སྒྲོལ་མ་དམར་མོའི་ཁྱད་པར་བའི་དབང་སྐུར་སྣང་སྲིད་དབང་སྡུད།
༄༅། །སྒྲོལ་དམར་བེ་བུམ། ༈ སྒྲོལ་མ་དམར་མོའི་ཁྱད་པར་བའི་དབང་སྐུར་སྣང་སྲིད་དབང་སྡུད་བཞུགས་སོཿ
ན་མ་ཏཱ་རཿ སྔོན་འགྲོའི་ཆོས་ཀྱིས་རྒྱུད་སྨིན་ཞིངཿ དངོས་གཞིའི་བསྙེན་སྒྲུབ་དྲོད་ཐོབ་པཿ བླ་མ་གུས་པས་ལོ་གསུམ་བསྙེནཿ སྐལ་བ་ཅན་གྱི་སྐྱེས་བུ་ལཿ ཁྱད་དབང་བྱིན་སྐུར་བྱ་བ་ལཿ བྱིན་དབབ་རྫས་མཆོག་དཀར་དམར་གཙོཿ སྐུ་རྟེན་འམ་ནི་གཏོར་མ་དངཿ གསུང་རྟེན་བྷནྡྷ་ཐུགས་མེ་ལོང་ཿ ཚོགས་རྫས་མཎྜལ་ཅི་ཚོགས་བྱཿ སྐུར་གནས་དབེན་ཞིང་ཉམས་དགའ་བརཿ སྒོ་ཆོད་རྣམ་པ་གསུམ་དུ་བྱཿ སྒོ་སྲུང་དཔའ་བོ་གིང་ཕོ་བསྐོསཿ དཔོན་སློབ་ཆབ་ཅིག་སྔོན་གཏོར་བཏངཿ ཉམས་ཆགས་གསོ་ཕྱིར་ཡིག་བརྒྱར་འབདཿ བུམ་པ་བསྒྲུབ་ཅིང་བགེགས་ཚོགས་བསལཿ རྩ་བའི་འགུགས་སྔགས་འབུམ་ཕྲག་དང་ཿ དབབ་སྔགས་འབུམ་ཀྱིས་སྣོད་བཅུད་བརླབསཿ དཔོན་སློབ་ཐམས་ཅད་བསམ་གཏན་བྱཿ དེ་ནས་སློབ་མས་གསོལ་བ་ནིཿ ཀྱེ་དཔའ་བོ་རྣལ་འབྱོར་ཀུན་ཀྱི་རྗེཿ བླ་མ་འཇིག་རྟེན་གསུམ་རྒྱལ་མཿ མ་རུང་བློ་འདི་དབང་སྡུད་ཕྱིརཿ དཀྱིལ་འཁོར་ཆེན་པོར་འཇུག་པར་འཚལཿ ལན་གསུམ་གསོལ་བས་བླ་མ་ཡིསཿ བུ་ཁྱོད་གཞན་ཕན་སེམས་བརྟན་པསཿ དེ་ལྟ་ཉིད་དུ་བདག་གིས་སྦྱིནཿ བཀའ་གནང་སྦྱིན་ཞིང་བདུད་རྩི་བླུདཿ དེ་ནས་སློབ་མ་བདེ་བ་ཡིཿ འདུག་སྟངས་གང་རུང་བྱེད་བཅུག་ལཿ སློབ་མའི་གསང་བར་ཏཱཾ་ཞིག་བསྒོམཿ བླ་མ་རྒྱལ་བ་སྲས་དང་བཅསཿ འོད་ཞུ་ཏཱཾཿདེ་རང་ལ་ཐིམཿ ཏཱཾ་ཡིག་བདེ་བས་ཞུ་བ་ལསཿ དབང་གི་སྒྲོལ་མ་དམར་མོར་གྱུརཿ དབུ་མའི་ནང་ནས་སྤྱི་བོར་འཕུརཿ སླར་བབས་གསང་བའི་ནང་ནས་རྩེཿ སླར་ཡང་མཐིལ་བཞི་སོ་སོར་སོངཿ འོད་ལྔ་འཕྲོས་པས་ལུས་གང་བསམཿ གསང་བའི་ཡེ་ཤེས་དབབས་རྫས་བདུགཿ ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་བ་ལོ་ཀ་ཨ་ཀརྵ་ཤ་ཧྲཱིཾ་ཛཿ ནྲྀ་ཨངྒུ་ཤ་ཡ་ཧཱུཾ་ཛཿ མཿཧཿརིཿནིཿསཿརཿཙཿཧྲཱིཿཡཿཙིཏྟ་ཧྲཱིཾཿཧྲཱིཾཿཛ་ཛཿ ཨ་ཝེ་ཤ་ཡ་ཕེཾ་ཕེཾཿ དབབས་པའི་སྔགས་དང་རོལ་མོ་དཀྲོལཿ སྟེང་འོག་རླུང་གཉིས་ཡང་བསྲེ་བཅུགཿ རྗེས་སུ་མགོ་བོར་རྡོ་རྗེ་བཞགཿ རྩ་སྔགས་མཐར་ཛྙཱ་ན་ས་ཏྭ་ཏིཥྛ་བཛྲཿབརྟན་པའི་སྔགས་བརྗོད་མེ་ཏོག་འཐོརཿ ༧དེ་ནས་སྐུ་རུ་བྱིན་རླབས་ནི། སྐུ་རྟེན་འམ་གཏོར་མ་མགོ་ལ་བཞགཿ རྩ་བའི་སྔགས་ཀྱིས་རིགས་ལྔ་དྲངསཿ དབང་བསྐུར་ལུས་ཉིད་ལྷ་རུ་གྱུརཿ ཆུ་ལྷག་ཡར་ལུད་འོད་དཔག་མེདཿ རིགས་ཀྱི་བདག་པོར་རྒྱས་གདབ་བྱཿ རྩ་བའི་སྔགས་ལ་བཛྲ་ཨ་བྷི་ཏིཥྛ་ཧཱུཾཿ དབབ་པའི་སྔགས་ཡང་ཅི་མང་བཟླཿ ༧དེ་ནས་གསུང་དུ་བྱིན་རླབས་པཿ བླ་མ་རྒྱལ་བ་སྲས་བཅས་ཀྱིཿ ཐུགས་སྔགས་སློབ་མའི་ཁ་རུ་ཞུགསཿ ལྟེ་བར་སླེབས་མོས་འོག་རླུང་འཐེནཿ སྲས་བཅས་རྒྱལ་བའི་སྦྱོར་མཚམས་ནསཿའོད་དང་བདུད་རྩི་གཅིག་ཏུ་འདྲེསཿ ཁར་ཞུགས་ལས་ལ་ཁྱབ་བ་དང་ཿ བདེ་བའི་དོན་ལ་མཉམ་པར་བཞགཿ རྩ་བའི་སྔགས་ལ་བྷོ་དྷི་ཙིཏྟ་མ་ཧཱ་སུ་ཁ་ཨ་བྷི་ཥིཉྩ་ཧཱུཾཿ དང་འབྲེལ་དབབ་སྔགས་བདེ་བ་འཆར་བར་བཟླཿ ༧དེ་ནས་ཐུགས་ཀྱི་བྱིན་རླབས་དབངཿ ལྟེ་བར་གཏུམ་མོ་བསྒོམ་པ་འབརཿ ལུས་ཀྱི་ནང་ཁེངས་སྤྱི་བོ་ཡིཿ འོད་དཔག་མེད་པ་ཧཾ་དཀར་དུཿ གྱུར་ཞུ་འཁོར་ལོ་བཞི་རིམ་གང་ཿ དགའ་བ་བཞི་བོ་ངོས་བཟུང་ལཿ མེ་ལོང་གཟུགས་བརྙན་བསྟན་མ་ཐགཿ སྣང་སྲིད་མེ་ལོང་གཟུགས་བརྙན་བཞིནཿ རང་ཤར་རང་སྟོང་འཛིན་པ་བྲལཿ ལུས་ཀྱང་མི་དམིགས་འོད་དུ་ཞུཿ བདེ་དང་སྟོང་བ་གཉིས་མེད་པཿ སྟོང་བཞིའི་འོད་གསལ་ངང་ལ་བཞགཿ མཉམ་པར་བཞག་ཅིང་བླ་མ་ཡིསཿ ཕཊཿབརྗོད་གནས་ལུགས་རང་ངོ་སྤྲདཿ ལྡང་ཚེ་རྩ་སྔགས་དབྱངས་གྱེར་བསཿ འཕགས་མའི་སྐུ་རུ་ལམ་ལམ་ཤརཿ འདི་ལྟར་དམ་ཚིག་བརྗོད་པར་བྱཿ བུད་མེད་མཐོང་ཚད་ཕྱིའི་མཁའ་འགྲོཿ རྩ་ཁམས་ནང་གི་མཁའ་འགྲོ་མཿ བྱང་སེམས་གསང་བའི་མཁའ་འགྲོ་མཿ སེམས་ཉིད་དོན་གྱི་མཁའ་འགྲོ་ཡིནཿ ཤེས་པར་གྱིས་ཤིག་སྙིང་གི་བུཿ རྡོ་རྗེར་ཞེ་སྡང་བྱམས་གཉིས་མེདཿ རིན་ཆེན་ང་རྒྱལ་སེར་སྣ་འབྲེལཿ པདྨར་འདོད་ཆགས་གཉིས་སྦྱོར་བརྟེནཿ ཀརྨར་ཕྲག་དོག་རྩུབ་སྤྱོད་གཉེརཿ ལོ་ཀར་ཚོགས་དང་གཏོར་མས་བསྐངཿ འཇིག་འདས་ཤ་ལྔ་བདུད་རྩིར་སྤྱོདཿ ཀུན་ལ་བླ་མའི་དམ་ཚིག་དངཿ མཆེད་གྲོགས་དམ་ཚིག་འབྲལ་མི་བྱཿ གསང་བར་འོས་པ་སྨྲ་མི་བྱཿ བསྒྲགས་ན་ཉེ་འདིར་གདོན་གྱིས་གཙེསཿ ཕྱི་མ་དམྱལ་བར་ཐེ་ཚོམ་མེདཿ ཚུལ་བཞིན་སྒྲུབ་ན་མཁའ་འགྲོ་མསཿ གཅེས་ཕྲུག་ཉིད་དེ་སྲུང་མས་བཀུརཿ བར་ཆད་ཞི་ཞིང་ཚེ་དཔལ་རྒྱསཿ འགྲོ་བ་གསུམ་པོ་དབང་དུ་བྱེདཿ མཆོག་དང་ཐུན་མོང་དངོས་གྲུབ་ཐོབཿ བདུད་བཞི་བཅད་ནས་སྐུ་བཞི་ཐོབཿ མདོ་ན་རྒྱུད་ལས་གང་གསུང་པའིཿ སྒྲོལ་མའི་བྱིན་རླབས་མྱུར་ཐོབ་འགྱུརཿ བྱིན་རླབས་ནང་ནས་ཁྱད་པར་བཿ དབང་གི་ནང་ནས་དབང་མཆོག་ཏེཿ འཕགས་མའི་ཆོས་ཀྱི་སྙིང་པོ་ཉིདཿ ཐོབ་པ་ཡིན་ནོ་དགའ་བར་གྱིསཿ བརྗོད་རྗེས་སློབ་མས་མཎྜལ་ཕུལཿ དཔོན་སློབ་དགའ་སྟོན་ཚོགས་ལ་རོལཿ ཟངས་ཤོག་དམར་པོ་ལས་བྱུང་བའིཿ ཆོས་རྒྱལ་སྤྲུལ་བའི་ཆོས་ཀྱི་སྐལཿ མི་དབང་ཆེན་པོའི་ཐུགས་དམ་གཙོཿ རིག་འཛིན་ཚེ་དབང་ནོར་བས་ཕབཿ རྒྱ་རྒྱ་རྒྱཿ གསང་བ་གསུམ་གྱིས་རྒྱས་བཏབ་པསཿ ཆོས་འཛིན་སྐལ་ལྡན་རེ་གཉིས་ལསཿ འཁྱལ་ན་ཉམས་པར་གྱུར་ཏ་རེཿ གཟའ་བདུད་དུག་གི་སྤུ་གྲིས་སྲུངསཿ གཉེར་མཛོད་བཛྲ་ས་མཱ་ཡཿ ཨྠྀི རྫོགས་སོཿ
༄༅། །སྒྲོལ་མའི་ལས་ཚོགས་འདིར་དང་པོ་དབང་དྲག་གིས་ཀྱིས་འགུགས་ཤིང་འདྲེན་པ་དང༌། དེ་ནས་ཞི་རྒྱས་གཉིས་ཀྱི་གསོ་བའི་ཕྱིར་ལས་བཞི་གོ་བལྡོག་ནས་ལས་རེ་ལ་ལྔ་ཚན་ལྔ་རེར་དབྱེས་ཤིང་རྩ་བའི་ལས་གཞུང་དང་ཆིང་བརྒྱད་བསྡོམ་པས་སྡེ་ཚན་བརྒྱ་དང་བརྒྱད་བཞུགས། དཔེར་ན། དབང་ལ་ཡུལ་སེམས་དབང་སྡུད་ཐབས་ལྔ། སྡེ་བརྒྱད་འགུགས་པའི་ཐབས་ལྔ། ཆེ་དགུ་འགུགས་པའི་ཐབས་ལྔ། སྤྱི་ལ་བཅེས་པའི་ཐབས་ལྔ། དྭངས་བཅུད་འགུགས་པའི་ཐབས་ལྔ་དང། དྲག་པོ་ལ། ཕྱི་དགྲ་འདུལ་བའི་ཐབས་ལྔ། འབྱུང་བ་འདུལ་བའི་ཐབས་ལྔ། ཉོན་མོངས་གསོད་པའི་ཐབས་ལྔ། ཞི་བ་ལ། སེམས་མ་རུང་བ་ཞི་བའི་ཐབས་ལྔ། སྡིག་པ་སྦྱང་བའི་ཐབས་ལྔ། ཉོན་མོངས་ཞི་བའི་ཐབས་ལྔ། ནད་ཞི་བའི་ཐབས་ལྔ། ཉེ་བར་འཚེ་བ་ཞི་བའི་ཐབས་ལྔ། རྒྱས་པ་ལ། ཤེས་རབ་རྒྱས་པའི་ཐབས་ལྔ། བསྟན་པ་རྒྱས་པའི་ཐབས་ལྔ། འདོད་ཡོན་རྒྱས་པའི་ཐབས་ལྔ། ཁམས་རྒྱས་པའི་ཐབས་ལྔ། ཡོན་ཏན་རྒྱས་པའི་ཐབས་ལྔ་སོགས་ཀྱི་དབྱེ་བསྡུ་ཡང་བཞུགས་མོད། མཐའ་གཅིག་ཏུ་ཆོ་ཀའི་ངོ་བོ་ནས་དེ་ལྟར་འབྱེད་དཀའ་བས་བཤད་སྒྲོས་ཏེ་ངག་རྒྱུན་ཡིག་ཐོག་ཏུ་བཀོད་པ་ཞིག་གོ། དཔའ་བོའི་ཕྱག་དཔེ་དང་སྟག་བླའི་ཕྱག་དཔེ་གཉིས་ལ་དབྱེ་ཚུལ་ཁྱད་པར་མི་མཚུངས་ཞིང་། དེ་བཞིན་མང་ཉུང་ཡང་ཅུང་ཟད་མཆིས་སོ། །