་རྒྱས་དཀོན་མཆོག་གི་ཚོགས། དེའི་ཕྱི་རོལ་གྱི་གདན་ལ་དམ་ཆོས་དཀོན་མཆོག་གི་ཚོགས། དེའི་ཕྱི་རོལ་ཏུ་གཙང་རིགས་ཀྱི་མགོན་པོ་བདུན་ཅུ་རྩ་ལྔ་ལ་སོགས་པ་དམ་ཆོས་བསྲུང་མའི་ཚོགས་རྣམས་བཞུགས་པར་མོས་ལ་དེ་རྣམས་ཀྱི་སྤྱན་སྔར་རང་གི་ལུས་ཞིང་གི་རྡུལ་རྙེད་དུ་སྤྲུལ་ཞིང་བདག་དང་ལྷན་ཅིག་པར་མཁའ་མཉམ་གྱི་སེམས་ཅན་ཐམས་ཅད་ཀྱིས་ཀྱང་ཕྱག་འཚལ་བ་སོགས་དགེ་བའི་ལས་ལ་ཡང་དག་པར་འཇུག་པར་བསམ་ལ་པདྨ་ཁ་འབུས་ལྟ་བུའི་ཐལ་མོ་སྤྱི་བོའི་སྙིང་ཁར་སྦྱར་ལ་སྙིང་ནས་མོས་གུས་ཀྱི་ཤུགས་དྲག་པོ་བསྐྱེད། ཨོཾ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་ཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཕྱོགས་དུས་ཀུན་ཁྱབ་སྐྱབས་གསུམ་བཀའ་སྡོད་བཅས། །ཉོན་མོངས་འགྲོ་ལ་མཁྱེན་བརྩེས་རབ་དགོངས་ནས། །དཔག་མེད་ཞིང་ནས་ཐོགས་མེད་རྫུ་འཕྲུལ་གྱིས། །འདིར་གཤེགས་མཆོད་སྤྲིན་རྒྱ་མཚོའི་དབུས་བཞུགས་འཚལ། །

ཨོཾ་བཛྲ་ས་མཱ་ཛཿཛཿཧཱུཾ་བཾ་ཧོཿ པདྨ་ཀ་མ་ལ་ཡ་སྟྭཾ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་ལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་ལྡན། །བླ་མའི་སྐུ་ལ་ཕྱག་འཚལ་ལོ། །བླ་མའི་གསུང་ནི་ཚངས་པའི་དབྱངས། །བདག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་སྐྲག་གྱུར་པའི། །བླ་མའི་གསུང་ལ་ཕྱག་འཚལ་ལོ། །བླ་མའི་ཐུགས་ནི་ནམ་མཁའ་ལྟར། །བདེ་གསལ་མི་རྟོགས་སྟོང་པའི་ངང་། །རྣམ་ཐར་གསུམ་ལ་ལེགས་གནས་པའི། །བླ་མའི་ཐུགས་ལ་ཕྱག་འཚལ་ལོ། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་རྣམས་ལ་ཕྱག་འཚལ་ལོ། །སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབས་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །སྐྱབས་གནས་དཀོན་མཆོག་གསུམ་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པའི་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །དང་པོ་བྱང་ཆུབ་མཆོག་ཏུ་སེམས་བསྐྱེད་ནས། །བསྐལ་པ་གྲངས་མེད་གསུམ་དུ་ཚོགས་བསགས་ཏེ། །བར་དུ་གཅོད་པའི་བདུད་བཞི་འཇོམས་མཛད་པའི། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །སངས་རྒྱས་གཟིགས་གཙུག་ཏོར་ཐམས་ཅད་སྐྱོབས། །འཁོར་བ་འཇིག་དང་གསེར་ཐུབ་འོད་བསྲུང་དང་། །ཤཱཀྱ་ཐུབ་པ་གཽ་ཏཾ་ལྷ་ཡི་ལྷ། །སངས་རྒྱས་དཔའ་བོ་བདུན་ལ་ཕྱག་འཚལ་ལོ། །མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་བསྒྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །མཐུན་པའི་དགེ་ཚོགས་སྨོན་ལམ་རྨད་བྱུང་ཞིང་། །སྤྱད་པ་སྤྱད་ཚེ་ན་ཡང་མཆེད་གྱུར་ལ། །བསྐལ་བཟང་གཅིག་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། །དང་པོ་བྱང་ཆུབ་མཆོག་ཏུ་སེམས་བསྐྱེད་ནས། །ཚོགས་གཉིས་ཡོངས་རྫོགས་དགོངས་པ་མཐར་ཕྱིན་པའི། །དེ་བཞིན་གཤེགས་པ་དྲུག་ཁྲི་ལྔ་སྟོང་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་པའི་དཔལ། །མགོན་མེད་སྡུག་བསྔལ་གྱུར་པ་རྣས་ཀྱི་སྐྱབས། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །དུས་གསུམ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ཕྱག་སྟོང་འཁོར་ལོ་བསྒྱུར་བའི་རྒྱལ་པོ་སྟོང་། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་། །གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །སྐྱོན་གྱི་མ་གོས་སྐུ་མདོག་དཀར། །

རྫོགས་སངས་རྒྱས་ཀྱི་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། །བདག་དང་མཁའ་མཉམ་འགྲོ་བ་མ་ལུས་པས། །ལུས་འདི་ཞིང་རྡུལ་མཉམ་པར་སྤྲུལ་ནས་ནི། །རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་རྙེད་པས། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །སྐབས་འདིར་སྤྲོ་ན་བརྒྱུད་པའི་བླ་མ་ལ་ཕྱག་འཚལ་བ་ནི། དུས་གསུམ་རྒྱལ་བའི་ཐུགས་རྗེ་གཅིག་བསྡུས་པ། །མཁའ་ཁྱབ་འགྲོ་བའི་མགོན་པོ་སྤྱན་རས་གཟིགས། །གང་གི་སྒྲུབ་ཐབས་གསོ་སྦྱོངས་བརྒྱུད་པ་ཡི། །བླ་མ་རྣམས་ལ་གུས་པས་ཕྱག་འཚལ་ལོ། །མཁའ་སྤྱོད་གྲུབ་གཙོ་དགེ་སློང་དཔལ་མོའི་ཞབས། །མཁས་པའི་ཁྱུ་མཆོག་པཎྜི་ཏ་ཟླ་གཞོན། །ཡེ་ཤེས་མཆོག་བརྙེས་དཔལ་ལྡན་ཡེ་ཤེས་བཟང་། །འཇམ་དཔལ་གྲུབ་པ་བལ་པོ་པེ་ཉ་བ། །སྤྱན་རས་གཟིགས་དངོས་ཟླ་བ་རྒྱལ་བའི་མཚན། །མངོན་ཤེས་མཆོག་བརྙེས་གྲུབ་ཆེན་ཉི་ཕུག་པ། །འཕགས་ནོར་གྱིས་ཕྱུག་དཔུག་སྟོན་རྡོ་རྗེ་རྒྱལ། །བསྡུ་དངོས་བཞིའི་བདག་ཞང་སྟོན་དགྲ་འཇིག་ཆེ། །དྲི་མེད་བསླབ་གསུམ་རྒྱལ་མཚན་རྩེ་འདུལ་བ། །ཚོགས་གཉིས་ཀྱིས་ཕྱུག་མཁན་ཆེན་བདེ་བ་ཅན། །དོན་གཉིས་ཕུན་ཚོགས་བྱང་སེམས་ཆུ་བཟང་བ། །ལུང་རྟོགས་ཀྱིས་ཕྱུག་ཆོས་རྗེ་ཤེས་རབ་འབུམ། །རྒྱལ་སྲས་མཆོག་གྱུར་ཐོགས་མེད་བཟང་པོའི་ཞབས། །བྱང་ཆུབ་སེམས་གཉིས་རྒྱས་པ་ཆོས་རིན་ཆེན། །གཞན་ཕན་སེམས་དཔའི་སྟོབས་ལྡན་བསོད་རིན་པ། །སེམས་དཔའ་ཆེན་པོ་བསོད་ནམས་རྒྱལ་བའི་མཚན། །འཇམ་མགོན་གྲུབ་པའི་དཔའ་བོ་གྲོལ་ཆོག་ཞབས། །ལུང་རྟོགས་རིག་པའི་རྒྱལ་མཚན་རྡོ་རིང་དབོན། །རྡོ་རྗེ་འཆང་དངོས་ཀུན་མཁྱེན་སྙིང་པོའི་ཞབས། །རྒྱལ་ཚབ་ཡེ་ཤེས་རིན་ཆེན་རྒྱ་མཚོ་ཟུང་། །བསྟན་འཛིན་བློ་གྲོས་ཆེ་དང་འཕྲིན་ལས་དཔལ། །ཐུགས་རྗེའི་གཏེར་ཆེན་ཟླ་མེད་ཀུན་བཟང་དབང་། །བྱིན་རླབས་མཆོག་སྩོལ་རྩ་བའི་བླ་མ་སྟེ། །དེ་ལྟར་འཕགས་མཆོག་སྤྱན་རས་གཟིགས་དབང་གི །བསྒོམ་བསྒྲུབ་བསླབ་རིམ་བཀའ་བརྒྱུད་བླ་མ་ལ། །མི་ཕྱེད་སྙིང་ནས་གུས་པས་ཕྱག་འཚལ་ལོ། །རྩ་བའི་བླ་མ་སངས་རྒྱས་ཀུན་ལས་ལྷག །སློབ་དཔོན་བཟང་པོ་མིག་གི་འབྲས་བུ་བཞིན། །མཐོ་རིས་ཐར་པའི་ལམ་སྟོན་དགེ་བའི་བཤེས། །དམ་པའི་ཚོགས་གྱུར་ཡོངས་ལ་ཕྱག་འཚལ་འདུད། །ཀུན་གྱི་ཐུགས་རྗེས་རྟག་ཏུ་བཟུང་བ་ཡི། །བརྩེ་བའི་ཕྱག་བསྐྱངས་བདག་གི་སྤྱི་བོར་བཞག །ཞེས་པ་ཅུང་ཟད་བསྡུས་པ་སྟེ་རྒྱས་པར་ནི་བླ་མ་གོང་མ་རྣམས་ཀྱི་མཛད་པ་ཉིད་ཤེས་པར་བྱའོ། །ཕྱག་འཚལ་རྒྱས་བསྡུས་ཇི་ལྟར་ཡང་ཕྱག་འཚལ་བའི་གཟུང་འདི་མ་ཆད་པར་བྱ་སྟེ། དེ་ཡང་། ཨོཾ་ན་མོ་མཉྫུ་ཤྲཱི་ཡེ་སྭཱ་ཧཱ། ན་མཿསུ་ཤྲཱི་ཡེ་སྭཱ་ཧཱ། ན་མཿཨུཏྟ་མ་ཤྲཱི་ཡེ་སྭཱ་ཧཱ། ཞེས་ལན་གསུམ་གྱིས་ནམ་མཁའ་གང་བའི་ཚོགས་ཞིང་ལ་དམིགས་ཏེ་བརྐྱང་ཕྱག་གསུམ་བྱ་སྟེ་དེས་ནི་སྡེ་སྣོད་གསུམ་ཐོས་བསམ་བསྒོམ་གསུམ་བྱས་པའི་བསོད་ནམས་དང་མཉམ་ཞིང་དེས་ཉིན་རེ་བཞིན་ཕྱག་གསུམ་རེ་བྱས་ན་མཐོང་ལམ་ཡེ་ཤེས་ཚེ་འདིར་སྐྱེ་ཞིང་དེ་སྲིད་མི་དང་མི་མ་ཡིན་འབྱུང་པོ་ནད་རིམས་ཀྱི་གནོད་པས་མི་ཚུགས་པར་བསྲུངས་པར་གསུངས་སོ། །

