རིགས་མཚུན་ལྷ་བསྲུངས་གཉན་པོ་རྡོ་རྗེ་བྲག་བཙན་གྱི་གསོལ་མཆོད་འདོད་དོན་ལྷུན་གྲུབ།
༄༅། །རིགས་མཚུན་ལྷ་བསྲུངས་གཉན་པོ་རྡོ་རྗེ་བྲག་བཙན་གྱི་གསོལ་མཆོད་འདོད་དོན་ལྷུན་གྲུབ་ཅེས་བྱ་བ་བཞུགས་སོ། །
༈ ཨོཾ་ན་མཿཤྲཱི་ཧེ་རུ་ཀ་ཡ་མནྟ་ཀ་ཙ་ར་ཎ་ཡ། གང་ཞིག་མུན་པའི་གླིང་གི་སྐྱེས་གཅིག་པུ་རྡོ་རྗེ་བྲག་བཙན་ཡབ་ཡུམ་སྲས་བཅས་མཆོད་པར་འདོད་པས་གཙང་ཞིང་ཡིད་དང་མཐུན་པའི་གནས་སུ་མཆོད་པའི་ཡོ་བྱད་ཤ་ཁྲག་གི་གཏོར་མ་ཛ་གད་བསང་གསུར་རོལ་མོ་ཚང་བར་བྱས་ཤིང་རང་ཉིད་འཇིགས་བྱེད་གཤིན་རྗེ་གཤེད་ལྟ་བུ་ལྷག་པའི་ལྷ་ཡི་ང་རྒྱལ་བསྐྱེད་ལ། ཧཱུྃ། རབ་འབྱམས་རྒྱལ་ཀུན་འདུས་པའི་ངོ་བོ་ཉིད། །བསྐལ་བཟང་སངས་རྒྱས་སྟོང་གི་འབྱུང་གནས་ཆེ། །རྡོ་རྗེ་ཁྲག་འཐུང་པདྨ་ཐོད་འཕྲེང་གིས། །བྱིན་རླབས་ནུས་པའི་མཐུ་བྱིན་དུས་འདིར་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཧེ་རུ་ཀ་དཔལ་ཡོངས་ཀྱི་འཁོར་ལོས་བསྒྱུར། །འཇིགས་བྱེད་ཁྲོ་བོ་ཀུན་གྱི་སྤྱི་དཔལ་མཆོག །བཅོམ་ལྡན་དཔལ་ཆེན་ཡ་མནྟ་ཀ་ཡི། །དྲེགས་པའི་གཉེན་པོ་སྟོབས་ཀྱི་དངོས་གྲུབ་སྩོལ། །ཨྱེ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། དེ་ནས་འདིར་ཡབ་ཡུམ་སྲས་གསུམ་འཇིག་རྟེན་གྱི་དྲེགས་པ་རང་རྒྱུད་ཀྱི་ཚུལ་དུ་མཆོད་པ་ན་མདུན་དུ་སྐད་ཅིག་ཙམ་གྱིས་བྱོན་པར་བསམ་སྟེ་རྔ་དང་རྐང་གླིང་བཤུགས་པའི་སྒྲས་གཟི་བྱིན་བསྐྱེད་ལ་སྤྱན་འདྲེན་ནི། ཧཱུྃ་ཛཿབྷྱོ་ཡ༔དཔལ་ཆེན་འཁོར་ལོ་བདེ་མཆོག་དཀྱིལ་འཁོར་དུ། རྡོ་རྗེ་དཔའ་བོ་དཔའ་མོ་ཧེ་རུ་ཀ །གདུལ་བྱའི་དོན་དུ་རྒྱལ་བསྟན་བསྲུང་བའི་ཕྱིར། །དུར་ཁྲོད་བསིལ་བའི་ཚལ་དང་སོ་ཤའི་གླིང་། །ཁྱད་པར་གཤིན་དོང་ས་འོག་མུན་གླིང་ན། །བཅོམ་ལྡན་ཡ་མནྟ་ཀའི་བཀའ་སྟོད་ཚུལ། །ལས་དང་ཚེ་ལ་དབང་བསྒྱུར་དྲག་ཤུལ་ཅན། །འཆི་བདག་མུན་པའི་སྐྱེས་གཅིག་ཡབ་ཡུམ་སྲས། །དམ་ལྡན་བདག་གི་གདུང་བས་སྤྱན་འདྲེན་ན། །སྔོན་ཚེ་དཔལ་གྱི་སྤྱན་སྔར་ཁས་བླངས་བཞིན། །རྣལ་འབྱོར་དམ་ལྡན་ཕྲིན་ལས་མཛད་པའི་ཕྱིར། །མ་ཐོགས་མྱུར་དུ་གནས་འདིར་གཤེགས་སུ་གསོལ། །ཛཿབྷྱོ༔ བོད་ཡུལ་དབུ་རུ་སྲིན་རིར་སྲིན་མགོན་ནག །ཡབ་ཡུམ་འཁོར་བཅས་དམ་ལ་ད་ཚུར་བྱོན། །དྲ་བ་བློ་ཡུལ་སྤྲིན་འཛིན་ཀློ་བཙན་ནག །ཡབ་ཡུམ་འཁོར་བཅས་དམ་ལ་ད་ཚུར་བྱོན། །ཀོང་ཡུལ་རྒྱ་ལར་དོང་བདག་བཤན་པ་ཆེ། །ཡབ་ཡུམ་འཁོར་བཅས་དམ་ལ་ད་ཚུར་བྱོན། །ཀུ་ལུང་དགའ་ཚལ་རྔ་སྒྲར་བདུད་ཀྱི་མགོན། །ཡབ་ཡུམ་འཁོར་བཅས་དམ་ལ་ད་ཚུར་བྱོན། །ལྗོན་ཀླུང་བྲག་སྐེར་རྡོ་རྗེ་བྲག་བཙན་ཞེས། །ཡབ་ཡུམ༴ སྟག་ཚང་ཞིང་སྐྱོང་དབང་ཕྱུག་དགྲ་འདུལ་ཆེ། །ཡབ་ཡུམ་འཁོར་བཅས༴ ཚ་བ་བན་རི་སྒྲོ་བྲག་ལྷ་བཙན་དཀར། །ཡབ་ཡུམ་འཁོར་བཅས་དམ་ལ༴ བཙོན་རྒོད་རི་བཀྲ་རྡོ་རྗེ་དབང་དྲག་རྩལ། །ཡབ་ཡུམ་འཁོར་བཅས་༴ གཞན་ཡང་འཕྲུལ་ལྡན་སྐྱེས་བུ་ཆེན་པོ་ཁྱོད། །རྒྱ་གར་དུར་ཁྲོད་གནས་ཡུལ་ཆེན་པོ་དང་། །བོད་ཡུལ་དབུས་གཙང་གཙུག་ལག་སྒྲུབ་གནས་ཆེ། །གངས་ར་རྫོང་ཆེན་སྦས་ཡུལ་ལྗོངས་ལ་སོགས། །གང་དུ་བཞུགས་ཀྱང་འཇམ་དཔལ་གཤིན་རྗེ་དང་། །པདྨ་དབང་ཆེན་གསང་བདག་རྡོ་རྗེ་འཛིན། །པདྨ་ཐོད་འཕྲེང་སྤྱན་སྔར་དམ་བཅས་བཞིན། །དམ་ཚིག་ཅན་གྱི་གྲོགས་དཔལ་མགོན་བྱེད་སླད། །རྣལ་འབྱོར་གདུང་བའི་སེམས་ཀྱིས་འབོད་ལགས་ན། །མ་ཐོགས་མྱུར་བར་སྐད་ཅིག་ཡིད་མགྱོགས་ལྟར། །ཚུར་བྱོན་ཚུར་བྱོན་མུན་པའི་སྐྱེས་གཅིག་པུ། །ཡབ་ཡུམ་འཁོར་བཅས་གནས་འདིར་ད་ཚུར་བྱོན། །དགྱེས་པས་པད་ཉི་བམ་རོའི་གདན་ལ་བཞུགས། །དམ་ཚིག་གཉེན་པོ་བསྲུང་ཕྱིར་ཕྱག་ཀྱང་འཚལ། །ཁྱོད་མཆོད་ཕྱི་ནང་གསང་བ་ཀུན་བཟང་སྤྲིན། །བླ་མེད་རོལ་པ་སྦྱོར་སྒྲོལ་རྨད་བྱུང་རྫས། །དངོས་འབྱོར་ཡིད་སྤྲུལ་འཛད་མེད་ནམ་མཁའི་མཛོད། །འབུལ་ལོ་དགྱེས་བཞེས་འདོད་དོན་འཕྲིན་ལས་མཛོད། །མེ་ཏོག་བདུག་སྤོས་ལ་སོགས་ཉེར་སྤྱོད་རྫས། །གཟུགས་སྒྲ་དྲི་རོ་རེག་ཆོས་འདོད་ཡོན་ཚོགས། །སྨན་གཏོར་རཀྟ་ཤ་ཆང་བསངས་གསུར་དང་། །ཤུག་གླུ་རྐང་གླིང་རྔ་རོལ་རྔམ་སྙན་སྒྲ། །འབུལ་འདི་བཞེས་ལ་སངས་རྒྱས་བསྟན་པ་བསྲུང་། །བདག་ཅག་དམ་ལྡན་འཕྲིན་ལས་ཐོགས་མེད་མཛོད། །ཁྱད་པར་དམར་གཏོར་དགྲ་བོའི་རུ་པ་ནི། །གཟས་པོའི་དབང་པོ་དོན་སྙིང་སྲོག་དབུགས་མདངས། །བླ་ཚེ་སྲོག་ཏུ་དམིགས་ནས་འབུལ་བཞེས་རོལ། །བརྣག་པའི་དགྲ་བོ་ལོ་ཟླར་མ་འགྱངས་སྒྲོལ། །ཡ་མ་རཱ་ཛ་མུན་ཏི་ཁྲག་རྒལ་མུན་རྩེ་ས་མ་ཡ་ཛ་ཛཿ ཨེ་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། རཀྟ་པི་པ་ཧོ། སརྦ་ཤ་ཏྲུཾ་མ་རཱ་ཡ་ཙིཏྟ་ཁཱ་ཧི། ཧཱུྃ་བྷྱོ་ཡ། མུན་པའི་གླིང་གི་སྐྱེས་ཤིག་ཡ་མཚན་ཆེ། །ལྷ་ཅིག་མཚན་མང་རྣམ་འགྱུར་དུ་མའི་སྐུ། །ཁྱོད་ཀྱི་ཡབ་ནི་རལ་པ་ཚར་དགུ་སྟེ། །མཐིང་ནག་ཕྱག་གཉིས་ཁྲི་ཤིང་སྦྲུལ་ཞགས་བསྣམས། །ལྕགས་རལ་ཚར་དགུ་ཞལ་ནས་དུག་རླངས་ཐུལ། །དུག་སྦྲུལ་ལ་ཞོན་གཤིན་རྗེ་འབུམ་གྱིས་བསྐོར། །འདིར་གཤེགས་དམ་རྫས་གཏོར་མ་འདི་བཞེས་ལ། །སྡང་བྱེད་དགྲ་བོ་ལོ་ཟླར་མ་འགྱངས་སྒྲོལ། །སྐྱེས་མཆོག་ཡུམ་ནི་སྲིན་མི་སྭ་བདར་མ། །མཐིང་ནག་ཕྱག་གཉིས་རལ་གྲི་སྦྲུལ་ཞགས་གདེངས། །སྤྱི་གཙུག་གཡུ་རལ་ཞལ་ནས་ནད་རིམ་འཕྲོ། །སྟག་མོ་ལ་ཞོན་མ་མོ་འབུམ་གྱིས་བསྐོར། །འདིར་གཤེགས་དམ་རྫས་གཏོར་མ་འདི་བཞེས་ལ། །སྡང་བྱེད་དགྲ་བོ་ལོ་ཟླར་མ་འགྱངས་སྒྲོལ། །དྲེགས་པ་གཤིན་རྗེ་མ་མོ་འདུས་པའི་སྲས། །དོང་བདག་བཤན་པ་ལག་དམར་མུན་པ་སྐྱེས། །རྡོ་རྗེ་བྲག་བཙན་རྡོ་རྗེ་དབང་དྲག་རྩལ། །སྐུ་ནི་མུན་པ་དཔྲལ་སྤྱན་གཅིག་ཟླ་བ། །ཞལ་ན་ཚེམས་གཅིག་ཉི་མ་མེ་འོད་འབར། །ཕྱག་ན་སྤུ་གྲི་སྦྲུལ་གྱི་ཞགས་པ་བསྣམས། །ཆུ་གླང་དམར་ཞོན་འཁོར་དུ་སྲོག་བདག་འབུམ། །ལྷ་སྲིན་དྲེགས་པ་སྟོང་སྡེ་བརྒྱད་ཀྱིས་བསྐོར། །འདིར་གཤེགས་དམ་རྫས་གཏོར་མ་འདི་བཞེས་དང་། །སྡང་བྱེད་དགྲ་བོ་ལོ་ཟླར་མ་འགྱངས་སྒྲོལ། །ཁྱོད་ཡུམ་སྲིན་མོ་ནག་མོ་གྲི་ཐོད་ཅན། །སྲིན་མོ་འབུམ་བསྐོར་རླུང་ནག་འཚུབ་མར་