སྤྱན་རས་གཟིགས་དབང་སེང་གེ་སྒྲའི་སྒྲུབ་ཐབས་རྒྱུན་ཁྱེར།
༄༅། །སྤྱན་རས་གཟིགས་དབང་སེང་གེ་སྒྲའི་སྒྲུབ་ཐབས་རྒྱུན་ཁྱེར་བཞུགས་སོ། །
༈ ཨོཾ་སྭཱསྟི། རྒྱལ་བ་ཀུན་གྱི་སྙིང་རྗེའི་རང་གཟུགས་ནི། །སྤྱན་རས་གཟིགས་ཞེས་མཚན་ཙམ་ཐོས་པས་ཀྱང་། །དུཿཁ་ཀུན་སེལ་སེང་གེ་སྒྲར་བཏུད་ནས། །དེ་ཡི་སྒྲུབ་ཐུབས་རྒྱུན་ཁྱེར་འདིར་བཤད་བྱ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་མྱུར་འགྲུབ་ཤོག །ཨོཾ་སྭཱ་བྷཱ་ཝ་ཤུདྷོ་སརྦ་དྷརྨ་སྭ་བྷ་ཝ་ཤུདྡྷོ྅ཧཾ། སྟོང་པའི་ངང་ལས་པད་ཟླའི་དཀྱིལ་འཁོར་ལ། །གསེར་གྱི་དྲ་བས་གཡོགས་པའི་སེང་གེའི་སྟེང་། །རང་རིག་ཧྲཱིཿལས་འཕགས་པ་སེང་གེ་སྒྲ། །དཀར་པོ་ཞི་འཛུམ་སེམས་པའི་སྐྱིལ་ཀྲུང་ཅན། །ཚངས་སྐུད་རི་དྭགས་པགས་པས་ཕྲག་གཡོན་བཀབས། །འོད་དཔག་མེད་པ་གཙོ་བོར་གྱུར་པ་ཡིས། །རིགས་ལྔས་དབུ་བརྒྱན་རལ་པ་ཐོར་ཅོག་ཅན། །ཕྱག་གཡས་མཆོག་སྦྱིན་གཡོན་པ་གདན་ལ་བསྟེན། །གཡོན་གྱི་སྙན་ཐད་པད་དཀར་རལ་གྲིའི་མཚན། །གཡས་སུ་ཏྲི་ཤུལ་རྒྱལ་རིགས་སྦྲུལ་དཀར་དཀྲིས། །གཡོན་དུ་པདྨར་ཐོད་པ་མེ་ཏོག་བཀང་། །བདག་ཉིད་འཕགས་པའི་གནས་གསུམ་ཨོཾ་ཨཱཿཧཱུྃ། །འོད་འཕྲོས་རང་འདྲའི་ཡེ་ཤེས་སེམས་དཔའ་བཀུགས། །དམ་ཡེ་དབྱེར་མེད་རང་དང་གཅིག་ཏུ་གྱུར། །སྙིང་ཀར་ཟླ་སྟེང་ཧྲཱིཿཡིག་དཀར་པོའི་མཐར། །སྔགས་འཕྲེང་འཁོར་བས་འགྲོ་བའི་སྡིག་སྒྲིབ་སྦྱངས། །རྒྱལ་བ་རྣམས་ཀྱི་ཐུགས་རྗེ་གཅིག་ཏུ་བསྡུས། །བདག་གཞན་འཕགས་པའི་ས་ལ་འཁོད་པར་བསམ། །ཨོཾ་ཨཱཿཧྲཱིཿསིངྷ་ནཱ་ད་ཧཱུྃ་ཕཊ།ཞེས་ཅི་ནུས་བཟླས། །ཐུན་མཚམས་སུ་ལྷ་སྐུ་མི་དམིགས་པར་བཞག་ཅིང་དགེ་བ་རྫོགས་བྱང་དུ་བསྔོ། སྤྱན་རས་གཟིགས་དབང་སེང་གེ་སྒྲའི་སྒྲུབ་ཐབས། །བྱིན་རླབས་རྒྱུན་ལྡན་ཚིག་ཉུང་དོན་གསལ་བ། །བརྗོད་འདི་དགེ་བས་འགྲོ་ཀུན་སྡུག་བསྔལ་ལས། །ཡོངས་གྲོལ་འཕགས་མཆོག་གོ་འཕང་མྱུར་ཐོབ་ཤོག །
ཞེས་པ་ཡང་དོན་དུ་གཉེར་བ་རྣམས་ཀྱི་ངོར། རིག་པ་འཛིན་པ་ཚེ་དབང་ནོར་བུས་བལ་ཡུལ་ཀཱ་ཎའི་ངོགས་མཆོད་རྟེན་ལྔ་བསྒྲིགས་སུ་ཆུ་སྤྲེལ་ནག་ཟླའི་དམར་ཕྱོགས་ཀྱི་དགའ་བ་གསུམ་པ་ལ་བཀོད་པའོ། །སརྦ་མངྒ་ལཾ།