དཔལ་རྡོ་རྗེ་སེམས་དཔའི་སྒྲུབ་ཐབས་རྒྱུན་ཁྱེར་སྙིང་པོ་དོན་ཡོངས་སུ་གྲུབ་པ།
༄༅། །དཔལ་རྡོ་རྗེ་སེམས་དཔའི་སྒྲུབ་ཐབས་རྒྱུན་ཁྱེར་སྙིང་པོ་དོན་ཡོངས་སུ་གྲུབ་པ་ཞེས་བྱ་བ་བཞུགས་སོ། །
༈ ཨོཾ་སྭཱསྟི། ཀྱེ་མ། དལ་འབྱོར་རིན་ཆེན་འདི་ནི་རྙེད་པར་དཀའ། །ནམ་འཆི་ཆ་མེད་སྙིང་ནས་དྲན་བྱས་ཤིང་། །ཁམས་གསུམ་འཁོར་བའི་སྡུག་བསྔལ་རྒྱ་མཚོ་ལས། །སྒྲོལ་བའི་གྲུ་ལ་འབད་པས་འཇུག་རེ་རན། ། ༡ ཇི་སྲིད་སྙིང་པོ་བྱང་ཆུབ་བར། །སངས་རྒྱས་ལ་ནི་བདག་སྐྱབས་མཆི། །དམ་པའི་ཆོས་ལ་བདག་སྐྱབས་མཆི། །དགེ་འདུན་ལ་ཡང་མི་ཕྱེད་དད། ། ༢ བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། ། ༣ དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་བའི། །སྐུ་གསུང་ཐུགས་ཀྱི་བྱིན་གྱིས་བརླབ་ཏུ་གསོལ། ། ༤ ཨོ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ། ཆོས་ཀུན་གདོད་ནས་མ་དམིགས་སྟོང་པའི་ངང་། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །མ་རྟོགས་འགྲོ་ལ་ཚད་མེད་སྙིང་རྗེ་ཡིས། །རང་གཟུགས་ཀུན་གཞི་གནས་འགྱུར་ཟླ་བའི་དལ། ། ༥ ཉོན་ཡིད་དག་པ་གཞོམ་མེད་ཡི་གེ་ཧཱུྃ། །ཡིད་ཤེས་དག་པ་བདེ་ཆེན་རྡོ་རྗེའི་གཟུགས། །གསུམ་ལས་འོད་ཀྱི་དོན་གཉིས་ལྷུན་གྲུབ་འདུས། །ཡོངས་གྱུར་ལྔ་བདག་ཡེ་ཤེས་རྫོགས་པའི་སྐུ། ། ༦ རྡོ་རྗེ་སེམས་དཔའི་ཆེས་ཆེར་དཀར་བའི་མདངས། །ཟླ་བ་འབུམ་གྱིས་མཚོན་མིན་མཚན་དཔེ་རྫོགས། །རྡོ་རྗེའི་སྲོག་ཞུ་རྒྱན་བརྒྱད་ཆས་ལྔས་ཀླུབས། །རྡོ་རྗེ་དྲིལ་བསྙེན་ཚུལ་དགུ་དཔལ་དུ་འབར། ། ༧ པད་ཟླར་རྡོར་སྐྱིལ་རང་འོད་ཡུམ་ལ་འཁྱུད། །ཟླ་བའི་རྒྱབ་ཡོལ་འོད་ཟེར་མུ་མེད་འཕྲོ། །གནས་གསུམ་འབྲུ་གསུམ་རྡོ་རྗེ་གསུམ་དུ་མཚོན། །མགོ་བོར་དང་པོའི་སངས་རྒྱས་ཡབ་ཡུམ་བཞུགས། ། ༨ གནས་གསུམ་འོད་ཀྱི་ཡི་དམ་དཀྱིལ་འཁོར་ལྷ། །ལུས་མེད་མ་ལུས་མི་ལུས་བདག་ལ་བསྟིམ། །དེ་བཞིན་རྩ་བ་ཡན་ལག་བླ་མ་ལ། །སྤྱན་དྲངས་གདོད་མའི་མགོན་དང་གཉིས་སུ་མེད། ། ༩ སྙིང་ཀར་པདྨ་ལ་གནས་ཟླ་བའི་དལ། །རྡོ་རྗེའི་མཚན་པ་བྱང་ཆུབ་སེམས་ཉིད་མཚོན། །རྡོ་རྗེའི་ལྟེ་བར་ཆོས་དབྱིངས་ཡེ་ཤེས་ཧཱུྃ། །ཕྱི་རིམ་ཨོཾ་དང་བཛྲ་ས་ཏྭས་བསྐོར། ། ༡༠ ཨོཾ་བཛྲ་སཏྭ་ཧཱུྃ། བདག་དང་བླ་མས་ཡིག་དྲུག་རྡོ་རྗེའི་སྒྲ། །བཟླས་པས་བླ་མ་ཡི་དམ་ཀུན་གྱིས་བཟླས། །ལྷན་ཅིག་ལུས་ནང་སྲིན་བུ་སྐྲ་བ་སྤུ། །ཀུན་ལས་ཡི་གེ་དྲུག་པའི་སྔགས་སྒྲ་བྱུང་། ། ༡༡ རྒྱུད་ལྔ་འབྱུང་གཞི་མཁའ་ཁྱབ་རྒྱལ་བ་ཡང་། །བདག་དང་ལྷན་ཅིག་གསང་སྔགས་རྒྱལ་པོ་སྒྲོགས། །ཐུན་ཐར་སྣང་ཀུན་སྐུའི་རྡོ་རྗེར་གྱུར། །དེ་ཡང་གཞོམ་མེད་གསུང་གི་རྡོ་རྗེ་ཆོས། ། ༡༢ དེ་ཡང་འགྱུར་མེད་ཐུགས་ཀྱི་རྡོ་རྗེ་སེམས། །དེ་ཡང་ཆོས་དབྱིངས་ཡེ་ཤེས་ངོ་བོར་འདུས། །སྤྱི་བོའི་བླ་མ་ཀུན་བཟང་རང་ལ་ཐིམ། །རང་ཉིད་ཟླ་དལ་དེ་ཡང་རྡོ་རྗེ་དང་། ། ༡༣ དེ་ཨོཾ་ལུགས་འབྱུང་མཐའ་རུ་ཧཱུྃ་ལ་འདུས། །ཧཱུྃ་ཉིད་ཐིག་ལེ་ནཱ་དའི་བར་དུ་གཞིལ། །རྣམ་རྟོག་གསུམ་བྲལ་ཆོས་ཉིད་གཉུག་མའི་ངང་། །ཅི་གནས་བཞག་ཐར་ཧཱུྃ་གི་རང་སྒྲ་ཡིས། ། ༡༤ སླར་ཡང་དཔལ་ལྡན་རྡོ་རྗེ་སེམས་དཔའ་ཡི། །དཀྱིལ་འཁོར་འཁོར་ལོའི་རང་བཞིན་ལྷུན་གྱིས་གྲུབ། །སྣང་གྲགས་རིག་གསུམ་རྡོ་རྗེ་གསུམ་གྱི་དངོས། །གདོད་ནས་ཡིན་བཞིན་རྟག་པར་ལམ་དུ་ཁྱེར། ། ༡༥ དེ་ལྟར་བླ་མ་རྡོ་རྗེ་སེམས། །བསྐྱེད་བཟླས་རྫོགས་པར་ཞུགས་པའི་དགེ་བ་ཀུན། །མཁའ་མཉམ་སེམས་ཅན་ཡོངས་ལ་བསྔོ་བའི་མཐུས། །ཀུན་གྱི་རྡོ་རྗེ་སེམས་འབྲས་འགྲུབ་པར་ཤོག ། ༡༦ དུས་གསུམ་གཤེགས་པའི་རྒྱལ་བ་ཐམས་ཅད་ཀྱི། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བསོད་ནམས་འདི་ཡི་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆིའི་རྦ་རླབས་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །
ཞེས་རྡོ་རྗེ་སེམས་དཔའི་སྒྲུབ་ཐབས་ཉམས་ལེན་ཁྱེར་བདེ་སྙིང་པོར་བྱས་པ་འདི་ཡང་དོན་ཡོངས་སུ་གྲུབ་པ་དཔལ་ཀཾ་ཚང་གི་རིང་ལུགས་པ་ཆེན་པོ་རྒྱལ་ཚབ་བདུན་པའི་ཁྲི་ལ་བཞུགས་པ་གོ་ཤྲི་དཀོན་མཆོག་འོད་ཟེར་གྱི་གསུང་གིས་བསྐུལ་བའི་ངོར། རབ་མྱོས་ལྕགས་རྟ་སྨིན་དྲུག་ཟླ་བའི་དཀར་ཕྱོགས་ཀྱི་རྒྱལ་བ་དང་པོ་ལ་དཔལ་རིག་པ་འཛིན་པ་ཚེ་དབང་ནོར་བུས་གཉལ་སྨད་དགེ་རིར་བརྗོད་པ་དགེའོ། །དགེའོ། །སརྦ་མངྒ་ལཾ།