དེ་ནས་ཡན་ལག་བདུན་པ་རྫོགས་པའི་སངས་རྒྱས་ཀྱི་བཀའ་བཟང་པོ་སྤྱོད་པ་ནས་འབྱུང་བ་ནི་ངེས་པར་གལ་ཆེ་དེ་དེ་ནི་ཇི་སྙེད་སུ་དག་ནས། ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་སོ། །དགེ་སློང་མ་དཔལ་མོས་མཛད་པའི་ཡན་ལག་བདུན་པ་ནི། འཕགས་པ་སྤྱན་རས་གཟིགས་དབང་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་པའི་ཚོགས་ཀྱིས་བཞེས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོ་སྐྱེ་བོ་ལ་སོགས་པ། །དུས་གསུམ་དགེ་བ་ཅི་བསགས་པའི། །བསོད་ནམས་ལ་ནི་བདག་ཡི་རང་། །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟར་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོང་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཡི། །འདྲེན་པའི་དཔལ་དུ་བདག་གྱུར་ཅིག །ཡང་། དཔལ་མོས་མཛད་པའི་རྒྱུན་བཤགས་ནི། སེམས་ཅན་ཐམས་ཅད་བདེ་དང་ལྡན་གྱུར་ཅིག །སེམས་ཅན་ཐམས་ཅད་སྡུག་བསྔལ་ཀུན་བྲལ་ནས། །བླ་མེད་བྱང་ཆུབ་ཐོབ་པར་ཤོག །གང་ཡང་བདག་གིས་དུས་ཀུན་ཏུ། །སྡིག་པ་བགྱིས་པ་གང་གྱུར་པ། །སྐྲག་པས་རྨི་འདྲར་བཤགས་བགྱིད་ཅིང་། །དེང་ནས་བརྩམས་ཏེ་འབྱུང་མི་བགྱིད། །དགེ་བ་རྣམས་ལ་རྗེས་ཡི་རང་། །འཁོར་ལོ་བསྐོར་ཞིང་གསོལ་བ་འདེབས། །སངས་རྒྱས་བྱང་ཆུབ་ཡིད་ཀྱིས་བཟུང་། །ཐམས་ཅད་བྱང་ཆུབ་མཆོག་ཏུ་བསྔོ། །དེ་ཐོབ་ལམ་ལ་གནས་བགྱི་ཞིང་། །སྐྱབས་གསུམ་ལ་ནི་བདག་སྐྱབས་མཆི། །ཞེས་པ་རྣམས་བརྗོད། བསྡུ་ན་ཕྱག་འཚལ་སྐབས་སྦྱར་གྱི་རྗེས་སུ་བདུན་གང་རུང་རེའི་ཆོག་ལ། རྒྱས་པར་ནི་མཆོད་འཕྲེང་མཎྜལ་སོགས་གོང་ནས་འབྱུང་ལྟར་སྐབས་འདིར་བྱ་བ་རྒྱལ་སྲས་པས་བཞེད་པ་དང་། སྤྱན་རས་གཟིགས་སྒྲུབ་ཐབས་འཕགས་གཞུང་རྒྱུད་ཀྱི་དགོངས་པར་ཡང་སྣང་བས་ལེགས་ལ། མ་བྱས་ཀྱང་དེ་རྣམས་བདུན་ཁོངས་སུ་འདུས་པ་དང་ལུགས་འདིར་སྐྱབས་འགྲོ་ནས་ཚད་མེད་བསྒོམས་ཏེ་བདག་བསྐྱེད་ལ་འཇུག་པར་ཡང་བསྟན་པས་ཆོ་ག་ཆད་པར་མི་འགྱུར་རོ། །ཡན་ལག་བདུན་ཡང་གོ་རིམ་བཞིན་ཆོ་ག་སྐབས་ཐོབ་ཚིག་སོ་སོར་སྡེབས་པ་མཁྱེན་རབ་དབང་ཕྱུག་སོགས་དམ་པ་མང་པོས་མཛད་པ་ཡང་ལེགས་མོད། ཡང་རང་གཞུང་མ་འདྲེས་སོ་སོར་བསྲང་སྟེ་རིམ་པར་ཀླགས་ཀྱང་མི་ལེགས་པ་ནི་མ་ཡིན་ནོ། །བདུན་པ་བདག་བསྐྱེད་བཟླས་པ་དང་བཅས་པའི་དེ་ཉིད་ནི། སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་སྙམ་པའི་བྱམས་པ་དང་། སྡུག་བསྔལ་དང་བྲལ་བར་གྱུར་ཅིག་སྙམ་པའི་སྙིང་རྗེ་དང་། བདེ་བ་དང་མི་འབྲལ་བར་གྱུར་ཅིག་སྙམ་པའི་དགའ་བ་དང་། ཆགས་སྡང་མེད་པར་གྱུར་ཅིག་སྙམ་པའི་བཏང་སྙོམས་ཏེ། ཚད་མེད་པ་བཞི་དྲག་ཏུ་བསྒོམ། ཨོཾ་སྭ་བྷ་ཝ་ཤུདྷཿསརྦ་དྷརྨ་སྭ་བྷ་ཝ་ཤུད་དྷོ྅ཧཾ། ཞེས་པས་རྒྱུ་བ་དང་མི་རྒྱུ་བ་ཐམས་ཅད་རང་བཞིན་གྱིས་སྟོང་ཞིང་། དེ་བཞིན་ཉིད་ལས་མི་འདའ་བར་བསམ་མོ། །ཡང་། ཨོཾ་ཤུ་ནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་པས་གཟུང་འཛིན་གཉིས་ཀ་ཡང་སྟོང་པར་བསམ་མོ། །

སྟོང་པའི་ངང་ལས་སམ་ལྗང་ཁུ་ལས་སྣ་ཚོགས་པདྨ་འདབ་མ་བརྒྱད་པ་དེའི་ལྟེ་བ་ལ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདཀར་པོ་བསམ། དེ་ལས་འོད་ཟེར་འཕྲོས་པས་སེམས་ཅན་གྱི་སྡིག་སྒྲིབ་སྦྱངས་ཏེ། ཇོ་བོའི་སྐུར་གྱུར་པ་རྣམས་འོད་དུ་ཞུ་སྟེ་སྔར་འཕྲོས་པའི་འོད་དང་འགྲོགས་ནས་ཚུར་འདུས་ཏེ་ཧྲཱིཿ་དེ་གསེར་གྱི་པདྨ་འདབ་མ་བརྒྱད་པ་ལྟེ་བར་ཧྲཱིཿཡིས་མཚན་པ་གཅིག་ཏུ་གྱུར། དེ་ལས་འོད་ཟེར་ལྕགས་ཀྱུ་ཞགས་པ་ལྟ་བུ་བྱུང་ནས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་རས་གཟིགས་ཀྱི་རྣམ་པར་བྱོན་ནས་ཧྲཱིཿལ་ཐིམ་པས་སྐད་ཅིག་གིས་པདྨ་ཧྲཱིཿདང་བཅས་པ་ཡོངས་སུ་གྱུར་པ་ལས་བདག་ཉིད་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་སྟོན་ཀའི་ཟླ་བ་ལྟར་ཆེས་དཀར་བ་ཞལ་བཅུ་གཅིག་གི་རྩ་བའི་ཞལ་དཀར་བ། གཡས་ལྗང་། གཡོན་དམར་བ། དེའི་སྟེང་མ་དབུས་ལྗང་། གཡས་དམར། གཡོན་དཀར་བ། དེའི་སྟེང་མ་དབུས་དམར། གཡས་དཀར། གཡོན་ལྗང་བ། དེ་རྣམས་ཞི་འཛུམ་སྒེག་ཅིང་རལ་པ་དམར་སེར་མཛེས་ཤིང་འཁྱིལ་བ། དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་ཤིང་ཁྲོ་གཉེར་དང་ལྡན་པ། སྤྱན་གསུམ་པ། རལ་པ་ཁམས་སེར་གྱེན་དུ་སྒྲེང་བ། དེའི་སྤྱི་བོར་རྫོགས་པའི་སངས་རྒྱས་འོད་དཔག་མེད་པ་ཞལ་དམར་པོ་མགྲིན་པ་དང་བཅས་དབུ་སྐྲ་བུང་བ་ལྟང་ནག་ཅིང་གཙུག་ཏོར་མངོན་པར་འཕགས་པའོ། །ཞལ་སོ་སོའི་ཁ་དོག་དཔལ་མོའི་གཞུང་ནས་དབུས་ལྗང་ཁུ་དང་དམར་བས་ཕྱེ་བ་བཞེད་པ་ཙམ་ལས་མི་གསལ་བ་བླ་མ་གོང་མ་རྣམས་ཀྱིས་ཙཎྜ་གོ་མའི་གཞུང་དང་མཐུན་པར་མཛད། གཞན་སྭ་དྷ་ན་མ་ལར་བཞུགས་པའི་སྒྲུབ་ཐབས་རྒྱུད་ཀྱི་དུམ་བུ་དང་འཕགས་པ་ཀླུ་སྒྲུབ་དང་གྲུབ་ཐོབ་ཀ་མ་ལ་གོ་མའི་གཞུང་དང་འཕགས་མཆོག་སྲོང་བཙན་སྒམ་པོས་མཛད་པ་དང་། ལྷ་བཙུན་ནཱ་ག་ར་ཛའི་ཐུགས་དམ་རྣམས་ཀྱི་ཞལ་གྱི་མདོག་དང་རྣམ་འགྱུར་མི་འདྲ་བ་ཡོད། རྩ་བའི་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་གཉིས་པས་བགྲང་ཕྲེང་། གསུམ་པ་མཆོག་སྦྱིན་གྱི་ཕྱག་རྒྱ་ལས་བདུད་རྩིའི་རྒྱུན་འཛག་པས་ཡི་དྭགས་ཀྱི་བཀྲེས་སྐོམ་སེལ་བ། བཞི་པས་འཁོར་ལོ་འཛིན་པ་གཡོན་གྱི་གཉིས་པ་ན་གསེར་གྱི་པདྨ་ཡུ་བ་དང་བཅས་པ། གསུམ་པ་ན་རིལ་བ་སྤྱི་བླུགས། བཞི་པ་ན་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དགུ་བཅུ་རྩ་གཉིས་པདྨའི་འདབ་ལྟར་འཇམ་ཞིང་མཆོག་སྦྱིན་རྣམ་པར་བཅང་བ། ཕྱག་ཐམས་ཅད་ཀྱི་མཐིལ་ན་ཞི་བའི་སྤྱན་རེ་རེས་སྤྲས་པ། ཕྱག་རྣམ་ཡར་དབུའི་གཙུག་ཏོར་དང་། རྩ་ཕྱག་བརྒྱད་ཀྱི་ཕྱག་མཚན་འདི་དང་མཚུངས། གཞན་རྒྱུད་ཀྱི་དགོངས་པས་ལྷ་བཙུན་ནཱ་ག་ར་ཛའི་ཐུགས་དམ་ལ་རྩ་ཕྱག་དྲུག་དང་། འཕགས་མཆོག་སྲོང་བཙན་ཞབས་ཀྱི་རྩ་ཕྱག་བཅུ་དང་གྲུབ་ཐོབ་ཀ་མ་ལ་གོ་མའི་གཞུང་དུ་རྩ་ཕྱག་བཅུ་གཉིས་སོགས་བཅུ་གཅིག་ཞལ་ཕྱག་སྟོང་རྣམ་གྲངས་ལུགས་མི་འདྲ་བ་ཡིན་ནོ། །ཞབས་གཉིས་མཉམ་པའི་སྟབས་ཀྱིས་བཞེངས་ཤིང་། རས་བཟང་པོའི་ཤམ་ཐབས་དང་། ནོར་བུས་སྤྲས་པའི་གསེར་གྱི་སྐེ་རགས་ཅན། རིན་པོ་ཆེའི་དབུ་རྒྱན། རྣ་རྒྱན། མགུལ་རྒྱན། ཕྱག་གདུབ། ཞབས་གདུབ་དཔུང་རྒྱན་ཅན། རི་དྭགས་ཀྱི་ལྤགས་པས་ནུ་མ་གཡོན་པ་བཀབ་པ།

དར་སྣ་ཚོགས་ཀྱི་ཅོད་པཎ་ལ་སོགས་པས་བརྒྱན་ཅིང་། མཚན་དཔེ་ཡོངས་སུ་རྫོགས་པའི་སྐུ་འོད་ཟེར་དཔག་ཏུ་མེད་པ་འཕྲོ་བའི་རང་བཞིན་ཅན་དུ་གྱུར། དེའི་ཐུགས་ཀར་གསེར་གྱི་པདྨ་དང་ཟླ་བ་ལ་གནས་པའི་ཧྲཱིཿདཀར་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་དང་སངས་རྒྱས་ཀྱི་ཞིང་རབ་འབྱམས་ཁྱད་པར་རི་པོ་ཏ་ལ་ནས་ཐུགས་རྗེ་ཆེན་པོ་བཅུ་གཅིག་ཞལ་ལ་སངས་རྒྱས་དང་སྤྱན་ཟས་གཟིགས་ཀྱི་སྐུའི་རྣམ་འགྱུར་དུ་མ་བྱང་ཆུབ་སེམས་དཔའི་ཚོགས་མ་ལུས་པས་བསྐོར་བ་སྐད་ཅིག་གིས་སྤྱན་དྲངས་བཛྲ་ས་མཱ་ཛཿ མདུན་གྱི་ནམ་མཁར་རིན་པོ་ཆེའི་པདྨ་འདབ་མ་འབུམ་དང་ལྡན་པ་ལ་བཞུགས་པར་གྱུར། ཨོཾ་པདྨ་ཀ་མ་ལ་ཡ་སྟྭཾ། དེ་ནས་མཆོད་རྫས་རྣམས་རང་རང་གི་སྔགས་དང་ཕྱག་རྒྱས་བྱིན་གྱིས་རླབས་ནས། སྙིང་ཁའི་ཧྲཱིཿལས་མཆོད་པའི་ལྷ་མོ་དཔག་ཏུ་མེད་པ་སྤྲོས་ནས། ཨོཾ་བཛྲ་པུཥྤེ་ཨཱཿཧཱུྃ་སྭཱ་ཧཱ། ཞེས་པས་མེ་ཏོག་མ་དཀར་མོས་མེ་ཏོག་དཔག་ཏུ་མེད་པས་མཆོད་པར་བསམ། དེ་བཞིན་དུ་དྷུ་པེས་བདུག་སྤོས་མ་སྔོན་མོས་བདུག་སྤོས། ཨཱ་ལོ་ཀེས་མར་མེ་མ་དམར་མོས་མར་མེ། གནྡྷེ་དྲི་མཆོག་མ་ལྗང་ཁུས་དྲི་མཆོག ནེ་ཝེ་ཏྱས་ཞལ་ཟས་མ་སེར་མོས་ཞལ་ཟས། ཤཔྟས་རོལ་མོ་ཕུལ་ནས་མཆོད་པའི་ལྷ་མོ་རྣམས་ཧྲཱིཿལ་བསྡུས་ལ། དཀྱིལ་འཁོར་ཀུན་ཏུ་རྒྱལ་བ་མཉེས་མཛད་པའི། །རིན་ཆེན་མེ་ཏོག་ལ་སོགས་མཆོད་པའི་ཚོགས། །ནམམཁའ་གང་བར་སེམས་ཀྱིས་མངོན་སྤྲུལ་ནས། །གཞལ་མེད་ཁང་དུ་སྤྲིན་བཞིན་གཏིབས་གྱུར་ཅིག །ཞེས་པས་མཆོད། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་བླ་ན་མེད། །ཚེ་དང་ཡེ་ཤེས་དཔག་མེད་རྣམ་ངེས་པ། །གཟི་བརྗིད་རྒྱལ་པོའི་ཞབས་ལ་ཕྱག་འཚལ་ལོ། །དུས་གསུམ་བདེ་བར་གཤེགས་པ་དང་། །ཕྱག་སྟོང་འཁོར་ལོས་བསྒྱུར་བ་སོགས་ཚིགས་བཅད་གཉིས་དང་། ཆོས་སྐུ་ནམ་མཁའ་ལྟ་བུ་སོགས། ཕྱག་བྱར་འོས་པ་སོགས་ཀྱིས་བསྟོད། མཆོད་བསྟོད་རྒྱས་པར་སྤྲོ་ན་གཞན་ཡང་བྱ་ལ། རྒྱུན་དུ་ནི་དེ་ཙམ་བདེའོ། །དེ་ནས་ཛཿཞེས་བརྗོད་པས་སྤྱི་བོར་བྱོན་ཧཱུྃ་ཞེས་བརྗོད་པས་གཉིས་སུ་མེད་པར་ཐིམ་བཾ་གྱིས་ཡེ་ཤེས་པ་བརྟན་པར་གྱུར། ཧོཿཞེས་པས་ཡེ་ཤེས་པ་དམ་ཚིག་པའི་ངོ་བོར་གྱུར་པར་བསམ་མོ། །དེ་ནས་རང་གི་དཔྲལ་བར་ཟླ་བའི་སྟེང་དུ་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་སྔོན་པོ་བསམ་ལ། ཨོཾ་ཨཱཿ་ཧཱུྃ་ལན་གསུམ་བརྗོད་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་སུ་མོས་པ་བྱའོ། །

