བཅོམ་ལྡན་འདས་འཕགས་མཆོག་འཇིག་རྟེན་མགོན་པོའི་སྒྲུབ་ཐབས་སྙིང་པོ་བྱང་ཆུབ་མཆོག་གི་གྲུ་འཛིན།
༄༅། །བཅོམ་ལྡན་འདས་འཕགས་མཆོག་འཇིག་རྟེན་མགོན་པོའི་སྒྲུབ་ཐབས་སྙིང་པོ་བྱང་ཆུབ་མཆོག་གི་གྲུ་འཛིན་ཞེས་བྱ་བ་བཞུགས་སོ། །
༈ ན་མོ་ལོ་ཀ་ནཱ་ཐཱ་ཡ། རྒྱལ་བ་ཀུན་གྱི་སྙིང་རྗེའི་རང་གཟུགས། །མཚན་ཙམ་འཛིན་པས་ཕྱིར་མི་ལྡོག་འགོད། །སྤྱན་རས་གཟིགས་དབང་སངས་རྒྱས་ཀུན་གཙོ། །དེ་ལ་སྙིང་ནས་རྟག་པར་ཕྱག་བྱས། །དེ་བསྒྲུབ་སྔོན་རྗེས་སེམས་བསྐྱེད་དང་། །སྙིང་རྗེས་ཆུ་སྦྱིན་བཅས་ཁྱེར་བདེ། །རང་གཞན་ཐར་མཆོག་འགྲུབ་པའི་ཕྱིར། །བཀོད་ལ་ཡིད་འོང་ཀུན་འཇུག་ཤོག །དེ་ཡང་ཐུན་རྣམས་ཀྱི་དང་པོ་དང་འབྲེལ་བར་གདེང་དང་ཁ་ལག་བཀྲུས། དང་པོ་སེམས་བསྐྱེད་བླང་བ་ནི། ཕྱག་སོགས་ཡན་ལག་བདུན་པ་རྒྱས་བསྡུས་ཅི་རིགས་སྔོན་དུ་འགྲོ་ཞིང་། སེམས་ཅན་ཐམས་ཅད་ལ་བྱམས་སྙིང་རྗེས་ཁྱབ་པར་བྱས་ནས། སངས་རྒྱས་ལ་སྙིང་ཐག་པ་ནས་མོས་གུས་དང་ཐོབ་འདོད་ཀྱི་འདུན་པས་ཐལ་མོ་སྦྱར་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱིའོ། །ཞེས་ལན་གསུམ་གྱིས་སྡོམ་པ་བླང་། དེ་ལྟར་སེམས་བསྐྱེད་པ་ལ་རང་གཞན་དགའ་བ་བསྐྱེད་ཅིང་སྨོན་ལམ་གདབ་པ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་ཏོ། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །བདག་གིས་དེ་རིང་སྐྱོབས་པ་ཐམས་ཅད་ཀྱི། །སྤྱན་སྔར་འགྲོ་ལ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོང་པར་ཤོག །བྱང་ཆུབ་སེམས་དཔའ་གང་དག་སུ་བཞུགས་པས། །དེ་དག་ཀུན་གྱི་སྨོན་ལམ་འགྲུབ་གྱུར་ཅིག །ཅེས་བརྗོད་དོ། །
