ར་ཛ་གིང་ཀ་རའི་གསོལ་མཆོད།
ཧཱུྃ་བྷྱོཿ སྤང་ལྗོངས་ལྗོན་ཤིང་རབ་མཛེས་བྲག་རིས་དཀྲིགས། །རིན་ཆེན་ཁང་བཟང་གནྡྷོ་ལྷ་ཁང་མཛེས་པའི་དབུས། །ཤེལ་གིང་ཆེན་པོ་ར་ཛ་གིང་ཀ་ར། །དཀར་དམར་གཞོན་ནུ་གསེར་གྱི་ཧ་རི་ཡི། །ཆོས་གོས་གསོལ་ཞིང་དབུ་ལ་བསེ་ཞྭ་བགོས། །ཕྱག་ན་སྦ་ལྕགས་དར་བརྒྱན་ཤེལ་འཕྲེང་འདྲེན། །སྔོན་ན་ཕོ་ཉ་མང་པོ་འདུར་ཞིང་རྒྱུག །གཡས་གཡོན་སྤྲུལ་པའི་ལས་མཁན་མང་པོ་འགྱེད། །རྒྱབ་ན་འཁོར་གྱི་དམག་དཔུང་ཉི་ལི་ལི། །རྟ་དང་དྲེལ་གྱི་རྒྱུག་འདུར་བྲང་སེ་བྲང་། །རྒྱ་དར་ཇ་ཡི་ཁལ་འགལ་ཉི་ལི་ལི། །ཀུན་ཀྱང་སྔོན་གྱི་དམ་ཚིག་གཉན་དགོངས་ལ། །འདིར་གཤེགས་རིན་ཆེན་མཛེས་པའི་སྟན་ལ་བཞུགས། །ཕྱི་ནང་གསང་བའི་མཆོད་སྤྲིན་དཀར་དམར་གསུར། །སྨྱུག་རྒོད་མདའ་དར་མེ་ལོང་ཤུག་རྒྱལ་སོགས། །འབུལ་བཞེས་ཁྱོད་སྔོན་པདྨ་ཐོད་ཕྲེང་དང་། །རིག་གྲུབ་གཏེར་སྟོན་རྣམས་ཀྱི་སྤྱན་སྔ་རུ། །ཁས་བླངས་དམ་དང་མ་འགལ་བདག་གྲོགས་མཛོད། །དེ་དུས་རི་བོ་བྱ་ཁྱུང་ལྡེམ་མགུལ་དུ། །སྔགས་འཆང་ཚེ་དབང་དཔལ་གྱི་ནོར་བུ་ཉིད། །འོད་གསལ་ངང་དུ་མཉམ་པར་བཞག་པའི་དྲུང་། །དྲོད་ཉུལ་སློང་ཚད་ཆོ་འཕྲུལ་ཆེར་བསྟན་ཚེ། །པདྨ་ཁྲག་འཐུང་ཁྲོས་པའི་ཏིང་འཛིན་གྱིས། །གཟེར་ནས་དམ་བཞག་སྲོག་གི་སྙིང་པོ་ཕུལ། །ཆོས་རྒྱུད་འཛིན་བསྟན་བསྲུང་བར་ཁས་བླངས་ཏེ། །དམ་ལ་མ་འདའ་རིག་འཛིན་བདག་ཅག་གི །འཁོར་བསྲུང་རྐྱེན་བཟློག་བར་ཆད་མཐའ་དག་སོལ། །ཆོས་སྐྱོང་སྣ་འདྲེན་མཛོད་ལ་སྡང་དགྲ་ཐུལ། །བཅོལ་བའི་འཕྲིན་ལས་ཐོགས་མེད་གྲུབ་པར་མཛོད། །ཏྲི་ར་ཛཿཨི་དཾ་བྷ་ལིནྟ་ཁཱ་ཧི།
ཞེས་པ་དཔལ་བེའུ་ལུང་དུ་གྲ་འཁོར་རྣམས་ནད་ཀྱིས་གཟིར་ཞིང་རང་ཡང་སེམས་རྒྱུད་འཁྲུག་ཚེ་གཟར་གཅུན་གྱི་གདོན་གང་ཡིན་ངོས་བཟུང་བས་ཚེས་ལྔའི་ཐོ་རངས་ལ་གིང་པ་རྣམས་རང་གཟུགས་བསྟན་ཏེ་སྲོག་གི་སྙིང་པོ་ཕུལ་ནས་ན་ར་ཀན་གྱི་བྲོ་བོར་ནས་ཅུང་ཟད་མཆོད་སྦྱིན་བྱས་པས་དགེ་བར་མཐོང་ནས་ཚེ་དབང་ནོར་བུས་སྦྱར་བ་ལགས། དགེའོ། །