ཐུགས་རྗེ་ཆེན་པོ་ལོ་ཀཻ་ཤཱ་རའི་སྒྲུབ་ཐབས།
༄༅། །ཐུགས་རྗེ་ཆེན་པོ་ལོ་ཀཻ་ཤཱ་རའི་སྒྲུབ་ཐབས། །
༈ ཨོཾ་སྭཱསྟི། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་མྱུར་གྲུབ་ཤོག །ཨོཾ་སྭ་བྷཱ་ཝ་ཤུདྷ་སརྦ་དྷརྨ་སྭཱ་བྷ་ཝ་ཤུདྷོ྅ཧཾ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀཽ྅ཧཾ། ཆོས་ཀུན་གདོད་ནས་བདག་བདེ་སྟོང་བ་ཉིད། །དེ་དོན་མ་རྟོགས་སྙིང་རྗེ་ཟླ་བའི་གཟུགས། །འཕོ་བཅས་རླུང་དག་འགག་མེད་ཡི་གེ་ཧྲཱིཿ བདེ་བ་ཆེན་པོ་པད་དཀར་སྡོང་བུ་བཅས། །རྡོ་རྗེ་གསུམ་དངོས་དེ་ལས་འོད་འཕྲོས་པས། །ཁམས་གསུམ་སྒྲིབ་སྦྱངས་སྐུ་གསུམ་བྱིན་བརླབས་བསྡུས། །ཡོངས་གྱུར་འཇིག་རྟེན་དབང་ཕྱུག་སྤྱན་རས་གཟིགས། །རབ་དཀར་ཟླ་བ་བྱེ་བའི་འོད་འཕྲོག་ཅིང་། །མཛེས་སྡུག་ལྟ་བས་མི་ངོམ་རྡོ་རྗེའི་སྐུ། །ཞལ་གཅིག་སྤྱན་གསུམ་ཞི་བའི་ལྟ་སྟངས་ཅན། །ཕྱག་གཡས་མཆོག་སྦྱིན་བདུད་རྩིས་ཡི་དྭགས་ཚིམ། །གཡོན་པས་པད་དཀར་འདབ་སྟོང་ཡུ་བ་འཛིན། །རལ་པ་དམར་སེར་ཐོར་ཚུགས་ལྷག་མ་འཕྱང་། །རི་དྭགས་པགས་པས་ཕྲག་པ་གཡོན་བཀབ་ཅིང་། །དར་དང་རིན་ཆེན་ཞི་བའི་ཚུལ་རྒྱན་རྫོགས། །སེམས་དཀྱིལ་ཟླ་གདན་ཟླ་བའི་རྒྱལ་ཡོལ་མཛེས། །རལ་པའི་ངོས་སུ་སངས་རྒྱས་འོད་དཔག་མེད། །མཆོག་གི་སྤྲུལ་སྐུ་མཉམ་བཞག་སྐྱིལ་ཀྲུང་བཞུགས། །གནས་གསུམ་རྡོ་རྗེ་གསུམ་དང་ཐུགས་ཀྱི་དབུས། །པད་དཀར་ཟླ་སྟེང་ཧྲཱིཿདཀར་ཡིག་དྲུག་བསྐོར། །ཨོཾ་མ་ཎི་པདྨེ་ཧཱུྃ། ཡི་དམ་ཀུན་འདུས་བདག་ཉིད་སྤྱན་རས་གཟིགས། །བླ་མ་ཀུན་འདུས་སྤྱི་བོར་འོད་དཔག་མེད། །ཐུགས་ཀའི་ས་བོན་ཡིག་དྲུག་ཆོས་ཀུན་འདུས། །བདག་གི་ངག་ནས་ཡིག་དྲུག་བཟླས་པའི་ཚེ། །ནང་གི་སྲིན་བུ་ཕྱི་ཡི་བ་སྤུ་དང་། །སྐྱེ་འགྲོ་སེམས་ཅན་འབྱུང་བའི་རྡུལ་ཕྲ་རག །དེ་བཞིན་མཁའ་མཉམ་སངས་རྒྱས་བྱང་སེམས་ཚོགས། །ཀུན་གྱིས་ཡིག་དྲུག་སྔགས་ཀྱི་སྒྲ་དབྱངས་ལྡིར། །ཐུན་མཐར་སྣོད་བཅུད་གཞལ་ཡས་ལྷའི་རང་བཞིན། །ཀུན་འདུས་བདག་ཐིམ་ནམ་མཁའི་རྒྱལ་བ་སྲས། །འོད་དཔག་ལ་ཐིམ་དེ་ཡང་རང་ལ་ཐིམ། །རང་ཡང་ས་བོན་ཐིག་ལེ་སྟོང་པར་ཡལ། །སླར་ཡང་སྔགས་སྒྲས་བདག་ཉིད་ལྷ་རུ་ལྡང་། །སྣང་གྲགས་རིག་པ་འཕགས་པའི་སྐུ་གསུང་ཐུགས། །ཁྱེར་སོ་གསུམ་ལྡན་སྒྱུ་མ་ལྟ་བུའི་ངང་། །ཡེངས་མེད་ཕྱག་རྒྱ་ཆེན་པོའི་ངང་ལ་བཞག །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོར་སྤྱོད་ཕྱིར་རབ་ཏུ་བསྔོ་བར་བགྱི། །བསོད་ནམས་འདི་ཡི་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །
ཅེས་པ་འདི་ཡང་དཔལ་ཆེན་ཆུ་བོ་རི་པ་སྤྱན་རས་གཟིགས་ཀྱི་རྣལ་འབྱོར་པ་དོན་གྲུབ་རྒྱལ་མཚན་དང་། དད་གུས་ཀྱི་ལང་ཚོ་བརྟས་པ་གྲྭ་ཕྱི་སྨིན་གྲུབ་སྡེ་པ་དག་གིས་གསོལ་བ་བཏབ་པའི་ངོར། རྒྱལ་ཁམས་པ་རིག་འཛིན་ཚེ་དབང་ནོར་བུས་ས་འབྲུག་གནམ་ལོ་གསར་འཆར་རྒྱལ་ཟླའི་དམར་ཕྱོགས་ཀྱི་ཚེས་བཅུར་གཙང་གི་སྟག་ཚལ་རིག་འཛིན་གྲུབ་པའི་བསྟི་གནས་མངྒ་ལ་ཀུ་ཊ་ར་སྨྲས་པ་སརྦ་མངྒ་ལཾ།