གཉིས་པ་དངོས་གཞི་འཇིག་རྟེན་མགོན་པོའི་བསྒོམ་བསྒྲུབ་ནི། ཨོཾ་སྭ་བྷཱ་ཨ་ཤུདྡྷ་སརྦ་དྷརྨཱ་སྭཱ་བྷཱ་ཝ་ཤུདྡྷོ྅ཧཾ། ཨོཾ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཆོས་རྣམས་སྟོང་པའི་ངང་ལས་རང་རིག་པ། །འགྲོ་ལ་སྙིང་རྗེ་རོལ་པས་ཡི་གེ་ཧྲཱིཿ །དེ་ཉིད་ཡོངས་གྱུར་བདག་ཉིད་འཇིག་རྟེན་མགོན། །ཞལ་གཅིག་ཕྱག་གཉིས་ཞབས་ཟུང་སྐྱིལ་མོ་ཀྲུང་། །པད་ཟླའི་གདན་དང་ཟླ་བའི་རྒྱབ་ཡོལ་ཅན། །ཟླ་བའི་དཀྱིལ་འཁོར་རྒྱས་འདྲའི་ཞལ་མངའ་ཞིང་། །པདྨ་དཀར་པོ་རྒྱས་འདྲའི་སྤྱན་རས་གཟིགས། །ཕྱག་ན་མཆོད་སྦྱིན་པད་དཀར་འདབ་བརྒྱ་མཛེས། །ཞི་ཚུལ་རྒྱན་རྫོགས་ཡིད་དུ་འོང་བའི་སྐུ། །སྤྱི་གཙུག་སངས་རྒྱས་འོད་དཔག་མེད་པ་བཞུགས། །གནས་གསུམ་རྡོ་རྗེ་གསུམ་གྱུར་ཨོཾ་ཨཱཿཧཱུྃ། །འོད་འཕྲོས་རྒྱལ་ཀུན་སྤྱན་དྲངས་བདག་ལ་ཐིམ། །བཛྲ་ས་མཱ་ཡ་ཛཿཛཿཧཱུྃ་བཾ་ཧོཿ ཐུགས་ཀར་པད་མ་འདབ་དྲུག་ལྟེར། །ཟླ་སྟེང་ཧྲི་མཐར་ཡིག་དྲུག་འཁོར། །ཨོཾ་མ་ཎི་པདྨེ་ཧཱུྃ། འོད་ཀྱིས་རྒྱལ་མཆོད་འགྲོ་སྒྲིབ་སྦྱངས། །ཅིར་སྣང་འཕགས་པའི་སྐུ་གསུང་ཐུགས། །ཞེས་བརྗོད། དེའི་དོན་སེམས་བཞིན་ཡིག་དྲུག་ཅི་ནུས་སུ་བཟླས། ཐུན་མཐར་ཨརྒྷཾ་སོགས་ཀྱིས་མཆོད། ཧྲཱིཿ སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱི་དབུ་ལ་བརྒྱན། །ཐུགས་རྗེ་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་བསྟོད། །ཞེས་པས་བསྟོད། ཆུ་སྦྱིན་སྐབས་འདིར་གཏོང་བ་འམ། མི་བཏང་ན་ལྷ་སྐུ་རྫོགས་རིམ་དུ་བསྡུ་བ་ནི། སྣང་སྲིད་ཞིང་ཁམས་འཕགས་ཀུན་རང་ལ་ཐིམ། །རང་ཡང་སྙིང་གའི་པད་ཟླ་ཡིག་དྲུག་ཧྲཱིཿ །རིམ་བསྡུས་ཐིག་ལེ་ཉག་གཅིག་སྟོང་པར་ཐིམ། །སླར་ཡང་ལྷ་སྐུ་སྒྱུ་མ་ལྟ་བུར་གྲུབ། །ཨོཾ་ཨཱཿཧཱུཾ་ཧྲཱིཿཨོཾ་མ་ཎི་པདྨེ་ཧཱུྃ། དེ་ནས་རྫོགས་རིམ་དངོས་ལ་མཉམ་པར་བཞག་པ་ནི། རང་རིགས་གསལ་སྟོང་ཆོས་ཉིད་འདུས་མ་བྱས། །རང་བབ་སྒོམ་མེད་ཡེངས་མེད་ངང་ལ་བཞག །དུས་གསུམ་རྣམ་རྟོག་སྤྲོ་བསྡུ་བླང་ར་བྲལ། །སྐྱེ་འགག་གནས་མིན་འདི་ནི་འཇིག་རྟེན་མགོན། །ཞེས་པའི་དོན་ཉམས་སུ་ལེན་པའོ། །གསུམ་པ་རྗེས་འབྲེལ་སྙིང་རྗེའི་རྣལ་འབྱོར་གྱིས་ཡི་དྭགས་དང་བར་དོའི་ཆུ་གཏེར་བཏགས་པ་ལ། ཡི་དྭགས་ཁ་ཟས་ཀྱི་དྲི་ཚོར་བར་མི