ཡང་སྙིང་ཁའི་ཧྲཱིཿ་ལས་འོད་འཕྲོས་པས་རང་བཞིན་གྱི་གནས་ནས་འོད་དཔག་མེད་ཀྱི་གཙོ་བྱས་པའི་རིགས་ལྔ་མདུན་གྱི་ནམ་མཁར་སྤྱན་དྲངས་ཏེ། མཆོད་པ་ལྔ་ཕུལ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་རིགས་ལྔའི་ཐུགས་ཀ་ནས་སངས་རྒྱས་སྤྱན་མ་མཱ་མ་ཀཱི་གོས་དཀར་མོ། སྒྲོལ་མ་རྣམས་བདུད་རྩིའི་བུམ་པ་བསྣམས་པ་བྱོན་ནས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་འཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཤིང་སྤྱི་བོ་ནས་བདུད་རྩིའི་རྒྱུན་གྱིས་དབང་བསྐུར་བས་སྒོ་གསུམ་གྱི་དྲི་མ་དག་ནས་ཡེ་ཤེས་ཀྱི་ཆུས་ལུས་གང་ཞིང་ཆུ་ལྷག་མ་ཡར་ལུད་པས་རྩ་ཞལ་གྱི་གཙུག་ཏུ་བླ་མའི་ངོ་བོར་འོད་དཔག་མེད་དཔྲལ་བར་མི་བསྐྱོད་པ། རྣ་བ་གཡས་པར་རིན་ཆེན་འབྱུང་ལྡན། གཡོན་པར་དོན་ཡོད་གྲུབ་པ། ལྟག་པར་རྣམ་པར་སྣང་མཛད་རྣམས་ཀྱིས་བརྒྱན་པར་བསྒོམ། དེ་ནས་རང་གི་སྙིང་ཀར་པདྨ་དང་ཟླ་བའི་སྟེང་དུ་ཡེ་ཤེས་སེམས་དཔའ་ཇོ་བོའི་སྐུ་ཚོན་གང་བ་ཅིག་གི་ཐུགས་ཀར་པད་ཟླའི་སྟེང་དུ་ཏིང་འཛིན་སེམས་དཔའ་ཧྲཱིཿདཀར་པོ་གཅིག་བསམ། དེ་ལས་འོད་འཕྲོས་པས་ཐུགས་རྗེ་ཆེན་པོ་དཔག་ཏུ་མེད་པ་བྱུང་ནས། ཁམས་གསུམ་གྱི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་ཇོ་བོའི་གོ་འཕང་ལ་བཀོད་ནས་ཚུར་འདུས་ཤིང་ཐུགས་ཁའི་ཧྲཱིཿ་ལ་ཐིམ། དེ་བཞིན་དུ་སྤྲོ་བསྡུ་གཉིས་པོ་འཁོར་བར་བསམ་ཞིང་སྔགས་བཟླས་སོ། །ཡང་སྤྲོ་བསྡུའི་ངལ་ན་སྙིང་ཁའི་ཟླ་བ་ལ་གནས་པའི་ཧྲཱིཿཡིག་གི་མཐར་སྔགས་ཀྱི་འཕྲེང་བ་བཀོད་ལ་གཟུངས་ཟླ་བའམ། མ་མཆུ་གླེགས་ཤིང་གི་རྣམ་པ་ཤེལ་ལྟར་དྭངས་པ་ལ་གཟུངས་སྔགས་དབུ་གཡོན་བསྟན་གསེར་གྱི་ཁ་དོག་ལྟ་བུར་དམིགས་ལ། ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་ཝེཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ། ཨི་ལི་མི་ལི། ཙི་ཏི་ཛྭ་ལ་མ་པཱ་ནཱ་ཡེ་སྭཱ་ཧཱ། ཞེས་བཅུ་གཅིག་ཞལ་གྱི་སྙིང་པོ་སྟེ་དཔལ་མོའི་གཞུང་དངོས་གཞིར་དེ་ལས་མ་བསྟན་ཞིང་། ཙཎྜ་གོ་མའི་གཞུང་དུ་བཟླ་བྱའི་སྔགས་གང་ཡིན་མི་གསལ། ཀླུ་སྒྲུབ་ཀྱི་གཞུང་དུ་མགྲིན་སྔོན་གྱི་གཟུངས་དང་པདྨ་ཥྞཱིཥ་བཟླ་བར་གསུངས། འདིར་བྱང་སེམས་ཡབ་སྲས་ཀྱིས་མཛད་པའི་ཕྱག་ལེན་དུ་མདུན་བསྐྱེད་སྐབས་སུ་བསྟན་པའི་གཟུངས་རིང་ཚར་གཅིག་གིས་སྣ་དྲངས་ཤིང་སྙིང་པོ་བརྒྱ་དང་བདུན་བཟླ་བར་བཞེད་ལ། ཐུགས་རྗེ་ཆེན་པོའི་ཡང་སྙིང་ཡི་གེ་དྲུག་པ་ཡང་ཇི་ལྟར་འོས་པ་བཟླ། འོན་ཀྱང་ཆོ་ག་འདིའི་བཟླ་བྱའི་གཙོ་བོ་བཅུ་གཅིག་ཞལ་གྱི་རྩ་སྔགས་གཟུངས་རིང་དང་། སྙིང་པོ་གཟུངས་ཐུང་དག་ཡིན་པས་དེ་ལ་ངེས་པར་འབད་དགོས་སོ། །

གཟུངས་རིང་འབུམ་ཕྲག་གཅིག་བཟླས་པས་མཚམས་མེད་པ་ལྔ་བྱས་པ་རྣམས་ཀྱིས་ཀྱང་འགྲུབ་པར་འགྱུར་བ་འཕགས་པ་སྤྱན་རས་གཟིགས་དབང་ཕྱུག་རང་ཉིད་ཀྱིས་དེ་བཞིན་གཤེགས་པའི་དཀྱིལ་འཁོར་དུ་དམ་བཅས་པས་ཐེ་ཚོམ་མི་བྱ་ཞེས་རྒྱུད་ཀྱི་ཚིག་སྟེ། དཔལ་ལྡན་ཇོ་བོ་རྗེས་ཀྱང་འཕགས་ཡུལ་དུ་གཟུངས་སྔགས་ཇི་སྙེད་པ་ལས་གཟུངས་འདི་ནི་བྱིན་རླབས་ལྷག་པར་མྱུར་བ་ཡིན་ཞེས་བསྔགས་པར་གྲགས་སོ། །དེ་ལྟར་གཟུངས་བཟླས་པའི་མཐར། བདག་གི་ཡེ་ཤེས་སེམས་དཔའ་མདུན་དུ་བཞུགས་པ་མཆོད་བསྟོད་མདོར་བསྡུས་ཤིག་བྱ་དགེ་བ་བསྔོ་སླར་ཡེ་ཤེས་པ་རང་ལ་ཞུགས། བརྒྱད་པ་མདུན་བསྐྱེད་ཀྱི་ཆོ་ག་གཟུངས་བཟླས་བྱ་བའི་དེ་ཉིད་ནི་དཀྱིལ་འཁོར་བསང་སྦྱངས་སྟོང་པའི་ངང་ལས་སཾ་ལྗང་ཁུ་ལས་སྣ་ཚོགས་པདྨ་འདབ་མ་བརྒྱད་པ་དེའི་ལྟེ་བ་ལ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདཀར་པོ་བསམ། དེ་ལས་འོད་ཟེར་འཕྲོས་པས་སེམས་ཅན་གྱི་སྡིག་སྒྲིབ་སྦྱངས་ཏེ་ཇོ་བོའི་སྐུར་གྱུར་པ་རྣམས་འོད་དུ་ཞུ་སྟེ་སྔར་སྤྲོས་པའི་འོད་དང་འགྲོགས་ནས་ཚུར་འདུས་ཏེ་ཧྲིཿལ་ཐིམ་པས་ཧྲིཿ་དེ་གསེར་གྱི་པདྨ་འདབ་མ་བརྒྱད་པའི་ལྟེ་བར་ཧྲིའི་མཚན་པ་གཅིག་ཏུ་གྱུར། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་བྱུང་ནས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་རས་གཟིགས་ཀྱི་རྣམ་པར་བྱོན་ནས་ཧྲཱིཿལ་ཐིམ་པས་སྐད་ཅིག་གིས་པདྨ་ཧྲིཿདང་བཅས་པ་ཡོངས་སུ་གྱུར་པ་ལས། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་སྟོན་ཁའི་ཟླ་བ་ལྟར་ཆེས་དཀར་བ་ནས་འཕྲོ་བའི་རང་བཞིན་དུ་གྱུར་ཞེས་པའི་བར་གོང་གི་བདག་བསྐྱེད་བཞིན་བྱ། དེའི་དབུ་གཙུག་ཏུ་སངས་རྒྱས་འོད་དཔག་མེད་དམར་པོ་མཉམ་བཞག་གི་ཕྱག་རྒྱ་མཛད་པ་ཤར་དུ་ཧཱུྃ་ལས་མི་བསྐྱོད་པ་སྔོན་པོ་ས་གནོན་གྱི་ཕྱག་རྒྱ་ཅན། ལྷོར་ཏྲཾ་ལས་རིན་ཆེན་འབྱུང་ལྡན་སེར་པོ་མཆོག་སྦྱིན་གྱི་ཕྱག་རྒྱ་ཅན།

ནུབ་ཏུ་ཨོཾ་ལས་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། བྱང་དུ་ཨ་ལས་དོན་ཡོད་གྲུབ་པ་ལྗང་ཁུ་སྐྱབས་སྦྱིན་གྱི་ཕྱག་རྒྱ་ཅན་གཤེགས་པ་གཞན་གསུམ་གཡོན་མཉམ་བཞག་མཛད་པ་ཐམས་ཅད་ཀྱང་རྡོ་རྗེ་སྐྱིལ་ཀྲུང་གིས་བཞུགས་ཤིང་སངས་རྒྱས་རབ་ཏུ་བྱུང་བའི་ཆ་ལུགས་ཅན་ནོ། །འཚམས་ཀྱི་འདབ་མ་བཞིར་བུམ་པ་བཞི་གྲུབ་པར་གྱུར། དེའི་ཐུགས་ཀར་པདྨ་དང་ཟླ་བ་ལ་གནས་པའི་ཧྲཱིཿདཀར་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་དང་སངས་རྒྱས་ཀྱི་ཞིང་རབ་འབྱམས་སྤྱི་དང་ཁྱད་པར་བདེ་བ་ཅན་དང་གྲུ་འཛིན་ནས་འོད་དཔག་མེད་དང་བཅུ་གཅིག་ཞལ་ལ་སྤྱན་རས་གཟིགས་སྐུའི་རྣམ་འགྱུར་དུ་མ་དང་སངས་རྒྱས་བྱང་ཆུབ་སེམས་དཔའི་ཚོགས་མ་ལུས་ལུས་པ་མེད་པས་བསྐོར་བ་སྐད་ཅིག་གིས་སྤྱན་དྲངས་བཛྲ་ས་མཱ་ཛཿས། མདུན་གྱི་ནམ་མཁར་རིན་པོ་ཆེའི་པདྨ་འདབ་མ་འབུམ་དང་ལྡན་པ་ལ་བཞུགས་པར་གྱུར། ཨོཾ་པདྨ་ཀ་མ་ལ་ཡེ་སྟྭཾ། དེ་ནས་མཆོད་རྫས་རྣམས་རང་སྔགས་ཕྱག་རྒྱས་བྱིན་གྱིས་བརླབས་པ་ནས་མཆོད་བསྟོད་དང་དབང་བསྐུར་གྱི་བར་བདག་བསྐྱེད་སྐབས་ལྟར་ལ་ཡེ་ཤེས་ཀྱི་ཆུས་ལུས་གང་བར་གྱུར་ཞེས་རིགས་བདག་གིས་རྒྱས་འདེབས་མ་བྱས་ཀྱང་ཆོག བྱེད་པར་སྤྲོ་ན་ཡེ་ཤེས་ཀྱི་ཆུའི་ལུས་གང་ཞིང་ཆུའི་ལྷག་མ་ཡར་ལུད་པས་གཙོབ་བོ་ལ་འོད་དཔག་མེད་དུ་གྱུར་པ་སྔར་གྱི་དེ་ལ་ཐིམ། དེ་བཞིན་གཤེགས་པ་བཞི་ལ་རང་རིགས་ཀྱིས་དབུ་བརྒྱན་པར་གྱུར་ཞེས་བརྗོད་པ་ཁྱད་པར་རོ། །གཟུངས་སྔགས་བཟླ་བའི་སྐབས་བདག་བསྐྱེད་ལྟར་སེམས་དཔའ་གསུམ་བརྩེགས་ལ་སྤྲོ་བསྡུ་གཙོ་བོ་དང་། མ་ལྕོགས་ཚེ་ཐུགས་ཀའི་ཧྲིཿལ་སེམས་བཟུང་ཞིང་སྐབས་སུ་བདག་མདུན་གཉིས་ཀའི་ཕྱག་སོར་ལས་བདུད་རྩིའི་རྒྱུན་བབས་པས་བུམ་པ་གང་ཞིང་ཡི་དྭགས་རྣམས་ཚིམ་པར་བསམ་ལ། ན་མོ་རཏྣ་ཏྲ་ཡཱ་ཡ། ན་མོ་ཨཱཪྻ་ཛྙཱ་ན་སཱ་ག་ར། བཻ་རོ་ཙ་ན། བྷཱུ་ཧ་རཱ་ཛཿཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ན་མཿསརྦ་ཏ་ཐཱ ག་ཏེ་བྷྱཿཨརྷ་ཏེ་བྷྱཿ སམྱཀྶཾ་བུདྡྷེ་བྷྱཿ ན་མོ་ཨཱཪྻ་ཨ་ཝ་ལོ་ཀི་ཏེ་ཤྭ་ར་ཡ། བི་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་ཝཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་ཝ་རེ། ཨི་ལི་མི་ལི་ཙི་ཏི་ཛྭ་ལ་མ་པཱ་ནཱ་ཡེ་སྭ་ཧཱ། ཞེས་གཟུངས་རིངས་དེ་ཉིད་བརྒྱ་དང་རྩ་བརྒྱད་དག་པར་བཟླས་སོ། །ཐུགས་རྗེ་ཆེན་པོ་ཞལ་ཕྱག་མང་པོ་བསྒོམ་པར་མི་ནུས་ཚེ་ཞལ་གཅིག་ཕྱག་གཉིས་པ་བསྒོམ་པར་དགེ་སློང་མ་དཔལ་མོའི་ཞབས་ནས་གསུང་པ་ཡིས་བདག་མདུན་གྱི་ཡེ་ཤེས་སེམས་དཔའ་ཞལ་ཕྱག་གཉིས་ལེགས་པར་སེམས་ཤིང་། ཐུན་མཚམས་རྒྱུན་གྱི་རྣལ་འབྱོར་ལ་ཡང་ཞལ་གཅིག་ཕྱག་གཉིས་འཇུག་ཆེ་བར་ཤེས་སོ། །

