ཕྱག་རྡོར་དོན་གྱི་སྒྲུབ་ཐབས་གང་ཤར་ཐོལ་སྐྱེས་ཀྱི་གླུ་རྡོ་རྗེའི་གད་རྒྱང་།

༄༅། །ཕྱག་རྡོར་དོན་གྱི་སྒྲུབ་ཐབས་གང་ཤར་ཐོལ་སྐྱེས་ཀྱི་གླུ་རྡོ་རྗེའི་གད་རྒྱང་ཞེས་བྱ་བ་བཞུགས་སོ། །

༈ ཨོཾ་སྭསྟི། འཁོར་འདུས་ཀྱི་མིང་བཏགས་གློ་བུར་བ། །རང་ངོ་ནས་མ་གྲུབ་གཞི་རྩ་སྟོང་། །རང་རིག་ནི་གདོད་མའི་དག་པ་ཆེ། །ཀུན་གཞི་མཆོག་ཀུན་ཏུ་བཟང་པོར་གྲུབ། ། ༡ དེ་ཉིད་ནི་རྣམ་པ་ཐམས་ཅད་པས། །རང་རིག་གི་ངོ་བོ་གསང་བདག་ཡིན། །ཆོས་ཉིད་ལ་ཞལ་ཕྱག་མ་དམིགས་ཀྱང་། །མེད་པ་ཡང་མ་ཡིན་ཞལ་ཕྱག་སྣང་། ། ༢ སྣང་སེམས་ཞེས་ཐ་དད་ཡེ་ནས་མེད། །མེད་བཞིན་དུ་སྣང་ལུགས་ངོས་ཅིག་ནས། །བཅོམ་ལྡན་དཔའ་ཁྲག་འཐུང་ཧེ་རུ་ཀཿ སྐུ་མདོག་མཐིང་ཆོས་ཉིད་འགྱུར་བ་མེད། ། ༣ ཉག་གཅིག་གི་ཞལ་ལ་བདེན་གཉིས་ཕྱག །མཐའ་བྲལ་གྱི་ཞབས་ནི་བསྐྱངས་ཤིང་བསྐུམ། །གཟུང་འཛིན་གྱི་གཟའ་ཀླུ་གདན་དུ་བརྫིས། །སྟོང་ཉིད་ཀྱི་རྡོར་དྲིལ་མཁའ་ལ་ཕྱར། ། ༤ སྙིང་རྗེ་ཡི་མེ་ཞགས་གཡོན་ན་བསྣམས། །སྲིད་གྲོལ་གྱི་རལ་པ་གྱེན་དུ་བརྫེས། །ཆགས་སྡང་གི་སེང་གླང་ལྤགས་པ་གསོལ། །ཚོགས་བརྒྱད་དག་དུར་ཁྲོད་དཔལ་ཆས་རྫོགས། ། ༥ ཡེ་ཡིན་གྱི་སྐུ་རུ་དེ་ལྟར་ཤར། །ཐུགས་ཀློང་དུ་ཡེ་ཤེས་རྡོ་རྗེ་ནི། །སྐུ་གསུམ་གྱི་བདག་ཉིད་རྩེ་མོ་གསུམ། །ཉག་གཅིག་གི་ངོ་བོ་ལྟེ་བ་རུ། ། ༦ གཉིས་མེད་ཀྱི་ཡེ་ཤེས་ཧཱུྃ་གི་སྤྲས། །ཧཱུྃ་ཧཱུྃ་ཧཱུྃ། ཟུང་འཇུག་དངོས་བཛྲ་རྭ་མ་མཚོན། །རྟོག་འཇོམས་ཀྱི་ཡི་གེ་རྩེ་མོར་ཕཊ྄། ཧཱུྃ་བཛྲ་ཕཊ྄། ༧ རང་རིག་གི་མེ་དཔུང་འབར་བ་ཡི། །གཉིས་སྣང་གི་གདོན་བགེགས་མ་ལུས་བསྲེགས། །ཞེ་སྡང་མདངས་སྟེང་གདོན་ཐལ་བར་རློག །འདོད་ཆགས་མདངས་འོད་གདོན་ཕྱེ་མར་འཐག ། ༨ ཕཊ྄ཿ འཁོར་འདས་ཀུན་ང་ཡི་ཆོ་འཕྲུལ་སྟེ། །སྲེགས་བྱ་དང་བསྲེགས་བྱེད་རོ་མཉམ་འདྲེས། །ང་ཉིད་ལས་གཞན་པའི་འཁོར་འདས་སུ། །གཟའ་ཀླུ་ཡང་གསང་བདག་ང་ཉིད་དོ། ། ༩ ང་རང་གི་ངོ་བོ་ལ་ཚུར་ལྟོས་དང་། །ང་ཉིད་ཞེས་དངོས་པོའི་མཚན་འཛིན་སྟོངས། །བེམ་སྟོང་དུ་མ་ཡིན་ཤིན་ཏུ་བརྗིད་༼བརླིད་ཡིན་པས་བསྲད། །༽ཡོད་མེད་ཀྱི་ཁས་བླངས་གང་ཡང་མེད། །༡༠ འདི་དོན་གྱི་གནད་ལ་མ་རེག་པའི། །མཚན་ཉིད་ཀྱི་དགེ་བཤེས་སྐམ་པོ་འགའ། །སྔགས་ལམ་ལ་ཞུགས་པའི་རློམ་འཆང་ཡང་། །ཆོས་ཉིད་ལ་ཁས་ལེན་མེད་དོ་ཞེས། ། ༡༡ མེད་ལུགས་ཀྱི་བསྒྲུབ་གཞིར་མཛུབ་ཚུགས་མེད། །སྒོམ་ཡོན་གྱི་སངས་རྒྱས་བེམ་སྟོང་བསྒྲུབ། །འཕགས་ཀླུ་ཡི་ཁས་བླང་ཡིན་རྫུ་ནས། །ཡང་དག་གི་དོན་ལ་འཕགས་ཀླུ་འགོག ། ༡༢ མ་ནོར་བ་འཕགས་ཀླུའི་རྗེས་འབྲང་ན། །ལམ་དུས་ཀྱི་མཚན་ཉིད་གོང་སྨོས་བཞིན། །འབྲས་དུས་ཀྱང་དེ་དང་རྗེས་མཐུན་དུ། །ཟབ་བརླིང་གནད་རྒྱ་ཆེར་བཤད་ཡོད་ཀྱང་། ། ༡༣ འདི་སྐབས་མི་སྤྲོ་ཡི་གེས་འཇིགས། །དེ་དག་ནི་སྐབས་ཀྱི་འཕྲོས་དོན་སྟེ། །གསང་བདག་གི་བསྒོམ་བཟླས་ཐུན་མཐའ་རུ། །ཕྱི་སྣོད་ཀུན་གཟུང་བའི་རྟོག་པས་སྟོང་། ། ༡༤ ནང་བཅུད་ཀུན་འཛིན་པའི་གཞི་ཡིས་སྟོང་། །སྟོང་ཉིད་ངང་སྒྱུ་ལུས་འོད་གསལ་ཞུགས། །མི་འགྱུར་བདེ་ཐིག་ལེའི་དབྱིབས་སུ་འདུས། །འོད་གསལ་གྱི་ངང་དེ་གནས་ལུགས་ཡིན། ། ༡༥ སྨོན་ལམ་གྱི་འཕེན་པས་ཡེ་ཤེས་སྐུ། །གནས་ལུགས་ལས་མ་གཡོས་ངང་དུ་ལྡང་། །དགེ་ཚོགས་ཀུན་སྒྱུ་ལྟར་འགྲོ་ལ་བསྔོ། །དེ་སྐད་ཅེས་གསང་བདག་བསྒྲུབ་ཐབས་མཆོག ། ༡༦ རྒྱལ་བ་དང་རྒྱལ་སྲས་ཀུན་གྱི་ཤུལ། །མ་ནོར་ཞིང་འཁྲུལ་ཡུང་ཉུང་ངུའི་ངག །ཚུལ་བཞིན་ཡི་གེའི་བཀོད་པ་འདི། །ལང་འགྲོ་ཡི་རིག་འཛིན་མཆོག་གི་གདུངས། ། ༡༧ སྒྲོལ་མ་བ་ཞེས་སྔ་་འགྱུར་གསལ་བྱེད་གཙོ། །དེ་ཉིད་རིགས་ལ་དམ་པ་ཡིད། །སྐྱེ་སྲིད་མཆོག་པདྨ་ཀུན་གསལ་གྱི། །གསུང་ངོ་རུ་མདོ་ཁམས་ཀཿཐོག་པ། ། ༡༨ རེ་ཁེ་ལྗོངས་ཆོས་སྨྲ་རིག་པ་འཛིན། །ཚེ་དབང་དཔག་ནོར་བུ་ཞེས་གྲགས་པས། །དབུས་འགྱུར་གཙང་ཟབ་བུ་ལུང་དུ་སྨྲས། ། ༡༩ མངྒ་ལཾ། ཨོཾ་ཏུམ་བུ་ལི་ཏུམ་བུ་ལི་རཀྵ་ར་ཧུ་ལ་སུ་སུ་མེལ་མེལ་ཤིག་ཤིག་ཁྲོལ་ཁྲོལ་སྭཱ་ཧཱ།