བཀའ་འདུས་སྙིང་པོའི་མཆོད་ཕྲེང་།
༄༅། །བཀའ་འདུས་སྙིང་པོའི་མཆོད་ཕྲེང་བཞུགས། །
༈ ཨོཾ་ཨཱཿཧཱུྃ། སྐྱེ་མེད་རྣམ་དག་ཆོས་དབྱིངས་ཕོ་བྲང་ནས། །འགག་མེད་རོལ་པ་རྒྱལ་བ་སྲས་བཅས་ལ། །གསོལ་བ་འདེབས་སོ་མཆོད་པ་དམ་པ་འབུལ། །དབང་བཞི་ཆུ་བོའི་དངོས་གྲུབ་སྩལ་དུ་གསོལ། ། ༡ འོག་མིན་རྣམ་དག་དུར་ཁྲོད་ཆེན་པོ་ནས། །ཆེ་མཆོག་ཧེ་རུ་ཀ་དཔལ་གཙོ་དགུ་ལ། །གསོལ་བ་འདེབས་སོ་མཆོད་པ་དམ་པ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། ། ༢ ཡེ་ཤེས་ལས་དང་མཁའ་སྤྱོད་གནས་ཡུལ་ནས། །རིགས་ལྔའི་མཁའ་འགྲོ་འབུམ་ཕྲག་ཡོངས་བཅས་ལ། །གསོལ་བ་འདེབས་སོ་མཆོད་པ་དམ་པ་འབུལ། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། ། ༣ ཆོས་དབྱིངས་ཀློང་ལས་ལོངས་སྤྱོད་རྫོགས་པའི་ངང་། །གང་འདུལ་སྤྲུལ་སྐུ་དཔལ་མགོན་འཁོར་བཅས་ལ། །གསོལ་བ་འདེབས་སོ་མཆོད་པ་དམ་པ་འབུལ། །བསྟན་པ་བསྲུང་བའི་དངོས་གྲུབ་སྩལ་དུ་གསོལ། ། ༤ ཞེས་པ་འདི་ནི་ནོར་བུ་བརྩེགས་ཞོལ་ནས། །བཀའ་འདུས་སྙིང་པོ་ཡིད་བཞིན་ནོར་བུ་ཡི། །མཆོད་པ་ཡིད་བཞིན་ནོར་བུའི་འཕྲེང་བ་ཞེས། །ཚེ་དབང་ནོར་བུའི་ཞལ་ནས་གསུང་པ་བཞིན། །ཡི་གེའི་རིག་བྱེད་ནོར་བུ་བློ་གྲོས་སོ། །བཀའ་འདུས་སྒྲུབ་བརྒྱུད་ཕྱོགས་བཅུར་རྒྱས་པར་ཤོག །སརྦ་མངྒ་ལཾ།