དགུ་པ་བདུན་དང་བསྟོད་ཕྱག་གི་མཆོད་པ་དེ་ཉིད་ནི། དང་པོ་ཡན་ལག་བདུན་ལ། བདག་མདུན་དཀྱིལ་འཁོར་གྱི་ལྷ་དང་ཕྱོགས་བཅུའི་སངས་རྒྱས་སྲས་དང་སློབ་མ་གཡོག་དང་བཅས་ཤིང་མགྲོན་ཐབས་ཀྱི་ལྷ་གསར་དུ་ཡང་འདུས་པར་བསམ་སྟེ། ཨོཾ། ཕྱོགས་དུས་ཀུན་ཁྱབ་ནས་སྤྱན་རས་གཟིགས་ལ་ཕྱག་འཚལ་ལོ་ཞེས་པའི་བར་གོང་དུ་བསྟན་ལྟར་དང་། དེ་ནས་སྤྱན་རས་གཟིགས་དབང་རྒྱལ་བའི་གཙུག་ཏོར་ཅན། །ཕྱག་གིས་མཐིལ་ནས་བདུད་རྩིའི་འོ་རྒྱུན་གྱིས། །ཡི་དྭགས་བཀྲེས་སྐོམ་ནད་ཀུན་སེལ་མཛད་པའི། །མགོན་པོ་སྤྱན་རས་གཟིགས་ལ་ཕྱག་འཚལ་ལོ། །སངས་རྒྱས་བྱེ་བྲག་བཅུ་གཅིག་ཞལ། །རྩ་བའི་ཞལ་ནི་དཀར་ལ་མཛེས། །ལྗང་དང་དམར་པོ་གཡས་དང་གཡོན། །ཞི་བའི་ཞལ་ལ་ཕྱག་འཚལ་ལོ། །དབུས་ལྗང་གཡས་དམར་གཡོན་ཞལ་དཀར། །དབུས་དམར་གཡས་དཀར་གཡོན་ལྗང་ཞལ། །སྤྱན་དཀྱུས་རིང་ཞིང་ཞལ་བཀྲ་བ། །འཛུམ་བཅས་ཞལ་ལ་ཕྱག་འཚལལོ། །ཁྲོ་ཞལ་ནག་པོ་སྤྱན་གསུམ་པ། །མཆེ་གཙིགས་སྐྲ་བརྫེས་སྨ་ར་སེར། །སྟེང་ཞལ་དམར་པོ་གཙུག་ཏོར་ལྡན། །བཅུ་གཅིག་ཞལ་ལ་ཕྱག་འཚལ་ལོ། །ཆོས་ཉིད་ཐུགས་ཆུད་ཐུགས་ཀར་ཐལ་མོ་སྦྱར། །ཐུགས་རྗེ་རྒྱུན་མི་ཆད་པའི་འཕྲེང་བ་འཛིན། །ཡི་དྭགས་བཀྲེས་སྐོམ་སེལ་མཛད་མཆོག་སྦྱིན་ཕྱག །ཕྱག་གཡས་འཁོར་ལོ་བསྣམས་ལ་ཕྱག་འཚལ་ལོ། །འཁོར་བའི་འདམ་གྱིས་མ་གོས་པདྨ་བསྣམས། །རིལ་བ་སྤྱི་བླུགས་ཉོན་མོངས་དྲི་མ་འཁྲུད། །ཐབས་དང་ཤེས་རབ་གཉིས་འབྲེལ་མདའ་གཞུ་བསྣམས། །རྣམ་ཐར་བརྒྱད་ལྡན་ཁྱེད་ལ་ཕྱག་འཚལ་ལོ། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱི། །ཐུགས་རྗེ་གཅིག་ཏུ་བསྡུས་པའི་སྤྱན་རས་གཟིགས། །ནམ་མཁའི་མཐའ་ཁྱབ་ཚད་མེད་ཕྲིན་ལས་ཀྱིས། །འགྲོ་བ་འདྲེན་པའི་གཙོ་ལ་ཕྱག་འཚལ་ལོ། །སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་ནས་བསགས། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །ཆོས་སྐུ་ནམ་མཁའ་ལྟ་བུར་ཁྱབ་པ་ལ། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །མི་འཁྲུགས་པ་དང་སྣང་མཛད་སྤྱན་རས་གཟིགས། །རིན་ཆེན་འོད་འཕྲོ་རི་རབ་མུ་ཁྱུད་དང་། །འོད་དཔག་མེད་དང་རྡོ་རྗེ་འཛིན་པ་སྟེ། །མཐུ་སྟོབས་ཆེན་པོ་བརྒྱད་ལ་ཕྱག་འཚལ་ལོ། །བཟང་སྐྱོང་ཟླ་འོད་གཞོན་ནུ་ཡུལ་འཁོར་སྐྱོངས། །དོན་ཟབ་དགོངས་འབྲེལ་ཀུན་འདྲི་ཆོས་འཕགས་དང་། །བློ་གྲོས་ངག་ཡངས་དོན་དམ་ཡང་དག་འཕགས། །ཡོན་ཏན་འབྱུང་གནས་རྣམས་ལ་ཕྱག་འཚལ་ལོ། །འཕགས་མ་སྒྲོལ་མ་སྤྱན་མ་མཱ་མ་ཀཱི །གོས་དཀར་གདུགས་དཀར་རྣམ་རྒྱལ་མ་ཙུན་དེ། །དུག་སེལ་རིགས་བྱེད་དབྱངས་ཅན་མ་ནོར་རྒྱུན། །འོད་ཟེར་ཅན་མ་རྣམས་ལ་ཕྱག་འཚལ་ལོ། །ཤཱ་རིའི་བུ་སོགས་ཉན་ཐོས་མཆོག་བརྒྱད་དང་། །ཡན་ལག་འབྱུང་སོགས་གནས་བརྟན་ཆེ་བཅུ་དྲུག །གཞན་ཡང་རང་སངས་རྒྱས་དང་ཉན་ཐོས་ཀྱི། །འཕགས་པ་དགྲ་བཅོམ་རྣམས་ཕྱག་འཚལ་ལོ། །དུས་གསུམ་གཤེགས་པའི་སངས་རྒྱས་དང་། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་གྱི་གྲངས་རྙེད་ཀྱིས། །ལུས་བཏུད་པ་ཡིས་བདག་ཕྱག་འཚལ། །སངས་རྒྱས་སྲས་དང་སློབ་གྱུར་འཕགས་ཚོགས་ཀྱི། །ཞལ་མཐོང་བྱང་ཆུབ་སེམས་བསྐྱེད་བསླབ་གཞི་བླང་། །སངས་རྒྱས་བསྟན་བསྲུང་དཀར་པོའི་ཕྱོགས་གྱུར་པའི། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ལོ། །

ཕྱག་བྱར་འོས་པ་སོགས་ཕྱག་འཚལ་ཅི་རིགས་དང་། །མཆོད་རྫས་རྣམས་སླར་ཡང་རྒྱ་ཆེར་བྱིན་གྱིས་བརླབས་པར་བྱ་སྟེ། དེ་ཡང་བསང་སྦྱངས་སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཨཱཿཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། མེ་ཏོག གདུག་སྤོས། སྣང་གསལ། དྲི་མཆོག ཞལ་ཟས། རོལ་མོ་དང་གཞན་ཡང་འཕན་གདུགས་བླ་རེ་རྒྱལ་མཚན་བ་དན་ལ་སོགས་པ་མཆོད་པའི་ཡོ་བྱད་མ་ཚང་བ་མེད་པ་ཀུན་ཏུ་བཟང་པོའི་མཆོད་པའི་ཡོ་བྱད་མ་ཚང་མེད་པ་ཀུན་ཏུ་བཟང་པོའི་མཆོད་སྤྲིན་ལྟ་བུ་ནམ་མཁའི་ཁྱོན་དང་མཉམ་ཞིང་དུས་ཞིང་ཁམས་ཇི་སྲིད་དུ་གནས་པར་གྱུར། ཨོཾ་བཛྲ་ཨརྒྷཾ་སྭ་ཧཱ། ནས། ཤཔྟ་སྭཱ་ཧཱའི་བར་ཕྱག་རྒྱ་དང་བཅས་ཤིང་། ཨོཾ་སརྦ་བིད་པུ་ར་པུ་ར། སུ་ར་སུ་ར་ཨ་ཝརྟ་ཡ་ཨ་ཝརྟ་ཧོ་ཨོཾ་བཛྲ་སྥ་ར་ཎ་ཁཾ། ཞེས་བྱིན་ཕབས། མཆོད་ཡོན་ཕལ་ཆེར་མཆོད་ཡོན་བླ་རེ་དང་། །མཆོད་ཡོན་བཀོད་པའི་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ཨོཾ་གུ་རུ་ལོ་ཀ་ན་ཐ་དེ་ཝ་ཌ་ཀི་ནི་ཏྲི་རཏྣ་ས་པ་རི་ཝ་རེ་བྷྱཿ ཨརྒྷཾ་པཱུ་ཛ་མེ་གྷ་ས་མུ་དྲ་ས་ཕ་ན་ར་ཎ་ས་མ་ཡེ་ཨཱཿཧཱུྃ་སྭཱ་ཧཱ། དེ་བཞིན་ཞལ་བསིལ་ལ། པ་དྱཾ་པཱུ་ཛ་མེ་གྷ་ས་མུ་དྲ་སོགས། མེ་ཏོག བདུག་སྤོས། མར་མེ། དྲི་མཆོག ཞལ་ཟས། སིལ་སྙན་གྱི་བར། པཱུཥྤེ་པཱུ་ཛ་མེ་གྷ་ནས་ཤཔྟ་པཱུ་ཛའི་བར་གྱིས་འབུལ་ལོ། །དེ་ནས་མཎྜལ་རྒྱས་བསྡུས་གང་རུང་ཞིག་འབུལ། སྤྲོ་ན། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །རིན་ཆེན་བླ་རེ་ཡིད་འོང་རྒྱན་དང་བཅས། །ཆེན་པོ་ཉེར་སྤྱོད་བདེ་བ་སྒྲུབ་པ་ཡང་། །རྒྱལ་བ་སྲས་དང་བཅས་ལ་དབུལ་བར་བགྱི། །ཨོཾ་བཛྲ་བི་ཏ་ན་ཨཱཿཧཱུྃ། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །ལྷ་རྫས་ལས་བྱུང་སྣ་ཚོགས་མདོག་དང་ལྡན། །བ་དན་ཡིད་འོང་ཕྱོགས་བཅུར་གཡོ་བ་ཡང་། །རྒྱལ་བ་སྲས་དང་བཅས་ལ་དབུལ་བར་བགྱི། །ཨོཾ་བཛྲ་པ་ཏཱ་ཀ་ཨཱཿཧཱུྃ། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །རིན་ཆེན་གདུགས་མཛེས་གསེར་གྱི་ཡུ་བ་ཅན། །ཁོར་ཡུག་རྒྱན་གྱི་རྣམ་པ་ཡིད་འོང་ལྡན། །རྒྱལ་བ་སྲས་དང་བཅས་ལ་དབུལ་བར་བགྱི། ། ཨོཾ་བཛྲ་ཙྪ་ཏྲ་ཡ་ཨྰཿཧཱུྃ།

འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །རིན་ཆེན་རྒྱལ་མཚན་ནོར་བུའི་ཏོག་གིས་སྤྲས། །བདུད་ཀྱི་དགྲ་ལ་རྒྱལ་བའི་རྒྱལ་མཚན་འཕྱར། །རྒྱལ་བ་སྲས་དང་བཅས་ལ་དབུལ་བར་བགྱི། །ཨོཾ་བཛྲ་དྷྭ་ཛ་ཨཱཿཧཱུྃ། ཞེས་སོགས་མཆོད་པའི་བྱེ་བྲག་ཇི་སྙེད་པས་མཆོད། སྡིག་པ་བཤགས་པ་ནི། བདག་ནི་མི་ཤེས་གཏི་མུག་པས། །རང་བཞིན་ཁ་ནས་མ་ཐོའམ། །བཅས་པའི་སྡིག་པ་གང་ཡིན་པ། །གང་ཡང་རུང་བ་བགྱིས་པ་རྣམས། །མགོན་པོའི་སྤྱན་སྔར་མངོན་སུམ་དུ། །ཐལ་སྦྱར་སྡུག་བསྔལ་འཇིགས་སེམས་ཀྱིས། །ཡང་དང་ཡང་དུ་ཕྱག་འཚལ་ཏེ། །དེ་དག་ཐམས་ཅད་བཤགས་པར་བགྱི། །འདྲེན་པ་རྣམས་ཀྱིས་བདག་གི་སྡིག །ནོངས་པ་ལགས་པས་བཟུང་དུ་གསོལ། །འདི་ནི་བཟང་པོ་མ་ལགས་པས། །སླན་ཆད་བདག་ནི་ཡོངས་མི་བགྱིད། །རྗེས་སུ་ཡི་རང་བ་ནི། སེམས་ཅན་ཀུན་གྱི་ངན་སོང་གི །སྡུག་བསྔལ་ངལ་གསོའི་བདེ་བ་དང་། །སྡུག་བསྔལ་ཅན་རྣམས་བདེར་གནས་ལ། །དགའ་བས་རྗེས་སུ་ཡི་རང་ངོ་། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་རྗེས་སུ་ཡི་རང་ངོ་། །ལུས་ཅན་འཁོར་བའི་སྡུག་བསྔལ་ལས། །ངེས་པར་ཐར་ལ་ཡི་རང་ངོ་། །ཆོས་འཁོར་བསྐུལ་བ་ནི། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྦར་དུ་གསོལ། །མྱ་ངན་ལས་མི་འདའ་བར་གསོལ་བ་གདབ་པ་ནི། རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་མདོངས་པར་མ་འགོད་ཕྱིར། །བསྐལ་པ་གྲངས་མེད་བཞུགས་སུ་གསོལ། །བསྔོ་བ་ནི། དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་བསགས་པ་གང་། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་སེལ་བར་ཤོག །ཅེས་ཡན་ལག་བདུན་གྱིས་མཆོད། དེ་ནས་སླར་ཡང་བསྟོད་པས་མཆོད་པ་ནི། བདག་གི་ཡེ་ཤེས་པ་མདུན་གྱི་གཙོ་བོ་ལ་བསྟིམ། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཉན་རང་སངས་རྒྱས་ཀྱི་འཕགས་པ། བླ་མ་ཡི་དམ་མཁའ་འགྲོ་ཆོས་སྐྱོང་ཡེ་ཤེས་སྤྱན་དང་ལྡན་པ་རྣམས་མདུན་དུ་བཞུགས་པའི་སྤྱན་སྔར་རང་གི་ལུས་མར་མེ་གཅིག་ལ་གཉིས་མཆེད་ལྟ་བུར་འཕེལ་བའི་ལུས་གྲངས་མེད་པ་ལུས་རེ་རེར་མགོ་གྲངས་མེད་པས་འཕགས་པའི་ཞབས་ངོས་སུ་འདུད་ཅིང་ཁ་གྲངས་མེད་ནས་ལྕེའི་དབང་པོ་དེ་ཉིད་ཀྱིས་འཕགས་པ་ལ་སྙན་པར་བསྟོད་ཅིང་སེམས་ཅན་ཐམས་ཅད་ཀྱང་བདག་དང་སྤྱོད་ལམ་མཐུན་པར་རྒྱལ་བ་རྒྱ་མཚོའི་ཚོགས་ལ་གུས་པས་བཏུད་པར་བསམ་ལ་ཕྱག་འཚལ་བའི་གཟུངས་ཕྱག་བཅས་གོང་དུ་བསྟན་ལྟར་བྱས་རྗེས་མཉམ་ཉིད་མི་གཡོ་ལྟ་བུ་རྒྱུད་ཚིག་རྣམ་པར་དག་པས་བདེ་བར་གཤེགས་པ་སྤྱི་ལ་བསྟོད་པ་ཞིག་སྔོན་དུ་གཏོང་ན་ལེགས་པར་ངེས་སོ། །

དེ་ནས་བྱེ་བྲག་འཇིག་རྟེན་མགོན་པོ་བསྟོད་པ། དེ་ཡང་མཁའ་ཁྱབ་ཀྱི་བླ་མ་ཡི་དམ་སངས་རྒྱས་བྱང་སེམས། དཀོན་མཆོག་ཀུན་སྐུའི་རྣམ་པ་ཐམས་ཅད་ཀྱང་ཐུགས་འཇིག་རྟེན་མགོན་པོའི་ངོ་བོར་འདུས་ཤིང་ཇི་སྙེད་པ་ནི་སྐུའི་རྣམ་འགྱུར་ཡང་མཚུངས་པར་སྟོན་པ་དང་མདུན་བསྐྱེད་འཕགས་པ་བཅུ་གཅིག་ཞལ་གྱི་ཐུགས་ཀ་ནས་འཇིག་རྟེན་མགོན་པོ་ཞལ་གཅིག་ཕྱག་གཉིས་བསྟོད་ཚིག་དང་མཐུན་པ་ཞིག་མདུན་གྱི་པད་ཟླར་བཞུགས་པར་ཡང་མོས་ཤིང་དེ་རྣམས་ལ་གུས་པ་ཆེན་པོས་བསྟོད་ཅིང་ཕྱག་འཚལ་བའི་ངོ་ཆེན་རང་གི་སྤྱི་བོའི་ཐད་དུ་དགེ་སློང་མ་དཔལ་མོས་མཛད་པར་བསམ་ལ་བསྟོད་ཚིག་ནི། རྒྱ་གར་སྐད་དུ། ཨཱརྱ་ཨ་ཝ་ལོ་ཀི་ཤྭ་རཱ་ཡ་བྷིཀྵུ་ཤྲཱི་ནེ་རེ་སྟོད་ཏྲ་ནཱ་མ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ལ་དགེ་སློང་མ་དཔལ་མོས་བསྟོད་པ་ཞེས་བྱ་བ། ཨོཾ་འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་རྟེན་བླ་མ་སྲིད་པ་གསུམ་གྱིས་བསྟོད་པ་པོ། །ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པའི་རྒྱལ་མཆོག་བསྟོད་པས་གྲུབ་པར་མཛད་པ་པོ། །འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་གཤེགས་དཔག་མེད་སྐུ་མཆོག་སྐུ་བཟང་འཛིན་པ་པོ། །བདེ་གཤེགས་སྣང་མཐའ་ཡས་ཀྱི་དབུ་རྒྱན་འཛིན་པ་པོ། །ཕྱག་གཡས་མཆོག་སྦྱིན་ཡི་དགས་བཀྲེས་སྐོམ་སེལ་བ་པོ། །གཡོན་པའི་ཕྱག་ནི་གསེར་གྱི་པདྨོས་རྣམ་པར་བརྒྱན་པ་པོ། །དྲི་ཞིམ་རལ་བའི་ཕྲེང་བ་དམར་སེར་འཁྱུག་པ་པོ། །ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །སྤྱན་གྱི་པདྨོ་མཆོག་ཏུ་བཟང་ཞིང་ཡངས་པ་པོ། །ཁ་བ་དུང་ལྟར་རྣམ་དཀར་དྲི་ངད་ལྡང་བ་པོ། །དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ། །མཛེས་པའི་འོད་ཟེར་སྐྱ་རེངས་དམར་པོས་བརྒྱན་པ་པོ། །པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །སྟོན་ཀའི་སྤྲིན་གྱི་མདོག་དང་ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །རི་དྭགས་པགས་པས་ནུ་མ་གཡོན་པ་བཀབ་པ་པོ། །སྙན་ཆ་གདུ་བུས་སྒེག་ཅིང་རྒྱན་རྣམས་འཆང་བ་པོ། །དྲི་མ་མེད་པའི་པདྨོའི་མཆོག་ལ་གནས་པ་པོ། །ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ།

གསེར་གྱི་སྐ་རགས་མཆོག་ལ་ནོར་བུས་སྤྲས་པ་པོ། །སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་པ་པོ། །མཆོག་བརྙེས་བསོད་ནམས་མང་པོ་ཉེ་བར་བསགས་པ་པོ། །རྟག་ཏུ་བདེ་བའི་འབྱུང་གནས་རྒ་ནད་སེལ་བ་པོ། །གསུམ་ཐར་མཛད་ཅིང་མཁས་སྤྱོད་སྤྱོད་པ་སྟོན་པ་པོ། །ལུས་ཅན་མཆོག་སྟེ་བདུད་དཔུང་འཁྲུགས་ལས་རྒྱལ་པ་པོ། ། གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། ཚངས་པའི་གནས་པ་བཞི་ ཡིས་དབེན་པར་མཛད་པ་པོ། །ངང་པའི་འགྲོས་དང་གླང་ཆེན་དྲེགས་འདྲར་གཤེགས་པ་པོ། །ཡོངས་རྫོགས་ཉེ་བར་བསགས་ཤིང་བསྟན་པ་་ཉེར་བ་བོ། །འོ་མའི་མཚོ་དང་ཆུ་ཡི་མཚོ་ལས་སྒྲོལ་བ་བོ།གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས། །སྤྱན་རས་གཟིགས་ཀྱི་དབང་པོ་ཡིད་ལ་སེམས་བྱེད་ཅིང༌། །བསྟོད་པའི་མཆོག་འདི་དག་ཅིང་གསལ་བར་འདོན་བྱེད་ན། །དེ་ནི་སྐྱེས་པའམ་ཡང་ན་བུད་མེད་ཡིན་ཡང་རུང༌། །སྐྱེ་བ་འདི་དང་མ་འོངས་སྐྱེ་བ་ཐམས་ཅད་དུ། །འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །འཕགས་པ་སྤྱན་རས་གཟིགས་དབང་ཕྱུག་ལ། དགེ་སློང་མ་དཔལ་མོས་ལི་ཁ་ར་ཤིང་འཕེལ་དུ་བསྟོད་པ་རྫོགས་སོ། །བསྟོད་པ་ཨོཾ་འཇིག་རྟེན་མགོན་པོ་ནས་ཀུན་འགྲུབ་འགྱུར་བར་ཚར་བདུན་ནམ་ཉེར་གཅིག་བརྗོད་བཞིན་ཕྱག་བྱའོ། །བཅུ་པ་གསོལ་བ་གདབ་པ་དེ་ཉིད་ནི། འཕགས་པ་སྤྱན་རས་གཟིགས་དབང་ཕྱུག་བདག་ལ་དགོངས་སུ་གསོལ། ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་ཞིང་རྒྱས་པར་བྱིན་གྱིས་བརླབ་ཏུ་གསོལ།

བསྟན་པའི་རྩ་ལག་སྐྱེས་བུ་དམ་པ་རྣམས་སྐུ་ཚེ་རིང་ཞིང་འགྲོ་དོན་འཕེལ་བར་བྱིན་གྱིས་བརླབ་ཏུ་གསོལ། བདག་སོགས་སེམས་ཅན་ཐམས་ཅད་བདེ་ཞིང་དམ་པའི་ཆོས་ལ་སྤྱོད་པར་བྱིན་གྱིས་བརླབ་ཏུ་གསོལ། བྱམས་པ་དང་སྙིང་རྗེ་བྱང་ཆུབ་ཀྱི་སེམས་འབྱོངས་པར་བྱིན་གྱིས་བརླབ་ཏུ་གསོལ། ཞི་གནས་དང་ལྷག་མཐོང་ཟུང་དུ་འབྲེལ་བའི་ཏིང་ངེ་འཛིན་ནི་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ།ཇི་ལྟ་བ་དང་ཇི་སྙེད་པ་རྟོགས་པའི་ཤེས་རབ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་བྱིན་རླབས་དངོས་གྲུབ་ཀྱི་ཚུལ་དུ་བཅུ་གཅིག་ཞལ་གྱི་མདུན་དུ་བཞུགས་པའི་འཇིག་རྟེན་མགོན་པོ་དེ་ཉིད་རང་གི་སྤྱི་བོའི་གཙུག་ནས་སྙིང་ཁར་ཐིམ་པས་བདག་ཀྱང་འཕགས་པའི་སྐུར་སྔར་བཞིན་པར་གྱུར།

དེ་ནས་བཅུ་གཅིག་པ་མཆོད་གཏོར་འབུལ་བའི་དེ་ཉིད་ནི། འདས་གཏོར་བསང་སྦྱངས། སྟོང་པའི་ངང་ལས་བྷྲུཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཧཱུྃ་ལས་བྱུང་བའི་གཏོར་མ་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབས། སྙིང་པོ། ཏདྱ་ཐཱ། ཨོཾ་དྷ་ར་དྷ་ར་སོགས་དང་། ཉེ་སྙིང་ཡི་གེ་དྲུག་པའི་མཐར། ཨོཾ་ཨཱརྱ་ཨ་ཝ་ལོ་ཀི་ཏེ་ཤྭ་རཱ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ཞེས་པ་ལན་གསུམ་གྱིས་འཕགས་པ་ལ་ཕུལ། སངས་རྒྱས་བྱང་ཆུབ་སེམས་དཔའ་སྤྱི་ལ་དམིགས་ཏེ་ཨོཾ་སརྦ་བུདྡྷ་བོ་དྷི་ས་ཏྭ་ག་ཎ་ཀ་ལ་ས་པ་རི་ཝཱ་རེ་བྷྱཿཨོཾ་ཨ་ཀ་རོ་མུ་ཁཾ་སརྦ་དྷརྨ་ཎཱཾ་ཨ་དྱ་ནུཏྦནྣ་ཏྭ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་པས་ཕུལ་ཨརྒྷཾ་སོགས་ཀྱིས་མཆོད། སྐྱོན་གྱིས་མ་གོས་དང་། ནམ་མཁའི་མཐར་གཏུགས་ཆོས་དབྱིངས་ཡོངས་ཁེངས་པ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །འཁོར་དང་བཅས་ལ་ཕྱག་འཚལ་བསྟོད་པར་བགྱི། །ཞེས་པས་བསྟོད། མཆོད་སྦྱིན་གཏོར་མ་འདི་བཞེས་ཤིང་། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་བསྲུང་། །དངོས་གྲུབ་ཀུན་གྱིས་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། དེ་ནས་ཆོས་སྐྱོངས་དང་ཆ་གསུམ་ལ་ཕྱོགས་སྐྱོང་འབྱུང་པོ་བགེགས་རིགས་སྤྱི་སྟེ་དེ་རྣམས་ལ་གཏོར་མ་དང་ཆོ་ག་འདིའི་སྒོས་བསྲུང་དུ་གྲགས་པ་ཆུ་བདག་ཝ་རུ་ཎ་ཡི་ཀླུ་གཏོར་དང་། གནས་གཞི་ཡུལ་བདག་བཅས་ལ་རང་རང་གི་ཆོ་ག་ཤེས་ན་ཤིན་ཏུ་ལེགས་པས་དེས་བསྔོས། གལ་ཏེ་དང་པོའི་བློ་ཅན་ལྟ་བུ་ཆོ་ག་དེ་རྣམས་མི་ཤེས་པའམ་མི་ནུས་ཚེ་གཏོར་མ་སོ་སོར་བསངས་སྦྱངས་འབྲུ་གསུམ་གྱིས་རིམ་པར་བྱིན་གྱིས་བརླབས། ཨ་ཀཱ་རོའི་སྔགས་རྒྱས་མགྲོན་དེ་དང་དེར་དམིགས་ཏེ་བསྔོས། ཨརྒྷཾ་སོགས་ཀྱིས་མཆོད། ཨོཾ་སྔོན་ཚེ་བཅོམ་ལྡན་འདས་ཀྱི་སྤྱན་སྔ་རུ། །ཆོས་བཞིན་བསྒྲུབ་པར་བྱེད་པའི་གང་ཟག་ལ། །བུ་བཞིན་བསྲུང་ཞིང་སྐྱོང་བར་ཞལ་བཞེས་པའི། །ཆོས་སྐྱོངས་བསྲུང་མ་རྣམས་ལ་ཕྱག་འཚལ་ལོ། །སངས་རྒྱས་བསྟན་བསྲུང་འཇིག་རྟེན་སྐྱོང་། །