་ནུས་པ་རྣམས་ལ། ཁ་ཟས་མ་བྱས་པའི་ནང་སྔ་བར་སེན་བར་གྱི་དྲི་མ་ཡང་དག་པར་བྱས་ཤིང་སྣོད་དྲི་མ་མེད་པར་ཆུ་ཤིན་ཏུ་གཙང་བ་བཤམས་ལ། བདག་ཉིད་འཕགས་པའི་སྐུར་གསལ་བའི་མདུན་གྱི་ནམ་མཁར་ཡང་འཕགས་པ་སྐད་ཅིག་གིས་གསལ་བའི་ཕྱག་གི་མཐིལ་ནས་བདུད་རྩིའི་རྒྱུན་གྱིས་ཡི་དྭགས་ཐམས་ཅད་ཀྱི་བཀྲེས་སྐོམ་སོགས་དུཿཁ་མཐའ་དག་སེལ་བར་བསམ་ལ། ཨོཾ་ཨཱཿཧཱུྃ་ཧྲཱི་མ་ཎི་པདྨེ་ཧཱུྃ། འཕགས་པ་སྤྱན་རས་གཟིགས་དབང་གི །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ནས། །ཁྲུས་བྱས་རྟག་ཏུ་བསིལ་བར་ཤོག །ཨོཾ་ཛ་ལ་མི་དཾ་སརྦ་པྲེ་ཏ་བྷྱཿསྭཱ་ཧཱ། ཞེས་སྔགས་ཚར་རེ་དང་ལག་གཡས་ཀྱི་ཆུ་དུམ་རེ་སྦྲེངས། གཡོན་པས་སྔགས་རེའི་མཐར་སེ་གོལ་གཅིག་ཀྱང་རེ་གདབ་ལ། ཚུལ་དེས་གྲངས་ཅི་ནུས་སུ་བསག གཞན་མ་གྲུབ་ཀྱང་ཡི་དྭགས་ཆུ་སྦྱིན་འདི་ཙམ་ཅིག་ཕན་ཡོན་ལ་བསམ་སྟེ་རབ་ཏུ་འབད་པར་བྱའོ། །
དེ་ནས་ཡི་དྭགས་གཞན་ལ་སྣོད་གཙང་མར་འབྲུ་འམ་མཆན་ནམ་ཕྱེའམ་ཁུར་བའམ་ཟན་རིལ་སོགས་གང་འབྱོར་བཤམས་ལ། ཐོག་མར་སུ་རུ་པའི་གཏོར་མ་ནི། མདུན་གྱི་ནམ་མཁར་རྫོགས་པའི་སངས་རྒྱས་གཟུགས་མཛེས་བཞུགས་པའི་བྱིན་རླབས་ཀྱིས་ཡི་དྭགས་རྣམས་བཀྲེས་སྐོམ་ཞི་ཞིང་སྡུག་བསྔལ་སེལ་བར་བསམ་ལ། ཨོཾ་ཨཱཿཧཱུྃ་གི་གཏོར་མ་འདོད་ཡོན་བདུད་རྩིའི་གཏེར་དུ་བྱིན་གྱིས་རླབས། ན་མཿསུ་རཱུ་པ་ཡ། ཏ་ཐཱ་ག་ཏ་ཡ། ཨརྷ་ཏེ། སམྱཀྶཾ་བུདྡྷ་ཡ། ཏདྱ་ཐཱ། ཨོཾ་སུ་རུ་སུ་རུ། པྲ་སུ་རུ་པྲ་སུ་རུ། ཏ་ར་ཏ་ར། བྷ་ར་བྷ་ར། སཾ་བྷ་ར་སཾ་བྷ་ར། སྨ་ར་སྨ་ར། སནྟ་ར་པ་ཡ་སནྟ་ར་པ་ཡ། སརྦ་པྲེ་ཏ་ནཾ་སྭཱ་ཧཱ། ཞེས་པ་བདུན་གྱི་མཐར་ལག་གཡོན་གྱིས་སེ་གོལ་གསུམ་བྱས་ཤིང་། ཕྱི་རུ་དེངས་ཤིང་ཀླག་ལྟ་འདོད་པ་རྣམས། །འཇིག་རྟེན་ཁམས་གནས་ཡི་དྭགས་ཐམས་ཅད་པ། །རྣམས་ལ་བདག་གི་བཟའ་བ་སྟེར་བར་བགྱི། །མཆོག་གསུམ་བདེན་པས་ཚིམ་མགུ་རྒྱས་ཐོབ་ཤོག །འདི་རྐང་པ་གསུམ་ཀླག་བདེ་ཕྱིར་ལེགས་སྦྱར་ལས་བོད་སྐད་དུ་བསྒྱུར་བ་དང་། རྐང་པ་གཅིག་ཚིགས་བཅད་ཁ་སྐོངས་སུ་སྦྱར་བ་སྟེ་གཞན་ཡང་སྨོན་ལམ་བཟང་པོ་བཏབ། འདི་ཟས་མ་ཟོས་གོང་ཁོ་ནར་བྱས་པས་ཡི་དྭགས་ཐམས་ཅད་ལ་འབྲས་བྲེ་བོ་ཆེ་རེ་རེ་བྱིན་པར་འགྱུར་ཞིང་། ཕན་ཡོན་ཚེ་རིང་བ་དང་ལོངས་སྤྱོད་འཕེལ་བ་དང་། ཕྱི་མ་བདེ་བ་ཅན་དུ་སྐྱེ་བ་སོགས་མང་དུ་གསུངས་སོ། །དེ་ནས་ཁ་འབར་མའི་གཏོར་མ་བཏང་བ་ནི། རྫས་དང་བྱིན་རླབས་གོང་ལྟར་ལ། ལག་གཡས་ཀྱི་གཏོར་མའི་སྣོད་ལ་རེག་ནས། གཟི་བརྗིད་ཚད་མེད་དབང་གྱུར་འོད་ཟེར་རྣམ་པར་རྒྱལ་བའི་ཤུགས་ཀྱི་གཟུངས་འདི་བཀླགས་ཏེ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། ཞེས་ལན་བདུན་གྱི་མཐར་སེ་གོལ་གདབ། དེ་རྗེས་དེ་བཞིན་གཤེགས་པ་བཞིའི་མཚན་བརྗོད་དེ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འཇམ་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཞེས་བརྗོད་མཐར་གཏོར་མའི་རྫས་གཙང་སར་དོར་ཏེ་ཚར་མང་དུ་བཏང་ན་སྣོད་དུ་ཆུ་དང་རྫས་ཡང་ཡང་བཤམས་ཏེ་སྔགས་དང་དེ་བཞིན་གཤེགས་པའི་མཚན་གོང་བཞིན་བྱས་ཏེ་གྲངས་ཚད་ཅི་ནུས་སུ་བསགས་པའོ། །འདི་ནི་སྔ་དྲོ་འམ་དུས་ནམ་དུ་ཡང་རུང་སྟེ། ཕན་ཡོན་ནི། ཕྱོགས་ནས་ལྷག་པའི་ཡི་དྭགས་གངྒཱའི་ཀླུང་གི་བྱེ་མ་ཕྲག་ཕྲུག་བརྒྱ་སྟོང་སྙེད་སོ་སོ་ནས་ཁ་ཟས་ཡུལ་མ་ག་དྷའི་བྲེ་བདུན་བདུན་ཐོབ་པས་ཚིམ་ཞིང་། ཡི་དྭགས་ནས་མཐོ་རིས་སུ་སྐྱེ་བར་འགྱུར་ལ། གཏོར་མ་བཏང་བ་པོ་ཡང་ཚེ་རིང་བསོད་ནམས་འཕེལ། སྦྱིན་པའི་ཕ་རོལ་ཏུ་ཕྱིན་པ་མྱུར་དུ་རྫོགས། མི་དང་མི་མ་ཡིན་པས་འཚེ་མི་ནུས་ཤིང་སངས་རྒྱས་བྱེ་བ་ཕྲག་ཕྲུག་བརྒྱ་སྟོང་སྙེད་མཉེས་པར་བྱེད་པའི་མཆོག་འགྱུར་བ་སོགས་མང་དུ་གསུངས་སོ། །དེ་ལྟར་ཡི་དྭགས་ཆུ་སྦྱིན་མཚན་གསུམ་སྟེ་གྲུབ་ན་གསུམ་ཀ་དང་། མ་གྲུབ་ན་རེ་རེ་ཅིས་ནས་ཀྱང་མ་ཆད་པ་གལ་ཆེ་བར་བྱའོ། །དེ་ནས་བར་དོའི་གཏོར་མ་བཏང་ན། རྫས་ཁ་འབར་མའི་སྐབས་ལྟར་བཤམས་ལ། མདུན་གྱི་མཁའ་ལ་རྫོགས་པའི་སངས་རྒྱས་མི་འཁྲུགས་པ་གསལ་ཞིང་། དེའི་བྱིན་རླབས་ཀྱི་བར་དོའི་སེམས་ཅན་རྣམས་ཟས་སྐོམ་གྱིས་ཚིམ་ཞིང་སྒྲིབ་པ་དག་པར་བསམ་ལ། སྔགས་ཁ་འབར་མ་ལྟར་གོང་བཞིན་ལམ་བདུན་དང་། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་རི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲ་ས་ནི་ཏྲ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རམྤ་ར་ཎི་མེ་ས་ཏྭ་ནཉྩ་སྭ་ཧཱ། ཅི་ནས་བཟླས་མཐར། བདག་གིས་བཤམས་པའི་རྫས་འདི་སྔགས་དང་ཕྱག་རྒྱའི་བྱིན་རླབས་མཐུས། བར་དོའི་སེམས་ཅན་ཀུན་སྡུག་བསྔལ་ཡོངས་བྲལ་བདེ་དང་ལྡན། བར་དོ་ངོ་ཤེས་ལྷ་དང་བླ་མ་རྗེས་དྲན་དེ་ཡི་བྱིན་གྱིས་བརླབས། རང་བཞིན་འོད་གསལ་ངོས་ཟིན་བར་དོར་ཟུང་འཇུག་སྐུ་ཐོབ་ཤོག ཅེས་སྨོན་ལམ་བཏབ། བར་དོའི་འགྲོ་བ་ཆུ་སྦྱིན་ཡང་ཐད་རུང་གཙོ་བོ་དྲི་ཟ་བ་ཤས་ཆེ་བས་གོང་གི་ཆོ་གའི་རྫས་ཕྱེ་མར་གྱི་གསུར་བཏང་ན་ལེགས་པ་ཁོ་བོའི་རྣམ་རྟོག་གོ །དེ་ལྟར་ཆུ་སྦྱིན་ཚང་བར་བཏང་ན་སྤྱི་དང་། རེ་རེ་ལས་མི་བཏང་ན་དེ་ཡི་མཐར་ཆོས་སྦྱིན་བྱ་སྟེ། དེ་ཡང་། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོངས་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་ན། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཐམས་ཅད་བསྲུང་བའི་དགེ་སྦྱོངས་དག །སྡུག་བསྔལ་ཀུན་ལས་ངེས་གྲོལ་ལོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལ་ཀུན་བྱུང་བ། །ངོ་བོ་མེད་ཅིང་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབས་པའི་སྲས་སུ་སྐྱེ། །ཞེས་སོ། །གཞན་ཡང་ཆད་དུ་གཏོར་མ་བཏང་ཕྱིར་རམ། རྒྱུན་ཆགས་སྤྱོད་ལམ་གྱི་སྐབས་སུ་ཡང་སྟེ། འབབ་ཆུའམ། གདེངས་ཀ རྫིངས་བུ། ལུ་མ་ལྟ་བུ་དང་ཕྲད་པ་ན་དེར་འདུག་ལ། བདག་མདུན་འཕགས་པ་ཕྱག་ནས་བདུད་རྩི་བབ་པ་གོང་བཞིན་གསལ་བཏབ་སྟེ། གཙང་སྦྲ་བྱས་པའི་ལག་གཡས་ཀྱི་འཁྱོར་བ་ཆུས་བཀང་ནས་ཡེ་ཤེས་སྐར་མདའི་སྔགས་བཀླགས་ཤིང་ཁྱོར་ཆུ་དེ་ཆུར་དོར་བ་ལན་བདུན་བྱའོ། །དེ་ཡི་ཕན་ཡོན་སངས་རྒྱས་ཀྱི་གཟིགས་པའི་ཡི་དྭགས་མ་ལུས་པ་རེ་རེ་ཡི་ལྷ་ཡི་བཟའ་བཏུང་མ་དྷ་ཡི་བྲེ་བདུན་བདུན་ཐོབ་པ་དང་། ཆུ་དེ་འཐུང་བའི་འགྲོ་བ་ཀུན་ཀྱང་བདེ་འགྲོ་ཐོབ་པ་སོགས་མང་དུ་གསུངས་པས་ཅི་ནུས་སུ་འབད་པར་བྱ་ལ། སྐབས་འདིར་གོང་གི་ཆུ་སྦྱིན་གྲུབ་མཚམས་གཏོར་ཆུ་བསགས་པའི་སྣོད་དུ་ཡེ་ཤེས་སྐར་མདའི་སྔགས་ཚར་རེ་དང་། ཆུ་སྙིམ་པ་རེ་བྱས་ལ་ལན་བདུན་བླུགས་ཏེ། དེ་ཕྱི་རོལ་འབབ་ཆུ་སོགས་སུ་དོར་ན་གོང་དུ་བཤད་པའི་ཕན་ཡོན་ཐོབ་ཕྱིར་ལག་ལེན་དུ་བཏབ་པར་བྱའོ། །ཡེ་ཤེས་སྐར་མདའི་སྔགས་ནི། ཨོཾ་ཉྫཱ་ན་ཨ་ཝ་ལོ་ཀི་ཏེ་ན་མཿས་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི། དུ་རུ་དུ་རུ། ཧྲི་ད་ཡ་ཛ་ལ་ནི་ཧཱུྃ། ཞེས་སོ། །དེ་ལྟར་སྦྱིན་པའི་བྱ་བ་གང་བྱས་ཀྱང་མཐར་སྦྱིན་པ་རྣམ་པར་དག་པའི་གཟུངས་བཀླགས་པར་བྱ་ལ། དེ་ནི་འདི་ལྟ་སྟེ། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཨོཾ་ཨ་མོ་གྷ་པཱ་ཤ །མ་ཧཱ་དཱ ན་པཱ་ར་མི་ཏཾ། པ་རི་པཱུ་ར་ཡ་ཧཱུྃ། ད་ར་ད་ར། བི་བི་ད་ར་བི་ཙི་ཏྲེཿ སརྦ་ས་ཏྭ་ཨུ་པ་བྷོ་ག །སརྦ་ཏ་ཐཱ་ག་ཏ་མ་ཧཱ་དཱ་ན་པཱུ་ཛ་མེ་གྷ། པྲ་བར་ཏ་ཡ། ཏ་ར་ཏ་ར། ཏཱ་ར་ཡ། ཏཱ་ར་ཡ། མ་ཧཱ་པདྨ་ནི་ཧཱུྃ་ཕཊ། འདི་ནི་སྦྱིན་པའི་ཕ་རོལ་དུ་ཕྱིན་པའི་དོན་ཡོད་ཞགས་པ་ཆེན་པོའི་སྙིང་པོ་སྟེ། གང་གིས་ཡུངས་འབྲུ་ཙམ་ཡང་སྦྱིན་པ་བྱིན་ཏེ། དྲན་པ་ཙམ་གྱི་ལན་བདུན་བཟླས་བརྗོད་བྱས་ན་མཆོད་སྦྱིན་སྦྱིན་པ་རྣམ་པར་འཕྲུལ་པ་ཆེན་པོར་ནི་ཤིན་ཏུ་རྒྱས་པ་ཆེན་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཞེས་དོན་ཞགས་ཕྱིན་དྲུག་གིས་བཟུང་ནས་ཏེ། སྦྱིན་པའི་དགེ་བ་ཉམས་པ་མེད་པ་སྤེལ་ཕྱིར་བཀླགས་པ་ཤིན་ཏུ་ལེགས་པའོ། །དེ་ནས་ཨོཾ་ཨཱཿཧཱུྃ་ཧྲཱིཿཞེས་པས་བདུན་གྱིས་བཅོམ་ལྡན་འདས་རང་གི་དཔྲལ་བར་ཐིཾ་སརྦ་གཙྪཿཞེས་སེ་གོལ་གཏོགས་ནས་གཏོར་མགྲོན་གཤེགས། ཡི་གེ་བརྒྱ་པ་ལན་ཁ་ཡར་གྱི་ནོངས་པ་བཤགས། བསོད་ནམས་འདི་ཡི་ཐམས་ཅད་གཟིགས་པ་སོགས་ཀྱིས་དགེ་བ་བསྔོ། སྨོན་ལམ་བཏབ། བཀྲ་ཤིས་བརྗོད། དེ་ནས་སྤྱོད་ལམ་ཀུན་འཕགས་པའི་ཁྱེར་སོ་དང་མི་བྲལ་བར་བྱའོ། །གྲགས་ཆེ་རྐང་ཚུགས་ཆོ་ག་གསུམ། །གཅིག་ཏུ་བསྡུ་ཚུལ་སྔོན་མེད་འདི། །འཇིག་རྟེན་མགོན་པོའི་བྱིན་རླབས་མཐུས། །གྲུབ་ལས་གཞན་གྱིས་ནམ་ཡང་མིན། །དེ་ལྟར་གཞན་ཕན་བསམ་པ་ཁོ་ནས། །བདག་གིས་ཡང་ནི་འབད་བགྱིས་དགེ་དེས། །མཁའ་མཉམ་སེམས་ཅན་མ་ལུས་པ་ཀུན། །འཇིག་རྟེན་མགོན་པོ་མྱུར་འགྲུབ་རྒྱུ་གྱུར་ཤོག །
ཞེས་པའང་མངའ་རི་མུ་ཁུན་ཀྵེ་ཏྲའི་རྗེ་འབངས་རྣམས་དང་། གཙང་དབུས་རུ་བཞིའི་ཆར་རང་སློབ་སྦྱིན་བདག་ནང་རྗེ་རྣམ་པར་དཀར་བའི་བློ་ལྡན་དུ་མས་ཀྱང་བསྐུལ་བ་དང་། ཉེ་བར་ཞ་ལུ་བ་དགེ་སློང་རྡོ་རྗེ་འཛིན་པ་རིན་ཆེན་འཇམ་དཔལ་དོན་འགྲུབ་ཀྱིས་ནན་ཏན་བཅས་ཤིང་། ལྷག་ཏུ་འཇིག་རྟེན་མགོན་པོའི་ཐུགས་རྗེའི་རོལ་གར་འགྲོ་བའི་དེད་དཔོན་རྒྱལ་བའི་དབང་པོ་དཔལ་ཆེན་པོ་ཀརྨ་པ་བཅུ་གསུམ་པའི་ཞལ་སྔ་ནས་དེ་ལྟར་འབྲི་བར་འོས་སོ་ཞེས་བཀའ་ཡིས་གནང་ལྟར་འགྲོ་བ་མང་པོ་ལ་ཕན་པའི་ལྷག་བསམ་ཁོ་ནས་ཚེགས་ཆུང་དོན་ཆེ་ཚིག་ཉུང་གནད་ཟབ་དགོས་པ་མཆོག་དང་ལྡན་པའི་གཞུང་རང་གི་འདོད་ལྟར་རིག་པ་འཛིན་པ་ཚེ་དབང་ནོར་བུས་རབ་བྱུང་བཅུ་གསུམ་པའི་སྐྱེས་བདག་གི་ལོ་གསར་དུ་འཆར་ཉེ་བ་མགོ་ཟླའི་དཀར་ཕྱོགས་རྒྱལ་བ་གཉིས་པ་ལ་གཉལ་རྨད་གྲ་འོར་དུ་ཟེ་རེགས་འཕྲལ་མར་བཏབ་ནས་འཇིག་རྟེན་མགོན་པོའི་ཕོ་བྲང་མཚུར་གྱི་གནྡྷོ་ལར་ཡི་གེ་གཉིས་པར་བཀོད་ཅིང་། སླར་ཡང་མངའ་རིས་མང་ཡུལ་བྱམས་སྤྲིན་གྱི་གཙུག་ལག་ཁང་དུ། ཆུ་སྤྲེའུ་ས་གའི་དམར་ཕྱོགས་རྒྱལ་བ་གཉིས་པར་བསྣན་མ་འོས་ཁ་ཤས་སྦྱར་བ་སྟེ་འདིས་ཀྱང་འགྲོ་བ་ལ་ཕན་པ་དང་བདེ་བའི་རྒྱུ་རླབས་པོ་ཆེ་འགྲུབ་པར་གྱུར་ཅིག སརྦ་མངྒ་ལཾ། དགེའོ། །