ཞིང་སྐྱོང་ཆེན་པོའི་འཕྲིན་ལས་དཔའ་བོ་དགྱེས་པའི་རོལ་མཚོ།
༄༅། །ཞིང་སྐྱོང་ཆེན་པོའི་འཕྲིན་ལས་དཔའ་བོ་དགྱེས་པའི་རོལ་མཚོ་ཞེས་བྱ་བ་བཞུགས་སོ། །
༈ བདེ་ཆེན་ཡེ་ཤེས་འཁོར་ལོར་ཡོངས་སྣང་བ། །རྒྱ་བོད་ས་མཚམས་ཙཱ་རི་ཀོ་ཏྲ་ཡ། །མཁའ་སྤྱོད་དུར་ཁྲོད་ཆེན་པོའི་ཞིང་སྐྱོངས་ནི། །མི་བཟད་ནག་པོ་ཆེན་པོ་སེང་གེའི་ཞལ། །དྲག་པོ་དྲག་ཤུལ་རྨད་བྱུང་གཟི་ལྡན་ནག །ག་ཡ་དྷཱ་ར་རྡོ་རྗེ་ལས་རབ་རྩལ། །གནས་གསུམ་དཔའ་བོ་ས་བཅུའི་ཉེ་བའི་མགོན། །དཔལ་ལྡན་སྲིན་གཙོ་བདུད་རྗེ་ཐོད་པའི་འཕྲེང་། །གསང་བའི་ཡུམ་ཆེན་སེང་གདོང་སི་ན་ར། །བཀའ་ཉན་དུག་མཚོན་མིང་སྲིང་དྲེགས་པ་བརྒྱད། །ཁྱེད་རྣམས་སྔོན་ཚེ་བཅོམ་ལྡན་ཧེ་རུ་ཀཿ རྟ་མཆོག་གསང་བདག་སྤྱན་སྔར་དམ་ནོད་ཅིང་། །དེ་བཞིན་པདྨ་ཐོད་འཕྲེང་རྩལ་འཆང་དྲུང་། །མ་ར་རི་ཀ་སྟག་ཚང་འཆིམས་ཕུ་དང་། །གཟིལ་ཆེན་གསང་བའི་ཕུག་པར་དམ་བཞག་ནས། །ཁས་བླང་ཐ་ཚིག་གཉན་པོ་དྲན་གྱིས་ལ། །དམ་ཅན་རྣལ་འབྱོར་བདག་གི་སྤྱན་འདྲེན་ན། །མ་ཐོགས་མྱུར་བ་ཉིད་དུ་འདིར་བྱོན་ཛཿ ཏིང་འཛིན་གྱིས་སྤྲུལ་དགྱེས་པའི་གདན་ལ་བཞུགས། །དམ་ཚིག་གཅིག་ཏུ་བསྲེ་ཕྱིར་ལྷ་ཕྱག་འཚལ། །ཕྱི་ལྟར་ཉེ་སྤྱོད་ནང་ལྟར་འདོད་ཡོན་ལྔ། །གསང་བ་སྨན་གཏོར་རཀྟའི་མཆོད་པ་དང་། །ཁྱད་པར་ཏ་ན་ག་ཎའི་ལོངས་སྤྱོད་རྫས། །དཔག་མེད་ནམ་མཁའ་གང་བ་འབུལ་གྱིས་བཞེས། །མཐུན་རྫས་བསྒྲལ་བའི་ཤ་ཁྲག་རུས་པ་རྐང་། །ཀླད་པ་བ་སུ་ཙིཏྟ་དབང་པོ་ལྔ། །འབུལ་གྱི་དགེས་བཞེས་བར་ཆད་སེལ་བ་དང་། །མཐུན་པའི་དངོས་གྲུབ་མ་ལུས་བདག་ལ་སྩོལ། །ཧཱུྃ་བྷྱོཿ གདོད་ནས་གཡོ་མེད་རྒྱལ་བ་ཀུན་ཏུ་བཟང་། །ནང་མདངས་ཧེ་རུ་ཀཿདཔལ་ཆེན་པོའི་གར། །སྤྲུལ་པ་ཞིང་སྐྱོང་ཆེན་པོའི་སྐུར་སྣང་བ། །ནག་པོ་དྲག་པོ་ཆེ་ལ་ཕྱག་འཚལ་བསྟོད། །ངེས་པའི་དོན་དུ་ཧེ་རུ་ཀཿཉིད་དེ། །རྒྱལ་བའི་བསྟན་པ་བསྲུངས་ཕྱིར་ལས་ཀྱི་ཚུལ། །མི་བསྲུན་སེང་གདོང་གཏུམ་པའི་རྩལ་འཆང་བ། །རྒྱལ་འགོང་རྒྱ་འདྲེའི་གཤེད་མ་ཁྱོད་ལ་བསྟོད། །གཉིས་མེད་ཡུམ་ཆེན་དཔལ་འབར་མེ་ལྕེའི་འཕྲེང་། །སེང་གདོང་དམར་མོ་ཁམས་གསུམ་དབང་གི་བདག །བཀའ་ཉན་མིང་སྲིང་ལྷ་སྲིན་སྡེ་བརྒྱད་སོགས། །མཐུ་ལྡན་འཁོར་དང་བཅས་པ་ཕྱག་འཚལ་བསྟོད། །དམ་རྫས་ཛ་གཱར་མཆོད་གཏོར་འདི་བཞེས་ལ། །བདག་ལ་འཚེ་བྱེད་མི་དང་མི་མིན་ཐུལ། །བྱད་ཁ་རྦོད་གཏོང་ཐམས་ཅད་ཕྱིར་ལ་ཟློག །ཁམས་གསུམ་དབང་བསྡུས་འདོད་དགུ་ཆར་དུ་ཕོབ། །ལས་བཞི་ལྷུན་གྲུབ་གྲུབ་ཆེན་བརྒྱད་སོགས་བསྩོལ། །ས་ལམ་འགལ་རྐྱེན་བར་ཆད་མཐའ་དག་སོལ། །ཚེ་རབས་རྟག་ཏུ་ཉེ་བའི་མགོན་ཁྱོད་ཀྱིས། །བྱང་ཆུབ་བསྒྲུབ་པའི་འཕྲིན་ལས་གཡེལ་མེད་མཛོད། །
ཅེས་སྔ་འགྱུར་བསྟན་པའི་གསལ་བྱེད་སྒྲོལ་ཕུག་པ་པདྨ་ཀུན་གསལ་ཞལ་སྔ་ནས་བསྐུལ་བའི་རྐྱེན་བྱས་འཕྲལ་ཤུགས་འབྱུང་ཉིད་དུ་ཙཱ་རི་ཕྲ་དོམ་ཚང་རོང་དུ་དཔལ་ཚེ་དབང་ནོར་བུས་སྦྱར་བ་སྟེ་མེ་སྦྲུལ་གྲོ་ཞུན་ཟླ་བའི་དམར་ཕྱོགས་ཀྱི་རྒྱལ་བ་གསུམ་པ་ལའོ། །མངྒ་ལཾ། ༸ཤིན་ཏུ་འགྱོགས་བྲིས་བགྱིས་པའི་ཡི་གེ །གཟུགས་ཙམ་དོད་པས་གཞན་དུ་ཅི་ཞིག །འདི་ནི་བྱ་བྲལ་ཡན་པ་བློ་དེས། །དོམ་ཚངས་ཏེ་འདབས་ཁང་བུར་༼ཀྲུན་ནོ། །༽ཞེས་གསུངས་པ་ལྟར་རྗེ་བཙུན་སྒྲོལ་མ་པའི་ཕྱག་བྲིས་ཀྱི་ཤོག་༼གྲི་༽དུ་རྒྱས་འདིར་ཕབ་པའོ། །