འཕགས་པའི་བཀའ་སྡོད་མཐུ་བོ་ཆེ། །གཞན་ཡང་འབྱུང་པོ་བགེགས་རིགས་བཅས། །ཡུལ་བདག་གནས་བདག་གྲོང་བདག་ཡང་། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་ཐུན་མོང་དུ་བཅོལ། སརྦ་ལོ་ཀ་གཙྪཿས་གཏོར་མགྲོན་འཇིག་རྟེན་པ་རྣམས་གཤེགས། སྤྲོས་པ་ཆུང་ན་མདོར་བསྡུས་དེ་ཙམ་གྱི་རུང་བའོ། །གཏོར་མ་གསུམ་བཤམས་པ་ལ་རང་གིས་དཀྱུས་སུ་བཤད་པའི་གཏོར་འབུལ་དེ་ཀས་འགྲུབ་ལ། འདས་གཏོར་གཅིག་པུར་བྱས་ན་འཕགས་པ་དང་བྱང་སེམས་སྤྱི་ལ་ཕུལ་པ་དེ་ཁོ་ནས་ཆོག་པའོ། །བཅུ་གཉིས་པ་སྨོན་ལམ་གདབ་པའི་དེ་ཉིད་ནི། ཐོག་མར་བྱིན་རླབས་དང་བཅས་པའི་མཆོད་བསྟོད་བསྡུས་པ་ཞིག་བཏང་རག་གི་ཚུལ་དུ་ཕུལ་དེ་ནས། སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ཏེ། །སྤྱན་རས་གཟིགས་ཀྱི་དམ་ཚིག་ལ་གནས་ཤོག །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་འགྱུར་ཞིང་། །སྐྱེས་པ་ཉམས་པ་མེད་པ་ཡང་། །གོང་ནས་གོང་སུ་འཕེལ་བར་ཤོག །ཅེས་སྨོན་ལམ་བཏབ།

བཅུ་གསུམ་པ་ལྷག་ཆད་བསྐང་བའི་དེ་ཉིད་ནི། ཐོག་མར་མེ་ལོང་ལ་ལྷའི་གཟུགས་བརྙན་ཤར་བ་ལ་བུམ་ཆུ་བླུགས་ཤིང་། འགྲོ་བའི་སྒྲོན་མེ་སྤྱན་རས་གཟིགས་དབང་ལ། །དྲི་ཞིམ་བདུད་རྩིའི་རྒྱུན་གྱིས་ཁྲུས་གསོལ་བས། །འགྲོ་བའི་སྒྲིབ་གཉིས་དྲི་མ་ཀུན་བསལ་ནས། །དྲི་བྲལ་སྐུ་གསུམ་བརྙེས་པའི་བཀྲ་ཤིས་ཤོག །ཅེས་སྐུ་ཁྲུས་གསོལ། སྤྲོ་ན་ཇི་ལྟར་བལྟམས་པ་སོགས་ཁྲུས་ཆོག་རྒྱས་པ་དྲི་ཕྱིས་ན་བཟའ་འབུལ་བའི་བར་བྱ། དེ་ནས་ཐལ་མོ་སྦྱར་ཏེ། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་བདག་ཅག་ལ་དགོངས་སུ་གསོལ། བདག་ཅག་ལས་དང་པོ་པར་གྱུར་ཅིང་། སེམས་བྱིང་བ་དང་རྒོད་པའི་དབང་གིས་ཏིང་ངེ་འཛིན་མི་གསལ་བ་དང་། སྔགས་མ་དག་པ་དང་། ཆོ་ག་ལྷག་ཆད་གྱུར་པ་དང་། གཙང་སྦྲ་ཆུང་བ་ལ་སོགས་པ་ཐམས་ཅད་མགོན་པོ་ཐུགས་རྗེ་ཆེན་པོ་དང་ལྡན་པ་ཁྱེད་ལ་བཟོད་པར་གསོལ་གྱིས། བདག་ཅག་གི་སྒྲིབ་པར་མི་འགྱུར་བར་བྱིན་གྱིས་བརླབ་ཏུ་གསོལ། ཨོཾ་པདྨ་ས་ཏྭ་ས་མ་ཡ། མ་ནུ་པཱ་ལ་ཡ། པདྨ་ས་ཏྭ་ཏྭེ་ནོ་པ། ཏིཥྚ་དྲྀ་དྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ།ཨ་ནུ་རཀྟོ་མེ་བྷ་ཝ།སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ། ཙིཏྟཾ་ཤྲི་ཡ། ཀུ་རུ་ཧཱུྃ། ཧ་ཧ་ཧ་ཧ་ཧོ་བྷ་ག་ཝཱན་སརྦ་ཐྭ་ག་ཏ། པདྨ་མཱ་མེ་མུཉྩ། པདྨ་བྷ་ཝ། མ་ཧཱ་ས་མ་ཡ་ས་ཏྭ་ཨཱ། ཞེས་ཅི་ནུས་སམ་ལན་གསུམ་བརྗོད། ཀླུ་སྒྲུབ་དང་། ཙནྡྲ་གོ་མིའི་གཞུང་དུ་ཨོཾ་བཛྲ་ས་ཏྭ་ས་མ་ཡ་ཞེས་རྡོ་རྗེ་སེམས་དཔའི་ཡིག་བརྒྱ་ཉིད་དུ་བསྟན་མོད། དེ་བླ་མ་གོང་མ་རྣམས་ཀྱིས་པདྨ་ས་ཏྭ་ཞེས་པདྨའི་རིགས་ཀྱི་ཡིག་བརྒྱར་མཛད་པ་ཡིན། དེས་ནི་གསང་སྔགས་གསར་འགྱུར་གྱི་རྒྱུད་གཞུང་དུ་གྲགས་ཆེ་བར་རྡོར་སེམས་དང་ཧེ་རུ་ཀའི་ཡིག་བརྒྱ་ལས་གཞན་མི་གསལ་ཡང་རྡོ་རྗེ་སེམས་དཔའི་ཡིག་བརྒྱ་ཡི་དམ་རབ་འབྱམས་སུ་ཁ་བསྒྱུར་བའི་ཁུངས་བོད་སྔགས་རྙིང་མའི་རྒྱུད་དུ་གསལ་བཞིན་འདི་རིགས་དེའི་མན་ལ་བརྟེན་པར་ངེས་སོ། །

བཅུ་བཞི་པ་ཡི་གེ་དྲུག་པའི་སྒོ་ནས་གཟུངས་སྒྲུབ་ཁྲུས་ཆུའི་བྱིན་རླབས་ལན་པའི་དེ་ཉིད་ནི། ཨོཾ་མ་ཎི་པདྨེ་ཧཱུྃ། ཞེས་བརྗོད་པས་དཀྱིལ་འཁོར་གྱི་ལྷ་ཚོགས་དང་སངས་རྒྱས་བྱང་སེམས་ཐམས་ཅད་ཀྱི་ཐུགས་གཉིས་སུ་མེད་པ་ཡེ་ཤེས་ཀྱི་རང་གཟུགས་འཕགས་པ་གཙོ་འཁོར་གསུམ་གྱི་རྣམ་པར་མདུན་གྱི་ནམ་མཁར་བྱོན་པ་གསུམ་ཀ་ཡང་ཞལ་གཅིག་ཕྱག་བཞི་པ་རིན་པོ་ཆེའི་རྒྱན་དུ་མས་བརྒྱད་པ་འཁོར་ལོ་བསྒྱུར་བའི་རྒྱལ་པོ་སྲས་དང་བཙུན་མོའི་རྣམ་པ་ཅན། རྩ་ཕྱག་ཐལ་མོ་སྦྱར་བ། གཙོ་བོ་བཅོམ་ལྡན་འདས་ཡི་གེ་དྲུག་པ་སྐུ་མདོག་སྟོན་ཟླ་འབུམ་ལྟར་དཀར་བ། ནུ་མ་གཡོན་རི་དྭགས་ལྤགས་པས་བཀབ་པ། ཕྱག་འོག་མ་གཉིས་མུ་ཏིག་གི་འཕྲེང་བ་དང་། ཨུཏྤལ་དཀར་པོ་འཛིན་ཅིང་། པད་ཟླ་ལ་ཞབས་རྡོར་སྐྱིལ་གྱིས་བཞུགས་པ། གཡས་སུ་སྲས་ནོར་བུ་འཛིན་པ་སེར་པོ་ཕྱག་འོག་མ་གཡས་མཐེབ་སྲིན་བར་ཡིད་བཞིན་ནོར་བུ་དང་། གཡོན་རིན་ཆེན་ལྕུག་མ་བདུད་རྩིའི་འབྲས་བུ་འབབ་པ། གཡོན་དུ་ཡུམ་ཡི་གེ་དྲུག་མ་གཙོ་བོ་ཇི་བཞིན་ལ་ལྷ་མོའི་འཇོ་སྒེག་སྤྱན་གཉིས་ཀ་ཡང་གཙོ་བོར་འདུད་ཚུལ་པུས་མོ་ཕྱོགས་གཅིག་པད་ཟླའི་གདན་ལ་བཙུགས་ཏེ་གནས་པ། དེ་རྣམས་ཀྱི་ཕྱག་གཡས་པ་ལས་བདུད་རྩིའི་རྒྱུན་བདག་སོགས་སེམས་ཅན་རྣམས་ཀྱི་སྤྱི་བོར་བབ་ལུས་ཕྱི་ནང་མེད་པ་ལན་གསུམ་དུ་བཀྲུས་པས་དང་པོས་ཉོན་མོངས་སྒྲིབ་དག གཉིས་པ་ཤེས་སྒྲིབ་དག གསུམ་པས་སྐྱེ་མེད་ཆོས་སྐུ་ཐོབ་པར་བསམ་ལ། དུང་ཞལ་གྱི་ཆུ་ལ་གཟུངས་བུམ་གྱི་ཆུ་ཐིག་བསྲེས་ཏེ་གདོང་དང་ཁ་ལན་གསུམ་དུ་བཀྲུས་ཤིང་ཡིག་དྲུག་བཟླས་ནས་བུམ་ཆུ་ལན་གསུམ་འཐུང་། དེ་ནས་གཙོ་བོ་ཡུམ་སྲས་རྣམས་རིམ་པར་རང་གི་སྤྱི་བོར་ཐིམ་པས་སྐུ་གསུང་ཐུགས་རྡོ་རྗེའི་རང་བཞིན་དུ་གྱུར་ཅིང་ཅུང་ཟད་མཉམ་པར་བཞག་པས་ཡེ་ཤེས་རྡོ་རྗེའི་ངོ་བོར་གྱུར། རྒྱལ་སྲས་ཐོགས་མེད་པའི་གཞུང་དུ་འདི་བཀོད་པར་མཛད་པ་རྩ་བའི་ཁུངས་ཇོ་བོ་རྗེའི་མན་ངག་དང་འབྲེལ་བར་སྣང་བས་དེ་དང་བསྟུན་ཏེ་ཅུང་ཟད་གསལ་བར་ཕྱེས་པ་ཡིན་ལ། བླ་མ་གཞན་ནས་གཙོ་རྐྱང་དང་ཕྱག་གཉིས་པར་མཛད་པ་སོགས་མི་འགལ་ཡང་། རྒྱལ་སྲས་པའི་རྗེས་སུ་འབྲང་ཕྱིན་དེའི་གཞུང་དང་མཐུན་པར་བྱས་ན་ལེགས་པར་སེམས་སོ། །

བཅོ་ལྔ་པ་བསྐྱེད་རིམ་གྱི་ཉེར་ལྡོག་འཇུག་ལྡང་གི་དེ་ཉིད་ནི། མདུན་བསྐྱེད་དཀྱིལ་འཁོར་ཚོམ་བུའི་ལྷ་ལ་དམིགས་ཏེ། ཐུགས་རྗེའི་ཕྱག་ན་པདྨོ་ཡིས། །ཡིད་ཀྱི་པདྨོ་ཁ་ཕྱེ་ནས། །རིན་པོ་ཆེ་ལྟར་གཤེགས་ནས་ཀྱང་། །ཚུར་བྱོན་ཐུགས་རྗེ་ཆེན་པོ་མུམ། །ཞེས་བརྗོད་པས་མདུན་བསྐྱེད་རྣམས་རང་བཞིན་གྱི་གནས་སུ་གཤེགས་པར་བསམ་ལ་རྟེན་ཡོད་ན་དེ་ལ་བརྟེན་བཞུགས་རྟེན་འབྲེལ་སྙིང་པོས་རབ་གནས་བྱ་ཉིན་ཕྱི་མའི་རྗེས་སུ་མཆོག་གི་སྐབས་ཡིན་ན་མེ་ཏོག་གམ། རྡུལ་མཚོན་གྱི་ཚོམ་བུ་བསྡུ་གཟུངས་སྒྲུབ་ཀྱི་བུམ་བུ་འཆད་འགྱུར་ལྟར་སྤྱོད་པར་བྱའོ། །དེ་ནས་བདག་བསྐྱེད་བསྡུ་བ་ནི། སྣང་སྲིད་དག་པའི་ཞིང་དང་ཐུགས་རྗེ་ཆེན་པོའི་སྐུར་གྱུར་པ་རིམ་པས་དམ་ཚིག་སེམས་དཔའ་ལ་ཐིམ། དེ་ཡང་ཞལ་ཕྱག་གཞན་རྩ་བའི་ཞལ་ཕྱག་ལ་བསྡུས། དེ་ཡང་རང་གི་སྙིང་ཀའི་ཡེ་ཤེས་སེམས་དཔའ་དང་། དེ་ཏིང་ངེ་འཛིན་སེམས་དཔའ་ཧྲིཿཡིག་ལ་འདུས། ཧྲཱིཿཡང་ཐིག་ལེ་དཀར་པོ་ཡུངས་ཀར་ཙམ་དུ་གྱུར། ཐིག་ལེ་ཡང་ཇེ་ཕྲར་སྟོང་པའི་དབྱིངས་སུ་ཡལ་ཏེ་དམིགས་མེད་སྤྲོས་བྲལ་གྱི་ངང་ལ་ཅི་གནས་སུ་མཉམ་པར་བཞག དེ་ལས་ལྡང་ཚེ་སྐད་ཅིག་གིས་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པའི་སྐུ་སྒྱུ་མ་ལྟར་སྣང་ཞིང་སྤྱོད་ལམ་ཀུན་ལྷ་སྔགས་སྙིང་རྗེའི་རྣལ་འབྱོར་དང་མི་འབྲལ་བར་བྱའོ། །

བཅུ་དྲུག་པ་དགེ་བ་བྱང་ཆུབ་ཆེན་པོར་བསྔོ་ཞིང་བཀྲ་ཤིས་མཐའ་རྒྱས་ཀྱི་དེ་ཉིད་ནི་ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་ཐུགས་རྗེ་ཆེན་པོ་དང་ལྡན་པ་རྣམས་བདག་ལ་དགོངས་སུ་གསོལ། འདི་ལྟར་བདག་གིས་གསོ་སྦྱོངས་ཀྱི་ཚུལ་ཁྲིམས་བསླབ་ཅིང་བསྒོམ་བཟླས་བགྱིས་པའི་དགེ་བའི་རྩ་བ་ལ་བརྟེན་ནས་སེམས་ཅན་ཐམས་ཅད་ཀྱི་དོན་དུ་འཕགས་པ་གཟི་བརྗིད་འོད་དཔག་མེད་པའི་གོ་འཕང་མྱུར་དུ་ཐོབ་པར་གྱུར་ཅིག དགེ་བ་འདིའི་མྱུར་དུ་བདག །སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འཁོད་པར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་དགེ་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེར་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་དག་མ་ལུས་བདག་གིས་ཡོངས་སུ་བཀང་། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤི་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། །བཟང་པོ་སྤྱོད་པའི་སྨོན་ལམ་བཏབ་པ་ཡིས། །དགེ་བ་ཅུད་ཟད་བདག་གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །བཟང་པོ་སྤྱོད་པའི་སྨོན་ལམ་བསྔོས་པ་ཡིས། །བསོད་ནམས་དམ་པ་མཐའ་ཡས་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་ཐོབ་པར་ཤོག །སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཕྱིར། །ཀུན་ཏུ་བཟང་པོས་བརྒྱན་པའི་གཞུང་གྲུབ་སྟེ། །ངན་སོང་རྒྱུད་རྣམས་མ་ལུས་སྟོང་པར་ཤོག །ཅེས་དགེ་བ་བྱང་ཆུབ་ཏུ་བསྔོས།

བསྡུ་ན་ཚིགས་བཅད་ཐོག་མ་གསུམ་དང་། རྒྱལ་བའི་དཀྱིལ་འཁོར་བཟང་ཞིང་དང་། བཟང་པོ་སྤྱོད་པའི་སྨོན་ལམ་བསྔོས་པ་ཡིས་སོགས་ཚིགས་བཅད་གཉིས་ཙམ་གྱིས་ཆོག་ལ། རྒྱས་པར་ནི་བསྔོ་སྨོན་གཞན་ཡང་བརྗོད་དོ། །དེ་ནས་བཀྲ་ཤིས་པའི་མེ་ཏོག་གི་སྣོད་མདུན་དུ་བཀྲམ་ཤིང་སྙིམ་པར་བཟུང་ལ། སྟོན་མཆོག་དམ་པ་ལྷ་མིས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་མིའི་མཆོད་འོས་པ། །ཆོས་ལ་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཚོགས་མཆོག་དམ་པ་ལྷ་མིས་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །འབྱུང་པོ་གང་དག་འདིར་ནི་ལྷག་གྱུར་ཏེ། །སའམ་འོན་ཏེ་བར་སྣང་འཁོད་ཀྱང་རུང་། །སྐྱེ་རྒུ་ཀུན་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །བདག་ཅག་རྣམས་དང་ཡོན་གྱི་བདག་པོ་འཁོར་དང་བཅས་རྣམས་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་རྒྱལ་བར་གྱུར་ཅིག ཅེས་སྦྱོར་དངོས་ཀྱི་ཆོ་གའི་ཐུན་བར་རྣམས་སུ་བཀྲ་ཤིས་བརྗོད་པའི་ཚིག་དེ་ཙམ་བདེ་ལ། རྗེས་གཏང་རག་ཆོ་ག་དང་འབྲེལ་བའི་སྐབས་སུ་ནི་གྲགས་ཆེ་ཞིང་། ཁུངས་དང་ལྡན་པའི་བཀྲ་ཤིས་ཀྱི་ཚིགས་གཞན་ཡང་ཅི་ཙམ་མང་བཞིན་ལེགས་པས་རྒྱས་པར་བྱའོ། །དེ་ནས་མཆོད་གཏོར་རྣམས་ཕྱོགས་གཙང་མའི་གནས་སུ་བཏང་། ཡང་ལོངས་སྤྱོད་པར་འདོད་ཚེ་སྔགས་ཀྱི་བྱིན་གྱིས་རླབས་པར་བྱ་སྟེ། སྔགས་ནི་ཨོཾ་དེ་བྱ་ཨེནྣ་ས་མ་དྷི་དྷྱ་ན་པྲ་ཎ་ནེ་སྭཱ་ཧཱ། ཞེས་ལན་བདུན་གྱིས་སྔགས་ནས་སྤྱད་པས་དངོས་གྲུབ་ཀྱི་རྫས་སུ་འགྱུར་བར་གསུང་པས་དེ་ལྟར་གཅེས་སོ། །

གོང་དུ་གཟུངས་ཀྱིས་བསྒྲུབ་པའི་བུམ་ཆུ་དེ་ནི་བྱིན་རླབས་ནུས་མཐུ་མཆོག་ཏུ་ཆེ་བ་ཡིན་པས་གཙང་སྦྲ་ཆེན་པོ་བྱས་ཏེ། སྐྱེ་བོའི་རྒྱུ་འགྲུལ་དབེན་པའི་རི་མཐོན་པོའི་རྩེ་མོ་དང་། ཡང་མང་དུ་རྒྱུ་བའི་ལ་ཆེན་རྩེ་འམ་འདུས་མདོར་གཙང་ཤིང་མཐོ་བའི་སྟེགས་བུའི་ཁར་རྡེའུ་དཀར་བཟང་པོ་སྤུངས་པའི་སྙིང་པོར་རྡུལ་ཚོན་ལྷ་མཚན་ཚོམ་བུ་མ་གོད་བླུགས་གཟུངས་སྔགས་བཟླས་ནས་བུམ་པའི་ཆུ་བྲན་ལ་ཆོ་ག་བཞིན་ཐུགས་རྗེ་ཆེན་པོར་བསྒོམ་ནས་བརྟན་བཞུགས་ཤིས་བརྗོད་བྱས་པས། རི་མཐོང་བ་དང་། ལམ་དེར་རྒྱུ་བ་དང་། རྫི་རླུང་ཕོག་པ་ཀུན་ངན་སོང་ལས་གྲོལ་བ་སོགས་དགོས་པ་ཕན་ཡོན་ཆེན་པོ་དང་ལྡན་པར་གསུངས་སོ། །ཡང་མི་མ་ཡིན་དཀར་པོའི་ཕྱོགས་ལ་དགའ་བའི་རྟེན་གནས་སུ་གོང་བཞིན་རྡེའུ་དཀར་པོའི་བཅས་སམ། མེད་ཀྱང་རུང་ལ་གཟུངས་བསྒྲུབ་ཀྱི་ཆུ་གཟུངས་སྔགས་བཟླས་ཤིང་སྨོན་ལམ་བཟང་པོ་བཀྲ་ཤིས་ཀྱིས་འཐོར་བའམ། ཡང་མི་མ་ཡིན་དེ་ལ་དམིགས་བཀྲུ་བྱབ་ཀྱི་ཆོ་ག་ཇི་བཞིན་བྱས་པས་དེར་གནས་ཀྱི་དུཿཁ་ཞི་ཞིང་མཐུ་སྟོབས་རྒྱས་ནས་ཡུལ་ཕྱོགས་དེ་དགེ་ཞིང་ཤིས་པར་འགྱུར་བ་དང་། མི་མ་ཡིན་དྲག་ཤུལ་རྩུབ་འགྱུར་ཅན་གྱི་གནས་སུ་ཡང་དེ་བཞིན་བྱས་པས་གདུག་རྩུབ་ཆུང་ཞིང་ཞི་བ་བྱང་ཆུབ་སེམས་སྐྱེ་བར་ཤེས་སོ། །ཡང་ཀླུ་གཏོར་བཏང་བ་དང་ཀླུ་གཏའ་བསྡམས་པ་དང་། ཆར་འབེབས་པ་དང་། ད་ལྟར་གཏེར་བུམ་འཇུག་པར་གྲགས་པ་རྣམས་ལ་ནི་འདི་ཡི་གཟུངས་བསྒྲུབ་ཀྱི་ཆུ་ལག་ལེན་མ་ནོར་བར་སྤྱད་ན་འབྲེལ་ཞིང་ཆེས་འཇུག་པས་མཆོག་ཏུ་ཤིས་པ་ཡིན་ནོ། །གཞན་ཡང་ནགས་ཚལ་འཐུག་པོའམ་ཤིང་རྐང་གཅིག་དང་རྫོང་བུའམ་ཡུར་ཀ་དང་། ཞིང་ས་དང་ཁང་ཁྱིམ་སོགས་སུ་བུམ་ཆུ་འཐོར་བས་དེར་གནས་འགྲོ་བ་ལ་ཕན་ཅིང་བཀྲ་ཤིས་པར་འགྱུར་རོ། །

ལྷག་ཏུ་ཆུ་ཀླུང་ཆེན་པོར་བླུགས་ན་སེམས་ཅན་མང་པོར་སྨན་ཅིང་དེ་ཡང་ཡི་དྭགས་ཆུ་སྦྱིན་གྱི་ཆུ་ལ་བསྲེས་ནས་བཏང་བས་ཆུ་སྦྱིན་ཕལ་ལས་ཕན་ཡོན་འབུམ་འགྱུར་དུ་ཆེ་བ་ཡི་གོང་མ་རྣམས་དམིགས་བསལ་སྐབས་སུ་བབ་ཚེ་གཙོ་བོར་སྤྱོད་ལ་འདི་ནི་རྟག་ཏུ་ལག་ལེན་དུ་བཏབ་པར་བྱ་སྟེ། དེས་ནི་ཆུ་དེ་མྱོངས་པའི་ཡི་དྭགས་རྣམས་ལས་ཟད་དེ་དག་པའི་གནས་སུ་སྐྱེ་བ་དང་སངས་རྒྱས་ཐམས་ཅད་དགྱེས་པར་འགྱུར་བ་ཡི་བྱེད་པ་པོ་རྣམས་ནད་མེད་པ་འབྱོར་པ་རྒྱས་པ་འཆི་བ་བསླུས་ཏེ་ཚེ་རིང་པོར་གནས་ཤིང་ནམ་ཞིག་དུས་ཀྱི་འཆི་བའི་ཚེ་བཟང་པོའི་གནས་སུ་འཇུག་ཅིང་སྨོན་ལམ་གྱིས་མཚམས་སྦྱར་ན་བདེ་བ་ཅན་དུ་ངེས་པར་སྐྱེ་བ་སོགས་ཕན་ཡོན་ཚད་མེད་པ་ཡོད་དོ། །ཁྱད་པར་མིའམ་བྱོལ་སོང་སོགས་གང་ཡང་རུང་བ་དུས་མཐར་གྱུར་པའི་ཕུང་པོ་གོང་བུར་གནས་པའམ། དུར་ཁྲོད་དུ་རུས་པའམ་སྐྲ་དང་དྲི་མ་སོགས་ལ་གཟུངས་སྔགས་བཟླས་ཤིང་བུམ་ཆུའི་འཐོར་བས་ངན་འགྲོའི་འཇིགས་པ་ལས་ངེས་པར་སྐྱབས་པ་དང་། ཚེ་དང་ལྡན་པ་ནད་གདོན་གྱིས་ཟིན་པ་ལ་ཡང་གཟུངས་ཆུས་བཀྲུ་བྱབ་བསྲུང་བ་དང་། བུམ་ཆུ་རིང་དུ་བརྟེན་པས་དུཿཁ་ལས་གྲོལ་བར་ངེས་སོ། །མདོར་ན་གཟུངས་བསྒྲུབ་ཀྱི་ཆུ་ལ་གཟུངས་སྔགས་ཀྱི་ཕན་ཡོན་ཇི་སྙེད་བཤད་པ་ཡི་ནུས་པ་ཆ་མཐུན་ཡོད་པས་དེས་ན་རང་གཞན་གྱི་འཇམས་དེས་གཙང་མའི་སྒོ་ནས་ཁྲུས་བྱ་བ་དང་ཁོང་དུ་བཏུང་བ་སོགས་ཉེ་བར་སྤྱོད་པས་སྡོམ་པ་གསུམ་གྱི་ཕམ་ལྟུང་དང་མཚམས་མེད་པའི་ལས་ལ་སྤྱད་པ་སོགས་ཚེ་རབས་བརྒྱ་སྟོང་དུ་མར་བསགས་པའི་སྡིག་པ་རྣམས་ངེས་པར་དག་པ་དང་ཡང་བ་དང་། ཆེས་སྲབ་པར་འགྱུར་བས་འགྲོ་བའི་དོན་ལ་ཅི་ནུས་སུ་སྤྱོད་པར་བྱའོ། །

