རྒྱུད་རྒྱལ་གསང་བ་འདུས་པའི་མན་ངག་འཇམ་དཔལ་ཞལ་ལུང་གི་འཕོ་བ་ཉུང་གསལ་ཡེ་ཤེས་དགོངས་པའི་རྒྱན།

༄༅། །རྒྱུད་རྒྱལ་གསང་བ་འདུས་པའི་མན་ངག་འཇམ་དཔལ་ཞལ་ལུང་གི་འཕོ་བ་ཉུང་གསལ་ཡེ་ཤེས་དགོངས་པའི་རྒྱན་ཞེས་བྱ་བ་བཞུགས་སོ། །

༈ ན་མོ་བཛྲ་མཉྫུ་ཤྲཱི་ཡེ། དལ་འབྱོར་འདི་ནི་ཤིན་ཏུ་གཡོ་བ་དང་། །འཇིག་རྟེན་སྐྱེ་བོ་དམ་པ་འཕྲད་རྙེད་དཀའ། །དེ་བས་ཤེས་རབ་ཐབས་ལ་གཞོལ་བ་ཡི། །ཡིད་ལ་བྱེད་པའི་མཆོག་འདི་བསྒྲུབ་པར་བྱེད། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་ནི་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་མྱུར་འགྲུབ་ཤོག །སངས་རྒྱས་ཀུན་འདུས་བླ་མ་འཇམ་དཔལ་དཔའ། །ཧེ་རུ་ཀ་དཔལ་དཀོན་མཆོག་གསུམ་སྤྱི་དཔལ། །དེ་ལ་སྐྱབས་མཆི་མཆོད་འབུལ་སྡིག་པ་བཤགས། །གསོལ་བ་འདེབས་སོ་དབང་བཞིས་བདག་བྱིན་རློབས། །བདག་ལུས་མི་དམིགས་འཇམ་དཔལ་རྡོ་རྗེའི་སྐུ། །ལྟེ་སྨིན་ཁ་སྣ་རྣ་མིག་གཙུག་ཧཱུྃ་མཐིང་། །ཆུ་ལམ་སུམ་དཀར་བཤང་ལམ་ཀྵུ་ཡིག་དམར། །ཀུན་ཀྱང་འོད་ཟེར་དང་བཅས་སྒོ་དགུ་འགེགས། །རང་གི་ཕུང་ཁམས་རིགས་ལྔ་ཡུམ་བཞིའི་དངོས། །དབང་ཡུལ་སེམས་དཔའ་སེམས་མའི་རང་བཞིན་ཉིད། །སྤྱི་བོར་རིན་ཆེན་སྣ་ཚོགས་ལས་གྲུབ་པའི། །རྡོ་རྗེ་རྩེ་དགུ་འོད་ཟེར་ལྔ་འཕྲོའི་ལྟེར། །ཆོས་ཀྱི་དབྱིངས་ངོ་རྡོ་རྗེ་རྩེ་ལྔ་དཀར། །ལྟེ་བར་ཟླ་སྟེང་ཐིག་ལེ་དམར་སེར་ཟླུམ། །ཙ་ན་ཀ་ཚད་ཟབ་གསལ་དབྱེར་མེད་དངོས། །འོད་ཟེར་སྣ་ལྔ་རབ་ཏུ་འཕྲོ་ཞིང་འབར། །བདག་ཉིད་དཀྱིལ་འཁོར་འཁོར་ལོར་སྣང་བ་ཀུན། །རང་གི་སེམས་སྣང་ཐར་ནི་ཧྲིལ་རྗེས་ཀྱི། །སྙིང་གའི་ཐིག་ལེ་ལ་ཐིམ་དེ་དྷུ་ཏི། །རྡོ་རྗེ་གཉིས་ར་དབུས་མ་རྒྱུད་ནས་ལྟེར། །ཐིག་ལེ་ལ་ཐིམ་འཁོར་ལོ་གཙོ་བོའི་སྐུ། །རྡོ་རྗེ་རྩེ་དགུ་དེ་ཡང་རྩེ་ལྔ་པ། །དེ་ཐིག་ཏ་ལ་བདུན་སྲིད་མཁར་འཕང་ནས། །ཇེ་ཕྲ་མཐར་ནི་འོད་གསལ་སྟོང་ཉིད་ངང་། །འཛིན་མེད་མཉམ་བཞག་ཆོས་སྐུ་ཐོབ་མོས་ཤིང་། །དེ་ངང་ཟབ་གསལ་ལྷ་སྐུ་ལོངས་སྤྱོད་རྫོགས། །དཀྱིལ་འཁོར་དཔག་མེད་སྤྲུལ་ནས་སེམས་ཅན་ཀུན། །སངས་རྒྱས་སར་བཀོད་སྤྲུལ་སྐུའི་ང་རྒྱལ་བཟུང་། །དེ་ལྟར་འཇམ་དཔལ་རྡོ་རྗེའི་ཞལ་ལུང་མཆོག །གྲོལ་བའི་ཐིག་ལེ་འཕོ་བའི་མན་ངག་གང་། །བསྒོམ་པའི་ནུས་པས་ཚེ་འདི་སྐུ་གསུམ་གྱི། །འབྲས་བུ་མངོན་གྱུར་འཇམ་དཔལ་དབྱངས་ཐོབ་ཤོག །འདིས་ནི་དབང་རབ་ཚེ་འདིར་འབྲིང་བར་དོ། །ཐ་མ་རིག་འཛིན་གྲུབ་ནས་སྐྱེ་བ་བདུན། །ཚུན་ཆད་གྲོལ་ཞེས་འཇམ་དཔལ་གྱིས་གསུངས་པས། །སོམ་ཉི་མེད་པས་བསྒོམ་བསྒྲུབ་ལ་འབད་གཅེས། །ཚུལ་འདི་ཤེས་ནས་བླ་མའི་མན་ངག་ལྟར། །སྨྲ་བར་བྱེད་པོ་ཚེ་དབང་ནོར་བུ་སྟེ། །དགེ་དེས་སྲིད་འགྲོ་འཁོར་བའི་རྒྱ་མཚོ་སྐེམས། །བྱེད་པོ་འཇམ་དཔལ་བདག་གིས་མྱུར་ཐོབ་ཤོག །

ཅེས་པ་ཡང་གཙང་རུ་ལག་གདོད་དགའ་བཀྲ་ཤིས་རྩེ་ཡི་སྡེ་པ་པདྨ་ཚེ་བརྟན་གྱི་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ཤིང་སྟག་ཆུ་སྟོད་ཟླ་བ་བདེན་བཞི་ཆོས་འཁོར་བསྐོར་བའི་དུས་ཆེན་ལ་གྲོམ་པ་རྒྱང་དུ་བྲིས་པའི་ཡི་གེ་པ་རང་གི་སློབ་མ་བློ་བཟང་དར་རྒྱས་སོ། །མངྒ་ལཾ།