བྲག་སྐད་ཤིང་ལོའི་ཚལ་གྱི་སྒོ་བསྲུང་མགོན་ཐང་བདུད་ཀྱི་གསོལ་མཆོད།
ཧཱུྃ་བྷྱོཿ མི་མཇེད་འཛམ་གླིང་ཐིག་ལེ་རྡོ་རྗེ་གདན། །བྱང་ཕྱོགས་རི་བོ་ནག་པོ་བཅུ་གསུམ་མཚམས། །ལྷ་ལྡན་ཤར་ལྷོ་སྦས་ཡུལ་པདྨ་དཀར། །ཉེ་བའི་གནས་ཆེན་མ་ཡི་ཀུ་ལུང་ཞེས། །ཡ་མཚན་རཱ་མ་ཤྭ་རའི་གནས་ཀྱི་ཆ། །ལྷོ་ནུབ་སྦས་ལུང་བྲག་སྐས་ལྗོན་པའི་ཚལ། །གཉེར་འཛིན་ཞིང་སྐྱོངས་དཔའ་བོ་དྲེགས་པ་ཆེ། །མགྲོན་ཐང་བདུད་པོ་ཆེན་པོ་ཞེས་བྱ་བ། །དྲག་ཤུལ་ཅན་ཁྱོད་གནས་ལ་མ་ངེས་ཀྱང་། །ཁྱད་པར་རླུང་ཆུ་དྲག་འབེབས་ཚང་ཚིང་ནགས། །གདུག་པའི་གཅན་གཟན་མ་རུངས་འདྲེ་སྲིན་ཚལ། །སྤྲ་སྤྲེ་རི་དྭགས་རྩེ་བྲོ་ཁྱབ་པའི་གནས། །གཟུགས་ཅན་མི་རྣམས་རྒྱུ་བར་དཀའ་བ་དེར། །ཁྱོད་ཀྱི་སྐུ་མཁར་རི་བོ་ཙིཏྟའི་དབྱིབས། །རྩེ་ནས་མར་བལྟས་མཚོ་དཀྱིལ་ནོར་བུ་འདྲ། །རྩ་ནས་ཡར་བལྟས་རྒྱལ་མཚན་སྒོང་འཕྱར་འདྲ། །ལན་ནས་བལྟས་ཚེ་དཔལ་གཏོར་བཤམས་ལེགས་འདྲ། །འདྲ་གསུམ་དོན་གཅིག་རི་བོ་དེ་འདྲའི་ནང་། །བདུད་མཁར་ཟླུམ་པོ་ལྕགས་བྱས་ཁ་བད་གཡུ། །མཆོང་གིས་སྒོ་བྱས་གསེར་གྱི་གཟེར་གྱིས་གདམས། །ནང་ན་རོལ་པ་བདུད་ཀྱི་སྐྱེས་གཅིག་པོ། །ཕྱི་ལྟར་དགེ་བསྙེན་བཙུན་པའི་ཆ་ལུགས་ཅན། །མདོག་སྨུག་བསྭེ་ཐེབས་མཁར་སིལ་ལྷུང་བཟེད་འཆང་། །ནང་ལྟར་ལྕགས་ཀྱི་མི་ཕོ་རལ་པ་ཅན། །དར་ནག་བོད་ཟུ་རལ་གྲི་ཞགས་པ་བསྣམས། །རྟ་ནག་ལ་ཞོན་འཇིག་རྟེན་ཁྱབ་པར་ཉུལ། །གསང་བ་ཀླུ་བདུད་གཅེར་བུ་ཟངས་ཀྱི་མདོག །སྡིག་པའི་མགོ་ཅན་ཕྱག་གཡས་སྤུ་གྲི་དང་། །གཡོན་པས་ཙིཏྟའི་སྐུ་སྨད་སྦྲུལ་དུ་འཁྱིལ། །གདུག་པ་འབྲུག་དང་དུག་སྦྲུལ་ནག་པོ་ཆིབས། །ལུས་ལ་མིག་བརྒྱ་དུག་གི་རླངས་པ་འཐུལ། །འཁོར་དུ་སྲོག་བདག་ཀླུ་བདུད་སྟོང་གིས་བསྐོར། །ཉིན་མོ་རྩེ་ཤར་དམར་ཐག་ཟེར་ལ་རྒྱུ། །མཚན་མོ་ཟླ་བའི་འོད་དང་ཟེར་ལ་རྒྱུ། །མུན་འཚུབ་སྲོད་གུང་ནག་པོའི་མདངས་ལ་རྒྱུ། །སྤྲིན་ནག་དཀྱིལ་དང་རླུང་ནག་འཚུབ་མའི་སྣ། །གློག་འོད་ཐོག་སེར་དྲག་པོའི་གདོང་ལ་རྒྱུ། །ཁྱོད་ནི་མི་བསྲུན་དྲག་ཤུལ་ཆེན་པོ་སྟེ། །སྔོན་ཚེ་སངས་རྒྱས་པདྨ་ཐོད་འཕྲེང་རྩལ། །བར་དུ་འཁྲུལ་ཞིག་ཚུལ་ཁྲིམས་འབུམ་པ་དང་། །གཏེར་སྟོན་ནུས་ལྡན་བདུད་འདུལ་རྡོ་རྗེ་ཡི། །སྤྱན་སྔར་ཁས་བླངས་སྲོག་གི་སྙིང་པོ་ཕུལ། །ད་དུས་སྒྲོལ་མ་བསང་ཆབ་ཁྲུས་ཆུ་རི། །མགུལ་དུ་སྔགས་འཆང་ཚེ་དབང་ནོར་བུ་ཡི། །མདུན་དུ་རང་གཟུགས་ཅི་བཞིན་བསྟན་ནས་ཀྱང་། །སྲོག་སྙིང་མདངས་གསོལ་མངོན་སུམ་ཕུལ་ནས་ནི། །ཁས་བླངས་དམ་བཅའ་གཉན་པོ་ཇི་བཞིན་དུ། །སྤྱན་འདྲེན་གནས་འདིར་སྐད་ཅིག་མྱུར་དུ་བྱོན། །དགྱེས་བཞུགས་འདོད་ཡོན་མཆོད་སྤྲིན་ནམ་མཁའ་མཛོད། །བྱིན་གྱིས་བརླབས་པ་འཛད་མེད་ཕྱི་ནང་གསང་། །དཀར་མངར་ཤ་ཁྲག་བསང་གསུར་སྨན་རཀ་གཏོར། །གཡག་བྱ་ར་ལུག་གཟུགས་འགྲོས་ལ་སོགས་པ། །འབུལ་བཞེས་བདག་གི་བསམ་དོན་ཡིད་བཞིན་དུ། །འགྲུབ་ཅིང་སྦས་ཡུལ་འདི་རུ་གསན་པ་ཡི། །སྐྱེ་འགྲོར་བདེ་སྐྱིད་ཆར་ཆུ་དུས་སུ་འབེབས། །ལོ་ལེགས་ནོང་འཕེལ་འཁྲུག་རྩོད་མི་བདེ་མེད། །ཁྱད་པར་གསང་སྔགས་བསྟན་པ་ནུབ་མེད་རྒྱས། །སེམས་ཅན་ཀུན་ཀྱང་བདེ་དགའ་ལ་སྤྱོད་ཅིང་། །ཕྱི་རོལ་མཐའ་དམག་སོགས་དང་བདུད་ཀྱིས་བྱིན། །བརླབས་པའི་གང་ཟག་གནས་འདིར་མི་བཏང་ཞིང་། །སངས་རྒྱས་བསྟན་པ་དར་གནས་ཕྲིན་ལས་མཛོད། །
ཞེས་བྲག་སྐད་ཤིང་ལོའི་ཚལ་གྱི་སྒོ་བསྲུང་མགོན་ཐང་བདུད་ཀྱི་གསོལ་མཆོད་འདི་ནི་བསྐུལ་བའི་ངོར་ལ་ཕྱོགས་ཀུན་དུ་རྒྱུ་ཞིང་མིང་ཡོངས་སུ་གྲགས་པ་ཚེ་དབང་ནོར་བུ་གྲགས་པ་རྡོ་རྗེས་སྣ་ཚོགས་དབྱིག་ཞེས་ཤིང་སྦྲུལ་ཟླ་བ་དང་པོ་རྒྱལ་ཉའི་ཚེས་བཅུ་གཉིས་ལ་སྦྱར། མ་ནུས་ཀོག་པོ་ཁ་རྒྱབ་ཕྱིར་ཐབས། མ་མཐོང་མཐོང་བརྫུ་མི་ཤེས་མཁས་འདོད་ནི་མ་ལགས་ཤིང་། ཨོ་རྒྱན་ཐུགས་རྗེར་བརྟེན་ནས་མཐོང་ཚུལ་བཞིན་དུ་བགྱིས་པ་ལགས། དགེའོ། །