རྒྱུ། །འདིར་གཤེགས་དམ་རྫས་གཏོར་མ་འདི་བཞེས་ལ། །སྡང་བྱེད་དགྲ་བོ་ལོ་ཟླར་མ་འགྱང་སྒྲོལ། །དེ་ལྟར་འཆི་བདག་ཡབ་ཡུམ་སྲས་འཁོར་བཅས། །མཐུ་རྩལ་རྨད་བྱུང་སྤྲུལ་པ་བསམ་མི་ཁྱབ། །སྐྱེས་མཆོག་རྡོ་རྗེ་བྲག་བཙན་རྣམ་འགྱུར་ཡང་། །མ་ངེས་ཕྱི་ལྟར་ཡུལ་ལྷ་ཟོ་དོར་ཚུལ། །དུང་རྟ་ཤེལ་མི་མདུང་དར་ནོར་རྒྱལ་བསྣམས། །རིན་ཆེན་གོ་ལྡན་དྲེགས་བྱེད་སྟོང་སྡེས་བསྐོར། །ནང་ལྟར་བཙན་རྒོད་སྲིན་གཟུགས་དམག་ཆས་ཅན། །མཚོན་ཐོགས་རྟ་དམར་ལ་ཞོན་འདྲེ་དམག་བསྐོར། །གསང་བར་ལྷ་ཆེན་གནོད་སྦྱིན་དམར་ཚེར་སྐུ། །དར་དམར་ཐོད་བེར་ནོར་བུ་ལྕགས་ཀྱུ་བསྣམས། །ཞབས་ལ་བསེ་ལྷམ་སྟག་མོ་གྲུབ་མ་ཆིབས། །རང་འདྲའི་སྤྲུལ་དང་བཙུན་མོ་སྲས་བློན་བསྐོར། །རེ་འགའ་ཁྲོས་ཚེ་དྲེའུ་རྟ་རྐང་གསུམ་ཆིམས། །མི་རྒོད་ལྤགས་གསོལ་སྦྲུལ་གྱི་ཐོད་གདེངས་ཅན། །ཀླུ་བདུད་འབུམ་སྐོར་སྡང་དགྲ་རྩད་ནས་གཅོད། །དེ་ལྟར་ཕྱི་ནང་གསང་བའི་སྤྲུལ་ཚོགས་རྣམས། །འདིར་གཤེགས་དམ་རྫས་གཏོར་མ་འདི་བཞེས་ལ། །སྡང་བྱེད་དགྲ་བོ་ལོ་ཟླར་མ་འགྱངས་སྒྲོལ། །ཧཱུྃ་བྷྱོཿ མུན་པའི་སྐྱེས་བུ་ཕྱག་བརྙན་རྡོ་རྗེ་ལེགས། །སྙིང་སྡུག་བརྟེན་མ་བཀའ་འཁོར་དགེ་བསྙེན་དང་། །ལས་བྱེད་རོལ་པ་སྐྱ་བདུན་གདོང་དམར་མ། །སྡེ་དཔུང་བཀའ་ཉན་བྲན་གཡོག་ཡང་འཁོར་བཅས། །འདིར་གཤེགས་དམ་རྫས་གཏོར་མ་འདི་བཞེས་ལ། །སྡང་བྱེད་དགྲ་བོ་ལོ་ཟླར་མ་འགྱངས་སྒྲོལ། །ཧཱུྃ་བྷྱོཿ དེ་ལྟར་དམ་ཅན་ཡབ་ཡུམ་སྲས་འཁོར་ལ། །མཆོད་ཅིང་བསྟོད་ནས་འཕྲིན་ལས་བཅོལ་བ་ནི། །པདྨ་ཐོད་འཕྲེང་རྗེས་འབྲང་རིག་འཛིན་གྱིས། །རིགས་རྒྱུད་རྒྱལ་བསྟན་འཛིན་སྐྱོངས་སྤེལ་ནུས་པ། །ཆེ་བཙན་གྲགས་ལྡན་རྒྱུན་མི་ཆད་པ་དང། །སློབ་རྒྱུད་མཁས་བཙུན་བཟང་པོ་འབའ་ཞིག་པས། །ཡུལ་དབུས་མཐའ་ཁོབ་ཀུན་ཏུ་འཕེལ་ཞིང་རྒྱས། །བདག་ཅག་དཔོན་སློབ་མོས་མཐུན་འཁོར་བཅས་ཀྱིས། །ཡིད་ལ་བསམ་པའི་འདོད་དོན་ལྷུན་འགྲུབ་པར། །མི་མཐུན་འགལ་རྐྱེན་བར་ཆད་ཀུན་ཞི་ཞིང་། །མཐུན་རྐྱེན་ཚེ་བསོད་དཔལ་འབྱོར་མངའ་ཐང་སོགས། །ཡར་སྐྱེད་སྙན་པའི་དུང་བསུས་གྲགས་པ་ཡིས། །བ་དན་སྲིད་རྩེར་འཕྱོར་ལ་ལྷ་འདྲེ་མི། །ཆེ་བཙན་དྲེགས་ཚོགས་མོས་བཞི་དབང་དུ་བསྡུས། །བདག་ཅག་སྡེ་རིགས་དམ་ལྡན་འཁོར་བཅས་ལ། །མངོན་གྱུར་སྦྱོར་རྩུབ་ལྐོག་གྱུར་བསམ་ངན་མཁན། །སྡང་ཞིང་གདུག་པར་བྱེད་པའི་དགྲ་བོ་རྣམས། །ལོ་དང་ཟླ་བར་མ་འགྱངས་ཞག་ཟ་མར། །ཚེ་སྟུང་སྲོག་ཆོད་སྙིང་ཕྱུང་ཐོད་པ་འབྲོགས། །ཀླད་པ་སྙིང་ཁྲག་བསྲེལ་ལ་ལྗིབ་ལྗིབ་གསོལ། །བསད་རྟགས་དོན་སྙིང་ད་ལྟ་ཁྱེར་ལ་ཤོག །གསོལ་ཡང་མི་གསན་བཅོལ་ཀྱང་མི་མཛད་ན། །དམ་ཅན་དྲེགས་པ་བརྟེན་པས་ཅི་ཞིག་བྱ། །བློ་བུར་ཧུར་ཐུམ་དགྲ་སྲོག་མི་གཅོད་ན། །མཐུ་རྩལ་ནུས་པ་ཆེ་ཞེས་སུ་ལ་ངོམ། །ལངྐའི་སྲིན་ཀྱང་གུས་པས་མཆོད་བསྟོད་པས། །ཕ་མ་ལྟར་བྱམས་བཅོལ་བའི་ལས་ཀྱང་མཛད། །ལྷ་ཁྱོད་རྗེ་བཙུན་བླ་མའི་འཇིག་རྟེན་གྱི། །རིགས་རུས་བསྐྱེད་བྱེད་ཆོ་བཙུན་ཡིན་ཞེས་དང་། །ཡུལ་གྱི་ལྷ་དང་རིག་འཛིན་རྒྱུད་བསྲུང་ཞེས། །མཆོད་བསྟོད་རྟག་ཏུ་དུང་བས་མངའ་གསོལ་ན། །རྣལ་འབྱོར་བདག་གི་འཕྲིན་ལས་ཅིས་མི་མཛད། །མ་ཡེལ་མ་ཡེལ་འཆི་བདག་ཡབ་ཡུམ་སྲས། །སྔོན་ཚེ་དཔལ་ཆེན་ཁྲག་འཐུང་སྤྱན་སྔ་རུ། །ཁས་བླངས་དམ་ལྡན་ཇི་བཞིན་སྒྲུབ་པ་པོ། །བཅོལ་བའི་འཕྲིན་ལས་ཐོགས་མེད་འགྲུབ་པར་མཛོད། །
ཅེས་པ་འདི་ཡང་དབེན་གནས་གཉན་གྱི་བསྲུང་མར་ཞེན་པའི་དོན་གཉེར་འགའ་ཡིས་བསྐུལ་བ་དང་། རང་རེའི་རིགས་རུས་བསྐྱེད་བྱེད་ཆོ་མཚུན་གྱི་ངོ་བོ་ཡིན་ཞེས་ཀྱང་ཐོས་པ་ལ་བརྟེན་ནས་གསོལ་མཆོད་རྒྱུན་ཁྱེར་གྱི་ཚུལ་དུ་རྐོང་ཡུལ་གྱི་མཐིལ་དུར་ཁྲོད་པདྨ་རྩེགས་པ་དང་མཚུངས་པ་ཆུ་བོ་གཡས་འཁྱིལ་གྱི་སྒྲུབ་སྡེ་གཙང་པོ་མགོ་དགུར་ཆུ་ཕག་ས་ག་ཟླ་བའི་དམར་ཕྱོགས་ཀྱི་རྒྱལ་བ་གསུམ་པའི་ཐུན་བར་གཅིག་ཏུ་དཔལ་རིག་པ་འཛིན་པ་ཚེ་དབང་ནོར་བུས་བརྗོད་པ་བཀྲ་ཤིས་དགེ་ལེགས་ཀྱི་རྒྱུར་གྱུར་ཅིག སརྦ་མངྒ་ལཾ།