དེ་ཡང་བསྙུང་གནས་ཀྱི་ཆོ་ག་དཔལ་མོ་ལུགས་བཅུ་གཅིག་ཞལ་གྱི་སྒྲུབས་ཐབས་བོད་དུ་མཛད་པ་རྒྱལ་སྲས་ཐོགས་མེད་ཀྱ་ཡི་གེ་གཙོ་བོར་སྣང་ལ། དེ་རྗེས་སྔ་ཕྱིར་གྲུབ་མཐའ་ཐ་དད་ཀྱི་དགེ་བའི་བཤེས་གཉེན་དུ་མས་བརྩམས་པ་ཤིན་ཏུ་མང་མོད། རྒྱལ་སྲས་ཐོགས་མེད་སོགས་དམ་པ་སྔ་མ་རྣམས་ཀྱི་བུམ་ཆུའི་ཁྲུས་བྱེད་པ་ཙམ་ལས། གཞན་མ་བསྟན་པ་ནི་དེ་སྐབས་རིགས་མཐུན་གྱི་རྒྱུད་ཤེས་པ་མང་ཞིང་ལག་ལེན་མཐོང་རྒྱུད་ཀྱི་རྟོགས་སླ་བ་ལ་དགོངས་ཏེ་ལྷོད་ཡོངས་སུ་བཞག་པར་སྣང་བས། འདིར་ཡང་བརྗོད་བྱ་ཚིག་ཚོགས་མང་པོས་ཡི་གེ་གཞན་བསླད་ཀྱི་དོགས་སྙིང་ནས་བྲི་དཀའ་བ་བྱུང་རུང་ཕྱི་མ་ད་ལྟའི་དུས་སུ་བསྙུང་གནས་མཁན་རྣམས་ཀྱི་གཟུངས་བསྒྲུབ་ཀྱི་ཆུའི་འགྲོ་དོན་བྱེད་ཚུལ་ཡིད་རྟོག་ཙམ་ཡང་མི་བྱེད་པ་མང་བས་དེས་ན་གཞན་ལ་ཕན་པའི་ལྷག་བསམ་ཁོ་ནས་རྒྱུད་དོན་བླ་མའི་མན་ངག་རིག་པས་ཁོ་བོས་ཕྱོགས་ཆ་ཙམ་ཞིང་སྣང་བར་བྱས་པ་སྟེ་ཕྱིན་ཆད་གསལ་བར་གྱུར་པ་ཀུན་ཡི་གེ་འདིའི་མཐུ་རུ་ལྟ་བར་བྱོས་ཤིག དེ་ལྟར་གསོ་སྦྱོངས་བསྙུང་བར་གནས་པའི་ཆོ་ག་འདི་ལ་ནི་སྦྱོར་དངོས་རྗེས་གསུམ་ཚང་བར་བྱ་དགོས་ཏེ། དེས་ནི་ས་ག་ཟླ་བའི་དུས་ཆེན་ལྟ་བུ་ལ་མཚོན་ན། ཚེས་བཅུ་གཅིག་ལ་སྦྱོར་བ་བཅོ་ལྔ་ལ་དངོས་གཞི། བཅུ་དྲུག་གི་སྔ་ཆར་རྗེས་ཆོག་སྟེ། དང་པོ་སྦྱོར་བའི་ཉིན་ཉི་མ་མ་ཤར་གོང་དུ་ཁྲུས་དང་སྡོམ་པ་བླང་ཟིན་པར་བྱས་ནས་ཆོ་ག་ལ་འཇུག ཉིན་ཕྱེད་མ་ཡོལ་ཡན་ལ་ཁ་ཟས་བླང་བྱ་འབྲས་གྲོ་ནས་གསུམ་གང་ཡང་རུང་བའི་བཤོས་དང་།

དཀར་མངར་ཡང་རུང་སྟེ་ཕུད་འཕགས་པ་ལ་མཆོད་ཅིང་འཕྲོག་མ་མ་བུ་ལ་ཡང་བྱིན་ནས་རན་པར་གདན་གཅིག་ཏུ་སྤྱོད། ཁ་ཟས་མི་འོས་པ་ནི་ཤ་ཁྲག་སྒོག་ཙོང་གི་རིགས་དང་ལ་ཕུག་སྲན་མ་ཏིལ་རྣམས་སྤངས། སྐོམ་ཡང་བག་མེད་མ་ཡིན་པར་རུང་མཐུན་དུ་སྤྱད། དངོས་གཞིའི་ཉིན་ཐོ་རངས་སམ་ནམ་ལངས་ནས་ཁྲུས་དང་གསོ་སྦྱོངས་བླངས་ནས་ལུས་བསྙུང་བར་གནས་པས་ཟས་སྐོམ་འབྲུ་གཅིག་གམ་ཆུ་ཐིགས་ཙམ་ཡང་ངེས་པར་སྤངས་དགོས་ལ། མཆིལ་མ་ཡང་མི་མིད་པར་བླ་མ་གོང་མ་འགའ་ཞིག་གིས་གསུང་བ་ནུས་ན་དེ་ཡང་ཤིན་ཏུ་བཟང་། ངག་སྨྲ་བ་བཅད་དེ་ཆོ་ག་ཡང་ཡིད་ཀྱི་དང་གཟུངས་བཟླས་ཡང་ཡིད་ཀྱིས་བྱེད་པར་བླ་མ་བྱང་ཆུབ་སེམས་དཔའ་ཡབ་སྲས་རྣམས་ཀྱིས་བཞེད། དེ་ཡང་དོན་ཞགས་ཕྱིན་དྲུག་གི་ཚུལ་ཁྲིམས་དག་པའི་གཟུངས་བསྟན་པའི་མཐར་གཟུངས་འདི་བསྙུང་བར་བྱས་ཏེ་གསོ་སྦྱོངས་ཡན་ལག་བརྒྱད་པ་བཟུང་ནས་མི་སྨྲ་བར་ལན་ཉི་ཤུ་རྩ་གཅིག་དྲན་པར་བྱའོ་ཞེས་གསུངས་པའི་དོན་དང་། རྒྱུད་སྡེ་སྤྱིར་འཇུག་པས་ལེགས་ཀྱང་ཤེར་བརྩོན་དམན་པས་ཡིད་བཟླས་སྐབས་གཟུངས་ལྷག་ཆད་དུ་གྱུར་ན་མི་རུང་བས་ལྷག་ཆད་སྤངས་ཏེ་སྐད་ཤུབ་བུས་དག་པར་བཟླས་ན་ལེགས་པར་སེམས་སོ། །དེ་ཡང་རྒྱུད་ཆུང་འགྱུར་དག་པར། ཚིག་གཞན་མི་བརྗོད་པར་བཟླས་ཞེས་གསུངས་པ་དང་། ཚུལ་ཁྲིམས་ཀྱི་གཟུངས་གོང་གི་ཚིག་གི་འཕྲོས་སུ། དེ་ནས་དོན་ཡོད་ཞགས་པའི་སྙིང་པོ་བཟླས་བརྗོད་བྱའོ་ཞེས་འབྱུང་བས་ཀྱང་སྤྱི་དང་མཐུན་ཅིང་མི་འགལ་བ་ཡིན་ནོ། །གང་ལྟར་སྡོམ་པ་ཐམས་ཅད་ཀྱི་རྩ་བ་སེམས་ཡིན་པས་བླ་མ་དང་སངས་རྒྱས་ལ་མཆོག་ཏུ་གུས་ཤིང་སེམས་ཅན་ལ་བྱམས་སྙིང་རྗེ་དང་ལྡན་པར་བྱས་ཤིང་ལྷའི་སྣང་བ་དང་གཟུངས་སྔགས་ཀྱི་སྒྲ་ལ་སེམས་མ་ཡེངས་པར་བཞག་པ་རྣམས་ཤིན་ཏུ་གལ་ཆེ་བ་ཉིད་དོ། །ཉིན་ཕྱི་མ་གཏང་རག་གི་གསོ་སྦྱོངས་ཀྱི་སྡོམ་པ་བླངས་བ་བཞག་སྟེ་ཆོ་ག་གཞན་ཚར་གཅིག་བཏང་ནས་སྤྱོད་ལམ་ལ་འཇུག་པར་བྱ་སྟེ། ཁྱིམ་པ་ཡིན་ཡང་ཉི་མ་དེར་འཇམས་དེས་གཙང་མའི་སྤྱོད་པ་ལ་གནས་པར་བྱའོ། །

དེ་ལྟར་བསྙུང་བར་གནས་པའི་ཆོ་ག་དེ་ཉིད་བཅུ་དྲུག་གི་སྒོ་ནས་སྦྱོར་དངོས་རྗེས་ཚང་ལན་བདུན་བར་མ་ཆད་པར་བླང་བས་བསྒྲུབ་པའི་བསྙེན་པར་གྱུར་ཏེ་གཟུངས་ཀྱི་ལས་ཚོགས་རྣམས་བསྒྲུབ་པ་ལ་དབང་བ་དོན་ཞགས་མཆིམས་འགྲེལ་དུ་བཤད་ཅིང་གཞན་ལ་བསྙུང་གནས་ཀྱི་སྡོམ་པ་འབོག་པར་ཡང་སྔོན་དུ་བསྙེན་པ་དེ་ལྟར་ཐེམ་དགོས་ཞེས་བླ་མ་གོང་མ་རྣམས་ཀྱིས་གསུང་གི་རྒྱུན་ལས་སོ། །ཐུགས་རྗེ་ཆེན་པོའི་བསྒྲུབ་པ་གསོ་སྦྱོངས་དང་འབྲེལ་བ་འདིའི་ཕན་ཡོན་ནི་བསམ་གྱིས་མི་ཁྱབ་པ་སྔགས་ཕྱི་རྒྱུད་སྤྱི་དང་བྱེ་བྲག་པ་ལས་རྟོགས་པར་བྱའོ། །དེ་ལྟར་འཕགས་པ་སྤྱན་རས་གཟིགས་དབང་ཞེས། །མཚན་ཙམ་ལན་ཅིག་ཐོས་པ་ཁོ་ནས་ཀྱང་། །ཕྱིར་མི་ལྡོག་པའི་ས་ལ་ཉེར་འགོད་པར། །རྒྱལ་བ་སྲས་བཅས་ཀུན་གྱི་མགྲིན་གཅིག་བསྔགས། །དེས་ན་འདི་ཡི་སྒྲུབ་ཐབས་གཟུངས་སྔགས་དང་། །འཕྲད་པའི་དལ་འབྱོར་རིན་ཆེན་རྙེད་དཀའ་འདི། །ཐོབ་དུས་དེ་ཡི་སྙིང་པོ་ལེན་པའི་ཕྱིར། །ཚུལ་འདིར་སྒོ་གསུམ་འབད་པས་ཅིས་མི་བསྙེན། །སྲིད་ཞི་ལས་འདས་བྱང་ཆུབ་སྙིང་པོ་དངོས། །འདིས་འགྲུབ་རྒྱལ་བས་ཡང་ནས་ཡང་བསྔགས་ན། །ཞི་འབྲས་ཙམ་དང་གནས་སྐབས་མཐོ་རིས་ཀྱི། །མངོན་མཐོའི་དབང་ཕྱུག་འགྲུབ་པར་སྨོས་ཅི་འཚལ། །དེས་ན་ཚེགས་ཆུང་དོན་ཆེ་དོན་བཟང་པོ། །འདུལ་མདོ་སྔགས་བཅས་ཐུན་མོང་ངོ་མཚར་ཆོས། །དེ་ལ་གུས་པས་བདག་གིས་འབད་སྨྲས་པའི། །དགེ་བས་འགྲོ་ཀུན་སྤྱན་རས་གཟིགས་ཐོབ་ཤོག །

ཅེས་འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྒྲུབ་ཐུབས་གསོ་སྦྱོང་དང་འབྲེལ་བ་འདི་ནི་རིང་མོ་ཉིད་ནས་ངུར་སྨྲིག་འཛིན་པ་དགེ་བའི་བཤེས་གྱུར་དུ་མས་ཡང་ཡང་བསྐུལ་ཞིང་། ཁྱིམ་སྤྱོད་བྱང་ཆུབ་སེམས་དཔའི་རིགས་ཅན་མང་པོས་ཀྱང་སྔར་ཕྱིར་ཡང་ནས་ཡང་དུ་གསོལ་བ་བཏབ་པའི་ངོར་བླ་མ་གོང་མ་རྣམས་ཀྱི་གསུང་རྒྱུན་ཕྱག་ལེན་གསལ་བར་བོད་ཡུལ་གྱི་ལྗོངས་ཝཾ་ལེ་བདེ་ཆེན་གྱི་གཙུག་ལག་ཁང་གི་རྟེན་གཙོ་ལྷ་བཙུན་ན་ག་ར་ཛའི་ཐུགས་དམ་འཕགས་པ་སྤྱན་རས་གཟིགས་དབང་ཕྱུག་བཅུ་གཅིག་ཞལ་གྱི་སྐུ་བརྙན་དཔལ་ཇོ་བོ་རྗེས་རབ་ཏུ་གནས་པའི་ལེགས་པར་མཛད་པའི་དྲུང་དུ་དཔལ་རིག་པ་འཛིན་པ་རྒྱལ་ཁམས་པ་ཚེ་དབང་ནོར་བུ་འཇིག་རྟེན་དབང་ཕྱུག་ཐུགས་རྗེའི་ཆུ་རྒྱུན་ཆད་པ་མེད་པའི་དཔལ་གྱིས་རབ་བྱུང་བཅུ་གསུམ་པའི་དཔལ་གདོང་ཆུ་བྱ་དཔྱིད་ར་དབོ་ཟླའི་ཚེས་བཅོ་ལྔར་དབུ་བརྩམས་སྟེ་དམར་ཕྱོགས་ཀྱི་ཚེས་བཅུའི་སྔ་ཐུན་དང་པོར་གྲུབ་པར་སྦྱར་བའི་ཡི་གེ་པ་དགེ་སློང་ཤེས་རབ་བསྟན་འཛིན་ནོ། །དགེའོ། །དགེའོ། །